လါအီကူး ၃၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤအပူၤ တၢ်ဒုးအိၣ်ထီၣ်ကီၢ်ဆၢတၢ်ဘံၣ်တၢ်ဘၢဒီးတၢ်ကူၣ် လဲၤမၤကၤဝဲၤဒၢးဝံၤလီၢ်ခံ ဃိၣ်လိၥ်ကျိပူၤ လီၢ်ကဝီၤပှၤဘၣ်မူဘၣ်ဒါဘၣ်ထွဲဖီၣ်န့ၢ်ဝဲသ့ၣ်လၢအဘၣ်တၢ်ကူၣ်လဲၤမၤကၤအီၤလၢ အတဖိးသဲစးဘၣ် အိၣ်ထီၣ်တုၤလၢ(၂)ဘျီအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်တလါအံၤလါအီကူး ၁၀ သီအနံၤန့ၣ် လၢမုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤတၢ်လီၢ်တတီၤအပူၤ ခ့ၣ်အဲၣ်ယူၣ် တီခိၣ်ရိၣ်မဲ ဒုးအိၣ်ထီၣ်ဝဲကီၢ်ဆၢတၢ်ဘံၣ်တၢ်ဘၢဒီးတၢ်ကူၣ်လဲၤမၤကၤဝဲၤဒၢးအံၤဒီး ဖဲန့ၣ်ဝံၤဘၣ်တၢ်ဖီၣ်န့ၢ်ဝဲသ့ၣ်လၢအဘၣ် တၢ်ကူၣ်လဲၤမၤကၤအီၤလၢအတဖိးသဲစး ဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.
မုၢ်ြတီၢ်ကီၢ်ရ့ၣ် ကီၢ်သူလ့ၤ ဒီး ကီၢ်ကၠီၣ်တဲၣ် မဲၢ်ဟီၣ်စီၣ်ကီၢ်ရ့ၣ် ကီၢ်ဆၢ ဖဲလါအီကူး ၂၃ သီအနံၤန့ၣ် မဲၢ်ရၢ်ထၣ်တြဲၤ ပှၤဘၣ် မူဘၣ် ဒါဖီၣ်န့ၢ်ဝဲသ့ၣ်ပဟံၣ်လၢအဘၣ်တၢ်ကူၣ်လဲၤမၤကၤအီၤလၢ အတဖိးသဲး(၂)ထိလၢ သီလဲၥ်ထၣ်ဆၢလၥ် ဃိၣ်လိၥ်ကျိကပၤ လၢကီၢ်သူလ့ၤတကပၤန့ၣ်လီၤ.
ဒီးသ့ၣ်လၢတၢ်ဖီၣ်န့ၢ်ဝဲဘျီဝဲအံၤတၢတထိန့ၣ်သ့ၣ်ပဟံၣ်ပၣ်ဝဲ (၃၁)ကျီဒီး သ့ၣ်ခံထိတထိန့ၣ် သ့ၣ်ပဟံၣ်ပၣ်ဝဲ(၄၅)ကျီ ပၥ်ဖှိၣ်ခဲလၢၥ်(၇၆)ကျီးအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပၥ်ဖျါဝဲဒၣ်န့ၣ်လီၤ.
တကးဒံးဘၣ်ဖဲန့ၣ်ဝံၤလီၢ်ခံ မၤကဒီးဖဲလါအီကူး ၂၆ သီအနံၤန့ၣ် ခ့ၣ်အဲၣ်ယူၣ် မဲၢ်ရၢ်ထၣ်တြဲၤဒီးကၠီၣ်တဲၣ်ပှၤဘၣ်မူ ဘၣ်ဒါတဖၣ် ပၥ်ဖှိၣ်ထီၣ်သး ဖီၣ်န့ၢ်ကဒီးဝဲသ့ၣ်ပဟံၣ်လၢတၢ်ကူၣ်လဲၤမၤကၤအီၤလၢတဖိးသဲစးဘၣ်အံၤ(၅၉)ကျီဖဲထံထၣ် ဃိၣ်လိၥ်ကျိကပၤ လၢကီၢ်ကၠီၣ်တဲၣ်တကပၤအံၤန့ၣ်လီၤ.
ဒီးသ့ၣ်ပဟံၣ်(၅၉)ကျီအံၤခီဖျိတၢ်ဖီၣ်ချုးန့ၢ်ဝဲလၢဃိၣ်လိၥ်ကျိကီၢ်ကၠီၣ်တဲၣ်ပူၤတကပၤအဃိ ဘၣ်တၢ်ဟ့ၣ်လီၤကွံၥ်အီၤဆူကၠီၣ်တဲၣ် ပှၤဘၣ်မူဘၣ်ဒါအစုပူၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
သ့ၣ်ပဟံၣ်လၢတၢ်ဖီၣ်န့ၢ်ဝဲ(၂)ဘျီလၢၥ်အံၤန့ၣ်အိၣ်ဟဲလီၤထွံဝဲလၢဃိၣ်လိၥ်ကျိပူၤအံၤတဆီဒီး သ့ၣ်တဖၣ်အံၤအါဒၣ်တက့ၢ်န့ၣ်မ့ၢ်ဝဲ သ့ၣ်ပဟံၣ်အဃ့သ့ၣ်တဖၣ်လီၤဒီး တုၤလၢခဲအံၤပှၤမၤတၢ်ဖိန့ၣ်တၢ်ဖီၣ်န့ၢ်ဝဲတအိၣ်ဒံးဘၣ်အသိး သ့ၣ်တဖၣ်အံၤအိၣ်ဟဲဖဲလဲၣ် ဒီးတၢ်ကလဲၤဆှၢဝဲဖဲန့ၣ်တၢ်ဃုသ့ၣ်ညါဝဲအဖၢမုၢ်အဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ စံးဝဲန့ၣ်လီၤ.
“သ့ၣ်ဖဲပှၤဖီၣ်န့ၢ်ဝဲတဖၣ်န့ၣ်ကဘၣ်မ့ၢ်ဖဲထံဆၢကီၢ်ဆၢဟီၣ်ကဝီၤဖဲန့ၣ်လီၤ. အဟဲလီၤထွံဒီး ပှၤဖီၣ်ချုးန့ၢ်ဝဲလီၤ. သ့ၣ်တဖၣ်အံၤ အါဒၣ်တက့ၢ်အဃ့လီၤ, အသံသိဒုပၣ်တနီၤလၢယိၤဖီၣ်န့ၢ်ဝဲန့ၣ်ကအိၣ်အကျီ(၁၀)ဘၣ်ဆၣ် အါဒၣ် တက့ၢ်န့ၣ်အဃ့လီၤ ခီဖျိလၢ ပှၤဖီၣ်ဝဲအနီၢ်ကစၢၢ်တချုးဘၣ်အဃိ သ့ၣ်တဖၣ်အံၤမတဂၤကပှ့ၤဝဲလဲၣ်,ကလဲၤဆှၢဝဲဖဲလဲၣ်န့ၣ် တၢ်မၤဖျါထီၣ်အီၤတန့ၢ်ဒံး ဘၣ် တၢ်ဆဲးဃိထံအီၤအဖၢမုၢ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်ဒ်သိးတၢ်ထုးထီၣ်ဟုၣ်သ့ၣ်ဒ်အံၤတဖၣ် ခါဆူညါသုတအိၣ်ထီၣ်လၢၤတဂ့ၤအဂီၢ် ကမျၢၢ်ထံဖိကီၢ်ဖိအတၢ်ပၥ်ဖှိၣ်အံၤ မ့ၢ်တၢ်လၢအရ့ဒိၣ်ဝဲဒီး အလီၢ်အိၣ်စ့ၢ်ကီးဝဲလၢတၢ်ကဘၣ်မၤဆူၣ်ထီၣ်ဝဲတၢ်ဟ့ၣ်တၢ်သ့ၣ်ညါနၢ်ပၢၢ်အဂ့ၢ်န့ၣ် ပဒိၣ်စီၤထိၣ်ရီၤဘ့ၤ စံးအါထီၣ်ဝဲန့ၣ်လီၤ.
“တၢ်ဟုၣ်သ့ၣ်ကဲထီၣ်သးအလီၢ်န့ၣ်မ့ၢ်ဝဲဒၣ်ဃိၣ်လိၥ်တၢ်မုၣ်တၢ်ခုၣ်ကရၢၢ်အဃိဆူမဲၥ်ညါ တၢ်သ့ၣ်တဖၣ်အံၤကလီၤမၢ်သုတကဲ ထီၣ်လၢၤတဂ့ၤအဂီၢ် ဒိးသန့ၤထီၣ်သးလၢကမျၢၢ်အဂံၢ်အဘါကဘၣ်ဟဲဂ့ၤဒိၣ်ထီၣ်.ဘၣ်မနုၤလဲၣ်တၢ်သူၣ်ထီၣ်ကရၢၢ်အံၤလၢတၢ်က ဟုကယၥ်က့ၤခိၣ်ဃၢၤန့ဆၢၣ်သ့ၣ်ဖိဝၣ်ဖိတဖၣ်န့ၣ်မ့ၢ်တၢ်အခိၣ်သ့ၣ်လီၤ. ဒီးတၢ်သူၣ်ထီၣ်ကရၢၢ်အံၤလၢကမျၢၢ်အဂီၢ်ဒီးတၢ်ပၥ်ဖှိၣ် မၤသကိးအီၤလၢကမျၢၢ်ထံဖိကီၢ်ဖိလီၤ.ကတီၢ်ခဲအံၤကမျၢၢ်ဒုဘၣ်ကွၢ်ဆၢၣ်မဲၥ်တၢ်ဃံးတၢ်စ့ၤဒုကအိၣ်အကပၤကပၤလီၤ. ဘၣ်ဆၣ် လၢတၢ်မၤဘၣ်ဒိက့ၤဃိၣ်လိၥ်တၢ်မုၣ်တၢ်ခုၣ်ဒ်အံၤတမ့ၢ်တၢ်ပနီၣ်လၢအဂ့ၤဘၣ်.ဒ်န့ၣ်အသိးတဖိးမံလိၥ်သးဒီးဃိၣ်လိၥ် တၢ်မုၣ် တၢ်ခုၣ် အတၢ်ပညိၣ်ဘၣ်အဃိမ့ၢ်တၢ်မၤဘၣ်ဒိက့ၤကရၢၢ်ဒီးကမျၢၢ်အနီၢ်ကစၢ်လီၤ.အဃိတၢ်ဟ့ၣ်တၢ်သ့ၣ်ညါတဖၣ်တၢ်ကဘၣ် မၤဆူၣ်ထီၣ်အီၤဒီးဒ်သိးတၢ်သ့ၣ်တဖၣ်အံၤသုတအိၣ်ထီၣ်လၢၤတဂ့ၤန့ၣ်ကမျၢၢ်တဖၣ်ကဘၣ်ပၥ်ဖှိၣ်မၤသကိးတၢ်အါထီၣ်လီၤ.” အဂ့ၢ်န့ၣ် စံးဝဲန့ၣ်လီၤ.
ခ့ၣ်အဲၣ်ယူၣ်(သုးက့ ၅)ဟီၣ်ကဝီၤ အပူၤကွံၥ်တချုးတၢ်ဒုးအိၣ်ထီၣ်ထံဆၢကီၢ်ဆၢတၢ်ဘံၣ်တၢ်ဘၢဒီးတၢ်ကူၣ်လဲၤ မၤကၤဝဲၤဒၢးဒံး ဘၣ်အခါန့ၣ် ဃိၣ်လိၥ်ကျိပူၤ တၢ်ဖီၣ်န့ၢ်ဝဲသ့ၣ်လၢအဘၣ်တၢ်ကူၣ်လဲၤမၤကၤအီၤလၢအတဖိးသဲစးဘၣ်အံၤ ကဲထီၣ်ဝဲတလီၢ်လီၢ် ဘၣ်ဆၣ် ခီဖျိလီၢ်ကဝီၤပှၤဘၣ်မူဘၣ်ဒါဒီးကမျၢၢ်ထံဖိကီၢ်ဖိအတၢ်ပၥ်ဖှိၣ်မၤသကိးတၢ်အံၤအဃိလီၢ်ခံအံၤတၢ်ဖီၣ်ချုးဝဲတအိၣ်လၢၤ ဘၣ်လီၤစှၤဝဲအဂ့ၢ်န့ၣ် ပှၤဘၣ်မူဘၣ်ဒါစံးဝဲန့ၣ်လီၤ.
လၢတၢ်န့ၣ်အဃိထံဆၢကီၢ်ဆၢဒီတကျိၤ လၢတၢ်တြီဆၢခီကီၢ်ဆၢတၢ်ဖံးတၢ်မၤလၢအတဖိးသဲစးတဖၣ်အံၤအပူၤ ခါဆူညါ ခံခီခံကပၤ လီၢ်ကဝီၤပှၤဘၣ်မူဘၣ်ဒါဘၣ်ထွဲကဖီၣ်လိၥ်စုမၤသကိးတၢ်ဒီး တကတီၢ်ဃီလၢခ့ၣ်အဲၣ်ယူၣ်လီၢ်ကဝီၤပှၤဘၣ်မူဘၣ်ဒါဒီးကၠီၣ်တဲၣ် ပှၤဘၣ်မူဘၣ်ဒါအတၢ်ဖီၣ်လိၥ်စု မၤဖျါထီၣ်ဝဲတၢ်ကူၣ်လဲၤမၤကၤသ့ၣ်လၢအတဖိးသဲးစးဘၣ်ဒ်အံၤ ဘၣ်ထွဲဝဲဒီးခ့ၣ်အဲၣ်ယူၣ် အတၢ်ဒုးအိၣ်ထီၣ်ဝဲကီၢ်ဆၢတၢ်ဘံၣ်တၢ်ဘၢဒီးတၢ်ကူၣ်လဲၤမၤကၤဝဲၤဒၢးအံၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
