လါအီကူး ၁၇သီ, ၂၀၂၄နံၣ်, ခ့ၣ်အဲးစံၣ်,
မိၢ်ကီၢ်စဲၣ်,ကၠဲးထိၣ်ကီၢ်ဆၣ်,ကၠဲးထိၣ်ဝ့ၢ်ကလံၤစိးကဝီၤဒ့တကပၤအပူၤမဟါလါအီကူး(၁၆)သီအနံၤဟါခီ(၇)နၣ်ရံၣ်အဆၢကတီၢ်သုးကီၣ်ကးအပှၤတဖၣ်နုၥ်လီၤဖီၣ်ဝဲကမျၢၢ်လီၢ်ကဝီၤဖိ(၄)ဂၤလၢအဟံၣ်ပူၤလၢကဘၣ်လဲၤကဲဝဲကမျၢၢ်တၢ်ဘၣ်ကဲသုးအဂ့ၢ်,ဝ့ၢ်လီၢ်ကဝီၤဖိတဖၣ်စံးဝဲန့ၣ်လီၤ.
သုးကီၣ်ကးအသုးသိလ့ၣ်(၃)ခိၣ်,ပှၤသုးဖိဒီးပၢၤကီၢ်ဂံၢ်ဘါအဂၤ(၃၀)ဃၣ်ဃၣ်နုၥ်လီၤဝဲလၢကလံၤစိးကဝီၤဒ့အပူၤလၢသးစၢ်သ့ၣ်တဖၣ်အဟံၣ်ပူၤဒီးစံးဝဲလၢအဝဲသ့ၣ်တဖၣ်အမံၤပၣ်လၢတၢ်ကဘၣ်လဲၤကဲသုးဒီးဖီၣ်က့ၤကိးဝဲအဂ့ၢ်,ကၠဲးထိၣ်ဝ့ၢ်လီၢ်ကဝီၤပိၥ်ခွါတဂၤစံးဝဲဒ်အံၤန့ၣ်လီၤ.
အဝဲစံးဝဲလၢ“ပၢၤကီၢ်တဖၣ်ပၣ်ဃုၥ်ဝဲန့ၣ်လီၤ.ကဝီၤဒ့ခိၣ်နၢ်ပှၤဘၣ်မူဘၣ်ဒါဒီးပှၤလီၢ်ကဝီၤဖိတဖၣ်တပၣ်ဘၣ်.ဟဲဝဲဒီးသိလ့ၣ်(၃)ခိၣ်ပှၤနီၢ်ဂံၢ်(၃၀)ဘျီဖီၣ်ဝဲသးစၢ်လွံၢ်ဂၤန့ၣ်လီၤ.ပှၤလၢအမံၤပၣ်လၢစရီပူၤတဖၣ်န့ၣ်ဒုဘၣ်ဃ့ၢ်အိၣ်ခူသူၣ်သးအိၣ်စ့ၢ်ကီးလီၤ.တဟးလူၤသံကွၢ်ဝဲလၢပှၤဟံၣ်ဒ်သိးလၢအပူၤကွံၥ်လၢၤဘၣ်,ဘၣ်ဆၣ်ခဲအံၤမတၤတဂၤအိၣ်ဟံၣ်ဖဲလဲၣ်ဖဲလဲၣ်န့ၣ်ပှၤတဲပၠးအသုလီၤတံၢ်လီၤဆဲးအိၣ်လံ”အဂ့ၢ်စံးဝဲန့ၣ်လီၤ.
အပူၤကွံၥ်လါအီကူး(၇)သီအပူၤလၢတၢ်ကဘၣ်လဲၤကဲကမျၢၢ်သုး(၄)ဖုတဖုအဂီၢ်,သုးကီၣ်ကးဟးလူၤထၢဝဲစရီသံကွၢ်သံဒိးဝဲတၢ်လၢကၠဲးထိၣ်ဝ့ၢ်ကဝီၤဒ့(၆)ဘ့ၣ်အပူၤအိၣ်ဝဲဒၣ်ဝံၤအလီၢ်ခံသိလ့ၣ်(၂)ခိၣ်ဟးရှၣ်တၢ်လၢဝ့ၢ်ပူၤဒီးလူၤဖီၣ်ဝဲပှၤလၢအမံၤပၣ်လၢစရီအပူၤတဖၣ်အိၣ်ဝဲအသိး,ပှၤလၢတၢ်ဖီၣ်အီၤလၢတၢ်တသ့ၣ်ညါထွဲဝဲဘၣ်တဖၣ်အိၣ်ဝဲအဂ့ၢ်,သ့ၣ်ညါဘၣ်ဒ်ဝ့ၢ်လီၢ်ကဝီၤကမျၢၢ်တဖၣ်စံးဝဲအသိးန့ၣ်လီၤ.
ကၠဲးထိၣ်ဝ့ၢ်ပူၤအံၤသုးကီၣ်ကးလူၤဖီၣ်ဝဲပှၤလၢကဘၣ်လဲၤကဲသုးသ့ၣ်တဖၣ်အိၣ်ဝဲအမဲၥ်ညါ,သုးကီၣ်ကးတဖၣ်အံၤလူၤဖီၣ်ဝဲပှၤလၢအတၢ်ဘၣ်ထွဲအိၣ်ဒီးကမျၢၢ်တၢ်ဒီသဒၢသုး(PDF)ဖိတဖၣ်အိၣ်ဝဲဒီးပှၤလၢဖီၣ်ဃၥ်ဝဲတဖၣ်အံၤဒ်သိးကပျၢ်ထီၣ်ကွံၥ်ဝဲဒီးကမၤလီၤတဲၥ်ကွံၥ်ဝဲအမံၤလၢတၢ်ဘၣ်ကဲသုးအဂီၢ်,လဲၤတၢၣ်ပီၣ်တဲသကိးဝဲလၢကဘၣ်ဟ့ၣ်စ့အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး,သုးကီၣ်ကးအံၤထုးထီၣ်ရၤလီၤဝဲကမျၢၢ်တၢ်ဘၣ်ကဲသုးဝံၤအလီၢ်ခံကိးဝဲအဆိကတၢၢ်တၢ်ဘၣ်ကဲသုး(၁)တဖုအပူၤ,ပၥ်ပနီၣ်ဝဲပှၤဘၣ်ကဲသုးလၢကီၢ်ဆၣ်တဖၣ်အပူၤအနီၢ်ဂံၢ်တထီၣ်ဘးဘၣ်အဃိဟ့ၣ်ဝဲတၢ်ဆီၣ်သနံးဆူဝ့ၢ်ပူၤကမျၢၢ်သးစၢ်တဖၣ်ဒီးမၤပျံၤမၤဖုးဝဲကမျၢၢ်သးစၢ်တဖၣ်အိၣ်ဝဲအသိးတကီၢ်ခါခဲအံၤမၤအါထီၣ်ဝဲအတၢ်ဟူးတၢ်ဂဲၤလၢနုၥ်လီၤဖီၣ်တၢ်တုၤလၢဟံၣ်ပူၤလံန့ၣ်လီၤ.
