ရခၢၣ်(ကၠီၣ်တီၤ)တၢ်ထီၣ်ဒုးဃုၥ်ဒီးသုးမီၤစိရိၤအတၢ်ပၥ်တၢ်ခးပနီၣ်ဆူကမျၢၢ်အဖီခိၣ် SCEF ထုးထီၣ်ဝဲလံၥ်တၢ်ပၥ်ဖျါတဘ့ၣ်

လါအီးကထိဘၢၣ် ၉ သီ, ၂၀၂၆ နံၣ်, ခ့ၣ်အဲးစံၣ်

သုးမီၤစိရိၤမၤဝဲကဘီယူၤတၢ်ထီၣ်ဒုးလၢ ရခၢၣ်ကီၢ်စဲၣ် ကၠီၣ်တီၤဝ့ၢ်အခါ ကမျၢၢ်ဃုၥ်ဒီးဖိဒံဖိသၣ်(၁၀၀)ဃၣ်ဃၣ် သံဖှိၣ်ရိၣ်ဖှိၣ် အါအါဂီၢ်ဂီၢ်အဖီခိၣ်အံၤ ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်ကမံးတံၥ်(SCEF)ပဲၥ်အၢပဲၥ်သီထုးထီၣ်ဝဲလံၥ်ပၥ်ဖျါတဘ့ၣ် ဖဲမဟါလါအီးကထိဘၢၣ် ၈ သီအံၤန့ၣ်လီၤ.

ဖဲအပူၤကွံၥ်လါစဲးပထ့ဘၢၣ် ၂၈ အနံၤန့ၣ် တၢ်ဒုးကဲထီၣ်တအိၣ်သုးမီၤစိရိၤအံၤလဲၤခးလီၤဝဲတၢ်ဒီးကဘီယူၤလၢ ရခၢၣ်ကီၢ်စဲၣ် ကၠီၣ်တီၤဝ့ၢ်ပူၤ ဖၠါတၢ်ဆါတၢ်ပှ့ၤလီၢ်ဒီးတိၤလၢပှၤဟးထီၣ်က့ၤလီၤ,ပှၤအိၣ်ဖှိၣ်ရိၣ်ဖှိၣ်အါဝဲအလီၢ်အံၤအဃိ ကမျၢၢ်လၢအတၢ်ကမၣ် တအိၣ်ဘၣ်သံဝဲ(၅၀)ဃၣ်ဃၣ်ဒီးဘၣ်ဒိဘၣ်ထံးဝဲအဂၤ(၆၀)ဃၣ်ဃၣ်ညါန့ၣ်လီၤ.

ကၠီၣ်တီၤတၢ်လီၢ်လၢကဘီယူၤလဲၤခးလီၤတၢ်အံၤန့ၣ်တၢ်ဒုးကဲထီၣ်တအိၣ်ဝဲဘၣ်အသိး ကမျၢၢ်အိၣ်ဆိးလီၢ်, တၢ်ဘူၣ်တၢ်ဘါလီၢ်, ကၠိဃုၥ်ဒီးတၢ်ဆါဟံၣ်လၢသုးမီၤစိရိၤပၥ်ဝဲတၢ်ခးပနီၣ်အံၤ မ့ၢ်တၢ်မၤထီဒါလုၢ်သ့ၣ်ခါပတၥ်ဝဲသုးကွီၣ်မ့ၣ်လၢအအၢအသီ ဖျိဖျိဖျါဖျါ အဃိ ထီဒါပဲၥ်အၢပဲၥ်သီဝဲအဂ့ၢ်န့ၣ် (SCEF)စံးဝဲန့ၣ်လီၤ.

တကးဒံးဘၣ်တၢ်ခးပနီၣ်ထံဖိကီၢ်ဖိကီၢ်ဖိကမျၢၢ်လၢသုးမီၤစိရိၤဆဲးမၤဝဲတပယူၥ်ဃီအံၤ မ့ၢ်တၢ်ဟ့ၣ်ဂံၢ်ဟ့ၣ်ဘါဆှၢ ဝဲကမျၢၢ်အံၤ လၢတၢ်ဖှီၣ်တၢ်နးတၢ်ကီတၢ်ခဲအပူၤဒီး ဒ်န့ၣ်အသိးလၢတၢ်စုဆူၣ်ခီၣ်တကးသ့ၣ်တဖၣ်အံၤအဃိ ဘၣ်ဒိဘၣ်ထံးက့ၤဝဲ ဖဲၣ်ဒရၢၣ်ဒံၣ် မိၣ်ခြ့ၣ်စံၣ်တၢ်မၤရဲၣ်ကျဲၤလၢကမျၢၢ်ထံဖိကီၢ်ဖိမိၢ်န့ၢ်သးလီဝဲအံၤသ့ဝဲအဂ့ၢ်န့ၣ် (SCEF)စံးစ့ၢ်ကီးဝဲန့ၣ်လီၤ.

သုးမီၤစိရိၤအံၤဟီၣ်ကဝီၤလၢအဘၣ်ဟ့ၣ်ဆှူဝဲဒီးကလုၥ်ဒူၣ်တၢ်ပၢၢ်ဆၢကရူၢ်ဒိၣ်စိဝဲန့ၢ်သ့ၣ်တဖၣ်အံၤအပူၤန့ၣ် လၢတၢ်(၅)နံၣ်ဃၣ် ဃၣ်အတီၢ်ပူၤအံၤ တၢ်ပၢၢ်ဆၢကရူၢ်ကရၢအိၣ်ဆိးလီၢ်အမဲၥ်ညါ လီၢ်ခံအံၤပၥ်ဝဲတၢ်ခးပနီၣ်မၤဝဲတၢ်ထီၣ်ဒုးလၢ ကမျၢၢ်ဒူသဝီ,ကၠိ, တၢ်ဆါဟံၣ်,တၢ်ဘူၣ် တၢ်ဘါတၢ်သူၣ်ထီၣ်အလီၢ်သ့ၣ်တဖၣ်အံၤအိၣ်ထီၣ်ဝဲကိးမုၢ်နံၤဒဲးတုၤလၢခဲအံၤန့ၣ်လီၤ.

တၢ်ထီၣ်ဒုးကမျၢၢ်ထံဖိကီၢ်ဖိဒီးတၢ်လုၢ်သ့ၣ်ခါပတၥ်မၤကမၣ်သုးကွီၣ်မ့ၣ်လအၢအၢသီသီလၢသုးမီၤစိရိၤမၤဝဲအံၤ ပၥ်ဖျါထီၣ် ဝဲသးလၢတအဲၣ်ဒိးဃဲၣ်လီၤဘှါဆှဲဝဲထံကီၢ်တၢ်ဂ့ၢ်ကီအံၤဘၣ်အသိး အအါဒီးအစှၤန့ၣ် မၤဘၣ်ဒိက့ၤဝဲတၢ်သိၣ်တၢ်သီ တၢ်ဘျၢ လၢကရူၢ်ကရၢဒီးထံဂုၤကီၢ်ဂၤလၢအတူၢ်လိၥ်ဆီၣ်ထွဲအဝဲသ့ၣ်တဖၣ်သ့ဝဲစ့ၢ်ကီးအဂ့ၢ်န့ၣ် စံးဝဲန့ၣ်လီၤ.

လၢတၢ်န့ၣ်အဃိ ဒ်သိးသုးမီၤစိရိၤလၢအသူဝဲတၢ်စုဆူၣ်ခီၣ်တကးလၢကမျၢၢ်အဖီခိၣ်အံၤတဖၣ်ကကတၢၢ်ကွံၥ်အဂီၢ်န့ၣ် သိၣ်မှံၤ ကရူၢ်ကရၢဒီး ထံဂုၤကီၢ်ဂၤတၢ်ကရၢကရိတဖၣ် အလီၢ်အိၣ်လၢကက့ၤဃိထံသမံသမိးလီၤက့ၤတၢ်ဖံးတၢ်မၤလၢအဘၣ်ဃးဒီး သုးမီၤစိရိၤသ့ၣ်တဖၣ်အံၤအဂ့ၢ်န့ၣ် SCEF ဆီၣ်တခူထီၣ်ဝဲဒၣ်န့ၣ်လီၤ.

တကးဒံးဘၣ် ဒ်သိးကမျၢၢ်ထံဖိကီၢ်ဖိတဖၣ်အံၤကပူၤဖျဲးလၢထသုးမီၤစိရိၤအမၤအၢမၤသီပူၤကန့ၢ်ဝဲအဂီၢ် ဒီး သုးမီၤစိရိၤသနူ ကလီၤပှီၢ်ကွံၥ်အဂီၢ်န့ၣ် ကပၥ်ဖှိၣ်မၤသကိးတၢ်ဒီး ကမျၢၢ်ထံဖိကီၢ်ဖိ,သိၣ်မှံၤတၢ်ကရၢကရိဃုၥ်ဒီးထံဂုၤကီၢ်ဂၤ ဟံၣ်ဖိဃီဖိတဖၣ်အဂ့ၢ်န့ၣ် (SCEF)အလံၥ်တၢ်ပၥ်ဖျါအပူၤ စံးဝဲန့ၣ်လီၤ.

လၢတၢ်ကမၤကတၢၢ်ကွံၥ်သုးမီၤစိရိၤသနူအံၤအဂီၢ် ဖဲလါမးရှးအခါန့ၣ် Steering Council for the Emergence of a Federal Democratic Union (SCEF) အံၤ ဘၣ်တၢ်ပၥ်ဖှိၣ်ဒုးအိၣ်ထီၣ်အီၤလၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဃုၥ်ဒီး(NUG),(CRPH),ကခၠ့ၣ်(KIO),ခၠီ(CNF),(Karenni)ကရူၢ်ကရၢသ့ၣ်တဖၣ် အံၤလၢအအိၣ်ဃုၥ်ဝဲဒီး ထံရူၢ်ကီၢ်သဲးတၢ်အိၣ် ဆၢထၢၣ် (၆)ထံၣ်အံၤန့ၣ်လီၤ.