အီးကထိဘၢၣ် ၂ သီ, ၂၀၂၆နံၣ်, ခ့ၣ်အဲးစံၣ်,
ကံၢ်မဲကညီ ၦၤသဝီဖိဒီး Karen Students Sport FC ပာ်ဖှိၣ်ထီၣ်အသး ဒီး ဒုးအိၣ်ထီၣ်ဝဲ ကံၢ်မဲကညီ ဖျၢၣ်ထူတၢ်လိၥ်ကွဲတၢ်ပြၢ အဆိကတၢၢ်တဘျီ ဖဲလါစဲးပတ့ဘၢၣ် ၂၆ သီအနံၤ လၢ Kimae Karen Stadium အပူၤအဂ့ၢ်သ့ၣ်ညါဘၣ်န့ၣ်လီၤ.
တၢ်ပြၢအပူၤ ကညီသးစၢ်လၢ ကံၢ်မဲ ဒီး သဝီလၢအိၣ်လၢကစၢၢ်ခိၣ်လီၢ်ကဝီၤတဖၣ် ပၣ်ဃုာ်ဝဲအမဲာ်ညါ ကီၢ်ပူၤဖၠၣ်စိမိၤတဖျၢၣ် ဒီး ကီၢ်ကၠီၣ်တဲၣ်ပူၤဖၠၣ်စိမိၤ တဖၣ်ပၣ်ဃုၥ်ဝဲဒီးခဲလၢၥ် ပှၤလိာ်ကွဲအိၣ်ဝဲအဖု ၁၀ ဖု အဂ့ၢ်န့ၣ် သ့ၣ်ညါဘၣ်ဝဲန့ၣ်လီၤ.
တၢ်ပြၢအံၤ အတၢ်ပညိၣ်မ့ၢ်ဒ်သိး ကညီစှီၤဒီး ကညီၦိၢ်ဖိတဖၣ် ကဒိးန့ၢ်ဘၣ် တၢ်ခွဲးတၢ်ယာ်လၢ ကထံၣ်လိာ်သး ကရ့လိာ်မုာ်လိာ်သး ဒီး ကမၤသကိးတၢ်အဂီၢ်န့ၣ် KSS FC ၦၤနဲၣ်တၢ် စီၤကၠီၤစါစံးဝဲန့ၣ်လီၤ.
အဝဲစံးဝဲလၢ“တၢ်ရဲၣ်တၢ်ကျဲၤအံၤ အတၢ်ပညိၣ်အခိၣ်သ့ၣ်န့ၣ် မ့ၢ်ဒ်သိး ကညီစှီၤဒီး ကညီၦိၢ်ဖိတဖၣ် ကဒိးန့ၢ်ဘၣ် တၢ်ခွဲးတၢ်ယာ်လၢ ကထံၣ်လိာ်သး ကရ့လိာ်မုာ်လိာ်သး ဒီး ကမၤသကိးတၢ်အဂီၢ် ဒီး ကဒုးအိၣ်ထီၣ် တၢ်ရ့လိာ်မုာ်လိာ်အါထီၣ်အဂီၢ်န့ၣ်လီၤ” အဂ့ၢ် စံးဝဲန့ၣ်လီၤ.
တၢ်ရဲၣ်တၢ်ကျဲၤဒ်အံၤန့ၣ် ခါဆူညါဒ်သိးကညီသးစၢ်ကပၣ်ဃုၥ်အါထီၣ်ကန့ၢ်အဂီၢ် ကဆဲးမၤဒံးဝဲဒၣ်အဂ့ၢ် KSS FC ၦၤနဲၣ်တၢ် စီၤကၠီၤစါ တဲအါထီၣ်ဝဲဒၣ်စ့ၢ်ကီးန့ၣ်လီၤ.
တကးဒံးဘၣ် လၢမုၢ်နၤခီအဆၢကတီၢ် တၢ်ဒုးအိၣ်ထီၣ်စ့ၢ်ကီး မူးသးဖှံတၢ်ရဲၣ်တၢ်ကျဲၤတခါလၢ ဒုးနဲၣ်ဖျါထီၣ် ကညီလုၢ်လၢ်ထူသနူတၢ်ဆဲးတၢ်လၤအက့ၢ်အဂီၤတဖၣ် ခီဖျိတၢ်သူၣ်ဝံၣ်သးဆၢ ဒီး တၢ်ဒ့တၢ်အူတၢ်တဖၣ် ဒီး ကညီသးစၢ်တဖၣ်ဒီး လီၢ်ကဝီၤဖိတဖၣ် ပၣ်ဃုာ်ဝဲလၢ တၢ်ရဲၣ်တၢ်ကျဲၤအပူၤန့ၣ်လီၤ.
စ့ပၥ်ကီၤလၢ ဒိးန့ၢ်ဘၣ်လၢ တၢ်ပြၢအပူၤန့ၣ် ကသူဝဲလၢတၢ်ဆီၣ်ထွဲမၤစၢၤ တၢ်လိၥ်ကွဲတၢ်ပီးတၢ်လီတဖၣ် ဆူ ကံၢ်မဲလီၢ်ကဝီၤ ကၠိဖိတဖၣ်အဂီၢ် ဒီး ကဟ့ၣ်လီၤစ့ၢ်ကီး ဖျၢၣ်ထူတၢ်လိၥ်ကွဲတၢ်သိၣ်လိလၢ ကၠိဖိလၢအသူၣ်အီၣ်သးအီၣ်တဖၣ်အဂီၢ်န့ၣ်လီၤ. တၢ်ရဲၣ်တၢ်ကျဲၤအံၤ ကဆဲးမၤဝဲလၢ ခါဆူညါ ဒ်သိး ကညီသးစၢ်တဖၣ် ကပာ်ဃုာ်အါထီၣ်ဝဲအဂီၢ်န့ၣ် သ့ၣ်ညါဘၣ်ဝဲလီၤ.
