လါအီကူး ၁၇ သီ, ၂၀၂၆ နံၣ်, ခ့ၣ်အဲးစံၣ်
လၢတၢ်လူၤပိၥ်မၤထွဲသုးမုၢ်ဒိၣ်အတၢ်သိၣ်တၢ်သီတအိၣ်ဘၣ်တၢ်ဂ့ၢ်အံၤအဖီခိၣ် စးထီၣ်တနံၤအံၤဘၣ်တၢ်ဒုးအိၣ်ဘှံးဝဲ ဆၣ်ကပီၤ သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်ဖိ လၢမူဒါတၢ်မၤပူၤအဂ့ၢ်န့ၣ် ကီၢ်သူလ့ၤသုးမုၢ်ဒိၣ်(KTLA)ထုးထီၣ်ပၥ်ဖျါဝဲလံၥ်တၢ်နဲၣ်လီၤ တဘ့ၣ် ဖဲတနံၤအံၤ လါအီကူး ၁၇ သီ အံၤန့ၣ်လီၤ.
ဒ်(KTLA)အလံၥ်တၢ်နဲၣ်လီၤတၢ်ကလုၢ်ပူၤပၥ်ဖျါပူၤအသိးန့ၣ် ဆၣ်ကပီၤသုးရ့ၣ် သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်ဖိ အံၤ ခီဖျိ တဒိကနၣ်လူၤပိၥ်မၤထွဲသုးမုၢ်ဒိၣ်တၢ်သိၣ်တၢ်သီဒီးခိၣ်နၢ်အတၢ်ကလုၢ်တၢ်နဲၣ်လီၤဒ်တၢ်ဟ့ၣ်လီၤအီၤမူဒါအသိးဘၣ် မၤဖဲ အတၢ်ထံၣ် တၢ်ဆိကမိၣ်လဲၤက့ၤဝဲလၢအသးအဃိ ဒ်သိးခိၣ်နၢ်ပှၤဘၣ်မူဘၣ်ဒါဃုၥ်ဒီးဝဲၤကျိၤဝဲၤဒ့ဘၣ်ထွဲလၢအဂၤတဖၣ် ကသ့ၣ်ညါထွဲဝဲအဂီၢ် ဘၣ်တၢ်ထုးထီၣ်ပၥ်ဖျါဝဲလံၥ်တၢ်နဲၣ်လီၤဒ်အံၤလီၤအဂ့ၢ်န့ၣ် စံးဝဲန့ၣ်လီၤ.
လၢတၢ်န့ၣ်အဃိ KTLA ဆၣ်ကပီၤသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်ဖိ အံၤစးထီၣ်(၂၀၂၆)တနံၤအံၤလါအီကူး ၁၇ သီ တုၤဃီၤ လၢ(၂၀၂၇)လါအီကူး ၁၇ သီ တၢ်ကဒုးအိၣ်ဘှံးအီၤလၢမူဒါတၢ်ဖံးတၢ်မၤပူၤလၢတနံၣ်အတီၢ်ပူၤအဂ့ၢ်န့ၣ် ပၥ်ဖျါဝဲန့ၣ်လီၤ.
ဆၣ်ကပီၤသုးရ့ၣ်ခိၣ် စီၤအဲၣ်ဖိ လၢအဘၣ်တၢ်ဒုးအိၣ်ဘှံးအီၤလၢတၢ်ကရၢကရိမူဒါတၢ်ဖံးတၢ်မၤအပူၤအံၤ မ့ၢ်ဝဲဒၣ်သုးခိၣ်အဲၣ်ခွံ ဆၣ်ကဆီသုးတြိၤစုတီၤဖီလၥ်သုးရ့ၣ်တရ့ၣ်ဒီး သုးရ့ၣ်အံၤဟူးဂဲၤဝဲဒၣ်လၢ ဘျံးဒဝဲၢ်ကီၢ်ရ့ၣ်(သုးက့ ၄)ဒဝဲၢ်ခံဟီၣ်ကဝီၤပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
(KTLA)လၢအဘၣ်တၢ်တီခိၣ်ရိၣ်မဲအီၤလၢသုးခိၣ်စီၤနၢၤဒါအံၤ စးထီၣ်လၢတၢ်ထုးထီၣ်ကွံၥ်အီၤလၢခ့ၣ်အဲၣ်ယူၣ်တၢ်ကရၢကရိပူၤ အိၣ်ဆၢ ထၢၣ်က့ၤဝဲလီၤလီၤဆီဆီတုၤလၢခဲအံၤ လၢအတၢ်ကရၢကရိအပူၤ လၢတၢ်လူၤပိၥ်မၤထွဲခိၣ်နၢ်တၢ်ဖီခိၣ်တၢ်နဲၣ်လီၤ တၢ်သိၣ် တၢ်သီဘၣ်တအိၣ်ဘၣ်တၢ်ဂ့ၢ်အံၤအဖီခိၣ် ထံၣ်ဘၣ်လၢဒုးအိၣ်ဘှံးဒီးထုးထီၣ်ကွံၥ်ဝဲသုးခိၣ်သုးနၢ်,ပှၤသုးဖိသံၣ်ဖိလၢ တၢ်ကရၢကရိပူၤ အိၣ်ဝဲခဲအံၤခဲအံၤ န့ၣ်လီၤ.
ဒ်န့ၣ်အသိးအဘူးကတၢၢ်ဖဲတနံၣ်အံၤ(၂၀၂၆)လါမ့ၤအခါန့ၣ်စ့ၢ်ကီး ဆၣ်ကပီၤအသုးရ့ၣ်အပှၤ(၃၇)ဂၤလၢ အတဘၣ်သူၣ် ဘၣ်သးဝဲ သုးခိၣ်အဲၣ်ခွံအတၢ်ဖံးတၢ်မၤဘၣ်အံၤန့ၣ် ဟဲက့ၤပၥ်ဖှိၣ်မၤသကိးတၢ်ဒီး ခ့ၣ်အဲၣ်ယူၣ် ကညီဒီကလုၥ်တၢ်ထူၣ်ဖျဲး သုးမုၢ်ဒိၣ်(KNLA) သုးရ့ၣ်(၂၇)ကဲထီၣ်ဒံးဝဲဒၣ်န့ၣ်လီၤ.
ဒီးမ့ဘၣ်ကွၢ်ပှၤ(၃၇)ဂၤလၢဟဲက့ၤပၥ်ဖှိၣ်မၤသကိးတၢ်ဒီးသုးရ့ၣ်(၂၇)ဖဲန့ၣ်အခါန့ၣ် ပၣ်ဃုၥ်ဝဲသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်ဖိ အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤဒ်သိးကသ့ၣ်ညါဘၣ်တၢ်အိၣ်သးအံၤလီၤတံၢ်လီၤဆဲးအဂီၢ် ပခ့ၣ်အဲးစံၣ်-ကညီတၢ်ကစီၣ်ဆဲးကျိးဝဲ(KTLA) ပှၤဘၣ်မူ ဘၣ်ဒါဘၣ်ဆၣ် ဆဲးကျိးတန့ၢ်ဝဲဘၣ်န့ၣ်လီၤ.
