ခ့ၣ်အဲးစံၣ် – KIC News

လါယူၤလံ ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် သိလ့ၣ်တီၣ်တၢ်ဖိိတၢ်လံၤႇသိလ့ၣ်တီၣ်ၦၤလဲၤတၢ်က့ၤတၢ်ဖိလၢအဟးထီၣ်က့ၤလီၤဖဲကီးတရံး–မၠၣ်၀တံၣ်အ့ရှါကျဲမုၢ်ခိၣ်တဖၣ်အံၤပယီၤသုးအိၣ်ခိးဃ့အီၣ်စ့မၤပျံၤမၤဖုး၀ဲအဂ့ၢ်န့ၣ် ၦၤလၢအဘၣ်သဂၢၢ်ဒီးတၢ်ကဲထီၣ်သးအံၤတဖၣ်စံး၀ဲန့ၣ်လီၤႉ “တမ့ၢ်လၢတြဲၤ(ဂိတ်)ဘၣ်ႉအ၀ဲသ့ၣ်ကူကၤကမျၢၢ်ကူကၤဟဲထီၣ်ဃ့အီၣ်စ့မီၤနီၤႉမ့မ့ၢ်သိလ့ၣ်ဖိန့ၣ်ဃ့၀ဲ(၁၀၀၀)ကၠးႉအ၀ဲသ့ၣ်မ့မူၤထီၣ်န့ၣ်ဃ့၀ဲတုၤလၢ(၃၀၀၀)တုၤလၢ(၅၀၀၀)ကၠးညါႉတဘျီတခီၣ်နါက့တဃ့၀ဲဘၣ်စ့ၢ်ကီးအိၣ်လီၤႉအိၣ်တဘျီန့ၣ်တနံၤဃီန့ၣ်ယဘၣ်ဟ့ၣ်လီၤစ့အိၣ်(၄)တီၤညါႇလၢယဂီၢ်တၢ်တအိၣ်တ့ၢ်နီတမံၤလၢၤဘၣ်”အဂ့ၢ်န့ၣ်ၦၤနီသိလ့ၣ်ဖိတဂၤစံး၀ဲန့ၣ်လီၤႉ ပယီၤသုးလၢအအိၣ်ခိးဃ့အီၣ်စ့တဖၣ်အါဒၣ်တက့ၢ်န့ၣ်ဃ့အီၣ်စ့လၢအ၀ဲသ့ၣ်မူၤထီၣ်အခါဒီး ဟးထီၣ်လၢကျဲမုၢ်ကပၤကိးတီၢ်ဃာ်သိလ့ၣ်ပၠးထီၣ်၀ဲအကျိဃ့အီၣ်စ့အဂ့ၢ်န့ၣ်သိလ့ၣ်ကစၢ်လၢအဘၣ်ဟ့ၣ်လီၤစ့(၂၀ႇ၀၀၀)ကၠးတဂၤစံး၀ဲန့ၣ်လီၤႉ အ၀ဲစံး၀ဲလၢ“ပယီၤသုးလၢအမူးသံးတဂၤအိၣ်ဟဲထီၣ်လၢတၦီာ်ကျါႉပညိၣ်ယၤဒီးကျိတဲယၤလၢဟ့ၣ်လီၤစ့(၂၀၀၀၀)ႇယတဲကဒါအီၤလၢယစ့တအိၣ်ဘၣ်ႉယမၢအဟံ(၅၀၀၀)နါက့တန့ၢ်ဘၣ်ႉတဲယၤလၢယမ့ခးသံနၤန့ၣ်န့ၢ်လီၤႉမတဂၤမးတထံၣ်ဘၣ်”အဂ့ၢ်န့ၣ်စံး၀ဲန့ၣ်လီၤႉ ပယီၤသုးလၢအအိၣ်ခိးဃ့အီၣ်စ့တဖၣ်အံၤအိၣ်ဆီလီၤသးလၢကျဲတၢ်ဘံၣ်တၢ်ဘၢအဂီၢ်လီၤဒီးသိလ့ၣ်တီၣ်တၢ်ဖိတၢ်လံၤႇသိလ့ၣ်တီၣ်ၦၤလဲၤက့ၤတၢ်ဖိလၢအဟးထီၣ်က့ၤလီၤဖဲကျဲမုၢ်ခိၣ်တဖၣ်န့ၣ်ဃ့အီၣ်၀ဲစ့န့ၣ်လီၤႉမ့ဘၣ်မုၢ်နံၤလၢ(KNLA)သုးပာ်ဖှိၣ်လဲၤခးအ၀ဲသ့ၣ်အခါန့ၣ်တၢ်ဃ့အီၣ်စ့လၢကျဲပူၤဆိကတီၢ်အသးဘၣ်ဆၣ်တၢ်ကဲထီၣ်သး၀ံၤအလီၢ်ခံဆဲးဃ့အီၣ်ဒံးတၢ်အဂ့ၢ်န့ၣ် ၦၤဟးထီၣ်က့ၤလီၤဖဲန့ၣ်သ့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ တချုးလၢသုးဟံးန့ၢ်တၢ်စိတၢ်ကမီၤကဲထီၣ်သးဒံးဘၣ်အခါန့ၣ် လၢကီးတရံး–မၠၣ်၀တံၣ်အ့ရှါကျဲမုၢ်ခိၣ်န့ၣ် ဘၣ်ဟ့ၣ်တြဲၤ(Gate)အၦ့ၤထဲလၢတၢ်ကနုာ်လီၤမၠၣ်၀တံၣ်ကီၢ်ဆၣ်(သ့ၣ်ကါညံၣ်နီၣ်)တၢ်လီၢ်တတီၤအံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါယူၤလံ ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိတၢ်ဒုးကဲထီၣ်ဒံး၀ဲလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ ဂီၤလ့ၤ-အူကြ့ၣ်ထၣ်လီၢ်က၀ီၤပူၤအဃိ ကၠီၣ်တဲၣ်သုးခိးကီၢ်ဆၢမၤအါထီၣ်သုးဂံၢ်ဘါဟးဆှၣ်တၢ်အဖီခိၣ်အံၤတၢ်ကီတၢ်ခဲဟဲအိၣ်ထီၣ်လၢကလဲၤဆှၢန့ၢ်ၦၤဃ့ၢ်မှံဟးဖျိးအတၢ်အီၣ်တၢ်အီဒီးတၢ်ဆီၣ်ထွဲမၤစၢၤလၢအဂၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကၠီၣ်တဲၣ်သုးခိးကီၢ်ဆၢတဖၣ်အံၤခီဖျိအိၣ်ခိးသမံသမိးၦၤဟးထီၣ်က့ၤလီၤလၢအတမ့ၢ်ကၠီၣ်တဲၣ်ကီၢ်ဆၢလီၢ်က၀ီၤသ၀ီဖိတဖၣ်အိၣ်၀ဲတနီၤအဃိလၢကလဲၤမၤစၢၤဂီၤလ့ၤႇအူကြ့ၣ်ထၣ်ႇသ့ၣ်ဘီဘိႇလ့က့ၣ်ကိာ်လီၢ်က၀ီၤၦၤဃ့ၢ်အိၣ်ကမှံတဖၣ်အဂီၢ်ထံၣ်ဘၣ်တၢ်ကီတၢ်ခဲအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဂၤစံး၀ဲဒ်အံၤန့ၣ်လီၤႉ “စးထီၣ်လၢပယီၤသုးကဘီယူၤဟဲတလၢတၢ်လီၢ်တ့ၢ်လီၤမ့ၣ်ပိၢ်န့ၣ်ကၠီၣ်တဲၣ်သုးဟဲအိၣ်ခိးတၢ်လၢကီၢ်ဆၢမီၤနီၤႉတၢ်ကရၢကရိလၢအမၤစၢၤၦၤဃ့ၢ်အိၣ်ကမှံတဖၣ်တၢ်ကီတၢ်ခဲအိၣ်လၢဟဲဟ့ၣ်လီၤမၤစၢၤတၢ်မီၤနီၤႉမ့တမ့ၢ်ကၠီၣ်တဲၣ်ၦၤလီၢ်က၀ီၤသ၀ီဖိဘၣ်န့ၣ်တဟ့ၣ်ဒုးဟးထီၣ်က့ၤလီၤ၀ဲဘၣ်ႉတၢ်ဒုးနါက့ဆဲးကဲထီၣ်အဃိခဲအံၤကၠီၣ်တဲၣ်သုးဟးဆှၣ်တၢ်လၢကီၢ်ဆၢကျဲဒီတကျိၤအိၣ်၀ဲအသိးဟးဆှၣ်စ့ၢ်ကီးတၢ်လၢသုးသိလ့ၣ်ႇဆဲးကဲးအိၣ်မီၤနီၤႉအ၀ဲသ့ၣ်ကွၢ်စိဃီၤဒီး(မၤပၠီ)လၢဘုခ့ကျီးႇကစၢၢ်ခိၣ်ဆူကီၢ်ပယီၤတကပၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢတၢ်န့ၣ်အဃိကတီၢ်ခဲအံၤၦၤလၢအိၣ်ကီၢ်ကၠီၣ်တဲၣ်မဲၢ်ဆီး၀့ၢ်ပူၤလၢအလဲၤဆှၢန့ၢ်ၦၤဃ့ၢ်အိၣ်ကမှံဖိတၢ်မၤစၢၤသ့ၣ်တဖၣ်အံၤလဲၤတန့ၢ်လၢၤဘၣ်ဒီးဘၣ်ဆှၢခီဖျိ၀ဲလၢၦၤကီၢ်ကၠီၣ်တဲၣ်ဖိႇလီၢ်က၀ီၤဖိအအိၣ်တဆီန့ၣ်လီၤႉလၢန့ၣ်အမဲာ်ညါၦၤဃ့ၢ်အိၣ်ကမှံဖိလၢအိၣ်ဟီၣ်က၀ီၤဖဲန့ၣ်အပူၤတဖၣ်တက့ၤဘၣ်ဒံးလၢအဒူသ၀ီတၢ်လီၢ်တၢ်ကျဲဘၣ်ဒီးအိၣ်ဒံး၀ဲဖဲထံကျိကၢၢ်နံၤၦၤကီၢ်ကၠီၣ်တဲၣ်ဖိအကျီးဒဲပူၤအဂ့ၢ်န့ၣ် ၦၤလၢမၤစၢၤၦၤဃ့ၢ်အိၣ်ကမှံတဖၣ်စံး၀ဲန့ၣ်လီၤႉ ဖဲမဟါလါယူၤလံ ၁၂ သီအနံၤစ့ၢ်ကီးပယီၤသုးတြိၤ(၄၄)စုတီၤအဖီလာ်(ခလရ–၈)လၢအနီၣ်ဂံၢ်ကအိၣ် (၁၀၀)ဃၣ်ဃၣ်အံၤအိၣ်လၢဖလူသ၀ီဟဲထီၣ်၀ဲဆူသ့ၣ်ဘီဘိ–ဆိၣ်စံမၠဲၣ်–အူကြ့ၣ်ထၣ်–ဂီၤလ့ၤကစၢၢ်ကျဲဒီတကျိၤဒီးဖဲန့ၣ်တၢ်ဒုးကဲထီၣ်၀ဲဒီး(KNLA)သုးပာ်ဖှိၣ်ဖဲဂီၤလ့ၤ(သိထၣ်ကွ့ၣ်)တၢ်လီၢ်ႇသယဲၣ်တပ့ၤကျဲမုၢ်ခိၣ်န့ၣ်လီၤႉတၢ်ခးလိာ်သးကဲထီၣ်ဘျီ၀ဲအံၤအပူၤခီဖျိပယီၤတကပၤသံဘၣ်ဒိဘၣ်ထံးအါအဃိပယီၤသုးဘၣ်က့ၤဂုၤအလီၢ်ခံအဂ့ၢ်န့ၣ်ဟီၣ်က၀ီၤ(Cobra)သုးကျိၤထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ တၢ်ဒုးကဲထီၣ်၀ံၤအလီၢ်ခံ(KNLA)သုးပာ်ဖှိၣ်မၤရှဲလဲတၢ်လီၢ်အခါမၤန့ၢ်၀ဲကျိချံၦာ်သၣ်အါအါဂီၢ်ဂီၢ်ဒီးဖီၣ်န့ၢ်သမူ၀ဲပယီၤသုးတစှၤန့ၢ်(၅)ဂၤဘၣ်န့ၣ်လီၤႉပယီၤသုးလၢတၢ်ဖီၣ်န့ၢ်၀ဲတဖၣ်အံၤဒ်သုးတၢ်သိၣ်တၢ်သီအိၣ်အသိးတၢ်ပၢၤဃာ်အံးထွဲကွၢ်ထွဲကူစါယါဘျါအ၀ဲသ့ၣ်ဂ့ၤဂ့ၤလီၤအဂ့ၢ်န့ၣ် သ့ၣ်ညါဘၣ်လၢ(KNLA)သုးပာ်ဖှိၣ်ကရူၢ် (Cobra)သုးကျိၤအအိၣ်န့ၣ်လီၤႉ ခီဖျိတၢ်ဒုးကဲထီၣ်ကိးမုၢ်နံၤဒဲးဃၣ်ဃၣ်အဃိကတီၢ်ခဲအံၤလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ လ့က့ၣ်ကိာ်ဃုာ်ဒီးဂီၤလ့ၤလီၢ်က၀ီၤဒူသ၀ီႇတၢ်လီၢ်လၢတၢ်ဒုးကဲထီၣ်အပူၤတဖၣ်ခီဖျိၦၤဃ့ၢ်မှံဟးဖျိးအနီၣ်ဂံၢ်အိၣ်လၢ(၁၀ႇ၀၀၀)ဃၣ်ဃၣ်လံအဃိတၢ်စူၤအကတီၢ်လိၣ်ဘၣ်၀ဲတၢ်အီၣ်တၢ်အီႇအိၣ်ဆိးလီၢ်ကျဲဒီးကသံၣ်ကသီတဖၣ်န့ၣ်လီၤႉ တၢ်အိၣ်သးဒ်အံၤအဖီခိၣ်ကၠီၣ်တဲၣ်သုးမၢၦၤဃ့ၢ်အိၣ်ကမှံတဖၣ်လၢကက့ၤခီဃီၤဆူကီၢ်ပယီၤတကပၤဘၣ်ဆၣ် မ့မ့ၢ်ၦၤဃ့ၢ်အိၣ်ကမှံတဖၣ်ခီဖျိက့ၤလၢအဒူသ၀ီတၢ်လီၢ်တၢ်ကျဲတဘူၣ်ဒံး၀ဲဘၣ်အဃိအိၣ်ကဒုဒံး၀ဲဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢသူမှဲကျိကၢၢ်နံၤအါအါဂီၢ်ဂီၢ်အဂ့ၢ်န့ၣ်ဂီၤလ့ၤသ၀ီဖိလၢအဃ့ၢ်တၢ်ဒုးတဖၣ် စံး၀ဲအသိးသ့ၣ်ညါဘၣ်န့ၣ်လီၤႉ

လါယူၤလံ ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် ပလီကီၢ်ဆၣ်အပူၤန့ၣ် ခီဖျိတၢ်စူၤတပယူာ်ဃီအဃိ ၦၤလီၢ်အိၣ်ကမှံတၢ်လီၢ်(၃)တီၤလၢကမျၢၢ်ၦၤဃ့ၢ်မှံဟးဖျိးအိၣ်အဂၤ(၁၀၀၀)ဘျဲၣ်အံၤ သဂၢၢ်ဘၣ်၀ဲတၢ်ခိၣ်ဒုး(မိကၤ)တဘံၣ်တဘၢဘၣ်တၢ်ကီတၢ်ခဲအဂ့ၢ်န့ၣ်ၦၤဘၣ်မူဘၣ်ဒါလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ စးထီၣ်ဖဲလါယူၤလံထီၣ်သီန့ၣ်လၢပလီကီၢ်ဆၣ်အပူၤခီဖျိတၢ်စူၤအဆၢတတဲာ်ဘၣ်ဒီးပယီၤသုးမၤအါထီၣ်သုးဂံၢ်ဘါဟူးဂဲၤအါထီၣ်အဃိ ကမျၢၢ်ၦၤဃ့ၢ်မှံဟးဖျိး(၁ႇ၄၀၀)ဘျဲၣ်အဂီၢ်တၢ်ခိၣ်ဒုးတဘံၣ်တဘၢ၀ဲဘၣ်အသိး တၢ်အီၣ်တၢ်အီစ့ၢ်ကီးတကူတလၢ၀ဲဘၣ်အဂ့ၢ်န့ၣ်လီၢ်က၀ီၤၦၤဘၣ်မူဘၣ်ဒါလၢမၤစၢၤၦၤဃ့ၢ်မှံဟးဖျိးတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤန့ၣ်ၦၤဃ့ၢ်မှံဟးဖျိးအနီၣ်ဂံၢ်ကအိၣ်လၢ(၁ႇ၄၀၀)ဘျဲၣ်ညါလံမီၤနီၤႉတၢ်လိၣ်ဒုအိၣ်အါမးလီၤႉပလဲၤဆှၢတၢ်အီၣ်လၢဂီၤခီမ့တုၤန့ၣ်မုၢ်ဟါလီၤန့ၣ်လၢာ်လံႉခီဖျိတၢ်ဒုးကဲထီၣ်တပယူာ်ဃီအဃိဘၣ်စံၣ်ကအိၣ်(၃)လါဘျဲၣ်လံႉခဲအံၤန့ၣ်သ၀ီဘၣ်ဟးစံၣ်အိၣ်(၇)ဖျၢၣ်လံႉမူခိၣ်စူၤဒီတနံၤညါလီၤႉခီဖျိတၢ်စူၤဒိၣ်အဃိကးဘၢဃာ်ဒီး(တၤလပၣ်)တဘၢဘၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိပယီၤသုးနုာ်လီၤဟူးဂဲၤအါထီၣ်လၢဒူသ၀ီပူၤအဃိတၢ်ဘၣ်သဂၢၢ်ခးလိာ်သးကဲထီၣ်၀ဲဒီးလီၢ်က၀ီၤတၢ်ဒီသဒၢကမျၢၢ်(PDF)သုးဒီးလီၢ်က၀ီၤကမျၢၢ်လၢအဘၣ်စံၣ်သ့ၣ်တဖၣ်အံၤကက့ၤအိၣ်ဆူအဒူသ၀ီတၢ်လီၢ်အဂီၢ်တညီ၀ဲဒံး၀ဲဘၣ်အဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဒ်န့ၣ်အသိးစးထီၣ်ဖဲအပူၤကွံာ်လါယူၤ ၂၇ သီတုၤလၢလါယူၤလၢာ်န့ၣ် တၢ်ဒုးကဲထီၣ်၀ဲ(၄)သီတပယူာ်ဃီလၢပလီကီၢ်ဆၣ်အပူၤဒီးသ၀ီ(၅)ဖျၢၣ်ဃၣ်ဃၣ်ဘၣ်ဃ့ၢ်ထီၣ်၀ဲဒီး တၢ်လီၢ်လၢအိၣ်ပလီ၀့ၢ်အခိၣ်အဃၢၤတဖၣ်စ့ၢ်ကီးပယီၤသုးအိၣ်ခိးသမံသမိးမၤဃံးထီၣ်တၢ်ဟးထီၣ်က့ၤလီၤအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ သ၀ီလၢအိၣ်ပလီဟီၣ်က၀ီၤပူၤကျဲလၢတၢ်ဟးထီၣ်က့ၤလီၤ၀ဲတဖၣ်န့ၣ်ပယီၤသုးဆီလီၤတြဲၤအိၣ်ခိးသမံသမိးတၢ်အိၣ်၀ဲအသိးကျဲလၢတၢ်ကလဲၤဆှၢတၢ်အီၣ်တၢ်အီလၢၦၤလီၢ်အိၣ်ကမှံအိၣ်တၢ်လီၢ်အံၤစ့ၢ်ကီးခီဖျိပယီၤသုးကးတံၢ်၀ဲအဃိတၢ်ခိၣ်ဒုး(မိကၤ)ႇကသံၣ်ကသီဒီးတၢ်အီၣ်တၢ်အီတဖၣ်ခီဖျိတတုၤ၀ဲလၢၦၤလီၢ်အိၣ်ကမှံအိၣ်တၢ်လီၢ်ဘၣ်အဃိ ဘၣ်သဂၢၢ်၀ဲတၢ်ကီတၢ်ခဲဒ်အံၤလီၤအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

လါယူၤလံ ၁၂ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)လၢၢ်ဒိၣ်ဒီးမိကီၢ်ဆၣ်တကပၤန့ၣ် ခီဖျိပယီၤသုးမၤအါထီၣ်သုးဂံၢ်ဘါဒီးခံခီခံကပၤတၢ်ဘၣ်သဂၢၢ်ခးလိာ်သးကဲထီၣ်အဃိ ၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲအသိးလၢၦၤသ့ၣ်တဖၣ်အံၤအဂီၢ်လိၣ်ဘၣ်ဒံး၀ဲတၢ်ခိၣ်ဒုး(မိကၤ)ႇကသံၣ်ကသီဒီးဂံၢ်ခီၣ်ထံးတၢ်အီၣ်တၢ်အီတဖၣ်အဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ စးထီၣ်ဖဲလါယူၤလၢာ်န့ၣ်ပယီၤသုးဒီးခ့ၣ်အဲၣ်ယူၣ်အဘၢၣ်စၢၤခံခီခံကပၤတၢ်ဖ့ၣ်စၢဟဲဆူၣ်ထီၣ်၀ဲဒီး ဖဲတလါအံၤလါယူၤလံထီၣ်န့ၣ်ခီဖျိတၢ်လဲၤထီၣ်မၤန့ၢ်၀ဲပယီၤသုးကလၢၤဖိ(၅)ဖျၢၣ်အဃိပယီၤသုးတကပၤမၤအါထီၣ်အသုးဂံၢ်ဘါဒီးခံခီခံကပၤတၢ်ဒုးကဲထီၣ်၀ဲတပယူာ်ဃီန့ၣ်လီၤႉခီဖျိတၢ်ဒုးကဲထီၣ်အဃိခ့ၣ်အဲၣ်ယူၣ်ကီၢ်ဆၣ်(၂)ဘ့ၣ်အပူၤၦၤဃ့ၢ်မှံဟးဖျိးအနီၣ်ဂံၢ်အိၣ်တုၤလၢ(၇၀၀၀၀)ဒီး(၁၀၀၀၀၀)ဃၣ်ဃၣ်လံဒီးလိၣ်ဘၣ်၀ဲတၢ်ဆီၣ်ထွဲမၤစၢၤတဖၣ်အဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဂၤစံး၀ဲဒ်အံၤန့ၣ်လီၤႉ “ၦၤဃ့ၢ်ထီၣ်အနီၣ်ဂံၢ်ဒုဟဲအါထီၣ်ရုၢ်ရုၢ်လီၤႉဘၣ်မနုၤအဃိလဲၣ်န့ၣ်တၢ်ပိၢ်ထီၣ်ကိးမုၢ်နံၤဒဲးဃၣ်ဃၣ်ညါမီၤနီၤႉခဲအံၤလၢၦၤဃ့ၢ်မှံဟးဖျိးတဖၣ်အဂီၢ်န့ၣ်တၢ်လၢအလိၣ်သ့ၣ်တဖၣ်န့ၣ်မ့ၢ်၀ဲတၢ်အီၣ်တၢ်အီႇကသံၣ်ကသီတဖၣ်လီၤႉလီၤဆီဒၣ်တၢ်ဖိဒံဖိသၣ်ဒီးၦၤသူၣ်က့သးၦၢ်တဖၣ်အဂီၢ်န့ၣ်ကသံၣ်ကသီလိၣ်အိၣ်မီၤနီၤႉမ့မ့ၢ်ပ၀ဲဒၣ်ခီန့ၣ်ပမၤဒ်ပမၤအန့ၢ်အသိးလီၤႉခဲအံၤလၢတၢ်အိၣ်ဆူၣ်အိၣ်ချ့အဂီၢ်မ့ၢ်ဂ့ၤႇတၢ်အီၣ်တၢ်အီဒီးတၢ်ခိၣ်ဒုး(မိကၤ)တဖၣ်လိၣ်၀ဲမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ အပူၤကွံာ်လၢညါလၢၢ်ဒိၣ်ကီၢ်ဆၣ်အပူၤန့ၣ်ၦၤဃ့ၢ်မှံဟးဖျိးအိၣ်၀ဲ(၁၅ႇ၀၀၀)ဘျဲၣ်လီၤဒီးမိကီၢ်ဆၣ်ပူၤန့ၣ်အိၣ်၀ဲ(၆၀၀၀၀)ဘျဲၣ်ႇမ့မ့ၢ်လၢၢ်ဒိၣ်ကီၢ်ဆၣ်ပူၤသ၀ီအဖျၢၣ်(၃၀)ဘျဲၣ်ဒီးမိကီၢ်ဆၣ်ပူၤသ၀ီအဖျၢၣ်(၄၀)ဘျဲၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ၦၤဃ့ၢ်မှံဟးဖျိးတဖၣ်အံၤအကျါတနီၤန့ၣ်လဲၤစံၣ်အိၣ်၀ဲလၢလၢၢ်ဒိၣ်၀့ၢ်ႇတီအူ၀့ၢ်ဒီးဖၣ်အၣ်၀့ၢ်အဘူးတံၢ်အဟံၣ်ဃုာ်ဒီးကီၢ်ဆၢတၢ်လီၢ်လၢအဂၤအိၣ်၀ဲအသိးတနီၤန့ၣ်လဲၤစံၣ်အိၣ်၀ဲလၢသ၀ီခိၣ်ဃၢၤကစၢၢ်ကလိကျါဒီးဖဲန့ၣ်ဖိဒံဖိသၣ်ႇသူၣ်က့သးၦၢ်ၦၤနီၣ်ဂံၢ်ခဲလၢာ်ကအိၣ်လၢ(၅၀ႇ၀၀၀)ဃၣ်ဃၣ်ညါအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤၦၤဃ့ၢ်မှံဟးဖျိးအအိၣ်န့ၣ်လီၤႉ ကတီၢ်ခဲအံၤလၢၦၤဃ့ၢ်မှံဟးဖျိးတဖၣ်အံၤအီၣ်အီအဂီၢ်ဘၣ်ဒိးသန့ၤထီၣ်သးလၢတၢ်မၤဘူၣ်ကစၢ်ဒီးနီၢ်တဂၤတၢ်မၤဘူၣ်ကစၢ်လၢအိၣ်လီၢ်က၀ီၤပူၤတဖၣ်တစိၢ်တလီၢ်န့ၣ်လီၤႉလၢန့ၣ်အမဲာ်ညါၦၤလၢအမၤစၢၤၦၤဃ့ၢ်မှံဟးဖျိးတဖၣ်အံၤစ့ၢ်ကီးပယီၤသုးဖီၣ်မၤသံ၀ဲဒၣ်အိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲအပူၤကွံာ်လါယူၤလံ ၄ သီအနံၤန့ၣ်န့ၣ်လီၤႉဒ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးန့ၣ်စီၤလါကပီၤ(ကိး)စီၤဖါဘီလၢအနုာ်လီၤမၤစၢၤၦၤဃ့ၢ်မှံဟးဖျိးလၢပျီပူၤတဂၤအံၤပယီၤသုးဖီၣ်မၤသံကွံာ်အီၤဒီးဟံဃုာ်စ့ၢ်ကီးအကျိၣ်အစ့ဒံးအဂ့ၢ်န့ၣ်စံး၀ဲန့ၣ်လီၤႉ စးထီၣ်ဖဲအပူၤကွံာ်လါယူၤ ၂၅ သီအနံၤန့ၣ် ခံခီခံကပၤအဘၢၣ်စၢၤတၢ်ဒုးစးထီၣ်ကဲထီၣ်ဒီး ဖဲန့ၣ်ပယီၤသုးတကပၤသံဘၣ်ဒိဘၣ်ထံးအိၣ်၀ဲအါမးအသိးဘၣ်ပာ်တ့ၢ်ကွံာ်အသုးကလၢၤဖိ(၅)ဖျၢၣ်အဃိ လၢတၢ်ဂ့ၢ်အံၤအဖီခိၣ်ပယီၤသုးတကပၤမၤအါထီၣ်အသုးဂံၢ်ဘါဒီးခးလီၤစ့ၢ်ကီးကျိဖးဒိၣ်ဆူဒူသ၀ီပူၤကိးမုၢ်နံၤဒဲးအဂ့ၢ်န့ၣ်ဂံၢ်ခီၣ်ထံးတၢ်ကစီၣ်လၢအိၣ်ဟီၣ်က၀ီၤပူၤတဖၣ်စံး၀ဲန့ၣ်လီၤႉ တချုးလၢတၢ်ဘၣ်သဂၢၢ်ခးလိာ်သးကဲထီၣ်ဒံးဘၣ်အခါန့ၣ်ပယီၤသုးမီၤစိရိၤတကပၤတဲပျံၤ၀ဲလၢသ၀ီအဖျၢၣ်(၂၀)ဃၣ်ဃၣ်လၢအိၣ်(ခ့ၣ်အဲၣ်ယူၣ်)တၢ်ပၢဟီၣ်က၀ီၤပူၤအံၤတဘၣ်တူၢ်လိာ်ခ့ၣ်အဲၣ်ယူၣ်ဘၣ်ဒီးမ့တူၢ်လိာ်၀ဲန့ၣ်ကဘၣ်ဟးထီၣ်ကွံာ်လၢသ၀ီပူၤတကးဒံးဘၣ်ခးလီၤကျိဖးဒိၣ်ဆူသ၀ီပူၤအိၣ်၀ဲအဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါဒံး၀ဲန့ၣ်လီၤႉ

လါယူၤလံ ၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါယူၤလံ ၇ သီအနံၤန့ၣ် ပယီၤသုးတြိၤ(၄၄)စုတီၤအဖီလာ်သုးရ့ၣ်(၄)ရ့ၣ်ဒီးသုးခိးကီၢ်ဆၢ(BGF–၁၀၂၂)သုးဟီၣ်က၀ီၤခိၣ်သုးခိၣ်ဒိၣ်ဖိစီၤမိၣ်သိၤတီၤခိၣ်ရိၣ်မဲသုးဂံၢ်ဘါအဂၤ(၁၀၀)ဃၣ်ဃၣ်အံၤလၢကဟဲမၤအါထီၣ်သုးဂံၢ်ဘါဆူဂီၤလ့ၤတကပၤအဂီၢ် ခီဖျိ(Cobra)သုးပာ်ဖှိၣ်ခိးခးအ၀ဲသ့ၣ်လၢတၢ်ဘၢၣ်စၢၤအဃိ ပယီၤသုးတကပၤသံဘၣ်ဒိဘၣ်ထံး၀ဲအါမးအဂ့ၢ်န့ၣ်(Cobra)သုးကျိၤထုးထီၣ်ပာ်ဖျါ၀ဲဖဲတနံၤအံၤန့ၣ်လီၤႉ ပယီၤသုးတြိၤ(၄၄)စုတီၤအဖီလာ်ခီၣ်ချ့သုးရ့ၣ်(ခမရ-၂၀၇)ႇခီၣ်သုးရ့ၣ်(ခလရ–၈)ႇခီၣ်ချ့သုးရ့ၣ်(ခမရ–၂၀၄)(ခမရ–၉)(ခမရ–၁၀၂)ဒီးသုးခိၣ်စီၤမိၣ်သိၤတီခိၣ်ရိၣ်မဲ(BGF)သုးဂံၢ်ဘါအဂၤ(၁၀၀)ဃၣ်ဃၣ်အံၤ ပာ်ဖှိၣ်ထီၣ်သးဖဲဖလူဖိႇဖလူဖးဒိၣ်လီၢ်က၀ီၤဒီးဂုာ်ကျဲးစၢးဟဲထီၣ်၀ဲဆူမၠၣ်၀တံၣ်–ဂီၤလ့ၤကျဲဒီတကျိၤအခါ ဖဲန့ၣ်ပယီၤသုးကျိၤလၢအပၣ်ဃုာ်ဒီး(ခမရ–၂၀၇)အံၤဒီး(Cobra)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲမဟါလါယူၤလံ ၇ သီအနံၤန့ၣ် ပယီၤသုးကျိၤလၢအပၣ်ဃုာ်ဒီး(ခမရ–၂၀၇)အံၤဟဲထီၣ်တုၤ၀ဲလၢမၠၣ်၀တံၣ်–ဂီၤလ့ၤ ကျဲမုၢ်ခိၣ်(သိထၣ်ကွ့ၣ်)တၢ်လီၢ်ဒီးဖဲန့ၣ်တၢ်ခးလိာ်သးကဲထီၣ်၀ဲဒီး(Cobra)သုးပာ်ဖှိၣ်န့ၣ်လီၤႉတုၤလၢတၢ်ထုးထီၣ်ပာ်ဖျါတနံၤအံၤန့ၣ်တၢ်ထံၣ်န့ၢ်၀ဲသုးခိၣ်စိ(၁)ဂၤႇသုးကသံၣ်သရၣ်(၁)ဂၤဃုာ်ဒီးသုးဖိ(၅)ဂၤအသံစိၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်(Cobra)ထုးထီၣ်ပာ်ဖျါ၀ဲအသိးန့ၣ်ပထံၣ်ဘၣ်လၢတၢ်ဂီၤမူအပူၤပယီၤသုးသံဘၣ်ဒိဘၣ်ထံးအါအါဂီၢ်ဂီၢ်အသိးခီဖျိတၢ်ဒုးကဲထီၣ်ဒံးအဖၢမုၢ်အဃိပယီၤသုးသံဘၣ်ဒိဘၣ်ထံးအနီၣ်ဂံၢ်စရီန့ၣ်တၢ်မၤလီၤတံၢ်လီၤဆဲး၀ဲအဖၢမုၢ်လီၤအဂ့ၢ်န့ၣ် (Cobra)သုးကျိၤစံး၀ဲန့ၣ်လီၤႉ တုၤလၢမဟါတၢ်ဒုးကဲထီၣ်အပူၤန့ၣ်တၢ်မၤန့ၢ်၀ဲပယီၤသုးကျိချံၦာ်သၣ်တနီၤဃုုာ်ဒီးစဲးဖီကဟၣ်တၢ်ဖိတၢ်လံၤလၢအဂၤတဖၣ်ဒီးခံခီခံကပၤတၢ်ဒုးကဲထီၣ်အပူၤမ့မ့ၢ်(Cobra)သုးကျိၤတကပၤသံဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် စံး၀ဲန့ၣ်လီၤႉ ခီဖျိတၢ်ခိးခးပယီၤသုးမီၤစိရိၤအဃိဖဲတနံၤအံၤလါယူၤလံ ၈ သီ ဂီၤခီ ၄ နၣ်ရံၣ်တခီဃၣ်ဃၣ်အဆၢကတီၢ်န့ၣ် သုးမီၤစိရိၤကဘီယူၤတဘ့ၣ်ဟဲတ့ၢ်လီၤဒံးမ့ၣ်ပိၢ်လၢလ့က့ၣ်ကိာ်လီၢ်က၀ီၤလၢ(Cobra)သုးကျိၤအိၣ်ခိးတၢ်ဘံၣ်တၢ်ဘၢအလီၢ်တၢ်လူၢ်ခိၣ်တခါဒံးဒီးအ၀ဲသ့ၣ်ၦၤတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ်(Cobra)သုးကျိၤထုးထီၣ်ပာ်ဖျါ၀ဲန့ၣ်လီၤႉ

လါယူၤလံ ၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် မုာ်ပၢၤသ၀ီအပူၤန့ၣ် တီၤထီကၠိလၢကညီကူၣ်သ့ဆဲးလၤ၀ဲၤကျိၤ(KECD)အိးထီၣ်၀ဲတဖၣ်တနံၣ်အံၤခီဖျိၦၤကၠိဖိနီၣ်ဂံၢ်ဟဲအါထီၣ်အဃိ လံာ်မိၢ်ၦၢ်ဒီးကၠိတၢ်ပီးတၢ်လီလၢကသိၣ်လိတၢ်အဂီၢ်လိၣ်ဒံး၀ဲအဂ့ၢ်န့ၣ် သ့ၣ်ညါဘၣ်လၢကၠိၦၤဘၣ်မူဘၣ်ဒါအအိၣ်န့ၣ်လီၤႉ ဖဲအပူၤကွံာ်(၂၀၂၁–၂၀၂၂)နံၣ်အခါကၠိသ့ၣ်တဖၣ်အံၤၦၤကၠိဖိနီၣ်ဂံၢ်အိၣ်ထဲ(၃၄၃)ဂၤလီၤဒီး ဘၣ်ဆၣ်တနံၣ်အံၤခီဖျိၦၤကၠိဖိနီၣ်ဂံၢ်အိၣ်တုၤလၢ(၅၀၀)ဃၣ်ဃၣ်ညါအဃိဘၣ်သိၣ်လိနီၤဖးလီၤအတီၤဒီးခီဖျိလံာ်မိၢ်ၦၢ်တကူတလၢဘၣ်အဃိတၢ်ကီတၢ်ခဲအိၣ်လၢကသိၣ်လိတၢ်အဂီၢ်အဂ့ၢ်န့ၣ်ကၠိသရၣ်မုၣ်နီၢ်အ့အ့လွ့ၤလၢအသိၣ်လိတီၤထီတဂၤစံး၀ဲန့ၣ်လီၤႉ အ၀ဲစံး၀ဲလၢ“ကၠိလၢအဂၤတဖၣ်န့ၣ်ဟဲထီၣ်ကၠိဖဲအံၤအါအဃိတနံၣ်အံၤ(၉)တီၤဒီးအတီၤ(၁၀)န့ၣ်ပနီၤဖးလီၤအီၤခံဒူၣ်မီၤနီၤႉတတီၤန့ၣ်ၦၤကၠိဖိအိၣ်၀ဲအဂၤ(၅၀)ဘျဲၣ်ႉခီဖျိတၢ်လီၢ်အံၣ်အဃိသိၣ်လိတၢ်ဒုကီတစဲးႉမ့မ့ၢ်လံာ်မိၢ်ၦၢ်န့ၣ်ဘၣ်ကွၢ်ဖှိၣ်၀ဲ(၅)ဂၤညါအဃိလၢကၠိဖိအဂီၢ်န့ၣ်တဘၣ်ဂီၢ်ဘၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ်နံၣ်အခါန့ၣ်(၁၀)တီၤကၠိဖိအနီၣ်ဂံၢ်အိၣ်၀ဲ(၄၇)ဂၤလီၤဒီးဘၣ်ဆၣ်တနံၣ်အံၤကၠိဖိနီၣ်ဂံၢ်အါထီၣ်အဂၤ(၁၀၀)ဘျဲၣ်ညါအဃိတၢ်သိၣ်လိအလီၢ်ဒီးလံာ်လဲၢ်တၢ်ပီးတၢ်လီတဖၣ်လိၣ်ဒံး၀ဲအဂ့ၢ်န့ၣ် သ့ၣ်ညါဘၣ်လၢကၠိၦၤဘၣ်မူဘၣ်ဒါအအိၣ်န့ၣ်လီၤႉ “ခိ၀ံၣ်အကတီၢ်ဒီးသုးဟံးန့ၢ်တၢ်စိတၢ်ကမီၤတၢ်အိၣ်သးအဃိအတီၤ(၁၀)အံၤဘၣ်အိၣ်ဘှံး၀ဲ(၂)နံၣ်ညါမီၤနီၤႉတနံၣ်ညါအံၤအ၀ဲသ့ၣ်ဟဲထီၣ်က့ၤကၠိလၢကီၢ်သူလ့ၤကၠိႉမၤလိဘၣ်ဃုာ်ဒီးပလံာ်ကညီအဃိဂ့ၤလီၤမီၤနီၤႉလံာ်နါက့တမ့ၢ်ဒ်သိးဒီးလၢကညါအခါဘၣ်တမ့ၢ်လၢဖးတၢ်တခါအံၤႇသံကွၢ်တၢ်တခါအံၤႇစံးဆၢတၢ်တခါအံၤတမ့ၢ်လၢၤဘၣ်မီၤနီၤႉဒ်ပနၢ်ပၢၢ်အသိးပက့ၤစံးဆၢကဒါန့ၢ်မီၤနီၤႉခီဖျိလၢလံာ်မိၢ်ၦၢ်တကူတလၢဘၣ်အဃိသရၣ်မ့ဟ့ၣ်လီၤဟံၣ်တၢ်မၤ(အ့ၤစၤ)န့ၣ်ဘၣ်လဲၤမၤဖှိၣ်သကိး၀ဲလၢၦၤဟံၣ်လၢမုၢ်နၤခီဒီးပကွၢ်န့ၣ်တၢ်ကီတၢ်ခဲအိၣ်မီၤနီၤ”အဂ့ၢ်န့ၣ်စီၤအီၤကၠီၤမ့လၢအိၣ်ဟဲ၀့ၢ်တကူၣ်အံၤစံး၀ဲန့ၣ်လီၤႉ လၢခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်၀ီၢ်ရ့ၣ်ကီၢ်ဆၣ်အပူၤခီဖျိထံရူၢ်ကီၢ်သဲးဒီးဒုးယၤတၢ်အိၣ်သးတဖၣ်အဃိ ကၠိတဖၣ်အါဒၣ်တက့ၢ်န့ၣ်တုၤလၢခဲအံၤတအိးထီၣ်၀ဲဒံးဘၣ်အဃိကၠိလၢအိၣ်ကီၢ်ပယီၤတၢ်လီၢ်အါတီၤဟဲထီၣ်က့ၤကၠိလၢခ့ၣ်အဲၣ်ယူၣ်အိးထီၣ်၀ဲတဖၣ်လီၤဒီးကၠိတၢ်ပီးတၢ်လီတကူတလၢ၀ဲဘၣ်အဂ့ၢ်န့ၣ် သ့ၣ်ညါဘၣ်လၢကူၣ်သ့ဆဲးလၤ၀ဲၤကျိၤၦၤဘၣ်မူဘၣ်ဒါအအိၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံခီဖျိထံရူၢ်ကီၢ်သဲးဒီးဒုးယၤတၢ်အိၣ်သးတဖၣ်အဃိခံခီခံကပၤတၢ်ပၢဟီၣ်က၀ီၤပူၤဖဲကၠိတအိးထီၣ်ဒံးဘၣ်အကတီၢ်ကၠိဖိသ့ၣ်တဖၣ်အါဒၣ်တက့ၢ်န့ၣ်ဟဲထီၣ်က့ၤကၠိလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢကူၣ်သ့ဆဲးလၤ၀ဲၤကျိၤအိးထီၣ်၀ဲလၢကီၢ်ရ့ၣ်ႇကီၢ်ဆၣ်တဖၣ်အပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢတၢ်န့ၣ်အဃိတနံၣ်အံၤတၢ်သိၣ်နံၣ်အဂီၢ်ကၠိလၢအိၣ်ကီၢ်ရ့ၣ်ႇကီၢ်ဆၣ်အပူၤတဖၣ်ခီဖျိၦၤကၠိဖိနီၣ်ဂံၢ်ဟဲအါထီၣ်အဃိတၢ်ကီတၢ်ခဲအိၣ်ထီၣ်လၢအိၣ်ဆိးလီၢ်ကျဲႇတၢ်အီၣ်တၢ်အီတကးဒံးဘၣ်တၢ်သိၣ်လိအဒၢးဒီးကၠိတၢ်ပီးတၢ်လီတကူတလၢ၀ဲဘၣ်အဂ့ၢ်န့ၣ်(KECD)ၦၤဘၣ်မူဘၣ်ဒါတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ အပူၤကွံာ်(၂၀၂၁–၂၀၂၂)နံၣ်အခါလၢခ့ၣ်အဲၣ်ယူၣ်ဒူသထူူၣ်ႇတီအူႇချၢၣ်လွံၢ်ထူၣ်ႇ ဘျံးဒ၀ဲၢ်ႇမုၢ်တြီၢ်ႇဒူပျာ်ယာ်ဒီးဖၣ်အၣ်ကီၢ်ရ့ၣ်(၇)ဘ့ၣ်အပူၤကညီကူၣ်သ့ဆဲး၀ဲၤကျိၤ(KECD)အဖီလာ်တီၤဖုၣ်တုၤလၢတီၤထီန့ၣ်ကၠိခဲလၢာ်အိၣ်၀ဲ(၁ႇ၀၉၆)ဖျၢၣ်ဒီးဖဲန့ၣ်ကၠိဖိနီၣ်ဂံၢ်အိၣ်၀ဲခဲလၢာ်(၈၉ႇ၈၇၉)ဂၤအဂ့ၢ်န့ၣ်သ့ၣ်ညါဘၣ်ဒ်(KECD)တၢ်မၤနီၣ်စရီအသိးန့ၣ်လီၤႉမ့မ့ၢ်ကၠိဖိနီၣ်ဂံၢ်စရီလၢတနံၣ်ညါအံၤအဂီၢ်န့ၣ်တၢ်ထၢဖှိၣ်စရီအဖၢမုၢ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါယူၤလံ ၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်အပူၤ တနံၣ်အံၤ(၂၀၂၂)နံၣ်တၢ်ဒုးကဲထီၣ်လၢ(၆)လါအတီၢ်ပူၤပယီၤသုးတကပၤသံ၀ဲ(၂ႇ၀၀၀)ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါလါယူၤ ၆ သီအနံၤန့ၣ်လီၤႉ စးထီၣ်ဖဲတနံၣ်အံၤလါယနူၤအါရံၤတုၤလၢလါယူၤလၢာ်န့ၣ်လၢခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤတဖၣ်အပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီးပယီၤသုးမီၤစိရိၤႇသုးခိးကီၢ်ဆၢ(BGF)တဖၣ်အဘၢၣ်စၢၤတၢ်ဒုးကဲထီၣ်ခဲလၢာ်(၂ႇ၆၈၆)ဘျီဒီးဖဲန့ၣ်ပယီၤသုးတကပၤသံ၀ဲ(၂ႇ၂၀၈)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခံခီခံကပၤတၢ်ဒုးကဲထီၣ်အပူၤပယီၤသုးမီၤစိရိၤဒီး(BGF)တကပၤဘၣ်ဒိ၀ဲ(၁ႇ၅၄၅)ဂၤဒီး မ့မ့ၢ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)သုးပာ်ဖှိၣ်တကပၤန့ၣ်ဘၣ်လုၢ်ထီၣ်ကွံာ်အသးသမူ(၈၄)ဂၤႇဘၣ်ဒိ၀ဲ(၁၇၅)ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးန့ၣ်အပူၤကွံာ်လါမးရှးဒီးလါအ့ဖြ့ၣ်ခံလါအတီၢ်ပူၤန့ၣ် ပထံၣ်ဘၣ်လၢတၢ်ဒုးကဲထီၣ်အါကတၢၢ်လီၤဒီးလါမးရှးႇလါယူၤခံလါအံၤန့ၣ်ပယီၤသုးတကပၤသံဘၣ်ဒိဘၣ်ထံးအါကတၢၢ်စ့ၢ်ကီးန့ၣ်လီၤႉ ဒ်န့ၣ်အသိးခီဖျိပယီၤသုးခးလီၤကျိဖးဒိၣ်ဆူသ၀ီပူၤႇကဘီယူၤဟဲတ့ၢ်လီၤမ့ၣ်ပိၢ်အဃိလီၢ်က၀ီၤကမျၢၢ်သံ၀ဲ(၇၂)ဂၤဒီးဘၣ်ဒိ(၁၅၅)ဂၤန့ၣ်လီၤႉ ဖဲအပူၤကွံာ်(၂၀၂၁)လါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံ ခံခီခံကပၤတၢ်ဒုးစးထီၣ်ကဲထီၣ်၀ဲလၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤန့ၣ်လီၤႉဘၣ်ဆၣ်လၢခ့ၣ်အဲၣ်ယူၣ်(သုးက့ ၅)ဖၣ်ပူၣ်ဟီၣ်က၀ီၤပူၤတၢ်ဒုးကဲထီၣ်အါကတၢၢ်၀ဲလီၤအသိးကတီၢ်ခဲအံၤလၢ(သုးက့ ၆)ဒူပျာ်ယာ်ကီၢ်ရ့ၣ်ဒီး(သုးက့ ၃)ချၢၣ်လွံၢ်ထူၣ်ကီၢ်ရ့ၣ်တကပၤစ့ၢ်ကီးတၢ်ဒုးဆူၣ်ထီၣ်၀ဲဒၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံ(ခ့ၣ်အဲၣ်ယူၣ်)ထီၣ်မၤန့ၢ်၀ဲသုးမီၤစိရိၤအသုးကလၢၤဖးဒိၣ်(၅)ဖျၢၣ်ႇသုးကလၢၤဖိတနီၤဒီးကတီၢ်ခဲအံၤအူကြ့ၣ်ထၣ်ပယီၤသုးကလၢၤလၢတၢ်လဲၤထီၣ်၀ဲအံၤစ့ၢ်ကီးတၢ်ဒုးကဲထီၣ်ဒံး၀ဲတပယူာ်ဃီန့ၣ်လီၤႉ

လါယူၤလံ ၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ်အပူၤခီဖျိဂံၢ်ခီၣ်ထံးတၢ်အီၣ်တၢ်အီအၦ့ၤထီၣ်အဃိဂံၢ်ခီၣ်ထံးၦၤမုၢ်ဆ့ၣ်မုၢ်ဂီၤဖိလၢအိၣ်ဟီၣ်က၀ီၤအပူၤတဖၣ််သဂၢၢ်ဘၣ်၀ဲတၢ်လုၢ်အီၣ်နီၢ်ခိသးသမူတၢ်ကီတၢ်ခဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံခီဖျိထံရူၢ်ကီၢ်သဲးတၢ်အိၣ်သးတဂၢၢ်တကျၢၤဘၣ်အဃိ တၢ်ဒုးဆူၣ်ထီၣ်၀ဲလၢကညီကီၢ်စဲၣ်ကီၢ်ဆၢဟီၣ်က၀ီၤပူၤအသိးတၢ်ကူၣ်လဲၤမၤကၤအကျိၤအကျဲတဖၣ်စ့ၢ်ကီးကီခဲထီၣ်၀ဲဒီးခီဖျိပနံာ်တၢ်ဖိတၢ်လံၤလၢတၢ်ၦ့ၤဆါအီၤတဖၣ်ဟဲလီၤစဲၤခံအဃိပနံာ်တၢ်ဖိတၢ်လံၤလီၤစှၤတလၢတလီၣ်၀ဲဘၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ခီဖျိတၢ်အိၣ်သးအံၤအဖီခိၣ်လၢဖၣ်အၣ်ႇကီးတရံးႇမၠၣ်၀တံၣ်ႇလူၢ်ပျဲၢ်ဒီးဖၣ်ပူၣ်ဟီၣ်က၀ီၤတဖၣ်အပူၤ ဂံၢ်ခီၣ်ထံးတၢ်အီၣ်တၢ်အီလၢအမ့ၢ်ဟုသးႇသိအီၣ်ႇအံသၣ်ႇမိၢ်ဂံာ်သၣ်ဒီးပသဲသၣ်တဖၣ်အၦ့ၤထီၣ်အဃိ တၢ်လုၢ်အီၣ်နီၢ်ခိသးသမူကီခဲထီၣ်၀ဲအဂ့ၢ်န့ၣ် ဖၣ်အၣ်လီၢ်က၀ီၤဖိလၢအဟးတူၢ်ငါတနံၤဂီၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်အိၣ်သးဒုတဘၣ်ဂီၢ်လၢၤဘၣ်ႉယၤန့ၣ်ယမၤတၢ်န့ၢ်တနံၤမး(၈၀၀၀)ကၠးလီၤႉဘၣ်တနံၤနံၤန့ၣ်မးတမၤဘၣ်တၢ်ဘၣ်ႉတၢ်မၤဒုမၤတထံၣ်တမၤဘၣ်တထံၣ်လီၤမီၤနီၤႉက၀ီၤဒ့ပူၤအံၤလၢညါန့ၣ်တၢ်စံၢ်ဃါ(အသိး)တခွးန့ၣ်(၅၀၀)ကၠးခဲအံၤ(၈၀၀)ကၠးလံႉဟုသးနါက့အၦ့ၤထီၣ်အဃိလၢပဂီၢ်န့ၣ်တဘၣ်ဂီၢ်ဘၣ်ႉလၢၦၤမုၢ်ဆ့ၣ်မုၢ်ဂီၤဖိအဂီၢ်န့ၣ်လ့ၤတက့ၤတဘၣ်ဂီၢ်လၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါအပူၤကွံာ်ပသဲသၣ်တပီၢ်န့ၣ်(၁၂၀၀)ကၠးခဲအံၤအၦ့ၤအိၣ်၀ဲ(၂၄၀၀)ကၠးဒီးမ့မ့ၢ်ပသဲ၀ါန့ၣ်အပူၤကွံာ်တပီၢ်န့ၣ်အၦ့ၤအိၣ်၀ဲ(၆၀၀၀)ကၠးခဲအံၤအၦ့ၤထီၣ်တုၤလၢ(၇၀၀၀)ကၠးလံအသိးမ့မ့ၢ်မိၢ်ဂံာ်သၣ်အဃ့န့ၣ်အပူၤကွံာ်တပီၢ်န့ၣ်အၦ့ၤအိၣ်၀ဲ(၅၅၀၀)ကၠးဘၣ်ဆၣ်ခဲအံၤအၦ့ၤအိၣ်တုၤလၢ(၇၀၀၀)ကၠးညါအဂ့ၢ်န့ၣ် ကျးကစၢ်တဖၣ်စံး၀ဲန့ၣ်လီၤႉ ကတီၢ်ခဲအံၤပနံာ်တၢ်ဖိတၢ်လံၤကဟဲလီၤအဂီၢ်ခီဖျိကျဲတၢ်ကီတၢ်ခဲဒီးသိၦ့ၤထီၣ်အဃိ တၢ်ဆှၢထီၣ်ဆှၢလီၤအဘူးအလဲစ့ၢ်ကီးအၦ့ၤဒိၣ်ထီၣ်အသိးခီဖျိတၢ်ဖံးတၢ်မၤဒီးကျိၣ်စ့တၢ်ဟဲနုာ်တအိၣ်အါအါလၢၤဘၣ်အဃိဆါတၢ်တန့ၢ်အါအါလၢၤဘၣ်အဂ့ၢ်န့ၣ် ကျးကစၢ်လၢအိၣ်ကီးတရံး၀့ၢ်ပူၤတဂၤစံး၀ဲန့ၣ်လီၤႉ “ခဲအံၤန့ၣ်ကျဲပံးလၢတၢ်လီၢ်ကိးတီၤဒဲးလီၤႉဒ်သိးဒီးစိၤလၢညါမီၤနီၤႉနကဆှၢတၢ်လီၢ်တတီၤဒီးတတီၤန့ၣ်ၦၤအိၣ်ခိးတြီနၤလၢကျဲပူၤႇဘၣ်မံတ့ၢ်တသီတၢ်ဆၢကတီၢ်ဆဲးခံမီၤနီၤႉလၢခံတခါန့ၣ်သိၦ့ၤထီၣ်ႇၦၤစိာ်ထီၣ်စိာ်လီၤတၢ်အဘူးအလဲနါက့အၦ့ၤထီၣ်လီၤႉအဃိန့ၣ်တၢ်ဖိတၢ်လံၤနါက့အၦ့ၤထီၣ်လီၤႉၦၤဟဲၦ့ၤအီၣ်တၢ်နါက့လီၤစှၤဒိၣ်န့ၢ်ဒံးအပူၤကွံာ်မီၤနီၤႉအပူၤကွံာ်နဆါမ့န့ၢ်တကလီၢ်န့ၣ်ခဲအံၤဆါန့ၢ်က့ၤထဲယဲၢ်ကလးကၠးလီၤႉတၢ်အိၣ်သးနးထီၣ်လံ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိထံရူၢ်ကီၢ်သဲးတၢ်အိၣ်သးတဂၢၢ်တကျၢၤအတၢ်ပိာ်ထွဲထီၣ်အခံအဃိဂံၢ်ခီၣ်ထံးတၢ်အီၣ်တၢ်အီတကးဒံးဘၣ်အမဲာ်ညါသိစ့ၢ်ကီးအၦ့ၤထီၣ်၀ဲဒၣ်န့ၣ်လီၤႉလၢန့ၣ်အမဲာ်ညါခီဖျိကီၢ်ပယီၤပူၤတၢ်ဖံးတၢ်မၤလီၤစှၤအဃိကီၢ်ပယီၤၦၤမၤတၢ်ဖိတဖၣ်နုာ်လီၤခူသူၣ်၀ဲဆူကီၢ်ကၠီၣ်တဲၣ်ပူၤလၢကျဲအဘိဘိလၢအတဖိးသဲစးဘၣ်ဟဲအါထီၣ်၀ဲန့ၣ်လီၤႉ

လါယူၤလံ ၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲစှၤသီအတီၢ်ပူၤခီဖျိသုးမီၤစိရိၤမၤအါထီၣ်သုးဂံၢ်ဘါဟူးဂဲၤအါထီၣ်လၢမၠၣ်၀တံၣ်ကလံၤတကပၤအဃိၦၤဃ့ၢ်မှံဟးဖျိးဖိလၢအလဲၤဃ့ၢ်ထီၣ်ဆူကီၢ်ကၠီၣ်တဲၣ်–ကီၢ်ပယီၤကီၢ်ဆၢတၢ်လီၢ်တဖၣ်ဒီး လဲၤစံၣ်အိၣ်တစိၢ်တလီၢ်လၢကီၢ်ကၠီၣ်တဲၣ်ပူၤတဖၣ်တုၤလၢခဲအံၤက့ၤဆူအဟံၣ်တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ မၠၣ်၀တံၣ်ကလံၤထံးသ၀ီတဖၣ်လၢအမ့ၢ်သ့ၣ်ဘီဘိႇဘျၢၣ်ဒိၣ်ႇအူကြ့ၣ်ထၣ်ႇ၀ၣ်မံၤထၣ်သ၀ီၦၤဃ့ၢ်မှံဟးဖျိးဖိအဂၤ(၂၀၀၀)ဘျဲၣ်အံၤအိၣ်ကဒုဒံးအသးဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢဒီတကျိၤဒီး ကၠီၣ်တဲၣ်ပူၤသီခါဖၠၣ်ႇပနံာ်ဒၢး(ကိၤဒီၤ)လီၢ်အါအါဂီၢ်ဂီၢ်ဒံးအဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ အူကြ့ၣ်ထၣ်သ၀ီဖိလၢအဘၣ်ဃ့ၢ်မှံဟးဖျိးအံၤတဂၤစံး၀ဲ“ခဲအံၤၦၤဃ့ၢ်မှံဟးဖျိးတဖၣ်လဲၤစံၣ်အိၣ်၀ဲလၢကီၢ်ကၠီၣ်တဲၣ်ပူၤမီၤလံၤခၠဲသ၀ီသီခါဖၠၣ်ႇမီကထါႇပနံာ်ဒၢး(ကိၤဒီၤ)လီၢ်တစိၢ်တလီၢ်ၦၤလီၢ်အိၣ်ကဒုအလီၢ်ႇဂီၤလ့ၤယိၤသီခါဖၠၣ်ဒီးကီၢ်ပယီၤကီၢ်ဆၢဘုခ့ကျီးႇၦၢ်ပူၤအနီၣ်ဂံၢ်ကအိၣ်(၂၀၀၀)ဘျဲၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လီၢ်က၀ီၤဖိလၢအဘၣ်ဃ့ၢ်မှံဟးဖျိးတဖၣ်အံၤသဂၢၢ်ဘၣ်၀ဲတၢ်အီၣ်တၢ်အီဒီးအိၣ်ဆိးလီၢ်ကျဲတၢ်ဂ့ၢ်ကီတဖၣ်အဂ့ၢ်န့ၣ် ၦၤလၢအဘၣ်ဃ့ၢ်မှံဟးဖျိးတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ “ဖဲအံၤန့ၣ်ၦၤအိၣ်ဒီဒူၣ်ညါအဃိအီၣ်အီအိၣ်ဆိးလီၢ်ကျဲတဘၣ်ဂီၢ်ဘၣ်ႉအဲၣ်ဒိးက့ၤအိၣ်လၢကစၢ်လီၢ်ကစၢ်ကျဲလီၤႉဖဲမဟါန့ၣ်ကၠီၣ်တဲၣ်သုးမၢၦၤဃ့ၢ်မှံဟးဖျိးဖိတဖၣ်က့ၤကဒါဆူဂီၤလ့ၤႉတဲ၀ဲလၢတၢ်ဒုးမ့ကဲထီၣ်န့ၣ်ဟဲစံၣ်ထီၣ်ကဒါႉသ၀ီလၢအဂၤတဖၣ်ခီန့ၣ်က့ၤတဘူၣ်ဒံးဘၣ်”အဂ့ၢ်န့ၣ်ၦၤဃ့ၢ်မှံဟးဖျိးတဂၤဃီ၀ဲန့ၣ်စံး၀ဲန့ၣ်လီၤႉ ကတီၢ်ခဲအံၤပယီၤသုးဒီးသုးခိးကီၢ်ဆၢ(BGF)သုးဟီၣ်က၀ီၤ(၃)တဖၣ်ပာ်ဖှိၣ်ထီၣ်သးမၤအါထီၣ်သုးဂံၢ်ဘါအါအါဂီၢ်ဂီၢ်လၢမၠၣ်၀တံၣ်–ကီးတရံးဟီၣ်က၀ီၤပူၤအသိး ပယီၤသုးအဂၤ(၃၀၀)ဘျဲၣ်ဟဲဆ့ၣ်နီၤဆီလီၤသးအိၣ်၀ဲလၢ လ့က့ၣ်ကိာ်လီၢ်က၀ီၤဖလူကၠိကရၢၢ်ပူၤႇဖလူဖါနကီၤသီခါဖၠၣ်ဒီးၦၤဃ့ၢ်မှံဟးဖျိးအဟံၣ်ပူၤတနီၤအိၣ်၀ဲအဂ့ၢ်န့ၣ် ဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ လၢကညီကီၢ်စဲၣ်ကၠၤအ့စ့ၣ်ကၠံႇကီးတရံးႇမၠၣ်၀တံၣ်ႇဖၣ်ပူၣ်ကီၢ်ဆၣ်တဖၣ်အပူၤန့ၣ် ခီဖျိတၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤကိးမုၢ်နံၤဒဲးဃၣ်ဃၣ်အဃိသ၀ီအဖျၢၣ်(၁၀၀)ဘျဲၣ်လီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်၀ဲဒီးခီဖျိပယီၤသုးခးလီၤကျိဖးဒိၣ်ႇကဘီယူၤဟဲတ့ၢ်လီၤမ့ၣ်ပိၢ်ႇဒီးတၢ်ဒုးကဲထီၣ်လၢပျီပူၤဟဲအါထီၣ်အဃိကမျၢၢ်သံဟဲအါထီၣ်၀ဲအဂ့ၢ်န့ၣ် ကညီၦၤဂ့ၢ်၀ီတၢ်ကရၢကရိတဖၣ်စံး၀ဲန့ၣ်လီၤႉ

လါယူၤလံ ၆ သီႇ ၂၀၂၂ နံၣ်ႇ ခ့ၣ်အဲးစံၣ် တၢ်လဲၤထီၣ်မၤန့ၢ်ကံွာ်ပယီၤသုးကလၢၤတနီၤလၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ််ကီၢ်ရ့ၣ်(သုးက့ ၃)ဟီၣ်က၀ီၤ မိကီၢ်ဆၣ်(စွ့ၣ်ကၠ့ၣ်)ပူၤကဲထီၣ်သး၀ံၤအလီၢ်ခံ ခီဖျိပယီၤသုးမၤအါထီၣ်အဂံၢ်ဘါအါအါဂီၢ်ဂီၢ်ဒီးခးလီၤကျိဖးဒိၣ်ဆူသ၀ီပူၤအဃိလီၢ်က၀ီၤဖိအဂၤ(၅၀ႇ၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ စးထီၣ်ဖဲလါယူၤလံ ၂ သီအနံၤန့ၣ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) လဲၤထီၣ်မၤန့ၢ်၀ဲသုးမီၤစိရိၤအသုးကလၢၤဖိ(၅)ဖျၢၣ်လၢအိၣ်ခ့ၣ်အဲၣ်ယူၣ်(မိကီၢ်ဆၣ်)ပူၤအံၤ၀ံၤအလီၢ်ခံ ပယီၤသုးမၤအါထီၣ်အဂံၢ်ဘါအါအါဂီၢ်ဂီၢ်န့ၣ်လီၤႉလၢတၢ်န့ၣ်အဃိလီၢ်က၀ီၤဖိတဖၣ်ဘၣ်ယိၣ်လၢတၢ်ဒုးကကဲထီၣ်လၢလီၢ်က၀ီၤပူၤအဃိသ၀ီလၢအိၣ်ဘူးဒီးသုးကလၢၤဖဲန့ၣ်သ့ၣ်တဖၣ်လီၢ်က၀ီၤဖိလၢအကလးဃ့ၢ်ထီၣ်၀ဲအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးလၢလီၢ်က၀ီၤပူၤတဖၣ်စံးဘၣ်ခ့ၣ်အဲးစံၣ်န့ၣ်လီၤႉ “ခီဖျိတၢ်လဲၤထီၣ်ခးသုးကလၢၤတၢ်ဂ့ၢ်အဃိနါက့ပၣ်စ့ၢ်ႉဖဲန့ၣ်၀ံၤအလီၢ်ခံအ၀ဲသ့ၣ်မၤအါထီၣ်အဂံၢ်ဘါအါအါဂီၢ်ဂီၢ်အဃိသ၀ီလၢအတစံၣ်ထီၣ်ဒံးဘၣ်တဖၣ်တနီၤန့ၣ်ကမျၢၢ်တဖၣ်ပျံၤတၢ်ဒီးဘိၣ်ထီၣ်အတၢ်ဘိၣ်တၢ်စၢၤႉစံၣ်ထီၣ်ဒီဒူၣ်ညါႉလဲၤခီဃီၤလၢ(စ့ၣ်တီ)မုၢ်နုာ်တကပၤဒီဒူၣ်ႉခီဖျိပယီၤသုးမၤအါထီၣ်အဂံၢ်ဘါအဃိလီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ဒုးကကဲထီၣ်ဒီးမ့မ့ၢ်ၦၤဃ့ၢ်မှံဟးဖျိးလၢအိၣ်(မုၢ်နုာ်)တဖၣ်န့ၣ်လဲၤစံၣ်အိၣ်၀ဲလၢ၀့ၢ်ပူၤဟဲအါထီၣ်၀ဲ”အဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ််လီၤႉ ခီဖျိပယီၤသုးမၤအါထီၣ်အဂံၢ်ဘါအါအါဂီၢ်ဂီၢ်အဃိခ့ၣ်အဲၣ်ယူၣ်(မိကီၢ်ဆၣ်)ပူၤသ၀ီပာ်ဖှိၣ်အဖျၢၣ်(၄၀)ဘျဲၣ်လီၢ်က၀ီၤဖိအဂၤ(၄၀ႇ၀၀၀)ဃၣ်ဃၣ်ဃ့ၢ်ထီၣ်၀ဲဒီးလၢလၢၢ်ဒိၣ်ကီၢ်ဆၣ်တကပၤစ့ၢ်ကီးသ၀ီအဖျၢၣ်(၂၀)ဘျဲၣ်လီၢ်က၀ီၤဖိ(၁၇ႇ၀၀၀)ဘျဲၣ်ဃ့ၢ်ထီၣ်၀ဲစ့ၢ်ကီးအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ လီၢ်က၀ီၤဖိလၢအဃ့ၢ်ထီၣ်တဖၣ်အံၤတနီၤန့ၣ်လဲၤစံၣ်အိၣ်၀ဲလၢလၢၢ်ဒိၣ်ႇမိဒီးတီအူ၀့ၢ်တကပၤအိၣ်၀ဲအသိး တနီၤန့ၣ်လဲၤစံၣ်အိၣ်၀ဲလၢကစၢ်ကလိကျါၦၢ်ပူၤအိၣ်၀ဲအဃိလၢတၢ်ကလဲၤဆှၢန့ၢ်ၦၤဃ့ၢ်မှံဟးဖျိးတဖၣ်အံၤအတၢ်အီၣ်တၢ်အီအဂီၢ်န့ၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ “ခဲအံၤပဆဲးကျိးဒီးၦၤမၤဘူၣ်တၢ်ဖိကစၢ်ဒီးလၢကမၤစၢၤ၀ဲအဂီၢ်အိၣ်ကတီၤထီၣ်သးအိၣ်လီၤႉကလဲၤလၢၦၤဃ့ၢ်မှံဟးဖျိးအိၣ်တၢ်လီၢ်အဂီၢ်န့ၣ်ကျဲတနီၤန့ၣ်ကးတံၢ်ဃာ်အသးႉပယီၤသုးအိၣ်ခိးတၢ်လၢကျဲဒီတဘိညါအဃိလၢကစိာ်ထီၣ်စိာ်လီၤတၢ်အဂီၢ်န့ၣ်တၢ်ကီတၢ်ခဲအိၣ်ႉပယီၤသုးမၤအါထီၣ်အဂံၢ်ဘါအဃိတၢ်သမံသမိးနါက့ဟဲအါထီၣ်ႉမ့၀ံၤၦၤဃ့ၢ်မှံဟးဖျိးတနီၤန့ၣ်က့ၤဟံအီၣ်တၢ်အီၣ်လၢအဟံၣ်ႇက့ၤဘုၣ်လီၤဆၣ်ဖိကီၢ်ဖိအဆၣ်အိၣ်အဃိ ဖဲအဟဲက့ၤလၢကျဲအခါတိနိၣ်ဒီးပယီၤသုးဒီးတၢ်ဖီၣ်အီၤနါက့အိၣ်၀ဲ”အဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါယူၤလံ ၃ သီအနံၤစ့ၢ်ကီး ပယီၤသုးဖီၣ်မၤဒၢၣ်၀ဲမိကီၢ်ဆၣ်(အ့လီစ့ၤ)သ၀ီဖိခံဂၤကဲထီၣ်သးဒံးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ ပယီၤသုးမၤအါထီၣ်အဂံၢ်အါတကးဒံးဘၣ်အမဲာ်ညါခီဖျိသုးမီၤစိရိၤကဘီယူၤဟဲဆှၣ်တၢ်ဒီးပယီၤသုးခးလီၤနါစိၤကျိဖးဒိၣ်ဆူသ၀ီပူၤအဃိလီၢ်က၀ီၤဖိလၢအဘၣ်ဃ့ၢ်မှံဟးဖျိးတဖၣ်အံၤသဂၢၢ်ဘၣ်၀ဲဒီးဆူၣ်ချ့ဒီးအီၣ်အီအိၣ်ဆိးလီၢ်ကျဲတၢ်ဂ့ၢ်ကီတဖၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ