လံာ်ဟးထီၣ်တဘ့ၣ်လၢတၢ်ထူးသံကွံာ် KTLA သုးခိၣ်စီၤနၢၤမၠးလၢကၠီၣ်တဲၣ်ထံဖိကီၢ်ဖိစရီပူၤ
လါဖ့ၤဘြူၤအါရံၤ ၉ သီ ၂၀၂၄ နံၣ် ခ့ၣ်အဲးစံၣ် ဖဲလါယနူၤအါရံၤ(၃၀)သီအနံၤန့ၣ် လံာ်ဟးထီၣ်တဘ့ၣ်လၢတၢ်ထူးသံကွံာ်ကီၢ်သူလ့ၤသုးမုၢ်ဒိၣ်် ုဿူဗ အခိၣ် သုးခိၣ်ကျၢၢ်ဖိစီၤနၢၤဒါမၠး လၢကၠီၣ်တဲၣ်ထံဖိကီၢ်ဖိစရီပူၤအဂ့ၢ်န့ၣ် မဲၢ်ဆီးကီၢ်ဆၣ်ရူ ထုးထီၣ်ပာ်ဖျါ၀ဲန့ၣ်လီၤႉ တၢ်ထူးသံကွံာ်သုးခိၣ်ကျၢၢ်ဖိ စီၤနၢၤဒါမၠးအမံၤအံၤပၣ်ဃုာ်စ့ၢ်ကီး၀ဲအဟံၣ်ဖိဃီဖိဃီဖိလၢအမ့ၢ်အမိဒီးအဒ့မုၣ် အဂ့ၢ်န့ၣ် မဲၢ်ဆီးကီၢ်ဆၣ်ရူ ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဒ်မဲၢ်ဆီးကီၢ်ဆၣ်ရူထုးထီၣ်ပာ်ဖျါ၀ဲလံာ်ပူၤအသိးန့ၣ်ၦၤသ့ၣ်တဖၣ်အံၤကၠီၣ်တဲၣ်ခိၣ်ဂီၤလၢအစိာ်၀ဲခဲအံၤသ့ၣ်တဖၣ်န့ၣ် ၦၤစိာ်တၢ်ဖိအကစၢ်အိၣ်၀ဲခံဂၤတကးဒံးဘၣ်အမဲာ်ညါတၢ်ဃုထံၣ်သ့ၣ်ညါ၀ဲလၢ Mr.SomsakKhambia ဒီး အဒ့မုၣ် Mrs.KhamsaiKhambia အမိ Mrs.YeayKhambia သ့ၣ်တဖၣ်အံၤ သူ၀ဲၦၤတၢ်ဂီၤနီၢ်ဂံၢ်လၢတဖိးသဲးစးဘၣ်အဃိ ဘၣ်တၢ်ထူးသံကွံာ်အီၤလၢထံဖိကီၢ်ဖိစရီပူၤလီၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါၦၤမံၤၦၤသၣ်လၢတၢ်ထူးသံကွံာ်အီၤလၢစရီပူၤသ့ၣ်တဖၣ်အံၤတၢ်ဂ့ၢ်တၢ်ကျိၤတၢ်အုၣ်သးမ့အိၣ်လီၤတံၢ်လီၤဆဲးန့ၣ် လၢ(၁၅)သီအတီၢ်ပူၤဟဲဘှါဆှဲ၀ဲလၢရူသ့အဂ့ၢ်န့ၣ် မဲၢ်ဆီးကီၢ်ဆၣ်ရူလံာ်တၢ်ပာ်ဖျါအပူၤစံး၀ဲန့ၣ်လီၤႉ ဘၣ်ဃးလံာ်ဟးထီၣ်တဘ့ၣ်အံၤအဖီခိၣ်န့ၣ်ပခ့ၣ်အဲၣ်စံၣ်-ကညီတၢ်ကစီၣ် ဆဲးကျိးသံကွၢ်၀ဲသုးခိၣ်စီၤနၢၤဒါမၠးဘၣ်ဆၣ် က့ၤစံးဆၢကဒါက့ၤ၀ဲလၢတၢ်ဂ့ၢ်တၢ်ကျိၤတဖၣ်အံၤတအဲၣ်ဒိးတဲဒံးဘၣ် အဂ့ၢ်န့ၣ်် စံး၀ဲန့ၣ်လီၤႉ သုးခိၣ်ကျၢၢ်ဖိ စီၤနၢၤဒါမၠးအံၤ ဖဲအပူၤကွံာ်(၂၀၂၁)အခါန့ၣ် ဘၣ်တၢ်ထုးထီၣ်ကွံာ်အီၤလၢ (ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ)အပူၤဒီးဖဲန့ၣ်၀ံၤလီၢ်ခံဖဲ(၂၀၂၂) လါယူၤလံအခါန့ၣ်အ၀ဲတီခိၣ်ရိၣ်မဲဒုးအိၣ်ထီၣ်၀ဲ ကီၢ်သူလ့ၤသုးမုၢ်ဒိၣ်(KTLA)အံၤန့ၣ်လီၤႉ
စယၣ်ကၠံတၢ်ဒုးအဃိကမျၢၢ်လၢအလဲၤစံၣ်အိၣ်ပကိတၢ်ဘါယွၤသရိာ်ဘျီၣ်ပူၤတဖၣ်လိၣ်ဘၣ်တၢ်အီၣ်တၢ်အီ
လါဖ့ၤဘြူၤအါရံၤ ၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် တီအူကီၢ်ရ့ၣ် ထီတထူၣ်ကီၢ်ဆၣ် (စယၣ်ကၠံ)သ၀ီအပူၤ ဖဲလါဖ့ၤဘြူၤအါရံၤ(၇)သီအနံၤန့ၣ် ခီဖိတျၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်သ့ၣ်တဖၣ်ဒီးသုးကီၣ်ကးအဘၢၣ်စၢၤအဃိကမျၢၢ်လၢအလဲၤစံၣ်အိၣ်လၢပကိတၢ်ဘါယွၤသရိာ်ဘျီၣ်ပူၤတဖၣ်လိၣ်ဘၣ်၀ဲဒၣ်တၢ်အီၣ်တၢ်အီယၣ်လုးႇ တၢ်ကူတၢ်ကၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ခီဖျိတၢ်ဒုးတၢ်ယၤကဲထီၣ်၀ဲဒၣ်ဒိၣ်ဒိၣ်မုၢ်မုၢ်လၢစယၣ်ကၠံ၀့ၢ်ပူၤအဃိလီၢ်က၀ီၤကမျၢၢ်တဖၣ်ဃ့ၢ်ထီၣ်၀ဲခဲလၢာ်ဒီးတနီၤန့ၣ်လဲၤစံၣ်ထီၣ်၀ဲလၢတီအူ၀့ၢ်တကပၤအိၣ်၀ဲအသိးတနီၤန့ၣ်လဲၤစံၣ်အိၣ်၀ဲလၢ(ပကိ)တၢ်ဘါယွၤသရိာ်ဘျီၣ်ပူၤစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ၦၤကမျၢၢ်လၢအလဲၤဃ့ၢ်အိၣ်ကဒုသးလၢ(ပကိ)တၢ်ဘါယွၤသရိာ်ဘျီၣ်ပူၤတဖၣ်အံၤအနီၣ်ဂံၢ်ကအိၣ်ထီၣ်ဘးလၢ(၉၀၀)ဘျဲၣ်လံဒီးတကီၢ်ခါခဲအံၤလၢအ၀ဲသ့ၣ်အဂီၢ်လိၣ်ဘၣ်၀ဲဒၣ်တၢ်အီၣ်တၢ်အီႇ တၢ်ကူတၢ်ကၤႇ ယၣ်လုးသ့ၣ်တဖၣ်အဂ့ၢ်န့ၣ် သရၣ်မၠးထူလၢအကွၢ်ထွဲမၤစၢၤၦၤဃ့ၢ်မှံဟးဖျိးအံၤ စံးဘၣ်ခ့ၣ်အဲးစံၣ်-ကညီိတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ “မ့မ့ၢ်လၢမဟါကၢၤယလဲၤကွၢ်နီၣ်ဂံၢ်(၅)တၢ်ဘါယွၤလၢပကိန့ၣ်အိၣ်၀ဲ(၉၀၀)ဘျဲၣ်လံမီၤနီၤႉ အ၀ဲန့ၣ် မ့ၢ်ထဲပၦၤကညီဖိဒံးလီၤမီၤႇ မ့မ့ၢ်ပယီၤဒီးတီသူန့ၣ်ကအိၣ်လၢကၠိတၢ်လီၢ်အဂၤတနီၤဒီးလၢတၢ်လီၢ်အဂၤစ့ၢ်ကီးလီၤႉ မ့မ့ၢ်လၢပကိခီန့ၣ်ဒုအိၣ်ဘၣ်ယၤလၢ(၉၀၀)ဘျဲၣ်လံမီၤနီၤႉ လၢတၢ်လိၣ်ဘၣ်အဖီခိၣ်န့ၣ်အ၀ဲသ့ၣ်န့ၣ်တနီၤနီၤန့ၣ် ဃ့ၢ်ထီၣ်အနီၢ်ကစၢ်အလိၤဆ့ကၤလီၤႉ အဃိသးန့ၣ်ယၣ်လုၣ်ယၣ်မံႇ ပ့ၢ်ပီၤဖိဒီးတၢ်ကူတၢ်ကၤသ့ၣ်တဖၣ်လိၣ်ဘၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လီၢ်က၀ီၤၦၤကမျၢၢ်လၢအလဲၤဃ့ၢ်အိၣ်ကဒုသးဖဲပကိတၢ်ဘါယွၤသရိာ်ဘျီၣ်ပူၤအဂၤ(၉၀၀)ဘျဲၣ်အံၤန့ၣ် အါဒၣ်တက့ၢ်မ့ၢ်၀ဲဒၣ်(ပၤလၤကိ)(သၤယၤကိ)(အ့ပၠီ)ဒီး(စယၣ်ကၠံ)ၦၤသ၀ီဖိသ့ၣ်တဖၣ်လီၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါခီဖျိလၢတၢ်ဒုးကဲထီၣ်တကးဒံးဘၣ်ပယီၤသုးခးလီၤကျိာ်ဖးဒိၣ်ႇ ကဘီယူၤစ့ၢ်ကီးဟဲခးလီၤတၢ် အဃိစယၣ်ကၠံ၀့ၢ်ပူၤကမျၢၢ်ဃုာ်ဒီးဒူသ၀ီလၢအိၣ်ဘူးဖဲန့ၣ်သ၀ီတစှၤန့ၣ်အဖျၢၣ်တဆံဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သရၣ်မၠးထူစံးအါထီၣ်၀ဲန့ၣ်လီၤႉ အ၀ဲစံး၀ဲလၢ“လၢတၢ်ခးလိာ်သးအကတီၢ်န့ၣ်ကျိဖးဒိၣ်ဟဲလီၤတဲာ်၀ဲမီၤနီၤႇ ကျိဖးဒိၣ်လီၤတဲာ်၀ံၤမးကဘီယူၤဟဲနုာ်လီၤ၀ဲလၢမုၢ်၀ါဖဲန့ၣ်မီၤနီၤ တၢ်လီၢ်အကပိၤကပၤဖဲန့ၣ်ၦၤဃ့ၢ်ထီၣ်ခဲလၢာ်လံႉ ကအိၣ်၀ဲဒူသ၀ီအဖျၢၣ်တဆံဘျဲၣ်ႉ ခီဖျိလၢတၢ်ဒုးကဲထီၣ်ဒ်အံၤအဖီခိၣ်ထံဖိကီၢ်ဖိတဖၣ်ခဲအံၤန့ၣ်ဘၣ်နးဘၣ်ဖှီၣ်ဒိၣ်မးလီၤႉ လၢတၢ်ဖံးအီၣ်မၤအီၣ်အဖီခိၣ်နါက့န့ၣ် တနီၤန့ၣ်မ့ၣ်အူအီၣ်ကွံာ်အ၀ဲသ့ၣ်တၢ်မုၢ်တၢ်ဘိသ့ၣ်တဖၣ်အိၣ်မီၤနီၤႉ ခီဖျိလၢဘၣ်ဃ့ၢ်ထီၣ်ဃ့ၢ်လီၤတၢ်လီၢ်ႇ တၢ်ကျဲတအိၣ်အဃိသ၀ီဖိတနီန့ၣ်လၢတၢ်မဲာ်ထံမဲာ်နိႇ သူၣ်ဟးဂီၤသးဟးဂီၤအိၣ်၀ဲန့ၣ်လီၤ” အဂ့ၢ်စံး၀ဲဒၣ်န့ၣ်လီၤႉ တကီၢ်ခါခဲအံၤၦၤကမျၢၢ်လၢအလဲၤစံၣ်အိၣ်ဖဲပကိတၢ်ဘါယွၤသရိာ်ဘျီပူၤသ့ၣ်တဖၣ်အံၤတၢ်ကရၢကရိလဲၤမၤစၢၤ အ၀ဲသ့ၣ်တအိၣ်နီမံၤဒံးဘၣ်ဒီးဘၣ်ဆၣ်တၢ်ဘူၣ်တၢ်ဘါကရူၢ်ကရၢလၢအိၣ်ဖဲန့ၣ်တဖၣ် အသ့ဖဲအသ့အ၀ဲသ့ၣ်ပာ်ဖှိၣ်ထီၣ်သးဆီၣ်ထွဲမၤစၢၤဆိဃာ်၀ဲတၢ်အီၣ်တၢ်အီႇ တၢ်ကူတၢ်ကၤအိၣ်၀ဲအဂ့ၢ်န့ၣ်သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးဖိအအိၣ်န့ၣ်လီၤႉ
သုးကီၣ်ကးခးလီၤကျိဖးဒိၣ်အဃိ၀ီၢ်ရ့ၣ်ကီၢ်ဆၣ်ပူၤကမျၢၢ်ဘၣ်ဒိ(၇)ဂၤအကျါပာ်ဃုာ်ဖိသၣ်(၂)ဂၤ
လါဖ့ၤဘြူၤအါရံၤ ၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ၀ီရ့ၣ်ကီၢ်ဆၣ်အပူၤ ဖဲလါဖ့ၤဘြူၤအါရံၤ(၇)သီအနံၤန့ၣ် ခီဖျိမျိုာ်သုးရ့ၣ်(အမတ-၃၁၆)အံၤ ခးလီၤကျိဖးဒိၣ်ဆူ(ကျုံလောင်)သ၀ီပူၤအဃိ ၦၤကမျၢၢ်ဘၣ်ဒိ(၇)ဂၤအကျါပၣ်ဃုာ်၀ဲဖိသၣ်(၂)ဂၤ အဂ့ၢ်န့ၣ် ယ့တၢ်ဒုးစဲးပြဲးသုးကရူၢ်(YGF) စံး၀ဲန့ၣ်လီၤႉ ခီဖျိလၢသုးကီၣ်ကးခးတပျုၤတပျီာ်ကျိဖးဒိၣ်အဃိဘၣ်ဒိၣ်၀ဲကမျၢၢ်(၇)ဂၤအကျါပာ်ဃုာ်၀ဲကျါဖိသၣ်(၁၀)နံၣ် ၂ ဂၤဒီးလၢန့ၣ်အမဲာ်ညါၦၤဟံၣ်ၦၤဃီဟးဂူာ်ဟးဂီၤစ့ၢ်ကီးအိၣ်၀ဲအဂ့ၢ်န့ၣ် ယ့တၢ်ဒုးစဲးပြဲးသုးကရူၢ်(YGF) ၦၤဘၣ်မူဘၣ်ဒါတဂၤစံး၀ဲဒ်အံၤန့ၣ်လီၤႉ “သုးကီၣ်ကးမျိာ်သုးရ့ၣ်(၃၁၆)အံၤခးလီၤ၀ဲကျိဖးဒိၣ်ဆူသ၀ီပူၤႉၦၤကမျၢၢ်ဘၣ်ဒိခဲလၢာ်အိၣ်၀ဲ(၇)ဂၤမီၤနီၤႉ ဖိသၣ်န့ၣ် ပၣ်၀ဲ(၂)ဂၤလီၤႉ မ့မ့ၢ်အ၀ဲ(၂)ဂၤန့ၣ်ဘၣ်ဒိဖးနးညါႉ ၦၤသံဒုတအိၣ်ဘၣ်မ့မ့ၢ်လၢသ၀ီပူၤအံၤခီန့ၣ်ဟံၣ်ဟးဂီၤအိၣ်၀ဲလီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ မ့ၢ်လၢသုးကီၣ်ကးမျိာ်သုးရ့ၣ်ခးလီၤကျိဖးဒိၣ်လၢသ၀ီပူၤအဃိလီၢ်က၀ီၤၦၤကမျၢၢ်လၢအိၣ်ဒူသ၀ီအပူၤသ့ၣ်တဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ကၠိၤလီသ၀ီဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ အ၀ဲစံး၀ဲလၢ “တနၢ်ဟူတၢ်ဒုးကဲထီၣ်ဘၣ်နါက့အ၀ဲသ့ၣ်သုးကလၢၤလူၢ်န့ၣ်ခးလီၤ၀ဲကျိဖးဒိၣ်ကိးနံၤဒဲးလီၤႉ ခီဖျိၦၤဖိသၣ်ဘၣ်ဒိဘၣ်ထံးအဃိၦၤသ၀ီဖိတဖၣ်န့ၣ်ပျံၤ၀ဲလၢကဘၣ်ကဒီးအဃိအ၀ဲသ့ၣ်လဲၤစံၣ်ထီၣ်အိၣ်လၢသ၀ီချၢႉ တနံၤညါအံၤၦၤလၢအက့ၤညါက့ၤလီၤႉၦၤလၢအက့ၤတဘူၣ်ဒံးဘၣ်နါက့အိၣ်ဒံးႉခဲအံၤတၢ်သီၣ်တၢ်သဲဂၢၢ်ထီၣ်တစဲး” အဂ့ၢ်န့ၣ် စံး၀ဲန့ၣ်လီၤႉ ပယီၤသုးကလၢၤခးလီၤကျိဖးဒိၣ်ဆူသ၀ီပူၤအံၤတမ့ၢ်ထဲလၢ၀ီၢ်ရ့ၣ်ကီၢ်ဆၣ်အပူၤဘၣ်ဒီးမ့မ့ၢ်တခီလၢကညီကီၢ်စဲၣ် ခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤစ့ၢ်ကီးပယီၤသုးအံၤခးလီၤ၀ဲဒၣ်ကျိဖးဒိၣ်ႇ ကဘီယူၤစ့ၢ်ကီးဟဲခးလီၤတၢ်အဃိ ၦၤကမျၢၢ်သံဘၣ်ဒိဘၣ်ထံးကဲထီၣ်၀ဲဒၣ်ကိးလါဒဲးဃၣ်ဃၣ်န့ၣ်လီၤႉ
ကၠဲးဒိ၀့ၢ်ပူၤတၢ်ဒုးဆဲးကဲထီၣ်အဃိကမျၢၢ်လၢအဃ့ၢ်ထီၣ်တဖၣ်က့ၤလၢဟံၣ်တဘူၣ်ဒံးဘၣ်
လါဖ့ၤဘြူၤအါရံၤ ၉ သီႇ ၂၀၂၄ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် ကၠဲးဒိ၀့ၢ်ပူၤ တကီၢ်ခါခဲအံၤ ခီဖျိတၢ်ဒုးဆဲးကဲထီၣ်အဃိလီၢ်က၀ီၤကမျၢၢ်လၢအဃ့ၢ်ထီၣ်တဖၣ်အံၤက့ၤလၢဟံၣ်တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ စးထီၣ်ဖဲအပူၤကွံာ် လါယနူၤအါရံၤ ၂၇ သီအနံၤန့ၣ် လၢကၠဲးဒိ၀့ၢ်ပူၤတၢ်ဒုးစးထီၣ်ကဲထီၣ်၀ဲလၢ(KNLA)တၢ်ပၢၢ်ဆၢ သုးပာ်ဖှိၣ်ဒီးပယီၤသုးအဘၢၣ်စၢၤဒီးခီဖျိပယီၤသုးအံၤက့ၤခးလီၤကဒါကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒၣ်ဒီးတုၤလၢခဲအံၤက့ၤလၢဟံၣ်တဘူၣ်ဒံးဘၣ်အဂ့ၢ်န့ၣ် ကမျၢၢ်လၢအဃ့ၢ်ထီၣ်တဖၣ် စံး၀ဲန့ၣ်လီၤႉ ပူယ့သ၀ီဖိလၢအဃ့ၢ်ထီၣ်တဂၤစံး၀ဲလၢ“စးထီၣ်လၢတၢ်ကဲထီၣ်န့ၣ်မုၢ်ဟါခါန့ၣ်ပဘၣ်စံၣ်မံမၢ်မၢ်လီၤႉဖဲကျိဖးဒိၣ်လီၤတဲာ်ဖဲပသ၀ီပူၤအခါန့ၣ်ဖဲယဟံၣ်လီၢ်ခံန့ၣ်ဘၣ်ဒံးၦၤကမျၢၢ်တဂၤဒံးႉပယီၤသုးခးလီၤကျိဖးဒိၣ်လီၤတဲာ်လၢပသ၀ီပူၤ အံၤအိၣ် တဘျီခံဘျီလံအ၀ဲတဘျီန့ၣ်ဘၣ်၀ဲဒၣ်ၦၤဟံၣ်ၦၤဟံၣ်ဟးဂီၤအိၣ်ခံဖျၢၣ်သၢဖျၢၣ်ညါ၊တၢ်မၢၤအကစၢ်န့ၣ်တဘၣ်ဘၣ်ႉဖဲပစးထီၣ်စံၣ်အံၤပယီၤသုးခးလီၤကျိဖးဒိၣ်ဘၣ်ၦၤဟံၣ်ၦၤဟံၣ်ခိၣ်ဖျိအိၣ်စ့ၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် န့ၣ်လီၤႉ တကးဒံးဘၣ်လၢန့ၣ်အမဲာ်ညါခီဖျိဒုးယၤတၢ်ဖ့ၣ်ဆၢကဲထီၣ်အဃိကၠဲးဒိကမျၢၢ်ဃုာ်ဒီးဒူသ၀ီလၢအိၣ်တၢ်ခိၣ်တၢ်ဃၢၤ ဖဲန့ၣ်တဖၣ်ဒ်အမ့ၢ်မဲာ်တီႇမံၣ်နါအၣ်ႇပူယ့သ၀ီ ကမျၢၢ်တဖၣ်စ့ၢ်ကီးဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးတၢ်ဒုးကဲထီၣ်ဘျီ၀ဲအံၤလီၢ်က၀ီၤကမျၢၢ်ဃ့ၢ်ထီၣ်အကျါန့ၣ်ပၣ်ဃုာ်စ့ၢ်ကီး၀ဲသုးကီၣ်ကးအပၢပြးသးၦၢ်ႇ စည်ပင်ႇလီမ့ၣ်အူႇတၢ်ဆဲးကျိးႇတၢ်မၤပံာ်မ့ၣ်အူကရူၢ်ဒီးကူၣ်သ့ၦၤမၤတၢ်ဖိသ့ၣ်တဖၣ်အဂ့ၢ်န့ၣ် ကၠဲးဒိလီၢ်က၀ီၤ ၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ််လါဖ့ၤဘြူၤအါရံၤထီၣ် ၁ သီအနံၤန့ၣ် ခီဖျိပယီၤသုးကဘီယူၤဟဲခးလီၤတၢ်လၢ မဲာ်တီသ၀ီပူၤအဃိ ကၠိတၢ်သူၣ်ထီၣ်ဟးဂီၤ၀ဲဒၣ်(၂)ဖျၢၣ်ဒီးကမျၢၢ်အဟံၣ်အဃီဘၣ်ဒိဘၣ်ထံးဟးဂီၤ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါတၢ်ကစီၣ်အသိးသ့ၣ်ညါဘၣ်န့ၣ်လီၤႉ
(စယၣ်ကၠံ)၀့ၢ်ပူၤတၢ်ဒုးကဲထီၣ်ကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်
လါဖ့ၤဘြူၤအါရံၤ ၈ သီႇ ၂၀၂၄ နံၣ်ႇ ခ့ၣ်အဲးစံၣ် လၢကညီကီၢ်စဲၣ် တီအူကီၢ်ရ့ၣ် ထီတထူၣ်ကီၢ်ဆၣ်(စယၣ်ကၠံ)၀့ၢ်ပူၤ ဖဲမဟါလါယနူၤအါရံၤ(၇)သီဂီၤခီအဆၢကတီၢ် န့ၣ်တၢ်ဒုးကဲထီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤဒီး ဖဲန့ၣ်ခီဖျိပယီၤသုးကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါယနူၤအါရံၤ ၇ သီ ဂီၤခီအဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်နုာ်လီၤထီၣ်မၤန့ၢ်၀ဲ ပယီၤသုး သုးကလၢၤႇ ပၢၤကီၢ်၀ဲၤလီၢ်ဃုာ်ဒီးခီၣ်သုးရ့ၣ်(ခလရ-၇၃)သုးရ့ၣ်သ့ၣ်တဖၣ်အံၤဒီးဖဲန့ၣ်တၢ်ဒုးကဲထီၣ်၀ဲဒၣ်ဒိၣ်ဒိၣ်မုၢ်မုၢ်လၢခံခီခံကပၤအဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်ႇ ကဘီယူၤစ့ၢ်ကီးဟဲခးလီၤတၢ်အဃိ လီၢ်က၀ီၤၦၤကမျၢၢ် ဘၣ်ဃ့ၢ်ထီၣ်၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ လီၢ်က၀ီၤကမျၢၢ်ပိာ်မုၣ်လၢအဃ့ၢ်ထီၣ်တဂၤစံး၀ဲလၢ “ပကဘၣ်ဟးပူၤဖျဲးအသးဒ်လဲၣ်ႇ ပကဘၣ်အိၣ်ဘၣ်ကၠါလဲၣ်ႇ ပကဘၣ်အိၣ်၀ဲဒၣ်ဒ်လဲၣ်ဒီးပကဘၣ်အိၣ်ဒံးတသီဧါတနွံဧါန့ၣ်ပတဲတဘၣ်လၢၤဘၣ်ႉ ဘၣ်ဆၣ်မ့ၢ်လၢပအိၣ်တသ့ပအိၣ်တဘၣ်အဃိပဟဲအိၣ်လၢၦၤကရၢၢ်ပူၤၦၤဟံၣ်ပူၤမီၤနီၤႉ ပဃ့ၢ်တနံၤညါအံၤလီၤမီၤနီၤႉၦၤဟးထီၣ်ကိးဂၤဒဲးလီၤႉ ၦၤတအိၣ်လၢသ၀ီအပူၤဟံၣ်ပူၤဃီပူၤနီတဂၤလၢၤဘၣ်ႉ ပတၢ်တပၣ်နီမံၤဘၣ်တၢ်ကူတၢ်ကၤခီဒၢးတၢ်မနုၤမးတပၣ်ဘၣ်ႉ နီၢ်ကစၢ်မ့ၢ်ပူၤန့ၣ်ဘၣ်လံမီၤႉ တၢ်ဖိတၢ်လံၤတၢ်အီၣ်တၢ်အီတသ့ၣ်နီၣ်လၢၤဘၣ်ပစံၣ်ထီၣ်ဒ်န့ၣ်လီၤမီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကးဒံးဘၣ်ဒူသ၀ီလၢအိၣ်(စယၣ်ကၠံ)၀့ၢ်ခိၣ်၀့ၢ်ဃၢၤတဖၣ်ဒ်အမ့ၢ်(အ့ၤကၠ့သါ)(ဆွ့ၤတစီ)(အ့နွ့ၤကိ)ဒီး(အ့ၤကၠီ) သ၀ီၦၤကမျၢၢ်သ့ၣ်တဖၣ်စ့ၢ်ကီးဃ့ၢ်ထီၣ်၀ဲဒီးလဲၤစံၣ်ထီၣ်၀ဲလၢတီအူတကပၤအိၣ်၀ဲအသိး တနီၤန့ၣ်လဲၤဃ့ၢ်အိၣ်လၢ ဒူသ၀ီတၢ်လီၢ်လၢအဂၤစ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢအဃ့ၢ်ထီၣ်တဖၣ်စံး၀ဲန့ၣ်လီၤႉ (အ့ၤကၠီ)သ၀ီဖိလၢအဘၣ်ဃ့ၢ်ထီၣ်တဂၤစ့ၢ်ကီးစံး၀ဲလၢ “ပအိၣ်လၢ(အ့ၤကၠီ)ပဟဲစံၣ်အိၣ်လၢ(ပၠံၤကါ)ဖဲအံၤမီၤနီၤ ၦၤ ဃ့ၢ်ထီၣ်လၢလံ ၦၤလၢအဂၤန့ၣ်လဲၤဃ့ၢ်အိၣ်လၢတၢ်လီၢ်အဂၤအိၣ်၀ဲလီၤႉ လၢသ၀ီပူၤန့ၣ်ၦၤတအိၣ်နီၤတဂၤလၢဘၣ် ဒီးၦၤတဲလၢပယီၤသုးဟဲနုာ်လီၤလံမီၤနီၤ ၦၤဟဲခးတၢ်အဃိပဃ့ၢ်ထီၣ်၀ဲမီၤနီၤလီၤႉ လၢမဟါအနံၤန့ၣ်ပဃ့ၢ်ဒီနံၤဒီနၤလီၤ ပဟဲဃ့ၢ်တုၤဖဲအံၤန့ၣ်န့ၢ်မဟါအနံၤသၢနၣ်ရံၣ်ဖဲန့ၣ်မီၤနီၤႉ ပအိၣ်ဖဲအံၤန့ၣ်ဟံၣ်ဒူၣ်ခဲလၢာ်အိၣ်၀ဲလွံၢ်ဒူၣ်မီၤနီၤႉ ပအိၣ်ဖဲအံၤန့ၣ်တစ့ၣ်ခၠၣ်အါအါဘၣ်ႉ ဖဲပဃ့ၢ်န့ၣ်ပဃ့ၢ်ပိာ်ၦၤခံဒ်န့ၣ်လီၤႇ လဲၤထီၣ်တုၤလၢတီအူန့ၣ်သ့ၣ်ညါၦၤဒီးတအိၣ်ႇ ၦၤဟးဒီးဟးပိာ်ၦၤခံဒ်န့ၣ်လီၤမီၤနီၤႉ တၢ်မနုၤမးတပၣ်ဘၣ်ႇ ဟးစံၣ်ၦၤကညီဒ်အံၤန့ၣ်လီၤ”...
ခီဖျိဒုးယၤတၢ်သဘံၣ်သဘုၣ်အဃိကမျၢၢ်လၢအဃ့ၢ်ထီၣ်တဖၣ်ဘၣ်ကိၢ်ဘၣ်ဂီၤတၢ်လၢအဒံၣ်အဖိတၢ်ကူၣ်ဘၣ် ကူၣ်သ့ဆူညါအဂီၢ်
လါဖ့ၤဘြူၤအါရံၤ ၉ သီ ၂၀၂၄ နံၣ် ခ့ၣ်အဲးစ့ၣ် ကီၢ်ပယီၤအံၤခီဖျိထံလီၢ်ကီၢ်ပူၤတၢ်ဒုးတၢ်ယၤအဃိ ၦၤဃ့ၢ်တၢ်ဒုးလီၢ်အိၣ်ကမှံဖိတဖၣ်ကက့ၤအိၣ်ဆိးဘၣ်က့ၤဆူ အ ဟံၣ်အဃီန့ၣ်မ့ၢ်ဒၣ်တၢ်မံမီၣ်တခါလီၤ တကးဘၣ်အမဲာ်ညါ တကီၢ်ခါအခဲအံၤလၢကညီကီၢ်စဲၣ်အပူၤ ၦၤဃ့ၢ်တၢ်ယၤ အနီၣ်ဂံၢ်အနီၣ်ဒွးဟဲအါထီၣ်၀ဲဒၣ်ကွ့ၢ်ကွ့ၢ်န့ၣ်လီၤႉ တကီၢ်ခါအခဲအံၤတၢ်ဒုးတၢ်ယၤတၢ်ဘၣ်ဂံာ်ဂူာ်အဃိ ၦၤဃ့ၢ်တၢ်ဒုးဖိတဖၣ်ကွၢ်ဆၢၣ်မဲာ်ဘၣ်၀ဲ တၢ်လုၢ်အီၣ်နီၢ်ခိသး သမူတၢ်ကီတၢ်ခဲ အကလုာ်ကလုာ်အမဲာ်ညါ လၢအ၀ဲသ့ၣ်အဒံၣ်အဖိတၢ်ကူၣ်ဘၣ်ကူၣ်သ့အဂီၢ် ဘၣ်ကိၢ်ဘၣ်ဂီၤ၀ဲဒၣ် အဂ့ၢ်န့ၣ်နီၢ်ဖီကျၢၤစံး၀ဲဒၣ်ဒ်အံၤန့ၣ်လီၤႉ အ၀ဲစံး၀ဲလၢ “ကွၢ်လၢဖိကဘၣ်ထီၣ်ကၠိထီၣ်ကီၢ်အံၤန့ၣ်ဘၣ်ယိၣ်ဒုဘၣ်ယိၣ်၀ဲႇ မ့ၢ်ပဆှၢပဖိကၠိကန့ၢ်ဒံးဧါႉ တၢ်အံၤပဟးအိၣ်ဒၣ်ကၠါအံၤဒုပတဟးဖံးအီၣ်မၤအီၣ်ဘၣ်တၢ်နီတမံၤဘၣ်ႉ ပဖိမ့ၢ်တအိၣ်ဘၣ်ကၠိလၢၤဘၣ်ဒီးဖိသၣ်ဆၢကတီၢ်ဒီး ကလၢၤမီၤနီၤႉ ပကွၢ်တၢ်အံၤပကဘၣ်မၤကၠါလဲၣ်သ့ၣ်ညါဘၣ် ဆိမိၣ်မးတဘၣ်လၢၤဘၣ်ႇ တယာ်က့ၤမးတဘၣ်လၢၤ ဘၣ်ႉ ကၠိလဲတၢ်လၢာ်ဘူၣ်လၢာ်စ့တနံၣ်တနံၣ်လၢာ်ဃဲၤဃဲၤစ့ၢ်ကီးလီၤႉ ပဖိအိၣ်သၢဂၤမီၤနီၤ ဖိသၣ်ကထီၣ်ကၠိအံၤတၢ် ကိၢ်တၢ်ဂီၤဘၣ်နာ်က့မၤတဘၣ်ဘၣ်ႉ မ့ဒိၣ်ထီၣ်မ့တထီၣ်ဘၣ်ကိၠဘၣ်ဘျီဒု ပဖိအံၤတကျၢတကျါသ့ၣ်ညါတၢ်နီမံၤလၢၤ ၀ဲလဲၣ်ႉ မ့ၢ်အ၀ဲသ့ၣ်ကကဲထီၣ်ဘၣ်၀ဲနၣ်လ့ဧါ၊ၦၤအိသံးဖိဧါႇ မ့ၢ်ကကဲထီၣ်ဘၣ်၀ဲၦၤကနူၤကပၤဖိဧါသ့ၣ်ညါဘၣ်ႉ မ့ၢ် ဘၣ်တဲဒုအိၣ်ဒၣ်အကဘၣ်မၤတၢ်မၤလၢနးနးကျံးကျံးလၢကဘၣ်ဟးကဲ၀ဲၦၤပျဲၢ်ၦၤကုၢ်န့ၣ်န့ၣ်ႉ ဆိမိၣ်သးမ့ၢ်သ့မ့ၢ်ဘၣ် ဆှၢမ့ၢ်န့ၢ်ဆှၢမ့ၢ်သ့န့ၣ်ယအဲၣ်ဒိးလၢအ၀ဲသ့ၣ်ကထီၣ်ဘၣ်ကၠိစ့ၢ်ကီးန့ၣ်လီၤ” အဂ့ၢ်စံးဘၣ် ခ့ၣ်အဲးစံၣ်-ကညီတၢ်က စီၣ်န့ၣ်လီၤႉ နီၢ်ဖီကျၢၤအံၤအအိၣ်ဆိး၀ဲဒၣ်ဖဲမၠၣ်၀တံၣ်ကီၢ်ဆၣ်(မဲၢ်ကနဲ)သ၀ီအပူၤဒီးဖဲအပူၤကွံာ်(၂၀၂၃)နံၣ်ႇ လါမးရှးန့ၣ်အ၀ဲဒီး အဟံၣ်ဖိဃီဖိဟဲဃ့ၢ်အိၣ်ကဒုအသးလၢ(သ့ၣ်ဘီဘိ)ၦၤလီၢ်အိၣ်ကမှံဖိအလီၢ်န့ၣ်လီၤႉ အခဲအံၤန့ၣ် အ၀ဲအဲၣ်ဒိးက့ၤက ဒါက့ၤဆူအအိၣ်ဆိးတၢ်လီၢ်တၢ်ကျဲဘၣ်ဆၣ် က့ၤ၀ဲတဘူၣ်ဒံးဘၣ်ဒီးဘၣ်အိၣ်ဆိးအီၣ်အီ၀ဲကီကီခဲခဲအဂ့ၢ်န့ၣ်နီၢ်ဖီကျၢၤ စံးအါထီၣ်၀ဲဒၣ်န့ၣ်လီၤႉ “အိၣ်ဘူၣ်လၢၤဘၣ် ပယီၤသုးဟဲခးလီၤဒီးကဘီယူၤဟဲခးလီၤႉ ပမ့ၢ်အိၣ်ဒံးခဲခဲအံၤနာ်က့ၦၤကွ့ၤလီၤတၢ်တဟါ တဖျၢၣ်ခံဖျၢၣ်ႇ တနံၤတဖျၢၣ်ခံဖျၢၣ်မီၤနီၤႉ ပမ့ၢ်အိၣ်ဒံးဒၣ်ဒ်န့ၣ်ဒု ပဘၣ်အိၣ်ကနၣ်ပဖံးအီၣ်မၤအီၣ်တသ့နီတလိၣ်ႇ တၢ်...
ခီဖျိထိၣ်ကီၤကိကျဲကတံာ်အဃိသိလ့ၣ်တီၣ်ပနံာ်တၢ်ဖိတၢ်လံၤတနီၤဆီတလဲသူက့ၤကျဲလၢကၠဲၣ်အူၣ်တီၤကျဲ
လါဖ့ၤဘြူၤအါရံၤ ၈ သီ၊ ၂၀၂၄ နံၣ်၊ ခ့ၣ်အဲးစံၣ် လၢကညီကီၢ်စဲၣ် ရၤမတံ-၀့ၢ်ထိၣ်ကီကိကျဲတကပၤန့ၣ် ခီဖျိသိလ့ၣ်လ့ၢ်ထီၣ်လ့ၢ်လိၤအါကျဲကတံာ်အဃိ သိလ့ၣ်တီၣ်ပနံာ်တၢ်ဖိတၢ်လံၤတဖၣ်အံၤဆီတလဲသူက့ၤကျဲလၢကၠဲၣ်အူၣ်တီၤကျဲတကပၤအဂ့ၢ်န့ၣ် ၦၤနီသိလ့ၣ်ဖိတဖၣ် စံး၀ဲန့ၣ်လီၤႉ လၢထိၣ်ကီၤကိကျဲတကပၤန့ၣ်သိလ့ၣ်တီၣ်ပနံာ်တၢ်ဖိတၢ်လံၤတဖၣ်တၢ်ကီတၢ်ခဲအိၣ်လၢကလ့ၢ်ထီၣ်လ့ၢ်လိၤအဃိ ဘၣ်ဆီတလဲသူက့ၤကျဲလၢကၠဲၣ်အူၣ်တီၤကျဲမုၢ်တကပၤဒီးဒ်န့ၣ်အသိးကျဲအံၤမ့ၢ်တ့ၢ်၀ဲကျဲလီၢ်လံၤတဘိလၢ တၢ်တသူအီၤဖးယံာ်လံအဂ့ၢ်န့ၣ် ၦၤနီသိလ့ၣ်ဖိလၢအလ့ၢ်ထီၣ်လ့ၢ်လိၤဖဲန့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဘၣ်ဃးတၢ်ဆီတလဲသူက့ၤကျဲလၢကၠဲၣ်အူၣ်တီၤကျဲအံၤန့ၣ်ၦၤနီသိလ့ၣ်ဖိလၢတအဲၣ်ဒိးပာ်ဖျါအမံၤတဂၤစံး၀ဲလၢ “ထိၣ်ကီကိကျဲဒုယလ့ၢ်ထီၣ်လ့ၢ်လိၤအဆ့ၣ်တပၠ့ၣ်ဘၣ်မီၤ၊သိလ့ၣ်ဖးဒိၣ်အါတလၢအဃိထီၣ်ကစၢၢ်အဆၢကတီၢ် ယဘၣ်ကီၤ၀ံၤမ့ၤလၢကျဲအဃိယတသူဘၣ်ဖးယံာ်လံ၊ခဲအံၤယသူလၢကျဲလၢကၠဲၣ်အူၣ်တီၤကျဲမုၢ်တဘိအံၤမီၤ၊ ပလ့ၢ်လိၤဖဲအံၤတၢ်ကီတၢ်ခဲတအိၣ်နီတမံၤဘၣ်၊ယသကိးသိလ့ၣ်ကစၢ်တဖၣ်နါက့ဟဲလ့ၢ်လိၤက့ၤဖဲအံၤလီၤမီၤႉ ပလဲၤမၠး၀တံၣ်လၢဂီၤခီန့ၣ်ဟါခီန့ၣ်ပဟဲက့ၤတုၤတနံၤဃီလီၤႉကျဲဒီတဘိန့ၣ်အိၣ်ထဲBGFအတြဲၤလီၤမီၤ၊ တဘၣ်ဟ့ၣ်စ့အါအါဘၣ်ကွၢ်ဖဲပသးအိၣ်န့ၣ်ပဟ့ၣ်သ့လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ဒ်န့ၣ်အသိးတကီၢ်ခါခဲအံၤလၢထိၣ်ကီၤကိကျဲန့ၣ်ကညီတၢ်မုာ်တၢ်ခုၣ်ကီၣ်ကးကရၢ(PC)၊သုးကီၣ်ကးဒီးသုးခိးကီၢ်ဆၢ (BGF)လၢအိၣ်ခိးတၢ်ဖဲန့ၣ်သ့ၣ်တဖၣ်တသမံသမိးသိလ့ၣ်ဒ်လၢညါအသိးလၢၤဘၣ်ဒီး ၦၤနီသိလ့ၣ်ဖိဟ့ၣ်လီၤစ့ မ့၀ံၤန့ၣ်လ့ၢ်ထီၣ်လ့ၢ်လိၤန့ၢ်၀ဲညီညီလီၤအဂ့ၢ်န့ၣ် ၦၤနီသိလ့ၣ်ဖိလၢအလ့ၢ်ထီၣ်လ့ၢ်လိၤဖဲန့ၣ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ “အခဲအံၤထိၣ်ကီကိကျဲတၢ်ဟးထီၣ်က့ၤလီၤဒုမ့ဘၣ်ဃးတၢ်သမံသမိးန့ၣ်ပမ့ၢ်ဟ့ၣ်လီၤစ့န့ၣ်၀ံၤလီၤမီၤႉ အ၀ဲသ့ၣ်ဒုတဃ့ဘၣ်၊လီၤဂာ်ဒ်သိးသိလ့ၣ်ကစၢ်တဖၣ်န့ၣ်ဟ့ၣ်န့ၢ်ဆူၣ်အ၀ဲသ့ၣ်မီၤနီၤႉလၢညါအပူၤကွံာ်ထုးထီၣ်ကွၢ် ပတၢ်ဘိၣ်တၢ်ဖိတၢ်လံၤသ့ၣ်တဖၣ်အိၣ်၀ဲ˜ ခဲအံၤတအိၣ်လၢၤဘၣ်˜မ့မ့ၢ်လၢ(အၣ်စၣ်တိ)သိလ့ၣ်န့ၣ်ထိၣ်ကီကိကျဲဒီတဘိ န့ၣ်လၢာ်လၢတကလီၢ်ဘျဲၣ်ညါမီၤႉယနၢ်ဟူလၢကျဲလၢအဂၤန့ၣ်ဒုအိၣ်တဘိမီၤႉၦၤတဲ၀ဲလၢမ့ၢ်လဲၤလၢဖၣ်အၣ်န့ၣ် သၢနၣ်ရံၣ်အတီၢ်ပူၤတုၤလီၤမီၤႉဘၣ်ဆၣ်ယတလဲၤဘၣ်နီတဘျီဒံးဘၣ်” အဂ့ၢ်စံး၀ဲန့ၣ်လီၤႉ လၢရၤမတံ-ကီးတရံး-ဖၣ်အၣ်-မီၣ်လမၠဲၣ်ကျဲမုၢ်တကပၤန့ၣ်ဒ်သိးသိလ့ၣ်တီၣ်ပနံာ်တၢ်ဖိတၢ်လံၤတဖၣ်အံၤ လ့ၢ်ထီၣ်လ့ၢ်လိၤဘၣ်ညီညီကန့ၢ်အဂီၢ်န့ၣ်ၦၤနီသိလ့ၣ်ဖိတဖၣ်ဃ့ထီၣ်ဖီၣ်စုက၀ဲၤကရူၢ်ကရၢလၢအိၣ်ခိးတြဲၤတဖၣ် အံၤကဃ့စှၤလီၤကျဲတၢ်ခိတၢ်သွဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်(၂၀၂၃)လါဒံၣ်စ့ဘၢၣ်အခါန့ၣ်လၢကီးတရံး-ရၤမတံအ့ရှါကျဲန့ၣ် ခီဖျိတၢ်ဒုးကဲထီၣ်လၢ တၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤအဃိတၢ်ပံးကွံာ်၀ဲဒၣ်ကျဲတုၤလၢခဲအံၤဒီး တၢ်လ့ၢ်ထီၣ်လ့ၢ်လိၤ သူက့ၤကျဲလၢထိၣ်ကီၤကိ-နဘူ-တန့ခၠါကျဲတကပၤအဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
သုးကီၣ်ကးပညိၣ်ခး၀ဲကရ့ၣ်နံၣ်ကီၢ်စဲၣ်ကၠိအံၤမ့ၢ်တၢ်မၤကမၣ်ၦၤဟီၣ်ခိၣ်ဖိခွဲးယ၁်ဒိၣ်ဒိၣ်မုၢ်မုၢ်အဂ့ၢ် KHRG စံး၀ဲ
လါဖ့ၤဘြူၤအါရံၤ ၈ သီႇ ၂၀၂၄ နံၣ်ႇ ခ့ၣ်အဲးစံၣ် ဖဲအပူၤကွံာ်ဖ့ၤဘြူၤအါရံၤ ၅ သီအနံၤ သုးကီၣ်ကးကဘီယူၤလဲၤခးလီၤတၢ်လၢကရ့ၣ်နံၣ်ကီၢ်စဲၣ် ဒံၤမီၣ်စိၤကီၢ်ဆၣ် ကၠိကရၢၢ်ပူၤအဖီခိၣ်အံၤ မ့ၢ်တၢ်မၤကမၣ်၀ဲၦၤဂ့ၢ်၀ီခွဲးယာ်ဒိၣ်ဒိၣ်မုၢ်မုၢ်ဒီးထီဒါ၀ဲတဲာ်တဲာ်ဖျုဖျုအဂ့ၢ်န့ၣ် (KHRG) ထုးထီၣ်ပာ်ဖျါစံး၀ဲဖဲမဟါလါဖ့ၤဘြူၤအါရံၤ ၇ သီ အနံၤန့ၣ်လီၤႉ လၢကရ့ၣ်နံၣ်ကီၢ်စဲၣ် ဒံၤမီၣ်စိၤကီၢ်ဆၣ်အပူၤ ဖဲလါဖ့ၤဘြူၤအါရံၤ ၅ သီ ဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် သုးကီၣ်ကးကဘီယူၤလဲၤခးလီၤတၢ်လၢသ၀ီခံဖျၢၣ် လီၢ်အိၣ်ကမှံကၠိကရၢၢ်ပူၤအဃိ ၦၤကၠိဖိဃုာ်ဒီးကၠိသရၣ် သံဘၣ်ဒိဘၣ်ထံး၀ဲအါမးဒီးလၢတၢ်ဂ့ၢ်အံၤအဖီခိၣ်မ့ၢ်တၢ်မၤကမၣ်၀ဲၦၤဂ့ၢ်၀ီခွဲးယာ်ဒီးထီဒါ၀ဲတဲာ်တဲာ်ဖျုဖျုအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ် Karen Human Rights Group-KHRG ထုးထီၣ်ပာ်ဖျါလံာ်စံး၀ဲန့ၣ်လီၤႉ သုးမီၤစိရိၤအတၢ်ဖံးတၢ်မၤအံၤလုၢ်သ့ၣ်ခါပတာ်မၤကမၣ်၀ဲၦၤဟီၣ်ခိခွဲးယာ်ဒီးတကးဒံးဘၣ်အလီၢ်အိၣ်လၢ ထံဂုၤကီၢ်ဂၤစ့ၢ်ကီးကဘၣ်ဟံးထီၣ်ဖီၣ်ထီၣ်ဂ့ၢ်၀ီအဂ့ၢ်န့ၣ် (KHRG)ၦၤကတိၤတၢ်ပၢ စီၤနၢၤဒၣ်ဆူ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သုးကီၣ်ကးတဖုအံၤအတၢ်ပညိၣ်အိၣ်လိၤလိၤပာ်ပညိၣ်၀ဲအသိးန့ၣ်ဆဲးခးလီၤႇမၤဘၣ်ဒိဘၣ်ထံး၀ဲဒၣ် ကမျၢၢ်ဒီးတၢ်သူၣ်ထီၣ်သ့ၣ်တဖၣ်အံၤမီၤနီၤႉလီၤဆီဒၣ်တၢ်တၢ်ဟးဂူာ်ဟးဂီၤအံၤတမ့ၢ်ထဲလၢကၠိဘၣ်ဘၣ်ဒိဘၣ်ထံးဒီး ဘၣ်သံဘၣ်ၦၢ်စ့ၢ်ကီးလၢၦၤဖိဒံဖိသၣ်ၦၤကၠိဖိသ့ၣ်တဖၣ်အံၤလီၤႉအဃိသးန့ၣ်တၢ်သ့ၣ်တဖၣ်အံၤမၤကမၣ်၀ဲဒၣ်ၦၤဟီၣ်ခိၣ်ဖိခွဲးယာ်အဒိၣ်အမုၢ်တကးဒံးဘၣ်န့ၣ်မ့ၢ်တၢ်မၤကမၣ်ကွီၢ်မ့ၣ်အဃိအ၀ဲသ့ၣ်န့ၣ်လ့ၤတက့ၤတဘၣ်ပူၤဖျဲးထီၣ်လၢတၢ် ကမၣ်သ့ၣ်တဖၣ်အံၤအပူၤဘၣ်ႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤသုးကီၣ်ကးအံၤသူအါက့ၤ၀ဲဒၣ်ကလံၤကျါတၢ်ဒုးအဃိလၢတၢ်တီတၢ်တြၢ်ဒီးတၢ်ကဟံးထီၣ်ဖီၣ်ထီၣ် သုးမီၤစိရိၤဂ့ၢ်၀ီအဂီၢ်န့ၣ်အလီၢ်အိၣ်လၢထံဂုၤကီၢ်ဂၤတဖၣ်ကဖီၣ်လိာ်စုမၤသကိးတၢ်လၢတၢ်ပတုာ်ကွံာ် တၢ်ဆီၣ်ထွဲမၤစၢၤသုးမီၤစိရိၤလၢမုၢ်ကျိၤ၀ဲၤကွာ်ဒီးသုးဂ့ၢ်၀ီတကပၤအဂ့ၢ်န့ၣ် စီၤနၢၤဒၣ်ဆူ စံးအါထီၣ်၀ဲဒၣ်န့ၣ်လီၤႉ တကးဒံးဘၣ်ဒ်သိးသုးမီၤစိရိၤအတၢ်မၤကမၣ်ကွီၢ်မ့ၣ်သ့ၣ်တဖၣ်အံၤကပတုာ်ကွံာ်သးအဂီၢ်န့ၣ်(KHRG)ဃ့ထီၣ်ဃုာ် စ့ၢ်ကီး၀ဲတၢ်ဂ့ၢ်သၢထံၣ်လၢထံဂုၤကီၢ်ဂၤအအိၣ်အဂ့ၢ်န့ၣ် စီၤနၢၤဒၣ်ဆူ စံး၀ဲန့ၣ်လီၤႉ အ၀ဲစံး၀ဲလၢ“ဒ်သိးပယီၤသုးကီၣ်ကးအတၢ်ဂံၢ်တၢ်ဘါလၢတၢ်ဆဲးမၤကမၣ်၀ဲကွီၢ်မ့ၣ်လၢတၢ်ကဆဲးခးလီၤကျိဖးဒိၣ် အံၤကလီၤစှၤကပတုာ်ကွံာ်သးအဂီၢ်န့ၣ်အရ့ဒိၣ်ကတၢၢ်န့ၣ်ထံဂုၤကီၢ်ဂၤတဖၣ်ကဘၣ်ဟ့ၣ်တၢ်ဆီၣ်သနံးလၢတၢ်ဆါန့ၢ််ကဘီယူၤသိလၢသုးကီၣ်ကးအအိၣ်တကးဒံးဘၣ်တၢ်ဆီၣ်ထွဲမၤစၢၤသုးကီၣ်ကးလၢသုးဂ့ၢ်၀ီတကပၤလၢ ကျိချံမျိာ်သၣ် တဖၣ်မီၤနီႉတၢ်သ့ၣ်တဖၣ်အံၤထံဂုၤကီၢ်ဂၤတဘ့ၣ်စုာ်စုာ်အမူအဒါအိၣ်၀ဲဒၣ်လၢကဘၣ်ဆီၣ်သနံး၀ဲကဘၣ်ဟံးဂ့ၢ်၀ီ၀ဲမီၤနီၤႉခံထံၣ်တထံၣ်ခီန့ၣ်ထံဂုၤကီၢ်ဂၤပတီၢ်စ့ၢ်ကီးတၢ်ကဟံအရ့ကွီၢ်မ့ၣ်လၢသုးမီၤစိရိၤခိၣ်နၢ်လၢအဟ့ၣ်လီၤတၢ်ကလုၢ်သ့ၣ်တဖၣ်အံၤအဖီခိၣ်န့ၣ်လီၤႉတကးဒံးဘၣ်ထံဂုၤကီၢ်ဂၤတဖၣ်ကြၢးဟ့ၣ်၀ဲတၢ်ဆီၣ်ထွဲမၤစၢၤတဖၣ်အံၤလၢကရူၢ်ကရၢလၢအိၣ်ကီၢ်ပူၤလၢအဆီၣ်ထွဲမၤစၢၤ၀ဲဒၣ်ၦၤလၢအဘၣ်ဒိဘၣ်ထံးလၢပယီၤသုးအတၢ်ထီၣ်ဒုးသ့ၣ် တဖၣ်အံၤမီၤနီၤ”အဂ့ၢ်န့ၣ် စံး၀ဲန့ၣ် လီၤႉ ဒ်န့ၣ်အသိး(၂၀၂၁)သုးဟံးန့ၢ်တၢ်စိတၢ်ကမီၤ၀ံၤလီၢ်ခံတၢ်ဒုးဆူၣ်ထီၣ်၀ဲလၢပယီၤသုးဒီးကလုာ်ဒူၣ်ဖီၣ်စုက၀ဲၤကရူၢ် အဘၢၣ်စၢၤအံၤဒီးတကးဒံဘၣ်ဖဲတၢ်ဒုးကဲထီၣ်တဘျီလၢ်လၢ်အခါန့ၣ်သုးကီၣ်ကးအံၤပညိၣ်၀ဲကမျၢၢ်ဒူသ၀ီအိၣ်ဆိးလီၢ်ကျဲႇကၠိတၢ်သူၣ်ထီၣ်ဒ်အံၤဖျါ၀ဲဒၣ်ဖျါဖျါလီၤအဂ့ၢ်န့ၣ်...
ဘၣ်စံၣ်ဘၣ်ဃ့ၢ်တအိၣ်ဘၣ်ဆၣ်ဘၣ်ဖံးလိမၤဒိးတၢ်လၢတၢ်ဘၣ်ယိၣ်ဘၣ်ဘှီပူၤအဂ့ၢ် တီနီၢ်ကၠိၦၤဘၣ်မူဘၣ်ဒါစံး၀ဲ
လါဖ့ၤဘြူၤအါရံၤ ၈ သီႇ ၂၀၂၄ နံၣ်ႇ ခံၣ်အဲးစံၣ် လၢကညီကီၢ်စဲၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ရၤမတံကလံၤထံး တီနီၢ်မုၢ်ထီၣ် သ့ၣ်ဘီဘိအပူၤ တနံၣ်အံၤဘၣ်စံၣ်ဘၣ်ဃ့ၢ်တၢ်ဒုးတယာ်တအိၣ်ဘၣ်ဘၣ်ဆၣ်ၦၤကၠိဖိသ့ၣ်တဖၣ်ဘၣ်ဖံးလိမၤဒိးတၢ်လၢတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် ကၠိၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ သ့ၣ်ဘီဘိသ၀ီကညီကူၣ်သ့ဆဲးလၤ၀ဲၤကျိၤ(KECD)ဖီလာ်တီနီၢ်တီၤထီကၠိအံၤ (၂၀၂၃)တၢ်မၤလိနံၣ်အတီၢ်ပူၤ ကၠိဖိသ့ၣ်တဖၣ်ဘၣ်ဃ့ၢ်ထီၣ်ဒီးဘၣ်ဆိကတီၢ်ကွံာ်တၢ်မၤလိမၤဒိးတအိၣ်၀ဲဘၣ်ဆၣ် ဘၣ်ဖံးလိမၤဒိးတၢ်လၢ တၢ်ကိၢ်တၢ်ဂီၤတၢ်ပျံၤတၢ်ဖုးပူၤအဖၢမုၢ်လီၤအဂ့ၢ်န့ၣ် ကၠိၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ စးထီၣ်လၢကၠိအိးထီၣ်တုၤလၢခဲအံၤန့ၣ်ၦၤကၠိဖိတဖၣ်ဘၣ်ဃ့ၢ်ထီၣ်တအိၣ်နီတဘျီဒံးဘၣ်ဒီးထီၣ်ဘၣ်၀ဲကၠိအမျးကယၤ ၦဲၤၦဲၤဘၣ်ဆၣ်ခီဖျိလၢဟီၣ်က၀ီၤပူၤပယီၤသုးအိၣ်ဒံး၀ဲအဃိကၠိဖိတဖၣ်ဘၣ်ပျံၤဘၣ်ဖုးဒံးတၢ်ဒီးသရၣ်၊မုၣ်တဖၣ် စ့ၢ်ကီး ဘၣ်သူၣ်ကိၢ်သးဂီၤတၢ်လၢဖိသၣ်တဖၣ်အဂီၢ်အိၣ်၀ဲအဂ့ၢ်န့ၣ် တီနီၢ်တီၤထီကၠိ သရၣ်ကၠိခိၣ်စီၤအဲၣ်ဃူ စံး၀ဲဒံးအံၤန့ၣ်လီၤႉ အ၀ဲစံး၀ဲလၢ “ တနံၣ်ညါအံၤန့ၣ်လါယူၤတုၤလၢလါယနူၤအါရံၤအတီၢ်ပူၤစးထီၣ်လၢပအိးထီၣ်ကၠိတုၤလၢခဲကနံၣ်အံၤအတီၢ်ပူၤဒုလီၤဆီ၀ဲဒီးမဟိတၢ်မၤလိနံၣ်မီၤနီၤႉတၢ်သီၣ်တၢ်သဲတအိၣ်ဘၣ်ဒုတမ့ၢ်ဘၣ်မီၤႉအိၣ်၀ဲဒီးအိၣ်ဘၣ်ဆၣ်စှၤလီၤ၀ဲမီၤႉပမ့ထိၣ်သတြီၤတနံၣ်အံၤဒီးမဟိတနံၣ်ခီန့ၣ်တနံၣ်အံၤကၠိဖိတဖၣ်မၤလိဘၣ်တၢ်အမျးကယၤၦဲၤ၀ဲဒီးကၠိတၢ်ဖံးတၢ်မၤလၢပပာ်လီၤတဖၣ်န့ၣ်ပမၤဘၣ်အီၤဘျ့ဘျ့ဆှီဆှီလီၤမီၤနီၤႉဒီးမ့မ့ၢ်လၢတၢ်ဘၣ်ယိာ်ဘၣ်ဘှီတၢ်ဘၣ်ပျံၤဘၣ်ဖုးသ့ၣ် တဖၣ်န့ၣ်ဒုအိၣ်ဒံး၀ဲဒၣ်တၢ်လီၤႉဘၣ်မနုၤအဃိလဲၣ်န့ၣ်ဒုၣ်ဒါသုးမီၤစိရိၤတဖၣ်ဒုအိၣ်ဒံး၀ဲလၢပဟီၣ်က၀ီၤပူၤအဃိ ပဘၣ်ကိၢ်ဘၣ်ဂီၤတၢ်လၢဖိသၣ်တဖၣ်အဂီၢ်ထီဘိလီၤမီၤနီၤႉ” အဂ့ၢ်န့ၣ် စံး၀ဲန့ၣ်လီၤႉ အပူၤကွံာ်လၢညါကၠိဖိတဖၣ်ဘၣ်ဃ့ၢ်ထီၣ်အခါသဂၢၢ်ဘၣ်တ့ၢ်၀ဲတၢ်ကီတၢ်ခဲအိၣ်၀ဲအဃိ တနံၣ်အံၤဟီၣ်က၀ီၤတၢ်အိၣ်သးအဖီခိၣ်တၢ်ကတီၤဆိဃာ်န့ၢ်၀ဲတၢ်မၤလိလီၢ်တဖျၢၣ်လၢဖိသၣ်မ့ၢ်ဘၣ်စံၣ်ထီၣ်လၢဂ့ၢ်ဂီၢ်အူအခါန့ၣ်အ၀ဲသ့ၣ် ကမၤလိဘၣ်တၢ်အဂီၢ်အဂ့ၢ်န့ၣ် သရၣ်ကၠိခိၣ် စီၤအဲၣ်ဃူ စံးအါထီၣ်၀ဲန့ၣ်လီၤႉ တကတီၢ်ဃီအပူၤကွံာ်ကၠိတၢ်မၤလိနံၣ်အခါန့ၣ်ဘၣ်ကွၢ်ဆၢၣ်မဲာ်၀ဲတၢ်ကီတၢ်ခဲတၢ်တၤတၢ်သ့ၣ်တဖၣ်ဒီး တနံၣ်အံၤဟီၣ်က၀ီၤတၢ်အိၣ်သးမ့ၢ်တဂ့ၤအါအါဒံးဘၣ်ဆၣ်တနံၣ်အံၤမၤလိဘၣ်၀ဲတၢ်ဘူးထီၣ်လၢနံၣ်ကတၢၢ်လံအဃိ သးခု၀ဲဒိၣ်မးအဂ့ၢ်န့ၣ် တီနီၢ်တီၤထီကၠိ ကၠိဖိမုၣ် နီၢ်ဆၢဆၢအဲၣ် စံးစ့ၢ်ကီး၀ဲဒ်အံၤန့ၣ်လီၤႉ အ၀ဲစံး၀ဲလၢ “ ...
ဘျံးဒ၀ဲၢ်ကီၢ်ရ့ၣ်ပူၤတၢ်ထီၣ်မၤန့ၢ်ကဒီး၀ဲသုးကီၣ်ကးအသုးကလၢၤတဖျၢၣ်အဂ့ၢ် တၢ်ပၢၢ်ဆၢသုးကရူၢ်ထုးထီၣ်ပာ်ဖျါ
လါဖ့ၤဘြူၤအါရံၤ ၇ သီႇ ၂၀၂၄ နံၣ်ႇ ခံၣ်အဲးစံၣ် တနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် အပူၤ ဖဲမဟါဟါခီန့ၣ် တၢ်ဒီသဒၢကမျၢၢ်သုးကရူၢ်ထီၣ်မၤန့ၢ်၀ဲ သုးကီၣ်ကးအသုးကလၢၤတဖျၢၣ်လၢအအိၣ်ဒ၀ဲၢ်၀့ၢ်မုၢ်ထီၣ် နီၣ်ဂံၢ်(၈)ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်အကပၤအံၤ အဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢသုးပာ်ဖှိၣ်အအိၣ်န့ၣ်လီၤႉ သုးကီၣ်ကးအသုးကလၢၤ၀ဲအံၤအိၣ်ဆီလီၤအသးဖဲဒ၀ဲၢ်၀့ၢ်မုၢ်ထီၣ်ခီၣ်ချ့သုးရ့ၣ်(ခမရ-၄၀၁)ဒီး(ခမရ-၄၀၂)အဘၢၣ်စၢၤ(မဲၤ၀့ၤ)ကစၢၢ်ဒီခိၣ်ဒီးဖဲမဟါလါဖ့ၤဘြူၤအါရံၤ ၅ သီ ဟါခီ(၄)နၣ်ရံၣ်တခီအဆၢကတီၢ်န့ၣ် တၢ်ထီၣ်ဒုးမၤန့ၢ်ကွံာ်၀ဲအဂ့ၢ်န့ၣ်တၢ်ပၢၢ်ဆၢသုးကရူၢ်(ဗထူး)သုးကျိၤ တၢ်ဘိးဘၣ်ရၤလီၤမူဒါခိၣ် (ထဲၣ်မၠဲၣ်)စံး၀ဲဒ်အံၤ န့ၣ်လီၤႉ အ၀ဲစံး၀ဲလၢ“လါဖ့ၤဘြူၤအါရံၤ ၅ သီအနံၤဟါခီအဆၢကတီၢ်န့ၣ် ပနုာ်လီၤထီၣ်ဒုးမၤန့ၢ်၀ဲမီၤနီၤႉ ဘၣ်လၢ သုးကလၢၤပူၤန့ၣ်ၦၤနီၣ်ဂံၢ်လီၤစှၤအဃိလၢစှၤမံးနံးအတီၢ်ပူၤန့ၣ်တၢ်ထီၣ်မၤန့ၢ်အီၤလီၤႉ မ့ၢ်ဘၣ်တဲလီၤတံၢ်လီၤဆဲးန့ၣ် သုးကီၣ်ကးတကပၤသံ၂ ဂၤ မီၤနီၤႉ မ့မ့ၢ်လၢအဂၤတဖၣ်န့ၣ်ဃ့ၢ်ထီၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ သုးကီၣ်ကးအသုးကလၢၤ၀ဲအံၤမ့ၢ်၀ဲဒၣ် (ဗထူး)သုးကရူၢ်ဒီးဒ၀ဲၢ်တၢ်ပၢၢ်ဆၢသုးပာ်ဖှိၣ်သုးကျိၤသုးပာ်ဖှိၣ်သ့ၣ်တဖၣ် အံၤလဲၤထီၣ်မၤန့ၢ်၀ဲဒီးတၢ်ဒုးဘျီ၀ဲအံၤအပူၤန့ၣ်တၢ်မၤန့ၢ်၀ဲပယီၤသုးအကျိ(၃)ခိၣ်ႇကျိဒၢ(၇)ခါဃုာ်ဒီး ကျိချံၦာ်သၣ်သ့ၣ်တဖၣ်အဂ့ၢ်န့ၣ် (ဗထူး)သုးကျိၤလံာ်တၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ တၢ်ထီၣ်မၤန့ၢ်သုးကလၢၤ၀ဲအံၤ၀ံၤလီၢ်ခံဖဲမဟါမုၢ်နၤခီ(၉)နၣ်ရံၣ်ဃၣ်ဃၣ်အဆၢကတီၢ်န့ၣ် သုးကီၣ်ကးအကဘီယူၤဟဲဆှၣ်တၢ်ခံဘ့ၣ်လၢသုးကလၢၤအခိၣ်အဃၢၤဒီးခးလီၤ၀ဲဒၣ်ကျိဆဲးသ့ၣ်တဖၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်တကပၤစံး၀ဲန့ၣ်လီၤႉ ဖဲလါယနူၤအါရံၤကတၢၢ်တနွံအခါန့ၣ်စ့ၢ်ကီး လၢတနီသရံၣ်ကီၢ်ဒိၣ် ဘျံးဒ၀ဲၢ်ကီၢ်ရ့ၣ် ဘါခၠီဟီၣ်က၀ီၤအပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့-၄ႇ သုးက့-၆ သုးရ့ၣ်ခံရ့ၣ်ဒီး တၢ်ဒီသဒၢကမျၢၢ်သုးကရူၢ် သုးပာ်ဖှိၣ်သ့ၣ်တဖၣ်အံၤအဆိကတၢၢ်တဘျီထီၣ်မၤန့ၢ်၀ဲ(ထူၣ်လၢၢ်)ပယီၤသုးကလၢၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ