လါယူၤလံ ၁၆သီ, ၂၀၂၆နံၣ်, ခ့ၣ်အဲးစံၣ်
“ကညီဒီကလုၥ်ဂၢၤသးကရၢ”ခိၣ်နၢ်, သိၣ်ဒူကိးဂၤ ဃုၥ်ဒီး ကညီကလုၥ်ထံဖိကီၢ်ဖိခဲလၢၥ် ကပၥ်လီၤသးလၢမ့ၢ်ပှၤ တကလုၥ် လၢအအိၣ်ဒီး တၢ်သဘျ့, ပူၤဖျဲးဒီး တၢ်ဆီၣ်တံၢ်မၤနၢၤအဂ့ၢ် (KNU) ကရၢခိၣ်ပဒိၣ်စီၤကွဲၤထူဝ့ ဆီၣ်သခူ ထီၣ်ဝဲဒၣ်ဖဲ တနံၤအံၤ လါယူၤလံ (၁၆)သီအနံၤ လၢအလီၤဘၣ်ဝဲ(၇၉)နံၣ်ပှဲၤထီၣ် “ကညီဒီကလုၥ်ဂၢၤသးကရၢ” (KNDO)မုၢ်နံၤ လံၥ်ဟ့ၣ်ယုၢ်အပူၤန့ၣ်လီၤ.
“ကညီဒီကလုၥ်ဂၢၤသးကရၢ”(KNDO)အံၤမ့ၢ်ကညီဖီၣ်စုကဝဲၤကရၢ အဆိကတၢၢ်တဖုလၢ အနုၥ် လီၤ တၢ်ဒုးလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အတၢ်တီခိၣ်ရိၣ်မဲအဖီလၥ်န့ၣ်လီၤ.
တၢ်ကရၢကရိဒုးအိၣ်ထီၣ်တ့ၢ်ဝဲကရူၢ်ကရၢအံၤ လၢတၢ်ကဒီတဒၢဒီး ဂၢၤလီၤက့ၤပသးအဂီၢ်အသိး တၢ်မၤလၢပှဲၤ မူဒါ ကန့ၢ်အဂီၢ် ခိၣ်နၢ်ပှၤဘၣ်မူဘၣ်ဒါတဖၣ် ပှၤအဲၣ်တၢ်ပၢၢ်ဆၢဖိတဖၣ်, (KNDO)ခိၣ်နၢ်သိၣ်ဒူ ကိးဂၤဃုၥ်ဒီး ကညီကလုၥ် ထံဖိကီၢ်ဖိခဲလၢၥ် ကအိၣ်ဒီးတၢ်တူၢ်ခီၣ်ပၥ်သးလၢ ပမ့ၢ်ပှၤတကလုၥ်လၢအိၣ်ဒီးတၢ်သဘျ့ ပူၤဖျဲးဒီး တၢ်ဆီၣ်တံၢ်မၤနၢၤ အိၣ်မူလဲၤထီၣ်လဲၤထီလၢ သနၢၣ်ကိးသနၢၣ်ဒဲးလၢ ကီၢ်တဘ့ၣ်အံၤအပူၤအဂ့ၢ် (KNU)ကရၢခိၣ် ပဒိၣ်စီၤကွဲၤထူဝ့ ဆီၣ်သခူ ပၥ်ဖျါဝဲန့ၣ်လီၤ.
လၢန့ၣ်အမဲၥ်ညါ, ဒ်တၢ်မုၢ်လၢ်ဂဲၤလိၥ်ဝဲလၢ ကသူၣ်ထီၣ် ကညီကီၢ်, ကီၢ်သူလ့ၤလၢအအိၣ်ဒီး တၢ်အုၣ်ကီၤ သးလၢ ကညီကလုၥ်အတၢ်အိၣ်စံၥ်အိၣ်ကျၢၤ, တၢ်မုၥ်တၢ်ခုၣ် ဒီးတၢ်စံၣ်ညီပၢလီၤက့ၤထံရုၢ်ကီၣ်သဲးဘူၣ်တီၢ်ဒၣ်ဝဲ ဒီး သူၣ်ထီၣ် ဖဲၣ်ဒရၢၣ်ဒံၣ်မိၣ်ကရ့ၣ်စံၣ်ကီၢ်စၢဖှိၣ်အသိးန့ၣ်, တၢ်ခွဲးတၢ်ယၥ်အိၣ်ဝဲလၢပှဲၤလၢ တၢ်ကဘၣ်ဂၢၤက့ၤ ပသး ဒီတဒၢ ခီဆၢ တၢ်အၢတၢ်သီလၢ ကဟဲဘၣ်ပပှၤကလုၥ်ထံဖိကီၢ်ဖိအဂ့ၢ် ပၥ်ဖျါဝဲစ့ၢ်ကီးန့ၣ်လီၤ.
တကးဒံးဘၣ်,ကတီၢ်ခဲအံၤ ခီဖျိပတၢ်ပညိၣ်ကွၢ်စိတဖၣ်တလၢပှဲၤထီၣ်ဒံးဘၣ် အဃိ ကဘၣ်အိၣ်ဒီးတၢ်သးခူတလ့ၢ် ဂဲၤလိၥ် မၤသကိးဃူဃူ ဒူဒူ တုၤတၢ်လၢထီၣ်ပှဲၤထီၣ်တစုအဂ့ၢ် ဆီၣ်သခူ စံးစ့ၢ်ကီးဝဲန့ၣ်လီၤ.
တၢ်မၤလၢပှဲၤထီၣ် ကညီဒီကလုၥ်ထံရုၢ်ကီၢ်သဲး တၢ်မိၢ်န့ၣ်သးလီအဂီၢ် (KNU ) ကညီဒီကလုၥ်စၢဖှိၣ်ကရၢခိၣ်နၢ်တဖၣ် ထံၣ်စိဝဲဒၣ်လၢ တၢ်ဖ့ၣ်ဆၢအိၣ်ထီၣ်တုၤဝဲလၢ စုကဝဲၤတၢ်သဘံၣ်ဘုၣ်ပတီၢ်သ့ဝဲအဃိ လၢတၢ်ကဒီသဒၢလီၤက့ၤ ကညီ ကလုၥ်သးသမူ ဒီးတၢ်စုလီၢ်ခီၣ်ခိၣ်အဂီၢ် ကရၢကရိဒုးအိၣ်ထီၣ်တ့ၢ်ဝဲ “ကညီဒီကလုၥ်ဂၢၤသးကရၢ”(KNDO)အံၤဖဲ (၁၉၄၇) နံၣ် လါယူၤလံ (၁၆)သီအနံၤအဂ့ၢ် သ့ၣ်ညါဘၣ်န့ၣ်လီၤ.
တၢ်ပၢၢ်ဆၢဒီတကတီၢ်အပူၤ“ကညီဒီကလုၥ်ဂၢၤသးကရၢ”အံၤ ဟံးန့ၢ်ဝဲမူဒါလၢဒုးယၤဂ့ၢ်ဝီ, တၢ်ဘံၣ်တၢ်ဘၢဂ့ၢ်ဝီဒီး သဲစးတၢ်ဒိၣ်စိဂ့ၢ်ဝီလၢ သနၢၣ်အါမံၤဒီး မ့ၢ်ဝဲ (KNU)ဂံၢ်ခီၣ်ထံးတၢ်ဂံၢ်တၢ်ဘါခိၣ်သ့ၣ်တဖုအမဲၥ်ညါ မ့ၢ်စ့ၢ်ကီးဝဲ ကရၢတဖုလၢ အအိၣ်ဖျဲၣ်ထီၣ်န့ၢ်ဝဲကဒီးဝဲ ကညီသုးမုၢ်ဒိၣ်, ကညီပှၤဖီၣ်တၢ်စုကဝဲၤကရၢလၢအဂၤ တဖၣ်အဂ့ၢ်, လံၥ်ဟ့ၣ်ယုၢ်အပူၤ ဘိးဘၣ်ပၥ် ဖျါဝဲ န့ၣ်လီၤ.
ဒ်န့ၣ်အသိး, (၇၉)နံၣ် တၢ်ဂဲၤလိၥ်အပူၤ ကညီဒီကလုၥ်ဂၢၤသးကရၢခိၣ်နၢ်ဒီး သုးမုၢ်သံၣ်ဘိတဖၣ် အိၣ်ဒီးတၢ်တူၢ်ဆါခီၣ် ဆါသး, တၢ်သးစွံကတုၤ အဃိမ့ၢ်တၢ်သးခုဒီး အလီၢ်အိၣ်ဝဲလၢ ကဘၣ်ပၥ်ကဖၢလၢပသး လၢပအိၣ်ဒီးဂၢၤသးကရၢ လၢအလုၢ်ဒိၣ်ပှ့ၤဒိၣ်ဒ်အံၤအဂ့ၢ် (၇၉)ဝီတဝီပှဲၤထီၣ် (KNDO)မုၢ်နံၤအပူၤ ကညီပိၥ်မုၥ်ကရၢ(KWO) ပၥ်ဖျါလံၥ်ဟ့ၣ်ယုၢ်စ့ၢ်ကီး န့ၣ်လီၤ.
တကတီၢ်ဃီ, လၢတၢ်ဒီသဒၢ ပပှၤကလုၥ်အတၢ်အိၣ်မူခါဆူညါဒီး ကညီတၢ်ပၢၢ်ဆၢတၢ်မၤနၢၤအဂီၢ် ကရူၢ်ကရၢအံၤ ကဘၣ်ဒုးဖျိးကွံၥ်စ့ၢ်ကီးဝဲ တၢ်သူမုၢ်ကျိၤဝဲၤ ကွၥ်အသူ လၢတဖိးသဲစး တဖၣ်အဂ့ၢ် ဆီၣ်သခူဟ့ၣ်ဂံၢ် ဟ့ၣ်ဘါ ဝဲဒၣ်န့ၣ်လီၤ.
တကတီၢ်ဃီ, (၇၉)ဝီတဝီ “ကညီဒီကလုၥ်ဂၢၤသးကရၢ”မုၢ်နံၤအံၤ မုၢ်လၢ်ဒီးဆၢဂ့ၤဆၢဝါဝဲလၢ ကညီဒီကလုၥ်တၢ်ပၢၢ် ဆၢအတၢ်ပညိၣ် ကမၤနၢၤတၢ်အသိး ကရူၢ်ကရၢအံၤ “ကဆၢထၢၣ်သကိးဒီးကမျၢၢ် ကဂၢၤဃၥ်ဝဲ ကလုၥ်ဂ့ၢ်ဝီခွဲးယၥ် တၢ်တီတၢ်တြၢ် ဒီး ကျဲးစၢး သကိးလၢခါဆူညါဖဲၣ်ဒရၢၣ်အဂီၢ်” အဂ့ၢ် ခ့ၣ်အဲၣ်ယူၣ်လီၢ်ခၢၣ်သး ဆီၣ်သခူထီၣ်ဝဲဖဲမုၢ်နံၤဝဲအံၤအဆၢကတီၢ်န့ၣ်လီၤ.
