ကီၣ်ဘ့ဖိဒံဖိသၣ်လၢဃ့ၢ်တၢ်ဒုးက့ၤအိၣ်လၢသ၀ီသ့ၣ်တဖၣ် တၢ်ကီတၢ်ခဲအိၣ်လၢကဆဲးထီၣ်ကၠိ
လါယူၤလံ ၈ သီႇ ၂၀၂၄ နံၣ်ႇ ခ့ၣ်အဲးစံၣ် တလၢၤ-ကညီကီၢ်စဲၣ်အဆၢ ကီၣ်ဘ့သ၀ီပူၤ ခီဖျိတၢ်ဒုးတၢ်ယၤအဃိ ကမျၢၢ်သ့ၣ်တဖၣ်ဘၣ်ဃ့ၢ်ထီၣ်၀ဲဒီး ဖဲအပူၤကွံာ်လါယူၤထီၣ်တ၀ာ်အခါန့ၣ် ၦၤဖိဒံဖိသၣ်လၢအဃ့ၢ်တၢ်ဒုးတဖၣ်က့ၤနုာ်လီၤအိၣ်၀ဲလၢသ၀ီပူၤဒီး အ၀ဲသ့ၣ်တၢ်ကီတၢ်ခဲအိၣ်လၢကဆဲးထီၣ်ကၠိအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါမးရှးလၢာ်အခါန့ၣ် ခီဖျိတၢ်နုာ်လီၤခး၀ဲဒၣ်ကီၣ်ဘ့ဟီၣ်က၀ီၤပၢၤကီၢ်၀ဲၤလီၢ်အဃိ တၢ်ဒုးကဲထီၣ်၀ဲ ဒၣ်ဒိၣ်ဒိၣ်မုၢ်မုၢ်လၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီးအဃိဖဲန့ၣ်ကီၣ်ဘ့သ၀ီဃုာ်ဒီဒူသ၀ီလၢအဂၤ ကမျၢၢ်သ့ၣ်တဖၣ်ဘၣ်ဃ့ၢ်ထီၣ်၀ဲအသိး ဖဲလါအ့ဖြ့ၣ်အခါန့ၣ်ပယီၤသုးကျိၤဟဲထီၣ်နုာ်လီၤအိၣ်ဆိးက့ၤ၀ဲလၢသ၀ီပူၤ တုၤလၢခဲအံၤတစုန့ၣ်လီၤႉ ဖဲန့ၣ်၀ံၤလီၢ်ခံလီၢ်က၀ီၤကမျၢၢ်တနီၤက့ၤအိၣ်လၢအတၢ်လီၢ်တၢ်ကျဲအဒူသ၀ီပူၤအိၣ်ဒီး ဘၣ်ဆၣ်ၦၤကၠိဖိလၢ အဘၣ်ထီၣ်ကၠိတဖၣ်တနီၤန့ၣ်ခီဖျိဟီၣ်က၀ီၤတၢ်အိၣ်သးတဂၢၢ်တကျၢၤဘၣ်အဃိ တၢ်ကီတၢ်ခဲအိၣ်လၢကဆဲးထီၣ်ကၠိ အဂ့ၢ်န့ၣ် ကီၣ်ဘ့သ၀ီဖိတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ “အခိၣ်သ့ၣ်ဒုၦၤကၠိဖိတဖၣ်တၢ်ကီတၢ်ခဲအိၣ်လၢကထီၣ်ကၠိမီၤနီၤႉပဟဲအိၣ်ဖဲအံၤန့ၣ်လၢကပာ်ဖိသၣ်ကၠိအဂီၢ်ကၠိဟး ထီၣ်လံာ်အုၣ်သးတအိၣ်ဘၣ်ႉပၢၢ်တုၤလၢကၠိသရၣ်မုၣ်စ့ၢ်ကီးဘၣ်ဃ့ၢ်အဃိမ့ၢ်အ၀ဲသ့ၣ်လဲၤတုၤဖဲလဲၣ်မးတသ့ၣ်ညါဘၣ်ႉ ပၢၤကီၢ်၀ဲၤလီၢ်ဒီးကၠိန့ၣ်အိၣ်ဘူးဘူးဖိလီၤႉတၢ်မ့သီၣ်ထီၣ်န့ၣ်ၦၤဘၣ်စံၣ်ဒီကၠိလီၤအဃိကၠိဖိမိၢ်ပၢ်တဖၣ်ပျံၤတၢ်ပာ်အဒံၣ်အဖိလၢကၠိတဘူၣ်ဘၣ်မီၤနီၤ”အဂ့ၢ်န့ၣ် ကၠိဖိမိၢ်ပၢ်လၢအဃ့ၢ်တၢ်ဒုးတဂၤ စံး၀ဲန့ၣ်လီၤႉ တကီၢ်ခါခဲအံၤလၢသ၀ီခိၣ်ထိးဒီးသီခါဖၠၣ်ကရၢၢ်ပူၤန့ၣ်ပယီၤသုးသ့ၣ်တဖၣ်အိၣ်ဆီလီၤအသးဒံးဒီး ဒ်န့ၣ်အသိး ဂံၢ်ခီၣ်ထံးကၠိလၢအိၣ်သ၀ီပူၤတဖၣ်အိးထီၣ်အသးဘၣ်ဆၣ် သုးကီၣ်ကးအကူၣ်သ့ၦၤမၤတၢ်ဖိတဖၣ် လၢတၢ်ဂ့ၢ်တအိၣ် နီမံၤ မၢဖိသၣ်လဲၤထီၣ်ကၠိသိးကူကၤယိယိဖိလၢအတမ့ၢ်ကၠိတၢ်ကူတၢ်သိးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လီၢ်က၀ီၤကမျၢၢ်ပိာ်မုၣ်လၢအဂၤတဂၤစ့ၢ်ကီးစံး၀ဲလၢ“နထီၣ်ကၠိန့ၣ်နကၤကၠိတၢ်ကူတၢ်သိးတန့ၢ်ဘၣ်ႉနဘၣ်သိးဒၣ် ဟံၣ်တၢ်ကူတၢ်ကၤလီၤႉၦၤဖိသၣ်ႇကၠိသရၣ်မုၣ်လဲၤထီၣ်ကၠိအိၣ်ႇၦၤလဲၤထီၣ်ကၠိကိးမုၢ်နံၤဒဲးလီၤႉတၢ်မၢၤဘၣ်မၤလိလံာ်တခီခီဘၣ်ကွၢ်ဒီးတၢ်အိၣ်သးတခီခီဒ်န့ၣ်လီၤႉ”အဂ့ၢ်န့ၣ် စံး၀ဲန့ၣ်လီၤႉ လၢကီၣ်ဘ့သ၀ီအခိၣ်အဃၢၤဒူသ၀ီတဖၣ်အပူၤခီဖျိတၢ်အိၣ်သးတဂၢၢ်တကျၢၤဒံးဘၣ်အဃိ ဖဲကၠိိထီၣ်အကတီၢ်အံၤ ဒ်သိးဖိဒံဖိသၣ်သ့ၣ်တဖၣ်ကထီၣ်ဘၣ်ကၠိမုာ်မုာ်ခုၣ်ခုၣ်ဘျ့ဘျ့ဆှီဆှီအဂီၢ်ဘၣ်ကိၢ်ဘၣ်ဂီၤတၢ်လၢအ၀ဲသ့ၣ်အဂီၢ် အဂ့ၢ်န့ၣ် ကၠိဖိမိၢ်ပၢ်တဖၣ်စံး၀ဲန့ၣ်လီၤႉ
လၢၢ်ဒိၣ်ကီၢ်ဆၣ်ပယီၤသုးကျိဖးဒိၣ်အဃိတလါတီၢ်ပူၤကမျၢၢ်သံ(၁၆)ဂၤဘၣ်ဒိ(၁၀)ဂၤ
လါယူၤလံ ၈ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့(၃)လၢၢ်ဒိၣ်ကီၢ်ဆၣ်ဟီၣ်က၀ီၤအပူၤစးထီၣ်ဖဲပူၤ ကွံာ်လါယူၤ(၁)သီတုၤ(၃၀)သီလါယူၤဒီတလါအတီၢ်ပူၤအံၤန့ၣ်ခီဖျိသုးကီၣ်ကးတကပၤခးလီၤကျိဖးဒိၣ်ခဲလၢာ်အိၣ်၀ဲ(၁၈၆)ဖျၢၣ်အဃိဘၣ်သံ၀ဲကမျၢၢ်(၁၆)ဂၤဘၣ်ဒိ(၁၀)ဂၤအဂ့ၢ်န့ၣ်ကီၢ်ဆၣ်အၦၤဘၣ်မူဘၣ်ဒါစံး၀ဲဒၣ်န့ၣ်လီၤႉ တကီၢ်ခါလၢၢ်ဒိၣ်ကီၢ်ဆၣ်ဟီၣ်က၀ီၤအပူၤန့ၣ်သုးကီၣ်ကးတကပၤအတၢ်ဟူးတၢ်ဂဲၤဟဲအါထီၣ်၀ဲဒၣ်ဒ်အမ့ၢ်အိၣ်လၢအသုးကလၢၤအပူၤဒီးခးလီၤစိကျိဖးဒိၣ်ဆူကမျၢၢ်ဒူသ၀ီတၢ်လီၢ်တၢ်ကျဲအပူၤဖဲအ၀ဲသ့ၣ်အဲၣ်ဒိးခးလီၤ၀ဲဒၣ်ဒီးဒ်န့ၣ်အသိးဟူးဂဲၤဟဲခးလီၤ၀ဲဒၣ်တၢ်ဒီးကဘီယူၤႇ ဒြိသ့ၣ်တဖၣ်စ့ၢ်ကီးအဂ့ၢ်န့ၣ်လၢၢ်ဒိၣ်ကီၢ်ဆၣ် ၦၤကတိၤတၢ်ပၢပဒိၣ်စီၤ၀ါမုၢ်စံး၀ဲဒၣ်အံၤန့ၣ်လီၤႉ “ဘၣ်ထွဲဒီးလါယူၤဒီတလါအတီၢ်ပူၤန့ၣ်ဒုၣ်ဒါအတၢ်ဟူးတၢ်ဂဲၤအါ၀ဲလၢခးစိကျိဖးဒိၣ်လၢအလီၢ်ဒီးခးလီၤ၀ဲဒၣ်ဆူဒူသ၀ီလၢအဲၣ်ဒိးခးလီၤ၀ဲသ့ၣ်တဖၣ်မီၤနီၤႉ ဒ်န့ၣ်အသိးတၢ်ဟူးတၢ်ဂဲၤလၢကလံၤကျါကဘီယူၤမ့ၢ်ဂ့ၤႇ ဒြိမ့ၢ် ဂ့ၤဟူးဂဲၤ၀ဲဒၣ်လီၤႉ မ့မ့ၢ်လၢခီၣ်သုးတၢ်ဟူးတၢ်ဂဲၤလၢသုးကျိၤအက့ၢ်အဂီၤခီဒုထဲန့ၣ်တအိၣ်ဘၣ်ႉ မ့ၢ်ဘၣ်ကွၢ် က့ၤခီန့ၣ်ခီဖျိဒုၣ်ဒါအတၢ်မၤအၢမၤပယွဲဒ်အမ့ၢ်၀ဲတၢ်ခးလီၤစိကျိဖးဒိၣ်ႇ ဒြိႇ ကဘီယူၤအဃိန့ၣ် ထံဖိကီၢ်ဖိက မျၢၢ်သ့ၣ်တဖၣ်တကီၢ်ခါခဲအံၤန့ၣ်ဘၣ်ဒိဘၣ်ထံးႇ ဘၣ်သံၣ်ၦာ်၀ဲမီၤနီၤႉ ဒီးအခဲအံၤန့ၣ်လၢၢ်ဒိၣ်ကီၢ်ဆၣ်အပူၤန့ၣ် ကမျၢၢ်သ့ၣ်တဖၣ်ဘၣ်ဃ့ၢ်မှံဟးဖျိးႇ အိၣ်လၢဟံၣ်လၢဃီတဘူးဘၣ်ႉ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤႉ လၢလါယူၤဒီတလါအတီၢ်ပူၤန့ၣ်ဒူသ၀ီလၢသုးကီၣ်ကးခီၣ်သုးရ့ၣ်(ခလရ-၆၀) (ခလရ-၂၆၄)ဒီးခီၣ်ချ့သုးရ့ၣ် (ခမရ-၃၀၇) (ခမရ-၂၀)သ့ၣ်တဖၣ်ခးလီၤ၀ဲကျိဖးဒိၣ်အါကတၢၢ်အလီၢ်န့ၣ်မ့ၢ်၀ဲၦဲၤလိာ်ကျိၤအမုၢ်နုာ်ဒူသ၀ီတၢ် လီၢ်ဒီးကျီမီၤခိၣ်သ၀ီတုၤလၢတိၤသ့ၣ်ဖူသ၀ီဒီတကျိၤလၢဒူသ၀ီ(၈)ဖျၢၣ်အပူၤအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤအၦၤဘၣ်မူဘၣ်ဒါအအိၣ်န့ၣ်လီၤႉ လၢန့ၣ်အမဲာ်ညါပယီၤသုးကီၣ်ကးလၢဟဲအိၣ်ဆီလီၤအသးဖဲ(ကိမၠ့ၣ်သါယၤ)တၢ်လီၢ်ဖဲန့ၣ်သ့ၣ်တဖၣ်ကညီတၢ်ပၢၢ်ဆၢသုးမုၢ်ဒိၣ်တကပၤဟူးဂဲၤ၀ဲကိးနံၤဒဲးဃၣ်ဃၣ်အဃိသုးကီၣ်ကးခီၣ်သုးဂံၢ်ဘါလၢကဟဲထီၣ်ဟူးဂဲၤဆှၢန့ၢ်၀ဲတၢ်အီၣ်အဂီၢ်ဟဲထီၣ်၀ဲတညီဘၣ်အဖီခိၣ်အ၀ဲသ့ၣ်ဘၣ်ဒိးသန့ၤထီၣ်အသးလၢကဘီယူၤအတၢ်တီဆှၢန့ၢ်၀ဲလီၤအဂ့ၢ်ပဒိၣ်စီၤ၀ါမုၢ်စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်ဟီၣ်က၀ီၤဒီတဘ့ၣ်လၢၤအပူၤန့ၣ်စးထီၣ်လၢလါယနူၤအါရံၤတုၤလါမ့ၤလၢယဲၢ်လါအတီၢ်ပူၤအံၤခီဖျိပယီၤသုးကီၣ်ကးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိန့ၣ်ဘၣ်သံကမျၢၢ်(၅၃)ဂၤဘၣ်ဒိ(၁၅၄)ဂၤအကျါပိာ်မုၣ်ပာ်ဃုာ်၀ဲ(၆၈)ဂၤအဂ့ၢ်သ့ၣ်ညါဘၣ်န့ၣ်လီၤႉ
ပယီၤသုးခးလီၤကျိဖးဒိၣ် သ၀ီဖိဘၣ်ဒိ(၆)ဂၤအကျါပၣ်ဃုာ်ဖိသၣ်လၢအသးနံၣ်တၦဲၤဒံးဘၣ် ၃ ဂၤ
လါယူၤလံ ၈ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ကၠဲးထိၣ်ကီၢ်ဆၣ်အပူၤ ဖဲလါယူၤလံ ၆ သီအနံၤ ခီဖျိပယီၤသုးခးလီၤကျိဖးဒိၣ်လၢလီၢ်က၀ီၤဒူသ၀ီပူၤအဃိ ၦၤကမျၢၢ်ဘၣ်ဒိ၀ဲဒၣ်(၆)ဂၤအကျါပၣ်ဃုာ် ဖိသၣ်လၢအသးနံၣ် တၦဲၤဒံးဘၣ်(၃)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါယူၤ ၆ သီ မုၢ်ဃ့ၢ်လီၤ ၂ နၣ်ရံၣ်ဘျဲၣ်အဆၢကတီၢ် ပယီၤသုးခီၣ်ချ့သုးရ့ၣ်(ခမရ-၂)လၢအိၣ်(မီၤတူၤကိ) သ့ၣ်တဖၣ် အံၤ ခးလီၤ၀ဲဒၣ်ကျိဖးဒိၣ်(၅)ဖျၢၣ်လီၤတဲာ်ပိၢ်ဖးထီၣ်၀ဲဒၣ်လၢတကွံပူၤသ၀ီအခိၣ်အဃၢၤအဃိ ဘၣ်ဒိ၀ဲဒၣ်ၦၤကမျၢၢ် (၆)ဂၤ တကးဒံးဘၣ်အမဲာ်ညါသိလ့ၣ်တခိၣ်ဃုာ်ဒီးဟံၣ်တဖျၢၣ်စ့ၢ်ကီးဘၣ်၀ဲဒၣ်ဒီးကျိဖးဒိၣ် အက့အခီဟးဂီၤ၀ဲအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ကျိဖးဒိၣ်အဃိၦၤကမျၢၢ်လၢအဘၣ်ဒိ(၆)ဂၤန့ၣ်မ့ၢ်၀ဲ တကွံပူၤသ၀ီ မီၤအီၤသဲဖၠူၤ(၈)နံၣ်ႇ မီၤခၠံၣ်ဆါကိၤ(၁၂)နံၣ်ႇ မီၤကၠီၤစွၤအူ(၁၃)နံၣ်ႇ မီၤ၀့ကိၤကိၤ(၁၉)နံၣ်ႇ ဒီၤခ့ၤသဲၣ်(၄၉)နံၣ်ဒီး တက့ၣ်ခံသ၀ီ အူစၤဂ့ၤ(၅၁)နံၣ် သ့ၣ်တဖၣ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတကတီၢ်ဃီဖဲဟါခီ ၇း၀၀ နၣ်ရံၣ်ဘျဲၣ်အဆၢကတီၢ်စ့ၢ်ကီး ပယီၤသုးတဒူၣ်ဃီ၀ဲအံၤ ခးလီၤကဒီး ကျိဖးဒိၣ်(၃)ဖျၢၣ် လီၤတဲာ်ပိၢ်ဖးဒိၣ်၀ဲဒၣ်လၢတကွံပူၤသ၀ီဃၢၤ(၁)ဖျၢၣ်ဒီးလၢတကွံပူၤ-ဖီဒ့ၣ်ညါထၣ်သ၀ီဘၢၣ်စၢၤ (၂)ဖျၢၣ် အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်တလါအံၤလါယူၤလံ ၄ သီ မုၢ်နၤခီ ၉း၃၀ ဃၣ်ဃၣ်အဆၢကတီၢ်စ့ၢ်ကီး ပယီၤသုးတဒူၣ်ဃီ၀ဲအံၤ...
ကတီၢ်ကၢ်ကွံာ်(အီၣ်စ့ၣ်ယၣ်သုးကျိၤ)လၢာ်ဂံၢ်လၢာ်ဘါအဂ့ၢ်(KNLA)စံး၀ဲ
လါယူၤလံ ၅သီႇ ၂၀၂၄နံၣ်ႇ ခ့ၣ်အဲးစံၣ်ႇ ကတီၢ်ကၢ်ကွံာ်၀ဲဒုၣ်ဒါသုးကီၣ်ကး(အီၣ်စ့ၣ်ယၣ်သုးကျိၤ)လၢအဟဲထီၣ်ဆူတီနီၢ်ကစၢၢ်တဖၣ်အံၤလၢာ်ဂံၢ်လၢာ်ဘါလီၤအဂ့ၢ် (KNLA)ထုးထီၣ်ပာ်ဖျါ၀ဲလံာ်တဘ့ၣ်ဖဲတနံၤအံၤလါယူၤလံ(၅)သီအနံၤန့ၣ်လီၤႉ သုးကီၣ်ကး(အီၣ်စ့ၣ်ယၣ်သုးကျိၤ)လၢအဂုၢ်ကျဲးစၢးဟဲထီၣ်၀ဲဆူတီနီၢ်ကစၢၢ်တၢ်လူၢ်ခိၣ်တဖၣ်အံၤမ့ၢ်၀ဲၦၤသ့ၣ်တဖၣ်လၢကဟံးန့ၢ်ဒိၣ်စိဒိၣ်ကမီၤတၢ်လီၢ်တၢ်ကျဲအဃိႇဆၢကတီၢ်ခဲအံၤ(KNLA)သုးမုၢ်သံၣ်ဘိဒီးတၢ်ပၢၢ်ဆၢသုးပာ်ဖှိၣ်တဖၣ်ဂုၢ်ကျဲးစၢး၀ဲလၢကတီၢ်ကၢ်ကွံာ်၀ဲ အ၀ဲသ့ၣ်တဖၣ်အိၣ်၀ဲအဂ့ၢ်ႇခ့ၣ်အဲၣ်ယူၣ်(ၦၤကတိၤတၢ်ပၢ)ပဒိၣ်စီၤကျၢၤစ့စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“အီၣ်စ့ၣ်ယၣ်သုးကျိၤလၢဟဲထီၣ်တဒူၣ်အံၤခဲအံၤသူ၀ဲသုးဂံၢ်ဘါႇမၤအါထီၣ်၀ဲသုးဂံၢ်ဘါတဖၣ်အိၣ်၀ဲန့ၣ်လီၤႉဒီးအ၀ဲသ့ၣ်တဖၣ်ဟဲထီၣ်၀ဲဂုၢ်ကျဲးစၢး၀ဲလၢကဟံန့ၢ်တၢ်လီၢ်လၢတၢ်ဒီခိၣ်လၢကဒိၣ်စိဒိၣ်ကမီၤ၀ဲတၢ်အဃိတကီၢ်ခါခဲအံၤပ၀ဲပသုးမုၢ်သံၣ်ဘိတကပၤအိၣ်ဒီးတၢ်ဂုၢ်ကျဲးစၢးလၢကတီၢ်ကၢ်ကွံာ်၀ဲအ၀ဲသ့ၣ်တဖၣ်န့ၣ်လီၤႉအဃိန့ၣ်ခဲအံၤန့ၣ်တၢ်ဒုးတၢ်ယၤအိၣ်၀ဲကိးမုၢ်နံၤလီၤႉအ၀ဲသ့ၣ်တဖၣ်ဟဲထီၣ်အဃိပကဘၣ်တြီဆၢတီၢ်ကၢ်ကွံာ်အီၤလီၤႉ”အဂ့ၢ်စံး၀ဲန့ၣ်လီၤႉ လၢန့ၣ်အမဲာ်ညါႇပတြီဆၢတီၢ်ကၢ်ကွံာ်၀ဲသုးကီၣ်ကး(အီၣ်စ့ၣ်ယၣ်)သုးကျိၤအံၤမ့န့ၢ်မၣ်ဒီးပဟီၣ်က၀ီၤဒၣ်ပကစၢ်ႇပစံၣ်ညီၣ်တီနံလီၤပသးကသ့၀ဲဒီးပကတုၤလၢပတၢ်မိၣ်န့ၢ်သးလီဖီတၢၣ်လီၤအဂ့ၢ်စံးအါထီၣ်၀ဲဒၣ်န့ၣ်လီၤႉ တကတီၢ်ဃီႇဖဲတနံၤအံၤလါယူၤလံ(၅)သီအနံၤအဆၢကတီၢ်အပူၤ(KNLA)ထုးထီၣ်ပာ်ဖျါထီၣ်၀ဲလံာ်တဘ့ၣ်လၢ(အီၣ်စ့ၣ်ယၣ်သုးကျိၤ)အပူၤႇၦၤလၢအဘၣ်တၢ်မၢဆူၣ်မၢစိးအီၤလၢကဘၣ်ဟဲဒုးတၢ်ဒီးအနီၢ်ကစၢ်သးတပၣ်ဘၣ်တဖၣ်ႇကဟဲပာ်လီၤစုက၀ဲၤဒီးပာ်ဖှိၣ်မၤသကိးတၢ်ဒီးတၢ်ပၢၢ်ဆၢသုးပာ်ဖှိၣ်ကရူၢ်အိၣ်၀ဲအဂ့ၢ်သ့ၣ်ညါဘၣ်န့ၣ်လီၤႉ ဘၣ်ဃးဒီးလံာ်ထုးထီၣ်ပာ်ဖျါအ၀ဲအံၤန့ၣ်မ့ၢ်ဒ်သိး(အီၣ်စ့ၣ်ယၣ်သုးကျိၤ)အပူၤႇသုးဖိအလီၢ်လံၤမ့ၢ်ဂ့ၤအသီမ့ၢ်ဂ့ၤႇၦၤလၢတအဲၣ်ဒိးကဲသုးဘၣ်ဒီးတၢ်မၢဆူၣ်မၢစိးအီၤအီၤတဖၣ်ဃုာ်ဒီးၦၤလၢအဲၣ်ဒိးဃ့ၢ်ဖျိးထီၣ်လၢအသုးကျိၤပူၤတဖၣ်ႇဃ့ၢ်ဖျိး၀ဲကန့ၢ်ႇကသ့ကညီအဂီၢ်မ့ၢ်တၢ်ဒုးသ့ၣ်ညါအ၀ဲသ့ၣ်တဖၣ်လီၤအဂ့ၢ်ႇခ့ၣ်အဲၣ်ယူၣ်ၦၤကတိၤတၢ်ပၢပဒိၣ်စီၤကျၢၤစ့စံးစ့ၢ်ကီး၀ဲဒၣ်န့ၣ်လီၤႉ ဒ်န့ၣ်အသိးႇသုးကီၣ်ကး(အီၣ်စ့ၣ်ယၣ်သုးကျိၤ)အံၤဂုၢ်ကျဲးစၢးလဲၤထီၣ်၀ဲဆူတီနီၢ်ကစၢၢ်တၢ်လူၢ်ခိၣ်အံၤယံာ်၀ဲလၢ (၃) လါဃၣ်ဃၣ်လံဘၣ်ဆၣ်ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပာ်ဖှိၣ်ခိးတြီတံာ်ဃၣ်အ၀ဲသ့ၣ်တဖၣ်အဃိႇသဂၢၢ်ဘၣ်၀ဲတၢ်ဘၣ်ဒိၣ်ဘၣ်ထံးႇတၢ်သံတၢ်ၦၢ်အိၣ်၀ဲအါမးအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
(KNLA)အိၣ်ဒီးမူဒါနီၢ်နီၢ်လၢကဒီသဒၢကမျၢၢ်ထံဖိကီၢ်ဖိလၢသုးမီၤစိရိၤသနူအတၢ်ဆီၣ်တံၢ်မၤနၢၤအဂ့ၢ် KNU စံး၀ဲ
လါယူၤလံ ၅ သီႇ ၂၀၂၄ နံၣ်ႇ ခ့ၣ်အဲးစံၣ် (KNLA)အမူဒါဒိၣ်ကတၢၢ်မ့ၢ်တၢ်ထီဒါမၤတရီတပါမၤဟးဂီၤကညီကလုာ်အထံရူၢ်ကီၢ်သဲးတၢ်ပညိၣ်ဒီးကညီကမျၢၢ်ထံဖိကီၢ်ဖိအတၢ်အိၣ်မူသုတန့ၢ်၀ဲတဂ့ၤအသိးကရၢအံၤအိၣ်စ့ၢ်ကီးမူဒါနီၢ်နီၢ်လၢကဘၣ်ဒီသဒၢကညီကမျၢၢ်ထံဖိကီၢ်ဖိတဖၣ်လၢပယီၤကလုာ်ဒိၣ်စိသနူဒီးသုးမီၤစိရိၤသနူအတၢ်ဆီၣ်တံၢ်မၤနၢၤတဖၣ်အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ စံးလီၤ၀ဲ ဖဲတနံၤအံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)နံၣ်ဆၢက့ၤၦဲၤထီၣ် ၇၅ ၀ီတ၀ီ အလံာ်ဟ့ၣ်ယုၢ်ပူၤန့ၣ် လီၤႉ စးထီၣ်(၂၀၂၁)သုးဟံးန့ၢ်တၢ်စိတၢ်ကမီၤ၀ံၤတုၤလၢခဲအံၤလၢသၢနံၣ်ဘျဲၣ်အတီၢ်ပူၤအံၤ တၢ်ဒုးတၢ်ယၤအိၣ်ထီၣ်၀ဲဒၣ် လၢထံကီၢ်ဒီတဘ့ၣ်အပူၤဒီးခီဖျိလၢသုးမီၤစိရိၤအတၢ်မၤအၢမၤသီအံၤအဃိ ကညီကမျၢၢ်ထံဖိကီၢ်ဖိတဖၣ်ဘၣ်ကွၢ် ဆၢၣ်မဲာ်၀ဲတၢ်ကိၢ်တၢ်ဂီၤႇတၢ်သံတၢ်ၦၢ်ဒီးတၢ်ကီတၢ်ခဲအါအါဂီၢ်ဂီၢ်ဒီးလၢတၢ်န့ၣ်အဃိတၢ်ကဒီသဒၢကၢၤဃာ်က့ၤ ၦၤကလုာ်ကညီဖိအဂီၢ်(KNLA)သ့ၣ်ညါမူဒါလၢၦဲၤလၢတၢ်ဒုးထီဒါက့ၤဒုၣ်ဒါသုးမီၤစိရိၤအံၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ် လီၤႉ ဒ်န့ၣ်အသိးဖဲတၢ်ဒုးထီဒါသုးမီၤစိရိၤတဖုအံၤအဆၢကတီၢ်စ့ၢ်ကီး(KNLA)သုးမုၢ်ဒိၣ်အံၤအိၣ်ဒီးတၢ်သူၣ်ဒူသးဒူႇ တၢ်တူၢ်ခီၣ် ပာ်သးႇတၢ်သးသဟီၣ်အလၢအၦဲၤလၢၦၤကလုာ်အဂီၢ်ဒ်သိးၦၤကလုာ်ကဒိးန့ၢ်ဘၣ်တၢ်ထဲသိးတုၤသိး ဒီးနီၢ်ကစၢ်တၢ်စံၣ် ညီၣ်ပၢလီၤသးခွဲးယာ်အဃိပာ်လုၢ်ပာ်ၦ့ၤပာ်ပနီၣ်အ၀ဲသ့ၣ်အတၢ်ကျဲးစၢးအဂ့ၢ်န့ၣ် လံာ်တၢ်ပာ်ဖျါ အပူၤ စံး၀ဲန့ၣ်လီၤႉ လၢန့ၣ်အမဲာ်ညါကညီကမျၢၢ်ထံဖိကီၢ်ဖိဘၣ်ကွၢ်ဆၢမဲာ်တၢ်ဖှီၣ်တၢ်ယာ်ႇတၢ်ဆီၣ်တံၢ်မၤနၢၤတုၤလၢခဲအံၤန့ၣ်ပစံး သ့၀ဲဒီး အဃိလၢကဒီသဒၢၦၤကလုာ်ကညီဖိအတၢ်အိၣ်မူဒီးတၢ်စုလီၢ်ခီၣ်ခိၣ်အဂီၢ်ဘၣ်တၢ်ဒုးအိၣ်ထီၣ်၀ဲ (KNLA) သုးမုၢ်ဒိၣ်အံၤ ဒီးတကးဒံးဘၣ်လၢၦၤကလုာ်ကညီဖိအဂီၢ်ပာ်လီၤစ့ၢ်ကီးတၢ်ပညိၣ်တၢ်တူၢ်ခီၣ်ပာ်သးခိၣ်သ့ၣ်(၂)ထံၣ် လၢအပၣ်ဃုာ် ကဒီသဒၢကမျၢၢ်ထံဖိကီၢ်ဖိအသးသမူႇအဟံၣ်အဃီတၢ်စုလီၢ်ခီၣ်ခိၣ် အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ အဃိလၢမုၢ်နံၤဆၢက့ၤအံၤအဖီခိၣ်ဆၢဂ့ၤဘၣ်ကညီကလုာ်ခိၣ်နၢ်ႇသုးမုၢ်ဒိၣ်ခိၣ်နၢ်သိၣ်ဒူႇကမျၢၢ်ထံဖိကီၢ်ဖိဃုာ်ဒီး ကရူၢ်ကရၢလၢအပၢၢ်ဆၢထီဒါသုးမီၤစိရိၤတဖၣ်ခဲလၢာ်ကပူၤဖျဲးဒီးတၢ်တတၢာ်တနါတကးဒံးဘၣ် စံးဘျုးဘၣ် ကညီကမျၢၢ် ထံဖိကီၢ်ဖိလၢအဆီၣ်ထွဲမၤစၢၤကီၢ်သူလ့ၤသုးမုၢ်ဒိၣ်ဒ်တၢ်သ့အိၣ်ဒီးအ၀ဲသ့ၣ်အသိးအဂ့ၢ်န့ၣ် ခ့ၣ်အဲၣ်ယူၣ် ဟ့ၣ်ထီၣ်အတၢ် ဆၢဂ့ၤဆၢ၀ါတၢ်စံးဘျုးစံးဖှိၣ်န့ၣ်လီၤႉ တနံၤအံၤလၢအလီၤဘၣ်၀ဲကညီဒီကလုာ်တၢ်ထူၣ်ဖျဲးမုၢ်ဒိၣ်(KNLA)နံၣ်ဆၢက့ၤ ၇၅ ၀ီတ၀ီ အဖီခိၣ်အံၤန့ၣ် ခ့ၣ်အဲၣ်ယူၣ်-ကညီ ဒီကလုာ်စၢဖှိၣ်ကရၢ အမဲာ်ညါ (KNLA)သုးရိၣ်မဲခိၣ်ကျၢၢ် သုးခိၣ်ကျၢၣ်ဒိၣ် စီၤကၠီၣ်နံၣ် အတၢ်ကတိၤလံာ်ဟ့ၣ်ယုၢ် ဃုာ်ဒီး...
မုၢ်တြီၢ်ကီၢ်ရ့ၣ်တလါအတီၢ်ပူၤသုးကီၣ်ကးကဘီယူၤဟဲတ့ၢ်လီၤမ့ၢ်ပိၢ်(၅၈၈)ဖျၢၣ်ႇ ဒြိမ့ၣ်ပိၢ်(၇၂)ဖျၢၣ်
လါယူၤ ၅ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢမုၢ်တြီၢ်ကီၢ်ရ့ၣ်သုးက့နီၣ်ဂံၢ်(၅)ဟီၣ်က၀ီၤအပူၤစးထီၣ်လၢလါယူၤ(၁)သီတုၤ (၃၀)သီလၢတလါအတီၢ်ပူၤအံၤပယီၤသုးကီၣ်ကးအကဘီယူၤဟဲတ့ၢ်လီၤမ့ၣ်ပိၢ်ဆူကမျၢၢ်ဒူသ၀ီတၢ်လီၢ်တၢ်ကျဲအပူၤခဲလၢာ်(၅၈၈)ဖျၢၣ်ႇ ဟဲတ့ၢ်လီၤဒြိမ့ၣ်ပိၢ်ခဲလၢာ်(၇၂)ဖျၢၣ်အဂ့ၢ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲ ဖဲမဟါလါယူၤလံ(၄)သီအနံၤန့ၣ်လီၤႉ ပယီၤသုးကီၣ်ကးအံၤလၢလါယူၤဒီတလါအတီၢ်ပူၤဟဲတ့ၢ်လီၤမ့ၣ်ပိၢ်ဒီးကဘီယူၤႇ ဟဲတ့ၢ်လီၤဒြိမ့ၢ်ပိၢ်ဆူ ကမျၢၢ်ဒူသ၀ီတၢ်လီၢ်တၢ်ကျဲၤပူၤအဃိဘၣ်ဟးဂီၤကွံာ်၀ဲကမျၢၢ်ဟံၣ်ဃီ(၄)ဖျၢၣ်ႇ သီခါဖၠၣ်(၁)ဖျၢၣ်ဒီးကၠိ တၢ်သူၣ်ထီၣ်တဖျၢၣ်အသိးတကးဒံးတၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤအဂ့ၢ်သ့ၣ်ညါဘၣ်န့ၣ်လီၤႉ တၢ်ဒုးကဲထီၣ်လၢပယီၤသုးကီၣ်ကးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်သုးက့(၅)အၦၤသ့ၣ်တဖၣ်အဘၢၣ်စၢၤမ့ၢ်လၢ(ခီၣ်ပူၣ်)အသုးကလၢၤအၦၤသ့ၣ်တဖၣ်လၢတၢ်ကက့ၤထီၣ်မၤန့ၢ်က့ၤ၀ဲဖၣ်ပူၣ်သုးကလၢၤအဂီၢ်အ၀ဲသ့ၣ်ဂုာ်က့ၤအခံလၢကက့ၤပာ်ဖှိၣ်က့ၤအသးဒီးဖၣ်ပူၣ်ဒုးယၤသုးကလၢၤအဂီၢ်တၢ်ဘၣ်ခးလိာ်သးကဲထီၣ်၀ဲအဂ့ၢ်န့ၣ်မုၢ်တြီၢ်ကီၢ်ရ့ၣ်အၦၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံး၀ဲဒၣ်ဒ်အံၤန့ၣ်လီၤႉ တၢ်ဒုးကဲထီၣ်၀ဲဒ်အံၤခီန့ၣ်အါတက့ၢ်ၦၤအိၣ်ခိးဃာ်အီၤႇ ဒီၣ်တဲာ်ဃာ်အဆၢ၀း၀းဒ်အံၤအဖီခိၣ်န့ၣ်လၢသုးကီၣ် ကးတကပၤအဲၣ်ဒိးဂုာ်ဟံန့ၢ်က့ၤ၀ဲအတၢ်လီၢ်တၢ်ကျဲလၢၦၤမၤန့ၢ်က့ၤ၀ဲမီၤနီၤႉ အဃိန့ၣ်အ၀ဲသ့ၣ်ဟဲတဖှိက့ၤ တၢ်ဒ်အံၤအဖီခိၣ်န့ၣ်တၢ်ဒုးကဲထီၣ်၀ဲတဘျီတဘျီဒ်န့ၣ်လၢသုးကီၣ်ကးဒီးသုးက့(၅)ဃုာ်ဒီးသုးပာ်ဖှိၣ်အဘၢၣ်စၢၤဒ်န့ၣ်လီၤႉ တၢ်ဒုးလၢအကဲထီၣ်၀ဲအါကတၢၢ်န့ၣ်မ့ၢ်၀ဲဒၣ်ဖဲဖၣ်ပူၣ်ဒုးယၤအသုးကလၢၤဟီၣ်က၀ီၤဖဲန့ၣ်မီၤ နီၤႉ ခီပူၣ်အသုးကလၢၤန့ၣ်အ၀ဲသ့ၣ်အတၢ်ပညိၣ်အိၣ်၀ဲလၢကက့ၤလူၤထီၣ်က့ၤ၀ဲဒၣ်ဖၣ်ပူၣ်အဒုးယၤသုးက လၢၤအဖီခိၣ်အ၀ဲသ့ၣ်ဟးထီၣ်လၢတၢ်ချၢဒီးကက့ၤ၀ဲအဂီၢ်အဃိန့ၣ်ဘၣ်သဂၢၢ်လိာ်သးဒီးသုးက့(၅)အၦၤဒီးပာ်ဖှိၣ်သုးသ့ၣ်တဖၣ်ခဲအံၤခဲအံၤလီၤႉ အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါလါယူၤဒီတလါအတီၢ်ပူၤတၢ်ဒုးကဲထီၣ်၀ဲ(၁၂၂)ဘျီလၢခံခီခံကပၤအဘၢၣ်စၢၤအဃိပယီၤသုးကီၣ်ကးအၦၤသံ၀ဲ(၆၀)ဂၤအသိးဘၣ်ဒိစ့ၢ်ကီး၀ဲ(၁၉)ဂၤန့ၣ်လီၤႉ ဒ်န့ၣ်အသိးလၢကညီဒီကလုာ်တၢ်ထူၣ်ဖျဲး သုးမုၢ်ဒိၣ်သုးက့နီၣ်ဂံၢ်(၅)တကပၤဘၣ်သံ(၂)ဂၤဒီးဘၣ်ဒိစ့ၢ်ကီး၀ဲ(၃)ဂၤအဂ့ၢ်န့ၣ်မုၢ်တြီၢ်တၢ်ကစီၣ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ မုၢ်တြီၢ်ကီၢ်ရ့ၣ်ဟီၣ်က၀ီၤအပူၤဖဲပူၤကွံာ်လါမ့ၤဒီတလါအတီၢ်ပူၤတၢ်ဒုးကဲထီၣ်၀ဲ(၁၀၇)ဘျီႇ သုးကီၣ်ကးသံ ဘၣ်ဒိဘၣ်ထံး၀ဲခဲလၢာ်(၆၀)ဂၤဃၣ်ဃၣ်အသိးသုးကီၣ်ကးသုးကလၢၤဒ်အမ့ၢ် (၀ၣ်လူၤႇ တၤဘူၣ်ကၠိႇ ကဟံၣ်ကၠိႇ လၢၢ်တိဒီးမီဖိကၠိ) သုးကလၢၤပယီၤသုးကီၣ်ကးအၦၤသ့ၣ်တဖၣ်က့ၤဂုာ်က့ၤအခံက့ၤပာ်ဖှိၣ်က့ၤ အသးဒီး(ခီၣ်ပူၣ်)အသုးကလၢၤအဂ့ၢ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဒၣ်စ့ၢ်ကီးဖဲလါယူၤ(၄)သီအနံၤန့ၣ်လီၤႉ
ကျိဖးဒိၣ်လီၤတဲာ်ဘၣ်ကီးတရံးလီၢ်က၀ီၤပိာ်ခွါတဂၤအဃိကမျၢၢ်လၢက့ၤအိၣ်ဆိးတဖၣ်တနီၤဟးထီၣ်ကွံာ်၀ဲလၢ၀့ၢ်ပူၤ
လါယူၤလံ ၄သီႇ ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇသုးက့-၆ႇဒူပျၢ်ယာ်ကီၢ်ရ့ၣ်ကီးတရံးကီၢ်ဆၣ်ႇကီးတရံး၀့ၢ်အပူၤအပူၤကွံာ်လါယူၤလံ(၂)သီအနံၤအပူၤႇကျိဖးဒိၣ်လီၤတဲာ်ဘၣ်၀ဲလီၢ်က၀ီၤပိာ်ခွါတဂၤအဃိႇကမျၢၢ်လၢက့ၤအိၣ်ဆိးတနီၤဟးထီၣ်ကွံာ်၀ဲလၢ၀့ၢ်ပူၤအဂ့ၢ်ႇကီးတရံးလီၢ်က၀ီၤဖိတဖၣ်စံး၀ဲန့ၣ်လီၤႉ ကီးတရံး၀့ၢ်ပူၤကျိဖးဒိၣ်လီၤတဲာ်၀ဲ(၆)ဖျၢၣ်အကျါ(၁)ဖျၢၣ်လီၤတဲာ်ဘၣ်၀ဲက၀ီၤဒ့(၃)လီၢ်က၀ီၤပိာ်ခွါတဂၤအဃိကမျၢၢ်လီၢ်က၀ီၤဖိလၢအဟဲက့ၤအိၣ်ဆိးက့ၤလၢအနီၢ်ကစၢ်တၢ်လီၢ်တၢ်ကျဲတဖၣ်ပျံၤတၢ်ဖုးတၢ်ဒီးတနီၤဟးထီၣ်ကွံာ်ကဒီး၀ဲလၢ၀့ၢ်ပူၤအိၣ်၀ဲအဂ့ၢ်ႇကီးတရံးလီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“မုၢ်နၤအခီအဆၢကတီၢ်ကျိဖးဒိၣ်လီၤတဲာ်၀ဲ(၆)ဖျၢၣ်အကျါလီၤတဲာ်၀ဲလၢက၀ီၤဒ့အဂၤ(၅)ဖျၢၣ်၀ံၤလီၤတဲာ်ကဒီး၀ဲလၢက၀ီၤဒ့(၃)အပူၤတဖျၢၣ်တဘျီဃီႇဘၣ်၀ဲကမျၢၢ်လီၢ်က၀ီၤပိာ်ခွါၦၤဘှီသိလ့ၣ်ကစၢ်တဂၤန့ၣ်လီၤႉဒီးလီၢ်က၀ီၤပိာ်ခွါ၀ဲအံၤဘၣ်ဒိနးတၢ်လီၤဘၣ်ယိၣ်အိၣ်အဃိကမျၢၢ်လၢအဂၤလၢဟဲက့ၤအိၣ်ဆိးတနီၤန့ၣ်ပျံၤတၢ်ဖုးတၢ်ဒီးတနံၤအံၤဟးထီၣ်ကွံာ်၀ဲလၢ၀့ၢ်ပူၤကအိၣ်လၢသၢပူတပူညါႇၦၤဟဲက့ၤအိၣ်ဆိးန့ၣ်ကအိၣ်(၂၀၀၀)ဃၣ်ဃၣ်နါက့ခဲအံၤတၢ်ကဲထီၣ်သးတဘျီပျံၤတၢ်ဟးထီၣ်ကဒီးကအိၣ်လၢ(၅၀၀)ဂၤဃၣ်ဃၣ်ညါ”အဂ့ၢ်စံး၀ဲန့ၣ်လီၤႉ လၢန့ၣ်အမဲာ်ညါႇဖဲကျိဖးဒိၣ်လီၤတဲာ်အဆၢကတီၢ်ကမျၢၢ်လီၢ်က၀ီၤပိာ်ခွါအံၤႇဘၣ်ဖဲအ၀ဲဆ့ၣ်နီၤဆီၣ်လိာ်ကွဲလီတဲစိလၢဟံၣ်ပူၤဒီးဘၣ်ဒိ၀ဲအခီၣ်ဒီးအဆံၣ်ဒၢခိၣ်နးနးအဃိတၢ်ဆှၢအီၤဆူတၢ်ဆါဟံၣ်ဘၣ်ဆၣ်အသးသမူဟးထီၣ်ကွံာ်၀ဲလံအဂ့ၢ်ႇစံးအါထီၣ်၀ဲန့ၣ်လီၤႉ တကးဒံးဘၣ်ႇကီးတရံး၀့ၢ်ပူၤက၀ီၤဒ့လၢအဂၤတၢ်လီၢ်တဖၣ်အပူၤကျိဖးဒိၣ်လီၤတဲာ်အိၣ်စ့ၢ်ကီး၀ဲအဃိကမျၢၢ်တၢ်ဘၣ်ဒိဘၣ်ထံးအိၣ်၀ဲဘၣ်ဆၣ်ခ့ၣ်အဲးစံၣ်ကညီတၢ်ကစီၣ်မၤလီၢ်တံၢ်တန့ၢ်၀ဲဒံးဘၣ်အဂ့ၢ်ဒုးသ့ၣ်ညါဘၣ်ၦၤဒိကနၣ်တၢ်ဖိတဖၣ်န့ၣ်လီၤႉ တကတီၢ်ဃီႇကီးတရံး၀့ၢ်ခိၣ်ဃၢၤဒူသ၀ီတဖၣ်အပူၤႇတကီၢ်ခါခဲအံၤခီဖျိဟီၣ်က၀ီၤဒုးယၤတၢ်အိၣ်သးအဖီခိၣ်လီၢ်က၀ီၤကမျၢၢ်တဖၣ်တက့ၤအိၣ်ဘၣ်လၢအနီၢ်ကစၢ်တၢ်လီၢ်တၢ်ကျဲဒံးဘၣ်အသိးဘၣ်အခါလၢကဘၣ်မၤအီၣ်ဘုဟုအဆၢကတီၢ်လံဘၣ်ဆၣ်တဖံးအီၣ်မၤအီၣ်ဘၣ်၀ဲတၢ်ဒံးဘၣ်အဃိႇသဂၢၢ်ဘၣ်၀ဲတၢ်အိၣ်ဆိးအီၣ်အီတၢ်ကီတၢ်ခဲအဂ့ၢ်ႇၦၤဃ့ၢ်တၢ်ဒုးလီၢ်အိၣ်ကမှံဖိတဖၣ်စံး၀ဲန့ၣ်လီၤႉ ဒ်န့ၣ်အသိးႇဟီၣ်ခိၣ်မဲာ်ဖံးဒုးယၤတၢ်အိၣ်သးအဖီခိၣ်ကညီတၢ်ထူၣ်ဖျဲးသုးမုၢ်ဒိၣ်(KNLA)ပာ်ဖှိၣ်သးခိးတြီတံာ်ဃာ်၀ဲသုးကီၣ်ကးလၢဟဲထီၣ်တဖၣ်အဃိသုးကီၣ်ကးအီၣ်စ့ၣ်ယၣ်သုးကျိၤအံၤတၢ်ဘၣ်ဒိဘၣ်ထံးအိၣ်အါ၀ဲဒီးႇဒ်သိးကမၤအါထီၣ်သုးဂံၢ်ဘါအဂီၢ်ႇဆှၢထီၣ်၀ဲသုးတၢ်သိၣ်လိစံၢ်လီၤၦၤသုးဖိတဖၣ်လၢဖၣ်အၣ်တဆီဆူကီးတရံးတကပၤအိၣ်၀ဲအဂ့ၢ်ႇဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ
ကီၢ်သူလ့ၤသုးမုၢ်ဒိၣ်ကမၤဆူၣ်ထီၣ်သးသဟီၣ်ဒီးတၢ်တူၢ်ခီၣ်ပာ်သးလၢတၢ်ပၢၢ်ဆၢတၢ်မၤပူၤအဂ့ၢ်(KWO)ဆီၣ်တခူထီၣ်
လါယူၤလံ ၄ သီႇ ၂၀၂၄ နံၣ်ႇ ခ့ၣ်အဲးစံၣ် တလါအံၤလါယူၤလံ ၅ သီ လၢအလီၤဘၣ်၀ဲကီၢ်သူလ့ၤသုးမုၢ်ဒိၣ်မုၢ်နံၤၦဲၤထီၣ်(၇၅)၀ီတ၀ီဒီး လၢမုၢ်နံၤအံၤအဖီခိၣ် ကီၢ်သူလ့ၤသုးမုၢ်ဒိၣ်ကမၤဆူၣ်ထီၣ်မၤဂ့ၤထီၣ်သးသဟီၣ်ဒီးတၢ်တူၢ်ခီၣ်ပာ်သးလၢတၢ်ပၢၢ်ဆၢတၢ်မၤပူၤဒီး ကအိၣ်ဒီး တၢ်ခီၣ်ခိၣ်ဟံမူဒါအါထီၣ်လၢတၢ်မၤပူၤအဂ့ၢ်န့ၣ် လီၢ်ခၢၣ်သး ကညီပိာ်မုၣ်ကရၢ(KWO)ဆီၣ်တခူပာ်ဖျါထီၣ် အလံာ်ယုၢ် ဖဲတနံၤအံၤလါယူၤလံ ၄ သီ အနံၤန့ၣ်လီၤႉ ဒ်(KWO)အလံာ်ဟ့ၣ်ယုၢ်တၢ်ပာ်ဖျါပူၤအသိးန့ၣ် ကီၢ်သူလ့ၤသုးမုၢ်ဒိၣ်အံၤကျဲးစၢးတ့ၢ်တၢ်အဂ့ၤကတၢၢ်ဘၣ်ဆၣ် ခါဆူညါ ကဘၣ်ဂုာ်ကျဲးစၢးအါန့ၢ်အလီၢ်လၢအကဲထီၣ်ဒသုးမုၢ်ဒိၣ်လၢအစဲၤနီၢ်ဒလၢတုၤထီၣ်ထီၣ်ဘးဒ်ဟီၣ််ခိၣ်ဘီမုၢ် ပာ်ပနီၣ်အီၤ သ့အသိးဒီးလၢန့ၣ်အမဲာ်ညါကဘၣ်မၤဆူၣ်ထီၣ်မၤဂ့ၤထီၣ်သးသဟီၣ်ဒီးတၢ်တူၢ်ခီၣ်ပာ်သးလၢတၢ်ပၢၢ်ဆၢတၢ်မၤပူၤတကးဒံးဘၣ်ကအိၣ်ဒီးတၢ်ခီၣ်ခိၣ်ဟံမူဒါအါထီၣ်လၢတၢ်မၤပူၤအဂ့ၢ်န့ၣ် စံး၀ဲန့ၣ်လီၤႉ ဘၣ်ဃး(KWO)အလံာ်ဟ့ၣ်ယုၢ်ဆူကီၢ်သူလ့ၤသုးမုၢ်ဒိၣ်မုၢ်နံၤဆၢက့ၤအဖီခိၣ်ဘျီ၀ဲအံၤန့ၣ် ကရၢခိၣ် နီၢ်ကညီဖီ စံး၀ဲလၢ “ပတဲလၢအ၀ဲသ့ၣ်ကဘၣ်မၤဂ့ၤထီၣ်သးသဟီၣ်တၢ်တူၢ်ခီၣ်ပာ်သးလၢတၢ်ပၢၢ်ဆၢပူၤစံးတၢ်န့ၣ်ပမ့ကွၢ်ခဲအံၤ ပယီၤသုးဟံန့ၢ် ဆူၣ်တၢ်စိတၢ်ကမီၤဘျီန့ၣ်ၦၤက့ၤခီၣ်ဆၢအီၤလၢထံကီၢ်ဒီတဘ့ၣ်အပူၤလီၤႉၦၤပယီၤဖိလၢအိၣ်၀့ၢ်ပူၤဒၣ်လဲာ်ဟဲထီၣ်မၤတၢ်ပၢၢ်ဆၢမီၤနီၤႉပအဲၣ်ဒိးလၢကဘၣ်မၤဆူၣ်ထီၣ်၀ဲတၢ်တူၢ်ခီၣ်ပာ်သးလၢတၢ်ပၢၢ်ဆၢတၢ်မၤပူၤလၢကနၢ်ပၢၢ်၀ဲဘၣ်မနုၤအဃိပၦၤကညီအံၤဘၣ်ပၢၢ်ဆၢတၢ်လဲၣ်ႇအတၢ်မုၢ်လၢ်ကွၢ်စိအ၀ဲသ့ၣ်မ့နၢ်ပၢၢ်၀ဲဘျဲးဘျဲးဘျီးဘျီးန့ၣ်သးလၢအအဲၣ်ဒိးနုာ်လီၤပၣ်ဃုာ်လၢသုးပူၤမ့ၢ်ဂ့ၤႇကဒီသဒၢဒူဖိသ၀ီဖိႇဒုၣ်ဒါတၢ်သ့ၣ်တဖၣ်န့ၣ်ကအိၣ်၀ဲဒၣ်မီၤႉအဃိတၢ်သ့ၣ်တဖၣ်အံၤပ အဲၣ်ဒိးလၢကမၤဂ့ၤ ထီၣ်၀ဲမီၤနီၤ”အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤ ခီဖျိလၢကီၢ်သူလ့ၤသုးမုၢ်ဒိၣ်အတၢ်ဟူးတၢ်ဂဲၤ အံၤအဃိပယီၤသုးကလၢၤဖျိးကွံာ်၀ဲဒၣ်တစှၤန့ၢ်အဖျၢၣ်(၈၀)ဘျဲၣ်ညါဒီးလၢတၢ်န့ၣ်အဃိအလီၢ်အိၣ်လၢပကဘၣ်ပာ် ပနီၣ်သုးမုၢ်ဒိၣ်အတၢ်ဟ့ၣ်လီၤသးအံၤအသိးအလီၢ်အိၣ်စ့ၢ်ကီးလၢကမျၢၢ်ထံဖိကီၢ်ဖိတဖၣ်ကဆီၣ်ထွဲပာ်ဖှိၣ်မၤသကိးတၢ်အဂ့ၢ်န့ၣ် (KWO)ကရၢခိၣ် နီၢ်ကညီဖီ စံးအါထီၣ်၀ဲန့ၣ်လီၤႉ “ပကညီသုးမုၢ်ဒိၣ်ဒုမၤအမူဒါလၢၦဲၤဒိၣ်ကတၢၢ်လီၤပမ့က့ၤထိၣ်သတြီၤက့ၤအီၤန့ၣ်ႉဘၣ်မနုၤအဃိလဲၣ်န့ၣ်အမူဒါလၢ ကဘၣ်ဒုးဖျိးကွံာ်သုးမီၤစိရိၤႇကဘၣ်ဒီသဒၢကမျၢၢ်တဖၣ်န့ၣ်မၤ၀ဲဂ့ၤကတၢၢ်လီၤႉပမ့က့ၤကွၢ်န့ၣ်တၢ်လီၢ်တၢ်ကျဲလၢ အိၣ်ပကီၢ်သူလ့ၤပူၤန့ၣ်သုးကလၢၤဖျိးကွံာ်တစှၤန့ၢ်အဖျၢၣ်(၈၀)ဘၣ်ႉလၢတၢ်ထီၣ်ဒုးန့ၢ်ကဒါအဃိမ့ၢ်ဂ့ၤႇလၢသုးမုၢ်ဒိၣ်အတၢ်ဟူးတၢ်ဂဲၤအဖီခိၣ်အ၀ဲသ့ၣ်ဘၣ်ထုးကွံာ်သးမ့ၢ်ဂ့ၤတၢ်သ့ၣ်တဖၣ်အံၤကဲထီၣ်၀ဲဒၣ်တၢ်ပာ်ပနီၣ်အ၀ဲသ့ၣ်တခါႉ အဃိပအဲၣ် ဒိးလၢပၢပြးတကပၤမ့ၢ်ဂ့ၤပကဘၣ်ဟံထီၣ်မူဒါႉကမျၢၢ်တဖၣ်စ့ၢ်ကီးကြၢးဆီၣ်ထွဲပၣ်ဃုာ်မၤသကိးတၢ်လၢ ဆၢကတီၢ်ခဲအံၤ အလီၢ်အိၣ်သၦၢ်ကတၢၢ်လီၤ”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးဆၢကတီၢ်ခဲအံၤကညီသုးမုၢ်ဒိၣ်အံၤမ့ၢ်မၤလၢၦဲၤမူဒါဖဲဘၣ်ကွၢ်ဆၢၣ်မဲာ်တၢ်သဘံၣ်သဘုၣ်ႇတၢ်ဘၣ် ဂံာ်ဂူာ်ႇ တၢ်ဒုးတၢ်ယၤႇတၢ်ကီတၢ်ခဲတၢ်နးတၢ်ဖှီၣ်လၢကျဲအကပၤကပၤဒီးဘၣ်ဆၣ်အ၀ဲသ့ၣ်မ့ဘၣ်ကွၢ်ဆၢၣ်မဲာ်၀ဲ ဒ်လဲၣ်သနါက့ တဟ့ၣ်အဃၣ်ႇတတ့ၢ်စၢ်လီၤအဂံၢ်အဘါနီတဘျီဘၣ်မ့မ့ၢ်တခီလၢကဒိးန့ၢ်က့ၤကညီကီၢ်အဂီၢ် ဒီသဒၢပၢၤ ဃာ်စၢၤ၀ဲ ကမျၢၢ်အသးသမူႇဟံၣ်ဃီတၢ်စုလီၢ်ခီၣ်ခိၣ်တုၤဒၣ်လဲာ်လုၢ်ထီၣ်ကွံာ်အသးသမူလၢၦၤကလုာ် အဂီၢ်အဃိ ပကြၢးပာ်ပနီၣ်...
(BGF)ဟံၣ်ဖိဃီဖိတဖၣ်တဘၣ်ထီထီၣ်(ဆၣ်)တၢ်ပနီၣ်လၢအသိလ့ၣ်လိၤဘၣ်အဂ့ၢ်ႇလီၢ်ခၢၣ်သးကမံတံာ်ဟ့ၣ်လီၤတၢ်ကလုၢ်
လါယူၤလံ ၃သီႇ ၂၀၂၄နံၣ်ႇ ခ့ၣ်အဲးစံၣ်ႇ သုးခိးကီၢ်ဆၢ(BGF)အဟံၣ်ဖိဃီတဖၣ်ႇတဘၣ်ထီထီၣ်၀ဲ(BGF)သုးသိလ့ၣ်(ဆၣ်)အတၢ်ပနီၣ်လၢအသိလ့ၣ်အလိၤဒီးဟးဒိး၀ဲဘၣ်အဂ့ၢ်ႇကညီကီၢ်စဲၣ်(သုးခိးကီၢ်ဆၢ)လီၢ်ခၢၣ်သးၦၤဟ့ၣ်ကူၣ်ဟ့ၣ်ဖးတၢ်ဒီးပၢဆှၢရဲၣ်ကျဲၤကမံတံာ်ထုးထီၣ်ဘိးဘၣ်ရၤလီၤ၀ဲလံာ်ဟ့ၣ်တၢ်ကလုၢ်တဘ့ၣ်ဖဲအပူၤကွံာ်လါယူၤအသီ(၂၀)အနံၤအဂ့ၢ်ႇသ့ၣ်ညါဘၣ်န့ၣ်လီၤႉ လံာ်ဘိးဘၣ်ရၤလီၤတၢ်ကလုၢ်အပူၤပာ်ဖျါ၀ဲလၢ“သုးခိးကီၢ်ဆၢ(BGF)အသုးခိၣ်စိႇသုးခိၣ်ယီၤႇသုးမုၢ်သံၣ်ဘိဃုာ်ဒီးၦၤသုးဖိခဲလၢာ်အဒူၣ်ဖိထၢဖိတဖၣ်အံၤလ့ၤတက့ၤတဘၣ်ထီထီၣ်၀ဲ(BGF)သုးသိလ့ၣ်တၢ်ပနီၣ်လၢအမ့ၢ်၀ဲ(ဆၣ်)အက့ၢ်အဂီၤအံၤဘၣ်”အဂ့ၢ်ႇပာ်ဖျါ၀ဲလၢလံာ်တၢ်ကလုၢ်အပူၤန့ၣ်လီၤႉ ဘၣ်ဃးတၢ်ဟ့ၣ်လီၤတၢ်ကလုၢ်ဒ်အံၤန့ၣ်ခီဖျိတကီၢ်ခါခဲအံၤသုးခိးကီၢ်ဆၢ(BGF)အဒူၣ်ဖိထၢဖိတနီၤသူ၀ဲ(ဆၣ်)တၢ်ပနီၣ်လၢအသိလ့ၣ်လိၤဒီးဟးထီၣ်က့ၤလီၤလၢဟီၣ်က၀ီၤပူၤအိၣ်၀ဲအဃိဒီးတၢ်အံၤတမ့ၢ်တၢ်လၢအကြၢး၀ဲဘၣ်၀ဲဘၣ်အဖီခိၣ်တၢ်ထုးထီၣ်ဟ့ၣ်လီၤတၢ်ကလုၢ်ဒ်အံၤလီၤအဂ့ၢ်(BGF)သုးဟီၣ်က၀ီၤနီၢ်ဂံၢ်-၂ႇအဒုးယၤခိၣ်ႇသုးခိၣ်ဒိၣ်စိစီၤတ့ၤ၀့စံးဘၣ်ကညီကွဲၤလ့လိၤဒ်အံၤန့ၣ်လီၤႉ အ၀ဲစံး၀ဲလၢ“တၢ်ဂ့ၢ်ဘၣ်ဃးတၢ်ဟ့ၣ်လီၤတၢ်ကလုၢ်တခါန့ၣ်ခီန့ၣ်ႇတနီၤနီၤန့ၣ်ခီဖျိဟးဒိး၀ဲသိလ့ၣ်လၢအပၣ်ဃုာ်ဒီး(BGF)ဆၣ်တၢ်ပနီၣ်၀ံၤလဲၤ၀ဲဆူခူပူၤ၀့ၢ်ပူၤလၢဖၣ်အၣ်ႇမီၣ်လမၠဲၣ်ႇဒူသထူၣ်၀့ၢ်ပူၤသ့ၣ်တဖၣ်န့ၣ်အိၣ်၀ဲအဃိလီၤႉဒီးတၢ်အံၤတမ့ၢ်တၢ်ကြၢးတၢ်ဘၣ်ဘၤမီၤႉတၢ်လၢဒူၣ်ဖိထၢဖိဟံၣ်ဖိဃီဖိခီန့ၣ်တဟး၀ဲဒီးၦၤသုးဖိဘၣ်အဃိန့ၣ်တလိၣ်လၢဘၣ်ထီထီၣ်(ဆၣ်)တၢ်ပနီၣ်ဘၣ်ႉတၢ်ထုးထီၣ်တၢ်ကလုၢ်အံၤန့ၣ်အိၣ်တၢ်ဂ့ၢ်အံၤလီၤႉတၢ်ကီတၢ်ခဲလၢအဂၤဒုတအိၣ်ဘၣ်”အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါႇသုးခိးကီၢ်ဆၢဒူၣ်ဖိထၢဖိတဖၣ်အံၤခီဖျိမ့ၢ်၀ဲကမျၢၢ်တဖၣ်လီၤအဃိဒ်သိးကမျၢၢ်သ့ၣ်တဖၣ်ဒိး၀ဲသိလ့ၣ်အသိးန့ၣ်ကဘၣ်ဒိး၀ဲဒ်ကမျၢၢ်တဖၣ်လီၤအဂ့ၢ်ႇစံးအါထီၣ်၀ဲဒၣ်န့ၣ်လီၤႉ တကတီၢ်ဃီႇလၢတၢ်ထီထီၣ်၀ဲ(ဆၣ်)တၢ်ပနီၣ်ဒီးဟးဒိး၀ဲသိလ့ၣ်သ့ၣ်တဖၣ်အကျါန့ၣ်ကမျၢၢ်လီၢ်က၀ီၤဖိလၢအတမ့ၢ်၀ဲသုးဟံၣ်ဖိဃီဖိဘၣ်ဒီးႇမ့ၢ်၀ဲၦၤမၤအီၣ်မုၢ်ကျိၤ၀ဲၤကွာ်တနီၤတဖၣ်ပၣ်ဃုာ်၀ဲအဃိဒ်သိးတၢ်သဘံၣ်ဘုၣ်တအိၣ်ဘၣ်အဂီၢ်တၢ်ဟ့ၣ်လီၤတၢ်ကလုၢ်လၢကလူၤပိာ်ထွဲ၀ဲအဂ့ၢ်ႇစံးစ့ၢ်ကီး၀ဲဒၣ်န့ၣ်လီၤႉ ဒ်န့ၣ်အသိးႇလံာ်တၢ်ကလုၢ်ပူၤပာ်ဖျါ၀ဲလၢတၢ်ဘိးဘၣ်ရၤလီၤလံာ်၀ံၤအလီၢ်ခံႇၦၤတဂၤလၢ်လၢ်လၢမ့တလူၤပိာ်မၤထွဲ၀ဲဒ်တၢ်ကလုၢ်အသိးဘၣ်န့ၣ်ႇတၢ်ဂ့ၢ်ကီမ့ၢ်အိၣ်ထီၣ်ဘၣ်ဆၣ်တၢ်တဘှါရှဲန့ၣ်၀ဲဘၣ်အဂ့ၢ်ႇပာ်ဖျါ၀ဲဒၣ်န့ၣ်လီၤႉ
တနံၤဃီအတီၢ်ပူၤတနီသရံၣ်ကီၢ်ဆၣ်ကမျၢၢ်ဘၣ်ဒိ(၃)ဂၤအကျါဘၣ်ဃုာ်ဖိသၣ်(၅)နံၣ်ဆူဖီလာ်(၂)ဂၤ
လါယူၤလံ ၃ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ်သုးက့(၄)ဟီၣ်က၀ီၤတနီသရံၣ်ကီၢ်ဆၣ်အပူၤ ဖဲပူၤကွံာ်မဟါလါယူၤလံ(၂)သီအနံၤလၢတနံၤဃီအတီၢ်ပူၤအံၤခီဖျိသုးကီၣ်ကးအကဘီယူၤဟဲတ့ၢ်လီၤမ့ၣ်ပိၢ်ဖဲ(သလိၣ်ဖိၣ်)ဒီး(၀ၣ်ယ့း)သ၀ီအပူၤအဃိဘၣ်ဒိ၀ဲၦၤသ၀ီဖိ(၃)ဂၤအကျါဘၣ်ဃုာ်ဖိသၣ်(၅)နံၣ်ဆူဖီလာ်(၂)ဂၤအဂ့ၢ်သ့ၣ်ဘၣ်န့ၣ်လီၤႉ ဘၣ်ထွဲဒီးပယီၤသုးကီၣ်ကးအကဘီယူၤဒုးသုးဟဲတ့ၢ်လီၤမ့ၣ်ပိၢ်လၢကမျၢၢ်ဒူသ၀ီအပူၤတၢ်ဂ့ၢ်အံၤန့ၣ်တနီသရံၣ်အၦၤဘၣ်မူဘၣ်ဒါတဂၤစံး၀ဲလၢ“ဘၣ်မနုၤအဃိပယီၤသုးကီၣ်ကးဘၣ်ဟဲတ့ၢ်လီၤမ့ၣ်ပိၢ်ဒီးကဘီယူၤလဲၣ်န့ၣ်မ့ၢ်လၢ(PDF)သ့ၣ်တဖၣ်ဒီး(ဗကဖ)(ဗအဖ)သ့ၣ်တဖၣ်ဟဲအိၣ်ဆီလီၤအသးဖဲ(၀ၣ်ယ့း)ကမျၢၢ်ဒူသ၀ီပူၤအဃိန့ၣ်ကဘီယူၤဟဲတ့ၢ်လီၤမ့ၣ်ပိၢ်မီၤနီၤႉ အ၀ဲသ့ၣ်ဟဲအိၣ်ဟူးဂဲၤ၀ဲဖဲန့ၣ်န့ၣ်အိၣ်၀ဲဒၣ်ဒ်န့ၣ်လီၤမီၤနီၤႉ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါကမျၢၢ်ဒူသ၀ီဖိလၢအိၣ်ဆိးဒူသ၀ီအပူၤသ့ၣ်တဖၣ်တကီၢ်ခါခဲအံၤန့ၣ်ဘၣ်အိၣ်လၢတၢ်ပျံၤတၢ်ဖုးႇ တၢ်ပလီၢ်ပဒီသးအပူၤထီဘိဒီးအ၀ဲသ့ၣ်ဘၣ်အိၣ်ခိးကနၣ်၀ဲဒၣ်ကဘီယူၤ ကဟဲကဒါက့ၤ၀ဲအသိးတနီၤလဲၤဃ့ၢ်အိၣ်ကဒုအသးလၢဒူသ၀ီအဂၤအဂ့ၢ်တနီသရံၣ်အၦၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲဒၣ်န့ၣ်လီၤႉ ခီဖျိပယီၤသုးကီၣ်ကးဟဲတ့ၢ်လီၤမ့ၣ်ပိၢ်ဒ်အံၤအဖီခိၣ်ဘၣ်ဒိ၀ဲ(၀ၣ်ယ့း)ၦၤသ၀ီဖိနီၢ်ပါဟး(၂၇)နံၣ်တဂၤဒီးအဖိစီၤကၢလၢ(၅)နံၣ်တဂၤအသိးဖဲမုၢ်ထူၣ်(၁၂)နၣ်ရံၣ်အဆၢကတီၢ်န့ၣ်ဟဲတ့ၢ်လီၤကဒီး၀ဲမ့ၣ်ပိၢ်ဖဲ(သလိၣ်ဖိၣ်)သ၀ီပူၤအဃိဘၣ်ဒိ၀ဲဖိသၣ်(၃)နံၣ်တဂၤအဂ့ၢ်ႇ ၦၤလၢအဘၣ်ဒိ သ့ၣ်တဖၣ်အံၤတၢ်ဆှၢအ၀ဲသ့ၣ်လၢဘျံးတၢ်ဆါဟံၣ်အဂ့ၢ်သ့ၣ်ညါဘၣ်လၢလီၢ်က၀ီၤအၦၤဘၣ်မူဘၣ်ဒါအအိၣ်န့ၣ်လီၤႉ ဒ်န့ၣ်အသိးပယီၤသုးကီၣ်ကးအံၤလၢကက့ၤထီၣ်မၤန့ၢ်က့ၤ၀ဲအသုးကလၢၤဒ်အမ့ၢ်(၁၀၂၀)သုးကလၢၤဒီး(မိတီၤ)အကျဲမုၢ်အံၤအဂီၢ်အ၀ဲသ့ၣ်ဟဲပာ်ဖှိၣ်ထီၣ်အသးဖဲလၢၢမုၢ်လါကီၢ်ဆၣ်ဟီၣ်က၀ီၤ(တူၣ်ပၠီၣ်)သ၀ီအပူၤအသုးဂံၢ်ဘါၦၤနီၣ်ဂံၢ်ကအိၣ်လၢ(၁၀၀)ဂၤဘျဲၣ်အဂ့ၢ်လီၢ်က၀ီၤအၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်စ့ၢ်ကီးန့ၣ်လီၤႉ