KIC News

လါအီကူး ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢမုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤ ကတၢၢ်တံာ်သ၀ီကရူၢ်အပူၤ ဖဲမဟါလါအီကူး ၂၂ သီ ဂီၤခီ ၂ နၣ်ရံၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုုးမုၢ်ဒိၣ် (KNLA)သုးပာ်ဖှိၣ်နုာ်လီၤခး၀ဲသုးခိးကီၢ်ဆၢ(BGF)အိၣ်ခိးတၢ်လီၢ်တခါဖဲကည့ၤဒိၤတိၤအံၤအဃိ ဖဲန့ၣ်ခံခီခံကပၤသံ ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢသ၀ီဖိအအိၣ်န့ၣ်လီၤႉ သုးခိးကီၢ်ဆၢ(BGF-၁၀၁၃)သုးကလၢၤဖိတခါလၢအိၣ်ကည့ၤဒိၤတိၤဖီခိၣ်လၢအိၣ်ဆီလီၤသးဖဲ ကတၢၢ်တံာ်သ၀ီကရူၢ်(ကဲတီ)သ၀ီကပၤ ဘီကၠိၣ်လဲၤသ၀ီပူၤအံၤ ဖဲကညီဒီကလုာ်တၢ်ထူၣ်ဖျဲးသုးမုၢ်(KNLA)သုးပာ်ဖှိၣ် နုာ်လီၤခးသုးကလၢၤယံာ်တခီနၣ်ရံၣ်ဃၣ်ဃၣ်အခါခီဖျိ(BGF)က့ၤခးလီၤကဒါကျိဖးဒိၣ်ဆူတၢ်ဒုးကဲထီၣ်လီၢ်အထံၣ်(၃၀)ဃၣ်ဃၣ်ညါအဃိ(KNLA)သုးပာ်ဖှိၣ်ဘၣ်ဂုၤက့ၤလီၢ်ခံအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ တၢ်ဒုးကဲထီၣ်ဘျီ၀ဲန့ၣ်အပူၤ(BGF)တကပၤသံ၀ဲ(၂)ဂၤအသိးမ့မ့ၢ်(KNLA)သုးပာ်ဖှိၣ်တကပၤန့ၣ်...

လါအီကူး ၂၂ သီႇ ၂၀၂၂ နံၣ်ႇ ခ့ၣ်အဲးစံၣ် တၢ်လဲၤခးကီးတရံးတီနီၢ်ကစၢၢ်ကျဲလီၢ်လံၤဒီး(အီၣ်ဘိၤတဲ)ကျဲဘၢၣ်စၢၤတီၤသိလိသုးခိးကီၢ်ဆၢ(BGF)ဒီးပယီၤသုးပာ်ဖှိၣ်သုးကလၢၤကဲထီၣ်သး၀ံၤအလီၢ်ခံတၢ်ကးတံၢ်ကွံာ်ကျဲလၢအိၣ်သုးကလၢၤမဲာ်ညါအံၤဒီး တဲပျံၤလီၢ်က၀ီၤကမျၢၢ်လၢမ့ဟးထီၣ်က့ၤလီၤန့ၣ်ကခး၀ဲဒၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲလါအီကူး ၁၈ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လဲၤခး တီနီၢ်ကစၢၢ်ကျဲလီၢ်လံၤဒီးအီၣ်ဘိၤတဲကျဲဘၢၣ်စၢၤ(တီၤသိလိ)သုးကလၢၤကဲထီၣ်သး၀ံၤအလီၢ်ခံ ခီဖျိတၢ်ကးတံၢ်ကွံာ်ကျဲ၀ဲန့ၣ်အဃိ လဲၤစ့သ၀ီႇဆီၣ်ဟဲႇကီၢ်မူႇယီၤကိၣ်ဒီးအီၣ်ဘိၤတဲသ၀ီ(၅)ဖျၢၣ်သ၀ီဖိတဖၣ် ဘၣ်ပာ်တ့ၢ်ကွံာ်အကျီၢ်ပနၢ်စဲးထဲၢ်စံာ်တဖၣ်ဒီးဘၣ်ဟးစံၣ်အိၣ်ခူသူၣ်၀ဲအဂ့ၢ်န့ၣ်လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ “ဘၣ်ဖဲဘုဒိၣ်ထီၣ်ဒီးကျီၢ်ပနၢ်ႇထွ့ၣ်လၣ်ထဲၢ်စံာ်အဖၢမုၢ်လီၤႉတၢ်ဒုးကဲထီၣ်ကဒါခးလီၤကျိဖးဒိၣ်အဃိသ၀ီဖိတဖၣ်ဘၣ်စံၣ်ထီၣ်ကဒါခဲလၢာ်လံႉတဲ၀ဲလၢၦၤမ့ဟးထီၣ်က့ၤလီၤလၢ(တီၤသိလိ)ကျဲန့ၣ်ကခးသံ၀ဲႉပယီၤသုးကျိၤလၢအဟဲအိၣ်ဖဲသုးကလၢၤ၀ဲန့ၣ်တဖၣ်တဲ၀ဲလၢ(BGF)လၢအအိၣ်တပူၤဃီဒီးအ၀ဲသ့ၣ်တဖၣ်မ့က့ၤလၢသ၀ီပူၤန့ၣ်ကခးလီၤကျိဖးဒိၣ်လၢသ၀ီပူၤတဲ၀ဲဒ်န့ၣ်အဃိ(BGF)အဟံၣ်ဖိဃီဖိစ့ၢ်ကီးဘၣ်ဟးစံၣ်အိၣ်ခူသူၣ်ႉခဲအံၤသ၀ီဖိတဖၣ်လဲၤအိၣ်ဖှိၣ်၀ဲလၢသီခါဖၠၣ်တကပၤန့ၣ်မီၤနီၤႉပဘၣ်ပာ်တ့ၢ်ကွံာ်စံာ်လီၢ်ကျီးလီၢ်ႉဘုလၢပသူၣ်ဃာ်တဖၣ်နါက့ကျီၢ်ပနၢ်နုာ်လီၤအီၣ်လၢာ်လံ”အဂ့ၢ်န့ၣ်စံး၀ဲန့ၣ်လီၤႉ ဖဲအပူၤကွံာ်လါအီကူး ၁၅ သီအနံၤ တၢ်နုာ်လီၤခးကီးတရံးပၢၤကီၢ်၀ဲၤလီၢ်(၂)တီၤ၀ံၤအလီၢ်ခံ တၢ်ခးလိာ်သးကဲထီၣ်၀ဲလၢ(KNLA)သုးပာ်ဖှိၣ်ဒီးပယီၤသုးကျိၤတဖၣ်အဘၢၣ်စၢၤဒီးခီဖျိပယီၤသုးကဘီယူၤဟဲဆှၣ်တၢ်ႇခးလီၤကျိဖးဒိၣ်လၢသ၀ီပူၤအဃိလီၢ်က၀ီၤသ၀ီဖိသံဘၣ်ဒိဘၣ်ထံးအိၣ်ဒီးဟံၣ်ဃီဟးဂီၤ၀ဲအိၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်စှၤသီအတီၢ်ပူၤပယီၤသုးကးတံၢ်ကွံာ်တီနီၢ်ကစၢၢ်ကျဲလီၢ်လံၤ(အီၣ်ဘိၤတဲ)ကျဲအသိး ခီဖျိကးတံၢ်ဃုာ်၀ဲကီးတရံး၀့ၢ်ကျဲနုာ်လီၤဟးထီၣ်တဖၣ်အဃိ စဲးသိဒီးတၢ်အီၣ်တၢ်အီလီၤတူာ်ကွံာ် လၢကီးတရံးကလံၤစိးသ၀ီတဖၣ်အပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ လၢန့ၣ်အမဲာ်ညါလီၢ်က၀ီၤဖိတဖၣ်ဘၣ်ယိၣ်ဘၣ်ဘှီ၀ဲလၢတၢ်ဒုးကကဲထီၣ်ကဒါလၢကဒူသ၀ီပူၤဒီး ခီဖျိပယီၤသုးအံၤဒိးလီၤဃာ်မ့ၣ်ပိၢ်လၢသ၀ီပူၤကျဲကပိၤကပၤအိၣ်အဃိ...

တၢ်ဆဲးကျိးသံကွၢ် သုးခိၣ်ကၠီၤသဲၣ် ဘၣ်ဃးတၢ်နုာ်လီၤခးကီးတရံး၀့ၢ်တၢ်ဂ့ၢ် ဖဲအပူၤကံွာ်လါအီကူး ၁၅ သီအနံၤန့ၣ် သုးခိၣ်ကၠီၤသဲၣ်တီခိၣ်ရိၣ်မဲ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(ခ့ၣ်အဲၣ်အဲလ်အ့ၣ်)ဒီးတၢ်ပၢၢ်ဆၢဖီၣ်စုက၀ဲၤကရူၢ်တဖၣ်နုာ်လီၤခး၀ဲ သုးမီၤစိရိၤအပၢၤကီၢ်၀ဲၤလီၢ်(၂)တီၤႇဖဲကီးတရံး၀့ၢ်ပူၤန့ၣ်လီၤႉ ဘၣ်ထွဲဒီးတၢ်ဂ့ၢ်အ၀ဲန့ၣ်ပဆဲးကျိးသံကွၢ်၀ဲ သုးခိၣ်ကၠီၤသဲၣ်ဒ်အံၤန့ၣ်လီၤႉ တၢ်သံကွၢ်-၀ဲသးစူၤတဲပၠးၦၤဖဲအပူၤကွံာ်စှၤသီတၢ်နုာ်လီၤခးကီးတရံး၀့ၢ်ပူၤပၢၤကီၢ်၀ဲၤလီၢ်တၢ်ဂ့ၢ်အံၤ တစဲးမီၤနီၤႉ စံးဆၢ–တၢ်ဂ့ၢ်ကဲထီၣ်သးန့ၣ်ဒ်အံၤလီၤဘၣ်ဆဲလၢညါခါန့ၣ်တၢ်လၢပၢၤကီၢ်(ရဲ)မတၤန့ၣ်ႇဘၣ်ဆဲလၢသုးဟံးန့ၢ် တၢ်စိတၢ်ကမီၤတဒူၣ်န့ၣ်ႇပယီၤတဒူၣ်န့ၣ်အ၀ဲမၤနၢၤၦၤကမျၢၢ်ဖဲကီးတရံး၀့ၢ်ပူၤန့ၣ်မီၤနီၤႉပတဲအီၤဘၣ်ဆဲလၢကမျၢၢ်န့ၣ်မၤနၢၤတဂ့ၤႉအဒိန့ၣ်ဟးဃုန့ၢ်ကမျၢၢ်တၢ်ကီတၢ်ခဲတၢ်ကမၣ်ပတဲအီၤတဘျုးဘျီပဟ့ၣ်အီၤတၢ်ပလီၢ်တဘျုးဘျီညါႉတန့ၢ်ဘၣ်အဃိသးဒီးလၢခံဒီးတုၤလၢပဘၣ်နုာ်လီၤခးပတီၢ်န့ၣ်ႉ တၢ်သံကွၢ်–တၢ်ကဲထီၣ်သးကီးတရံးန့ၣ်တၢ်ပၢၢ်ဆၢသုးပာ်ဖှိၣ်မၤန့ၢ်ကျိတနီၤမီၤနီၤ ၀ံသးစူၤတဲပၠးၦၤမၤန့ၢ်ကျိၦဲၤခိၣ်လဲၣ်ဒီးတၢ်ကဲထီၣ်အသးဒ်လဲၣ်ႉ စံးဆၢ–ပၦၤခီန့ၣ်ပန့ၢ်ကျိန့ၣ်ခဲလၢာ်န့ၣ်(၆)ခိၣ်နီၤႉဃုခိၣ်န့ၣ်တမ့ၢ်တၢ်နီတမံၤဘၣ်ၦၤမၢအယူာ်ထီၣ်စုဒီး တယူာ်ထီၣ်စုအဃိန့ၣ်ၦၤခးႉၦၤခးသံဘျီဒီးၦၤဟံန့ၢ်အကျိႉအဂၤဒုတအိၣ်ဘၣ်ႉပဆိမိၣ်လၢပလဲၤဒီးပကဖီၣ်သမူအီၤမီၤနီၤႉအ၀ဲသ့ၣ်တတူၢ်ဖီၣ်အသးဘၣ်ဘျီၦၤခးအီၤဒီးၦၤဟံန့ၢ်အကျိဒ်န့ၣ်လီၤႉနါက့ၦၤန့ၢ်ကျိဃုခိၣ်ႇအ၀ဲသ့ၣ်နါက့အခးၦၤလဲးလိးစ့ၢ်လီၤႉအခးၦၤဘျီဒၢးအိၣ်ဒၣ်နၤခးယၤခးန့ၣ်တၢ်လၢတၢ်ဒုးပျီပူၤဒၢးနီၤႉ တၢ်သံကွၢ်–ဘၣ်ထွဲဒီး ကီးတရံး၀့ၢ်ပူၤ တၢ်ကဲထီၣ်အသးအဂ့ၢ်န့ၣ် ပယီၤသုးမီၤစရိၤထုးထီၣ်ပာ်ဖျါလံာ်အဖီခိၣ်န့ၣ်နထံၣ်ဒ်လဲၣ်ႉ စံးဆၢ–ပယီၤသုးန့ၣ်အသံစ့ၢ်ႉပယီၤပၢၤကီၢ်နါက့အသံစ့ၢ်မီၤနီၤႉ သံခဲလၢာ်ခဲဆ့န့ၣ်(၁၂)ဂၤႉလၢၦၤဖီၣ်န့ၢ်အီၤခီန့ၣ်ဘၣ်ဆဲလၢကီၢ်ရ့ၣ်သဲစး(ဥပဒေ)ကစၢ်န့ၣ်ၦၤဖီၣ်န့ၢ်(၂)မီၤနီၤႉ တၢ်သံကွၢ်–လၢတၢ်ပၢၢ်ဆၢသုးပာ်ဖှိၣ်တကပၤန့ၣ်ဘၣ်ဒိဘၣ်ထံးၦဲၤဂၤလဲၣ်ႉ စံးဆၢ–လၢပၦၤတကပၤခီဒုအဘၣ်တပျာ်အကံၣ်ဒုၣ်တဂၤလီၤလၢပအိၣ်တကပၤန့ၣ်ႉ အဃၣ်ဃၢၤဒုတဘၣ်တၢ်နီတမံၤဘၣ်ႉ တၢ်သံကွၢ်–ပယီၤသုးပၢၤကီၢ်လၢတၢ်ဖီၣ်န့ၢ်၀ဲတဖၣ်န့ၣ်ကတီၢ်ခဲအံၤတၢ်အိၣ်သးအိၣ်ဒ်လဲၣ်ႉ စံးဆၢ–ၦၤဖီၣ်န့ၣ်ခံဂၤအံၤတမ့ၢ်သုးဘၣ်ႉအကဲ၀ဲဒၣ်ပၢပြးအဒူၣ်အထၢမီၤနီၤႉ ခဲအံၤၦၤခံဂၤန့ၣ်အိၣ်၀ဲဒီးယၤယမ့က့ၤခီဒၢးယဆိမိၣ်ယကဆှၢထီၣ်လၢကီၢ်ဆၣ်အအိၣ်ႉကီၢ်ဆၣ်တကပၤသံဒိးသံကွၢ်အီၤမ့၀ံၤဘျီဒၢးအဒိမ့ၢ်ပကမၤဒ်လဲၣ်ႇအကစၢ်နါက့အကဆဲးမၤ၀ဲဒ်လဲၣ်ဒုအ၀ဲန့ၣ်အိၣ်၀ဲဒၣ်လၢကီၢ်ဆၣ်အတၢ်ဆၢတဲာ်စုပူၤလီၤမီၤနီၤႉ တၢ်သံကွၢ်–ပယီၤသုးခးလီၤကဒါကျိဖးဒိၣ်ဆူဒူသ၀ီတဖၣ်အပူၤအဖီခိၣ်နအဲၣ်တဲနဲဒ်လဲၣ်ႉ စံးဆၢ–ယအဲၣ်ဒိးတဲန့ၣ်ၦၤလဲၤနုာ်လီၤခးတၢ်ခီန့ၣ်လၢ၀့ၢ်ပူၤဧဲၢ်ႉပယီၤသုးမုၢ်ဒိၣ်တဒူၣ်န့ၣ် အခးလီၤကဒါကျိးဖးဒိၣ်န့ၣ်လၢ(ယီၢ်ကိာ်)လၢနိနဲၢ်န့ၣ်ႉယသ့ၣ်ညါန့ၣ်ၦၤကမျၢၢ်န့ၣ်ဘၣ်ဒိ(၅)ဂၤႉလၢမုၢ်ဟါလီၤ(၅)နၣ်ရံၣ်န့ၣ်(၆)နၣ်ရံၣ်န့ၣ်ဘၣ်ဒိၦၤနိနဲၢ်န့ၣ်(၂)ဂၤစ့ၢ်ႉခဲလၢာ်ခဲစ့န့ၣ်(၅)ဂၤႉသံခီန့ၣ်ၦၤဖိသၣ်(၂)နံၣ်တဂၤကဲ၀ဲဒၣ်ၦၤယီၢ်ကိာ်သ၀ီလီၤႉအဃိန့ၣ်ပယီၤလၢအဟံးန့ၢ်ဆူၣ်တၢ်စိတၢ်ကမီၤတဖၣ်အံၤမၤတၢ်လိၤဧါဘျၢဧါႇမၤတၢ်ဘၣ်ဧါတဘၣ်ဧါန့ၣ်ယဆိမိၣ်ဒုကမျၢၢ်ထံဖိကီၢ်ဖိဒုပဲာ်၀ဲအဆၢကသ့လီၤဧဲၢ်နီၤႉ တၢ်သံကွၢ်–တၢ်ဂ့ၢ်ကဲထီၣ်သးအံၤအဖီခိၣ်နအဲၣ်ဒိးစံးဘၣ်ကမျၢၢ်ထံဖိကီၢ်ဖိတဖၣ်ဒ်လဲၣ်ႉ စံးဆၢ–ယအဲၣ်ဒိးတဲလၢကမျၢၢ်ခဲလၢာ်သုးဟံးန့ၢ်ဆူၣ်တၢ်စိတၢ်ကမီၤတဒူၣ်န့ၣ် တၢ်ဒုးကဲထီၣ်သးတလိၣ်ဂ့ၤတလိၣ်ဂ့ၤခး၀ဲဒၣ်လၢသ၀ီပူၤလီၤႉမ့နၢ်ဟူလၢကျိသီၣ်တၢ်သီတၢ်သဲခီဒုသ၀ီယံၤဂ့ၤဘူးဂ့ၤမ့သ့ၣ်ညါလၢတၢ်ဒုးအိၣ်ဒုနုာ်လီၤအိၣ်လၢတၢ်ပူၤလၢဟံၣ်ဖီလာ်မတၤႉနုာ်လီၤအိၣ်ကဒုဒ်န့ၣ်မီၤနီၤတၢ်လၢသုးမီၤစိရိၤတဒူၣ်အံၤခီဒုအတရ့တၢ်ဘၣ်ႉဖဲအမိၣ်သးမၤန့ၣ်မၤ၀ဲမီၤနီၤႉယအဲၣ်ဒိးတဲလၢကမျၢၢ်ခဲလၢာ်ကအိၣ်ဒီးတၢ်ပလီၢ်ပဒီႇမ့နၢ်ဟူကျိသီၣ်ကျိသဲဒီးနုာ်လီၤအိၣ်လၢတၢ်ဒီသဒၢအပူၤတလိၣ်လိၣ်မီၤနီၤႉ တၢ်သံကွၢ်–လီၢ်ခံကတၢၢ်တထံၣ်န့ၣ်နအဲၣ်ဒိးစံးဘၣ်သုးမီၤစိရိၤတဒူၣ်အံၤဒ်လဲၣ်ႉ စံးဆၢ–ယအဲၣ်ဒိးတဲန့ၣ်လၢအ၀ဲသ့ၣ်ဂီၢ်န့ၣ်တၢ်ဆၢကတီၢ်အိၣ်ဒံးႉသုးမီၤစိရိၤအစုတီၤဖီလာ်ပၢပြးတဒူၣ်န့ၣ် တၢ်ဆၢကတီၢ်အိၣ်ဒံးလၢဟဲက့ၤမၤသကိးပာ်ဖှိၣ်က့ၤသးဒီးကမျၢၢ်ထံဖိကီၢ်ဖိႉလၢကမျၢၢ်တၢ်ဘၣ်သးန့ၣ်မၤထွဲသကိးယအဲၣ်ဒိးတဲလၢၦၤလၢအဟံးဆူၣ်န့ၢ်တၢ်စိတၢ်မီၤအစုဒုၣ်စုတီၤဖီလာ်တဒူၣ်န့ၣ်ဟဲက့ၤမၤသကိးတၢ်ဒီးကမျၢၢ်ထံဖိကီၢ်ဖိဘျီန့ၣ်ဒၢးပကသူၣ်ထီၣ်က့ၤပထံပကီၢ်လၢကလဲၤထီၣ်လဲၤထီအဂီၢ်ဒီးပကသူၣ်ထီၣ်သကိးစၢၤႉမ့မၤထွဲသုးမီၤစိရိၤအတၢ်နဲၣ်လီၤအတၢ်ကလုၢ်ဒုပထံပကီၢ်အံၤတမ့ၢ်ကလဲၤထီၣ်လဲၤထီဘၣ်ႇဒံၣ်မိၣ်ခြ့ၣ်စံၣ်န့ၢ်တသ့ဘၣ်ႉ

လါအီကူး ၁၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်–ကီးတရံးအ့ရှါကျဲမုၢ်ခိၣ်န့ၣ် တၢ်ဒုးကဲထီၣ်ဒံး၀ဲလၢပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤအဂ့ၢ်န့ၣ် (KNLA)သုးပာ်ဖှိၣ်ကဆီ၀ါသုးဒ့(၁)အသုးဒ့ခိၣ်သုးခိၣ်စီၤကၠီၤသဲၣ်စံး၀ဲန့ၣ်လီၤႉ ဖဲအပူၤကွံာ်လါအီကူး ၁၅ သီအနံၤန့ၣ် (KNLA)သုးပာ်ဖှိၣ်တဖၣ်နီၤဖးလီၤအကရူၢ်ဒီးနုာ်လီၤခး၀ဲကီးတရံး၀့ၢ်ပူၤ ပယီၤသုးမီၤစိရိၤအစုတီၤဖီလာ်ပၢၤကီၢ်၀ဲၤလီၢ်ကဲထီၣ်သး၀ံၤအလီၢ်ခံ တုၤလၢတနံၤအံၤလါအီကူး ၁၉ သီအနံၤန့ၣ် တၢ်ဒုးကဲထီၣ်ဒံး၀ဲတပယူာ်ဃီလၢကီးတရံး၀့ၢ်ကပၤအ့ရှါကျဲမုၢ်ပယီၤသုးအိၣ်ခိးတၢ်လီၢ်တဖၣ်အဂ့ၢ်န့ၣ် ကဆီ၀ါသုးဒ့(၁)အသုးဒ့ခိၣ် သုးခိၣ် စီၤကၠီၤသဲၣ်စံး၀ဲဒ်အံၤန့ၣ်လီၤႉ “စးထီၣ်ခးဖဲတဂီၤအံၤ ၉ နၣ်ရံၣ်ဘျဲၣ်န့ၣ်မီၤနီၤႉလၢကီးတရံးတကပၤန့ၣ်တၢ်ဒုးကဲထီၣ်ကိးမုၢ်နံၤဒဲးလီၤႉ တုၤလၢခဲအံၤခးဒံးလီၤႉခးကိးမုၢ်နံၤဒဲးလီၤတနံၤညါအံၤနါက့ခးဒံးႉမ့မ့ၢ်ပယီၤသုးတၢ်ဟူးတၢ်ဂဲၤခီဆူၣ်ဆူၣ်မုၢ်မုၢ်အိၣ်တသ့ဘၣ်တၢ်အသုးတအိၣ်လၢၤစ့ၢ်ဧဲၢ်ႉအိၣ်ဒၣ်လၢပဘၣ်နုာ်လီၤခးအီၤန့ၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲတနံၤအံၤန့ၣ်လီၤႉ ခီဖျိတၢ်ဒုးကဲထီၣ်အဃိဖဲမဟါလါအီကူး...

လါအီကူး ၁၉ သီႇ ၂၀၂၂ နံၣ်ႇ ခ့ၣ်အဲးစံၣ် တၢ်ခးလိာ်သးကဲထီၣ်လၢကညီကီၢ်စဲၣ် ကီးတရံး၀့ၢ်ပူၤ၀ံၤအလီၢ်ခံ စးထီၣ်ဖဲမဟါလါအီကူး ၁၈ သီ မုၢ်ထူၣ်အဆၢကတီၢ်န့ၣ် ပယီၤသုးကးတံၢ်ကွံာ်၀့ၢ်ပူၤကျဲနုာ်လီၤဟးထီၣ်ခဲလၢာ်အဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤတဖၣ်အအိၣ်န့ၣ်လီၤႉ ဖဲအပူၤကွံာ်လါအီကူး ၁၅ သီအနံၤန့ၣ် တၢ်ပၢၢ်ဆၢသုးပာ်ဖှိၣ်နုာ်လီၤခး၀ဲကီးတရံး၀့ၢ်ပၢၤကီၢ်၀ဲၤလီၢ် တၢ်လီၢ်(၂)တီၤကဲထီၣ်သး၀ံၤအလီၢ်ခံဖဲမဟါမုၢ်ထူၣ်အဆၢကတီၢ်န့ၣ်ပယီၤသုးကးတံၢ်ကွံာ်ကျဲခဲလၢာ်ဒီးတဲၣ်ကံၣ်ပိလၢထၢနုာ်၀ဲဒီးဂာ်လၢၢ်ကမူၣ်ႇလၢၢ်ဒီးမဲးထၢၣ်တဖၣ်အဂ့ၢ်န့ၣ် ၦၤအိၣ်၀့ၢ်ပူၤလၢအထံၣ်၀ဲဒီးအမဲာ်တဂၤ စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ ကီးတရံးလီၢ်က၀ီၤကမျၢၢ်တဂၤစံး၀ဲ“ပယီၤသုးနါက့ဘၣ်ဒီပျံၤတၢ်ဖးဒိၣ်ညါႉကးတံၢ်ကွံာ်၀ဲကျဲဟးထီၣ်နုာ်လီၤလၢ၀့ၢ်ပူၤထံထံဆးဆးလံႉလၢကအိၣ်ခိးသိလ့ၣ်အဂီၢ်စ့ၢ်ကီးကဘၣ်မ့ၢ်အၦၤတအိၣ်အါအါလၢၤဘၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ တချုးတၢ်ကးတံၢ်ကျဲဒံးဘၣ်အခါန့ၣ်ပယီၤသုးမီၤစိရိၤအၦၤဘၣ်မူဘၣ်ဒါတဖၣ်ဟဲကွၢ်၀ဲ၀့ၢ်ပူၤကျဲနုာ်လီၤဟးထီၣ်၀ံၤအလီၢ်ခံ(စည်ပင်)ၦၤမၤတၢ်ဖိတဖၣ်ကးတံၢ်ကွံာ်၀ဲယၤကိၣ်ကျဲလီၢ်လံၤႇစွ့ၤကၠဲၣ်မ့ဃိၣ်ကျဲႇယွၤသ့ၣ်ကျဲႇကမဲၤကိကျဲႇနါကတိကျဲႇတတၤကူကျဲႇပလဲဖၠူၤတၢ်တိစၢၤမၤစၢၤကျဲဒီး(ေမွးမြူဇုန်)ကျဲဖိကျဲနုာ်လီၤ၀့ၢ်ပူၤတဖၣ်ခဲလၢာ်ဒီးထဲဒၣ်ကီးတရံး–ဖၣ်အၣ်ကျဲဟးထီၣ်တဘိလီၤတၢ်ပာ်လီၤတြဲၤအိၣ်ခိးသမံသမိးတၢ်အဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤတဖၣ်အအိၣ်န့ၣ်လီၤႉ တၢ်နုာ်လီၤခးကီးတရံး၀့ၢ်ပၢၤကီၢ်၀ဲၤလီၢ်ကဲထီၣ်သး၀ံၤအလီၢ်ခံတၢ်ဒုးကဲထီၣ်၀ဲလၢ၀့ၢ်ခိၣ်၀့ၢ်ဃၢၤဒူသ၀ီအဖၣ်အပူၤအသိးတနံၤအံၤစ့ၢ်ကီးတၢ်ဒုးကဲထီၣ်ဒံး၀ဲလၢကီးတရံးကျဲလီၢ်လံၤ(တီၤသိလိ)တၢ်လီၢ်ႇကီးတရံးအ့ရှါကျဲသီ(ကမွ်းခြံကုန်း)တၢ်လီၢ်ဒီးတီၤနီၢ်ထံလီၤဆှူတၢ်လီၢ်အဂ့ၢ်န့ၣ်လီၢ်က၀ီၤဖိစံးဘၣ်ခ့ၣ်အဲးစံၣ်ဖဲမဟါလါအီကူး ၁၈ သီအနံၤန့ၣ်လီၤႉ

လါအီကူး ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် ဟုသးထၢၣ်(၈၀၀)လၢနံၣ်ပီဖီၣ်ဒ့ရှၢၣ်ဆှၢဟ့ၣ်လီၤ၀ဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)လီၢ်ခၢၣ်သးသုး၀ဲၤလီၢ်ခိၣ်သ့ၣ်အံၤတဖၣ် ဖဲလါအီကူး ၁၃ သီအနံၤန့ၣ် တၢ်ကိး၀ဲသ၀ီ(၉)ဖျၢၣ်ၦၤဘၣ်မူဘၣ်ဒါတဖၣ်ဒီး နီၤလီၤဟ့ၣ်၀ဲဟုသးထၢၣ်တဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဟုသးထၢၣ်လၢယပၣ််ပဒိၣ်နံၣ်ပီဖီၣ်ဒ့ရှၢၣ်ဟ့ၣ်လီၤ၀ဲတဖၣ်အံၤဟ့ၣ်နီၤလီၤက့ၤ၀ဲလၢအ၀ဲသ့ၣ်ဟီၣ်က၀ီၤပူၤ ဆိၣ်စံမၠဲၣ်ႇလ့ဂီၤႇ၀ၣ်မံၤထၣ်ႇစွ့ၤအ့မၠဲၤႇအူကြ့ၣ်ထၣ်ႇထံသဲလၢာ်ႇဂီၤလ့ၤႇအူဖိထၣ်ႇလၢၢ်ဃီၤသ၀ီကမျၢၢ်ၦၤဃ့ၢ်မှံဟးဖျိးဟံၣ်(၁ႇ၉၅၄)ဖျၢၣ်ၦၤနီၣ်ဂံၢ်(၇ႇ၉၀၂)ဂၤအဂ့ၢ်န့ၣ်(DKBA)ဒုးယၤခိၣ်သုးခိၣ်ဒိၣ်စိစီၤစ့ၤ၀့စံးဘၣ်ခ့ၣ်အဲးစံၣ်န့ၣ်လီၤႉ သုးခိၣ်ဒိၣ်စိစီၤစ့ၤ၀့စံး၀ဲ“နံၣ်ပီဖီၣ်ဒ့ရှၢၣ်ဟ့ၣ်မၤစၢၤတၢ်တခါန့ၣ်ပက့ၤနီၤလီၤကမျၢၢ်ဖိမီၤနီၤႉခဲလၢာ်ခဲစ့ဟံၣ်ခိၣ်န့ၣ်(၁ႇ၉၅၄)ဖျၢၣ်ႉတ၀ီညါအံၤၦၤဟ့ၣ်ၦၤ(၈၀၀)ဒီးပဟ့ၣ်လီၤ(၈၀၀)ခဲလၢာ်လီၤႉ”အဂ့ၢ်န့ၣ်စံး၀ဲန့ၣ်လီၤႉ တၢ်ဟ့ၣ်လီၤဟုသးထၢၣ်ဘျီ၀ဲအံၤဒိးန့ၢ်ဘၣ်ထဲဟံၣ်ခိၣ်တနီၤလီၤဒီးဟံၣ်ဖိဃီဖိလၢအတဒိးန့ၢ်ဘၣ်ဟုသးဒံးဘၣ်အိၣ်ဒံး၀ဲအဂ့ၢ်န့ၣ်ဂီၤလ့ၤက၀ီၤဒ့ၦၤတီခိၣ်ရိၣ်မဲတၢ်လၢအလဲၤဟံဟုသးလၢလီၢ်က၀ီၤၦၤဃ့ၢ်မှံဟးဖျိးအဂီၢ်အံၤ စံး၀ဲဒ်အံၤန့ၣ်လီၤႉ ကိးဖှိၣ်၀ဲဒၣ်သ၀ီခိၣ်နၢ်တဖၣ်ဘျီဒၢးဖဲလါအီကူး ၁၄ သီအနံၤန့ၣ် ပဒွး၀ဲဒၣ်လၢဟံၣ်တဖျၢၣ်န့ၣ်သၢဂၤဒီး ပနီၤလီၤ၀ဲဒၣ်ဟုသးထၢၣ်တဖၣ်မီၤနီၤႉတနီၤန့ၣ်တန့ၢ်ဘၣ်၀ဲဒံးဘၣ်ႉၦၤဃ့ၢ်မှံဟးဖျိးအိၣ်အဂၤ(၈၀၀၀)န့ၣ်ခဲအံၤဒိးန့ၢ်ဘၣ်၀ဲဒၣ်(၂၄၀၀)ဘျဲၣ်လံမီၤနီၤ”အဂ့ၢ်န့ၣ်အ၀ဲစံး၀ဲန့ၣ်လီၤႉ လၢတၢ်ဂ့ၢ်အံၤအဖီခိၣ်သုးခိၣ်ဒိၣ်စိစီၤစ့၀ဲစံး၀ဲ“တၢ်တခါအံၤန့ၣ်လၢအပူၤကွံာ်ပပာ်ဖျါထီၣ်န့ၣ်ဒ်သိးပတၢ်ကရၢကရိန့ၣ်ကဟ့ၣ်လီၤ၀ဲ(၃)၀ီမီၤနီၤႉခဲလၢာ်န့ၣ်(၂၀၀၀)မီၤနီၤႉလဲၤသးမ့ဘၣ်တဲန့ၣ်လၢတချုးၦၤဃ့ၢ်တၢ်ဒုးဖိတအိၣ်ဒံးဘၣ်ခါန့ၣ်တၢ်တခါန့ၣ်အပာ်ပနီၣ်ဃာ်၀ဲလံမီၤနီၤႉတၢ်တခါအံၤခီဒၢးဘၣ်အတီၤဘျီဟဲတုၤဒီးပနီၤလီၤက့ၤ၀ဲၦၤဘၣ်ကီဘၣ်ခဲတဒူၣ်အံၤန့ၣ်”အဂ့ၢ်န့ၣ်စံးအါထီၣ်၀ဲန့ၣ်လီၤႉ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤအပူၤ ခီဖျိပယီၤသုးနုာ်လီၤမၤ ဒုးယၤတၢ်ဟူးတၢ်ဂဲၤလၢ ဖလူ–ဂီၤလ့ၤကျဲမုၢ်အဃိတၢ်ဒုးကဲထီၣ်၀ဲဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)ႇကီၢ်သူလ့ၤသုးမုၢ်ဒိၣ်(KTLA)သုးပာ်ဖှိၣ်တဖၣ်အဃိ လၢၢ်ဃီၤႇအူဟူထၣ်ႇဂီၤလ့ၤႇထံသဲလၢာ်ႇ...

လါအီကူး ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကီးတရံး၀့ၢ်ပူၤ တၢ်ခးလိာ်သးကဲထီၣ်၀ံၤအလီၢ်ခံ ပယီၤသုးနုာ်လီၤသမံသမိးၦၤတမှံၤစရီ(ဧည့်စရင်း)လၢၦၤဟံၣ်တဖျၢၣ်၀ံၤတဖျၢၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲမဟါလါအီကူး ၁၇ သီ မုၢ်ဃ့ၢ်လီၤအဆၢကတီၢ်န့ၣ် သိလ့ၣ်ခံခိၣ်လၢပယီၤသုးနီၣ်ဂံၢ်ကအိၣ်အဂၤ(၂၀)ဘျဲၣ်အံၤ နုာ်လီၤ၀ဲဒၣ်လၢကီးတရံး၀့ၢ်ပူၤဒီးခးပိၢ်ထီၣ်ကျိလၢတၢ်ဖးဖီအဂ့ၢ်န့ၣ် လီၢ်က၀ီၤကမျၢၢ်လၢအိၣ်၀့ၢ်ပူၤတဂၤစံး၀ဲ ဒ်အံၤန့ၣ်လီၤႉ “ဟဲနုာ်လီၤန့ၣ်ကဘၣ်ဖဲဟါခီ ၄ နၣ်ရံၣ်ဘျဲၣ်ႇ ၦၤနီၣ်ဂံၢ်ကအိၣ်လၢအဂၤ(၂၀)ဘျဲၣ်ညါႉ မ့၀ံၤထုးထီၣ်၀ဲဒၣ်ကျိခးပိၢ်ထီၣ်၀ဲလီၤႉဒီတ၀့ၢ်စံၣ်ပြံပြါခဲလၢာ်ႉၦၤက့ၤစံၣ်နုာ်လီၤလၢဟံၣ်ပူၤကးတံၢ်က့ၤပဲတြီအိၣ်ဘှ့ၣ်ဘှီၣ်ဒီတ၀့ၢ်လီၤႉအ၀ဲသ့ၣ်ဟးကိးပသူဆိၣ်တၢ်ခးကျိႇလူၤခးဒံးၦၤခံဂၤဒီးကျိကိညၢ်တဘၣ်ဘၣ်ႉ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ တၢ်ကဲထီၣ်သး၀ံၤအလီၢ်ခံဖဲဟါခီ ၈ နၣ်ရံၣ်ဃၣ်ဃၣ်အဆၢကတီၢ်န့ၣ် က၀ီၤဒ့ၦၤဘၣ်မူဘၣ်ဒါႇ...

တၢ်သံကွၢ် IKO ၦၤပၢၤလီၢ်ဆ့ၣ်နီၤပဒိၣ်ကနဲမံၤဘၣ်ဃးတၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်အဂ့ၢ်– ...

လါအီကူး ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢကီၢ်ရ့ၣ်(၆)ဘ့ၣ်အပူၤ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ် အိၣ်၀ဲ(၃၀၀ႇ၀၀၀)ဘျဲၣ်ဒီးကတီၢ်ခဲအံၤၦၤသ့ၣ်တဖၣ်အံၤအဂီၢ်လိၣ်ဘၣ်၀ဲဒၣ်တၢ်ဆီၣ်ထွဲမၤစၢၤတဖၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါလါအီကူး ၁၆ သီအနံၤန့ၣ်လီၤႉ ခီဖျိတၢ်ဒုးတၢ်ယၤကဲထီၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤအဃိ ကမျၢၢ်ထံဖိကီၢ်ဖိဘၣ်ဃ့ၢ်မှံဟးဖျိး၀ဲအါအါဂီၢ်ဂီၢ်ဒီးကတီၢ်ခဲအံၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲခဲလၢာ်(၃၅၆ႇ၆၇၄)ဂၤလံအဃိလိၣ်ဘၣ်၀ဲတၢ်အိၣ်တၢ်ဆိးလီၢ်ကျဲႇတၢ်အီၣ်တၢ်အီႇကသံၣ်ကသီဒီးတၢ်ဘံၣ်တၢ်ဘၢတဖၣ်အဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ကမျၢၢ်လၢအဘၣ်ဃ့ၢ်မှံဟးဖျိးတဖၣ်အံၤခ့ၣ်အဲၣ်ယူၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီး ကညီဒီကလုာ်ဂၢၤသးကရၢ(KNDO)တဖၣ်ဟံးန့ၢ်၀ဲမူဒါလၢလီၢ်ကျဲသနၢၣ်ဒၣ်၀ဲစုာ်စုာ်န့ၣ်လီၤႉ ခ့ၣ်အဲၣ်ယူၣ်အစုတီၤဖီလာ်(KNLA)ဒီး(KNDO)တဖၣ်ဘၣ်ကွၢ်ဆၢၣ်မဲာ်ဒုးတၢ်ဒီးသုးမီၤစိရိၤအသုးဒီးဘၣ်ရဲၣ်ကျဲၤစ့ၢ်ကီး၀ဲသုးဂ့ၢ်၀ီအတၢ်လၢာ်ဘူၣ်လၢာ်စ့တကးဘၣ်ဘၣ်ရဲၣ်ကျဲၤဃုာ်စ့ၢ်ကီးတၢ်လိၣ်တဖၣ်လၢကမျၢၢ်လၢဘၣ်ဃ့ၢ်အိၣ်မှံဟးဖျိးသ့ၣ်တဖၣ်အဂီၢ်အဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ ဒ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲစရီအသိးန့ၣ်မုၢ်တြီၢ်ကီၢ်ရ့ၣ်ပူၤန့ၣ်ၦၤဃ့ၢ်မှံဟးဖျိးအိၣ်၀ဲ(၉၆ႇ၁၈၀)ဂၤႇဒူသထူၣ်ကီၢ်ရ့ၣ်န့ၣ်(၉၄ႇ၇၆၈)ဂၤႇဒူပျာ်ယာ်ကီၢ်ရ့ၣ်န့ၣ်(၉၀ႇ၂၉၁)ဂၤႇချၢၣ်လွံၢ်ထူၣ်ကီၢ်ရ့ၣ်(၆၁ႇ၈၉၈)ဂၤႇတီအူကီၢ်ရ့ၣ်န့ၣ်(၇ႇ၅၃၇)ဂၤဒီးမ့မ့ၢ်ဘျံးဒ၀ဲၢ်ကီၢ်ရ့ၣ်န့ၣ်အိၣ်၀ဲ(၆ႇ၀၀၀)ဂၤန့ၣ်လီၤႉ ကတီၢ်ခဲအံၤခီဖျိတၢ်စူၤအါဒီးကမျၢၢ်လၢဘၣ်ဃ့ၢ်မှံဟးဖျိးတဖၣ်အံၤတၢ်ခိၣ်ဒုး(မိကၤ)တဘံၣ်တဘၢဘၣ်အဃိတၢ်ညၣ်ဂိၢ်တၢ်ဆါကဲထီၣ်သးဟဲအါထီၣ်၀ဲဒီးတၢ်လီၢ်လၢၦၤဃ့ၢ်မှံဟးဖျိးအိၣ်အလီၢ်တနီၤန့ၣ်ခီဖျိကျဲတၢ်ကီတၢ်ခဲတၢ်အိၣ်သးအဃိတၢ်ကီတၢ်ခဲအိၣ်လၢကလဲၤဆှၢတၢ်အီၣ်တၢ်အီကသံၣ်ကသီတဖၣ်အဂ့ၢ်န့ၣ်ထၢၣ်၀ံချၢဆူၣ်ချ့ကရူၢ်(BPHWT)ၦၤနဲၣ်တၢ်စီၤ၀့ကၠီၤစံး၀ဲန့ၣ်လီၤႉ “ၦၤလီၢ်အိၣ်ကမှံဖိတဖၣ်န့ၣ်တမ့ၢ်အိၣ်တၢ်လီၢ်တပူၤဃီဘၣ်ႉအိၣ်တၢ်လီၢ်အါတီၤအဃိကဘၣ်ဟးကွၢ်န့ၣ်ကီခဲစ့ၢ်ႉစးထီၣ်ဖဲအပူၤကွံာ်ခံလါသၢလါန့ၣ်ခီဖျိတၢ်ညၣ်ဂိၢ်တၢ်ဆါဟဲအါထီၣ်အဃိလၢကကူစါယါဘျါၦၤဆါအဂီၢ်န့ၣ်တၢ်ကီတၢ်ခဲအိၣ်လၢကဆှၢကသံၣ်ကသီမီၤနီၤႉဟးဃုၦ့ၤကသံၣ်နါက့ကီစ့ၢ်ႉမ့၀ံၤတၢ်လီၢ်တနီၤနါက့ကဟးၦ့ၤတၢ်အီၣ်တၢ်နါက့ကီခဲစ့ၢ်ႉကဆှၢထီၣ်ဆှၢလီၤနါက့ကီခဲစ့ၢ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါတၢ်လီၢ်တနီၤန့ၣ်ခီဖျိပယီၤသုးနုာ်လီၤအိၣ်လၢဟီၣ်က၀ီၤအပူၤဒီးအိၣ်ခိးသမံသမိးတၢ်လၢကျဲပူၤအိၣ်အဃိတၢ်ကီတၢ်ခဲအိၣ်လၢကဆှၢတၢ်အီၣ်တၢ်အီလၢၦၤဃ့ၢ်အိၣ်ကမှံတဖၣ်အဂီၢ်အဂ့ၢ်န့ၣ်ချၢၣ်လွံၢ်ထူၣ်ကီၢ်ရ့ၣ်ၦၤလၢမၤစၢၤၦၤဃ့ၢ်အိၣ်ကမှံဖိတဂၤစံးဘၣ်ခ့ၣ်အဲးဒံၣ်ဒ်အံၤန့ၣ်လီၤႉ “ပယီၤသုးခးလီၤကျိဖးဒိၣ်လၢသ၀ီပူၤန့ၣ်အိၣ်ဒံးအဖၢမုၢ်လီၤႉၦၤဃ့ၢ်အိၣ်ကမှံဖိတနီၤန့ၣ်က့ၤဟံအီၣ်တၢ်အီၣ်တၢ်အီလၢအသ၀ီပူၤအိၣ်ႉခီဖျိပယီၤသုးအိၣ်ခိးသမံသမိးတၢ်လၢကျဲပူၤအဃိအ၀ဲသ့ၣ်က့ၤတဘူၣ်ဘၣ်ႉမ့ဘၣ်သဂၢၢ်ဒီးပယီၤသုးဒုတညီဘၣ်အဃိတၢ်ကီတၢ်ခဲအိၣ်လီၤႉမ့၀ံၤလၢကစိာ်တၢ်အီၣ်တၢ်အီလၢကျဲမုၢ်ဖးဒိၣ်တီတီနါက့တညီဘၣ်အဃိဘၣ်စိာ်က့ၤလၢၦၢ်ပူၤကျဲအိၣ်စ့ၢ်လီၤႉတနီၤန့ၣ်ဘၣ်စိာ်လၢဆဲးကဲးတနီၤန့ၣ်ဘၣ်ယိးလၢၦၤကညီလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ စးထီၣ်ဖဲ(၂၀၂၂)လါယနူၤအါရံၤတုၤလၢလါယူၤလံန့ၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤခီဖျိပယီၤသုးခးလီၤကျိဖးဒိၣ်ဒီးဖီၣ်မၤသံမၤ၀ီကမျၢၢ်တဖၣ်အဃိိလီၢ်က၀ီၤကမျၢၢ်သံ၀ဲ(၉၁)ဂၤဒီးဘၣ်ဒိ၀ဲ(၁၈၁)ဂၤအဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ဘိးဘၣ်ရၤလီၤ၀ဲစရီအသိးသ့ၣ်ညါဘၣ်န့ၣ်လီၤႉ

လါအီကူး ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် နိၣ်တကီကီၢ်ဆၣ်အပူၤခီဖျိပယီၤသုးလၢအိၣ်ချၢၣ်-တကူၣ်တၢၣ် ပၢၤကီၢ်၀ဲၤလီၢ်ကရၢၢ်ပူၤအံၤတဖၣ်ဒိးလီၤဃာ်မ့ၣ်ပိၢ်လၢပၢၤကီၢ်၀ဲၤလီၢ်ကပၤကၠိကရၢၢ်ပူၤအဃိဖိဒံဖိလၢအိၣ်လီၢ်က၀ီၤပူၤဖဲန့ၣ်လၢအထိတုၤလၢခဲအံၤတမၤလိဘၣ်တၢ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ လၢတကူၣ်တၢၣ်သ၀ီနီၣ်ဂံၢ်(၃)တီၤဖုၣ်ကၠိကရၢၢ်ပူၤကျဲဟးထီၣ်တၢ်လီၢ်တတီၤန့ၣ်ပယီၤသုးဒိးလီၤဃာ်မ့ၣ်ပိၢ်တဖျၢၣ်တကးဒံးဘၣ်အမဲာ်ညါလၢချၢၣ်တကူၣ်တၢၣ်တီၤထီကၠိကရၢၢ်ပူၤကၠိ(ဟီခါ)အမဲာ်ညါဒီးခံကထြၢကၠိဖးဒိၣ်အမဲာ်ညါနီၣ်တယၢ်တၢၣ်ကပၤစ့ၢ်ကီးဒိးလီၤဃာ်မ့ၣ်ပိၢ်အိၣ်အဃိဘၣ်ယိၣ်ဘၣ်ဘှီဘၣ်တၢ်အဂ့ၢ်န့ၣ်သ၀ီဖိတဖၣ်စံး၀ဲန့ၣ်လီၤႉ “လၢတကူၣ်တၢၣ်သ၀ီနီၣ်ဂံၢ်(၃)တီၤဖုၣ်ကၠိကရၢၢ်ပူၤန့ၣ်ပထံၣ်လၢပယီၤသုးဒိးလီၤဃာ်မ့ၣ်ပိၣ်တဖျၢၣ်ႉလၢချၢၣ်–တကူၣ်တၢၣ်တီၤထီကၠိကရၢၢ်ပူၤနါက့ဒိးလီၤဃာ်၀ဲအိၣ်ခံတီၤႉမ့မ့ၢ်သ၀ီဖိတဖၣ်ဒုပျံၤတၢ်ဖုးတၢ်မီၤနီၤႉခးပိၢ်ထီၣ်ကျိလၢပၢၤကီၢ်၀ဲၤလီၢ်ပူၤကိးမုၢ်နၤဒဲးအဃိတုၤလၢခဲအံၤသ၀ီဖိလၢအိၣ်ဘူးဖဲန့ၣ်တဖၣ်က့ၤလၢဟံၣ်တဘူၣ်ဘၣ်ႉဖိသၣ်နါက့တုၤလၢခဲအံၤတထီၣ်ဘၣ်ကၠိဒံးဘၣ်”အဂ့ၢ်န့ၣ်တကူၣ်တၢၣ်လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအ့ဖြ့ၣ်အခါသုးခိးကီၢ်ဆၢ-BGF(၁၀၂၁)လၢအိၣ်တကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤအံၤဒီး ပယီၤသုး(ခလရ–၃၂)လၢအိၣ်နိၣ်တကီ၀့ၢ်ပူၤအံၤတဖၣ်နုာ်လီၤ၀ဲဒၣ်လၢဒူသ၀ီအပူၤ၀ံၤ လူၤဖီၣ်ပီၣ်တၣ်ဒီးခးလီၤကျိဖးဒိၣ်ဆူသ၀ီပူၤအဃိဘၣ်သံ၀ဲလီၢ်က၀ီၤသ၀ီဖိ(၃)ဂၤဒီးဘၣ်ဒိ၀ဲအဂၤ(၁၀)ဘျဲၣ်ဒံးန့ၣ်လီၤႉ ခီဖျိပယီၤသုးဒီး(BGF)သုးပာ်ဖှိၣ်တဖၣ်ခးလီၤကျိဖးဒိၣ်အဃိလီၢ်က၀ီၤအဟံၣ်အဃီတၢ်ဖံးအီၣ်မၤအီၣ်လီၢ်ကျဲဟးဂူူာ်ဟးဂီၤ၀ဲဒီးမ့ၣ်ပိၢ်လၢလီၤတဲာ်လၢချၢၣ်တကူၣ်တၢၣ်သ၀ီကျီးကရၢၢ်တၢ်ဖံးအီၣ်မၤအီၣ်လီၢ်လၢအတပိၢ်ဖးထီၣ်ဒံးအိၣ်အဃိတုၤလၢခဲအံၤလီၢ်က၀ီၤကမျၢၢ်တဖၣ်လဲၤလၢကျီးပူၤတဘူၣ်ဒံး၀ဲဘၣ်အဂ့ၢ်န့ၣ်၀ီၢ်ရီလီၢ်က၀ီၤဖိတဖၣ်စံး၀ဲန့ၣ်လီၤႉ ချၢၣ်–တကူၣ်တၢၣ်ဟီၣ်က၀ီၤအံၤအိၣ်၀ဲဒၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ်တၢ်ပၢဟီၣ်က၀ီၤအပူၤဒီးစးထီၣ်ဖဲအပူၤကွံာ်လါအ့ဖြ့ၣ်န့ၣ်ပယီၤသုးလၢအဟဲနုာ်လီၤဟူးဂဲၤတဖၣ်အံၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်ဒံး၀ဲအသီဖးယံၤညါန့ၣ်လီၤႉခီဖျိတၢ်ဒုးကဲထီၣ်အဃိလီၢ်က၀ီၤကမျၢၢ်အဂၤတကလးဘျဲၣ်ဘၣ်ဃ့ၢ်ထီၣ်ဒံး၀ဲဒီးလီၢ်က၀ီၤကမျၢၢ်လၢအိၣ်ဘူးပၢၤကီၢ်၀ဲၤလီၢ်ခိၣ်ဃၢၤသ့ၣ်တဖၣ်စ့ၢ်ကီးတုၤလၢခဲအံၤတဟဲက့ၤအိၣ်လၢအဟံၣ်ဒံးဘၣ်အဂ့ၢ်န့ၣ်သ့ၣ်ညါဘၣ်လၢသ၀ီဖိအအိၣ်န့ၣ်လီၤႉ ခီဖျိပယီၤသုးတဖၣ်ခးလီၤကျိဖးဒိၣ်ကျိဖိကိးမုၢ်နၤဒီးဒိးလီၤဃာ်မ့ၣ်ပိၢ်လၢကၠိကရၢၢ်ပူၤအဃိ ကၠိလၢအိၣ်ဘူးဖဲသုးကလၢၤအခိၣ်အဃၢၤဖဲန့ၣ်အဖျၢၣ်(၁၀)ဃၣ်ဃၣ်တုၤလၢခဲအံၤတအိးထီၣ်၀ဲဒံးဘၣ်န့ၣ်လီၤႉ ဒ်န့ၣ်အသိးလၢ(ခ့ၣ်အဲၣ်ယူၣ်)ဒူပျာ်ယာ်ကီၢ်ရ့ၣ်ႇကြုၢ်တုကီၢ်ဆၣ်အပူၤ ပယီၤသုးလၢအနုာ်လီၤအိၣ်ဖဲတီၤကၠၤအ့သ၀ီ(တီၤထီကၠိ)ကရၢၢ်ပူၤတဖၣ်အံၤစ့ၢ်ကီးခီဖျိအ၀ဲသ့ၣ်ဒိးလီၤဃာ်မ့ၣ်ပိၢ်လၢကၠိကရၢၢ်ကပိၤကပၤအိၣ်အဃိဘၣ်ဟးထီၣ်က့ၤလီၤလၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ်လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ