နိၣ်ခၠိနဲၣ်သုးကလၢၤသုတလီၤတဂ့ၤအဂီၢ်,သုးကီၣ်ကးကဘီယူၤမၤတၢ်ခးလီၤစၢၤတၢ်အါထီၣ်
လါအီကူး ၁၆သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,တၢ်ပၢဟီၣ်ကဝီၤသုးက့(၆)ဒူပျၥ်ယၥ်ကီၢ်ရ့ၣ်,ဝီၢ်ရ့ၣ်ကီၢ်ဆၣ်ပယီၤသုးနိၣ်ခၠိနဲၣ်သုးကလၢၤအံၤ,ဒ်သိးအသုတလီၤကွံၥ်ဆူတၢ်ပၢၢ်ဆၢသုးပၥ်ဖှိၣ်အစုပူၤတဂ့ၤအဂီၢ်,စးထီၣ်ဖဲလါအီကူး(၁၀)သီအနံၤအပူၤ,ကဘီယူၤခးလီၤတၢ်ဒီးဟီၣ်ခိၣ်မဲၥ်ဖံးခိၣ်တကပၤစ့ၢ်ကီးကျိဖးဒိၣ်ခးလီၤစၢၤတၢ်အါထီၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ. နိၣ်ခၠိနဲၣ်သုးကီၣ်ကးအသုးကလၢၤအံၤ,သုတလီၤကွံၥ်ဆူကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLAဒီးတၢ်ပၢၢ်ဆၢသုးပၥ်ဖှိၣ်အစုပူၤတဂ့ၤအဂီၢ်,တကီၢ်ခါခဲအံၤသုးကီၣ်ကးအကဘီယူၤခးလီၤဝဲတၢ်ဆူသုးကလၢၤခိၣ်ဃၢၤတၢ်လီၢ်တၢ်ကျဲတဖၣ်အပူၤအိၣ်ဝဲအသိး,ပယီၤသုးလၢအိၣ်သရိၥ်ဝါဝဲကလံၣ်ခီၣ်ချ့သုးရ့ၣ်(ခလရ၆၁)အမျီၤသုးကလၢၤတဖၣ်စ့ၢ်ကီးခးလီၤစၢၤဝဲကျိဖးဒိၣ်တပယူၥ်ဃီအိၣ်ဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“စးထီၣ်ဖဲ(၁၃)သီအနံၤန့ၣ်,ပှၤဟူးဂဲၤဆူၣ်ထီၣ်က့ၤဒီးသုးကီၣ်ကးလၢအိၣ်သရိၥ်ဝါဝဲကလံၣ်သ့ၣ်တဖၣ်ခးလီၤဝဲ(၁၂၀မမ)ကျိဖးဒိၣ်ဆူနိၣ်ခၠိနဲၣ်,ဒီးလိးရှါတကပၤကိးနံၤတကးဘၣ်မဟါတနံၤကဘီယူၤဟဲခးလီၤတၢ်စ့ၢ်ကီးလီၤ.တကီၢ်ခါခဲအံၤဒုခးလီၤတၢ်တပယူၥ်ဃီလီၤ.သုးကီၣ်ကးတကပၤန့ၣ်ဒ်သိးအတၢ်လီၤတလီၤတဂ့ၤအဂီၢ်ဒုခးလီၤဝဲတၢ်လီၢ်လၢပှၤတၢ်ပၢၢ်ဆၢဖိတဖၣ်အိၣ်ဆိးဝဲအလီၢ်သ့ၣ်တဖၣ်ဒီးကမျၢၢ်အိၣ်ဆိးတၢ်လီၢ်သ့ၣ်တဖၣ်အိၣ်ဝဲလီၤ.”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ,ခီဖျိသုးကီၣ်ကးအံၤခးလီၤစိဝဲကျိဖးအဃိနိၣ်ခၠိနဲၣ်,လိးရှါလီၢ်ကဝီၤကမျၢၢ်သ့ၣ်တဖၣ်တကးဘၣ်ဃီကျါသဝီလီၢ်ကဝီၤကမျၢၢ်တဖၣ်စ့ၢ်ကီးဘၣ်ဃ့ၢ်ပဒ့ၣ်ကွံၥ်ဝဲအသးဆူခိၣ်ဃၢၤတၢ်လီၢ်တဖၣ်အပူၤအိၣ်ဝဲအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. တကးဒံးဘၣ်,မဟါလါအီကူး(၁၅)သီအနံၤအပူၤ,တၢ်ဒုးကဲထီၣ်ဝဲလၢကညီတၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၂၇)တၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအဘၢၣ်စၢၤဖဲ(ယဲတခိၤဖယါကိ)ခိၣ်ဃၢၤတၢ်လီၢ်တဖၣ်အပူၤဝံၤအလီၢ်ခံသုးကီၣ်ကးတကပၤအပှၤသံကွံၥ်ဝဲ(၆)ဂၤအကျါပၣ်ဃုၥ်ဝဲဒီးအသုးခိၣ်စိတဂၤအသိးဘၣ်ဒိဘၣ်ထံးဝဲနးနး(၂)ဂၤအိၣ်စ့ၢ်ကီးဝဲအဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်န့ၣ်လီၤ တကတီၢ်ဃီ,ဝီၢ်ရ့ၣ်ကီၢ်ဆၣ်အပူၤ,သုးကီၣ်ကးနိၣ်ခၠိနဲၣ်သုးကလၢၤအံၤသုတလီၤကွံၥ်တဂ့ၤအဂီၢ်,အပူၤကွံၥ်လါအီကူး(၅)သီအနံၤအပူၤသုးကီၣ်ကးဆှၢထီၣ်ဝဲတၢ်အီၣ်တၢ်အီဒီးတၢ်ပီးတၢ်လီတဖၣ်ဆူနိၣ်ခၠိနဲၣ်,ဃုၥ်ဒီးချၢၣ်တကူၣ်တၢၣ်ဒီးစံဖၠူၤကိသုးကလၢၤပူၤတဖၣ်အပူၤအိၣ်ဝဲအသိးဒ်သိးအသုးကျိၤကနုၥ်လီၤဟူးဂဲၤအဂီၢ်,လၢဟီၣ်ခိၣ်မဲၥ်ဖံးခိၣ်တကပၤစ့ၢ်ကီးမၤအါထီၣ်ဝဲအသုးဂံၢ်ဘါအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိး,သုးကီၣ်နိၣ်ခၠိနဲၣ်သုးကလၢၤအံၤမ့ၢ်ဝဲသုးကလၢၤဖးဒိၣ်တဖျၢၣ်လၢအိၣ်ဝဲဖဲဃိၣ်သၢဖျၢၣ်-သရိၥ်ဝါအဘၢၣ်စၢၤကျဲမုၢ်အဖီခိၣ်ဒီးတကီၢ်ခါခဲအံၤဒ်သိးဟီၣ်ခိၣ်မဲၥ်ဖံးခိၣ်ပယီၤသုးဟဲထီၣ်သုတန့ၢ်တဂ့ၤအဂီၢ်,တၢ်ပၢၢ်ဆၢသုးပၥ်ဖှိၣ်တဖၣ်ခိးကးတံၥ်တြီဃၥ်ဝဲဒၣ်တပယူၥ်ဃီအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
မူကီၢ်ဆၣ်အပူၤမ့ၢ်လၢထံဒိၣ်နိယွၤအဃိကမျၢၢ်ဟံၣ်ဒီးတၢ်သူၣ်ထီၣ်(၂၇)ဖျၢၣ်ဘၣ်ဟးဂီၤလီၤထွံကွံၥ်ဝဲ
လါအီကူး ၁၆ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့(၃)မူကီၢ်ဆၣ်ဟီၣ်ကဝီၤအပူၤဖဲတကီၢ်ခါအတီၢ်ပူၤအံၤန့ၣ်ခီဖျိ လၢထံဒိၣ်နိယွၤအဃိကမျၢၢ်ဟံၣ်ဒီးသူၣ်ထီၣ်(၂၇)ဖျၢၣ်ဘၣ်ဟးဂီၤလီၤထွံကွံၥ်ဝဲဒၣ်အဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါဝဲဖဲလါအီကူး(၁၅)သီအနံၤန့ၣ်လီၤ. ကမျၢၢ်ဒူဖိသဝီဖိသ့ၣ်တဖၣ်လၢအဟံၣ်အဃီဘၣ်လီၤထွံကွံၥ်သ့ၣ်တဖၣ်အံၤန့ၣ်တကီၢ်ခါခဲအံၤဘၣ်အိၣ်ဆိးဆိဝဲဒၣ်လၢတၢ်ဒီခိၣ်အလီၢ်ဒီးကတီၢ်ခဲအံၤန့ၣ်ကီၢ်ဆၣ်ပှၤဘၣ်မူဘၣ်ဒါကွၢ်ထွဲတိစၢၤမၤစၢၤဝဲဒၣ်အဂ့ၢ်မူကီၢ်ဆၣ်အပှၤကတိၤတၢ်ပၢသရၣ်စီၤစံးပတြၢၤစံးဝဲဒ်အံၤန့ၣ်လီၤ. "လၢမဟါကၢၤထံဒိၣ်န့ၣ်အဝဲသ့ၣ်လဲၤဃ့ၢ်အိၣ်လၢတၢ်ဒီၣ်ခိၣ်မီၤနီၤ. သဝီသ့ၣ်တဖၣ်န့ၣ်အိၣ်ဝဲဖဲကစၢၢ်ခီၣ်ထံးလီၤ. ကစၢၢ် ထံဟဲလီၤဒီးထံဒိၣ်အါအဃိန့ၣ်ဟံၣ်တနီၤနီၤဘၣ်ထွဲလၢထံကျါမီၤနီၤ. ပှၤသဝီဖိဘၣ်သုးအသးလၢကစၢၢ်ဒီခိၣ်တစဲးဖိမီၤ. ဒီးတၢ်ရဲၣ်တၢ်ကျဲၤဒုဂ့ၢ်ဝီအူတၢ်တိစၢၤမၤစၢၤလၢကီၢ်ဆၣ်တကပၤခီန့ၣ်တၢ်သုးတၢ်ကျဲၤတၢ်တိစၢၤမၤစၢၤအိၣ်ဝဲလီၤ. သနါ က့ၤန့ၣ်ဟံၣ်ဖိဃီဖိသ့ၣ်တဖၣ်ဒုကတီၢ်ခဲအံၤန့ၣ်အိၣ်ဆိးပၥ်ဒီးဘှီထီၣ်လီၢ်ကျဲလၢတၢ်ဒီခိၣ်အလီၢ်ဒ်န့ၣ်မီၤနီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒူသဝီလၢကမျၢၢ်ဘၣ်ကွၢ်ဆၢၣ်မဲၥ်ဘၣ်ဝဲထံဒိၣ်နိယွၤဟံၣ်ဃီတၢ်သူၣ်ထီၣ်ဘၣ်လီၤထွံသ့ၣ်တဖၣ်န့ၣ်မ့ၢ်ဝဲ(ကီပၠ့)သဝီပှၤလီၢ်အိၣ်ကမှံဖိသ့ၣ်တဖၣ်အဒဲတၢ်သူၣ်ထီၣ်(၈)ဖျၢၣ်ဃုၥ်ဒီးတၢ်ဖိတၢ်လံၤဆၣ်ဖိကီၢ်ဖိသ့ၣ်တဖၣ်ဒီး(ပီၢ်ပံၣ်ဒဲ)သဝီဖိဟံၣ်(၁၉)ဖျၢၣ်အမဲၥ်ညါ(ယီၢ်ခံ)သဝီဟံၣ်လီၤထွံကွံၥ်ပၥ်ဃုၥ်ဝဲအဂ့ၢ်သ့ၣ်ညါန့ၣ်လီၤ. လၢန့ၣ်အမဲၥ်ညါကမျၢၢ်တၢ်သူၣ်အီၣ်ဖျးအီၣ်စံၥ်ပှဲၤသ့ၣ်တဖၣ်ဘၣ်ဟးဂီၤဃုၥ်စ့ၢ်ကီးဝဲဒီးကတီၢ်ခဲအံၤန့ၣ်ဒူသဝီတနီၤအပူၤထံက့ၤလီၤက့ၤဝဲဒၣ်အဖီခိၣ်ပှၤသဝီဖိသ့ၣ်တဖၣ်တနီၤက့ၤအိၣ်ဆိးဝဲဘၣ်ဆၣ်ဒူသဝီလၢထံအိၣ်ဒံးသ့ၣ်တဖၣ်ခီန့ၣ်ပှၤသဝီဖိသ့ၣ်တဖၣ်ဘၣ်အိၣ်ဘၣ်ဆိးဒံးဝဲဒၣ်လၢတၢ်ဒီခိၣ်အဂ့ၢ်ပဒိၣ်စီၤစံးပတြၢၤစံးအါထီၣ်ဝဲန့ၣ်လီၤ. တကီၢ်ခါခဲအံၤထံသ့ၣ်တဖၣ်လီၤက့ၤဝဲလံဘၣ်ဆၣ်မ့ၢ်လၢကျဲတၢ်လဲၤတၢ်က့ၤကီခဲဝဲဒီး(တိၤ)သ့ၣ်တဖၣ်ဟးဂီၤဝဲအဃိလၢတၢ်ကမၤလီၤတံၢ်ထၢဖှိၣ်ဝဲတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤစရီအဂီၢ်တၢ်ဆၢကတီၢ်ဘၣ်ယံၥ်ထၢဝဲန့ၣ်လီၤ. ဒ်န့ၣ်အသိးတၢ်စးထီၣ်ဝဲတၢ်ရဲၣ်တၢ်ကျဲၤလၢအမ့ၢ်တၢ်သူၣ်ထီၣ်ဘှီထီၣ်က့ၤဝဲတၢ်သူၣ်ထီၣ်သ့ၣ်တဖၣ်အသိးကမျၢၢ်လၢတူၢ်ဘၣ်တၢ်သ့ၣ်တဖၣ်အဂီၢ်လိၣ်ဘၣ်ဝဲတၢ်ဆီၣ်ထွဲမၤစၢၤအဂ့ၢ်တၢ်ပၥ်ဖျါပူၤအသိးပၥ်ဖျါဝဲန့ၣ်လီၤ.
သုးကီၣ်ကးဟဲတ့ၢ်လီၤဒြိမ့ၣ်ပိၢ်အဃိဘၣ်ဟးဂီၤဝဲကၠိတၢ်သူၣ်ထီၣ်တဖျၢၣ်ဒီးတၢ်ဆါဟံၣ်တဖျၢၣ်
လါအီကူး ၁၆ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ်-လၢၢ်ဒိၣ်ကီၢ်ဆၣ်ဟီၣ်ကဝီၤအပူၤဖဲလါအီကူး(၁၃)သီအနံၤဟါခီ(၆) နၣ်ရံၣ်ဘျဲၣ်အဆၢကတီၢ်ခီဖျိလၢသုးကီၣ်ကးအပှၤသ့ၣ်တဖၣ်ဟဲတ့ၢ်လီၤဒြိမ့ၣ်ပိၢ်ဖဲ(ထံပူၤလူၢ်)သဝီပူၤအဃိဘၣ်ဟးဂီၤကွံၥ်ဝဲတၢ်မၤလိကၠိတဖျၢၣ်ဒီးတၢ်ဆါဟံၣ်တဖျၢၣ်အဂ့ၢ်ခ့ၣ်အဲၣ်ယူၣ်ထုးထီၣ်ပၥ်ဖျါဝဲဖဲမဟါလါအီကူး(၁၅)သီအနံၤန့ၣ်လီၤ. ပယီၤသုးကီၣ်ကးခီၣ်သုးရ့ၣ်လၢအမ့ၢ်(ခလရ-၂၆၄)သုးရ့ၣ်ဟဲတ့ၢ်လီၤဒြိမ့ၣ်ပိၢ်အဃိတၢ်မၤလိကၠိလၢအဘၣ်ဟးဂီၤကွံၥ်ဝဲ တဖျၢၣ်အံၤန့ၣ်ကတီၢ်ခဲအံၤတၢ်ဘၣ်ပတုၥ်ကွံၥ်ဝဲဒၣ်ဒီးကၠိဖိသ့ၣ်တဖၣ်ဘၣ်မၤလိမၤဒိးက့ၤတၢ်လၢဟံၣ်ဃီသ့ၣ်တဖၣ်ပူၤအဂ့ၢ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဝဲဒ်အံၤန့ၣ်လီၤ. "ဘၣ်ထွဲဒီးတၢ်ကဲထီၣ်အသးအံၤန့ၣ်ဒုၣ်ဒါခီအိၣ်လၢအသုးကလၢၤအပူၤ,အိၣ်ဖဲ(၂၆၄)အသုးကလၢၤအပူၤမီၤနီၤ. ဒီးခးစိဝဲ ဒၣ်ကျိဖးဒိၣ်လၢ(ထံပူၤလူၢ်)သဝီမီၤနီၤ. အဝဲသ့ၣ်ခးလီၤဝဲဒၣ်တၢ်ကိးမုၢ်ဟါလီၤ. အဝဲသ့ၣ်ဟဲတ့ၢ်လီၤမ့ၣ်ပိၢ်ဒီးဒြိန့ၣ်ဘၣ် ဟးဂီၤဝဲဒၣ်တီၤကၠိဒီးတၢ်ဆါဟံၣ်. ကတီၢ်ခဲအံၤကၠိဖိသ့ၣ်တဖၣ်ထီၣ်ဝဲကၠိဘၣ်ဆၣ်သနါက့န့ၣ်မ့ၢ်လၢတၢ်ကဲထီၣ်အသးဒ် အံၤအဃိပှၤကၠိဖိသ့ၣ်တဖၣ်ထီၣ်က့ၤကၠိတဘူၣ်လၢၤဘၣ်မီၤနီၤ. ဘၣ်ထီၣ်က့ၤဝဲကၠိလၢဟံၣ်ပူၤလီၤ. ဖဲတၢ်ဟဲတ့ၢ်လီၤမ့ၣ် ပိၢ်န့ၣ်ကၠိဖိသ့ၣ်တဖၣ်တၢ်ဘၣ်ဒိဘၣ်ထံးတအိၣ်ဘၣ်. ပယီၤသုးအံၤခးဝဲကျိဖးဒိၣ်ကိးဆၢကတီၢ်ဒဲးစ့ၢ်ကီးလီၤ." အဂ့ၢ်စံး ဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ(ထံပူၤလူၢ်)သဝီကၠိအံၤန့ၣ်ဘၣ်တၢ်က့ၤအိးထီၣ်လဲၤတရံးက့ၤအသးဖဲတနံၣ်ညါအံၤအတီၢ်ပူၤဒီးမ့ၢ်ဝဲတီၤဖုၣ်ကၠိတဖျၢၣ်အသိးပှၤကၠိဖိနီၣ်ဂံၢ်ခဲလၢၥ်အိၣ်ဝဲ(၉၀)ဂၤဘျဲၣ်န့ၣ်လီၤ. ဒ်န့ၣ်အသိးထံပူၤလူၢ်သဝီတၢ်ဆါဟံၣ်စ့ၢ်ကီးမ့ၢ်လၢ ဘၣ်ဟးဂီၤကွံၥ်ဝဲဒၣ်ဒ်အံၤအဖီခိၣ်အဃိကမျၢၢ်လၢဘၣ်ဆူးဘၣ်ဆါသ့ၣ်တဖၣ်ဘၣ်တၢ်ကူးဆါယါဘျါန့ၢ်က့ၤဝဲလၢဟံၣ်ပူၤလီၤအဂ့ၢ်ပဒိၣ်စီၤဝါမုၢ်စံးအါထီၣ်ဝဲန့ၣ်လီၤ. ဒ်န့ၣ်အသိးဖဲပူၤကွံၥ်လါအီကူး(၁၃)သီအနံၤန့ၣ်မ့ၢ်လၢပယီၤသုးကီၣ်ကးခီၣ်သုးရ့ၣ်(ခလရ-၂၆၄)ခးလီၤကျိဖးဒိၣ်ဆူ(တီၢ် ခ့ၣ်)သဝီပူၤအဃိဘၣ်ဒိဘၣ်ထံးစ့ၢ်ကီးဝဲကမျၢၢ်(၃)ဂၤဒီးဟံၣ်ဃီတၢ်သူၣ်ထီၣ်,ကမျၢၢ်ဆၣ်ဖိကီၢ်ဖိဘၣ်ဒိဘၣ်ထံးအိၣ်ဝဲအဂ့ၢ်လီၢ်ကဝီၤအပှၤဘၣ်မူဘၣ်ဒါစံးဝဲန့ၣ်လီၤ. ခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်ကဝီၤကီၢ်ရ့ၣ်ကိးဘ့ၣ်ဒဲးအပူၤစးထီၣ်လၢ(၂၀၂၄)နံၣ်လါနူၤအါရံၤတုၤလါယူၤလၢ(၆)လါအတီၢ်ပူၤအံၤန့ၣ်ခီဖျိလၢသုးကီၣ်ကးတကပၤခးလီၤကျိဖးဒိၣ်,ဟဲတ့ၢ်လီၤမ့ၣ်ပိၢ်ဒီးကဘီယူၤ,ဒြိသ့ၣ်တဖၣ်အဃိဘၣ်ဟးဂီၤကွံၥ်ဝဲကၠိတၢ်သူၣ်ထီၣ်(၁၄)ဖျၢၣ်ဒီးတၢ်ဆါဟံၣ်(၂)ဖျၢၣ်အဂ့ၢ်ခ့ၣ်အဲၣ်ယူၣ်တၢ်ပၥ်ဖျါပူၤအသိးသ့ၣ်ညါန့ၣ်လီၤ.
ဒူပျၥ်ယၥ်ကီၢ်ရ့ၣ်ပှၤလီၢ်အိၣ်ကမှံဖိတဖၣ်သဂၢၢ်ဘၣ်ဝဲတၢ်ညၣ်ဂိၢ်လိၤကိၢ်တၢ်ဆါ
လါအီကူး ၁၅သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်အပူၤ,စးထီၣ်ဖဲလါယူၤလံတၢ်စူၤဒိၣ်ထီၣ်အလါအတီၢ်ပူၤ,ကမျၢၢ်ပှၤဃ့ၢ်တၢ်ဒုးလီၢ်အိၣ်ကမှံဖိသ့ၣ်တဖၣ်သဂၢၢ်ဘၣ်ဝဲတၢ်ညၣ်ဂိၢ်လိၤကိၢ်တၢ်ဆူးတၢ်ဆါတဖၣ်အိၣ်အါထီၣ်ဝဲအဂ့ၢ်,ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. စးထီၣ်ဖဲတၢ်စူၤဒိၣ်ထီၣ်အဆၢကတီၢ်,လီၢ်အိၣ်ကဒုဖိတဖၣ်သဂၢၢ်ဘၣ်ဝဲတၢ်ညၣ်ဂိၢ်လိၤကိၢ်တၢ်ဆါအိၣ်ထီၣ်ဝဲဒီးဒူပျၥ်ယၥ်ကီၢ်ရ့ၣ်ဒီတဘ့ၣ်ပတီၢ်,ပှၤလီၢ်အိၣ်ကဒုဖိတဖၣ်သဂၢၢ်ဘၣ်တၢ်ညၣ်ဂိၢ်လိၤကိၢ်အတၢ်ဆါအံၤတနံၣ်အံၤအိၣ်အါထီၣ်ဝဲအဂ့ၢ်,ဒူပျၥ်ယၥ်ကီၢ်ရ့ၣ်ပှၤမၤစၢၤပှၤလီၢ်အိၣ်ကဒုပှၤဘၣ်မူဘၣ်ဒါတဂၤစံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ“လၢပကီၢ်ရ့ၣ်အပူၤပှၤလီၢ်အိၣ်ကမှံဖိအတၢ်အိၣ်ဆူၣ်အိၣ်ချ့အတၢ်အိၣ်သးခီန့ၣ်,အခဲအံၤခီဒုတၢ်အိၣ်သးန့ၣ်တတီၤဒီးတတီၤန့ၣ်တဒ်သိးလိၥ်သးဘၣ်.အခဲအံၤတၢ်စူၤခါအဆၢကတီၢ်အါတက့ၢ်ပှၤဘၣ်သဂၢၢ်ဘၣ်ဒီးတၢ်ညၣ်ဂိၢ်လိၤကိၤတၢ်ဆါန့ၣ်လီၤ.ဒီးပမ့ကွၢ်လၢပကီၢ်ရ့ၣ်ဒီတဘ့ၣ်ပတီၢ်န့ၣ်တနံၣ်အံၤပှၤလီၢ်အိၣ်ကဒုဖိတဖၣ်သဂၢၢ်ဘၣ်ဝဲတၢ်ညၣ်ဂိၢ်လိၤကိၢ်တၢ်ဆါအါထီၣ်ဝဲန့ၣ်လီၤ.မ့မ့ၢ်လၢကသံၣ်ကသီတဖၣ်တကပၤတခီန့ၣ်ဆူၣ်ချ့ပှၤဘၣ်မူဘၣ်ဒါတဖၣ်ဂုၥ်ကျဲးစၢးဝဲတသ့ဖဲအသ့ဘၣ်ဆၣ်တၢ်လၢတၢ်လီၣ်တအိၣ်ဝဲဒၣ်ဘၣ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ပှၤလီၢ်အိၣ်ကဒုဖိတဖၣ်အံၤခီဖျိဘၣ်ပၥ်တ့ၢ်လီၢ်ကျဲတၢ်အိၣ်တၢ်ဆိးလီၢ်ဒီးဃ့ၢ်အိၣ်ကဒုအသးယံၥ်ထီၣ်ဝဲအဃိ,တၢ်ကီတၢ်ခဲအိၣ်စ့ၢ်ကီးဝဲတၢ်အိၣ်ဆိးအီၣ်အီတကပၤအဂ့ၢ်,စံးစ့ၢ်ကီးဝဲဒၣ်န့ၣ်လီၤ. တကးဒံးဘၣ်,တၢ်ညၣ်ဂိၢ်လိၤကိၢ်တၢ်ဆါကဲထီၣ်အသးအံၤ,ကမျၢၢ်လီၢ်ကဝီၤဖိလၢတမ့ၢ်လီၢ်အိၣ်ကမှံတဖၣ်စ့ၢ်ကီးသဂၢၢ်ဘၣ်ဝဲအိၣ်ဝဲတနီၤအသိးဒီးခီဖျိကီၢ်ရ့ၣ်အပူၤကီၢ်ဆၣ်ကိးဘ့ၣ်ဒဲးဃၣ်ဃၣ်သဂၢၢ်ဘၣ်ဝဲအိၣ်ဝဲအဃိ,လီၢ်ခၢၣ်သးဆူၣ်ချ့ပှၤဘၣ်မူဘၣ်ဒါတဖၣ်အိၣ်ဝဲဒီးတၢ်ရဲၣ်တၢ်ကျဲၤလၢကမၤဝဲတၢ်မၤပတုၥ်ကွံၥ်တၢ်ညၣ်ဂိၢ်တၢ်ဆါတၢ်ဟ့ၣ်တၢ်သိၣ်လိတဖၣ်ဆူကမျၢၢ်အအိၣ်အိၣ်ဝဲအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. တကတီၢ်ဃီ,(၂၀၂၁)နံၣ်သုးဟံန့ၢ်ဆူၣ်တၢ်စိကမီၤအလီၢ်ခံတုၤလၢ(၂၀၂၄)လါယူၤအပူၤ,ခ့ၣ်အဲၣ်ယူၣ်တၢ်ပၢဟီၣ်ကဝီၤဒူပျၥ်ယၥ်ကီၢ်ရ့ၣ်အပူၤ,ကမျၢၢ်လီၢ်အိၣ်ကမှံဖိတဖၣ်အိၣ်ဝဲလၢ(၂၁၀၂၆၅)ဂၤအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,သုးကီၣ်ကးအံၤ,ခီဖျိပၥ်ပနီၣ်ဝဲကမျၢၢ်တဖၣ်ဒ်ဒုၣ်ဒါအသိးဒီးပညိၣ်ခးလီၤဝဲကျိဖိကျိဖးဒိၣ်ဆူကမျၢၢ်အိၣ်ဆိးတၢ်လီၢ်တၢ်ကျဲတကးဘၣ်ဒိးလီၤမ့ၢ်ပိၢ်လၢကမျၢၢ်ဒူသဝီခိၣ်ဃၢၤတဖၣ်အိၣ်ဝဲအဃိကမျၢၢ်လီၢ်ကဝီၤဖိတဖၣ်အံၤဘၣ်ဃ့ၢ်ပဒ့ၣ်ကွံၥ်အသးဒီးဘၣ်ကဲထီၣ်ဝဲပှၤလီၢ်အိၣ်ကမှံဖိအဂ့ၢ်,ပှၤမၤစၢၤကီၢ်ပူၤပှၤလီၢ်အိၣ်ကမှံဖိကမံတံၥ်(-)ပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
သုးကီၣ်ကးအပၢၤကီၢ်လၢတၢ်ဖီၣ်န့ၢ်၀ဲ(၃)ဂၤအံၤတၢ်အးလီၤက့ၤလၢၦၤဘၣ်မူဘၣ်ဒါစုပူၤအဂ့ၢ် (KRF)စံး၀ဲ
လါအီကူာ် ၁၅ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ပူၤ သုးကီၣ်ကးအပၢၤကီၢ်သုး(၃)ဂၤလၢတၢ်ဖီၣ်န့ၢ်၀ဲဖဲအပူၤကွံာ်လါ အခါတဖၣ် တကီၢ်ခါခဲအံၤတၢ်ဆှၢထီၣ်အးလီၤက့ၤလၢကရူၢ်ဘၣ်ထွဲၦၤဘၣ်မူဘၣ်ဒါစုပူၤလံအဂ့ၢ်န့ၣ် (Kyaikhto Revolution Force)ထုးထီၣ်ပာ်ဖျါ၀ဲဖဲတနံၤအံၤလါအီကူာ် ၁၅ သီအနံၤန့ၣ်လီၤႉ ကၠဲးထိၣ်ကီၢ်ဆၣ် ဖီဒ့ၣ်ညါထၣ်သ၀ီ ကဒဲးထံကျိပူၤ အပူၤကွံာ်လါယူၤလံ ၇ သီ ဟါခီ ၃ နၣ်ရံၣ်ဃၣ်ဃၣ်အဆၢ ကတီၢ် ဖဲ(KRF)ဟးဆှၣ်တၢ်အခါဖီၣ်ချုး၀ဲသုးကီၣ်ကးအပၢၤကီၢ်(၃)ဂၤဒီး တကီၢ်ခါခဲအံၤ ခီဖျိတၢ်သမံသမိးအ၀ဲသ့ၣ်၀ံၤလံအဃိ တၢ်ဆှၢထီၣ်အးလီၤက့ၤလၢၦၤဘၣ်မူဘၣ်ဒါစုပူၤလံအဂ့ၢ်န့ၣ် ကၠဲးထိၣ်တၢ်ပၢၢ်ဆၢကရူၢ်(KRF)လံာ်တၢ်ပာ်ဖျါအပူၤ စံး၀ဲန့ၣ် လီၤႉ ဒ်(KRF)လံာ်တၢ်ပာ်ဖျါပူၤပာ်ဖျါ၀ဲအသိးန့ၣ် သုးကီၣ်ကးအပၢၤကီၢ်သုးလၢတၢ်ဖီၣ်န့ၢ်၀ဲသ့ၣ်တဖၣ်န့ၣ်မ့ၢ်၀ဲ ၀့ထဲၣ်ႇ ကၠံၤသၤ(ကိး)ဖိအီႇကီထဲၣ်ကၠီၤ(ကိး)ကၠၤကၠီန့ၣ်လီၤႉဒီးအ၀ဲသ့ၣ်သၢဂၤအံၤအသးနံၣ်အိၣ်(၂၆)ခိၣ်ဃၢၤဒီး လီၤဘၣ်မူဒါအိၣ် ၀ဲဒၣ်ဖဲကၠဲးထိၣ်၀့ၢ်ပၢၤကီၢ်၀ဲၤလီၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ ဘၣ်ဃးတၢ်ဂ့ၢ်အံၤန့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“တၢ်ကဲထီၣ်သးတခါအံၤဒု အမ့ၢ်လီၤႉ ကဲထီၣ်လၢမဟါတလါအခါလံမီၤနီၤႉၦၤဖီၣ်အ၀ဲသ့ၣ်၀ံၤဘျီပနၢ်ဟူၦၤဆှၢထီၣ်လၢ(PDF)အခိၣ်အိၣ်လီၤႉ ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲတနံၤအံၤန့ၣ်လီၤႉ ဒ်န့ၣ်အသိးကၠဲးထိၣ်တၢ်ပၢၢ်ဆၢကရူၢ်(KRF)အံၤ ကဆဲးပၢၢ်ဆၢသုးမီၤစိရိၤသနူတုၤလၢအလီၤၦီၢ်တစုဒီး ကဟ့ၣ်လီၤသး ဒီသဒၢကမျၢၢ်ထံဖိကီၢ်ဖိအဟံၣ်အဃီတၢ်စုလီၢ်ခီၣ်ခိၣ်အဂ့ၢ်န့ၣ် လံာ်တၢ်ပာ်ဖျါအပူၤ စံး၀ဲန့ၣ်လီၤႉ (KRF)ကရူၢ်အံၤအိၣ်ဆီလီၤသးဟူးဂဲၤ၀ဲဒၣ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်ပူၤဒီး လၢတၢ်ထီဒါပၢၢ်ဆၢသုးမီၤစိရိၤတၢ်ဟူးတၢ်ဂဲၤအပူၤန့ၣ် ပာ်ဖှိၣ်မၤသကိးတၢ်ဒီး (KNLA),(PDF) ဃုာ်ဒီးသိၣ်မှံၤကရူၢ်လၢအဂၤသ့ၣ်တဖၣ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိပယီၤသုးကျိၤဟဲမၤအါထီၣ်သုးဂံၢ်ဘါအဃိဒူသဝီ(၃)ဖျၢၣ်အပူၤပှၤသဝီဖိဘၣ်ဃ့ၢ်ပဒ့ၣ်ထီၣ်သး
လါအီကူး ၁၃ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူၤလ့ၤတၢ်ပၢဘျံးဒဝဲၢ်ကီၢ်ရ့ၣ်တနီသရံၣ်ကီၢ်ဆၣ်ဟီၣ်ကဝီၤအပူၤစးထီၣ်ဖဲတလါအံၤလါအီကူးသၢနွံတနွံအဆၢ ကတီၢ်မ့ၢ်လၢပယီၤသုးကီၣ်ကးအသုးကျိၤဟဲမၤအါထီၣ်အသုးဂံၢ်ဘါဖဲ(တကဲး)ဟီၣ်ကဝီၤပယီၤသုးခီၣ်ချ့သုးရ့ၣ်(ခမရ-၅၆၁)အသုး ရ့ၣ်ပူၤအဃိဒူသဝီ(၃)ဖျၢၣ်အပူၤပှၤသဝီဖိဘၣ်ပျံၤဘၣ်ဖုးတၢ်ဒီးဘၣ်ဃ့ၢ်အိၣ်ကဒုသးအဂ့ၢ်တနီသရံၣ်အပှၤဘၣ်မူဘၣ်ဒါစံးဝဲန့ၣ်လီၤ. ပယီၤသုးကီၣ်ကးဟဲမၤအါထီၣ်အသုးကျိၤအံၤန့ၣ်မ့ၢ်ဒ်သိးကဟဲက့ၤထီၣ်ဒိၣ်စိန့ၢ်က့ၤဝဲအသုးကလၢၤတၢ်လီၢ်တၢ်ကျဲဒီးဒ်သိးလၢကဟဲထီၣ်ဆီတလဲက့ၤအသုးစ့ၢ်ကီးအဂ့ၢ်တနီသရံၣ်ကီၢ်ဆၣ်အပှၤကတိၤတၢ်ပၢပဒိၣ်စီၤထံဝါစံးဝဲဒ်အံၤန့ၣ်လီၤ. "အဝဲသ့ၣ်န့ၣ်တၢတမံၤန့ၣ်ဟဲထီၣ်ဝဲဒ်သိးအဝဲသ့ၣ်ကဟဲထီၣ်ဒိၣ်စိဝဲဟီၣ်ကဝီၤမီၤနီၤ. ဒီးခံခါတခါခီန့ၣ်အဝဲသ့ၣ်ကဘၣ်ဆီတလဲအ သုးတခါ. သုးကျိၤခံကျိၤလၢအဟဲထီၣ်ဝဲန့ၣ်ကဘၣ်ဆီတလဲဝဲသုးဒီး(သ့ဒီ)သုးကလၢၤမီၤနီၤ. လၢတၢ်န့ၣ်အဃိန့ၣ်အဝဲသ့ၣ်တစး ထီၣ်အခီၣ်ခါဒံးဘၣ်. ဖဲအဝဲသ့ၣ်ဟးထီၣ်တၢ်ချၢန့ၣ်ဘၣ်သဂၢၢ်လိၥ်သးဒီးပပှၤအဃိတၢ်ခးလိၥ်သးကဲထီၣ်ဝဲလီၤ. အဃိန့ၣ်အဝဲသ့ၣ် အိၣ်အိၣ်ဂၢၢ်ပၥ်စၢၤဝဲဖဲ(ခမရ-၅၆၁)အသုးရ့ၣ်ပူၤလီၤ" အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပူၤကွံၥ်လါအီကူး(၇)သီအနံၤန့ၣ်(တကဲး-ပျီသီ)သဝီမၤဝဲတၢ်လိၥ်ခိၣ်လိၥ်ကွဲတၢ်ရဲၣ်တၢ်ကျဲၤအဆၢကတီၢ်သုးကီၣ်ကးကဘီယူၤဟဲ တ့ၢ်လီၤမ့ၣ်ပိၢ်ဖဲန့ၣ်ဝံၤအလီၢ်ခံ,ဆှၢအါထီၣ်ဝဲအသုးဂံၢ်ဘါအဃိဒူသဝီ(၃)ဖျၢၣ်ဒ်အမ့ၢ်ဝဲတကဲးဆွဲၣ်ပျီ, တကဲးလၥ်ခီ, ပျီသီသဝီသ့ၣ်တ ဖၣ်ကမျၢၢ်(၉၅)မျးကယၤဘၣ်ဃ့ၢ်ပဒ့ၣ်အသးဆူတၢ်လီၢ်တဒၢထံခံကွၢ်ခံ,တၢ်လီၢ်လၢအဝဲသ့ၣ်အိၣ်တဒၢသ့ဝဲအလီၢ်အဂ့ၢ်ကီၢ်ဆၣ်လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. ဒ်န့ၣ်အသိးခီဖျိလၢပယီၤသုးဟဲမၤအါထီၣ်အသုးဂံၢ်ဘါဒ်သိးအံၤအဃိကမျၢၢ်လၢအိၣ်ဟီၣ်ကဝီၤဖဲန့ၣ်သ့ၣ်တဖၣ်အါဒၣ်တၢ်တက့ၢ်ပှၤဘၣ်ဃ့ၢ်ပဒ့ၣ်အသးဒ်အမ့ၢ်ပှၤသးပှၢ်, ဖိဒံဖိသၣ်ဒီးပှၤပိၥ်မုၣ်ပိၥ်မၢၤသ့ၣ်တဖၣ်န့ၣ်လီၤ. မ့မ့ၢ်ပှၤလၢအိၣ်တ့ၢ်ဒူသဝီပူၤသ့ၣ်တဖၣ် ခီန့ၣ်မ့ၢ်ဝဲပှၤပိၥ်ခွါလၢအရ့ဒိၣ်သ့ၣ်တဖၣ်လီၤအဂ့ၢ်ပဒိၣ်စီၤထံဝါစံးအါထီၣ်ဝဲဒၣ်န့ၣ်လီၤ. တကတီၢ်ဃီမ့ၢ်လၢဘၣ်ဃ့ၢ်ပဒ့ၣ်အိၣ်ကဒုအသးဆူထံခံကွၥ်ခံတၢ်လီၢ်တၢ်ကျဲၤဒ်အသိးအံၤအဃိဘၣ်ကွၢ်ဆၢၣ်မဲၥ်ဘၣ်ဝဲဒီးတၢ်အခိၣ်ဒုးတလၢတပှဲၤ, ကသံၣ်ကသီတၢ်ဂ့ၢ်ကီဒီးတၢ်အီၣ်တၢ်အီတၢ်လိၣ်ဘၣ်အိၣ်ဝဲအဖီခိၣ်လီၢ်ကဝီၤပှၤဘၣ်မူဘၣ်ဒါတကပၤဂုၥ်ကျဲးစၢး ရဲၣ်ကျဲၤဆီၣ်ထွဲမၤစၢၤဝဲအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ. စးထီၣ်လၢသုးမီၤစိရိၣ်ဟံးန့ၢ်ဆူၣ်ကွံၥ်ထံကီၢ်တၢ်စိတၢ်ကမီၤဝံၤအလီၢ်ခံဘျံးဒဝဲၢ်ကီၢ်ရ့ၣ်အပူၤကမျၢၢ်ပှၤဃ့ၢ်မှံဟးဖျိးအနီၣ်ဂံၢ်ခဲလၢၥ်အိၣ်ဝဲ(၁၁၂,၂၄၉)ဂၤဒီးအကျါ(၁၉)မျးကယၤန့ၣ်မ့ၢ်ဝဲတနီသရံၣ်ကီၢ်ဆၣ်ပှၤလီၢ်အိၣ်ကမှံဖိသ့ၣ်တဖၣ်အဂ့ၢ်ဘျံးဒဝဲၢ်ကီၢ်ရ့ၣ်တၢ်ပၥ်ဖျါပူၤအသိးသ့ၣ်ညါဘန့ၣ်လီၤ.
ပှၤကလုၥ်ဒီးမၤထူရၤအတၢ်မိၣ်န့ၣ်သးလီကလၢထီၣ်ပှဲၤထီၣ်အဂီၢ်,ကဘၣ်အိၣ်ဒီးတၢ်ဃူတၢ်ဖိးအဂ့ၢ်,ခ့ၣ်အဲၣ်ယူၣ်ကရၢခိၣ်ဆီၣ်တခူစံးဝဲ
လါအီကူး ၁၃သီ, ၂၀၂၄နံၣ်, ခ့ၣ်အဲးစံၣ်, ကမၤလၢပှဲၤပှၤကလုၥ်တၢ်မိၣ်န့ၣ်သးလီဒီးမၤထူရၤအတၢ်မိၣ်န့ၣ်သးလီအဂီၢ်,ကဘၣ်အိၣ်ဒီးတၢ်ဃူတၢ်ဖိးအဂ့ၢ်,ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,အကရၢခိၣ်ဆီၣ်တခူစံးတ့ၢ်ဝဲဖဲမဟါလါအီကူး(၁၂)သီအနံၤလၢအလီၤဘၣ်ဝဲ(၇၄)ဝီတဝီကညီမၤထူရၤအမုၢ်နံၤန့ၣ်လီၤ. ကညီတၢ်ပၢၢ်ဆၢတၢ်ဂဲၤလိၥ်တၢ်ဖံးတၢ်မၤအပူၤ,ပပှၤကလုၥ်ကညီဖိတဖၣ်အတၢ်ဟ့ၣ်လီၤသးအိၣ်ဝဲလံဘၣ်ဆၣ်ခီဖျိတၢ်ဃူတၢ်ဖိးတၢ်စှၤဒံးဝဲအဃိဒ်သိးပတၢ်မိၣ်န့ၣ်သးလီကတုၤထီၣ်,ထီၣ်ဘးအဂီၢ်,တၢ်ပၥ်ဖှိၣ်မၤသကိးတၢ်လၢတၢ်ဃူတၢ်ဖိးအပူၤအံၤအကါဒိၣ်ဝဲလၢပကဘၣ်ပၥ်သူၣ်ပၥ်သးလၢတၢ်ဖံးတၢ်မၤဆူညါအပူၤအဂ့ၢ်,ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢအကရၢခိၣ်(ပဒိၣ်စီၤကွဲၤထူဝ့)ဆီၣ်တခူစံးတ့ၢ်ဝဲလၢတၢ်ရဲၣ်တၢ်ကျဲၤအပူၤဒ်အံၤန့ၣ်လီၤ. အဝဲစံးဝဲလၢ“တၢ်ပၢၢ်ဆၢ(၇၅)နံၣ်အတီၢ်ပူၤအံၤ,ပပှၤကလုၥ်တဖၣ်ဂဲၤလိၥ်ဝဲဒၣ်,မၤလၢပှဲၤဝဲဒၣ်မူဒါလံသနါက့ပပှၤကလုၥ်အတၢ်ဂဲၤလိၥ်အံၤလၢတၢ်မၤသကိးတၢ်တကပၤန့ၣ်အမျးကယၤစှၤဝဲအသိးန့ၣ်ပှၤလၢအမၤသကိးတၢ်တဖၣ်စ့ၢ်ကီးအတၢ်ဃူတၢ်ဖိးမ့အိၣ်ထဲလဲၣ်,(၇၅)နံၣ်အတီၢ်ပူၤတၢ်မၤသကိးတၢ်အမျးကယၤစှၤဒိၣ်မး,တၢ်မၤသကိးအပူၤန့ၣ်လၢပှၤကလုၥ်အဂီၢ်န့ၣ်တဂၤလၢလီၢ်သနၢၣ်န့ၣ်အိၣ်ဝဲလံဘၣ်ဆၣ်တၢ်ပၥ်ဖှိၣ်မၤသကိးတၢ်တၢ်ဃူတၢ်ဖိးတအိၣ်လၢလၢပှဲၤပှဲၤဘၣ်.အဃိန့ၣ်တၢ်မၤသကိးတၢ်လၢပပှၤကလုၥ်အဂီၢ်လၢကိးသနၢၣ်စုၥ်စုၥ်န့ၣ်ကဘၣ်အိၣ်ဝဲဒၣ်ဒီးတၢ်ဃူတၢ်ဖိး,တၢ်ဃူတၢ်ဖိးန့ၣ်မ့ၢ်ဝဲဒၣ်တၢ်အုၣ်ကီၤသးလၢပပှၤကလုၥ်တၢ်မၤနၢၤ,တၢ်ဃူတၢ်ဖိးလၢလီၢ်သနၢၣ်စုၥ်စုၥ်န့ၣ်ကမ့ၢ်ဝဲဒၣ်တၢ်မၤလၢပှဲၤပပှၤကလုၥ်တၢ်မိၣ်န့ၣ်သးလီဒီးမၤထူရၤပှၤလၢဟ့ၣ်လီၤတ့ၢ်အသးတဖၣ်အတၢ်မိၣ်န့ၣ်သးလီန့ၣ်လီၤ.လၢတၢ်န့ၣ်အဃိအအံၤမ့ၢ်တၢ်အကါဒိၣ်လၢပကဘၣ်ပၥ်သူၣ်ပၥ်သးလၢပတၢ်ဖံးတၢ်မၤလၢခါဆူညါအပူၤန့ၣ်လီၤ”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,တၢ်မၤလၤကပီၤဝဲမၤထူရၤပှၤလၢဟ့ၣ်လီၤတ့ၢ်သးလၢထံကီၢ်ဒီးပှၤကလုၥ်အဂီၢ်သ့ၣ်တဖၣ်အံၤတဘၣ်မ့ၢ်ဝဲထဲတၢ်ပၥ်ဖှိၣ်ထီၣ်သးမၤသ့ၣ်နီၣ်ထီၣ်က့ၤအဝဲသ့ၣ်တဖၣ်ကလီကလီဘၣ်ဒီးမ့မ့ၢ်တခီကဘၣ်မ့ၢ်ဝဲတၢ်မၤလၤကပီၤလၢသူၣ်ကံၢ်သးလဲနီၢ်နီၢ်လၢတၢ်ပၥ်ကဲဝဲခိၣ်နၢ်တဖၣ်အတၢ်မုၢ်လၢ်ဒီးမၤထွဲဝဲခိၣ်နၢ်တဖၣ်အတၢ်ကတိၤအဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. တကးဒံးဘၣ်,ဒ်သိးပပှၤကလုၥ်အတၢ်အိၣ်မူကလဲၤထီၣ်လဲၤထီ,လၢပှဲၤဒီးပှၤတကလုၥ်အက့ၢ်အဂီၤအဂီၢ်န့ၣ်ကျဲအိၣ်ဝဲဒၣ်ထဲတဘိလၢပဝဲကိးဂၤပကဘၣ်အိၣ်ဒီးတၢ်ဃူတၢ်ဖိးလီၤအဂ့ၢ်,ခ့ၣ်အဲၣ်ယူၣ်ကရၢခိၣ်ဆီၣ်တခူစံးစ့ၢ်ကီးဝဲန့ၣ်လီၤ. တကတီၢ်ဃီ,ပပှၤကလုၥ်ကဒိးန့ၢ်က့ၤပထံပကီၢ်အဂီၢ်,လိၣ်က့ၤထဲပတၢ်ဂုၥ်ကျဲးစၢးဒီးတၢ်ထိၣ်ဃူထိၣ်ဖိးလိၥ်က့ၤသးလီၤအဂ့ၢ်,(KNLA)သုးရိၢ်မဲခိၣ်ကျၢၢ်သုးခိၣ်ကျၢၢ်ဒိၣ်စိစီၤကၠီၤနံၣ်ဆီၣ်တခူစံးတ့ၢ်စ့ၢ်ကီးဝဲလၢတၢ်ရဲၣ်တၢ်ကျဲၤအပူၤဒ်အံၤန့ၣ်လီၤ. အဝဲစံးဝဲလၢ“ပှၤလၢအသံတ့ၢ်တဖၣ်ဒုမၤဝဲအမူအဒါဝံၤလံ,ဘၣ်ဆၣ်ခီဖျိအတၢ်မုၢ်လၢ်တလၢထီၣ်ပှဲၤထီၣ်ဝဲဒံးဘၣ်အဃိပဝဲလၢအိၣ်တ့ၢ်လၢလီၢ်ခံတဖၣ်ပကဂုၥ်ကျဲးစၢးလၢပပှၤကလုၥ်တဖၣ်အတၢ်မိၣ်န့ၢ်သးလီတၢ်ထဲသိးတုၤသိးတုၤလၢအန့ၢ်န့ၣ်လီၤ.ဒ်သိးပပှၤကညီကအိၣ်ဒီးအဟီၣ်ခိၣ်ကပံးအတၢ်လီၢ်တၢ်ကျဲလၢတၢ်ပၥ်ပနီၣ်အီၤအဂီၢ်ပမ့အိၣ်ဒီးတၢ်ဃူတၢ်ဖိးန့ၣ်ပကဒိးန့ၢ်ဘၣ်တၢ်သဘျ့ခွဲးယၥ်န့ၣ်လီၤ.အဃိန့ၣ်လိၣ်က့ၤထဲပတၢ်ဂုၥ်ကျဲးစၢးဒီးတၢ်ဃူတၢ်ဖိးလီၤ”အဂ့ၢ်စံးဝဲဒၣ်န့ၣ်လီၤ. ဒ်န့ၣ်အသိး,ဒ်သိးပပှၤကလုၥ်ကဒိးန့ၢ်ဘၣ်က့ၤနီၢ်ကစၢ်တၢ်စံၣ်ညီၣ်ပၢလီၤဘၣ်သးအဂီၢ်ဒီးကတုၤထီၣ်ဆူတၢ်မၤနၢၤဖီတၢၣ်တၢ်မိၣ်န့ၢ်သးလီချ့ချ့အဂီၢ်,ပကဘၣ်အိၣ်ဃူအိၣ်ဖိးဒီးဆၢထၢၣ်ထီဒါက့ၤသုးမီၤစိရိၤအဂ့ၢ်,ခ့ၣ်အဲၣ်ယူၣ်ခိၣ်နၢ်တဖၣ်ဆီၣ်တခူစံးဝဲဒၣ်န့ၣ်လီၤ.
တၢ်စူၤထံဒိၣ်ထီၣ်အဃိ ဒူသထူၣ်ကီၢ်ရ့ၣ် ကီၢ်ဆၣ်ခံဘ့ၣ်ပူၤ ဘုဟးဂီၤအ့ကၢၣ်(၄၀၀၀)ဃၣ်ဃၣ်ဒီးကမျၢၢ်သံ(၃)ဂၤ
လါအီကူာ် ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ အပူၤကွံာ်လါအခါခီဖျိတၢ်စူၤထံဒိၣ် ထီၣ်အဃိ မီၤစကိၤကီၢ်ဆၣ်ဒီးဖၣ်အၣ်ကီၢ်ဆၣ် ကီၢ်ဆၣ်(၂)ဘ့ၣ်ပူၤ ဘုသံဘုဟးဂီၤ၀ဲဒၣ်အအ့ကၢၣ်(၄၀၀၀)ဃၣ်ဃၣ် ဒီး ကမျၢၢ်လီၤအုးသံ၀ဲဒၣ်(၃)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤႉ ဒူသထူၣ်ကီၢ်ရ့ၣ်ပူၤ စးထီၣ်ဖဲအပူၤကွံာ်လါယူၤလံ ၂၄ သီန့ၣ် ခီဖျိတၢ်စူၤတပယူာ်ဃီဒီးထံဒိၣ်ထီၣ်လၢဒူပူၤသ၀ီပူၤ တကးဒံးဘၣ်ဘုသ့ၣ်တဖၣ်ထံလုၢ်ဘၢအီၤအါအါဂီၢ်ဂီၢ်အဃိ ကီၢ်ဆၣ်(၂)ဘ့ၣ်အံၤအပူၤ ဘုသံဘုဟးဂီၤ၀ဲဒၣ်ခဲလၢာ် (၃၈၉၄)အ့ကၢၣ်ဒီးလီၢ်က၀ီၤကမျၢၢ်ပိာ်ခွါလီၤအုးသံ၀ဲဒၣ်လၢထံ(၃)ဂၤ အဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ ခီဖျိတၢ်စူၤထံဒိၣ်ထီၣ်အဃိ လီၢ်က၀ီၤကမျၢၢ်လၢအလီၤအုးသံ(၃)ဂၤန့ၣ်မ့ၢ်၀ဲမီၤစကိၤကီၢ်ဆၣ်ပူၤ မီၤပီၣ်ကၠဲ(၃၈)နံၣ် သံဖဲလါအီကူာ် (၂၆)သီႇ အူအ့၀့စီၣ်(၅၀)နံၣ် သံဖဲလါယူၤလံ ၂၉ သီ ဒီး စီၤကဲၢ်ငဲ(၂၄)နံၣ် သံဖဲလါယူၤလံ(၂၉)သီ အဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါဒ်ကီၢ်ရ့ၣ်တၢ်မၤနီၣ်စရီပူၤပာ်ဖျါ၀ဲအသိးန့ၣ် မီၤစကိၤကီၢ်ဆၣ်ပူၤ ဘုသံဘုဟးဂီၤ၀ဲဒၣ်ခဲလၢာ် (၁၁၂၁)အ့ကၢၣ်ႇ ဘုချံဟးဂီၤ၀ဲဒၣ်(၆၄၆)နာ်ဒီး မ့မ့ၢ်လၢဖၣ်အၣ်ကီၢ်ဆၣ်ပူၤန့ၣ်ဘုသံဘုဟးဂီၤ၀ဲဒၣ်ခဲလၢာ်(၂၇၇၃) အ့ကၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒူသ၀ီကရူၢ်လၢဘုသံဘုဟးဂီၤကဲထီၣ်သ့ၣ်တဖၣ်န့ၣ်မ့ၢ်၀ဲ မီၤစကိၤကီၢ်ဆၣ်ပူၤလၢအမ့ၢ် ကနုာ်ကရူၢ်,ကီးရ့ၣ်ကရူၢ်ႇ ပါကိကရူၢ်ပူၤဒူသ၀ီသ့ၣ်တဖၣ်ဒီးဒ်န့ၣ်အသိးမ့မ့ၢ်လၢဖၣ်အၣ်ကီၢ်ဆၣ်န့ၣ် ဘူၣ်ပြၢးကရူၢ်ႇဟးတရဲာ်ကရူၢ်ႇ အံဟဲကရူၢ်, နိၣ်မကွံၢ်ကရူၢ်ႇ၀ဲပၠၣ်ကရူၢ်ႇတကီၤဘိကရူၢ်ႇမဲၢ်ကနးကရူၢ်ႇနီဖးဒိၣ်ကရူၢ်သ့ၣ်တဖၣ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ...
ကၠိဖိကသ့တီခိၣ်ရိၣ်မဲတၢ်ဒီးကသ့ပၥ်ဒိၣ်မၤလၤကပီၤခိၣ်နၢ်ဒိၣ်ထီအဂီၢ်ခီကီၢ်ဆၣ်သူလ့ၤကၠိအပှၤနဲၣ်တၢ်သရၣ်မုၣ်ဖီရ့ၣ်ဆီၣ်တခူထီၣ်
လါအီကူး ၁၂ သီ, ၂၀၂၄ နံၣ်, ခ့ၣ်အဲးစံၣ် တနံၤအံၤလါအီကူး(၁၂)သီလၢအလီၤဘၣ်ဝဲကညီဒီတကလုၥ်မၤထူရၤမုၢ်နံၤအသိးတလါအံၤမ့ၢ်စ့ၢ်ကီးဝဲကညီလါခူးကံၢ်စုလါအဃိခီကီၢ်ဆၣ်သူလ့ၤကၠိအိၣ်ဒီးတၢ်မၤလၤကပီၤဝဲတၢ်ရဲၣ်တၢ်ကျဲၤမူးသ့ၣ်တဖၣ်အံၤမ့ၢ်ဒ်သိးကၠိဖိသ့ၣ်တဖၣ်ကသ့တီခိၣ်ရိၣ်မဲတၢ်ဒီးကသ့ပၥ်ဒိၣ်မၤလၤကပီၤက့ၤဝဲခိၣ်နၢ်ဒိၣ်ထီအဂီၢ်ဆၣ်သူလ့ၤကၠိအပှၤနဲၣ်တၢ်သရၣ်မုၣ်ဖီရ့ၣ်စံးဝဲဒီးဆီၣ်တခူထီၣ်ဝဲဒၣ်ဖဲတနံၤန့ၣ်လီၤ. ခီကီၢ်ဆၣ်သူလ့ၤကၠိအံၤမၤလၤကပီၤဝဲကညီမၤထူရၤမုၢ်နံၤ, ကညီလါခူးကံၢ်စုဃုၥ်ဒီးကီၢ်ကၠီၣ်တဲၣ်နီၢ်ပၤမုၣ်မိၢ်မုၢ်နံၤတၢ်ရဲၣ်တၢ် ကျဲၤမူးအံၤကိးနံၣ်ဒဲးအသိးလီၤလီၤဆီဆီတၢ်တနံၣ်ညါအံၤန့ၣ်ကၠိဖိသ့ၣ်တဖၣ်အနီၢ်ကစၢ်ဒၣ်ဝဲတီခိၣ်ရိၣ်မဲဝဲဒီးမ့ၢ်ဒ်သိးအဝဲသ့ၣ်တဖၣ်ခါဆူညါကကဲထီၣ်ဝဲခိၣ်နၢ်လၢအတီခိၣ်ရိၣ်မဲတၢ်သ့ဒီးကသ့ၣ်ညါက့ၤခိၣ်နၢ်လုၢ်ဒိၣ်ပှ့ၤဒိၣ်သ့ၣ်တဖၣ်အမဲၥ်ညါကဟ့ၣ်ခီဟ့ၣ်နီၤဘၣ်က့ၤဝဲဆူစိၤလၢခံတစိၤကသ့အဂီၢ်အဂ့ၢ်ဆၣ်သူလ့ၤအပှၤနဲၣ်တၢ်သရၣ်မုၣ်ဖီရ့ၣ်စံးဝဲဒၣ်ဒ်အံၤန့ၣ်လီၤ. "ဆၣ်သူလ့ၤမ့ၢ်ပှၤကညီအဆၣ်လၢအဟ့ၣ်ထီၣ်တၢ်ကပီၤအသိးန့ၣ်ပမၤဝဲဒၣ်မူးအဝဲအံၤကိးမုၢ်နံၣ်ဒဲးလီၤ. ဒီးတနံၣ်ညါအံၤလီၤ လီၤဆီဆီန့ၣ်ပမၢဝဲဒၣ်ပှၤကၠိဖိအဒိၣ်သ့ၣ်တဖၣ်တီခိၣ်ရိၣ်မဲဒ်သိးကကဲထီၣ်ဝဲဒၣ်ခိၣ်နၢ်လၢအတီခိၣ်ရိၣ်မဲတၢ်သ့အဂီၢ်. လၢပ တၢ်မၤမူးတဘျီညါအံၤန့ၣ်ပမၤဝဲဒၣ်မူး(၃)မူးလၢအမ့ၢ်ဝဲဒၣ်ကီၢ်ကၠီၣ်တဲၣ်နီၢ်ပၤမုၣ်အိၣ်ဖျဲၣ်မုၢ်နံၤအသိးမ့ၢ်စ့ၢ်ကီးဝဲဒၣ်ပဝဲပှၤကညီ ဒီကလုၥ်ပခိၣ်ပနၢ်ပသုးမုၢ်သံၣ်ဘိလုၢ်ဒိၣ်ပှ့ၤဒိၣ်သ့ၣ်တဖၣ်လၢဟ့ၣ်လီၤသးသမူမီၤနီၤ. ဒီးမ့ၢ်တၢ်လၢပဒုးသ့ၣ်နီၣ်ထီၣ်က့ၤပဖိ ပလံၤသူၣ်ဘီၣ်သးစၢ်သ့ၣ်တဖၣ်လၢကသ့ၣ်ညါက့ၤပခိၣ်ပနၢ်လုၢ်ဒိၣ်ပှ့ၤဒိၣ်ဒီးပစိၤမ့ၢ်လၢၤန့ၣ်အဝဲသ့ၣ်အစိၤလီၤ. အဝဲသ့ၣ်က ဟ့ၣ်ခီဟ့ၣ်နီၤကဒါက့ၤဝဲဆူပှၤလၢခံတစိၤကသ့အဂီၢ်" အဂ့ၢ်န့ၣ်စံးဘၣ်ခ့ၣ်အဲးစ့ၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါခီကီၢ်ဆၣ်သူလ့ၤကၠိပၥ်ဖှိၣ်တၢ်မၤလၤကပီၤဝဲကညီမၤထူရၤမုၢ်နံၤ, ကညီလါခူးကံၢ်စုလါဃုၥ်ဒီးကီၢ်ကၠီၣ်တဲၣ် မိၢ်မုၢ်နံၤမူးဘျီဝဲအံၤအပူၤန့ၣ်ကၠိဖိ, ကၠိဖိမိၢ်ပၢ်, ပှၤတဝၢခိၣ်နၢ်, ကူၣ်သ့တၢ်ကရၢကရိခိၣ်နၢ်လၢမၤသကိးဃုၥ်တၢ် ဒီးဆူၣ်ချ့တၢ် ကရၢကရိခိၣ်နၢ်သ့ၣ်တဖၣ်ပှၤဟဲထီၣ်ဝဲခဲလၢၥ်(၁၀၀၀)ဂၤဃၣ်ဃၣ်အဂ့ၢ်သ့ၣ်ညါဘၣ်န့ၣ်လီၤ. ခီကီၢ်ဆၣ်သူလ့ၤကၠိဖိသးစၢ်(စီၤအ့ခၠၢ)လၢအပၥ်ဃုၥ်ပၥ်ဂီၢ်လၢတၢ်တီခိၣ်ရိၣ်မဲမၤလၤကပီၤမူးဘျီဝဲအံၤတဂၤတဲဖျါထီၣ်ဝဲအတၢ်တူၢ်ဘၣ်အိၣ်ဝဲလၢ "ပကၠိအံၤန့ၣ်ပမၤလၤကပီၤဝဲဒၣ်ကိးနံၣ်ဒဲးလီၤ. ဒ်ပမ့ၢ်ပှၤကညီအသိးန့ၣ်ပခိၣ်ပနၢ်လၢအလုၢ်ထီၣ်တ့ၢ်အသး သမူသ့ၣ်တဖၣ်ပဘၣ်မၤလၤကပီၤအီၤမးမးလီၤ. အဃိန့ၣ်ပကၠိမၤလၤကပီၤဝဲကိးနံၣ်ဒဲးလီၤမီၤနီၤ. တနံၣ်ညါအံၤအလီၤဆီတ စဲးမီၤနီၤ. ပထံၣ်ဘၣ်ပှၤကၠိဖိလီၢ်လံၤ, သရၣ်သရၣ်မုၣ်သ့တဖၣ်, ပှၤတမှံၤလၢထံဂုၤကီၢ်ဂၤသ့ၣ်တဖၣ်ဟဲဟးဝဲအဃိန့ၣ်ပသး ခုဒိၣ်မးလီၤ." အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တၢ်မၤဝဲမူးဘျီဝဲအံၤအပူၤန့ၣ်တၢ်အိးထီၣ်တၢ်ရဲၣ်တၢ်ကျဲၤလၢကညီ(ဒိ)တၢ်ဂဲၤကလံၣ်ဒီးဝံၤအလီၢ်ခံတၢ်ဟ့ၣ်တၢ်ယူၥ်ယီၣ်ဆူကညီမၤထူရၤလၢအလုၢ်ထီၣ်တ့ၢ်အသးမူဃုၥ်ဒီးတၢ်တဲဖျါထီၣ်ကညီမၤထူရၤဟဲကဲထီၣ်သးအဂ့ၢ်, တၢ်မၤလၤကပီၤမိၢ်သ့တဖၣ် ဒီးတၢ်တဲဖျါထီၣ်ကညီလါခူးကံၢ်စုအဂ့ၢ်အကျိၤဒီးတၢ်ဟ့ၣ်လီၤက့ၤခိၣ်ဖးလၢကၠိဖိလၢအနုၥ်လီၤပြၢတၢ်သ့ၣ်တဖၣ်အအိၣ်အဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးခီကီၢ်ဆၣ်သူလ့ၤကၠိအံၤမၤလၤကပီၤဝဲကညီမၤထူရၤမုၢ်နံၤဒီးကညီလါခူးကံၢ်စုဃုၥ်ဒီးကီၢ်ကၠီၣ်တဲၣ်နီၢ်ပၤမုၣ်မိၢ်မုၢ်နံၤတၢ်ရဲၣ်တၢ်ကျဲၤအမူးအံၤန့ၣ်အိၣ်လံဝဲဒၣ်(၁၆)ဝီတဝီလံအဂ့ၢ်သ့ၣ်ညါဘၣ်န့ၣ်လီၤ.
(ကွဲၢ်ကဘီခီကီၢ်ကၠိမၤလၤကပီၤဝဲ(၇၄)ဝီတဝီကညီမၤထူရၤမုၢ်နံၤဒီး(၁၆)ဝီတဝီလါခူးကံၢ်စူမုၢ်နံၤ) အဂ့ၢ်န့ၣ်လီၤ.
လါအီကူး ၁၂သီ, ၂၀၂၄နံၣ်, ခ့ၣ်အဲးစံၣ်, တလါအံၤဒ်အလီၤဘၣ်ဝဲ(၁၆)ဝီတဝီကညီလါခူးကံၢ်စုမုၢ်နံၤဒီး(၇၄)ဝီတဝီကညီမၤထူရၤမုၢ်နံၤအသိးန့ၣ်,ကွဲၢ်ကဘီကညီခီကီၢ်တီၤထီကၠိဝဲတၢ်မၤလၤကပီၤမုၢ်နံၤဒိၣ်ထီၣ်တဖၣ်အံၤဖဲတနံၤအံၤလါအီးကူး(၁၂)သီအနံၤအပူၤ,လၢကီၢ်ကၠီၣ်တဲၣ်ကီၢ်ဆၢ,မဲၢ်ဆီးဝ့ၢ်ကွဲၢ်ကဘီကၠိကရၢၢ်အပူၤန့ၣ်လီၤ. ဖဲတၢ်မၤလၤကပီၤဝဲ(၇၄)ဝီတဝီကညီမၤထူရၤမုၢ်နံၤဒီး(၁၆)ဝီတဝီလါခူးကံၢ်စုမုၢ်နံၤအပူၤ,မ်ပှၤကိးဂၤကအိၣ်ဒီးတၢ်ဂုၥ်ကျဲးစၢးဒီးတၢ်ပၥ်သူၣ်ပၥ်သးလၢအလဲၢ်,လၢတၢ်ဟံးထီၣ်ဖီၣ်ထီၣ်က့ၤပှၤကလုၥ်တၢ်ဖံးတၢ်မၤလၢခံတစိၤအဂီၢ်အဂ့ၢ်,ပှၤတီခိၣ်ရိၢ်မဲဒုးအိၣ်ထီၣ်တၢ်ရဲၣ်တၢ်ကျဲၤကမံးတံၥ်ပှၤဘၣ်မူဘၣ်ဒါ,ကီၢ်မူရၤကညီသးစၢ်ကရၢ(ခ့ၣ်ဝၣ်အိၤ)ကရၢခိၣ်စီၤမၠးပတဲၣ်ဆီၣ်တခူစံးတ့ၢ်ဝဲလၢတၢ်အိးထီၣ်မူးတၢ်ရဲၣ်တၢ်ကျဲၤအပူၤဒ်အံၤန့ၣ်လီၤ. အဝဲစံးဝဲလၢ“တနံၤအံၤဒ်အမ့ၢ်ဝဲပကီၢ်ခိၣ်စီၤဘးအူကၠံဟ့ၣ်လီၤကွံၥ်အသးမုၢ်နံၤအသိးန့ၣ်,တလါအံၤမ့ၢ်စ့ၢ်ကီးဝဲလါခူးကံၢ်စုအလါအဃိတနံၤအံၤတၢ်မၤလၤကပီၤဝဲမုၢ်နံၤဝဲအံၤမ့ၢ်တၢ်ဘျူးတၢ်ဖှိၣ်ဒိၣ်မးန့ၣ်လီၤ.ဒ်ပတၢ်ရဲၣ်တၢ်ကျဲၤကကဲထီၣ်လိၣ်ထီၣ်ပတၢ်ဃူတၢ်ဖိးကအိၣ်ဖျါထီၣ်ဒ်အံၤအဂီၢ်န့ၣ်တၢ်ကီတၢ်ခဲအိၣ်အါမးန့ၣ်လီၤ.ဘၣ်ဆၣ်သနၥ်က့တၢ်ကီတၢ်ခဲမ့ၢ်အိၣ်ဒီးပှၤထဲလဲၣ်ထဲလဲၣ်ဘၣ်ဆၣ်ပကဘၣ်ဂုၥ်ကျဲးစၢး,အဃိန့ၣ်ဖဲတၢ်ပၥ်ဖှိၣ်ထီၣ်သးဘျီဝဲအံၤန့ၣ်အဲၣ်ဒိးဟ့ၣ်ဒုးသ့ၣ်ညါခိၣ်နၢ်သူၣ်ခ့သးပှၢ်ဒီးဖိဒံဖိသၣ်သ့ၣ်တဖၣ်လၢ,လီၢ်ခံန့ၣ်သုကဘၣ်ဟံထီၣ်ဖီၣ်ထီၣ်က့ၤမူဒါအဃိသုကဘၣ်အိၣ်ဒီးတၢ်ပၥ်သူၣ်ပၥ်သးလၢအလဲၢ်န့ၣ်လီၤ.ပကလုၥ်တဖုကဒိးန့ၢ်တၢ်သဘျ့တၢ်မုၥ်တၢ်ခုၣ်,တၢ်ထဲသိးတုၤသိးအဂီၢ်,ထဲပဃ့ထီၣ်တၢ်တခါတမ့ၢ်ပှၤကဟ့ၣ်ပှၤနီတဂၤဘၣ်.အိၣ်ဒၣ်ပနီၢ်ကစၢ်ပကဘၣ်ဂုၥ်ကျဲးစၢးလီၤ.အဃိန့ၣ်တနံၤအံၤအဲၣ်ဒိးမၣ်လိၥ်ပှၤကိးဂၤလၢမ်ကအိၣ်ဒီးတၢ်ဂုၢ်ကျဲးစၢးလၢကလုၥ်ဂီၢ်ကိးဂၤဒဲးအဂ့ၢ်,”စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ကညီလါခူးကံၢ်စုမုၢ်နံၤအံၤ,မ့ၢ်ဝဲကညီဒီတကလုၥ်အဂီၢ်အတၢ်မၤနီၣ်မၤဃါမုၢ်နံၤဒိၣ်ထီတနံၤအဃိသူၣ်စၢ်သးဘီၣ်တဖၣ်ကြၢးကွၢ်လိကွၢ်ဒိမၤနီၣ်မၤဃါဒီးဟံးဃၥ်ဖီၣ်ဃၥ်မိပါဖံဖုတၢ်ဟ့ၣ်သါအံၤအဂ့ၢ်,စံးအါထီၣ်ဝဲဒၣ်စ့ၢ်ကီးန့ၣ်လီၤ. ဒ်န့ၣ်အသိး,တၢ်ကံၢ်စုအံၤမ့ၢ်ဝဲကညီတၢ်ဆဲးတၢ်လၤလုၢ်လၢ်ထူသနူတခါအဃိ,ဒ်သိးသုတလီၤတဂ့ၤအဂီၢ်သးစၢ်တဖၣ်ကဘၣ်ဃုသ့ၣ်ညါမၤနၢ်ပၢၢ်ထီၣ်က့ၤအသးလၢကညီလုၢ်လၢထူသနူတခါအံၤအဂ့ၢ်,ကညီသးစၢ်မုၣ်လၢအဟဲထီၣ်မၤလၤကပီၤလါခူကံၢ်စုအမူးတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“တနံၤအံၤဒ်အမ့ၢ်ဝဲတၢ်ကံၢ်စုမုၢ်နံၤအသိးန့ၣ်,ယနၥ်လၢပဝဲသးစၢ်တဖၣ်ပကပၢၤဃၥ်ပတၢ်ဆဲးတၢ်လၤဒီးဟဲမၤလၤကပီၤသကိးမုၢ်နံၤအံၤန့ၣ်လီၤ.ဒီးဘၣ်ဃးတၢ်ကံၢ်စုအံၤယဲယနီၢ်ကစၢ်တဂၤယတထံၣ်လၢအမ့ၢ်တၢ်အဒူၣ်အဆၢလၢပဝဲကညီခရံၥ်ဖိဒီးဘူးဒးတဖၣ်အဘၢၣ်စၢၤဘၣ်.တၢ်ကံၢ်စုအံၤမ့ၢ်ကညီတၢ်ဆဲးတၢ်လၤလၢမိၢ်ပၢ်ဖံဖုဟ့ၣ်သါတ့ၢ်ဝဲတခါလီၤ.အဃိန့ၣ်ပဝဲသးစၢ်တဖၣ်န့ၣ်ဖဲလါခူကံၢ်စုအဆၢကတီၢ်န့ၣ်ကြၢးလၢပကဘၣ်လူၤဃုသ့ၣ်ညါမၤနၢ်ပၢၢ်ပသးဒ်သိးပတၢ်ဆဲးတၢ်လၤအံၤသုတလီၤမၢ်တဂ့ၤအဂီၢ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ. တတကီၢ်ဃီ,တနံၤအံၤကွဲၢ်ကဘီခီကီၢ်ကၠိတၢ်မၤလၤကပီၤဝဲမၤထူရၤဒီးကညီလါခူးကံၢ်စုမုၢ်နံၤအပူၤ,တၢ်ဖးဖျါထီၣ်ဝဲကညီမၤထူရၤအဂ့ၢ်အကျိၤဒီးဟ့ၣ်ဝဲတၢ်ယူးယီၣ်ဒီးတၢ်သးအုၣ်ဖီကွီၤတဖၣ်ဆူပှၤဒူပှၤဃိၤခိၣ်နၢ်လၢအဟ့ၣ်လီၤတ့ၢ်သးလၢထံကီၢ်ဒီးပှၤကလုၥ်ဂီၢ်တဖၣ်အလၢၢ်ထူၣ်,အိၣ်ဝဲအသိး,တၢ်ဖးဖျါထီၣ်စ့ၢ်ကီးဝဲလါခူကံၢ်စုဟဲကဲထီၣ်အသးအဂ့ၢ်အကျိၤတဖၣ်အမဲၥ်ညါ,အိၣ်ဃုၥ်ဝဲဒီးခီကီၢ်ကၠိဖိမုၣ်ခွါတဖၣ်အတၢ်ဒုးနဲၣ်တၢ်ဆဲးတၢ်လၤ,တၢ်သူၣ်ဝံၣ်သးဆၢ,တၢ်ဂဲၤကလံၣ်တဖၣ်စ့ၢ်ကီးန့ၣ်လီၤ. ဒ်န့ၣ်အသိး,တနံၤအံၤမူးတၢ်ရဲၣ်တၢ်ကျဲၤအပူၤ,မဲၢ်ဆီးကၠီၣ်တဲၣ်ပၢၤကီၢ်ခိၣ်နၢ်,ခ့ၣ်အဲၣ်ယူၣ်ကညီသးစၢ်ကရၢခိၣ်နၢ်,ကၠိပှၤဘၣ်မူဘၣ်ဒါ,ကၠိဖိဃုၥ်ဒီးကညီဖိလၢအိၣ်ဆိးဖဲမဲဆီးဝ့ၢ်ပူၤတဖၣ်ပၣ်ဖှိၣ်ထီၣ်သးခဲလၢၥ်အိၣ်ဝဲအဂၤ(၁၀၀၀)ဘျဲၣ်ဃၣ်ဃၣ်န့ၣ်လီၤ.