KIC News

လါအီကူး ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ်အပူၤ သုးမီၤစိရိၤအစုတီၤဖီလာ်သုးခိးကီၢ်ဆၢ(BGF)ထုးထီၣ်တၢ်ကလုၢ်လၢၦၤလၢအဟးထီၣ်က့ၤလီၤမ့တအိၣ်ဒီးထံကီၢ်ခိၣ်ဂီၤ(မၣ်ပိၤတ့ၤ)ဘၣ်န့ၣ်ကဃ့အီၣ်လိး၀ဲစ့(၂)ကလီၢ်ကၠးအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ လီၢ်က၀ီၤကမျၢၢ်လၢအိၣ်ဒွဲၣ်လိကီၢ်ဆၣ်ပူၤမးထီသ၀ီႇလ့ဖိထၣ်ႇကတၢၢ်တံာ်ဒီးထံသဘျုၣ်ထၣ်သ၀ီတဖၣ်မ့ဟးထီၣ်က့ၤလီၤန့ၣ်ကဘၣ်စိာ်ဃုာ်၀ဲထံကီၢ်ခိၣ်ဂီၤ(မၣ်ပိၤတ့ၤ)ဒီးၦၤလၢမ့တစိာ်ခိၣ်ဂီၤတဖၣ်န့ၣ်တၢ်ကဃ့အီၣ်လိး၀ဲစ့ဒီးၦၤလၢအခိၣ်ဂီၤတအိၣ်ဒံးဘၣ်သ့ၣ်တဖၣ်မ့အဲၣ်ဒိးမၤခိၣ်ဂီၤန့ၣ်ကဘၣ်ဟ့ၣ်၀ဲစ့(၃)ကလီၢ်ကၠးန့ၣ် BGF(၁၀၁၃)သုးရ့ၣ် ထုးထီၣ်ဃာ်လံာ်တၢ်ကလုၢ်ဖဲလါအီကူး ၁၆ သီအနံၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ လီၢ်က၀ီၤဖိလၢအလဲၤခီတဲာ်ဘၣ်(BGF)သုးကလၢၤမဲာ်ညါလၢတၢ်ဖီၣ်အီၤတဂၤစံး၀ဲ“ဖဲတၢ်တနံၤန့ၣ်ယလဲၤဖၠးဘၣ်ဖဲအ၀ဲသ့ၣ်သုးကလၢၤမဲာ်ညါခံဘျီမီၤနီၤႉမ့ၢ်အ၀ဲသ့ၣ်ဆိမိၣ်ယၤတမံၤမံၤဧါတသ့ၣ်ညါဘၣ်ႉအဖီၣ်ယၤႇထၢနုာ်ယၤလၢတၢ်ဒုးဃာ်လီၢ်ဘျီတီၢ်ယၤ(၄)ထံၣ်ႉယမ့ၢ်ၦၤလီၢ်က၀ီၤဖိလီၤန့ၣ်ၦၤအိၣ်ဖဲအ၀ဲသ့ၣ်သုးကလၢၤအံၤတနီၤသ့ၣ်ညါ၀ဲမီၤနီၤႉ၀ံၤဘျီၦၤဟဲအုၣ်ခီၣ်ယၤအဃိအ၀ဲသ့ၣ်ပျၢ်က့ၤယၤလီၤႉလီၢ်က၀ီၤဖိလၢအဟးထီၣ်က့ၤလီၤဖဲန့ၣ်တဖၣ်တၢ်ဖီၣ်အီၤတလီၢ်လီၢ်လီၤႉတနီၤန့ၣ်မ့ဟ့ၣ်စ့မးပျၢ်လီၤ၀ဲ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ သုးခိးကီၢ်ဆၢ(BGF)တဖၣ်အံၤသမံသမိးဟီၣ်က၀ီၤပူၤလီၢ်က၀ီၤကမျၢၢ်လၢအဟးထီၣ်က့ၤလီၤတဖၣ်ဟဲအါထီၣ်၀ဲဒီး(BGF)သုးလၢအနုာ်လီၤဟူးဂဲၤဖဲ(သုးက့ ၅)ဟီၣ်က၀ီၤအပူၤတဖၣ်အံၤ မၤကမၣ်၀ဲၦၤဂ့ၢ်၀ီခွဲးယာ် ကိးမုၢ်နံၤဒဲးလီၤအဂ့ၢ်န့ၣ်ခ့ၣ်အဲၣ်ယူၣ်–မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲအပူၤကွံာ်လါအီကူး ၁၈ သီအနံၤန့ၣ်လီၤႉ ဘၣ်ဃးတၢ်ထုးထီၣ်တၢ်ကလုၢ်လၢလီၢ်က၀ီၤကမျၢၢ်မ့ဟးထီၣ်က့ၤလီၤမ့တစိာ်ဃုာ်ခိၣ်ဂီၤ(မၣ်ပိၤတ့ၤ)ဘၣ်တၢ်ဂ့ၢ်အံၤန့ၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ်ဆဲးကျိးဒီး(BGF-၁၀၁၃)ၦၤဘၣ်မူဘၣ်ဒါတဖၣ်ဘၣ်ဆၣ် ဆဲးကျိးတန့ၢ်၀ဲဘၣ်န့ၣ်လီၤႉ သုးမီၤစိရိၤစုတီၤအဖီလာ်(BGF)သုးလၢအနုာ်လီၤဟူးဂဲၤဖဲခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤပူၤတဖၣ် ခီဖျိအ၀ဲသ့ၣ်ဒိးလီၤမ့ၣ်ပိၢ်လၢတၢ်ဖံးအီၣ်မၤအီၣ်လီၢ်ကျဲဒီးတၢ်လီၤပျီလီၢ်တဖၣ်အဃိ ဆၣ်ဖိကီၢ်ဖိလၢလီၢ်က၀ီၤကမျၢၢ်ဘုၣ်၀ဲတဖၣ်ယီၢ်ဘၣ်မ့ၣ်ပိၢ်သံ၀ဲအိၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ တလါအံၤလါအီကူး...

လါအီကူး ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါအီကူး ၂၀ သီအနံၤလၢမၠၣ်၀တံၣ်–ကီးတရံးအ့ရှါကျဲမုၢ်ဟီၣ်က၀ီၤအပူၤ တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤဒီး ဖဲန့ၣ်ကီၤနွဲၣ်ဒီးအၤကလီၤသ၀ီဘၢၣ်စၢၤန့ၣ်ခီဖျိမီၣ်လမၠဲၣ်–မၠၣ်၀တံၣ်မ့ၣ်အူတၢၣ်ဟးဂီၤအဃိ မၠၣ်၀တံၣ်၀့ၢ်ဃုာ်ဒီးကီၢ်ဆၣ်(၃)ဘ့ၣ်ပူၤသ၀ီအဖျၢၣ်(၅၀)ဃၣ်ဃၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ တၢ်ဒုးကဲထီၣ်အခါခီဖျိမီၣ်လမၠဲၣ်–မၠၣ်၀တံၣ်(၂၃၀ kv)မ့ၣ်အူတၢၣ်ဟးဂီၤ၀ဲ(၂)တၢၣ်ဒီး မ့ၣ်အူတဟဲဘၣ်န့ၢ်၀ဲတနွံဘျဲၣ်လံအဃိမၠၣ်၀တံၣ်ႇကီးတရံးႇကၠၤအ့စ့ၣ်ကၠံကီၢ်ဆၣ်(၃)ဘ့ၣ်ပူၤသ၀ီ(၅၀)ဖျၢၣ်ဃၣ်ဃၣ်ထံၣ်ဘၣ်၀ဲတၢ်ကီတၢ်ခဲန့ၣ်လီၤႉ ကမျၢၢ်လၢအိၣ်မၠၣ်၀တံၣ်၀့ၢ်ပူၤတဂၤစံး၀ဲ“ၦၤတဲလၢမ့ၣ်အူဟဲတညီလၢၤဘၣ်ႉမ့ၣ်အူတၢၣ်လၢကစၢၢ်ခိၣ်တဖၣ်န့ၣ်ၦၤဘှီမ့ၣ်အူဖိလၢအိၣ်မၠၣ်၀တံၣ်၀့ၢ်ပူၤတဖၣ်လဲၤဘှီ၀ဲတဘူၣ်ဘၣ်ႉၦၤဘၣ်ယိၣ်လၢၦၤကခးၦၤလဲၤဘှီမ့ၣ်အူဖိတဖၣ်ဒီးၦၤပျံၤလၢတၢ်ဒုးကကဲထီၣ်အဃိမ့ၣ်အူကဟဲကဒါအဂီၢ်တလီၤတံၢ်ဘၣ်ႉခဲအံၤလၢမၠၣ်၀တံၣ်န့ၣ်တၢ်လီၢ်လၢအသူယိၤကီၢ်မ့ၣ်အူတဖၣ်န့ၢ်ကိညၢ်ဒံးႉၦၤလၢအဟံမ့ၣ်အူလၢကီၢ်ပယီၤတဖၣ်န့ၣ်တၢ်ကီတၢ်ခဲအိၣ်လၢကသူထံႇကသူမ့ၣ်အူႇကသွီလီတဲစိဂံၢ်မီၤနီၤႉမ့မ့ၢ်လၢကီးတရံးႇကြုၢ်တုႇနိၣ်တကီသ၀ီတကပၤန့ၣ်နးဒိၣ်ဒီးတစဲးႉသူတၢ်တန့ၢ်တၢ်နီတမံၤဘၣ်”အဂ့ၢ်န့ၣ်စံး၀ဲန့ၣ်လီၤႉ မ့ၣ်အူတၢၣ်လၢအဟးဂီၤတဖၣ်အံၤသုးမီၤစိရိၤအစုတီၤဖီလာ်မၠၣ်၀တံၣ်မ့ၣ်အူ၀ဲၤကျိၤကဘှီ၀ဲဘၣ်ဆၣ်ခီဖျိတၢ်ဒုးကဲထီၣ်လၢပယီၤသုးဒီးဟီၣ်က၀ီၤ(KNLA)သုးပာ်ဖှိၣ်တဖၣ်အဘၢၣ်စၢၤအဃိတၢ်ကီတၢ်ခဲအိၣ်လၢကဘှီမ့ၣ်အူတၢၣ်အံၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ “မ့ၣ်အူတဟဲကသွီလီတဲစိအဂံၢ်နါက့တသ့ႉၦၤလၢအိၣ်ဒီးမ့ၣ်အူစဲးတဖၣ်ဒုသွီ၀ဲလီတဲစိအဂံၢ်ႇ(Power bank)ႇဒးမံလၢဟံၣ််သ့မီၤနီၤႉတၢ်လီၢ်တနီၤန့ၣ်ဟ့ၣ်ဒုးသွီကလီ၀ဲလီၤႉမ့ၢ်အဘှီမ့ၣ်အူဧါႇမ့ၢ်မ့ၣ်အူကဟဲဆံးယံာ်လဲၣ်တၢ်ကစီၣ်ဟးထီၣ်အကလုာ်ကလုာ်အဃိမ့ၣ်အူကဟဲကဒါဆံးယံာ်လဲၣ်ဒုတလီၢ်တံၢ်ဘၣ်ႉခဲအံၤနသွီလီတဲစိအဂံၢ်တဖျၢၣ်န့ၣ်ဘၣ်ဟ့ၣ်(၅၀၀)ကၠးႇ(Power bank)တဖျၢၣ်န့ၣ်(၁၀၀၀)ကၠးႇ(၂၀၀၀)ကၠးညါ”အဂ့ၢ်န့ၣ် မၠၣ်၀တံၣ်လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဘၣ်ဃးမ့ၣ်အူဟးဂီၤလၢမၠၣ်၀တံၣ်–ကီးတရံး–နိၣ်တကီ–ကြုၢ်တုကျဲဒီတကျိၤဒီးသ၀ီတဖၣ်အပူၤအံၤ ဖဲအပူၤကွံာ်လါအီကူး ၂၀ သီ ဟါခီအဆၢကတီၢ်န့ၣ် ပယီၤသုးဒီး(KNLA)သုးပာ်ဖှိၣ်အဘၢၣ်စၢၤ တၢ်ဒုးကဲထီၣ်အကတီၢ်မ့ၣ်အူတၢၣ်ဟးဂီၤ၀ဲ(၂)တၢၣ်အံၤအဖီခိၣ် တၢ်ကစီၣ်လၢဟ့ၣ်ဂံၢ်ဟ့ၣ်ဘါသုးမီၤစိရိၤတဖၣ် ထုးထီၣ်ပာ်ဖျါတၢ်ကစီၣ်လၢဖီၣ်စုက၀ဲၤကရူၢ်ဟဲမၤပိၢ်ဖးမၤဟးဂီၤ၀ဲဒၣ်မ့ၣ်အူတၢၣ်အံၤအဂ့ၢ်န့ၣ်ထုးထီၣ်ပာ်ဖျါ၀ဲန့ၣ်လီၤႉ ဘၣ်ဆၣ်ဒ်ကီးတရံးလီၢ်က၀ီၤဖိတဖၣ်စံး၀ဲအသိးန့ၣ်ပယီၤသုးခီၣ်သုးရ့ၣ်(ခလရ–၉၇)သုးရ့ၣ်လၢအိၣ်ဆီလီၤသးဖဲကီးတရံး၀့ၢ်ပူၤအံၤခးလီၤကျိဖးဒိၣ်ဆူတၢ်ဒုးကဲထီၣ်အလီၢ်အဃိ...

လါအီကူး ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢမၠၣ်၀တံၣ်၀့ၢ်ကလံၤထံး ဆိၣ်စံမၠဲၣ်–အူကြ့ၣ်ထၣ်–ဂီၤလ့ၤကျဲမုၢ်ခိၣ် အူကြ့ၣ်ထၣ်ကျဲဘၣ်သဂၢၢ်လိာ်သးလီၢ်န့ၣ် ပယီၤသုးနုာ်လီၤအိၣ်ကးတံၢ်ဃာ်ကျဲအိၣ်ကတီၤထီၣ်သးလၢကမၤ၀ဲဒုးယၤတၢ်ဟူးတၢ်ဂဲၤဒီး ထုးထီၣ်စ့ၢ်ကီးတၢ်ကလုၢ်လၢမ့ဟးထီၣ်က့ၤလီၤန့ၣ်ကခး၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ကျးကစၢ်လၢအိၣ်လီၢ်က၀ီၤပူၤဖဲန့ၣ်လၢတအဲၣ်ဒိးပာ်ဖျါအမံၤတဂၤစံး၀ဲ“ဂီၤလ့ၤကျဲဒီတဘိ(သိထၣ်ကွ့ၣ်)တကပၤန့ၣ်ကညီဖီၣ်စုက၀ဲၤကရူၢ်ကးတံၢ်ဃာ်၀ဲအသိးလၢသ့ၣ်ဘီဘိႇဆိၣ်စံမၠဲၣ်ႇအူကြ့ၣ်ထၣ်တုၤလၢဂီၤလ့ၤန့ၣ် သုးကလၢၤလၢအိၣ်တြဲၤအိၣ်ခိးတၢ်လီၢ်ကျဲကပၤတဖၣ်ကးတံၢ်ဃာ်၀ဲမီၤနီၤႉလဲၤလၢကျီးပူၤဘုခ့ကျီးပူၤတန့ၢ်နီတဆဲးဘၣ်ႇမ့ၢ်နါဟူၦၤကညီကလုၢ်ႇ(ထွ့ၤလၤ)ကလုၢ်န့ၣ်ခးပိၢ်ထီၣ်ကျိခးစိ၀ဲလီၤႉကျဲဒီတဘိန့ၣ်တဒုးလဲၤၦၤနီတဂၤဘၣ်”အဂ့ၢ်န့ၣ်စံး၀ဲန့ၣ်လီၤႉ ခီဖျိပယီၤသုးထုးထီၣ်တၢ်ကလုၢ်ဒ်အံၤအဃိကစၢၢ်ခိၣ်သ၀ီလီၢ်က၀ီၤဖိတဖၣ်တၢ်ကီတၢ်ခဲအိၣ်လၢကလဲၤၦ့ၤတၢ်လၢဂီၤလ့ၤတကပၤဒီးကလဲၤဖံးမၤတၢ်လၢကျီးပူၤအဂီၢ်တၢ်ကီတၢ်ခဲဟဲအိၣ်ထီၣ်၀ဲအဂ့ၢ်န့ၣ် ကျးကစၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံပယီၤသုးနုာ်လီၤမၤဒုးယၤတၢ်ဟူးတၢ်ဂဲၤလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤအပူၤန့ၢ်၀ဲ(၈)လါဘျဲၣ်လံဒီးခီဖျိတၢ်ဒုးကဲထီၣ်အဃိ လီၢ်က၀ီၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၉၀ႇ၂၉၁)ဂၤလံအဂ့ၢ်န့ၣ် ကညီဂံၢ်ခီၣ်ထံးတၢ်ကရၢကရိထၢဖှိၣ်မၤနီၣ်စရီအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါကမျၢၢ်ၦၤလီၢ်အိၣ်ကမှံဖိလၢအိၣ်သူမှဲကျိကၢၢ်နံၤဒီတကျိၤဒီးကီၢ်ဆၢတၢ်လီၢ်တဖၣ်အံၤတၢ်ကီတၢ်ခဲအိၣ်ထီၣ်လၢကဟးထီၣ်က့ၤလီၤဒီးတုၤလၢခဲအံၤလိၣ်ဘၣ်ဒံး၀ဲတၢ်အီၣ်တၢ်အီတဖၣ်အဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ “တုၤလၢခဲအံၤပက့ၤအိၣ်လၢဂီၤလ့ၤ(ယပၣ်)ဟံၣ်တၢ်သူၣ်ထီၣ်လီၢ်တဘူၣ်ဒံးဘၣ်ႉဘၣ်အိၣ်စိဖဲဂီၤလ့ၤယိၤကီၢ်ပူၤဘုခ့ကျီးသ့ၣ်ခိၣ်အဟံၣ်တစိၢ်တလီၢ်မီၤနီၤႉခီဖျိပယီၤသုးဆီလီၤသးအိၣ်ဒံးအဃိကလဲၤမၤဘုခ့ကျီးဒီးမၤတသ့ႇစ့ဒၢးတအိၣ်ႉမ့မ့ၢ်လၢအီၣ်အီခီန့ၣ်ၦၤမ့ဟဲနီၤလီၤၦၤမးပအီၣ်ဘၣ်မီၤနီၤ”အဂ့ၢ်န့ၣ် ဂီၤလ့ၤလီၢ်က၀ီၤကမျၢၢ်လၢအဘၣ်ဃ့ၢ်အိၣ်ကမှံတဂၤစံး၀ဲန့ၣ်လီၤႉ တလါအံၤလါအီကူး ၁ သီတုၤလၢ ၂၀ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၆)စုတီၤအဖီလာ်ဒီး...

လါအီကူး ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ကီၢ်ဆၣ် သ၀ီတနီၤအပူၤန့ၣ် ပယီၤသုးမီၤစိရိၤစုတီၤဖီအလာ် သုးခိးကီၢ်ဆၢ(BGF)ဟးကရၢကရိကမျၢၢ်လၢတၢ်ကဒုးအိၣ်ထီၣ်ဂၢၤကီၢ်သုးလၢတၢ်ကဒီသဒၢလီၤက့ၤဒူသ၀ီတၢ်ဘံၣ်တၢ်ဘၢအဂီၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲလါအီကူး ၂၃ သီအနံၤန့ၣ် သုးမီၤစိရိၤအစုတီၤဖီလာ်ကညီကီၢ်စဲၣ် သုးခိးကီၢ်ဆၢ(BGF)အနဲၣ်ရွဲၣ်ခိၣ်ကျၢၢ် သုးခိၣ်ဒိၣ်စိ စီၤခၠ့ၣ်သူၤ တီခိၣ်ရိၣ်မဲမၤ၀ဲတၢ်ထံၣ်လိာ်အိၣ်သကိးဒီးကမျၢၢ်ဖဲလူၢ်ပျဲၢ်ကီၢ်ဆၣ်ႇကီၣ်၀ါသ၀ီပူၤဒီး စံးလီၤဖဲတၢ်အိၣ်ဖှိၣ်ပူၤအဂ့ၢ်န့ၣ် လီၢ်က၀ီၤဖိလၢလဲၤထီၣ်တၢ်အိၣ်ဖှိၣ်အံၤတဂၤစံး၀ဲဒ်အံၤန့ၣ်လီၤႉ “တဲ၀ဲလၢကညီဖိကဒဲကဒဲကဘၣ်အိၣ်ဃူအိၣ်ဖိးကဘၣ်အဲၣ်လိာ်သးမီၤနီၤႉႇသ၀ီကိးဖျၢၣ်ဒဲးဒုးအိၣ်ထီၣ်တၢ်ဒီသဒၢသုးအံၤႉမ့လိၣ်န့ၣ်အ၀ဲသ့ၣ်ကဟ့ၣ်တၢ်သိၣ်ႇဟဲတဲ၀ဲဒ်န့ၣ်မီၤနီၤႉၦၤဟဲထီၣ်တၢ်အိၣ်ဖှိၣ်ဒီဒူၣ်ညါ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ တၢ်မၤတၢ်အိၣ်ဖှိၣ်ဘျီ၀ဲအံၤအပူၤကီၣ်၀ါသ၀ီခိၣ်ဃၢၤလၢအမ့ၢ်ကမီၣ်ကခၠူသ၀ီႇမဲလီၤကၠံႇမဲလီၤလ့ဒီးသ၀ီလၢအိၣ်ဖဲန့ၣ်ဟံၣ်တဖျၢၣ်တဂၤဟဲထီၣ်ဒိကနၣ်၀ဲဒီးတၢ်အိၣ်ဖှိၣ်အပူၤၦၤဟဲကူကၤထဲကညီကူကၤလီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ “သုးခိၣ်ခၠ့ၣ်သူတဲလီၤ၀ဲလၢသါ(သ့ၣ်စၤဖီး)ဒီးခ့ၣ်အဲၣ်ယူၣ်န့ၣ်မ့ၢ်လီၤႇဘၣ်ဆၣ်ကညီဖိကဒဲကဒဲန့ၣ်ယတ သ့ၣ်စၤဖီး(ထီဒါ)ဘၣ်ႉတုၤလၢခဲအံၤန့ၣ်ပအိၣ်ဆၢထၢၣ်ဒ်စီၤဘးအူကၠံတၢ်ကတိၤ(၄)ထံၣ်န့ၣ်အသိးလီၤတဲ၀ဲဒ်န့ၣ်မီၤနီၤ”အဂ့ၢ်န့ၣ်လီၢ်က၀ီၤဖိလၢလဲၤထီၣ်တၢ်အိၣ်ဖှိၣ််တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ကတီၢ်ခဲအံၤ(BGF)သုးတဖၣ်မၤစၢၤ၀ဲသ၀ီဖိကမျၢၢ်လၢအိၣ်အ၀ဲသ့ၣ်တၢ်ပၢဟီၣ်က၀ီၤပူၤတဖၣ်လၢကျိၣ်စ့ဒီး ဟးလူၤကရၢကရိကမျၢၢ်တဖၣ်ဒ်သိးကကဲထီၣ်အ၀ဲသ့ၣ်ၦၤႇကကဲထီၣ်သုးဖိအိၣ်၀ဲအသိး ၦၤလၢတအဲၣ်ဒိးကဲ(BGF)သုးတဖၣ်န့ၣ်ဘၣ်ဟ့ၣ်လီၤ၀ဲစ့အဂ့ၢ်န့ၣ်...

လါအီကူး ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲလါအီကူး ၂၃ သီအနံၤန့ၣ်(KNLA)သုးပာ်ဖှိၣ်ထီၣ်မၤန့ၢ်၀ဲကတၢၢ်တံာ်သုးခိးကီၢ်ဆၢ(BGF)သုးကလၢၤဖိတၢ်လီၢ်တခါဒီး မၤန့ၢ်ဃုာ်ကျိချံၦာ်သၣ်တနီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲဖဲမဟါလါအီကူး ၂၄ သီအနံၤန့ၣ်လီၤႉ သုးခိးကီၢ်ဆၢ(BGF)သုးကလၢၤဖိတဖျၢၣ်လၢအိၣ်ကတၢၢ်တံာ်သ၀ီကရူၢ် ဘီကၠိၣ်ထၣ်သ၀ီကပၤ ကည့ၤဒိၤတိၤ ကတၢၢ်တံာ်သ၀ီပူၤအံၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ထီၣ်ခး၀ဲယံၤတနၣ်ရံၣ်ဃၣ်ဃၣ်ဒီးဖဲတၢ်နုာ်လီၤမၤရှဲလဲတၢ်လီၢ်အခါ(BGF)သုးသံ(၄)ဂၤဒီးဘၣ်ဒိ၀ဲ(၂)ဂၤအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲတၢ်မၤရှဲလဲသုးကလၢၤအခါတၢ်မၤန့ၢ်၀ဲကျိ(M-16)ခံခိၣ်ႇ(AK-47)တခိၣ်ႇစဲးကတိၤတၢ်(၂)ဖျၢၣ်ႇ စုကွံာ်မ့ၣ်ပိၢ်(၆)ဖျၢၣ်ႇ(RPG-7)ချံ(၄)ဖျၢၣ်ႇ(M-16)ဆၣ်ဒၢ(၁)ဘ့ၣ်ႇ(AK-47)ဆၣ်ဒၢ(၃)ဘ့ၣ်ဒီး နးတိချံ(၉၄)ဖျၢၣ်အဂ့ၢ်န့ၣ်ခ့ၣ်အဲၣ်ယူၣ်–မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံလီၢ်က၀ီၤကမျၢၢ်လၢအိၣ်ဘူးဖဲကတၢၢ်တံာ်သ၀ီခိၣ်ဃၢၤတဖၣ်ဘၣ်ယိၣ်လၢတၢ်ကလူၤဖီၣ်ပီၣ်တၣ်ႇတၢ်ကကိးသူအ၀ဲသ့ၣ်ဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် ကတၢၢ်တံာ်သ၀ီဖိတဂၤစံး၀ဲန့ၣ်လီၤႉ “ဖဲတၢ်ကဲထီၣ်သးတဂီၤန့ၣ်ၦၤခးလီၤကျိဖးဒိၣ်ဒီတနံၤလီၤႉခဲအံၤတနၢ်ဟူတၢ်နီတမံၤလၢၤဘၣ်ႉဘၣ်ဆၣ်လၢညါခါန့ၣ်ၦၤလူၤဖီၣ်ပီၣ်တၣ်လၢ၀ဲပၠၣ်သ၀ီတကပၤန့ၣ်အိၣ်မီၤနီၤႉဖဲအံၤနါက့တၢ်ဒုးကဲထီၣ်အဃိဘၣ်ယိၣ်လၢၦၤကလူၤဖီၣ်တၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါအီကူး ၂၄...

လါအီကူး ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး–မၠၣ်၀တံၣ်အ့ရှါကျဲမုၢ်ခိၣ်န့ၣ် သုးမီၤစိရိၤအစုတီၤဖီလာ် သုးခိးကီၢ်ဆၢ(BGF)သုးလၢအအိၣ်ခိးတၢ်ဖဲကျဲဒီတကျိၤအံၤတဖၣ်မၤပျံၤမၤဖုးဃ့အီၣ်စ့လၢကမျၢၢ်ၦၤလဲၤတၢ်က့ၤတၢ်ဖိတဖၣ်အအိၣ်အဂ့ၢ်န့ၣ် ကမျၢၢ်ၦၤလဲၤက့ၤတၢ်ဖိလၢအသဂၢၢ်ဘၣ်ဒီးတၢ်ကဲထီၣ်သးအံၤတဖၣ်စံး၀ဲန့ၣ်လီၤႉ လၢတီနီၢ်ကစၢၢ်အ့ရှါကျဲမုၢ်ခိၣ်ဒီတကျိၤန့ၣ်ပယီၤသုးမီၤစိရိၤအစုတီၤဖီလာ်(BGF)တဖၣ်ဃ့အီၣ်၀ဲစ့လၢသိလ့ၣ်ဟးထီၣ်က့ၤလီၤဒီးသိလ့ၣ်တီၣ်တၢ်ဖိတၢ်လံၤတဖၣ်အအိၣ်ဒီးဒ်အ၀ဲသ့ၣ်ဃ့အသိးမ့တဟ့ၣ်ဘၣ်န့ၣ်မၤပျံၤမၤဖုး၀ဲအဂ့ၢ်န့ၣ်ကမျၢၢ်ၦၤလဲၤတၢ်က့ၤတၢ်ဖိလၢအသဂၢၢ်ဘၣ်၀ဲဒီးတၢ်ကဲထီၣ်သးအံၤတဂၤစံး၀ဲဒ်အံၤန့ၣ်လီၤႉ “ယမိန့ၣ်သံလၢမါတလ့မီၤနီၤႉစ့နါက့တလၢလၢၤဘၣ်ႉယဃ့ကညးအ၀ဲသ့ၣ်ႇအ၀ဲသ့ၣ်တဲယၤလၢတန့ၢ်ဘၣ်ႉဒ်အ၀ဲသ့ၣ်ဃ့အသိးန့ၣ်ဘၣ်ဟ့ၣ်လီၤမီၤနီၤႉမၤပျံၤမၤဖုးယၤႉဒ်အ၀ဲသ့ၣ်ဃ့အသိးနမ့တဟ့ၣ်လီၤဘၣ်န့ၣ်မၢပတုာ်ဃာ်သိလ့ၣ်ႇကဒွဲၣ်အူအီၣ်၀ဲဒ်န့ၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢတီနီၢ်ကစၢၢ်အ့ရှါကျဲမုုၢ်ခိၣ်န့ၣ်သုးခိးကီၢ်ဆၢ(BGF)တြဲၤအိၣ်ခိးတၢ်လီၢ်အိၣ်၀ဲ(၈)ခါဒီးဒ်သိးကမျၢၢ်သိလ့ၣ်ဒီးသိလ့ၣ်တီၣ်တၢ်ဖိတၢ်လံၤတဖၣ်ကဟးထီၣ်ဟးလီၤဘၣ်အဂီၢ််တြဲၤအိၣ်ခိးတၢ်လီၢ်တတီၤန့ၣ်ဘၣ်ဟ့ၣ်လီၤ၀ဲ(၅၀၀၀)ကၠးညါအဃိသိလ့ၣ်ကစၢ်လၢတီၣ်ငါတၢ်ဖိတၢ်လံၤတဖၣ်အံၤဒိးန့ၢ်ဘၣ်စ့လီၤစှၤ၀ဲအဂ့ၢ်န့ၣ် ၦၤတီၣ်ငါသိလ့ၣ်ဖိတဖၣ်စံး၀ဲန့ၣ်လီၤႉ “အိၣ်ခိးတၢ်လီၢ်န့ၣ်ကအိၣ်(၈)တီၤညါႉတြဲၤအိၣ်ခိးတၢ်လီၢ်တတီၤန့ၣ်ဘၣ်ဟ့ၣ်(၅၀၀၀)ကၠးႉလၢကစၢၢ်ခီၣ်ထံးတဒူၣ်န့ၣ်ယသကိးတဂၤန့ၣ်အစ့တလၢဘၣ်အဃိမၤပျံၤ၀ဲဒီးဒီမီၤနီၤႉဆဲးနါက့ဆဲး၀ဲစ့ၢ်ႇတၢ်မၢၤဆဲး၀ဲလၢဘၣ်ဘၣ်တဘၣ်ဘၣ်ဒ်န့ၣ်မီၤနီၤႉမၤ၀ဲလၢၦၤကပျံၤတၢ်အဂီၢ်မီၤနီၤႉပက့ၤမၤဆၢအ၀ဲသ့ၣ်တဘၣ်နီတမံၤဘၣ်ႉဘၣ်တူၢ်ဒ်န့ၣ်လီၤခီဖျိအိၣ်ဒီးဟံၣ်ဖိဃီဖိမီၤနီၤႉမ့ထံၣ်ထီၣ်သိလ့ၣ်န့ၣ်တဲ၀ဲဟ့ၣ်လီၤ(၅၀၀၀)ကၠးဒ်န့ၣ်”အဂ့ၢ်န့ၣ်ၦၤနီသိလ့ၣ်ဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ ဘၣ်ဃးတၢ်ဂ့ၢ်ကဲထီၣ်သးတၢ်အိၣ်သးအံၤခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိးဒီးသုးခိးကီၢ်ဆၢ(BGF)ၦၤဘၣ်မူဘၣ်ဒါတဖၣ်ဘၣ်ဆၣ် ဆဲးကျိးတန့ၢ်၀ဲဘၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါအီကူး ၁၅ သီအနံၤ တၢ်ခးလိာ်သးကဲထီၣ်လၢကီးတရံး၀့ၢ်ပူၤ၀ံၤအလီၢ်ခံ တၢ်ကးတံၢ်ကွံာ်၀ဲ၀့ၢ်ပူၤကျဲနုာ်လီၤဟးထီၣ်တဖၣ်ခဲလၢာ်ဒီးလၢ၀့ၢ်ချၢဒူသ၀ီတဖၣ်အပူၤစ့ၢ်ကီးတၢ်ဒုးကဲထီၣ်၀ဲအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ

လါအီကူး ၂၄ သီႇ ၂၀၂၂ နံၣ်ႇ ခ့ၣ််အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ်အပူၤန့ၣ် သ၀ီတနီၤအပူၤဖိဒံဖိသၣ်တဖၣ်အလိၤကဖိဒၢမံထီၣ်ကဲထီၣ်သးအါမးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ တၢ်ဆါအံၤကဲထီၣ်သးအါလၢဖိသၣ်(၅)နံၣ်ဆူဖီလာ်ဒီးဖဲအကဖိထီၣ်လၢကိာ်ပူၤႇမိၢ်ၦၢ်လိၤဒီတဂၤအခါန့ၣ် ပထံၣ်ဘၣ်လၢဖိသၣ်တဖၣ်အတၢ်ကိၢ်ထီၣ်ႇနါအ့ၣ်လီၤအဂ့ၢ်န့ၣ် ဖိသၣ်မိၢ်ပၢ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖိသၣ်မိနါအဲဆၣ်စံး၀ဲ“ဖိသၣ်ဘၣ်ဖဲသ၀ီပူၤတဖၣ်အံၤအါလၢဖိသၣ်လီၤႉဖဲယဖိစးထီၣ်ဘၣ်တသီခံသီအခါန့ၣ်အဟီၣ်ညါႇလၢခံဘျီတဟီၣ်လၢၤဘၣ်ႉဖဲအလိၤကဖိထီၣ်အထံဟဲထီၣ်အခါန့ၣ်အလိၤသးအဃိအမံတန့ၢ်ဘၣ်အဟီၣ်မီၤနီၤႉမ့မ့ၢ်ယဖိခီန့ၣ်တၢ်ကိၢ်တထီၣ်ဘၣ်ႉစးထီၣ်ဘၣ်တဘျီဃီန့ၣ်ယဒုးအီၣ်အီၤကသံၣ်ဒ်သရၣ်ဟ့ၣ်လီၤ၀ဲအသိးမီၤနီၤႉဖိသၣ်တနီၤန့ၣ်ဖဲအလိၤကဖိထီၣ်အခါန့ၣ်အတၢ်ကိၢ်ထီၣ်ႇနါအ့ၣ်လီၤႇအကူးမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖိသၣ်လၢအလိၤကဖိထီၣ်တဖၣ်အါဒၣ်တက့ၢ်စးထီၣ်ကဲထီၣ်(၃)သီအတီၢ်ပူၤန့ၣ်အလိၤကဖိဒၢမံထီၣ်၀ဲဒီး ဒ်သိးတၢ်ပူၤလီၢ်ကဘျါအဂီၢ်တၢ်ဆၢကတီၢ်ယံၤ၀ဲ(၇)သီညါအဂ့ၢ်န့ၣ်ဖိသၣ်မိလၢအလဲၤခီဖျိတၢ်အံၤတဂၤစံး၀ဲအသိးသ့ၣ်ညါဘၣ်န့ၣ်လီၤႉ ကတီၢ််ခဲအံၤတၢ်ပနီၣ်လၢကဲထီၣ်သးလၢဖိသၣ်အအိၣ်တဖၣ်အံၤမ့ၢ်၀ဲဒၣ်ဖံးဘ့ၣ်တၢ်ဆါမုၢ်ဆ့ၣ်မုၢ်ဂီၤတကလုာ်လီၤဒီးဘၣ်ကူဘၣ်ဂာ်၀ဲလၢတဂၤဒီးတဂၤထိးဘၣ်လိာ်သးဒီးတမ့ၢ်တၢ်ပနီၣ်လၢအလီၤဘၣ်ယိၣ်ဘၣ် ဘၣ်ဆၣ်ဖဲအကဲထီၣ်သးအခါအရ့ဒိၣ်လၢကဘၣ်ပာ်အီၤကဆှဲကဆှီအဂ့ၢ်န့ၣ် ကြုၢ်တုကီၢ်ဆၣ် ကသံၣ်သရၣ်တဂၤစံး၀ဲန့ၣ်လီၤႉ အ၀ဲစံး၀ဲ“တၢ်ဆါကဲထီၣ်သးခဲအံၤန့ၣ်မ့ၢ်တၢ်ဃၢ်လၢဟဲကဲထီၣ်သးခီဖျိဖံးဘ့ၣ်အဃိမီၤနီၤႉမ့ၢ်၀ဲတၢ်ဆါဘၣ်ကူဘၣ်ဂာ်လၢဖံးဘ့ၣ်မီၤနီၤႉဘၣ်ကူဘၣ်ဂာ်သ့၀ဲလၢဖိသၣ်ကဒဲကဒဲထိးဘၣ်လိာ်သးႇမ့၀ံၤဘၣ်ကူဘၣ်ဂာ်လၢတၢ်ကူတၢ်သိးအအိၣ်တဆီမီၤနီၤႉမ့မ့ၢ်ဖံးဘ့ၣ်တၢ်ဆါမုၢ်ဆ့ၣ်မုၢ်ဂီၤန့ၣ်အလီၢ်ကအိၣ်တ့ၢ်၀ဲႉတၢ်ဃၢ်၀ဲန့ၣ်မ့လဲၤနုာ်လီၤလၢပသွံၣ်ပူၤန့ၣ်သွံၣ်အစုၣ်ထီၣ်ပသံသ့မီၤနီၤႉဒိးသန့ၤထီၣ်သးလၢဖိသၣ်တဂၤဒီးတဂၤအဖီခိၣ်လီၤ”အဂ့ၢ်န့ၣ်ကသံၣ်သရၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါကမျၢၢ်လၢအိၣ်ဒူပူၤသ၀ီပူၤတဖၣ်ပထံၣ်ဘၣ်လၢဖံးဘ့ၣ်တၢ်ဆါကဲထီၣ်သးတကးဒံးဘၣ်အမဲာ်ညါတနံၣ်အံၤတၢ်စူၤခါအကတီၢ်ပထံၣ်ဘၣ်လၢတၢ်ညၣ်ဂိၢ်သွံၣ်ဟးထီၣ်တၢ်ဆါဒီးတၢ်ညၣ်ဂိၢ်တၢ်ဆါကဲထီၣ်သးဟဲအါထီၣ်၀ဲအဂ့ၢ်န့ၣ်ဆူၣ်ချ့ကသံၣ်သရၣ်ၦၤမၤတၢ်ဖိလၢအိၣ်ဟီၣ်က၀ီၤပူၤတဖၣ်စံး၀ဲန့ၣ်လီၤႉ

လါအီကူး ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါဂီၤခီ ၈ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးမီၤစိရိၤကဘီယူၤဟဲခးလီၤတၢ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤ မိကီၢ်ဆၣ်ပူၤခံဘျီညါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲတနံၤအံၤဂီၤခီအဆၢကတီၢ် လၢမိကီၢ်ဆၣ် မီကဲသၣ်ပၢၤခိၣ်သ၀ီပူၤန့ၣ် တၢ်ခးလိာ်သးကဲထီၣ်၀ဲလၢ ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၈)ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံပယီၤသုးမီၤစိရိၤကဘီယူၤဟဲခးလီၤစၢၤတၢ်လၢတၢ်ဒုးကဲထီၣ််လီၢ်အခိၣ်အဃၢၤတဖၣ်အဂ့ၢ်န့ၣ်လီၢ်က၀ီၤကမျၢၢ်စံးဘၣ်ခ့ၣ်အဲးစံၣ်ဖဲမဟါလါအီကူး ၂၃ သီအနံၤန့ၣ်လီၤႉ လီၢ်က၀ီၤဖိတဂၤစံး၀ဲ“ဖဲတဂီၤညါအံၤန့ၣ်ကဘီယူၤဟဲဆှၣ်တၢ်လၢတၢ်ဖီခိၣ်တလီၢ်လီၢ်လီၤႉကဘီယူၤလဲၤခးလီၤတၢ်လၢ(သုးရ့ၣ်–၈)တကပၤန့ၣ်ႉလၢအံၤတကပၤလီၢ်က၀ီၤဖိတဖၣ်နါက့စံၣ်ထီၣ်လံအဃိ တၢ်ဘၣ်ဒိဘၣ်ထံးတၢ်အိၣ်သးဒုတသ့ၣ်ညါဒံးဘၣ်”အဂ့ၢ်န့ၣ်စံး၀ဲဖဲမဟါန့ၣ်လီၤႉ ဖဲလါအီကူး ၂၃ သီ ဂီၤခီအဆၢကတီၢ်လၢမီကဲသၣ်ပၢၤခိၣ်သ၀ီပူၤန့ၣ် တၢ်ဒုးကဲထီၣ်၀ဲလၢ...

လါအီကူး ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်ဖဲတလါအံၤန့ၣ်တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးတဖၣ်စးထီၣ်သူ၀ဲကီၢ်သူလ့ၤသုးမုၢ်ဒိၣ်(Kawthoolei Armed Forces-KAF)အလံာ်မဲာ်ဖျၢၣ်တၢ်ပနီၣ်လံအဂ့ၢ်န့ၣ် (DKBA)ခိၣ်နၢ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ ဖဲအပူၤကွံာ်စှၤသီအခါခ့ၣ်အဲၣ်ယူၣ်ဆှၢဃီၤသးနါၦၢ်လံာ်မဲာ်ဖျၢၣ်တၢ်ပနီၣ်တဖၣ်ဆူ(DKBA)သုး၀ဲၤလီၢ်ခိၣ်သ့ၣ်အအိၣ်ဒီးလၢတၢ်ဃူတၢ်ဖိးအဂီၢ်ဘၣ်ထီထီၣ်က့ၤ၀ဲဒ်အံၤလီၤအဂ့ၢ်န့ၣ် (DKBA)သုးခိၣ်လၢတအဲၣ်ဒိးပာ်ဖျါအမံၤတဂၤ စံး၀ဲဒ်အံၤန့ၣ်လီၤႉ “ၦၤဟ့ၣ်လီၤၦၤဖဲသ့ၣ်ဘီဘိန့ၣ်ဘျီဒၢးၦၤဟ့ၣ်လီၤသုးခိၣ်ကျၢၢ်န့ၣ်ႉမ့မ့ၢ်အ၀ဲဒုထီဧါတထီဧါတသ့ၣ်ညါဘၣ်ႉယဲမုၢ်နံၤဂ့ၤမုၢ်သၢနံၤဘျီယမၢၦၤထီထီၣ်ႉမ့တထီဘၣ်နါက့တဘၣ်တၢ်နီမံၤဘၣ်တၢ်တဖၣ်န့ၣ်မ့ၢ်ဒၣ်တၢ်ဃူတၢ်ဖိးလီၣ်ဒၢးႉမ့မ့ၢ်ပ၀ဲဒုပထီထီၣ်လံႉတၢ်မၢၤတထီခဲလၢာ်ဒံးဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ကတီၢ်ခဲအံၤတီနီၢ်မုၢ်ထီၣ်(DKBA)သုးက့စုတီၤဖီလာ်သုးဒီးလီၢ်ခၢၣ်သးသုးတဖၣ်စးထီၣ်ထီထီၣ်၀ဲလံာ်မဲာ်ဖျၢၣ်တၢ်ပနီၣ်လံအသိးခီဖျိသးနါၦၢ်လံာ်မဲာ်ဖျၢၣ်တၢ်ပနီၣ်အံၤတကူတလၢဒံးဘၣ်အဃိတၢ်ကမၤအါထီၣ်လၢအသီဒီးထီထီၣ်တၢ်ပနီၣ်အံၤလၢတၢ်ဃူတၢ်ဖိးအဂီၢ်လီၤအဂ့ၢ်န့ၣ်သုးခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဖဲအပူၤကွံာ်လါအီကူး ၃ သီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိစီၤကၠီၤနံၤဃုာ်ဒီး (KNLA)ခိၣ်နၢ်ဒိၣ်ထီတနီၤဒီး(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံတီခိၣ်ရိၣ်မဲ(DKBA)ခိၣ်နၢ်တနီၤ မၤ၀ဲတၢ်ထံၣ်လိာ်အိၣ်သကိးတခါဒီးလၢကက့ၤပာ်ဖှိၣ်ထီၣ်သးအဂီၢ်ခံခီခံကပၤတၢ်သးလီၤပလိာ်အိၣ်ထီၣ်၀ဲ (၅)ထံၣ်န့ၣ်လီၤႉ တၢ်ထီထီၣ်လံာ်မဲာ်ဖျၢၣ်တၢ်ပနီၣ်အံၤန့ၣ် ဖဲအပူၤကွံာ်လါအီကူး ၁၂ သီအနံၤ...

လါအီကူး ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤလါအီကူး ၂၃ သီ ဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးမီၤစိိရိၤကဘီယူၤ(၃)ဘ့ၣ် ဟဲတ့ၢ်လီၤမ့ၣ်ပိၢ်ဒီတတွဲလၢမၠၣ်၀တံၣ်ကလံၤထံး ဖလူ–ဂီၤလ့ၤကျဲ(သိထၣ်ကွ့ၣ်)တၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “ဖဲအနၣ်ရံၣ် ၁၀ တခီအခါန့ၣ်မီၤနီၤႉကဘီယူၤဟဲဆှၣ်တၢ်(၃)ဘ့ၣ်ႇ၀ံၤဒီးဟဲတ့ၢ်လီၤမ့ၣ်ပိၢ်ဒီတွဲလၢ (သိထၣ်ကွ့ၣ်)တၢ်လီၢ်ဒီတကျိၤႇခးလီၤစိတၢ်လၢကဘီယူၤ”အဂ့ၢ်န့ၣ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဂၤစံး၀ဲန့ၣ်လီၤႉ လၢန့ၣ်အမဲာ်ညါလၢကီးတရံးတကပၤစ့ၢ်ကီးပယီၤသုးကဘီယူၤဟးဆှၣ်တၢ်တဘ့ၣ်ဒီး တတ့ၢ်လီၤ၀ဲမ့ၣ်ပိၢ်ဒံးဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ပယီၤသုးကျိၤနုာ်လီၤမၤဒုးယၤတၢ်ဟူးတၢ်ဂဲၤလၢဖလူ–ဂီၤလ့ၤကျဲႇခးလီၤကျိဖးဒိၣ်ႇ ကဘီယူၤဟဲတ့ၢ်လီၤမ့ၣ်ပိၢ်အဖီခိၣ်အံၤခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တကပၤက့ၤထီၣ်ဒုးကဒါ၀ဲအဃိပယီၤသုးတကပကၤသံဘၣ်ဒိဘၣ်ထံးအိၣ်၀ဲအါမးအသိးဖဲစှၤသီအတီၢ်ပူၤစ့ၢ်ကီးပယီၤသုးစံၣ်ဖျိးထီၣ်နုာ်လီၤမၤ(CDM)ဟဲအိၣ်ကဒုသးလၢခ့ၣ်အဲၣ်ယူၣ်ဟီၣ်က၀ီၤပူၤဟဲအါထီၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဒုးယၤတၢ်ဟူးတၢ်ဂဲၤတၢ်ရဲၣ်တၢ်ကျဲၤဘျီ၀ဲအံၤမ့ၢ်၀ဲသုးတြိၤ(၂၂)ႇသုးတြိၤ(၄၄)ႇသုးတြိၤ(၇၇)အသုးတြိၤခိၣ်လီၢ်လံၤ သုးခိၣ်ကျၢၢ်မၠၣ်သဲၣ်အူလၢအဘၣ်တီၣ်ထီၣ်က့ၤအီၤဒ်မုၢ်ထီၣ်ကလံၤထံးကီၢ်ခီခိၣ်အသီအံၤ နဲၣ်လီၤတၢ်ကလုၢ်ဆူသုးတြိၤ(၃)ခါအသုးကျိၤ(၄)ကျိၤလၢကမၤ၀ဲတၢ်ထီၣ်ဒုးတကးဒံးဘၣ်အမဲာ်ညါ အကျါန့ၣ်ပၣ်ဃုာ်စ့ၢ်ကီးဒီးသုးခိးကီၢ်ဆၢ(BGF)သုးအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤ.