လါနိၣ်ဝ့ဘၢၣ် ၁၀ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်စ့တၢးမိၢ်ၦၢ် (Bank of Thailand) ကထုးထီၣ်ဝဲ စ့ဘးအသီ ၁၀၀ဘး အဘ့ၣ် ၂၀ ကကွဲၢ် လၢကမၤလၤကပီၤ ဒီး တၢ်သ့ၣ်နီၣ်ထီၣ်က့ၤ နီၢ်ပၤမုၣ် စံၤရံၣ်ခ့းဒီး နီၢ်ပၤမုၣ်ဖိ ဘၣ်ဂၠးရကံးတံးယာ်ဖၤ လၢအလဲၤပူၤကွံၥ်တ့ၢ်လံတဖၣ်န့ၣ်လီၤ. စ့ဘးအသီ ၁၀၀ဘး အဘ့ၣ် ၂၀ ကကွဲၢ် အံၤ ကစးထီၣ်ရၤလီၤ ဖဲ လါဒံၣ်စဲဘၢၣ် ၂၁ သီအနံၤဆူ ထံဖိကီၢ်ဖိတဖၣ်အအိၣ်န့ၣ်လီၤ.
ကီၢ်ကၠီၣ်တဲၣ်စ့တၢးမိၢ်ၦၢ်ၦၤပၢအဆှၢတၢ် Vitai Ratanakorn စံးဝဲလၢ အဝဲသ့ၣ်ထုးထီၣ်ဝဲ စ့ဘးအဘ့ၣ်တဖၣ်အံၤ မ့ၢ်ဒ်သိးကမၤလၤကပီၤ နီၢ်ပၤမုၣ်ခံဂၤအတၢ်မၤဂ့ၤလၢ ထံကီၢ်ဒီးထံဖိကီၢ်ဖိအဂီၢ် ဒီး ဒ်သိးထံဖိကီၢ်ဖိတဖၣ် ကပာ်ဃာ်အီၤ ဒ်တၢ်သ့ၣ်နီၣ်ထီၣ်က့ၤတမံၤအသိး အဂ့ၢ် ပၥ်ဖျါထီၣ်ဝဲဖဲ လါနိၣ်ဝ့ဘၢၣ် ၉ သီအနံၤန့ၣ်လီၤ.
စ့ဘးအဘ့ၣ်တဖၣ်အံၤ တၢ်ကဘၣ်မၤအီၤလၢ က့ၢ်ဂီၤခံကလုာ် ဒီး က့ၢ်ဂီၤတကလုာ်စုာ်စုာ် ကအိၣ်ဝဲ အဘ့ၣ် အကကွဲၢ် ၁၀ န့ၣ်လီၤ. စ့ဘးအဘ့ၣ်တဘ့ၣ်စုာ်စုာ် အလုၢ်အပှ့ၤမ့ၢ်ဝဲ ၁၀၀ ဘးဒီး ကဒိးန့ၢ်ဘၣ်အီၤသ့လၢ ကီၢ်ကၠီၣ်တဲၣ် ဒီတဘ့ၣ်အပူၤလၢ နီၢ်တဂၤပၢစ့တၢးတဖၣ် ဒီးပဒိၣ်ပၢစ့တၢးတဖၣ်အပူၤန့ၣ်လီၤ.
စ့ဘးအဘ့ၣ်တဖၣ်အမဲာ်ညါတကပၤန့ၣ် ကပာ်ဖျါထီၣ်ဝဲ စ့ဘး ၁၀၀ အဘ့ၣ် လၢခဲအံၤပှၤသူအီၤတဖၣ် အက့ၢ်အဂီၤအသိးန့ၣ်လီၤ. အလီၢ်ခံတကပၤန့ၣ် ကပာ်ဖျါထီၣ်ဝဲ နီၢ်ပၤမုၣ်စံၤရံၣ်ခ့းဒီး နီၢ်ပၤမုၣ်ဖိ ဘၣ်ဂၠးရကံးတံးယာ်ဖၤ အတၢ်မၤလၢ အမ့ၢ်တၢ်မၤလၢ တၢ်ပၢတၢ်ပြးအဂီၢ် ဒီးတၢ်မၤလၢ ပှၤဂ့ၢ်ဝီအဂီၢ် အဂီၤတဖၣ်န့ၣ်လီၤ. လၢန့ၣ်အမဲာ်ညါ ကပၣ်ဃာ်စ့ၢ်ကီးဝဲ တၢ်ဘံၣ်တၢ်ဘၢအတၢ်ပနီၣ်လီၤဆီတဖၣ် လၢကထံၣ်ဘၣ် ခီဖျိတၢ်သူ ဂီၤလုးတၢ်ကပီၤ (Ultraviolet light) န့ၣ်လီၤ.
တၢ်သ့ၣ်နီၣ်ထီၣ်က့ၤစ့ဘးအဘ့ၣ်တဖၣ်အမဲာ်ညါ စ့ဘးအဘ့ၣ်တဖၣ်အံၤ ကပာ်ဃာ်အီၤသ့အဂီၢ် တၢ်ထၢနုာ်အလီၢ် (Money Box) တဖၣ်စ့ၢ်ကီး ကဆါဝဲ တခါ ၁၀ ဘးန့ၣ်လီၤ. ဒီးစ့လၢ တၢ်ဆါအီၤန့ၢ်ဘၣ်တဖၣ် ကဟ့ၣ်လီၤဆူ စီၤပၤအအိၣ် ဒ်သိးကသူအီၤလၢ ပှၤဂ့ၢ်ဝီတၢ်မၤဂ့ၤတဖၣ်အဂီၢ်န့ၣ်လီၤ.
