KIC News

လါအီးကထိဘၢၣ် ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် စှၤသီအတီၢ်ပူၤလၢကညီကီၢ်စဲၣ် ဖၣ်အၣ်ႇကီးတရံးဒီးမၠၣ်၀တံၣ်ကီၢ်ဆၣ်တဖၣ်အပူၤန့ၣ် ခီဖျိသုးမီၤစိရိၤကဘီယူၤဟးဆှၣ်တၢ်လၢမုၢ်နၤခီဟဲအါထီၣ်အဃိ ဘၣ်အိၣ်လၢတၢ်တၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးအပူၤအဂ့ၢ်န့ၣ်လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ ဖဲအပူၤကွံာ်လါအီးကထိဘၢၣ် ၂၁ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခးကီးတရံး၀့ၢ်ပူၤကဲထီၣ်သး၀ံၤအလီၢ်ခံ သုးမီၤစိရိၤက့ၤခီၣ်ဆၢခးလီၤကဒါက့ၤ၀ဲဒီးကဘီယူၤတဖၣ် န့ၣ်လီၤႉ ကတီၢ်ခဲအံၤခီဖျိသုးမီၤစိရိၤကဘီယူၤဟးဆှၣ်ထီၣ်ဆှၣ်လီၤတၢ်ဟဲအါထီၣ်အဃိ ကမျၢၢ်လၢအိၣ်ဖၣ်အၣ်၀့ၢ်ပူၤတဖၣ်ဘၣ််အိၣ်လၢတၢ်ဘၣ်ယိၣ်ဘၣ်ဘှီတၢ်ပျံၤတၢ်ဖုးပူၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“”အပူၤကွံာ်လၢညါတဘျီတခီၣ်န့ၣ်ပထံၣ်ကဘီယူၤယူၤထီၣ်အိၣ်မီၤနီၤႉဖဲပနၢ်ဟူလၢတၢ်ဒုးကဲထီၣ်ဖဲကီးတရံး၀့ၢ်ပူၤဘျီန့ၣ်ပထံၣ်ကဘီယူၤယူၤကိးမုၢ်နံၤမုၢ်နၤဒဲးလီၤႉလၢဖၣ်အၣ်၀့ၢ်ပူၤနါက့တၢ်လီၢ်ကိးတီၤဒဲးလီၤႉအဃိန့ၣ်ပသးကိၢ်တၢ်စ့ၢ်မီၤနီၤႉမ့ၢ်ကဟဲတ့ၢ်လီၤမ့ၣ်ပိၢ်လၢဖၣ်အၣ်ဧါႉမ့၀ံၤၦၤအိၣ်လၢကီးတရံးပူၤတဖၣ်နါက့ပဘၣ်ယိၣ်တၢ်လၢအ၀ဲသ့ၣ်အဂီၢ်စ့ၢ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါလၢကညီကီၢ်စဲၣ် မၠၣ်၀တံၣ်၀့ၢ်ပူၤစ့ၢ်ကီး ခီဖျိကဘီယူၤဟးဆှၣ်တၢ်အိၣ်ဒီး သုးတၢ်ဟူးတၢ်ဂဲၤဟဲအါထီၣ်အဃိဘၣ်အိၣ်လၢတၢ်ပျံၤတၢ်ဖုးပူၤစ့ၢ်ကီးအဂ့ၢ်န့ၣ်ကမျၢၢ်လၢအိၣ်၀့ၢ်ပူၤတဂၤ စံး၀ဲဒ်အံၤန့ၣ်လီၤႉ “ပထံၣ်ကဘီယူၤဟးဆှၣ်တၢ်တလီၢ်လီၢ်ဘၣ်ဆၣ်သနါက့ဖဲတၢ်ဒုးကဲထီၣ်လၢကီးတရံး၀့ၢ်ပူၤတနံၤန့ၣ်ကဘီယူၤဒီဒူၣ်ညါမီၤနီၤႉစှၤသီအတီၢ်ပူၤမၠၣ်၀တံၣ်၀့ၢ်ပူၤနါက့တၢ်ပိၢ်ဖးထီၣ်ႇမ့၀ံၤဖဲအပူၤကွံာ်တသီခံသီအခါန့ၣ်ပယီၤသုးကျိၤဟးဆှၣ်တၢ်လၢ၀့ၢ်ပူၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကီးတရံး၀့ၢ်ပူၤသၢသီတပယူာ်ဃီအဃိလီၢ်က၀ီၤဒူသ၀ီကမျၢၢ်တဖၣ်ဘၣ်ဟးဃ့ၢ်ပလဲာ်သးအိၣ်၀ဲန့ၣ်လီၤႉကတီၢ်ခဲအံၤလီၢ်က၀ီၤကမျၢၢ်လၢအစံၣ်တဖၣ်စ့ၢ်ကီးသဂၢၢ်ဘၣ်၀ဲအီၣ်အီအိၣ်ဆိးလီၢ်ကျဲတၢ်ကီတၢ်ခဲတဖၣ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

လါအီးကထိဘၢၣ် ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢကခၠ့ၣ်ကီၢ်စဲၣ် ဖါကၣ်ကီၢ်ဆၣ်အပူၤ သုးမီၤစိရိၤကဘီယူၤအတၢ်လဲၤတ့ၢ်လီၤမ့ၣ်ပိၢ်လၢ တၢ်မၤတၢ်သူၣ်၀ံၣ်သးဆၢမူးသးဖှံအလီၢ်အံၤ ခီဖျိပညိၣ်မၤ၀ဲတၢ်ထီၣ်ဒုးလၢကမျၢၢ်ထံဖိကီၢ်ဖိအဖီခိၣ်အဃိ မ့ၢ်တၢ်လုၢ်သ့ၣ်ခါပတာ်၀ဲထံဂုၤကီၢ်ဂၤအကွီၢ်မ့ၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ထုးထီၣ်ပာ်ဖျါ၀ဲဖဲမဟါလါအီးကထိဘၢၣ် ၂၅ သီအနံၤန့ၣ်လီၤႉ လၢကခၠ့ၣ်ကီၢ်စဲၣ် ဖါကၣ်ကီၢ်ဆၣ် အနၣ်ပၤတၢ်လီၢ်န့ၣ် လၢတၢ်ကမၤလၤကပီၤတၢ်ဒုးအိၣ်ထီၣ် ကခၠ့ၣ်တၢ်သဘျ့(KIO)တၢ်ကရၢကရိၦဲၤထီၣ် ၆၂ ၀ီတ၀ီအဂီၢ် ဖဲလါအီးကထိဘၢၣ် ၂၃ သီ...

လါအီးကထိဘၢၣ် ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်(၃)သီတပယူာ်ဃီအဃိကီးတရံး၀့ၢ်ခိၣ်၀့ၢ်ဃၢၤဒူသ၀ီလီၢ်က၀ီၤဖိလၢအဘၣ်စံၣ်မံကိးမုၢ်နၤဒဲးသ့ၣ်တဖၣ်အံၤထံၣ်ဘၣ်၀ဲအီၣ်အီအိၣ်ဆိးလီၢ်ကျဲတၢ်ကီတၢ်ခဲအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ ဖဲအပူၤကွံာ်လါအီးကထိဘၢၣ် ၂၁ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် နုာ်လီၤခး၀ဲကီးတရံး၀့ၢ်သုးမီၤစိရိၤအ၀ဲၤကျိၤဘၣ်ထွဲ၀ဲၤဒၢးတၢ်လီၢ်တဖၣ်ကဲထီၣ်သး၀ံၤအလီၢ်ခံခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ကိးမုၢ်နၤဒဲးအဃိလီၢ်က၀ီၤသ၀ီဖိတဖၣ်ဘၣ်လဲၤစံၣ်မံ၀ဲသီခါဖၠၣ်ကရၢၢ်ပူၤဒီးတၢ်လီၢ်အဂၤအဃိတၢ်ကီတၢ်ခဲအိၣ်ထီၣ်လၢအီၣ်အီအိၣ်ဆိးလီၢ်ကျဲအဂ့ၢ်န့ၣ်လဲၤကွဲၤလီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ “ကဘီယူၤဟဲခးလီၤတၢ်ဒီးတနၤညါအံၤအိၣ်သၢနၤလံအဃိၦၤသ၀ီဖိတဖၣ်မံလၢသ၀ီပူၤတဘူၣ်လၢၤဘၣ်ႉ ခဲအံၤပယီၤသုးဒီး(BGF)ကနုာ်လီၤမၤရှဲလဲဟီၣ်က၀ီၤႉတၢ်ကစီၣ်ဟူထီၣ်လၢကနုာ်လီၤသမံသမိးတၢ်လၢသ၀ီပူၤမ့ၢ်(PDF)သုးအိၣ်ဧါတအိၣ်ဧါအဃိၦၤအိၣ်တဘူၣ်လၢၤဘၣ်ႉကညီကရူၢ်လဲၤခးလီၤအ၀ဲသ့ၣ်ဒီးကဘီယူၤဒြိႇပယီၤသုးခီဟဲက့ၤခးလီၤတၢ်ဒီးကဘီယူၤအဃိသ၀ီဖိတဖၣ်စံၣ်လၢာ်လံႉသ၀ီဖိတဖၣ်ခဲအံၤလဲၤစံၣ်အိၣ်၀ဲလၢသီခါဖၠၣ်ဖီလာ်ဒ်န့ၣ်လီၤႉသ၀ီလၢအိၣ်ကီးတရံး၀့ၢ်ခိၣ်၀့ၢ်ဃၢၤ၀း၀းတရံးန့ၣ်တၢ်အိၣ်သးတဂ့ၤဘၣ်အဃိသ၀ီဖိဟးစံၣ်ပလဲာ်သးလၢၤလံ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ ဖဲအပူၤကွံာ်လါအီးကထိဘၢၣ် ၁၉ သီအနံၤ လၢမၠၣ်၀တံၣ်–ကီးတရံးအ့ရှါကျဲသီန့ၣ် တၢ်ဒုးကဲထီၣ်၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤအဃိ ဖဲ ၂၁ သီအနံၤန့ၣ် တၢ်ပၢၢ်ဆၢသုးပာ်ဖှိၣ်နုာ်လီၤခး ၀ဲကီးတရံး၀့ၢ်သုးမီၤစိရိၤအ၀ဲၤဒၢးတၢ်လီၢ်ဒီးသုးခိးကီၢ်ဆၢ(BGF)ႇပယီၤသုးတြဲၤလၢအိၣ်ခိးထၢအီၣ်စ့ဖဲခွံတၢၣ်–တီၤကၠၤအ့ႇမၠီၣ်ကၠၤအ့ကျဲဒီတကျိၤအံၤတဖၣ်န့ၣ်လီၤႉ (KNLA)သုးပာ်ဖှိၣ်နုာ်လီၤခးကီးတရံး၀့ၢ်ပူၤအခါန့ၣ်ပယီၤသုးဒီး(BGF)သံဘၣ်ဒိဘၣ်ထံး၀ဲအါမးအသိး မၤန့ၢ်၀ဲကျိချံၦာ်သၣ်ဒီးမၤဟးဂီၤကွံာ်၀ဲတြဲၤလၢအအိၣ်ခိးဃ့အီၣ်ကမျၢၢ်စ့တဖၣ်အဂ့ၢ်န့ၣ်တၢ်ပၢၢ်ဆၢကရူၢ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ “လဲၤလၢကြုၢ်တုတကပၤန့ၣ်ဒီး(BGF)တြဲၤဃ့အီၣ်စ့ႉမ့လဲၤလၢကၠၤအ့တကပၤခီဒီးပယီၤသုးႇ(BGF)တြဲၤဃ့စ့အဃိကျဲလၢအိၣ်လီၢ်က၀ီၤပူၤဖဲအံၤတဖၣ်န့ၣ်သ၀ီဖိဘၣ်ဟ့ၣ်တြဲၤအဘူးအလဲအါမးလီၤႉတြဲၤလၢအိၣ်ခိးသမံသမိးတၢ်န့ၣ်ကအိၣ်အဖျၢၣ်(၂၀)ညါအဃိၦၤတူၢ်တန့ၢ်လၢၤဘၣ်ႉကညီသုးနုာ်လီၤခး၀ဲအခါန့ၣ်ပယီၤသုးဒီး(BGF)သံဒီဒူၣ်ညါႉၦၤသံစိၣ်နၢအုၣ်နၢပိးလၢရီဘၢၣ်ကျီးကျဲကပၤန့ၣ်ဒီဒူၣ်ညါႉအၦၤသံစိၣ်တဖၣ်န့ၣ်အ၀ဲသ့ၣ်တဟဲထၢ၀ဲဘၣ်ႉခဲအံၤအ၀ဲသ့ၣ်တြဲၤတအိၣ်တ့ၢ်အါအါလၢၤဘၣ်”အဂ့ၢ်န့ၣ်လီၢ်က၀ီၤဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ ကီးတရံးဟီၣ်က၀ီၤအပူၤ(KNLA)သုးပာ်ဖှိၣ်ကရူၢ်နုာ်လီၤမၤ၀ဲဒုးယၤတၢ်ဟူးတၢ်ဂဲၤအါထီၣ်အဃိ ပယီၤသုးႇသုးခိးကီၢ်ဆၢ(BGF)သုးပာ်ဖှိၣ်တဖၣ်ဟးဆှၢတၢ်လၢကီးတရံး၀့ၢ်ပူၤ၀့ၢ်ချၢတၢ်လီၢ်တဖၣ်ဒီး လၢမုၢ်နၤခီစ့ၢ်ကီးခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိကီးတရံးလီၢ်က၀ီၤသ၀ီဖိတဖၣ်ဘၣ်ဟးစံၣ်အိၣ်ခူသူၣ်၀ဲန့ၣ်လီၤႉ လၢန့ၣ်အမဲာ်ညါတၢ်ဒုးမ့ဆဲးဆူၣ်ထီၣ်ကွ့ၢ်ကွ့ၢ်န့ၣ်ၦၤဃ့ၢ်မှံးဟးဖျိးအနီၣ်ဂံၢ်ကအါထီၣ်၀ဲဒီး တၢ်ကီတၢ်ခဲကဟဲအိၣ်ထီၣ်၀ဲလၢတၢ်အီၣ်တၢ်အီတၢ်အိၣ်တၢ်ဆိးလီၢ်ကျဲတကပၤစ့ၢ်ကီးအဂ့ၢ်န့ၣ်...

လါအီးကထိဘၢၣ် ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်ပူၤ ခီဖျိပယီၤသုးဒီးတၢ်ပၢၢ်ဆၢသုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်အဃိ လီၢ်က၀ီၤကမျၢၢ်ထံဖိကီၢ်ဖိတဖၣ်ပျံၤတၢ်ဖုးတၢ်ဒီးကတီၢ်ခဲအံၤတၢ်ကးတံၢ်ကွံာ်၀ဲ ကၠိသ့ၣ်တဖၣ်လံအဂ့ၢ်န့ၣ် လီၢ်က၀ီၤဖိစံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအီးကထိဘၢၣ် ၂၁ သီ ဂီၤခီ ၇ နၣ်ရံၣ်ဘျဲၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကီၢ်သူလ့ၤသုးမုၢ်ဒိၣ်(KTLA)သုးပာ်ဖှိၣ်နုာ်လီၤခး၀ဲကီးတရံး၀့ၢ်က၀ီၤဒ့(၇)လၢသုးမီၤစိရိၤအ၀ဲၤဒၢးဒီး၀ဲၤကျိၤဘၣ်ထွဲ၀ဲၤဒၢးအိၣ်ဆီလီၤသးတၢ်လီၢ်တဖၣ်ဒီးတၢ်ဒုးစးထီၣ်ကဲထီၣ်၀ဲန့ၣ်လီၤႉ တၢ်ဒုးကဲထီၣ်၀ံၤအလီၢ်ခံခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(KNLA)ဒီး(KTLA)သုးပာ်ဖှိၣ်ဟူးဂဲၤအိၣ်အလီၢ်တဖၣ်ဒီးလီၢ်က၀ီၤကညီဒူသ၀ီပူၤအဃိလီၢ်က၀ီၤကမျၢၢ်သံဘၣ်ဒိဘၣ်ထံးအိၣ်ဒီးမ့ၣ်အူအီၣ်ဟးဂီၤ၀ဲတၢ်ဘူၣ်တၢ်ဘါတၢ်သူၣ်ထီၣ်ဃုာ်ဒီးဟံၣ်ဃီႇကျီးကရၢၢ်တဖၣ်အိၣ်၀ဲန့ၣ်လီၤႉ ခီဖျိတၢ်ကဲထီၣ်သးဒ်အံၤအဃိကီးတရံးလီၢ်က၀ီၤကမျၢၢ်သ့ၣ်တဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်ဒီး အ၀ဲသ့ၣ်တပျဲလဲၤထီၣ်အဒံၣ်အဖိကၠိလၢၤဘၣ်အဂ့ၢ်န့ၣ် ကီးတရံးကီၢ်ဆၣ် နဘူသ၀ီ လီၢ်က၀ီၤကၠိဖိမိၢ်ပၢ်တဂၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “တၢ်ဒုးကဲထီၣ်အဃိကၠိဖိမိၢ်ပၢ်တဖၣ်ကပျဲလဲၤထီၣ်အဒံၣ်အဖိကၠိဒ်လဲၣ်ႉကဘီယူၤစ့ၢ်ကီးဟဲခးလီၤတၢ်ႇခးလီၤလၢသ၀ီပူၤႉခဲအံၤနဘူကၠိနါက့တၢ်ကးတံၢ်အီၤလံႉကၠိလၢအိၣ်ကီးတရံးကီၢ်ဆၣ်ပူၤတဖၣ်အါဒၣ်တက့ၢ်န့ၣ်တၢ်ကးတံၢ်ကွံာ်အီၤလံမီၤနီၤ”အဂ့ၢ်န့ၣ်အ၀ဲစံး၀ဲန့ၣ်လီၤႉ တၢ်ဒုးကဲထီၣ်အဃိကီးတရံးကီၢ်ဆၣ်အပူၤလီၢ်က၀ီၤကၠိဖိမိၢ်ပၢ်တဖၣ်ခီဖျိအ၀ဲသ့ၣ်သူၣ်ကိၢ်သးဂီၤတၢ်လၢအဒံၣ်အဖိဂီၢ်အဃိကၠိဖိမိၢ်ပၢ်ႇကၠိကမံးတံာ်ဒီးကၠိသရၣ်၊မုၣ်တဖၣ်မၤ၀ဲတၢ်အိၣ်ဖှိၣ်ဒီးဘၣ်တၢ်ကးတံၢ်ကွံာ်ကၠိဒ်အံၤလီၤအဂ့ၢ်န့ၣ်ကၠိသရၣ်တဂၤစံး၀ဲန့ၣ်လီၤႉ ကၠိသရၣ်တဂၤစံး၀ဲလၢ“ၦၤလၢအိၣ်သ၀ီဖဲအံၤတဖၣ်န့ၣ်အ၀ဲသ့ၣ်ပျံၤတၢ်မီၤနီၤႉတနီၤန့ၣ်စံၣ်လၢၤလံႉၦၤလၢအအိၣ်တ့ၢ်တဖၣ်နါက့အိၣ်ခိးကွၢ်၀ဲတၢ်အိၣ်သးမီၤနီၤႉအ၀ဲသ့ၣ်ကဒုးထီၣ်အဖိကၠိအဂီၢ်န့ၣ်သူၣ်ကိၢ်သးဂီၤ၀ဲအဃိတၢ်ကးတံၢ်ကွံာ်ကၠိဒ်အံၤလီၤ”အဂ့ၢ်န့ၣ်စံး၀ဲန့ၣ်လီၤႉ ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကီးတရံးကီၢ်ဆၣ် ကီမူၣ်ႇပၠါပ့ၤႇခန့မူၤက၀ီၤဒ့ဒီး...

လါအီးကထိဘၢၣ် ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ်အပူၤ ဖဲမဟါလါအီးကထိဘၢၣ် ၂၄ သီ ဂီၤခီအဆၢကတီၢ်န့ၣ် ခီဖျိကတၢၢ်တံာ်သုးခိးကီၢ်ဆၢ(BGF)ဒီးပယီၤသုးပာ်ဖှိၣ်သုးကလၢၤတဖၣ်အံၤခးလီၤကျိဖးဒိၣ်ဆူဘီကၠိၣ်လဲၤသ၀ီပူၤအဃိ ဖိသၣ် ၈ နံၣ်သံ၀ဲ(၁)ဂၤဒီးဘၣ်ဒိ(၂)ဂၤအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲမဟါဂီၤခီအဆၢကတီၢ်န့ၣ်ပယီၤသုးဒီးသုးခိးကီၢ်ဆၢ(BGF)လၢအိၣ်ဆီလီၤသးဖဲဘီကၠိၣ်လဲၤသ၀ီပူၤတဖၣ်အံၤဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ံၤအလီၢ်ခံကတၢၢ်တံာ်(BGF)ႇပယီၤသုးပာ်ဖှိၣ်သုးကလၢၤအံၤခးလီၤကျိဖးဒိၣ်အထံၣ်အါမးအဃိတၢ်သံတၢ်ဘၣ်ဒိဘၣ်ထံးဟဲအိၣ်ထီၣ်၀ဲဒ်အံၤန့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“ကျိဖးဒိၣ်လီၤတဲာ်လၢဟံၣ်ဖီခိၣ်အဃိဖိသၣ်သံမီၤနီၤႉဖိသၣ်လၢအသံတဂၤန့ၣ်အပိာ်ခွါအသးအိၣ်(၈)နံၣ်ဒံးလီၤႉမ့၀ံၤအမိဒီးအနီနါက့ဘၣ်ဒိစ့ၢ်ကီးလီၤႉပယီၤသုးခးလီၤကျိဖးဒိၣ်လီၤပျံၤညါခးလီၤ၀ဲအဖျၢၣ်ဖးအါညါ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ကတၢၢ်တံာ်ပယီၤသုးတဖၣ်အံၤစးထီၣ်ဖဲတနံၤအံၤဂီၤခီ ၆ နၣ်ရံၣ်ဘျဲၣ်တုၤလၢမုၢ်ထူၣ် ၁၁ နၣ်ရံၣ်ဃၣ်ဃၣ်န့ၣ် ခးလီၤကျိဖးဒိၣ်လၢဘီကၠိၣ်လဲၤသ၀ီပူၤကအိၣ်လၢအဖျၢၣ်(၂၀)ဘျဲၣ်ညါဒီးတၢ်သံတၢ်ဘၣ်ဒိဘၣ်ထံးအိၣ်တကးဒံးဘၣ်အမဲာ်ညါ ဟံၣ်ဃီတၢ်သူၣ်ထီၣ်တဖၣ်စ့ၢ်ကီးဟးဂူာ်ဟးဂီၤ၀ဲအဂ့ၢ်န့ၣ် လီၢ်က၀ီၤကမျၢၢ်စံးဘၣ်ခ့ၣ်အဲးစံၣ် ဖဲမဟါလါအီးကထိဘၢၣ်...

လါအီးကထိဘၢၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် တနံၣ်အံၤ(၂၀၂၂)နံၣ် ပဒိၣ်မါရှါလါဖါသးစၢ်ခိၣ်နၢ်ဖိခိၣ်ဖးအဂီၢ်ဆှၢထီၣ်မံၤသ့၀ဲလံအဂ့ၢ်န့ၣ် (Phan Foundation)ထုးထီၣ်ဘိးဘၣ်ရၤလီၤ၀ဲဖဲအပူၤကွံာ်လါအီးကထိဘၢၣ် ၂၀ သီအနံၤန့ၣ်လီၤႉ ပဒိၣ်မါရှါသးစၢ်ခိၣ်နၢ်ဖိခိၣ်ဖးအံၤကဘၣ်မ့ၢ်ကညီသးစၢ်လၢအတကွၢ်လီၤနီၢ်ကစၢ်အဘျုးဘၣ်ဒီးတီခိၣ်ရိၣ်မဲဟူးဂဲၤမၤတၢ်ဘၣ်ဃးကညီဒီကလုာ်အဆူၣ်ချ့ႇကူၣ်သ့ႇၦၤဂ့ၢ်၀ီခွဲးယာ်ႇခိၣ်ဃၢၤန့ဆၢၣ်ႇလံာ်လဲၢ်တၢ်ဆဲးတၢ်လၤတဖၣ်ဒီးၦၤဒ်အံၤသ့ၣ်တဖၣ်(Phan Foundation)ဃုထၢထီၣ်ဟ့ၣ်လၤကပီၤ၀ဲခိၣ်ဖးအံၤကိးနံၣ်ဒဲးန့ၣ်လီၤႉ Phan Foundation ၦၤနဲၣ်တၢ် နၣ်စိၤယၤဖါစံး၀ဲလၢ“ကညီသးစၢ်သ့ၣ်တဖၣ်နုာ်လီၤပၢၢ်ဆၢတၢ်လၢၦၤတ၀ၢႇတၢ်ခွဲးတၢ်ယာ်အဂီၢ်ဒီး ဂုာ်ကျဲးစၢး၀ဲဒ်သိးကီၢ်သူလ့ၤအမဲာ်ညါကီၢ်ကၠီၣ်တဲၣ်ႇကီၢ်ပယီၤဒီးဟီၣ်ခိၣ်ဒီတဘ့ၣ်ကနၢ်ဟူအ၀ဲသ့ၣ်ကလုၢ်ဒီး ထံဖိကီၢ်ဖိကမျၢၢ်ကထူၣ်ဖျဲးထီၣ်ကွံာ်လၢတၢ်ဖှီၣ်တၢ်နးပူၤႇတၢ်မၤလၢၦဲၤအ၀ဲသ့ၣ််တၢ်လိၣ်ဘၣ်တဖၣ်ကန့ၢ်အဂီၢ်အဖီခိၣ်အံၤ ဒုးထိၣ်ဟူးထီၣ်ဂဲၤမၤနီၣ်ထီၣ်၀ဲၦၤန့ၣ်လီၤ”အဂ့ၢ်န့ၣ်လံာ်တၢ်ပာ်ဖျါအပူၤစံး၀ဲန့ၣ်လီၤႉ ဖါဖီၣ်ဒ့ရှၢၣ်သးစၢ်ခိၣ်နၢ်ဖိခိၣ်ဖးအံၤကဘၣ်မ့ၢ်ကညီသးစၢ်လၢအသးအိၣ်(၃၅)နံၣ်ဆူဖီလာ်ဒီး သးစၢ်လၢအိၣ်တၢ်လီၢ်တတီၤဂ့ၤတတီၤဂ့ၤႇတၢ်ကရၢကရိတဒူၣ်ဂ့ၤတဒူၣ်ဂ့ၤဆှၢထီၣ်မံၤသ့၀ဲအသိး တၢ်ကရၢကရိတဖၣ်စ့ၢ်ကီးအုၣ်ကီၤဆှၢထီၣ်၀ဲအၦၤမၤတၢ်ဖိအမံၤသ့၀ဲန့ၣ်လီၤႉ (၂၀၂၂)ပဒိၣ်မါရှါလါဖါသးစၢ်ခိၣ်နၢ်ဖိခိၣ်ဖးအံၤတၢ်ကဟ့ၣ်မၤလၤကပီၤ၀ဲလၢအမဲရကၤစ့ဒီၣ်လၣ်(၄၀၀၀)ဒီး ဆှၢထီၣ်မံၤအစဲၤခံကတၢၢ်တုၤဖဲ(၂၀၂၂)လါဒံၣ်စ့ဘၢၣ် ၃၁ သီအနံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါမံၤႇသးနံၣ်ႇအိၣ်ဖျဲၣ်မုၢ်နံၤႇအိၣ်ဆိးတၢ်လီၢ်ႇတၢ်ကရၢကရိတၢ်ဂ့ၢ်တၢ်ကျိၤတဖၣ်အံၤကဘၣ်တၢ်ကွဲးအီၤလၢကညီကျိာ်ႇပယီၤကျိာ်ႇကီၤလၤ၀ါကျိာ်ဒီးဆှၢထီၣ်အီၤဆူ(bwabwa.phan@phanfoundation.org)အအိၣ်န့ၣ်လီၤႉၦၤလၢအဒိးန့ၢ်ဘၣ်ခိၣ်ဖးအံၤတၢ်ကထုးထီၣ်ဘိးဘၣ်ရီၤလီၤအီၤဖဲ(၂၀၂၃)ထီၣ်သီအဂ့ၢ်န့ၣ်...

လါအီးကထိဘၢၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်က၀ီၤအပူၤ ဖဲအပူၤကွံာ်လါအီးကထိဘၢၣ် ၂၀ သီအနံၤန့ၣ် ခ့ၣ်အဲၣ်ယူၣ်(သုးက့ ၅)ၦၤဘၣ်မူဘၣ်ဒါဟဲဆီၣ်ထွဲမၤစၢၤ၀ဲ ကတၢၢ်တံာ်သ၀ီဒီးဒူသ၀ီလၢအိၣ်ဘူးဖဲအံၤတဖၣ်လၢကျိၣ်စ့အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ သ၀ီလၢအိၣ်ဘူးဒီးကတၢၢ်တံာ်သ၀ီတဖၣ်လၢအမ့ၢ်ကဲတီသ၀ီႇဘီကၠိၣ်ထၣ်ႇဘီကၠိၣ်လဲၤႇကည့ၤဒိၤႇနၣ်ကၠီၣ်ႇနိၣ်ဖီထံႇဖၤလိၤ တီၣ်သူၣ်ရှါသ၀ီႇထံသဲလ့သ၀ီပာ်ဖှိၣ်ခဲလၢာ်(၁၅)ဖျၢၣ်ဃၣ်ဃၣ်အံၤ ခ့ၣ်အဲၣ်ယူၣ်(သုးက့ ၅) ဟဲဆီၣ်ထွဲမၤစၢၤ၀ဲစ့တဂၤန့ၣ်လွံၢ်ကလး(၄၀၀၀၀)ကၠးအဂ့ၢ်န့ၣ်လီၢ်က၀ီၤသ၀ီဖိိတဂၤစံး၀ဲဒ်အံၤန့ၣ်လီၤႉ “ခ့ၣ်အဲၣ်ယူၣ်ဟဲဟ့ၣ်လီၤမၤစၢၤၦၤစ့လၢကတၢၢ်တံာ်သ၀ီဃုာ်ဒီးဒူသ၀ီလၢအိၣ်ဘူးဖဲအံၤတဖၣ်မီၤနီၤႉမၤစၢၤ၀ဲဟံၣ်ကိးဖျၢၣ်ဒဲးလီၤႉတဂၤန့ၣ်ဟ့ၣ်၀ဲ(လွံၢ်ကလး)ကၠးႉတၢ်လီၢ်ဒီတက၀ီၤညါအဃိသ၀ီကအိၣ်(၁၅)ဖျၢၣ်ညါမီၤနီၤႉဟ့ၣ်လီၤ၀ဲတဂၤန့ၣ်(လွံၢ်ကလး)အဃိၦၤလၢအဟံၣ်ဖိဃီဖိအါညါန့ၣ်န့ၢ်ဘၣ်၀ဲအါမီၤနီၤႉပသးခုဒိၣ်မးလီၤႉတၢ်ကီတၢ်ခဲအကတီၢ်ၦၤဟဲမၤဘူၣ်လီၤၦၤဒ်အံၤပသးခုဒိၣ်မး”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအခါန့ၣ်လၢကတၢၢ်တံာ်သ၀ီကရူၢ်အပူၤတၢ်ခးလိာ်သးကဲထီၣ်၀ဲလၢပယီၤသုးႇသုးခိးကီၢ်ဆၢ(BGF)ဒီး(KNLA)သုးပာ်ဖှိၣ်အဘၢၣ်စၢၤတလီၢ်လီၢ်အသိးခီဖျိတၢ်ဒုးကဲထီၣ်အဃိလီၢ်က၀ီၤကမျၢၢ်တဖၣ်ဘၣ်ဃ့ၢ်မှံဟးဖျိး၀ဲန့ၣ်လီၤႉကတီၢ်ခဲအံၤ(BGF)ဆီလီၤတြဲၤအိၣ်ခိးသမံသမိးတၢ်လၢလီၢ်က၀ီၤဖဲန့ၣ်အပူၤဒီးတၢ်ဘၣ်သဂၢၢ်ခးလိာ်သးကဲထီၣ်၀ဲဒီး(KNLA)သုးပာ်ဖှိၣ်တဖၣ်န့ၣ်လီၤႉ ဘၣ်ဃးတၢ်လဲၤဆီၣ်ထွဲမၤစၢၤလီၢ်က၀ီၤဖိတဖၣ်လၢကျိၣ်စ့တၢ်ဂ့ၢ်အံၤခ့ၣ်အဲးစံၣ်ဂုာ်ကျဲးစၢးဆဲးကျိးခ့ၣ်အဲၣ်ယူၣ်(သုးက့ ၅)ၦၤဘၣ်မူဘၣ်ဒါတဖၣ်ဘၣ်ဆၣ်တန့ၢ်၀ဲဘၣ်ဒီး ခ့ၣ်အဲၣ်ယူၣ်တကပၤစ့ၢ်ကီးထုးထီၣ်ပာ်ဖျါတၢ်ကစီၣ်တအိၣ်ဒံးဘၣ် န့ၣ်လီၤႉ ဒ်န့ၣ်အသိးဖဲအပူၤကွံာ်လါအီကူးအခါစ့ၢ်ကီး(BGF–၁၀၁၃)သုးရ့ၣ် သုးခိၣ်လၣ်ကၠဲၤ...

လါအီးကထိဘၢၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ကၠဲၣ်ထိၤကီၢ်ဆၣ်အပူၤ ဖဲအပူၤကွံာ်လါအီးကထိဘၢၣ် ၁၉ သီအနံၤန့ၣ် ပယီၤသုးနုာ်လီၤဒွဲၣ်အူအီၣ်ကွံာ်(ပျဥ်းကတိုးကုန်း)သ၀ီကရူၢ် ပနွဲၢ်ကျါသ၀ီပူၤဟံၣ်(၆)ဖျၢၣ်ဒီးလီၢ်က၀ီၤကမျၢၢ်(၈၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ တချုးလၢပယီၤသုးနုာ်လီၤဒွဲၣ်အူအီၣ်ပနွဲၢ်ကျါသ၀ီပူၤဟံၣ်ဃီတဖၣ်ဒံးဘၣ်အခါန့ၣ် အ၀ဲသ့ၣ်ခးလီၤ၀ဲကျိဖးဒိၣ်ကျိဖိတဖၣ်ဆူသ၀ီပူၤ၀ံၤဒွဲၣ်အူအီၣ်၀ဲသ၀ီပူၤဟံၣ်ဖးဒိၣ်(၆)ဖျၢၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါပယီၤသုးတဖၣ်အံၤဖီၣ်ဒုးဃာ်၀ဲပနွဲၢ်ကျါသ၀ီဖိ(၂)ဂၤအသိးနုာ်လီၤမၤဟးဂီၤသ၀ီဖိလၢအဘၣ်စံၣ်သ့ၣ်တဖၣ်အံၤအဟံၣ်အဃီဟံးန့ၢ်၀ဲတၢ်ဖိတၢ်လံၤလုၢ်ဒိၣ်ၦ့ၤဒိၣ်လၢအိၣ်ဟံၣ်ပူၤတဖၣ်တကးဒံးဘၣ်အမဲာ်ညါ နုာ်လီၤအိၣ်ဆီလီၤသးလၢသီခါဖၠၣ်ကရၢၢ်ပူၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ “တၢ်ခးလိာ်သးကဲထီၣ်လၢကၠဲၣ်ထံယိကစၢၢ်ခီၣ်ထံး၀ံၤအလီၢ်ခံန့ၣ်ပယီၤသုးဟူးဂဲၤအါထီၣ်လၢကၠဲၣ်ထိၤမီၤနီၤႉပယီၤသုးခးလီၤကျိဖးဒိၣ်လၢသ၀ီပူၤႉဖဲအ၀ဲတနံၤန့ၣ်ပယီၤသုးနုာ်လီၤဒွဲၣ်အူအီၣ်ပနွဲၢ်ကျါသ၀ီပူၤဟံၣ်ဃီဒံးမီၤနီၤႉၦၤလၢအိၣ်ကၠဲၣ်ထံယိကစၢၢ်ခီၣ်ထံးတဖၣ်အါဒၣ်တက့ၢ်န့ၣ်ဘၣ်ဃ့ၢ်ထီၣ်ႉကဘီယူၤနါက့ဟဲခးလီၤတၢ်တလီၢ်လီၢ်လီၤႉတၢ်ခးလိာ်သးနါက့အိၣ်ဒံး၀ဲ”အဂ့ၢ်န့ၣ်ကၠဲၣ်ထိၤကီၢ်ဆၣ် လီၢ်က၀ီၤကမျၢၢ်တဂၤစံးဘၣ်ခ့ၣ်အဲးစံၣ်န့ၣ်လီၤႉ ခီဖျိပယီၤသုးနုာ်လီၤမၤဒုးယၤတၢ်ဟူးတၢ်ဂဲၤအဃိပနွဲၢ်ကျါသ၀ီႇပျဥ်းကတိုးကုန်းႇအ့ၤကၣ်ဘိၤႇကဒိုင်ဒွတ်‚ေရွှဂဲရိုး‚ဂူးကူးႇလၢၢ်ချီၣ်ႇသ၀ီသီ ဇီးေပြာင်း သ၀ီခဲလၢာ်အဖျၢၣ်(၂၀)ဃၣ်ဃၣ်ဘၣ်ဃ့ၢ်ထီၣ်၀ဲဒီး ၦၤသ့ၣ်တဖၣ်အံၤလိၣ်ဘၣ်၀ဲ တၢ်ဆီၣ်ထွဲမၤစၢၤတဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ပယီၤသုးဂံၢ်ဘါအဂၤ(၅၀၀)ဃၣ်ဃၣ်လၢအနုာ်လီၤဟူးဂဲၤလၢကၠဲၣ်ထိၤကီၢ်ဆၣ်ပူၤတဖၣ်မ့ၢ်၀ဲ(စကခ–၁၃)‚(ခမရ–၅၅၉)‚(သုးတြိၤ–၇၇)ႇ(သုးတြိၤ–၄၄)‚(ခမရ–၂၀၇)‚(ခမရ–၂)သ့ၣ်တဖၣ်ဒီး ပယီၤသုးကျိၤနုာ်လီၤ၀ဲဒၣ်လၢ...

လါအီးကထိဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ပလီကီၢ်ဆၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ ပယီၤသုးဟဲတ့ၢ်လီၤမ့ၣ်ပိၢ်ဒီးကဘီယူၤဒြိလၢကညီတၢ်ဒီသဒၢကမျၢၢ်သုး(KPDF)တြဲၤအိၣ်ခိးသမံသမိးတၢ်လီၢ်အဂ့ၢ်န့ၣ် (KPDF)ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ (ပလီ)ကညီတၢ်ဒီသဒၢကမျၢၢ်သုး(KPDF)အံၤမ့ၢ်တြဲၤတဘ့ၣ်လၢအိၣ်ခိးသမံသမိး၀ဲကသံၣ်မူၤဘှီးဒီး ဒ်သိးပနံာ်တၢ်ဖိတၢ်လံၤလၢသုးမီၤစိရိၤထုးထီၣ်၀ဲတဖၣ်သုတဟဲနုာ်လီၤလၢဟီၣ်က၀ီၤပူၤတဂ့ၤအဂီၢ်န့ၣ်အိၣ်ခိးသမံသမိး၀ဲန့ၣ်လီၤႉဘၣ်ဆၣ်ဖဲမဟါလါအီးကထိဘၢၣ် ၂၀ သီ ဂီၤခီ ၁၀း၃၀ ဃၣ်ဃၣ်အဆၢကတီၢ်န့ၣ် ပယီၤသုးအံၤသူ၀ဲကဘီယူၤဒြိဟဲတ့ၢ်လီၤ၀ဲမ့ၣ်ပိၢ်(၄)ဖျၢၣ်လၢ(KPDF)တြဲၤအိၣ်ခိးတၢ်လီၢ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တၢ်ဟဲတ့ၢ်လီၤမ့ၣ်ပိၢ်အံၤအဖီခိၣ် ပလီ(Palaw KPDF)မူဒါခိၣ်တဂၤစံး၀ဲ “drone အကလုာ်ခီန့ၣ်ပတသ့ၣ်ညါဘၣ်ႉ အဂံၢ်လၢကမၤဘၣ်ဒိတၢ်ဒုတအိၣ်ဘၣ်ႉအကလုၢ်ဒုသီၣ်ဖးဒိၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိပယီၤသုးဟဲတ့ၢ်လီၤမ့ၣ်ပိၢ်ဒီးကဘီယူၤဒြိအဃိဘၣ်ဟးဂီၤ၀ဲသုးကလၢၤပူၤမ့ၣ်အူပျံၤမ့ၣ်အူတၢၣ်တဆံးတက့ၢ်လီၤဒီးအ၀ဲသ့ၣ်မၤ၀ဲဒ်အံၤဒီးခဲအံၤတဘျီန့ၣ်အိၣ်၀ဲခံဘျီလံဒီးအခီၣ်ထံးတဘျီန့ၣ်ဘၣ်ဒိ၀ဲသုးဖိတဂၤအဂ့ၢ်န့ၣ်...

လါအီးကထိဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါအီးကထိဘၢၣ် ၂၁ သီန့ၣ်တၢ်ဒုးကဲထီၣ်၀ဲလၢကညီကီၢ်စဲၣ် ကီးတရံး၀့ၢ်ပူၤဒီး ခီဖျိသုးမီၤစိရိၤအဒုးသုးဘီယူၤဒီး(ဟဲလံၣ်ခီပတၢၣ်)ဟဲက့ၤတ့ၢ်လီၤကဒါမ့ၣ်ပိၢ်လၢကညီလီၢ်က၀ီၤဒူသ၀ီတဖၣ်အပူၤလၢအတဘၣ်ဃးဒီးတၢ်ဒုးကဲထီၣ်အလီၢ်ဘၣ်အံၤအဃိလီၢ်က၀ီၤဖိအဟံၣ်အဃီဒီးတၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ “တၢ်ဒုးကဲထီၣ်န့ၣ်လၢ၀့ၢ်ပူၤလၢရူဖးဒိၣ်က၀ီၤဒ့(၇)တကပၤႉကဲထီၣ်လၢပၢၤကီၢ်ႇဃိာ်ႇသုးကီၣ်ကးအ၀ဲၤဒၢးႇ(၉၇)သုးရ့ၣ်တကပၤန့ၣ်မီၤနီၤႉကဘီယူၤဟဲဆှၣ်တၢ်လၢပၠါပ့ၤႇကီၢ်မူႇတတါအူႇခန့မူၤနီၤကဲႇယီၣ်ကိၤတကပၤန့ၣ်ဒီးတ့ၢ်လီၤ၀ဲမ့ၣ်ပိၢ်ခးလီၤနါက့ခးလီၤစ့ၢ်ႉအနးဒိၣ်ကတၢၢ်န့ၣ်လၢကီၢ်မူသ၀ီတကပၤန့ၣ်(ဟဲလံၣ်ခီပတၢၣ်)ကဘီယူၤခးလီၤတၢ်”အဂ့ၢ်န့ၣ်ကီးတရံးယီၢ်ကိာ်သ၀ီဖိတဖၣ်စံး၀ဲန့ၣ်လီၤႉ တၢ်ဒုးကဲထီၣ်လၢကီးတရံး၀့ၢ်ပူၤဖဲတနံၤညါအံၤန့ၣ်သုးမီၤစိရိၤအပၢၤကီၢ်သံ(၅)ဂၤဒီးမၤန့ၢ်၀ဲကျိ(၃)ခိၣ်အဂ့ၢ်န့ၣ် သ့ၣ်ညါဘၣ်လၢၦၤဘူးဒီး(KNLA)သုးပာ်ဖှိၣ်ကရူၢ်တဖၣ်အအိၣ်န့ၣ်လီၤႉ ဖဲတနံၤအံၤဂီၤခီအဆၢကတီၢ်န့ၣ် ပယီၤသုး(၉၇)သုးရ့ၣ်ခးလီၤမီထးကျိဖးဒိၣ်လီၤတဲာ်ပိၢ်ဖးထီၣ်လၢ ကီးတရံးက၀ီၤဒ့တဖၣ်အပူၤအဃိကမျၢၢ်သံ(၁)ဂၤႇဘၣ်ဒိ(၂)ဂၤအသိးခီဖျိသုးမီၤစိရိၤအဒုးသုးကဘီယူၤဟဲတ့ၢ်လီၤကဒါမ့ၣ်ပိၢ်လၢကညီလီၢ်က၀ီၤဒူသ၀ီဒီးက၀ီၤဒ့ပူၤအဃိတၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ “ဖဲအနၣ်ရံၣ်(၁၀)ဘျဲၣ်န့ၣ်ဒုးသုးကဘီယူၤ(၂)ဘ့ၣ်ဒီးဟဲလံၣ်ခီပတၢၣ်ကဘီယူၤ(၂)ဘ့ၣ်ဟဲဆှၣ်တၢ်ဒီးခးလီၤတၢ်လၢခန့မူၤႇပၠါပ့ၤႇတတါအူတကပၤန့ၣ်ႉကွံာ်လီၤမ့ၣ်ပိၢ်ဖးဒိၣ်ႉဘၣ်ၦၤဟံၣ်ၦၤဃီဒီဒူၣ်ညါႉလၢကီးတရံးပၢၤကီၢ်၀ဲၤဒၢးႇပၢၤကီၢ်ဃိာ်ႇ(၉၇)သုးရ့ၣ်တကပၤန့ၣ်ကညီကရူၢ်နုာ်လီၤခး၀ဲတၢ်ဒုးကဲထီၣ်အဖၢမုၢ်လီၤႉကဘီယူၤဆှၣ်တရံးခးလီၤတၢ်ကအိၣ်အဘျီ(၁၀)လံႉၦၤသံဘၣ်ဒိဘၣ်ထံးအိၣ်”အဂ့ၢ်န့ၣ်ကမျၢၢ်လၢအိၣ်ဘူးဒီးတၢ်ကဲထီၣ်သးအလီၢ်တဂၤတဂၤစံး၀ဲန့ၣ်လီၤႉ ခီဖျိတၢ်ဒုးကဲထီၣ်အဃိလၢမၠၣ်၀တံၣ်၀့ၢ်တကပၤန့ၣ်စ့ၢ်ကီးပယီၤသုးႇ(BGF)တဖၣ်ဟးဆှၣ်တၢ်လၢ၀့ၢ်ပူၤ၀့ၢ်ချၢဒီးအိၣ်ကတဲၤကတီၤထီၣ်သးလံန့ၣ်လီၤႉလၢန့ၣ်အမဲာ်ၦၤမၢပံးက့ၤကၠိႇ၀ဲၤဒၢးတဖၣ်ဒီးတၢ်အိၣ်ခိးသမံသမိးတၢ်လၢ၀့ၢ်ပူၤ၀့ၢ်ချၢဒီးတၢ်ကးတံၢ်ကွံာ်ကျဲသ့ၣ်တဖၣ်အဂ့ၢ်န့ၣ် ကမျၢၢ်လၢအိၣ်မၠၣ်၀တံၣ်၀့ၢ်ပူၤတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ