လါအီးကထိဘၢၣ် ၁၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်လၢသုးမီၤစိရိၤမၤဆူၣ်ထီၣ်ဝဲကလံၤကျါ တၢ်ထီၣ်ဒုးအံၤ တနံၤဃီအတီၢ်ပူၤ ပယီၤသုးခးလီၤကဒီးဝဲကျိဖးဒိၣ်ဒီးဟးတ့ၢ်လီၤဒြိမ့ၣ်ပိၢ်လၢဒူသဝီပူၤတစှၤန့ၢ်ဝဲ(၁၇)ဖျၢၣ်အဖီခိၣ် ဟံၣ်ဟးဂီၤကဒီးဝဲ(၁)ဖျၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲလါအီးကထိဘၢၣ် ၉ သီတနံၤဃီန့ၣ် ပယီၤသုး(၄၄)ခီၣ်ချ့သုးဝဲၤလီၢ်ခိၣ်သ့ၣ်, ခီၣ်သုးရ့ၣ်(ခလရ-၂၀၇)ဒီး (၃၁၀)အမျိၥ်သုးရ့ၣ်သ့ၣ် တဖၣ်အံၤ ခးလီၤဝဲကျိဖးဒိၣ်,ပျၢ်ထီၣ်ဝဲဒြိမ့ၣ်ပိၢ်လဲၤတ့ၢ်လီၤဝဲဆူကၠဲးထိၣ်ကီၢ်ဆၣ် ဒူသဝီဒီးကမျၢၢ်တၢ်ဖံးအီၣ်မၤအီၣ်လီၢ်အံၤအပူၤ ဒီတနံၤကျၢၤ ညါန့ၣ်လီၤ.
ဟီၣ်ကဝီၤပူၤတၢ်ဒုးကဲထီၣ်တအိၣ် ဖဲအပူၤကွံၥ်လါအီးကထိဘၢၣ် ၉ သီ ဟါခီ ၂း၀၀ နၣ်ရံၣ် ဒီး ၅း၀၀ နၣ်ရံၣ် အဆၢကတီၢ်န့ၣ် (၄၄)ခီၣ်ချ့သုးဝဲၤလီၢ်ခိၣ်သ့ၣ်အံၤ ပျၢ်ထီၣ်ဝဲဒြိ(၂)ဘ့ၣ်လဲၤတ့ၢ်လီၤဝဲမ့ၣ်ပိၢ်(၄)ဖျၢၣ် လၢတကွံပူၤ(ငှက်ပျောတော) ကရူၢ် စံကိ(ဇီးကုန်း)သဝီပူၤ န့ၣ်လီၤ.
ဒီးလၢဒြိအတၢ်လဲၤတ့ၢ်လီၤတၢ်ဘျီဝဲအံၤအပူၤန့ၣ် ကမျၢၢ်တၢ်သံတၢ်ဘၣ်ဒိဘၣ်ထံးမ့တအိၣ်ဘၣ်ဘၣ်ဆၣ် သဝီပူၤ အူစိပ့ၤ အဟံၣ် ခိၣ်ဒုး ,အကပိၤကပၤလီၤပှီၢ်ဟးဂီၤဝဲဒီတဖျၢၣ်အဂ့ၢ်န့ၣ် သ့ၣ်ညါဘၣ်လၢဒူသဝီပှၤဘၣ်မူဘၣ်ဒါအအိၣ်န့ၣ်လီၤ.
တၢ်ကဲထီၣ်သးဖဲန့ၣ်ဝံၤ တနံၤဃီဖဲမုၢ်နၤခီ ၁၁း၂၇ မံးနံးအဆၢကတီၢ် (၄၄)ခီၣ်ချ့သုးဝဲၤလီၢ်သ့ၣ်တဒူၣ်ဃီဝဲအံၤဒီး (၃၁၀)အမျိၥ် သုးရ့ၣ်အံၤ ခးလီၤကဒီးဝဲ(၁၂၀ မမ)ကျိဖးဒိၣ် ၈ ဖျၢၣ်ဆူ ဆီသုးခံ(ကျောက်ဖျာ)ကရူၢ် ပတ့ၤတီၤ(ပတိမ်တောင်)ကမျၢၢ် တၢ်ဖံးအီၣ် မၤအီၣ်လီၢ်ကျဲအသိး ဖဲ ၁၁း၃၇ အခါန့ၣ်စ့ၢ်ကီး ခီၣ်သုးရ့ၣ်(၂၀၇)သုးရ့ၣ်အံၤ ပျၢ်ထီၣ်ကဒီးဝဲဒြိ(၃)ဘ့ၣ်လီၤ တဲၥ်ပိၢ်ဖးထီၣ်ဝဲ လၢမိဘီ (မိုးဘော) နၣ်စ့ၤ(နတ်စင်)သဝီကပၤန့ၣ်လီၤ.
ဆီသုးခံကရူၢ်ဒီး တကွံပူၤကရူၢ်အံၤန့ၣ် စးထီၣ်ဖဲအပူၤကွံၥ်လါစဲးပထ့ဘၢၣ် အသီ ၂၀ ဘျဲၣ်လီၢ်ခံအံၤ ခီဖျိလၢကျိဖးဒိၣ်,ဒြိအဃိ ကမျၢၢ်သံဘၣ်ဒိဘၣ်ထံး,ဟံၣ်ဃီဟးဂူၥ်ဟးဂီၤကဲထီၣ်ဒံးဒၣ်န့ၣ်လီၤ.
ဒ်န့ၣ်အသိးဒူသဝီတၢ်လီၢ်လၢကပယီၤသုးခးလီၤကျိဖးဒိၣ်ဒီးဒြိခဲအံၤန့ၣ် မ့ၢ်ဟီၣ်ကဝီၤလၢ(KNLA)ဃုၥ်ဒီး တၢ်ပၢၢ်ဆၢကရူၢ်ကရၢ လၢအပၢၢ်ဆၢထီ ဒါဝဲသုးမီၤစိရိၤအံၤတဖၣ်ဒိၣ်စိဟူးဂဲၤဝဲဘၣ်ဆၣ် ခံခီခံကပၤတၢ်ဒုးကဲထီၣ်တအိၣ်ဝဲဘၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးပယီၤသုးခးလီၤကျိဖးဒိၣ်ဒီးဟးတ့ၢ်လီၤဝဲဒြိမ့ၣ်ပိၢ်တလီၢ်လီၢ်တၢ်ဂ့ၢ်အံၤ ဒူသဝီကမျၢၢ်လၢတအဲၣ်ဒိးပၥ်ဖျါအမံၤတဂၤ စံးဝဲလၢ “စးထီးလၢလါစဲးပထ့ဘၢၣ် ၂၄,၂၅,၂၆ သီ တုၤလၢခဲအံၤန့ၣ် ကဘီယူၤ,ကျိဖးဒိၣ်ဒီးဒြိတူၢ်သံသးတဖၣ်န့ၣ်ပယီၤသုးဟူးဂဲၤဝဲမၢ်မၢ် လီၤ. ခဲအံၤပမ့ကွၢ်ဒုၣ်ဒါဟူးဂဲၤဝဲတဖၣ်န့ၣ် အါဒၣ်တက့ၢ် တၢ်စုနၢသၢဘိ(PDF)အိၣ်အလီၢ်တဖၣ်လီၤ. ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
ကၠဲးထိၣ်ကီၢ်ဆၣ်အပူၤကွံၥ်လါစဲးပထ့ဘၢၣ် ၃၀ သီအခါန့ၣ်စ့ၢ်ကီး ခီဖျိလၢပယီၤသုးဒြိအံၤအဃိ ဟီၣ်ကဝီၤ(PDF)အပှၤ ဘၣ်ဒိ ဘၣ်ထံးဝဲ(၂)ဂၤ ကဲထီၣ်ဒံးဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်သဝီဖိလၢအိၣ်ဘူးဖဲန့ၣ်တဂၤစံးဝဲအသိးန့ၣ် လီၢ်ခံအံၤတၢ်ပၢၢ်ဆၢဖီၣ်စုကဝဲၤကရူၢ်လၢအဟူးဂဲၤဖဲန့ၣ်တဖၣ်ဘၣ် တၢ်ပညိၣ် ခးလီၤဝဲကျိဖးဒိၣ် ဒီးလဲၤတ့ၢ်လီၤဝဲလၢဒြိဟဲအါထီၣ်အဖီခိၣ် လၢတၢ်ဘံၣ်တၢ်ဘၢအဂီၢ် ကမျၢၢ်လၢအိၣ်ဖဲန့ၣ်တဖၣ်သဂၢၢ်ဘၣ်ဝဲ တၢ်တၤ တၢ်တၢ်ကီတၢ်ခဲအကလုၥ်ကလုၥ် အဂ့ၢ်န့ၣ် သ့ၣ်ညါဘၣ်န့ၣ်လီၤ
တကီၢ်ခါခဲအံၤကၠဲးထိၣ်ကီၢ်ဆၣ်ဟီၣ်ကဝီၤအပူၤ ပယီၤသုးကျိၤအတၢ်နုၥ်လီၤဟူးဂဲၤမ့တအိၣ်ဘၣ်ဘၣ်ဆၣ် တၢ်ရဲၣ်တၢ်ကျဲၤအိၣ်လၢ ကမၤဆှဲ (PDF )အဃိ သုးမီၤစိရိၤအံၤသူဝဲကဘီယူၤ,ကျိဖးဒိၣ်ဒီး ဒြိကိးမုၢ်နံၤဒဲးအဖီခိၣ် လီၤဆီဒၣ်တၢ်ဆီသုးခံကရူၢ်ဒီး တကွံပူၤ ကရူၢ်ပူၤ ကမျၢၢ်သ့ၣ်တဖၣ် ပျံၤတၢ်ဖုးတၢ်အါဒၣ်တက့ၢ်ဘၣ်ဃ့ၢ်ထီၣ်ဟးပလဲၥ်သးလီၤလၢတၢ်ဘံၣ်တၢ်ဘၢ လီၢ်အဂ့ၢ်န့ၣ် လီၢ်ကဝီၤ ပှၤဘၣ်မူဘၣ်ဒါစံးဝဲန့ၣ်လီၤ.
