လါနိၣ်ဝ့ဘၢၣ် ၂ သီ၊ ၂၀၂၆ နံၣ် ခ့ၣ်အဲးစံၣ်
ကရ့ၣ်နံၣ်ကီၢ်ရ့ၣ် လွဲၢ်ကီၤကီၢ်ဆၣ် မုၢ်ထီၣ်တကပၤ ဝၣ်ငီး ပှၤဃ့ၢ်မှံဖိတဖၣ် အတၢ်မၤလိကၠိ ဘၣ်တၢ်ခးလီၤမ့ၣ်ပိၢ်လၢ သုးမီၤစိရိၤအကျိၤကျဲတၢ်ခးလီၤမ့ၣ်ပိၢ်အဃိ ကၠိဖိပိာ်ခွါဒီးပိာ်မုၣ် ၃ ဂၤ သံဝဲဒီး ၅ ဂၤ ဘၣ်ဒိဘၣ်ထံးဝဲအဖီခိၣ် KnHRG ပာ်ဖျါထီၣ် ထီဒါဝဲဒၣ်အဂ့ၢ် ပၥ်ဖျါဝဲဒၣ် ဖဲလါနိၣ်ဝ့ဘၢၣ် ၂ သီအနံၤန့ၣ်လီၤ.
တၢ်အံၤကဲထီၣ်သး ဖဲ လါအီးထိဘၢၣ် ၃၁ သီ မုၢ်ဆါခီ ဖိသၣ်တဖၣ် မၤလိတၢ်အဆၢကတီၢ်န့ၣ်လီၤ. တၢ်ခးလီၤမ့ၣ်ပိၢ်အံၤ ဘၣ်တၢ်မၤအီၤခီဖျိ Y-12 ကဘီယူၤဒီး ကၠဲးဖဲၣ်ထၢၣ် (Jet fighter) တဖၣ်ဒီးခးလီၤမ့ၣ်ပိၢ်အဖျၢၣ်အါန့ၢ် ၂၀ အဖီခိၣ်န့ၣ်လီၤ.
ကၠိဖိလၢအသံတဖၣ်မ့ၢ်ဝဲ သၢတီၤကၠိဖိပိၥ်ခွါတဂၤ ယဲၢ်တီၤဒီးနွံတီၤ ကၠိဖိပိၥ်မုၣ်ခံဂၤဒီး ကၠိဖိလၢအဘၣ်ဒိ ၅ ဂၤန့ၣ် မ့ၢ်ဝဲ ဖိသၣ်လၢ အသးအိၣ် ၉ နံၣ်ဒီး ၁၆ နံၣ်အဘၢၣ်စၢၤတဖၣ်န့ၣ်လီၤ. လၢအဝဲသ့ၣ်အကျါ ကၠိဖိလၢအသးအိၣ် ၉ နံၣ်တဂၤ အခိၣ်သၣ်ဃံဘၣ်ဒိဝဲနးနးကလဲၥ်ဒီး အိၣ်လၢတၢ်သံတၢ်မူအဘၢၣ်စၢၤန့ၣ်လီၤ.
KnHRG အလံၥ်ပၥ်ဖျါပူၤ ပၥ်ဖျါထီၣ်ဝဲလၢ ဖဲတၢ်ခးလီၤတၢ်ကဲထီၣ်အဖၢမုၢ်န့ၣ် ဟီၣ်ကဝီၤအဝဲန့ၣ်ပူၤ တၢ်ဒုးတၢ်ယၤ တအိၣ်ဝဲဘၣ်ဒီး ဖိသၣ်လၢမၤလိလံၥ်အဖၢမုၢ်တဖၣ် ဘၣ်ဒိဝဲဒၣ်န့ၣ်လီၤ
လၢန့ၣ်အမဲၥ်ညါ KnHRG ပၥ်ဖျါထီၣ်ဝဲလၢ စးထီၣ်လၢ ၂၀၂၆ လါယူၤလံတုၤ လါစဲးတ့ဘၢၣ်အဘၢၣ်စၢၤန့ၣ် လၢကရ့ၣ်နံၣ်ကီၢ်စဲၢ်ပူၤ တၢ်ခးလီၤတၢ်လၢကဘီယူၤအိၣ်ဝဲ အါန့ၢ်ဒံး ၁၅ ဝီဒီး တၢ်ခးလီၤဒြိ အိၣ်ဝဲ အါန့ၢ်ဒံး ၃၅ ဝီလီၤအဂ့ၢ် တၢ်မၤနီၣ်မၤဃါအိၣ်ဝဲဒၣ်န့ၣ်လီၤ
လၢတၢ်ခးလီၤတၢ်တဖၣ်န့ၣ်အဖီခိၣ် ပှၤလၢအအိၣ်ဒီးမူဒါတဖၣ် ဒ်ကဟံးန့ၢ်မူဒါအဂီၢ် ဒ်သိးကဆှၢခီ ပှၤဟီၣ်ခိၣ်ဖိခွဲးယၥ်တၢ်အိၣ်သးလၢ ကီၢ်ပယီၤပူၤ ဆူ ထံဂုၥ်ကီၢ်ဂၤကွီၢ်ဘျီၣ် ICC ဒီး ဒ်သိးကမၤသကိးတၢ်ဒီး လီၢ်ကဝီၤ တၢ်ကရၢကရိတဖၣ်အဂီၢ် KnHRG ဃ့ထီၣ်ဝဲဒၣ်ဆူ ထံဂုၤကီၢ်ဂၤ ပှၤမၤသကိးတၢ်တဖၣ်န့ၣ်လီၤ.
