Home တၢ်ကစီၣ် ရိၤဟ့ၣ်ကၠၤကလုၥ်ဒူၣ်ကဒိးန့ၢ်ဘၣ်တၢ်တီတၢ်တြၢ်အဂီၢ် KOA ဆီၣ်ထွဲ

ရိၤဟ့ၣ်ကၠၤကလုၥ်ဒူၣ်ကဒိးန့ၢ်ဘၣ်တၢ်တီတၢ်တြၢ်အဂီၢ် KOA ဆီၣ်ထွဲ

12
0

လါနိၣ်ဝ့ဘၢၣ် ၁၉ သီ, ၂၀၂၆ နံၣ်, ခ့ၣ်အဲးစံၣ်

ရိၤဟ့ၣ်ကၠၤကလုၥ်ဒူၣ်တဖၣ် အတၢ်ဂုာ်ကျဲးစၢး လၢ ကဒိးန့ၢ်ဘၣ်တၢ်တီတၢ်တြၢ်အဂီၢ် ကီၢ်အမဲရကၤ ကညီကရၢ Karen Organization of America (KOA) ဆီၣ်ထွဲဆၢၣ်မဲာ်ဃုာ်ဝဲအဂ့ၢ် ထုးထီၣ်ပာ်ဖျါဝဲ ဖဲလါနိၣ်ဝ့ဘၢၣ် ၁၈ သီန့ၣ်လီၤ.

ရိၤဟ့ၣ်ကၠၤကလုၥ်ဒူၣ်တဖၣ်အံၤ လၢကီၢ်ပယီၤအပူၤ ဘၣ်တၢ်တြီဃၥ်အီၤ ဒီးဘၣ်တၢ်မၤအၢမၤနးအီၤစ့ၢ်ကီး ယံာ်တ့ၢ်လံအဂ့ၢ် KOA ပာ်ဖျါဝဲန့ၣ်လီၤ.

ကညီဖိတဖၣ်စ့ၢ်ကီး ဘၣ်ကွၢ်ဆၢၣ်မဲာ်ဒီး သုးမီၤစိရိၤ အတၢ်မၤဆူၣ်မၤစိးတဖၣ်အဃိ ကလုာ်ဒူၣ်တဖၣ်လၢ ဘၣ်တၢ်မၤအၢမၤနးအီၤတဖၣ် အကလုၢ်တဖၣ် ကဆဲးပာ်ဖျါထီၣ်န့ၢ်ဝဲအဂ့ၢ် KOA စံးဝဲန့ၣ်လီၤ.

ထံဂုၤကီၢ်ဂၤစံၣ်ညီၣ်ကွီၢ်ဘျီၣ် International Court of Justice (ICJ) ကစံၣ်ညီၣ်တဲာ်ဝဲ တၢ်ဂ့ၢ်လၢ ကီၢ်ကၣ်ဘံယၤ လိၥ်ဘၢလိၥ်ကွီၢ်ဝဲ ကီၢ်ပယီၤ ဘၣ်ဃးဒီး တၢ်မၤသံမၤဝီ ရိၤဟ့ၣ်ကၠၤကလုၥ်ဒူၣ်တဖၣ် အဖီခိၣ် အဂ့ၢ် ဖဲလါနိၣ်ဝ့ဘၢၣ် ၁၉ သီ န့ၣ်လီၤ.

ဖဲ၂၀၁၇ နံၣ်အပူၤ သုးမီၤစိရိၤ မၤသံဝဲ ရိၤဟ့ၣ်ကၠၤဖိအါဂၤ, တၢ်မၤဆူၣ်မၤစိးမၤတရီတပါ, မၤအၢမၤနးဝဲ ဒီးဒွဲၣ်အူထီၣ်ဝဲ အဝဲသ့ၣ်အဟံၣ်တဖၣ် လၢရခၢၣ်ကီၢ်ကလံၤထံးတကပၤအပူၤအဂ့ၢ် KOA ထုးထီၣ်ပာ်ဖျါဝဲန့ၣ်လီၤ.

တၢ်မၤအသးတဖၣ်အံၤအဃိ ကီၢ်ကၣ်ဘံယၤ လိၥ်ဘၢလိၥ်ကွီၢ် ကီၢ်ပယီၤ လၢ ထံဂုၤကီၢ်ဂၤစံၣ်ညီၣ်ကွီၢ်ဘျီၣ် (ICJ) အပူၤ ဖဲ ၂၀၁၉ နံၣ်၊ လါနိၣ်ဝ့ဘၢၣ် ၁၁ သီန့ၣ်လီၤ. ကီၢ်ကၣ်ဘံယၤ လိၥ်ဘၢလိၥ်ကွီၢ်လၢ ကီၢ်ပယီၤ မၤကမၣ်ဝဲ ကလုာ်ဒူၣ်တဖၣ် တၢ်မၤသံမၤဝီတၢ်အဂ့ၢ် တၢ်အၢၣ်လီၤအီလီၤတၢ်ဘျၢတဖၣ်န့ၣ်လီၤ.

တၢ်စံၣ်ညီၣ်တဲာ်အံၤ အရ့ဒိၣ်ဝဲလၢ ရိၤဟ့ၣ်ကၠၤကလုၥ်ဒူၣ်တဖၣ်အဖီခိၣ် လၢတၢ်မၤကမၣ်တၢ်တဖၣ်အဂီၢ် ပှၤလၢမၤကမၣ်တၢ်တဖၣ် ကဘၣ်ဟံးမူဒါအဂီၢ် ဒီးရိၤဟ့ၣ်ကၠၤကလုၥ်ဒူၣ်တဖၣ် ကဒိးန့ၢ်ဘၣ်တၢ်တီတၢ်တြၢ်အဂီၢ်အဂ့ၢ် KOA ပာ်ဖျါဝဲန့ၣ်လီၤ.

တၢ်စံၣ်ညီၣ်တဲာ်လၢ ICJ အံၤကဟဲထီၣ်ဒ်လဲၣ်ဂ့ၤ KOA ကဆဲးဆီၣ်ထွဲဃုာ်ဝဲ ဒီး ရိၤဟ့ၣ်ကၠၤတဖၣ်အဂ့ၢ် ထုးထီၣ်ပာ်ဖျါဝဲန့ၣ်လီၤ.