ခ့ၣ်အဲးစံၣ် – KIC News

လါမးရှး ၂၇ သီ၊ ၂၀၂၂ နံၣ်၊ ခ့ၣ်အဲးစံၣ် ဖဲစှၤသီအတီၢ်ပူၤခီဖျိပယီၤသုးအံၤပျိာ်လဲအသးဆူကမျၢၢ်ဆှၢအါထီၣ်သုးဂံၢ်ဘါဆူခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤအဃိ စးထီၣ်ဖဲလါမးရှး ၂၇ သီ ကမျၢၢ်တဖၣ်ကပတုာ်ကွံာ်ပနံာ်တၢ်ကူၣ်လဲၤမၤကၤဒီးတၢ်ဟးထီၣ်က့ၤလီၤတစိၢ်တလီၢ်လၢမၠၣ်၀တံၣ်-ကီးတရံးအ့ရှါကျဲဒီး မၠၣ်၀တံၣ်-၀ီၤလ့ကျဲအဂ့ၢ်န့ၣ် KNU(သုးက့ ၆)သုးရ့ၣ်ဒီးဒူပျာ်ယာ်ကီၢ်ရ့ၣ်ပၢဆှၢကရူၢ်တဖၣ် ထုးထီၣ်လံာ်ဃ့ကညး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ လံာ်တၢ်ပာ်ဖျါအပူၤစံး၀ဲလၢ စးထီၣ်ဖဲအပူၤကွံာ်လါဒံၣ်စ့ဘၢၣ် ၁၅ သီအနံၤ ခီဖျိတၢ်ဒုးကဲထီၣ်လၢမၠၣ်၀တံၣ်ကလံၤထံးလ့က့ၣ်ကိာ်ဟီၣ်က၀ီၤပူၤအဃိ ဒ်သိးလီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်ကက့ၤအိၣ်ဘၣ်လၢအဒူသ၀ီမုာ်မုာ်ခုၣ်ခုၣ်အဂီၢ် ဖဲလါမးရှး ၇ သီအနံၤ(ခ့ၣ်အဲၣ်ယူၣ်)ဆှၢထီၣ်လံာ်ဆူသုးမီၤစိရိၤမုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်အအိၣ်ဒီးပယီၤသုးလၢအိၣ်ဖဲလီၢ်က၀ီၤအံၤတဖၣ်ကဟးထီၣ်ကွံာ်လၢ(၃)သီအတီၢ်ပူၤန့ၣ်လီၤႉ ဘၣ်ဆၣ်ဖဲအပူၤကွံာ်လါမးရှး ၁၀ သီအနံၤ ပယီၤသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢလ့က့ၣ်ကိာ်ဟီၣ်က၀ီၤပူၤ တကးဒံးဘၣ်ခးလီၤကျိဖးဒိၣ်ကျိဖိတဖၣ်ဆူပျီပူၤဒီး ကတီၢ်ခဲအံၤပယီၤသုးတဖၣ်ဆိးကါ၀ဲမၠၣ်၀တံၣ်-ကီးတရံးအ့ရှါကျဲမုၢ်ဒီးမၠၣ်၀တံၣ်-၀ီၤလ့ၤကျဲ ဆှၢအါထီၣ်အသုးဂံၢ်ဘါလၢ KNU ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤန့ၣ်လီၤႉ လၢတၢ်န့ၣ်အဃိ KNU(သုးက့ ၆)ဒီးသိၣ်မှံၤသုးပာ်ဖှိၣ်တဖၣ်အဂီၢ်ကဲထီၣ်၀ဲဒၣ်တၢ်တၤတၢ်ဖးဒိၣ်ညါဒီး တၢ်ကီတၢ်ခဲလၢကမျၢၢ်ဘၣ်လဲၤခီဖျိ၀ဲတဖၣ်အံၤပဒိသူၣ်ဒိသးနၢ်ပၢၢ်ဘၣ်ဆၣ် စးထီၣ်ဖဲတနံၤအံၤလါမးရှး ၂၇ သီအနံၤန့ၣ်...

လါမးရှး ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးမ့တဟးထီၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤဘၣ်န့ၣ်ကလဲၤဒ်တၢ်တၢၣ်ပီၣ်တဲသကိးအကျဲတသ့ဘၣ်အဂ့ၢ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢစံး၀ဲန့ၣ်လီၤႉ ဒ်သိးခ့ၣ်အဲၣ်ယူၣ်ကနုာ်လီၤပၣ်ဃုာ်လၢဟီၣ်က၀ီၤတၢ်တၢၣ်ပီၣ်တဲသကိးပူၤအဂီၢ် ဖဲလါမးရှး ၂၃ သီအနံၤ ဘၣ်ဃးသုးကီၣ်ကးကီၢ်စဲၣ်ကိတိာ်ခိၣ်ကျၢၢ်ခၢၣ်စးဘံၣ်ဘၢဒီးကီၢ်ဆၢဂ့ၢ်၀ီကိတိာ်သုးခိၣ်ဒိၣ်စိမၠိမ့နီၤဆှၢထီၣ်လံာ်လၢဖၣ်အၣ်၀့ၢ်(ခ့ၣ်အဲၣ်ယူၣ်)လီၢ်ခၢၣ်သးဒီးသုးက့တၢ်ရ့လိာ်မုာ်လိာ်၀ဲၤဒၢးအအိၣ်အဖီခိၣ် ခ့ၣ်အဲၣ်ယူၣ်-ထံဂုၤကီၢ်ဂၤ၀ဲၤကျိၤခိၣ် ပဒိၣ်စီၤတီနံက့ၤခီၣ်ဆၢစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပတဲဃာ်လၢပမၢဟးထီၣ်က့ၤဖဲန့ၣ်ပၦၤဒူဖိသ၀ီဖိကဟဲက့ၤအိၣ်လၢအဟံၣ်အဃီႇနတဲထဲန့ၣ်၀ံၤအ၀ဲသ့ၣ်ဆှၢအါထီၣ်အသုးလီၤႉတဲခီလၢတၢ်ပတုာ်တၢ်ခးဆှၢထီၣ်အသုးမၢ်မၢ်လီၤႉဒီးဒွဲၣ်အူဒူသ၀ီမၤသံမၤ၀ီကမျၢၢ်သ့ၣ်တဖၣ် ဒီးတဂီၤညါအံၤလီၤခးလီၤကျိဖးဒိၣ်ၦၤသ၀ီဖိဘၣ်သံကလီလီဒ်အံၤလီၤႉ တၢ်သ့ၣ်တဖၣ်အံၤတမၤပတုာ်၀ဲနီတဘျီဘၣ်ႉဟဲတဲ၀ဲလၢတၢ်ပတုာ်တၢ်ခးန့ၣ်တၢ်ဆိမိၣ်ကသ့ဒ်လဲၣ်ႉတကးဒံးဘၣ်တၢ်ဒုးတၢ်ယၤအံၤတမ့ၢ်ကဲထီၣ်ထဲလၢပဟီၣ်က၀ီၤအပူၤဘၣ်ႉကဲထီၣ်ထံကီၢ်ဒီတဘ့ၣ်ညါလီၤႉနကလဲၤမၤဘှ့ၣ်မၤဘှီၣ်ဖဲန့ၣ်တက့ဖိႇနအိၣ်ထံကီၢ်တဘ့ၣ်ဃီနကလဲၤမၤဖဲန့ၣ်တက့ဖိကသ့ဧါ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ သုးကီၣ်ကးအလံာ်ဒုးသ့ၣ်ညါအပူၤစံး၀ဲလၢ ဒ်သိးတၢ်ဒုးသုတကဲထီၣ်လၢကီၢ်စဲၣ်အပူၤတဂ့ၤအဂီၢ် ခီဖျိတၢ်ဒုးအိၣ်ထီၣ်ဟီၣ်က၀ီၤတၢ်တၢၣ်ပီၣ်တဲသကိးကရူၢ်လံအဃိ ခ့ၣ်အဲၣ်ယူၣ်အံၤကနုာ်လီၤပၣ်ဃုာ်ပၣ်ဂီၢ်လၢကရူၢ်အပူၤဒီး ၦၤလၢအကနုာ်လီၤပၣ်ဃုာ်တဖၣ်ကတီၣ်ဖျါထီၣ်မံၤစရီအဂ့ၢ်န့ၣ် ပာ်ဖျါ၀ဲန့ၣ်လီၤႉ ဘၣ်ဃးသုးကီၣ်ကးဘံၣ်ဘၢဒီးကီၢ်ဆၢဂ့ၢ်၀ီကိတိာ်ဆှၢထီၣ်လံာ်တၢ်ဂ့ၢ်အံၤကညီပိာ်မုၣ်ကရၢ(KWO)အနဲၣ်ရွဲၣ်နီၢ်ကညီဖီစ့ၢ်ကီးစံး၀ဲလၢ“ဆၢကတီၢ်ခဲအံၤပ၀ဲကလုာ်ဒူၣ်ခဲလၢာ်ကဘၣ်အိၣ်ဃူအိၣ်ဖိးလီၤႉညီနုၢ်န့ၣ်အ၀ဲကကိးထံၣ်လိာ်သးဘျီဒုန့ၣ်ကမၢနပတုာ်တၢ်ခးလီၤႉအတၢ်ကူၣ်တရံးသ့ၣ်တဖၣ်အိၣ်ထီဘိလီၤႉ ပ၀ဲပကဲဂံၢ်ခီၣ်ထံးတၢ်ကရၢကရိအံၤတမ့ၢ်ပတအဲၣ်တၢ်မုာ်တၢ်ခုၣ်ဘၣ်န့ၣ်တမ့ၢ်ဘၣ်ႉပအဲၣ်လီၤဘၣ်ဆၣ်သနါက့တၢ်မုာ်တၢ်ခုၣ်လၢကအိၣ်၀ဲဒၣ်လၢသုးမီၤစိရိၤတဖုအံၤအတၢ်တီခိၣ်ရိၣ်မဲအပူၤန့ၣ်ကဲထီၣ်သးတသ့လ့ၤတက့ၤဘၣ်န့ၣ်ယထံၣ်ဒ်န့ၣ်လီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ ဒ်သိးကညီကီၢ်စဲၣ်ပူၤကလုာ်ဒူၣ်ဖီၣ်စုက၀ဲၤကရၢဖိဒီးအဟံၣ်ဖိဃီဖိတၢ်လုၢ်အီၣ်နီၣ်ခိသးသမူႇဆူၣ်ချ့ႇကူၣ်သ့ဒီး တၢ်ကဘှါဆှဲသကိးတၢ်မုာ်တၢ်ခုၣ်အတၢ်ဖံးတၢ်မၤလၢကီၢ်စဲၣ်ပူၤအံၤအဂီၢ် ဘၣ်တၢ်ဒုးအိၣ်ထီၣ်၀ဲတၢ်တိမၤစၢၤတၢ်မုာ်တၢ်ခုၣ်ကမံးတံာ်အံၤလီၤဒီး မ့မ့ၢ်ကီၢ်စဲၣ်ကိတိာ်ခိၣ်ကျၢၢ်စီၤမၠ့ၣ်အူန့ၣ်ကဟံးထီၣ်ဖီၣ်ထီၣ်၀ဲကမံးတံာ်ခိၣ်မူဒါဒီး ကမံးတံာ်ဖိအကျါပၣ်ဃုာ်မုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်ကီၢ်ခီခိၣ်(၂)သုးခိၣ်ကျၢၢ်ဖိစီၣ်မ့အီၤႇဘံၣ်ဘၢဒီးကီၢ်ဆၢဂ့ၢ်၀ီကိတိာ်ကဟံးထီၣ်ဖီၣ်ထီၣ်က့ၤကမံးတံာ်အနဲၣ်ရွဲၣ်မူဒါအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါကမံးတံာ်ကရူၢ်အကျါ ကီးတရံးႇဖၣ်အၣ်ႇလူၢ်ပျဲၢ်ႇမၠၣ်၀တံၣ်ႇကၠၤအ့စ့ၣ်ကၠံႇဖၣ်ပူၣ်ဒီးသၣ်တီၣ်၀့ၢ် ၦၤသူၣ်က့သးၦၢ်တဖၣ်တၢ်ထၢနုာ်ဃုာ်လၢကမံးတံာ်ဖိအကျါအဂ့ၢ်န့ၣ် ကီၢ်စဲၣ်သုးကီၣ်ကးတၢ်ဘိးဘၣ်ရၤလီၤဒီးကမျၢၢ်တၢ်ရ့လိာ်မုာ်လိာ်၀ဲၤကျိၤထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ

လါမးရှး ၂၅သီႇ ၂၀၂၂နံၣ်ႇ ခ့ၣ်အဲးစံၣ် ဖဲမဟါလါမးရှး ၂၄ သီ မုၢ်နၤခီ ၉း၂၀ မံးနံးအဆၢကတီၢ် မ့ၣ်ပိၢ်ပိၢ်ဖးထီၣ်တဖျၢၣ်လၢကညီကီၢ်စဲၣ် မၠၣ်၀တံၣ်က၀ီၤဒ့(၃) သုးခိးကီၢ်ဆၢ(BGF)သုးဟီၣ်က၀ီၤ(၄)အခိၣ် သုးခိၣ်ဒိၣ်ဖိစီၤမိၣ်သိၤအကိၣ်ကျးတၢ်သူၣ်ထီၣ်ကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိမ့ၣ်ပိၢ်ပိၢ်ဖးထီၣ်အဃိသုးခိၣ်ဒိၣ်ဖိအကိၣ်ကျးလ့သံၤရံၣ်တၢ်သူၣ်ထီၣ်အတြဲၤမဲၤထံကလၤတနီၤသဲၣ်ဖးဟးဂီၤ၀ဲအဂ့ၢ်န့ၣ် ၦၤလၢအိၣ်ဘူးဒီးတၢ်ကဲသးအလီၢ်တဂၤစံး၀ဲဒ်အံၤန့ၣ်လီၤႉ “တၢ်ပိၢ်ထီၣ်အကလုၢ်ဒုသီၣ်ဖးဒိၣ်ညါလီၤႉပိၢ်ဖးထီၣ်ဖဲကပိၤကပၤအံၤလီၤအဃိဟံၣ်ဟူးညီမးလီၤႉလၢခံမးသ့ၣ်ညါက့ၤလၢပိၢ်ဖးထီၣ်လၢမၠၣ်၀တံၣ်က၀ီၤဒ့(၃)သုးခိၣ်ဒိၣ်ဖိစီၤမိၣ်သိၤအကိၣ်ကျး(လ့သံၤရံၣ်)တၢ်သူၣ်ထီၣ်လီၢ်အတြဲၤမဲၤထံကလၤနါက့သဲၣ်ဖးလီၤ”အဂ့ၢ်န့ၣ် အ၀ဲစံး၀ဲန့ၣ်လီၤႉ ဖဲမ့ၣ်ပိၢ်ပိၢ်ဖးထီၣ်အခိၣ်အဃၢၤန့ၣ်အိၣ်ဘူးဒီးကီၢ်ရ့ၣ်ႇကီၢ်ဆၣ်၀ဲၤကျိၤအ၀ဲၤဒၢးတဖၣ်ဒီး ဟဲမၤပိၢ်ဖးထီၣ်ခီဖျိမနုာ်တၢ်ဂ့ၢ်လဲၣ်န့ၣ် ကမျၢၢ်လၢအိၣ်၀့ၢ်ပူၤသ့ၣ်တဖၣ်အဲၣ်ဒိးသ့ၣ်ညါ၀ဲန့ၣ်လီၤႉ မ့ၣ်ပိၢ်ပိၢ်ဖးထီၣ်တယံၤတမီၢ် နၢ်ဟူကျိဖးဒိၣ်ႇကျိဖိအကလုၢ်သီထီၣ်လၢ မၠၣ်၀တံၣ်က၀ီၤဒ့(၄)ကၠီၣ်လိကၠံက၀ီၤဒ့မုၢ်နုာ်တကပၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လါမးရှး ၂၄ သီႇ၂၀၂၂နံၣ်ႇခ့ၣ်အဲးစံၣ် ခီဖျိပယီၤသုးမၤအါထီၣ်အဂံၢ်ဘါလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ မၠၣ်၀တံၣ်ကလံၤထံးတီနီၢ်ကစၢၢ်မုၢ်ထီၣ်လ့က့ၣ်ကိာ်-သ့ၣ်ဘီဘိ-၀ီၤလ့ဟီၣ်က၀ီၤတကပၤအဃိ ဖဲတနံၤအံၤလါမးရှး ၂၄ သီ ဂီၤခီအဆၢကတီၢ်တၢ်ဒုးကဲထီၣ်၀ဲလၢတၢ်လီၢ်(၄)တီၤအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးဒုးယၤတၢ်ကစီၣ်အအိၣ်န့ၣ်လီၤႉ “ဖဲမဟါမုၢ်ဆါခီန့ၣ်ဘၣ်ဖဲ(BGF)ဒီးပယီၤသုးပာ်ဖှိၣ်ကအိၣ်အဂၤ(၁၀၀)ဟဲထီၣ်၀ဲဒီးသိလ့ၣ်အခိၣ်(၁၀)ဘျဲၣ်အိၣ်ဟဲ၀ဲဒၣ်လၢကဆီ၀ါလ့ကစၢၢ်ကျဲဖဲကလဲၤထီၣ်ဆူ၀ီၤလ့ၤကနဲလ့တကပၤအခါ တၢ်အိၣ်ခိးပံးတံၢ်ဃာ်ကျဲအဃိဖဲဟါခီန့ၣ်တၢ်ဒုးကဲထီၣ်၀ဲမီၤနီၤႉလၢလ့က့ၣ်ကိာ်ယသ့ၣ်ကူၤႇဘၠူပွဲၣ်ကိဒီး၀ီၤလ့ၤ-ကဆီ၀ါလ့ကစၢၢ်ကျဲက့ၣ်နၢၣ်တၢ်လီၢ်တဖၣ်န့ၣ်တုၤလၢတဂီၤညါအံၤတၢ်ဒုးကဲထီၣ်အဖၢမုၢ်လီၤႉ လၢ၀ီၤလ့ၤ-သ့ၣ်ဘီဘိပယီၤသုးကလၢၤတကပၤန့ၣ်နါက့တၢ်ဒုးကဲထီၣ်ႇခးလီၤကျိဖးဒိၣ်တပယူာ်ဃီလီၤ”အဂ့ၢ်န့ၣ် ဂံၢ်ခီၣ်ထံးဒုးယၤတၢ်ကစီၣ်တခါစံး၀ဲန့ၣ်လီၤႉ ခီဖျိလၢတၢ်ဒုးကဲထီၣ်အဃိသ့ၣ်ဘီဘိႇ၀ီၤလ့ၤႇအူးကြ့ၣ်ထၣ်သ၀ီကရူၢ်လီၢ်က၀ီၤကမျၢၢ်လၢအကထိဘၣ်ဟးဃ့ၢ်သုးလီၢ်သုးကျဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိတၢ်ဒုးကဲထီၣ်လၢ(သုးက့ ၆)ဟီၣ်က၀ီၤ လ့က့ၣ်ကိာ်ႇ၀ီၤလ့ၤႇကၠၤအ့စ့ၣ်ကၠံႇကီးတရံးဒီးမၠၣ်၀တံၣ်အခိၣ်အဃၢၤတၢ်လီၢ်အါတီၤအဃိ လီၢ်က၀ီၤပူၤတၢ်ဆဲးကျိးတၢ်ဟးထီၣ်က့ၤလီၤအကျဲသ့ၣ်တဖၣ်ပတုာ်အသးလံအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ကတီၢ်ခဲအံၤဟီၣ်က၀ီၤဖဲန့ၣ်တဖၣ်အပူၤ ဒူသ၀ီအဖျၢၣ်(၂၀)ဃၣ်ဃၣ် လီၢ်က၀ီၤၦၤလီၢ်အိၣ်ကမှံဖိအနီၣ်ဂံၢ်အိၣ်တုၤ၀ဲလၢခံကလးဃၣ်ဃၣ်လံဒီး ၦၤသ့ၣ်တဖၣ်အံၤအဂီၢ်လိၣ်ဘၣ်၀ဲဒၣ်တၢ်အီၣ်တၢ်အီႇတၢ်အိၣ်တၢ်ဆိးလီၢ်ကျဲဒီးကသံၣ်ကသီသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢၦၤလၢအမၤစၢၤၦၤလီၢ်အိၣ်ကမှံဖိတဖၣ်အအိၣ်န့ၣ်လီၤႉ

လါမးရှး ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤလါမးရှး ၂၄ သီ ဂီၤခီ ၅ နၣ်ရံၣ်ဘျဲၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်ဆူ မၠၣ်၀တံၣ်ကီၢ်ဆၣ် နိၣ်ဖိ-ထံမူထၣ်သ၀ီပူၤအဃိ ဘၣ်သံ၀ဲပိာ်မုၣ်ဖိ(၁)ဂၤဒီး ဘၣ်ဒိနးနးကလဲာ်(၃)ဂၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ တၢ်ဒုးကဲထီၣ်လၢဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ ခီဖျိပယီၤသုးတကပၤက့ၤခးလီၤကဒါကျိဖးဒိၣ်ဆူသ၀ီပူၤအဃိ ဘၣ်သံ၀ဲဒၣ်ထံမူထၣ်သ၀ီဖိပိာ်မုၣ်ဖိ(၁၇)နံၣ်တဂၤအခိၣ်သၣ်ဃံဖဲအအိၣ်လၢဟံၣ််ပူၤအခါဒီး ပိာ်မုၣ်ဖိလၢအဂၤတဂၤဒီးၦၤဒီမါ၀ၤခံဂၤဘၣ်ဒိဘၣ်ထံး၀ဲနးနးကလဲာ်အဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ “ဖိသၣ်ပိာ်မုၣ်ဖိတဂၤန့ၣ်ဘၣ်ဖဲအဂဲၤဆၢထၢၣ်ဖီၣ်အီၣ်မ့ၤလၢဂီၤခီႇကျိဖးဒိၣ်လီၤတဲာ်လိၤလိၤအဟံၣ်ပိၢ်ဖးထီၣ် ဘၣ်၀ဲအခိၣ်သၣ်ဃံဒီးသံ၀ဲလီၤႉလၢအဖီအီၣ်မ့ၤလီၢ်န့ၣ်သွံၣ်လဲလဲလီၤႉအမိလဲၤဆှၢအီၤလၢတၢ်ဆါဟံၣ်ဒံးလီၤႉဖဲအံၤခီတၢ်ဆါဟံၣ်တအိးထီၣ်နီတဖျၢၣ်ဘၣ်အဃိသံ၀ဲလၢကျဲပူၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲတဂီၤညါအံၤဂီၤခီအဆၢကတီၢ် ပယီၤသုးခးလီၤ(၁၂၀-မမ) ၆ ထံၣ်ဒီး ပိာ်မုၣ်ဖိလၢအသံတဂၤန့ၣ်တကးဒံးဘၣ်အမဲာ်ညါပိာ်မုၣ်ဖိလၢအဂၤတဂၤစ့ၢ်ကီးဘၣ်၀ဲဒၣ်အဆံၣ်ဒၢခိၣ်ဒီးအယီၢ်ဒ့န့ၣ်လီၤႉကတီၢ်ခဲအံၤအ၀ဲသ့ၣ်သးပ့ၤနီၣ်သးဒီးၦၤဒီမါ၀ၤခံဂၤန့ၣ်စ့ၢ်ကီးဘၣ်၀ဲအခီၣ်န့ၣ်လီၤႉ လၢန့ၣ်အမဲာ်ညါဟံၣ်ဟးဂီၤ၀ဲ(၂)ဖျၢၣ်ဒီးသိလ့ၣ်ဟးဂီၤ၀ဲ(၁)ခိၣ်စ့ၢ်ကီးအဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ပိာ််မုၣ်ဖိလၢအသံတဂၤအံၤၦဲၤထီၣ်၀ဲ(၁၇)နံၣ်ဖဲမဟါလါမးရှး(၂၃)သီအနံၤဒံးလီၤဒီးမ့ၢ်စ့ၢ်ကီး၀ဲဒၣ်ကၠိဖိတဂၤအသိး ပိာ်မုၣ်ဖိလၢကျိဘၣ်အဆံၣ်ဒၢခိၣ်ဒီးအယီၢ်ဒ့တဂၤန့ၣ်စ့ၢ်ကီး ခီဖျိတၢ်ဆါဟံၣ်တအိးထီၣ်ဘၣ်အဃိ အအီၣ်ကစံၣ်ကၠံၣ်လီၤ၀ဲဒီးအိၣ်၀ဲဒၣ်လၢတၢ်ဘၣ်ယိၣ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဟီၣ်က၀ီၤဖဲန့ၣ်အပူၤတၢ်ဒုးကဲထီၣ်လၢပယီၤသုးဒီး(KNLA)တဖၣ်အဘၢၣ်စၢၤအိၣ်၀ဲခဲအံၤခဲအံၤဒီး တၢ်ဒုးမ့ကဲထီၣ်တဘျီလၢ်လၢ်န့ၣ်ပယီၤသုးက့ၤခးဆၢကဒါကျိဖးဒိၣ်ကဲထီၣ်သးအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လါမးရှး ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ ပယီၤသုးလၢအအိၣ်ဆီလီၤသးဖဲလ့နိးသ၀ီသီခါဖၠၣ်ကရၢၢ်ပူၤခူၣ်လီၤဃာ်၀ဲတၢ်ပူၤသ့ၣ်တဖၣ်အံၤ သ၀ီဖိတဖၣ်မုၢ်လၢ်၀ဲလၢကဟးထီၣ်ကွံာ်လၢသ၀ီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးဒီးသုးခိးကီၢ်ဆၢ-BGF(၁၀၂၁)သုးရ့ၣ်တဖၣ်အံၤ အပူၤကွံာ်န့ၣ်အ၀ဲသ့ၣ်တဲ၀ဲလၢကအိၣ်စိဃာ်လၢ သီခါဖၠၣ်ကရၢၢ်ပူၤထဲ(၃)လီၤဘၣ်ဆၣ် တုၤလၢခဲအံၤတဟးထီၣ်ဒံးဘၣ်ခူၣ်ဃာ်၀ဲတၢ်ပူၤအဃိ ဘၣ်ယိၣ်လၢတၢ်ဒုးကကဲထီၣ်အဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ သ၀ီဖိတဂၤစံး၀ဲလၢ“တဲ၀ဲလၢကအိၣ်ဖဲသီခါဖၠၣ်အံၤထဲ(၃)သီလီၤ ဘၣ်ဆၣ်အိၣ်၀ဲတုၤအခဲအံၤလီၤႉ လၢဖယါကိန့ၣ်ပယီၤသုးကလၢၤအိၣ်ႇလၢကၠိကရၢၢ်ပူၤန့ၣ်(BGF)အိၣ်၀ဲလီၤႉ အ၀ဲသ့ၣ်မ့မူၤထီၣ်ခးပိၢ်ထီၣ်ကျိန့ၣ် သ၀ီဖိမ့ၢ်ဂ့ၤႇသီခါမ့ၢ်ဂ့ၤပျံၤတၢ်ဒီးဘၣ်ဟးပလဲာ်သးလီၤႉတၢ်ဂ့ၢ်မ့ဟဲအိၣ်ထီၣ်တမံၤဂ့ၤတမံၤဂ့ၤမုၢ်မ့ဟါန့ၣ်မတၤတဂၤမးလဲၤလၢသီခါဖၠၣ်တဘူၣ်လၢၤဘၣ်ႉအဲၣ်ဒိးလၢအ၀ဲသ့ၣ်ကဟးထီၣ်ကွံာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအီးကထိဘၢၣ်အခါ လၢ(ခ့ၣ်အဲၣ်ယူၣ်)ဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ်တၢ်ပၢဟီၣ်က၀ီၤ လ့နိးသ၀ီအပူၤ တၢ်ဒုးကဲထီၣ်၀ဲလၢခ့ၣ်အဲၣ်ယူၣ်ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ ပယီၤသုးဒီး(BGF)သုးနုာ်လီၤဆ့ၣ်နီၤအိၣ်၀ဲလၢ(ခ့ၣ်အဲၣ်ယူၣ်)လိၣ်ရှါဟီၣ်က၀ီၤဘံၣ်ဘၢတြဲၤအလီၢ်ဒီးလ့နိးသီခါဖၠၣ်ကရၢၢ်အပူၤကအိၣ်(၅)လါဃၣ်ဃၣ်လံအဂ့ၢ်န့ၣ် ဟီၣ်က၀ီၤ(ခ့ၣ်အဲၣ်ယူၣ်)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ကတီၢ်ခဲအံၤပယီၤသုးတဖၣ်တ့ထီၣ်အလီၢ်အကျဲအိၣ်၀ဲဒၣ်ဖဲလ့နိးသ၀ီဒီးနိၣ်ခၠိးနဲၣ်သ၀ီပူၤတကးဒံးဘၣ် တၢ်ဒုးကဲထီၣ်၀ံၤအလီၢ်ခံနုာ်လီၤအိၣ်၀ဲဒၣ်လၢသ၀ီသီခါဖၠၣ်ကရၢၢ်ပူၤဒီးကျဲမုၢ်ဒီတကျိၤန့ၣ်လီၤႉ လၢန့ၣ်အမဲာ်ညါခီဖျိအ၀ဲသ့ၣ်ခးပိၢ်ထီၣ်ကျိတလီၢ်လီၢ်အဃိ သ၀ီဖိတဖၣ်ဘၣ်ဟးစံၣ်ပလဲာ်သးလၢတၢ်လီၢ်အဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်(၂၀၂၁)လါအီးကထိဘၢၣ်အခါ ခီဖျိပယီၤသုး(ခလရ-၂၈၃)သုးရ့ၣ်လၢအအိၣ်ဆီလီၤသးဖဲလ့နိးသ၀ီပူၤအံၤတဖၣ် နုာ်လီၤတလၢ၀ဲဟီၣ်က၀ီၤတၢ်ပာ်ပနီၣ်လီၢ်အဃိတၢ်ဒုးစးထီၣ်ကဲထီၣ်၀ဲဒီး(KNLA)အၦၤတဖၣ်န့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံပယီၤသုးဒီး(BGF)တဖၣ်နုုာ်လီၤအိၣ်၀ဲဒၣ်လၢသရိာ်၀ါ-ဃိၣ်သၢဖျၢၣ်ကျဲဒီတကျိၤဒီးသီခါဖၠၣ်ကရၢၢ်ပူၤတနီၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ

လါမးရှး ၂၂ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံး၀့ၢ်ကလံၤထံးတကပၤန့ၣ် ခီဖျိပယီၤသုးမီၤစိရိၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးဆူၣ်ထီၣ်အဃိ လီၢ်က၀ီၤၦၤလီၢ်အိၣ်ကမှံဖိတဖၣ်ဘၣ်သုးကဒီးအလီၢ်အကျဲလၢတၢ်လီၢ်အဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိပယီၤသုးတဖၣ်ဟဲထီၣ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤကီးတရံးကလံၤထံးသ၀ီတဖၣ်အပူၤဒီး ဖဲန့ၣ်တၢ်ဒုးကဲထီၣ်၀ဲဒီးဟီၣ်က၀ီၤ(KNLA)သုးပာ်ဖှိၣ်တဖၣ်ကိးမုၢ်နံၤဒဲးအဃိ ၦၤလီၢ်အိၣ်ကမှံဖိလၢအကထိဘၣ်သုးကဒီးအလီၢ်အကျဲလၢတၢ်လီၢ်အဂၤအဂ့ၢ်န့ၣ် လီၢ်က၀ီၤဖိလၢအဟးမၤစၢၤၦၤလီၢ်အိၣ်ကမှံဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ“ခီဖျိလၢပယီၤသုးဟဲထီၣ်အဃိၦၤလီၢ်အိၣ်ကမှံဖိတဖၣ်ဘၣ်ဂုၤကဒါလီၢ်ခံဒီးဘၣ်သုးကဒီးအလီၢ်အကျဲမီၤနီၤႉအါဒၣ်တက့ၢ်န့ၣ်လဲၤမံ၀ဲဒၣ်လၢအဘူးအတံၢ်ဟံၣ်ႇအသမူသကိးဟံၣ်ႇကၠိႇသီခါဖၠၣ်အဃိ တနၤအံၤမ့မံ၀ဲဖဲသ၀ီတဖျၢၣ်အံၤအပူၤန့ၣ်နီၢ်တနၤဘၣ်လဲၤစံၣ်မံ၀ဲလၢသ၀ီအဂၤတဖျၢၣ်လီၤႉအိၣ်တပူၤဃီတဘၣ်ဂီၢ်ဘၣ်ႉမ့ၢ်ပယီၤသုးဟဲတုၤဖဲလဲၣ်လံလဲၣ်ႇဒ်သိးတတိနိၣ်ဒီးအ၀ဲသ့ၣ်ဘၣ်န့ၣ်ဘၣ်သုးလီၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခဲအံၤလၢကမဲၤကိႇသ၀ီသီသ၀ီအပူၤန့ၣ်ပယီၤသုးဒီးသုးခိးကီၢ်ဆၢ(BGF)သုးအိၣ်ဆီလီၤသးဒံး၀ဲအသိး ဖဲမဟါလါမးရှး ၂၁ သီ ဂီၤခီအဆၢကတီၢ်စ့ၢ်ကီး ပယီၤသုး(၁၀၀)ဘျဲၣ်ဟဲတုၤ၀ဲဒၣ်လၢနါစွ့ၤမိၤႇအီၤလဲၤသ၀ီပူၤဒီး နုာ်လီၤအိၣ်၀ဲဒၣ်လၢသီခါဖၠၣ်ကရၢၢ်ပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဒ်ၦၤလၢအဟးမၤစၢၤၦၤလီၢ်အိၣ်ကမှံဖိအတၢ်မၤနီၣ်မၤဃါစရီအသိးန့ၣ် လၢကီးတရံးကလံၤထံးကီးနွဲၣ်ႇမီမၣ်သ၀ီသီႇကၠးက၀းႇအီးဖးဖးဒိၣ်ဒီးယွၤတါရှ့ၤသ၀ီကရူၢ် ဒူသ၀ီ(၂၅)ဖျၢၣ်ဃၣ်ဃၣ်ဟံၣ်ခိၣ်အဖျၢၣ်(၂ႇ၀၀၀)ဘျဲၣ်ၦၤလီၢ်အိၣ်ကမှံခဲလၢာ်အိၣ်၀ဲ(၁၂ႇ၀၀၀)ဘျဲၣ်ဒီး ၦၤလီၢ်အိၣ်ကမှံဖိတဖၣ်အါဒၣ်တက့ၢ်န့ၣ်လဲၤစံၣ်အိၣ်၀ဲလၢသ၀ီလၢအိၣ်ဘူးဖဲန့ၣ်တဖၣ်အိၣ်၀ဲအသိး တနီၤန့ၣ်လဲၤစံၣ်အိၣ်၀ဲလၢကီးတရံး၀့ၢ်တကပၤစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိၦၤလီၢ်အိၣ်ကမှံဖိတဖၣ်ဘၣ်ဟးစံၣ်အိၣ်၀ဲဒ်အံၤနံၤသီအါထီၣ်လံအဃိ အ၀ဲသ့ၣ်ထံၣ်ဘၣ်၀ဲတၢ်အိၣ်တၢ်ဆိးလီၢ်ကျဲတၢ်ကီတၢ်ခဲဒီးတၢ်အီၣ်တၢ်အီတၢ်ကီတၢ်ခဲသ့ၣ်တဖၣ်အဂ့ၢ်န့ၣ် လီၢ်က၀ီၤဖိလၢအဟးမၤစၢၤၦၤလီၢ်အိၣ်ကမှံဖိတဂၤစံး၀ဲအသိး သ့ၣ်ညါဘၣ်န့ၣ်လီၤႉ ခီဖျိတၢ်ဒုးကဲထီၣ်အဃိဒ်သိးလီၢ်က၀ီၤကမျၢၢ်တဖၣ်ကက့ၤအိၣ်ဘၣ်လၢအဟံၣ်အဃီအဒူသ၀ီပူၤမုာ်မုာ်ခုၣ်ခုၣ်အဂီၢ် ဖဲအပူၤကွံာ်လါမးရှး ၇ သီအနံၤန့ၣ် ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် ကွဲးဆှၢထီၣ်လံာ်လၢမုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ်ကီၢ်ခီခိၣ်အအိၣ်မ့ၢ်ဒ်သိးပယီၤသုးကဟးထီၣ်ကွံာ်လၢဟီၣ်က၀ီၤပူၤအဂီၢ်ဘၣ်ဆၣ် ပယီၤသုးအံၤမ့မ့ၢ်တခီတဟးထီၣ်ကွံာ်ဘၣ်အမဲာ်ညါဟဲအါထီၣ်၀ဲဒၣ်ကွ့ၢ်ကွ့ၢ်အဃိ လီၢ်က၀ီၤၦၤလီၢ်အိၣ်ကမှံဖိတဖၣ်ဘၣ်သုးကဒီးအလီၢ်အကျဲကဲထီၣ်သးဒ်အံၤန့ၣ်လီၤႉ ဖဲစှၤသီအတီၢ်ပူၤပယီၤသုးမၤ၀ဲတၢ်ထီၣ်ဒုးလၢကီးတရံးကလံၤထံးဟီၣ်က၀ီၤတကပၤအသိး...

လါမးရှး ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါမးရှး ၂၁ သီ ဟါခီ ၅ နၣ်ရံၣ်ဃၣ်ဃၣ်အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၂၀၁)ဒီးသုးပာ်ဖှိၣ်တဖၣ် ထီၣ်မၤန့ၢ်၀ဲမီခံပယီၤသုးခီၣ်သုးရ့ၣ်(ခလရ-၃၂)သုးကလၢၤလၢအအိၣ်ဖဲမၠၣ်၀တံၣ်ကီၢ်ရ့ၣ်ႇဂီၤလ့ၤကီၢ်ဆၣ်ပူၤအဂ့ၢ်န့ၣ် KNLA တကပၤပာ်ဂၢၢ်ပာ်ကျၢၤစံး၀ဲန့ၣ်လီၤႉ စးထီၣ်ဖဲတဂီၤညါအံၤအဆၢကတီၢ်န့ၣ် (KNLA)သုးရ့ၣ်(၂၀၁)ဒီး တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးခိၣ်လီၢ်လံၤစီၤနီၢ်ခုသုးပာ်ဖှိၣ်တဖၣ်နုာ်လီၤခး၀ဲမီခံပယီၤသုးကလၢၤ(ခလရ-၃၂)သုးရ့ၣ်ဒီးခီၣ်ချ့သုးရ့ၣ်(ခမရ-၅၅၅)သုးကျိၤ(၂)ကျိၤဒီး မၤန့ၢ်၀ဲပယီၤသုးကလၢၤဖဲတနံၤအံၤဟါခီ ၅ နၣ်ရံၣ်ဃၣ်ဃၣ်အဆၢကတီၢ်အဂ့ၢ်န့ၣ် KNLA(၂၀၁)သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤဘုဖီ စံး၀ဲဒ်အံၤန့ၣ်လီၤႉ “မီခံသုးကလၢၤဒုစးထီၣ်လၢဂီၤခီန့ၣ်ပၦၤလဲၤထီၣ်ခး၀ဲမီၤနီၤႉဟါခီ ၅ နၣ်ရံၣ်ဘျီဒု အသုးကလၢၤလီၤ၀ဲလီၤမီၤနီၤႉမ့မ့ၢ်တၢ်ဖိတၢ်လံၤန့ၣ်လီလီစဲၤခဲအံၤခီဒုယၦၤတပာ်ဖျါထီၣ်ယၤဒံးဘၣ်ႉ ခီဖျိလၢအမၤဖှိၣ်၀ဲအဖၢမုၢ်ဒံးလီၤမီၤနီၤႉ မ့မ့ၢ်လၢကနဲလ့တကပၤခီဒုခးစိ၀ဲဒီး(၁၂၀) အဖၢမုၢ်လီၤႉကအိၣ်လၢအဖျၢၣ်တဆံခံဆံလံ”အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤဘုဖီ စံးဘၣ်ခ့ၣ်အဲးစံၣ်န့ၣ်လီၤႉ မီခံပယီၤသုးကလၢၤအံၤသုးကအိၣ်၀ဲ(၂၈)ဂၤဒီးတုၤလၢခဲအံၤဘၣ်ဃးတၢ်မၤန့ၢ်ကျိချံၦာ်သၣ်တၢ်အိၣ်သးဒီးတၢ်ဘၣ်ဒိဘၣ်ထံးတၢ်အိၣ်သးန့ၣ်တသ့ၣ်ညါဘၣ်လီၤတံၢ်လီၤဆဲးဒံးဘၣ်ဆၣ် မ့မ့ၢ်(KNLA)သုးပာ်ဖှိၣ်တကပၤ သံဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် KNLA(၂၀၁)သုးရ့ၣ်ခိၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါမးရှး ၁၃...

လါမးရှး ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးထီၣ်မၤန့ၢ်ကံွာ်တီနီၢ်တၢ်ဆါဟံၣ်ဃုာ်ဒီးလီၢ်က၀ီၤဒူသ၀ီပူၤတၢ်လီၢ်အါတီၤဒီး ခဲအံၤတၢ်ဒုးဆဲးကဲထီၣ်၀ဲကွ့ၢ်ကွ့ၢ်အဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ လီၢ်က၀ီၤတၢ်ကစီၣ်စံး၀ဲလၢ“တၢ်ဒုးကဲထီၣ်ကိးမုၢ်နၤမုၢ်ဆါလီၤႉခဲအံၤဟဲထီၣ်တလၢအီးဖးဖးဒိၣ်သ၀ီလံႇနုာ်လီၤဆီလီၤသးဖဲအီးဖးဖးဒိၣ်(ခ့ၣ်အဲၣ်ယူၣ်)စုတီၤအဖီလာ်ပၢၤကီၢ်သုး(KNPF)အိၣ်အလီၢ်လံလီၤႉမ့မ့ၢ်တီနီၢ်တၢ်ဆါဟံၣ်န့ၣ်ပယီၤသုုးနုာ်လီၤဆ့ၣ်နီၤအိၣ်လၢမုၢ်နၤခါလံႉတဂီၤညါအံၤတၢ်ဒုးကဲထီၣ်လၢနါစွ့ၤမိၤသ၀ီလီၤႉနါစွ့ၤမိၤသီခါဖၠၣ်နါက့ပယီၤသုးနုာ်လီၤဟံးန့ၢ်အလီၢ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကတီၢ်အံၤခီဖျိတၢ်ဒုးကဲထီၣ်အဃိလီၢ်က၀ီၤသ၀ီဖိလၢအကထိလဲၤစံၣ်အိၣ်၀ဲဒၣ်လၢဒီၣ်ပလၤႇသိစဲၤသိစူၣ်သ၀ီတကပၤအဂ့ၢ်န့ၣ် လီၢ်က၀ီၤၦၤဃ့ၢ်တၢ်ဒုးဖိတဖၣ်စံး၀ဲန့ၣ်လီၤႉ ခီဖျိပယီၤသုးတဖၣ်အံၤဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်နုာ်လီၤ၀ဲလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤအါအါဂီၢ်ဂီၢ်အဃိ တုၤလၢတနံၤအံၤလါမးရှး ၂၁ သီ ဂီၤခီအဆၢကတီၢ် တၢ်ဒုးကဲထီၣ်၀ဲဒီး(KNLA)သုးပာ်ဖှိၣ်တဖၣ်လၢကီးတရံးကလံၤထံးအီးဖးဖးဒိၣ်သ၀ီႇနါစွ့ၤမိၤႇဖၤခါကိႇတီၤကၠၤသ၀ီတကပၤန့ၣ်လီၤႉ ကတီၢ်ခဲအံၤသ့ၣ်ညါဘၣ်လၢကီးတရံးပယီၤသုး(ခလရ-၉၇)ႇလဲၤ၀ၣ်ကျိဖးဒိၣ်လူၢ်ႇ(စကခ- ၁၂)ကျိဖးဒိၣ်လူၢ်သ့ၣ်တဖၣ် ခးလီၤကျိဖးဒိၣ်လၢသ၀ီလၢတၢ်ဒုးကဲထီၣ်တဖၣ်အပူၤဒီး ဒ်ပျီပူၤတၢ်ဒုးတၢ်အိၣ်သးအံၤအသိးခံခီခံကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါမးရှး ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိပယီၤသုးမီၤစိရိၤခဲအံၤတဖၣ်တမ့ၢ်၀ဲဒၣ်ထံကီၢ်ပဒိၣ်ဘၣ်အဃိ ဘၣ်ဃးဒီးတၢ်ကးတံၢ်ဃာ်ကၠိ(၄)ဖျၢၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ဖၣ်အၣ်ကီၢ်ဆၣ်ပူၤတၢ်ဂ့ၢ်အဖီခိၣ် ကီၢ်စဲၣ်သုးမီၤစိရိၤဘံၣ်ဘၢဒီးကီၢ်ဆၢဂ့ၢ်၀ီကိတိာ် သုးခိၣ်ဒိၣ်စိမၠိမ့နီၤဆှၢထီၣ်လံာ်ထီဒါအံၤ တဖိးသဲစးဘၣ်အဂ့ၢ်န့ၣ် KNU က့ၤခီၣ်ဆၢစံး၀ဲန့ၣ်လီၤႉ ခီဖျိတၢ်ဟံးန့ၢ်တၢ်ဘံၣ်တၢ်ဘၢတန့ၢ်လၢၤဘၣ်အဃိဘၣ်ဃးဒီးတၢ်ကးတံၢ်ကွံာ်ဖၣ်အၣ်ကီၢ်ဆၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤပူၤကၠိ(၄)ဖျၢၣ်တၢ်ဂ့ၢ်အံၤအဖီခိၣ် ဖဲလါမးရှး ၁၄ သီအနံၤ ပယီၤသုးမီၤစိရိၤဘံၣ်ဘၢဒီးကီၢ်ဆၢဂ့ၢ်၀ီကိတိာ်သုးခိၣ်ဒိၣ်စိမၠိမ့နီၤဆှၢထီၣ်လံာ်ထီဒါဆူဖၣ်အၣ်ကီၢ်ဆၣ်(ခ့ၣ်အဲၣ်ယူၣ်)လီၢ်ခၢၣ်သးဒီးသုးက့တၢ်ရ့လိာ်မုာ်လိာ်၀ဲၤဒၢးႇ၀ဲၤဒၢးခိၣ်အအိၣ်အံၤအဖီခိၣ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ် က့ၤခီၣ်ဆၢစံး၀ဲဒ်အံၤန့ၣ်လီၤႉ “အ၀ဲသ့ၣ်န့ၣ်တမ့ၢ်ပဒိၣ်ဘၣ်ႇမတၤတဂၤပာ်ထီၣ်အီၤလၢပဒိၣ်လဲၣ်ႉကမျၢၢ်ထံဖိကီၢ်ဖိခဲလၢာ်တတူၢ်လိာ်အီၤဘၣ်ႉအ၀ဲသ့ၣ်ဆှၢထီၣ်လံာ်လၢ(NCA)အကျဲဘၣ်ဆၣ် ပ၀ဲဒၣ်အံၤ(NCA)စ့ၢ်ကီးတအိၣ်လၢၤဘၣ်ႉ (NCA)အံၤဟးဂီၤယံၤလံႉ(JMC)နါက့တအိၣ်လၢၤဘၣ်ႉစးထီၣ်လၢပဒိၣ်တအိၣ်လၢၤဘၣ်န့ၣ်(NCA)အံၤတအိၣ်လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးမီၤစိရိၤဘံၣ်ဘၢဒီးကီၢ်ဆၢဂ့ၢ်၀ီကိတိာ်လံာ်ထီဒါအပူၤစံး၀ဲလၢ ဖဲ(၇/၂/၂၀၂၂)ခ့ၣ်အဲၣ်ယူၣ်(သုးက့ ၁)ထုးထီၣ်ပာ်ဖျါ၀ဲလၢခီဖျိဖၣ်အၣ်ကီၢ်ဆၣ်(အထက)တကီၤဘိႇ(အထက)မၠဲၤႇ(အထက)အဒ့၀ဲပၠၣ်ဒီး(အလက)ဘီသဘၠူၣ်ကၠိကမံးတံာ်တဖၣ်ဟံးန့ၢ်ကၠိသရၣ်ၦၤမၤတၢ်ဖိအတၢ်ဘံၣ်တၢ်ဘၢတန့ၢ်လၢၤဘၣ်အဃိ စးထီၣ်လၢ(၁၀/၂/၂၀၂၂)တၢ်ကးတံၢ်ဃာ်ကၠိအံၤဒီး ခ့ၣ်အဲၣ်ယူၣ်အံၤကလူၤပိာ်မၤထွဲ(NCA) လံာ်ဃံးဃာ်တၢ်သိၣ်တၢ်သီတဖၣ်ႇတဘၣ်နုာ်လီၤဂိာ်စုဂိာ်ခီၣ်လၢဟီၣ်က၀ီၤပြၢပြးတၢ်ဂ့ၢ်တဖၣ်ဘၣ်ႇကမၤဃံးထီၣ်အစုဒုၣ်တီၤအဖီလာ်သုးဖိတဖၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ ဘၣ်ဃးပယီၤသုးမီၤစိရိၤဘံၣ်ဘၢဒီးကီၢ်ဆၢဂ့ၢ်၀ီကိတိာ်လံာ်ထီဒါအံၤန့ၣ် တၢ်တိစၢၤမၤစၢၤကညီတၢ်မုာ်တၢ်ခုၣ်ၦာ်ဘျးစဲ(KPSN)ကရူၢ် ၦၤကတိၤတၢ်ပၢ...