လါအီကူၥ် ၁၂သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တးကီၢ်ရ့ၣ်မဲၢ်ဆီးဝ့ၢ်ဟီၣ်ကဝီၤ ခီကီၢ်ကွဲၢ်ကဘီကညီတီၤထီကၠိအပူၤ တနံၤအံၤ လါအီကူၥ်(၁၂)သီ အနံၤအပူၤ တၢ်မၤလၤကပီၤဝဲ ကညီလါခူးကံၢ်စု, ကညီမၤရၤမုၢ်နံၤဒီး ကၠီၣ်တဲၣ်မိၢ်မုၢ်နံၤတဖၣ်အဂ့ၢ် သ့ၣ်ညါဘၣ်န့ၣ်လီၤ.
တၢ်မၤဝဲ ကညီဒီကလုၥ်အမုၢ်နံၤဒိၣ်မုၢ်နံၤထီဒီး ကၠီၣ်တဲၣ်မုၢ်နံၤဒိၣ်တဖၣ်အတၢ်ရဲၣ်တၢ်ကျဲၤလၢ ကၠိကရၢၢ်အပူၤအံၤ အတၢ်ပညိၣ်မ့ၢ်ဝဲဒ်သိး ကၠိဖိသူၣ်ဘီၣ်သးစၢ်တဖၣ် ကသ့ၣ်ညါလီၤက့ၤပၢၤလီၤက့ၤလုၢ်လၢ်ထူသနူဒီး သ့ၣ်ညါမၤလၤကပီၤက့ၤ ခိၣ်နၢ်ဒိၣ်ထီ တဖၣ်အဂ့ၢ်, ကၠိခိၣ် မါကၠီၣ်ချ့စူ စံးဝဲဒ်အံၤန့ၣ်လီၤ.
“ပတၢ်ပညိၣ်ဒုမ့ၢ်ဒ်သိးဖိဒံဖိသၣ်တဖၣ် ကသ့ၣ်ညါနၢ်ပၢၢ်မၤထွဲက့ၤအလုၢ်လၢ်ထူသနူတၢ်ဆဲးတၢ်လၤဒီးပၥ်ဒိၣ်ပၥ်ကဲ မၤလၤကပီၤက့ၤအခိၣ်နၢ်မၤထူရၤလၢဟ့ၣ်လီၤကွံၥ်အသးလၢကလုၥ်ဂီၢ်သ့ၣ်တဖၣ်န့ၣ်လီၤ.ပမ့တအိၣ်ဒီးလံၥ်လဲၢ်ထူသနူ တၢ်ဆဲးတၢ်လၤဘၣ်န့ၣ် ပကိးလီၤပသးလၢ ကလုၥ်တကလုၥ် တသ့ဝဲဘၣ်အဃိ ဖိဒံဖိသၣ်သ့ၣ်တဖၣ်ကသ့ၣ်ညါနၢ်ပၢၢ် က့ၤဝဲအဂီၢ် ကိးနံၣ်ဒဲးပရဲၣ်ကျဲၤမၤယုၤဒီး ပဘၣ်ဟ့ၣ်ခီဟ့ၣ်လီၤက့ၤဝဲတၢ်သ့ၣ်တဖၣ်အံၤန့ၣ်လီၤ.”အဂ့ၢ် စံးဝဲဒၣ်န့ၣ်လီၤ.
လၢန့ၣ်အမဲၥ်ညါ, ဖိသၣ်ဒိၣ်ထီၣ်လၢခံတစိၤသ့ၣ်တဖၣ်အံၤ မ့ၢ်တသ့ၣ်ညါလီၤက့ၤလုၢ်လၢ်ထူသနူတၢ်ဆဲးတၢ်လၤဒီး အတၢ်စံၣ်စိၤတဲစိၤ အပှၤကလုၥ်ဂ့ၢ်ကျိၤဘၣ်န့ၣ် ကညီကလုၥ်အံၤကလီၤမၢ်ကွံၥ်ဝဲဒီး တၢ်လီၤဘၣ်ယိၣ်အိၣ်ဝဲလၢ ကကဲ ထီၣ်က့ၤကလုၥ်ဂၤ အဂ့ၢ် အဝဲစံးအါထီၣ်ဝဲဒၣ်န့ၣ်လီၤ.
တနံၤအံၤတၢ်ရဲၣ်တၢ်ကျဲၤအပူၤ ကၠိဖိတဖၣ်ပၥ်ဖျါထီၣ်ဝဲ တၢ်သူၣ်ဝံၣ်သးဆၢ, တၢ်ဂဲၤကလံၣ်ဒီး တၢ်ဖးဖျါထီၣ်ဝဲကညီလါ ခူးကံၢ်စုကဲထီၣ်အဂ့ၢ်အကျိၤ, တၢ်မၤဝဲတၢ်ကံၢ်စုကွဲကလၤ, တၢ်ပၥ်ဖျါထီၣ်ဝဲ ကညီမၤထူရၤအတၢ်စံၣ်စိၤ, ဟ့ၣ်တၢ်ယူး ယီၣ်ဆူပှၤဒူပှၤဃိၤမၤထူရၤလၢၢ်ထူၣ်အမဲၥ်ညါ, လၢတၢ်မၤလၤကပီၤဝဲ ကၠီၣ်တဲၣ်မိၢ်အမုၢ်နံၤဒီး တၢ်သ့ၣ်နီၣ်ထီၣ်က့ၤဝဲ မိၢ်နီၢ်ပၤမုၣ်အဂီၢ် တၢ်ဟ့ၣ်တၢ်ယူးယီၣ်ထီၣ်ဝဲတၢ်ယူးယီၣ်ဃုၥ်ဒီး တၢ်သူၣ်ဝံၣ်သးဆၢတဖၣ် န့ၣ်လီၤ.
ကၠိအတၢ်ရဲၣ်တၢ်ကျဲၤတဖၣ်အဖီခိၣ်, ကၠိဖိမိၢ်(နါစူၣ်စူၣ်ခ့ၤ)လၢ ဟဲထီၣ်ပၣ်ဃုၥ်ပၣ်ဂီၢ်တဂၤစံးဝဲဒၣ်လၢ “ဟဲထီၣ်ထံၣ်ဘၣ်ပှၤအါသးမုၥ်ဒိၣ်မးလီၤ.တၢ်ရဲၣ်တၢ်ကျဲၤ(၃)ခါအံၤဖိသၣ်တဖၣ်အဂီၢ်အရ့ဒိၣ်ကိးခါ အဃိ ပဘၣ်သူၣ် ဘၣ်သးခဲလၢၥ်လီၤ. လါခူးကံၢ်စုထူသနူတၢ်ဆဲးတၢ်လၤမ့ၢ်ဂ့ၤ, မၤထူရၤအဂ့ၢ်အကျိၤမ့ၢ်ဂ့ၤ မိၢ်မုၢ်နံၤမ့ၢ်ဂ့ၤ မ့ၢ်တၢ်လၢပဖိပ လံၤတဖၣ်ကြၢးသ့ၣ်ညါက့ၤဒီးပၢၤဃၥ်ဝဲဒၣ်န့ၣ်လီၤ.”အဂ့ၢ်စံးဝဲန့ၣ်လီၤ.
တကတီၢ်ဃီ, ခီဖျိကၠိမၤန့ၢ်ဝဲ တၢ်ရဲၣ်တၢ်ကျဲၤဒ်အံၤ အဃိသ့ၣ်ညါအါထီၣ်ဝဲ ကညီလုၢ်လၢ်ထူသနူတၢ်ဆဲးတၢ်လၤဒီး ကညီမၤထူရၤဂ့ၢ်ကျိၤ အဂ့ၢ်(၁၁)တီၤကၠိဖိ စီၤမူယူၣ်ဘီၤ စံးဝဲဒၣ်န့ၣ်လီၤ.
ဒ်ကၠိဖိတဂၤအသိး သးမုၥ်ဝဲလၢအိၣ်ဒီး မုၢ်နံၤဒိၣ်ထီၣ် ဒ်အံၤအဂ့ၢ် အဝဲစံးဝဲဒၣ်န့ၣ်လီၤ.
“သရၣ်တဖၣ်မၤန့ၢ်ပှၤဒ်အံၤ ယသးမုၥ်ဒိၣ်မး, ပအိၣ်လၢသဝီခါ ယတမၤဘၣ်မူးပွဲဒ်အံၤနီ ဘျီဘၣ်.မ့ဝံၤန့ၣ်,မုၢ်နံၤအဝဲအံၤ န့ၣ်မ့ၢ်ဝဲ မၤထူရၤမုၢ်နံၤဒီး မိၢ်မုၢ်နံၤန့ၣ် ယသ့ၣ်ညါဖဲ ပှၤမၤတၢ်ရဲၣ်တၢ်ကျဲၤအံၤလီၤ.အဃိတၢ်ရဲၣ်တၢ်ကျဲၤအံၤ ကိးနံၣ်ဒဲး အရ့ဒိၣ်ဝဲလၢ တၢ်ကမၤအီၤ ဒ်သိး သူၣ်စၢ်သးဘီၣ်ဒ်သိးပှၤတဖၣ် ကသ့ၣ်ညါအါထီၣ်ဝဲအဂီၢ်န့ၣ်လီၤ. ” အဂ့ၢ်စံးဝဲန့ၣ်လီၤ.
တနံၤအံၤတၢ်ရဲၣ်တၢ်ကျဲၤအပူၤ (KNU)ခိၣ်နၢ်လီၢ်လံၤ,ကၠီၣ်တဲၣ်ဒူသဝီခိၣ်နၢ်ခၢၣ်စး, ကၠိသရၣ်သရၣ်မုၣ်ဃုၥ်ဒီး ကၠိဖိ တဖၣ် ခဲလၢၥ်ပှၤကညီ(၁၀၀၀) ဃၣ်ဃၣ်ဟဲထီၣ်မၤလၤကပီၤသကိးဝဲအဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိး, ဒ်သိးတၢ်ရဲၣ်တၢ်ကျဲၤအံၤ လၢဟီၣ်ကဝီၤဒူသဝီခိၣ်နၢ်တဖၣ်အတၢ်ဟ့ၣ်ခွဲးဖီခိၣ် ကဲထီၣ်လိၥ်ထီၣ်ဝဲဒီး တၢ်ဆီၣ်ထွဲမၤစၢၤဒီးတၢ်လိၣ်ဘၣ်ကပၤကပၤအဂီၢ် တၢ်ဘူၣ်ကစၢ်,ကၠိဖိမိၢ်ပၢ် ကၠိသရၣ်သရၣ်မုၣ်ဒီး ကၠိဖိတဖၣ် ပၥ်ဖှိၣ်မၤသကိးဝဲတၢ်အဂ့ၢ်, ကၠိပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
