သုးကီၣ်ကးပညိၣ်ခး၀ဲကရ့ၣ်နံၣ်လီၢ်အိၣ်ကမှံကၠိ(၂)ဖျၢၣ်အဖီခိၣ်အံၤထီဒါ၀ဲတဲာ်တဲာ်ဖျုဖျုအဂ့ၢ် KnHRG ထုးထီၣ်ပာ်ဖျါ
လါဖ့ၤဘြူၤအါရံၤ ၇ သီႇ ၂၀၂၄ နံၣ်ႇ ခ့ၣ်အဲးစံၣ် လၢကရံၣ်နံၣ်ကီၢ်စဲၣ် ဒံၣ်မီစိၤကီၢ်ဆၣ် မၠၣ်သလဲသ၀ီကရူၢ် ဒီၣ်အံၣ်စံၣ်သ၀ီအပူၤန့ၣ် ဖဲမဟါလါဖ့ၤဘြူၤအါရံၤ(၅)သီ ဂီၤခီ(၁၀)နၣ်ရံၣ်အဆၢကတီၢ် သုးကီၣ်ကးပညိၣ်ခး၀ဲလီၢ်အိၣ်ကမှံကၠိ(၂)ဖျၢၣ်အဖီခိၣ်အံၤ ထီဒါ၀ဲတဲာ်တဲာ်ဖျုဖျု အဂ့ၢ်န့ၣ် ကရ့ၣ်နံၣ်ၦၤကညီဂ့ၢ်၀ီခွဲးယာ်ကရူၢ် KnHRG ထုးထီၣ်ပာ်ဖျါ၀ဲဖဲမဟါ လါဖ့ၤဘြူၤအါရံၤ ၅ သီအနံၤ န့ၣ်လီၤႉ ခီဖျိသုးကီၣ်ကးအကဘီယူၤဟဲခးလီၤတၢ်လၢလီၢ်ကအိၣ်ကမှံကၠိသ့ၣ်တဖၣ်အံၤအဃိၦၤကၠိဖိဃုာ်လီၢ်က၀ီၤၦၤကမျၢၢ်သံဘၣ်ဒိဘၣ်ထံးအါမးဒီးတကးဒံးဘၣ်တၢ်သူၣ်ထီၣ်သ့ၣ်တဖၣ်စ့ၢ်ကီးဟးဂီၤ၀ဲဒၣ် အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးကီၣ်ကးပညိၣ်၀ဲကၠိဒ်အံၤအဖီခိၣ်မ့ၢ်တၢ်မၤထီဒါ၀ဲၦၤဖိသၣ်ခွဲးယာ်ဃုာ်ဒီးၦၤဟီၣ်ခိၣ်ဖိခွဲးယာ်အဃိလ့ၤတက့ၤတူၢ်လိာ်တသ့ဘၣ်ထီဒါ၀ဲသုးကီၣ်ကးအတၢ်ဖံးတၢ်မၤအံၤဒီးထံဂုၤကီၢ်ဂၤခိၣ်နၢ်တဖၣ်ကဟံထီၣ်ဖီၣ်ထီၣ်သုးကီၣ်ကးတဖုအံၤအရ့တုၤလီၤတီၤလီၤအဂ့ၢ်န့ၣ် ကရ့ၣ်နံၣ်ကတီၢ်ဘၢၣ်စၢၤပၢပြးကီၣ်ကး နဲၣ်ရွဲၢ်သဃဲၤ(၂)ကိၤဘညါစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “ ဘၣ်မနုၤအဃိယဘၣ်ထီဒါ၀ဲသုးကီၣ်ကးတၢ်မၤအံၤလဲၣ်န့ၣ်အ၀ဲသ့ၣ်တဖၣ်အတၢ်ထီၣ်ဒုး၀ဲကၠိခံဖျၢၣ်အံၤန့ၣ်အိၣ်၀ဲဒီးအတၢ်ပညိၣ်လီၤတံၢ်လီၤဆဲးလီၤမီၤႉအဃိတၢ်အံၤမ့ၢ်၀ဲတၢ်မၤကမၣ်သုးကွီၣ်မ့ၣ်တၢ်သိၣ်တၢ်သီအသိး မ့ၢ်စ့ၢ်ကီးတၢ်မၤကမၣ်ၦၤကညီတၢ်ဒိသူၣ်ဒိသးတၢ်ဘျၢသ့ၣ်တဖၣ်အမဲာ်ညါန့ၣ်မၤကမၣ်၀ဲဖိဒံဖိသၣ်လၢအတၢ်ကမၣ်တအိၣ်ဘၣ်သ့ၣ်တဖၣ်အံၤအတၢ်ခွဲးတၢ်ယာ်မီၤနီၤအဃိန့ၣ်ပအဲၣ်ဒိးပာ်ဖျါထီၣ်ပသးလၢသုးကီၣ်ကးအတၢ်မၤ၀ဲအံၤန့ၣ်လ့ၤတက့ၤပတူၢ်လိာ်တသ့ဘၣ်ႉပအဲၣ်ဒိးလၢထံဂုၤကီၢ်ဂၤၦၤဘၣ်မူဘၣ်ဒါတဖၣ်ကဟံထီၣ်ဖီၣ်ထီၣ်သုးကီၣ်ကးတဖၣ် အံၤအရ့တဲာ်တဲာ်ဖျုဖျုလၢအဆိအချ့အါန့ၢ်ဒံးအလီၢ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါသုးကီၣ်ကးပညိၣ်ဟဲခးလီၤတၢ်လၢကၠိဒ်အံၤန့ၣ်မ့ၢ်တၢ်မၤပျံၤမၤဖုး၀ဲဖိဒံဖိသၣ်ဒီးမိၢ်ပၢ်သ့ၣ်တဖၣ် လၢတၢ်ကူၣ်ဘၣ်ကူၣ်သ့တကပၤဒီးတၢ်မၤဒ်အံၤအဖီခိၣ်ဘၣ်ဒိဘၣ်ထံးစ့ၢ်ကီး၀ဲဖိဒံဖိသၣ်တၢ်ကူၣ်ဘၣ်ကူၣ်သ့အဃိ မ့ၢ်တၢ်မၤလၢအလီၤရၢၢ်လီၤစၢၢ်တခါအဂ့ၢ်န့ၣ် ကိၤဘညါ စံးအါထီၣ်၀ဲန့ၣ်လီၤႉ ဖဲသုးကီၣ်ကးကဘီယူၤဟဲခးလီၤတၢ်ဘျီ၀ဲအံၤန့ၣ်ဘၣ်သံ၀ဲကၠိဖိ(၄)ဂၤ˜ သးၦၢ်(၁)ဂၤဒီး ˜ ဘၣ်ဒိဘၣ်ထံး၀ဲဖိသၣ်ဆံး (၁၅)ဂၤ˜ကၠိသရၣ်(၂)ဂၤလီၢ်က၀ီၤဖိ(၅)ဂၤတကးဒံးဘၣ်အမဲာ်ညါဘၣ်ဟးဂီၤ၀ဲကၠိခံဖျၢၣ်၊တၢ်ဘါယွၤသရိာ်(၁)ဖျၢၣ်ဃုာ်ဒီးတၢ်သူၣ်ထီၣ်လၢအဂၤသ့ၣ်တဖၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးသုးကီၣ်ကးအတၢ်မၤထီဒါဖိဒံဖိသၣ်ခွဲးယာ်ဒီးၦၤကညီဂ့ၢ်၀ီခွဲးယာ်ဒ်အံၤအဖီခိၣ်လ့ၤတက့ၤတူၢ်လိာ် တသ့ဘၣ်အသိးအဲၣ်ဒိးလၢကရူၢ်ကရၢလၢအဘၣ်ဃးဒီးၦၤကညီဂ့ၢ်၀ီခွဲးယာ်တဖၣ်ဃုာ်ဒီးဘီမုၢ်စၢဖှိၣ်ကရၢတဖၣ် ကဟံထီၣ်ဖီၣ်ထီၣ်ဘၣ်သုးကီၣ်ကးအရ့တုၤလီၤတီၤလီၤအဂ့ၢ်န့ၣ် ကညီကူၣ်သ့ဆဲးလၤ၀ဲၤကျိၤ(KECD) လီၢ်ခၢၣ်သးနဲၣ်ရွဲၣ် သရၣ်စီၤအဲၣ်ကလုာ်ထူ စံးစ့ၢ်ကီး၀ဲဒ်အံၤန့ၣ်လီၤႉ...
တလါအတီၢ်ပူၤလၢၢ်ဒိၣ်ကီၢ်ဆၣ်အပူၤကမျၢၢ်သံ ၁၀ ဂၤ ဒီး ဘၣ်ဒိ ၂၀ ဂၤ
လါဖ့ၤဘြူၤအါရံၤ ၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်အပူၤ ခီဖျိသုးကီၣ်ကးအၦၤခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိ တလါအတီၢ်ပူၤ ကမျၢၢ်ဘၣ်သံ(၁၀)ဂၤဒီး ဘၣ်ဒိ၀ဲဒၣ်(၂၀)ဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ စးထီၣ်ဖဲအပူၤကွံာ်လါယနူၤအါရံၤ(၁)သီတုၤ(၃၁)သီလၢတလါအတီၢ်ပူၤ ခီဖျိပယီၤသုးခးလီၤကျိဖးဒိၣ်ဆူ လၢၢ်ဒိၣ်ကီၢ်ဆၣ်ဒူသ၀ီပူၤခဲလၢာ်အိၣ်၀ဲ(၂၀၀)ဘျဲၣ်ဒီး ကဘီယူၤဟဲခးလီၤတၢ်အိၣ်၀ဲ(၂၇)ဘျီအဃိ လီၢ်က၀ီၤၦၤကမျၢၢ်သံ၀ဲဒၣ်(၁၀)ဂၤႇ ဘၣ်ဒိ(၂၀)ဂၤဒီးဒ်န့ၣ်အသိးပယီၤသုးအံၤဖီၣ်စ့ၢ်ကီး၀ဲကမျၢၢ်(၂၁)ဂၤအဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤကတိၤတၢ်ပၢ ပဒိၣ်စီၤ၀ါမုၢ် စံး၀ဲန့ၣ်လီၤႉ လၢန့ၣ်အမဲာ်ညါခီဖျိသုးကီၣ်ကးခးလီၤကျိဖးဒိၣ်ဟဲခးလီၤတၢ်ဒီးကဘီယူၤအဃိဘၣ်ဟးဂီၤကွံာ်၀ဲကမျၢၢ်ဟံၣ် တၢ်သူၣ်ထီၣ်အဖျၢၣ်(၃၀)ဘျဲၣ်ႇ သီခါဖၠၣ်တၢ်သူၣ်ထီၣ်တဖျၢၣ်ဒီးဒ်န့ၣ်အသိးကမျၢၢ်အဆၣ်ဖိကီၢ်ဖိသ့ၣ်တဖၣ်စ့ၢ်ကီး သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲန့ၣ်လီၤႉ တကးဒံးဘၣ်ခီဖျိပယီၤသုးခးလီၤကျိဖးဒိၣ်အဃိကဲထီၣ်တၢ်ကီတၢ်ခဲလၢကမျၢၢ်လီၢ်က၀ီၤဖိသ့ၣ်တဖၣ် တၢ်လုၢ်အီၣ်နီၢ်ခိၣ်သးသမူႇ ကဖံးအီၣ်မၤအီၣ်ႇ တၢ်လဲၤတၢ်က့ၤတကပၤဒီးတၢ်ဘၣ်ယိၣ်ဘၣ်ဘှီလၢကမျၢၢ်သ့ၣ်တဖၣ် အဂီၢ်အဂ့ၢ်န့ၣ် လၢၢ်ဒိၣ်ကီၢ်ဆၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်န့ၣ်အသိးသုးမီၤစိရိၤဟံးန့ၢ်တၢ်စိတၢ်ကမီၤ၀ံၤအလီၢ်ခံ လၢချၢၣ်လွံၢ်ထူၣ်ကီၢ်ရ့ၣ်အပူၤ ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၂၄၈၁၆၀)ဂၤဒီးကမျၢၢ်ဃုာ်ဒီးဖိဒံဖိသၣ်ကၠိဖိသံ၀ဲဒၣ်ခဲလၢာ်(၁၂၈)ဂၤႇ ဘၣ်ဒိ၀ဲဒၣ်(၃၅၂)ဂၤအဂ့ၢ်န့ၣ် ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ် ထုးထီၣ်ပာ်ဖျါ၀ဲဖဲလါဖ့ၤဘြူၤအါရံၤ(၁)သီအနံၤန့ၣ်လီၤႉ
သဲးသၣ်အၦ့ၤက့ၤထီၣ်ကဒါဘၣ်ဆၣ်ခီဖျိဘၣ်ဃ့ၢ်တၢ်ဒုးအဃိတဆါဘၣ်သဲးသၣ်ဘၣ်
လါဖ့ၤဘြူၤအါရံၤ ၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ်(တနီသရံၣ်ကီၢ်ဆၣ်)အပူၤတကီၢ်ခါခဲအံၤသဲးသၣ်အၦ့ၤက့ၤထီၣ်ကဒါ၀ဲဘၣ်ဆၣ်ကမျၢၢ်လၢအမၤအီၣ်သဲးကျီးသ့ၣ်တဖၣ်မ့ၢ်လၢဘၣ်ဃ့ၢ်တၢ်ဒုးအဃိတဆါ၀ဲသဲးသၣ်ဘၣ်အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ လၢတနီသရံၣ်ကီၢ်ဆၣ်အပူၤအပူၤကွံာ်(၂)နံၣ်အခါန့ၣ်သဲးသၣ်အၦ့ၤလီၤ၀ဲတပယူာ်ဃီဒီးဘၣ်ဆၣ်တနံၣ်အံၤ သဲးသၣ်ဃ့တပီၢ်န့ၣ်အၦ့ၤအိၣ်၀ဲတုၤလၢ(၃၃၀၀)ကျးညါအဂ့ၢ်န့ၣ် တနီသရံၣ်ကီၢ်ဆၣ်ပူၤ လီၢ်က၀ီၤကမျၢၢ်လၢအမၤအီၣ်သဲးတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သဲးသၣ်အၦ့ၤဟဲက့ၤထီၣ်ကဒါဖဲတနံၣ်ညါအံၤလီၤႉပူၤကွံာ်နံၣ်န့ၣ်သဲးသၣ်လၢပတဆါဘၣ်အီၤဒံးဘၣ်သ့ၣ်တဖၣ်န့ၣ်ပပာ်ဃာ်အီၤမီၤနီၤႉဖဲပူၤကွံာ်နံၣ်န့ၣ်သဲးသၣ်တပီၢ်န့ၣ်အၦ့ၤအိၣ်၀ဲ(၁၅၀၀)ကျးလီၤအဃိ ပဒွးတကဲးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ် လီၤႉ လၢတနီသရံၣ်ကီၢ်ဆၣ်(ညီၤပ့ၤကွ့ကရူၢ်)ႇ(ဘါလီသကရူၢ်)ဒီး(ဘါလမိၣ်)ကရူၢ်သ့ၣ်တဖၣ်အံၤအပူၤန့ၣ်စးထီၣ်ဖဲပူၤကွံာ်လါယနူၤအါရံၤ(၁၅)သီအနံၤန့ၣ်သုးကီၣ်ကးဒီးလီၢ်က၀ီၤတၢ်ဒီသဒၢကမျၢၢ်သုးလၢအအိၣ်ဆီလီၤသးဖဲန့ၣ်သ့ၣ်တဖၣ်တၢ်ဒုးဆူၣ်ထီၣ်၀ဲလၢခံခီခံကပၤအဃိလီၢ်က၀ီၤဖိသ့ၣ်တဖၣ်တုၤလၢခဲအံၤဘၣ်ဃ့ၢ်အိၣ်ကဒုသး အဖၢမုၢ်လီၤအဂ့ၢ်န့ၣ် (ဘါလီ)သ၀ီဖိတဂၤစံး၀ဲဒ်အံၤန့ၣ်လီၤႉ “ပူၤကွံာ်နံၣ်အခါန့ၣ်ပဘၣ်ဃ့ၢ်တၢ်ဒုးခဲအံၤခဲအံၤအဃိပတဆါဘၣ်သဲးသၣ်မူၤမူၤနီၢ်နီၢ်ဘၣ်ႉတနံၣ်အံၤသဲးသၣ်အၦ့ၤဟဲက့ၤဂ့ၤထီၣ်နာ်သက့ဘၣ်ဃ့ၢ်တၢ်ဒုးဒံးလီၤႉအဃိသဲးသၣ်တနီၤအုၣ်ကွံာ်ဒီးဆှူကွံာ်၀ဲမီၤနီၤႉ သဲးသၣ်အၦ့ၤနါက့ တဂၢၤတကျၢၤဘၣ်အၦ့ၤထီၣ်တထံၣ်လီၤတထံၣ်” အဂ့ၢ်န့ၣ် စံး၀ဲန့ၣ်လီၤႉ သဲးသၣ်လၢအဟးထီၣ်လၢကီၢ်ပယီၤသ့ၣ်တဖၣ်အံၤတၢ်ဆှၢအီၤဆူကီၢ်အ့ဒံၣ်ယါထံကီၢ်အံၤအအါကတၢၢ်လီၤဒီးခီဖျိထံကီၢ်တၢ်အိၣ်သးတဂၢၢ်တကျၢၤဘၣ်အဃိပနံာ်တၢ်ဆှၢထီၣ်ဆှၢလီၤကျဲသ့ၣ်တဖၣ်စ့ၢ်ကီး တလဲၤသးဘၣ်လီၢ်ဘၣ်ဆးဒ်လၢညါအသိးဒံးဘၣ်အဂ့ၢ်န့ၣ် ၦၤခိးၦ့ၤသဲးသၣ်ဖိတဖၣ်စံး၀ဲန့ၣ်လီၤႉ
ပယီၤသုးကဘီယူၤဟဲတ့ၢ်လီၤကျိဖးဒိၣ်လၢတနီသရံၣ်ကီၢ်ဆၣ် (KNLA) သုးရ့ၣ် ၁၁ တၢ်လီၢ်
လါဖ့ၤဘြူၤအါရံၤ ၆ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)တနီသရံၣ်ဟီၣ်က၀ီၤအပူၤ ဖဲမဟါလါဖ့ၤဘြူၤအါရံၤ ၅ သီ မုၢ်ဃ့ၢ်လီၤ ၁ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးအကဘီယူၤဟဲတ့ၢ်လီၤ ကျိဖးဒိၣ်လၢ(KNLA) သုးရ့ၣ်(၁၁)တၢ်လီၢ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲန့ၣ်လီၤႉ ဖဲမဟါကဘၣ်ဖဲမုၢ်ဃ့ၢ်လီၤ ၁း၄၀ မံးနံးအဆၢကတီၢ်န့ၣ် ပယီၤသုးအဟဲၣ်လံၣ်ခီးပတၢၣ်တဘ့ၣ်ဟဲတ့ၢ်လီၤ၀ဲဒၣ် ကျိဖးဒိၣ်(၁၁)ဖျၢၣ်လၢ ကီၢ်ကၠီၣ်တဲၣ်ကီၢ်ဆၢ ကီၢ်ဆၢဖိ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ် ၁၁ ဟီၣ်က၀ီၤပူၤ အဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲန့ၣ်လီၤႉ ဘၣ်ဃးဒီးပယီၤသုးကဘီယူၤဟဲတ့ၢ်လီၤမ့ၣ်ပိၢ်အံၤန့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ “ကဘီယူၤ ဟဲတ့ၢ်လီၤမ့ၣ်ပိၢ်န့ၣ်မ့ၢ်၀ဲဒၣ်(သုးက့ ၄) သုးရ့ၣ် ၁၁ ဟီၣ်က၀ီၤမီၤနီၤႉ ဒုၣ်ဒါဟဲတ့ၢ်လီၤကျိဖးဒိၣ်န့ၣ်ကဘၣ်လၢ ၁း၄၀ မုၢ်ဃ့ၢ်လီၤအဆၢကတီၢ်န့ၣ်မီၤနီၤႉ တၢ်လီၢ်လၢပယီၤသုးကဘီယူၤဟဲတ့ၢ်လီၤမ့ၣ်ပိၢ်န့ၣ် မ့ၢ်၀ဲပခ့ၣ်အဲၣ်ယူၣ်အတၢ်လီၢ် ဒီး ဖဲန့ၣ်ပသုးမုၢ်အိၣ်ႇပတြဲၤအိၣ်၀ံၤဒီးထံဆဲးမဲးယွၤသုးကျိၤအိၣ်မီၤဖဲန့ၣ်ႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲတနံၤအံၤန့ၣ်လီၤႉ ဒ်န့ၣ်အသိးပယီၤသုးကဘီယူၤဟဲတ့ၢ်လီၤကျိဖးဒိၣ်ဘျီ၀ဲအံၤလီၢ်က၀ီၤကမျၢၢ်သံဘၣ်ဒိဘၣ်ထံးတအိၣ်၀ဲဘၣ်ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တကပၤစ့ၢ်ကီးတၢ်ဘၣ်ဒိဘၣ်ထံးတအိၣ်၀ဲဒၣ်နီမံၤဘၣ်အဂ့ၢ်န့ၣ် ပဒိၣ်စီၤအဲၣ်နၤ စံးအါထီၣ်၀ဲဒၣ်န့ၣ်လီၤႉ လၢန့ၣ်အမဲာ်ညါသုးမီၤစိရိၤဟံးန့ၢ်တၢ်စိတၢ်ကမီၤ၀ံၤလီၢ်ခံခ့ၣ်အဲၣ်ယူၣ်ဘိးဘၣ်ရၤလီၤလၢတတူၢ်၀ဲလိာ်သုးမီၤစိရိၤ အံၤဘၣ်အဃိတၢ်ကဘၣ်ထုးကွံာ်၀ဲဒၣ်သုးမီၤစိရိၤတၢ်ပၢတၢ်ပြးအဂ့ၢ်န့ၣ် ပဒိၣ်စီၤအဲၣ်နၤစံးအါထီၣ်၀ဲဒၣ်ဒ်အံၤန့ၣ်လီၤႉ အ၀ဲစံး၀ဲလၢ“တၢ်လၢပယီၤသုးမီၤစိရိၤဒီး(ခ့ၣ်အဲၣ်ယူၣ်)အဘၢၣ်စၢၤန့ၣ်တၢ်ဖ့ၣ်စၢအိၣ်တကးဘၣ်တၢ်ဖ့ၣ်စၢအါတလၢထီၣ်တဲာ်ဒီးအိၣ်က့ၤလၢစုက၀ဲၤတၢ်ဒုးတၢ်ယၤလံနီၤႉအဃိမ့ၢ်ဒၣ်ပအိၣ်လၢတၢ်ဒုးတၢ်ယၤအပျီပူၤလီၤခဲအံၤန့ၣ်ႉလၢပယီၤသုးမီၤစိရိၤထီၣ်ဟံန့ၢ်တၢ်စိတၢ်ကမီၤ၀ံၤလီၢ်ခံန့ၣ်(ခ့ၣ်အဲၣ်ယူၣ်)ထုးထီၣ်ဘိးဘၣ်ရၤလီၤ၀ဲလံတူၢ်လိာ်သုးမီၤစိရိၤတသ့ဘၣ်ႉထံရူၢ်ကီၢ်သဲးတၢ်တဲသကိးန့ၣ်တဲသကိးတသ့ဘၣ်ႉအဃိမ့ၢ်ဒၣ်တၢ်လဲၤဒ်ခ့ၣ်အဲၣ်ယူၣ်တၢ်ရဲၣ်တၢ်ကျဲၤလၢတၢ်ကဘၣ်ထုးကွံာ်၀ဲဒၣ်သုးမီၤစိရိၤတၢ်ပၢတၢ်ပြးဒီးသူၣ်ထီၣ်က့ၤဖဲၣ်ဒရၢၣ်ဒံၣ်မိၣ်ခြ့ၣ်စံၣ်ထံကီၢ်န့ၣ်လီၤမီၤနီၤ” အဂ့ၢ်န့ၣ် စံး၀ဲန့ၣ်လီၤႉ...
မုၢ်တြီၢ်ကီၢ်ရ့ၣ်တလါအတီၢ်ပူၤတၢ်ဒုးကဲထီၣ်(၈၀)ဘျဲၣ်ဒီးပယီၤသုးတကပၤသံ(၄၁)ဂၤ
လါဖ့ၤဘြူၤအါရံၤ ၅ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကီၢ်သူလ့ၤတၢ်ပၢမုၢ်တြီၢ်ကီၢ်ရ့ၣ် သုးက့(၅)ဟီၣ်က၀ီၤအပူၤ လၢတလါအတီၢ်ပူၤ တၢ်ဒုးကဲထီၣ်၀ဲ(၈၀)ဘျဲၣ်ဒီး ဖဲန့ၣ်ပယီၤသုးတကပၤသံ၀ဲဒၣ်(၄၁)ဂၤအဂ့ၢ်န့ၣ် မုၢ်တြီၢ်ကီၢ်ရ့ၣ်တၢ်ကစီၣ် ထုးထီၣ်ပာ်ဖျါ၀ဲဖဲလါဖ့ၤဘြူၤအါရံၤ ၅ သီအနံၤန့ၣ်လီၤႉ ဖဲပူၤကွံာ်လါယနူၤအါရံၤ(၁)သီတုၤ(၃၁)သီလၢတလါအတီၢ်ပူၤ တၢ်ဒုးကဲထီၣ်၀ဲလၢကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးကီၣ်ကးအဘၢၣ်စၢၤခဲလၢာ်အိၣ်၀ဲ(၈၉)ဘျီဒီး ပယီၤသုးတကပၤသံ၀ဲဒၣ်(၄၁)ဂၤ ဘၣ်ဒိစ့ၢ်ကီး၀ဲဒၣ်(၄၁)ဂၤအဂ့ၢ်န့ၣ် မုၢ်တြီၢ်ကီၢ်ရ့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢတလါအတီၢ်ပူၤသုးကီၣ်ကးဘၣ်ဒိ(၄၀)ဘျဲၣ်အံၤအကျါန့ၣ်ပၣ်ဃုာ်၀ဲသုးရ့ၣ်ခိၣ်တဂၤဒီး ဘၣ်ဆၣ်မ့မ့ၢ်လၢတၢ်ပၢၢ်ဆၢသုးကရူၢ်တကပၤတၢ်သံတၢ်ဘၣ်ဒိဘၣ်ထံးအိၣ်တအိၣ်ခီန့ၣ် လံာ်တၢ်ပာ်ဖျါအပူၤပာ်ဖျါ၀ဲတအိၣ်၀ဲဘၣ်န့ၣ်လီၤႉ ခီဖျိတၢ်ဒုးကဲထီၣ်လၢခံခီခံကပၤအဘၢၣ်စၢၤအဖီခိၣ်ပယီၤသုးအံၤခးလီၤ၀ဲကျိဖးဒိၣ်ဆူကမျၢၢ်ဒူသ၀ီတၢ်ဖံးအီၣ် မၤအီၣ်လီၢ်ကျဲအိၣ်၀ဲ(၅)ဖျၢၣ်ဒီးဘၣ်ဆၣ်ဒူသ၀ီၦၤကမျၢၢ်သံဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ ဒ်န့ၣ်အသိးလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့-၅)ဟီၣ်က၀ီၤအပူၤ စးထီၣ်(၂၀၂၃)နံၣ်လါယနူၤအါရံၤတုၤလၢလါဒံၣ်စဲဘၢၣ်လၢတနံၣ်အတီၢ်ပူၤန့ၣ်ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့-၅ အၦၤအဘၢၣ်စၢၤ တၢ်ဒုးကဲထီၣ်၀ဲ(၁၈၅၇)ဘျီဒီး ဖဲန့ၣ်သုးကီၣ်ကးတကပၤ သံ၀ဲဒၣ်(၈၅၇)ဂၤဒီးဘၣ်ဒိ၀ဲ(၆၀၉)ဂၤအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါတ့ၢ်ဃာ်၀ဲအိၣ်န့ၣ်လီၤႉ
ထံရူၢ်ကီၢ်သဲးတၢ်အုၣ်ကီၤသးကအိၣ်အဂီၢ်ကဖီၣ်လိာ်စုမၤသကိးတၢ်ဒီးကညီတၢ်ကရၢကရိတဖၣ်လၢသနၢၣ်ဒၣ်၀ဲအဂ့ၢ် KNU ကရၢခိၣ် စံး၀ဲ
လါဖ့ၤဘြူၤအါရံၤ ၅ သီႇ ၂၀၂၄ နံၣ်ႇ ခ့ၣ်အဲးစံၣ် တနံၤအံၤလါဖ့ၤဘြူၤအါရံၤ ၅ သီ လၢအလီၤဘၣ်၀ဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢနံၣ်ဆဲးဆၢၦဲၤထီၣ် (၇၇)နံၣ်အဖီခိၣ်အံၤ ထံရူၢ်ကီၢ်သဲးတၢ်အုၣ်ကီၤသးကအိၣ်အဂီၢ်ကဖီၣ်လိာ်စုမၤသကိးတၢ်ဒီးကညီတၢ်ကရၢကရိ တဖၣ်လၢသနၢၣ်ဒၣ်၀ဲစုာ်စုာ်အဂ့ၢ်န့ၣ် (KNU)ကရၢခိၣ် ပဒိၣ်စီၤကွဲၤထူ၀့ စံး၀ဲန့ၣ်လီၤႉ ကညီကလုာ်ထံရူၢ်ကီၢ်သဲးတၢ်အုၣ်ကီၤသးကအိၣ်အဂီၢ်ပကဘၣ်ဖီၣ်လိာ်စုမၤသကိးတၢ်ဒီးကညီတၢ်ကရၢကရိတဖၣ်လၢသနၢၣ်ဒၣ်၀ဲစုာ်စုာ်အဂ့ၢ်န့ၣ် ကရၢခိၣ် ပဒိၣ်စီၤကွဲၤထူ၀့ စံးလီၤ၀ဲဒၣ်လၢ(၇၇)နံၣ်ကညီဒီကလုာ်စၢဖှိၣ်ကရၢမုၢ်နံၤ ဆၢက့ၤ အလံာ်ဟ့ၣ်ယုၢ်ပူၤအံၤန့ၣ်လီၤႉ ဒ်(ခ့ၣ်အဲၣ်ယူၣ်)ကရၢခိၣ်အလံာ်ဟ့ၣ်ယုၢ်ပူၤအသိးန့ၣ်အလီၢ်အိၣ်နီၢ်နီၢ်လၢကညီဒီကလုာ်စၢဖှိၣ်ကရၢခိၣ်နၢ်ႇ ကရၢဖိဒီး ၦၤမၤသကိးတၢ်ဖိတဖၣ်ကအိၣ်ဒီးတၢ်တူၢ်ခီၣ်ပာ်သးလၢကရၢအံၤမ့ၢ်ကရၢတဖုလၢအကါဒိၣ်၀ဲလၢခါဆူညါကညီကလုာ်အဘူၣ်အတီၢ်အဂီၢ်ဒီးတကးဒံးဘၣ်ကရၢခိၣ်နၢ်ႇကရၢဖိတဖၣ်ကအိၣ်ဒီးကရၢအသးကအိၣ်ဆၢထၢၣ် လၢကရၢအကျဲသနူႇ ကဟံးန့ၢ်သကိးမူဒါလၢသနၢၣ်ဒၣ်၀ဲစုာ်စုာ်ႇရိၣ်ဖှိၣ်ကညီကလုာ်ဒီးထံဖိကီၢ်ဖိကမျၢၢ်ခဲလၢာ်လၢကအိၣ်ဒီးတၢ်မၤသကိးတုၤလၢကညီဒီကလုာ်စၢဖှိၣ်ကရၢအထံရူၢ်ကီၢ်သဲးတၢ်ကညိၣ်လၢၦဲၤထီၣ်တစုအဂ့ၢ်န့ၣ် ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါတၢ်ပၢၢ်ဆၢတၢ်ဂဲၤလိာ်(၇၇)နံၣ်အတီၢ်ပူၤအံၤကညီဒီကလုာ်စၢဖှိၣ်ကရၢဘၣ်ကွၢ်ဆၢၣ်မဲာ်၀ဲ တၢ်တၤတၢ်လၢတၢ်တီခိၣ်ရိၣ်မဲအပတီၢ်ႇကရၢအဒွဲပူၤတၢ်မၤသကိးတၢ်ဒီးလၢၦၤကလုာ်အသိးအကျါအိၣ်၀ဲဒၣ်အါမးဒီး ဒ်န့ၣ်အသိးခီဖျိတၢ်ပၢၢ်ဆၢတၢ်လဲၤကျဲတဒ်သိးလိာ်သးဘၣ်အဃိတၢ်လီၤမုၢ်လီၤဖးအိၣ်၀ဲဒၣ်စ့ၢ်ကီး၀ဲအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ တကးဒံးဘၣ်ကတီၢ်အံၤကညီဒီကလုာ်စၢဖှိၣ်ကရၢမၤလၢၦဲၤကညီကလုာ်အထံရူၢ်ကီၢ်သဲးႇတၢ်ကွၢ်စိတလၢၦဲၤ ဒံး၀ဲဘၣ် ဘၣ်ဆၣ်ခီဖျိကညီဒီကလုာ်စၢဖှိၣ်ကရၢခိၣ်နၢ်ႇသိၣ်ဒူဒီးကမျၢၢ်ထံဖိကီၢ်ဖိအတၢ်အိၣ်ဆၢထၢၣ်ဂၢၢ်ကျၢၤအဃိကရၢအံၤအိၣ်ဆၢထၢၣ်တီခိၣ်ရိၣ်မဲကညီတၢ်ပၢၢ်ဆၢအတၢ်ဂဲၤလိာ်န့ၢ်ဒံး၀ဲဂၢၢ်ဂၢၢ်ကျၢၤကျၢၤအဂ့ၢ်န့ၣ် ကရၢခိၣ် ပဒိၣ်စီၤကွဲၤထူစ့ စံး၀ဲန့ၣ် လီၤႉ ဒ်န့ၣ်အသိးကညီတၢ်ပၢၢ်ဆၢအတၢ်ဂဲၤလိာ်ဒီတကတီၢ်န့ၣ်ခိၣ်နၢ်ႇသိၣ်ဒူ ဒီးကမျၢၢ်ထံဖိကီၢ်ဖိဘၣ်လုၢ်ထီၣ်ကွံာ် အသးသမူအါမးဒီးလၢတၢ်န့ၣ်အဃိဖဲကညီဒီကလုာ်စၢဖှိၣ်ကရၢမုၢ်နံၤအံၤပသ့ၣ်နီၣ်မၤလၤကပီၤဒီး ဟ့ၣ်ထီၣ်တၢ်ယူးယီၣ် ဆူခိၣ်နၢ်သုးမုၢ်သံၣ်ဘိသိၣ်ဒူဒီးကမျၢၢ်ထံဖိကီၢ်ဖိလၢအလုၢ်ထီၣ် ကွံာ်အသးသမူႇ အသွံၣ်အထံႇအက့ၢ်အဂီၤသ့ၣ်တဖၣ်အံၤ အဂ့ၢ်န့ၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအံၤဘၣ်တၢ်ဒုးအိၣ်ထီၣ်အီၤဖဲ(၁၉၄၇)နံၣ် လါဖ့ၤဘြူၤအါရံၤ ၅ သီဒီး ဘၣ်တၢ်ကရၢကရိဒုးအိၣ်ထီၣ်အီၤလၢကရူၢ်လွံၢ်ဒူၣ်လၢအမ့ၢ်ကညီဒီကလုာ်ကရၢ(Karen National Association -KNA), ကညီဒီကလုာ်ဘူးဒးကရၢ(Buddhist Karen National Association-BKNA), ကညီလီၢ်ခၢၣ်သးကရၢ...
တၢ်ဆၢကတီၢ်ဘၣ်လံလၢပကဘၣ်ဒုးဖျိးထီၣ်ကွံာ်သုးမီၤစိရိၤလံအဂ့ၢ် KWO စံး၀ဲ
လါဖ့ၤဘြူၤအါရံၤ ၄ သီႇ ၂၀၂၄ နံၣ်ႇ ခ့ၣ်အဲးစံၣ် လၢတၢ်ပၢဆၢတၢ်လဲၤခီဖျိအဖီခိၣ်အံၤတၢ်ဆၢကတီၢ်ဘၣ်လံလၢပကဘၣ်ဒုးဖျိးထီၣ်ကွံာ်သုးမီၤစိရိၤလၢအဘၢအသီတဖုအံၤလံအဂ့ၢ်န့ၣ် ကညီပိာ်မုၣ်ကရၢ(KWO)ထုးထီၣ်ပာ်ဖျါစံး၀ဲလၢကညီဒီကလုာ်စၢဖှိၣ်ကရၢမုၢ်နံၤအလံာ် ဟ့ၣ်ယုၢ်ပူၤန့ၣ်လီၤႉ လၢကဟဲခဲမုၢ်ဆ့ၣ်လါဖ့ၤဘြူၤအါရံၤ ၅ သီအနံၤန့ၣ် လီၤဘၣ်၀ဲဒၣ်ကညီဒီကလုာ်စၢဖှိၣ်ကရၢမုၢ်နံၤဆၢက့ၤ ၦဲၤထီၣ်(၇၇)၀ီတ၀ီဒီးလၢမုၢ်နံၤ၀ဲအံၤအဖီခိၣ်ဆၢကတီၢ်ဘၣ်လံလၢပကဘၣ်ဒုးဖျိးထီၣ်ကွံာ် သုးမီၤစိရိၤလၢ အအၢအသီတဖုလၢအမၤနၢၤမၤနးမၤဖှီၣ်ၦၤကလုာ်ကမျၢၢ်ထံဖိကီၢ်ဖိသ့ၣ်တဖၣ်အံၤအဂ့ၢ်န့ၣ် (KWO)စံး၀ဲန့ၣ်လီၤႉ ဒ်(KWO)လံာ်တၢ်ပာ်ဖျါပူၤအသိးန့ၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ အတၢ်တီခိၣ်ရိၣ်မဲလၢ(၇၇)နံၣ် အတီၢ်ပူၤအံၤပထံၣ်ဘၣ်လၢခိၣ်နၢ်ဒီးၦၤဘၣ်မူဘၣ်ဒါတဖၣ်မ့ၢ်ဘၣ်ကွၢ်ဆၢၣ်မဲာ်၀ဲတၢ်ကီတၢ်ခဲႇတၢ်တၤတၢ်ဒီးအ၀ဲသ့ၣ်အိၣ်အကလုာ်ကလုာ်ဘၣ်ဆၣ်ကရၢအံၤအိၣ်ဆၢထၢၣ်ဂၢၢ်ကျၢၤလၢကညီဖိအဂီၢ်တုၤလၢမုၢ်မဆါတနံၤအဃိ မ့ၢ်တၢ်သးခုဒိၣ်မးအဂ့ၢ်န့ၣ် စံး၀ဲန့ၣ်လီၤႉ ဘၣ်ဃးလံာ်ဟ့ၣ်ယုၢ်လၢကညီဒီကလုာ်မုၢ်နံၤဆၢက့ၤအဖီခိၣ်အံၤ (KWO)ကရၢခိၣ်–၂ သရၣ်မုၣ် နီၢ်စ့ဟဲ စံး၀ဲလၢ“ ပတၢ်ပၢၢ်ဆၢတၢ်လဲၤကျဲအံၤန့ၣ်လဲၤအသးန့ၢ်ဖးယံၤလံႉအဃိန့ၣ်တနံၣ်အံၤ(၂၀၂၄)အတီၢ်ပူၤန့ၣ်ၦၤကညီဖိလၢအိၣ်ကီၢ်ပူၤကီၢ်ချၢထံဆၢကီၢ်ဆၢခဲလၢာ်ပကပာ်ဖှိၣ်လိာ်သးတၢ်ဆၢကတီၢ်ဘၣ်လၢပကဒုးဖျိးကွံာ်၀ဲဒၣ်သုးမီၤစိရိၤတဖုအံၤမီၤနီၤႉဒ်သိးပကသူၣ်ထီၣ်ကဒါက့ၤဖဲၣ်ဒရၢၣ်ကီၢ်စၢဖှိၣ်လၢပကန့ၢ်ဘၣ်၀ဲဒၣ်တၢ်အုၣ်ကီၤလၢအဂ့ၤကတၢၢ်မီၤနီၤႉအဃိန့ၣ်ကညီဖိခဲလၢာ်ပကဘၣ်ဆၢထၢၣ်ဖီၣ်လိာ်ပစုဒီးတကးဒံးဘၣ်န့ၣ်ပကလုၢ်သ့ၣ်တဖၣ်န့ၣ်ကဘၣ်သီၣ်၀ဲတခါဃီမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါ(၂၀၂၄)နံၣ်အံၤကမ့ၢ်၀ဲနံၣ်လၢအရ့ဒိၣ်လၢကညီဒီတကလုာ်အဂီၢ်လၢတၢ်ကမၤကတၢၢ်ကွံာ် သုးမိၤစိရိၤသနူဒီးသူၣ်ထီၣ်က့ၤဖဲၣ်ဒရၢၣ်ကီၢ်စၢဖှိၣ်သနူလၢအအိၣ်ဒီးတၢ်အုၣ်ကီၤလၢကလုာ်ဒူၣ်တၢ်စံၣ်ညီၣ်ပၢလီၤသးႇ တၢ်သဘျ့ႇတၢ်ထဲသိးတုၤသိးလၢၦၤကိးဂၤဒဲးအဂီၢ်ဒီးဒ်န့ၣ်အသိးပမ့ၢ်ဃူမ့ၢ်ၦိၤန့ၣ်ပကဒိးန့ၢ်ဘၣ်တၢ်မၤနၢၤလၢအဆိအချ့အဂ့ၢ်န့ၣ် (KWO)စံး၀ဲန့ၣ်လီၤႉ တကးဒံးဘၣ်အမဲာ်ညါကညီတၢ်ပၢၢ်ဆၢအတၢ်လဲၤကျဲတၢ်မၤနၢၤအဂီၢ်ကညီဖိခဲလၢာ်ကဘၣ်အိၣ်ဒီးတၢ်ကတဲၤကတီၤပာ်သးလၢကမၤနၢၤတၢ်အဂီၢ်ဒ်တၢ်သ့အိၣ်ဒီးၦၤအသိးဒီးတဂၤလၢပလီၢ်ပကျဲသနၢၣ်ဒၣ်၀ဲကပာ်ဖှိၣ်မၤသကိးတၢ်လၢတၢ်သးတဖျၢၣ်ဃီအပူၤဒီးမၤသကိးတၢ်ဃူဃူလၢတၢ်ကလုၢ်တဖျၢၣ်ဃီအဖီလာ်အဂ့ၢ်န့ၣ် လံာ်တၢ်ပာ်အပူၤစံး၀ဲန့ၣ် လီၤႉ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢအံၤဘၣ်တၢ်ကရၢကရိဒုးအိၣ်ထီၣ်အီၤဖဲ(၁၉၄၇)နံၣ် လါဖ့ၤဘြူၤအါရံၤ ၅ သီ အနံၤဒီး အတၢ်ပညိၣ်မ့ၢ်ဒ်သိးကအိၣ်ဆၢထၢၣ်ဂၢၢ်ကျၢၤဒီးကစံၣ်ညီၣ်ပၢလီၤနီၢ်ကစၢ်သးႇ ကတီခိၣ်ရိၣ်မဲဟူးဂဲၤ ဖံးမၤတၢ်လၢကမၤလၢထီၣ်ၦဲၤထီၣ်ကညီဒီကလုာ်အတၢ်မိၣ်န့ၢ်သးလီအံၤန့ၣ်လီၤႉ ဒ်န့ၣ်အသိးကရၢအံၤလၢကလုာ်ဒူၣ်ဖီၣ်စုက၀ဲၤခဲလၢာ်အကျါမ့ၢ်၀ဲဒၣ်ကရၢတဖုလၢအဂံၢ်ဆူၣ်၀ဲဒီးမ့ၢ်စ့ၢ်ကီးကရၢတဖုလၢအထံရူၢ်ကီၢ်သဲးတၢ်အိၣ်ဆၢထၢၣ်ဂၢၢ်ကျၢၤ၀ဲဒၣ်လၢကီၢ်ပယီၤထံရူၢ်ကီၢ်သဲးတၢ်ဂဲၤလိာ်အပူၤတကးဒံးဘၣ် မ့ၢ်စ့ၢ်ကီးထံရူၢ်ကီၢ်သဲးကရၢတဖုလၢအတၢ်လဲၤခီဖျိသးနံၣ်အါကတၢၢ်လၢကလုာ်ဒူၣ်ဖီၣ်စုက၀ဲၤအကျါအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ခီဖျိကျိဖးဒိၣ်အဃိတုၤလၢခဲအံၤတးပီသ၀ီဖိတဖၣ်တကူးဘၣ်နံၣ်သိႇပဲတဖၣ်ဒံးဘၣ်
လါဖ့ၤဘြူၤအါရံၤ ၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်, ကဘီယူၤစ့ၢ်ကီးဟဲခးလီၤတၢ်တလီၢ်လီၢ်အဃိ တကီၢ်ခါခဲအံၤတးပီသ၀ီလၢအစံၣ်ထီၣ်တဖၣ် တကူးဘၣ်အနံၣ်သိ,ပဲ သ့ၣ်တဖၣ်ဒံးဘၣ်အဂ့ၢ်န့ၣ် သ၀ီၦၤဘၣ်မူဘၣ်ဒါတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်အဃိ ဖဲအပူၤကွံာ်(၂၀၂၃)လါဒံၣ်စ့ဘၢၣ် ၁၃ သီအနံၤန့ၣ် တးပီသ၀ီဖိတဖၣ် ဘၣ်ဃ့ၢ်ထီၣ်၀ဲသ၀ီဒီတဖျၢၣ်ညါဒီးတုၤလၢခဲအံၤခီဖျိပယီၤသုးခးလီၤဒံးကျိဖးဒိၣ်၊ကဘီယူၤစ့ၢ်ကီး ဟဲခးလီၤတၢ်ကအိၣ် လၢကိးမုၢ်နံၤဒဲးဃၣ်ဃၣ်ညါအဃိသ၀ီဖိတဖၣ်တကူးဘၣ်နံၣ်သိ,ပဲသ့ၣ်တဖၣ်ဒံးဘၣ်အဂ့ၢ်န့ၣ် တးပီသ၀ီၦၤဘၣ်မူဘၣ်ဒါ တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“နက့ၤကူးဘူၣ်လၢၤ၀ဲလဲၣ်ကဘီယူၤဟဲခးလီၤတၢ်ဖဲတၢ်ပျီပူၤန့ၣ်ကတၢၢ်တၢၢ်လီၤႉတၢ်ဖိတၢ်လံၤစ့ၢ်ကီးဟးဂီၤဒီဒူၣ်ႉနက့ၤကူးဘူၣ်၀ဲလဲၣ်ႉလၢဘံလ့(အမတ)နါက့ခးလီၤႇလၢကမၤမိၢ်တကပၤနါက့ခးစိတၢ်ကိးမုၢ်နံၤလီၤႉ ဒီးလၢကဘီယူၤ ဟဲခးလီၤပၠးတၢ်ဘျီၦၤသ၀ီဖိနါက့ဘၣ်ဟးအိၣ်လၢတၢ်ကပိၤကပၤလဲလဲလီၤႉမၤ၀ဲတဘူၣ်နီလိၣ်ဘၣ်ႉပဲသ့ၣ်မတၤ၀ါတကဲတကီလၢၤႇနံၣ်သိသ့ၣ်မတၤ၀ါတကဲတကီလၢၤလဲၤထဲးခီဒၢးလဲၤထဲးတဘူၣ်ႉထဲအကစၢ်ဟးအိၣ်ဒီးအီၣ်န့ၣ်မးဘၣ်အီၣ်၀ဲၦၢ်တဃဲးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါခီဖျိပယီၤသုးခးလီၤကျိဖးဒိၣ်တလီၢ်လီၢ်အဃိၦၤသ၀ီဖိတဖၣ်အံၤက့ၤကူးပဲက့ၤမၤအီၣ်တၢ်တဘူၣ်နီတဂၤဘၣ်ဒီးတကးဒံးဘၣ်စှၤသီအတီၢ်ပူၤအံၤခီဖျိတၢ်စူၤအဃိပဲသ့ၣ်တဖၣ်ဘၣ်စီၣ်ဟးဂီၤ၀ဲဒၣ်အိၣ်အဂ့ၢ်န့ၣ် သ၀ီဖိလၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ၦၤကူးတဘူၣ်နီတဂၤဘၣ်ၦၤမၤတၢ်တဘူၣ်နီမံၤဘၣ်ႉနမၤပဲခံနာ်သၢနာ်နမ့ကူးန့ၣ်န့ၢ်စ့တဘျုးဘးညါႉ ကူးတချုးဘၣ်ႉၦၤက့ၤကူးတဘူၣ်နီဂၤဘၣ်ၦၤပျံၤတၢ်ၦၤစံၣ်ညါႉယဲဒၣ်န့ၣ်ယမၤအီၣ်တၢ်တကဲလၢၤဘၣ်ပစံၣ်ထီၣ်ဘျီ ပဖိတဖၣ်ဘၣ်စံၣ်ပိာ်ပခံခဲလၢာ်န့ၣ်ႉပဲနါက့မူခိၣ်စူၤဘၣ်စီၣ်ဘၣ်အၢဘၣ်သ့နသူတသ့လၢၤဘၣ်ႉယဖိခွါမၤအီၣ်ပဲလိ တနာ်ခံနာ်စ့ၢ်ႇအီၣ်ဘၣ်လၢၤသ့ဧါက့ၤမးတသ့လၢၤန့ၣ်”အဂ့ၢ်န့ၣ် စံး၀ဲန့ၣ်လီၤႉ တးပီသ၀ီဖိတဖၣ်အါဒၣ်တက့ၢ်န့ၣ်သူၣ်အီၣ်ဖျးအီၣ်ဖံးအီၣ်မၤအီၣ်၀ဲစံာ်ႇခုးႇပဲႇနံၣ်သိႇရီဘၢၣ်ဒီးသ၀ီအံၤ ဟံၣ်ခိၣ်အိၣ်၀ဲ(၃၄၀)ဖျၢၣ်ဒီးၦၤကညီနီၣ်ဂံၢ်န့ၣ်အိၣ်ခဲလၢာ်(၁၉၈၄)ဂၤန့ၣ် သ့ၣ်ညါဘၣ်န့ၣ်လီၤႉ တးပီသ၀ီဖိသ့ၣ်တဖၣ်အံၤခီဖျိအ၀ဲသ့ၣ်ဃ့ၢ်ထီၣ်ကအိၣ်လၢတလါဘျဲၣ်လံအဃိ တကီၢ်ခါခဲအံၤ အ၀ဲသ့ၣ်ထံၣ်ဘၣ်တၢ်ကီတၢ်ခဲလၢအီၣ်အီအိၣ်ဆိးတကပၤဒီး စးထီၣ်လၢအ၀ဲသ့ၣ်စံၣ်ထီၣ်တုၤလၢခဲအံၤန့ၣ် ၦၤလဲၤမၤစၢၤအ၀ဲသ့ၣ်ဟုသးအိၣ်ထဲတဘျီဧိၤဒံးလီၤအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါဖ့ၤဘြူၤအါရံၤ ၁ သီ ဟါခီအဆၢကတီၢ်စ့ၢ်ကီး သုးကီၣ်ကးအကဘီယူၤဟဲတ့ၢ်လီၤ တၢ်ဘိၣ်လၢတးပီပယီၤသုးကလၢၤပူၤဒီးဖဲအဟဲတ့ၢ်လီၤတၢ်ဘိၣ်အခါခးလီၤဃုာ်စ့ၢ်ကီး၀ဲကျိဖိအါအါဂီၢ်ဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ချၢၣ်လွံၢ်ထူၣ်ကီၢ်ရ့ၣ် မၤ၀ဲ(၂၄)၀ီတ၀ီခီကရဲးတၢ်အိၣ်ဖှိၣ်ဒီးဃုထၢထီၣ်ခိၣ်နၢ်လၢအသီ၀ံၤ၀ဲ
လါဖ့ၤဘြူၤအါရံၤ ၃ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့-၃) ၀ဲၤလီၢ်ခိၣ်သ့ၣ်တၢ်လီၢ်န့ၣ် ဖဲအပူၤကွံာ်လါယနူၤအါရံၤအခါ တၢ်မၤ၀ဲ(၂၄)၀ီတ၀ီခီကရဲးတၢ်အိၣ်ဖှိၣ်ဒီးခီကရဲးတၢ်အိၣ်ဖှိၣ်အပူၤ တၢ်ဃုထၢထီၣ်က့ၤ၀ဲခိၣ်နၢ်သီသ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ထုးထီၣ်ပာ်ဖျါ၀ဲဖဲလါဖ့ၤဘြူၤအါရံၤ(၁)သီ အနံၤန့ၣ်လီၤႉ ချၢၣ်လွံၢ်ထူၣ်ကီၢ်ရ့ၣ် (၂၄)၀ီတ၀ီခီကရဲးတၢ်အိၣ်ဘျီ၀ဲအံၤဘၣ်တၢ်စးထီၣ်မၤအီၤဖဲအပူၤကွံာ်(၂၀၂၄)နံၣ်လါယနူၤအါရံၤ ၉ သီ တုၤလၢ ၂၀ သီ လၢတဆံခံသီအတီၢ်ပူၤဒီး ဒ်န့ၣ်အသိးတၢ်အိၣ်ဖှိၣ်ဘျီ၀ဲအံၤအပူၤန့ၣ်တၢ်ဃုထၢထီၣ်၀ဲ ထီဘိကမံးတံာ်(၂၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးချၢၣ်လွံၢ်ထူၣ်ကီၢ်ရ့ၣ် မၤ၀ဲခီကရဲးတၢ်အိၣ်ဖှိၣ်ဒီးဃုထၢထီၣ်ခိၣ်နၢ်သီအံၤအဖီခိၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢစ့ စံး၀ဲလၢ“တၢ်ဆီတလဲလၢတၢ်ဃုထၢခီကရဲးဘျီ၀ဲအံၤန့ၣ်မီၤနီၤ လၢကီၢ်ရ့ၣ်ချၢၣ်လွံၢ်ထူၣ်ခိၣ်နၢ်ဒု ဆီတလဲအိၣ်၀ဲႉ ကီၢ်ရ့ၣ်ခိၣ်ဆီတလဲႇ ကီၢ်ရ့ၣ်ခိၣ်န့ၣ်ခဲအံၤတၢ်ဟ့ၣ်အီၤမူဒါလၢသုးခိၣ်ကျၢၢ်ဖိစီၤအဲၣ်ကလုာ်သ့န့ၣ် ကဲထီၣ်က့ၤ၀ဲကီၢ်ရ့ၣ်ခိၣ်အသိးလၢကီၢ်ရ့ၣ်နဲၣ်ရွဲၣ်စ့ၢ်ကီးန့ၣ်အိၣ်ဒီးတၢ်ဆီတလဲသ့ၣ်တဖၣ်လီၤႉ ဒီး၀ဲၤကျိၤ၀ဲၤဒ့သ့ၣ်တဖၣ်န့ၣ်အါတက့ၢ်ဒုအိၣ်၀ဲလီၢ်လီၢ်လီၤႉတၢ်ဆီတလဲဒုအိၣ်၀ဲတဒိၣ်တဆံးဖိမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါတကီၢ်ခါခဲအံၤကီၢ်ရ့ၣ်ကိးဘ့ၣ်ဒဲးဃၣ်ဃၣ်ဘၣ်ကွၢ်ဆၢၣ်မဲာ်၀ဲတၢ်ဒုးတၢ်ယၤအိၣ်၀ဲဒီးဒ်န့ၣ်အသိး ဖဲတၢ်ဒုးတၢ်ယၤဆူၣ်ထီၣ်အကတီၢ်အံၤလၢ(၂၄)၀ီတ၀ီခီကရဲးဘျီ၀ဲအံၤကကဲထီၣ်လိၣ်ထီၣ်အဂီၢ်န့ၣ် ချၢၣ်လွံၢ်ထူၣ်ကီၢ်ရ့ၣ်ဘၣ်ကွၢ်ဆၢမဲာ်၀ဲဒၣ်တၢ်ကီတၢ်ခဲအါမးအဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံးအါထီၣ်၀ဲန့ၣ်လီၤႉ လၢ(၂၄)၀ီတ၀ီခီကရဲးအပူၤန့ၣ် တၢ်ဃုထၢထီၣ်၀ဲထီဘိကမံးတံာ်(၂၁)ဂၤဒီးဖဲန့ၣ်အကျါ ကီၢ်ရ့ၣ်ခိၣ်န့ၣ်မ့ၢ်၀ဲ (ပဒိၣ်စီၤအဲၣ်ကလုာ်သ့)၊ကီၢ်ရ့ၣ်ခိၣ်ခံန့ၣ်မ့ၢ်၀ဲ(ပဒိၣ်စီၤလ့တယီ)ႇကီၢ်ရ့ၣ်နဲၣ်ရွဲၣ်(ပဒိၣ်စီၤလၢ်ဖိ)ႇ နဲၣ်ရွဲၣ်သဃဲၤ (ပဒိၣ်စီၤကနဲထူပၠဲၣ်)ဒီးကီၢ်ရ့ၣ်စံၣ်ညီၣ်ပီတ့န့ၣ်မ့ၢ်၀ဲ(ပဒိၣ်စီၤခါမဲ)သ့ၣ်တဖၣ်န့ၣ်လီၤႉ လၢန့ၣ်အမဲာ်ညါတၢ်အိၣ်ဖးဒိၣ်ဘျီ၀ဲအံၤအပူၤန့ၣ်ခိၣ်နၢ်ခၢၣ်စးတဖၣ်က့ၤသမံသမိးကဒါက့ၤ၀ဲပၢပြးဂ့ၢ်၀ီတၢ်ဖံးတၢ်မၤႇ သုးဂ့ၢ်၀ီႇရိၣ်ဖှိၣ်ဂ့ၢ်၀ီႇထံရူၢ်ကီၢ်သဲးဂ့ၢ်၀ီႇ ၦၤဂ့ၢ်၀ီတၢ်ဖံးတၢ်မၤတဖၣ်ဒီးလၢသဲစးတၢ်ဒိၣ်စိအဂီၢ်စံၣ်ညီၣ်ပီတ့တၢ်မၤလၢ တၢ်မၤတ့ၢ်အီၤလၢခီကရဲးလွံၢ်နံၣ်အတီၢ်ပူၤတဖၣ်ဒီးတကးဒံးဘၣ်တၢ်ပာ်လီၤတၢ်မၤခါဆူညါတၢ်ရဲၣ်တၢ်ကျဲၤလၢကပာ်ဖှိၣ်မၤသကိးတၢ်ဒီးထံဖိကီၢ်ဖိကမျၢၢ်ဒ်ခ့ၣ်အဲၣ်ယူၣ်ဂံၢ်ခီၣ်ထံးကျဲသနူအိၣ်၀ဲအသိးအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးလၢခီကရဲးတဘျီအံၤအပူၤန့ၣ်ခါဆူညါ(၄)နံၣ်လၢတၢ်ကတီခိၣ်ရိၣ်မဲတၢ်အဂီၢ်တၢ်ဃုထၢထီၣ်ဃုာ်စ့ၢ်ကီး ၀ဲထီဘိကမံးတံာ်ႇ ပၢဆှၢတၢ်ကမံးတံာ်ႇ ၀ဲၤကျိၤ၀ဲၤဒ့ခိၣ်နၢ်ဒီးကမံးတံာ်လၢတၢ်သူၣ်ထီၣ်ဆီလီၤလၢအဖိးသဲစးတဖၣ်အသိးတၢ်ပာ်လီၤတၢ်မၤခါဆူညါတၢ်ရဲၣ်တၢ်ကျဲၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢ(၂၄)၀ီတ၀ီချၢၣ်လွံၢ်ထူၣ်ကီၢ်ရ့ၣ်ခီကရဲးတၢ်အိၣ်ဖှိၣ်ဖးဒိၣ်တဘျီအံၤအပူၤန့ၣ်ခိၣ်နၢ်ခၢၣ်စးဟဲထီၣ်၀ဲ(၈၅)ဂၤႇ လီၢ်ခၢၣ်သးခိၣ်နၢ်၊သုးမုၢ်ဒိၣ်၀ဲၤလီၢ်ခိၣ်သ့ၣ်ခိၣ်နၢ်၊ၦၤမၤစၢၤတၢ်(၈)ဂၤႇကီၢ်ရ့ၣ်ခိၣ်နၢ်ဒ်အမ့ၢ်ဒူသထူၣ်ကီၢ်ရ့ၣ်ႇ...
(KNLA)သိၣ်မှံၤသုးပ၁်ဖှိၣ်လုၢ်ဘၢဒိၣ်စိ၀ဲ သ့ၣ်ကါညံၣ်နီၣ်–ယွၤသ့ၣ်ကျဲမုၢ်န့ၢ်လံ
လါဖ့ၤဘြူၤအါရံၤ ၃ သီႇ ၂၀၂၄ နံၣ်ႇ ခ့ၣ်အဲးစံၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သိၣ်မှံၤသုးပာ်ဖှိၣ်ကရူၢ် လုၢ်ဘၢဒိၣ်စိ၀ဲ ကညီကီၢ်စဲၣ် မၠၣ်၀တံၣ်၀့ၢ်ကပၤ သ့ၣ်ကါညံၣ်နီၣ်–ယွၤသ့ၣ်ကျဲမုၢ်လံအဂ့ၢ်န့ၣ် ပျီပူၤသုးဂ့ၢ်၀ီဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ် စံး၀ဲန့ၣ်လီၤႉ ဖဲမဟါလါဖ့ၤဘြူၤအါရံၤ ၂ သီ ဟါခီအဆၢကတီၢ်န့ၣ် လၢသ့ၣ်ကါညံၣ်နီၣ် ယွၤသ့ၣ်ကိ တၢ်ကူၣ်လဲၤမၤကၤလီၢ် ( ကုန်သွယ်ရေးဇုန်)ပယီၤသုးအိၣ်အလီၢ်သ့ၣ်တဖၣ်န့ၣ် တၢ်ဒုးကဲထီၣ်၀ဲဒီး(KNLA)သိၣ်မှံၤသုးပာ်ဖှိၣ်ကရူၢ်၀ံၤလီၢ်ခံ ဖဲတနံၤအံၤလါဖ့ၤဘြူၤအါရံၤ ၃ သီ ဂီၤခီအဆၢကတီၢ်န့ၣ် (KNLA)သိၣ်မှံၤ(PDF)သုးပာ်ဖှိၣ်လုၢ်ဘၢဒိၣ်စိ၀ဲ ယွၤသ့ၣ်–သ့ၣ်ကါညံၣ်နီၣ်အ့ရှါကျဲအံၤန့ၢ်၀ဲလံအဂ့ၢ်န့ၣ် ပျီပူၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံးဘၣ်ခ့ၣ်အဲးစံၣ်– ကညီတၢ်ကစီၣ် ဒ်အံၤန့ၣ်လီၤႉ “ခဲအံၤလၢသ့ၣ်ကါညံၣ်နီၣ်ဒုးယၤတကပၤဒီးယွၤသ့ၣ်တကပၤန့ၣ်ပလုၢ်ဘၢပၢဆှၢန့ၢ်လံႉဖဲမၠၣ်၀တံၣ်၊သ့ၣ်ကါညံၣ်နီၣ်အံၤသိလ့ၣ်ဟးထီၣ်က့ၤလီၤတန့ၢ်ဒံးဘၣ်ႉမ့မ့ၢ်တၢ်ကူၣ်လဲၤမၤကၤသိလ့ၣ်တဖၣ်န့ၣ်ခီန့ၣ်လဲၤတရံး၀ဲဒၣ်လၢ(၀့ၣ်ရှါ)သ၀ီတပၤန့ၣ်မီၤနီၤႉၦၤဘၣ်ယိၣ်လၢကျိဖးဒိၣ်ကလီၤတဲာ်ၦၤကခးအ၀ဲသ့ၣ်လၢအ့ရှါကျဲအဃိအ၀ဲသ့ၣ်လဲၤတရံးကျဲလၢန့ၣ်တကပၤလီၤႉမ့မ့ၢ်ၦၤသ၀ီဖိဒုလ့ၢ်ထီၣ်လ့ၢ်လိၤတအိၣ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ ဖဲတၢ်ဒုးကဲထီၣ်လၢခံခီခံကပၤအဘၢၣ်စၢၤအခါန့ၣ်ခီဖျိကျိဖးဒိၣ်လီၤတဲာ်ပိၢ်ဖးထီၣ်လၢယွၤသ့ၣ်သ၀ီပူၤဒီး သ့ၣ်ကါညံၣ် နီၣ်သ၀ီပူၤႇက၀ီၤဒ့တဖၣ်အပူၤအဃိၦၤကမျၢၢ်ဃုာ်ဒီးၦၤဖိဒံဖိသိၣ်သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ၦၤကမျၢၢ်လၢအိၣ် သ့ၣ်ကါညံၣ်နီၣ် သံၤတၤက၀ီၤဒ့ပူၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“(၃၅၅)ဒီး(၂၅၇)ပယီၤသုးတဖၣ်အံၤခးလီၤကျိဖးဒိၣ်လၢသ၀ီပူၤႇက၀ီၤဒ့တဖၣ်အပူၤမီၤနီၤႉ ၦၤကမျၢၢ်ဘၣ်ဒိအိၣ်ႉကျိဖးဒိၣ်လီၤတဲာ်ပိၢ်ဖးထီၣ်လၢသ့ၣ်ကါညံၣ်နီၣ်က၀ီၤဒ့ပူၤအဃိၦၤဖိသၣ်သံတဂၤႉ ကျိဖးဒိၣ်အက့အခီဘၣ်၀ဲဒၣ်ၦၤကမျၢၢ်(၅)ဂၤႉပယီၤသုးခးလီၤ၀ဲဒၣ်(၁၂၀ မမ)ဒီး(၆၀ မမ)တဖၣ်ႇ အတဘၣ်ၦၤ(PDF) ဘၣ် ဘၣ်၀ဲဒၣ်က၀ီၤဒ့ပူၤၦၤဟံၣ်ၦၤဃီႉ ဖဲတဂီၤညါအံၤတၢ်ဒုးဂၢၢ်ထီၣ်လံဘၣ်ဆၣ် ပဟးထီၣ်တၢ်ချၢတဘူၣ်ဒံးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ တကီၢ်ခါခဲအံၤခီဖျိ(KNLA)သိၣ်မှံၤသုးပာ်ဖှိၣ်(PDF)ပၢဆှၢလုၢ်ဘၢ၀ဲသ့ၣ်ကါညံၣ်နီၣ်–ယွၤသ့ၣ်ကိ အ့ရှါကျဲန့ၢ်လံ အဃိ သိၣ်လ့ၣ်တီၣ်ပနံာ်တၢ်ဖိတၢ်လံၤႇသိလ့ၣ်ဟံၣ်ႇသိလ့ၣ်တီၣ်ၦၤလဲၤတၢ်က့ၤတၢ်ဖိတဖၣ်အံၤ လၢမၠၣ်တ၀ံၣ် က၀ီၤဒ့(၆)ဒီး က၀ီၤဒ့(၇)ကျဲသီအံၤတဆီလဲၤတရံးက့ၤကျဲလၢ(၀့ၣ်ရှါ)သ၀ီတကပၤအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ