လါစဲးပထ့ဘၢၣ် ၃၀ သီ, ၂၀၂၆ နံၣ်, ခ့ၣ်အဲးစံၣ်
ကမၤမိၢ်-ဖၣ်ပူၣ်ကျဲလၢအိၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤပူၤဒီတကျိၤထီၣ်န့ၢ်ဒိၣ်စိက့ၤဝဲလံအဂ့ၢ်န့ၣ် သုးမီၤစိရိၤထုးထီၣ် ပၥ်ဖျါစံးဝဲအံၤန့ၣ် မ့ဘၣ်ကွၢ်ကဒါက့ၤလၢပျီပူၤတၢ်အိၣ်သးနီၢ်နီၢ်ခီန့ၣ်လီၤပလိၥ်သးတအိၣ်ဝဲဘၣ်ဒီး တုၤလၢခဲအံၤတၢ်ဒုးဆဲး ကဲထီၣ်ဝဲကိးမုၢ်နံၤဒဲးအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)က့ၤခီၣ်ဆၢစံးကဒါဝဲန့ၣ်လီၤ.
ဖဲမဟါလါစဲးပထ့ဘၢၣ် ၂၉ သီအနံၤ လၢသုးမီၤစိရိၤအတၢ်ကစီၣ်(မြန်မာ့အလင်း)ပူၤ စးထီၣ်လါမ့ၤတုၤလၢလါစဲးပထ့ဘၢၣ်ထီၣ်အံၤ ကၠီၣ်ကွ့သဝီ,ဝၣ်သိခိၣ်,မံၤစဲခၠီဖၠါသဝီ,နိၥ်ဃဲဒိၣ်,ဘီကၠိၣ်ထၣ်,ကတၢတံၥ်,ရှါသဝီ,တီသူ,ဖါလိဖိဒီး ဖါလိဒိၣ်သဝီ လၢအိၣ် ကမၤမိၢ်-ကတၢတံၥ်ကျဲဒီတကျိၤအံၤဃုၥ်ဒီးလီၢ်ခံကတၢၢ်ဖဲ ၂၇ သီအံၤထီၣ်ဒိၣ်စိန့ၢ်ကဒါဝဲ ထံကဆီမဲ(ဆင်စွယ်)သဝီလံ အဂ့ၢ်န့ၣ် ထံၣ်ဘၣ် လၢသုးမီၤစိရိၤထုးထီၣ်ပၥ်ဖျါဃုၥ်ဝဲဒီးတၢ်ဂီၤတဖၣ်န့ၣ်လီၤ.
ဒီးလၢသုးကျိၤအတၢ်ဟဲထီၣ်ဟူးဂဲၤလၢ(၅)လါဃၣ်ဃၣ်အတီၢ်ပူၤအံၤ တၢ်ဒုးကဲထီၣ်ဝဲဒီးဟီၣ်ကဝီၤ(KNLA),(PDF)သုးပၥ်ဖှိၣ်ကရူၢ် အိၣ်ဝဲ(၆၅)ဘျီဒီး မၤန့ၢ်ဝဲကျိ(၃)ခိၣ်, တၢ်ပၢၢ်ဆၢသုးတၢ်လီၢ်(၁၃)တီၤဒီး ထံၣ်န့ၢ်ဝဲတၢ်ပၢၢ်ဆၢသုးကရူၢ်အပှၤသံစိၣ်(၁၃)စိၣ်အဂ့ၢ်န့ၣ် သုးမီၤစိရိၤ စံးဝဲန့ၣ်လီၤ.
ဘၣ်ဃးသုးမီစိရိၤထုးထီၣ်ပၥ်ဖျါဝဲလၢက့ၤဒိၣ်စိကဒါကမၤမိၢ်-ဖၣ်ပူၣ်ကျဲန့ၢ်လံတၢ်ဂ့ၢ်အံၤ ဒ်အဝဲသ့ၣ်တဲဝဲအသိးဒီးဟီၣ်ခိၣ်မဲၥ်ဖံးခိၣ် တၢ်အိၣ်သးန့ၣ်လီၤဆီလိၥ်အသးဒိၣ်စိဝဲတန့ၢ်ခဲလၢၥ်ဘၣ် မ့မ့ၢ်တခီတၢ်ဒုးကဲထီၣ်ဝဲကိးမုၢ်နံၤဒဲးအဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤထိၣ်ရီၤဘ့ၤ က့ၤခီၣ်ဆၢစံးကဒါဝဲန့ၣ်လီၤ.
“မ့ၢ်အဒိၣ်စိဝဲဧါ/အတူၢ်သံသးဧါဒုတသ့ၣ်ညါဘၣ်.မ့ဝံၤအဒိၣ်စိဝဲန့ၢ်ထဲလဲၣ်န့ၣ်တသ့ၣ်ညါဘၣ်.ယအဲၣ်ဒိးသံကွၢ်လၢအက့ၤကၢၤဃၥ်က့ၤ,အက့ၤကွၢ်ထွဲလီၤက့ၤအသုးကျိၤန့ၣ်မ့ၢ်အန့ၢ်ထဲလဲၣ်.အတုၤဖဲလဲၣ်ဂ့ၤန့ၣ်အမူဒါလီၤ.မ့မ့ၢ်ဝဲဒၣ်န့ၣ်ပမူဒါအိၣ်လၢပကဘၣ်ဒီသဒၢ က့ၤပကစၢ်ဟီၣ်ကဝီၤအဃိ ပကဘၣ်မၤလီၤ. စးထီၣ်လၢကမၤမိၢ်တုၤလၢအတုၤတၢ်လီၢ်ခဲအံၤတၢ်ဘၢၣ်စၢၤန့ၣ် တတီၤမ့ၢ်တမ့ၢ် တတီၤ တၢ်ဒုးကဲထီၣ်မၢ်မၢ်လီၤ.ပပှၤစ့ၢ်ကီးမၤန့ၢ်ကျိမၢ်မၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ.
ကမၤမိၢ်ဆူထံကဆီမဲ(ဆင်စွယ်)သဝီလၢပယီၤသုးဟဲထီၣ်တုၤဝဲခဲအံၤန့ၣ် ဒိၣ်စိန့ၢ်ဝဲထဲလၢကျဲမုၢ်ခိၣ်တဘိလိၤလိၤလီၤဒီး ဒ်န့ၣ်အသိးကျဲမုၢ်ခံခီယၢ်ပၤဟီၣ်ကဝီၤပူၤန့ၣ် (KNLA)သုးပၥ်ဖှိၣ်အိၣ်ဆီလီၤသးဟူးဂဲၤဝဲအဃိ မၤလဲၢ်ထီၣ်ဝဲဟီၣ်ကဝီၤတၢ်ဒိၣ်စိ တညီဝဲဘၣ်အသိး သုးကျိၤလၢအဟဲထီၣ်ဟူးဂဲၤဝဲအံၤဟးဂီၤဝဲဒီတကျိၤလံအဖီခိၣ်ဒ်သိးသုးဖိသံၣ်ဖိသးသဟီၣ်ကဆူၣ်ထီၣ်အဂီၢ် ဘၣ်ပၥ်ဖျါထီၣ်ဝဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ် ပဲၥ်ထံနီၤဖးစံးဝဲန့ၣ်လီၤ.
တကတီၢ်ဃီဟီၣ်ကဝီၤပူၤဖဲန့ၣ် ဖဲပယီၤသုးကျိၤအတၢ်ဟဲထီၣ်ဟူးဂဲၤတၢ်ဒုးတၢ်ယၤကဲထီၣ်ဒီတကတီၢ်အပူၤန့ၣ် ပယီၤသုး တကပၤသံ ဘၣ်ဒိဘၣ်ထံးဝဲအါမးအသိး လၢတၢ်အိၣ်သးအကလုၥ်ကလုၥ်ၥ်အဃိ စံၣ်ဖျိးထီၣ်ဟဲက့ၤပၥ်လီၤစုကဝဲၤလၢ(သုးက့ ၅) အအိၣ်အိၣ်ဝဲအါမးစ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ် လီၤ.
တကးဒံးဘၣ်လၢတၢ်ဒုးတၢ်ယၤအပူၤ ခီဖျိလၢ(KNLA)တၢ်ပၢၢ်ဆၢသုးပၥ်ဖှိၣ်ကရူၢ်အတၢ်ဟူးတၢ်ဂဲၤအဃိ ကျဲတိၤလၢကမျၢၢ်လ့ၢ် ထီၣ်လ့ၢ်လိၤဝဲအံၤတဖၣ်ဟးဂီၤဝဲအိၣ်အဂ့ၢ် သုးမီၤစိရိၤစံးဝဲအဖီခိၣ်အံၤန့ၣ် ပဒိၣ်စီၤထိၣ်ရီၤဘ့ၤ က့ၤခီၣ်ဆၢကဒါဝဲဒ်အံၤန့ၣ်လီၤ.
“တိၤဟးဂီၤတခါန့ၣ်ဆိမိၣ်လိၤလိၤမီၤ တိၤန့ၣ်မ့ကဲဘျုးလၢကမျၢၢ်အဂီၢ်န့ၣ်အဂ့ၤဝဲလီၤ. အအံၤတိၤန့ၣ်ကဲဘျုးလၢတၢ်ထီၣ်ဒုး အဂီၢ်လီၤ. အမ့ဆိမိၣ်ဒိသူၣ်ဒိသးလၢကမျၢၢ်အဂီၢ်ထဲထဲန့ၣ်ညါန့ၣ် ဘၣ်မနုၤအဃိလၢဟးခးလီၤတၢ်လၢပှၤဒူပှၤသဝီကိးနံၤ ကိးနၤလဲၣ်. လၢကျိဖးဒိၣ်,ကဘီယူၤ,ဒြိအဃိန့ၣ်ပှၤဘၣ်စံၣ်လၢအကလး,ပှၤဘၣ်သံ,ဘၣ်ဒိဘၣ်ထံးစုတူၥ်ခီၣ်ကၢ်ဒီဒူၣ်. တၢ်သ့ၣ်တဖၣ်အံၤအဆိမိၣ်တၢ်လၢကမျၢၢ်အဂီၢ်ဧါ. တၢ်သ့ၣ်တဖၣ်အံၤကမျၢၢ်ပဲၥ်ထံနီၤဖးဝဲဘၣ်လီၤ”အဂ့ၢ်န့ၣ် စံးဝဲန့ၣ်လီၤ.
လၢကထီၣ်ဒိၣ်စိက့ၤဟီၣ်ကဝီၤလၢခ့ၣ်အဲၣ်ယူၣ်ဒိၣ်စိဝဲန့ၢ်တဖၣ်အံၤအဂီၢ် စးထီၣ်လၢလါမ့ၤထီၣ်ကမၤမိၢ်-ကတၢတံၥ်ကျဲ ပယီၤသုး က့ၤစးထီၣ်မၤကဒါဝဲဒုးယၤတၢ်ဟူးတၢ်ဂဲၤလၢ(၅)လါဃၣ်ဃၣ်အတီၢ်ပူၤအံၤန့ၣ် မၤထီဒါဝဲပှၤဂ့ၢ်ဝီခွဲးယၥ်ဒ်အမ့ၢ် သူဝဲဒၣ်ကျိဖးဒိၣ်,ဒြိ, ကဘီယူၤဒိၣ်ဒိၣ်မုၢ်မုၢ်ခးလီၤဝဲတၢ်ကိးမုၢ်နံၤဒဲး ဃၣ်ဃၣ်ဆူကမျၢၢ်ဒူသဝီ,တၢ်ဖံးအီၣ်မၤအီၣ်လီၢ်ကျီးပူၤတကးဒံးဘၣ် နုၥ်လီၤဒွဲၣ် အူ အီၣ်ကွံၥ်ဝဲသဝီပူၤကမျၢၢ်ဟံၣ်သ့ၣ်တဖၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒီးခီဖျိလၢသုးမီၤစရိၤအတၢ်မၤထီဒါပှၤဂ့ၢ်ဝီခွဲးယၥ်တၢ်ဟူးတၢ်ဂဲၤသ့ၣ်တဖၣ်အံၤအဃိ လီၢ်ကဝီၤကမျၢၢ်,သီဘူၣ်သီခါ သံဘၣ် ဒိဘၣ်ထံးဝဲဆှုၣ်မဲၥ်ကဲၤမဲၥ် အမဲၥ်ညါပှၤနီၣ်ဂံၢ်လၢအကလးဘၣ်ဃ့ၢ်ထီၣ်ဟးအိၣ်လၢ တၢ်ဘံၣ်တၢ်ဘၢလီၢ်တုၤလၢခဲအံၤဒီး ဒ်န့ၣ်အသိးကၠိ,ဟံၣ်,တၢ်ဘူၣ် တၢ်ဘါတၢ်သူၣ်ထီၣ်လီၤပှီၢ်ဟးဂီၤစ့ၢ်ကီးဝဲအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်နန့ၣ်လီၤ.
တကီၢ်ခါခဲအံၤမ့ဘၣ်ကွၢ်ဖဲလၢသုးမီၤစိရိၤထုးထီၣ်ပၥ်ဖျါစံးဝဲလၢထီၣ်ဒိၣ်စိဝဲ ကမၤမိၢ်-ဖၣ်ပူၣ်ကျဲန့ၢ်လံအတီၢ်ပူၤအံၤန့ၣ် ပျီပူၤပယီၤ သုးတဖၣ် သဂၢၢ်ဘၣ်ဝဲဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အတၢ်ထီၣ်ဒုးတပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
အဘူးကတၢၢ်ဖဲလါစဲးပထ့ဘၢၣ် ၂၇ သီ အံၤအခါန့ၣ်စ့ၢ်ကီး ဖၣ်ပူၣ်ပယီၤသုးကလၢၤလၢတၢ်ဒီၣ်တဲၥ်ကွံၥ်ဝဲတၢ်အီၣ်တၢ်အီကျဲ န့ၢ်ဝဲ (၂)နံၣ် ဘျဲၣ်ဃၣ်ဃၣ်အံၤန့ၣ် (KNLA),(KNDO),(FRF)တၢ်ပၢၢ်ဆၢကရူၢ်တဖၣ် လဲၤကွံၥ်စိဒီး(၆၀ မမ)ကျိဖးဒိၣ်(၄၅)ဖျၢၣ်ဒံးဒီး လၢတၢ်လဲၤခးဝဲဘျီဝဲအံၤန့ၣ် ကျိသၣ်တဖၣ်လီၤတဲၥ်ပိၢ်ဖးထီၣ်ဝဲလၢခိၣ်နၢ်ဒိၣ်ထီအိၣ်ဆိးတၢ်သူၣ်ထီၣ်လီၢ်ဒီးဘါရဲးတၢ်သူၣ်ထီၣ် အခိၣ် လိၤလိၤအဂ့ၢ်န့ၣ် (Federal Revolution Force-FRF) ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ.
