လါအီကူး ၂၃ သီႇ ၂၀၂၁ နံၣ်ႇ ခ့ၣ်အဲးစံၣ်
မီၤစိရိၤအသုးလၢအအိၣ်ဆီလီၤသးဖဲကၠၤအ့စ့ၣ်ကၠံကီၢ်ဆၣ် ကျ့းသ၀ီအပူၤတဖၣ်အံၤ ဖဲအပူၤကွံာ်လါအီကူး ၂၁ သီအနံၤန့ၣ် အ၀ဲသ့ၣ်ပာ်တ့ၢ်ကွံာ်အသုးကလၢၤဒီးဟးထီၣ်ကွံာ်၀ဲအလီၢ်ခံ သုးခိးကီၢ်ဆၢ(BGF)အသုးတဖၣ် ဟဲက့ၤအိၣ်ဆီလီၤက့ၤသးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
(BGF)သုးဟဲက့ၤအိၣ်ဆီလီၤက့ၤသးအဖီခိၣ် ကညီဒီကလုာ်စၢဖှိၣ်ကရၢ(KNU)တသးလီ၀ဲဘၣ်အမဲာ်ညါ (BGF)သုးမ့ၢ်ဟူးဂဲၤမၤ၀ဲဒ်သုးမီၤစိရိၤအတၢ်နဲၣ်ကျဲအသိးန့ၣ် တူၢ်လိာ်၀ဲတသ့ဘၣ်အဂ့ၢ်န့ၣ် KNU ဒူပျာ်ယာ်ကီၢ်ရ့ၣ် နဲၣ်ရွဲၣ် ပဒိၣ်စီၤလ့ၣ်စတၣ် စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ
အ၀ဲစံး၀ဲလၢ“တၢ်တခါအံၤဒုပဟ့ၣ်အခွဲးကသ့၀ဲလဲၣ်ႉ ဘၣ်မနုၤအဃိလဲၣ်န့ၣ် BGF သုးအံၤ အ၀ဲသ့ၣ်ဟူးဂဲၤ၀ဲဒၣ်လၢသုးမီၤစိရိၤအတၢ်ပၢဆှၢအဖီလာ်အဃိ တမ့ၢ်လၢအကဘၣ်ဂီၢ်ဖိးမံဒီးၦၤဘၣ်ႉ ဒီးအ၀ဲသ့ၣ်န့ၣ်ရ့လိာ်သးဒ်ဒီပုၢ်ဒီ၀ဲၢ်အသိးဒုအိၣ်မီၤနီၤႉ ဘၣ်ဆၣ်အ၀ဲသ့ၣ်မ့ၢ်ဟဲဆီလီၤအသုးဒု ပတူၢ်လိာ်အီၤတသ့ဘၣ်ႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
သုးမီၤစိရိၤပာ်တ့ၢ်ကွံာ်အသုးကလၢၤလၢကျ့းသ၀ီပူၤ၀ံၤအလီၢ်ခံ ဒူပျာ်ယာ်ကီၢ်ရ့ၣ်ႇ သုးက့(၆) ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၁၈)တီခိၣ်ရိၣ်မဲ လဲၤမၤရှဲလဲကွံာ်၀ဲဒၣ်သုးကလၢၤအံၤ ပသ့ၣ်ညါဘၣ်လၢသုးမီၤစိရိၤတကပၤတတူၢ်လိာ်၀ဲဘၣ်အဂ့ၢ်န့ၣ် စီၤလ့ၣ်စတၣ် စံးအါထီၣ်၀ဲန့ၣ်လီၤႉ
သုးမီၤစိရိၤအသုးလၢအအိၣ်ဆီလီၤသးဖဲကျ့းသ၀ီပူၤအံၤ ဖဲအ၀ဲသ့ၣ်ပာ်တ့ၢ်ကွံာ် အသုးကလၢၤဒီးဟးထီၣ်ကွံာ်၀ဲတနၤဃီ၀ဲန့ၣ် သုးခိးကီၢ်ဆၢ(BGF)သုးနီၣ်ဂံၢ်အဂၤ(၃၀) ဘျဲၣ်ဟဲက့ၤဆီလီၤသး၀ံၤ သုးမီၤစိရိၤအသုးလၢအလဲၤထီၣ်လၢကၠဲးဒိ၀့ၢ်တဖၣ်စ့ၢ်ကီးဟူးဂဲၤထီၣ်၀ဲလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“အလီၢ်န့ၣ်(BGF)ဟဲက့ၤအိၣ်ကဒါမီၤနီၤႉ ကအိၣ်၀ဲအဂၤ(၃၀)ဘျဲၣ်ႉ တနၤဃီဖဲပယီၤသုးဟးထီၣ်ဒီးအ၀ဲသ့ၣ်ဟဲက့ၤဆ့ၣ်နီၤအိၣ်ကဒါလီၤႉ အ၀ဲသ့ၣ်အိၣ်၀ဲ မူာ်မူာ်နီၢ်နီၢ်လီၤမီၤနီၤႉ ခဲအံၤလၢသ၀ီပူၤန့ၣ်တၢ်အိၣ်သးတဂ့ၤဘၣ်ႉ ပနၢ်ဟူစ့ၢ်ကီးလၢပယီၤသုးကဟဲက့ၤကဒါလီၤ တုၤဒုတတုၤဒံးဘၣ်ႉ တဲ၀ဲလၢမ့ဘၣ်သဂၢၢ်လိာ်သးဒုကခး၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
ခီဖျိသုးမီၤစိရိၤအသုးဟူးဂဲၤအါထီၣ်ဃိ လီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ဒုးကကဲထီၣ်ဒီး KNU ဒီးသုးမီၤစိရိၤအသုးတၢ်ခးလိာ်သးမ့ဟဲအိၣ်ထီၣ်န့ၣ် ဟံၣ်လၢအအိၣ်ဘူးဒီးပယီၤသုးကလၢၤတဖၣ် ကဟးစံၣ်ပလဲာ်သးအဂီၢ် တၢ်ဟဲဟ့ၣ်ပလီၢ်ဒုးသ့ၣ်ညါဆိပာ်၀ဲသ၀ီၦၤဘၣ်မူဘၣ်ဒါတဖၣ်အိၣ်၀ဲအဂ့ၢ်န့ၣ် လီၢ်က၀ီၤဖိတဂၤန့ၣ် စံး၀ဲန့ၣ်လီၤႉ
တကီၢ်ခါခဲအံၤ သုးမီၤစိရိၤအသုးတဖၣ်နုာ်လီၤဟံးန့ၢ်အလီၢ်အကျဲလၢ ကီးတရံး ကလံၤထံး ကမဲၤကိသ၀ီပူၤအဂၤ(၁၀၀)ဘျဲၣ်ဒီးကၠဲးဒိဟီၣ်က၀ီၤ ၀ဲၣ်တခိၤသ၀ီအပူၤလံန့ၣ်လီၤႉ ဒ်ပသ့ၣ်ညါဘၣ်လီၢ်ခံ ကတၢၢ်တၢ်အိၣ်သးအသိးန့ၣ် တၢ်ခးလိာ်သးကဲထီၣ်၀ဲလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
