လါအီကူၥ် ၂၄သီ, ၂၀၂၆နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တး(ခ်)ကီၢ်ရ့ၣ် အူးပၠၣ်ကညီဘၣ်ကီဘၣ်ခဲဒဲကဝီၤအပူၤ ပှၤဒဲကဝီၤဖိလၢဟး ထီၣ်လဲၤမၤ တၢ်ဆူ ခၠါထၣ်ဘူရံၤ(ဘိးနါရီ) လါမ်ယဲ ကျီး (၂၉)ဂၤသ့ၣ်တဖၣ်အံၤ လိၣ်ဘၣ်ဝဲ တၢ်မၤဘူးလဲအတၢ်တီတၢ် တြၢ်ဒီး တၢ်ဆၢကတီၢ်တၢ် ပၥ်ပနီၣ်တဖၣ် အဂ့ၢ်စံးဝဲဒၣ်န့ၣ်လီၤ.
ပှၤဒဲကဝီၤဖိတဖၣ်အံၤ အပူၤကွံၥ်တချူးလဲၤဖံးလဲၤမၤတၢ်အဆၢကတီၢ် တၢ်ဒုးသ့ၣ်ညါဝဲအဝဲသ့ၣ်တဖၣ်လၢ ကဘၣ်မၤဝဲ တၢ်ဒ့လါမ်ယဲ သၣ်, တၢ်ကျးစတံကၢၣ်(Sticker)ဒီး ကဒိးန့ၢ်ဘၣ်ဝဲအဘူးအလဲလၢ တနံၤအဂီၢ်တၢ်ပၥ်ပနီၣ်ဘၣ်ဆၣ် ဖဲစးထီၣ်မၤတၢ်မၤအခါ တၢ်ပၥ်ပနီၣ်တၢ်ဆၢကတီၢ်ဒီးတၢ်အဘူးအလဲတမ့ၢ်ဒ်သိးတၢ်ဟဲကိးအဝဲသ့ၣ်အဆၢကတီၢ်လၢၤဘၣ်အဂ့ၢ်အူးပၠၣ်ဒဲကဝီၤပိၥ်မုၣ်လၢတူၢ်ဘၣ်တၢ်တဂၤ စံးဝဲဒၣ်အံၤန့ၣ်လီၤ.
အဝဲစံးဝဲလၢ“အမ့ဟ့ၣ်ပှၤတနံၤဂီၢ်တၢ်မၤဘူးလဲဒ်သိး လဲၤကိးပှၤအခါတဲဝဲအသိးန့ၣ်, ပမ့ဘၣ်မၤစးထီၣ်လၢ ဂီၤခီမ့တမ့ၢ်မုၢ်ဃ့ၢ် လီၤ (၁)နၣ်ရံၣ်တုၤလၢ မုၢ်နၤခီအနၣ်ရံၣ်(၁၀) ဒၣ်လဲပမၤကဲကိးဂၤလီၤ. မ့ဝံၤပဃ့အါထီၣ်နၣ်ရံၣ်တုၤလၢ(၁၁)နၣ်ရံၣ် ဟ့ၣ် ပှၤ(၃၀၀) ဘၣ်ဆၣ် အဝဲသ့ၣ်ဟ့ၣ်တကဲဘၣ်. အဃိပတၢ်ဃုထၢတအိၣ်. ပကမၤလၢဒီဃၤတဖျၢၣ်တဖျၢၣ်သနၥ်က့ ပဃ့ထီၣ်လၢ ကပၥ်ပနီၣ်န့ၢ်ပှၤတၢ်ဆၢ ကတီၢ် ဘၣ်ဆၣ် အဝဲသ့ၣ်တဲလၢတန့ၢ်ဘၣ်. ပဘၣ်မၤလၢအဝဲသ့ၣ်တၢ် လိၣ် ဘၣ် တုၤအထီၣ်ဘးမးပအိၣ်ဘှံးဘၣ်လီၤ.”အဂ့ၢ်စံးဝဲန့ၣ်လီၤ.
အူးပၠၣ်ဘၣ်ကီဘၣ်ခဲဒဲကဝီၤဖိ(၂၉)ဂၤအံၤ ဟးထီၣ်မၤဝဲတၢ်ဖဲတလါအံၤ လါအီကူၥ်(၂၀)သီအနံၤအဂ့ၢ် သ့ၣ်ညါဘၣ် န့ၣ်လီၤ.
ဒီးဒ်အပူၤကွံၥ်တၢ်ဟဲကိးပှၤမၤတၢ်ဖိအဆၢကတီၢ် တၢ်ပၥ်ဖျါဝဲအသိးန့ၣ်, တၢ်ဒ့လါမ်ယဲ သၣ်ဒီး တၢ်ကျးစတံကၢၣ်(sticker)တၢ်မၤ သ့ၣ်တဖၣ်အံၤ တနံၤအဂီၢ် တၢ်ကဟ့ၣ်ဝဲ ပိၥ်မုၣ်တဖၣ် (၃၅၂)ဘးဒီး ပိၥ်ခွါတဖၣ်တခီ (၄၀၀)ဘး အဂ့ၢ်, အဝဲသ့ၣ်တ ဖၣ် အဝဲသ့ၣ်စံးဝဲန့ၣ်လီၤ.
ခၠါထၣ်ဘူရံၤ(ဘိးနါရီ) လါမ်ယဲ ကျီးအပူၤ ပှၤလဲၤမၤတၢ်ဖိတဖၣ်အံၤ အူးပၠၣ်ဒဲကဝီၤဖိသ့ၣ်တဖၣ် အမဲၥ်ညါ ထံကီၢ်အဂၤ ဒီး ကလုၥ်လၢအဂၤတဖၣ် ဟဲမၤတၢ်အိၣ်ဝဲအါဒူၣ်အဂ့ၢ် သ့ၣ်ညါဘၣ်လၢ ဒဲကဝီၤပှၤလဲၤမၤတၢ်ဖိတဖၣ်အအိၣ်န့ၣ်လီၤ.
ဘၣ်ဆၣ်, ပှၤမၤတၢ်ဖိ တၢ်အိၣ်တၢ်ဆိးတၢ်မံလီၢ်, တၢ်ဟးလီၢ်ဒီး တၢ် လုၢ်ထံလီၢ် သ့ၣ်တဖၣ်အံၤ တၢ်နီၤဖးဝဲ မုၣ် ခွါတအိၣ်, တၢ်ဘၣ်သူဝဲတၢ်လီၢ်တတီၤဃီအဃိ, ပိၥ်မုၣ်ပိၥ်မၢၤတဖၣ် တူၢ်ဘၣ်ဝဲ တၢ်တဘံၣ်တဘၢ တၢ်သူၣ်ပျံၤသးဖုး အဂ့ၢ်,ပှၤဒဲကဝီၤဖိလၢတူၢ်ဘၣ်တၢ်တဖၣ် ပၥ်ဖျါထီၣ်ဝဲဒၣ်န့ၣ်လီၤ.
တၢ်အံၤအဖီခိၣ်, (KWO)ကညီပိၥ်မုၣ်ကရၢခိၣ် နီၢ်ကညီဖီပဲၥ်ထံနီၤဖးစံးဝဲဒၣ်လၢ
“ပမ့ကွၢ်လၢပိၥ်မုၣ်တဖၣ်တၢ်ဘံၣ်တၢ်ဘၢအဂီၢ်န့ၣ်,တၢ်အိၣ်ဆိးမံလီၢ်,တၢ်ဟးလီၢ်,တၢ်လုၢ်ထံလီၢ်သ့ၣ်တဖၣ်အံၤကဘၣ်မ့ၢ်နီၢ်တဂၤအတၢ်သဒၢလီၢ်လီၤ.အဃိကြၢးလၢကဘၣ်အိၣ်ဒီးတၢ်အဒူၣ်အကၣ်ဘံၣ်ဘၢဒ်သိးတၢ်သုကွၢ်ဟုၣ်ကွၢ်စုၣ်တဂ့ၤအီၤဒီးကတူၢ်ဘၣ်သးတၢ်ဘံၣ်တၢ်ဘၢန့ၣ်လီၤ.မ့တမ့ၢ်ဒ်န့ၣ်ဘၣ်ခီအဝဲသ့ၣ်ကတူၢ်ဘၣ်တၢ်ပျံၤတၢ်ဖုးတၢ်သးကလၢၤတကးဘၣ်,တၢ်ဒ်အံၤကဲထီၣ်သးတုၤလၢတၢ်ဖီၣ်စိဖီၣ်စဲးတၢ်မၤတရီတပါသ့ဝဲန့ၣ်လီၤ.အဃိတၢ်အံၤမ့ၢ်တၢ်အရ့ဒိၣ်လၢပိၥ်မုၣ်တဖၣ်ကပၥ်ဖှိၣ်ထီၣ်သးဒီး တဲဖျါထီၣ်ဝဲဆူ တၢ်မၤခိၣ်တဖၣ်န့ၣ်လီၤ”အဂ့ၢ်စံးဝဲန့ၣ်လီၤ.
ဘၣ်ဃးဒီး ကညီဘၣ်ကီဘၣ်ခဲအူးပၠၣ်ဒဲကဝီၤဖိ(၂၉)ဂၤ အတၢ်လဲၤဖံးလဲၤမၤတၢ်ဆူ ခၠါထၣ်ဘူရံၤ(ဘိးနါရီ) လါမ်ယဲ ကျီးအဂ့ၢ်အံၤ, လၢတၢ်ကဘှါရှဲန့ၢ်ဝဲ တၢ်ဂ့ၢ်ကီအဂီၢ်, အဝဲသ့ၣ်တဖၣ် ဆဲးကျိးဝဲ ဒဲကဝီၤခိၣ်နၢ်ဘၣ်ထွဲတဖၣ် အိၣ်ဝဲအဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိး, လၢတၢ်ကမၤဘၣ်ဘျီးဘၣ်ဒါဝဲတၢ်ဂ့ၢ်အံၤအဂီၢ် တၢ်ရဲၣ်တၢ်ကျဲၤအိၣ်ဝဲဒ်လဲၣ်အဂ့ၢ်န့ၣ်, ခ့ၣ်အဲးစံၣ် ကညီတၢ် ကစီၣ် ဆဲးကျိးသံကွၢ်ဝဲ (KRC) ကညီဘၣ်ကီဘၣ်ခဲကမံးတံၥ် ပှၤဘၣ်မူဘၣ်ဒါတဖၣ် အဖၢမုၢ်အဂ့ၢ်, ဒုးသ့ၣ်ညါဘၣ်ပှၤဒိကနၣ်တၢ်ဖိတဖၣ်န့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဒဲကဝီၤတဖၣ်အပူၤ ထံဂုၤကီၢ်ဂၤ တၢ်ဒီၣ်တဲၥ်ကွံၥ်တၢ်ဆီၣ်ထွဲ မၤစၢၤဝံၤလီၢ်ခံ ဒ်သိး ကဒိးန့ၢ်ဘၣ်တၢ်ခွဲးတၢ်ယၥ်လၢ ကဟးထီၣ်ဃုဖံးဃုမၤတၢ်လၢတၢ်ချၢအဂီၢ် ဂံၢ်ခီၣ်ထံးတၢ်ကရၢကရိ,ဒီး ပှၤဟူးဂဲၤလၢ ပှၤကညီဂ့ၢ်ဝီခွဲးယၥ်တဖၣ် အတၢ်ဃ့ထီၣ်အဖီခိၣ်,အပူၤကွံၥ် (၂၀၂၅)နံၣ် နံၣ် လါအီကူၥ် အပူၤ ကၠီၣ်တဲၣ်ပဒိၣ်ဘၣ်ထွဲတဖၣ်ထုးထီၣ်ဘိးဘၣ်ရၤ လီၤဝဲလၢ ဟ့ၣ်တၢ်ပျဲခွဲးယၥ်လၢ ပှၤဒဲကဝီၤဖိတဖၣ် ကဟးထီၣ်မၤဝဲဆူတၢ်ချၢ လၢဖိးသဲစး အဂ့ၢ်,သ့ၣ်ညါဘၣ် န့ၣ်လီၤ.
