လါယူၤ ၂၉ သီႇ ၂၀၂၁ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ ချၢၣ်လွံၣ်ထူၣ်ကီၢ်ရ့ၣ် ဆီထံးကီၢ်ဆၣ် (သုးက့=၃)ဟီၣ်က၀ီၤအပူၤ ခီဖျိသုးမီၤစိရိၤဖီၣ်ပီၣ်တၣ်အဃိ လီၢ်က၀ီၤကမျၢၢ်ထံဖိကီၢ်ဖိတဖၣ် ဘၣ်အိၣ်လၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးမီၤစိရိၤအသုးလၢအအိၣ်လၢဟီၣ်က၀ီၤပူၤတဖၣ်လၢအမ့ၢ် ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ=၁၂)စု ဒုၣ်တီၤအဖီလာ် ခီၣ်ချ့သုးရ့ၣ်(ခမရ=၅၄၈)ဒီး(စကခ=၈)စုဒုၣ်တီၤအဖီလာ် ခီၣ်ချ့သုးရ့ၣ်(ခမရ=၄၀၂)တဖၣ် ဖဲအပူၤကွံာ်(လါယူၤ ၂၃)သီအနံၤ ဟဲဖီၣ်၀ဲဆီထံးကီၢ်ဆၣ် ဘျီခိၣ်သ၀ီဖိ(၁၃) ဂၤဒ်သိးကလဲၤပီၣ်တၣ်အဃိ လီၢ်က၀ီၤဖိတဖၣ်ဘၣ်ဟးဃ့ၢ်အိၣ်ခူသူၣ်၀ဲအဂ့ၢ်န့ၣ်် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ
အ၀ဲစံး၀ဲလၢ“မီၤစိရိၤအသုးဟဲဖီၣ်ပီၣ်တၣ်န့ၣ်မ့ၢ်၀ဲလီၤႉ ပျၢ်ဒုပျၢ်လီၤ၀ဲလံႉ စးထီၣ်လၢတၢ်ဆဲး လီၤ NCA ၀ံၤအလီၢ်ခံန့ၣ် တၢ်ဟဲဖီၣ်ပီၣ်တၣ်ဒ်အံၤတအိၣ်နီတဘျီဘၣ်ႉ ပယီၤသုးဟဲနု၁်လီၤ လၢသ၀ီပူၤဒီးဟဲဖီၣ်၀ဲပီၣ်တၣ်ဒ်အံၤအဃိ လီၢ်က၀ီၤဖိတဖၣ်ဘၣ်ယိၣ်ဘၣ်ဘှီတၢ်ဒီးဟးပလဲာ်သးတစိၢ်တလီၢ်အိၣ်လီၤမီၤနီၤႉ ခဲအံၤၦၤဟဲက့ၤကဒါလၢသ၀ီပူၤလၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ
သုးမီၤစိရိၤအသုးလၢအနီၣ်ဂံၢ်ကအိၣ်(၇၀)ဘျဲၣ်အံၤ ဒ်သိးကလဲၤထီၣ်လၢ KNU သုးက့(၅)တကပၤအဂီၢ် ဖဲတၢ်တနံၤန့ၣ်ဟဲနုာ်လီၤ၀ဲဒၣ်ဆူဘျီခိၣ်သ၀ီအပူၤဒီး ဖဲန့ၣ်ဖီၣ်၀ဲဒၣ်လီၢ်က၀ီၤဖိ(၁၃)ဂၤလၢကလဲၤပီၣ်တၣ်ဒီး ဖဲအကျါ(၃)ဂၤန့ၣ်ဃ့ၢ်ပူၤဖျဲးအသးန့ၣ်လီၤႉ သ၀ီဖိလၢအအိၣ်အဂၤ(၁၀)န့ၣ် တၢ်က့ၤကိးအ၀ဲသ့ၣ်တုၤလၢ သုးက့(၃)ဒီးသုးက့(၁)အဘၢၣ်စၢၤ လီပီၤထၣ်သ၀ီဒီး ဖဲလါယူၤ ၂၇ သီအနံၤန့ၣ်ပျၢ်လီၤက့ၤ၀ဲအဂ့ၢ်န့ၣ် KNU တၢ်ဘိးဘၣ်ရၤလီၤတၢ်ကစီၣ်၀ဲၤကျိၤ သူလ့ၤတၢ်ကစီၣ်ပာ်ဖျါ၀ဲန့ၣ်လီၤႉ
ခီဖျိသုးမီၤစိရိၤဖီၣ်ပီၣ်တၣ်လၢဟီၣ်က၀ီၤပူၤအဃိ ဘျီခိၣ်သ၀ီကရူၢ်အပူၤ သ၀ီ(၁၁)ဖျၢၣ် လီၢ်က၀ီၤဖိတကထိဘျဲၣ် ဘၣ်ဟးဃ့ၢ်ပလဲာ်သးတစိၢ်တလီၢ်အိၣ်၀ဲအသိး ခဲအံၤလီၢ်က၀ီၤဖိတဖၣ်ဟဲက့ၤတုၤ၀ဲလၢအဟံၣ်လံဘၣ်ဆၣ် ဘၣ်ယိၣ်၀ဲလၢတၢ်ကဖီၣ်ကဒီးပီၣ်တၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
စးထီၣ်လၢသုးမီၤစိရိၤဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤ၀ံၤအလီၢ်ခံ သုးမီၤစိရိၤအသုးဟဲဃုသ့ၣ်ညါ တၢ်ဒီး(drone)လၢ KNU သုးက့(၃)ဆီထံးကီၢ်ဆၣ်အပူၤအိၣ်၀ဲတလီၢ်လီၢ်အမဲာ်ညါ ဖဲအပူၤကွံာ် (လါမးရှး ၃၀)သီအနံၤစ့ၢ်ကီး ခီဖျိသုးမီၤစိရိၤအသုးဟဲကွံာ်လီၤမ့ၣ်ပိၢ်ဒီးကဘီယူၤအဃိ လီၢ်က၀ီၤဖိလၢ အကထိဘၣ်ဃ့ၢ်ပူၤဖျဲးသးအဂ့ၢ်န့ၣ် ဟီၣ်က၀ီၤၦၤဂ့ၢ်၀ီတၢ်ကရၢကရိအလံာ်တၢ်ပာ်ဖျါအသိးသ့ၣ်ညါဘၣ်န့ၣ်လီၤႉ
