ခ့ၣ်အဲးစံၣ် – KIC News

လါဒံၣ်စ့ဘၢၣ် ၁၆သီႇ ၂၀၂၁နံၣ်ႇ ခ့ၣ်အဲးစံၣ် ဖဲတနံၤအံၤလါဒံၣ်စ့ဘၢၣ် ၁၆ သီ ဂီၤခီအဆၢကတီၢ် ခီဖျိတၢ်ဒုးကဲထီၣ်လၢလ့က့ၣ်ကီာ်၀့ၢ်သီဟီၣ်က၀ီၤပူၤအဃိ ဒူသ၀ီလီၢ်က၀ီၤဖိလၢအအိၣ်ဘူးဖဲန့ၣ်အဂၤ(၂၀၀၀)ဃၣ်ဃၣ်လဲၤဃ့ၢ်အိၣ်ကဒု၀ဲလၢကၠီၣ်တဲၣ်တကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တနံၤအံၤခီဖျိတၢ်ဒုးဆဲးကဲထီၣ်သးကွ့ၢ်ကွ့ၢ်အဃိ သ၀ီလၢအအိၣ်ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢတဖၣ်လၢအမ့ၢ် လ့က့ၣ်ကီာ်ႇယသ့ၣ်ကူးႇမ့လဲၣ်ပၤႇပဟံၣ်ကျီးႇမဲၢ်ထီးသလ့သ၀ီဖိတဖၣ်အံၤ ဘၣ်ဃ့ၢ်ထီၣ်အိၣ်ကဒု၀ဲလၢကၠီၣ်တဲၣ်တကပၤန့ၣ်လီၤႉ သ၀ီဖိလၢအဃ့ၢ်ထီၣ်အိၣ်ကဒုလၢကီၢ်ကၠီၣ်တဲၣ်တကပၤတဂၤစံး၀ဲလၢ“ၦၤဟဲစံၣ်ဖဲအံၤကအိၣ်လၢ(၂၀၀၀)ဃၣ်ဃၣ်ညါႉမ့မ့ၢ်တၢ်ကူတၢ်ကၤႇဆ့ကၤကလၢၤဒုပဟဲစိာ်ဃုာ်အိၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖဲတနံၤအံၤကဘၣ်ဖဲမုၢ်ဃ့ၢ်လီၤအဆၢကတီၢ်န့ၣ် ဘၣ်ဖဲၦၤကအီၣ်မ့ၤၦၤရဲၣ်လီၤသးအဆၢကတီၢ် ပယီၤသုးခးလီၤကျိဖးဒိၣ်လီၤတဲာ်လၢကၠီၣ်တဲၣ်တကပၤဒီးပိၢ်ဖးထီၣ်လၢဘုခ့ကျီးပူၤအဂ့ၢ်န့ၣ် ၦၤလၢအဃ့ၢ်ထီၣ်ကၠီၣ်တဲၣ်ပူၤတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ စးထီၣ်ဖဲအပူၤကွံာ်(လါဒံၣ်စ့ဘၢၣ် ၁၃)သီအနံၤန့ၣ် ပယီၤသုးနုာ်လီၤသမံသမိးဖီၣ်၀ဲၦၤလၢအထီဒါသုးမီၤစိရိၤ(PDF)လၢခ့ၣ်အဲၣ်ယူၣ်တၢ်ပၢဟီၣ်က၀ီၤလ့က့ၣ်ကီာ်၀့ၢ်သီက၀ီၤဒ့တဖၣ်အပူၤဒီး စးထီၣ်ဖဲန့ၣ်တၢ်သဘံၣ်သဘုၣ်ဟဲအိၣ်ထီၣ်၀ဲဒၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီး ပယီၤသုးတဖၣ်အဘၢၣ်စၢၤန့ၣ်လီၤႉ ပယီၤသုးနုာ်လီၤသမံသမိးတၢ်လၢလ့က့ၣ်ကီာ်၀့ၢ်သီက၀ီၤဒ့ပူၤ၀ံၤအလီၢ်ခံ ဖဲမဟါလါဒံၣ်စ့ဘၢၣ် ၁၅ သီအနံၤ တၢ်ခးလိာ်သးစးထီၣ်ကဲထီၣ်၀ဲဒၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်ဒီးပယီၤသုးတဖၣ်အဘၢၣ်စၢၤအဂ့ၢ်န့ၣ် န့ၣ်လီၤႉ လၢန့ၣ်အမဲာ်ညါဖဲတနံၤအံၤဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်တၢ်ဒုးဆဲးကဲထီၣ်ကဒီး၀ဲအသိး ခီဖျိပယီၤသုးခးလီၤကျိဖးဒိၣ်လၢသ၀ီပူၤအဃိ လီၢ်က၀ီၤကမျၢၢ်အဂၤ(၄၀၀၀)ဘျဲၣ် ဘၣ်ပာ်တ့ၢ်ကွံာ်အဟံၣ်အဃီဒီး ဘၣ်လဲၤဃ့ၢ်အိၣ်ကဒုသးလၢတၢ်လီၢ်လၢအပူၤဖျဲးအလီၢ်အိၣ်၀ဲအသိး တနီၤန့ၣ်ဘၣ်လဲၤဃ့ၢ်ထီၣ်၀ဲလၢကီၢ်ကၠီၣ်တဲၣ်တကပၤန့ၣ်လီၤႉ ဘၣ်ထွဲဒီးၦၤဃ့ၢ်တၢ်ဒုးဖိတၢ်အိၣ်သးအံၤ ကညီတၢ်တိစၢၤမၤစၢၤတၢ်မုာ်တၢ်ခုၣ်ၦာ်ဘျးစဲ(KPSN)ၦၤကတိၤတၢ်ပၢနီၢ်၀ါခုၣ်ရှံစံး၀ဲလၢ“လၢပစရီပူၤန့ၣ်ၦၤဃ့ၢ်ထီၣ်န့ၣ်သ၀ီယဲၢ်ဖျၢၣ်မီၤနီၤႉ အနီၣ်ဂံၢ်နီၣ်ဒွးခီန့ၣ်ပတသ့ၣ်ညါဒံးဘၣ်ႉ ခဲအံၤတၢ်လၢအရ့ဒိၣ်ကတၢၢ်န့ၣ်မ့ၢ်၀ဲတၢ်အီၣ်တၢ်အီႇတၢ်လီၢ်တၢ်ကျဲဒီးဆ့ဖိယၣ်ဖိသ့ၣ်တဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤပယီၤသုးနုာ်လီၤဟံးန့ၢ်အလီၢ်လၢလ့က့ၣ်ကီာ်က၀ီၤဒ့(၆)ဒီးက၀ီၤဒ့(၃)အပူၤအသိး...

လါဒံၣ်စ့ဘၢၣ် ၁၆ သီႇ ၂၀၂၁ နံၣ်ႇ ခ့ၣ်အဲးစံၣ် ခီဖျိတၢ်အိၣ်ခိးထုးပယီၤသုးသိလ့ၣ်(၅)ခိၣ်ဒီးမ့ၣ်ပိၢ်ဖဲမၠၣ်၀တံၣ်-ကီးတရံးအ့ရှါကျဲအဃိ ပယီၤသုးတကပၤသံအဂၤ(၁၀)ဃၣ်ဃၣ်ဒီး တၢ်ဒုးဆဲးကဲထီၣ်ဖဲကီးတရံး၀့ၢ်ကီးနွဲၣ်သ၀ီကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲတနံၤအံၤလါဒံၣ်စ့ဘၢၣ် ၁၆ သီ မုၢ်ဃ့ၢ်လီၤ ၃ နၣ်ရံၣ်တခီဃၣ်ဃၣ်အဆၢကတီၢ် ပယီၤသုးသိလ့ၣ်(၅)ခိၣ်လၢကဟဲဆှၢအါထီၣ်အၦၤဖဲမၠၣ်၀တံၣ်တကပၤအဂီၢ်အံၤ ခီဖျိကညီဒီကလုာ်တၢ်ထူၣ်ဖျဲးသုးမုၣ်ဒိၣ်(KNLA)အၦၤအိၣ်ခိးထုးအ၀ဲသ့ၣ်ဒီးမ့ၣ်ပိၢ်ဖဲအ့ရှါကျဲတီနီၢ်ထံလီၤဆူကပၤအဃိ ပယီၤသုးတကပၤသံ၀ဲအဂၤ(၁၀)အကျါပၣ်ဃုာ်၀ဲသုးခိၣ်တဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ တၢ်အိၣ်ခိးထုးပယီၤသုးအသိလ့ၣ်ဖဲအ့ရှါကျဲမုၢ်ခိၣ်၀ံၤအလီၢ်ခံ ဖဲတနံၤအံၤဟါခီ ၆ နၣ်ရံၣ်ဃၣ်ဃၣ်အဆၢကတီၢ် ပယီၤသုးတဖၣ်ခးလီၤကျိဖးဒိၣ်လၢကီးနွဲၣ်သ၀ီတကပၤအဂ့ၢ်န့ၣ် လီၢ်က၀ီၤဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ “ဖဲ ၆ နၣ်ရံၣ်န့ၣ်စးထီၣ်ခးလီၤကျိဖးဒိၣ်တဖၣ်လံႉ ယတယးဒုကလီၤတဲာ်၀ဲလၢကီးနွဲၣ်သ၀ီတကပၤလီၤ”အဂ့ၢ်န့ၣ် စံး၀ဲန့ၣ်လီၤႉ ဒ်တကီၢ်ခါတၢ်အိၣ်သးခဲအံၤအသိး ပယီၤသုးဒီး(သုးက့-၆)သိၣ်မှံၤပာ်ဖှိၣ်ကရူၢ်တဖၣ်အဘၢၣ်စၢၤ တၢ်ခးလိာ်သးဆဲးကဲထီၣ်၀ဲကွ့ၢ်ကွ့ၢ်ဒီး ခီဖျိတၢ်အိၣ်သးအံၤအိၣ်လၢတၢ်ဒုးကဆူၣ်ထီၣ်၀ဲအဃိ တၢ်ဘိးဘၣ်သ့ၣ်ညါလီၤ၀ဲလၢတၢ်တဘၣ်ဟးထီၣ်ဟးလီၤလၢမၠၣ်၀တံၣ်-ကီးတရံးအ့ရှါကျဲမုၢ်ခိၣ်လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါဒံၣ်စ့ဘၢၣ် ၁၅ သီႇ ၂၀၂၁ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တးခ်ကီၢ်ရ့ၣ် ထၣ်ဆီၤယါကီၢ်ဆၣ် မဲၢ်လးဘၣ်ကီဘၣ်ခဲဒဲအ၀ီၤအပူၤ ဖဲမဟါဟါခီတၢ်ကဲထီၣ်သးလၢၦၤဒဲက၀ီၤဖိတဖၣ်လဲၤပာ်ဖျါထီၣ်တၢ်ဘၣ်သးလၢတအဲၣ်ဒိး၀ဲကၠီၣ်တဲၣ်ၦၤဘၣ်မူဘၣ်ဒါပလးဘၣ်အဃိ ဒဲက၀ီၤဘံၣ်ဘၢတြဲၤဒီးသိလ့ၣ်ႇဆဲးကဲးတနီၤဟးဂီၤအိၣ်၀ဲအသိး သးစၢ်လၢအပာ်ဖျါထီၣ်သးတနီၤဘၣ်ဒိဘၣ်ထံးအိၣ်စ့ၢ်ကီး၀ဲအဂ့ၢ်န့ၣ် သ့ၣ်ညါဘၣ်လၢဒဲက၀ီၤၦၤဘၣ်မူဘၣ်ဒါအအိၣ်န့ၣ်လီၤႉ ဖဲဒဲက၀ီၤၦၤသးစၢ်ဖိခံဂၤဟဲက့ၤလၢဆဲးကဲးခိၣ်လၢအတထီဘၣ်တၢ်ဘးဘၢနါဒ့ဘၣ်အံၤ ဒဲက၀ီၤကၠီၣ်တဲၣ်ၦၤဘၣ်မူဘၣ်ဒါ(ပလး)တွံၢ်လီၤအီၤလၢဆဲးကဲးလိၤသ့ကွံာ်၀ဲအဆဲးကဲး၀ံၤအလီၢ်ခံ ဖဲန့ၣ်ဒဲက၀ီၤကမျၢၢ်လၢအကထိလဲၤပာ်ဖျါထီၣ်တၢ်ဘၣ်သးဒီး လၢတၢ်သးဒိၣ်ထီၣ်အပူၤမၤဟးဂီၤ၀ဲကၠီၣ်တဲၣ်ၦၤဘၣ်မူဘၣ်ဒါအတၢ်သူၣ်ထီၣ်အလီၢ်ႇသိလ့ၣ်ဒီးဆဲးကဲးတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ “တၢ်ဟးဂုၤဟးဂီၤဒုအိၣ်ဖးအါညါႇပၣ်၀ဲဒီးရူႇကါႇအီးစီအိၣ်တၢ်လီၢ်န့ၣ်ခဲလၢာ်လီၤမီၤနီၤႉ ဘၣ်ဆၣ်တၢ်ဟးဂုၤဟးဂီၤဒုတသ့ၣ်ညါလီၤတံၢ်လီၤဆဲးဒံးဘၣ်ႉ ခဲအံၤတၢ်လီၢ်ဖဲန့ၣ်ကၠီၣ်တဲၣ်သုးတဖၣ်အိၣ်ခိး၀ဲတၢ်”အဂ့ၢ်န့ၣ် ဒဲက၀ီၤခိၣ်စီၤအီနဲးစံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်ဂ့ၢ်ကဲထီၣ်သးအဖီခိၣ် ကၠီၣ်တဲၣ်ၦၤဘၣ်မူဘၣ်ဒါလၢအဟံးန့ၢ်တၢ်ဘံၣ်တၢ်ဘၢလၢဒဲက၀ီၤအပူၤတဖၣ်စ့ၢ်ကီး အိၣ်လၢဒဲက၀ီၤပူၤတဘူၣ်လၢၤဘၣ်ဒီးဟးစံၣ်ပလဲာ်သးလံအဂ့ၢ်န့ၣ် ဒဲက၀ီၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တၢ်ကဲထီၣ်သးဘျီ၀ဲအံၤအပူၤ ၦၤအိၣ်လၢဒဲက၀ီၤပူၤတဖၣ်စံး၀ဲလၢ သိလ့ၣ်ဟးဂီၤ၀ဲအခိၣ်(၁၀)ဃၣ်ဃၣ်ဒီးဆဲးကဲးဟးဂီၤ၀ဲအခိၣ်(၂၀)ဃၣ်ဃၣ်န့ၣ်လီၤႉ လၢန့ၣ်အမဲာ်ညါကမျၢၢ်လၢအိၣ်က၀ီၤဒ့ပူၤကိးဘ့ၣ်ဒဲးဃၣ်ဃၣ်ပာ်ဖှိၣ်ထီၣ်သးလဲၤပာ်ဖျါထီၣ်၀ဲအတၢ်ဘၣ်သးအဂ့ၢ်န့ၣ် ၦၤလၢအထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ လၢန့ၣ်အမဲာ်ညါ ဖဲခိ၀ံၣ်အတီၢ်ပူၤတၢ်ကးတံၢ်ဃာ်၀ဲဒဲက၀ီၤတၢ်နုာ်လီၤဟးထီၣ်အကတီၢ် ၦၤလၢအကျိၣ်စ့အိၣ်တဖၣ်လဲၤသ့က့ၤသ့ဒီးမ့မ့ၢ်ၦၤမုုၢ်ဆ့ၣ်မုၢ်ဂီၤဖိတဖၣ်လဲၤတသ့က့ၤတသ့ဘၣ်အဃိ တၢ်သူၣ်တမံသးတမုာ်ဟဲအိၣ်ထီၣ်၀ဲလၢၦၤဒဲက၀ီၤဖိတဖၣ်အဖီခိၣ်ဒီးတၢ်ဂ့ၢ်ဘၣ်ဟဲကဲထီၣ်သးဒ်အံၤလီၤအဂ့ၢ်န့ၣ် ဒဲက၀ီၤၦၤဘၣ်မူဘၣ်ဒါတဂၤစံး၀ဲန့ၣ်လီၤႉ တကီၢ်ခါခဲအံၤဒဲက၀ီၤခိၣ်ဒီးၦၤဘၣ်မူဘၣ်ဒါလၢအဘၣ်ထွဲတဖၣ်ႇက၀ီၤဒ့ခိၣ်တဖၣ်မၤ၀ဲတၢ်အိၣ်ဖှိၣ်ဒီးတၢ်ဂ့ၢ်ကဲထီၣ်သးလၢတကီၢ်ခါခဲအံၤသ့ၣ်တဖၣ်ကဘၣ်ဘှါရှဲ၀ဲဒ်လဲၣ်န့ၣ်တသ့ၣ်ညါ၀ဲဒံးဘၣ်အဂ့ၢ်န့ၣ် သ့ၣ်ညါဘၣ်လၢၦၤအိၣ်ဒဲက၀ီၤပူၤတဖၣ်အအိၣ်န့ၣ်လီၤႉ ဒ်ပဒိးန့ၢ်ဘၣ်တၢ်ကစီၣ်လီၢ်ခံကတၢၢ်အသိးန့ၣ် ခီဖျိကၠီၣ်တဲၣ်သုးတဖၣ်ကနုာ်လီၤဟးကွၢ်တၢ်လၢဒဲက၀ီၤပူၤဒီးကဟံး၀ဲတၢ်ဘံၣ်တၢ်ဘၢအဃိ ဒ်သိးတၢ်ဂ့ၢ်ဒ်အံၤသုတကဲထီၣ်လၢၤတဂ့ၤအဂီၢ် စးထီၣ်လၢဟါခီ ၆ နၣ်ရံၣ်လီၢ်ခံန့ၣ် တၢ်တဘၣ်ဟးထီၣ်လၢဟံၣ်ချၢနီတဂၤလၢၤဘၣ်အဂ့ၢ်န့ၣ် ဒဲက၀ီၤပၢဆှၢတၢ်ကမံးတံာ်နဲၣ်လီၤ၀ဲတၢ်ကလုၢ်န့ၣ်လီၤႉ

လါဒံၣ်စ့ဘၢၣ် ၁၅ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤလါဒံၣ်စ့ဘၢၣ် ၁၅ သီ ဟါခီ ၆ နၣ်ရံၣ်အဆၢကတီၢ်တၢ်ဒုးကဲထီၣ်ကဒီးဖဲလ့က့ၣ်ကီာ်၀့ၢ်သီပူၤဒီး ပယီၤသုးခးလီၤကျိဖးဒိၣ်တပယူာ်ဃီလၢကညီဖီၣ်စုက၀ဲၤအိၣ်တၢ်လီၢ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ခီဖျိတၢ်ဒုးဆဲးကဲထီၣ်အဃိ ကမျၢၢ်လၢအိၣ်လ့့က့ၣ်ကီာ်၀့ၢ်သီက၀ီၤဒ့ပူၤတဖၣ်ဒီး လီၢ်က၀ီၤဖိလၢအအိၣ်ဘူးဖဲန့ၣ်သ့ၣ်တဖၣ်အဂၤ(၁၀၀၀)ဃၣ်ဃၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကမျၢၢ်လၢအအိၣ်ဖဲလ့က့ၣ်ကီာ်၀့ၢ်သီက၀ီၤဒ့(၆)ဘ့ၣ်လၢာ်အပူၤတဖၣ်ဃုာ်ဒီးဖလူသ၀ီႇယသ့ၣ်ကူၤႇထံမဲး၀ါခံသ၀ီဖိတဖၣ် နီၤဖးလိာ်သးလဲၤအိၣ်၀ဲဒၣ်လၢသီခါဖၠၣ်ဒီးတၢ်ဘါယွၤသရိာ်တၢ်သူၣ်ထီၣ်အလီၢ်အဂ့ၢ်န့ၣ် လီၢ်က၀ီၤသးစၢ်တဖၣ်စံး၀ဲန့ၣ်လီၤႉ “က၀ီၤဒ့ပူၤကမျၢၢ်တဖၣ်အါဒၣ်တက့ၢ်န့ၣ်လဲၤစံၣ်အိၣ်ခူသူၣ်၀ဲဒၣ်လၢတၢ်လီၢ်လၢအပူၤဖျဲးအလီၢ်လံန့ၣ်လီၤႉ အိၣ်တ့ၢ်ထဲတနီၤလီၤႉ ယၤဒီးယဒံၣ်သဖိသ့ၣ်တဖၣ်ဒုပတုၤလၢတၢ်လီၢ်လၢအပူၤဖျဲးအလီၢ်လံ”အဂ့ၢ်န့ၣ် လီၢ်က၀ီၤပိာ်မုၣ်တဂၤစံး၀ဲန့ၣ်လီၤႉ ဖဲတနံၤအံၤ ၁၁ နၣ်ရံၣ်တခီအဆၢကတီၢ်စ့ၢ်ကီး ပယီီၤသုးကျိၤလၢအကဟဲသမံသမိးတၢ်လၢလ့က့ၣ်ကီာ်က၀ီၤဒ့(၆)တဖၣ်အံၤ ခီဖျိလဲၤတလၢ၀ဲကညီ ဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဂၢၤသးကရၢ(KNDO)သုးကလၢၤတၢ်လီၢ်အဃိ တၢ်ဒုးကဲထီၣ်၀ဲတစှၤန့ၢ်ဒံးတၢ်လီၢ်(၃)တီၤဘၣ်ညါန့ၣ်လီၤႉ တၢ်ဒုးကဲထီၣ်ဘျီ၀ဲအံၤအပူၤပယီၤသုးတကပၤသံ၀ဲ(၆)ဂၤဒီးတၢ်ဖီၣ်ချုးသမူန့ၢ်၀ဲတစှၤန့ၢ်ဒံး(၈)ဂၤဘၣ်အဂ့ၢ်န့ၣ် သ့ၣ်ညါဘၣ်လၢၦၤလၢအဘူးဒီးကညီဖီၣ်စုက၀ဲၤကရူၢ်အအိၣ်ဘၣ်ဆၣ် ခ့ၣ်အဲးစံၣ်-ကညီတၢ်ကစီၣ်၀ဲၤလီၢ်ခိၣ်သ့ၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်န့ၣ်လီၤႉ ဖဲတနံၤအံၤမုၢ်ဃ့ၢ်လီၤန့ၣ် ပယီၤသုးလၢအဘၣ်ဒိလၢတၢ်ဒုးပူၤသ့ၣ်တဖၣ် သိလ့ၣ်တီၣ်ၦၤဆါ(၄)ခိၣ်က့ၤစိာ်အ၀ဲသ့ၣ်ဆူမၠၣ်၀တံၣ်၀့ၢ်တကပၤန့ၣ်လီၤႉ လၢန့ၣ်အမဲာ်ညါပယီၤသုးသိလ့ၣ်အခိၣ်(၁၀)ဃၣ်ဃၣ်ဟဲထီၣ်၀ဲလၢမဲၢ်ထီးသလ့ဒီးလ့က့ၣ်ကီာ်တကပၤအဂ့ၢ်န့ၣ် ၦၤလၢအထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ

လါဒံၣ်စ့ဘၢၣ် ၁၅ သီႇ ၂၀၂၁ နံၣ်ႇ ခ့ၣ်အဲးစံၣ် ခီဖျိပယီၤသုးဟ့ၣ်ထီၣ်တၢ်ဂ့ၢ်လၢကနုာ်လီၤဃုက့ၤအၦၤသုးဖိလၢအစံၣ်ဖျိး(၃)ဂၤအဃိ မၤအါထီၣ်၀ဲသုးဂံၢ်ဘါလၢခ့ၣ်အဲၣ်ယူၣ်တၢ်ပၢဟီၣ်က၀ီၤဘျံးဒ၀ဲၢ်ကီၢ်ရ့ၣ် သုးက့(၄)လၢၢ်မုၢ်လါကီၢ်ဆၣ် ဒူယ့ပ့ၤဆှီၤသ၀ီပူၤအဂ့ၢ်န့့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ပယီၤသုးတဖၣ်အံၤဆီလီၤအသးလၢဒူယ့ပ့ၤဆှီၤသ၀ီသီခါဖၠၣ်ကရၢၢ်ပူၤဒီးသ၀ီလၢအိၣ်ဖဲကျဲမုၢ်ကပိၤကပၤတဖၣ်န့ၣ်ကအိၣ်၀ဲဒၣ်အဂၤ(၃၀၀)ဃၣ်ဃၣ်ညါဒီးလၢန့ၣ်အမဲာ်ညါမၤတံာ်တာ်စ့ၢ်ကီး၀ဲလီၢ်က၀ီၤဖိလၢအလ့ၢ်ထီၣ်လ့ၢ်လိၤတဖၣ်အိၣ်၀ဲအဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ “ခဲအံၤလၢဒူယ့ပ့ၤဆှီၤသ၀ီန့ၣ်ပယီၤသုးတဖၣ်တအဲၣ်လီၢ်က၀ီၤဖိနုာ်လီၤဟးထီၣ်လၢၤဘၣ်ႉ ၦၤတနီၤကတာ်ထီလၢတၢ်ချၢဒီးဟဲက့ၤနုာ်လီၤလၢသ၀ီပူၤတဘူၣ်လၢၤဘၣ်ႉ တၢ်ဒုးကကဲထီၣ်သ့၀ဲလီၤႉ အ၀ဲသ့ၣ်အသုးဂံၢ်ဘါဟဲအါထီၣ်ႇတမ့ၢ်အိၣ်ထဲဒူယ့ပ့ၤဆှီၤသ၀ီတဖျၢၣ်အပူၤဘၣ်ႇလၢကၠဲၣ်ကါသ၀ီပူၤနါက့ဆီလီၤသးအိၣ်ဒံး၀ဲလီၤႉ လၢန့ၣ်တကပၤနါက့လဲၤတဘူၣ်ဘၣ်”အဂ့ၢ်န့ၣ် လီၢ်က၀ီၤဖိဖဲန့ၣ်တဂၤစံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးကရူၢ်တဖၣ်အံၤ စးထီၣ်ဆီလီၤဆိအသးလၢ လၢၢ်မုၢ်လါကီၢ်ဆၣ်ကၠဲၣ်ကါသ၀ီႇပလီကိႇတမဲၤတီၤသ၀ီပူၤ၀ံၤအလီၢ်ခံ တကီၢ်ခါခဲအံၤမၤအါထီၣ်အသုးဂံၢ်ဘါလၢခ့ၣ်အဲၣ်ယူၣ်တၢ်ပၢဟီၣ်က၀ီၤဒူယ့ပ့ၤဆှီၤသ၀ီပူၤန့ၣ်လီၤႉ လီၢ်က၀ီၤဖိတဂၤစံး၀ဲလၢ“တဲ၀ဲလၢအၦၤလၢအဟဲအိၣ်ဖဲအံၤတဖၣ်လီၤမၢ်မီၤနီၤႉ ဖဲအံၤသ့ၣ်ညါ၀ဲလၢ(္စီၠ)အိၣ်လီၤႉ အ၀ဲသ့ၣ်တဲ၀ဲလၢအၦၤသုးဖိလီၤမၢ်ဧါန့ၣ်မတဂၤမးတသ့ၣ်ညါဘၣ်ႉ မ့စံၣ်ဖျိးနါက့မ့ၢ်ကဘၣ်နာ်အီၣ်ဧါမီၤနီၤႉ မ့ၢ်အဟဲဃုသ့ၣ်ညါတၢ်လၢဟီၣ်က၀ီၤအပူၤလီၣ်ဧါမီၤနီၤႉ ပယီၤသုးတကပၤဒုဟဲထီၣ်ရုၢ်ရုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်(လါဒံၣ်စ့ဘၢၣ် ၁၁ သီ)အနံၤစ့ၢ်ကီး ခီဖျိပယီၤသုးကရူၢ်တဖၣ်အံၤဒီးဟီၣ်က၀ီၤ(KNLA)ဒီး(PDF)သုးပာ်ဖှိၣ်တဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲဖဲဒူယ့ပ့ၤဆှီၤသ၀ီကပၤဒီးဖဲန့ၣ်ပယီၤသုးတကပၤသံ၀ဲ(၃)ဂၤအဃိ ဟီၣ်က၀ီၤဖဲန့ၣ်တဖၣ်အပူၤပယီၤသုးမၤအါထီၣ်သုးဂံၢ်ဘါဒီးဆှၢအါထီၣ်၀ဲတၢ်အီၣ်တၢ်အီတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တနီသရံၣ်ကီၢ်ခီဒိၣ်အပူၤ ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်အစုဒုၣ်တီၤအဖီလာ်သုးရ့ၣ်တဖၣ်ဟူးဂဲၤ၀ဲဒီး မ့မ့ၢ်လၢလၢၢ်မုၢ်လါဟီၣ်က၀ီၤအပူၤန့ၣ်ဟီၣ်က၀ီၤခီၣ်ချ့သုးရ့ၣ်(ခလရ-၂၈၅)တဖၣ်ဟူးဂဲၤ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါဒံၣ်စ့ဘၢၣ် ၁၄ သီႇ ၂၀၂၁ နံၣ်ႇ ခ့ၣ်အဲးစံၣ် ခီဖျိပယီၤသုးနုာ်လီၤသမံသမိးဖီၣ်ၦၤလၢအထီဒါသုးမီၤစိရိၤဒီးတၢ်ဒီသဒၢကမျၢၢ်(PDF)လၢလ့က့ၣ်ကီာ်၀့ၢ်သီပူၤတၢ်ဂ့ၢ်အဃိ တကီၢ်ခါခဲအံၤသုးတၢ်ဖ့ၣ်ဆၢဟဲအိၣ်ထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီး ပယီၤသုးအဘၢၣ်စၢၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲတနံၤအံၤလါဒံၣ်စ့ဘၢၣ် ၁၄ သီ စးထီၣ်လၢဂီၤခီ ၈ နၣ်ရံၣ်ဃၣ်ဃၣ်အဆၢကတီၢ် ပၢဆှၢရဲၣ်ကျဲၤသုး ၀ဲၤလီၢ်ခိၣ်သ့ၣ်(စကခ-၁၃)သုးတြိၤခိၣ်တဂၤတီခိၣ်ရိၣ်မဲ၀ဲပယီၤသုးခီၣ်ချ့သုးရ့ၣ်(၅၆၀)သုးကျိၤ နီၤဖးလီၤ၀ဲသုးကျိၤ(၄)ကျိၤဒီးနုာ်လီၤသမံသမိးဖီၣ်တၢ်လၢလ့က့ၣ်ကီာ်၀့ၢ်သီက၀ီၤဒ့(၆)ဘ့ၣ်လၢာ်အပူၤ တုၤလၢမုၢ်ဟါတၢ်ခံးတစုအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်နုာ်လီၤဖီၣ်သမံသမိးတၢ်ဘျီ၀ဲအံၤ တၢ်ဖီၣ်ချုးန့ၢ်၀ဲမၠီမၠးဘျီၣ်ဒိၣ်ခၢၣ်စးဒီၣ်ကထၢၣ်၀့ၤလ့အီၤဃုာ်ဒီးသးစၢ်ၦၤဟူးဂဲၤတၢ်ဖိ(၂၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တကီၢ်ခါခဲအံၤပယီၤသုးကျိၤလၢအအိၣ်ခိးခူသူၣ်တၢ်ဖဲလ့က့ၣ်ကီာ်၀့ၢ်ချၢပဲကျီးပူၤတဖၣ်အံၤ ခီဖျိဟီၣ်က၀ီၤ(KNLA)အၦၤက၀ီၤဃာ်အ၀ဲသ့ၣ်လံအဃိ ပယီၤသုးကျိၤလၢအနုာ်လီၤသမံသမိး တၢ်လၢက၀ီၤဒ့အပူၤတဖၣ်ဒီးပယီသုးကျိၤလၢအအိၣ်ခိးခူသူၣ်တၢ်ဖဲပဲကျီးပူၤတဖၣ် လၢကဟးထီၣ်ကဒါအဂီၢ်ကီခဲ၀ဲအဂ့ၢ်န့ၣ် လ့က့ၣ်ကီာ်က၀ီၤဒ့ဖိတဖၣ်စံး၀ဲန့ၣ်လီၤႉ လီၢ်က၀ီၤဖိလၢအအိၣ်လ့က့ၣ်ကီာ်က၀ီၤဒ့(၃)တဂၤစံး၀ဲ“ခဲအံၤပသ့ၣ်ညါဘၣ်လၢကနုာ်လီၤဖီၣ်တၢ်လၢက၀ီၤဒ့(၆)ဘ့ၣ်လၢာ်ပူၤအဃိ တၢ်ခံးလီၤလံမ့ၢ်ကဆဲးမၤသးဒ်လဲၣ်ဒုတသ့ၣ်ညါဘၣ်ႉ တဟါအံၤမးမ့တဟးထီၣ်ဘၣ်ဒုပနၢ်ဟူလၢကခး၀ဲလီၤႉ ခီဖျိတၢ်ဟ့ၣ်၀ဲသုးကျိၤတဖၣ်အခွဲး လၢကနုာ်လီၤသမံသမိးတၢ်အဃိ ခဲအံၤပထံၣ်ဘၣ်လၢတၢ်ဖီလာ်သုးတဖၣ်အိၣ်ကတဲာ်ကတီၤထီၣ်သးလံ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်အိၣ်သးအံၤအဃိ ၦၤအိၣ်လၢလ့က့ၣ်ကီာ်၀့ၢ်သီက၀ီၤဒ့ပူၤတဖၣ် လဲၤစံၣ်အိၣ်ပလဲာ်သးလၢကစၢၢ်ခီၣ်ထံးအိၣ်၀ဲအသိး တနီၤန့ၣ်လဲၤစံၣ်အိၣ်၀ဲလၢသီခါဖၠၣ်ဒီးတၢ်ဘါယွၤသရိာ်အိၣ်စ့ၢ်ကီး၀ဲအဂ့ၢ်န့ၣ် ကမျၢၢ်လၢအိၣ်က၀ီၤဒ့ပူၤတဖၣ်စံး၀ဲန့ၣ်လီၤႉ

လါဒံၣ်စ့ဘၢၣ် ၁၃ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ လီၢ်ခၢၣ်သးထီဘိကမံးတံာ်ဆၢတဲာ်လီၤ၀ဲလၢကမၤ၀ဲ ၁၇ ဘျီတဘျီ ခီကရဲးတၢ်အိၣ်ဖှိၣ်ဖးဒိၣ်အံၤ ဖဲနံၣ်လၢကဟဲ(၂၀၂၂)ထီၣ်သီန့ၣ်လီၤႉ ခ့ၣ်အဲၣ်ယူၣ်လီၢ်ခၢၣ်သးထီဘိကမံးတံာ်တၢ်အိၣ်ဖှိၣ်လၢတၢ်မၤအီၤစးထီၣ်လၢလါနိၣ်၀့ဘၢၣ် ၂၂ သီတုၤလၢလါဒံၣ်စ့ဘၢၣ် ၈ သီအနံၤအံၤ တၢ်တၢၣ်ပီၣ်တဲသကိး၀ဲလၢတၢ်ကမၤခီကရဲးတၢ်အိၣ်ဖဲ(၂၀၂၂)လါဖ့ၤဘြူၤအါရံၤအတီၢ်ပူၤအဂ့ၢ်န့ၣ် လီၢ်ခၢၣ်သးထီဘိကမံးတံာ်ဖိလၢအဟဲထီၣ်တၢ်အိၣ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ လီၢ်ခၢၣ်သးထီဘိမံးတံာ်နဲၣ်ရွဲၣ်ခိၣ်ကျၢၢ်သဃဲၤ(၂)ပဒိၣ်စီၤလၣ်ထိစံး၀ဲလၢ“တဲ၀ဲလၢကမၤ၀ဲဖဲလါဖ့ၤဘြူၤအါရံၤအတီၢ်ပူၤလီၤႉ ဘၣ်အိၣ်ခိးကွၢ်ဒံးလၢတၢ်ဆဲးခိ၀ံၣ်ကသံၣ်ဒီသဒၢ၀ံၤအဆၢကတီၢ်မီၤနီၤႉ မ့ၢ်တၢတဖျၢၣ်ဒီးခံဖျၢၣ်တဖျၢၣ်န့ၣ်ကယံၤထဲလဲၣ်န့ၣ်ကဘၣ်တယးကွၢ်ဒံးမီၤနီၤႉ ဘၣ်တဲလၢ(၂၀၂၂) ထီၣ်သီလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါတၢ်အိၣ်ဖှိၣ်အပူၤတၢ်တၢၣ်ပီၣ်တဲသကိး၀ဲလံာ်ပာ်ဖျါလၢတၢ်ကတီၣ်ထီၣ်၀ဲလၢခီကရဲးပူၤတဖၣ်ႇတၢ်က့ၤပဲာ်ထံနီၤဖးက့ၤခ့ၣ်အဲၣ်ယူၣ်အတၢ်သူၣ်ထီၣ်ဆီလီၤတဖၣ်ႇ တၢ်တၢၣ်ပီၣ်တဲသကိး၀ဲတၢ်မၤအကျဲဒီးခါဆူညါတၢ်မၤအကျဲတဖၣ်ဒီးႇကအိၣ်ကတီၤသးလၢ(၁၇)ဘျီတဘျီခီကရဲးတၢ်အိၣ်ဖှိၣ်အဂီၢ်အဂ့ၢ်န့ၣ် ပဒိၣ်စီၤလၣ်ထိစံးအါထီၣ်၀ဲန့ၣ်လီၤႉ KNU-ကညီဒီကလုာ်စၢဖှိၣ်ကရၢအံၤဘၣ်တၢ်ဒုးအိၣ်ထီၣ်၀ဲဖဲ(၁၉၄၇)နံၣ် လါဖ့ၤဘြူၤအါရံၤ ၅ သီအနံၤဒီးအ၀ဲၤကျိၤအိၣ်၀ဲ(၁၄)ဘိန့ၣ်လီၤႉ လီၢ်ခၢၣ်သးထီဘိကမံးတံာ်တၢ်အိၣ်ဖှိၣ်လၢတၢ်မၤ၀ဲ၀ံၤခဲအံၤန့ၣ် တၢ်ကရၢကရိ၀ဲၤကျိၤဒီးသိၣ်မှံၤဂ့ၢ်၀ီ၀ဲၤကျိၤတဖၣ်တၢ်တဆဲးပာ်၀ဲလၢၤဘၣ်ဒီး တၢ်ကဆဲးမၤဖျါထီၣ်က့ၤတၢ်မၤအကျဲလၢအဘၣ်ထွဲတဖၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ထီဘိကမံးတံာ်တၢ်အိၣ်ဖှိၣ်လၢတၢ်မၤ၀ဲဘျီ၀ဲန့ၣ် ခီဖျိလၢတၢ်အိၣ်ဆူၣ်အိၣ်ချ့တၢ်ဂ့ၢ်ဒီးခိၣ်နၢ်တနီၤလဲၤပူၤကံွာ်သးအိၣ်၀ဲအဃိ ၦၤဟဲထီၣ်၀ဲဒၣ်တၢ်အိၣ်ဖှိၣ်အံၤအိၣ်၀ဲ(၄၁)ဂၤန့ၣ်လီၤႉ

လါဒံၣ်စ့ဘၢၣ် ၁၀ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤလါဒံၣ်စ့ဘၢၣ် ၁၀ သီအနံၤ ပယီၤသုးလၢအအိၣ်ဖဲမဲၢ်ခါထၣ်သုးကလၢၤအံၤခး၀ဲဒၣ်ကမျၢၢ်ချံ(၂)ဘ့ၣ်လၢအလ့ၢ်ထီၣ်လ့ၢ်လိၤဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဃိၣ်လိာ်ကျိပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိလၢအထံၣ်၀ဲဒီးအမဲာ်တဖၣ်အအိၣ်န့ၣ်လီၤႉ ဖဲတနံၤအံၤလါဒံၣ်စ့ဘၢၣ် ၁၀ သီ မုၢ်ထူၣ် ၁၁ နၣ်ရံၣ်ဘျဲၣ်အဆၢကတီၢ် ပယီၤသုးခး၀ဲကမျၢၢ်အချံတဘ့ၣ်လၢအဟဲလီၤပိာ်၀ဲထံကျိအံၤဒီး တကးဒံးဘၣ်ဖဲမုၢ်ထူၣ် ၁၂ နၣ်ရံၣ်တခီဃၣ်ဃၣ်န့ၣ် ပယီၤသုးတဒူၣ်ဃီ၀ဲန့ၣ်ခးကဒီး၀ဲကမျၢၢ်အချံတဘ့ၣ်အဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ချံခံဘ့ၣ်န့ၣ်တၢ်ခး၀ဲႇခး၀ဲခံဘျီမီၤနီၤႉ ခး၀ဲတၢတဘ့ၣ်န့ၣ်ချံဖိႇလၢခံတဘ့ၣ်န့ၣ်ကဲ၀ဲချံဖးဒိၣ်လီၤႉ ၦၤအိၣ်လၢချံဖိတဘ့ၣ်န့ၣ်အပူၤတဖၣ်ဖုလီၤ၀ဲလၢချံပူၤလီၤႉ တဘၣ်ၦၤကညီဘၣ်ဆၣ်သနါက့မ့မ့ၢ်ချံကစၢ်န့ၣ်အစ့လီၤထွံကံွာ်၀ဲလၢထံကျါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိပယီၤသုးခး၀ဲကမျၢၢ်ချံအဃိ ချံဟးဂီၤ၀ဲတဆံးတက့ၢ်ဘၣ်ဆၣ် မ့မ့ၢ်ၦၤအိၣ်လၢချံပူၤသ့ၣ်တဖၣ်န့ၣ်တၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ မဲၢ်ခါထၣ်ပယီၤသုးခးကမျၢၢ်အချံကဲထီၣ်သးဒ်လဲၣ်န့ၣ် လီၢ်က၀ီၤသ၀ီဖိလၢအအိၣ်လၢကီၢ်ကၠီၣ်တဲၣ်တကပၤစ့ၢ်ကီးထံၣ်ထွဲ၀ဲတၢ်ကဲထီၣ်သးအံၤအမဲာ်ညါ တၢ်ဂီၤမူလၢအ၀ဲသ့ၣ်ဒိဃာ်၀ဲသ့ၣ်တဖၣ်တီၣ်ထီၣ်ရၤလီၤ၀ဲဒၣ်လၢ(facebook)ပူၤအိၣ်စ့ၢ်ကီးန့ၣ်လီၤႉ သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံ ပယီၤသုးကလၢၤလၢအအိၣ်ဆီလီၤသးဖဲဃိၣ်လိာ်ကျိကၢၢ်နံၤတနီၤန့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ သုးက့(၅)စုဒုၣ်တီၤအဖီလာ်(KNLA)အၦၤတဖၣ်လဲၤထီၣ်ဒုးဟံးန့ၢ်က့ၤ၀ဲဒီး ပယီၤသုးခးကမျၢၢ်ချံဒ်အံၤကဲထီၣ်သးတစှၤန့ၢ်ဒံးသၢဘျီလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ

လါဒံၣ်စ့ဘၢၣ် ၉ သီႇ ၂၀၂၁ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ် တးခ်ကီၢ်ရ့ၣ်အပူၤ ခီကီၢ်ကၠိဖိလၢအသးနံၣ်စးထီၣ်(၁၂)နံၣ်တုၤလၢ(၁၈)နံၣ်သ့ၣ်တဖၣ် ကၠီၣ်တဲၣ်ပဒိၣ်ကဆဲးန့ၢ်၀ဲခိ၀ံၣ်ကသံၣ်ဒီသဒၢအဂ့ၢ်န့ၣ် သ့ၣ်ညါဘၣ်လၢတၢ်ကရၢကရိလၢအဟူးဂဲၤမၤတၢ်လၢခီကီၢ်ကၠိတဖၣ်အအိၣ်န့ၣ်လီၤႉ ဖဲတလါအံၤလါဒံၣ်စ့ဘၢၣ် ၅ သီအနံၤန့ၣ် တၢ်စးထီၣ်ဆဲးန့ၢ်၀ဲခီကီၢ်ဆၣ်သူလ့ၤကၠိဖိတဖၣ်ကသံၣ်ဒီသဒၢလံဒီး တၢ်ကဆဲးဆဲးန့ၢ်၀ဲခီကီၢ်ကၠိလၢအအိၣ်တ့ၢ်သ့ၣ်တဖၣ်ဒံးအဂ့ၢ်န့ၣ် (Burmese Migrant Teachers Association-BMTA) ၦၤဘၣ်မူဘၣ်ဒါသရၣ်မုၣ်ဒီၣ်စွ့ၤစ့ၤ၀့ စံး၀ဲဒ်အံၤန့ၣ်လီၤႉ ဒီၣ်စွ့ၤစ့ၤ၀့စံး၀ဲလၢ“ယသံကွၢ်လၢမဲၢ်ဆီးတၢ်ဆါဟံၣ်ဖးဒိၣ်ဒီး ဖဲန့ၣ်သရၣ်မုၣ်တဖၣ်တဲယၤလၢတဲဘၣ်ကၠိဖိမိၢ်ပၢ်လီၤတံၢ်လီၤဆဲးမီၤနီၤႉကဆဲးန့ၢ်၀ဲခီကီၢ်ကၠိဖိကသံၣ်ဒီသဒၢစးထီၣ်(၁၂)နံၣ်တုၤလၢ(၁၈)နံၣ်မီၤနီၤႉ ကဆဲးန့ၢ်၀ဲဖဲလါဒံၣ်စ့ဘၢၣ်လီၢ်ခံကတၢၢ်တနွံမ့တမ့ၢ်လါယနူၤအါရံၤထီၣ်တၢတနွံလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤခီကီၢ်ကၠိဖိလၢတၢ်ကဆဲးန့ၢ်၀ဲကသံၣ်ဒီသဒၢအမံၤစရီတဖၣ် အ၀ဲသ့ၣ်ထၢဃာ်စရီလၢခီကီၢ်ကူၣ်သ့တၢ်ကရၢကရိလၢအဘၣ်ထွဲတဖၣ်အအိၣ်လံအဂ့ၢ်ဒီး ကဆဲးန့ၢ်ခီကီၢ်ကၠိအဖျၢၣ်(၇၀)ဘျဲၣ်လၢအအိၣ်တးခ်ကီၢ်ရ့ၣ်ပူၤအဂ့ၢ်န့ၣ် ဒီၣ်စွ့ၤစ့ၤ၀့စံးအါထီၣ်၀ဲန့ၣ်လီၤႉ ခီကီၢ်ကၠိအဖျၢၣ်(၇၀)ဘျဲၣ်လၢအအိၣ်ဖဲကီၢ်ကၠီၣ်တဲၣ်ကလံၤစိး တးခ်ကီၢ်ရ့ၣ်အပူၤအံၤ ၦၤကၠိဖိမၤလိမၤဒိးတၢ်အနီၣ်ဂံၢ်အိၣ်၀ဲတကလးဘျဲၣ်ညါဒီး ကၠိဖိတဖၣ်အကျါကၠိဖိလၢအသးနံၣ်စးထီၣ်(၁၂)နံၣ်တုၤလၢ(၁၈)နံၣ်တဖၣ်ခဲလၢာ်န့ၣ် ကၠီၣ်တဲၣ်ပဒိၣ်ကဆဲးန့ၢ်၀ဲခိ၀ံၣ်ကသံၣ်ဒီသဒၢန့ၣ်လီၤႉ တကီၢ်ခါခဲအံၤကီၢ်ကၠီၣ်တဲၣ်အပူၤခိ၀ံၣ်တၢ်ဘၣ်ကူဘၣ်ဂာ်လီၤစှၤ၀ဲဒၣ်လံဘၣ်ဆၣ် ဖဲအပူၤကွံာ်လါဒံၣ်စ့ဘၢၣ် ၆ သီအနံၤန့ၣ် အမဲရံၣ်ကၣ်ထံကီၢ်ဖိတဂၤလၢအဟဲနုာ်လီၤလၢကီၢ်ကၠီၣ်တဲၣ်ပူၤအံၤ တၢ်ထံၣ်န့ၢ်အီၤလၢအဘၣ်ခိ၀ံၣ်တၢ်ဆါဃၢ်အသီလၢအမ့ၢ်(Omicron)လံအဂ့ၢ်န့ၣ် ကၠီၣ်တဲၣ်ဆူၣ်ချ့၀ဲၤကျိၤ ဘိးဘၣ်ရၤလီၤပာ်ဖျါ၀ဲန့ၣ်လီၤႉ ဖဲတလါအံၤလါဒံၣ်စ့ဘၢၣ် ၅ သီအနံၤ...

လါဒံၣ်စ့ဘၢၣ် ၈ သီ, ၂၀၂၁ နံၣ်, ခ့ၣ်အဲးစံၣ် ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်လၢမုၢ်သဲးသ၀ီပူၤအဃိ လီၢ်က၀ီၤသ၀ီဖိဘၣ်ဒိ၀ဲ(၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါလါဒံၣ်စ့ဘၢၣ် ၇ သီ ဟါခီ ၇ နၣ်ရံၣ်ဃၣ်ဃၣ်အဆၢကတီၢ် ခီဖျိခူၤသ့ၤစိပယီၤသုးကလၢၤ(ခမရ-၇၄)အံၤ ခးလီၤကျိဖးဒိၣ်တဖၣ်ဆူမုၢ်သဲးသ၀ီပူၤအဃိ လီၢ်က၀ီၤသးစၢ်(၁)ဂၤဒီးဖိသၣ်(၂)ဘၣ်ဒိဘၣ်ထံး၀ဲအဂ့ၢ်န့ၣ် ခ့ၣ်အဲၣ်ယူၣ် တၢ်ကစီၣ်ပာ်ဖျါ၀ဲဖဲတနံၤအံၤလါဒံၣ်စ့ဘၢၣ် ၈ သီအနံၤန့ၣ်လီၤႉ ဒ်ခ့ၣ်အဲၣ်ယူၣ်တၢ်ကစီၣ်ပာ်ဖျါ၀ဲအသိး လီၢ်က၀ီၤသ၀ီဖိလၢအဘၣ်ဒိ ၃ ဂၤအံၤမ့ၢ်၀ဲ စီၤန့ၢ်ကျၢၤမူ(၂၄)နံၣ်န့ၣ်ဘၣ်၀ဲအဒ့ဖီလာ်ႇစီၤလွဲန့ၢ်မူ(၁၃)နံၣ်ဘၣ်၀ဲအခီၣ်မုၢ်ဒီးမ့မ့ၢ်စီၤပွ့ပွ့တိၣ်(၁၃)နံၣ်အံၤဘၣ်၀ဲအခီၣ်ကံၣ်ဒုၣ်န့ၣ်လီၤႉ ဘၣ်ထွဲဒီးတၢ်ဂ့ၢ်ကဲထီၣ်သးအံၤချၢၣ်လွံၢ်ထူၣ်ကီၢ်ရ့ၣ်ကညီဂ့ၢ်၀ီၦၤဘၣ်မူဘၣ်ဒါတဂၤစံး၀ဲလၢ“မ့ၢ်လီၤတၢ်ခးလိာ်သးကဲထီၣ်ဖဲမဟါ ၇ သီ ဟါခီလီၤႉ တၢ်ခးလိာ်သးကဲထီၣ်၀ံၤဘျီပယီၤသုးခးလီၤကျိဖးဒိၣ်လၢသ၀ီပူၤလီၤႉ ဖဲန့ၣ်ဘၣ်၀ဲၦၤ(၃)ဂၤပိာ်ခွါခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲတနံၤအံၤလါဒံၣ်စ့ဘၢၣ် ၈ သီအနံၤန့ၣ်လီၤႉ လၢန့ၣ်အမဲာ်ညါဖဲတနံၤအံၤမုၢ်ဃ့ၢ်လီၤ ၁ နၣ်ရံၣ်ဘျဲၣ်အဆၢကတီၢ်စ့ၢ်ကီး သုးသိလ့ၣ်(၂၇)ခိၣ်လၢအတီၣ်၀ဲတၢ်အီၣ်တၢ်အီၦဲၤၦဲၤအံၤလဲၤထီၣ်၀ဲဆူလၢၢ်ဒိၣ်တကပၤဒီးမ့လဲၤထီၣ်၀ဲန့ၣ်အါဒၣ်တက့ၢ်တၢ်ဒုးကဲထီၣ်၀ဲအဂ့ၢ်န့ၣ် ချၢၣ်လွံၢ်ထူၣ်ကီၢ်ရ့ၣ်ကညီဂ့ၢ်၀ီၦၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ