ဘီကထၣ်ပယီၤသုးကလၢၤလၢအိၣ်ဆီလီၤအသးထီၣ်ဘးလၢ(၅၀)နံၣ်ဃၣ်ဃၣ်ထုးကွံာ်သး
လါမ့ၤ ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ်သုးက့(၃)လၢၢ်ဒိၣ်ကီၢ်ဆၣ်ဟီၣ်က၀ီၤအပူၤဘီကထၣ်ပ ယီၤသုးကီၣ်ကးသုးကလၢၤတဖျၢၣ်လၢအိၣ်ဆီလီၤအသးထီၣ်ဘးလၢ(၅၀)နံၣ်ဃၣ်ဃၣ်အတီၢ်ပူၤအံၤထုးလီၤကွံာ်သးအဂ့ၢ်ချၢၣ်လွံၢ်ထူၣ်ကီၢ်ရ့ၣ်အၦၤဘၣ်မူဘၣ်ဒါသ့ၣ်တဖၣ်စံး၀ဲဒၣ်န့ၣ်လီၤႉ ပယီၤသုး(ဘီကထၣ်)သုးကလၢၤလၢအိၣ်လၢၢ်ဒိၣ်ကီၢ်ဆၣ်အပူၤအံၤန့ၣ်ခီဖျိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ကညီဒီကလုာ်ဂၢၤသးကရၢ(KNDO)သုးပာ်ဖှိၣ်သ့ၣ်တဖၣ်လဲၤက၀ီၤတံာ်ခး၀ဲအဃိဖဲလါမ့ၤ(၇)သီအနံၤမုၢ်နၤခီအဆၢကတီၢ်န့ၣ်ပယီၤသုးကီၣ်ကးအံၤဂုာ်က့ၤ၀ဲအခံအဂ့ၢ်ချၢၣ်လွံၢ်ထူၣ်ကီၢ်ရ့ၣ်နဲၣ်ရွဲၣ်သဃဲၤပဒိၣ်စီၤနဲၣ်ထူဘၠဲစံး၀ဲဒ်အံၤန့ၣ်လီၤႉ “ပၦၤလဲၤက၀ီၤတံာ်ဃာ်၀ဲဒီးခး၀ဲဒီးစုဘျၢ(စနဲဖၢၣ်)ကျိဒီးဒြိမီၤနီၤႉ တၢ်လဲၤက၀ီၤခးအီၤအံၤတံာ်တာ်၀ဲကအိၣ် လၢခံနွံဃၣ်ဃၣ်ညါ အသီ(၁၀)ဒုဘျဲၣ်မီၤနီၤႉ မ့ၢ်လၢတၢ်က၀ီၤခးအီၤကိးနံၤဒဲးဃၣ်ဃၣ်အဃိန့ၣ်အ၀ဲသ့ၣ်ကၢ ထီၣ်၀ဲအခံဒီးက့ၤ၀ဲဒၣ်လီၤႉ အ၀ဲသ့ၣ်က့ၤလီၤ၀ဲဖဲလါမ့ၤ(၇)သီဟါခီအနံၤန့ၣ်ဒီးလါမ့ၤ(၈)သီအနံၤန့ၣ်ပၦၤလဲၤ ထီၣ်ရှဲလဲကွံာ်၀ဲတၢ်လီၢ်တၢ်ကျဲလၢာ်လံမီၤနီၤႉ လၢသုးကလၢၤပူၤန့ၣ်တအိၣ်နီၤတဂၤလၢၤဘၣ်ႉ ဘီကထၣ်သုး ကလၢၤန့ၣ်တမ့ၢ်လၢၦၤထီၣ်တဖှိမၤန့ၢ်အီၤဒ်န့ၣ်ဘၣ်ႉ တၢ်က၀ီၤခး၀ဲလၢဒြိဒီးစနဲဖၢၣ်အဃိန့ၣ်ဂုာ်က့ၤ၀ဲအခံမီၤ နီၤႉ ဒီးမ့ၢ်တက့ၤဂုာ်က့ၤအခံဒုတၢ်ကဂဲၤအီၤလီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါပယီၤသုးလၢအဂုာ်က့ၤအလီၢ်ခံသ့ၣ်တဖၣ်အံၤက့ၤဂုာ်က့ၤ၀ဲအခံလၢ(တိၤသ့ၣ်ဖူ)သ၀ီအဃၢၤတကပၤလၢကပာ်ဖှိၣ်ထီၣ်က့ၤအသးဒီးအသုးဂံၢ်ဘါလၢအဟဲထီၣ်သ့ၣ်တဖၣ်အဂ့ၢ်ပဒိၣ်စီၤနဲၣ်ထူဘၠဲစံးအါထီၣ်၀ဲဒၣ်န့ၣ်လီၤႉ ဘီကထၣ်ပယီၤသုးကလၢၤ၀ဲအံၤန့ၣ်ဘၣ်တၢ်စးထီၣ်ဟူးဂဲၤက၀ီၤတံၢ်ဃာ်အီၤလၢလါအ့ဖြ့ၣ်(၂၂)သီအနံၤလံဒီးသုးကလၢၤအပူၤပယီၤသုးလၢအိၣ်ဆီလီၤအသးတဖၣ်န့ၣ်မ့ၢ်၀ဲခီၣ်သုးရ့ၣ်(ခလရ-၅၇)ဒီးအၦၤနီၣ်ဂံၢ်လၢအိၣ် တ့ၢ်က့ၤဂုာ်က့ၤ၀ဲအခံခဲလၢာ်အိၣ်၀ဲ(၃၀)ဂၤဘျဲၣ်အဂ့ၢ်သ့ၣ်ညါဘၣ်န့ၣ်လီၤႉ လၢအသီ(၁၀)ဘျဲၣ်တၢ်က၀ီၤတံၢ်ခး၀ဲပယီၤသုးကီၣ်ကးအံၤအဃိပယီၤသုးသံဘၣ်ဒိဘၣ်ထံးခဲလၢာ်(၂၀)ဂၤဃၣ်ဃၣ်အသိးဒီးဖဲတၢ်လဲၤထီၣ်ရှဲလဲကွံာ်၀ဲဘီကထၣ်ပယီၤသုးကလၢၤအဆၢကတီၢ်တၢ်တမၤန့ၢ်တၢ်စုက၀ဲၤနီတမံၤဘၣ်မ့ၢ်လၢသုးကီၣ်ကးအံၤက့ၤစိာ်ဃုာ်၀ဲဒီးတၢ်စုက၀ဲၤသ့ၣ်တဖၣ်အဂ့ၢ်သ့ၣ်ညါဘၣ်န့ၣ်လီၤ ဒ်န့ၣ်အသိးသုးကလၢၤ၀ဲအံၤန့ၣ်အိၣ်သူၣ်လီၤအသးထီၣ်ဘးလၢအနံၣ်(၅၀)ဃၣ်ဃၣ်လံဒီးသုးကလၢၤ၀ဲအံၤပူၤန့ၣ်တနံၣ်တဘျီမ့တမ့ၢ်ခံနံၣ်တဘျီဆီတလဲၤ၀ဲအသုးရ့ၣ်အၦၤသ့ၣ်တဖၣ်အိၣ်၀ဲအဂ့ၢ်သ့ၣ်ညါဘၣ်န့ၣ်လီၤႉ ဒ်န့ၣ်အသိးချၢၣ်လွံၢ်ထူၣ်ကီၢ်ရ့ၣ်ဟီၣ်က၀ီၤဒီတဘ့ၣ်အပူၤစးထီၣ်လၢသုးကီၣ်ကးဟံန့ၢ်ဆူၣ်တၢ်စိတၢ်ကမီၤ၀ံၤအလီၢ်ခံတၢ်ထီၣ်ဒုးမၤန့ၢ်ကွံာ်၀ဲပယီၤသုးကီၣ်ကးသုးကလၢၤအိၣ်၀ဲခဲလၢာ်(၁၈)ဖျၢၣ်ပာ်ဃုာ်ဒီးဘီကထၣ်သုးကလၢၤဒီးမ့မ့ၢ်ပယီၤသုးကလၢၤလၢအဂုာ်က့ၤ၀ဲအခံန့ၣ်အိၣ်၀ဲခဲလၢာ်န့ၣ်အဖျၢၣ်(၁၀)အဂ့ၢ်သ့ၣ်ညါဘၣ်လၢချၢၣ်လွံၢ်ထူၣ်ကီၢ်ရ့ၣ်အၦၤဘၣ်မူဘၣ်ဒါအအိၣ်န့ၣ်လီၤႉ
၃၅ ၀ီတ၀ီ နံၣ်ဆဲးဆၢအဂီၢ် (KYO)ကွဲမုာ်၀ဲကညီသူၣ်ဘီၣ်သးစၢ်တဖၣ်လၢကဆှၢထီၣ်အတၢ်ကွဲး
လါမ့ၤ ၁၄ သီႇ ၂၀၂၄ နံၣ်ႇ ခ့ၣ်အဲးစံၣ် လၢကဟဲတလါအံၤလါမ့ၤ ၂၃ သီအနံၤန့ၣ် လီၤဘၣ်၀ဲဒၣ် ၃၅ ၀ီတ၀ီ ကညီသးစၢ်ကရၢ(KYO)နံၣ်ဆဲးဆၢမုၢ်နံၤဒီး လၢမုၢ်နံၤအံၤအဖီခိၣ်ကညီသူၣ်ဘီၣ်သးစၢ်ၦၤကွဲးတၢ်ဖိတဖၣ်ကဆှၢထီၣ်ဘၣ်အတၢ်ကွဲးသ့ၣ်တဖၣ်အဂ့ၢ်န့ၣ် (KYO)ပာ်ဖျါဒုးသ့ၣ်ညါလီၤ၀ဲဒၣ်လၢအ(facebook page)ပူၤဖဲလါမ့ၤ ၁၂ သီအနံၤန့ၣ်လီၤႉ (KYO)နံၣ်ဆဲးဆၢတၢ်သ့ၣ်ဆၢက့ၤဘျီ၀ဲအံၤအဂီၢ်တၢ်ကထုးထီၣ်၀ဲဒၣ်လံာ်မဲးကစံတဘ့ၣ်လၢအမံၤမ့ၢ်“အဲၣ်တၢ်တီ” အံၤဒီးလၢတၢ်န့ၣ်အဃိကွဲမုာ်ဘၣ်သူၣ်ဘီၣ်သးစၢ်တဖၣ်လၢကဆှၢထီၣ်ဘၣ်အတၢ်ကွဲးသ့ၣ်တဖၣ်အဂ့ၢ်န့ၣ် (KYO)ၦၤဘၣ်မူဘၣ်ဒါ ဆီၣ်တခူစံး၀ဲန့ၣ်လီၤႉ ဘၣ်ဃးတၢ်ကွဲမုာ်သူၣ်ဘီၣ်သးစၢ်လၢကဆှၢထီၣ်အတၢ်ကွဲးလၢ(KYO)မုၢ်နံၤအဖီခိၣ်အံၤအတၢ်ပညိၣ်မ့ၢ်မနုၤလဲၣ်ဒီး တၢ်ကွဲးသ့ၣ်တဖၣ်အံၤတၢ်ကထၢနုာ်ထုးထီၣ်အီၤဖဲလဲၣ်အဂ့ၢ်န့ၣ် (KYO) နဲၣ်ရွဲၣ်သဃဲၤ–၂ စီၤအဲၣ်ထံကီၢ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“လၢကဟဲလါမ့ၤ ၂၃ သီ တၢ်ဒုးအိၣ်ထီၣ်(KYO)ၦဲၤထီၣ်၀ဲဒၣ် ၃၅ နံၣ် ပကမၤလၤကပီၤအီၤဒီးသုတမ့ၢ် မၤလၤကပီၤအီၤလၢ၀ံၤတၢ်မံၤဘၣ်ႉတၢ်မၤလၤကပီၤအီၤအဖီခိၣ်န့ၣ်ဒ်သိးကကဲဘျုးက့ၤလၢကရၢမိၢ်ၦၢ်လၢကလဲၤထီၣ်၀ဲတကီၢ်ခါထံရူၢ်ကီၢ်သဲးမ့ၢ်ဂ့ၤႇတၢ်ပၢၢ်ဆၢအတၢ်လဲၤကျဲမ့ၢ်ဂ့ၤန့ၣ်ကကဲဘျုးက့ၤလၢပၦၤဒီတကလုာ်အဂီၢ်လီၤႉ တၢ်ကွဲမုာ် အတၢ်ပညိၣ်ခီန့ၣ်ဒ်သိးသးစၢ်တဖၣ်အသးကဆူၣ်ကသ့ၣ်ညါအါထီၣ်ဘၣ်(KYO)ႉခံခါတခါန့ၣ်တၢ်ကွဲးလၢတၢ်ဆှၢထီၣ်အီၤတဖၣ်န့ၣ်ပမၤ(KYO)မုၢ်နံၤမ့၀ံၤန့ၣ်ပကက့ၤတီၣ်ထီၣ်ကဒါလၢ(အီၤလါ)ပူၤႉတကးဒံးဘၣ်ပကထုးထီၣ်ကဒါက့ၤအီၤလၢလံာ်(မဲးကစံ)မီၤႉအဃိပကွဲမုာ်ကညီသူၣ်ဘီၣ်သးစၢ်ကိးဂၤဒဲးလၢကဆှၢထီၣ်အတၢ်ကွဲးလီၤ”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးခါလၢကဟဲဆူမဲာ်ညါန့ၣ်(KYO)တၢ်ရဲၣ်တၢ်ကျဲၤအိၣ်လၢတလါတဘျီမ့ၢ်ဂ့ၤႇခံလါတဘျီမ့ၢ်ဂ့ၤ ကဂုာ်ကျဲးစၢး ဆဲးထုးထီၣ်၀ဲဒၣ်လံာ်တၢ်ကွဲး(မဲးကစံ)အိၣ်၀ဲအဂ့ၢ်န့ၣ် ကရၢအၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ ဒ်(KYO)ကွဲးပာ်ဖျါထီၣ်အသိးန့ၣ်တၢ်ကွဲးလၢတၢ်ကဘၣ်ဆှၢထီၣ်၀ဲသ့ၣ်တဖၣ်န့ၣ်မ့ၢ်၀ဲထါႇတၢ်ဂီၤ(ကၣ်တိ), တၢ်ကွဲးထီရီၤႇ တၢ်ထံၣ်ႇတၢ်ကွဲးလီၤနံၤ(သရော်စာ)ႇလံာ်ဆီရဲၣ်ႇ၀ိးထူးလၢကဘၣ်ဘၣ်ထွဲလိာ်သးဒီးထံရူၢ်ကီၢ်သဲး အဂ့ၢ်အကျိၤႇ ကညီသးစၢ်ႇတၢ်ပၢၢ်ဆၢအဂ့ၢ်အကျိၤႇတၢ်ကတိၤဆၢဂ့ၤဆၢ၀ါ(KYO)မုၢ်နံၤဆၢက့ၤႇကညီဒီကလုာ် အဂ့ၢ်အကျိၤ ဒီးဒီကလုာ်တၢ်ဃူတၢ်ဖိးအဂ့ၢ်အကျိၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးတၢ်ကွဲးသ့ၣ်တဖၣ်အံၤတၢ်ကဘၣ်ဆှၢထီၣ်အီၤဆဲးခံကတၢၢ်ဖဲလါမ့ၤ ၂၀ သီ ဟါခီ ၉ နၣ်ရံၣ်ဒီး တၢ်ကွဲးအီၤသ့၀ဲဒၣ်လၢကညီစှီၤကျိာ်ႇကညီၦိၢ်မုၢ်နုာ်၊ၦိၢ်မုၢ်ထီၣ်ကျိာ်ႇကီၤလၤ၀ါကျိာ်ဒီးပယီၤကျိာ်သ့ၣ်တဖၣ်အသိး တၢ်ကွဲးတဖၣ်တၢ်ကဘၣ်ဆှၢထီၣ်အီၤဆူ(KYO facebook page messenger),(kyohqktl@gmail.com), (Signal,Telegram,Line,Viber...
ဟီၣ်က၀ီၤတၢ်ပၢတၢ်ပြးကဂ့ၤထီၣ်အဂီၢ်ႇခ့ၣ်အဲၣ်ယူၣ်ပာ်လီၤ၀ဲတၢ်မၤရဲၣ်ကျဲၤ(၅)ထံၣ်
လါမ့ၤ ၁၄သီႇ ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤႇကီၢ်ရ့ၣ်(၇)ဘ့ၣ်ႇကီၢ်ဆၣ်(၂၇)ကီၢ်ဆၣ်အပူၤႇဟီၣ်က၀ီၤတၢ်ပၢတၢ်ပြးကဂ့ၤထီၣ်အဂီၢ်ႇခ့ၣ်အဲၣ်ယူၣ်ပာ်လီၤ၀ဲတၢ်မၤရဲၣ်ကျဲၤ(၅)ထံၣ်အဂ့ၢ်ႇခ့ၣ်အဲၣ်ယူၣ်တၢ်ကစီၣ်ဘိးဘၣ်ရၤလီၤ၀ဲဖဲမဟါလါမ့ၤ(၁၃)သီအနံၤန့ၣ်လီၤႉ ဒ်သိးခ့ၣ်အဲၣ်ယူၣ်တၢ်ပၢဟီၣ်က၀ီၤႇကီၢ်ဆၣ်(၂၇)ဘ့ၣ်အပူၤႇတၢ်ပၢတၢ်ပြးဒီးတၢ်ရဲၣ်သဲကတီၤကမျၢၢ်ဂ့ၢ်၀ီအတၢ်ဖံးတၢ်မၤကဂ့ၤထီၣ်အဂီၢ်ႇအပူၤကွံာ်လါမ့ၤ(၇)သီတုၤလၢ(၁၁)သီအနံၤအပူၤႇကီၢ်ဆၣ်ခိၣ်နၢ်ၦၤဘၣ်မူဘၣ်ဒါဒီးကီၢ်ဆၣ်နဲၣ်ရွဲၣ်တဖၣ်မၤ၀ဲတၢ်ကူၣ်လိာ်တၢၣ်ပီၣ်တၢ်အိၣ်ဖှိၣ်အဆိကတၢၢ်တဘျီဖဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(လီၢ်ခၢၣ်သး)ဒီးပာ်လီၤ၀ဲမဲး၀ါကျိတၢ်အၢၣ်လီၤ(၅)ထံၣ်လၢတၢ်သးတဖျၢၣ်ဃီအပူၤလၢကမၤဖျါထီၣ်၀ဲအမိၢ်လံၤမိၢ်ၦၢ်အဂ့ၢ်ႇဘိးဘၣ်ရၤလီၤပာ်ဖျါ၀ဲလၢခ့ၣ်အဲၣ်ယူၣ်တၢ်ကစီၣ်အပူၤန့ၣ်လီၤႉ တၢ်မၤရဲၣ်ကျဲၤတၢ်ဆၢတဲာ်(၅)ထံၣ်လၢကီၢ်ဆၣ်ခိၣ်နၢ်ဒီးကီၢ်ဆၣ်နဲၣ်ရွဲၣ်သ့ၣ်တဖၣ်ပာ်လီၤ၀ဲန့ၣ်မ့ၢ်၀ဲ“တၢ်လူၤပိာ်မၤထွဲတၢ်ပၢတၢ်ပြးလၢအဂ့ၤႇတၢ်တြီဆၢဒီသဒၢန့ၣ်ထံဖိကီၢ်ဖိကမျၢၢ်ခွဲးယာ်ႇတၢ်ရူၢ်ကျဲးစၢးပာ်ဖှိၣ်မၤသကိးတၢ်သ့ၣ်တဖၣ်ႇတၢ်ဂုၢ်ထီၣ်ပသီထီၣ်လၢအယူာ်ကၢ(တူၢ်ယံာ်ခိးကျၢၤတၢ်ဂုၢ်ထီၣ်ပသီထီၣ်)ႇဃုာ်ဒီးတၢ်လဲၤထီၣ်လဲၤထီၣ်လၢအယူာ်ကၢ(တၢ်လဲၤထီၣ်လဲၤထီၣ်လၢအဆဲးလဲၤအသး)သ့ၣ်တဖၣ်န့ၣ်လီၤႉ လၢန့ၣ်အမဲာ်ညါႇကီၢ်ဆၣ်ခိၣ်နၢ်လၢဟဲထီၣ်တၢ်ကူၣ်လိာ်တဲသကိးတၢ်အိၣ်ဖှိၣ်တဖၣ်အံၤႇတူၢ်လိာ်၀ဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇအဂံၢ်ခီၣ်ထံးအတၢ်ဘျၢသဲးစးအပူၤခီၣ်တဃာ်ပၢပြးသနူတၢ်ပာ်လုၢ်ပာ်ၦ့ၤလၢအပၣ်ဃုာ်သ့ၣ်တဖၣ်အသိးပာ်ပနီၣ်၀ဲဂံၢ်ခီၣ်ထံးတၢ်ဘျၢသဲစးခိၣ်သ့ၣ်လၢအမ့ၢ်တၢ်ရ့ဒိၣ်အမဲာ်ညါႇပၢပြးကျဲသနူတဒ်၀့ၤဒ်၀ီၤကအိၣ်ဂၢၢ်အိၣ်ကျၢၤခၢၣ်သနၢၣ်အဂီၢ်ႇအၢၣ်လီၤ၀ဲအသးလၢကလူၤပိာ်ထွဲမၤထွဲ၀ဲတၢ်လၢပာ်လီၤ၀ဲသ့ၣ်တဖၣ်အဂ့ၢ်ႇခ့ၣ်အဲၣ်ယူၣ်တၢ်ကစီၣ်အပူၤပာ်ဖျါ၀ဲန့ၣ်လီၤႉ တကးဒံးဘၣ်ႇကီၢ်ဆၣ်ခိၣ်နၢ်ဒီးၦၤဘၣ်မူဘၣ်ဒါတဖၣ်အံၤႇကဖီၣ်ဂၢၢ်ကျၢၤ၀ဲခီၣ်တဃာ်ကျဲသနူလၢစၢၤသွဲၣ်သီသ့ၣ်တဖၣ်အဂီၢ်အသိးႇဒ်သိးတၢ်သူၣ်ထီၣ်ကီၢ်သူလ့ၤလၢအယူာ်ကၢကအိၣ်အဂီၢ်ႇကအိၣ်ဆၢထၢၣ်၀ဲဂၢၢ်ဂၢၢ်ကျၢၤကျၢၤအဂ့ၢ်ႇပာ်ဖျါ၀ဲလၢမဲး၀ါကျိအတၢ်အၢၣ်လီၤလံာ်ဘိးဘၣ်ရၤလီၤအပူၤစ့ၢ်ကီးန့ၣ်လီၤႉ ဘၣ်ဃးဒီးတၢ်မၤ၀ဲကီၢ်ဆၣ်ခိၣ်နၢ်ဒီးကီၢ်ဆၣ်နဲၣ်ရွဲၣ်တၢ်ကူၣ်လိာ်တဲသကိးတၢ်အိၣ်ဖှိၣ်ဘျီအံၤန့ၣ်ႇအတၢ်ပညိၣ်မ့ၢ်၀ဲဒ်သိးတၢ်ကဟံထီၣ်ဘှါရှဲ၀ဲကီၢ်ဆၣ်ခိၣ်နၢ်တဖၣ်အတၢ်တၤတၢ်လၢအကါဒိၣ်ႇလၢတၢ်ပၢတၢ်ပြးတၢ်ဖံးတၢ်မၤအပူၤအဂီၢ်ဒီးႇဒ်သိးကမျၢၢ်တၢ်ပၢတၢ်ပြးႇတၢ်ရ့လိာ်ဘၣ်ထွဲတၢ်ဂ့ၢ်သ့ၣ်တဖၣ်ကဂ့ၤဒိၣ်ထီၣ်အဂီၢ်ႇတၢ်မၤ၀ဲတၢ်ကူၣ်လိာ်တဲသကိးအတၢ်တိာ်ကျဲၤကူၣ်တရံးလၢအသီလီၤအဂ့ၢ်ခ့ၣ်အဲၣ်ယူၣ်တၢ်ကပာ်ဖျါအပူၤပာ်ဖျါ၀ဲန့ၣ်လီၤႉ တကတီၢ်ဃီႇတၢ်ကူၣ်လိာ်တဲသကိးအတၢ်အိၣ်ဖှိၣ်အံၤန့ၣ်ႇမ့ၢ်၀ဲတၢ်ခွဲးတၢ်ယာ်အဒိၣ်အမုၢ်လၢကီၢ်ဆၣ်ခိၣ်လၢအဟဲထီၣ်တဖၣ်ကသူၣ်ထီၣ်၀ဲတၢ်ရ့လိာ်ႇတၢ်ဆဲးကျိးလိာ်သးလၢကဒဲကဒဲအဘၢၣ်စၢၤဒ်သိးကကဲထီၣ်၀ဲတၢ်ပာ်ဖှိၣ်မၤသကိးတၢ်လၢကတီၢ်ယံာ်လၢအဘျူးအဖှိၣ်အိၣ်၀ဲလၢကမျၢၢ်တၢ်ပၢတၢ်ပြးတၢ်ဖံးတၢ်မၤအပူၤအဂီၢ်အဂ့ၢ်ႇမ့ၢ်တၢ်ပညိၣ်ကွၢ်စိ၀ဲစ့ၢ်ကီးအဂ့ၢ်ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ ဒ်န့ၣ်အသိးႇဖဲတၢ်မၤ၀ဲတၢ်ကူၣ်လိာ်တဲသကိးတၢ်အိၣ်ဖှိၣ်လၢသၢသီတီၢ်ပူၤဘျီ၀ဲအံၤန့ၣ်ႇကီၢ်ဆၣ်ခိၣ်နၢ်ဃုာ်ဒီးကီၢ်ဆၣ်နဲၣ်ရွဲၣ်ပၢဆှၢရဲၣ်ၦၤဘၣ်မူဘၣ်ဒါတဖၣ်ဟဲထီၣ်၀ဲခဲလၢာ်အိၣ်၀ဲ(၅၄)ဂၤအိၣ်၀ဲအဂ့ၢ်သ့ၣ်ညါဘၣ်ဒ်ခ့ၣ်အဲၣ်ယူၣ်တၢ်ပာ်ဖျါအိၣ်၀ဲအသိးန့ၣ်လီၤႉ
တၢ်ထီၣ်မၤန့ၢ်(၁၀၂၀)သုးကလၢၤအခါပယီၤသုးဃ့ၢ်ပူၤဖျဲးထီၣ်(၂၀)ဂၤဘျဲၣ်ဘၣ်သံတစှၤန့ၢ်(၅)ဂၤ
လါမ့ၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒ၀ဲၢ်ကီၢ်ရ့ၣ်သုးက့နီၣ်ဂံၢ်(၄)လၢၢ်ကဆီကီၢ်ဆၣ်ဟီၣ်က၀ီၤအပူၤဖဲပူၤကွံာ် လါမ့ၤ(၁၁)သီအနံၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်သ့ၣ်တဖၣ်ထီၣ်မၤန့ၢ်ကွံာ်၀ဲပယီၤသုးကီၣ်ကး(၁၀၂၀)ကစၢၢ်လူၢ်သုးကလၢၤအခါပယီၤသုးသံတစှၤန့ၢ်(၅)ဂၤဒီးဃ့ၢ်ပူၤဖျဲးထီၣ်သးကအိၣ်လၢ(၂၀)ဂၤဘျဲၣ်အဂ့ၢ်အၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ “တၢ်ဒုးကဲထီၣ်အခါန့ၣ်ၦၤအိၣ်ဒံး၀ဲလၢတၢ်ဖီလာ်လီၤမီၤနီၤႉ ပယီၤသုးအံၤမ့ၢ်လၢအသီအါထီၣ်ဒီးဃ့ၢ်ဖျိးထီၣ် ကွံာ်၀ဲဖဲ(၉)သီအနံၤလီၤႉ ဘၣ်မနုၤအဃိလဲၣ်တၢ်တနံၤန့ၣ်ဖဲမုၢ်နၤခီန့ၣ်အ၀ဲသ့ၣ်ခးကျိတခီခီၦၤလၢဃ့ၢ်ထီၣ်န့ၣ် ဃ့ၢ်ထီၣ်၀ဲမီၤနီၤႉ ခဲလၢာ်ခဲစ့န့ၣ်အ၀ဲသ့ၣ်ကအိၣ်၀ဲ(၂၀)ဂၤဘျဲၣ်ဘျဲၣ်န့ၣ်သံလီၤစှၤကွံာ်၀ဲ(၆)ဂၤမီၤနီၤႉ ၦၤလၢ ဃ့ၢ်ပူၤဖျဲးအသးသ့ၣ်တဖၣ်န့ၣ်ကအိၣ်လီၤတဲာ်ဒံး၀ဲ(၂၀)ဂၤဒံးန့ၣ်အိၣ်လီၤ”အဂ့ၢ်လၢၢ်ကဆီကီၢ်ဆၣ်မူဒါခိၣ်စီၤဘီးကစဲၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်လဲၤထီၣ်ခး၀ဲပယီၤသုးကီၣ်ကး(၁၀၂၀)ကစၢၢ်လူၢ်၀ဲအံၤ၀ံၤအလီၢ်ခံမ့မ့ၢ်တၢ်စုက၀ဲၤတခီန့ၣ်တၢ်မၤန့ၢ်ဒၣ်ထဲကျိချံတဆံးတက့ၢ်လီၤဒီးခီဖျိပယီၤသုးအံၤဖဲအ၀ဲသ့ၣ်ဃ့ၢ်ပူၤဖျဲးသးအခါစိာ်ဃုာ်၀ဲဒီးတၢ်စုက၀ဲၤသ့ၣ်တဖၣ်အဂ့ၢ်လီၢ်က၀ီၤအၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ပယီၤသုးလၢဃ့ၢ်ပူၤဖျဲးထီၣ်အသးလၢ(၁၀၂၀)သုးကလၢၤအပူၤသ့ၣ်တဖၣ်အံၤမ့ၢ်အ၀ဲသ့ၣ်လဲၤတုၤဖဲလဲၣ်က့ၤတုၤဖဲလဲၣ်န့ၣ်တၢ်မၤလီၤတံၢ်အီၤတန့ၢ်ဒံးဘၣ်အဃိဒူသ၀ီလၢအိၣ်တၢ်ခိးတၢ်ဃၢၤလၢအဘူးဒီးသုးကလၢၤအ၀ဲအံၤန့ၣ်က့ၤအိၣ်ဆိး၀ဲတဘူးဒံးဘၣ်ဒီးတကီၢ်ခါခဲအံၤလိၣ်ဘၣ်၀ဲကသံကသီႇ တၢ်အီၣ်တၢ်အီၣ်အဂ့ၢ်လီၢ်က၀ီၤ အၦၤဘၣ်မူဘၣ်ဒါစံးအါထီၣ်၀ဲန့ၣ်လီၤႉ ဒ်န့ၣ်အသိးပယီၤသုး(၁၀၂၀)သုးကလၢၤအံၤန့ၣ်မ့ၢ်၀ဲသုးကလၢၤခံဖျၢၣ်တဖျၢၣ်လၢအဘၣ်တၢ်ထီၣ်မၤန့ၢ်အီၤဖဲလၢၢ်ကဆီကီၢ်ဆၣ်ဟီၣ်က၀ီၤပူၤအသိးဖဲလါမ့ၤ(၈)သီဂီၤခီ(၈)နၣ်ရံၣ်ဘျဲၣ်အဆၢကတီၢ်ကစၢၢ်ဒိၣ်ကီၢ်ဆၣ်သုးရ့ၣ်(၁၂)ဟီၣ်က၀ီၤအပူၤန့ၣ်စ့ၢ်ကီး(KNLA)ဒီးသုးပာ်ဖှိၣ်ထီၣ်မၤန့ၢ်ကွံာ်၀ဲပဲၤသ၀ီပယီၤသုးကလၢၤအံၤဒီးတၢ်ဖီၣ်မူဒံးန့ၢ်ဃုာ်ဒီးပယီၤသုးအဂၤ(၂၀)ဘျဲၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
တၢ်လဲၤမၤပိၢ်ဖးထီၣ်တပျဲကျိတိၤ၀ံၤလီၢ်ခံပယီၤသုးခးလီၤကျိဖးဒိၣ်တပယူာ်ဃီ ကမျၢၢ်သံ(၂)ဂၤႇဘၣ်ဒိ(၄)ဂၤအကျါ ပၣ်ဃုာ်ဖိသၣ်
လါမ့ၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် သထူၣ်ကီၢ်ဆၣ်အပူၤ တၢ်လဲၤမၤလီၤၦီၢ်တပျဲကျိတိၤ ၀ံၤလီၢ်ခံ ပယီၤသုးက့ၤခးလီၤကဒါကျိဖးဒိၣ်တပယူာ်ဃီဒီး ခီဖျိကျိဖးဒိၣ်အံၤအဃိ ကမျၢၢ်သံ၀ဲဒၣ်(၂)ဂၤႇ ဘၣ်ဒိ(၄)ဂၤ အကျါပၣ်ဃုာ်၀ဲဒၣ်ဖိသၣ်(၂)ဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်လါမ့ၤ ၁၁ သီ ဂီၤခီ ၂ နၣ်ရံၣ်ဘျဲၣ်အဆၢကတီၢ်န့ၣ် တၢ်လဲၤမၤပိၢ်ဖးထီၣ်၀ဲဒၣ်တပျဲကျိတိၤလၢအိၣ်၀ဲဒၣ် ဖဲသထူၣ်ကီၢ်ဆၣ်ဒီးဘံလ့ကီၢ်ဆၣ်အဘၢၣ်စၢၤ ၀့ၢ်တကူၣ်-မီၣ်လမၠဲၣ်ကျဲအံၤဒီး ဖဲန့ၣ်၀ံၤတကတီၢ်ဃီဖဲဂီၤခီ ၇ နၣ်ရံၣ် ဃၣ်ဃၣ်အဆၢကတီၢ် သုးကီၣ်ကးအမျိာ်သုး(၃၁၄)က့ၤခးလီၤကဒါ၀ဲကျိဖးဒိၣ်လၢဒူသ၀ီပူၤအဃိ ၦၤကမျၢၢ်သံ ဘၣ်ဒိ ဘၣ်ထံးကဲထီၣ်အသးဒ်အံၤလီၤအဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါ စံး၀ဲန့ၣ်လီၤႉ ဘၣ်ဃးတၢ်ဂ့ၢ်ကဲထီၣ်သးအံၤ ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲလၢ“စးထီၣ်လၢ ၁၀ သီ တုၤလၢခဲအံၤန့ၣ် ပယီၤသုးခးစိ၀ဲဒၣ်ကျိဖးဒိၣ်ဆူဒူသ၀ီပူၤကိးမုၢ်နၤကိးမုၢ်ဆါလီၤႉ သုးကီၣ်ကးတဖုအံၤအတၢ်ဒိသူၣ်ဒိသးလၢ ကမျၢၢ် ထံဖိကီၢ်ဖိအဖီခိၣ်တအိၣ်ဘၣ်ႉတၢ်ဒုးကဲထီၣ်သးမ့ၢ်ဂ့ၤႇတကဲထီၣ်သးဘၣ်မ့ၢ်ဂ့ၤန့ၣ်ခးစိကျိဖးဒိၣ်ဆူဒူသ၀ီပူၤထီဘိ အဃိဘၣ်သံ၀ဲဒၣ်ၦၤကမျၢၢ်ထံဖိကီၢ်ဖိႇဘၣ်ဟးဂီၤကမျၢၢ်အဟံၣ်အဃီတဖၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ သုးကီၣ်ကးအမျိာ်သုး(၃၁၄)လၢအခးလီၤကျိဖးဒိၣ်အံၤအိၣ်ဆီလီၤအသးဘူး၀ဲဒၣ်ဒီးတပျဲကျိတိၤထဲဒၣ်တတၢၣ်လီၤ ဒီးဒ်န့ၣ်အသိးပယီၤသုးခးလီၤကျိဖးဒိၣ်ဘျီ၀ဲအံၤလီၤတဲာ်ပိၢ်ဖးထီၣ်၀ဲလၢလါအီၣ်ဃၢၤသ၀ီပူၤ(၅) ဖျၢၣ်ႇ သ၀ီဃၢၤ ၂ ဖျၢၣ်ဒီး ဖဲန့ၣ်တံစီၣ်မ့ထိဒီးအမါနီၢ်မၠးသ့အံၤသံ၀ဲဒၣ်ဒီးၦၤဒီမါ၀ံၤခံဂၤအံၤအဖိမုၣ်လၢအမ့ၢ် နီၢ်ဖၠူၤဖၠူၤ(၁၀)နံၣ်ႇ နီၢ်မုၣ်ခၠံးခၠံး(၄)နံၣ် ခံဂၤအံၤဃုာ်ဒီးတံမီၤကၠံႇမုဂါစ့ၤစ့ၤသ့ၣ်တဖၣ်အံၤဘၣ်ဒိ၀ဲဒၣ်ဒီးကျိဖးဒိၣ်အက့အခီအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ...
တနီသရံၣ် သ့ၤဒီတၢ်ဒုးလၢခံနွံဘျဲၣ်အတီၢ်ပူၤ ပယီၤသုးသံ(၂၀)ဘျဲၣ်
လါမ့ၤ ၁၀ သီႇ ၂၀၂၄ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် တနီသရံၣ်ကီၢ်ဆၣ် သ့ၤဒီသ၀ီအပူၤ ဖဲတၢ်ဒုးကဲထီၣ်လၢတၢ်ပၢၢ်ဆၢသုးပာ်ဖှိၣ်ဒီးပယီၤသုး အဘၢၣ်စၢၤ လၢခံနွံဘျဲၣ်အတီၢ်ပူၤအံၤ သုးကီၣ်ကးတကပၤသံ၀ဲဒၣ်(၂၀)ဘျဲၣ်အဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် တၢ်ဒီသဒၢကမျၢၢ်သုးပာ်ဖှိၣ်သုးကျိၤ(၁)ထုးထီၣ်ပာ်ဖျါ၀ဲဖဲမဟါလါမ့ၤ ၉ သီအနံၤန့ၣ်လီၤႉ စးထီၣ်ဖဲအပူၤကွံာ်လါအ့ဖြ့ၣ် ၂၃ သီအနံၤန့ၣ် တၢ်ဒုးကဲထီၣ်၀ဲဒၣ်ဒိၣ်ဒိၣ်မုၢ်မုၢ်လၢတၢ်ဒီသဒၢကမျၢၢ်သုးပာ်ဖှိၣ်ကရူၢ် ဒီးပယီၤသုးအဘၢၣ်စၢၤဒီး ဖဲန့ၣ်ပယီၤသုးသံဘၣ်ဒိဘၣ်ထံးလၢတၢ်ဒုးပူၤအါအါဂီၢ်ဂီၢ်ဒ်အံၤလီၤအဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် တၢ်ဒီသဒၢကမျၢၢ်သုးပာ်ဖှိၣ်သုးကျိၤ(၁) စံး၀ဲန့ၣ်လီၤႉ ဒ်န့ၣ်အသိးဖဲတၢ်ဒုးကဲထီၣ်အခါန့ၣ်စ့ၢ်ကီးသုးကီၣ်ကးအံၤသူ၀ဲကျိဖးဒိၣ်တကးဒံးဘၣ် ကဘီယူၤစ့ၢ်ကီး ဟဲခးလီၤတၢ်အဃိ ဘျံးဒ၀ဲၢ်ကီၢ်ရ့ၣ် တၢ်ဒီသဒၢကမျၢၢ်သုးပာ်ဖှိၣ်သုးကျိၤ(၁)အၦၤသံ၀ဲဒၣ် ၄ ဂၤဒီး ဘၣ်ဒိ၀ဲဒၣ်(၇)ဂၤ အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲတၢ်ဒုးကဲထီၣ်အကတီၢ်သုးကီၣ်ကးအံၤသူ၀ဲဒၣ်(Mi 2)ကဘီယူၤဒီးကဘီယူၤကၠဲး ဟးတ့ၢ်လီၤ၀ဲဒၣ်မ့ၣ်ပိၢ်အဘျီတဖၣ် အဘျီအဂ့ၢ်န့ၣ် လံာ်တၢ်ပာ်ဖျါအပူၤ စံး၀ဲန့ၣ်လီၤႉ တကီၢ်ခါခဲအံၤ လၢတနီသရံၣ်ကီၢ်ဆၣ်အပူၤ ဒုးယၤတၢ်ဖ့ၣ်စၢဆဲးကဲထီၣ်ဒံး၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ် အဘၢၣ်စၢၤဒီး တၢ်ပၢၢ်ဆၢသုးပာ်ဖှိၣ်တကပၤစ့ၢ်ကီးက့ၤခီၣ်ဆၢခးကဒါ၀ဲပယီၤသုးလၢကျိဖးဒိၣ်ႇကျိဖိဒီး ဒြိသ့ၣ်တဖၣ် အိၣ်၀ဲအဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် တၢ်ဒီသဒၢကမျၢၢ်သုးပာ်ဖှိၣ်သုးကျိၤ(၁)စံး၀ဲန့ၣ်လီၤႉ
ဒ်သိးသူၣ်ဘီၣ်သးစၢ်ကန့ၢ်မၤလိဘၣ်၀ဲတၢ်အဂီၢ်(KSNG)တီခိၣ်ရိၣ်မဲဟ့ၣ်၀ဲတၢ်ကိၢ်ခါတၢ်မၤလိလၢတၢ်လီၢ်(၇)တီၤအပူၤၦၤကၠိဖိ(၁၀၀၀)ဂၤဘျဲၣ်
လါမ့ၤ ၉ သီႇ ၂၀၂၄ နံၣ်ႇ ခ့ၣ်အဲးစံၣ် တနံၣ်အံၤတၢ်ကိၢ်ခါလါအ့ဖြ့ၣ်အတီၢ်ပူၤအံၤကညီကၠိဖိၦာ်ဘျးစဲးကရူၢ်(KSNG)တီခိၣ်ရိၣ်မဲဟ့ၣ်၀ဲတၢ်ကိၢ်ခါတၢ်မၤလိလၢၦၤဖိဒံးဖိသၣ်ႇ သူၣ်ဘီသးစၢ်သ့ၣ်တဖၣ်လၢတၢ်လီၢ်(၇)တီၤအပူၤၦၤကၠိဖိခဲလၢာ်(၁၀၀၀)ဂၤဘျဲၣ် အဂ့ၢ်ကညီကၠိဖိၦာ်ဘျးစဲကရူၢ်အကရၢခိၣ်စံး၀ဲဒၣ်အသိးသ့ၣ်ညါဘၣ်န့ၣ်လီၤႉ လါအ့ဖြ့ၣ်အတီၢ်ပူၤအံၤန့ၣ်ကညီကၠိဖိၦာ်ဘျးစဲကရူၢ်တီခိၣ်ရိၣ်မဲဟ့ၣ်၀ဲတၢ်ကိၢ်ခါတၢ်မၤလိလၢသုးက့(၅)ကီၢ်ရ့ၣ်တၢ်လီၢ်န့ၣ်တတီၤႇ သုးက့(၆)န့ၣ်တတီၤဒီးသုးက့(၇)တၢ်လီၢ်န့ၣ်(၅)တီၤခဲလၢာ်(၇)တီၤဒီးၦၤကၠိဖိနီၣ်ဂံၢ်ခဲ လၢာ်အိၣ်၀ဲ(၁၀၀၀)ဂၤဘျဲၣ်ဆူအဖီခိၣ်လီၤအဂ့ၢ်သ့ၣ်ညါဘၣ်န့ၣ်လီၤႉ တၢ်ကိၢ်ခါအတီၢ်ပူၤအံၤန့ၣ်မ့ၢ်ဒ်သိးကၠိဖိသ့ၣ်တဖၣ်ကသ့မၤလိဘၣ်တၢ်ဒီးကရ့လိာ်မုာ်လိာ်ဘၣ်အသးႇ ကသူၣ်ဖှံသးဖှံအဂီၢ်ဒီးဒ်န့ၣ်အသိးကသ့ဒီသဒၢအၦၤတ၀ၢႇခိၣ်ဃၢၤန့ၣ်ဆၢၣ်အသိးကသ့ပာ်လုာ်ပာ်ၦ့ၤတၢ်ကူၣ်ဘၣ်ကူၣ်မ့ၢ်တၢ်အရ့ဒိၣ်၀ဲဒ်လဲၣ်အဂ့ၢ်န့ၣ်ကညီကၠိဖိၦာ်ဘျးစဲကရူၢ်အကရၢခိၣ်စီၤန့ၢ်ကီၢ်စ့စံး၀ဲဒ်အံၤန့ၣ်လီၤႉ “ဒ်သိးကၠိဖိသ့ၣ်တဖၣ်ဖဲတၢ်ကိၢ်ခါအဆၢကတီၢ်ကဟဲရ့လိာ်မုာ်လိာ်သးကလိာ်ခိၣ်လိာ်ကွဲဒီးမၤလိသကိးတၢ်မီၤနီၤႉ ဒ်သိးကၠိဖိဒ်ယတဲအသိးလီၤကၠိဖိသ့ၣ်တဖၣ်န့ၣ်ကသူၣ်ခုသးခုဘၣ်၀ဲဖဲတၢ်ကိၢ်ခါအဆၢကတီၢ်ႉ ဒီးတၢ်မၤလိအ၀ဲန့ၣ်ပကတဲာ်ကတီၤအ၀ဲသ့ၣ်အတၢ်အဲၣ်ၦၤကလုာ်သးသဟီၣ်လၢကဆဲးမၤတၢ်ဆူညါဒီးကသ့ပာ်လုာ်ပာ်ၦ့ၤတၢ်ကူၣ်ဘၣ်ကူၣ်သ့န့ၣ်မ့ၢ်တၢ်အရ့ဒိၣ်ဒ်လဲၣ်မီၤနီၤႉ ဒီးအ၀ဲသ့ၣ်ကအဲၣ်ဘၣ်၀ဲဒီးကသ့တြီ ဆၢဒီသဒၢမၤဂ့ၤမၤစၢၤအၦၤတ၀ၢႇအၦၤကလုာ်ႇခိၣ်ဃၢၤန့ၤဆၢၣ်မ့ၢ်ဂ့ၤတၢ်ပတုၤကွံာ်ကွံာ်တၢ်မူးတၢ်ဘှီမ့ၢ်ဂ့ၤအိၣ်၀ဲမီၤနီၤႉ ပဟ့ၣ်စ့ၢ်ကီး၀ဲတၢ်သ့ၣ်ညါနၢ်ပၢၢ်ဒီးအဂုၤအဂၤသ့ၣ်တဖၣ်အိၣ်၀ဲလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါလၢတၢ်ဟ့ၣ်၀ဲတၢ်ကိၢ်ခါတၢ်မၤလိအတီၢ်ပူၤအံၤန့ၣ်တၢ်ဟ့ၣ်အီၤဖဲလါအ့ဖြ့ၣ်တလါအတီၢ်ပူၤဒီးလံာ်လဲာ်လၢတၢ်သိၣ်လိဃုာ်၀ဲသ့ၣ်တဖၣ်န့ၣ်မ့ၢ်၀ဲကညီတၢ်စံၣ်စိၤတဲစိၤႇ လံာ်ကိၤလၤ၀ါႇ တၢ်တဲလီၤတၢ်လၢ ကမျၢၢ်ကျါႇ တၢ်တီခိၣ်ရိၣ်မဲဒီးဂံၢ်ခီၣ်ထံးတၢ်အိၣ်ဆူၣ်အိၣ်ချ့အဂ့ၢ်အကျိၤသ့ၣ်တဖၣ်အဂ့ၢ်သ့ၣ်ညါဘၣ် န့ၣ်လီၤႉ ဒ်ပသ့ၣ်ညါအသိးတကီၢ်ခါထံလီၢ်ကီၢ်ပူၤတၢ်အိၣ်သးအခဲအံၤန့ၣ်တၢ်သဘံၣ်သဘုၣ်အိၣ်ထီၣ်၀ဲလၢတၢ်လီၢ်အါတီၢ်ပူၤအဃိဖဲတၢ်လဲၤဟ့ၣ်၀ဲတၢ်ကိၢ်ခါတၢ်မၤလိအကတီၢ်သဂၢၢ်ဘၣ်စ့ၢ်ကီး၀ဲဒီးသုးကီၣ်ကးအကဘီယူၤဟဲတ့ၢ်လီၤမ့ၣ်ပိၢ်အိၣ်၀ဲဒီးလၢတၢ်ဘၣ်ယိၣ်ဘၣ်ဘှီအကျါလဲၤခီဖျိဘၣ်၀ဲဂ့ၤဂ့ၤဘၣ်ဘၣ်အဂ့ၢ်စီၤန့ၢ်ကီၢ်စ့စံးအါထီၣ်၀ဲဒၣ်န့ၣ်လီၤႉ လၢန့ၣ်အမဲာ်ညါလၢတၢ်ဟ့ၣ်၀ဲတၢ်ကိၢ်ခါတၢ်မၤလိအပူၤတၢ်ဟ့ၣ်ဃုာ်၀ဲဒီးမ့ၣ်ပိၢ်တၢ်ဟ့ၣ်ပီညါတၢ်ႇ တၢ်ဟ့ၣ် ဂံၢ်ဟ့ၣ်ဘါၦၤလၢတူၢ်ဘၣ်တၢ်သ့ၣ်တဖၣ်ဒီးဒ်န့ၣ်အသိးတၢ်ဟ့ၣ်ဃုာ်စ့ၢ်ကီး၀ဲဒၣ်ဒီး(Media)တၢ်ကစီၣ်တၢ်သိၣ်လိအဂ့ၢ်သ့ၣ်ညါဘၣ်န့ၣ်လီၤႉ ကညီကၠိဖိၦာ်ဘျးစဲကရူၢ်(KSNG)အံၤကိးနံၣ်ဒဲးဃၣ်ဃၣ်ဟ့ၣ်၀ဲတၢ်ကိၢ်ခါတၢ်မၤလိလၢကီၢ်ပူၤကီၢ်ဆၢတၢ်လီၢ်တၢ်ကျဲအပူၤအိၣ်၀ဲဒီးခါဆူမဲာ်ညါတၢ်မၤလိဒ်သိးအံၤသ့ၣ်တဖၣ်န့ၣ်ကမၤအါထီၣ်၀ဲဒၣ်အသိးခါဆူညါတၢ်လီၢ်လၢလဲၤတတုၤလဲၤတန့ၢ်သ့ၣ်တဖၣ်ထံလီၢ်ကီၢ်ပူၤတၢ်အိၣ်သးမ့ၢ်ဂ့ၤထီၣ်က့ၤန့ၣ်ကလဲၤဒုးအိၣ်ထီၣ်န့ၢ်၀ဲတၢ်မၤလိအဂ့ၢ်ကညီကၠိဖိၦာ်ဘျးစဲကရူၢ်အကရၢခိၣ်စီၤန့ၢ်ကီၢ်စ့စံး၀ဲန့ၣ်လီၤႉ
နၣ်သၤကွ့ကမျၢၢ်တဖၣ်ဃ့ၢ်တၢ်ဒုးန့ၢ်(၅)လါဃၣ်ဃၣ်လံဘၣ်ဆၣ်တုၤလၢခဲအံၤက့ၤလၢဟံၣ်တဘူၣ်ဒံးဘၣ်
လါမ့ၤ ၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) လၢၢ်ဒိၣ်ကီၢ်ဆၣ် နၣ်သၤကွ့၀့ၢ်ပူၤန့ၣ် ခီဖျိတၢ်ဒုးကဲထီၣ်လၢခံခီခံကပၤအဘၢၣ်စၢၤအဃိ စးထီၣ်ဖဲအပူၤကွံာ်(၂၀၂၃)လါဒံၣ်စ့ဘၢၣ်တုၤလၢခဲအံၤန့ၣ် ၦၤကမျၢၢ်လၢအဃ့ၢ်ထီၣ်တဖၣ်အံၤဟးစံၣ်အိၣ်န့ၢ်(၅)လါဃၣ်ဃၣ်လံဘၣ်ဆၣ်တုၤလၢခဲအံၤအ၀ဲသ့ၣ်က့ၤလၢအဟံၣ် အဃီတဘူၣ်ဒံးဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ စးထီၣ်ဖဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ်၀ံၤလီၢ်ခံန့ၣ် ပယီၤသုးအံၤခးလီၤ၀ဲဒၣ်ကျိဖးဒိၣ်လၢ၀့ၢ်ပူၤအိၣ်၀ဲကိးမုၢ်နံၤဒဲးဒီးတကးဒံးဘၣ်အမဲာ်ညါၦၤကမျၢၢ်လၢအက့ၤအိၣ်လၢ နၣ်သၤကွ့၀့ၢ်ပူၤတဖၣ်တနီၤန့ၣ်ပယီၤသုးဖီၣ်၀ဲအိၣ်အဃိၦၤကမျၢၢ်တဖၣ်အါဒၣ်တက့ၢ်န့ၣ်တုၤလၢခဲအံၤအ၀ဲသ့ၣ်က့ၤ လၢဟံၣ်တဘူၣ်ဘၣ်န့ၣ်လီၤႉ လီၢ်က၀ီၤကမျၢၢ်ပိာ်မုၣ်လၢအဃ့ၢ်တၢ်ဒုးတဂၤစံး၀ဲလၢ“ခဲအံၤပယီၤသုးလၢအိၣ်နၣ်သၤကွ့၀့ၢ်ပူၤတဖၣ်န့ၣ်ခးစိကျိဖးဒိၣ်လၢ၀့ၢ်ချၢမီၤနီၤႉမ့မ့ၢ်လၢ၀့ၢ်ပူၤဒုကျိဖးဒိၣ်လီၤတဲာ်တအိၣ်ဘၣ်ႉမ့ခးလီၤ၀ဲလၢ၀့ၢ်ပူၤနါက့အိၣ်ဒၣ်အ၀ဲသ့ၣ်အၦၤလီၤႉ မတၤတဂၤ မးက့ၤလၢဟံၣ်တဘူၣ်ဘၣ်ႉခဲအံၤမ့တုၤလၢလါမ့ၤ ၂၆ သီန့ၣ် ပတက့ၤဘၣ်လၢဟံၣ်န့ၣ်ကၦဲၤ(၅)လါလီၤႉ တၢ်မၤဘူၣ်ကစၢ် ဒုတဟဲနီပူၤဘၣ်ႉပန့ၢ်ဘၣ်ဟုသးအိၣ်မီၤတဘျီႇဟံၣ်ဖိဃီဖိလွံၢ်ဂၤဂီၢ်န့ၣ်ဟ့ၣ်၀ဲဟုသးတထၢၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဒ်န့ၣ်အသိးခီဖျိၦၤကမျၢၢ်သ့ၣ်တဖၣ်အံၤဘၣ်စံၣ်တၢ်ဒုးအဖီခိၣ်အ၀ဲသ့ၣ်တဖံးအီၣ်မၤအီၣ်သူၣ်အီၣ်ဖျးအီၣ်ဘၣ်တၢ်ဘၣ်ဒီးလၢတၢ်န့ၣ်အဃိစံာ်လီၢ်လၢအိၣ်နၣ်သၤကွ့၀့ၢ်ခိၣ်၀့ၢ်ဃၢၤအအ့ကၢၣ်လၢအကထိဘၣ်ဆှူ၀ဲဒၣ်ဒီးဒ်န့ၣ်အသိး တနံၣ်အံၤ တၢ်စူၤခါစ့ၢ်ကီးဘၣ်ယိၣ်လၢတက့ၤမၤအီၣ်ဘၣ်ဘုဘၣ်အဂ့ၢ်န့ၣ် ၦၤမၤအီၣ်စံာ်ဖိတနီၤစံး၀ဲန့ၣ်လီၤႉ နၣ်သၤကွ့ကမျၢၢ်လၢအမၤအီၣ်စံာ်တဂၤစံး၀ဲလၢ“ဖဲအံၤဒုလၢၦၤဃ့ၢ်မှံဟးဖျိးအဂီၢ်န့ၣ်တၢ်လီၢ်လီၤလီၤဆီဆီတအိၣ် ဘၣ်ႉ ခ့ၣ်အဲၣ်ယူၣ်နါက့မၤ၀ဲကသ့ဒ်လဲၣ်ႉထဲနၣ်သၤကွ့တခါအံၤလီၤးန့ၣ်ၦၤဃ့ၢ်မှံဟးဖျိးအိၣ်တစှၤဘၣ်ႉစံာ်လီၢ်လၢအိၣ် နၣ်သၤကွ့ကပိၤကပၤတဖၣ်န့ၣ်ၦၤသူၣ်ဘုၦၤကူးဘုတညီဘၣ်အဃိစံာ်လီၢ်ဆှူအိၣ်အအ့ကၢၣ်လၢအကထိညါႉ ပဲနါက့က့ၤသူၣ်တသ့ဘၣ်”အဂ့ၢ်န့ၣ် စံး၀ဲန့ၣ်လီၤႉ ဒ်(၂၀၁၄)သုးကီၣ်ကးအဖးဖီမုၢ်စရီတၢ်မၤနီၣ်အသိးန့ၣ် နၣ်သၤကွ့၀့ၢ်ပူၤ၀့ၢ်ချၢလၢၦၤနီၣ်ဂံၢ်အိၣ်၀ဲ(၉၀၀၀) ဃၣ်ဃၣ်အံၤန့ၣ် လဲၤစံၣ်အိၣ်၀ဲဒၣ်လၢဒူသ၀ီတၢ်လီၢ်လၢအဂၤဒီး တကးဒံးဘၣ်အမဲာ်ညါလဲၤစံၣ်အိၣ်၀ဲတုၤလၢ ချၢၣ်လွံၢ်ထူၣ်ႇဖၠူ၀့ၢ်သ့ၣ်တဖၣ် အပူၤအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
ခ့ၣ်အဲၣ်ယူၣ်ကဘှါရှဲထံရူၢ်ကီၢ်သဲးတၢ်ဂ့ၢ်ကီလၢႇထံရူၢ်ကီၢ်သဲးအကျဲသနူအဂီၢ်ႇကဆီၣ်တခူထီၣ်၀ဲအဂ့ၢ်ကညီဖီၣ်စုက၀ဲၤကရူၢ်ခိၣ်နၢ်ဒီးတၢ်ဘူၣ်တၢ်ဘါခိၣ်နၢ်ထုးထီၣ်ပာ်ဖျါ၀ဲ
လါမ့ၤ ၉သီႇ ၂၀၂၄နံၣ်ႇ ခ့ၣ်အဲးစံၣ်ႇ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇကဘှါရှဲ၀ဲထံရူၢ်ကီၢ်သဲးတၢ်ဂ့ၢ်ကီလၢထံရူၢ်ကီၢ်သဲးကျဲသနူအဂီၢ်ႇကဆီၣ်ထွဲမၤစၢၤ၀ဲအဂ့ၢ်ႇကညီဖီၣ်စုက၀ဲၤကရူၢ်ခိၣ်နၢ်ဒီးတၢ်ဘူၣ်တၢ်ဘါခိၣ်နၢ်တဖၣ်ထုးထီၣ်ပာ်ဖျါ၀ဲဖဲတၢ်မၤကမျၢၢ်တၢ်ထံၣ်လိာ်အိၣ်ဖှိၣ်လၢဖၣ်အၣ်ကီၢ်ရ့ၣ်လူၢ်ပျဲၢ်ကီၢ်ဆၣ်အပူၤဖဲအပူၤကွံာ်လါမ့ၤ(၇)သီအနံၤအဆၢကတီၢ်န့ၣ်လီၤႉ ဘၣ်ဃးဒီးတၢ်ထုးထီၣ်လံာ်တၢ်ပာ်သးအံၤန့ၣ်ခီဖျိထံရူၢ်ကီၢ်သဲးတၢ်ဂ့ၢ်ကီအံၤႇတၢ်ဃဲၣ်လီၤဘှါလီၤအီၤလၢထံရူၢ်ကီၢ်သဲးအကျိၤအကျဲသနူတအိၣ်၀ဲဘၣ်အဃိႇထံလီၢ်ကီၢ်ပူၤဒုးယၤတၢ်ဖ့ၣ်ဆၢဘၣ်အိၣ်ထီၣ်၀ဲဒီးဒ်သိးခ့ၣ်အဲၣ်ယူၣ်ကဘှါဆှဲက့ၤ၀ဲထံရူၢ်ကီၢ်သဲးတၢ်ဂ့ၢ်ကီအံၤလၢထံရူၢ်ကီၢ်သဲးသနူအဂီၢ်ႇမ့ၢ်ဒၣ်ဖီၣ်စုက၀ဲၤကရူၢ်ကရၢႇတၢ်ဘူၣ်တၢ်ဘါခိၣ်နၢ်ဃုာ်ဒီးကမျၢၢ်လၢလဲၤထီၣ်အိၣ်ဖှိၣ်တဖၣ်ထုးဖျါထီၣ်အတၢ်ပာ်သးလီၤအဂ့ၢ် fKNU-KNLA(PC)အၦၤကတိၤတၢ်ပၢသုးခိၣ်ဒိၣ်စိစီၤကၠီၣ်ညိၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ပထံကီၢ်ဒီတဘ့ၣ်အံၤတၢ်ဘၣ်လီၢ်ဘၣ်စးတအိၣ်ဘၣ်ႇထံရူၢ်ကီၢ်သဲးတၢ်ဖံးတၢ်မၤတၢ်ဘၣ်လီၢ်ဘၣ်ဒါတအိၣ်ဘၣ်ႇလၢတၢ်န့ၣ်အဃိကမျၢၢ်တဖၣ်ဘၣ်ဃ့ၢ်အိၣ်ကဒုဘၣ်ကီဘၣ်ခဲ၀ဲအဖီခိၣ်န့ၣ်ႇတၢ်တခါအံၤမ့ၢ်တၢ်လီၤသူၣ်အုးသးအုးလၢပၦၤထံဖိကီၢ်ဖိအဂီၢ်ဃုာ်ဒီးပၦၤကမျၢၢ်တဖၣ်အဂီၢ်လီၤႉဒီးတမံၤဂ့ၤတမၠိဂ့ၤန့ၣ်ပမ့ကွၢ်က့ၤလၢတၢ်ဒုးတၢ်ယၤကဲထီၣ်သးလၢမုၢ်မဆါတနံၤအံၤသ့ၣ်တဖၣ်န့ၣ်ႇမ့ၢ်တၢ်ဟဲကဲထီၣ်အသးခီဖျိလၢထံရူၢ်ကီၢ်သဲးအတၢ်ဂ့ၢ်ကီအဃိန့ၣ်လီၤႉ အဃိန့ၣ်လၢပကဘၣ်ဃဲၣ်လီၤဘှါလီၤက့ၤထံရူၢ်ကီၢ်သဲးအတၢ်ဂ့ၢ်ကီလၢတၢ်တၢၣ်ပီၣ်တၢၣ်ပီအကျဲအသနူကတုၤလီၢ်ထီၣ်ဘးအဂီၢ်န့ၣ်ႇဖီၣ်စုက၀ဲၤကရူၢ်ကရၢႇတၢ်ဘူၣ်တၢ်ဘါခိၣ်နၢ်ဃုာ်ဒီးကမျၢၢ်လၢအလဲၤထီၣ်တၢ်အိၣ်ဖှိၣ်တဖၣ်ပပာ်ဖျါထီၣ်၀ဲအတၢ်ပာ်သးလၢႇလၢတၢ်ဃဲၣ်လီၤဘှါလီၤထံရူၢ်ကီၢ်သဲးတၢ်ဂ့ၢ်ကီလၢထံရူၢ်ကီၢ်သဲးသနူအဂီၢ်ဒ်တၢ်သ့အိၣ်ဒီးၦၤအသိးန့ၣ်ကဆီၣ်ထွဲမၤစၢၤလီၤ”အဂ့ၢ်စံး၀ဲဒၣ်န့ၣ်လီၤႉ လၢန့ၣ်အမဲာ်ညါႇဒ်ခ့ၣ်အဲၣ်ယူၣ်ပာ်လီၤ၀ဲတၢ်သိၣ်တၢ်သီတၢ်ဘျၢလၢႇကဘှါဆှဲ၀ဲထံရူၢ်ကီၢ်သဲးတၢ်ဂ့ၢ်ကီလၢထံရူၢ်ကီၢ်သဲးကျဲသနူအသိးန့ၣ်ႇဒ်သိးကတုၤလီၢ်ထီၣ်ဘးကဒိးန့ၢ်ဘၣ်ဖဲၣ်ဒရဲၣ်ဒံၣ်မိၤကရ့ၣ်စံၣ်ကီၢ်စၢဖှိၣ်အဂီၢ်ကဆီၣ်တခူတိစၢၤမၤစၢၤ၀ဲအဂ့ၢ်ႇကညီဖီၣ်စုက၀ဲၤလွံၢ်ဖုဒီးတၢ်ဘူၣ်တၢ်ဘါခိၣ်နၢ်တဖၣ်ပာ်ဖျါ၀ဲလၢအလံာ်တၢ်ပာ်သးအပူၤန့ၣ်လီၤႉ တကးဒံးဘၣ်ႇခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢအံၤႇပာ်လီၤ၀ဲအတၢ်သိၣ်တၢ်သီတၢ်ဘျၢလၢတၢ်ကဘၣ်ဘှါဆှဲထံရူၢ်ကီၢ်သဲးတၢ်ဂ့ၢ်ကီလၢထံရူၢ်ကီၢ်သဲးသနူအိၣ်၀ဲလီၤတံၢ်လီၤဆဲးသနာ်က့ခီဖျိခိၣ်နၢ်အကျါတနီၤဘှါဆှဲ၀ဲထံရူၢ်ကီၢ်သဲးတၢ်ဂ့ၢ်ကီလၢဒုးယၤဂ့ၢ်၀ီအကျိၤအကျဲအသနူအဃိႇထံလီၢ်ကီၢ်ပူၤတၢ်ဒုးတၢ်ယၤအိၣ်ထီၣ်၀ဲဒီးကမျၢၢ်တဖၣ်တူၢ်ဘၣ်၀ဲတၢ်ကီတၢ်ခဲအမဲာ်ညါႇတၢ်ဘူၣ်တၢ်ဘါခိၣ်နၢ်တဖၣ်ဘၣ်ပျံၤဘၣ်ဖုးဘၣ်ဃ့ၢ်အိၣ်ကဒုစ့ၢ်ကီး၀ဲအသးအဂ့ၢ်လံာ်တၢ်ပာ်ဖျါတၢ်ပာ်သးအပူၤႇပာ်ဖျါ၀ဲန့ၣ်လီၤႉ လၢတၢ်န့ၣ်အဃိႇဒ်တကီၢ်ခါခဲအံၤကမျၢၢ်အဟံၣ်အဃီႇတၢ်ဘူၣ်တၢ်ဘါတၢ်သူၣ်ထီၣ်ႇဒူသ၀ီတၢ်ဘၣ်အူအီၣ်ႇတၢ်သံတၢ်ၦၢ်ႇတၢ်ဒုးတၢ်ယၤဒီးကမျၢၢ်တၢ်ဘၣ်စံၢ်မှံဟးဖျိးသုတအိၣ်ထီၣ်လၢၤတဂ့ၤအဂီၢ်ႇဟီၣ်က၀ီၤအပူၤကမျၢၢ်လီၢ်က၀ီၤဖိတဖၣ်ကအိၣ်ဘၣ်မုာ်မုာ်ခုၣ်ခုၣ်အဂီၢ်ႇမၤ၀ဲကမျၢၢ်တၢ်ထံၣ်လိာ်အိၣ်ဖှိၣ်ဖဲမဲဆမ့ၣ်သီခါဖၠၣ်အပူၤဒီးပာ်ဖျါထီၣ်၀ဲအတၢ်ပာ်သးအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးႇဖဲတၢ်မၤ၀ဲဖီၣ်စုက၀ဲၤကရူၢ်ကရၢႇတၢ်ဘူၣ်တၢ်ဘါခိၣ်နၢ်ဒိၣ်ထီဒီးႇကမျၢၢ်တၢ်အိၣ်ဖှိၣ်ဘျီ၀ဲအံၤအပူၤန့ၣ်ဘူးဒးတၢ်ဘူၣ်တၢ်ဘါဟဲထီၣ်၀ဲခဲလၢာ်အဂၤ(၂၅၀)ဘျဲၣ်အိၣ်၀ဲအသိးဘျၢထံခရံာ်ဖိတၢ်အိၣ်ဖှိၣ်သရၣ်ဟဲထီၣ်၀ဲအဂၤ(၁၀)စ့ၢ်ကီးအဂ့ၢ်ပာ်ဖျါ၀ဲလၢလံာ်တၢ်ပာ်သးအပူၤန့ၣ်လီၤႉ
ဒူသထူၣ်ကီၢ်ရ့ၣ်တလါအတီၢ်ပူၤ တၢ်ဒုးကဲထီၣ် ၃၇ ဘျီႇ ပယီၤသုးသံ ၃၇ ဂၤ
လါမ့ၤ ၉ သီႇ ၂၀၂၄ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူထူၣ်ကီၢ်ရ့ၣ်(သုးက့ ၁)ဟီၣ်က၀ီၤ လါအ့ဖြ့ၣ်တလါအတီၢ်ပူၤန့ၣ် တၢ်ဒုးကဲထီၣ်၀ဲ(၃၇)ဘျီဒီးပယီၤသုးတကပၤသံ၀ဲဒၣ်(၃၇)ဂၤႇဘၣ်ဒိ၀ဲဒၣ်(၄၀)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤ အသိးသ့ၣ်ညါဘၣ်န့ၣ်လီၤႉ အပူၤကွံာ်လါအ့ဖြ့ၣ် ၁ သီတုၤ ၃၀ သီ လၢတလါအတီၢ်ပူၤ ခီဖျိဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးပာ်ဖှိၣ်သ့ၣ်တဖၣ်အံၤ ခိးခး၀ဲပယီၤသုးလၢတၢ်ဒ့ၣ်စၢၤကျဲပူၤႇခိးထုးဒီးမ့ၣ်ပိၢ်ႇလဲၤခးပယီၤသုးလၢဒြိမ့ၣ်ပိၢ် အဃိ သုးကီၣ်ကးတကပၤဘၣ်သံဘၣ်ဘၣ်ဒိဘၣ်ထံးကဲထီၣ်၀ဲဒၣ်ဒ်အံၤလီၤအဂ့ၢ်န့ၣ် လံာ်တၢ်မၤနီၣ်ပူၤအသိး သ့ၣ်ညါဘၣ်န့ၣ် လီၤႉ ဒ်ဒူသထူၣ်ကီၢ်ရ့ၣ်တၢ်မၤနီၣ်စရီပူၤပာ်ဖျါ၀ဲအသိးန့ၣ်သုးကီၣ်ကးသံဘၣ်ဒိဘၣ်ထံးတဖၣ်အကျါပၣ်ဃုာ်၀ဲသုးဒ့ခိၣ်(၂)ဒီးပၢၤကီၢ်သုးအိၣ်၀ဲအသိးလၢန့ၣ်အမဲာ်ညါတၢ်မၤန့ၢ်ဃုာ်၀ဲ(MA 3)တခိၣ်ႇအဒၢတခါႇကျိချံ ၂၉ ဖျၢၣ်ႇ စဲးကတိၤတၢ် (၁)ဖျၢၣ် လၢဒုၣ်ဒါအအိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးလၢခံခီခံကပၤတၢ်ဒုးကဲထီၣ်တလါအတီၢ်ပူၤအံၤန့ၣ်မ့မ့ၢ်လၢ(KNLA)သုးပာ်ဖှိၣ်တကပၤန့ၣ် ဘၣ်ဟ့ၣ်လီၤကွံာ် အသးသမူ(၁)ဂၤဒီးဘၣ်ဒိ၀ဲဒၣ်(၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တကးဒံးဘၣ်ခီဖျိလၢ(KNLA)သုးပာ်ဖှိၣ်ခိးထုး၀ဲမ့ၣ်ပိၢ်ႇလဲၤတ့ၢ်လီၤဒြိမ့ၣ်ပိၢ်လၢပယီၤသုးအိၣ်အလီၢ်အဃိ သုးကီၣ်ကးအသိလ့ၣ် ဟးဂီၤ(၂)ခိၣ်ႇလ့ၣ်မ့ၣ်အူဟးဂီၤ(တတွဲ)ဒီးတၢ်သူၣ်ထီၣ်ဟးဂီၤ၀ဲဒၣ်တဖျၢၣ်အဂ့ၢ်န့ၣ် ကီၢ်ရ့ၣ်လံာ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤႉ ဒ်န့ၣ်အသိးတလါအတီၢ်ပူၤပယီၤသုးခးလီၤကျိဖးဒိၣ်အိၣ်၀ဲ(၂၉)ဘျီႇကဘီယူၤဟဲတ့ၢ်မ့ၣ်ပိၢ်(၂)ဘျီဒီး ခီဖျိလၢ ကျိဖးဒိၣ်ဒီး ကဘီယူၤအံၤအဃိၦၤကမျၢၢ်သံ၀ဲဒၣ်(၁)ဂၤႇဘၣ်ဒိ(၆)ဂၤဒီးလၢန့ၣ်အမဲာ်ညါ ၦၤကမျၢၢ်ဟံၣ်ဃီဃုာ်ဒီး ကျးဘၣ်ထံးဟးဂီၤ ပာ်ဖှိၣ်ခဲလၢာ်အိၣ်၀ဲ(၃၇)ဖျၢၣ်တကးဒံးဘၣ်ၦၤကမျၢၢ်အသိလ့ၣ်ႇရီဘၢၣ်ကျီးႇတၢ်မုၢ်တၢ်ဘိသ့ၣ်တဖၣ် မ့ၣ်အူအီၣ်ဟးဂီၤ ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးကီၣ်ကးအံၤခးလီၤ၀ဲဒၣ်ကျိဖးဒိၣ်ကဲထီၣ်သးအိၣ်၀ဲတလီၢ်လီၢ်ဒီးသုးကီၣ်ကးအံၤသူအါက့ၤ၀ဲဒၣ်လၢ ကျိဖးဒိၣ်ႇ ကဘီယူၤအဂ့ၢ်န့ၣ် ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့း စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤႉ “ဘၣ်ဃးလၢပဟီၣ်က၀ီၤပူၤဒုသုးကီၣ်ကးလၢအဟံးဆူၣ်တၢ်စိတၢ်ကမီၤခဲအံၤတဖၣ်န့ၣ်မ့ဘၣ်ဃးလၢကျိဖးဒိၣ်ဒု တသီခံသီတဘျီတၢ်လီၢ်တတီၤခံတီၤန့ၣ်ခးလီၤ၀ဲပနၢ်ဟူမၢ်မၢ်လီၤႉခဲအံၤသုးကီၣ်ကးန့ၣ်သူအါ၀ဲဒၣ်လၢကျိဖးဒိၣ်ဒီးကဘီယူၤလီၤႉကျိဖးဒိၣ်န့ၣ်လၢညါသူအါ၀ဲလၢ(၁၂၀)ခဲအံၤတမ့ၢ်ဒ်န့ၣ်လၢၤဘၣ်သူက့ၤ၀ဲလၢ(၁၂၂)မီၤနီၤႉဒ်န့ၣ်အသိး ပနၢ်ဟူဘၣ် လၢဒုၣ်ဒါန့ၣ်လၢတၢ်ဒုးတၢ်ယၤကဲထီၣ်အလီၢ်န့ၣ်သူ၀ဲကျိတၢ်စုၣ်တၢ်ပျၢ်အိၣ်န့ၣ်ပဖးဘၣ်လၢတၢ်ကစီၣ်ပူၤအိၣ်စ့ၢ်မီၤနီၤ”...