လါဖ့ၤဘြူၤအါရံၤ ၄ သီႇ ၂၀၂၂ နံၣ်ႇ ခ့ၣ်အဲးစံၣ်
သုးဟံးဆူၣ်တၢ်စိတၢ်ကမီၤၦဲၤထီၣ်တနံၣ်၀ံၤအလီၢ်ခံ ဖဲမဟါလါယနူၤအါရံၤ ၃ သီအနံၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(KNU)ဒီးဒီကလုာ်ဒံၣ်မိၣ်ခြ့ၣ်စံၣ်ကရၢစိ(NLD)ခိၣ်နၢ်ဒိၣ်ထီတဖၣ်အဘၢၣ်စၢၤ မၤ၀ဲတၢ်ထံၣ်လိာ်တၢၣ်ပီၣ်အိၣ်သကိးအဆိကတၢၢ်တဘျီန့ၣ်လီၤႉ
တၢ်ထီဒါသုးမီၤစိရိၤအံၤ ခီဖျိတၢ်မုၢ်လၢ်ကွၢ်စိလီၤဂာ်လိာ်သးအဖီခိၣ် ဘၣ်တၢ်မၤ၀ဲတၢ်ထံၣ်လိာ်တၢၣ်ပီၣ်အိၣ်သကိးအံၤဒီး ဖဲမဟါတၢ်ထံၣ်လိာ်အိၣ်သကိးအပူၤ အခိၣ်သ့ၣ်န့ၣ်မ့ၢ်ဒၣ်တၢ်ဒုးသ့ၣ်ညါလိာ်ဆိသးဒီး တၢ်ရဲၣ်တၢ်ကျဲၤအိၣ်လၢကဆဲးထံၣ်လိာ်အိၣ်သကိးဒံး၀ဲအဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထံဂုၤကီၢ်ဂၤ၀ဲၤကျိၤခိၣ် ပဒိၣ်စီၤတီနံလၢအပၣ်ဃုာ်လၢတၢ်ထံၣ်လိာ်အိၣ်သကိးအပူၤအံၤစံး၀ဲဒ်အံၤန့ၣ်လီၤႉ
“တၢ်ဂ့ၢ်ခိၣ်သ့ၣ်ခီန့ၣ်ခါဆူညါပကဖီၣ်လိာ်စုမၤသကိးတၢ်အဂီၢ်လီၤႉ ခီဖျိပတၢ်မုၢ်လၢ်ကွၢ်စိလီၤဂာ်လိာ်သးအဃိ ထီဘိန့ၣ်ပကဖီၣ်လိာ်စုမၤသကိးတၢ်လီၤႉ လီၤဆီဒၣ်တၢ်လၢတၢ်ထီဒါသုးမီၤစိရိၤသနူတကပၤမီၤနီၤ”အဂ့ၢ်န့ၣ် အ၀ဲစံးဘၣ်ခ့ၣ်အဲးစံၣ်န့ၣ်လီၤႉ
တၢ်ထံၣ်လိာ်အိၣ်သကိးလၢတၢ်မၤအီၤဖဲမဟါအံၤ ဒီကလုာ်ဒံၣ်မိၣ်ခြ့ၣ်စံၣ်ကရၢစိ(NLD)လီၢ်ခၢၣ်သးပၢဆှၢတၢ်ကမံးတံာ်ဖိ အူအီၤကၠံၤညိၣ်တီခိၣ်ရိၣ်မဲ လီၢ်ခၢၣ်သးကမံးတံာ်ဖိ ဒီၣ်ကထၢၣ်ခ့ၤစီၤႇအူထိမၠ့ၣ်ႇအူကၠီၤထွ့ႇအူမၠိနဲၤႇအူ၀့အီၤဒီးတၢ်ရ့လိာ်မုာ်လိာ်မူဒါခိၣ် အူဘိၤဘိၤအူတဖၣ်ဟဲထီၣ်၀ဲဒၣ်န့ၣ်လီၤႉ
ဒ်န့ၣ်အသိးမ့မ့ၢ်(ခ့ၣ်အဲၣ်ယူၣ်)တကပၤန့ၣ် ကရၢခိၣ်(၂) ပဒိၣ်စီၤကွဲၤထူ၀့ႇ နဲၣ်ရွဲၣ်ခိၣ်ကျၢၢ် ပဒိၣ်စီၤတၢ်ဒိၣ်မူႇ ထံဂုၤကီၢ်ဂၤ၀ဲၤကျိၤခိၣ် ပဒိၣ်စီၤတီနံဒီး လီၢ်ခၢၣ်သးထီဘိကမံးတံာ်ဖိ ပဒိၣ်စီၤအဲၣ်ကလုာ်စ့ႇ လီၢ်ခၢၣ်သးထီဘိကမံးတံာ်ဖိ ပဒိၣ်စီၤအဲၣ်ထူႇ ၀ဲၤဒၢးကရူၢ်ခိၣ် စီၤနံၤမရိၣ်တဖၣ်ဟဲထီၣ်၀ဲန့ၣ်လီၤႉ
ဖဲ(၁၉၉၀)နံၣ်၀ံၤအလီၢ်ခံအခါစ့ၢ်ကီး(ခ့ၣ်အဲၣ်ယူၣ်)အံၤတူၢ်လိာ်ဆီၣ်ထွဲ၀ဲ(NLD)ပၣ်တံၣ်အံၤကျၢၤမုဆှုဒီး ဒ်သိးတၢ်ကသူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်အဂီၢ် မ့ၢ်တၢ်ကရၢကရိတဖုလၢအဃ့ထီၣ်ဃာ်၀ဲဒၣ်န့ၣ်လီၤႉ ဖဲ(၂၀၁၅)တၢ်ဃုထၢအခါ(NLD)ပဒိၣ်လၢအဒိးန့ၢ်ဘၣ်၀ဲထံကီၢ်တၢ်စိတၢ်ကမီၤအံၤ လၢဒီကလုာ်တၢ်မၤဃူမၤဖိးက့ၤတၢ်ဂ့ၢ်ခိၣ်တီအဖီလာ်န့ၣ် ခီဖျိတကွၢ်မဲာ်၀ဲကလုာ်ဒူၣ်တဖၣ်ဘၣ်အဃိ ကလုာ်ဒူၣ်ကလုာ်သ့ၣ်တဖၣ်အတၢ်နာ်အီၣ်(NLD)စ့ၢ်ကီးလီၤစှၤ၀ဲအဂ့ၢ်န့ၣ် ၦၤလၢအဃုသ့ၣ်ညါထံရူၢ်ကီၢ်သဲးတဖၣ် ပဲာ်ထံနီၤဖးစံး၀ဲန့ၣ်လီၤႉ
ဘၣ်ဆၣ်ပယီၤသုးအံၤတတူၢ်လိာ်၀ဲ(၂၀၂၀)တၢ်ဃုထၢအစၢဒီးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ (NLD)ပၣ်တံၣ်အံၤဂုာ်ကျဲးစၢးထံၣ်လိာ်သးဒီးကလုာ်ဒူၣ်ဖီၣ်စုက၀ဲၤတၢ်ကရၢကရိတဖၣ်ဘၣ်ဆၣ် တၢ်တတူၢ်လိာ်ဟ့ၣ်ဂံၢ်ဟ့ၣ်ဘါ၀ဲဘၣ်န့ၣ်လီၤႉ
လၢတၢ်န့ၣ်အဃိဒ်သိးသုးမီၤစိရိၤသနူအဂံၢ်ကတဲာ်ကွံာ်အဂီၢ် (NLD)အံၤဒုးအိၣ်ထီၣ်၀ဲပဒိၣ်လၢအသီႇသိၣ်မှံၤတဖၣ်ဒီး ပၢၢ်ဆၢက့ၤသုးမီၤစိရိၤတကးဘၣ်အမဲာ်ညါ ကဒုးစ့ၢ်ကီး၀ဲလၢထံရူၢ်ကီၢ်သဲးအကျိၤအကျဲတဖၣ်အဂီၢ် ထံၣ်လိာ်တၢၣ်ပီၣ်အိၣ်သကိး၀ဲဒီးကလုာ်ဒူၣ်ဖီၣ်စုက၀ဲၤ တၢ်ပၢၢ်ဆၢတၢ်ကရၢကရိခိၣ်နၢ်သ့ၣ်တဖၣ်တဘျုးဘျီလံန့ၣ်လီၤႉ
