သုးကီၣ်ကးအီၣ်စ့ၣ်ယးသုးကျိၤခးလီၤကျိဖးဒိၣ်အဃိ ထံမူထၣ်သ၀ီဖိဘၣ်ဒိ(၃)ဂၤအကျါပၣ်ဃုာ်ဖိသၣ်(၂)ဂၤ
လါယူၤလံ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် မၠၣ်၀တံၣ်ကလံၤထံး ထံမူထၣ်သ၀ီအပူၤ ဖဲလါယူၤလံ ၉ သီအနံၤ သုးကီၣ်ကးအအီၣ်စ့ၣ်ယးသုးကျိၤခးလီၤကျိဖးဒိၣ်အဃိ ထံမူထၣ်သ၀ီဖိဘၣ်ဒိ(၃)ဂၤ အကျါ ပၣ်ဃုာ် ဖိသၣ်(၂)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ ဖဲလါယူၤလံ ၉ သီ ဂီၤခီ ၁၁း၀၀ နၣ်ရံၣ်ဃၣ်ဃၣ်အဆၢကတီၢ် သုးကီၣ်ကးအ(အီၣ်စ့ၣ်ယး)သုးကျိၤလၢ အိၣ်မၠၣ်တ၀ံၣ်-ကီးတရံးအ့ရှါကျဲကစၢၢ်ခီၣ်ထံးအံၤ ခးလီၤ၀ဲကျိဖးဒိၣ်လီၤတဲာ်ပိၢ်ဖးထီၣ်၀ဲလၢထံမူထၣ်သ၀ီပူၤအဃိ ဖါတံၢ်(၅၅)နံၣ် တဂၤဒီးဖိသၣ်(၅)နံၣ်တဂၤ,(၁၁)နံၣ်တဂၤသ့ၣ်တဖၣ်အံၤဘၣ်ဒိဘၣ်ထံး၀ဲဒၣ်အဂ့ၢ်န့ၣ် ဒူပျာ်ယာ်ကီၢ်ရ့ၣ် တၢ်ကစီၣ် ထုးထီၣ်ပာ်ဖျါ၀ဲဖဲတနံၤအံၤအသိး သ့ၣ်ညါဘၣ်န့ၣ်လီၤႉ တကးဒံးဘၣ်အမဲာ်ညါကျိဖးဒိၣ်အံၤအဃိထံမူထၣ်သ၀ီဖိအဟံၣ်အဃီဟးဂီၤ၀ဲဒၣ်(၁၂)ဖျၢၣ်ႇသိလ့ၣ်ဃုာ်ဒီး ဟံၣ်တၢ်ဖိ တၢ်လံၤသ့ၣ်တဖၣ်ဟးဂီၤ၀ဲဒၣ်တနီၤဒီးဒ်န့ၣ်အသိး ပှၤဘၣ်ဒိသ့ၣ်တဖၣ်အကျါမ့မ့ၢ်လၢဖါတံၢ်(၅၅)နံၣ်တဂၤ အံၤခီဖျိ ဘၣ်ဒိနးနးကျံၤကျံၤအဃိဘၣ်တၢ်ဆှၢထီၣ်အီၤဆူကီၢ်ကၠဲၣ်တဲၣ် မဲၢ်ဆီးတၢ်ဆါဟံၣ်ဖးဒိၣ်အဂ့ၢ်န့ၣ် ကီးတရံးကီၢ်ဆၣ်ခိၣ် စီၤဖၣ်ထယါ စံး၀ဲန့ၣ်လီၤႉ အ၀ဲစံး၀ဲလၢ“ၦၤဘၣ်ဒိန့ၣ်(၃)ဂၤႉလၢအသးၦၢ်တဂၤန့ၣ်ဘၣ်ဒိနးတစဲးႉတနံၤဃီန့ၣ်ၦၤဆှၢထီၣ်အီၤလၢမဲၢ်ဆီးတၢ်ဆါဟံၣ်လီၤႉကျိဖးဒိၣ်အဃိဘၣ်ၦၤဟံၣ်တနီၤစ့ၢ်ႉမ့၀ံၤတၢ်ကဲထီၣ်သးကဒီးဖဲမဟါတဟါဘျီခဲအံၤၦၤဟးပလဲာ်သးအိၣ်ႇလၢအိၣ်ဘူၣ်တနီၤဒီးအိၣ်ကနၣ်ဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ စးထီၣ်သုးဟံန့ၢ်တၢ်စိတၢ်ကမီၤ၀ံၤလီၢ်ခံ ထံမူထၣ်သ၀ီအခိၣ်အဃၢၤဖဲန့ၣ်အပူၤခီဖျိတၢ်ဒုးကဲထီၣ်ႇ ပယီၤသုးခးလီၤ ကျိဖးဒိၣ်အဃိသ၀ီဖိိခဲလၢာ်ဃၣ်ဃၣ်ဃ့ၢ်ထီၣ်ႇတနီၤန့ၣ်လဲၤစံၣ်အိၣ်၀ဲလၢထံဆၢကီၢ်ဆၢသ့ၣ်ဘီဘိလီၢ်အိၣ်ကမှံလီၢ်ႇကျဲမုၢ်၀ၢ်ႇထံနၢ်ထံခံတုၤလၢခဲအံၤတစုအိၣ်၀ဲအသိး တနီၤန့ၣ်အိၣ်တ့ၢ်လၢသ၀ီပူၤစ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤ ၦၤဘၣ်မူဘၣ်ဒါစံး၀ဲန့ၣ်လီၤႉ ဒ်လီၢ်က၀ီၤၦၤဘၣ်မူဘၣ်ဒါစံး၀ဲအသိးန့ၣ်အပူၤကွံာ်ထံမူထၣ်သ၀ီပူၤန့ၣ်ဟံၣ်ခိၣ်ပာ်ဖှိၣ်ခဲလၢာ်အိၣ်၀ဲ(၅၀၀)ဘျဲၣ်ဒီး ဘၣ်ဆၣ်ခီဖျိတၢ်အိၣ်သးတဂ့ၤဘၣ်ပယီၤသုးခးလီၤကျိဖးဒိၣ်တလီၢ်လီၢ်အဃိတကီၢ်ခါခဲအံၤၦၤသ၀ီဖိအိၣ်တ့ၢ်လၢသ၀ီပူၤအိၣ်ဒၣ်ထဲ(သၢပူတပူ)လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢကဟဲထီၣ်ဟံန့ၢ်က့ၤကီးတရံးဒီးမၠၣ်၀တံၣ်၀့ၢ်အံၤဂီၢ်ဖဲအပူၤကွံာ်လါအ့ဖြ့ၣ် ၁၁ သီအနံၤန့ၣ် သုးကီၣ်ကး (အီၣ်စ့ၣ်ယး) သုးကျိၤအံၤဟဲထီၣ်တုၤ၀ဲဒၣ်ဖဲကီးတရံး၀့ၢ်အံၤဒီးစးထီၣ်ဖဲန့ၣ်ခီဖျိပယီၤသုးခးလီၤ၀ဲဒၣ်ကျိဖးဒိၣ်ဆူ ...
သုးမုၢ်သံၣ်ဘိတဖၣ်တဘၣ်မၤကသံၣ်မူၤဘှီးဒီးတၢ်တၤကျိၣ်တၤစ့တၢ်မၤတဖၣ်ဘၣ်အဂ့ၢ်(KNU/KNLA-PC)ဒီး( DKBA)ထုးထီၣ်တၢ်ကလုၢ်
လါယူၤလံ ၁၁သီႇ ၂၀၂၄နံၣ်ႇ ခ့ၣ်အဲးစံၣ် ကညီကီၢ်စဲၣ်-ကီၢ်ကၠီၣ်တဲၣ်ကီၢ်ဆၢရၤမတံ၀့ၢ်ပူၤတၢ်မၤကသံၣ်မူၤဘှီးဒီးတၢ်တၤကျိၣ်တၤစ့တၢ်ဂ့ၢ်သ့ၣ်တဖၣ်အံၤသုးမုၢ်သံၣ်သံၣ်ဘိတဖၣ်လ့ၤတက့ၤတဘၣ်မၤ၀ဲဘၣ်အဂ့ၢ်ႇကညီတၢ်မုာ်တၢ်ခုၣ်ကီၣ်ကးကရၢ( KNU/KNLA-PC)ဒီးဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ထုးထီၣ်၀ဲလံာ်တၢ်ကလုၢ်တဘ့ၣ်ဖဲမဟါလါယူၤလံ(၁၀)သီအနံၤန့ၣ်လီၤႉ ရၤမတံ၀့ၢ်ပူၤဘၣ်ဃးတၢ်တၤကျိၣ်တၤစ့တၢ်ဖံးတၢ်မၤတဖၣ်အံၤအ၀ဲသ့ၣ်အသုးမုၢ်သံၣ်ဘိတဖၣ်တၢ်ပၣ်ဃုာ်ပၣ်ဂီၢ်တအိၣ်၀ဲဘၣ်ဘၣ်ဆၣ်သုးမုၢ်သံၣ်ဘိအကျါစှၤကိးဂၤမၤ၀ဲတၢ်ဂဲၤလိာ်ကွဲ(Game)အိၣ်အဃိထုးထီၣ်၀ဲတၢ်ကလုၢ်လၢတၢ်ကဘၣ်ပံးကွံာ်တၢ်ဂဲၤလိာ်ကွဲ(Game)တၢ်လီၢ်သ့ၣ်တဖၣ်ဒီးတဘၣ်မၤ၀ဲကသံၣ်မူၤဘှီးတၢ်ဖံးတၢ်မၤဘၣ်အဂ့ၢ်ရၤမတံ၀့ၢ်ပနံာ်တၢ်ကၤဒီးတၢ်ရ့လိာ်မုာ်လိာ်မူဒါခိၣ်ခံ(သုးခိၣ်ဒိၣ်ဂီၢ်ဂ့ၢ်)စီၤအဲၣ်ဒိၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“လၢညါလံၤလံၤန့ၣ်တၢ်တၤကျိၣ်တၤစ့ဒီးတၢ်မၤကသံၣ်မူၤဘှီးန့ၣ်(ဖံၣ်စံၣ်)ဒုတမၤ၀ဲဘၣ်ႉဘၣ်ဆၣ်လၢအကျါတဂၤခံဂၤဒုမၤ၀ဲအိၣ်အဃိန့ၣ်ဒ်သိးကပံးကွံာ်ခဲလၢာ်အဂီၢ်န့ၣ်ပထုးထီၣ်လံာ်လီၤႉအခဲအံၤဘၣ်ဃးရၤမတံ၀့ၢ်ပူၤအံၤ(KNU/KNLA-PC/DKBA/BGF)ဘၣ်ဃးတၢ်မၤသ့ၣ်တဖၣ်အံၤၦၤမၤတန့ၢ်နီတဂၤလၢၤဘၣ်ႉမ့အိးထီၣ်န့ၣ်ပၠးသနၤထီၣ်အါမီၤႉတၢ်တၤကျိၣ်တၢ်စ့သ့ၣ်တဖၣ်တၢ်လိာ်ကွဲသ့ၣ်တဖၣ်အလီၢ်ခံန့ၣ်တၢ်မၤဆါကသံၣ်မူဘှီးအိၣ်အဃိဖိသၣ်သးစၢ်တဖၣ်ဟးဂီၤအါထီၣ်တၢ်အီၣ်ဟုၣ်တၢ်အါထီၣ်၀ဲအသးန့ၣ်တကီၢ်ခါခဲအံၤရၤမတံ၀့ၢ်ပူၤတၢ်ရ့လိာ်မုာ်လိာ်အဖီလာ်ဒုတၢ်မၤသ့ၣ်တဖၣ်န့ၣ်တအိၣ်နီတဖျၢၣ်ဘၣ်ဘၣ်ဆၣ်အိၣ်ဂ့ၤတအိၣ်ဂ့ၤကဘၣ်ထုးထီၣ်တၢ်ကလုၢ်လီၤ”အဂ့ၢ်စံး၀ဲန့ၣ်လီၤႉ ဘၣ်ဃးလံာ်တၢ်ထုးထီၣ်တၢ်ကလုၢ်အံၤထုးထီၣ်ရၤလီၤသဃဲၤ၀ဲဒီး (KNU/KNLA-PC/DKBA/BGF)သုးကလၢၤႇသုးရ့ၣ်ႇ၀ဲၤကျိၤဘၣ်ထွဲသ့ၣ်တဖၣ်ခဲလၢာ်ဃုာ်ဒီးရၤမတံ၀့ၢ်သုးကီၣ်ကးသုးတၢ်မဲာ်ညါသုးတြိၤ(၄၄)ရၤမတံသုးတၢ်မဲာ်ညါ၀ဲၤကျိၤႇသုးကီၣ်ကးစုတီၤဖီလာ်သုးဒ့ခိၣ်ႇ၀့ၢ်ပူၤပၢၤကီၢ်ရူႇသုးခိးကီၢ်ဆၢ( BGF)ဘံၣ်ဘၢရူဒီးဒံၣ်မိၤကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)သ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤႉ ခီဖျိတၢ်တၤကျိၣ်တၤစ့ဒီးတၢ်မၤကသံၣ်မူၤဘှီးအဃိရၤမတံ၀့ၢ်ပူၤတၢ်အီၣ်ဟုၣ်သိလ့ၣ်ဆဲးကဲးတဖၣ်ကဲထီၣ်အသးတလီၢ်လီၢ်အိၣ်၀ဲဒီးၦၤလၢအဟးအီၣ်ဟုၣ်၀ဲဆဲးကဲးသ့ၣ်တဖၣ်အံၤလဲၤဒိးလဲ၀ဲဒီးတၢ်မူၤတၢ်ဘှီးသ့ၣ်တဖၣ်ကဲထီၣ်သးအိၣ်၀ဲအါမးအဂ့ၢ်သုးခိၣ်ဒိၣ်ဂီၢ်ဂ့ၢ်စီၤအဲၣ်ဒိၣ်စံးစ့ၢ်ကီး၀ဲဒ်အံၤန့ၣ်လီၤႉ အ၀ဲစံး၀ဲလၢ“အခဲအံၤတၢ်ဟုၣ်တၢ်ဘျၣ်အါထီၣ်မီၤၦၤဖီၣ်မ့န့ၢ်န့ၣ်န့ၢ်ထဲဖိသၣ်သးစၢ်သ့ၣ်တဖၣ်လီၤႉဟးဟုၣ်၀ဲသိလ့ၣ်ဆဲးကဲးသ့ၣ်တဖၣ်၀ံၤလဲၤလဲအိ၀ဲဒီးကသံၣ်မူၤဘှီးသ့ၣ်တဖၣ်မီၤႉတၢ်၀ဲန့ၣ်အဃိသးတၢ်မူၤတၢ်ဘှီးန့ၣ်ဟးထီၣ်လၢတၢ်လိၣ်ကွဲလီၢ်လီၤႉတၢ်လိၣ်ကွဲလီၢ်မ့အိၣ်န့ၣ်တၢ်မူၤတၢ်ဘှီးအိၣ်လီၤႉအဃိန့ၣ်တၢ်လိၣ်ကွဲလီၢ်မ့တအိၣ်လၢၤဘၣ်န့ၣ်ကသံၣ်မူၤဘှီးတဖၣ်ကလီၤစှၤ၀ဲတစဲးမီၤႉလ့ၤတက့ၤတအိၣ်လၢၤဘၣ်ဒုပတတဲဘၣ်ႉဘၣ်ဆၣ်ကလီၤစှၤ၀ဲမီၤႉတၢ်တၤကျိၣ်တၢ်စ့မ့လီၤမၢ်ဒုတၢ်ဟုၣ်တၢ်ဘျၣ်နါက့ကကိညၢ်တစဲးမီၤ”အဂ့ၢ်စံး၀ဲန့ၣ်လီၤႉ လၢန့ၣ်အဃိလၢ (KNU/KNLA-PC)လီၢ်ခၢၣ်သးထုးထီၣ်လံာ်တၢ်ကလုၢ်အပူၤပာ်ဖျါ၀ဲလၢဒ်တၢ်သိၣ်တၢ်သီတၢ်ဘျၢအိၣ်၀ဲလၢသုးမုၢ်သံၣ်ဘိတဖၣ်လ့ၤတက့ၤတဘၣ်မၤ၀ဲကသံၣ်မူၤဘှီးဒီးတၢ်တၤကျိၣ်တၤစ့တၢ်ဖံးတၢ်မၤအံၤဘၣ်အသိးန့ၣ်တၢ်မ့ၢ်တလူၤပိာ်ထွဲမၤထွဲ၀ဲဘၣ်န့ၣ်ကဟံး၀ဲအရ့တုၤလီၤတီၤလီၤအဂ့ၢ်ပာ်ဖျါ၀ဲန့ၣ်လီၤႉ တကတီၢ်ဃီဖဲတၢ်ထုးထီၣ်လံာ်တၢ်ကလုၢ်မဟါလါယူၤလံအသီ(၁၀)အနံၤဂီၤခီအဆၢကတီၢ်န့ၣ်ရၤမတံ၀့ၢ်ပူၤဖီၣ်စုက၀ဲၤကရူၢ်ကရၢတဖၣ်ဖီၣ်ချူး၀ဲတၢ်လိၣ်ကွဲလီၢ်(၅)ဖျၢၣ်ဒီးကသံၣ်ကသ့ၣ်အဖျၢၣ်ဃိးကထိ(၈၀၀၀)ဘျဲၣ်အိၣ်၀ဲအသိးတၢ်ဖီၣ်န့ၣ်၀ဲကသံၣ်မူၤဘှီးဒီးတၢ်လိၣ်ကွဲလီၢ်ၦၤမၤတၢ်ဖိတဖၣ်အံၤတၢ်ဆှၢ၀ဲဆူ(ရွ့ၣ်ကိၣ်ကိၤ)( BGF)ပၢဆှၢတၢ်အလီၢ်အဂ့ၢ်သုးခိၣ်ဒိၣ်ဂီၢ်ဂ့ၢ်စီၤအဲၣ်ဒိၣ်စံးစ့ၢ်ကီး၀ဲန့ၣ်လီၤႉ ကီၢ်ဆၢ၀့ၢ်တ၀့ၢ်လၢအမ့ၢ်၀ဲရၤမတံ၀့ၢ်ပူၤတၢ်ခးညၣ်တၢ်လိၣ်ကွဲလီၢ်ဒီး( ONLINE) တၢ်တၤကျိၣ်တၤစ့တၢ်လီၢ်သ့ၣ်တဖၣ်အံၤဟီၣ်က၀ီၤအပူၤဖီၣ်စုက၀ဲၤကရူၢ်ကရၢတနီၤအတၢ်ပၣ်ဃုာ်ပၣ်ဂီၢ်အိၣ်ဒံး၀ဲအဖၢမုၢ်အဂ့ၢ်၀့ၢ်ပူၤဖီၣ်စုက၀ဲၤကရူၢ်ကရၢတဖုအကျါၦၤလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ ဒီးရၤမတံ၀့ၢ်ပူၤအံၤကညီတၢ်မုာ်တၣ်ခုၣ်ကီၣ်ကးကရၢ( KNU/KNLA-PC)သုးခိးကီၢ်ဆၢ( BGF)ဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)တဖၣ်တကးဘၣ်သုးကီၣ်ကးအၦၤသ့ၣ်တဖၣ်စ့ၢ်ကီးဟူးဂဲၤ၀ဲအဂ့ၢ်သ့ၣ်ညါဘၣ်န့ၣ်လီၤႉ ဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)ကရူၢ်ကရၢသ့ၣ်တဖၣ်စ့ၢ်ကီးထုးထီၣ်၀ဲလံာ်လၢတၢ်ကဘၣ်ပံးကွံာ်တၢ်လိၣ်ကွဲအလီၢ်တဖၣ်ဒီးသုးမုၢ်သံၣ်ဘိတဖၣ်တဘၣ်မၤ၀ဲကသံၣ်မူၤဘှီးဒီးတၢ်တၤကျိၣ်တၤစ့တဖၣ်ဘၣ်အသိးဒ်လံာ်တၢ်ကလုၢ်အသိးတၢ်မ့တလူၤပိာ်ထွဲမၤထွဲ၀ဲဘၣ်န့ၣ်ကဟံ၀ဲအရ့တုၤလီၤတီၤလီၤစ့ၢ်ကီးအဂ့ၢ်ပာ်ဖျါစ့ၢ်ကီး၀ဲလၢအလံာ်ထုးထီၣ်တၢ်ကလုၢ်အပူၤန့ၣ်လီၤႉ ဒ်န့ၣ်အသိးသုးခိးကီၢ်ဆၢ(BGF)သ့ၣ်တဖၣ်စ့ၢ်ကီးဟ့ၣ်ပလီၢ်၀ဲလၢတၢ်ကဘၣ်ပံးကွံာ်ညၣ်တၢ်လိၣ်ကွဲအလီၢ်ဒီးအိၤလဲတၢ်တၤကျိၣ်တၤစ့တၢ်လီၢ်သ့ၣ်တဖၣ်ခဲလၢာ်အိၣ်၀ဲအဂ့ၢ်ထုးထီၣ်၀ဲလံာ်တၢ်ဟ့ၣ်ပလီၢ်ဖဲအပူၤကွံာ်လါယူၤ(၂၆)သီအိၣ်၀ဲဒီးစးထီၣ်ဖီၣ်၀ဲတၢ်လိၣ်ကွဲလီၢ်တနီၤလၢရၤမတံ၀့ၢ်ပူၤဖဲလါယူၤ(၂၇)သီအနံၤအိၣ်၀ဲဒၣ်န့ၣ်လီၤႉ
သုးပာ်ဖှိၣ်နုာ်လီၤခးပယီၤသုး (ခလရ-၂၈၅)အသုးကျိၤအဃိပယီၤသုးသံ(၅)ဂၤအကျါပၣ်ဃုာ်အသုးကျိၤခိၣ် (၁)ဂၤ
လါယူၤလံ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ်သုးက့နီၣ်ဂံၢ်(၄)လၢၢ်မုၢ်လါကီၢ်ဆၣ်ဟီၣ်က၀ီၤအပူၤ(ပလီၢ်) ၀့ၢ်ပယီၤသုးအသုးကျိၤလၢဟဲထီၣ်ၦၤနီၣ်ဂံၢ်(၅၀)ဂၤဘျဲၣ်သ့ၣ်တဖၣ်မ့ၢ်လၢတၢ်ခိးခးအ၀ဲသ့ၣ်အဃိပယီၤသုးအၦၤသံ(၅)ဂၤအကျါဘၣ်ဃုာ်အသုးကျိၤခိၣ်သုးခိၣ်ဒိၣ်ဖိ(၁)ဂၤအဂ့ၢ်ကီၢ်ရ့ၣ်အၦၤဘၣ်မူဘၣ်ဒါစံး၀ဲန့ၣ်လီၤႉ ဖဲမဟါလါယူၤလံ(၁၀)သီအနံၤမုၢ်ထူၣ်(၁၂)နၣ်ရံၣ်ကတီၢ်န့ၣ်(ပလီၢ်)၀့ၢ်ပယီၤသုးခီၣ်သုးရ့ၣ်(ခလရ-၂၈၅)အ သုးကျိၤနီၣ်ဂံၢ်(၁)အၦၤနီၣ်ဂံၢ်(၅၀)ဂၤဘျဲၣ်အံၤဟဲထီၣ်၀ဲဖဲ(၅တၢၣ်)သ၀ီအဆၢကတီၢ်ခီဖျိကညီဒီကလုာ်ဂၢၤသးကရၢ(KNDO)သုးရ့ၣ်(၇)အသုးဒ့(၅)အၦၤဒီးတၢ်ပၢၢ်ဆၢသုးပာ်ဖှိၣ်သ့ၣ်တဖၣ်က၀ီၤတံၢ်ခိးခး၀ဲဒၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ပယီၤသုးကီၣ်ကးခီၣ်သုးရ့ၣ်(ခလရ-၂၈၅)သုးကျိၤ(၁)အံၤန့ၣ်မ့ၢ်၀ဲ၀့ၢ်တိၣ်ရ့ၣ်ပယီၤသုးသ့ၣ်တဖၣ်လၢအက့ၤ လီၤပာ်ဖှိၣ်က့ၤအသးဖဲ(ပလီၢ်)၀့ၢ်အသုး၀ဲၤလီၢ်ခိၣ်သ့ၣ်သ့ၣ်တဖၣ်ဒီးဖဲအ၀ဲသ့ၣ်ဟးဟံးန့ၢ်၀ဲတၢ်ဘံၣ်တၢ်ဘၢလၢ၀့ၢ်ချၢဒီးတုၤဖဲ(ယဲၢ်တၢၣ်)သ၀ီအဆၢကတီၢ်တၢ်ခးအ၀ဲသ့ၣ်အဂ့ၢ်န့ၣ်ဘျံးဒ၀ဲၢ်ကီၢ်ရ့ၣ်ခိၣ်ပဒိၣ်စီၤဖျိးစိ၀့စံး၀ဲဒၣ်အသိးသ့ၣ်ညါဘၣ်န့ၣ်လီၤႉ “အ၀ဲသ့ၣ်က့ၤအိၣ်ဒၣ်ဖဲ(ပလီၢ်)၀့ၢ်မကၠံကိအသုး၀ဲၤလီၢ်ခိၣ်သ့ၣ်ဖဲန့ၣ်လီၤႉ အ၀ဲသ့ၣ်ဟးထီၣ်ဟံန့ၢ်တၢ်ဘံၣ်တၢ် ဘၢလၢ၀့ၢ်ချၢအဃိန့ၣ်ၦၤနုာ်လီၤဂဲၤအ၀ဲသ့ၣ်မီၤနီၤႉ ပယီၤသုးသ့ၣ်တဖၣ်န့ၣ်မ့ၢ်၀ဲ၀့ၢ်တိရ့ၣ်အၦၤသ့ၣ်တဖၣ် လီၤႉ အ၀ဲသ့ၣ်န့ၣ်က့ၤတုၤလၢအသုး၀ဲၤလီၢ်ခိၣ်သ့ၣ်လံမီၤနီၤႉ မ့ၢ်၀ံၤန့ၣ်ၦၤက့ၤဃ့ၢ်လၢ(ကၠီၣ်လိကၠံ)တဒူၣ်န့ၣ်နါ က့မ့ၢ်၀ဲ၀့ၢ်တိၣ်ရ့ၣ်အၦၤလီၤမီၤႉ အ၀ဲသ့ၣ်က့ၤတုၤလၢန့ၣ်ဒီးပာ်ဖှိၣ်ထီၣ်အသးဟးဟူးဂဲၤ၀ဲဖဲ၀့ၢ်ကပိာ်ကပၤဒီး တၢ်ခးအ၀ဲသ့ၣ်ဒ်န့ၣ်လီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ပယီၤသုးကီၣ်ကးအၦၤလၢဘၣ်သံ(၅)ဂၤသ့ၣ်တဖၣ်န့ၣ်မ့ၢ်၀ဲသုးကျိၤခိၣ်သုးခိၣ်ဒိၣ်ဖိလၢအမ့ၢ်(သဲၣ်ထိအီၤ)ႇ သုးစကီၤ(၁)ဂၤႇ သုးစကီၤဖိ(၂)ဂၤဒီးသုးစကီၤပြံ(၁)တဂၤအသိးတၢ်မၤန့ၢ်ဃုာ်စ့ၢ်ကီး၀ဲတၢ်စုက၀ဲၤကျိချံၦာ် သၣ်သ့ၣ်တဖၣ်ဒ်အမ့ၢ် MA-7 ၆၀မမကျိဖးဒိၣ်ပျီ(၁)ခိၣ်ႇ ၆၀မမအချံ (၃)ဖျၢၣ်ႇ MA-1(၁)ခိၣ်ႇ MA-2(၂) ခိၣ်ႇ MA-3(၃)ခိၣ်ႇ MA-5ကျိဖုၣ်(၁)ခိၣ်ႇ အံးနါကါ(၁)ဖျၢၣ်ႇ မ့ကိသံ(၆)ဖျၢၣ်ႇ MA-14ခီၣ်မ့ၣ်ပိၢ်(၃)ဖျၢၣ်ႇ MAကျိဆၣ်ဒၢ(၂၇)ဘ့ၣ်ႇ MA-2ကျိဆၣ်ဒၢ(၁)ဘ့ၣ်ႇ ကျိချံ(၂၄၁၂)ဖျၢၣ်ႇ သုးခိၣ်ဖျီၣ်(၆)ဖျၢၣ်ႇ စဲးတဲတၢ်အ ဆံး(၁)ဖျၢၣ်ႇလီတဲစိၤ(၄)ဖျၢၣ်ႇ ဆ့ကၤဒီသဒၢကျိချံ(၅)ဘ့ၣ်ႇ အံးခွ့မဲၣ်(၄)ဘ့ၣ်ႇ ထၢၣ်၀ံချၢ(၁)ဖျၢၣ်သ့ၣ်တဖၣ် န့ၣ်လီၤႉ ဒ်န့ၣ်အသိးဘျံးဒ၀ဲၢ်ကီၢ်ရ့ၣ်လၢၢ်မုၢ်လါကီၢ်ဆၣ်ဟီၣ်က၀ီၤအပူၤဖဲပူၤကွံာ်လါယူၤ(၁၄)သီအနံၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဃုာ်ဒီးတၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်ကွံာ်၀ဲသုးကီၣ်ကး၀့ၢ်တိၣ်ရ့ၣ်သုးကလၢၤအံၤဒီးသုးကီၣ်ကးအၦၤလၢဃ့ၢ်ထီၣ်သ့ၣ်တဖၣ်တနီၤဂုာ်က့ၤ၀ဲအခံလၢ(ပလီၢ်)၀့ၢ်တကပၤအသိးတနီၤဂုာ်က့ၤ၀ဲဆူ(ကၠီၣ်လိကၠံ)တကပၤအိၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ
သုးကီၣ်ကးဒိးလီၤပာ် ဟီၣ်လာ်မ့ၣ်ပိၢ်အဃိလ့နိးလီၢ်က၀ီၤကမျၢၢ်က့ၤဟံၣ်တဘူၣ်
လါယူၤလံ ၁၁သီႇ ၂၀၂၄နံၣ်ႇ ခ့ၣ်အဲၣ်စံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇသုးက့(၆)ဒူပျာ်ယာ်ကီၢ်ရ့ၣ်ႇ၀ီၢ်ရ့ၣ်ကီၢ်ဆၣ်ႇ၀ီၢ်ရီဟီၣ်က၀ီၤလ့နိးသ၀ီအပူၤႇတၢ်ပၢၢ်ဆၢသုးပာ်ဖှိၣ်ထီၣ်မၤန့ၣ်ကွံာ်ပယီၤသုးကလၢၤယံာ်လံ(၂)လါဘျဲၣ်လံဘၣ်ဆၣ်ဟီၣ်က၀ီၤပူၤသုးကီၣ်ကးသုးဒိးလီၤပာ်ဟီၣ်လာ်မ့ၣ်ပိၢ်အိၣ်ဒံး၀ဲအဃိႇကမျၢၢ်လီၢ်က၀ီၤဖိတဖၣ်က့ၤအိၣ်ဆိး၀ဲလၢအဟံၣ်အဃီတဘူၣ်၀ဲဒံးဘၣ်အဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တၢ်ပၢၢ်ဆၢသုးပာ်ဖှိၣ်ထီၣ်မၤန့ၢ်ကွံာ်လ့နိးပယီၤကလၢၤ၀ံၤအလီၢ်ခံႇမၤ၀ဲတၢ်ရှဲလဲဟီၣ်က၀ီၤဒီးခီဖျိဒူသ၀ီခိၣ်ဃၢၤတၢ်လီၢ်တဖၣ်အပူၤပယီၤသုးဒိးလီၤပာ်ဟီၣ်လာ်မ့ၣ်ပိၢ်အိၣ်၀ဲအါမးဒီးတၢ်ရှဲလဲကွံာ်၀ဲတ၀ံၤတတဲာ်လၢာ်ဒံးဘၣ်အဃိႇကမျၢၢ်လီၢ်က၀ီၤဖိတဖၣ်တက့ၤအိၣ်ဘၣ်လၢအနီၢ်ကစၢ်ဟံၣ်ဃီဒံးဘၣ်အဂ့ၢ်ႇ၀ီၢ်ရ့ၣ်ကီၢ်ဆၣ်-နဲၣ်ရွဲၣ်သဃဲၤ(စီၤဆၣ်လီၤအဲၣ်)စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“လ့နိးပယီၤသုးကလၢၤန့ၣ်တၢ်ထီၣ်န့ၢ်၀ံၤအလီၢ်ခံမ့ၣ်ပိၢ်အိၣ်ဖးအါညါႇဒီးတၢ်သမံသမိးကွံာ်၀ဲ၀ံၤတၢ်ရှဲကွံာ်လဲကွံာ်၀ဲဘၣ်ဆၣ်သနာ်က့တုၤမုၢ်မဆါတနံၤအံၤန့ၣ်မ့ၣ်ပိၢ်န့ၣ်အိၣ်ဒံးဒၣ်တၢ်ဒံးလီၤႉအဃိန့ၣ်ၦၤဘၣ်မၤနီၣ်ဃာ်ဒ်သိး(Dangerous+Zone)သ့ၣ်တဖၣ်န့ၣ်လီၤႉအဃိသတးန့ၣ်ၦၤလီၢ်က၀ီၤကမျၢၢ်သ့ၣ်တဖၣ်န့ၣ်ခဲကနံၣ်အံၤဒုတက့ၤအိၣ်၀ဲလၢအတၢ်လီၢ်တၢ်ကျဲအပူၤဒ်ဘၣ်ႉဘၣ်အိၣ်စီၤစုၤဒံး၀ဲလီၤမီၤႉအဃိန့ၣ်ကမျၢၢ်သ့ၣ်တဖၣ်န့ၣ်လၢဘၣ်ဟးဖးဒီးပာ်တ့ၢ်ဟံၣ်ဃီသ့ၣ်တဖၣ်န့ၣ်အတၢ်ကီတၢ်ခဲအိၣ်၀ဲလီၤႉမ့မ့ၢ်လၢၦၤက့ၤအိၣ်လၢသ၀ီပူၤဒုၦၤက့ၤအိၣ်ဘူၣ်တအိၣ်နီတဂၤဒံးဘၣ်”အဂ့ၢ်စံး၀ဲန့ၣ်လီၤႉ လၢန့ၣ်အမဲာ်ညါႇတကီၢ်ခါခဲအံၤသုးကီၣ်ကးအကဘီယူၤဟးဆှးတၢ်ႇဟဲထီၣ်ဆှၢတၢ်အီၣ်တၢ်အီဃုာ်ဒီးကျိချံၦာ်သၣ်လၢနိၣ်ခၠိးနဲၣ်သုးကလၢၤတကပၤတပယူာ်ဃီအိၣ်စ့ၢ်ကီး၀ဲအဂ့ၢ်ႇအ၀ဲစံးအါထီၣ်၀ဲဒၣ်န့ၣ်လီၤႉ တကးဒံးဘၣ်ႇဖဲအပူၤကွံာ်လါယူၤလံ(၅)သီအနံၤအဆၢကတီၢ်ႇသုးကီၣ်ကးကဘီယူၤဟဲခးလီၤ၀ဲတၢ်လၢကၠါမံတိၤႇဖၣ်ယၣ်သ၀ီတၢ်လီၢ်တၢ်ကျဲတဖၣ်အပူၤအိၣ်၀ဲအသိးႇအပူၤကွံာ်လါယူၤအတီၢ်ပူၤသနာ်က့ႇသုးကီၣ်ကးကဘီယူၤဟဲခးလီၤတၢ်ဒီးအီလံၣ်ကၢၣ်ကျိလၢတကူတၢၣ်ႇစံဖၠူၣ်ကိႇသ၀ီခိၣ်ဃၢၤတၢ်လီၢ်တၢ်ကျဲတဖၣ်အပူၤအိၣ်စ့ၢ်ကီး၀ဲအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးႇဖဲအပူၤကွံာ်လါမ့ၤ(၁၈)သီအနံၤဂီၤခီ(၈)နၣ်ရံၣ်တခီအဆၢကတီၢ်ႇပယီၤသုးလၢအိၣ်နိၣ်ခၠိနဲၣ်သုးကလၢၤပူၤတဖၣ်ခးသံကွံာ်၀ဲနိၣ်ခၠိနဲၣ်သ၀ီဖိ(စီၤအီၤဟ့)လၢအသးနံၣ်အိၣ်၀ဲ(၂၇)နံၣ်တဂၤအံၤဖဲအက့ၤဘုၣ်လီၤထိးအဆၢကတီၢ်အိၣ်စ့ၢ်ကီး၀ဲအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တကတီၢ်ဃီႇခီဖျိမ့ၣ်ပိၢ်တၢ်လီၤဘၣ်ယိၣ်ဒီးသုးကီၣ်ကးကဘီယူၤတၢ်လီၤဘၣ်ယိၣ်အိၣ်ဒံး၀ဲအဖၢမုၢ်အဃိႇကမျၢၢ်လီၢ်က၀ီၤဖိတဖၣ်ဘၣ်ဃ့ၢ်အိၣ်ကဒုအသးယံာ်ထီၣ်လၢ(၃)လါဃၣ်ဃၣ်လံဒီးႇတဖံးအီၣ်မၤအီၣ်ဘၣ်၀ဲတၢ်ဘၣ်အမဲာ်ညါဘၣ်ဆဲးအိၣ်ကဒုအသးဒံးအဃိႇသဂၢၢ်ဘၣ်၀ဲအိၣ်ဆိးအီၣ်အီတၢ်ဃံးတၢ်စ့ၤတၢ်ကီတၢ်ခဲသ့ၣ်တဖၣ်အဂ့ၢ်ႇလ့နိးၦၤဃ့ၢ်အိၣ်ကဒုၦၤသ၀ီဖိတဖၣ်စံး၀ဲန့ၣ်လီၤႉ
ဖရူၤစိၤ၀့ၢ်မုၢ်နုာ်ကမျၢၢ်ၦၤဃ့ၢ်မှံဟးဖျိးတဖၣ်သဂၢၢ်ဘၣ်တၢ်အီၣ်တၢ်အီလီၤတူာ်လီၤကာ်တၢ်ဂ့ၢ်ကီ
လါယူၤလံ ၁၁ သီႇ ၂၀၂၄ နံၣ်ႇ ခ့ၣ်အဲးစံၣ် ကရ့ၣ်နံၣ်ကီၢ်စဲၣ်အပူၤ ကမျၢၢ်ၦၤဃ့ၢ်မှံဟးဖျိးလၢအိၣ်ဖရူၤစိၤကီၢ်ဆၣ်မုၢ်နုာ်တကပၤတဖၣ် တကီၢ်ခါခဲအံၤ သဂၢၢ်ဘၣ်၀ဲ တၢ်အီၣ်တၢ်အီလီၤတူာ်လီၤကာ်တၢ်ဂ့ၢ်ကီအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးလၢအိၣ်ဖဲန့ၣ်သ့ၣ်တဖၣ် စံး၀ဲန့ၣ်လီၤႉ ဖရူၤစိၤ၀့ၢ်မုၢ်နုာ်လီၢ်က၀ီၤကမျၢၢ်တဖၣ်အါဒၣ်တက့ၢ်လုၢ်အီၣ်အသးသမူလၢတၢ်မၤအီၣ်ခုးမၤအီၣ်သံၣ်ဒီး ကမျၢၢ်လၢအဃ့ၢ် တၢ်ဒုးတဖၣ်လၢကမၤအီၣ်ခုးမၤအီၣ်သံၣ်အဂီၢ်ခီဖျိဟီၣ်ခိၣ်လီၢ်လီၤစှၤအဃိ အ၀ဲသ့ၣ်သဂၢၢ်ဘၣ်၀ဲ တၢ်အီၣ်တၢ်အီလီၤတူာ်ဒ် အံၤလီၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးလၢအိၣ်ကရ့ၣ်နံၣ်ကီၢ်စဲၣ်ပူၤ တဂၤစံး၀ဲန့ၣ်လီၤႉ အ၀ဲစံး၀ဲလၢ“လီၢ်က၀ီၤကမျၢၢ်တဖၣ်အါလၢအ၀ဲသ့ၣ်မၤအီၣ်ခုးမၤအီၣ်သံၣ်အဃိၦၤလီၢ်အိၣ်ကမှံၤဖိတဖၣ် ကမၤအီၣ်တၢ် အဂီၢ်ကီခဲမီၤနီၤႉမ့၀ံၤနကငါတၢ်လီၢ်အဂီၢ်နါက့ဟီၣ်ခိၣ်အဘူးအလဲဒိၣ်အဃိဒွးတကဲးဘၣ်ႉ အဃိအ၀ဲသ့ၣ်လိၣ်ဘၣ်၀ဲ ဂ့ၢ်ဂီၢ်အူတၢ်အီၣ်တၢ်အီတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဖရူၤစိၤကီၢ်ဆၣ်အံၤကျဲတၢ်လဲၤတၢ်က့ၤတၢ်ဆဲးကျိးစ့ၢ်ကီးကီခဲတကးဒံးဘၣ်အမဲာ်ညါ ၦၤလီၢ်အိၣ်ကမှံဖိ သ့ၣ်တဖၣ်အံၤၦၤလဲၤမၤစၢၤအ၀ဲသ့ၣ်တအိၣ်အါအါအဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိး တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ “ခဲအံၤ(၁၀၂၇)ဒုးယၤတၢ်ဟူးတၢ်ဂဲၤစ့ၢ်ကီးစးထီၣ်ကဒါလံအဃိလၢအံၤတကပၤနါက့ဘၣ်အိၣ်ဒီးတၢ်ပလီၢ်စ့ၢ်မီၤနီၤႉ တၢ်ကီလၢတၢ်ဖိတၢ်လံၤစ့ၢ်ကီးအၦ့ၤဒိၣ်ထီၣ်ခံဆးဘျဲၣ်ညါလံႉၦၤဟဲမၤစၢၤတၢ်စ့ၢ်ကီးတအိၣ်အါအါဘၣ်ႉအဃိလၢတၢ်အီၣ်တၢ်အီတကပၤန့ၣ်ဖးနးညါ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါသုးဟံန့ၢ်တၢ်စိတၢ်ကမီၤသၢနံၣ်ဘျဲၣ်အတီၢ်ပူၤအံၤခီဖျိလီၢ်က၀ီၤကမျၢၢ်သ့ၣ်တဖၣ်အံၤဘၣ်ဃ့ၢ် မှံဟးဖျိးဟး ပလဲာ်သးတဖံးအီၣ်မၤအီၣ်ဘၣ်တၢ်ဘၣ်အဃိ အ၀ဲသ့ၣ်ဘၣ်ပာ်ဂံၢ်ပာ်ဘါဒိးသန့ၤထီၣ်အသးလၢ တၢ်မၤစၢၤကစၢ်တဖၣ် အအိၣ် န့ၣ်လီၤႉ ကမျၢၢ်ၦၤဃ့ၢ်မှံဟးဖျိးသ့ၣ်တဖၣ်အံၤလၢအ၀ဲသ့ၣ်ဟီၣ်က၀ီၤအပူၤန့ၣ်ခီဖျိတၢ်ဒုးကဲထီၣ်၊တၢ်ဒိးလီၤဃာ်၀ဲဟီၣ်လာ် မ့ၣ်ပိၢ် အဃိအ၀ဲသ့ၣ်က့ၤအိၣ်လၢအဟံၣ်အဃီအတၢ်လီၢ်တၢ်ကျဲတဘူၣ်၀ဲဒံးဘၣ်အသိး ၦၤကမျၢၢ်လၢအက့ၤတဖၣ် တနီၤန့ၣ် ယီၢ်ဘၣ်၀ဲဒၣ်မ့ၣ်ပိၢ်ဘၣ်ဒိဘၣ်ထံးကဲထီၣ်သးအိၣ်အဃိတၢ်ကီတၢ်ခဲအိၣ်လၢကက့ၤအိၣ်ဒီးဘၣ်ဟးပလဲာ်သးအဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ကရ့ၣ်နံၣ်ဟီၣ်က၀ီၤအပူၤ ခီဖျိတၢ်ဒုးကဲထီၣ်၀ဲဒၣ်လၢတၢ်လီၢ်သကုၤဆးဒးအဃိ လီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲဒီး ဒ်န့ၣ်အသိးဖရူၤစိၤကီၢ်ဆၣ်စ့ၢ်ကီးခီဖျိခံခီခံကပၤတၢ်ဒုးကဲထီၣ်အဃိ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်(၁၄၀၀၀)ဘျဲၣ်လံအဂ့ၢ်န့ၣ် လီၢ်က၀ီၤတၢ်ကစီၣ်ဒီးကရ့ၣ်နံၣ်ဂ့ၢ်၀ီၦာ်ဘျးစဲကရူၢ် (KCSN)စရီတၢ်ပာ်ဖျါအသိး သ့ၣ်ညါဘၣ်န့ၣ်လီၤႉ
ကၠီၣ်တဲၣ်ကးတံာ်ကွံာ်တၢ်ၦ့ၤကျီၢ်ႇပနၢ်အဃိလီၢ်က၀ီၤအပူၤကျီၢ်ႇပနၢ်အၦ့ၤလီၤ၀ဲကွ့ၢ်ကွ့ၢ်
လါယူၤလံ ၁၀သီႇ ၂၀၂၄နံၣ်ႇ ခ့ၣ်အဲးစံၣ်ႇ ကီၢ်ကၠီၣ်တဲၣ်တကပၤကးတံာ်ကွံာ်၀ဲတၢ်ၦ့ၤကျီၢ်ႇပနၢ်လၢကၠီၣ်တဲၣ်ဒီးကညီကီၢ်စဲၣ်ကျဲတၢ်စိာ်ဆှၢတီၣ်ဆါတကကပၤအဃိႇကညီကီၢ်စဲၣ်ဟီၣ်က၀ီၤတဖၣ်အပူၤႇကျီၢ်ႇပနၢ်အၦ့ၤလီၤ၀ဲကွ့ၢ်ကွ့ၢ်အဂ့ၢ်ႇၦၤဆါတၢ်ၦ့ၤတၢ်ဖိတဖၣ်စံး၀ဲန့ၣ်လီၤႉ စးထီၣ်ဖဲအပူၤကွံာ်လါမ့ၤအတီၢ်ပူၤႇကီၢ်ကၠီၣ်တဲၣ်တကပၤကးတံာ်ကွံာ်၀ဲတၢ်ၦ့ၤကျီၢ်ပနၢ်လၢအဟဲနုာ်လၢကညီကီၢ်စဲၣ်ဒီးကၠီၣ်တဲၣ်ကီၢ်ဆၢတၢ်ဟးထီၣ်က့ၤလီၤကျဲတဆီအဃိႇဟီၣ်က၀ီၤပူၤတၢ်ၦ့ၤက့ၤကျီၢ်ပနၢ်တအိၣ်လၢၤ၀ဲဘၣ်ဒီးကျီၢ်ပနၢ်တဖၣ်အၦ့ၤလီၤကွံာ်၀ဲအဆးတဖၣ်အဆးကွ့ၢ်ကွ့ၢ်အဂ့ၢ်ႇလူၢ်ပျဲၢ်ကီၢ်ဆၣ်လီၢ်က၀ီၤဖိလၢအလဲၤဆါပနၢ်(၆)ဒုဖဲႇကီၢ်ဆၢကျဲတၢ်လီၢ်တတီၤအပူၤတဂၤႇစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ယစးထီၣ်ဆှၢပာ်ယပနၢ်န့ၣ်စးထီၣ်လၢတၢ်ကိၢ်ခါအခါလံၤလံၤလံႇယပနၢ်ခဲလၢာ်န့ၣ်(၆)ဒုႇတဒုန့ၣ်ယဘၣ်ပာ်က့ၤအၦ့ၤဖဲစ့ယိၤတကလးခံကထိဘးလီၤႉယဘၣ်ပာ်ဖဲန့ၣ်န့ၣ်အိၣ်လၢခံလါဘျဲၣ်ညါႉလၢန့ၣ်တကပၤတၦ့ၤ၀ဲဘၣ်အဃိခဲအံၤယကဘၣ်က့ၤမူၤကဒါက့ၤလၢယသ၀ီလီၤႉထဲပၦ့ၤဒုးအီၣ်လီၢ်ဘိန့ၣ်ယရှူလံ”အဂ့ၢ်စံး၀ဲန့ၣ်လီၤႉ အပူၤကွံာ်ကီၢ်ကၠီၣ်တဲၣ်တကပၤအိးထီၣ်၀ဲတၢ်ၦ့ၤကျီၢ်ႇပနၢ်အဆၢကတီၢ်ကျီၢ်ႇပနၢ်ဒိၣ်ဆံၣ်ပြံသွါတၢ်အိၣ်သးအဖီခိၣ်ႇအၦ့ၤအိၣ်၀ဲလၢစ့ယိၤခံကလးဘျဲၣ်ထီၣ်ဘးတုၤလၢသၢကလးဘျဲၣ်အိၣ်၀ဲဘၣ်ဆၣ်ႇတကီၢ်ခါခဲအံၤဒ်ကီၢ်ဆၢစ့တၢ်ဒိးလဲအိၣ်၀ဲအသိးန့ၣ်ႇကျီၢ်ႇပနၢ်တဒုအိၣ်က့ၤထဲတကလးဘျဲၣ်အဃိလၢဟီၣ်က၀ီၤသ၀ီတဖၣ်အပူၤအၦ့ၤအိၣ်တ့ၢ်က့ၤထဲစ့ပယီၤ(၅)ကလီၢ်ကၠးလီၤအဂ့ၢ်ႇလီၢ်က၀ီၤဖိလၢအလုၢ်အီၣ်သးသမူလၢတၢ်ဘုၣ်အီၣ်ကျီၢ်ပနၢ်တဖၣ်စံး၀ဲန့ၣ်လီၤႉ တကးဒံးဘၣ်ႇခီဖျိၦၤၦ့ၤကျီၢ်ႇပနၢ်တအိၣ်၀ဲလၢၤဘၣ်ဒီးအၦ့ၤသ့ၣ်တဖၣ်လီၤ၀ဲဒ်အံၤအဃိကျီၢ်ႇပနၢ်လၢတၢ်ဆှၢထီၣ်၀ဲဆူကီၢ်ဆၢႇလၢအအိၣ်ကတာ်ထီတဖၣ်တၢ်ဘၣ်ဒိဆါလီၤက့ၤ၀ဲအိၣ်၀ဲအသိးႇဒူသ၀ီတနီၤအပူၤလီၢ်က၀ီၤဖိလၢလိၣ်ဘၣ်စ့ႇဒိဆါလီၤကျီၢ်တဖၣ်သနာ်က့ဘၣ်ခီၣ်ရှူ၀ဲအသးအိၣ်၀ဲအဂ့ၢ်ႇကီၢ်ဆၢသ၀ီတဖျၢၣ်အပူၤႇလီၢ်က၀ီၤဖိလၢအဘုၣ်ကျီၢ်တဂၤစံး၀ဲစ့ၢ်ကီး၀ဲန့ၣ်လီၤႉ တကတီၢ်ဃီႇကၠီၣ်တဲၣ်တကပၤကးတံာ်ကွံာ်တၢ်ၦ့ၤကျီၢ်ပနၢ်အံၤခီဖျိလၢတၢ်ဂ့ၢ်မနုၤအဃိလဲၣ်န့ၣ်ႇတၢ်တသ့ၣ်ညါ၀ဲဘၣ်ႇဘၣ်ဆၣ်ကျီၢ်ႇပနၢ်လၢအဟဲနုာ်လၢကီၢ်ပယီၤတကပၤအံၤအၦ့ၤတကြၢးကၢကီၣ်ဘၣ်အဃိႇပတုာ်၀ဲတၢ်မၤကၤၦ့ၤကျီၢ်ႇပနၢ်တၢ်မၤအဂ့ၢ်ႇၦၤလၢအဘူးဒီးၦၤမၤကၤဆါကျီၢ်ကစၢ်တဂၤစံး၀ဲန့ၣ်လီၤႉ ဒ်န့ၣ်အသိးႇတၢ်ကးတံာ်ကွံာ်၀ဲတၢ်ၦ့ၤကျီၢ်ပနၢ်လၢကီၢ်ဆၢကျဲတကပၤအံၤန့ၣ်ႇတနံၣ်အံၤမ့ၢ်တၢ်ကဲထီၣ်အသးအဆိကတၢၢ်တဘျီအဃိၦၤမၤကၤကျီၢ်ႇပနၢ်ဖိတဖၣ်ဘၣ်ခီၣ်ရှူ၀ဲအသးအိၣ်၀ဲဂ့ၢ်ႇသ့ၣ်ညါဘၣ်န့ၣ်လီၤႉ
သုးဟံန့ၢ်တၢ်စိတၢ်ကမီၤသၢနံၣ်ဘျဲၣ်အတီၢ်ပူၤစ့ၦ့ၤလီၤတပယူာ်ဃီဒီးတၢ်လုၢ်တၢ်ၦ့ၤဆဲးထီၣ်ကွ့ၢ်ကွ့ၢ်
လါယူၤလံ ၁၀ သီႇ ၂၀၂၄ နံၣ်ႇ ခ့ၣ်အဲးစံၣ် ကီၢ်ပယီၤအပူၤ စးထီၣ် ၂၀၂၁ သုးဟံးန့ၢ်တၢ်စိတၢ်ကမီၤ၀ံၤလီၢ်ခံ စ့အလုၢ်အၦ့ၤလီၤ၀ဲဒၣ်တပယူာ်ဃီဒီး လၢန့ၣ်အမဲာ်ညါဂံၢ်ခီၣ်ထံးတၢ်အီၣ်တၢ်အီႇတၢ်ဖိတၢ်လံၤစ့ၢ်ကီးအၦ့ၤထီၣ်၀ဲဒၣ်ကွ့ၢ်ကွ့ၢ်လၢတၢ်လီၢ်ကိးတီၤဒဲး ကီၢ်ပူၤကမျၢၢ်တဖၣ်စံး၀ဲန့ၣ်လီၤႉ သုးဟံန့ၢ်တၢ်စိတၢ်ကမီၤ၀ံၤလီၢ်ခံ ထံလီၢ်ကီၢ်ပူၤတၢ်အိၣ်သးတဂၢၢ်တကျၢၤႇတၢ်ဒုးတၢ်ယၤကဲထီၣ်အဖီခိၣ် ကီၢ်ပယီၤ ဒီတဘ့ၣ်အပူၤစ့ၦ့ၤလီၤအလုၢ်အၦ့ၤတအိၣ်၀ဲလၢၤဘၣ်ဒီးစ့ယိၤအၦ့ၤထီၣ်ကွ့ၢ်ကွ့ၢ်အဃိခါဆူညါတၢ်အိၣ်သးမ့ဆဲးလဲၤသးဒ်အံၤန့ၣ်စ့ၦ့ၤကထီၣ်ကဒါအဂီၢ်တညီ၀ဲဒံးဘၣ်အဂ့ၢ်န့ၣ် မၠၣ်၀တံၣ်၀့ၢ်ပူၤကမျၢၢ်လၢအမၤစ့တီလဲတၢ်ဖံးတၢ်မၤတဂၤ စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ“စ့အခဲအံၤလၢ(bank account)ပူၤန့ၣ်စ့ပယီၤစ့ခီလဲတကလီၢ်န့ၣ်အိၣ်တ့ၢ်က့ၤဒၣ်ထဲ(၇၇၅)ဘးဒ်န့ၣ်လီၤႉ မ့မ့ၢ်စ့လၢတၢ်ချၢန့ၣ်အၦ့ၤအိၣ်လၢ(၇၈၅)တုၤ(၇၉၀)ဒံးလၢန့ၣ်ညါႉမၠၣ်၀တံၣ်ဒီတ၀့ၢ်န့ၣ်စ့(bank)ပူၤဒီးတၢ်ချၢန့ၣ်စ့ခီလဲအါစှၤညါလၢ(၈၀၀)တုၤလၢ(၁၀၀၀)ဘးလၢန့ၣ်ညါမီၤနီၤခဲအံၤႉနဆှၢစ့လၢအခီၣ်ထံးန့ၣ်နဘၣ်ဟ့ၣ်အၦ့ၤဒိၣ်န့ၢ်နဆှၢစ့လၢ (bank to bank)ပူၤဒံးမီၤနီၤႉ မ့လဲၤသးဒ်အံၤဒုစ့ၦ့ၤကထီၣ်ကဒါအဂီၢ်ဒုအတယၢၢ်ဃၢတစဲးႉထံကီၢ် တၢ်အိၣ်သးတဂၢၢ်ဘၣ် အဃိယဆိမိၣ်စ့ဒုအၦ့ၤကလီၤအါထီၣ်အါန့ၢ်အ၀ဲအံၤဒံးသ့၀ဲ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါမၠၣ်၀တံၣ်၀့ၢ်ပူၤအပူၤကွံာ်ခံလါသၢလါအခါန့ၣ်ၦၤလဲၤထုးထီၣ်စ့တဂၤန့ၣ်န့ၢ်ဒံးလၢအကယၤလၢအကထိ ကၠးညါဘၣ်ဆၣ် စးထီၣ်ဖဲလါယူၤလံအံၤန့ၣ်ခီဖျိတၢ်မၤဃံးထီၣ်ပာ်ပနီၣ်က့ၤစ့နီၣ်ဂံၢ်အဃိ လဲၤထုးထီၣ်န့ၢ်စ့န့ၢ်က့ၤဒၣ် ထဲအဆံလီၤအဂ့ၢ်န့ၣ် ၦၤခီလဲစ့ဖိလၢအိၣ်မၠၣ်၀တံၣ်တဂၤ စံးအါထီၣ်၀ဲန့ၣ်လီၤႉ စ့ၦ့ၤလီၤအလုၢ်အၦ့ၤတအိၣ်တကးဒံးဘၣ်အမဲာ်ညါကယဲၢ်မ့ၢ်ဂံၢ်ခီၣ်ထံးတၢ်အီၣ်တၢ်အီကိးမံၤကိးဆ့ဃုာ်ဒီး တၢ်ဖိတၢ်လံၤ တဖၣ်အၦ့ၤလီၤတအိၣ်အၦ့ၤဒိၣ်ထီၣ်ကွ့ၢ်ကွ့ၢ်အဃိတၢ်ကီတၢ်ခဲအိၣ်ထီၣ်လၢကမျၢၢ်ၦၤပတီၢ်မုၢ်ဖိတဖၣ် အဂီၢ်အဂ့ၢ်န့ၣ် ကမျၢၢ်လၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ “စ့အလုၢ်အၦ့ၤမ့ဆဲးလဲၤသးဒ်အံၤဒုတၢ်ကီတၢ်ခဲအိၣ်လၢၦၤကိးဂၤဒဲးအဂီၢ်လီၤႉတအိၣ်လၢၤဘၣ်ဘျီၦၤလၢအဖီၣ်ဃာ်စ့ပယီၤ၊ၦၤအိၣ်လၢလာ်တဖၣ်န့ၣ်တၢ်ဘၣ်ဒိအီၤနး၀ဲန့ၣ်မီၤနီၤႉမ့ၢ်မ့ၢ်ၦၤမၤအီၣ်မုၢ်ကျိၤ၀ဲၤကွာ်တဖၣ်န့ၣ်ခီစ့ၦ့ၤမ့ထီၣ်ဒီးမၤ ထီၣ်၀ဲအၦ့ၤႉ စ့ၦ့ၤမ့အိၣ်တစဲးခီန့ၣ်လၢၦၤပတီၢ်မုၢ်ဖိအဂီၢ်ဒုကိၢ်ညၢ်၀ဲတစဲးမီၤနီၤခဲအံၤလၢတၢ်ဆါတၢ်ၦ့ၤလီၢ်ဖးဒိၣ်န့ၣ်ဆီဒံၣ်တကးန့ၣ်အၦ့ၤအိၣ်(၁၀၀၀၀)ဘျဲၣ်လံႉၦၤဟဲက့ၤဆါလၢပဟံၣ်ဃၢၤအံၤတဖျၢၣ်န့ၣ်(၇၀၀)ကၠးႉဒ်သိးယအီၣ်ဟုသးလၢအဂ့ၤတဖၣ်န့ၣ်တထၢၣ်န့ၣ်ခဲအံၤ(၂၀၀၀၀၀) ဘျဲၣ်လံ”အဂ့ၢ်န့ၣ် စံး၀ဲန့ၣ်လီၤႉ ကီၢ်ပယီၤပူၤစးထီၣ်ဖဲသုးဟံန့ၢ်တၢ်စိတၢ်ကမီၤသီသီအခါန့ၣ်စ့ပယီၤတကလီၢ်(၁၀၀ႇ၀၀၀)ကၠးန့ၣ်စ့ခီလဲအၦ့ၤအိၣ်လၢစ့ယိၤ(၁၅၀၀)ဘးဒံးညါဒီးဘၣ်ဆၣ်သုးဟံန့ၢ်တၢ်စိတၢ်ကမီၤန့ၢ်သၢနံၣ်ဘျဲၣ်၀ံၤလီၢ်ခံအတီၢ်ပူၤအံၤ စ့ပယီၤအၦ့ၤ လီၤတပယူာ်ဃီပၢၢ်တုၤလၢခဲအံၤတကလီၢ်န့ၣ်န့ၢ်က့ၤလၢစ့ယိၤထဲ(၇၉၀)ဘးခိၣ်ဃၢၤအဂ့ၢ်န့ၣ် ပှၤခီလဲစ့ဖိတဖၣ်စံး၀ဲ န့ၣ်လီၤႉ
တသီအတီၢ်ပူၤပယီၤသုးဟူးဂဲၤခးလီၤကျိဖးဒိၣ်ဒီးဒြိအဃိဘၣ်သံကမျၢၢ်(၂)ဂၤႇ ဟံၣ်ဃီဘၣ်ဟးဂီၤ၀ဲ
လါယူၤလံ ၉ သီႇ ၂၀၂၄ နံၣ်ႇ ခ့ၣ်အဲးစံၣ် ကညီဒီကလုာ်စၢဖှိၣ်ကရၢဟီၣ်က၀ီၤချၢၣ်လွံၢ်ထူၣ်ကီၢ်ရ့ၣ်လၢၢ်ဒိၣ်ကီၢ်ဆၣ်အပူၤဖဲပူၤကွံာ်မဟါလါယူၤလံ(၈)သီအနံၤန့ၣ်မ့ၢ်လၢပယီၤသုးကီၣ်ကးဟူးဂဲၤခးလီၤကျိဖးဒိၣ်ဒီးသူစ့ၢ်ကီး၀ဲဒြိဟဲတ့ၢ်လီၤ၀ဲမ့ၣ်ပိၢ်အဃိတနံၤဃီအတီၢ်ပူၤကမျၢၢ်ဘၣ်သံ(၂)ဂၤဒီးဟံၣ်ဃီတၢ်သူၣ်ထီၣ်ဘၣ်ဟးဂူာ်ဟးဂီၤအိၣ်၀ဲအဂ့ၢ်န့ၣ်ၦၤလၢအဘူးဒီးလီၢ်က၀ီၤဖဲန့ၣ်သ့ၣ်တဖၣ်စံး၀ဲန့ၣ်လီၤႉ ပယီၤသုးအံၤဖဲ(၈)သီမုၢ်ထူၣ်(၁၂)ဘျဲၣ်အဆၢကတီၢ်ဟးတ့ၢ်လီၤ၀ဲဒြိမ့ၣ်ပိၢ်ဖဲ(တီၤခ့ၣ်)ကရူၢ်ပူၤဒ်အံၤအဖီခိၣ်ကမျၢၢ်ၦၤလီၢ်က၀ီၤဖိလၢဘၣ်သံခံဂၤန့ၣ်မ့ၢ်၀ဲ(လ့အ့ၣ်စူၣ်)ၦၤသ၀ီဖိ(ဒီၣ်မိ၀ါ)သးနံၣ်(၄၂)နံၣ်ဒီး(ကိကၠီၣ်ယဲအီၤ)သးနံၣ်(၃၃)နံၣ်ခံဂၤအံၤဒီးဘၣ်အူအီၣ်ဃုာ်ဒီးဟံၣ်တၢ်သူၣ်ထီၣ်စ့ၢ်ကီးအိၣ်၀ဲအဂ့ၢ်လီၢ်က၀ီၤၦၤဘၣ်မူဘၣ်ဒါစံး၀ဲဒၣ်အသိးသ့ၣ်ညါဘၣ်န့ၣ်လီၤႉ ဖဲတနံၤဃီ၀ဲန့ၣ်န့ၣ်ပယီၤသုးကီၣ်ကးခီၣ်ချ့သုးရ့ၣ်(ခမရ-၄၃၉)ဒီးခီၣ်သုးရ့ၣ်(ခလရ-၂၆၄)သ့ၣ်တဖၣ်ခးလီၤ (Howitzer)ကျိဖးဒိၣ်ဆူကမျၢၢ်ဒူသ၀ီတၢ်အိၣ်တၢ်ဆိးပူၤအဃိဘၣ်ဟးဂီၤကွံာ်၀ဲ(ယွၤမၣ်ကၠံ)သ၀ီၦၤသ၀ီဖိဟံၣ်တဖျၢၣ်ဒီး(လ့အ့ၣ်စူၣ်)သ၀ီကမျၢၢ်ဟံၣ်တဖျၢၣ်အဂ့ၢ်န့ၣ်သ့ၣ်ညါဘၣ်စ့ၢ်ကီးန့ၣ်လီၤႉ ဘၣ်ထွဲဒီးသုးကီၣ်ကးဟူးဂဲၤခးလီၤကျိဖးဒိၣ်ဒီးဒြိသ့ၣ်တဖၣ်အံၤန့ၣ်လၢၢ်ဒိၣ်ကီၢ်ဆၣ်ၦၤလီၢ်က၀ီၤဖိလၢအိၣ်ဘူးဖဲန့ၣ်တဂၤစံး၀ဲလၢ “ပယီၤသုးကီၣ်ကးခးလီၤကျိဖးဒိၣ်န့ၣ်ခး၀ဲကိးနံၤဒဲးလီၤႉ အ၀ဲသ့ၣ်အိၣ်လၢ(ပ့ၣ်စလိၣ်)သုးကလၢၤအပူၤဒီး ခးစိ၀ဲကျိဖးဒိၣ်လၢ(ကၠ့ၣ်ကွ့ႇ တီၤခ့ၣ်ႇ လ့အ့ၣ်စူၣ်)သ၀ီသ့ၣ်တဖၣ်န့ၣ်အပူၤမီၤနီၤႉ ခးလီၤ၀ဲကျိဖးဒိၣ်န့ၣ်ဘၣ် ၀ဲကမျၢၢ်အိၣ်၀ဲလီၤဘၣ်ဆၣ်လၢတံတခီတသ့ၣ်ညါလီၤတံၢ်လီၤဆဲးဘၣ်ႉ ဖဲမဟါစံာ်ပျီပူၤန့ၣ်သုးကီၣ်ကးဒြိ ကအိၣ်လၢဃုဘ့ၣ်နွံဘ့ၣ်ညါဟဲ၀ဲမီၤနီၤႉ အဃိန့ၣ်ၦၤဖှံဟီၣ်ခိၣ်ညါထ့ၣ်ဖိသ့ၣ်တဖၣ်န့ၣ်ဟဲက့ၤထီၣ်ဃ့ၢ်၀ဲခဲ လၢာ်လီၤႉ ကမျၢၢ်သ့ၣ်တဖၣ်ဒုဘၣ်အိၣ်လၢကနၣ်တၢ်ကစီၣ်ဒ်န့ၣ်လီၤမီၤႉ တၢ်မ့ၢ်ဂၢၢ်ထီၣ်တစဲးန့ၣ်က့ၤ၀ဲလၢသ၀ီအပူၤဒီးတၢ်မ့ၢ်သီၣ်ထီၣ်ၦၤမ့ၢ်ဟ့ၣ်လီၤတၢ်ကစီၣ်န့ၣ်ဃ့ၢ်ယံာ်ထီၣ်၀ဲဒီးဒူသ၀ီလီၤႉ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢၢ်ဒိၣ်ကီၢ်ဆၣ်ဟီၣ်က၀ီၤအပူၤဖဲလါယူၤထီၣ်သီတၢတနွံအတီၢ်ပူၤန့ၣ်ပယီၤသုးကျိၤလၢဟဲထီၣ်သ့ၣ်တဖၣ်နုာ်လီၤဒွဲၣ်အူႇ မၤဟးဂီၤကွံာ်၀ဲကမျၢၢ်ၦၤလီၢ်အိၣ်ကမှံဖိတၢ်လီၢ်တၢ်ကျဲဒ်အံၤအဖီခိၣ်ၦၤလီၢ်အိၣ်က မှံဖိသ့ၣ်တဖၣ်သဂၢၢ်ဘၣ်ဒီးတၢ်အိၣ်တၢ်ဆိးလီၢ်ကျဲအဂ့ၢ်ကီၢ်ဆၣ်ၦၤဘၣ်မူဘၣ်ဒါစံး၀ဲန့ၣ်လီၤႉ ခီဖျိသုးကီၣ်ကးခးလီၤကျိဖးဒိၣ်ဒီးဟဲတ့ၢ်လီၤမ့ၣ်ပိၢ်ဒီးဒြိအဃိလၢၢ်ဒိၣ်ကီၢ်ဆၣ်လါယူၤလံဒီတလါအတီၢ်ပူၤကမျၢၢ်ဘၣ်သံ၀ဲ(၁၆)ဂၤဒီးဘၣ်ဒိ၀ဲခဲလၢာ်(၁၀)ဂၤအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤႉ
သုးဟံန့ၢ်တၢ်စိတၢ်ကမီၤ၀ံၤလီၢ်ခံ ကီၢ်ဆၢတီၤထီဒီးတီၤခၢၣ်သးကၠိဖိနီၣ်ဂံၢ်ဟဲအါထီၣ်အဂ့ၢ် (KECD)စံး၀ဲ
လါယူၤလံ ၉ သီႇ ၂၀၂၄ နံၣ်ႇ ခ့ၣ်အဲးစံၣ် (၂၀၂၁)သုးဟံးန့ၢ်တၢ်စိတၢ်ကမီၤ၀ံၤလီၢ်ခံ ခီဖျိဟီၣ်က၀ီၤတၢ်ဒုးတၢ်ယၤတၢ်အိၣ်သးအကလုာ်ကလုာ်အဃိ လၢကီၢ်ကၠီၣ်တဲၣ်-ကီၢ်ပယီၤထံဆၢကီၢ်ဆၢတၢ်လီၢ်သ့ၣ်တဖၣ်န့ၣ် တီၤထီဒီးတီၤခၢၣ်သးကၠိတဖၣ် ကၠိဖိနီၣ်ဂံၢ်ဟဲအါ ထီၣ်၀ဲဒၣ်အသိး တနံၣ်အံၤဖၣ်အၣ်ကီၢ်ရ့ၣ်စ့ၢ်ကီးၦၤကၠိဖိနီၣ်ဂံၢ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢကညီကူၣ်သ့ဆဲး လၤ၀ဲၤကျိၤ(KECD)ၦၤဘၣ်မူဘၣ်ဒါအအိၣ်န့ၣ်လီၤႉ (၂၀၂၁)လါယနူၤအါရံၤထီၣ် ၁ သီ သုးဟံးန့ၢ်တၢ်စိိတၢ်ကမီၤ၀ံၤလီၢ်ခံ ကီၢ်ပယီၤပူၤဒုးယၤတၢ်သဘံၣ်သဘုၣ်ကဲထီၣ် တၢ်ဒုးတၢ်ယၤကဲထီၣ်တၢ်အိၣ်သးတဂ့ၤလၢၤဘၣ်အဃိ ကၠိလၢအိၣ်သုးပဒိၣ်စုတီၤဖီလာ်တဖၣ်အံၤ အိးထီၣ်သးတန့ၢ် လၢၤဘၣ်အဖီခိၣ် ထံဆၢကီၢ်ဆၢတီၤထီဒီးတီၤခၢၣ်သးကၠိဖိနီၣ်ဂံၢ်ဘၣ်ဟဲအါထီၣ်၀ဲဒၣ်ဒ်အံၤလီၤအဂ့ၢ်န့ၣ် ဖၣ်အၣ်ကီၢ်ရ့ၣ် (KECD)၀ဲၤကျိၤခိၣ် ပဒိၣ်စီၤဖျဲၣ်ထူ စံး၀ဲဒ်အံၤန့ၣ်လီၤႉ “မ့မ့ၢ်လၢသုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ်ထံဆၢကီၢ်ဆၢဒုလီၤဆီဒၣ်တၢ်တီၤထီကၠိဒီးတီၤခၢၣ်သးတဖၣ်န့ၣ် ၦၤကၠိဖိနီၣ်ဂံၢ်ဟဲအါထီၣ်အိၣ်မီၤႉတခါလၢသုးဟံန့ၢ်တၢ်စိတၢ်ကမီၤ၀ံၤလီၢ်ခံန့ၣ်ကၠိလၢအိၣ်ဟီၣ်က၀ီၤပူၤပဒိၣ်ကၠိသ့ၣ် တဖၣ်န့ၣ်တထီၣ်လၢၤဘၣ်ႇမ့၀ံၤဒီးလၢဒူခိၣ်သ၀ီဃၢၤကၠိတထီၣ်ဘၣ်ခီဖျိတၢ်ဒုးတၢ်ယၤအဃိဒီးသုးဟံန့ၢ်တၢ်စိတၢ်က မီၤအဖီခိၣ်န့ၣ်ကၠိတဖၣ်အိးထီၣ်သးတန့ၢ်လၢၤဘၣ်အဃိၦၤကၠိဖိဟဲအါထီၣ်ဒ်န့ၣ်မီၤနီၤႉမ့မ့ၢ်လၢဖၣ်အၣ်ကီၢ်ရ့ၣ်ပူၤခီန့ၣ် ကီၢ်ဆၣ်ကိးဘ့ၣ်ဒဲးဃၣ်ဃၣ်ခီဖျိၦၤဃ့ၢ်မှံဟးဖျိးနီၣ်ဂံၢ်ဟဲထီၣ်အဃိၦၤကၠိဖိနီၣ်ဂံၢ်ဟဲအါထီၣ်ဒုလီၤတံၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါထံလီၢ်ကီၢ်ပူၤတၢ်အိၣ်သးအဖီခိၣ်ၦၤကၠိဖိလၢအဟဲထီၣ်သုးလီၢ်သုးကျဲဟဲထီၣ်က့ၤကၠိလၢထံဆၢ ကီၢ်ဆၢသ့ၣ်တဖၣ်န့ၣ် အါဒၣ်တက့ၢ်အိၣ်ဟဲ၀ဲဒၣ်လၢဒူသထူၣ်ႇတီအူႇချၢၣ်လွံၢ်ထူၣ်ကီၢ်ရ့ၣ်ႇဘျံးဒ၀ဲၢ်ကီၢ်ရ့ၣ်ဃုာ်ဒီး ကီၢ်ရ့ၣ်တၢ်လီၢ်လၢအဂၤသ့ၣ်တဖၣ်အိၣ်၀ဲဒၣ်အဂ့ၢ်န့ၣ် ပဒိၣ်စီၤဖျဲၣ်ထူ စံးအါထီၣ်၀ဲန့ၣ်လီၤႉ သုးဟံန့ၢ်တၢ်စိတၢ်ကမီၤ၀ံၤလီၢ်ခံလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကီၢ်ရ့ၣ်ကိးဘ့ၣ်ဒဲးဃၣ်ဃၣ်အပူၤ ဒုးယၤတၢ် သဘံၣ်သဘုၣ်ကဲထီၣ်၀ဲဘၣ်ဆၣ်လီၤဆီဒၣ်တၢ်ဖၣ်အၣ်ကီၢ်ရ့ၣ်(သုးက့ ၇)အံၤ ဘၣ်ကွၢ်ဆၢၣ်မဲာ်တၢ်ဒုး တၢ်ယၤဒ်သိးကီၢ် ရ့ၣ်အဂၤအိၣ်စှၤဘၣ်ဆၣ် ခီဖျိကီၢ်ပူၤတၢ်သဘံၣ်သဘုၣ်အဃိၦၤဃ့ၢ်မှံဟးဖျိးတဖၣ်အကျါပၣ်ဃုာ်ဖိဒံဖိသၣ်လၢဘၣ် ထီၣ် ကၠိသ့ၣ်တဖၣ်အါမးအဂ့ၢ်န့ၣ် ပဒိၣ်စီၤဖျဲၣ်ထူ စံးလီၤ၀ဲလၢ(KECD-Facebook Page)ပူၤန့ၣ်လီၤႉ “နံၣ်လၢကဟဲ(၂၀၂၄-၂၅)တၢ်မၤလိနံၣ်ဒုတၢ်ကီတၢ်ခဲသ့ၣ်တဖၣ်ဒုအိၣ်လီၤႉလၢပဖၣ်အၣ်ကီၢ်ရ့ၣ်ပူၤဒုပတဆၢမုၢ် လၢ်လၢ တၢ်ဒုးတၢ်ယၤသ့ၣ်တဖၣ်အိၣ်ထီၣ်ဘၣ်ႉဆၢကတီၢ်ခဲအံၤပဘၣ်ကွၢ်ဆၢၣ်မဲာ်တၢ်အိၣ်တမံၤလၢဖၣ်အၣ်ကီၢ်ရ့ၣ်ပူၤ န့ၣ်ၦၤဃ့ၢ်မှံ ဟးဖျိးနီၣ်ဂံၢ်အိၣ်အကလးဆူဖီခိၣ်လီၤႉဖဲန့ၣ်ကပၣ်ဃုာ်ၦၤဖိသၣ်လၢကဘၣ်မၤလိတၢ်သ့ၣ်တဖၣ်လီၤႉတနံၣ်အံၤပပာ်ပသးလၢၦၤကၠိဖိလၢအဟဲအိၣ်ကမှံတဖၣ်နါက့ကန့ၢ်မၤလိဘၣ်တၢ်ဒ်သိးလီၢ်က၀ီၤဖိသ့ၣ်တဖၣ်လီၤႉလီၤလီၤဆီဆီလၢၦၤဃ့ၢ်အိၣ်ကမှံဖိအတၢ်မၤလိအလီၢ်ဒုပကတဲၤကတီၤတအိၣ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ ဖၣ်အၣ်ကီၢ်ရ့ၣ်ပူၤ...
ပယီၤသုးဖီၣ်မၤသံအီၣ် ကီးတရံးလီၢ်က၀ီၤၦၤလီၢ်အိၣ်ကမှံဖိအဆၣ်ဖိကီၢ်ဖိ
လါယူၤလံ ၈သီႇ ၂၀၂၄နံၣ်ႇ ခ့ၣ်အဲးစံၣ် ပယီၤသုးကီၣ်ကးအအီၣ်စ့ၣ်ယၣ်သုးကျိၤလၢဟဲအိၣ်ဆီလီၤသးဖဲ ကီးတရံး၀့ၢ်ဟီၣ်က၀ီၤသ့ၣ်တဖၣ် ဖီၣ်မၤသံအီၣ်၀ဲဒၣ်လီၢ်က၀ီၤမျၢၢ်လၢဘၣ်ဃ့ၢ်တၢ်ဒုးဆၣ်ဖိကီၢ်ဖိလၢအဘုၣ်၀ဲသ့ၣ်တဖၣ်ဖဲဒၣ်အသးအဂ့ၢ် လီၢ်က၀ီၤကမျၢၢ်စံး၀ဲဒၣ်န့ၣ်လီၤႉ တကီၢ်ခါခဲအံၤလီၢ်က၀ီၤကမျၢၢ်သ့ၣ်တဖၣ်က့ၤကွၢ်တၢ်လၢဒူသ၀ီတဘူၣ်ဒံးဘၣ်အဃိပယီၤသုးကီၣ်ကး အအီၣ်စ့ၣ်ယၣ်သုးကျိၤလၢ အ့ရှၢၣ်ကျဲမုၢ်သီဒီးရၤမတံကီးရံးကျဲမုၢ်လီၢ်လံၤကတၢၢ်တၢၢ်န့ၣ် ကမျၢၢ်ဖိဆီဒီးထိးန့ၣ်ဖီၣ်အီၣ်တ့ၢ်၀ဲဖးယံာ်လံဒီးအခဲအံၤစးထီၣ်ဖီၣ်မၤသံအီၣ်၀ဲကျီၢ်သ့ၣ်တဖၣ်ဖဲအ၀ဲသ့ၣ်ဘၣ်သးအီၣ်၀ဲအဂ့ၢ် ကီတရံးလီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲဒၣ်ဒ်အံၤန့ၣ်လီၤႉ အ၀ဲစံး၀ဲလၢ“ပယီၤသုးသ့ၣ်တဖၣ်အံၤအိၣ်ဒီးအီၣ်၀ဲဒၣ်ၦၤသ၀ီဖိကျီၢ်လီၤႉဖဲအအိၣ်ဖဲတတဲၤကူ နိၣ်လါတဒူၣ်န့ၣ်ႇအီၣ်ၦၤကျီၢ်တစှၤလၢအဒုလံဘၣ်ႉဖဲယသ့ၣ်ညါအသိးန့ၣ်အိၣ်၃ဒု၄ဒုလံႉလၢယတသ့ၣ်ညါဘၣ်န့ၣ်ကအိၣ်တဘျုးလၢအဒုဒံးန့ၣ်လီၤႉပယီၤအိၣ်အဃိန့ၣ်သ၀ီဖိတဖၣ်က့ၤကွၢ်တၢ်တဘူၣ်ဘၣ်ႉ”အဂ့ၢ်စံး၀ဲဒၣ်န့ၣ်လီၤႉ ပယီၤသုးအီၣ်စ့ၣ်ယၣ်သုးကျိၤ၀ဲအံၤလၢကထီၣ်ဒိၣ်စိက့ၤရၤမတံ၀့ၢ်အဂီၢ်ဖဲအပူၤကွံာ်လါအ့ဖြ့ၣ်အဆၢကတီၢ်ဟဲထီၣ်၀ဲဒီးဂံၢ်ဘါအါအါဂီၢ်ဂီၢ်ဒီးသ၀ီလၢအ၀ဲသ့ၣ်အိၣ်ဆီလီၤသးစးထီၣ်လၢရၤမတံ-ကီးတရံးကျဲလီၢ်လံၤ နိၣ်နဲၣ်ႇယီၢ်ကုးႇကီမူႇပၠါပ့ၤႇနမူႇကၠီၤရှၤကိသ၀ီသ့ၣ်တဖၣ်ဒီးတုၤလၢအ့ရှၢၣ်ကျဲမုၢ်သီ ကီးနွဲၣ်ႇယွၤသ့ၣ်ကိႇတတဲၤကူဒီးအီကြီသ၀ီဒီတကျိၤန့ၣ် ဖီၣ်အီၣ်၀ဲကမျၢၢ်ထိးႇဆီဒီးပနၢ်သ့ၣ်တဖၣ်အမဲာ်ညါတကီၢ်ခါခဲအံၤတပျုၤတပျီၤကျိဖးဒိၣ်ႇတ့ၢ်လီၤ၀ဲမ့ၣ်ပိၢ်ဒီးဒြိအိၣ်၀ဲတပယူၤဃီအဃိကမျၢၢ်ဘၣ်ဒိဘၣ်ထံးဘၣ်သံဘၣ်ၦၢ်အိၣ်၀ဲဒၣ်အဂ့ၢ်သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတကီၢ်ခါခဲအံၤကြုၢ်တုဒီးကီတရံးကမျၢၢ်ဖိသ့ၣ်တဖၣ်ခီဖျိနၢ်ဟူ၀ဲဒၣ်လၢ သုးကီၣ်ကးကထီၣ်ရှဲလဲကွံာ်တၢ်လီၢ်လၢကယဲၢ်မ့ၢ်တၢ်ပၢၢ်ဆၢသုးပာ်ဖှိၣ်အိၣ်တၢ်လီၢ်သ့ၣ်တဖၣ်အဃိ ကမျၢၢ်သ့ၣ်တဖၣ်ဘၣ်ဃ့ၢ်အိၣ်ကဒုကဒီးသးအိၣ်၀ဲဒၣ်အဂ့ၢ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ