လါယူၤလံ ၂၈ သီ, ၂၀၂၆ နံၣ်, ခ့ၣ်အဲးစံၣ်
ကၠါဖၠၣ်တၢ်ဖံးတၢ်မၤလၢအိၣ်ကီၢ်ကၠီၣ်တဲၣ် မဲၢ်ဆီးဝ့ၢ်ဝၢ်ခီ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် ကၠီးခဲးဟီၣ်ကဝီၤ အပူၤအံၤ ဖဲတၢ်နုၥ်လီၤမၤဆှဲလဲတၢ်အခါ ဖီၣ်န့ၢ်ဝဲပှၤမၤတၢ်ဖိအဂၤ(၇၀၀)ဘျဲၣ်ဃုၥ်ဒီးတၢ်ဖိတၢ်လံၤပီးလီသ့ၣ်တဖၣ်အဂ့ၢ်န့ၣ် သုးမီၤစိရိၤထုးထီၣ်ပၥ်ဖျါဝဲန့ၣ်လီၤ.
ဒ်မုၢ်နံၤ ၂၇ သီ သုးကရူၢ်အလံၥ်တၢ်ပၥ်ဖျါပူၤအိၣ်ဝဲအသိးန့ၣ် ဖဲလါယူၤလံ ၂၅ သီအနံၤ လၢကၠီးခဲးကၠါဖၠၣ်တၢ်ဖံးတၢ်မၤလီၢ်အပူၤ ဖဲတၢ်နုၥ်လီၤမၤဆှဲလဲတၢ်အခါ ထံၣ်န့ၢ်ဝဲတၢ်သူၣ်ထီၣ် ၈ ဖျၢၣ် အဂ့ၢ်န့ၣ် စံးဝဲန့ၣ်လီၤ.
ဒီးဖဲတၢ်နုၥ်လီၤဆှဲလဲတၢ်အခါ ဖီၣ်န့ၢ်ဝဲကၠါဖၠၣ်ပှၤမၤတၢ်ဖိ(၇၇၇)ဂၤဒီး ပှၤသ့ၣ်တဖၣ်အံၤမ့ၢ်ဝဲတရူးထံဖိကီၢ်ဖိ ပိၥ်ခွါ(၆၂၀)ဂၤ, ပိၥ်မုၣ်(၁၁)ဂၤဒီး ကၠီၣ်တဲၣ်ထံဖိကီၢ်ဖိ(၃)ဂၤ, ပှၤကီၢ်ပယီၤဖိ ပိၥ်မုၣ်(၁၁၁)ဂၤ, ပိၥ်ခွါ(၃၂)ဂၤ အဂ့ၢ်န့ၣ် သုးမီၤစိရိၤအလံၥ်တၢ်ပၥ်ဖျါ အပူၤ ပၥ်ဖျါဝဲန့ၣ်လီၤ.
တကးဒံးဘၣ်တၢ်ဖီၣ်န့ၢ်ဝဲကၠါဖၠၣ်ပှၤမၤတၢ်ဖိအဂၤ(၇၀၀)ဘျဲၣ်အမဲၥ်ညါ မၤန့ၢ်ဃုၥ်ဝဲ ခီၣ်ဖၠူထၢၣ်(၈၅)ဖျၢၣ်, လီတဲစိ(၁၈၃)ဖျၢၣ်, ကျိ(၉)ခိၣ်ဃုၥ်ဒီးအချံအသၣ်,စတါလံၣ်တၢ်ဖိတၢ်လံၤပီးလၢအဂၤသ့ၣ်တဖၣ်အဂ့ၢ်န့ၣ် သုးမီၤစိရိၤစံးဝဲန့ၣ်လီၤ.
ကၠီးခဲးဟီၣ်ကဝီၤလၢအမ့ၢ်ဝဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တၢ်ပၢဟီၣ်ကဝီၤအံၤ တချုးလၢ သုးကရူၢ်နုၥ်လီၤ မၤဆှဲလဲတၢ်ဒ်အံၤအိၣ်ထီၣ်ဒံးဘၣ် စးထီၣ်ဖဲလါယူၤလံထီၣ် ၃ နွံတနွံအခါန့ၣ် ကၠါဖၠၣ်ပှၤမၤတၢ်ဖိ လၢအိၣ်ဖဲန့ၣ်သ့ၣ်တဖၣ် သုးလီၢ် သုးကျဲဆူ ဆိၣ်စံမၠဲၣ်ဟီၣ်ကဝီၤပူၤဝံၤဖဲန့ၣ်တဆီသုးကဒီးအလီၢ်ဆူဃိၣ်သၢဖျၢၣ်တကပၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဒ်န့ၣ်အသိးတချုးတၢ်ကဲထီၣ်သးအံၤဒံးဘၣ် ဖဲလါယူၤလံထီၣ်သုးကရူၢ်မၤဝဲတၢ်တၢၣ်ပီၣ်တဲသကိးတၢ်မုၥ်တၢ်ခုၣ်အခါ လၢတဘၣ် မၤထွဲလိၥ်သးဒီးကၠါဖၠၣ်တၢ်ဖံးတၢ်မၤအံၤဘၣ်အဂ့ၢ်န့ၣ် သုးမီၤစိရိၤဟ့ၣ်ပလီၢ်ဒံးဝဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ် (DKBA) ကရူၢ်လၢအတၢ်ဘၣ်ဘျးစဲအိၣ်ဝဲဒီးတၢ်ဖံးတၢ်မၤအံၤန့ၣ်လီၤ.
