လါယူၤလံ ၃၁ သီ, ၂၀၂၅ နံၣ်,
တလၢၤကီၢ်စဲၣ် သၤဖၠူၤစယၣ်ကီၢ်ဆၣ်အပူၤ ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်ခိးခးဝဲပယီၤသုးအဃိ ပယီၤသုးတကပၤသံ(၅)ဂၤ,ဘၣ်ဒိ(၂)ဂၤအဂ့ၢ်န့ၣ် တလၢၤတၢ်ပၢၢ်ဆၢသုးကရူၢ် Mon State Revolutionary Force-MSRF ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ.
ဒ်တလၢၤတၢ်ပၢၢ်ဆၢကရူၢ် MSRF ထုးထီၣ်ပၥ်ဖျါဝဲအသိးန့ၣ် သၤဖၠူၤစယၣ်ကီၢ်ဆၣ်ပူၤ အပူၤကွံၥ်လါယူၤလံ ၂၉ သီ ဂီၤခီ ၇း၀၀ ဘျဲၣ် အဆၢကတီၢ် ပယီၤသုးဂံၢ်ဘါအဂၤ(၄၀)ဃၣ်ဃၣ်လၢအိၣ်ဟးထီၣ်ဖဲ(အနင်း)သ၀ီ ပၢၤကီၢ်သုးဝဲၤလီၢ်အံၤတဖၣ် တလၢၤ တၢ်ပၢၢ်ဆၢကရူၢ်(MSRF)ဃုၥ်ဒီးယ့တၢ်ဒီသဒၢကမျၢၢ်သုး(YPDF),ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၂၇) သုးဒ့(၁) သုးပၥ်ဖှိၣ် သ့ၣ်တဖၣ်အံၤ အိၣ်ခိးခးအဝဲသ့ၣ်လီၤ.
လၢတၢ်ခိးခးပယီၤသုးဘျီဝဲအံၤအပူၤန့ၣ် ပယီၤသုးတကပၤသံဝဲ(၃)ဂၤဒီးဘၣ်ဒိ(၂)ဂၤအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
တကးဒံးဘၣ်ဖဲမဟါလါယူၤလံ ၃၀ သီ မုၢ်ထူၣ် ၁၁း၃၀ အဆၢကတီၢ်န့ၣ်စ့ၢ်ကီး ပယီၤသုးအိၣ်ဆီလီၤသးဖဲ ဝီၢ်ရ့ၣ်ကီၢ်ဆၣ်ကလံၤစိး (ကွမ်ကျိုက်)သ၀ီဃၢၤအံၤသ့ၣ်တဖၣ် တၢ်ပၢၢ်ဆၢသုးပၥ်ဖှိၣ်တဒူၣ်ဃီဝဲအံၤနုၥ်လီၤခးအဝဲသ့ၣ်အဃိ ဖဲန့ၣ်ပယီၤသုးတကပၤသံ ကဒီးဝဲ(၂)ဂၤအဂ့ၢ်န့ၣ် MSRF စံးဝဲန့ၣ်လီၤ.
ဒ်န့ၣ်အသိးဖဲတၢ်လဲၤခးပယီၤသုးသ့ၣ်တဖၣ်အံၤအခါန့ၣ် ပယီၤသုးတကပၤခးလီၤကဒါကျိဖးဒိၣ်ကအိၣ်လၢအဘျီ(၃၀)ဃၣ်ဃၣ် ညါအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
တလၢၤတၢ်ပၢၢ်ဆၢသုးကရူၢ် MSRF အံၤ လၢတၢ်ဒုးထီဒါသုးမီၤစိရိၤဒုးယၤဂ့ၢ်ဝီတၢ်ဟူးတၢ်ဂဲၤအပူၤန့ၣ် ပၥ်ဖှိၣ်မၤသကိးတၢ်ဒီး တၢ်ပၢၢ်ဆၢကရူၢ် ကရၢလၢအဂၤတဖၣ်အကျါပၣ်ဃုၥ်စ့ၢ်ကီးဝဲဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢကဟဲလါဒံၣ်စ့ဘၢၣ်ဒီးလါယနူၤအါရံၤ တၢ်ဃုထၢလၢသုးကီၣ်ကးကမၤဝဲဘျီဝဲအံၤအပူၤန့ၣ် လီၢ်ကဝီၤသဝီသူၣ်က့သးပှၢ်, (Non-CDM)ပှၤမၤတၢ်ဖိတဖၣ် လၢတၢ်ဃုထၢတၢ်ဟူးတၢ်ဂဲၤတၢ်ဖံးတၢ်မၤဘျီဝဲအံၤအပူၤ လ့ၤတက့ၤတဘၣ်ပၥ်ဖှိၣ် မၤသကိးတၢ်ဒီး သုးကီၣ်ကးဘၣ် အဂ့ၢ်န့ၣ် အပူၤကွံၥ်လါယူၤလံ ၂၀ သီ (MSRF),(YPDF), တီၢ်နီၢ်သုးရ့ၣ်(၂) Dawna Column ကရူၢ်သ့ၣ် တဖၣ်အံၤ ထုးထီၣ်သဃဲၤဝဲလံၥ်ဟ့ၣ်ပလီၢ်တဘ့ၣ်ဒံးန့ၣ်လီၤ.
