လါစဲးပထ့ဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ်
ဒ်သိးကရူၢ်ကရၢကိးဒူၣ်ဒဲးသူၣ်ဘီၣ်သးစၢ်တဖၣ်အတၢ်ဆဲးကျိးကဂ့ၤဒိၣ်ထီၣ်အဂီၢ်န့ၣ်ကညီသးစၢ်ကရၢ(KYO) လီၢ်ခၢၣ်သး တီခိၣ်ရိၣ်မဲမၤ၀ဲသးစၢ်တၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤတခါလၢအပၣ်ဃုာ်ကလုာ်ဒူၣ်သိၣ်မှံၤသးစၢ်တဖၣ်ဖဲ (ခ့ၣ်အဲၣ်ယူၣ်)တၢ်ပၢဟီၣ်က၀ီၤတၢ်လီၢ်တတီၤစးထီၣ်လါစဲးပထ့ဘၢၣ် ၄ သီတုၤလၢ ၅ သီ လၢခံသီအတီၢ်ပူၤ အဂ့ၢ်န့ၣ် သ့ၣ်ညါဘၣ်န့ၣ် လီၤႉ
သုးဟံးန့ၢ်တၢ်စိတၢ်ကမီၤ၀ံၤလီၢ်ခံသူၣ်ဘီၣ်သးစၢ်လၢအနုာ်လီၤပၣ်ဃုာ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤပူၤ လၢအဟဲအိၣ်ကဒုသးဖဲ(ခ့ၣ်အဲၣ်ယူၣ်)ဟီၣ်က၀ီၤပူၤတဖၣ်အံၤဒ်သိးအ၀ဲသ့ၣ်ကရူၢ်တဒူၣ်ဒီးတဒူၣ်အဘၢၣ်စၢၤ တၢ်ဆဲးကျိးကဂ့ၤဒိၣ်ထီၣ်အဂီၢ် ဘၣ်တၢ်မၤ၀ဲတၢ်ထံၣ်လိာ်အိၣ်သကိးဒ်အံၤလီၤအဂ့ၢ်န့ၣ် (KYO)နဲၣ်ရွဲၣ်သဃဲၤ–၂ စီၤအဲၣ်ထံကီၢ် စံး၀ဲဒ်အံၤန့ၣ် လီၤႉ
“သုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ်တၢ်လီၢ်ကိးတီၤဒဲးသူၣ်ဘီၣ်သးစၢ်လၢအနုာ်လီၤပၣ်ဃုာ်လၢတၢ်ထီဒါသုးမီၤစိရိၤတၢ်ဟူးတၢ်ဂဲၤပူၤတဖၣ်အါဒၣ်တက့ၢ်န့ၣ်အ၀ဲသ့ၣ်ဟဲအိၣ်ဖှိၣ်ဖဲအံၤႉသးစၢ်အဟဲအိၣ်ဖှိၣ်ဖဲအံၤတဖၣ်ဖဲအ၀ဲသ့ၣ်ဟဲအိၣ်ကဒုသးလၢ(ခ့ၣ်အဲၣ်ယူၣ်)ဟီၣ်က၀ီၤပူၤအကတီၢ်အံၤဒ်သိးအ၀ဲသ့ၣ်ကရူၢ်တဒူၣ်ဒီးတဒူၣ်အဘၢၣ်စၢၤတၢ်ရ့လိာ်သးကအိၣ်ႇတၢ်ပၢၢ်ဆၢအတီၢ်ပူၤအ၀ဲသ့ၣ်တၢ်ဆဲးကျိးလိာ်သးကဂ့ၤဒိၣ်ထီၣ်အဂီၢ်ဘၣ်တၢ်မၤ၀ဲတၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤအံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အဆိကတၢၢ်တနံၤဖဲတၢ်အိးထီၣ်တၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤမူးအပူၤန့ၣ် (ခ့ၣ်အဲၣ်ယူၣ်)ခိၣ်နၢ်ဒိၣ်ထီ တဖၣ်လၢ အမ့ၢ်ပဒိၣ်စီၤသမ့ၤထိႇ(ခ့ၣ်အဲၣ်ယူၣ်)နဲၣ်ရွဲၣ်ခိၣ်ကျၢၢ်သဃဲၤ–၂ ပဒိၣ်စီၤလၣ်ထိႇ (KYO)လီၢ်ခၢၣ်သး ၦၤပၢၤလီၢ်ဆ့ၣ်နီၤ စီၤလၢၢ်နၢၤ ဃုာ်ဒီး ခိၣ်နၢ်ဘၣ်ထွဲလၢအဂၤတကးဒံးဘၣ်အမဲာ်ညါ ယိၤဒိၣ်ႇကရ့ၣ်နံၣ်ႇ ရၢၣ်ခၢၣ်ဒီးပယီၤကလုာ်ဒူၣ် သးစၢ် ခဲလၢာ် အဂၤ(၈၀)ဃၣ်ဃၣ်ဟဲထီၣ်၀ဲဒၣ်န့ၣ်လီၤႉ
တၢ်ထံၣ်လိာ်အိၣ်သကိးလၢခံသီအတီၢ်ပူၤအံၤ(ခ့ၣ်အဲၣ်ယူၣ်)လီၢ်ခၢၣ်သးခိၣ်နၢ်တဖၣ်စံးကတိၤဟ့ၣ်ဂံၢ်ဟ့ၣ်ဘါလီၤ တၢ်ဒီးတၢ်ဆှဲပၠးလီၤဘၣ်ဃးတကီၢ်ခါထံရူၢ်ကီၢ်သဲးတၢ်အိၣ်သးႇတၢ်ဟူးတၢ်ဂဲၤတၢ်ဖံးတၢ်မၤတဖၣ်အသိး တၢ်တၢၣ်ပီၣ်တဲသကိးဟ့ၣ်ခီဟ့ၣ်နီၤဘၣ်ဃးသးစၢ်ဒီးတၢ်ပၢၤဃာ်ခိၣ်ဃၢၤန့ဆၢၣ်ဒီးႇသးစၢ်ကရူၢ်ကရၢအတၢ်ဟူး တၢ်ဂဲၤသ့ၣ်တဖၣ်န့ၣ်လီၤႉ
“သုးဟံးန့ၢ်တၢ်စိတၢ်ကမီၤ၀ံၤလီၢ်ခံကရူၢ်ကရၢလၢအဟဲအိၣ်ကဒုသးဖဲ(ခ့ၣ်အဲၣ်ယူၣ်)ဟီၣ်က၀ီၤပူၤအံၤအိၣ်ဒီဒူၣ်ညါလီၤႉတၢ်ဖံးတၢ်မၤႇတၢ်ထံၣ်တၢ်ဆိကမိၣ်လၢအတလီၤဂာ်လိာ်သးဘၣ်န့ၣ်အိၣ်ဒီဒူၣ်ညါႉပတၢ်ဆိကမိၣ်ပတၢ်ထံၣ်မ့တဒ်သိးလိာ်သး ဘၣ်ဘၣ်ဆၣ်ပတၢ်ပညိၣ်ဖီတၢၣ်န့ၣ်မ့ၢ်ဒၣ်ဒ်သိးသိးလီၤႉပတၢ်ပညိၣ်ဖီတၢၣ်ဒ်သိးႇပတၢ်ထံၣ်တၢ်ဆိမိၣ်မ့တဒ်သိးလိာ်သးဘၣ်န့ၣ်တဂၤဒီးတဂၤကဲထီၣ်တၢ်ဖုၣ်ထံၣ်ဖုၣ်ထီသ့မီၤနီၤႉဒ်လဲၣ်ဂ့ၤဒ်လဲၣ်ဂ့ၤလၢပ၀ဲကဒဲကဒဲအဘၢၣ်စၢၤတၢ်ဂ့ၢ်ကီသုတကဲထီၣ်တဂ့ၤအဂီၢ်န့ၣ်ယထံၣ်လၢပွဲတပွဲအံၤကကဲထီၣ်တၢ်တိစၢၤမၤစၢၤမီၤနီၤ”အဂ့ၢ်န့ၣ် (KYO)လီၢ်ခၢၣ်သး ပၢဆှၢတၢ်ကမံးတံာ် တၢ်ကရၢကရိဒီးတၢ်ဘိးဘၣ်ရၤလီၤမူဒါခိၣ် စီၤခၣ်စီၣ်၀့ စံး၀ဲန့ၣ်လီၤႉ
တၢ်ထံၣ်လိာ်အိၣ်သကိးဘျီ၀ဲအံၤအပူၤသိၣ်မှံၤကလုာ်ဒူၣ်သးစၢ်တဖၣ်စ့ၢ်ကီးတီၣ်ဖျါထီၣ်တၢၣ်ပီၣ်တဲသကိး အ၀ဲသ့ၣ် တၢ်ဖံးတၢ်မၤတၢ်ဟူးတၢ်ဂဲၤတဖၣ်တဒူၣ်စုာ်စုာ်ဒီးတၢ်လၢအ၀ဲသ့ၣ်ပာ်ဖှိၣ်မၤသကိး၀ဲသ့တဖၣ်စ့ၢ်ကီး တၢၣ်ပီၣ်တဲသကိး ဃုာ်၀ဲဒၣ်န့ၣ်လီၤႉ
ဒ်န့ၣ်အသိးတၢ်ထံၣ်လိာ်အိၣ်သကိးဒ်အံၤ အခီၣ်ထံးအဆိကတၢၢ်တဘျီဘၣ်တၢ်မၤတ့ၢ်အီၤဖဲအပူၤကွံာ် (၂၀၁၉) ကညီတၢ်ပၢဆၢမုၢ်နံၤၦဲၤထီၣ်(၇၀)၀ီတ၀ီ တၢ်ရဲၣ်တၢ်ကျဲၤမူးအခါန့ၣ်လီၤႉ
