ကီၢ်ကၠီၣ်တဲၣ်(ဘီကီး၀့ၢ်)သးစၢ်ကညီပိာ်မုၣ်ဖိလၢအမၤတၢ်လၢဟံၣ်ပူၤတဂၤလီၤတဲာ်သံလၢဟံၣ်ဖီခိၣ်
လါအီကူာ် ၂၀ သီႇ ၂၀၂၄ နံၣ်ႇ ခ့ၣ်အဲးစံၣ် လၢကီၢ်ကၠီၣ်တဲၣ် ဘီကီး၀့ၢ်ပူၤ ဖဲလါအီကူာ် ၁၆ သီအနံၤန့ၣ် ကညီပိာ်မုၣ်သးစၢ်(၁၉)နံၣ်လၢအမၤတၢ်လၢ ဟံၣ်တၢ်မၤ တဂၤဖဲအ၀ဲမၤကဆှဲကဆှီဟံၣ်အခါ လၢတၢ်တပာ်သူၣ်ပာ်သးအပူၤလီၤတဲာ်၀ဲဒၣ်လၢဟံၣ်ခံကထြၢ ဖီခိၣ်ဒီးသံ၀ဲဒၣ် အဂ့ၢ်န့ၣ် အဘူးအတံၢ်တဂၤ စံး၀ဲန့ၣ်လီၤႉ ကညီမုၣ်သးစၢ်လၢအလီၤတဲာ်သံလၢဟံၣ်ဖီခိၣ်တဂၤအံၤအမံၤ၀ဲဒၣ်လၢနီၢ်မၤအူႇအိၣ်၀ဲဒၣ်လၢကီးတရံးကီၢ်ဆၣ် ကီး၀ၣ်လဲၤသ၀ီဒီး လဲၤမၤတၢ်လၢဘီးကီးအိၣ်ဒီး(ဖးစပိး)လံာ်လဲၢ်လၢအဖိးသဲစးမၤဟံၣ်တၢ်မၤအိၣ်တနံၣ်ဘျဲၣ်လံ န့ၣ်လီၤႉ ၦၤလၢအမၤတၢ်ဒီးအီၤတပူၤဃီတဖၣ်စံး၀ဲလၢတၢ်တနံၤန့ၣ်ဖဲအ၀ဲမၤကဆှဲကဆှီတၢ်လၢဟံၣ်ခံကထြၢဖီၣ်ခိၣ်ထွါကဆှီ၀ဲဒၣ်ယွၤ(မဲၤထံကလၤ)အခါအခီၣ်တပျာ်ဒီးလီၤတဲာ်သံ၀ဲဒၣ်အဂ့ၢ်န့ၣ် အဘူးအတံၢ်တဖၣ်စံး၀ဲန့ၣ်လီၤႉ ဘၣ်ဃးကညီမုၣ်တဂၤအံၤသံတၢ်ဂ့ၢ်အံၤ တၢ်မၤကစၢ်ပျၢ်လီၤအခၢၣ်စးဟဲဟ့ၣ်၀ဲတၢ်လၢၤဘူၣ်လၢၤစ့လၢ ထီၣ်တၢ်ဆါဟံၣ်ဒီး ကကုၢ်ထီၣ်က့ၤၦၤသံစိၣ်အဂီၢ်အိၣ်၀ဲအသိး ဘၣ်အိၣ်ခိးစ့အီၣ်လိးလၢတၢ်မၤကစၢ်ကဟ့ၣ်၀ဲအံၤ အဂ့ၢ်န့ၣ် နီၢ်မၤအူအမုငါ နီၢ်မုမုၣ် စံး၀ဲဒၣ်ဒ်အံၤန့ၣ်လီၤႉ အ၀ဲစံး၀ဲလၢ“မ့မ့ၢ်လၢကကုၢ်ထီၣ်ကွံာ်ၦၤသံစိၣ်အဂီၢ်ဒုသ့ၣ်ခိၣ်အၦၤဟဲဟ့ၣ်စ့မၤစၢၤအိၣ်မီၤႉ မ့မ့ၢ်လၢသ့ၣ်ခိၣ်ကစၢ် ဒုတဟဲဘၣ်ႉအ၀ဲသ့ၣ်တဲ၀ဲခီန့ၣ်တဘၣ်ကိၢ်နီမံၤတဂ့ၤႇကမၤဟ့ၣ်၀ဲခဲလၢာ်လီၤႉသ့ၣ်ခိၣ်န့ၣ်အမံၤဖးဒိၣ်တဂၤညါအဃိ တမၤဟးဂီၤအမံၤဘၣ်တဲ၀ဲဒ်န့ၣ်ႉတၢ်မၢၤဘၣ်အိၣ်ခိးတသီခံသီမီၤနီၤႉလီလီစဲၤခဲအံၤမ့ၢ်ကဟ့ၣ်၀ဲသးသမူစ့အီၣ်လိးဆံးအါလဲၣ်န့ၣ်တသ့ၣ်ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ကီၢ်ကၠီၣ်တဲၣ်ပူၤ ၦၤမၤတၢ်ဖိတဂၤဂ့ၤတဂၤဂ့ၤလၢအမၤတၢ်လၢအအိၣ်ဒီးလံာ်လဲၢ်လၢအဖိးသဲစးလၢလၢၦဲၤၦဲၤန့ၣ် အ၀ဲသ့ၣ်မ့သံလၢတၢ်ဖံးတၢ်မၤလီၢ်န့ၣ်တၢ်သိၣ်တၢ်သီအိၣ်လၢတၢ်မၤကစၢ်ဘၣ်ဟ့ၣ်၀ဲစ့အီၣ်လိးလၢအ၀ဲသ့ၣ်ဂီၢ် (၁၅)ကလီၢ် ဒီးဘၣ်ဆၣ်ၦၤသံတဂၤအံၤမ့ၢ်ၦၤတဂၤလၢအမၤတၢ်လၢဟံၣ်တၢ်မၤအဃိကဒိးန့ၢ်ဘၣ်၀ဲစ့အီၣ်လိး တဒ်သိး လိာ်သးဘၣ် သ့၀ဲအဂ့ၢ်န့ၣ် ၦၤဟူးဂဲၤမၤတၢ်လၢကီၢ်ပယီၤၦၤမၤတၢ်ဖိဂ့ၢ်၀ီကရူၢ်(JACBA) ၦၤပၢၤလီၢ်ဆ့ၣ်နီၤ အူမိကၠိ စံး၀ဲန့ၣ်လီၤႉ “အဆိကတၢၢ်န့ၣ်ကဒိးန့ၢ်ဘၣ်၀ဲတၢ်ကုၢ်ထီၣ်က့ၤၦၤစိၣ်အဘူးအလဲႉ၀ံၤမးကဒိးန့ၢ်က့ၤသးသမူစ့အီၣ်လိးအဘူးအလဲလၢခံမီၤနီၤႉမ့မ့ၢ်ၦၤမၤတၢ်ဖိလၢအမၤတၢ်လၢတမ့ၢ်တၢ်မၤလီၢ်ဖးဒိၣ်ပူၤဘၣ်ဒုတန့ၢ်(၁၅)ကလီၢ်ဘၣ်ႉလၢတၢ်သိၣ်တၢ်သီပာ်လီၤ၀ဲအပူၤန့ၣ်တဘျီတခီၣ်နကန့ၢ်ဘၣ်စ့အီၣ်လိးန့ၣ်ကယံၤ၀ဲသ့မီၤနီၤႉကဘၣ်လဲၤပတီၢ်ဘၣ်အပတီၢ်ညါ”အဂ့ၢ်န့ၣ် စံး၀ဲန့ၣ်လီၤႉ ဖဲနီၢ်မၤအူသံကဲထီၣ်သးအဆၢကတီၢ် အခိၣ်အဃၢၤန့ၣ်ၦၤလၢအထံၣ်တၢ်ကဲထီၣ်သးလၢအမဲာ်အိၣ်၀ဲ(၃)ဂၤဒီး ဒ်န့ၣ်အသိးနီၢ်မၤအူအ(ဖးစပိး)ပူၤတၢ်မၤကစၢ်အမံၤဒီးတကီၢ်ခါတၢ်မၤကစၢ်အမံၤလၢအမၤတၢ်ခဲအံၤတဂၤန့ၣ် မ့ၢ်ဒၣ်ထဲတဂၤဃီလီၤအဂ့ၢ်န့ၣ် အဘူးအတံၢ်စံး၀ဲအသိးသ့ၣ်ညါဘၣ်န့ၣ်လီၤႉ
ဘျံးဒဝဲၢ်ကီၢ်ရ့ၣ်(၆)လါအတီၢ်ပူၤတၢ်ဒုးကဲထီၣ်(၆၂)ဘျီပယီၤသုးသံ(၁၅၁)ဂၤ
လါအီကူး ၁၉ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်သုးက့(၄)ဟီၣ်ကဝီၤအပူၤ စးထီၣ်လၢလါယနူၤအါရံၤတုၤလါယူၤလၢနံၣ်တဝၥ်အ တီၢ်ပူၤအံၤ တၢ်ဒုးတၢ်ယၤကဲထီၣ်ဝဲလၢပယီၤသုးကီၣ်ကးဒီးကညီဒီကလုၥ်သုးမုၢ်ဒိၣ်ဃုၥ်ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်အ ဘၢၣ်စၢၤခဲလၢၥ်အိၣ်(၆၂)ဘျီ ပယီၤသုးကီၣ်ကးတကပၤသံ(၁၅၁)ဂၤအဂ့ၢ်ဘျံးဒဝဲၢ်ကီၢ်ရ့ၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. ခီဖျိလၢခံခီခံကပၤတၢ်ဒုးကဲထီၣ်ဝဲ(၆၂)ဘျီလၢ(၆)လါအတီၢ်ပူၤဒ်အံၤအဖီခိၣ်ပယီၤသုးကီၣ်ကးတကပၤသံ(၁၅၁)ဂၤဘၣ်ဒိ(၂၁၂)ဂၤတကးဒံးဘၣ်ပယီၤသုးအပှၤသ့ၣ်တဖၣ်ပၥ်လီၤတၢ်စုၤကဝဲခဲလၢၥ်အိၣ်(၁၃၈)ဂၤဒီးပယီၤသုးအံၤဟူးဂဲၤဟဲခးလီၤတၢ်ဒီးကဘီယူၤအိၣ်ဝဲ(၅၁)ဘျီစ့ၢ်ကီးအဂ့ၢ်သ့ၣ်ညါဘၣ်အသိးမ့မ့ၢ်လၢကညီဒီကလုၥ်သုးမုၢ်ဒိၣ်သုးက့နီၣ်ဂံၢ်(၄)တကပၤခီန့ၣ်တၢ်သံတၢ်ဘၣ်ဒိတၢ်တပၥ်ဖျါဘၣ်အဂ့ၢ်ဒ်တၢ်ပၥ်ဖျါပူၤအသိးသ့ၣ်ညါန့ၣ်လီၤ. လၢန့ၣ်အမဲၥ်ညါစးထီၣ်လၢ(၂၀၂၁)နံၣ်သုးမီၤစိရိၤဟံးန့ၢ်ဆူၣ်ကွံၥ်ထံကီၢ်တၢ်စိတၢ်ကမီၤဝံၤအလီၢ်ခံဘျံးဒဝဲၢ်ကီၢ်ရ့ၣ်ဟီၣ်ကဝီၤအပူၤပယီၤသုးကီၣ်ကးအသုးကလၢၤသ့ၣ်တဖၣ်တၢ်ထီၣ်မၤန့ၢ်ကွံၥ်ဝဲခဲလၢၥ်(၅)ဖျၢၣ်ဒီးပယီၤသုးကလၢၤဘၣ်ဟးထီၣ်ကွံၥ်ခဲလၢၥ်အိၣ်ဝဲ(၂၁)ဖျၢၣ်စ့ၢ်ကီးအဂ့ၢ်သ့ၣ်ညါဘၣ်န့ၣ်လီၤ. ကတီၢ်အံၤမ့ၢ်လၢသုးကီၣ်ကးတကပၤမၤဆူၣ်ထီၣ်ဝဲတၢ်ဟူးတၢ်ဂဲၤအဃိကမျၢၢ်ပှၤလီၢ်ကဝီၤဖိသ့ၣ်တဖၣ်ဘၣ်ပျံၤဘၣ်ဖုးတၢ်ဒီးဘၣ်ဃ့ၢ်အိၣ်ကဒုအသးလၢတၢ်အိၣ်ကဒုအလီၢ်အမဲၥ်ညါတကတီၢ်ဃီမ့ၢ်လၢဘၣ်စံၣ်ဘၣ်ဃ့ၢ်ဒ်အံၤအဖီခိၣ်လၢအဝဲသ့ၣ်အဂီၢ်လိၣ်ဘၣ်ဝဲတၢ်ဆီၣ်ထွဲမၤစၢၤသ့ၣ်တဖၣ်အဂ့ၢ်ကီၢ်ဆၣ်ပှၤဘၣ်မူဘၣ်ဒါလၢအိၣ်တၢ်မဲၥ်ညါတဂၤစံးဝဲဒ်အံၤန့ၣ်လီၤ. "ကတီၢ်အံၤမ့ၢ်လၢသုးကီၣ်ကးမၤဆူၣ်ထီၣ်ဝဲတၢ်ဟူးတၢ်ဂဲၤလၢတနီသရံၣ်ကီၢ်ဆၣ်အပူၤလၢ(ဝၣ်ယဲး)ဟီၣ်ကဝီၤအပူၤမ့ၢ်ဂ့ၤ, (တကဲး) ဟီၣ်ကဝီၤအပူၤမ့ၢ်ဂ့ၤအဃိဒီးတုၤလၢကမျၢၢ်သ့ၣ်တဖၣ်န့ၥ်ဘၣ်အိၣ်ဒီးတၢ်ပျံၤတၢ်ဖုးအဃိန့ၣ်ဘၣ်ဃ့ၢ်ပဒ့ၣ်ပဒီအသးမီၤနီၤ. အဃိန့ၣ် တၢ်လၢအပိၥ်ထွဲထီၣ်အခံန့ၣ်မ့ၢ်ဝဲတၢ်စူၤအဃိတၢ်အခိၣ်ဒုတကူတလၢဘၣ်, ခံမံၤတမံၤလိၣ်ဘၣ်ဝဲတၢ်အီၣ်မိၢ်ပှၢ်, ဒီးကသံၣ်ကသီ သ့ၣ်တဖၣ်မီၤနီၤ. ပှၤဘၣ်မူဘၣ်ဒါတဖၣ်ကျဲးစၢၤဝဲလၢပပှၤကလုၥ်သ့ၣ်တဖၣ်ကတူၢ်ဘၣ်တၢ်ကလီၤစှၤဝဲအဂီၢ် လီၤ." အဂ့ၢ်န့ၣ်စံး ဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တနီသရံၣ်ကီၢ်ဆၣ်တလါအံၤလါအီကူးအတီၢ်ပူၤပယီၤသုးကီၣ်ကးတကပၤဟူးဂဲၤဟဲခးလီၤတၢ်ဒီးကဘီယူၤအိၣ်ဝဲ(၈)ဘျီ,ခးလီၤနါစိၤကျိဖးဒိၣ်,ဟဲထီၣ်စိၥ်ဆှၢန့ၢ်ဝဲအပှၤတၢ်အီၣ်တၢ်အီ,ပယီၤသုးလၢမ့ၢ်သုးခီၣ်သုးရ့ၣ်(၄၃၁)ဒီး(၂၈၀)သ့ၣ်တဖၣ်ဟဲမၤအါထီၣ်အသုးဂံၢ်ဘါဒ်အံၤအဖီခိၣ်ဘၣ်ဟးဂီၤကွံၥ်ဝဲဒၣ်ကီၢ်ဆၣ်ဘျီၣ်ရိဖှိၣ်တဖျၢၣ်,ကီၢ်ဆၣ်ဝဲၤဒၢးတဖျၢၣ်ဒီး(လၢၢ်တမၣ်)သဝီသီခါဖၠၣ်တဖျၢၣ်အမဲၥ်ညါကမျၢၢ်ဘၣ်ဒိဘၣ်ထံး,ဟံၣ်ဃီတၢ်သူၣ်ထီၣ်ဘၣ်ဟးဂူၥ်ဟးဂီၤအိၣ်ဝဲအဂ့ၢ်ဘျံးဒဝဲၢ်ကီၢ်ရ့ၣ်တၢ်ပၥ်ဖျါပူၤအသိးပၥ်ဖျါဝဲန့ၣ်လီၤ ဒ်န့ၣ်အသိးဖဲပူၤကွံၥ်လါယူၤလံ(၂၉)သီအနံၤအခါန့ၣ်စ့ၢ်ကီးကညီဒီကလုၥ်ဂၢၤသးကရၢသုးရ့ၣ်(၇),သုးဒ့(၅)အပှၤသ့ၣ်တဖၣ်က့ၤဒိၣ်စိကဒါက့ၤဝဲဒီးမၤဝဲတၢ်ၡဲလဲက့ၤဝဲဟီၣ်ကဝီၤလၢပယီၤသုးဒီးပၠံၣ်သူၣ်စ့ၣ်သ့ၣ်တဖၣ်အိၣ်ဆီလီၤအသးဖဲလၢၢ်မုၢ်လါကီၢ်ဆၣ်,ပလီကိသဝီပူၤအဂ့ၢ်ကညီဒီကလုၥ်ဂၢၤသးကရၢသုးရ့ၣ်သုးရ့ၣ်(၇),သုးဒ့(၅)အသုးဒ့ခိၣ်စံးတ့ၢ်ဝဲဒၣ်န့ၣ်လီၤ.
ဖၣ်အၣ်ကီၢ်ဆၣ် KNLA သုးရ့ၣ်(၁)ဟီၣ်က၀ီၤပူၤ ဂၢၤကီၢ်သုးက့ၤအးကဒါကျိဆူသုးကီၣ်ကးဒီး(BGF)အိၣ်ခဲလၢာ်အဂ့ၢ် ၦၤဘၣ်မူဘၣ်ဒါစံး၀ဲ
လါအီကူာ် ၁၉ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် KNLA သုးရ့ၣ်(၁)ဟီၣ်က၀ီၤပူၤ အပူၤကွံာ်တနွံဃၣ်ဃၣ်အခါ ဂၢၤကီၢ်သုးလၢသုးကီၣ်ကးဟ့ၣ်လီၤဖီၣ်၀ဲကျိတၢ်စုက၀ဲၤတဖၣ်က့ၤအးကဒါက့ၤကျိဆူသုးကီၣ်ကးဒီး(BGF)အအိၣ် ခဲလၢာ် လံအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ဖၣ်အၣ်ကီၢ်ဆၣ်ပူၤ သုးကီၣ်ကးအၦၤဂၢၤကီၢ်သုးလၢအိၣ်(KNLA)သုးရ့ၣ်(၁)ဟီၣ်က၀ီၤအပူၤတဖၣ် ခီဖျိတအဲၣ်ဒိး အိၣ်လၢ သုးမီၤစိရိၤတၢ်တီခိၣ်ရိၣ်မဲဖီလာ်လၢၤဘၣ်အဃိ ဖဲလါအီကူာ် ၁၀ သီအနံၤန့ၣ် လဲၤအးကဒါက့ၤကျိ(၆၀)ခိၣ် ဆူ သုးကီၣ်ကးအအိၣ်ဖဲဖၣ်အၣ်၀့ၢ်နီၣ်ဂံၢ်(၁၅၁)ပယီၤသုးတၢ်လီၢ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ တကတီၢ်ဃီမၤကဒီးဖဲလါအီကူာ် ၁၂ သီအနံၤ သုးကီၣ်ကးအဂၢၤကီၢ်သုးလဲၤအးကဒီးကျိ(၁၁)ခိၣ်ဆူ သုးခိးကီၢ်ဆၢ (BGF)သုးဟီၣ်က၀ီၤ(၂)အခိၣ် သုးခိၣ်စီၤတ့၀့အအိၣ်ဒီးဒ်န့ၣ်အသိးကယဲၢ်မ့ၢ်သုးကီၣ်ကးအဂၢၤကီၢ်သုးလၢအိၣ်ဖဲန့ၣ်သ့ၣ် တဖၣ်လဲၤအးက့ၤကျိခဲလၢာ်လံအဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ အ၀ဲစံး၀ဲလၢ“ဖဲအသီ(၁၀)အနံၤန့ၣ်အ၀ဲသ့ၣ်လဲၤအးက့ၤကျိလၢဖၣ်အၣ်၀့ၢ်(၁၅၁)သုးကလၢၤန့ၣ်ႉ ၦၤကညီအနီၣ်ဂံၢ် န့ၣ် ကအိၣ်လၢအခိၣ်(၆၀)ညါဘၣ်မနုၤလဲၣ်န့ၣ်တၢ်လီၢ်ဖဲန့ၣ်န့ၣ်ဂၢၤကီၢ်သုးအိၣ်ဒီဒူၣ်ညါႉမ့မ့ၢ်လၢ(၁၁)ခိၣ်ခါန့ၣ်(BGF)ဟ့ၣ်လီၤအီၤအဃိလဲၤအးက့ၤ၀ဲလၢ(BGF)သုးဟီၣ်က၀ီၤ(၂)အခိၣ် သုးခိၣ်တ့ၤ၀့ အအိၣ်န့ၣ်လီၤႉဖဲဟီၣ်က၀ီၤတခါန့ၣ် အပူၤန့ၣ် ကယဲၢ်မ့ၢ်ၦၤလၢတၢ်ဟ့ၣ်လီၤစုက၀ဲၤန့ၣ်လဲၤအးက့ၤ၀ဲခဲလၢာ်ခဲစ့လီၤတအိၣ်တ့ၢ်နီဂၤလၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါသုးကီၣ်ကးအဂၢၤကီၢ်သုးလၢအက့ၤအးကဒါကျိသ့ၣ်တဖၣ်အံၤအိၣ်ဃာ်ဖဲဟီၣ်က၀ီၤပူၤ၀ဲန့ၣ် တချုးလၢ သုးဟံန့ၢ်တၢ်စိတၢ်ကမီၤဒံးဘၣ်အခါလံၤလံၤလံဒီးသုးဟံန့ၢ်တၢ်စိတၢ်ကမီၤ၀ံၤလီၢ်ခံခီဖျိတၢ်ဘံၣ်တၢ်ဘၢ ဒီးသးသမူ တၢ်အုၣ်ကီၤသးတအိၣ်လၢအ၀ဲသ့ၣ်ဂီၢ်လၢၤဘၣ်အဃိဘၣ်က့ၤအးကဒါကျိဒ်အံၤလီၤအဂ့ၢ်န့ၣ် ပဒိၣ်စီၤအ့နဲၤ စံး၀ဲန့ၣ်လီၤႉ စံး၀ဲလၢ“အ၀ဲသ့ၣ်က့ၤအးကျိတၢ်ဂ့ၢ်အံၤယသံကွၢ်ၦၤအဂၤန့ၣ်တဲ၀ဲလၢဂၢၤကီၢ်သုးတဖၣ်အံၤလဲၤပာ်ဖျါထီၣ်သုးကီၣ်ကးလၢ ပမ့ဆဲးဖီၣ်ကျိန့ၣ်ပဒီသဒၢလီၤက့ၤသးတန့ၢ်ဘၣ်မီၤႉအဃိကျိ၀ၣ်သ့ၣ်တဖၣ်အံၤကကဲထီၣ်တၢ်ပၢၢ်ဆၢကျိ၀ၣ်လီၤႉ ဒီးပဖီၣ် စ့ၢ်ကီးတဘူၣ်လၢၤဘၣ်ႉတဲ၀ဲလၢသုဒီသဒၢန့ၢ်ၦၤမ့န့ၢ်မးပဖီၣ်န့ၢ်သုကဘူၣ်လီၤႉသုဒီသဒၢန့ၢ်ၦၤမ့တန့ၢ်ဘၣ်ဒု ၀ဲဒၣ်ပနီၢ်ကစၢ် ဒုပဒီသဒၢလီၤသးတန့ၢ်လၢၤဘၣ်ႉအ၀ဲသ့ၣ်န့ၣ်အိၣ်ပာ်တချုးလၢၦၤမၤတၢ်ပတုာ်တၢ်ခးဒံးဘၣ်အခါန့ၣ်လံႉခဲအံၤတုၤလၢသုးဟံန့ၢ်တၢ်စိတၢ်ကမီၤဘျီအ၀ဲသ့ၣ်န့ၣ်မၤထွဲဒံး၀ဲဒၣ်သုးမီၤစိရိၤအတၢ်သိၣ်တၢ်သီအဃိတကြၢးအိၣ်လၢၤဘၣ်”အဂ့ၢ်န့ၣ်...
တၢ်မၤက့ၤတၢ်စိၥ်ခီဆှၢစ့လၢဝ့ၢ်ပူၤဆူသဝီတဆီဒီးဒိးလဲက့ၤစ့တဖၣ်အိၣ်ထီၣ်ဝဲ
လါအီကူး ၁၉သီ, ၂၀၂၄နံၣ်, ခ့ၣ်အဲးစံၣ် ကညီကီၢ်စဲၣ်အပူၤ,တၢ်ကဒိးလဲစ့အဂီၢ်,တကီၢ်ခါခဲအံၤနီၢ်တဂၤတၢ်ဒိးလဲစ့(ပုဂ္ဂလိကဘဏ်)ဒီး(အွန်လိုင်းဘဏ်)သ့ၣ်တဖၣ်တၢ်သူက့ၤအီၤကီခဲထီၣ်ဝဲအဃိ,တၢ်ဘၣ်မၤဝဲတၢ်စိၥ်ခီဆှၢကျိၣ်စ့တဖၣ်ဒီးမၤက့ၤတၢ်ဒိးလဲကျိၣ်စ့အကျိၤအကွၥ်အသီအိၣ်ထီၣ်ဝဲအဂ့ၢ်,ရၤမတံဝ့ၢ်လီၢ်ကဝီၤဖိလၢအမၤတၢ်ဒိးလဲစ့တၢ်ဖံးတၢ်မၤဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ဒူသဝီလၢ(ဘဏ်)တအိၣ်ဘၣ်တၢ်လီၢ်သ့ၣ်တဖၣ်အပူၤန့ၣ်,တၢ်ဘၣ်စိၥ်ခီဆှၢဝဲကျိၣ်စ့သ့ၣ်တဖၣ်ဝံၤဘၣ်ဟ့ၣ်လီၤပှၤဒိးလဲစ့ကစၢ်တဖၣ်ဝံၤမၣ်တၢ်ဘၣ်မၤက့ၤဝဲတၢ်ဒိးလဲစ့န့ၣ်လီၤ.ပှၤအိၣ်လၢကၠီၣ်တဲၣ်တဖၣ်န့ၣ်ဆှၢလီၤန့ၢ်ဝဲအဟံၣ်ဖိဃီဖိလၢစ့ယိၤဒီးပှၤလၢအိၣ်ကီၢ်ပယီၤဖံးမၤတၢ်ဒိးလဲစ့တဖၣ်ခဲအံၤမၤဝဲတၢ်ဒိးလဲတဘူၣ်လၢၤဘၣ်အဃိ,လီၤဂၥ်လၢကဲထီၣ်က့ၤဝဲလၢတၢ်ဘၣ်ဆါကျိၣ်စ့,ပှ့ၤကျိၣ်စ့လံန့ၣ်လီၤ.ပှၤမ့က့ၤစိၥ်ဝဲကျိၣ်စ့သ့ၣ်တဖၣ်ဆူသဝီတဆီမၣ်ဒိးန့ၢ်ဘၣ်ဝဲတၢ်ဆှၢတၢ်အဘူးအလဲသ့ၣ်တဖၣ်လီၤ.ဒီးတၢ်ဒိးလဲစ့တၢ်မၤအံၤမ့မၤဝဲဒ်အံၤမၣ်ဆဲးမၤဝဲသ့လီၤအဂ့ၢ်”ရၤမတံလီၢ်ကဝီၤဖိလၢအမၤတၢ်ဒိးလဲစ့တဂၤစံးဝဲန့ၣ်လီၤ. လၢန့ၣ်အမဲၥ်ညါ,တၢ်မၤဝဲတၢ်စိၥ်ခီဆှၢစ့တၢ်မၤအံၤန့ၣ်,ပှၤလၢအစိၥ်ဆှၢစ့တဂၤအံၤမ့ၢ်ဆှၢဝဲစ့ပယီၤတကလီၢ်န့ၣ်ဒိးန့ၢ်ဘၣ်ဝဲတၢ်စိၥ်ဆှၢခီတၢ်အဘူးအလဲ(၁၀၀၀)ကၠးလၢစ့ကစၢ်လၢအလဲၤဟံန့ၣ်ဝဲတတဂၤန့ၣ်အအိၣ်,အိၣ်ဝဲဒီးဖဲက့ၤစိၥ်ကဒီးဝဲဆူသဝီအပူၤပှၤဒိးလဲစ့ကစၢ်တဖၣ်အအိၣ်အခါဒိးန့ၢ်ဘၣ်ဝဲတၢ်လဲၤတၢ်က့ၤအဘူးအလဲလၢစ့ပယီၤတလီၢ်န့ၣ်(၂၀၀၀၀ ကၠးမ့တမ့ၢ် ၃၀၀၀)ကၠးအဘၢၣ်စၢၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. တကတီၢ်ဃီ,သၣ်မညၣ်သဝီပှၤဒိးလဲစ့ဖိတဂၤစံးဝဲလၢ“အခဲအံၤကထုးထီၣ်န့ၢ်ပှၤစ့တဘျီဃီတန့ၢ်လၢၤဘၣ်.ဘၣ်လဲၤဟံလၢဝ့ၢ်ပူၤဝံၣ်မၣ်ဘၣ်က့ၤဟ့ၣ်လီၤက့ၤလၢသဝီန့ၣ်လီၤ.ဒ်သိးလၢညါအပူၤကွံၥ်ပှၤဟဲပၠးပှၤစ့စလ့ၣ်ဝံၤပထုးထီၣ်န့ၢ်အဝဲသ့ၣ်တဘျီဃီတန့ၢ်လၢၤဘၣ်.ပကဟ့ၣ်အဝဲသ့ၣ်စ့နီၢ်န့ၣ်တအိၣ်လၢၤဘၣ်”အဂ့ၢ်စံးဝဲန့ၣ်လီၤ. ဒ်န့ၣ်အသိး,ကီၢ်ဆၣ်ဟီၣ်ကဝီၤသဝီတဖၣ်အပူၤတၢ်ကထုးထီၣ်ဒိးလဲဝဲစ့လၢ()သ့ၣ်တဖၣ်တဘျီဃီတန့ၢ်ဝဲလၢၤဘၣ်ဒီးဘၣ်ကွၢ်ဝဲလၢစ့နီၢ်အိၣ်တ့ၢ်အဖီခိၣ်ဒိးလဲဝဲဒီးလၢတၢ်ကီတၢ်ခဲအကလုၥ်ကလုၥ်အဖီခိၣ်(အိၤလဲ)ပှၤဒိးလဲစ့ခၢၣ်စးတဖၣ်တတူၢ်လိၥ်ဝဲမၤဝဲတၢ်ဒိးလဲစ့လၢၤဘၣ်အိၣ်ဝဲအဂ့ၢ်,သ့ၣ်ညါဘၣ်လၢလီၢ်ကဝီၤဖိဒီးပှၤဒိးလဲစ့ဖိတဖၣ်အအိၣ်န့ၣ်လီၤ.
ကမျၢၢ်ပၥ်ဖျါထီၣ်တၢ်ဘၣ်သးဝံၤအလီၢ်ခံ,ဃိၣ်သၢဖျၢၣ်ကီၢ်ဆၢတြဲၤလၢတၢ်ကးတံၥ်ဝဲအံၤတၢ်ပျဲလ့ၢ်ထီၣ်လ့ၢ်လိၤက့ၤကမျၢၢ်ပှၤမၤတၢ်ဖိတဖၣ်
လါအီကူး ၁၈သီ, ၂၀၂၄နံၣ်, ခ့ၣ်အဲးစံၣ်, ကီၢ်ပယီၤပှၤမၤတၢ်ဖိတဖၣ်ပၥ်ဖျါထီၣ်အသးဃ့ထီၣ်ဝဲလၢတၢ်ကက့ၤအိးထီၣ်က့ၤကီၢ်ကၠီၣ်တဲၣ်ကီၢ်ပယီၤကီၢ်ဆၢ,ဃိၣ်သၢဖျၢၣ်ဝ့ၢ်ကီၢ်ဆၢြတဲၤဝံၤအလီၢ်ခံ,ကၠီၣ်တဲၣ်ပှၤဘၣ်မူဘၣ်ဒါဒီးကီၢ်ပယီၤပှၤဘၣ်မူဘၣ်ဒါတဖၣ်တၢၣ်ပီၣ်သကိးဝဲတၢ်ဒီးတြဲၤလၢတၢ်ကးတံၥ်ကွံၥ်ဃၥ်ဝဲယံၥ်ထီၣ်လၢ(၂)လါဃၣ်ဃၣ်အံၤ,တၢ်ဟ့ၣ်တၢ်ပျဲလၢကမျၢၢ်တဖၣ်ကလ့ၢ်ထီၣ်လ့ၢ်လိၤက့ၤဝဲဖဲ တနံၤအံၤလါအီကူး(၁၈)သီအနံၤအပူၤအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ. ဖဲအပူၤကွံၥ်လါယူၤ(၁၇)သီအနံၤအပူၤ,ဃိၣ်သၢဖျၢၣ်ဝ့ၢ်ကၠီၣ်တဲၣ်ပှၤဘၣ်မူဘၣ်ဒါဒီးကီၢ်ပယီၤပှၤဘၣ်မူဘၣ်ဒါတဖၣ်ကးတံၥ်ကွံၥ်ဝဲကျဲတၢ်ဟးထီၣ်က့ၤလီၤအဖီခိၣ်,တၢ်တီဆှၢပနံၥ်တၢ်ဖိတၢ်လံၤအတၢ်လဲၤနုၥ်ဒီးကမျၢၢ်တၢ်လ့ၢ်ထီၣ်လ့ၢ်လိၤဖံးအီၣ်မၤအီၣ်တဘၣ်ဘှီးဘၣ်ဒါဘၣ်အဃိ,ကီၢ်ပယီၤပှၤမၤတၢ်ဖိတဖၣ်မၤဝဲတၢ်ပၥ်ဖျါထီၣ်အတၢ်ဘၣ်သးဖဲလါအီကူး(၁၅)သီဒီး(၁၆)သီအနံၤန့ၣ်လီၤ. ခီဖျိကမျၢၢ်ပှၤမၤတၢ်ဖိတဖၣ်ပၥ်ဖျါထီၣ်တၢ်ဘၣ်သးတၢ်ဂ့ၢ်ခိၣ်တီ(၃)ထံၣ်အဃိခိၣ်နၢ်ခံခီခံကပၤတၢၣ်ပီၣ်တဲသကိးက့ၤဝဲတၢ်အိၣ်ဝဲဒီးတနံၤအံၤတၢ်ပျဲဟးထီၣ်က့ၤလီၤဝဲပှၤမၤတၢ်ဖိတဖၣ်လံဘၣ်ဆၣ်,မ့မ့ၢ်သိလ့ၣ်တဖၣ်တခီလ့ၤတက့ၤလ့ၢ်ထီၣ်လ့ၢ်လိၤဝဲတန့ၢ်ဒံးဘၣ်အဂ့ၢ်,ဃိၣ်သၢဖျၢၣ်လီၢ်ကဝီၤဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ကမျၢၢ်သ့ၣ်တဖၣ်န့ၣ်ပၥ်ဖျါထီၣ်ဝဲအတၢ်ဘၣ်သး(၃)ထံၣ်န့ၣ်လီၤ.ဒီးတၢ်သ့ၣ်တဖၣ်န့ၣ်မ့ၢ်ဝဲ(၁)ပှၤမၤတၢ်ဖိတဖၣ်န့ၣ်အဲၣ်ဒိးဝဲလၢကီၢ်ပယီၤအပူၤတၢ်မုၣ်တၢ်ခုၣ်ကအိၣ်(၂)ကမၤအီၣ်မၤအီဘၣ်ဝဲတၢ်ဘၣ်ဂ့ၢ်ဘၣ်ဝီဘၣ်လီၢ်ဘၣ်စး(၃)အဲၣ်ဒိးဝဲလၢထံကီၢ်ခံဘ့ၣ်အဘၢၣ်စၢၤတၢ်ဟးထီၣ်က့ၤလီၤဒီးဟီၣ်ကဝီၤတၢ်အိၣ်သးတဖၣ်ကအိၣ်ဒီးတၢ်မုၥ်တၢ်ခုၣ်တၢ်ဘၣ်ဘှီးဘၣ်ဒါသ့ၣ်တဖၣ်န့ၣ်လီၤ.လၢတၢ်န့ၣ်အဃိန့ၣ်ခိၣ်နၢ်တဖၣ်ကတိၤတၢၣ်ပီၣ်သကိးတၢ်ဝံၤတနံၤအံတၢ်ပျဲလ့ၢ်ထီၣ်လ့ၢ်လိၤပှၤမၤတၢ်ဖိသ့ၣ်တဖၣ်လံဘၣ်ဆၣ်,သိလ့ၣ်ဖိဆံးသိလ့ၣ်ဖးဒိၣ်တဖၣ်ဒုလ့ၤတက့ၤလ့ၢ်လိၤဝဲတန့ၢ်ဒံးဘၣ်န့ၣ်လီၤ.ဒီးပှၤကညီလၢအလ့ၢ်လိၤပှ့ၤအီၣ်ပှ့ၤအီတၢ်တဖၣ်နါက့န့ၣ်စိၥ်ဝဲတၢ်ဖိတၢ်လံၤန့ၢ်ထဲအနီၢ်ကစၢ်လိၤစှၤကိးမံၤလီၤ.”အဂ့ၢ်စံးဝဲန့ၣ်လီၤ. လၢန့ၣ်အမဲၣ်ညါ,ဘၣ်ဃးဒီးကီၢ်ဆၢတြဲၤအံၤန့ၣ်အပူၤကွံၥ်တၢ်ဟ့ၣ်လ့ၢ်ထီၣ်လ့ၢ်လိၤဝဲထဲကီၢ်ပယီၤကၠိဖိလၢအလဲၤထီၣ်ကၠိဆူကီၢ်ကၠီၣ်တဲၣ်အပူၤဒီးတြဲၤခိၣ်ဃၢၤပှၤမၤတၢ်ဖိသ့ၣ်တဖၣ်လီၤအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ. တကတၢ်ဃီ,ကညီကီၢ်စဲၣ်နိၣ်တကီကီၢ်ဆၣ်,ဃိၣ်သၢဖျၢၣ်ဝ့ၢ်တၢ်လီၢ်တဖၣ်အပူၤအံၤမ့ၢ်ဝဲဒံၣ်မိၤကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ဟူးဂဲၤတၢ်လီၢ်,ဒီးလၢကီၢ်ကၠီၣ်တဲၣ်ဆၣ်ခလဲၣ်ဘူရံၤကီၢ်ဆၣ်ကီၢ်ဆၢတၢ်ဆှၢပနံၣ်တၢ်ကၤတြဲၤတၢ်လီၢ်တဖၣ်အပူၤစ့ၢ်ကီးအပူၤကွံၥ်(DKBA)ဒီးကၠီၣ်တဲၣ်ပှၤခိးကီၢ်ဆၢပှၤဘၣ်မူဘၣ်ဒါတဖၣ်တဲအါဂ့ၢ်လိၥ်သးဘၣ်ဃးဒီးတၢ်ဘှီထီၣ်ကျဲကဲထီၣ်တ့ၢ်ဝဲအသးအဃိ,ကီၢ်ပယီၤတကပၤစးထီၣ်ကးတံၥ်ဆိကျဲဝံၤအလီၢ်ခံကၠီၣ်တဲၣ်တကပၤစ့ၢ်ကီးက့ၤကးတံၥ်ကဒီးဝဲဒၣ်ကျဲကဲထီၣ်အသးန့ၣ်လီၤ. လၢတၢ်န့ၣ်အဃိ,ခီဖျိတၢ်ကးတံၥ်ကွံၥ်ဝဲကီၢ်ဆၢြတဲၤဒ်အံၤအဖီခိၣ်တၢ်ဂ့ၢ်ကီအိၣ်ထီၣ်က့ၤဝဲလၢကမျၢၢ်ကတၢ်ဖံးအီၣ်မၤအီၣ်,ကဟးထီၣ်ဟးက့ၤလီၤအမဲၥ်ညါ,ဃိၣ်သၢဖျၢၣ်ဝ့ၢ်ပူၤစ့ၢ်ကီးကၠီၣ်တဲၣ်ပနံၣ်တၢ်ကၤလၢတၢ်ဆှၢလီၤဝဲဆူကီၢ်ပယီၤတကပၤလီၤတူၥ်ကွံၥ်ဝဲအဃိ,တၢ်တီဆှၢခူသူၣ်က့ၤဝဲတၢ်ဖိတၢ်လံၤလၢတဖိးသဲစးကျဲအိၣ်ဝဲအဖီခိၣ်,သုးကီၣ်ကးတကပၤဖီၣ်ဝဲသိလ့ၣ်တဖၣ်အိၣ်ဝဲအဂ့ၢ်,သ့ၣ်ညါဘၣ်လၢကီၢ်ဆၢပှၤမၤကၤတၢ်ဖိတဖၣ်အအိၣ်န့ၣ်လီၤ.
(၁၅)သီအတီၢ်ပူၤတၢ်ဒုးကဲထီၣ်(၅၇)ဘျီသုးကီၣ်ကးသံ(၂၀)ဂၤဘၣ်ဒိ(၄)ဂၤ
လါအီကူး ၁၈သီ, ၂၀၂၄နံၣ်, ခ့ၣ်အဲးစံၣ ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၅)မုၢ်ြတီၢ်ကီၢ်ရ့ၣ်တၢ်ပၢဟီၣ်ကဝီၤကဝီၤအပူၤ,တလါအံၤလါအီကူး(၁)သီတုၤလၢ(၁၅)သီအတီၢ်ပူၤတၢ်ဒုးကဲထီၣ်ဝဲလၢသုးကီၣ်ကးဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပၥ်ဖှိၣ်အဘၢၣ်စၢၤခဲလၢၥ်(၅၇)ဘျီဒီးသုးကီၣ်ကးတကပၤသံဝဲ(၂၀)ဂၤ,ဘၣ်ဒိဘၣ်ထံးဝဲ(၄)ဂၤအဂ့ၢ်,မုၢ်တြီၢ်တၢ်ကစီၣ်ထုးထီၣ်ဘိးဘၣ်ရၤလီၤဝဲဖဲမဟါလါအီကူး(၁၇)သီအနံၤန့ၣ်လီၤ. လံၥ်ထုးထီၣ်ပၥ်ဖျါအပူၤပၥ်ဖျါဝဲလၢ(၁၅)သီတၢ်ဒုးအပူၤ,တၢ်ပၢၢ်ဆၢသုးပၥ်ဖှိၣ်တကပၤအတၢ်ဘၣ်ဒိဘၣ်ထံးတအိၣ်နီတမံၤဘၣ်,ဘၣ်ဆၣ်ခီဖျိသုးကီၣ်ကးတကပၤခးလီၤကျိဖးဒိၣ်(၅)ဘျီအိၣ်ဝဲအဃိ,ကမျၢၢ်လီၢ်ကဝီၤဖိ(၁)ဂၤဒီး,ကမျၢၢ်အဆၣ်ဖိကီၢ်ဖိကျီၢ်တဒုဘၣ်ဒိဘၣ်ထံးဝဲအဂ့ၢ်,မုၢ်တြီၢ်တၢ်ပၥ်ဖျါအပူၤပၥ်ဖျါဝဲန့ၣ်လီၤ. လၢန့ၣ်အမဲၥ်ညါ,တၢ်ဒုး(၁၅)သီအတီၢ်ပူၤအံၤန့ၣ်သုးကီၣ်ကးတကပၤအကဘီယူၤဆှၢအါထီၣ်တၢ်အီၣ်တၢ်အီတၢ်ပီးတၢ်လီဒီးမၤဝဲကလံၤကျါတၢ်ခးလီၤတၢ်တပယူၥ်ဃီအိၣ်ဝဲအဂ့ၢ်,ပၥ်ဖျါစ့ၢ်ကီးဝဲန့ၣ်လီၤ. တကးဒံးဘၣ်,မုၢ်တြီၢ်ကီၢ်ရ့ၣ်အပူၤအံၤစးထီၣ်ဖဲ(၂၀၂၄)နံၣ်ထီၣ်အပူၤ,တၢ်ပၢၢ်ဆၢသုးပၥ်ဖှိၣ်ထီၣ်ဒုးမၤန့ၢ်ကွံၥ်ဝဲသုးကီၣ်ကးအသုးကလၢၤတဖၣ်ဃုၥ်ဒီးအတၢ်လီၢ်တၢ်ကျဲတနီၤအိၣ်ဝဲဒီးတကီၢ်ခါခဲအံၤပယီၤသုးကလၢၤလၢအိၣ်လီၢ်တဲၥ်သ့ၣ်တဖၣ်စ့ၢ်ကီးတၢ်ပၢၢ်ဆၢသုးပၥ်ဖှိၣ်ခိးတြီတံၥ်ကဝီၤဃၥ်ဝဲလၢဟီၣ်ခိၣ်အမဲၥ်ဖံးခိၣ်တကပၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. တကတီၢ်ဃီ,ခီဖျိတၢ်ပၢၢ်ဆၢသုးပၥ်ပၥ်ဖှိၣ်တဖၣ်ခိးတြီတံၥ်ဃၥ်ဝဲလၢဟီၣ်ခိၣ်အမဲၥ်ဖံးခိၣ်တကပၤအဃိ,သုးကီၣ်ကးအံၤလၢကဆှၢထီၣ်တၢ်အီၣ်တၢ်အီတၢ်ပီးတၢ်လီအဂီၢ်ဘၣ်ဆိးကါက့ၤဝဲထဲလၢကဘီယူၤအဃိ,မၤဝဲကလံၤကျါတၢ်ဒုးအါထီၣ်ဝဲအဂ့ၢ်,မုၢ်တြီၢ်တၢ်ကစီၣ်ပၥ်ဖျါတ့ၢ်ဝဲဖဲလါယူၤလံအပူၤအိၣ်စ့ၢ်ကီးဝဲန့ၣ်လီၤ. ဒ်န့ၣ်အသိး,မုၢ်တြီၢ်ကီၢ်ရ့ၣ်အပူၤအံၤ,အပူၤကွံၥ်လါယူၤလံဒီတလါအပူၤတၢ်ဒုးကဲထီၣ်တ့ၢ်ဝဲလၢသုးကီၣ်ကးဒီးတၢ်ပၢၢ်ဆၢသုးပၥ်ဖှိၣ်အဘၢၣ်စၢၤအဘျီ(၁၀၀)အဖီခိၣ်သုးကီၣ်ကးအပှၤသံဝဲအဂၤ(၅၀)ဘျဲၣ်ဒီးဘၣ်ဒိဝဲ(၁၂)ဂၤအဂ့ၢ်,မုၢ်တြီၢ်ကီၢ်ရ့ၣ်တၢ်ကစီၣ်ပၥ်ဖျါတ့ၢ်ဝဲဖဲလါအီကူး(၅)သီအနံၤန့ၣ်လီၤ.
ကမျၢၢ်တၢ်ဘၣ်ကဲသုးအဂီၢ်,တၢ်နုၥ်လီၤဖီၣ်ဝဲကၠဲးထိၣ်ကမျၢၢ်ပိၥ်ခွါ(၄)ဂၤလၢဟံၣ်ပူၤ
လါအီကူး ၁၇သီ, ၂၀၂၄နံၣ်, ခ့ၣ်အဲးစံၣ်, မိၢ်ကီၢ်စဲၣ်,ကၠဲးထိၣ်ကီၢ်ဆၣ်,ကၠဲးထိၣ်ဝ့ၢ်ကလံၤစိးကဝီၤဒ့တကပၤအပူၤမဟါလါအီကူး(၁၆)သီအနံၤဟါခီ(၇)နၣ်ရံၣ်အဆၢကတီၢ်သုးကီၣ်ကးအပှၤတဖၣ်နုၥ်လီၤဖီၣ်ဝဲကမျၢၢ်လီၢ်ကဝီၤဖိ(၄)ဂၤလၢအဟံၣ်ပူၤလၢကဘၣ်လဲၤကဲဝဲကမျၢၢ်တၢ်ဘၣ်ကဲသုးအဂ့ၢ်,ဝ့ၢ်လီၢ်ကဝီၤဖိတဖၣ်စံးဝဲန့ၣ်လီၤ. သုးကီၣ်ကးအသုးသိလ့ၣ်(၃)ခိၣ်,ပှၤသုးဖိဒီးပၢၤကီၢ်ဂံၢ်ဘါအဂၤ(၃၀)ဃၣ်ဃၣ်နုၥ်လီၤဝဲလၢကလံၤစိးကဝီၤဒ့အပူၤလၢသးစၢ်သ့ၣ်တဖၣ်အဟံၣ်ပူၤဒီးစံးဝဲလၢအဝဲသ့ၣ်တဖၣ်အမံၤပၣ်လၢတၢ်ကဘၣ်လဲၤကဲသုးဒီးဖီၣ်က့ၤကိးဝဲအဂ့ၢ်,ကၠဲးထိၣ်ဝ့ၢ်လီၢ်ကဝီၤပိၥ်ခွါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ပၢၤကီၢ်တဖၣ်ပၣ်ဃုၥ်ဝဲန့ၣ်လီၤ.ကဝီၤဒ့ခိၣ်နၢ်ပှၤဘၣ်မူဘၣ်ဒါဒီးပှၤလီၢ်ကဝီၤဖိတဖၣ်တပၣ်ဘၣ်.ဟဲဝဲဒီးသိလ့ၣ်(၃)ခိၣ်ပှၤနီၢ်ဂံၢ်(၃၀)ဘျီဖီၣ်ဝဲသးစၢ်လွံၢ်ဂၤန့ၣ်လီၤ.ပှၤလၢအမံၤပၣ်လၢစရီပူၤတဖၣ်န့ၣ်ဒုဘၣ်ဃ့ၢ်အိၣ်ခူသူၣ်သးအိၣ်စ့ၢ်ကီးလီၤ.တဟးလူၤသံကွၢ်ဝဲလၢပှၤဟံၣ်ဒ်သိးလၢအပူၤကွံၥ်လၢၤဘၣ်,ဘၣ်ဆၣ်ခဲအံၤမတၤတဂၤအိၣ်ဟံၣ်ဖဲလဲၣ်ဖဲလဲၣ်န့ၣ်ပှၤတဲပၠးအသုလီၤတံၢ်လီၤဆဲးအိၣ်လံ”အဂ့ၢ်စံးဝဲန့ၣ်လီၤ. အပူၤကွံၥ်လါအီကူး(၇)သီအပူၤလၢတၢ်ကဘၣ်လဲၤကဲကမျၢၢ်သုး(၄)ဖုတဖုအဂီၢ်,သုးကီၣ်ကးဟးလူၤထၢဝဲစရီသံကွၢ်သံဒိးဝဲတၢ်လၢကၠဲးထိၣ်ဝ့ၢ်ကဝီၤဒ့(၆)ဘ့ၣ်အပူၤအိၣ်ဝဲဒၣ်ဝံၤအလီၢ်ခံသိလ့ၣ်(၂)ခိၣ်ဟးရှၣ်တၢ်လၢဝ့ၢ်ပူၤဒီးလူၤဖီၣ်ဝဲပှၤလၢအမံၤပၣ်လၢစရီအပူၤတဖၣ်အိၣ်ဝဲအသိး,ပှၤလၢတၢ်ဖီၣ်အီၤလၢတၢ်တသ့ၣ်ညါထွဲဝဲဘၣ်တဖၣ်အိၣ်ဝဲအဂ့ၢ်,သ့ၣ်ညါဘၣ်ဒ်ဝ့ၢ်လီၢ်ကဝီၤကမျၢၢ်တဖၣ်စံးဝဲအသိးန့ၣ်လီၤ. ကၠဲးထိၣ်ဝ့ၢ်ပူၤအံၤသုးကီၣ်ကးလူၤဖီၣ်ဝဲပှၤလၢကဘၣ်လဲၤကဲသုးသ့ၣ်တဖၣ်အိၣ်ဝဲအမဲၥ်ညါ,သုးကီၣ်ကးတဖၣ်အံၤလူၤဖီၣ်ဝဲပှၤလၢအတၢ်ဘၣ်ထွဲအိၣ်ဒီးကမျၢၢ်တၢ်ဒီသဒၢသုး(PDF)ဖိတဖၣ်အိၣ်ဝဲဒီးပှၤလၢဖီၣ်ဃၥ်ဝဲတဖၣ်အံၤဒ်သိးကပျၢ်ထီၣ်ကွံၥ်ဝဲဒီးကမၤလီၤတဲၥ်ကွံၥ်ဝဲအမံၤလၢတၢ်ဘၣ်ကဲသုးအဂီၢ်,လဲၤတၢၣ်ပီၣ်တဲသကိးဝဲလၢကဘၣ်ဟ့ၣ်စ့အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,သုးကီၣ်ကးအံၤထုးထီၣ်ရၤလီၤဝဲကမျၢၢ်တၢ်ဘၣ်ကဲသုးဝံၤအလီၢ်ခံကိးဝဲအဆိကတၢၢ်တၢ်ဘၣ်ကဲသုး(၁)တဖုအပူၤ,ပၥ်ပနီၣ်ဝဲပှၤဘၣ်ကဲသုးလၢကီၢ်ဆၣ်တဖၣ်အပူၤအနီၢ်ဂံၢ်တထီၣ်ဘးဘၣ်အဃိဟ့ၣ်ဝဲတၢ်ဆီၣ်သနံးဆူဝ့ၢ်ပူၤကမျၢၢ်သးစၢ်တဖၣ်ဒီးမၤပျံၤမၤဖုးဝဲကမျၢၢ်သးစၢ်တဖၣ်အိၣ်ဝဲအသိးတကီၢ်ခါခဲအံၤမၤအါထီၣ်ဝဲအတၢ်ဟူးတၢ်ဂဲၤလၢနုၥ်လီၤဖီၣ်တၢ်တုၤလၢဟံၣ်ပူၤလံန့ၣ်လီၤ.
တဂီၤဃီတၢ်ဒုးကဲထီၣ်ဒီးပယီၤသုးခးလီၤကျိဖးဒိၣ်အဃိကမျၢၢ်သံ(၂)ဂၤ ဘၣ်ဒိ(၅)ဂၤ
လါအီကူာ် ၁၇ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ်အပူၤ တနံၤအံၤလါအီကူာ် ၁၇ သီ ဂီၤခီအဆၢကတီၢ် လၢတီၤကလ့သ၀ီဃၢၤ တၢ်ဒုးကဲထီၣ်၀ဲလၢတၢ်ပၢၢ်ဆၢသုးကရူၢ်ဒီးပယီၤသုးအဘၢၣ်စၢၤဒီး ခီဖျိပယီၤသုးခးလီၤ ၀ဲဒၣ်ကျိဖးဒိၣ်အဃိ လီၢ်က၀ီၤကမျၢၢ်သံ၀ဲဒၣ်(၂)ဂၤႇဘၣ်ဒိ(၅)ဂၤအဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီၤႉ ဖဲတဂီၤညါအံၤ ၅း၂၀ မံးနံးအဆၢကတီၢ် လၢတီၤကလ့သ၀ီဃၢၤ တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤဒီး တၢ်ဒုးကဲထီၣ်အကတီၢ် ဘၣ်လၢ(ငါထၣ်ကၠံ)သ၀ီဖိစီၤမီၤနဲၤကလဲၤကွၢ်အကၠၤလၢအဒိးလီၤဃာ်အံၤဒီး ဖဲလဲၤလၢကျဲ အကတီၢ်ဘၣ်၀ဲဒၣ်ဒီးပယီၤသုးအကျိချံသံ၀ဲအဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ ခီဖျိတၢ်ဒုးကဲထီၣ်အဃိတဂီၤဃီဖဲဂီၤခီ ၅း၃၅ အဆၢကတီၢ် ပယီၤသုးခီၣ်ချ့သုးရ့ၣ်(၄၄)စုတီၤဖီလာ် (ခလရ-၈) အမျိာ်သုး အံၤပညိၣ်ခးလီၤ၀ဲဒၣ်ကျိဖးဒိၣ်(၄)ဖျၢၣ်လီၤတဲာ်ပိၢ်ဖးထီၣ်၀ဲလၢ ဒီယၣ်ကရူၢ် တီၤကလ့သ၀ီဒီးစွ့ၤအ့ၤဒိၤ သ၀ီပူၤသ၀ီချၢအဃိဘၣ်သံ၀ဲဒၣ် နးကၠံခၠီၤ နီၢ်မိမိ(၂၄)နံၣ် အံၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤႉ “တၢ်ဒုးန့ၣ်ကဲထီၣ်ဖဲတီၤကလ့သ၀ီဃၢၤမီၤနီၤႉတၢ်ဒုးကဲထီၣ်အဃိ(ခလရ-၈)အမျိာ်လူၢ်ကွံာ်စိ၀ဲဒၣ်ကျိဖးဒိၣ်ႉ တမ့ၢ်ကကွံာ်၀ဲဒၣ်လၢတၢ်ဒုးကဲထီၣ်အလီၢ်ဘၣ်ကွံာ်လီၤ၀ဲလၢသ၀ီပူၤန့ၣ်လီၤႉလီၤ၀ဲဒၣ်လၢသ၀ီပူၤခံဖျၢၣ်ႉလၢစွ့ၤအ့ၤဒိၤ တဖျၢၣ်ႇတီၤကလ့တဖျၢၣ်ႉလီၤတဲာ်၀ဲဒၣ်န့ၣ်လွံၢ်ဖျၢၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဟါအံၤ န့ၣ်လီၤႉ ကျိဖးဒိၣ်အဃိၦၤကမျၢၢ်လၢအဘၣ်ဒိဘၣ်ထံး(၅)သ့ၣ်တဖၣ်န့ၣ်မ့ၢ်၀ဲ စီၤကွဲၤဒူ(၅၅)နံၣ်ႇ စီၤဒိပၠၤ(၅၇)နံၣ်ႇ နီၢ်မၣ်နွဲၣ်(၆၀)နံၣ်ႇ နီၢ်မၣ်ငဲၤ(၄၀)နံၣ်ႇ ဒီၤမၣ်တိၣ်(၆၃)နံၣ်သ့ၣ်တဖၣ်ဒီး မ့မ့ၢ်လၢဒီၤမၣ်တိၣ်အံၤခီဖျိကျိဖးဒိၣ်ဘၣ်အီၤ နးအၦံာ်ဖျိးထီၣ်အဃိဘၣ်တၢ်ဆှၢအီၤဆူဘံလ့တၢ်ဆါဟံၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါ အအိၣ် န့ၣ်လီၤႉ သထူၣ်ကီၢ်ဆၣ်ပူၤ...
ကမၤပတုၥ်ကွံၥ်သုးကီၣ်ကးအတၢ်မၤအၢလၢကမျၢၢ်လီၢ်ကဝီၤဖိတဖၣ်အဖီခိၣ်ဒီးဟ့ၣ်တၢ်ဆီၣ်သနံးတုၤလီၤတီၤလီၤအဂ့ၢ်,လၢၢ်ဒိၣ်ကီၢ်ဆၣ်ဂ့ၢ်ဂီၢ်အူကညီတၢ်တိစၢၤမၤစၢၤကမံးတံၥ်ဃ့ထီၣ်ဝဲထံဂုၤကီၢ်ဂၤအဂ့ၢ်
လါအီကူး ၁၇သီ, ၂၀၂၄နံၣ်, ခ့ၣ်အဲးစံၣ်, ကမၤပတုၥ်ကွံၥ်သုးကီၣ်ကးအတၢ်မၤအၢလၢကမျၢၢ်လီၢ်ကဝီၤဖိတဖၣ်အဖီခိၣ်ဒီးဟ့ၣ်တၢ်ဆီၣ်သနံးတုၤလီၤတီၤလီၤအဂ့ၢ်,လၢၢ်ဒိၣ်ကီၢ်ဆၣ်ဂ့ၢ်ဂီၢ်အူကညီတၢ်တိစၢၤမၤစၢၤကမံးတံၥ်ဃ့ထီၣ်ဝဲထံဂုၤကီၢ်ဂၤဒီးထုးထီၣ်ဝဲလံၥ်တၢ်ဃ့ထီၣ်တဘ့ၣ်ဖဲအပူၤကွံၥ်လါအီကူး(၁၄)သီအနံၤန့ၣ်လီၤ. လံၥ်ထုးထီၣ်ပၥ်ဖျါအပူၤဃ့ထီၣ်ဝဲလၢ,ဒ်ပှၤဟီၣ်ခိၣ်ဖိခွဲးယၥ်အလံၥ်တၢ်ရၤလီၤအိၣ်ဝဲအသိးန့ၣ်လၢကမၤပတုၥ်ကွံၥ်သုးကီၣ်ကးအတၢ်မၤအၢပညိၣ်ခးလီၤဝဲကမျၢၢ်လီၢ်ကဝီၤဖိတဖၣ်အံၤအဖီခိၣ်အဂီၢ်,ကီၢ်ပူၤကီၢ်ချၢပဒိၣ်ပပှၢ်,ပှၤတဝၢခိၣ်နၢ်ဃုၥ်ဒီးထံဂုၤကီၢ်ဂၤကဟ့ၣ်တၢ်ဆီၣ်သနံးလၢအတုၤလီၤတီၤလီၤဆူသုးကီၣ်ကးတဖၣ်ဒီးကမၤပတုၥ်ကွံၥ်စ့ၢ်ကီးဝဲပှၤလၢဟ့ၣ်ဂံၢ်ဟ့ၣ်ဘါသုးကီၣ်ကးကရူၢ်ကရၢတဖၣ်အတၢ်ဖံးတၢ်မၤတဖၣ်အမဲၥ်ညါ,သုးကီၣ်ကးအတၢ်ပညိၣ်ခးလီၤအကဘီယူၤ,ကျိဖးဒိၣ်ဒီးဒြိသ့ၣ်တဖၣ်အံၤကဘၣ်မၤပတုၥ်ကွံၥ်ဝဲတဘျီဃီအဂ့ၢ်,ပၥ်ဖျါဝဲလၢလံၥ်ထုးထီၣ်ပၥ်ဖျါအပူၤန့ၣ်လီၤ. တကးဒံးဘၣ်,ဖဲ(၂၀၂၄)နံၣ်လါယူၤ(၁)သီတုၤလၢလါယူၤလံ(၃၁)ဖဲ(၂)လါအတီၢ်ပူၤ,သုးကီၣ်ကးအံၤမၤထီဒါမၤကမၣ်ဝဲပှၤဟီၣ်ခိၣ်ဖိခွဲးယၥ်ဆူကမျၢၢ်တဖၣ်အဖီခိၣ်လၢကဘီယူၤတၢ်ခးလီၤကျိဖိကျိဖးဒိၣ်,ခးလီၤတၢ်ဒီးဒြိသ့ၣ်တဖၣ်အိၣ်ဝဲအသိးဒီးဖီၣ်ကမျၢၢ်,ဟံန့ၢ်ဆူၣ်ဝဲကမျၢၢ်တၢ်ဖိတၢ်လံၤဒီးဒုးလီၤဝဲလၢဃိၣ်ပူၤ,တကးဘၣ်ဃ့အီၣ်ဝဲကမျၢၢ်ကျိစ့,မၢဆူၣ်ဝဲကမျၢၢ်တဖၣ်လၢကလဲၤကဲသုးသ့ၣ်တဖၣ်အိၣ်ဝဲဒၣ်အဂ့ၢ်,လံၥ်ထုးထီၣ်ပၥ်ဖျါအပူၤပၥ်ဖျါဝဲန့ၣ်လီၤ. ဒီးခီဖျိသုးကီၣ်ကးမၤထီဒါဝဲပှၤဟီၣ်ခိၣ်ဖိခွဲးယၥ်ဆူကမျၢၢ်လီၢ်ကဝီၤဖိတဖၣ်အဖီခိၣ်ဒ်အံၤအိၣ်ဝဲအဃိ,ခံလါအတီၢ်ပူၤလီၢ်ကဝီၤကမျၢၢ်ဘၣ်သံကွံၥ်ဝဲ(၉)ဂၤဒီးဘၣ်ဒိဘၣ်ထံးဝဲ(၁၁)ဂၤနးနးကလဲၥ်အမဲၥ်ညါဟံၣ်(၁၁)ဖျၢၣ်,ကၠိတၢ်သူၣ်ထီၣ်ဃုၥ်ဒီးတၢ်ဘူၣ်တၢ်ဘါလီၢ်သီခါဖၠၣ်,သရိၥ်တဖၣ်ဘၣ်ဟးဂီၤကွံၥ်ဝဲတကးဘၣ်ကမျၢၢ်အဆၣ်ဖိကီၢ်ဖိကျီၢ်ဒီးတၢ်သူၣ်အီၣ်ဖျးအီၣ်လီၢ်တဖၣ်ဘၣ်ဟးဂီၤကွံၥ်ဝဲဒၣ်စ့ၢ်ကီးအဃိ,ဃ့ထီၣ်စ့ၢ်ကီးဝဲကီၢ်ပူၤကီၢ်ချၢပှၤဘၣ်မူဘၣ်ဒါ,ထံဂုၤကီၢ်ဂၤပှၤကညီဂ့ၢ်ဝီခွဲးယၥ်ပှၤဘၣ်မူဘၣ်ဒါဒီးပှၤတဝၢခိၣ်နၢ်တဖၣ်လၢကဟ့ၣ်တၢ်ဟ့ၣ်တၢ်ဒိသူၣ်ဒိသးတၢ်တိစၢၤမၤစၢၤဒီးတၢ်အိၣ်ဆူၣ်အိၣ်ချ့တၢ်ကူၣ်ဘၣ်ကူၣ်သ့တၢ်လိၣ်ဘၣ်တဖၣ်လၢကမျၢၢ်လၢအတူၢ်ဘၣ်ဝဲသုးကီၣ်ကးတၢ်မၤအၢမၤနးတဖၣ်အဂီၢ်အဂ့ၢ်,လံၥ်ထုးထီၣ်ပၥ်ဖျါအပူၤပၥ်ဖျါဝဲန့ၣ်လီၤ. လၢန့ၣ်အမဲၥ်ညါ,တကီၢ်ခါခဲအံၤန့ဆၢၣ်တၢ်တတၢၤတနါအိၣ်ထီၣ်အဖီခိၣ်ထံဒိၣ်ခိၣ်ယွၤအဃိလၢၢ်ဒိၣ်ကီၢ်ဆၣ်အပူၤကမျၢၢ်ဒူသဝီအဖျၢၣ်(၁၀၀)ဘျဲၣ်,ဟံၣ်ခိၣ်(၁၀၀၀၀)ဘျဲၣ်ကမျၢၢ်လီၢ်ကဝီၤဖိ(၇၀၀၀၀)ဘျဲၣ်သဂၢၢ်ဘၣ်ဝဲထံဒိၣ်ဘၢတၢ်ဂ့ၢ်ကီအဂ့ၢ်ပၥ်ဖျါဝဲလၢလံၥ်ထုးထီၣ်ပၥ်ဖျါအပူၤန့ၣ်လီၤ. တကတီၢ်ဃီ,စံးဘျူးဘၣ်ဝဲပှၤလၢအမၤစၢၤဆီၣ်ထွဲတ့ၢ်ဝဲကမျၢၢ်လီၢ်ကဝီၤဖိလၢအဘၣ်ကီဘၣ်ခဲသ့ၣ်တဖၣ်အသိး,ခါဆူညါကအိၣ်ဒီးတၢ်ပၥ်သးကျၢၤမူဆှူလၢကဆဲးမၤစၢၤလိၥ်သကိးသးခံခီယၢ်ပၤအဂ့ၢ်ဆီၣ်တခူပၥ်ဖျါစ့ၢ်ကီးဝဲလၢအလံၥ်ထုးထီၣ်ပၥ်ဖျါအပူၤန့ၣ်လီၤ. ဒ်န့ၣ်အသိး,သုးဟံန့ၢ်ဆူၣ်တၢ်စိကမီၤအလီၢ်ခံ,လၢၢ်ဒိၣ်ကီၢ်ဆၣ်ဂ့ၢ်ဂီၢ်အူတၢ်တိစၢၤမၤစၢၤကမံးတံၥ်အံၤတိစၢၤမၤစၢၤဝဲကမျၢၢ်လီၢ်ကဝီၤဖိလၢအတူၢ်ဘၣ်တၢ်မၤထီဒါပှၤကညီဂ့ၢ်ဝီခွဲးယၥ်တဖၣ်ဒီးအိၣ်ဆၢထၢၣ်ဝဲဒီးကမျၢၢ်တဖၣ်အမဲၥ်ညါ,မၤစၢၤဆီၣ်ထွဲဝဲကမျၢၢ်တၢ်လိၣ်ဘၣ်တဖၣ်တသ့ဖဲအသ့အဂ့ၢ်,ပၥ်ဖျါဝဲလၢ်ဝဲလၢလံၥ်တၢ်ဃ့ထီၣ်အပူၤန့ၣ်စ့ၢ်ကီးန့ၣ်လီၤ.
လၢတရူးကၠါဖၠၣ် She Zhijiang အဂီၢ်သုးခိၣ်ခၠံၣ်သူၤမၤတၢ်ထုကဖၣ်မူးတၢ်ရဲၣ်တၢ်ကျဲၤအဖီခိၣ် ဂံၢ်ခီၣ်ထံးကညီကရူၢ် ကရၢတဖၣ်ပဲာ်ထံနီၤဖး၀ဲဒ်လဲၣ်
လါအီကူာ် ၁၇ သီႇ ၂၀၂၄ နံၣ်ႇ ခ့ၣ်အဲးစံၣ် အပူၤကွံာ်စှၤသီအခါတၢ်ဂီၤမူတၢ်ကစီၣ်ရၤလီၤသးတခါလၢသုးခိးကီၢ်ဆၢ(BGF)အခိၣ် စီၤခၠံၣ်သူၤ ဒီးအခ့အၦၤတဖၣ် မၤ၀ဲဒၣ်တၢ်ဃ့ထုကဖၣ်မူးတၢ်ရဲၣ်တၢ်ကျဲၤဒိၣ်ဒိၣ်မုၢ်မုၢ်တခါလၢတရူးကၠါဖၠၣ် She Zhijiang အဂီၢ် လၢအမံၤဟူသၣ်ဖျါ လၢတၢ်လံၣ်အီၣ်လီအီၣ်လၢကလံၤကျါတၢ်တၤကျိၣ်တၤစ့လၢစွ့ၣ်ကိၣ်ကိၤဟီၣ်က၀ီၤပူၤန့ၣ်လီၤႉ She Zhijiang လၢအဘၣ်တၢ်မၤန့ၢ်အီၤတၢ်ထုကဖၣ်တၢ်ရဲၣ်တၢ်ကျဲၤအံၤမ့ၢ်ၦၤတဂၤလၢအပၣ်ဃုာ်လၢ စွ့ၤကိၣ်ကိၤ ၀့ၢ်သီ တၢ်တိၤကျဲၤအပူၤန့ၣ်လီၤႉ ဖဲအပူၤကွံာ်(၂၀၂၂)လါအီကူာ်အခါန့ၣ်မ့ၢ်စ့ၢ်ကီးၦၤတဂၤလၢကၠီၣ်တဲၣ်ပၢၤကီၢ်ကရူၢ်ဖီၣ်ဃာ်အီၤ ခီဖျိလၢတၢ်ဆါအီၣ်ၦၤကညီႇကလံၤကျါတၢ်တၤကျိၣ်တၤစ့ဃုာ်ဒီးတၢ်ဖံးတၢ်မၤလၢအဖိးသဲစးတအိၣ်ဘၣ်သ့ၣ်တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢ(She Zhijiang)အဂီၢ်လၢတၢ်မၤတၢ်ဘါထုကဖၣ်တၢ်ရဲၣ်တၢ်ကျဲၤအပူၤန့ၣ်ပထံၣ်ဘၣ်လၢ တရူးၦၤဒိၣ်ကျိၣ်ဒိၣ်စ့, သုးခိးကီၢ်ဆၢ(She Zhijiang)သုးခိၣ်ခၠံၣ်သူၤဃုာ်ဒီးအဖိခွါ(၂)ဂၤႇခိၣ်နၢ်ၦၤမၤသကိးတၢ်ဖိလၢအဂၤတကးဒံးဘၣ် လီၢ်က၀ီၤကမျၢၢ်ႇ ကၠိသရၣ်သရမုၣ်ႇၦၤကၠိဖိႇသူၣ်ဘီၣ်သးစၢ်သ့ၣ်တဖၣ်ဟဲထီၣ်၀ဲဒၣ်အါအါဂီၢ်ဂီၢ်န့ၣ် ထံၣ်ဘၣ်လၢတၢ်ဂီၤမူ ရၤလီၤသးတခါအံၤ အပူၤန့ၣ်လီၤႉ ဒ်တၢ်ဂီၤမူတခါအံၤပူၤပာ်ဖျါ၀ဲအသိးန့ၣ် တၢ်ရဲၣ်တၢ်ကျဲၤအပူၤထံၣ်ဘၣ်လၢသုးခိၣ်ခၠံၣ်သူၤထီၣ်ကတိၤလီၤတၢ်လၢ တၢ်မဲာ်ညါ အိၣ်ဘၣ်ဆၣ်တၢ်ဂီၤမူအပူၤတၢ်ပာ်ဖျါအီၤဒၣ်ထဲတၢ်ကတိၤလီၢ်ခံကတၢၢ်လၢဆၢဂ့ၤဆၢ၀ါဟီၣ်က၀ီၤသုးဖိ သံၣ်ဖိႇကမျၢၢ်ႇ ကၠိသရၣ်သရမုၣ်ဃုာ်ဒီးၦၤကၠိဖိသ့ၣ်တဖၣ်န့ၣ်လီၤႉ “တနံၤအံၤလၢ(She Zhijiang)အဂီၢ်တၢ်ဘါထုကဖၣ်တၢ်ရဲၣ်တၢ်ကျဲၤအံၤအပူၤသီခါႇၦၤမၤသကိးတၢ်ဖိႇ စွ့ၣ်ကိၣ်ကိၤ ကမျၢၢ်ထံဖိကီၢ်ဖိႇၦၤကၠိဖိႇကၠိသရၣ်သရၣ်မုၣ်ဃုာ်ဒီး(BGF)သုးခိၣ်သုးနၢ်ႇသုးဖိသံၣ်ဖိတဖၣ်ခဲလၢာ်လီၢ်ခံကတၢၢ် ကအိၣ်ဘၣ်ထူးထူးတီၤတီၤႇကအိၣ်ဆူၣ်အိၣ်ချ့ဒီးတၢ်လၢသုမိၣ်န့ၢ်သးလီတဖၣ်ကလၢၦဲၤဘၣ်၀ဲတက့ၢ်” သုးခိၣ်စီၤခၠံၣ်သူၤ စံးလီၤလၢတၢ်ထုကဖၣ်တၢ်ရဲၣ်တၢ်ကျဲၤပူၤန့ၣ်လီၤႉ တၢ်ထုကဖၣ်တၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်တရူးဃုာ်ဒီး(BGF)သုးခိၣ်သုးနၢ်သုးမုၢ်သံၣ်ဘိႇကမျၢၢ်လၢအဟဲ ထီၣ်တၢ်ရဲၣ် တၢ်ကျဲၤတဖၣ်ခဲလၢာ်ဟဲကူဟဲသိး၀ဲဒၣ်ဆ့ကၤ၀ါလၢအမဲာ်ညါအိၣ်၀ဲဒီး(She Zhijiang)အတၢ်ဂီၤႇတကးဒံးဘၣ်တၢ်ရဲၣ် တၢ်ကျဲၤအပူၤတရူးၦၤဒိၣ်ကျိၣ်ဒိၣ်စ့ဒီးသီခါႇ(BGF)သုးခိၣ်ခၠံၣ်သူၤႇခိၣ်နၢ်လၢအဂၤတဖၣ်ပျၢ်ဖျဲးထီၣ်သကိး၀ဲထိၣ်လွံၢ်၀ါဆူမူခိၣ်ႇတၢ်ဆၢတံၢ်သကိးတၢ်ကံညာ်က့ဂီၤဂီၤဖိလၢပျံၤလိၤတၢ်ဟူးတၢ်ဂဲၤသ့ၣ်တဖၣ်ပၣ်ဃုာ်၀ဲ အဂ့ၢ်န့ၣ် သ့ၣ်ညါဘၣ်န့ၣ်လီၤႉ (She Zhijiang)လၢအဘၣ်တၢ်မၤတၢ်ထုကဖၣ်လၢအဂီၢ်တဂၤအံၤမ့ၢ်တဂၤလၢအမၤသကိးတၢ်ဒီး သုးကီၣ်ကးစုတီၤ ဖီလာ်သုးခိးကီၢ်ဆၢ(BGF)ခိၣ်နၢ်တနီၤဒီးဒ်န့ၣ်အသိးမ့ၢ်စ့ၢ်ကီးၦၤတဂၤလၢအသူၣ်ထီၣ်၀ဲဒၣ်စွ့ၣ်ကိၣ်ကိၤ၀့ၢ်သီ တၢ်တိာ်ကျဲၤ အံၤန့ၣ်လီၤႉ ဘၣ်ဃးသုးခိၣ်ခၠံၣ်သူၤမၤ၀ဲဒၣ်တၢ်ထုကဖၣ်တၢ်ရဲၣ်တၢ်ကျဲၤအံၤအဖီခိၣ်...