လါယနူၤအါရံၤ ၁၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ် (သုးက့ ၄) ထံမိၢ်ပှၢ်ဟီၣ်က၀ီၤအပူၤ တကီၢ်ခါခဲအံၤခီဖျိဒုးယၤတၢ်ဘၣ်ဂံၥ် ဂူၥ်အိၣ်ထီၣ်လၢ၀့ၢ်ဒ၀ဲၢ်-မဲၥ်သမံၢ်ခံကျဲမုၢ်ဖးဒိၣ်အဃိ ကမျၢၢ်ထံဖိကီၢ်ဖိဃုၥ်ဒီးသိလ့ၣ်(မီထိၣ်)တဖၣ်လ့ၤတက့ၤတဘၣ် လ့ၢ်ထီၣ်လ့ၢ် လိၤဘၣ်အဂ့ၢ်န့ၣ် တနီသရံၣ်ကီၢ်ခီ ကီၢ်သူလ့ၤကညီသုးမုၢ်ဒိၣ်(KTLA) ဆၣ်ကဆီသုးတြိၤ ထုးထီၣ်ဟ့ၣ်ပလီၢ်၀ဲ ဖဲမဟါ လါယနူၤ အါရံၤ ၁၀ သီအနံၤန့ၣ်လီၤ.
ဒ်(KTLA)လံၥ်တၢ်ဟ့ၣ်ပလီၢ်ပူၤပၥ်ဖျါ၀ဲအသိးန့ၣ် ထံမိၢ်ပှၢ်ဟီၣ်က၀ီၤဃုၥ်ဒီး၀့ၢ်ဒ၀ဲၢ်-မဲၥ်သမံၢ်ခံအ့ရှါကျဲမုၢ်န့ၣ် ခီဖျိဒုၣ်ဒါမၤအါထီၣ်အဂံၢ် အဘါဒီးတၢ်ဒုးတၢ်ယၤအိၣ်ထီၣ်အဃိ ထံဖိကီၢ်ဖိကမျၢၢ်ဃုၥ်ဒီးသိလ့ၣ်(မီထိၣ်)ဖးဒိၣ်, သိလ့ၣ်တီၣ်ပှၤလဲၤတၢ်က့ၤတၢ်ဖိတဖၣ် လ့ၤတက့ၤတဘၣ်လ့ၢ်ထီၣ်လ့ၢ်လိၤဘၣ်အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးလၢကီၢ်သူလ့ၤကညီသုးမုၢ်ဒိၣ်(KTLA)အတၢ်ဟ့ၣ်ပလီၢ်အံၤ လီၢ်က၀ီၤကမျၢၢ်ထံဖိကီၢ်ဖိတဖၣ်မ့တတူၢ်လိၥ်လူၤပိၥ်မၤထွဲ ၀ဲဘၣ်ဒီးတၢ်ဂ့ၢ်ကီမ့အိၣ်ထီၣ်,တၢ်ဘၣ်ဒိဘၣ်ထံးမ့အိၣ်ထီၣ်သပျၢၤန့ၣ် တမ့ၢ်လၢဆၣ်ကဆီသုးတြိၤ/ဆၣ်ဃံလၤသုးရ့ၣ် ခိၣ်နၢ်ပှၤဘၣ်မူ ဘၣ်ဒါလ့ၤတက့ၤတဟ့၀ဲမူဒါဘၣ်အဂ့ၢ်န့ၣ် လံၥ်တၢ်ပၥ်ဖျါပူၤစံး၀ဲန့လီၤ.
လံၥ်တၢ်ဟ့ၣ်ပလီၢ်လၢတၢ်ထုးထီၣ်ဘိးဘၣ်ရၤလီၤ၀ဲအံၤန့ၣ်မ့ၢ်၀ဲ ကီၢ်သူလ့ၤသုးမုၢ်ဒိၣ်(KTLA) ဆၣ်ကဆီသုးတြိၤ...
လါယနူၤအါရံၤ ၁၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် (သုးက့ ၁)ဟီၣ်က၀ီၤ ဘံလ့ကီၢ်ဆၣ်အပူၤ စးထီၣ်ဖဲအပူၤကွံၥ်လါဒံၣ်စ့ဘၢၣ်လၢၥ်အံၤန့ၣ် ဟီၣ်က၀ီၤ(KNDO)သုးရ့ၣ် ၂ လဲၤခးစဲးပြဲး၀ဲမဲးပြ့ခံပယီၤသုးကလၢၤအံၤဒီး ပယီၤသုးက့ၤခးလီၤကဒါကျိဖးဒိၣ်တပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
မဲးပြ့ခံပယီၤသုးကလၢၤလၢအိၣ်ဆီလီၤသးဖဲဘံလ့ကီၢ်ဆၣ်ပူၤလၢအဘူးလိၥ်သးဒီး(သုးက့ ၅)ဟီၣ်က၀ီၤအံၤ စးထီၣ်ဖဲလါဒံၣ်စ့ဘၢၣ် ၃၁ သီ အနံၤန့ၣ် ဟီၣ်က၀ီၤကညီဒီကလုၥ်ဂၢၤသးကရၢ(KNDO) သုးရ့ၣ်-၂ သုးပၥ်ဖှိၣ် လဲၤစဲးပြဲး,လဲၤတ့ၢ်လီၤ၀ဲဒီးဒြိမ့ၣ်ပိၢ် တလီၢ်လီၢ် အဖီခိၣ် ပယီၤသုးတကပၤသူ၀ဲကဘီယူၤဟဲက့ၤခးလီၤကဒါတၢ်ဆူသုးကလၢၤအခိၣ်အဃၢၤအဃိ ကမျၢၢ်တဖၣ်ဃ့ၢ်ထီၣ်၀ဲ အါမးအဂ့ၢ်န့ၣ် သုးက့(၁)ပှၤဘၣ်မူဘၣ်ဒါစံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤ (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲလၢ“ပှၤစးထီၣ်လဲၤခးန့ၣ်ကဘၣ်လၢလါဒံၣ်စ့ဘၢၣ် ၃၁ သီ အနံၤန့ၣ်လံ....
မံၣ်ဒံၣ်ယၢၣ်လၢသ့ၣ်ညါမူဒါ-အိၣ်ဒီးသူးသ့ၣ်လၤကပီၤ ဒီး ပှၤမၤတၢ်ကစီၣ်ဖိလၢသ့ၣ်ညါမူဒါ-အိၣ်ဒီးသူးသ့ၣ်လၤကပီၤ တၢ်တီခိၣ်ရိၣ်မဲ
(စိၣ်မံၣ်ယၣ်ကၠီၣ်)
(၉-၁-၂၀၂၅)
-(IT) တၢ်ကစီၣ်တၢ်သ့တၢ်ဘၣ်ဂုၤထီၣ်ပသီထီၣ်ချ့သဒံးတပယူၥ်ဃီ
-ပှၤကိးဂၤဒဲးသူ၀ဲလီတဲစိဒီးအ့ထနဲးတၢ်ဆဲးကျိးဆဲးကျၢ
-ထံဒိၣ်ကီၢ်လဲၢ်တနီၤ,ပဒိၣ်ဒီးသုးဂ့ၢ်၀ီ၀ဲၤကျိၤတဖၣ်မ့ၢ်ဂ့ၤ, ပၥ်ခူသူၣ်ပၥ်ကဒၢဃၥ်၀ဲတၢ်ဂ့ၢ်တခါဒီး ဒုးအိၣ်ထီၣ်၀ဲတၢ်ကစီၣ် အယီၤအဘျၣ်ဒီးတၢ်ကစီၣ်အကမၣ်လၢတၢ်ဃါဃုၥ်ဒုးအိၣ်ထီၣ်၀ဲတဖၣ်
-ပှၤကိးဂၤဒဲး ဒုးအိၣ်ထီၣ်ဒုးကဲထီၣ်တၢ်ကစီၣ်အဂ့ၢ်အကျိၤသ့၀ဲအကလုၥ်ကလုၥ်လၢတဂၤဒၣ်၀ဲလၢလီတဲစိပူၤသ့ဒီး ရၤလီၤ၀ဲဒၣ်ဆူစိၣ်ရှၢၣ်မံၣ်ဒံၣ်ယၢၣ်ပူၤတဆီအံၤသ့၀ဲ
-လၢပကဖီၣ်ဂၢၢ်ဃၥ်၀ဲတၢ်ဂ့ၢ်(၄)ထံၣ်အံၤအဂီၢ်တမ့ၢ်တၢ်လၢအညီ၀ဲဘၣ်. တၢ်ကစီၣ်လၢအယီၤအဘျၣ်-တၢ်ကစီၣ်အကမၣ် သ့ၣ်တဖၣ်န့ၣ် ဟံန့ၢ်၀ဲခီၣ်တဃၥ်(၄)ထံၣ်လၢအိၣ်ဖျါတၢ်ဖီခိၣ်အံၤဒီး လၢစဲးကးအတီၢ်ပူၤရၤလီၤအသးချ့သဒံးဆူ ဟီၣ်ခိၣ်ဒီတဘ့ၣ် အပူၤန့ၣ်လီၤ.
-တၢ်လၢတၢ်ကစီၣ်အယီၤအဘျၣ်,အကမၣ်အတၢ်လီၤဘၣ်ယိၣ်အံၤ ပဒိၣ်ဒီးပှၤဘၣ်မူဘၣ်ဒါဘၣ်ထွဲတဖၣ် ပၢၤဃၥ်၀ဲခီဖျိလၢ တၢ်သ့တၢ်ဘၣ်, တၢ်သိၣ်တၢ်သီတၢ်ဘျၢကန့ၢ်အဂီၢ်န့ၣ် ဂုၥ်ကျဲးစၢး၀ဲလၢကျဲအကပၤကပၤန့ၣ်လီၤ. ဘၣ်ဆၣ်လၢတၢ်ကဖီၣ်ဂၢၢ်ဃၥ်၀ဲ ဘၣ်ဃးတၢ်ဒုးအိၣ်ထီၣ်တၢ်ကစီၣ်တၢ်ဂ့ၢ်တၢ်ကျိၤညီညီကဒၣ်ချ့သဒံးဒီး လၢစဲးကးအတီၢ်ပူၤရၤလီၤအသးဆူပှၤအါဂၤအအိၣ်ခီန့ၣ် ကဲ၀ဲဒၣ်တၢ်တၤတၢ်ဖးဒိၣ်ညါဒံးန့ၣ်လီၤ.
-လၢတၢ်အိၣ်သးနီၢ်နီၢ်အပူၤစ့ၢ်ကီး ဒ်သိးတၢ်ကဒုးအိၣ်ထီၣ်တၢ်ကစီၣ်အယီၤအဘျၣ်,တၢ်ကစီၣ်လၢအကမၣ်အံၤအဂီၢ်န့ၣ် တၢ်အိၣ်သးတၢ်ဂ့ၢ်တၢ်ကျိၤအကလုၥ်ကလုၥ်စ့ၢ်ကီး——-လီၤ. နကဒုးအိၣ်ထီၣ် ခိၣ်ဃၢၤန့ဆၢၣ်တၢ်ဘၣ်ယိၣ်လၢအဟဲတုၤအိၣ် ပှၤသ့လၢအတရ့တၢ်ဆၢကတီၢ်ဘၣ်အံၤဘၣ်ဧါ,လၢမုၢ်ကျိၤ၀ဲၤကွၥ်တကပၤစ့ၢ်ကီး နကဒုးအိၣ်ထီၣ်လၢသိအလုၢ်အပှ့ၤဧါ, နကဒုးအိၣ်ထထီၣ်ဘၣ်ဃးတၢ်ဆါဘၣ်ကူဘၣ်ဂၥ်တခါခါဧါ,နကဒုးအိၣ်ထီၣ်ဘၣ်ဃးဒုးယၤဂ့ၢ်၀ီဧါ. လၢမုၢ်ကျိၤ၀ဲၤကွၥ်တကပၤစ့ၢ်ကီးနကဒုးအိၣ်ထီၣ်ဒ်သိအလုၢ်အပှ့ၤဧါ, တၢ်သ့ၣ်တဖၣ်အံၤ နဒုးအိၣ်ထီၣ် ဒ်တၢ်ကွဲးပူတၢ်ဂ့ၢ်တၢ်ကျိၤတခါလၢအအိၣ်ဒီးတၢ်ရဲၣ်လီၤကျဲၤလီၤန့ၣ် နထုးထီၣ်ရၤလီၤအီၤသ့န့ၣ်လီၤ.
ခ့ခါဆၢကတီၢ်ခဲအံၤ ပှၤကိးဂၤဒဲးန့ၣ်အိၣ်ဒီးအလီတဲစိသူ၀ဲဒၣ်(စိၣ်ရှၢၣ်မံၣ်ဒံၣ်ယၢၣ်)တခါခါအဃိ တၢ်ဂ့ၢ်တၢ်ကျိၤတခါခါလၢ...
လါယနူၤအါရံၤ ၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲအပူၤကွံၥ်လါယနူၤအါရံၤ(၆)သီအနံၤန့ၣ်ပ ပယီၤသုးအပှၤ(၂)ဂၤဟဲဟ့ၣ်လီၤသးလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၉)အအိၣ်ဃုၥ်ဒီးတၢ်စုကဝဲၤသ့ၣ်တဖၣ်အဂ့ၢ်န့ၣ်ချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပယီၤသုးအပှၤဖိလၢဟဲဟ့ၣ်လီၤအသး(၂)ဂၤအံၤမ့ၢ်ဝဲပယီၤသုးခီၣ်သုးရ့ၣ်(ခလရ-၂၈၈)အပှၤဒီးဟဲလီၤဘၣ်မူဒါဖဲ(သါမနံၣ်)ဟီၣ် ကဝီၤတၢ်လီၢ်အပူၤန့ၢ်ဒံးဒၣ်ထဲတလါအတီၢ်ပူၤဒီးဖဲန့ၣ်ဝံၤလီၢ်ခံဟဲဟ့ၣ်လီၤသးဃုၥ်ဒီးတၢ်စုကဝဲၤသ့ၣ်တဖၣ်အဂ့ၢ်,အဂ့ၢ်လၢၢ်ဒိၣ်ကီၣ်ဆၣ်ပှၤကတိၤတၢ်ပၢပဒိၣ်စီၤဝါမုၢ်စံးဝဲဒ်အံၤန့ၣ်လီၤ.
"ဒုၣ်ဒါသုးလၢဟဲဟ့ၣ်လီၤအသးခံဂၤန့ၣ်အိၣ်ဝဲဒၣ်လၢ(ခလရ-၂၈၈)ဒီးဟဲလီၤမူဒါဖဲ(သါမနံၣ်)တၢ်လီၢ်န့ၣ်မီၤနီၤ. ပှၤခံဂၤန့ၣ်န့ၣ်မ့ၢ် ဝဲသုးဖိခံဂၤလၢၥ်လီၤ.
ပှၤသုးဖိခံဂၤန့ၣ်န့ၣ်ထီၣ်ဘၣ်ဝဲသုးတၢ်မၤလိနီၣ်ဂံၢ်(၅)ဝီတဝီမီၤနီၤ. ပှၤတၢတဂၤန့ၣ်မ့ၢ်ပှၤဟးပိၥ်ဝဲပနံၥ်သိ လ့ၣ်အခံဒီးပယီၤသုးဖီၣ်န့ၢ်အီၤဝံၤမၢကဲသုးလီၤ.ပှၤခံဂၤတဂၤန့ၣ်အိၣ်လၢယိၤကီၢ်,လီၤဘၣ်ဝဲဃိၥ်ပူၤဝံၤယိၤဟဲက့ၤဆှၢဝဲဒၣ်ဆူကီၢ်ပယီၤဒီးပယီၤသုးဖီၣ်ဃံးအီၤလၢကဘၣ်နုၥ်လီၤကဲသုးန့ၣ်လီၤ. အဝဲသ့ၣ်ဟဲလီၤမူဒါလၢတၢ်မဲၥ်ညါန့ၣ်န့ၢ်ဝဲတလါဒံးလီၤ" အဂ့ၢ်န့ၣ်စံး ဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါပယီၤသုးအပှၤခံဂၤလၢဟဲဟ့ၣ်လီၤအသးလၢ(KNLA)သုးရ့ၣ်(၉)အစုပူၤအံၤခီဖျိဟဲစိၥ်ဃုၥ်ဒီးတၢ်စုကဝဲၤဒ်အမ့ၢ်ကျိ(MA1-၁ခိၣ်,MA3-၁ခိၣ်, ကျိဆၣ်ဒၢ(၈)ဘ့ၣ်,ကျိချံအဖျၢၣ်(၂၀၀)သ့ၣ်တဖၣ်အဃိတၢ်ဟ့ၣ်လၤဟ့ၣ်ကပီၤဝဲကျိၣ်စ့အသိးဒ်တၢ်ပၥ် လီၤပၥ်ဝဲပှၤသုးဖိလၢအဟဲဟ့ၣ်လီၤသးတဖၣ်သုးတၢ်သိၣ်တၢ်သီတၢ်ဘျၢ,အတၢ်မၤကျဲအိၣ်ဝဲအသိးန့ၣ်တၢ်အံးထွဲကွၢ်ထွဲအဝဲသ့ၣ်ဂ့ၤဂ့ၤဘၣ်ဘၣ်အဂ့ၢ်ပဒိၣ်စီၤဝါမုၢ်စံးအါထီၣ်ဝဲဒၣ်န့ၣ်လီၤ.
စးထီၣ်လၢသုးဟံးန့ၢ်တၢ်စိတၢ်ကမီၤဝံၤအလီၢ်ခံချၢၣ်လွံၢ်ထူၣ်ကီၢ်ရ့ၣ်(သုးက့-၃)ဟီၣ်ကဝီၤအပူၤဟီၣ်ခိၣ်မဲၥ်ဖံးခိၣ်တၢ်ဒုးတၢ်ယၤကဲ ထီၣ်အသးအိၣ်ဝဲခဲအံၤခဲအံၤဒီးဖဲ(၂၀၂၄)နံၣ်,နံၣ်တဝၥ်အတီၢ်ပူၤန့ၣ်ချၢၣ်လွံၢ်ထူၣ်ကီၢ်ရ့ၣ်အပူၤတၢ်ဒုးကဲထီၣ်ဝဲအဘျီ(၄၀၀)ဘျဲၣ်အသိးမ့ၢ်ကီၢ်ရ့ၣ်တဘ့ၣ်လၢတၢ်ဒုးကဲထီၣ်ဝဲအါကတၢၢ်အဂ့ၢ်န့ၣ်ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပၥ်ဖျါတ့ၢ်ဃၥ်အိၣ်ဝဲဒၣ်န့ၣ်လီၤ.
လါယနူၤအါရံၤ ၉သီ, ၂၀၂၅နံၣ်, ခ့ၣ်အဲးစံၣ်
ကညီကီၢ်စဲၣ်ဖၣ်အၣ်ဝ့ၢ်ကဝီၤဒ့တဖၣ်အပူၤ,စးထီၣ်ဖဲအပူၤကွံၥ်နံၣ်ဘူးကလၢၥ်ဒီးတုၤလၢတကီၢ်ခါခဲအံၤတၢ်ဟ့ၣ်လီမ့ၣ်အူအဆၢကတီၢ်စှၤလီၤဝဲဒီးလီမ့ၣ်အူလီၤမၢ်အဆၢတဲၥ်ယံၤထီၣ်ဝဲအဖီခိၣ်,ဘၣ်ဒိဝဲကမျၢၢ်လီၢ်ကဝီၤဖိတဖၣ်မုၢ်ကျိၤဝဲၤကွၥ်အတၢ်ဖံးအီၣ်မၤအီၣ်ဒီးသဂၢၢ်ဘၣ်ဝဲတၢ်ကီတၢ်ခဲအါထီၣ်အဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ဖၣ်အၣ်,မီၣ်လမၠဲၣ်,ဇၣ်သပၠ့ၣ်,သထူၣ်,မၠဲၣ်ကလ့တၢ်တၢ်ဟ့ၣ်လီမ့ၣ်အူအကျိၤတၢ်လီၢ်ဒီးဖၣ်အၣ်ဝ့ၢ်ကဝီၤဒ့တၢ်လီၢ်တဖၣ်အပူၤ,စးထီၣ်ဖဲ(၂၀၂၄)နံၣ်လါဒံၣ်စဲဘၢၣ်တုၤလၢတကီၢ်ခါခဲအံၤတနံၤအတီၢ်ပူၤတၢ်ဟ့ၣ်က့ၤဝဲလီမ့ၣ်အူထဲ(၃)နၣ်ရံၣ်ခိၣ်ဃၢၤအိၣ်ဝဲဒီးကဝီၤဒ့တနီၤအပူၤတဒိးန့ၢ်ဘၣ်ဝဲလီမ့ၣ်အူ(၃)နၣ်ရံၣ်လၢလၢပှဲၤပှဲၤဘၣ်အိၣ်ဝဲအဂ့ၢ်,ဝ့ၢ်လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
တၢ်ဟ့ၣ်ဝဲလီမ့ၣ်အူအံၤ,တနံၤအတီၢ်ပူၤ(၃)ဘျီခိၣ်ဃၢၤဒီးတဘျီန့ၣ်ယံၥ်ဒၣ်ထဲ(၁)နၣ်ရံၣ်ခိၣ်ဃၢၤလီၤအဃိ,ကဖီအီၣ်တ့ၤအီၣ်တၢ်အဂီၢ်တဘၣ်လီၢ်ဘၣ်စးဘၣ်အဖီခိၣ်,တၢ်ဘၣ်သူဝဲသ့ၣ်မုၣ်ခံ,(သွၣ်)သွဲၣ်လး,ဒီး(ဂဲၣ်စ်)အဃိ,ဘၣ်ဒိဝဲကိးမုၢ်နံၤဒဲးတၢ်ဖံးမၤအီၣ်အီအဂ့ၢ်,လီၢ်ကဝီၤကမျၢၢ်တဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“တၢ်ဟ့ၣ်မ့ၣ်အူဆၢကတီၢ်လီၤစှၤဒိၣ်မး,လၢခံမ့ၢ်ကဟ့ၣ်ဝဲဒံးဧါတသ့ၣ်ညါဘၣ်.အခဲအံၤဂီၤခီ(၂)နၣ်ရံၣ်မ့ၣ်အူဟဲန့ၣ်ပဘၣ်ဆၢထၢၣ်တီၣ်ထီၣ်ထံ,ဖီမ့ၤလီၤ.ပကဘၣ်မံဆၢကတီၢ်ဒၣ်လဲၥ်ပဘၣ်အိၣ်ခိးမ့ၣ်အူဟဲလၢပကမၤတၢ်အဂီၢ်,တဘျီတခီၣ်မ့ၣ်အူဂံၢ်တဂ့ၤဘၣ်အဃိ,ပမ့ၤတမံအိၣ်ဝဲလီၤ.ဂ့ၢ်ဂီၢ်အူန့ၣ်တၢ်ပှ့ၤတၢ်ကလံၤထီၣ်နါက့ပဘၣ်ပၥ်ဂံၢ်ပၥ်ဘါသူဝဲသွဲၣ်လး,ဂဲၣ်စ်တဖၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ခီဖျိမ့ၣ်အူဟဲတဘၣ်လီၢ်ဘၣ်စးဒီးတၢ်ဟ့ၣ်မ့ၣ်အူလီၤစှၤဝဲဒ်အံၤအဖီခိၣ်,ဘၣ်ဒိဝဲတၢ်အိၣ်ဆူၣ်အိၣ်ချ့,တၢ်ဖံးအီၣ်မၤအီၣ်,တၢ်မံတၢ်ဂဲၤသ့ၣ်တဖၣ်အမဲၥ်ညါ,ဟံၣ်ပူၤဃီပူၤတၢ်သူတၢ်စွဲတၢ်လၢၥ်ဘူၣ်လၢၤစ့ၤအါထီၣ်ဝဲအဂ့ၢ်,လီၢ်ကဝီၤပိၥ်မုၣ်အံၤစံးအါထီၣ်ဝဲဒၣ်န့ၣ်လီၤ.
ဒ်န့ၣ်အသိး,တကီၢ်ခါခဲအံၤရ့ၣ်နီၣ်သိအမဲၥ်ညါ,ပနံၥ်တၢ်ကၤတဖၣ်အပှ့ၤထီၣ်ဝဲအဆၢကတီၢ်,လီမ့ၣ်အူပတုၥ်အသးနးထီၣ်ဝဲအဃိ,ကတီၢ်ယံၤမုၢ်ကျိၤဝဲၤကွၥ်ပှၤမၤတၢ်ဖိတဖၣ်အဂီၢ်,တၢ်ဒိဘၣ်အါထီၣ်ဝဲအဂ့ၢ်,ဖၣ်အၣ်လီၢ်ကဝီၤဖိလၢအမၤအီၣ်မုၢ်ကျိၤဝဲၤကွၥ်တဆံးတက့ၢ်တဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“တနံၤန့ၣ်အါကတၢၢ်န့ၢ်မ့ၣ်အူထဲ(၂)နၣ်ရံၣ်,(၃)နၣ်ရံၣ်လီၤဖးနးညါ,ဘၣ်ပှ့ၤက့ၤမ့ၣ်အူစဲးအဃိတၢ်လၢၥ်ဘူၣ်လၢၥ်စ့ၤအါထီၣ်န့ၣ်လီၤ.တဘျီတခီၣ်ကပှ့ၤ(ရ့ၣ်နီၣ်)သိအဂီၢ်တၢ်ကီတၢ်ခဲအိၣ်ဝဲလီၤ.ပအိးထီၣ်စဲးမ့ၣ်အူထဲပလိၣ်ဘၣ်အဆၢကတီၢ်လီၤအဃိ,ပတန့ၢ်သူ(အဲကိ)ကလံၤဒၢချံၣ်ဘၣ်.ကတီၢ်ယံၤအဂီၢ်တၢ်တဘၣ်လီၢ်ဘၣ်စးဘၣ်”အဂ့ၢ်လီၢ်ကဝီၤပိၥ်မုၣ်လၢအမၤတၢ်ဃံတၢ်လၤကျးတဂၤစံးဝဲန့ၣ်လီၤ.
ဖၣ်အၣ်ဒီတဝ့ၢ်အပူၤအံၤတၢ်ဒိးန့ၢ်ဘၣ်လီမ့ၣ်အူစှၤလီၤဝဲဘၣ်ဆၣ်,သုးကီၣ်ကးအစုတီၤဖီလၥ်လီမ့ၣ်အူပှၤမၤတၢ်ဖိလၢအထၢဝဲမ့ၣ်အူလဲတဖၣ်အံၤတထၢစှၤလီၤဝဲမ့ၣ်အူလဲဘၣ်ဒီးမ့မ့ၢ်တခီ,ထၢဝဲဒ်သိးအပူၤကွံၥ်လီၢ်လီၢ်အိၣ်ဝဲလီၤအဂ့ၢ်,ဝ့ၢ်လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါကမျၢၢ်လီၢ်ကဝီၤဖိတဖၣ်အိၣ်ဆိးဟီၣ်ကဝီၤအပူၤလီမ့ၣ်အူအကျိၤတဲၥ်အိၣ်ဝဲနးနးဘၣ်ဆၣ်,သုးကီၣ်ကးအတၢ်ဖံးတၢ်မၤလီၢ်,ဝဲၤဒၢးဒီးပှၤမၤတၢ်ဖိတဖၣ်အိၣ်ဆိးတၢ်လီၢ်တၢ်ကျဲပူၤ,ဒိးန့ၢ်ဘၣ်ဝဲမ့ၣ်အူဂ့ၤဂ့ၤအဂ့ၢ်,သ့ၣ်ညါဘၣ်ဒ်ဖၣ်အၣ်လီၢ်ကဝီၤဖိတဖၣ်စံးဝဲအသိးန့ၣ်လီၤ.
ဒ်သုးကီၣ်ကးအလီမ့ၣ်အူဝဲၤကျိၤကိတိၥ်ပၥ်ဖျါဝဲဒၣ်အသိးန့ၣ်တနံၤအတီၢ်ပူၤလိၣ်ဘၣ်ဝဲလီမ့ၣ်အူဂံၢ်(၅၄၄၃)မဲၤကၤဝၣ်အိၣ်ဝဲဘၣ်ဆၣ်,တၢ်ထုးထီၣ်လီမ့ၣ်အူအဂံၢ်န့ၢ်ဒၣ်ထဲ(၁၇၀၀)မဲၤကၣ်ဝၣ်ခိၣ်ဃၢၤအဖီခိၣ်,ထံကီၢ်ဒီတဘ့ၣ်အပတီၢ်တၢ်ဘၣ်ဟ့ၣ်ဝဲမ့ၣ်အူလၢအကလဲးဒီး,လၢကီၢ်ခီဒိၣ်ဒီးကီၢ်ဆၣ်အိၣ်လီၤတဲၥ်တဖၣ်အဂီၢ်တၢ်ဘၣ်ဟ့ၣ်ဝဲလီမ့ၣ်အူ(၃၅)မျးကယၤဒ်အံၤလီၤအဂ့ၢ်,သုးကီၣ်ကးလီမ့ၣ်အူကိၥ်တိၤဝဲၤကျိၤခိၣ်ထုးထီၣ်ပၥ်ဖျါဝဲဖဲတလါအံၤလါယနူၤအါရံၤအပူၤအိၣ်ဝဲန့ၣ်လီၤ.
လါယနူၤအါရံၤ ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့(၃)ဟီၣ်ကဝီၤလၢၢ်ဒိၣ်ကီၢ်ဆၣ်အပူၤဖဲတလါအံၤလါယနူၤအါရံၤ(၃)သီ အနံၤန့ၣ်(KNDO)သုးရ့ၣ်(၃)ထီၣ်ၡဲလဲကွံၥ်ဝဲမုၢ်သဲးပယီၤသုးကလၢၤဒီးလၢတၢ်ထီၣ်ၡဲလဲအဆၢကတီၢ်တၢ်မၤန့ၢ်ဃုၥ်ဝဲဒၣ်ပယီၤသုးတၢ်စုကဝဲၤ,ကျိချံပှၥ်သၣ်သ့ၣ်တဖၣ်အါအါဂီၢ်ဂီၢ်အဂ့ၢ်ကီၢ်ဆၣ်အပှၤဘၣ်မူဘၣ်ဒါစံးဝဲဒၣ်န့ၣ်လီၤ.
မုၢ်သဲးပယီၤသုးကလၢၤအံၤတၢ်စးထီၣ်ဟူးဂဲၤထီၣ်ဝဲဒၣ်ဖဲလါဒံၣ်စဲဘၢၣ်(၃၁)သီအနံၤဒီးဖဲလါယနူၤအံၤအါရံၤ(၃)သီအနံၤန့ၣ်(KNDO)သုးရ့ၣ်(၃)နုၥ်လီၤၡဲပျီကွံၥ်ဝဲသုးကလၢၤအံၤအဂ့ၢ်သ့ၣ်ညါဘၣ်အသိးလၢတၢ်ထီၣ်ၡဲလဲအကတီၢ်တၢ်မၤန့ၢ်ဃုၥ်စ့ၢ်ကီးဝဲပယီၤသုးစုကဝဲၤ,ကျိချံပှၥ်သၣ်သ့ၣ်တဖၣ်အါအါဂီၢ်ဂီၢ်အဂ့ၢ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဝဲဒ်အံၤန့ၣ်လီၤ.
အဝဲစံးဝဲလၢ "မ့မ့ၢ်(မုၢ်သဲး)ပယီၤသုးအံၤကလၢၤအံၤန့ၣ်တၢ်ထီၣ်အီၤဖဲလါဒံၣ်စဲဘၢၣ်(၃၁)သီအနံၤဒီးတၢ်ထီၣ်မၤန့ၢ်အီၤဖဲလါယနူၤအါ ရံၤ(၃)သီအနံၤန့ၣ်လီၤ. တၢ်ထီၣ်ပယီၤသုးကလၢၤဝဲအံၤန့ၣ်တၢ်မၤန့ၢ်ဝဲဒုၣ်ဒါတၢ်ဖိတၢ်လံၤသ့ၣ်တဖၣ်ဖးအါဖိလီၤ. မ့မ့ၢ်ပယီၤသုးအသံ ဒီးအဘၣ်ဒိခီန့ၣ်ပတဲလီၤတံၢ်တဘၣ်ဘၣ်. လၢတၢ်လဲၤထီၣ်ၡဲလဲအဆၢကတီၢ်န့ၣ်တၢ်ထံၣ်န့ၢ်ဝဲပယီၤသုးအစိၣ်(၄)ဂၤဒီးပယီၤသုးလၢ ဂုၥ်က့ၤအခံသ့ၣ်တဖၣ်လၢကျဲတၢ်ဘၢၣ်တီၤန့ၣ်ပၥ်တ့ၢ်အပှၤအစိၣ်လွံၢ်စိၣ်ယဲၢ်စိၣ်အိၣ်ဝဲလီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ.
တၢ်ထီၣ်ၡဲလဲပယီၤသုးကလၢၤတဘျီအံၤအပူၤတၢ်မၤန့ၢ်ဝဲ(RPG7အချံ-၈၃ဖျၢၣ်,81မမချံ-၂၅ဖျၢၣ်,60MMချံဖုၣ်-၇၂ဖျၢၣ်,60MMချံ ထီ-၇၂ဖျၢၣ်, MA1-၄ခိၣ်, MA3-၁ခိၣ်, MA11-၃ခိၣ်, MA9-၁ခိၣ်, MA2 -၁ခိၣ်, စဲးဖးဒိၣ်-၁ဖျၢၣ်, 81MM-၁ခိၣ်ဃုၥ်ဒီးစုကဝဲၤ, မ့ၣ်ပိၢ်,ကျိချံပှၥ်သၣ်တၢ်ပီးတၢ်လီအဂၤသ့ၣ်တဖၣ်အါအါဂီၢ်ဂီၢ်အဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါတၢ်ပၥ်ဖျါအပူၤအသိးသ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါမုၢ်သဲးပယီၤအပှၤလၢဂုၥ်လီၤက့ၤအခံတဖၣ်အနီၣ်ဂံၢ်ကအိၣ်လၢသၢဆံဘျဲၣ်လွံၢ်ဆံဒီးက့ၤဂုၥ်လီၤက့ၤအခံဖဲ(ခိၣ်ဖးလ့ခိၣ်)သုးကလၢၤအပူၤအဂ့ၢ်သ့ၣ်ညါဘၣ်အသိးပယီၤသုးလၢဟဲထီၣ်လူၤက့ၤဝဲအပှၤလၢအိၣ်မုၢ်သဲးသ့ၣ်တဖၣ်စ့ၢ်ကီးတကီၢ်ခါခဲ အံၤန့ၣ်အိၣ်ဒံးဝဲဒၣ်ဖဲဆီမံၤလူၢ်ဟီၣ်ကဝီၤပူၤဒံးလီၤအဂ့ၢ်ပဒိၣ်စီၤဝါမုၢ်စံးအါထီၣ်ဝဲဒၣ်န့ၣ်လီၤ.
ဘၣ်ဆၣ်ဘၣ်ထွဲဒီးတကီၢ်ခါပယီၤသုးကီၣ်ကးသ့ၣ်တဖၣ်အတၢ်ရဲၣ်တၢ်ကျဲၤ,အတၢ်အိၣ်သးဒီးအတၢ်ဟူးတၢ်ဂဲၤလၢကဟဲထီၣ်ဝဲဆူညါအဂီၢ်တၢ်တဲလီၤတံၢ်အီၤတန့ၢ်ဒံးဘၣ်အဂ့ၢ်လီၢ်ကဝီၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ.
တကတီၢ်ဃီဖဲတၢ်မၤဝဲတၢ်ထီၣ်ၡဲလဲကွံၥ်ဝဲ(မုၢ်သဲး)ပယီၤသုးကလၢၤအံၤဝံၤအလီၢ်ခံသုးကီၣ်ကးတကပၤအကဘီယူၤဟဲခးလီၤတၢ်,ဟဲတ့ၢ်လီၤမ့ၣ်ပိၢ်အဃိဒူသဝီကရူၢ်လၢအမ့ၢ်(ဃဲၥ်ကၤခိၣ်ကရူၢ်, ဒီး ဃဲဒဲကရူၢ်)ကမျၢၢ်တဖၣ်ဘၣ်ဃ့ၢ်အိၣ်ကဒုအသးလၢဒူသဝီတၢ် လီၢ်တၢ်ကျဲၤအဂၤဒီးဒ်န့ၣ်အသိးသဂၢၢ်ဘၣ်ဝဲတၢ်အီၣ်တၢ်အီ,ကသံၣ်ကသီတၢ်ဂ့ၢ်ကီစ့ၢ်ကီးအဂ့ၢ်ပဒိၣ်စီၤဝါမုၢ်စံးစ့ၢ်ကီးဝဲဒၣ်န့ၣ်လီၤ
ဒ်န့ၣ်အသိး(မုၢ်သဲး)ပယီၤသုးကလၢၤလၢတၢ်ထီၣ်ၡဲလဲကွံၥ်ဝဲဒီးထီၣ်မၤန့ၢ်ကွံၥ်ဝဲတဖျၢၣ်အံၤန့ၣ်မ့ၢ်ဝဲသုးကလၢၤတဖျၢၣ်လၢအရ့ဒိၣ်ဝဲလၢသုးကီၣ်ကးအသုးကျိၤသ့ၣ်တဖၣ်အဂီၢ်မ့ၢ်ဂ့ၤ,လၢကဝံစိၥ်တီဆှၢဝဲတၢ်ဖိတၢ်လံၤ,အပှၤသုးမုၢ်သံၣ်ဘိဆူ(သုးက့ၤ-၅)ဟီၣ်ကဝီၤပူၤ အဂီၢ်ဘၣ်ခီဖျိဝဲသုးကလၢၤတဖျၢၣ်အံၤအဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်ဟီၣ်ကဝီၤအပူၤဘၣ်ထွဲဒီးပယီၤသုးကလၢၤလၢအိၣ်ကစၢၢ်ကျါတၢ်လီၢ်တဖၣ်ဒီး(မုၢ်သဲး-လၢၢ် ဒိၣ်)ကျဲမုၢ်ဟီၣ်ကဝီၤအပူၤန့ၣ်ပယီၤသုးကီၣ်ကးအသုးကလၢၤခဲလၢၥ်ကအိၣ်တ့ၢ်ဒံးဝဲ(၇)ဖျၢၣ်အဂ့ၢ်န့ၣ်သ့ၣ်ညါဘၣ်စ့ၢ်ကီးန့ၣ်လီၤ.
လါယနူၤအါရံၤ ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤတဖၣ်အပူၤ လၢလါဒံၣ်စ့ဘၢၣ်တလါအတီၢ်ပူၤန့ၣ် တၢ်ဒုးကဲထီၣ်၀ဲခဲလၢၥ်(၂၇)ဘျီ ဒီး ပယီၤသုးတကပၤသံ၀ဲ(၃၀)ဂၤ,ဘၣ်ဒိ(၂၈)ဂၤ အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ် စရီအပူၤန့ၣ်လီၤ.
ဒူသထူၣ်ကီၢ်ရ့ၣ်ပူၤ စးထီၣ်ဖဲလါဒံၣ်စ့ဘၢၣ် ၁ သီ တုၤ ၃၁ သီ လၢတလါအတီၢ်ပူၤန့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ် ဒိၣ်(KNLA) သုးရ့ၣ်(၁),သုးရ့ၣ်(၂),သုးရ့ၣ်(၃)သုးပၥ်ဖှိၣ်ဒီး ပယီၤသုးအဘၢၣ်စၢၤ တၢ်ဒုးစဲးပြဲးကဲထီၣ် (၆)ဘျီ, တၢ်လဲၤတ့ၢ်လီၤ ပယီၤသုးဒီးဒြိမ့ၣ်ပိၢ်(၁၅)ဘျီ, တၢ်ခိးထုးမ့ၣ်ပိၢ်(၁)ဘျီ, တၢ်ဘၣ်သဂၢၢ်ခးလိၥ်သးကဲထီၣ်(၁)ဘျီ, တၢ်လဲၤကွံၥ်ပယီၤသုး ဒီးမ့ၣ်ပိၢ်(၄) ဘျီအဃိ ပယီၤသုးတကပၤသံဘၣ်ဒိဘၣ်ထံးအါကဲထီၣ်ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢခံခီခံကပၤတၢ်ဒုးကဲထီၣ်အတီၢ်ပူၤန့ၣ် မ့မ့ၢ်လၢဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃)သုးပၥ်ဖှိၣ်...
လါယနူၤအါရံၤ ၈သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ကီးတရံးကီၢ်ဆၣ်,ဂီၤလ့ၤဟီၣ်ကဝီၤအပူၤတနံၣ်အံၤဘုခ့တဂ့ၤဒီးအပှ့ၤတဂ့ၤဒ်သိးဒီးနံၣ်လၢအပူၤကွံၥ်ဘၣ်အဃိ,ကမျၢၢ်လီၢ်ကဝီၤဖိလၢအဖံးမၤအီၣ်ဘုခ့တဖၣ်,သဂၢၢ်ဘၣ်ဝဲတၢ်လုၢ်အီၣ်နီၢ်ခိသးသမူတၢ်ကီတၢ်ခဲအဂ့ၢ်,ကမျၢၢ်လီၤကဝီၤဖိတဖၣ်စံးဝဲဒၣ်န့ၣ်လီၤ.
တနံၣ်အံၤဘုခ့(၁၅)ကံလိပိတပိန့ၣ်,အပှ့ၤအိၣ်ဝဲဒၣ်ထဲ(၁၀၀)ဘးခိၣ်ဃၢၤလီၤအဃိ,ကမျၢၢ်လီၢ်ကဝီၤဖိလၢအမၤအီၣ်ဘုခ့တဖၣ်အံၤ,သဂၢၢ်ဘၣ်ဝဲဟံၣ်ဃီနီၢ်ခိတၢ်လုၢ်အီၣ်သးသမူအဂ့ၢ်,ဃီဖိခံကမျၢၢ်လီၢ်ကဝီၤဖိလၢအမၤအီၣ်ဘုခ့တဂၤစံးဝဲဒ်အံၤန့ၣ်လီၤ.
“မၤအီဘုခ့တနံၣ်အံၤလီၤတိၢ်တစဲးဖိ,ဘုခ့အသၣ်ဟးထီၣ်စှၤအဃိအပှ့ၤတအိၣ်အါဘၣ်အဃိန့ၣ်ပဝဲဒူဖိသဝီဖိတဖၣ်ပတဲလၢပမၤအီၣ်မၤအီအဆ့ၣ်တပၠ့ၣ်အါဘၣ်သ့မီၤ.အပူၤကွံၥ်နံၣ်န့ၣ်ဘုခ့ဟးထီၣ်လၢခံကထိညါတနံၣ်အံၤဟးထီၣ်က့ၤထဲတကထိဘျဲၣ်လီၤ.ဒီးပမ့ကွၢ်အပူၤကွံၥ်နံၣ်န့ၣ်,ပဆါဘၣ်တပိန့ၣ်န့ၢ်(၁၂၀)ဘးဘၣ်ဆၣ်,ခဲအံၤန့ၣ်က့ၤထဲ(၁၀၀)ခိၣ်ဃၢၤလီၤအဃိန့ၣ်,ဘၣ်ဒိဝဲပှၤမၤအီၣ်ဘုခ့ဖိတဖၣ်အတၢ်လုၢ်အီၣ်နီၢ်ခိသးသမူန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဘၣ်ဃးတၢ်ဖံးအီၣ်မၤအီၣ်ဝဲဘုခ့တၢ်သူၣ်တၢ်ဖျးအတၢ်မၤအံၤ,ကမျၢၢ်လီၢ်ကဝီၤတဖၣ်အါတက့ၢ်,သူၣ်လီၤဖျးလီၤဝဲလၢအနီၢ်ကစၢ်ဟီၣ်ခိၣ်ကပံၥ်တၢ်လီၢ်တၢ်ကျဲအိၣ်ဝဲအဖီခိၣ်တဘၣ်ဟ့ၣ်ဝဲဟီၣ်ခိၣ်ကပံၥ်အဘူးအလဲဘၣ်,ဘၣ်ဆၣ်,မ့မ့ၢ်တၢ်သူၣ်တၢ်ဖျးတၢ်ပီးတၢ်လီတၢ်လိၣ်ဘၣ်,ကသံၣ်ကသီဃုၥ်ဒီးတၢ်ဝံစိၥ်တီဆှၢသ့ၣ်တဖၣ်တခီပှၤဒိၣ်ကျိၣ်ဒိၣ်စ့(သဲထံ)လၢကၠီၣ်တဲၣ်ကီၢ်တကပၤလဲၤဘျၢလီၤန့ၢ်ဆိအဝဲသ့ၣ်စ့အိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
လၢတၢ်ဘျၢလီၤဆိဝဲစ့အဖီခိၣ်ဘုခ့အပှ့ၤဂ့ၤအဆၢကတီၢ်,လီၢ်ကဝီၤဖိတဖၣ်မၤအီၣ်တၢ်ဘၣ်ဂီၢ်ဘၣ်ဒွါဝဲဘၣ်ဆၣ်,ဘုခ့အပှ့ၤလီၤဒ်အံၤအဆၢကတီၢ်တနီၤဒ့ၣ်ကမၢ်ထီၣ်ဝဲဒီးသဲထံ,လီးဝဲတတူၢ်ဘၣ်အိၣ်ဝဲအဂ့ၢ်,လီၢ်ကဝီၤဖိလၢအမၤအီၣ်ဘုခ့လၢအဂၤတဂၤစံးဝဲဒ်အံၤစ့ၢ်ကီးန့ၣ်လီၤ.
“ပတၢ်လီၢ်တၢ်ကျဲအပူၤပကမၤအီၣ်ဘုခ့န့ၣ်ညီနုၢ်ပဘၣ်လဲၤဟံန့ၢ်ဘုခ့ချံ,တၢ်ပီးတၢ်လီ,ကသံၣ်ကသီလၢသဲထံ(ပှၤဒိၣ်ကျိၣ်ဒိၣ်စ့)အအိၣ်ခဲလၢၥ်န့ၣ်လီၤ.ပဟံတၢ်ဖိတၢ်လံၤအဃိပဒ့ၣ်ပကမၣ်ထီၣ်ပၥ်ဒီးသဲထံသ့ၣ်တဖၣ်န့ၣ်အဝဲသ့ၣ်မၤနီၣ်မၤဃါပၥ်န့ၢ်ပှၤလီၤ.အဃိန့ၣ်ဘုခ့အပှ့ၤဂ့ၤဆၢကတီၢ်ဒုပကမၢ်သ့ၣ်တဖၣ်တူၥ်ဝဲ,မ့မ့ၢ်ဘုခ့အပှ့ၤတဂ့ၤဘၣ်ဒ်အံၤဆၢကတီၢ်ဒုမၤအီၣ်တကဲးဘၣ်အမဲၥ်ညါ,ပှၤတနီၤကမၢ်တူၥ်ဝဲဘၣ်ဆၣ်,တနီၤကမၢ်ဒၣ်လဲၥ်တတူၢ်ဘၣ်”အဂ့ၢ်စံးဝဲဒၣ်န့ၣ်လီၤ.
ဂီၤလ့ၤဟီၣ်ကဝီၤအပူၤအံၤ,ကမျၢၢ်လီၢ်ကဝီၤဖိတဖၣ်အါတက့ၢ်သူၣ်အီၣ်ဖျးအီၣ်ဖံးအီၣ်မၤအီၣ်ဝဲဘုခ့,သဘ့ဟီၣ်လၥ်ဒီးဘီးက့ၣ်သ့ၣ်တဖၣ်န့ၣ်လီၤ.
တနံၣ်အံၤဒ်သိးဘုခ့အပှ့ၤတဂ့ၤဘၣ်အသိး,သဘ့ဟီၣ်လၥ်ဒီးဘီးက့ၣ်သ့ၣ်တဖၣ်စ့ၢ်ကီးအပှ့ၤတဂ့ၤဝဲစ့ၢ်ကီးအဂ့ၢ်,လီၢ်ကဝီၤဖိလၢအမၤအီၣ်သဘ့ဟီၣ်လၥ်ဒီးဘီးက့ၣ်တဖၣ်စံးဝဲဒၣ်န့ၣ်လီၤ.
လၢတၢ်န့ၣ်အဃိ,ဒ်သိးတၢ်လုၢ်အီၣ်နီၢ်ခိသးသမူကဘၣ်ဂ့ၢ်ဘၣ်ဂီဒီးဟံၣ်ဖိဃီဖိဖံးမၤအိၣ်ဆိးအီၣ်အီကဘၣ်ဂီၢ်ဘၣ်ဒွါအဂီၢ်, လီၢ်ကဝီၤဖိတဖၣ်အံၤဆၢမုၢ်လၢ်ဝဲလၢဘုခ့,ဘီးက့ၣ်ဒီးသဘ့ဟီၣ်လၥ်တဖၣ်အပှ့ၤကဂ့ၤထီၣ်န့ၣ်လီၤ.
လါယနူၤအါရံၤ ၃သီ, ၂၀၂၅နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်,ကီးတရံးကီၢ်ဆၣ်မီခံသဝီကရူၢ်ဒူသဝီ(၄),ကိးနံၣ်ဒဲးတၢ်စူၤခါလၢၥ်တၢ်ယီၤထီၣ်အဆၢကတီၢ်,ကမျၢၢ်လီၢ်ကဝီၤဖိတဖၣ်သဂၢၢ်ဘၣ်ဝဲထံတၢ်ဂ့ၢ်ကီအိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
ကီးတရံးကီၢ်ဆၣ်,မီခံသဝီကရူၢ်,ကလီၤဂီၤ,ဃီဖိခံ,ဖီဘုၣ်လၣ်ထၣ်ဒီးကီၢ်ဆၢဒူသဝီသ့ၣ်တဖၣ်အပူၤ,ကိးနံၣ်ဒဲးမူခိၣ်ထံလၢၥ်တၢ်ယီၤထီၣ်အဆၢကတီၢ်လီၢ်ကဝီၤဖိတဖၣ်ဘၣ်သဂၢၢ်ဝဲထံကၤအတၢ်ဂ့ၢ်ကီလၢ(၇)လါအတီၢ်ပူၤအိၣ်ဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲအသိးန့ၣ်လီၤ.
ဒီးခီဖျိထံကၤတၢ်ဂ့ၢ်ကီအံၤအဃိ,လီၢ်ကဝီၤဖိတဖၣ်အံၤဘၣ်လဲၤဒၢၣ်သူဝဲ(မဲ)ထံလၢအစီၤစုၤယံၤဒီးသဝီအိၣ်ဝဲအသိး,ဘၣ်လဲၤပှ့ၤဒၢၣ်အီဝဲထံအီလၢ,ကီၢ်ကၠီၣ်တဲၣ်,အူဖၣ်ဝ့ၢ်တိၤပၢၤဖူသဝီကိးမုၢ်နံၣ်ဒဲးအဃိသဂၢၢ်ဘၣ်ဝဲတၢ်ကီတၢ်ခဲအိၣ်ဝဲအါမံၤအဂ့ၢ်,ကလီၤဝီၤလီၢ်ကဝီၤကမျၢၢ်ပိၥ်မုၣ်တဂၤစံးဝဲဒ်အံၤန့ၣ်လီၤ.
“တၢ်ကိၢ်ထီၣ်ထံတအိၣ်လၢၤဘၣ်အဆၢကတီၢ်,ပသဂၢၢ်ဘၣ်တၢ်ကီတၢ်ခဲအါမးလီၤ.ပှၤတနီၤကလဲၤဒၢၣ်ထံန့ၣ်ခီဖျိအသိလ့ၣ်,အစဲး,အလိၣ်ထဲၣ်တအိၣ်ဘၣ်အဃိ,ဘၣ်လိၢ်(ငါ)ဝဲပှၤတၢ်ကျိၣ်စ့တအိၣ်ဘၣ်အဖီခိၣ်န့ၣ်, တၢ်ကီတၢ်ခဲအိၣ်ဝဲနးမးလီၤ.မ့ဝံၤန့ၣ်ခီဖျိပတၢ်လီၢ်အံၤန့ၣ်မ့ၢ်ထံဆၢကီၢ်ဆၢအဃိ,ကၠီၣ်တဲၣ်အပူၤတၢ်မ့ကဲထီၣ်သးလၢကသံၣ်မူၤဘှီးဒီးတၢ်လၢအဂၤတမံၤမံၤန့ၣ်,ပှၤပံးကျဲပှၤတပျဲလဲၤပှၤဘၣ်အဃိပကန့ၢ်ထံအီအဂီၢ်တၢ်ကီတၢ်ခဲအိၣ်,ပဘၣ်ပျံၤဘၣ်ဖုးတၢ်ဘၣ်တရံးလၢပှၢ်ပူၤတၢ်ကီတၢ်ခဲအါမးလီၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,မီခံကရူၢ်သဝီလွံၢ်ဖျၢၣ်အပူၤထံတၢ်ဂ့ၢ်ကီအံၤကဲထီၣ်တ့ၢ်အသးလၢမိၢ်ပၢ်ဖံဖုအစိၤအခါလံၤလံၤဒီးဒ်သိးကမျၢၢ်လီၢ်ကဝီၤဖိတဖၣ်အံၤကဒိးန့ၢ်ဘၣ်ထံအဂီၢ်,လီၢ်ကဝီၤပှၤဘၣ်မူဘၣ်ဒါတဖၣ်ဂုၢ်ကျဲးစၢးတ့ၢ်ဝဲဒၣ်လၢကျဲအဘိဘိအိၣ်ဝဲဘၣ်ဆၣ်,အပူၤကွံၥ်တၢ်တကဲထီၣ်လိၣ်ထီၣ်ဝဲဘၣ်အဂ့ၢ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒီးလၢတၢ်ဘှါရှဲဝဲထံတၢ်ဂ့ၢ်ကီအံၤန့ၣ်,အပူၤကွံၥ်ပှၤဘၣ်မူဘၣ်ဒါတဖၣ်ဂုၥ်ကျဲးစၢးခူၣ်ဝဲထံပူၤဒီးခီဖျိထံကျိၤတဖျါထီၣ်ဘၣ်အဃိ,တကဲထီၣ်လိၥ်ထီၣ်ဝဲဒၣ်ဘၣ်အဂ့ၢ်,ကလီၤဂီၤသဝီသးပှၢ်(စီၤအတ့ၣ်)စံးဝဲဒ်အံၤန့ၣ်လီၤ.
“ဘၣ်ဃးထံတၢ်ကီတၢ်ခဲအိၣ်အံၤကဲထီၣ်အသးအပူၤကွံၥ်နံၣ်တစှၤလၢၤဘၣ်.လၢတၢ်ကဘှါရှဲထံတၢ်ဂ့ၢ်ကီအဂီၢ်,အပူၤကွံၥ်ပှၤဘၣ်မူဘၣ်ဒါတဖၣ်ဂုၥ်ကျဲးစၢးခူၣ်ဝဲ(အဝံၤစံၣ်)ထံပူၤအိၣ်ဝဲနါက့,ထံကျိၤတဟဲဖျါထီၣ်ဘၣ်အဃိ,အတၢ်တကဲထီၣ်လိၣ်ထီၣ်ဘၣ်ဝဲဒီးဘၣ်သဂၢၢ်ထံတၢ်ဂ့ၢ်ကီအံၤတုၤလၢခဲအံၤလီၤ.ဒီးတၢ်ဆါဟံၣ်အဂီၢ်ထံကမါလၢသဝီကပၤန့ၣ်အိၣ်ခံဖျၢၣ်ဘၣ်ဆၣ်တၢ်သူအီၤလၢတၢ်ဆါဟံၣ်အဂီၢ်အဃိန့ၣ်,ပှၤသဝီဖိတဖၣ်ကသူဝဲတလၢဘၣ်.ထံနါက့တမ့ၢ်လၢအဂ့ၤဒိၣ်ဒိၣ်စ့ၢ်ဘၣ်.”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ,လၢတၢ်ဘျါရှဲဝဲထံတၢ်ဂ့ၢ်ကီအံၤအဂီၢ်န့ၣ်,လီၢ်ကဝီၤခိၣ်နၢ်ပှၤဘၣ်မူဘၣ်ဒါတဖၣ်ဃုကျဲလၢနံၣ်ယံၤလါအါဒီး,ဃုဝဲတၢ်မၤစၢၤအကျိၤအကျဲအဖီခိၣ်,တကတီၢ်ခါခဲအံၤဒ်သိးကမျၢၢ်တဖၣ်ကဒိးန့ၢ်ဘၣ်ထံလၢအဆိအချ့အဂီၢ်,ဒိးန့ၢ်ဘၣ်ဝဲတၢ်ခွဲးတၢ်ယၥ်လၢတၢ်တ့ထီၣ်ဘှီထီၣ်ထံဒၢလၢကမျၢၢ်တဖၣ်အဂီၢ်လံန့ၣ်လီၤ.
လၢတၢ်န့ၣ်အဃိ,တကီၢ်ခါခဲအံၤထုးဖှိၣ်ပၥ်ဖှိၣ်ကတီၤပၥ်ဝဲတၢ်ဖိတၢ်လံၤလၢအလိၣ်တဖၣ်ဒီးဆၢတဲၥ်လီၤသးလၢကမၤဝဲတုၤလၢကဲထီၣ်လိၣ်ထီၣ်အဂ့ၢ်,မီခံသဝီကရူၢ်ခိၣ်(စီၤသၣ်နိၣ်)စံးဝဲဒ်အံၤန့ၣ်လီၤ.
“လၢထံတၢ်ဂ့ၢ်ကီတၢ်ဘှါရှဲအီၤန့ၣ်,ပဝဲပအိၣ်ဒီးပတၢ်တိၥ်ပဃုကျဲအဖီခိၣ်ပန့ၢ်လံၥ်တၢ်ပျဲလံအဖီခိၣ်,ခဲအံၤန့ၣ်ပထုးဖှိၣ်ပတၢ်ဖိတၢ်လံၤပတၢ်လီၢ်တၢ်ကျဲလံ,ပစးထီၣ်ပတၢ်ဖံးတၢ်မၤတက့တခီဒီးပရဲၣ်လီၤအီၤလံ,အဃိန့ၣ်ပဆၢတဲၥ်လီၤသးလၢပကမၤတုၤလၢအကဲထီၣ်လီၤ.တယီၤညါအံၤပပၥ်လီၤသးလၢပကမၤတုၤလၢအဝံၤလီၤ.ပမ့မၤဖျါထီၣ်မးပကမျၢၢ်တဖၣ်ကနၥ်န့ၢ်ပှၤလၢပတၢ်တီခိၣ်ရိၣ်မဲအဖီခိၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဒ်န့ၣ်အသိး,လၢတၢ်မၤလိၣ်ထီၣ်ထံကျိၤကျဲတၢ်မၤအပူၤန့ၣ်,ကဟ့ၣ်ဆိဝဲမီခံသဝီကရူၢ်သဝီ(၄)ဖျၢၣ်လၢအသဂၢၢ်ဘၣ်ထံတၢ်ဂ့ၢ်ကီနးနးတဖၣ်အမဲၥ်ညါ,အိၣ်ဝဲဒီးတၢ်တိၥ်ပၥ်လၢကရဲၣ်ကျဲၤန့ၢ်က့ၤဝဲလၢမီခံသဝီကရူၢ်ဒီတဘ့ၣ်သဝီကိးဖျၢၣ်ဒဲးအပူၤကဒိးန့ၢ်ဘၣ်ထံလၢလၢပှဲၤပှဲၤအဂ့ၢ်,ပှၤဘၣ်မူဘၣ်ဒါတဖၣ်န့ၣ်လီၤ.
လါယနူၤအါရံၤ ၃သီ, ၂၀၂၅နံၣ်, ခ့ၣ်အဲးစံၣ်,
ကညီကီၢ်စဲၣ်,ဖၣ်ပူၣ်ကမးမိၢ်ကျဲသုးခိးကီၢ်ဆၢ(BFG)လၢအအိၣ်ဆီလီၤသးဖဲကတၢတံးလၢအဘၣ်တၢ်တီခိၣ်ရိၣ်မဲအီၤလၢသုးခိၣ်လၣ်ကၠဲၤလၢအမ့ၢ်သုးရ့ၣ်(1013)ဒီတရ့ၣ်ပၥ်ဖှိၣ်မၤသကိးက့ၤတၢ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်KNLAတၢ်ဂ့ၢ်န့ၣ်တမ့ၢ်ဘၣ်ဒီးအဝဲသ့ၣ်ဂုၤက့ၤခံလၢကအိၣ်ဆီတလဲသုးက့ၤအသုးကလၢၤတၢ်လီၢ်အဂ့ၢ် သုးက့(၅)အပှၤဘၣ်မူဘၣ်ဒါစံးဝဲဒၣ်န့ၣ်လီၤ.
သုးကီၣ်ကးဆီလီၤသးအိၣ်ဆိးဝဲကတၢတံးဒုးယၤသုးကလၢၤအံၤ,အပူၤကွံၥ်လါဒံၣ်စဲဘၢၣ်လၢၥ်အပူၤ(BGF)သုးရ့ၣ်(၁၀၁၃)သုးရ့ၣ်ဒီတရ့ၣ်လၢတၢ်တီခိၣ်ရိၣ်မဲအီၤလၢ(BGF)(၁၀၁၃)သုးခိၣ်လၣ်ကၠဲၤသ့ၣ်တဖၣ်,တနီၤလဲၤပၥ်ဖှိၣ်မၤသကိးက့ၤဝဲတၢ်ဒီး(KNLA)လၢတၢ်ထီဒါက့ၤသုးကီၣ်ကးတဖၣ်အိၣ်ဝဲအဂ့ၢ်,စိၤရှၢၣ်မံၣ်ဒံၣ်ယၢၣ်တၢ်ကစီၣ်တနီၤအပူၤဟဲဖျါထီၣ်ဝဲဒၣ်န့ၣ်လီၤ.
လၢတၢ်ဂ့ၢ်ဝဲအံၤအဖီခိၣ်(BGF)သုးရ့ၣ်(၁၀၁၃)အံၤ,အိၣ်ဒၣ်ဆီတလဲအိၣ်က့ၤဝဲလၢအနီၢ်ကစၢ်တၢ်လီၢ်ဒီးပၥ်ဖှိၣ်မၤသကိးတၢ်ဒီး(KNLA)တအိၣ်ဝဲဘၣ်အဂ့ၢ်,သုးက့(၅)မုၢ်တြီၢ်ကီၢ်ရ့ၣ်ပှၤကတိၤတၢ်ပၢ,သုးခိၣ်ဒိၣ်ဂီၢ်ဂ့ၢ်,စီၤကျၢၤဒိၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
“လၣ်ကၠဲၤကရူၢ်ကရၢန့ၣ်တမ့ၢ်ဟဲပၣ်ဖှိၣ်မၤသကိးတၢ်ဒီး(KNLA)သုးက့(၅)ဘၣ်,အဝဲသ့ၣ်က့ၤလီၤဝဲလၢကတၢတံးဒီးဘီကၠီးလဲးတကပၤဝံၤက့ၤလီၤကဒါက့ၤဝဲလၢသုးက့(၁)ဝံၤက့ၤဟံန့ၢ်က့ၤဝဲတၢ်လီၢ်လၢပှဲၤထၣ်,နိထၣ်တကပၤန့ၣ်လီၤ.ခါဆူညါကဆဲးမၤဝဲဒ်လဲၣ်တသ့ၣ်ညါဒံးဘၣ်”အဂ့ၢ်စံးဝဲဒၣ်န့ၣ်လီၤ.
ဒ်န့ၣ်အသိး တကီၢ်ခါခဲအံၤ ဟီၣ်ကဝီၤဖဲန့ၣ် န့ၣ် ခီဖျိကညီဒီကလုၥ်တၢ်ထူၣ်ဖျဲးသုးမုၢ်ဒိၣ်တကပၤဂဲၤလိၥ်တၢ်အဃိ ဒ်သိးကဒဲကဒဲတၢ်ဘၣ်ဂံၥ်ဂူၥ်,တၢ်ခးလိၥ်သးသုတကဲထီၣ်တဂ့ၤအဂီၢ် ထုးလီၤကွံၥ်ဝဲသုးရ့ၣ်ဝဲန့ၣ်လီၤအဂ့ၢ် BGF ပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ထုးလီၤသးန့ၣ်တၢ်ဂ့ၢ်လၢအဂၤတအိၣ်ဘၣ်.ဒ်သိးကဒဲကဒဲသုတၢ်ဘၣ်ဂံၥ်ဂူၥ်,တၢ်ခးလိၥ်သးတကဲထီၣ်တဂ့ၤအဂီၢ်ပမၢပလဲၥ်ကွံၥ်သးန့ၣ်လီၤ.အခဲအံၤ ဖဲန့ၣ်န့ၣ် ဘၣ်လၢပှၤမၤတၢ်အခါဒီးအဝဲသ့ၣ်မ့အိၣ်ဖဲန့ၣ်န့ၣ် ကကဲထီၣ်တၢ်တံၥ်တၥ်အဃိန့ၣ် အဝဲသ့ၣ်ထုးကွံၥ်သးန့ၣ်လီၤ.အခဲအံၤပမၢအဝဲသ့ၣ်က့ၤအိၣ်ဆီလီၤက့ၤသးလၢ နိထၣ်,အိဒီတကပၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
သုးက့(၅)ဟီၣ်ကဝီၤပူၤအံၤ,သုးခိးကီၢ်ဆၢအသုးရ့ၣ်အိၣ်ဆီလီၤသးခဲလၢၥ်(၂)ရ့ၣ်လၢအမ့ၢ်သုးရ့ၣ်(၁၀၁၃)လၢအဘၣ်တၢ်တီခိၣ်ရိၣ်မဲအီၤလၢသုးခိၣ်လၣ်ကၠဲၤဒီးသုးရ့ၣ်(၁၀၁၄)လၢဘၣ်တၢ်တီခိၣ်ရိၣ်မဲအီၤလၢသုးခိၣ်မီၤခၠံၣ်သ့ၣ်တဖၣ်ဒီးအပူၤကွံၥ်န့ၣ်အဝဲသ့ၣ်ဟံးန့ၢ်ဝဲဒၣ်သုးကီၣ်ကးအကျဲတၢ်ဘံၣ်တၢ်ဘၢအိၣ်အသိးလၢသုးကီၣ်ကးထၢသုးအသီအခါစ့ၢ်ကီးမၤစၢၤဝဲဒၣ်အိၣ်အဂ့ၢ် သ့ၣ်ညါဘၣ်ဒ်လီၢ်ကဝီၤတၢ်ကစီၣ်တနီၤပၥ်ဖျါဝဲဒၣ်အသိးန့ၣ်လီၤ.
တကီၢ်ခါခဲအံၤKNLAသုးပၥ်ဖှိၣ်ဒီးကတၢတံးသုးကီၣ်ကးအဘၢၣ်စၢၤတၢ်ဒုးအပူၤတၢ်ပၢၢ်ဆၢသုးပၥ်ဖှိၣ်တကပၤတၢ်ဘၣ်ဒိၣ်ဘၣ်ထံးတၢ်သံတၢ်ပှၢ်အါဝဲဒၣ်အဂ့ၢ် တၢ်ကစီၣ်အိၣ်ပှိၤသုးကီၣ်ကးတပၤရၤလီၤဝဲဒၣ်အိၣ်ဘၣ်ဆၣ် ကညီတၢ်ကစီၣ်ခ့ၣ်အဲးစံၣ်မၤလီၤတံၢ်အီၤဒီးခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်အပှၤဘၣ်မူဘၣ်ဒါအဖၢမုၢ်န့ၣ်လီၤ.