လါအီးကထိဘၢၣ် ၁၀သီ, ၂၀၂၆နံၣ်, ခ့ၣ်အဲးစံၣ်,
မိၢ်ကီၢ်စဲၣ် မီၣ်လမၠဲၣ်ဝ့ၢ် သုးကရူၢ် ကလံၤထံးမုၢ်ထီၣ်ကီၢ်ခီဒိၣ်သုးဝဲၤလီၢ်ခိၣ်သ့ၣ်အပူၤ ကမျၢၢ်တၢ်ဒီသဒၢသုး (PDF)ဖိ(၁၀)ဂၤ ဟ့ၣ် လီၤသးပၥ်လီၤစုကဝဲၤအကျါ အပှၤသုးဖိသံၣ်ဖိ ပၣ်ဃုၥ်ဝဲ တအိၣ်ဝဲဒၣ်ဘၣ်အဂ့ၢ် (Venom) သုးကျိၤပှၤဘၣ်မူဘၣ်ဒါတဖၣ် စံးဝဲန့ၣ်လီၤ.
အပူၤကွံၥ် လါအီးကထိဘၢၣ် (၉)သီအနံၤအပူၤ ကလံၤထံးမုၢ်ထီၣ်ကီၢ်ခီဒိၣ်သုးဝဲၤလီၢ်ခိၣ်သ့ၣ်အပူၤ တီနီၢ်သုးကျိၤ, (Venom)သုးကျိၤဒီး ကီၣ်ဘရၤသုးကျိၤအပူၤ ကမျၢၢ်တၢ်ဒီသဒၢသုး (PDF)ဖိ(၁၀)ဂၤသ့ၣ်တဖၣ်အံၤ ဟ့ၣ်လီၤသး ပၥ်လီၤစုကဝဲၤလၢ သုးကရူၢ်အစုပူၤအိၣ်ဝဲ အဂ့ၢ်, သုးကရူၢ်တကပၤ ပၥ်ဖျါထီၣ်ဝဲဒၣ်န့ၣ်လီၤ.
သုးကရူၢ်တကပၤပၥ်ဖျါဝဲဒ်အံၤ ဘၣ်ဆၣ် (Venom)သုးကျိၤ တကပၤ လဲၤဟ့ၣ်လီၤသး ပၥ်လီၤစုကဝဲၤ တအိၣ် ဝဲဘၣ်အဂ့ၢ် ပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ “ပပှၤလၢကလဲၤဟ့ၣ်လီၤသးပၥ်လီၤစုကဝဲၤဒ်န့ၣ်ဒုတအိၣ်ဘၣ်.သုးကရူၢ်အံၤ ပပှၤသုးဖိသံၣ်ဖိ တဖၣ် လ့ၤတက့ၤ ပတူၢ်လိၥ် တသ့ဘၣ်.” အဂ့ၢ် စံးဝဲန့ၣ်လီၤ.
ဒ်သုးကရူၢ်ပၥ်ဖျါဝဲအသိးန့ၣ်,တီနီၢ်သုးကျိၤ,( Venom)သုးကျိၤဒီး ကီၣ်ဘရၤသုးကျိၤ ပှၤလၢဟ့ၣ်လီၤသးပၥ်လီၤ စုကဝဲၤသ့ၣ် တဖၣ်အံၤ မ့ၢ်ဝဲ ပိၥ်ခွါ(၉)ဂၤ ပိၥ်မုၣ်(၁)ဂၤ ခဲလၢၥ်(၁၀)ဂၤဒီး အဝဲသ့ၣ်တဖၣ်အံၤ စိၥ်ဃုၥ်ဝဲ ကျိ (၆)ခိၣ်,
ကျိချံဒၢ(၁) ဖျၢၣ်, စုမ့ၣ်ပိၢ်လၢအမၤပှံၢ်လီၤတၢ် (၅)ဖျၢၣ် ဒီး စဲးကတိၤတၢ် (၁)ဖျၢၣ် အဂ့ၢ်, သ့ၣ်ညါဘၣ်န့ၣ်လီၤ.
တကတီၢ်ဃီ, ပှၤလၢ ဟ့ၣ်လီၤသး ပၥ်လီၤစုသ့ၣ်တဖၣ်အံၤ မိၢ်ကီၢ်စဲၣ်ကိၥ်တိၥ်ခိၣ်ကျၢၢ် အူအီၣ်ဝ့သါ, ဒီး ကလံၤထံးမုၢ်ထီၣ်ကီၢ်ခိၣ်ဒီၣ်သုးဝဲၤလီၢ်ခိၣ်သ့ၣ် ပှၤဘၣ်မူဘၣ်ဒါတဖၣ် တူၢ်လိၥ်ဝဲဒီး ဟ့ၣ်လၤကပီၤဝဲအီၤလၢ ကျိၣ်စ့ အသိး ဆှၢက့ၤဝဲတူ မိၢ်ပၢ်ပှၤကွၢ်ထွဲတၢ်ဘၣ်ထွဲတဖၣ် အစုပူၤအဂ့ၢ်, သုးကရူၢ်ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး, သုးကရူၢ်အတၢ်ပၥ်ဖျါအံၤအဖီခိၣ်, မ့ၢ်ဒၣ် တၢ်ရၤလီၤလံၣ်အီၣ်လီအီၣ်ဝဲကမျၢၢ်တဖၣ် အဂ့ၢ်, ( Venom) ပှၤဘၣ်မူ ဘၣ် ဒါတဖၣ် ပဲၥ်ထံနီၤဖး စံးဝဲန့ၣ်လီၤ.
