လါအီးကထိဘၢၣ် ၂၉သီ, ၂၀၂၆နံၣ်, ခ့ၣ်အဲးစံၣ်,
ကီၢ်ပယီၤထံကီၢ်အပူၤ တၢ်မၤထီဒါပှၤကညီဂ့ၢ်ဝီခွဲးယၥ်,တၢ်ဒိသူၣ်ဒိသးတၢ်ဆီၣ်ထွဲမၤစၢၤတၢ်ဃံးတၢ်စ့ၤဒီး တၢ်မၤပယွဲ ပိၥ်မုၣ်ပိၥ်မၢၤတၢ်ဘၣ်ဒိဘၣ်ထံး သ့ၣ်တဖၣ်အံၤ ထံဂုၤကီၢ်ဂၤကထံၣ်သ့ၣ်ညါဒီး ဟံးထီၣ်ဖီၣ်အရ့အဂီၢ်, ကီၢ်ပယီၤ ပိၥ်မုၥ် ပိၥ်မၢၤကရၢခိၣ်ကျၢၢ် Women’s League of Burma (WLB) တီၣ်ဖျါထီၣ်ဝဲဒၣ်လၢ ဘီမုၢ်စၢဖှိၣ်ကရၢ တၢ်အိၣ်ဖှိၣ်တဲသကိးအပူၤ န့ၣ်လီၤ.
အပူၤကွံၥ် လါအီးကထိဘၢၣ်(၂၆)သီအနံၤ တၢ်မၤဝဲဘီမုၢ်စၢဖှိၣ်ကရၢတၢ်အိၣ်ဖှိၣ်ဖးဒိၣ်လၢ နယူယီး အပူၤ (WLB) (Advocacy ) တၢ်ကတိၤန့ၢ်ခဲးတၢ်ကရူၢ်ကရၢခၢၣ်စး သ့ၣ်တဖၣ် အံၤ ပၣ်ဃုၥ်ပၣ်ဂီၢ်ဝဲလၢ တၢ်အိၣ်ဖှိၣ် တၢၣ် ပီၣ် တဲသကိး အပူၤဒီး ပၥ်ဖျါ ထီၣ်ဝဲ ကီၢ်ပယီၤထံကီၢ် ကမျၢၢ်ထံဖိကီၢ်ဖိအတၢ်အိၣ်သးအဂ့ၢ်, ရၤလီၤပၥ်ဖျါဝဲဒၣ်န့ၣ်လီၤ.
တၢ်ကတိၤပၥ်ဖျါထီၣ်တၢ်ဆူ ထံဂုၤကီၢ်ဂၤတၢ်အိၣ်ဖှိၣ်အပူၤအဖီခိၣ်, (WLB) ပှၤကတိၤန့ၢ်ခဲးတၢ်မူဒါခိၣ် နီၢ်ဆၢဆၢ စံးဝဲလၢ “လီၤဆီဒၣ်တၢ် ပကတိၤပၥ်ဖျါထီၣ်ဝဲ တကီၢ်ခါ ကီၢ်ပယီၤထံဖိကီၢ်ဖိတဖၣ်အတၢ်ဘၣ်သဂၢၢ်တၢ်ဃံး တၢ်စ့ၤ, သုးကရူၢ်အတၢ်မၤထီဒါပှၤဟီၣ်ခိၣ်ဖိခွဲးယၥ်, ပိၥ်မုၣ်ပိၥ်မၢၤ သူၣ်ဘီၣ်သးစၢ် တဖၣ် အတၢ်ဘၣ်ဒိဘၣ်ထံး, ကဘီယူၤ အတၢ်ထီၣ် ဒုးမၤဟးဂီၤတၢ်, ကမျၢၢ်တၢ်ဘၣ်ကဲသုးတၢ်ဘၣ်ဒိဘၣ်ထံးသ့ၣ်တဖၣ်န့ၣ်လီၤ.”အဂ့ၢ် စံးဝဲန့ၣ်လီၤ.
လၢန့ၣ်အမဲၥ်ညါ, ကတိၤပၥ်ဖျါဃုၥ်ဝဲဒၣ်လၢ တၢ်သုတတူၢ်လိၥ်ဝဲ သုးကရူၢ်တဖၣ်အံၤဒီး ပၥ်ပနီၣ်အီၤလၢအဖိးသဲစး တဂ့ၤ အဂ့ၢ်, စံးအါထီၣ်ဝဲန့ၣ်လီၤ.
တကးဒံးဘၣ်,ဒ်သိး ထံဂုၤကီၢ်ဂၤ တဖၣ် သုတကလဲၤကပၥ်ကွံၥ်ဝဲ ကီၢ်ပယီၤအတၢ်အိၣ်သးဒီး ကဟ့ၣ်ဝဲပှၤကညီတၢ်ဒိ သူၣ်ဒိသးတၢ်ဆီၣ်ထွဲမၤစၢၤလၢ လီၢ်ကဝီၤတၢ်ကရၢကရိကရူၢ်ကရၢတဆီဒီး , ကပတုၥ်ကွံၥ်ဝဲ တၢ်ဆီၣ်ထွဲ မၤစၢၤသုး ကရူၢ် ကဘီယူၤသိ အဂ့ၢ်, ဆီၣ်တခူဝဲစ့ၢ်ကီးအဂ့ၢ် (WLB) ပၥ်ဖျါဝဲန့ၣ်လီၤ.
တကတီၢ်ဃီ, ဘၣ်ဃးဒီး (WLB)အတၢ်ကတိၤပၥ်ဖျါထီၣ်ဘျီဝဲအံၤန့ၣ်,(UN)တကပၤ အတၢ်ခီၣ်ဆၢ လီၤတံၢ်လီၤမံလၢ ကီၢ်ပယီၤထံကီၢ် ဂ့ၢ်ဝီ အဖီခိၣ် တအိၣ် ဝဲနီတမံၤဒံးဘၣ်ဆၣ်, မၤဝဲတၢ်ထၢဖှိၣ် ပၥ်ဖှိၣ် တၢ်ဂ့ၢ်တၢ်ကျိၤလၢ အဘၣ်ဃးဒီး ကီၢ်ပယီၤထံကီၢ်တၢ်သဘံၣ်ဘုၣ် ဒီး တၢ်မၤကမၣ်မၤထီဒါ ပှၤဟီၣ်ခိၣ်ဖိခွဲးယၥ် တၢ်အုၣ်ကီၤသးတဖၣ် အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
(WLB)အံၤ မ့ၢ်ကရူၢ်ကရၢတဖုလၢ တၢ်ဒုးအိၣ်ထီၣ်ဝဲအီၤလၢ ကီၢ်ပယီၤ ကလုၥ်ဒူၣ်ပိၥ်မုၥ်ပိၥ်မၢၤကရူၢ်ကရၢတဖၣ် ဒီး တၢ်ဒုးအိၣ်ထီၣ်ဝဲ ဖဲ(၁၉၉၉)နံၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး, ကရူၢ်ကရၢအံၤလၢ ပိၥ်မုၣ်ပိၥ်မၢၤခွဲးယၥ်ဂ့ၢ်ဝီ, ဒံၣ်မိၣ်ကရ့ၣ်ဒီး တၢ်မုၥ်တၢ်ခုၣ်ဂ့ၢ်ဝီအဂီၢ် ဂုၥ်ကျဲးစၢးဝဲဒီး ဟူးဂဲၤဝဲလၢ ကလုၥ်ဒူၣ်တၢ်ထဲသိးတုၤသိး အဂီၢ်အဂ့ၢ်,သ့ၣ်ညါဘၣ်န့ၣ်လီၤ.
