ဒ်သိးကထူၣ်ဖျဲးထီၣ်ကွံာ်လၢတၢ်ဆီၣ်တံၢ်မၤနၢၤအဂီၢ်အလီၢ်အိၣ်သၦၢ်ကတၢၢ်လၢပကဘၣ်ရိၣ်ဖှိၣ်ပာ်ဖှိၣ်မၤသကိးတၢ်အဂ့ၢ်(KYO)စံး၀ဲ
လါမ့ၤ ၂၀ သီႇ ၂၀၂၄ နံၣ်ႇ ခ့ၣ်အဲးစံၣ် ဒ်သိးကပထူၣ်ဖျဲးထီၣ်ကွံာ်လၢသနူၤလီၢ်လံၤတၢ်ဆီၣ်တံၢ်မၤနၢၤအဂီၢ်အလီၢ်အိၣ်သၦၢ်ကတၢၢ်လၢပကဘၣ်ရိၣ်ဖှိၣ်ပာ်ဖှိၣ်မၤသကိးတၢ်ဒီးၦၤလၢအတူၢ်ဘၣ်တၢ်ဆီၣ်တံၢ်မၤနၢၤကလုာ်ဒူၣ်အဂုၤအဂၤသးစၢ်ဒီးကမျၢၢ်သ့ၣ်တဖၣ်အဂ့ၢ်ကညီသးစၢ်ကရၢဆီၣ်တခူထီၣ်၀ဲဖဲခါလၢကဟဲလါမ့ၤ(၂၃)သီလၢအလီၤဘၣ်၀ဲကညီသးစၢ်ကရၢမုၢ်နံၤၦဲၤထီၣ်(၃၅)၀ီတ၀ီအလံာ်ဟ့ၣ်ယုၢ်အပူၤန့ၣ်လီၤႉ ဒ်သိးပၦၤကလုာ်ကထူၣ်ဖျဲးထီၣ်လၢတၢ်ဆီၣ်တံၢ်မၤနၢၤအဂီၢ်ဒီးပကစံၣ်ညီၣ်ပနီၢ်ကစၢ်အဘူၣ်အတီၢ်လၢပၦၤဒီတကလုာ်အတၢ်ဘၣ်ဘျုးဘၣ်ဖှိၣ်အဂီၢ်အလီၢ်အိၣ်လၢပၦၤကညီသူၣ်ဘီၣ်သးစၢ်ႇ ၦၤပၢၢ်ဆၢတၢ်ဖိတဖၣ်ကြၢးပာ်သူၣ်ပာ်သး လၢပတၢ်ပၢၢ်ဆၢအံၤပဘၣ်ဒိးသန့ၤထီၣ်ပသးလၢပနီၢ်ကစၢ်ဂံၢ်ဘါႇ ပၦၤကညီကမျၢၢ်ဂံၢ်ဘါဒီးမၤအီၤတဲာ်တဲာ်ဖျုဖျုလၢ တၢ်သူၣ်ထီၣ်ပနီၢ်ကစၢ်ထံရူၢ်ကီၢ်သဲးအဘူၣ်အတီၢ်အဂီၢ်အဂ့ၢ်ကညီသးစၢ်ကရၢလံာ်ဟ့ၣ်ယုၢ်အပူၤဆီၣ်တခူထီၣ်စ့ၢ်ကီး၀ဲဒၣ်န့ၣ်လီၤႉ ဘၣ်ဃးဒီးတၢ်ပာ်ဖှိၣ်မၤသကိးတၢ်ဒီးကလုာ်အဂၤသးစၢ်သ့ၣ်တဖၣ်န့ၣ်အရ့ၣ်ဒိၣ်၀ဲဒ်လဲၣ်အဂ့ၢ်န့ၣ်ကညီသးစၢ်ကရၢနဲၣ်ရွဲၣ်သဃဲၤ-၂ စီၤအဲၣ်ထံကီၢ်စံး၀ဲလၢ “တကီၢ်ခါပသူၣ်ထီၣ်၀ဲဒၣ်ကီၢ်စၢဖှိၣ်န့ၣ်အတမ့ၢ်၀ဲပသူၣ်ထီၣ်၀ဲဒၣ်ၦၤတဂၤတန့ၢ် ဘၣ်ႇ ကလုာ်တဖုတန့ၢ်ဘၣ်ႉ ပအိၣ်ကီၢ်တဘ့ၣ်အပူၤန့ၣ်ကလုာ်ဒူၣ်အိၣ်၀ဲအါဖုစ့ၢ်ကီးလီၤအဃိန့ၣ်တၢ်ဖီၣ်လိာ်သးစုစ့ၢ် ကီးဘၣ်ကျၢၢၤ၀ဲမီၤနီၤႉ ဒီးတၢ်ဖီၣ်လိာ်သးစုႇ တၢ်နၢ်ပၢၢ်လိာ်သးဘၣ်အိၣ်အဖီခိၣ်န့ၣ်ပဘၣ်ဖံးသကိးမၤသကိးလိာ်သး တၢ်လီၤႉ အဃိန့ၣ်ဒုဒ်သိးပကသူၣ်ထီၣ်၀ဲဒၣ်ကီၢ်စၢဖှိၣ်န့ၣ်တဂၤဒီးတဂၤန့ၣ်တၢ်နၢ်ပၢၢ်လိာ်သးဒီးတၢ်မၤသကိးမ့ၢ်အိၣ်မး န့ၣ်ခါဆူမဲာ်ညါပကမၤလီၤၦီၢ်၀ဲသုးမီၤစိရိၤကန့ၢ်၀ဲချ့ချ့မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဒ်န့ၣ်အသိးကညီကလုာ်တၢ်ပၢၢ်ဆၢတၢ်မုၢ်လၢ်ဖီၣ်တၢၣ်အံၤတမ့ၢ်ထဲၦၤတဖုႇ ၦၤတကရူၢ်ႇ ၦၤတစိၤဧိၤအဂီၢ်ဘၣ်မ့ၢ်၀ဲက ညီဒီတကလုာ်အတၢ်မိၢ်န့ၢ်သးလီဒီးခါဆူညါစၢၤသွဲၣ်အစိၤစိၤတဖၣ်အဂီၢ်အဃိအလီၢ်အိၣ်လၢပကဘၣ်အိၣ်ဂဲၤဆၢထၢၣ်ကျၢၤမုဆှူလၢပၦၤကညီကလုာ်အဂီၢ်ဒီးၦၤတူၢ်ဘၣ်တၢ်ဆီၣ်တံၢ်မၤနၢၤတဖၣ်အဂီၢ်အသိးဂဲၤလိာ်လၢတၢ်သးစွံကတုၤအိၣ်ဒီးတၢ်ညိၣ်လၢကဒုးလီၤၦီၢ်ကွံာ်ဒုၣ်ဒါခိၣ်သ့ၣ်အဂ့ၢ်ကညီသးစၢ်ကရၢစံးစ့ၢ်ကီးန့ၣ်လီၤႉ ပၦၤကလုာ်ဘၣ်ကွၢ်ဆၢၣ်မဲာ်ဘၣ်၀ဲသနူၤအၢတၢ်ဆီၣ်တံၢ်မၤနၢၤအံၤစးထီၣ်လၢပဖံပဖုအစိၤတုၤလီၤလၢပစိၤခဲအံၤလံဘၣ်ဆၣ်သနါက့ပအိၣ်ဆၢထၢၣ်ဒ်ၦၤတကလုာ်အသိးန့ၢ်တုၤဆၢကတီၢ်ခဲအံၤန့ၣ်ခီဖျိလၢပၦၤကညီသူၣ်ဘီသးစၢ်ႇ ပၦၤကလုာ်ထံဖိကီၢ်ဖိကမျၢၢ်သ့ၣ်တဖၣ်အတၢ်ဟံမူဟံဒါဆီၣ်ထွဲမၤစၢၤပကညီတၢ်ပၢၢ်ဆၢအံၤအဃိလီၤအဂ့ၢ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါကညီတၢ်ပၢၢ်ဆၢအံၤမ့တမ့ၢ်ဘၣ်လၢကညီသးစၢ်စၢၤသွဲၣ်တစိၤဘၣ်တစိၤဟံးထီၣ်ဖီၣ်ထီၣ်ကညီကလုာ်တၢ်စံၣ်စိၤတဲစိၤမူဒါအံၤဘၣ်သၢပျၢၤန့ၣ်တၢ်လီၤဆံးလီၤစှၤကအိၣ်ထီၣ်၀ဲသၦၢ်ကတၢၢ်ဒီးပကတုၤဃီဆူပတၢ်မၤနၢၤဖီတၢၣ်အဂီၢ်ကယံၤထီၣ်၀ဲအမဲာ်ညါမ့ၢ်တၢ်လီၢ်ဘၣ်ယိၣ်လၢပၦၤကလုာ်တၢ်အိၣ်စံၣ်အိၣ်ကျၢၤအဂီၢ်အဂ့ၢ်န့ၣ်ကညီသးစၢ်ကရၢစံး၀ဲန့ၣ်လီၤ လၢတၢ်န့ၣ်အဃိလၢတၢ်ကသူၣ်ထီၣ်က့ၤကီၢ်သူလ့ၤလၢအတမ့ၢ်ဒ်အပူၤကွံာ်တၢ်ထံၣ်လိာ်စံးကတိၤတၢ်ဒီးထံကီၢ်ၦၤဒိၣ်စိဒိၣ်ကမီၤတဖၣ်ဘၣ်ႇ လၢမ့ၢ်၀ဲတၢ်ကသူၣ်ထီၣ်ကညီထံရူၢ်ကီၣ်သဲးအဘူၣ်အတီၢ်ခီဖျိဂံၢ်ခီၣ်ထံးကမျၢၢ်တဖၣ်အတၢ်ပာ် ဃုာ်ပာ်ဂီၢ်လၢကျဲကူၣ်တရံးအံၤအဖီခိၣ် ကညီသူၣ်ဘီၣ်သးစၢ်လၢအိၣ်လီၤမုၢ်ပြံပြါလၢတၢ်လီၢ်အါဒံအါတီၤသ့ၣ်တဖၣ် ပာ်ဖှိၣ်ထီၣ်တၢ်ဆိကမိၣ်ဆိကမးႇ တၢ်ဟ့ၣ်ကူၣ်ဟ့ၣ်ဖးဒီးတၢ်ဂံၢ်တၢ်ဘါသ့ၣ်တဖၣ်မ့ၢ်အိၣ်ထီၣ်သၢပျၢၤန့ၣ်ကညီတၢ်ပၢၢ် ဆၢတၢ်မၤနၢၤအဂီၢ်တၢ်လဲၤထီၣ်လဲၤထီၣ်ကအိၣ်ထီၣ်၀ဲသၦၢ်ကတၢၢ်လီၤအဂ့ၢ်သ့ၣ်ညါဘၣ်န့ၣ်လီၤႉ တကတီၢ်ဃီပၦၤကညီသူၣ်ဘီၣ်သးစၢ်သ့ၣ်တဖၣ်မ်သုကအိၣ်ဒီးနီၢ်ခိနီၢ်သးတၢ်အိၣ်ဆူၣ်အိၣ်ချ့အလၢအၦဲၤႇ အိၣ်ဒီးတၢ် ပၢၢ်ဆၢသးသဟီၣ်ႇ အိၣ်ဒိးတၢ်ရိၣ်ဖှိၣ်ဃူးဖိးဒီးဂဲၤလိာ်သကိးတၢ်ဆူညါလၢၦၤကကလုာ်ကထူၣ်ဖျဲးထီၣ်လၢတၢ်ဆီၣ်တံၢ် မၤနၢၤအကလုာ်ကလုာ်အပူၤအဂ့ၢ်ကညီသးစၢ်ကရၢဆၢဂ့ၤဆၢ၀ါဘၣ်စ့ၢ်ကီး၀ဲကညီသးစၢ်သ့ၣ်တဖၣ်န့ၣ်လီၤႉ
ခီကီၢ်ကၠိဖိအဂီၢ်(Myanmar Health Support-MHS)ကရူၢ်မၤ၀ဲဖျၢၣ်ထူတၢ်ပြၢတခါ
လါမ့ၤ ၂၀ သီႇ ၂၀၂၄ နံၣ်ႇ ခ့ၣ်အဲးစံၣ် လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်ဆီး၀့ၢ်ပူၤ ဖဲလါမ့ၤ ၁၈ သီ ဂီၤခီ ၇ နၣ်ရံၣ်အဆၢကတီၢ်န့ၣ် (Myanmar Health Support-MHS)ကရူၢ် မၤ၀ဲဒၣ်(MHS Summer Cup 2024)ဖျၢၣ်ထူတၢ်ပြၢမူးတၢ်ရဲၣ်တၢ်ကျဲၤတခါလၢ (We R Soccer Field) ဖျၢၣ်ထူပျီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ (MHS Summer Cup 2024)ဖျၢၣ်ထူတၢ်ပြၢဘျီ၀ဲအံၤအပူၤန့ၣ် မဲၢ်ဆီး ခီကီၢ်ကၠိ(၁၁)ဖျၢၣ် ကၠိဖိမုၣ်ခွါသ့ၣ်တဖၣ် နုာ်လီၤ၀ဲတၢ်ပြၢအံၤဒီး ဒ်သိးၦၤကၠိဖိတဖၣ်တဂၤဒီးတဂၤဘၢၣ်စၢၤကသ့ရ့လိာ်သးႇအသးကအိၣ်လၢ တၢ်လိာ်ခိၣ်လိာ်ကွဲဒီး နီၢ်ခိကအိၣ်ဆူၣ်အိၣ်ချ့အဂီၢ်ဘၣ်တၢ်မၤ၀ဲဖျၢၣ်ထူတၢ်ပြၢအံၤလီၤအဂ့ၢ်န့ၣ် (MHS)မူဒါခိၣ် သရၣ် မၠိမ့ပဲၤ စံး၀ဲန့ၣ်လီၤႉ အ၀ဲစံး၀ဲလၢ“အတၢ်ပညိၣ်ခီန့ၣ်ပအဲၣ်ဒိးဒုသ့ၣ်ညါၦၤဂၤလၢပတၢ်အိၣ်မူအပူၤပမ့ၢ်ဆှူတဘျီဘၣ်ဆၣ် တမ့ၢ်ပဆှူကိးဘျီဒဲး ဘၣ်ႉတၢ်လၢပနုာ်လီၤတၢ်ပြၢန့ၣ်ပတဘၣ်ပာ်ပသးလၢပကမၤနၢၤတၢ်ဘၣ်ႉပမ့ၢ်ဆှူနါက့ ပကဘၣ်က့ၤဘှီဘၣ်ဒီးဂုာ်ကျဲးစၢး ကဒါက့ၤအီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဖျၢၣ်ထူတၢ်ပြၢဘျီ၀ဲအံၤဘၣ်တၢ်မၤ၀ဲဒၣ်လၢခံသီအတီၢ်ပူၤဒီး တၢ်ပြၢအံၤအိၣ်၀ဲဒၣ်ဒီးခိၣ်ဖးတၢႇခိၣ်ဖးခံႇခိၣ်ဖးသၢ တကးဒံးဘၣ်အိၣ်စ့ၢ်ကီး၀ဲ ကရူၢ်လၢအဂဲၤလိာ်ကွဲဂ့ၤကတၢၢ်ခိၣ်ဖးႇကရူၢ်ၦၤနဲၣ်လိတၢ်အဂ့ၤကတၢၢ်ခိၣ်ဖးႇ ၦၤဂဲၤလိာ်ကွဲအဂ့ၤကတၢၢ်ခိၣ်ဖးဃုာ်ဒီးခိၣ်ဖးလၢအဂၤသ့ၣ်တဖၣ်တၢ်ဟ့ၣ်ဃုာ်၀ဲအဂ့ၢ်န့ၣ် ၦၤတီခိၣ်ရိၣ်မဲတၢ်ဖိတဖၣ် စံး၀ဲန့ၣ်လီၤႉ (Myanmar Health Support-MHS)တၢ်ကရၢကရိအံၤဘၣ်တၢ်ဒုးအိၣ်ထီၣ်အီၤဖဲ(၂၀၂၂)နံၣ်အခါဒီး မ့ၢ်၀ဲဒၣ်တၢ်ကရၢကရိတဒူၣ်လၢအဟူးဂဲၤဘၣ်ဃးတၢ်တိစၢၤမၤစၢၤခီကီၢ်ကၠိဖိအနီၢ်ခိနီၢ်သးတၢ်အိၣ်ဆူၣ်အိၣ်ချ့ တၢ်ရဲၣ်တၢ်ကျဲၤတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
သထူၣ်ကီၢ်ဆၣ် တနံၤဃီအတီၢ်ပူၤ ပယီၤသုးခးလီၤကျိဖးဒိၣ်(၉)ဖျၢၣ် ကမျၢၢ်ဘၣ်ဒိ(၁)ဂၤႇဟံၣ်ဟးဂီၤ ၄ ဖျၢၣ်
လါမ့ၤ ၁၈ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ်အပူၤ ဖဲမဟါလါမ့ၤ ၁၇ သီ တနံၤဃီအတီၢ်ပူၤ ပယီၤသုးခးလီၤကျိဖးဒိၣ်(၉)ဖျၢၣ်အဃိ ကမျၢၢ်ဘၣ်ဒိ(၁)ဂၤဒီးဟံၣ်ဟးဂီၤ၀ဲဒၣ်(၄)ဖျၢၣ်အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါ ဆှၢထီၣ်တၢ်ကစီၣ်အသိးသ့ၣ်ညါဘၣ်န့ၣ်လီၤႉ သထူၣ်ကီၢ်ဆၣ်ပူၤ ဖဲလါမ့ၤ ၁၇ သီ ဂီၤခီ ၁၁ နၣ်ရံၣ်ဘျဲၣ်အဆၢကတီၢ် ပယီၤသုးခီၣ်သုးရ့ၣ်(ခမရ-၉)လၢအိၣ် ၀့ပၣ်သ၀ီပူၤသ့ၣ်တဖၣ်အံၤ ခးလီၤ၀ဲဒၣ်ကျိဖးဒိၣ်(၃)ဖျၢၣ်လီၤတဲာ်ပိၢ်ဖးထီၣ်၀ဲလၢ(သုံးအိမ်စု)သ၀ီပူၤ ၂ ဖျၢၣ်အဃိ ကျိဖးဒိၣ်အက့အခီဘၣ်၀ဲဒၣ်စီၤညၣ်ထူ(၁၅)နံၣ်အံၤဒီးကမျၢၢ်အဟံၣ်ဟးဂီၤ၀ဲဒၣ်(၂)ဖျၢၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ်ပူၤ အသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးတကတီၢ်ဃီဖဲဟါခီ ၅ နၣ်ရံၣ်အဆၢကတီၢ် သုးကီၣ်ကးအမျိာ်သုး(၃၁၄)လၢအိၣ်ထံဖိညၣ်လံၣ်အံၤ ခးလီၤစ့ၢ်ကီး၀ဲကျိဖးဒိၣ်(၆)ဖျၢၣ်လီၤတဲာ်ပိၢ်ဖးထီၣ်၀ဲလၢစွ့ၣ်ယီၣ်ပၠးသ၀ီပူၤ(၁)ဖျၢၣ်ဒီးသ၀ီချၢ(၅)ဖျၢၣ်အဃိ ကမျၢၢ်ဟံၣ်ဟးဂီၤ၀ဲဒၣ်(၂)ဖျၢၣ် တၢ်ထူၣ်တၢ်ဘိစ့ၢ်ကီးဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါဖဲတၢ်တနံၤဃီ၀ဲအံၤ ဖဲမုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ် ပယီၤသုး(ခလရ-၈)လၢအိၣ် ဘံလ့တိၤတဖၣ်အံၤ ခးလီၤကျိဖးဒိၣ် ၃ ဖျၢၣ် ဆူကၠဲးထိၣ်ကီၢ်ဆၣ် ဒူသ၀ီပူၤအဃိ ဖိ၀ါသ့ၤသ၀ီဖိ စီၤထူကပီၤ (ကိး)စီၤထူထူ ၁၄ နံၣ်အံၤ ကျိဖးဒိၣ်အက့အခီဘၣ်အီၤဒီး ဒ်န့ၣ်အသိးဟံၣ်ဘၣ်၀ဲဒၣ်ဒီးကျိဖးဒိၣ် အက့အခီတဖျၢၣ်ႇ တၢ်ဟးလီၢ်လီၤၦီၢ်၀ဲဒၣ်တဖျၢၣ်စ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ သထူၣ်ကီၢ်ဆၣ်အပူၤ...
(KNU)ဃ့ထီၣ်ယပၣ်ပဒိၣ်ဒီးသိၣ်မှံၤထံကီၢ်တဖၣ်လၢကဟ့ၣ်တၢ်ဆီၣ်သနံးဆူသုးကီၣ်ကးအအိၣ်
လါမ့ၤ ၁၇သီႇ ၂၀၂၄နံၣ်ႇ ခ့ၣ်အဲးစံၣ်ႇ ဖဲလါမ့ၤ(၁၄)သီအနံၤန့ၣ် ကီၢ်ပယီၤကလုာ်ဒူၣ်ခိၣ်နၢ်လၢအထီဒါ၀ဲသုးကီၣ်ကးတဖၣ် လဲၤထံၣ်လိာ်သးဒီး ကီၢ်ယပၣ်ထံဂုၤကီၢ်ဂၤ၀ဲၤကျိၤ ကိာ်တိာ်ခိၣ်-၂ KOMURA Masahiro ဒီးဖဲန့ၣ်အဆၢကတီၢ် (KNU) ကညီဒီကလုာ်စၢဖှိၣ်ကရၢဃ့ထီၣ်၀ဲယပၣ်ပဒိၣ်ဃုာ်ဒီးသိၣ်မှံၤထံကီၢ်တဖၣ် လၢကဟ့ၣ်တၢ်ဆီၣ်သနံး ဆူ သုးကီၣ်ကးအအိၣ်အဂ့ၢ်န့ၣ် ခ့ၣ်အဲၣ်ယူၣ် ကရၢခိၣ် ပဒိၣ်စီၤကွဲၤထူ၀့ စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲတနံၤအံၤလါမ့ၤ(၁၇)သီအနံၤန့ၣ်လီၤႉ တၢ်လဲၤထံၣ်လိာ်သးဒီးကီၢ်ယပၣ်ထံဂုၤကီၢ်ဂၤ၀ဲၤကျိၤ ကိာ်တိာ်ခိၣ်-၂ ဘျီ၀ဲအံၤအတၢ်ပညိၣ်မ့ၢ်ဒ်သိး တၢ်ကသ့ၣ်ညါဘၣ်၀ဲကီၢ်ပယီၤထံရုၢ်ကီၢ်သဲး တၢ်အိၣ်သးဒီးကလုာ်ဒူၣ်အတၢ်မိၣ်န့ၢ်သးလီတဖၣ်ဒီးတကးဒံးဘၣ်အမဲာ်ညါဃ့ထီၣ်ယပၣ်ပဒိၣ်ဃုာ်ဒီးဒီးသိၣ်မှံၤထံကီၢ်သ့ၣ်တဖၣ်လၢကဟ့ၣ်တၢ်ဆီၣ်သနံးဆူ သုးကီၣ်ကးတဖၣ်အံၤအအိၣ်လၢကသ့ဆိမိၣ်တဲသကိးတၢ်လၢခါဆူညါထံရူၢ်ကီၢ်သဲးတၢ်ဆီတလဲအဂ့ၢ်န့ၣ် (KNU)ကရၢခိၣ် ပဒိၣ်စီၤကွဲၤထူ၀့ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ပတၢ်လဲၤထံၣ်လိာ်သးခီန့ၣ်တၢ်ပညိၣ်မ့ၢ်၀ဲဒ်သိးပကပာ်ဖျါထီၣ်ကီၢ်ပယီၤထံရုၢ်ကီၢ်သဲးအတၢ်အိၣ်သးႇဒီးပထံၣ်လိာ်န့ၣ်တမ့ၢ်ပထံၣ်လိာ်ထဲပဒိၣ်တဖၣ်ဘၣ်ပထံၣ်လိာ်တ့ၢ်ဒီးဘျီၣ်ဒိၣ်ခၢၣ်စးကိာ်တိၤခိၣ်ခံဂၤတဂၤလၢအမၤသကိးတၢ်ဒီးအ့ရှၢၣ်သ့ၣ်တဖၣ်လီၤႉတၢတမံၤန့ၣ်ပပာ်ဖျါထီၣ်၀ဲဒၣ်ကီၢ်ပယီၤအတၢ်ဂ့ၢ်ကီအံၤန့ၣ်မ့ၢ်၀ဲထံရုၢ်ကီၢ်သဲးအတၢ်ဂ့ၢ်ကီဒီးၦၤလၢဒုးအိၣ်ထီၣ်၀ဲတၢ်ဂ့ၢ်ကီသ့ၣ်တဖၣ်အံၤန့ၣ်မ့ၢ်၀ဲသုးအၦၤဘၣ်မူဘၣ်ဒါတဖၣ်အဃိတၢ်သ့ၣ်တဖၣ်အံၤကလုာ်ဒူၣ်ဒီးထံဖိကီၢ်ဖိတတူၢ်လိာ်ဘၣ်အဖီခိၣ်ဂဲၤဆၢထၢၣ်ဒီဒါက့ၤ၀ဲႇဒီးပပာ်ဖျါစ့ၢ်ကီး၀ဲလၢပကဘၣ်သူၣ်ထီၣ်ဖဲၣ်ဒရဲၣ်ကီၢ်စၢဖှိၣ်တံၢ်နီၢ်န့ၣ်လီၤႉ ခံမံတမံၤန့ၣ်ပပာ်ဖျါ၀ဲလၢသုးန့ၣ်ကအိၣ်လၢထံရုၢ်ကီၢ်သဲးအတၢ်တီခိၣ်ရိၢ်မဲဒ်သိးအက့ၢ်အဂီၤလၢအဟ့ၣ်စိဟ့ၣ်ကမီၤတၢ်အခဲအံၤန့ၣ်ပတူၢ်လိာ်၀ဲတန့ၢ်ဘၣ်ႇသုးအတၢ်မၤဘၣ်ထွဲအသးဒီးထံရုၢ်ကီၢ်သဲးန့ၣ်ကဘၣ်ပတုာ်ကွံာ်၀ဲဖဲစိၤအခဲအံၤလီၤႉသၢခါတခါန့ၣ်သုးတဖုအံၤလၢအမၤကမၣ်တ့ၢ်ၦၤဟီၣ်ခိၣ်ဖိခွဲးယာ်တဖၣ်အံၤတၢ်ဆီတလဲအဆၢကတီၢ်ဒ်သိးတၢ်တီတၢ်တြၢ်ကအိၣ်ထီၣ်အဂီၢ်အ၀ဲသ့ၣ်ကဘၣ်ဟ့ဟံမူဟံဒါဒီးပဃ့ထီၣ်စ့ၢ်ကီးယပၣ်ထံကီၢ်ပဒိၣ်ကိာ်တိၤၦၤမူဘၣ်ဒါတဖၣ်လၢကဘၣ်မၤသကိးတၢ်ဒီးထံကီၢ်အသိၣ်မှံၤလၢကဟ့ၣ်တၢ်ဆီၣ်သနံးဆူသုးကီၣ်တဖၣ်အံၤအအိၣ်ဒ်သိးကသ့ဆိကမိၣ်တဲသကိးတၢ်လၢခါဆူညါထံကီၢ်တၢ်အိၣ်သးအဂီၢ်”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါပာ်ဖျါထီၣ်ဃုာ်စ့ၢ်ကီး၀ဲကတီၢ်ယံာ်ထံရူၢ်ကီၢ်သဲးတၢ်ဂ့ၢ်ကီအတၢ်ကျဲၤဘၣ်တၢ်အစၢတဖၣ်အသိးႇကတီၢ်ဖုၣ်ကမျၢၢ်ဂ့ၢ်၀ီအဂီၢ်ပာ်ဖျါ၀ဲ ကညီကီၢ်စဲၣ် သုးက့(၇)အပူၤ လီၢ်အိၣ်ကဒုဖိအကလီၢ်(၁၀)ဘျဲၣ်အတၢ်အိၣ်မူတၢ်ကီတၢ်ခဲတၢ်သ့ၣ်တဖၣ်ဆူယပၣ်ပဒိၣ်ဒီးကိတိာ်ၦၤဘၣ်မူဘၣ်ဒါ တဖၣ်အအိၣ်ဒ်သိးကၠီၣ်တဲၣ်ကဟ့ၣ်၀ဲတၢ်တိစၢၤမၤစၢၤအဂ့ၢ်န့ၣ် ပဒိၣ် စီၤကွဲၤထူ၀့ စံးအါထီၣ်၀ဲန့ၣ်လီၤႉ တကးဒံးဘၣ်ႇတၢ်လဲၤထံၣ်လိာ်သးဘျီ၀ဲအံၤအပူၤ ယပၣ်ထံကီၢ်ပဒိၣ်ဃုာ်ဒီးကိတိာ်ခိၣ်နၢ်တဖၣ်အံၤအိၣ်ဒီးတၢ်သးစၢၢ်ဆၢလၢကီၢ်ပယီၤထံရုၢ်ကီၢ်သဲး တၢ်ဂ့ၢ်အဖီခိၣ်ဒီးယပၣ်ကီၢ်ပဒိၣ်သ့ၣ်တဖၣ်အံၤတမ့ၢ်လၢအတူၢ်လိာ်ပာ်ပနီၣ်၀ဲသုးကီၣ်ကးတဖုအံၤအတၢ်ဖံးတၢ်မၤဘၣ်အဂ့ၢ်န့ၣ် ပဒိၣ် စီၤကွဲၤထူ၀့ စံး၀ဲအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါယပၣ်ထံကီၢ်ကိတိာ်ခိၣ်နၢ်တဖၣ်အဲၣ်ဒိး၀ဲဒၣ်လၢကီၢ်ပယီၤအံၤကဟဲက့ၤကဒါက့ၤလၢဒံၣ်မိၣ်ကရ့ၣ်စံၣ်အကျဲနီၢ်နီၢ်ဒီး အဲၣ်ဒိး၀ဲဒၣ်လၢၦၤလၢအဘၣ်ထွဲဘၣ်ဃးတဖၣ်ကထံၣ်လိာ်ကတိၤတၢ်အဃိဒ်သိးတၢ်ထံၣ်လိာ်ကတိၤတၢ်ကအိၣ်အဂီၢ်တသ့ဖဲအသ့ကဂုာ်ကျဲးစၢး ဆီၣ်ထွဲ၀ဲလၢသနၢၣ်ဒၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ကရၢခိၣ် ပဒိၣ်စီၤကွဲၤထူ၀့ စံး၀ဲဒၣ်န့ၣ်လီၤႉ...
(သုးက့ ၅)ဟီၣ်က၀ီၤ ၁၅ သီအတီၢ်ပူၤ တၢ်ဒုးကဲထီၣ်(၄၆)ဘျီ ပယီၤသုးသံ(၁၇)ဂၤ
လါမ့ၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်က၀ီၤအပူၤ လါမ့ၤ ၁၅ သီ အတီၢ်ပူၤ တၢ်ဒုးကဲထီၣ်၀ဲ(၄၆)ဘျီဒီးဖဲန့ၣ်ပယီၤသုးတကပၤသံ၀ဲဒၣ်(၁၇)ဂၤႇဘၣ်ဒိ(၇)ဂၤအဂ့ၢ်န့ၣ် မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲမဟါလါမ့ၤ ၁၆ သီအနံၤန့ၣ်လီၤႉ (သုးက့ ၅)ဟီၣ်က၀ီၤ စးထီၣ်တလါအံၤလါမ့ၤ ၁ သီတုၤလၢ ၁၅ သီအနံၤ တၢ်ဒုးကဲထီၣ်၀ဲဒၣ်လၢဟီၣ်က၀ီၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အၦၤဒီးပယီၤသုးအဘၢၣ်စၢၤအဃိ ပယီၤသုးတကပၤ သံဘၣ်ဒိဘၣ်ထံးကဲထီၣ်အသးဒ်အံၤလီၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်မုၢ်တြီၢ်တၢ်ကစီၣ်လံာ်တၢ်ပာ်ဖျါပူၤပာ်ဖျါ၀ဲအသိးန့ၣ် ခံခီခံကပၤတၢ်ဒုးကဲထီၣ်အခါန့ၣ် သုးကီၣ်ကးတကပၤ သူ၀ဲဒၣ်ကဘီယူၤႇသူ၀ဲဒၣ်ဒြိဟးတ့ၢ်လီၤ၀ဲဒၣ်မ့ၣ်ပိၢ်လၢလီၢ်က၀ီၤကမျၢၢ်ဒူသ၀ီတၢ်အိၣ်တၢ်ဆိးတၢ်ဖံးအီၣ်မၤအီၣ် လီၢ်ကျဲကအိၣ်လၢကိးမုၢ်နံၤဒဲးဃၣ်ဃၣ်အဃိ ၦၤကမျၢၢ်အဟံၣ်ဟးဂီၤ၀ဲဒၣ်(၁၅)ဖျၢၣ်ဒီးဘၣ်ဟးဂီၤ၀ဲဒၣ်ဘုဖီတဖျၢၣ် အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိး(သုးက့ ၅)ဟီၣ်က၀ီၤအပူၤ ဖဲအပူၤကွံာ်လါအ့ဖြ့ၣ်ဒီတလါအတီၢ်ပူၤစ့ၢ်ကီး ပယီၤသုးဒီး(KNLA) သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲဒၣ်(၁၇၅)ဒီးဖဲန့ၣ်ပယီၤသုးသံ၀ဲ(၆၄)ဂၤႇဘၣ်ဒိ၀ဲဒၣ်(၃၅)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါတ့ၢ်၀ဲအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါခီဖျိ(သုးက့ ၅)အၦၤဒီၣ်တဲာ်ကွံာ်၀ဲဒၣ်ပယီၤသုးအတၢ်အီၣ်တၢ်အီကျဲဒီးလဲၤက၀ီၤခး၀ဲဒၣ် ပယီၤသုးလၢဒြိမ့ၣ်ပိၢ်တလီၢ်လီၢ်အဃိ ပယီၤသုးအံၤဂုၤလီၢ်ခံကၢတီၢ်ဟးထီၣ်ကွံာ်၀ဲဒၣ်အသုးကလၢၤပူၤစ့ၢ်ကီး ဟဲအါထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံဒုးယၤတၢ်သဘံၣ်သဘုၣ်ကဲထီၣ်၀ဲဒၣ်လၢကီၢ်ပယီၤခူပူၤ၀့ၢ်ပူၤႇ ကလုာ်ဒူၣ်ဖီၣ်စုက၀ဲၤ အဟီၣ်က၀ီၤတၢ်လီၢ်အါတီၤအပူၤဒီးဒ်န့ၣ်အသိးတုၤလၢခဲအံၤတစုတၢ်ဒုးအံၤတလီၤကယး ၀ဲဒၣ်ဘၣ်ဒီးမ့မ့ၢ်တခီဆဲးကဲ ထီၣ်ဒံး၀ဲဒၣ်အဖၢမုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
လၢၢ်ကဆီကီၢ်ဆၣ်အပူၤဒုးယၤတၢ်သဘံၣ်သဘုၣ်အဃိၦၤမၤအီၣ်သဲးဖိတဖၣ်သဂၢၢ်ဘၣ်ကျဲတၢ်ကီတၢ်ခဲဒီး သဲးသၣ်ၦ့ၤတအိၣ်
လါမ့ၤ ၁၆ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ် လၢၢ်ကဆီကီၢ်ဆၣ်ဟီၣ်က၀ီၤအပူၤ ခီဖျိလၢဟီၣ်က၀ီၤဒုးယၤ တၢ်သဘံၣ်သဘုၣ်တၢ်အိၣ်သးအဃိ ၦၤမၤအီၣ်သဲးဖိသ့ၣ်တဖၣ်ဘၣ်ကွၢ်ဆၢမဲာ်ဘၣ်၀ဲကျဲတၢ်ကီတၢ်ခဲဒီးသဲး အၦ့ၤ စ့ၢ်ကီးတအိၣ်ဘၣ်အဂ့ၢ်န့ၣ်လၢၢ်ကဆီကီၢ်ဆၣ်မနိၣ်ရိၣ်ဟီၣ်က၀ီၤၦၤမၤအီၣ်သဲးဖိတဂၤစံး၀ဲဒၣ်န့ၣ်လီၤႉ အ၀ဲစံး၀ဲလၢ “ယမၤအီၣ်သဲးသၣ်န့ၣ်အခဲအံၤယတဆါဘၣ်လၢၤန့ၣ်အိၣ်ဒံး၀ဲလီၤႉ ခီဖျိလၢကျဲန့ၣ်တၢ်ဒုးတၢ် ယၤအိၣ်ထီၣ်၀ဲထီဘိလၢကျဲဒီတဘိညါမီၤနီၤႉအဃိန့ၣ်တၢ်လဲၤထီၣ်က့ၤလီၤစ့ၢ်ကီးကီထီၣ်ခဲထီၣ်၀ဲဒိၣ်မးလၢတၢ်တီဆှၢ၀ဲဒၣ်သဲးသၣ်မ့ၢ်ဂ့ၤႇ တၢ်ဖိတၢ်လံၤအဂၤသ့ၣ်တဖၣ်ဆူခူပူၤ၀့ၢ်ပူၤမီၤနီၤႉ ပူၤကွံာ်လၢညါခါတချုးဒံး လၢသုးကီၣ်ကးဟံန့ၢ်ဆူၣ်ကွံာ်တၢ်စိတၢ်ကမီၤဘၣ်န့ၣ်ပဆါဘၣ်သဲးသၣ်တပီၢ်န့ၣ်(၄၀၀၀)ဘျဲၣ်တုၤလၢ(၅၀၀၀)လီၤႉ အခဲခဲအံၤန့ၣ်သဲးသၣ်တပီၢ်န့ၣ်အဆူၣ်ကတၢၢ်အိၣ်၀ဲဒၣ်(၂၇၀၀)ဒီး(၂၈၀၀)ထဲန့ၣ်လီၤႉ အၦ့ၤလီၤ၀ဲတ ၀ာ်ဃၣ်ဃၣ်ညါမီၤနီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိလၢကျဲတၢ်လဲၤတၢ်က့ၤကီခဲ၀ဲဒီးသဲးသၣ်စ့ၢ်ကီးအၦ့ၤတဂ့ၤဘၣ်အဃိၦၤမၤအီၣ်သဲးဖိသ့ၣ်တဖၣ် ဘၣ်ပာ်ဖှိၣ်အ၀ဲသ့ၣ်သဲးသၣ်လၢဒဲပူၤႇ ပျီပူၤဒ်န့ၣ်လီၤဒီးဒ်န့ၣ်အသိးအ၀ဲသ့ၣ်ဘၣ်ယိၢ်စ့ၢ်ကီး၀ဲလၢအ၀ဲ သ့ၣ်သဲးသၣ်အဃၢ်ကအီၣ်ဟးဂီၤကွံာ်၀ဲဒၣ်အဂ့ၢ် ၦၤမၤအီၣ်သဲးဖိတဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ လၢၢ်ကဆီကီၢ်ဆၣ်အပူၤၦၤမၤအီၣ်သဲးဖိသ့ၣ်တဖၣ်အါဒၣ်တၢ်က့ၢ်န့ၣ်လဲၤစိာ်ဆှၢဆါ၀ဲဒၣ်သဲးသၣ်တဖၣ်ဆူဘျံး၀့ၢ်အပူၤဒီးတကီၢ်ခါခဲအံၤမ့ၢ်လၢတၢ်ဒုးတၢ်ယၤတၢ်အိၣ်သးအဃိတလဲၤဆါဘၣ်၀ဲသဲးသၣ်လၢၤဘၣ်အဂ့ၢ်န့ၣ် ၦၤမၤအီၣ်သဲးဖိတဖၣ် စံး၀ဲန့ၣ်လီၤႉ ဘျံးဒ၀ဲၢ်ကီၢ်ရ့ၣ်လၢၢ်ကဆီကီၢ်ဆၣ်အပူၤန့ၣ်လီၢ်က၀ီၤၦၤကမျၢၢ်သ့ၣ်တဖၣ်အါဒၣ်တက့ၢ်န့ၣ်မ့ၢ်ၦၤလုၢ်အီၣ်သးသမူဖံးအီၣ်မၤအီၣ်သူၣ်အီၣ်ဖျးအီၣ်၀ဲဒၣ်သဲးကျီးသ့ၣ်တဖၣ်ဒီးဒ်န့ၣ်အသိးၦၤမၤအီၣ်၀ဲရီဘၢၣ်ႇ (ဆီအုန်း) ထူၣ်သ့ၣ်တဖၣ်အိၣ်စ့ၢ်ကီး အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးလၢၢ်ကဆီကီၢ်ဆၣ်အပူၤ ဖဲကွံာ်လါအ့ဖြ့ၣ်(၂)သီအနံၤန့ၣ်တၢ်ဘၣ်သဂၢၢ်ခးလိာ်ကဲထီၣ်၀ဲလၢ ကညီ ဒီကလုာ်တၢ်ထူၣ်ဖျဲးသုးမုၢ်ဒိၣ်ဒီးပယီၤသုးကီၣ်ကးအဘၢၣ်စၢၤ၀ံၤအလီၢ်ခံ ပယီၤသုးအံၤဟဲနုာ်လီၤ၀ဲလၢချီၣ် သူဂီၤသ၀ီပူၤဒီးဟံက့ၤစိာ်၀ဲၦၤကမျၢၢ်အသဲးသၣ်ဃ့သ့ၣ်တဖၣ်အါအါဂီၢ်ဂီၢ်ကဲထီၣ်တ့ၢ်အသးအိၣ်၀ဲ အဂ့ၢ်န့ၣ် သ့ၣ်ညါဘၣ် န့ၣ်လီၤႉ ခီဖျိလၢခံခီခံကပၤအဘၢၣ်စၢၤတၢ်ဒုးတၢ်ယၤကဲထီၣ်ဒီးသုးကီၣ်ကးတကပၤခးလီၤကျိဖးဒိၣ်ႇ ကဘီယူၤစ့ၢ် ကီးဟဲခးလီၤတၢ်အဃိကမျၢၢ်တဖၣ်ဘၣ်ပာ်တ့ၢ်ကွံာ်၀ဲသဲးကျီးတၢ်ဖံးအီၣ်မၤအီၣ်ဘၣ်ဃ့ၢ်အိၣ်ကဒုအသးဆူထံနါထံခံႇ တၢ်လီၢ်တၢ်ကျဲလၢအဂၤအဂ့ၢ်သ့ၣ်ညါဘၣ်လၢ လီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ
WAN-IFRA WIN (၂၀၂၄)နံၣ်အဂီၢ်မုၢ်ထီၣ်ကလံၤထံးခၢၣ်စး (KIC)အဲးဒံးထၢၣ်ခိၣ်ကျၢၢ်နါဖီဂ့ၤဒိးန့ၢ်ဘၣ်၀ဲ Women In News Editorial Leadership Award
လါမ့ၤ ၁၆ သီႇ ၂၀၂၄ နံၣ်ႇ ခ့ၣ်အဲးစံၣ်ႇ WAN-IFRA WIN(၂၀၂၄နံၣ်)အဂီၢ်တၢ်ဟ့ၣ်မၤလၤကပီၤ၀ဲ Women In News Editorial Leadership Award (၃)ဂၤအကျါ မုၢ်ထီၣ်ကလံၤထံးခၢၣ်စး (KIC)ကညီတၢ်ကစီၣ် ၦၤနဲၣ်တၢ်ဒီးလၢအမ့ၢ်စ့ၢ်ကီး အဲးဒံးထၢၣ်ခိၣ်ကျၢၢ် နါဖီဂ့ၤ ဒိးန့ၢ်ဘၣ်၀ဲအဂ့ၢ် WAN-IFRA WIN ထုးထီၣ်ပာ်ဖျါ၀ဲဖဲလါမ့ၤ(၁၄)သီအနံၤန့ၣ်လီၤႉ Women In News Editorial Leadership Award ခိၣ်ဖးလၢတၢ်ဃုထၢထီၣ်ဟ့ၣ်၀ဲခဲအံၤန့ၣ်တၢ်ပညိၣ်ဃုထၢ၀ဲလၢပိာ်မုၣ်ပိာ်မၢၤဂ့ၢ်၀ီတၢ်ဖံးတၢ်မၤအပူၤၦၤလၢဟူးဂဲၤလၢတၢ်တီခိၣ်ရိၢ်မဲတၢ်ကစီၣ်မံၣ်ဒံၣ်ယၢၣ်ႇတၢ်ဆီၣ်ထွဲမၤစၢၤမုၣ်ခွါတၢ်ထဲသိးတုၤသိးႇစၢၤသွဲၣ်သီၦၤမၤတၢ်ကစီၣ်ဖိဒီးဖျိးစိလၢတၢ်ဖံးတၢ်မၤပူၤတကးဘၣ်မ့ၢ်ၦၤလၢအဟ့ၣ်ဒိဂ့ၤတဲာ်ဘၣ်လၢ(မံၣ်ဒံၣ်ယၢၣ်)တၢ်မၤအပူၤ၊ဒုးအိၣ်ထီၣ်တၢ်ဆီတလဲလၢအဂ့ၤဆူထံကီၢ် ဘၣ်ထွဲတဖၣ်အဂီၢ်အဂ့ၢ်န့ၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ “တၢ်ဃုထၢဟ့ၣ်လၤကပီၤတၢ်ပညိၣ်န့ၣ်မ့ၢ်၀ဲဒ်သိးႇမံၣ်ဒံၣ်ယၢၣ်တၢ်ကစီၣ်ပၢဆှၢရဲၣ်ကျဲၤအတၢ်ဖံးတၢ်မၤအသနၢၣ်အပူၤႇပိာ်မုၣ်ပိာ်မၢၤသ့ၣ်တဖၣ်အံၤဒ်မူဒါလီၤဘၣ်၀ဲအသိးန့ၣ်လၢတၢ်တီခိၣ်ရိၢ်မဲတကပၤအတၢ်ပၣ်ဃုာ်ပၣ်ဂီၢ်တၢ်မၤသကိးဟဲအါထီၣ်၀ဲအဖီခိၣ်န့ၣ်မ့ၢ်ဒ်သိးတၢ်ကပာ်ပနီၣ်ပိာ်မုၣ်သ့ၣ်တဖၣ်အံၤအတၢ်မၤနီၢ်နီၢ်အဂီၢ်န့ၣ်လီၤအဂ့ၢ်” WAN-IFRA WIN မုၢ်ထီၣ်ကလံၤထံးအၣ်စံၣ်ယၣ် ၦၤနဲၣ်တၢ် ဒီၤခ့ၤသၤဒၤထ့ စံး၀ဲဘၣ်ဃးတၢ်ဟ့ၣ်လီၤဘၣ်ဃးခိၣ်ဖးန့ၣ်လီၤႉ လၢန့ၣ်အမဲာ်ညါႇအၣ်ဖရံၣ်ကၣ်ႇအၣ်ရၣ်ဒီးမုၢ်ထီၣ်ကလံၤစိးတၢ်လီၢ်(၃)တီၤအပူၤႇၦၤလၢတၢ်ဃုထၢဟ့ၣ်လၤကပီၤ၀ဲ(၃)ဂၤအကျါႇတဂၤလၢအမ့ၢ်(KIC)ကညီတၢ်ကစီၣ်ၦၤနဲၣ်တၢ်နါဖီဂ့ၤအံၤကီၢ်ပယီၤအပူၤထံရူၢ်ကီၢ်သဲးတၢ်ဆီတလဲအိၣ်ထီၣ်အဖီခိၣ်မ့မ့ၢ်၀ဲတၢ်ကစီၣ်သန့တခါလၢဘၣ်သုးလီၢ်သုးကျဲအိၣ်ဆိးဆူထံချၢကီၢ်ချၢဘၣ်ဆၣ်ႇအ၀ဲဂုာ်ကျဲးစၢးဆီၣ်ထွဲ၀ဲၦၤထၢတၢ်ကစီၣ်ဖိတဖၣ်အတၢ်ဘံၣ်တၢ်ဘၢဒီးႇဂုၢ်ကျဲးစၢးပၢၤဃာ်၀ဲတၢ်ကစီၣ်သဘျ့ခွဲးယာ်ႇဒီးဆီၣ်ထွဲ၀ဲကီၢ်ပယီၤကလုာ်ဒူၣ်ၦၤမၤတၢ်ကစီၣ်ဖိတဖၣ်အိၣ်၀ဲအဂ့ၢ် WAN-IFRA WIN ပာ်ဖျါ၀ဲန့ၣ်လီၤႉ တကတီၢ်ဃီႇဒိးန့ၢ်ဘၣ်၀ဲခိၣ်ဖးဒ်အံၤအဖီခိၣ်မ့ၢ်တၢ်သူၣ်မံသးမုာ်လၢအဂီၢ်ဒီးမ့ၢ်စ့ၢ်ကီး၀ဲတၢ်ဟ့ၣ်ဂံၢ်ဟ့ၣ်ဘါတခါလၢခါဆူညါ(ု၍ဃ)ကညီတၢ်ကစီၣ်အတၢ်ဖံးတၢ်မၤတၢ်လဲၤကျဲအဃိကဂုၢ်ကျဲးစၢး၀ဲလၢကညီတၢ်ကစီၣ်အတၢ်လဲၤထီၣ်လဲၤထီအဂီၢ်ဃုာ်ဒီးမုၣ်ခွါတၢ်ထဲသိးတုၤသိးအဂီၢ်အဂ့ၢ်(KIC)ၦၤနဲၣ်တၢ်နါဖီဂ့ၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဘၣ်ဃးဒီးတၢ်ဒိးန့ၢ်ဘၣ်ခိၣ်ဖးတခါန့ၣ်မ့ၢ်ၦၤဟ့ၣ်တၢ်ဖိတဖၣ်အတၢ်ပာ်သူၣ်ပာ်သးလၢယဖီခိၣ်လၢယတၢ်ဟ့ၣ်လီၤယသးလၢမံၣ်ဒံၣ်ယၢၣ်အတၢ်ဖံးတၢ်မၤအပူၤလီၤႉဒီးခံခါတခါခီန့ၣ်မ့ၢ်၀ဲအ၀ဲသ့ၣ်တဖၣ်အတၢ်ပာ်သးလၢပၦၤကညီအမံၣ်ဒံၣ်ယၢၣ်ၦၤမၤတၢ်ကစီၣ်အကျါၦၤလၢဟ့ၣ်လီၤသးဒီးတၢ်ကဲဘျူးလၢၦၤက၀ၢအဖီခိၣ်သ့ၣ်တဖၣ်လီၤႉဒီးယနီၢ်ကစၢ်ဒၣ်ယဲယဒိးန့ၢ်ဘၣ်ခိၣ်ဖးတခါအံၤအဖီခိၣ်န့ၣ်ယသူၣ်မံသးမုာ်ဒိၣ်မးလီၤႉခိၣ်ဖး၀ဲအံၤန့ၣ်မ့ၢ်၀ဲတၢ်ဟ့ၣ်ဂံၢ်ဟ့ၣ်ဘါယၤလၢခါဆူညါပကဘၣ်ဆဲးမၤတၢ်လၢပခ့ၣ်အဲးစံၣ်ကညီတၢ်ကစီၣ်အတၢ်လဲၤထီၣ်လဲၤထီအဂီၢ်လီၤႉပကဘၣ်လဲၤတၢ်အံၤအိၣ်ဒံးဖးယံာ်ဒံးတမ့ၢ်ထဲယၤတဂၤဘၣ်ႉၦၤလၢမၤသကိးတၢ်ကိးဂၤန့ၣ်သနါက့အတၢ်ပၣ်ဃုာ်ပၣ်ဂီၢ်စ့ၢ်ကီးလီၤႉဒီးဒ်သိးလၢပိာ်မုၣ်တၢ်တီခိၣ်ရိၢ်မဲတကပၤကလဲၤထီၣ်လဲၤထီအဂီၢ်စ့ၢ်ကီးယကကျဲးစၢးတသ့ဖဲအသ့လၢတၢ်ထဲသိးတုၤသိးတၢ်ဂုၢ်ထီၣ်ပသီထီၣ်အဂီၢ်...
သထူၣ်ကီၢ်ဆၣ် တၢ်လဲၤမၤပိၢ်ဖးထီၣ်တပျဲကျိတိၤ၀ံၤ(၃)သီအတီၢ်ပူၤ ကျိဖးဒိၣ်အဃိကမျၢၢ်ဃ့ၢ်ထီၣ်(၄၀၀၀)ဘျဲၣ်
လါမ့ၤ ၁၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ်အပူၤ တၢ်လဲၤမၤပိၢ်ဖးထီၣ် တပျဲကျိတိၤ၀ံၤစးထီၣ်လါမ့ၤ ၁၁ သီတုၤလၢ ၁၃ သီလၢသၢသီအတီၢ်ပူၤ ခီဖျိပယီၤသုးခးလီၤကျိဖးဒိၣ်တပယူာ်ဃီ အဃိ လီၢ်က၀ီၤကမျၢၢ်အဂၤ(၄၀၀၀)ဘျဲၣ်ဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် ဒူသထူၣ်ကီၢ်ရ့ၣ် တၢ်ကစီၣ်ထုးထီၣ်ပာ်ဖျါ၀ဲ အသိး သ့ၣ်ညါဘၣ်န့ၣ်လီၤႉ ဖဲလါမ့ၤ ၁၁ သီအနံၤန့ၣ် တၢ်လဲၤမၤပိၢ်ဖးထီၣ်၀ဲတပျဲတိၤအံၤဒီးဖဲန့ၣ် သုးကီၣ်ကးအမျိာ်သုး(၃၁၄),(ခမရ-၉),(ခလရ-၈) သုး ရ့ၣ်တဖၣ်အံၤခီဖိအျ၀ဲသ့ၣ် ခးလီၤကဒါ၀ဲကျိဖးဒိၣ်ဆူလီၢ်က၀ီၤဒူသ၀ီတဖၣ်အပူၤကိးမုၢ်နံၤမုၢ်နၤ တပယူာ်ဃီအဃိ ဒူသ၀ီလီၢ်က၀ီၤကမျၢၢ်လၢအအိၣ်ဘူးဖဲန့ၣ်သ့ၣ်တဖၣ်ပျံၤတၢ်ဖုးတၢ်ဘၣ်ဃ့ၢ်ထီၣ်ဟးစံၣ်အိၣ်၀ဲဒၣ် လၢတၢ်လီၢ်အဂၤ ဟဲကဲထီၣ်အသးဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးဒီးတၢ်ဂ့ၢ်ကဲထီၣ်သးအံၤန့ၣ်သထူၣ်ကီၢ်ဆၣ် နဲၣ်ရွဲၣ်သဃဲၤ စီၤမိစီၣ်ထဲၣ် စံး၀ဲလၢ“ပကီၢ်ဆၣ်ပူၤဒုဒုၣ်ဒါန့ၣ် ခးတၢ် ထီဘိကွၢ်ဖဲကလီၤတဲာ်လီၤႉပမ့ၢ်တဲလိၤလိၤန့ၣ်အါတက့ၢ်ၦၤကမျၢၢ်န့ၣ်ဘၣ်ဒိဘၣ်ထံးသံထီဘိလီၤႉတၢ်ဒုးမ့ကဲထီၣ်တဘျီလၢ်လၢ်န့ၣ်ဒုၣ်ဒါန့ၣ်ခးကျိအါထီၣ်မီၤနီၤႉကမျၢၢ်ခီန့ၣ်တၢ်ဒုးတၢ်ယၤမ့ကဲထီၣ်န့ၣ်အ၀ဲသ့ၣ်ဘၣ်ဃ့ၢ်မှံဟးဖျိး တနီၤန့ၣ်လဲၤ စံၣ်အိၣ်ဒၣ်လၢဒဲလၢခူပူၤ၀့ၢ်ပူၤႇမုဂါဖါတံၢ်ဟံၣ်အိၣ်တနီၤစ့ၢ်ႉစံၣ်ထီၣ်လၢလာ်တနီၤလၢခိတနီၤလဲၤအိၣ်၀ဲ လၢတဂၤလၢ အကစၢ်ကျီးကစၢ်ဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤႉ လၢန့ၣ်အမဲာ်ညါတၢ်သၢသီအတီၢ်ပူၤအံၤပယီၤသုးခးလီၤ၀ဲဒၣ်ကျိဖးဒိၣ်အိၣ်၀ဲခဲလၢာ်အဖျၢၣ်(၁၀၀)ဘျဲၣ်ဒီး လၢတၢ်န့ၣ် အဃိဒူသ၀ီလၢအဃ့ၢ်ထီၣ်သ့ၣ်တဖၣ်န့ၣ်မ့ၢ်၀ဲ လါအီၣ်ဃၢၤသ၀ီႇပါအီၣ်ကိသ၀ီႇဒီယွၣ်သ၀ီႇစးတရီႇ စွ့ၣ်ယီၣ်ပၠးႇ ကလီာ်ဃၢၤသ၀ီႇမယါကိႇမံၣ်ကၠီအဲၣ်ဒူသ၀ီသ့ၣ်တဖၣ်ဒီး သ၀ီသ့ၣ်တဖၣ်အံၤဟံၣ်ဒူၣ်ခဲလၢာ်ပာ်ဖှိၣ်အိၣ်၀ဲ (၇၈၇)ဖျၢၣ်ႇ ၦၤနီၣ်ဂံၢ်ခဲလၢာ်အိၣ်၀ဲ(၄၆၄၀)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီအပူၤပာ်ဖျါ၀ဲန့ၣ်လီၤႉ တကးဒံးဘၣ်ခီဖျိကျိဖးဒိၣ်အံၤအဃိကမျၢၢ်သံ၀ဲဒၣ်(၃)ဂၤဒီးဘၣ်ဒိ(၁၅)ဂၤအကျါပၣ်ဃုာ်၀ဲဒၣ်ဖိသၣ်(၅)ဂၤႇ ၦၤမိၢ်ဒၢ(၁)ဂၤဒီးဒ်န့ၣ်အသိးၦၤကမျၢၢ်အဟံၣ်အဃီဃုာ်ဒီးကျီးပူၤတၢ်မုၢ်တၢ်ဘိစ့ၢ်ကီးဟးဂီၤ၀ဲဒၣ်အိၣ်အဂ့ၢ်န့ၣ် လံာ်တၢ်ပာ်ဖျါအပူၤ...
ထီၣ်တထူၣ်ကီၢ်ဆၣ်ပူၤ ပယီၤသုးပညိၣ်ခးလီၤကျိဖးဒိၣ်အဃိ ဘၣ်သံကမျၢၢ်(၄)ဂၤ ဘၣ်ဒိ(၃)ဂၤ
လါမ့ၤ ၁၅ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢ တီအူကီၢ်ရ့ၣ် သုးက့(၂) ထီၣ်တထူၣ်ကီၢ်ဆီၣ်အပူၤ ဖဲပူၤကွံာ်လါမ့ၤ(၁၃)သီ ဟါခီ(၉)နၣ်ရံၣ်တခီအဆၢကတီၢ် ခီဖျိပယီၤကီၣ်ကးအံၤပညိၣ်ပာ်ပနီၣ်ခးလီၤကျိဖးဒိၣ်ဆူ(ယွၤလ့ကိ)သ၀ီပူၤ အဃိ ဘၣ်သံကမျၢၢ်(၄)ဂၤအကျါပာ်ဃုာ်ပိာ်မုၣ်(၂)ဂၤဒီး ဘၣ်ဒိ(၃)ဂၤအဂ့ၢ်န့ၣ် ထီတထူၣ်ကီၢ်ဆၣ်ၦၤဘၣ်မူ ဘၣ်ဒါ စံး၀ဲ န့ၣ်လီၤႉ စယဲၤကၠံ ပယီၤသုး(ခလရ-၇၃)အၦၤတဖၣ်အံၤ တၢ်ဒုးတၢ်ယၤကဲထီၣ်တအိၣ်ဘၣ်ဘၣ်ဆၣ် ပယီၤသုးအံၤပ ညိၣ် ပာ်ပနီၣ်၀ဲကမျၢၢ်တဖၣ်ဒ်ဒုၣ်ဒါအသိးအဃိ ခးလီၤ၀ဲကျိဖးဒိၣ်ကိးနံၤဒဲးဃၣ်ဃၣ်အဂ့ၢ်န့ၣ် ထီၣ်တထူၣ် ကီၢ်ဆၣ် ၦၤဘၣ်မူဘၣ်ဒါတဂၤ စံးဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ “ဘၣ်မနုၤအဃိလဲၣ်န့ၣ်(စယဲၣ်ကၠံ)ကလံၤထံးဟီၣ်က၀ီၤန့ၣ်ဒုၣ်ဒါအတၢ်ပၢတၢ်ပြးတအိၣ်တၢ်နီတမံၤလၢၤဘၣ်မီၤနီၤႉ အိၣ်၀ဲဒၣ်လၢခ့ၣ်အဲၣ်ယူၣ်သူၣ်လီၤ၀ဲဒၣ်တၢ်ပၢတၢ်ပြးသ့ၣ်တဖၣ်အဃိအ၀ဲသ့ၣ်န့ၣ်ပာ်၀ဲဒၣ်ကမျၢၢ် တဖၣ်ဒ်သိးဒီးအဒုၣ်အဒါအဃိခး၀ဲဒၣ်လီၤႉ ဒုၣ်ဒါန့ၣ်ဟဲနုာ်လီၤလၢပဟီၣ်က၀ီၤပူၤန့ၣ်တန့ၢ်ဘၣ်မီၤနီၤႉ ခီဖျိ လၢဟဲနုာ်လီၤတန့ၢ်ဘၣ်အဃိ (၇၃)သုးရ့ၣ်လၢအအိၣ်၀ဲဒၣ်လၢ(စယဲၤကၠံ)န့ၣ်ခးလီၤ၀ဲဒၣ်ကျိဖးဒိၣ်ဆူသ၀ီ သ့ၣ်တဖၣ်န့ၣ်မ့ၢ်ဘၣ်တဲန့ၢ်တနွံန့ၣ်ခံဘျီ သၢဘျီမီၤနီၤႉ တမ့ၢ်လၢပလဲၤမၤတံာ်တာ်အီၤဒီးလဲၤထီၣ်ဒုးအသုးရ့ၣ် ဒ်န့ၣ်တမ့ၢ်ဘၣ်ႉ အ၀ဲသ့ၣ်န့ၣ်ပာ်၀ဲကမျၢၢ်ဒ်သိးအဒုၣ်ဒါအဃိန့ၣ်ခး၀ဲဒၣ်လီၤႉ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါပယီၤသုးအံၤခးလီၤကျိဖးဒိၣ်ဆူကမျၢၢ်ဒူသ၀ီတၢ်လီၢ်တၢ်ကျဲပူၤတမ့ၢ်ထဲလၢဒူသ၀ီတဖျၢၣ်ဘၣ်ဒီး မ့မ့ၢ်တခီခးလီၤစ့ၢ်ကီၢ်၀ဲလၢတၢ်လီၢ်အါတီၢ်ပူၤအဃိ ၦၤဒူဖိသ၀ီဖိကမျၢၢ်သ့ၣ်တဖၣ်ဘၣ်ဃ့ၢ်အိၣ်ကဒု အသးလၢ ဒူသ၀ီချၢဒီးအ၀ဲသ့ၣ်အံၤခိးကနၣ်၀ဲဒၣ်တၢ်အိၣ်သးမ့ၢ်လီၤကယးမးက့ၤကဒါ၀ဲလၢအဒူသ၀ီပူၤအ ဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ စယဲၣ်ကၠံ လီၢ်က၀ီၤကမျၢၢ်လၢအသံ(၄)ဂၤန့ၣ်မ့ၢ်၀ဲ အူကၠီၣ်စ့ၤ(၈၄)နံၣ်ႇ မၣ်ထ့ယံၤ(၅၂)နံၣ်ႇ ကိၤထ့နဲၤ(၄၉)နံၣ် ဒီး မၣ်အံၣ်ဖူသီၤ(၁၈)နံၣ်သ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးလၢတီအူကီၢ်ရ့ၣ် သုးက့(၂)...
ပယီၤသုးလၢဟံတၢ်ဘံၣ်တၢ်ဘၢဖဲတပျဲကျိတိၤအခိၣ်အဃၢၤအံၤတဖၣ်တၢ်ပၢၢ်ဆၢသုးပာ်ဖှိၣ်လဲၤတ့ၢ်လီၤ၀ဲဒီးဒြိ
လါမ့ၤ ၁၅ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ်အပူၤ ဖဲတနံၤအံၤလါမ့ၤ ၁၅ သီ ဂီၤခီ ၉ နၣ်ရံၣ် အဆၢကတီၢ်န့ၣ် ပယီၤသုးလၢအဟံတၢ်ဘံၣ်တၢ်ဘၢဖဲတပျဲကျိတိၤအခိၣ်အဃၢၤတဖၣ်အံၤ တၢ်ပၢၢ်ဆၢသုးပာ်ဖှိၣ် လဲၤတ့ၢ်လီၤ၀ဲဒီးဒြိအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်လါမ့ၤ ၁၁ သီအနံၤန့ၣ် တၢ်လဲၤမၤပိၢ်ဖးထီၣ်၀ဲဒၣ်တပျဲကျိတိၤအံၤအဃိတိၤလီၤၦီၢ်ဟးဂီၤ၀ဲဒၣ်ဒီတဘိဒီး တကီၢ်ခါခဲအံၤသုကီၣ်ကးအံၤဒ်သိးလ့ၢ်ထီၣ်လ့ၢ်လိၤကညီအဂီၢ် အတၢ်ရဲၣ်တၢ်ကျဲၤအိၣ်လၢကဘှီဂ့ၤထီၣ်ကဒါတိၤ အဃိ တၢ်ပၢၢ်ဆၢသုးပာ်ဖှိၣ်ဘၣ်လဲၤတ့ၢ်လီၤ၀ဲဒီးဒြိဒ်အံၤလီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါလၢအိၣ်ဘူးဖဲန့ၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ “ခဲအံၤၦၤလဲၤတ့ၢ်လီၤဒြိဖဲတိၤန့ၣ်(၄)ဘျီဒီးလံႉပယီၤသုးန့ၣ်ကဘှီဂ့ၤထီၣ်ကဒါတိၤမီၤနီၤႉဒ်သိးပယီၤသုးတဖၣ်န့ၣ် တ့ဂ့ၤထီၣ်တိၤသုတန့ၢ်တဂ့ၤအဂီၢ်န့ၣ်ၦၤလဲၤတ့ၢ်လီၤဒြိမၢ်မၢ်လီၤႉတနၣ်ရံၣ်တဘျီမ့တမ့ၢ်ခံနၣ်ရံၣ်တဘျီန့ၣ်ၦၤဂဲၤလိာ်ကွဲအီၤဒ်န့ၣ်ႉနမ့ပျၢ်လိးအီၤဒ်န့ၣ်အ၀ဲသ့ၣ်တ့တိၤမ့၀ံၤန့ၣ်လဲၤထီၣ်လဲၤလီၤမ့ညီန့ၣ်ပၦၤလၢအိၣ်(သုးက့ ၇)သ့ၣ်တဖၣ် ကထံၣ်ဘၣ် တၢ်ကီတၢ်ခဲမီၤနီၤႉလၢပမၤသ့အသိးန့ၣ်ပမၤလီၤ ခဲအံၤအ၀ဲသ့ၣ်န့ၣ်ဆိမိၣ်၀ဲလၢ ကထီၣ်ဆှဲ၀ဲဒၣ်ပအိၣ် တၢ်လီၢ်သ့ၣ်တဖၣ် အဃိ၀ဲဒၣ်နါက့ပတြီတံာ်ဃာ်အကျဲပအိၣ်ဃာ်လၢရဲၤဒံၤစ့ၢ်လီၤႉ”အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါစးထီၣ်လၢတပျဲကျိတိၤဟးဂီၤ၀ံၤလီၢ်ခံန့ၣ်သိလ့ၣ်တၢ်လဲၤထီၣ်က့ၤလီၤအဂီၢ် တၢ်အိးထီၣ်န့ၢ် က့ၤ၀ဲကျဲလၢစွ့ၤယီၤပၠၣ်သ၀ီနုာ်လီၤဖျိထီၣ်ဆူထံညၣ်ပီၢ်သ၀ီတကပၤဒီးဘၣ်ဆၣ်ခီဖျိသိလ့ၣ်ဟဲထီၣ်က့ၤလီၤခံခီယၢ်ပၤအါတလၢအဃိသိလ့ၣ်ကတံာ်၀ဲဒၣ်လၢကျဲပူၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲဒၣ်န့ၣ်လီၤႉ ဒ်န့ၣ်အသိးတၢ်မၤပိၢ်ဖးထီၣ်တိၤ၀ံၤလီၢ်ခံပယီၤသုးအံၤခးလီၤ၀ဲဒၣ်ကျိဖးဒိၣ်ဆူဒူပူၤသ၀ီပူၤတပယူာ်ဃီအဃိ ဒူသ၀ီလီၢ်က၀ီၤကမျၢၢ်လၢအိၣ်ဘူးဖဲတိၤအခိၣ်အဃၢၤတဖၣ်စ့ၢ်ကီးသံဘၣ်ဒိဘၣ်ထံးအိၣ်၀ဲဒၣ်အါမးအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ တပျဲကျိတိၤအံၤဖဲအပူၤကွံာ်(၂၀၂၃)လါယူၤ ၂၈ သီအနံၤန့ၣ် တၢ်ပၢၢ်ဆၢသုးပာ်ဖှိၣ်လဲၤမၤပိၢ်ဖးထီၣ်တ့ၢ်၀ဲ တဘျီလံဒီး ဖဲတလါအံၤလါမ့ၤ ၁၁ သီ တၢ်လဲၤမၤပိၢ်ဖးထီၣ်ကဒီး၀ဲအဃိ မ့ပာ်ဖှိၣ်ဒီးတၢ်တဘျီအံၤ တၢ်လဲၤမၤပိၢ်ဖးထီၣ်၀ဲအိၣ် (၂)ဘျီ...