လါအီးကထိဘၢၣ် ၁၃သီ, ၂၀၂၆နံၣ်, ခ့ၣ်အဲးစံၣ်.
ကီၢ်ကၠီၣ်တဲၣ်အပူၤ ကီၢ်ပယီၤပှၤမၤတၢ်ဖိတဖၣ်အဂီၢ် လံာ်ပၥ်ဖျါလၢအမ့ၢ်မတၤ (Certificate of Identity – CI) လံာ် တၢ်မၤအလီၢ် ၅ တီၤတဖၣ်န့ၣ် ကစးထီၣ်အိးထီၣ်ဖဲ လါအီးကထိဘၢၣ် ၁၄ သီအဂ့ၢ် ကီၢ်ပယီၤၦၤမၤတၢ်ဖိမီၢ်သီဝဲၤဒၢး ဘိးဘၣ်ရၤလီၤဝဲဖဲ လါအီးကထိဘၢၣ် ၁၂ သီအနံၤန့ၣ်လီၤ.
တၢ်ဟ့ၣ်လီၤ CI အလီၢ်တဖၣ်အံၤ ကအိၣ်ဖဲ Samut Sakhon, Samut Prakan, Surat Thani, Chiang Mai, ဒီး Chon Buri ကီၢ်ရ့ၣ်တဖၣ်အပူၤန့ၣ်လီၤ. .
လၢန့ၣ်အမဲၥ်ညါ ၦၤလၢအဲၣ်ဒိးမၤ CI တဖၣ် ကဘၣ်တီၢ်ထီၣ်စ့ၢ်ကီး လံာ်အုၣ်သးလၢအဝဲသ့ၣ် ဆှၢလီၤစ့ သၢလါအဘူးအလဲ ခဲလၢာ်၂၅ မျးကယၤဆူ အဟံၣ်ဖိဃီဖိအအိၣ် ဒ်တၢ်အုၣ်ကီၤအသိး န့ၣ်လီၤ.
“CI တၢ်မၤအဂီၢ် ခါဆူညါ စ့ၢ်ကီး တၢ်လိၣ်ဘၣ်လံာ်အုၣ်သးတဖၣ် ကအါထီၣ်သ့ဝဲန့ၣ်လီၤ. ဒ်သိးဒီး တၢ်အုၣ်သးလၢတၢ်ဆှၢလီၤစ့ဆူဟံၣ်ဖိဃီဖိအအိၣ် ဒီး တၢ်ခိတၢ်သွဲတဖၣ်အဃိ တၢ်လၢာ်ဘူၣ်လၢာ်စ့ၤစ့ၢ်ကီး ကအါထီၣ်သ့ဝဲလီၤ. ၦၤမၤတၢ်ဖိတဖၣ် အဘူးအလဲစ့ၢ်ကီး စှၤဝဲအဃိ တၢ်လၢာ်ဘူၣ်လၢာ်စ့ၤတဖၣ်အံၤ ကဟ့ၣ်ဝဲအဂီၢ် ကီခဲဝဲလီၤ” အဂ့ၢ် ၦၤမၤတၢ်ဖိပိာ်မုၣ်တဂၤလၢအိၣ်ဒီး CI လၢအမၤတၢ်ဖဲ ကံၢ်မဲဝ့ၢ် ဒီးတအဲၣ်ဒိးပာ်ဖျါထီၣ်အမံၤဘၣ်တဂၤ စံးဝဲန့ၣ်လီၤ.
ၦၤလၢအဲၣ်ဒိးလဲၤမၤ CI တဖၣ် ကဘၣ်လဲၤဟ့ၣ်လီၤ CI လံာ်အပှ့ၤ ၂,၆၆၀ ဘး ဖဲ 7-Eleven ကျးလၢအဘူးဒီးအဝဲသ့ၣ်အလီၢ်ဒီး ဃုထၢဝဲဒၣ်တၢ်မၤ CI အလီၢ်သ့ဝဲအဂ့ၢ် လံာ်တၢ်ဘိးဘၣ်ရၤလီၤအပူၤ ပာ်ဖျါဝဲန့ၣ်လီၤ
CI တၢ်မၤအဂီၢ် တၢ်လိၣ်ဘၣ်လံာ်အုၣ်သးတဖၣ် ဒီး စ့တၢ်လၢာ်ဘူၣ်လၢာ်စ့ၤတဖၣ် ကအါထီၣ်သ့ဝဲအဂ့ၢ်န့ၣ် ကီၢ်ပယီၤမၤတၢ်ဖိတဖၣ်အကျါ တၢ်သးကိၢ်သးဂီၤအိၣ်ဝဲဒီး အဝဲသ့ၣ်တဖၣ် ပာ်ဖျါထီၣ်အတၢ်ထံၣ်ဒီး တၢ်ပာ်သူၣ်ပာ်သးတဖၣ်လၢ Facebook အဖီခိၣ်စ့ၢ်ကီးန့ၣ်လီၤ.
