ခ့ၣ်အဲးစံၣ် – KIC News

လါအ့ဖြ့ၣ် ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤဂီၤခီ ၂ နၣ်ရံၣ်ဃၣ်ဃၣ်အဆၢကတီၢ် လၢလ့ၣ်ကိာ်က၀ီၤဒ့တဖၣ်အပူၤ တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤအဂ့ၢ်န့ၣ် ဟီၣ်က၀ီၤတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲတနံၤအံၤလါအ့ဖြ့ၣ် ၁၀ သီ ဂီၤခီ ၂ နၣ်ရံၣ်ဃၣ်ဃၣ်အဆၢကတီၢ် ပယီၤသုးလၢအိၣ်ကျိဖးဒိၣ်လူၢ်ဒီးမဲၢ်ထီးတလ့တကပၤသုးကျိၤ(၂)ကျိၤဟဲနုာ်လီၤ၀ဲဒၣ်လၢလ့က့ၣ်ကိာ်က၀ီၤဒ့တဖၣ်အပူၤခးလီၤကျိဖးဒိၣ်ကျိဖိတဖၣ်အဃိ ကတီၢ်ခဲအံၤတၢ်ဒုးကဲထီၣ်၀ဲဒီးဟီၣ်က၀ီၤ(KNLA)သုးပာ်ဖှိၣ်တဖၣ်အဂ့ၢ်န့ၣ် ဟီၣ်က၀ီၤတၢ်ကစီၣ်စံးဘၣ်ခ့ၣ်အဲးစံၣ်န့ၣ်လီၤႉ “တဂီၤအံၤ ၂ နၣ်ရံၣ်ဃၣ်ဃၣ်န့ၣ်သုးကျိၤဟဲလီၤ၀ဲလီၤႉ ပယီၤသုးလၢအိၣ်ဘၠူပွဲၢ်တၢ်လူၢ်ခိၣ်ႇကျိဖးဒိၣ်လူၢ်ႇမီထိၣ်သလ့ႇဖလူတကပၤတဖၣ်ဟဲထီၣ်၀ဲဒီး ခးလီၤ၀ဲဒၣ်ကျိဖးဒိၣ်ဆူလ့က့ၣ်ကိာ်က၀ီၤဒ့ပူၤကညီသုးဖိအိၣ်အလီၢ်အဃိတၢ်ဒုးကဲထီၣ်မီၤနီၤႉ ကညီသုးတဖၣ်နီၤဖးလီၤကရူၢ်ဒီးက့ၤခးကဒါ၀ဲႇခီဖျိတၢ်ဘၣ်ပယီၤသုးနးအဃိခးလီၤအါထီၣ်ကျိဖးဒိၣ်အဃိဟံၣ်ဃီဟးဂီၤ၀ဲဒီဒူၣ်ညါလီၤႉတုၤလၢခဲအံၤခး၀ဲအဖၢမုၢ်ဒံးလီၤ”အဂ့ၢ်န့ၣ် ဟီၣ်က၀ီၤတၢ်ကစီၣ်စံး၀ဲန့ၣ်လီၤႉ ဖဲစှၤသီအတီၢ်ပူၤလၢလ့က့ၣ်ကိာ်ဟီၣ်က၀ီၤအပူၤ ခီဖျိ(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်စဲးပြဲးတပယူာ်အဃိ ပယီၤသုးတကပၤသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် (KNLA)တကပၤစံး၀ဲန့ၣ်လီၤႉ ဖဲမဟါလါအ့ဖြ့ၣ် ၉ သီ ဟါခီအဆၢကတီၢ်စ့ၢ်ကီး ဒ်သိးကနုာ်လီၤမၤရှဲ၀ဲ(KNLA)သုးပာ်ဖှိၣ်လၢအဟူးဂဲၤဖဲလ့က့ၣ်ကိာ်က၀ီၤဒ့ပူၤႇထံမဲး၀ါခံသ၀ီပူၤတဖၣ်အဂီၢ် ပယီၤသုးသုးတြိၤ(၂၂)စုတီၤအဖီလာ်သုးတဖၣ်ႇသုးရ့ၣ်တဖၣ်ႇသုးတြိၤ(၄၄)စုတီၤအဖီလာ်သုးရ့ၣ်တဖၣ်ႇသုးခိးကီၢ်ဆၢ(BGF)သုးပာ်ဖှိၣ်(၂၀၀)ဃၣ်ဃၣ်သုးကျိၤ(၂)ကျိၤနုာ်လီၤခး၀ဲအဃိ ခံခီခံကပၤတၢ်ဒုးကဲထီၣ်ဒံး၀ဲန့ၣ်လီၤ တၢ်ဒုးကဲထီၣ်ဘျီ၀ဲအံၤအပူၤ ပၣ်ဃုာ်၀ဲဒီးအပူၤကွံာ်လါမးရှး ၂၅ သီအနံၤ ပယီၤသုး(ခမရ-၅၈၅)သုးရ့ၣ်ခိၣ်-၂ သုးခိၣ်ဒိၣ်ဖိတ့ၤလ့အီၤဃုာ်ဒီး(CDM)ပယီၤသုးဖိလၢအဟဲက့ၤပာ်ဖှိၣ်မၤသကိးတၢ်ဒီး(KNLA)သုးပာ်ဖှိၣ်အံၤတနီၤစ့ၢ်ကီးထီၣ်ဒုးမၤစၢၤ၀ဲ(KNLA)သုးပာ်ဖှိၣ်လၢတၢ်ဒုးဘျီ၀ဲအံၤအပူၤအဂ့ၢ်န့ၣ်...

လါအ့ဖြ့ၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါအ့ဖြ့ၣ် ၆ သီ ဟါခီအဆၢကတီၢ် ခီဖျိပယီၤသုးခးလီၤကျိဖးဒိၣ်တပယူာ်ဃီဆူခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤ ကီးတရံးကီၢ်ဆၣ် ကၠီၣ်ထၣ်သ၀ီပူၤအဃိ လီၢ်က၀ီၤသ၀ီဖိတနီၤဘၣ်လဲၤစံၣ်အိၣ်လၢကီၢ်ကၠီၣ်တဲၣ်ကီၢ်ဆၢတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါအ့ဖြ့ၣ် ၆ သီ ဟါခီ ၈ နၣ်ရံၣ်ဃၣ်ဃၣ်အဆၢကတီၢ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လဲၤထီၣ်ခး၀ဲပယီၤသုးကလၢၤလၢအအိၣ်ဖဲကၠီၣ်ထၣ်သ၀ီမုၢ်ထီၣ်တကပၤကဲထီၣ်သး၀ံၤ ခီဖျိပယီၤသုးကလၢၤလၢအအိၣ်ဖဲဖိဆံၣ်မုၢ်သ၀ီတဖၣ် က့ၤခးလီၤကျိဖးဒိၣ်ဆူကၠီၣ်ထၣ်သ၀ီပူၤအဃိ သ၀ီဖိတဖၣ်ပျံၤတၢ်ဖုးတၢ်ဘၣ်ဟးစံၣ်ပလဲာ်သးန့ၣ်လီၤႉ ပယီၤသုးခးလီၤကျိဖးဒိၣ်ဘျီ၀ဲအံၤလီၢ်က၀ီၤသ၀ီဖိတၢ်ဘၣ်ဒိဘၣ်ထံးတအိၣ်၀ဲဘၣ်ဆၣ် ခီဖျိဘၣ်ယိၣ်၀ဲလၢတၢ်ဒုးကဆူၣ်ထီၣ်အဃိဟးစံၣ်ပလဲာ်စိအသးဒီး ၦၤဃ့ၢ်တၢ်ဒုးဖိလၢအလဲၤစံၣ်အိၣ်လၢ ကီၢ်ကၠီၣ်တဲၣ်-ကီၢ်ပယီၤကီၢ်ဆၢတဖၣ်အါဒၣ်တက့ၢ်န့ၣ်မ့ၢ်၀ဲၦၤသူၣ်က့သးၦၢ်ႇမိၢ်ဒီးဖိဒံဖိသၣ်သ့ၣ်တဖၣ်လီၤအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ ကၠီၣ်ထၣ်သ၀ီဖိတဂၤစံး၀ဲ“ခးလီၤတၢ်န့ၣ်အိၣ်အါလၢကျိဖးဒိၣ်လီၤႉမ့မ့ၢ်ကျိချံဖိဒုပအိၣ်ဟံၣ်ပူၤသ့လီၤမီၤႉအမၤ၀ဲလၢတၢ်ဖးဒိၣ်ခါန့ၣ်ဘျီပဘၣ်အိၣ်၀ဲလၢတၢ်ပူၤလီၤႉအိၣ်လၢတၢ်ပူၤတနီၤလဲၤထီၣ်အိၣ်လၢသီခါဖၠၣ်တနီၤမီၤႉသ၀ီဖိလၢအအိၣ်ဒီးအဒံၣ်ဆံးဖိဆံးႇသူၣ်က့သးၦၢ်တဖၣ်န့ၣ်လဲၤစံၣ်အိၣ်၀ဲလၢပၢချၢတကပၤန့ၣ်ဒီဒူၣ်ညါႉအိၣ်၀ဲတဘူၣ်ဘၣ်ဘၣ်ယိၣ်၀ဲလၢကဘီယူၤကဟဲတ့ၢ်လီၤမ့ၣ်ပိၢ်လီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါမးရှးဘူးကလၢာ်အခါစ့ၢ်ကီး ဟီၣ်က၀ီၤဖဲန့ၣ်အပူၤခီဖျိတၢ်ဒုးကဲထီၣ်၀ဲလၢဟီၣ်က၀ီၤ(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤဒံးအဃိ သ၀ီ(၆)ဖျၢၣ်လၢအပၣ်ဃုာ်ဒီးထံတဘျုၣ်ခံသ၀ီႇကွံလ့ႇကွံလိတၣ်ဒီးမီၣ်သ၀ီ လီၢ်က၀ီၤဖိ(၁၀၀၀)ဘျဲၣ် ဘၣ်လဲၤစံၣ်အိၣ်၀ဲလၢကီၢ်ကၠီၣ်တဲၣ်-ကီၢ်ပယီၤကီၢ်ဆၢကဲထီၣ်တ့ၢ်အသးဒံးန့ၣ်လီၤႉ ဖဲအပူၤကွံာ်လါအ့ဖြ့ၣ် ၃ သီဒီး ၄ သီအနံၤစ့ၢ်ကီး ဟီၣ်က၀ီၤ(KNLA)ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်ဒံး၀ဲလၢကီးတရံးကလံၤထံးကျ့းသ၀ီပူၤဒီး ဖဲန့ၣ်ခီဖိပယီၤသုးကဘီယူၤဟဲခးလီၤတၢ်ခံသီတပယူာ်ဃီအဃိ...

လါအ့ဖြ့ၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိပယီၤမၤအါထီၣ်အသုးဒီးနုာ်လီၤမၤဒုးယၤတၢ်ဟူးတၢ်ဂဲၤလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ကီးတရံးကလံၤထံးဟီၣ်က၀ီၤပူၤအဃိ သ၀ီ(၂၁)ဖျၢၣ် ကမျၢၢ်နီၣ်ဂံၢ်တကလးဘျဲၣ်အံၤဘၣ်ဃ့ၢ်၀ဲအဆၢကတီၢ်ယံၤလံဒီး သဂၢၢ်ဘၣ်၀ဲတၢ်အီၣ်တၢ်အီတကူတလၢအဂ့ၢ်န့ၣ် ၦၤလီၢ်အိၣ်ကဒုဖိတဖၣ်စံး၀ဲန့ၣ်လီၤႉ လီၢ်က၀ီၤကမျၢၢ်ၦၤဃ့ၢ်တၢ်ဒုးဖိ(၁၂ႇ၀၀၀)ဘျဲၣ်လၢအပၣ်ဃုာ်၀ဲဒီးသူၣ်က့သးၦၢ်ႇမိၢ်ဒီးဖိဒံဖိသၣ်တဖၣ်အံၤ ဘၣ်ဟးဃ့ၢ်၀ဲအဆၢကတီၢ်ယံၤထီၣ်ဒီးသဂၢၢ်ဘၣ်၀ဲတၢ်အီၣ်တၢ်အီတၢ်ကီတၢ်ခဲအသိး ခီဖျိတၢ်မၤစၢၤအကျဲတဖၣ်စ့ၢ်ကီးပတုာ်သးအဃိ ထံၣ်ဘၣ်တၢ်ကီတၢ်ခဲဟဲအါထီၣ်၀ဲအဂ့ၢ်န့ၣ် လီၢ်က၀ီၤၦၤဃ့ၢ်တၢ်ဒုးဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ ကတိထၣ်သ၀ီဖိတဂၤစံး၀ဲ“ပဟးစံၣ်န့ၢ်ဒီတလါလံႉလဲၤစံၣ်အိၣ်လၢဘူတံၢ်တဘျီဘျီႇဟဲက့ၤစံၣ်အိၣ်လၢကျီးပူူၤ ဘျီဘျီႇလီၢ်ကျဲအဂၢၢ်တအိၣ်ဘၣ်ႉပဟးစံၣ်အိၣ်မ့န့ၢ်တနွံအသီတဆံန့ၣ်ပယီၤသုးနုာ်လီၤတၢ်ဒုးကဲထီၣ် ဘၣ်ဟးစံၣ်ကဒီးလၢတၢ်လီၢ်အဂၤလီၤႉခဲအံၤၦၤဟဲနီၤလီၤအီၣ်ၦၤတၢ်လီၤႉကလဲၤၦ့ၤအီၣ်လၢသ၀ီအဂၤနါက့လၢကျးပူၤန့ၣ်တၢ်တအိၣ်နီတမံၤလၢၤဘၣ်ႉကလဲၤၦ့ၤအီၣ်လၢ၀့ၢ်ပူၤနါက့လဲၤက့ၤတညီဘၣ်အဃိကအီၣ်ကအီအဂီၢ်တၢ်ကီတၢ်ခဲဟဲအိၣ်ထီၣ်လီၤႉအခိၣ်သ့ၣ်န့ၣ်မ့ၢ်၀ဲဟုသးဒီးတၢ်အီၣ်တၢ်အီတဖၣ်လီၤ”အဂ့ၢ်န့ၣ်စံး၀ဲန့ၣ်လီၤႉ လၢန့ၣ်အမဲာ်ညါတၢ်လီၢ်လၢၦၤဃ့ၢ်တၢ်ဒုးဖိလဲၤစံၣ်အိၣ်၀ဲအလီၢ်တဖၣ်တၢ်ဒုးကဲထီၣ်ကိးမုၢ်နံၤဒဲးအသိး ခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိ ဘၣ်ဟးစံၣ်မံလၢမုၢ်နၤခီအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ လၢကီးတရံးကလံၤထံးဟီၣ်က၀ီၤ ကီးတရံး-ကၠဲးဒိကျဲဒီးတီၤကၠၤအ့-ကၠၤအ့စ့ၣ်ကၠံကျဲခံဘိလၢာ်ဒီတကျိၤန့ၣ် ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ တၢ်ဒုးမ့ကဲထီၣ်တဘျီလၢ်လၢ်ခီဖျိပယီၤသုးအံၤခးလီၤကျိဖးဒိၣ်ဆူဒူသ၀ီပူၤႇကဘီယူၤဟဲခးလီၤတၢ်အဃိ လီၢ်က၀ီၤဖိအဟံၣ်အဃီႇတၢ်ဘူၣ်တၢ်ဘါတၢ်သူၣ်ထီၣ်တဖၣ်ဟးဂူာ်ဟးဂီၤအ၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ခီဖျိတၢ်ဒုးကဲထီၣ်လၢ(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤအဃိ လၢခ့ၣ်အဲၣ်ယူၣ်-ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် တီနီၢ်မုၢ်နုာ်(ကီးတရံးကလံၤထံး)တကပၤန့ၣ် လီၢ်က၀ီၤကမျၢၢ်လၢအဘၣ်ဃ့ၢ်တၢ်ဒုးအိၣ်၀ဲ(၁၂ႇ၁၇၇)ဂၤအသိး လၢတီနီၢ်မုၢ်ထီၣ်(မၠၣ်၀တံၣ်ကလံၤထံး)တကပၤစ့ၢ်ကီး ၦၤဃ့ၢ်တၢ်ဒုးဖိအိၣ်၀ဲ(၁၁ႇ၄၃၄)ဂၤအဂ့ၢ်န့ၣ် သ့ၣ်ညါဘၣ်လၢတၢ်ကရၢကရိလၢအမၤစၢၤၦၤလီၢ်အိၣ်ကဒုဖိအတၢ်မၤနီၣ်စရီပူၤန့ၣ်လီၤႉ ဒ်ကညီပိာ်မုၣ်ကရၢ(KWO)အတၢ်မၤနီၣ်စရီအသိးန့ၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ႇတီအူႇချၢၣ်လွံၢ်ထူၣ်ႇဘျံးဒ၀ဲၢ်ႇမုၢ်တြီၢ်ႇဒူပျာ်ယာ်ဒီးဖၣ်အၣ်ကီၢ်ရ့ၣ်(၇)ဘ့ၣ်အပူၤ ကမျၢၢ်ၦၤလီၢ်အိၣ်ကဒုဖိခဲလၢာ်အိၣ်၀ဲ(၁၀၀ႇ၀၀၀)ဘျဲၣ်ဒီး လၢၦၤသ့ၣ်တဖၣ်အံၤအဂီၢ်လိၣ်ဘၣ်၀ဲဂ့ၢ်ဂီၢ်အူတၢ်ဆီၣ်ထွဲမၤစၢၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါအ့ဖြ့ၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါမးရှးန့ၣ် မီခံပယီၤသုးကလၢၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လဲၤထီၣ်မၤန့ၢ်ကွံာ် ၀ဲအံၤ ဖဲတနံၤအံၤလါအ့ဖြ့ၣ် ၆ သီ မုၢ်ထူၣ်အဆၢကတီၢ် ပယီၤသုးဟဲက့ၤထီၣ်တုၤကဒါလၢသုးကလၢၤအလီၢ်လံအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ ဒ်သိးပယီၤသုးကက့ၤဆ့ၣ်နီၤအိၣ်ကဒါလၢမီခံသုးကလၢၤအံၤအဂီၢ်န့ၣ် စးထီၣ်လၢလါအ့ဖြ့ၣ် ၅ သီအနံၤန့ၣ် သုးကျိၤဂံၢ်ဘါအါအါဂီၢ်ဂီၢ်ဟဲထီၣ်၀ဲဒၣ်လၢဂီၤလ့ၤမီခံသုးကလၢၤတကပၤဒီး ခီဖျိလၢ(KNLA)သုးပာ်ဖှိၣ်အိၣ်ခိးခးအ၀ဲသ့ၣ်လၢတၢ်ဒ့ၣ်စၢၤကျဲဒီတဘိအဃိ ပယီၤသုးသံဘၣ်ဒိဘၣ်ထံး၀ဲအါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်ကီးတရံးကီၢ််ဆၣ်နဲၣ်ရွဲၣ် ပဒိၣ်စီၤအဲၣ်ကီၢ်သီ စံး၀ဲန့ၣ်လီၤႉ အ၀ဲစံး၀ဲလၢ“အ၀ဲသ့ၣ်ဟဲတုၤ၀ဲဒၣ်လၢသုးကလၢၤအံၤဖဲမုၢ်ထူၣ်အခါလီၤႉ ခဲအံၤအ၀ဲသ့ၣ်မ့ထီၣ်တုၤလၢတၢ်ဒီခိၣ်ဒုအိၣ်ဒၣ်ကဟးခးစိလီၤတၢ်ဒီးကျိဖးဒိၣ်ဒ်န့ၣ်လီၤႉ အ၀ဲသ့ၣ်ခဲလၢာ်သံဘၣ်ဒိဘၣ်ထံးကအိၣ်လၢအဂၤ(၂၀)ညါႉဘၣ်မနုၤအဃိလဲၣ်န့ၣ်ဖဲမုၢ်နၤန့ၣ်က့ၤလီၤဆှၢၦၤဆါသိလ့ၣ်ခံခိၣ်လၢဂီၤလ့ၤတကပၤလီၤႉသိလ့ၣ်တခိၣ်န့ၣ်အိၣ်ၦဲၤဂၤခီလဲၣ်န့ၣ်ပတသ့ၣ်ညါလီၤတံၢ်ဘၣ်ႉၦၤက့ၤဆှၢဖဲမုၢ်ဟါခါအကျါန့ၣ်ပၣ်ဃုာ်၀ဲသုးကျိၤခိၣ်ႇသုးဒ့ခိၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢပယီၤသုးကက့ၤဆ့ၣ်နီၤအိၣ်ကဒါလၢမီခံသုးကလၢၤအဂီၢ် ပယီၤသုးကျိၤလၢအဟဲနုာ်လီၤတဖၣ်အံၤ ခီဖျိဟီၣ်က၀ီၤ(KNLA)ႇ(KNDO)သုးပာ်ဖှိၣ်အိၣ်ခိးခးအ၀ဲသ့ၣ်တၢ်ဘၢၣ်စၢၤအဃိ ပယီၤသုးတကပၤသံဘၣ်ဒိဘၣ်ထံးအဂၤ(၂၀)ဘျဲၣ်အသိး (KNLA)ႇ(KNDO)သုးပာ်ဖှိၣ်တကပၤစ့ၢ်ကီးဘၣ်ဟ့ၣ်လီၤကွံာ်အသးသမူဘၣ်ဒိဘၣ်ထံးအိၣ်၀ဲတနီၤအဂ့ၢ်န့ၣ် (KNDO)တကပၤစံး၀ဲန့ၣ်လီၤႉ မီခံပယီၤသုးကလၢၤအံၤဖဲအပူၤကွံာ်လါမးရှး ၂၁ သီအနံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNDO)သုးက့ ၆ ဒီး ကညီဒီကလုာ်ဂၢၤသးကရၢ(KNDO)သုးပာ်ဖှိၣ်တဖၣ်လဲၤထီၣ်မၤန့ၢ်ရှဲလဲကွံာ်၀ဲဒီး မၤန့ၢ်၀ဲပယီၤသုးအကျိချံၦာ်သၣ်အါအါဂီၢ်ဂီၢ်ဒံးန့ၣ်လီၤႉ “စးထီၣ်လၢၦၤလဲၤထီၣ်မၤရှဲကွံာ်သုးကလၢၤအံၤန့ၣ်မတၤတဂၤမးတအိၣ်ဘၣ်ႉ အသုးကလၢၤန့ၣ်ၦၤမၤပျီဃာ်ၦၤဒိးလီၤဃာ်ဒီးမ့ၣ်ပိၢ်စ့ၢ်မီၤနီၤႉအဃိန့ၣ်အဆိမိၣ်မ့ၢ်အ၀ဲသ့ၣ်အိၣ်မုာ်ဧါတမုာ်ဧါန့ၣ်ခဲမုၢ်ဟါမးပကသ့ၣ်ညါဘၣ်တၢ်အိၣ်သးတစဲးလီၤ”အဂ့ၢ်န့ၣ်...

လါအ့ဖြ့ၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်လါအ့ဖြ့ၣ် ၃ သီ ဟါခီ ၇ နၣ်ရံၣ်ဘျဲၣ်တုၤလၢမုၢ်၀ါထီၣ်တစု ပယီၤသုးတဟ့ၣ်အခွဲးလၢကဟးထီၣ်က့ၤလီၤလၢ ကၠၤအ့စ့ၣ်ကၠံကီၢ်ဆၣ် ချၢၣ်-တကူၣ်တၢၣ်ပယီၤပၢၤကီၢ်သုး၀ဲၤလီၢ်အမဲာ်ညါလၢၤဘၣ်တကးဒံးဘၣ်အမဲာ်ညါ မ့ထံၣ်ၦၤလၢအလီၤဆီတဖၣ်ကခး၀ဲအဂ့ၢ်န့ၣ် သ့ၣ်ညါဘၣ်လၢ၀ီၢ်ရီလီၢ်က၀ီၤသ၀ီၤသ၀ီၦၤဘၣ်မူဘၣ်ဒါအအိၣ်န့ၣ်လီၤႉ ဖဲအပူၤကွံာ်လါအ့ဖြ့ၣ် ၂ သီ ဟါခီ ၈ နၣ်ရံၣ်အဆၢကတီၢ် တၢ်ခးလိာ်သးကဲထီၣ်၀ဲလၢတကူၣ်တၢၣ်ပယီၤပၢၤကီၢ်သုး၀ဲၤလီၢ်အကပၤ၀ံၤအလီၢ်ခံ လၢအ၀ဲသ့ၣ်တၢ်ဘံၣ်တၢ်ဘၢအဂီၢ်သမံးသမိး၀ဲၦၤလၢအဟးထီၣ်က့ၤလီၤလၢအသုး၀ဲၤလီၢ်အမဲာ်ညါတဖၣ်ဒီး တပျဲၦၤဟးထီၣ်က့ၤလီၤလၢမုၢ်နၤခီလၢၤဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ၀ီၢ်ရီလီၢ်က၀ီၤဖိတဂၤစံး၀ဲ“စးထီၣ်လၢဟါခီ ၇ နၣ်ရံၣ်တုၤလၢမုၢ်၀ါထီၣ်န့ၣ် တဟ့ၣ်ခီတဲာ်၀ဲဖဲအသုး၀ဲၤလီၢ်အမဲာ်ညါန့ၣ်လၢၤဘၣ်ႉ မ့ထံၣ်၀ဲၦၤလၢအလီၤဆီန့ၣ်ကခး၀ဲလီၤႉတဲ၀ဲလၢၦၤဟ့ၣ်လီၤတၢ်ကလုၢ်လၢကဘၣ်ခးလီၤႉခဲအံၤတၢ်သမံသမိး၀ဲသိလ့ၣ်ႇသိလ့ၣ်ယီၢ်တဖၣ်ဟဲအါထီၣ်လီၤႉခီဖျိဖိသၣ်တဖၣ်ဘၣ်ဒိးစဲးအဃိပဘၣ်ကိၢ်ဘၣ်ဂီၤတၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိပယီၤသုးတြီဃာ်လၢတဘၣ်ဟးထီၣ်က့ၤလီၤလၢပၢၤကီၢ်သုး၀ဲၤလီၢ်အမဲာ်ညါလၢၤဘၣ်အဃိ ၦၤလၢအဖံးအီၣ်မၤအီၣ်တၢ်လၢရီဘၢၣ်ကျီးပူၤသ့ၣ်တဖၣ်ႇၦၤဟးထီၣ်က့ၤလီၤဖိတဖၣ်တၢ်ကီတၢ်ခဲဟဲအိၣ်ထီၣ်၀ဲဒီး ဘၣ်ယိၣ်လၢတၢ်ဒုးကဟဲကဲထီၣ်လၢဟီၣ်က၀ီၤပူၤအဂ့ၢ်န့ၣ် ၀ီၢ်ရီလီၢ်က၀ီၤဖိတဖၣ်စံး၀ဲန့ၣ်လီၤႉ “ရီဘၢၣ်တၢ်မၤန့ၣ်ဘၣ်လဲၤလၢ(၁၂)မးမီၤနီၤႉခဲအံၤမုၢ်နၤခီတပျဲဟးထီၣ်ဟးလီၤလၢၤဘၣ်အဃိကဘၣ်မၤက့ၤဒ်လဲၣ်မီၤနီၤႉၦၤနီသိလ့ၣ်ဖိလၢအဂၤတဖၣ်နါက့လၢတၢ်လုၢ်အီၣ်နီၢ်ခိသးသမူအဂီၢ်ကကီခဲထီၣ်လီၤႉမ့မၤ၀ဲဒ်အံၤဒုတမ့ၢ်လၢဟီၣ်က၀ီၤပူၤတၢ်တမုာ်တခုၣ်လၢၤဘၣ်”အဂ့ၢ်န့ၣ် ၀ီၢ်ရီလီၢ်က၀ီၤဖိနီၢ်အဲၣ်၀ါစံး၀ဲန့ၣ်လီၤႉ တကူၣ်တၢၣ်ပယီၤပၢၤကီၢ်သုး၀ဲၤလီၢ်အံၤသုးခိးကီၢ်ဆၢ(BGF)ဒီးပယီၤသုးတဖၣ်ပာ်လီၤအသုးကလၢၤအိၣ်ဆိး၀ဲလၢကရၢၢ်ပူၤဒီး ၦၤလၢအဟးထီၣ်က့ၤလီၤသ့ၣ်တဖၣ်အ၀ဲသ့ၣ်သမံသမိး၀ဲဒီး ၀ီၢ်ရီကျဲမုၢ်လၢအအိၣ်ဖဲအ၀ဲသ့ၣ်သုးကလၢၤအမဲာ်ညါအံၤစ့ၢ်ကီး စးထီၣ်လၢ(၇)နၣ်ရံၣ်ဘျဲၣ်န့ၣ်...

လါအ့ဖြ့ၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါအ့ဖြ့ၣ်(၅)သီအနံၤလၢအလီၤဘၣ်၀ဲကညီပိာ်မုၣ်ကရၢ(KWO-Karen Women's Organization)မုၢ်နံၤၦဲၤထီၣ်(၃၇)၀ီတ၀ီအပူၤန့ၣ် (KWO)ဃုထၢဟ့ၣ်လၤကပီၤ၀ဲကညီပိာ်မုၣ်(၈)ဂၤခိၣ်ဖးလၢအဟူးဂဲၤဖံးမၤတၢ်လၢအသနၢၣ်ဒၣ်၀ဲစုာ်စုာ်သ့ၣ်တဖၣ်န့ၣ်လီၤႉ လၢတၢ်ကဟ့ၣ်မၤလၤကပီၤကညီပိာ်မုၣ်လၢအဟူးဂဲၤဖံးမၤတၢ်လၢအသနၢၣ်ဒၣ်၀ဲလၢကမျၢၢ်အဂီၢ်အံၤန့ၣ် ဒ်(KWO)အတၢ်သူၣ်ထီၣ်ဆီလီၤအိၣ်ပာ်အသိး တနံၣ်အံၤ(KWO)လီၢ်ခၢၣ်သးဃုထၢဟ့ၣ်လၤကပီၤ၀ဲ ကညီပိာ်မုၣ်လၢအဟူးဂဲၤဖံးမၤတၢ်လၢဆူၣ်ချ့ႇကူၣ်သ့ႇထံရူၢ်ကီၢ်သဲးႇၦၤဂ့ၢ်၀ီခွဲးယာ်ဒီးသ၀ီသးၦၢ်မုၣ်တဖၣ်လီၤအဂ့ၢ်န့ၣ် ကညီပိာ်မုၣ်ကရၢ(KWO)နဲၣ်ရွဲၣ်နီၢ်ကညီဖီစံး၀ဲဒ်အံၤန့ၣ်လီၤႉ နီၢ်ကညီဖီစံး၀ဲလၢ“ကညီပိာ်မုၣ်ကရၢမုၢ်နံၤအံၤလၢပတၢ်ဘျၢခိၣ်သ့ၣ်အကိပူၤန့ၣ်အိၣ်ပာ်စၢၤမီၤနီၤႉကညီပိာ်မုၣ်လၢအဟ့ၣ်လီၤအသးလၢတၢ်ဖံးတၢ်မၤႇလၢတၢ်အိၣ်ဆူၣ်အိၣ်ချ့မ့ၢ်ဂ့ၤႇၦၤတ၀ၢတၢ်ဖံးတၢ်မၤသ့ၣ်တဖၣ်န့ၣ်ပကြၢးဟ့ၣ်လၤကပီၤအီၤမီၤနီၤႉမ့တမ့ၢ်၀ဲဒၣ်ကညီပိာ်မုၣ်ကရၢဖိဘၣ်သနါက့တနံၣ်အံၤပဃုထၢ၀ဲဒၣ်ၦၤဃိးဂၤလၢအဒိးန့ၢ်ဘၣ်တၢ်လၤကပီၤလၢလီၢ်ခၢၣ်သးအပတီၢ်မီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကညီပိာ်မုၣ်လၢ(KWO)ဟ့ၣ်လၤကပီၤအီၤသ့ၣ်တဖၣ်မ့ၢ်၀ဲ ဒီကလုာ်ဃူဖိး(NUG) ပိာ်မုၣ်ႇသးစၢ်ဒီးဖိသၣ်ဂ့ၢ်၀ီကိတိာ်၀ဲၤကျိၤ ကိတိာ်နီၢ်စူၣ်စဲနၢ်လၣ်လၣ်စိႇ (NUG)ပဒိၣ် တၢ်တြီဆၢတၢ်မၤဟးဂီၤၦၤဟီၣ်ခိၣ်ဖိဒီးန့ဆၢၣ်တၢ်ခွဲးတၢ်ယာ် ကိတိာ်ခိၣ်ကျၢၢ်-၂ နီၢ်ထူဖီႇ ၦၤဟူးဂဲၤလၢၦၤဂ့ၢ်၀ီခွဲးယာ် နၣ်စိၤယၤဖါဒီးနီၢ်မဲယၤဒါဂ့ၤဖီႇ (KNU)လီၢ်ခၢၣ်သးတၢ်ကရၢဒီးတၢ်ဘိးဘၣ်ရၤလီၤ ပဒိၣ်နီၢ်ဖီဂ့ၤခုၣ်ႇ ၦၤဟူးဂဲၤဖံးမၤတၢ်လၢကူၣ်သ့သနၢၣ် နီၢ်ညူထဲၤဘၤထိႇ ကညီဆူၣ်ချ့မၤစၢၤ၀ဲၤကျိၤနီၢ်ဒါဒီး ဖံနီၢ်ဖီညိၣ်လၢအဟံးတ့ၢ်မူဒါလၢသ၀ီသးၦၢ်မုၣ်လၢအနံၣ်(၂၀)ဘျဲၣ်အံၤသ့ၣ်တဖၣ်န့ၣ်လီၤႉ လၢန့ၣ်အမဲာ်ညါတၢ်ရဲၣ်တၢ်ကျဲၤဘျီ၀ဲအံၤအပူၤ(KWO)မၤလၤကပီၤစ့ၢ်ကီး၀ဲ ကညီပိာ်မုၣ်အဂၤ(၄၀)လၢအဟူးဂဲၤဖံးမၤတၢ်လၢကညီပိိာ်မုၣ်ကရၢပူၤလၢလီၢ်ခၢၣ်သးအပတီၢ်မ့ၢ်ဂ့ၤႇကီၢ်ရ့ၣ်အပတီၢ်မ့ၢ်ဂ့ၤႇကီၢ်ဆၣ်အပတီၢ်မ့ၢ်ဂ့ၤလၢအယံၤ(၁၀)နံၣ်ႇ(၁၅)နံၣ်ႇ(၂၀)နံၣ်ႇတုၤလၢ(၂၅)နံၣ်သ့ၣ်တဖၣ်န့ၣ်လီၤႉ ကညီပိာ်မုၣ်ကရၢမုၢ်နံၤၦဲၤထီၣ်(၃၇)နံၣ်အဂီၢ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် ပဒိၣ်ထဲဒၢၣ်ႇ တီအူကီၢ်ရ့ၣ်ပဒိၣ်စီၤအဲၣ်၀ါႇပိာ်မုၣ်ခိၣ်နၢ်လၢအသးၦၢ်ကတၢၢ်တဂၤစံးကတိၤဟ့ၣ်ဂံၢ်ဟ့ၣ်ဘါလီၤလၢတၢ်ဂီၤမူတဆီႇတၢ်ဖးဖျါထီၣ်လံာ်ဟ့ၣ်ယုၢ်ႇတၢ်ဖးဖျါထီၣ်(KWO)ဟဲကဲထီၣ်သးအဂ့ၢ်အကျိၤဒီးတၢ်သး၀ံၣ်စံးထီၣ်ပတြၢၤတၢ်သ့ၣ်တဖၣ်န့ၣ်လီၤႉ (KNU)တၢ်ကရၢဒီးတၢ်ဘိးဘၣ်ရၤလီၤ၀ဲၤကျိၤ နဲၣ်ရွဲၣ် ပဒိၣ်နီၢ်ဖီဂ့ၤခုၣ်လၢဘၣ်တၢ်ဟ့ၣ်လၤကပီၤအီၤခိၣ်ဖးအံၤစ့ၢ်ကီးစံး၀ဲလၢ “တၢ်ဖံးတၢ်မၤလၢပမၤတ့ၢ်သ့ၣ်တဖၣ်မီၤနီၤလၢၦၤတ၀ၢတၢ်ဖံးတၢ်မၤပူၤန့ၣ်ပထံၣ်ဘၣ်လၢလီၢ်က၀ီၤပူၤမ့ၢ်ဂ့ၤႇတၢ်ကရၢကရိပူၤမ့ၢ်ဂ့ၤႇ၀ဲၤကျိၤ၀ဲၤဒ့အပူၤမ့ၢ်ဂ့ၤန့ၣ်တၢ်လိၣ်အိၣ်အါမးမီၤနီၤႉလၢပိာ်မုၣ်သ့ၣ်တဖၣ်န့ၣ်ပထံၣ်ဘၣ်လၢအနီၣ်ဂံၢ်နီၣ်ဒွးဖးစှၤညါႉအဃိန့ၣ်ပဆၢမုၢ်လၢ်လၢပိာ်မုၣ်မိာ်မၢၤအါဒံအါဂၤန့ၣ်ကနုာ်လီၤမၤႇဘၣ်မနုၤအဃိလဲၣ်န့ၣ်တၢ်လီၢ်လီၤဟိအိၣ်အါမးလီၤႉ...

လါအ့ဖြ့ၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကံွာ်လါမးရှးတလါအတီၢ်ပူၤခီဖျိပယီၤသုးမီၤစိရိၤဒီးသုးခိးကီၢ်ဆၢ(BGF)သုးခးလီၤနါစိၤကျိဖးဒိၣ်ကျိဖိတဖၣ်ဆူခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤအဃိ ကမျၢၢ်သံ(၂၅)ဂၤဒီးဘၣ်ဒိ(၃၁)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ ခီဖျိပယီၤသုးဒီး(BGF)သုးတဖၣ်ခးလီၤကျိဖးဒိၣ်အဃိမ့ၢ်ဂ့ၤႇဟဲခးလီၤတၢ်လၢကဘီယူၤမ့ၢ်ဂ့ၤႇမၤဟးဂီၤကမျၢၢ်အတၢ်ဖိတၢ်လံၤမ့ၢ်ဂ့ၤ ပထိၣ်ဒွးက့ၤလၢစိၤခဲအံၤအလုၢ်အၦ့ၤကလီၤလၢ၀ဲလၢစ့အကလီၢ်တကထိဃၣ်ဃၣ်ညါအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါလၢခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်ႇမုၢ်တြီၢ်ကီၢ်ရ့ၣ်ဒီးဒူပျာ်ယာ်ကီၢ်ရ့ၣ်ဟီၣ်က၀ီၤတဖၣ်အပူၤ ခီဖျိပယီၤသုးသူ၀ဲကဘီယူၤဟဲခးလီၤတၢ်အိၣ်၀ဲ(၈)ဘျီညါအဃိ ကမျၢၢ်ဘၣ်ဒိ၀ဲ(၂)ဂၤဒီးကမျၢၢ်အဟံၣ်အဃီတၢ်သူၣ်ထီၣ်ဟးဂီၤ၀ဲအါမးအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ခီဖျိပယီၤသုးမၤ၀ဲတၢ်ထီၣ်ဒုးႇခးလီၤကျိဖးဒိၣ်ကျိဖိတဖၣ်ဒီးကဘီယူၤဟဲတ့ၢ်လီၤမ့ၣ်ပိၢ်လၢခ့ၣ်အဲၣ်ယူၣ်တၢ်ပၢဟီၣ်က၀ီၤပူၤအဃိ လီၢ်က၀ီၤကမျၢၢ်(၁၀၀ႇ၀၀၀)ဘျဲၣ်ဘၣ်ပာ်တ့ၢ်ကွံာ်အဟံၣ်အဃီဘၣ်ဟးစံၣ်ပလဲာ်သးအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ ကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢစီၤနဒၣ်ဆူစံး၀ဲ“လၢတၢ်ကဲထီၣ်သးတခါအံၤအဖီခိၣ်န့ၣ်ပမ့ကွၢ်ကဒါက့ၤလၢၦၤဂ့ၢ်၀ီခွဲးယာ်တကပၤခီန့ၣ်မ့ၢ်တၢ်မၤဘၣ်ဒိ၀ဲဒၣ်ၦၤဂ့ၢ်၀ီခွဲးယာ်ဒိၣ်ဒိၣ်မုၢ်လီၤမီၤနီၤႉဒီးဒ်န့ၣ်အသိးစ့ၢ်ကီးလၢထံဂုၤကီၢ်ဂၤတၢ်သိၣ်တၢ်သီတၢ်ဘျၢ(International Humanitarian Law)နါက့အ၀ဲမၤဘၣ်ဒိ၀ဲဒၣ်တဲာ်တဲာ်ဖျုဖျုလီၤမီၤနီၤႉအဃိသတးန့ၣ်ခီဖျိလၢကျိဖးဒိၣ်ခးလီၤတၢ်မ့ၢ်ဂ့ၤႇကဘီယူၤဟဲကွံာ်လီၤတၢ်မ့ၢ်ဂ့ၤႇတၢ်ဒုးတၢ်ယၤကဲထီၣ်မ့ၢ်ဂ့ၤန့ၣ်တၢ်လၢအမၤဘၣ်ဒိၦၤဂ့ၢ်၀ီခွဲးယာ်အဒိၣ်ကတၢၢ်န့ၣ်ကမ့ၢ်၀ဲဒၣ်လီၢ်က၀ီၤကမျၢၢ်အတၢ်အိၣ်မူအတၢ်ဘံၣ်တၢ်ဘၢမီၤနီၤႉဒ်န့ၣ်အသိးလၢသူၣ်သးတကပၤစ့ၢ်ကီးန့ၣ်အသုတၢ်ဘံၣ်တၢ်ဘၢတအိၣ်လၢၤဘၣ်ႉခံထံၣ်တထံၣ်န့ၢ်မၤဘၣ်ဒိ၀ဲတၢ်လုၢ်အီၣ်နီၢ်ခိသးသမူခွဲးယာ်လီၤႉတၢ်သ့ၣ်တဖၣ်အံၤကြၢးလၢတၢ်ကဘၣ်ပတုာ်အီၤလၢအဆိအချ့လီၤ”အဂ့ၢ်န့ၣ် စံး၀ဲန့ၣ်လီၤႉ ဒ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးန့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢကီၢ်သူလ့ၤတၢ်ပၢဟီၣ်က၀ီၤပူၤ ကညီဒီကလုာ်တၢ်ဖူၣ်ဖျဲးသုးမုၢ်ဒိၣ်(KNLA)ႇကညီဒီကလုာ်ဂၢၤသးကရၢ(KNDO)ဒီးသုးမီၤစိရိၤႇသုးခိးကီၢ်ဆၢ(BGF)သုးတဖၣ်အဘၢၣ်စၢၤ တၢ်ဘၣ်သဂၢၢ်ခးလိာ်သးကဲထီၣ်၀ဲ(၅၁၀)ဘျီဒီး ဖဲန့ၣ်ပယီၤသုးႇသုးခိးကီၢ်ဆၢ(BGF)အသုးသံ၀ဲ(၄၂၉)ဂၤႇဘၣ်ဒိ(၂၆၀)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါ(KNLA)ဒီး(KNDO)မၤဟးဂီၤကွံာ်သုးမီၤစိရိၤအသုးသိလ့ၣ်ခဲလၢာ်(၃၅)ခိၣ်အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုာ်ဂၢၤသးကရၢ(KNDO)တကပၤဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၂၂)ဂၤႇ လုၢ်ထီၣ်အနီၢ်ခိက့ၢ်ဂီၤလၢထံကီၢ်ဒီးကလုာ်ဂီၢ်(၃၅)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ

လါအ့ဖြ့ၣ် ၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါအ့ဖြ့ၣ် ၃ သီဒီးတနံၤအံၤလါအ့ဖြ့ၣ် ၄ သီအနံၤန့ၣ် သုးမီၤစိရိၤကဘီယူၤဟဲခးလီၤတၢ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်(ကီးတရံး၀့ၢ်ကလံၤထံး)ကျ့းသ၀ီပူၤခံတပယူာ်ဃီအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲမဟါမုၢ်ဟါလီၤ ၃ နၣ်ရံၣ်ဘျဲၣ်အဆၢကတီၢ် ပယီၤသုးမီၤစိရိၤကဘီယူၤဟဲၣ်လံၣ်ခီးပတၢၣ်(၂)ဘ့ၣ်ဒီးကဘီယူၤကၠဲး(၁)ဘ့ၣ်ဟဲခးလီၤတၢ်လၢကျ့းသ၀ီပူၤ၀ံၤအလီၢ်ခံ ဖဲတနံၤအံၤဂီၤခီ ၉ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီးကဘီယူၤဟဲၣ်လံၣ်ခီးပတၢၣ်(၂)ဘ့ၣ် ဟဲခးလီၤကဒီးတၢ်တဘျီအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါလါအ့ဖြ့ၣ် ၃ သီအနံၤ ပယီၤသုးကလၢၤလၢအအိၣ်ဆီလီၤသးဖဲကျ့းသ၀ီကပၤခိၤလၤဖ့ၤလူၢ်အံၤ ခီဖျိဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လဲၤထီၣ်ခးအ၀ဲသ့ၣ်အဃိ သုးမီၤစိရိၤကဘီယူၤဟဲထီၣ်ခးလီၤကဒါတၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လီၢ်က၀ီၤဖိတဂၤစံး၀ဲ“ဖဲအပူၤကွံာ်လါအ့ဖြ့ၣ် ၂ သီမုၢ်နၤခီန့ၣ် တၢ်ခးလိာ်သးကဲထီၣ်လၢသုးကလၢၤ၀ဲန့ၣ်ကပၤလီၤႉဖဲမဟါဂီၤခီ(၈)နၣ်ရံၣ်ဘျဲၣ်န့ၣ် ပနၢ်ဟူလၢတၢ်ကလဲၤထီၣ်မၤန့ၢ်က့ၤပယီၤသုးကလၢၤမီၤနီၤႉဟါခီဘျီဖဲန့ၣ်ဟဲခး၀ဲဒီးကဘီယူၤလီၤႉဖဲတဂီၤညါအံၤနါက့တၢ်ခးလိာ်သးကဲထီၣ်အသီတဘျီကဒီးဖဲသုးကလၢၤန့ၣ်ဒီး ဖဲတဂီၤညါအံၤကဘီယူၤဟဲခးလီၤတၢ်တဘျီဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ဃးပယီၤသုးမီၤစိရိၤကဘီယူၤဟဲခးလီၤတၢ်အံၤအဖီခိၣ်တၢ်ဟးဂူာ်ဟးဂီၤတၢ်အိၣ်သးခီတၢ်ပာ်ဂၢၢ်ပာ်ကျၢၤအီၤတန့ၢ်ဒံး၀ဲဘၣ်အသိး ဖဲတၢ်ဒုးကဲထီၣ်အလီၢ်ဒီးကဘီယူၤဟဲခးလီၤတၢ်အခိၣ်အဃၢၤသ၀ီဖိတဖၣ်ခဲလၢာ်ဃၣ်ဃၣ် ဘၣ်ဟးစံၣ်ပလဲာ်သးလၢတၢ်လီၢ်အဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ် ၂၀၂၁...

လါအ့ဖြ့ၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢကထီၣ်မၤန့ၢ်က့ၤမီခံသုးကလၢၤအဂီၢ် ပယီၤသုးဟဲတုၤ၀ဲဒၣ်လၢ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(KNLA)တၢ်ပၢဟီၣ်က၀ီၤအူကြ့ၣ်ထၣ်သုးကလၢၤအါအါဂီၢ်ဂီၢ်အဂ့ၢ်န့ၣ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးခိၣ်တဂၤစံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်စှၤသီအခါပယီၤသုးသ့ၣ်တဖၣ်အံၤအိၣ်ဟဲ၀ဲလၢကီၢ်ကၠီၣ်တဲၣ်-ကီၢ်ပယီၤကီၢ်ဆၢသူမှဲကျိလၢကီၢ်ပယီၤကၠီးခဲးသ၀ီတကပၤဒီးနုာ်လီၤကဒါ၀ဲဒၣ်လၢမီကၢထါ၀ံၤလဲၤခီဃီၤ၀ဲဆူ(DKBA)သုး၀ဲၤလီၢ်ခိၣ်သ့ၣ်ဆိၣ်စံမၠဲၣ်တၢ်လီၢ်ဒီး (DKBA)သုးရိၣ်မဲခိၣ်ကျၢၢ်အနီၢ်ကစၢ်ဒၣ်၀ဲ လဲၤဆှၢအ၀ဲသ့ၣ်ဆူအူကြ့ၣ်ထၣ်သုးကလၢၤလီၤအဂ့ၢ်န့ၣ် (KNLA)သုးခိၣ်တဂၤစံး၀ဲဒ်အံၤန့ၣ်လီၤႉ “ဒ်ပဒိးန့ၢ်ဘၣ်တၢ်ကစီၣ်န့ၣ်အဟဲခီထံဖဲမီကၢထါမီၤနီၤႉ(DKBA)သုးရိၣ်မဲခိၣ်ကျၢၢ်အနီၢ်ကစၢ်ဒၣ်၀ဲလဲၤဆှၢ၀ဲလၢအူကြ့ၣ်ထၣ်သုးကလၢၤလီၤႉအ၀ဲသ့ၣ်ဟဲနုာ်လီၤအိၣ်ခံဘျီလံႉဟဲ၀ၣ်နုာ်လီၤတၢတဘျီန့ၣ်ကအိၣ်အဂၤ(၆၀)ႉဖဲတဂီၤညါအံၤကဘၣ်ဖဲ ၅ နၣ်ရံၣ်န့ၣ်ဟဲခီဃီၤကဒီးအသီတဒူၣ်လံန့ၣ်(DKBA)တဲပၠးၦၤလီၤႉ တဲ၀ဲလၢကအိၣ်အဂၤ(၁၀၀)ဘျဲၣ်ညါႉ မၤ၀ဲဒ်သိးကထီၣ်ဟံးန့ၢ်က့ၤမီခံသုးကလၢၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးလၢအဟဲနုာ်လီၤသ့ၣ််တဖၣ်အံၤ တၢတဒူၣ်န့ၣ်ဟဲတုၤ၀ဲဒၣ်ဖဲဂီၤလ့ၤဒုးယၤလူၢ်လံႇ အတဒူၣ်လၢအဟဲတုၤ၀ဲဖဲတဂီၤအံၤဂီၤခီသ့ၣ်တဖၣ်န့ၣ်နုာ်လီၤ၀ဲဒၣ်လၢအူကြ့ၣ်ထၣ်သုးကလၢၤဒီး ၦၤသ့ၣ်တဖၣ်အံၤမ့ၢ်၀ဲခီၣ်သုးရ့ၣ်ႇခီၣ်ချ့သုးရ့ၣ်သုးပာ်ဖှိၣ်တဖၣ်လီၤအဂ့ၢ်န့ၣ် သုးခိၣ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါပဒိးန့ၢ်ဘၣ်တၢ်ကစီၣ်လၢပယီၤသုးအံၤကမၤရှဲ၀ဲမၠၣ်၀တံၣ်ကလံၤထံးဟီၣ်က၀ီၤအံၤလၢခံလါအတီၢ်ပူၤလၢအ၀ံၤအဂ့ၢ်န့ၣ် (KNLA)တကပၤစံး၀ဲန့ၣ်လီၤႉ ဘၣ်ဃးဒီးတၢ်ဂ့ၢ်အံၤအဖီခိၣ်(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိစီၤစတံစံး၀ဲလၢ “ဘၣ်ဃး၀ဲလဲၣ်ပယီၤတနုာ်လီၤလၢသ၀ီပူၤဘၣ်ႉပယီၤသုးမၤလၢကစၢၢ်ကျါႇပယီၤဟဲတုၤမးပတသ့ၣ်ညါဘၣ်ႉတဲတဘၣ်ဘၣ်ယအိၣ်ဖဲအံၤၦၤတဲလၢယဆှၢပယီၤမၢ်မၢ်လီၤႉယအိၣ်လၢဟံၣ်ပူၤယတကျၢတၢ်နီတမံၤဘၣ်ႉလၢအံၤဟံၣ်ခီၣ်ထံးမးတစံၣ်လီၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ကစီၣ်ဟးထီၣ်အံၤမ့ၢ်တၢ်ကစီၣ်လၢအကမၣ်ႇတၢ်မၤဒ်အံၤစ့ၢ်ကီးအ၀ဲတတူၢ်လိာ်၀ဲဘၣ်ဒီး(DKBA)အံၤအိၣ်ဆၢထၢၣ်၀ဲဒၣ်လၢကမျၢၢ်ကအိၣ်မုာ်အိၣ်ခုၣ်ဘၣ်အဂီၢ်လီၤဒီးဘၣ်ဃးတကီၢ်ခါတၢ်ဂ့ၢ်အံၤနုာ်လီၤပၣ်ဃုာ်တအိၣ်၀ဲဘၣ်အဂ့ၢ်န့ၣ် သုးရိၣ်မဲခိၣ်ကျၢၢ် သုခိၣ်ကျၢၢ်ဒိၣ်စိစီၤစတံ စံးအါထီၣ်၀ဲန့ၣ်လီၤႉ ၀ီၤလ့ၤဟီၣ်က၀ီၤပူၤလီၢ်က၀ီၤသ၀ီခိၣ်နၢ်တဂၤစံး၀ဲလၢ“ပယီၤဟဲနုာ်လီၤန့ၣ်အမ့ၢ်လီၤႉလၢအူကြ့ၣ်ထၣ်န့ၣ်တတီၤႇအိၣ်ဟဲနုာ်လီၤ၀ဲလၢဂီၤလ့ၤကၣ်စံၣ်နိၣ်တြဲၤန့ၣ်လီၤတံၢ်လီၤႉဘၣ်မနုၤအဃိလဲၣ်န့ၣ်သ၀ီဖိတဖၣ်ထံၣ်၀ဲပယီၤသုးခီထံကျိဒီးအဆ့ကၤဘၣ်စီၣ်လီၤတံၢ်လီၤဆဲးလီၤမီၤနီၤႉခဲအံၤတၢ်အိၣ်သးဘံဘူအဃိမ့ၢ်ကဘၣ်ပာ်ဂံၢ်ပာ်ဘါမတဂၤလဲၣ်မးတသ့ၣ်ညါလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါမးရှး ၂၁ သီအနံၤ ခီဖျိ(KNLA)သုးပာ်ဖှိၣ် လဲၤထီၣ်မၤန့ၢ်မီခံပယီၤသုးကလၢၤမၤန့ၢ်ကျိချံၦာ်သၣ်အါအါဂီၢ်ဂီၢ်အဃိ ပယီၤသုးအံၤနုာ်လီၤ၀ဲအါအါဂီၢ်ဂီၢ်လၢကထီၣ်မၤန့ၢ်က့ၤသုးကလၢၤအံၤအဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါမးရှး ၂၇ သီအနံၤ ပယီၤသုးလၢအဟဲနုာ်လီၤအါအါဂီၢ်ဂီၢ်သ့ၣ်တဖၣ်အံၤ ခီဖျိဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အိၣ်ခိးခးအ၀ဲသ့ၣ်လၢတၢ်ဘၢၣ်စၢၤအဃိ...

လါအ့ဖြ့ၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါမးရှး ၃၁ သီအနံၤ ပယီၤသုးနုာ်လီၤအိၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကြုၢ်တုကီၢ်ဆၣ် ကီးတရံး၀့ၢ်ဒီးကြုၢ်တုကျဲမုၢ်ဖီခိၣ်(၅)တၢၣ်သ၀ီပူၤအါအါဂီၢ်ဂီၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲလါမးရှး ၃၀ သီ မုၢ်ဃ့ၢ်လီၤအဆၢကတီၢ် ပယီၤသုးသိလ့ၣ်လၢအိၣ်ဟဲထီၣ်လၢဖၣ်အၣ်တကပၤအံၤတဖၣ် (KNLA)သုးပာ်ဖှိၣ်အိၣ်ခိးထုး၀ဲဒီးမ့ၣ်ပိၢ်ဖဲ(၅)တၢၣ်သ၀ီဒီး(၉)တၢၣ်သ၀ီအဘၢၣ်စၢၤကဲထီၣ်သး၀ံၤအလီၢ်ခံ ပယီၤသုး(၂၀၀)ဘျဲၣ်နုာ်လီၤအိၣ်ဆီလီၤအသးလၢ(၅)တၢၣ်သ၀ီပူၤဟဲကဲထီၣ်သးလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ “ဖဲမဟါတၢ်ခိးခးအ၀ဲသ့ၣ်ဖဲန့ၣ်အဃိ အ၀ဲသ့ၣ်နုာ်လီၤအိၣ်ဆီလီၤသးလၢ(၅)တၢၣ်သ၀ီပူၤလီၤႉ နုာ်လီၤအိၣ်၀ဲ လၢကၠိကရၢၢ်ဒီးရီဘၢၣ်ကျီးကျဲကပၤတဖၣ်လီၤႉ ဒ်သိးအ၀ဲသ့ၣ်အၦၤကလဲၤထီၣ်လၢမၠၣ်၀တံၣ်အဂီၢ် မ့ၢ်အ၀ဲသ့ၣ်ဟံးစၢၤတၢ်ဘံၣ်တၢ်ဘၢဧါဒုတသ့ၣ်ညါဘၣ်”အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်န့ၣ်လီၤႉ ဖဲမဟါတၢ်ဒုးကဲထီၣ်အလီၢ်ခိၣ်ဃၢၤန့ၣ် ပယီၤသုးဖီၣ်က့ၤကိး၀ဲလီၢ်က၀ီၤသ၀ီဖိတဂၤဒံးဒီး လီၢ်က၀ီၤသ၀ီဖိလၢပယီၤသုးဖီၣ်အီၤတဂၤန့ၣ်စ့ၢ်ကီးတုၤလၢခဲအံၤတၢ်တသ့ၣ်ညါဘၣ်အတၢ်အိၣ်သးဒံးဘၣ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါတၢ်အိၣ်ခိးထုးပယီၤသုးဒီးမ့ၣ်ပိၢ်ကဲထီၣ်သး၀ံၤအလီၢ်ခံ ဖဲဟါခီ ၃ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးခးလီၤကျိဖးဒိၣ်(၇)ထံၣ်လၢ(၅)တၢၣ်သ၀ီကပၤယ့ၤပူၤကၠံသ၀ီပူၤတကးဒံးဘၣ်အမဲာ်ညါ ခီဖျိကျိဖးဒိၣ်လူၢ်လၢကီးတရံး၀့ၢ်ကပၤအံၤစ့ၢ်ကီးခးလီၤကျိဖးဒိၣ်ဆူလးတကီသ၀ီပူၤအဃိ ဟံၣ်ဃီတၢ်သူၣ်ထီၣ်ဟးဂီၤတစှၤန့ၢ်(၅)ဖျၢၣ်ဘၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လးကကီသ၀ီဖိတဂၤစ့ၢ်ကီးစံး၀ဲ“ဖဲမဟါပယီၤသုးခးလီၤကျိဖးဒိၣ်ဘၣ်၀ဲဟံၣ်(၄)ဖျၢၣ်ႉလီၤတဲာ်အါ၀ဲလၢသီခါဖၠၣ်ဃၢၤမီၤနီၤႉသီခါအသိလ့ၣ်ႇဖံ၀ါအသိလ့ၣ်ဟးဂီၤအိၣ်လီၤႉဖဲစှၤသီအတီၢ်ပူၤအံၤပယီၤသုးခးလီၤကျိဖးဒိၣ်အါမးလီၤႉဘၣ်ဒိအအါကတၢၢ်န့ၣ်ဟံၣ်တၢ်သူၣ်ထီၣ်တဖၣ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်တဖၣ်အဃိ...