ခ့ၣ်အဲးစံၣ် – KIC News

လါအ့ဖြ့ၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် သုးမီၤစိရိၤဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ လၢကီၢ်ပယီၤမုၢ်ထီၣ်ကလံၤထံးဟီၣ်က၀ီၤတဖၣ်အပူၤ ဖီၣ်စုက၀ဲၤတၢ်သဘံၣ်သဘုၣ်ဟဲဒိၣ်ထီၣ်အါထီၣ်၀ဲဒီး ပယီၤသုးမီၤစိရိၤမၤကမၣ်ၦၤဂ့ၢ်၀ီခွဲးယာ်ဟဲအါထီၣ်၀ဲဒၣ်အဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG)ထုးထီၣ်ပာ်ဖျါ၀ဲဖဲမဟါလါမးရှး ၃၁ သီအနံၤန့ၣ်လီၤႉ ကီၢ်ပယီၤမုၢ်ထီၣ်ကလံၤထံးဟီၣ်က၀ီၤလၢအမ့ၢ်ကညီကီၢ်စဲၣ်ႇမိၣ်ကီၢ်စဲၣ်ဒီးပကိကီၢ်ခီဟီၣ်က၀ီၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်အပူၤန့ၣ်ပယီၤသုးမၤ၀ဲဒုးယၤတၢ်ဟူးတၢ်ဂဲၤဟဲအါထီၣ် ပညိၣ်မၤ၀ဲတၢ်ထီၣ်ဒုးလၢကမျၢၢ်တဖၣ်အဖီခိၣ်ႇဖီၣ်မၤအၢမးနးဒီးသူကမျၢၢ်ဒ်တၢ်ဒီသဒၢစုက၀ဲၤဟဲအါထီၣ်အသိး ၦၤလီၢ်အိၣ်ကဒုဖိအနီၣ်ဂံၢ်စ့ၢ်ကီးဟဲအါထီၣ်၀ဲကွ့ၢ်ကွ့ၢ်အဂ့ၢ်န့ၣ် (KHRG)လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ KHRG ၦၤနဲၣ်တၢ်နီၢ်ထူထူစံး၀ဲ“ပယီၤသုးအံၤလၢကမၤရှဲကွံာ်(PDF)အဂီၢ်တၢ်ဒုးဆူၣ်ထီၣ်၀ဲန့ၣ်ပတဲသ့လီၤႉ ကယဲၢ်မ့ၢ်ၦၤလၢအထီဒါအ၀ဲသ့ၣ်တဂၤလၢ်လၢ်န့ၣ်အ၀ဲသ့ၣ်ဖီၣ်၀ဲလီၤႉလၢတၢ်န့ၣ်အဃိတၢ်မၤကမၣ်ၦၤဂ့ၢ်၀ီခွဲးယာ်ဟဲအါထီၣ်ကဲထီၣ်အသးလီၤႉခီဖျိပယီၤသုးတကပၤစ့ၢ်ကီးတၢ်ဘၣ်ဒိအ၀ဲသ့ၣ်နးအဃိ အ၀ဲသ့ၣ်မၤ၀ဲဒ်သိးသ၀ီဖိတဖၣ်ကပျံၤတၢ်ဒီးၦၤမၤစၢၤခ့ၣ်အဲၣ်ယူၣ်သုးတန့ၢ်ဘၣ်တဂ့ၤအဂီၢ်လီၤႉခဲအံၤၦၤခဲလၢာ်ထီဒါအ၀ဲသ့ၣ်အဃိပထံၣ်ဘၣ်လၢပယီၤသုးမီၤစိရိၤအံၤသူ၀ဲတၢ်စုဆူၣ်ခီၣ်တကးသ့ၣ်တဖၣ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ စးထီၣ်လၢ(၂၀၂၁)လါယူၤလံတုၤလၢလါဒံၣ်စဲဘၢၣ် ဒ်(KHRG)မၤနီၣ်မၤဃါ၀ဲအသိးန့ၣ် ပယီၤသုးမၤ ကမၣ်ၦၤဂ့ၢ်၀ီခွဲးယာ်တဖၣ်ဒ်အမ့ၢ်ဖီၣ်၀ဲပီၣ်တၣ်ႇသူကမျၢၢ်ဒ်တၢ်ဒီသဒၢစုက၀ဲၤအသိးႇဖီၣ်မၤဒၢၣ်မၤလီၤ၀ဲႇမၤဟးဂီၤၦၤလီၢ်အိၣ်ကဒုဖိအဟံၣ်အဃီႇဟုၣ်ၦၤတၢ်ဖိတၢ်လံၤလၢအလုၢ်ၦ့ၤဒိၣ်တဖၣ်ႇအီၣ်ဟုၣ်ကမျၢၢ်အတၢ်အီၣ်တၢ်အီဒီးဆၣ်ဖိကီၢ်ဖိလၢကမျၢၢ်ဘုၣ်ဃာ်၀ဲတဖၣ်တကးဒံးဘၣ်အမဲာ်ညါခီဖျိပယီၤသုးခးလီၤကျိဖးဒိၣ်ကိးမုၢ်နံၤဒဲးအဃိ ကမျၢၢ်သံဘၣ်ဒိဘၣ်ထံးအါအါဂီၢ်ဂီၢ်အသိး လၢၦၤတူၢ်ဘၣ်ခီၣ်ဘၣ်တၢ်တဖၣ်အကျါ ပိာ်မုၣ်ဒီးဖိသၣ်ပိာ်မုၣ်ႇဖိဒံဖိသၣ်တဖၣ်ဘၣ်တူၢ်ဘၣ်ခီၣ်ဘၣ်တၢ်အါန့ၢ်ဒံးပိာ်ခွါသ့ၣ်တဖၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခီဖျိတၢ်ဒုးကဲထီၣ်အဃိၦၤလီၢ်အိၣ်ကဒုဖိတဖၣ်ဟဲအါထီၣ်၀ဲကိးမုၢ်နံၤဒဲးဒီး ကီၢ်ကၠီၣ်တဲၣ် ဟ့ၣ်အိၣ်ကဒု၀ဲတစိၢ်တလီၢ်လၢကီၢ်ဆၢအံၤဘၣ်ဆၣ်ႇမ့မ့ၢ်တခီဟ့ၣ်တၢ်ဆီၣ်သနံးဆူၦၤလီၢ်အိၣ်ကဒုဖိတဖၣ်လၢကက့ၤအိၣ်လၢကီၢ်ပယီၤတကပၤႇတ့ထီၣ်၀ဲဒဲဖိတဖၣ်လၢကီၢ်ဆၢသူမှဲကၢၢ်နံၤဒီတကျိၤႇ ထံၣ်ဘၣ်၀ဲတၢ်အီၣ်တၢ်အီတကူတလၢ၀ဲဘၣ်ဒီးထံဂုၤကီၢ်ဂၤတၢ်ဆီၣ်ထွဲမၤစၢၤစ့ၢ်ကီးလီၤစှၤ၀ဲဒၣ်အဂ့ၢ်န့ၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံစှၤလါအတီၢ်ပူၤ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်လၢအမ့ၢ်(သုးက့ ၅)မုၢ်တြီၢ်ကီရ့ၣ်ႇ(သုးက့ ၁)ဒူသထူၣ်ကီၢ်ရ့ၣ်ႇ(သုးက့ ၃)ချၢၣ်လွံၢ်ထူၣ်ထူၣ်ကီၢ်ရ့ၣ်ဟီၣ်က၀ီၤအပူၤတၢ်ဒုးကဲထီၣ်၀ဲကိးမုၢ်နံၤဒဲးဒီး စးထီၣ်ဖဲအပူၤကွံာ်နံၣ်လါဒံၣ်စ့ဘၢၣ်န့ၣ်တၢ်ဒုးစးထီၣ်ဆူၣ်ထီၣ်၀ဲလၢခ့ၣ်အဲၣ်ယူၣ်(သုးက့ ၆) ဒူပျာ်ယာ်ကီၢ်ရ့ၣ်ဟီၣ်က၀ီၤပူၤတုၤလၢခဲအံၤတစုန့ၣ်လီၤႉ တၢ်ဒုးကဲထီၣ်အကတီၢ်ပယီၤသုးအံၤသူ၀ဲသုးကဘီယူၤဟဲတ့ၢ်လီၤမ့ၣ်ပိၢ်အဘျီတဖၣ်အဘျီအသိး...

တၢ်ထံတၢ်တီဆိၣ်ဂ့ၤက့ၤ ၁.ဟီၣ်ခိၣ်တၢ်လီၤတံၢ်တအိၣ် ကိးမုၢ်နံၤၦဲၤတၢ်ဘၣ်ယိၣ် အီၣ်အီအိၣ်ဆိးတဘံၣ်ဘၢ မ့ၢ်ထံကီၢ်ပူၤတၢ်ဖ့ၣ်ဆၢ ၂.ကမျၢၢ်ဖိဃ့ၢ်မှံဟးဖျိး တၢ်သံတၢ်ၦၢ်အိၣ်သမိး သုးမုၢ်သံၣ်ဘိဒုးယ၁်ဃိ ၦၤကမျၢၢ်သၣ်ဝံၤလီၤဒိ ၃.သးအိၣ်ဆၢဂ့ၤယသိၣ်ဒူ ထံကီၢ်ဂီၢ်နလဲၤဒူဒူ မုၢ်နၤမုၢ်ဆါဟ့ၣ်လီၤသး ကလု၁်ဂီၢ်ပၢၢ်ဆၢခိးခး ၄.ထံကီၢ်ဂီၢ်ကီၤဝံၤကီၤစ့ၤ မုၢ်နၤမုၢ်ဆါတအီၣ်မ့ၤ ...

လါမးရှး ၃၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၃၁ သီ ဂီၤခီအဆၢကတီၢ် လၢမိၣ်ကီၢ်စဲၣ် ကၠဲၣ်ထိၤကီၢ်ဆၣ် မိၣ်ပလ့ၤကျဲဖးဒ့န့ၣ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA(သုးက့ ၁)သုးပာ်ဖှိၣ်ဒီး ပယီၤသုးတဖၣ်အဘၢၣ်စၢၤ ဖဲန့ၣ်ပယီၤသုးတကပၤသံ၀ဲ(၆)ဂၤအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ ဖဲတနံၤအံၤဂီၤခီ ၅ နၣ်ရံၣ်ဃၣ်ဃၣ်အဆၢကတီၢ် ပယီၤသုးလၢအိၣ်ဆီလီၤသးဖဲမိၣ်ပလ့ၤကျဲဖးဒ့အံၤဒီး ကညီသုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ် ဖဲန့ၣ်ပယီၤသုးတကပၤသံ(၆)ဂၤႇဘၣ်ဒိ(၂)ဂၤဒီး ကညီသုးပာ်ဖှိၣ်တကပၤဘၣ်ဟ့ၣ်လီၤကွံာ်အသးသမူ(၁)ဂၤအဂ့ၢ်န့ၣ် ခ့ၣ်အဲၣ်ယူၣ်ဒူသထူၣ်ကီၢ်ရ့ၣ်ၦၤဘၣ်မူဘၣ်ဒါတဂၤစံး၀ဲန့ၣ်လီၤႉ “ဖဲတဂီၤညါအံၤ ၅ နၣ်တခီဃၣ်ဃၣ်န့ၣ်ပယီၤသုုးဒီးပသုးပာ်ဖှိၣ်ကရူၢ်တဖၣ်အဘၢၣ်စၢၤတၢ်ဒုးကဲထီၣ်လီၤႉ အ၀ဲသ့ၣ်တကပၤသံ၀ဲ(၆)ဂၤႇဘၣ်ဒိ(၂)ဂၤလီၤႉမ့မ့ၢ်ပၦၤတခီဘၣ်ဟ့ၣ်လီၤအသးသမူ(၁)ဂၤ”အဂ့ၢ်န့ၣ် ခ့ၣ်အဲၣ်ယူၣ်ဒူသထူၣ်ကီၢ်ရ့ၣ်ၦၤဘၣ်မူဘၣ်ဒါစံးဘၣ်ခ့ၣ်အဲးစံၣ်န့ၣ်လီၤႉ တၢ်ဒုးကဲထီၣ်ဘျီ၀ဲအံၤယံၤ၀ဲ(၄၀)မံးနံးဃၣ်ဃၣ်ဒီး တၢ်ဒုးကဲထီၣ်အကတီၢ်ခီဖျိပယီၤသုးခးလီၤကျိဖးဒိၣ်ကျိဖိတဖၣ်အဃိ လီၢ်က၀ီၤဖိဘၣ်ဒိ(၂)ဂၤဒီး ပယီၤသုးခးပိၢ်ထီၣ်ကျိသမံသမိးတၢ်လၢမိၣ်ပလ့ၤသ၀ီပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲအပူၤကွံာ်လါမးရှး ၂၇ သီအနံၤစ့ၢ်ကီး လၢသထူၣ်-ဘံလ့ကျဲမုၢ် စွ့ၤယီၤပၠၣ်သ၀ီကပၤန့ၣ် ခီဖျိပယီၤသုးခးနါစိၤကျိလၢကျဲဒီတဘိလၢကမျၢၢ်ဟးထီၣ်က့ၤလီၤအံၤအဃိ ဘၣ်သံ၀ဲဒၣ်ဖိသၣ်ပိာ်ခွါဖိမီၤကၠီၤစ့ၤမ့(၆)နံၣ်ဒီးမီၤညံၤညံၤစီၣ်ထဲၣ်(၉)နံၣ်တဖၣ်ကဲထီၣ်တ့ၢ်အသးစ့ၢ်ကီးအဂ့ၢ်န့ၣ်...

လါမးရှး ၃၁ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိတၢ်ဒုးကဲထီၣ်လၢမၠၣ်၀တံၣ်-ကီးတရံးအ့ရှါကျဲသီအဃိ ပနံာ်တၢ်ဖိတၢ်လံၤတဖၣ်တဟဲလီၤဆိကတီၢ်ကွံာ်အသးဒီး လၢမၠၣ်၀တံၣ်ႇကီးတရံးႇကြုၢ်တုဟီၣ်က၀ီၤအပူၤတဖၣ် တၢ်ဖိတၢ်လံၤအလုၢ်အၦ့ၤထီၣ်အါထီၣ်ခံဆးညါအဂ့ၢ်န့ၣ် ၦၤဆါကျးဖးဒိၣ်လၢလီၢ်က၀ီၤပူၤတဖၣ်စံး၀ဲန့ၣ်လီၤႉ တခီမ့ၢ်တၢ်ဒုးစးထီၣ်ကဲထီၣ်လၢမၠၣ်၀တံၣ်-ကီးတရံးအ့ရှါကျဲသီန့ၣ် ခီဖျိပနံာ်တၢ်ဖိတၢ်လံၤ ဘၣ်ဆိကတီၢ်ကွံာ်သးအဃိ လၢလီၢ်က၀ီၤဒူသ၀ီတဖၣ်အပူၤတၢ်ဖိတၢ်လံၤအလုၢ်အၦ့ၤဒိၣ်ထီၣ်ခံဆးညါဒီး ကျးဖးဒိၣ်သ့ၣ်တဖၣ်စ့ၢ်ကီးဆါတၢ်တန့ၢ်အါအါလၢၤအဂ့ၢ်န့ၣ် ကျးဖးဒိၣ်ကစၢ်လၢအိၣ်ကြုၢ်တုသ၀ီပူၤတဂၤ စံး၀ဲဒ်အံၤန့ၣ်လီၤႉ “တၢ်လုၢ်တၢ်ၦ့ၤဒုအၦ့ၤထီၣ်ဖးဒိၣ်ညါမီၤနီၤႉအပူၤကွံာ်စ့အကလီၢ်(၂၀)ကၠးန့ၣ်ကတြီၢ်၀ဲဒၣ်သိလ့ၣ်တခိၣ်ညါႉခဲအံၤနၦ့ၤအကလီၢ်(၅၀)ကၠးနါက့တၦဲၤသိလ့ၣ်တခိၣ်လၢၤဘၣ်ႇကတြီၢ်က့ၤထဲတ၀ာ်လီၤႉလၢညါခါသိပိအဘီန့ၣ်(၂)ကလးဘျဲၣ်လီၤႉခဲအံၤ(၄)ကလးဘျဲၣ်လံႉအပူၤကွံာ်ဒးဆံၣ်ၦဲၤၦဲၤထံကိန့ၣ်(၁၀၀၀)ကၠးလီၤႉခဲအံၤ(၂ႇ၅၀၀)ဘျဲၣ်လံလီၤႉအပူၤကွံာ်န့ၣ်ယကျးအံၤယဆါတၢ်န့ၢ်တနံၤ(၅)ကလီၢ်ဘျဲၣ်ညါႉခဲအံၤခီဖျိၦၤအိၣ်ဖဲသ၀ီပူၤတဖၣ်တဟဲၦ့ၤအီၣ်တၢ်လၢၤဘၣ်အဃိ တနံၤန့ၣ်ဆါန့ၢ်က့ၤထဲ(၂)ကလီၢ်ကၠးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်ဒုးကဲထီၣ်လၢဟီၣ်က၀ီၤပူၤအဃိ ကျဲတၢ်ဆဲးကျိးစ့ၢ်ကီးပတုာ်ကွံာ်အသးဒီး ပနံာ်တၢ်ဖိတၢ်လံၤလဲၤလီၤတအိၣ်လၢၤဘၣ်အဃိ တၢ်အီၣ်တၢ်အီႇတၢ်ဖိတၢ်လံၤအမဲာ်ညါဒးဆံၣ်သိအလုၢ်အၦ့ၤဘၣ်ဟဲထီၣ်၀ဲလၢဟီၣ်က၀ီၤအပူၤလီၤအဂ့ၢ်န့ၣ် ၦၤပနံာ်ကၤတၢ်ဖိလၢအအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢတဖၣ်စံး၀ဲန့ၣ်လီၤႉ ၦၤပနံာ်ကၤတၢ်ဖိလၢအိၣ်မၠၣ်၀တံၣ်၀့ၢ်တဂၤစံး၀ဲ“ခီဖျိပယီၤသုးဒီး(KNLA)တၢ်ဒုးကဲထီၣ်အဃိသိလ့ၣ်တီၣ်တၢ်ဖိတၢ်လံၤဒီးသိလ့ၣ်ဟံၣ်လၢအဟးထီၣ်က့ၤလီၤတဖၣ်အိၣ်ကတာ်ထီသးလၢကျဲပူၤႇတၢ်ဒွဲၣ်အူအီၣ်သိလ့ၣ်ကဲထီၣ်သးတပယူာ်ဃီလီၤႉ အဃိသိလ့ၣ်တဖၣ်က့ၤလီၤတဘူၣ်လၢၤဘၣ်ႉကၠီၣ်တဲၣ်စ့အလုၢ်အၦ့ၤနါက့ထီၣ်အဃိ ကၠီၣ်တဲၣ်တၢ်အီၣ်တၢ်အီတဖၣ်အၦ့ၤထီၣ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါကတီၢ်ခဲအံၤ ကၠီၣ်တဲၣ်စ့အလုၢ်အၦ့ၤစ့ၢ်ကီးထီၣ်ဒီး ခီဖျိကီၢ်ပယီၤစ့အလုၢ်အၦ့ၤလီၤႇကီၢ်ဆၢတၢ်အီၣ်တၢ်အီတၢ်ဖိတၢ်လံၤအၦ့ၤထီၣ်အဃိ လီၢ်က၀ီၤကမျၢၢ်တဖၣ်တၦ့ၤအီၣ်တၢ်ဒ်အပူၤကွံာ်အသိးလၢၤဘၣ်အဂ့ၢ်န့ၣ် ၦၤပနံာ်ကၤတၢ်ဖိလၢအိၣ်ကီၢ်ဆၢတဖၣ်စံး၀ဲန့ၣ်လီၤႉ

လါမးရှး ၃၀ သီႇ ၂၀၂၂ နံၣ်ႇ ခ့ၣ််အဲးစံၣ် ကတီၢ်ခဲအံၤခီဖျိဒုးယၤတၢ်ဖ့ၣ်ဆၢဟဲအိၣ်ထီၣ်၀ဲလၢမၠၣ်၀တံၣ်-ကီးတရံးအ့ရှါကျဲမုၢ်အဃိ သိလ့ၣ်တီၣ်ၦၤလဲၤတၢ်ဖိဒီးသိလ့ၣ်တီၣ်တၢ်ဖိတၢ်လံၤလၢကယၤအိၣ်ကတာ်ထီအသးလၢကျဲပူၤအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ စးထီၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်ပၢဆှၢတၢ်ကရူၢ် ထုးထီၣ်လံာ်ဒုသ့ၣ်ညါကမျၢၢ်လၢ စးထီၣ်ဖဲလါမးရှး ၂၇ သီ တၢ်ကပတုာ်ဆိဃာ်တၢ်ဟးထီၣ်က့ၤလီၤလၢမၠၣ်၀တံၣ်-ကီးတရံးအ့ရှါကျဲ၀ံၤအလီၢ်ခံ တၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်ဒီး တၢ်ဒွဲၣ်အူကမျၢၢ်အသိလ့ၣ်တုၤလၢတၢ်သံတၢ်ၦၢ်ဟဲအိၣ်ထီၣ်၀ဲဒၣ်န့ၣ်လီၤႉ ဖဲမဟါလါမးရှး ၂၉ သီအနံၤစ့ၢ်ကီး လၢမၠၣ်၀တံၣ်ကီးတရံးအ့ရှါကျဲသီ ကီးနွဲၢ်သ၀ီဒီးတီနီၢ်တိၤတကပၤန့ၣ် တၢ်ဒွဲၣ်အူအီၣ်သိလ့ၣ်ဟံၣ်(၂)ခိၣ်ဒီးသိလ့ၣ်တီၣ်တၢ်ဖိတၢ်လံၤ(၂)ခိၣ်အသိး ကမျၢၢ်သိလ့ၣ်ႇသိလ့ၣ်တီၣ်တၢ်ဖိတၢ်လံၤသ့ၣ်တဖၣ်ဂုၤက့ၤအလီၢ်ခံက့ၤကဒါဆူမၠၣ်၀တံၣ်ဒီးကီးတရံး၀့ၢ်တကပၤဒီးႇ သိလ့ၣ်အခိၣ်လၢအကယၤအိၣ်ကတာ်ထီိအသးလၢကျဲပူၤအဂ့ၢ်န့ၣ် လီၢ်က၀ီၤတၢ်ကစီၣ်တခါစံး၀ဲန့ၣ်လီၤႉ အ၀ဲစံး၀ဲလၢ“လၢမၠၣ်၀တံၣ်အ့ရှါကျဲအသီန့ၣ်(BGF)ဒီးပယီၤသုးကလၢၤလူၢ်တဖၣ်အိၣ်၀ဲလီၤႉ အ၀ဲသ့ၣ်အံၤလၢကမၤၦဲၤထီၣ်ကျိချံၦာ်သၣ်ႇသုးဂံၢ်ဘါအဂီၢ်သူ၀ဲဒၣ်ကမျၢၢ်သိလ့ၣ် အိၣ်ခိး၀ဲကျဲတၢ်ဘံၣ်တၢ်ဘၢအိၣ်မီၤနီၤႉ ခီဖျိတၢ်ဒုးကဲထီၣ်ဒီးကညီသုးကရူၢ်ဖဲကျဲမုၢ်ဖီခိၣ်အံၤအဃိ တအဲၣ်ဒိးလၢသိလ့ၣ်ကဟးထီၣ်က့ၤလီၤဘၣ်ႉ ဖဲစှၤသီအတီၢ်ပူၤအံၤတၢ်ခး၀ဲသိလ့ၣ်ႇ တၢ်ဒွဲၣ်အူအီၣ်သိလ့ၣ်ပၢၢ်တုၤလၢတၢ်သံတၢ်ၦၢ်ဟဲအိၣ်ထီၣ်အဃိတအဲၣ်ဒိးလၢသိလ့ၣ်ကဟးထီၣ်က့ၤလီၤဘၣ်”အဂ့ၢ်န့ၣ် စံး၀ဲန့ၣ်လီၤႉ ခီဖျိပယီၤသုးအံၤအိၣ်ဟဲထီၣ်၀ဲလၢအ့ရှါကျဲမုၢ်သီတကပၤဒီးသူ၀ဲကမျၢၢ်သိလ့ၣ်ဆှၢအါထီၣ်အၦၤလၢ၀ီၤလ့ၤ-သ့ၣ်ဘီဘိတကပၤအဃိ ကီးတရံးလီၢ်က၀ီၤ(KNLA)သုးပာ်ဖှိၣ်တဖၣ်အိၣ်ခိးခးအ၀ဲသ့ၣ်ကိးမုၢ်နံၤဒဲးအသိး လၢကၠီးခဲးကျဲႇဘျၢၣ်ဒိၣ်သ၀ီကျဲတကပၤန့ၣ်စ့ၢ်ကီးခီဖျိတၢ်ဒုးကဲထီၣ်၀ဲလၢပယီၤသုးကျိၤတဖၣ်ဒီး(KNLA)သုးပာ်ဖှိၣ်တဖၣ်အဘၢၣ်စၢၤကိးမုၢ်နံၤဒဲးအဃိ လီၢ်က၀ီၤဖိလၢအကထိဘၣ်လဲၤဃ့ၢ်အိၣ်ကဒုအသးလၢသူမှဲကျိကၢၢ်နံၤန့ၣ်လီၤႉ ဖဲစှၤသီအတီၢ်ပူၤခီဖျိတၢ်ဒုးကဲထီၣ်လၢအ့ရှါကျဲသီႇကျဲလီၢ်လံၤႇသ့ၣ်ကါညံၣ်နီၣ်ဒီးကွ့ကလ့သ၀ီတကပၤအဃိ လီၢ်က၀ီၤသ၀ီဖိတဖၣ်ဘၣ်လဲၤဃ့ၢ်အိၣ်ကဒုအသးလၢယွၤသ့ၣ်ကိႇဖါခၠီသ၀ီသီခါဖၠၣ်ကရၢၢ်ပူၤအဂ့ၢ်န့ၣ် ၦၤလၢအမၤစၢၤၦၤလီၢ်အိၣ်ကဒုတဖၣ်စံး၀ဲန့ၣ်လီၤႉ လၢန့ၣ်အမဲာ်ညါခီဖျိတၢ်ဒုးကဲထီၣ်လၢကီးတရံးကလံၤထံးႇကၠဲးဒိႇကၠၤအ့စ့ၣ်ကၠံဟီၣ်က၀ီၤတကပၤစ့ၢ်ကီးအဃိ လီၢ်က၀ီၤသ၀ီဖိတဖၣ်ဘၣ်ဟးစံၣ်ပလဲာ်သးအဂ့ၢ်န့ၣ်...

လါမးရှး ၂၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ မၠၣ်၀တံၣ်ကလံၤထံး သ့ၣ်ဘီဘိသ၀ီကပၤ ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်ခံသီအတီၢ်ပူၤ ပယီၤသုးတကပၤသံအဂၤ(၈၀)ဃၣ်ဃၣ်ဒီးမၤန့ၢ်ကျိချံၦာ်သၣ်အါအါဂီၢ်ဂီၢ်အဂ့ၢ်န့ၣ် (KNLA)သုးပာ်ဖှိၣ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဖဲလါမးရှး ၂၇ သီအနံၤ ပယီၤသုး-တိၤ(၄၄)ဒီးမၠၣ်၀တံၣ်သုးခိးကီၢ်ဆၢ(BGF)သုးပာ်ဖှိၣ်အဂံၢ်ဘါ(၃၀၀)ဘျဲၣ် ဟဲထီၣ်မၤ၀ဲတၢ်ထီၣ်ဒုးလၢမၠၣ်၀တံၣ်-၀ီၤလ့ၤကျဲ ဘျၢၣ်ဒိၣ်သ၀ီကပၤဒီီး ဖဲလါမးရှး ၂၇ သီန့ၣ် တၢ်ဒုးကဲထီၣ်၀ဲ(၁)ဘျီႇ ၂၈ သီန့ၣ်ကဲထီၣ်(၂)ဘျီအဂ့ၢ်န့ၣ် (KNLA)သုးပာ်ဖှိၣ် ၦၤဘၣ်မူဘၣ်ဒါစံး၀ဲန့ၣ်လီၤႉ အ၀ဲစံး၀ဲလၢ“ဖဲမဟါန့ၣ်တၢ်ဒုးကဲထီၣ်ကဒီးမီၤနီၤႉခီဖျိအ၀ဲသ့ၣ်တဂုၤကဒါလီၢ်ခံဟဲထီၣ်အါထီၣ်အဃိ တၢ်ဒုးက့ၤကဲထီၣ်ကဒါလီၤႉအ၀ဲသ့ၣ်သံကအိၣ်လၢ(၁၅)ဂၤညါႇတၢ်ဒုးန့ၣ်ကဲထီၣ်လၢမုၢ်နၤခီအဃိပတလဲၤထၢဘၣ်ကျိဘၣ်ႉတၢ်ဒုးကဲထီၣ်လၢခံသီအတီၢ်ပူၤအံၤအ၀ဲသ့ၣ်သံကအိၣ်အဂၤ(၈၀)ဃၣ်ဃၣ်ညါလီၤႉပမၤန့ၢ်၀ဲဒၣ်ကျိချံၦာ်သၣ်ဒီးတၢ်ဆဲးကျိးစဲးဖီကဟၣ်တၢ်ဖိတၢ်လံၤတဖၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်ဒုးကဲထီၣ်ဒီးပယီၤသုးကဘီယူၤဟဲထီၣ်ခးလီၤတၢ်အဃိ ဘျၢၣ်ဒိၣ်သ၀ီဒီးသ၀ီလၢအိၣ်ဘူးဖဲန့ၣ်သ့ၣ်တဖၣ် လီၢ်က၀ီၤဖိ(၂၀၀၀)ဘျဲၣ်ဘၣ်လဲၤဃ့ၢ်ထီၣ်၀ဲဆူကီၢ်ကၠၠီၣ်တဲၣ်တကပၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၆)ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ

လါမးရှး ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၂၈ သီ ဂီၤခီ ၈း၂၀ မံးနံးအဆၢကတီၢ် လၢမၠၣ်၀တံၣ်-ကီးတရံးအ့ရှါကျဲမုၢ်ခိၣ်န့ၣ် တၢ်ခး၀ဲ(ပရိၤဘီၣ်-probox )သိလ့ၣ်တခိၣ်လၢအအိၣ်ဟဲက့ၤလီၤလၢမၠၣ်၀တံၣ်တကပၤဒီး ဖဲန့ၣ်ပိာ်ခွါလၢအိၣ်သိလ့ၣ်ပူၤတဂၤသံကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤလၢအသံလၢတၢ်ကဲထီၣ်သးအပူၤတဂၤအံၤအိၣ်၀ဲဒၣ်လၢမီၣ်လမၠဲၣ်ဒီး ကတီၢ်ခဲအံၤၦၤသံအစိၣ်အံၤတၢ်က့ၤဆှၢ၀ဲဆူကီးတရံးတၢ်ဆါဟံၣ်လံအဂ့ၢ်န့ၣ် သ့ၣ်ညါဘၣ်လၢကီးတရံး၀့ၢ််ပလဲဖၠူၤတၢ်တိစၢၤမၤစၢၤကရူၢ်အအိၣ်န့ၣ်လီၤႉ တကးဒံးဘၣ်လၢန့ၣ်အမဲာ်ညါဖဲတနံၤအံၤဂီၤခီအဆၢကတီၢ်စ့ၢ်ကီး တၢ်ခးကဒီးသိလ့ၣ်တခိၣ်လၢအိၣ်ဟဲထီၣ်လၢကီးတရံးတကပၤဒီး တၢ်ဘၣ်ဒိဘၣ်ထံးတအိၣ်၀ဲနီီတမံၤဘၣ်အဂ့ၢ်န့ၣ် သ့ၣ်ကါညံၣ်နီၣ်တၢ်တိစၢၤမၤစၢၤကရူၢ် စံး၀ဲန့ၣ်လီၤႉ “ကျဲတဘိအံၤ(ခ့ၣ်အဲၣ်ယူၣ်)ထုးထီၣ်ဃာ်လံာ်လၢတဘၣ်ဟးထီၣ်က့ၤလီၤဘၣ်အသိး လၢပယီၤသုးတကပၤစ့ၢ်ကီးအိၣ်ခူသူၣ်အိၣ်၀ဲအဃိ မ့ၢ်ဖဲလဲၣ်တကပၤခး၀ဲလဲၣ်န့ၣ်တဲဘၣ်ကီ”အဂ့ၢ်န့ၣ် လီၢ်က၀ီၤဖိတဂၤစံး၀ဲန့ၣ်လီၤႉ ဖဲအပူၤကွံာ်လါမးရှး ၂၆ သီအနံၤ ခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်ပၢဆှၢတၢ်ကရူၢ် ထုးထီၣ်လံာ်ဒုးသ့ၣ်ညါဃ့ကညးကမျၢၢ်လၢစးထီၣ်လါမးရှး ၂၇ သီအနံၤန့ၣ် ကမျၢၢ်တဖၣ်ကပတုာ်ဆိဃာ်ပနံာ်တၢ်ကူၣ်လဲၤမၤကၤဒီးတၢ်ဟးထီၣ်က့ၤလီၤလၢမၠၣ်၀တံၣ်-ကီးတရံးအ့ရှါကျဲဒီးမၠၣ်၀တံၣ်-၀ီၤလ့ၤကျဲတဖၣ်ဒံးန့ၣ်လီၤႉ ဒ်န့ၣ်အသိးဖဲမဟါလါမးရှး ၂၈ သီအနံၤစ့ၢ်ကီး လၢမၠၣ်၀တံၣ်-ကီးတရံးအ့ရှါကျဲ တီနီၢ်ထံလီၤဆှူကပၤ...

လါမးရှး ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါမးရှး ၂၇ သီအနံၤ တၢ်ဒုးကဲထီၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ(မၠၣ်၀တံၣ်ကလံၤထံး)ကၠီးခဲး-သ့ၣ်ဘီဘိသ၀ီဘၢၣ်စၢၤ ဘျၢၣ်ဒိၣ်သ၀ီပူၤဒီး ဖဲန့ၣ်ပယီၤသုးတကပၤသံ၀ဲ(၆၁)ဂၤႇဘၣ်ဒိ(၁၅)ဂၤအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အိၣ်ခိးခးပယီၤသုုးကျိၤ(၃၀၀)ဘျဲၣ်လၢတၢ်ဘၢၣ်စၢၤဒီး ဖဲန့ၣ်ခီဖျိအ၀ဲသ့ၣ်ၦၤသံအါအဃိက့ၤဂုၤကဒါအလီၢ်ခံလၢဘျၢၣ်ဒိၣ်သ၀ီကျဲႇကၠီးခဲသ၀ီတကပၤအဂ့ၢ်န့ၣ် (KNLA)သုးပာ်ဖှိၣ်သုးခိၣ်လၢအပၣ်ဃုာ်တၢ်ဒုးပူၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ “ပယီၤသုးသံ၀ဲဒၣ်(၆၁)ဂၤႇဘၣ်ဒိ၀ဲ(၁၅)ဂၤလီၤႉဖဲပလဲၤမၤရှဲလဲတၢ်လီၢ်အခါန့ၣ်ပထံၣ်အစိၣ်(၄)ဂၤလီၤႉအစိၣ်လၢအဂၤတဖၣ်န့ၣ်ဟဲဟံ၀ဲဖဲမုၢ်နၤလီၤႉဖဲမဟါန့ၣ်အစိၣ်ရဲၣ်လီၤသးလၢပမဲာ်ညါတဂၤတဂၤလီၤႉနၤခးယၤခးအဃိပလဲၤထၢတဘူၣ်ဘၣ်ႇအ၀ဲသ့ၣ်နါက့ဟဲထၢ၀ဲတဘူၣ်ဘၣ်မီၤနီၤႉၦၤသံစိၣ်တဖၣ်န့ၣ်ဟဲဟံ၀ဲဒၣ်ဖဲမုၢ်နၤလီၤမီၤနီၤႉလၢပ၀ဲဒၣ်တကပၤတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲတဂီၤညါအံၤတၢ်လဲၤထီၣ်မၤရှဲလဲတၢ်လီၢ်အဆၢကတီၢ် တၢ်မၤန့ၢ်၀ဲကျိစနဲၣ်ဖၢၤ(၁)ခိၣ်ႇ(၆၀-မမ)တခိၣ်,(M1)တခိၣ်ႇ(M2)တခိၣ်ဃုာ်ဒီးကျိချံၦာ်သၣ်အါအါဂီၢ်ဂီၢ်ဒီး တၢ်မၤရှဲကွံာ်ပယီၤသုးအစိၣ်တဖၣ်အဂ့ၢ်န့ၣ် သုးခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ တၢ်ဒုးကဲထီၣ်ဖဲမဟါခီဖျိတၢ်သံတၢ်ဘၣ်ဒိဘၣ်ထံးအါအဃိ သုးမီၤစိရိၤကဘီယူၤ(၂)ဘ့ၣ်ဟဲခးလီၤစၢၤတၢ်၀ံၤ ပယီၤသုးကျိၤတဖၣ်က့ၤဂုၤကဒါအလီၢ်ခံလၢကၠီးခဲသ၀ီတကပၤဒီး တုၤလၢတနံၤအံၤမုၢ်ထူၣ်န့ၣ်ပယီၤသုးကျိၤဟဲထီၣ်တအိၣ်ဒံးဘၣ်အဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲန့ၣ်လီၤႉ ခီဖျိတၢ်ဒုးကဲထီၣ်ဒိၣ်ဒိၣ်မုၢ်မုၢ်အဃိ ကၠီးခဲးႇဘျၢၣ်ဒိၣ်ႇသ့ၣ်ဘီဘိႇဆိၣ်စံမၠဲၣ်အခိၣ်အဃၢၤလီၢ်က၀ီၤဖိ(၂၀၀၀)ဃၣ်ဃၣ် ဘၣ်လဲၤဃ့ၢ်အိၣ်ကဒုသးတစိၢ်တလီၢ်လၢကီၢ်ကၠီၣ်တဲၣ်တကပၤဒီး ဖဲတနံၤအံၤဂီၤခီန့ၣ်ခီဖျိကၠီၣ်တဲၣ်သုးတဖၣ်တဲဘၣ်ၦၤဃ့ၢ်တၢ်ဒုးဖိတဖၣ်လၢကက့ၤဃီၤဆူကီၢ်ပယီၤတကပၤအဃိ ၦၤဃ့ၢ်တၢ်ဒုးဖိသ့ၣ်တဖၣ်ကက့ၤလၢအလီၢ်အကျဲအဂီၢ်တၢ်ကီတၢ်ခဲအိၣ်၀ဲအဂ့ၢ်န့ၣ် ၦၤဃ့ၢ်တၢ်ဒုးဖိတဖၣ်စံး၀ဲန့ၣ်လီၤႉ “ဖဲမဟါတၢ်ဒုးကဲထီၣ်လၢၦၤလီၢ်အိၣ်ကဒုအိၣ်အလီၢ်ႇခီဖျိမ့ၣ်ပိၢ်လီၤတဲာ်လၢကီၢ်ကၠီၣ်တဲၣ်ပူၤအဃိ ကၠီၣ်တဲၣ်သုးတဖၣ်တအဲၣ်ဟးထီၣ်ဟးလီၤဘၣ်ႉပလဲၤနီၤလီၤၦၤဃ့ၢ်တၢ်ဒုးဖိတဖၣ်အမ့ၤဘိၣ်ႇ ထံဘူ၀ံၤဒီးမၢ ပဟးထီၣ်ချ့ချ့လီၤႉတဟ့ၣ်ဒုးထီၣ်ၦၤဃ့ၢ်တၢ်ဒုးဖိတဖၣ်လၢကၠီၣ်တဲၣ်တကပၤဘၣ်ႉတဲ၀ဲလၢတၢ်ဒုးမ့ဂၢၢ်ထီၣ်န့ၣ်မၢက့ၤခီဃီၤလၢန့ၣ်တကပၤမီၤနီၤႉတၢ်ဒုးမ့ဆဲးကဲထီၣ်န့ၣ်ၦၤလီၢ်အိၣ်ကဒုဖိတဖၣ်ကဟဲအါထီၣ်ႇတၢ်မၤစၢၤအကျဲမ့ဃံးထီၣ်ဒု လၢၦၤလီၢ်အိၣ်ကဒုဖိတဖၣ်အဂီၢ်တၢ်အိၣ်တၢ်ဆိးႇတၢ်အီၣ်တၢ်အီအဂီၢ်ကကီခဲထီၣ်၀ဲလီၤ”အဂ့ၢ်န့ၣ် ၦၤလၢအမၤစၢၤၦၤလီၢ်အိၣ်ကဒုဖိတဖၣ်စံး၀ဲန့ၣ်လီၤႉ ခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤ ခီဖျိတၢ်ဒုးကဲထီၣ်လၢပယီၤသုးဒီးဟီၣ်က၀ီၤ(KNLAႇKNDO) သုးပာ်ဖှိၣ်တဖၣ်အဘၢၣ်စၢၤလၢတၢ်လီၢ်အါတီၤအဃိ လီၢ်က၀ီၤပူၤသ၀ီအဖျၢၣ်(၃၀)ဘျဲၣ်...

လါမးရှး ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၂၇ သီ ဂီၤခီအဆၢကတီၢ် လၢကညီကီၢ်စဲၣ် မၠၣ်၀တံၣ်-ကီးတရံးအ့ရှါကျဲ တီနီၢ်ထံလီၤဆှူကပၤ တၢ်ဒွဲၣ်အူအီၣ်သိလ့ၣ်တီၣ်တၢ်ဖိတၢ်လံၤ(၂)ခိၣ်ဒီး ကတီၢ်အံၤတၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “တဂီၤအံၤဂီၤခီဂီၤဂီၤန့ၣ်(၆)ပၣ်သိလ့ၣ်တခိၣ်ဒီး(၁၂)ပၣ်သိလ့ၣ်တခိၣ်လၢအအိၣ်ဟဲလီၤလၢမၠၣ်၀တံၣ်တကပၤ တၢ်ဒွဲၣ်အူအီၣ်ကွံာ်၀ဲဖဲအ့ရှါကျဲမုၢ်တီနီၢ်ထံလီၤဆှူကပၤလီၤ”အဂ့ၢ်န့ၣ် တၢ်တိစၢၤမၤစၢၤၦၤဂ့ၢ်၀ီကရၢဖိလၢအမၤစၢၤတၢ်ဖဲန့ၣ်တဂၤစံး၀ဲန့ၣ်လီၤႉ တၢ်ဒွဲၣ်အူအီၣ်သိလ့ၣ်တီၣ်တၢ်ဖိတၢ်လံၤ(၂)ခိၣ်ကဲထီၣ်သး၀ံၤအလီၢ်ခံ တၢ်ဒုးကဲထီၣ်၀ဲလၢတီနီၢ်ထံလီၤဆှူကီးတရံးတကပၤဒီးကတီၢ်ခဲအံၤလၢအ့ရှါကျဲမုၢ်ခိၣ်န့ၣ်သိလ့ၣ်ဟးထီၣ်က့ၤလီၤစှၤလီၤ၀ဲအဂ့ၢ်န့ၣ် လီၢ်က၀ီၤဖိတဂၤစံး၀ဲအသိးသ့ၣ်ညါဘၣ်န့ၣ်လီၤႉ တကးဒံးဘၣ်ဖဲမဟါလါမးရှး ၂၆ သီ ဟါခီအဆၢကတီၢ်စ့ၢ်ကီး ပယီၤသုးခးလီၤကျိဖးဒိၣ်ဆူအ့ရှါကျဲမုၢ်မၠၣ်၀တံၣ်တကပၤဒံးန့ၣ်လီၤႉ ဖဲမဟါလါမးရှး ၂၆ သီအနံၤစ့ၢ်ကီး ခ့ၣ်အဲၣ်ယူၣ်(သုးက့ ၆)ဒီးဒူပျာ်ယာ်ကီၢ်ရ့ၣ်ပၢဆှၢကရူၢ်တဖၣ် ထုးထီၣ်လံာ်ဃ့ကညးကမျၢၢ်လၢကပတုာ်ကွံာ်ပနံာ်တၢ်ကူၣ်လဲၤမၤကၤဒီးတၢ်ဟးထီၣ်က့ၤလီၤတစိၢ်တလီၢ်လၢမၠၣ်၀တံၣ်-ကီးတရံးအ့ရှါကျဲ၀ံၤအလီၢ်ခံ ဖဲတနံၤအံၤဂီၤခီန့ၣ်သိလ့ၣ်တီၣ်တၢ်ဖိတၢ်လံၤဒီးသိလ့ၣ်တီၣ်ဆှၢၦၤလဲၤက့ၤတၢ်ဖိတဖၣ် လ့ၢ်ထီၣ်လ့ၢ်လိၤလီၤစှၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးဖဲတနံၤအံၤဂီၤခီ ၁၁ နၣ်ရံၣ်ဃၣ်ဃၣ်အဆၢကတီၢ် ပယီၤသုးမီၤစိရိၤဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်ဘၢၣ်စၢၤတၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢမၠၣ်၀တံၣ်ကလံၤထံးဘျၢၣ်ဒိၣ်သ၀ီတကပၤအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ

လါမးရှး ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ထုးထီၣ်ကံွာ်၀ဲသုးခိၣ်(၃)ဂၤလၢမူဒါလီၢ်လးပူၤအဂ့ၢ်န့ၣ် (DKBA)လီၢ်ခၢၣ်သးပၢဆှၢကမံးတံာ်ထုးထီၣ်ဘိးဘၣ်ရၤလီၤလံာ်တၢ်နဲၣ်လီၤဖဲလါမးရှး ၂၄ သီအနံၤန့ၣ်လီၤႉ ဒ်လံာ်တၢ်နဲၣ်လီၤတၢ်ကလုၢ်ပူၤအသိး သုးခိၣ်(၃)ဂၤလၢအမ့ၢ်(၉၀၈)သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤဖုချၢၣ်(ကိး)စီၤနီၢ်ခုႇ ကျိၣ်ထူဘီလီၢ်ခၢၣ်သးပၢဆှၢရဲၣ်ကျဲၤဘံၣ်ဘၢသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ်စီၤ၀့ၤကျၢၤမူ ဒီး သုးခိၣ်ဒိၣ်ဖိစီၤကီၢ်အဲၣ်ဒိၣ်တဖၣ်အံၤ ခီဖျိအ၀ဲသ့ၣ်မၤကမၣ်သုးတၢ်သိၣ်တၢ်သီတၢ်ဘျၢသဲစး(အဆၢဖိ-၁၃)အဃိ စးထီၣ်မုၢ်နံၤလၢတၢ်ထုးထီၣ်လံာ်တၢ်ထုးထီၣ်ကွံာ်အ၀ဲသ့ၣ်လၢတၢ်ကရၢကရိအပူၤလံအဂ့ၢ်န့ၣ် ပာ်ဖျါ၀ဲန့ၣ်လီၤႉ ဘၣ်ဃးတၢ်ထုးထီၣ်လံာ်တၢ်နဲၣ်လီၤတၢ်ကလုၢ်အံၤ(DKBA)သုးခိၣ်လၢတအဲၣ်ဒိးပာ်ဖျါအမံၤတဂၤစံး၀ဲ“လံာ်ဒုအနီၢ်ကီၢ်လီၤႉ(၉၀၈)သုးရ့ၣ်ခိၣ်ဖုချၢၣ်သ့ၣ်ညါ၀ဲလီၤတံၢ်လီၤဆဲးလီၤႉတၢ်ဂ့ၢ်တၢ်ကျိၤလီၤတံၢ်လီၤဆဲးခီဒုတသ့ၣ်ညါဘၣ်”အဂ့ၢ်န့ၣ် ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ (၉၀၈)သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ်စီၤဖုချၢၣ်(ကိး)စီၤနီၢ်ခုအံၤ ဖဲအပူၤကွံာ်လါမးရှး ၂၁ သီ တၢ်လဲၤထီၣ်မၤန့ၢ်မၠၣ်၀တံၣ်ကလံၤထံးမီခံပယီၤသုးကလၢၤအခါန့ၣ် အ၀ဲပၣ်ဃုာ်၀ဲဒၣ်လၢ(KNLA)သုးပာ်ဖှိၣ်အကျါတဂၤန့ၣ်လီၤႉ ဒ်တၢ်ကစီၣ်ဟးထီၣ်လၢ(DKBA)ကရူၢ်ကရၢပူၤအသိးန့ၣ် ဖဲအပူၤကွံာ်စှၤသီအခါ ပယီၤသုး(ခလရ-၂၇၅)သုးရ့ၣ်ခိၣ် စဲစီၣ်မိထိ ကိးထံၣ်၀ဲ(DKBA)တၢ်ရ့လိာ်မုာ်လိာ်၀ဲၤဒၢးၦၤဘၣ်မူဘၣ်ဒါတဖၣ်ဒီး ဖဲန့ၣ်စဲစီၣ်မိထိစံးဘၣ်(DKBA)ၦၤဘၣ်မူဘၣ်ဒါတဖၣ်လၢကအိၣ်ဆၢထၢၣ်ဂၢၢ်ဂၢၢ်ကျၢၤကျၢၤႇကပာ်ဖှိၣ်မၤသကိးတၢ်ဒီးအ၀ဲသ့ၣ်အဂ့ၢ်ဒီး တကးဒံးဘၣ်တဲပျံၤတဲဖုး၀ဲလၢမ့တပာ်ဖှိၣ်မၤသကိးတၢ်ဒီးအ၀ဲသ့ၣ်ဘၣ်န့ၣ် တဟ့ၣ်၀ဲတၢ်အုၣ်ကီၤလၢတၢ်ကရၢကရိအမုၢ်ကျိၤ၀ဲၤကွာ်တၢ်ဖံးတၢ်မၤဒီးသုကလၢၤတဖၣ်ဘၣ်အဂ့ၢ်န့ၣ် စံး၀ဲန့ၣ်လီၤႉ