ခီဖျိတၢ်စူၤတပယူ၁်ဃီအဃိ ထံဒိၣ်ထီၣ်လၢမူကီၢ်ဆၣ် ဒူသ၀ီပူၤအဂ့ၢ် KNU ထုးထီၣ်ပ၁်ဖျါ
လါအီးကထိဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် စှၤသီအတီၢ်ပူၤ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ် ဒူသ၀ီတဖၣ်အပူၤ ခီဖျိတၢ်စူၤတပယူာ်ဃီအဃိ လီၢ်က၀ီၤကမျၢၢ်တဖၣ်သဂၢၢ်ဘၣ်၀ဲထံဒိၣ်ဃိၣ်ယွၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲ ဖဲလါအီးကထိဘၢၣ် ၁၀ သီအနံၤန့ၣ်လီၤႉ စးထီၣ်ဖဲအပူၤကွံာ်လါအီးကထိဘၢၣ် ၇ သီတုၤလၢခဲအံၤန့ၣ် လၢမူကီၢ်ဆၣ် ဒူသ၀ီတဖၣ်အပူၤ ခီဖျိတၢ်စူၤတပယူာ်ဃီ အဃိ ထံဒိၣ်ထီၣ်၀ဲလၢသပၠ့ၤညိၣ်သ၀ီႇကၠီၣ်ကၠံပီၣ်ႇမကၠံတီႇလ့ၤလၤကိႇတီပူၣ်ႇစံကိႇ ကၠဲၣ်တဲၣ်ညီၤပ့ၤ,ဒဲၣ်ပိၤဒီးညီၤပ့ၤသၤ သ၀ီသ့ၣ်တဖၣ်အံၤအပူၤအဂ့ၢ်န့ၣ် ၦၤသ၀ီဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“မ့မ့ၢ်လၢဟံၣ်ဟးဂီၤႇဟီၣ်ခိၣ်လာ်ဒုတအိၣ်ဒံးဘၣ်ႉထံဒိၣ်ထီၣ်အဃိမ့မ့ၢ်လၢဘုႇဘုခ့ႇပဲတဖၣ်န့ၣ် ထံဘၢလၢာ် မီၤနီၤႉအဃိလၢကအီၣ်ကအီအဂီၢ်ဆၢကတီၢ်ခဲအံၤတၢ်ကီဖးဒိၣ်ညါႉတၢ်ကရၢကရိလၢအဟဲမၤစၢၤတၢ်စ့ၢ်ကီးတအိၣ်ဒံးဘၣ်ႉထံဒိၣ်ထီၣ်အံၤကအိၣ်တနွံလံႉတၢ်စူၤတုၤလၢခဲအံၤလီၤႉထံဒိၣ်ထီၣ်ခဲအံၤအိၣ်ဘူးဒီး(သုးက့ ၂)စ့ၢ် မီၤနီၤႉ လၢန့ၣ်တကပၤနါက့ထံဒိၣ်ထီၣ်စ့ၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိတၢ်စူၤတပယူာ်ဃီအဃိတၢ်ကီိတၢ်ခဲအိၣ်ထီၣ်လၢတၢ်အီၣ်တၢ်အီတကပၤဒီးလၢကအီၣ်ကအီအဂီၢ်ဖဲလဲၤၦ့ၤတၢ်ဖိတၢ်လံၤအခါခီဖျိကျဲတၢ်ကီတၢ်ခဲအိၣ်တကးဒံးဘၣ်အမဲာ်ညါပယီၤသုးဆီလီၤတၢ်သမံသမိးတြဲၤအဃိ ထံၣ်ဘၣ်၀ဲ တၢ်ဘံၣ်တၢ်ဘၢတအိၣ်ဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးခီဖျိထံကျိထံထီၣ်အဃိသ၀ီပူၤ ဒဲၣ်ပိၤ ကၠိႇ စံကိ ကၠိႇ တီပူၣ် ကၠိႇ လ့ၤလၤကိ ကၠိႇ ကၠီၣ်ကၠံပီၣ် ကၠိ သ့ၣ်တဖၣ်အံၤ ဘၣ်တၢ်ပံးဃာ်အီၤတစိၢ်တလီၢ်အဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ မူကီၢ်ဆၣ်လၢထံဒိၣ်ဃိၣ်ယွၤကဲထီၣ်အလီၢ်သ့ၣ်တဖၣ်အံၤစ့ၢ်ကီး တၢ်ဒုးကဲထီၣ်၀ဲလၢပယီၤသုဒီး ဟီၣ်က၀ီၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤအိၣ်၀ဲတလီၢ်လီၢ်ဒီးခီဖျိခံခီခံကပၤတၢ်ဒုးကဲထီၣ်အဃိ တုၤလၢခဲအံၤလီၢ်က၀ီၤၦၤကမျၢၢ်တနီၤဟးစံၣ်အိၣ်ဒံးဒၣ်အဖၢမုၢ်န့ၣ်လီၤႉ
ဖဲပယီၤသုးကျိၤနု၁်လီၤလၢပလီၣ်ကီၢ်ဆၣ်ပူၤအကတီၢ် မၤတဲ၁်ကွံ၁်၀ဲလီမ့ၣ်အူ
လါအီးကထိဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲသုးကီၣ်ကးအသုးကျိၤဟဲနုာ်လီၤလၢတနီသရံၣ်ကီၢ်ခီဒိၣ် ပလီၣ်ကီၢ်ဆၣ် ဒူသ၀ီတဖၣ်ပူၤအဆၢကတီၢ် အ၀ဲသ့ၣ်မၤတဲာ်ကွံာ်၀ဲလီမ့ၣ်အူအဂ့ၢ်န့ၣ် လီၢ်က၀ီၤၦၤသ၀ီဖိတဖၣ်စံး၀ဲန့ၣ်လီၤႉ စးထီၣ်ဖဲအပူၤကွံာ်လါစဲးပထ့ဘၢၣ်ခံနွံတနွံအခါန့ၣ်ပယီၤသုးကျိၤနုာ်လီၤကဒီး၀ဲလၢပလီၣ်ကီၢ်ဆၣ် မ့ထ့ၤသ၀ီႇ မၠၣ်ဒီၤသ၀ီႇလဲၣ်ကူသ၀ီႇမီၤကၠီသ၀ီႇပၣ်ပၣ်၀ိၣ်ကိသ၀ီႇကဒဲသ၀ီတဖၣ်အပူၤဒီးမၤတဲာ်ကွံာ်၀ဲလီမ့ၣ်အူတဖၣ်အဂ့ၢ်န့ၣ် လီၢ်က၀ီၤၦၤသ၀ီဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“မ့ၣ်အူတဟဲဘၣ်န့ၣ်ဖးယံၤလံႉမ့မ့ၢ်လၢပလီၣ်၀့ၢ်တကပၤခီန့ၣ်မ့အူဟဲဒံးႉပယီၤသုးမ့ဟဲလီၤလံန့ၣ် အ၀ဲသ့ၣ်တပျဲလီၤမ့ၣ်အူလၢၤဘၣ်ႉမ့မ့ၢ်လၢၦၤဃ့ၢ်မှံဟးဖျိးအိၣ်လီၢ်န့ၣ်ဒွဲၣ်၀ဲဒၣ်ပနဲဒ်န့ၣ်လီၤႉခဲအံၤလၢပလီၣ်ကီၢ်ဆၣ် ပယီၤသုးတြဲၤန့ၣ် အ၀ဲသ့ၣ်တပျဲၦၤၦၤ့ပနဲအါအါဒ်သိးလၢညါလၢၤဘၣ်န့ၣ်န့ၢ်ဖးယံၤလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးမၤတဲာ်လီမ့ၣ်အူတကးဒံးဘၣ်အမဲာ်ညါၦၤလဲၤၦ့ၤပနဲစ့ၢ်ကီးန့ၢ်ဒၣ်ထဲလၢအ၀ဲသ့ၣ်ပာ်ပနီၣ်၀ဲအသိးလီၤအဃိ ၦၤဃ့ၢ်မှံဟးဖျိးသ့ၣ်တဖၣ်အံၤဘၣ်သူက့ၤ၀ဲမ့ၣ်အူဒၢ(မီးခွက်)ဒီးတၢ်လိမုၢ်(ဆိၣ်လၣ်ပၠါ)သ့ၣ်တဖၣ်လီၤအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုးကျိၤနုာ်လီၤလၢသ၀ီပူၤအဃိလီမ့ၣ်အူတဟဲဘၣ်အိၣ်လၢသၢနွံဘျဲၣ်လံဒီး မ့မ့ၢ်လၢပၣ်ပၣ်၀ိကိသ၀ီဒီးကဒဲသ၀ီဖိတဖၣ်န့ၣ်ဟးဃ့ၢ်အိၣ်လၢတၢ်လီၢ်အဂၤခဲလၢာ်လံအဂ့ၢ်န့ၣ် ၦၤသ၀ီဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“သ၀ီတဖၣ်န့ၣ်ၦၤတအိၣ်နီတဂၤလၢၤဘၣ်ႉပယီၤသုးမ့ဟဲနုာ်လီၤန့ၣ်ဒွဲၣ်အူအီၣ်ၦၤဟံၣ်ႇမၤသံၦၤကညီ အဃိၦၤဘၣ်ဟးစံၣ်အိၣ်ဒီယုၢ်လီၤႉၦၤက့ၤအိၣ်လၢသ၀ီပူၤတဘူၣ်လၢၤဘၣ်ႉမ့ၣ်အူတဟဲဘၣ်ဘျီအ့ထနဲးႇလီတဲစိအကျိၤဟးဂီၤလိၤတဘျီဃီလီၤႉအ၀ဲသ့ၣ်မၤ၀ဲဒ်အံၤန့ၣ်ဒ်သိးအ၀ဲသ့ၣ်သုးကျိၤဟဲလီၤန့ၣ်ၦၤသုတသ့ၣ်ညါတဂ့ၤအဂီၢ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးအံၤပျဲၦၤကမျၢၢ်လဲၤၦ့ၤဟုသးႇစဲးဖီကဟၣ်သိလၢပလီၣ်၀့ၢ်ပူၤအံၤဒ်အ၀ဲသ့ၣ်ပာ်ပနီၣ်၀ဲအသိးတၢ်ကဘၣ်ၦ့ၤ၀ဲထဲထဲန့ၣ်လီၤဒီးတကးဒံးဘၣ်အမဲာ်ညါ ပယီၤသုးရၤလီၤအသုးဂံၢ်ဘါအဂၤ(၄၀၀)ဃၣ်ဃၣ်လၢပလီၣ်၀့ၢ် က၀ီၤဒ့ႇ ဒူသ၀ီတဖၣ် အပူၤဒီး ဒုးယၤတၢ်ဖ့ၣ်စၢအိၣ်ထီၣ်၀ဲဒၣ်ဒီးတၢ်ဒီသဒၢကမျၢၢ်သုးကရူၢ်အဂ့ၢ်န့ၣ် လီၢ်က၀ီၤကမျၢၢ်လၢအအိၣ်ဘူးဒီးဒုးယၤ တၢ်အိၣ်သးအံၤတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
တၢ်ဒုးကဲထီၣ်လၢ(၉)လါအတီၢ်ပူၤ ပယီၤသုးတကပၤသံ(၃၀၀၀)ဘျဲၣ်ႇဘၣ်ဒိ(၂၀၀၀)ဘျဲၣ်အဂ့ၢ် KNU ထုးထီၣ်ပ၁်ဖျါ
လါအီးကထိဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ တနံၣ်အံၤ(၂၀၂၃)လါယူနူၤအါရံၤ တုၤလၢ လါစဲးပထ့ဘၢၣ် လၢ(၉)လါအတီၢ်ပူၤ ပယီၤသုးတကပၤသံ၀ဲဒၣ်အဂၤ(၃၀၀၀)ဘျဲၣ်ဒီး ဘၣ်ဒိဘၣ်ထံး အဂၤ(၂၀၀၀)ဘျဲၣ် အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပာ်ဖျါ၀ဲဖဲမဟါလါအီးကထိဘၢၣ် ၁၁ သီ အနံၤန့ၣ်လီၤႉ တနံၣ်အံၤစးထီၣ်လါယနူၤအါရံၤတုၤလၢလါစဲးပထ့ဘၢၣ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA), ကညီဒီကလုာ်ဂၢၤသးကရၢ(KNDO)ဒီးပယီၤသုးအဘၢၣ်စၢၤတၢ်ဒုးဖးဒိၣ်တၢ်ဒုးဖိကဲထီၣ်ခဲလၢာ်အဘျီ(၃၅၇၀) ပယီၤသုးတကပၤသံ၀ဲ(၃၈၆၅),ဘၣ်ဒိ(၂၂၆၀)အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်န့ၣ်အသိးမ့မ့ၢ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုာ်ဂၢၤသးကရၢ(KNDO)တကပၤန့ၣ် ဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၁၁၂)ဂၤဒီးဘၣ်ဒိ၀ဲ(၃၉၉)ဂၤအဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
မုၢ်နၤခီလီတဲစိကျိၤလီၤမၢ်အဃိ ၦၤမၤတၢ်လၢ(အီၤလါ)ပူၤတဖၣ်ထံၣ်ဘၣ်တၢ်ကီတၢ်ခဲ
လါအီးကထိဘၢၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ထံၤလိၤႇလူၢ်ပျဲၢ်ဒီးတန့ခၠါဟီၣ်က၀ီၤတကပၤန့ၣ် စးထီၣ်ဖဲတလါအံၤလါအီးကထိဘၢၣ်ထီၣ်န့ၣ် စးထီၣ်ဟါခီ ၈ နၣ်ရံၣ်တုၤလၢဂီၤခီ ၄ နၣ်ရံၣ် ခီဖျိ(MPT)လီတဲစိကျိၤလီၤမၢ်အဃိ ၦၤလၢအသူဒီးမၤတၢ်လၢ (အီၤလါ)ပူၤ သ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢကညီကီၢ်စဲၣ်အပူၤ လီၢ်က၀ီၤၦၤသူၣ်ဘီၣ်သးစၢ်တဖၣ်အါဒၣ်တက့ၢ်န့ၣ် ဆါတၢ်ၦ့ၤတၢ်လၢ(အီၤလါ)ပူၤႇ ဃုမၤလိမၤဒိးတၢ်လၢ(အီၤလါ)ပူၤဒီးခီဖျိလီတဲစိကျိၤလီၤမၢ်အဃိဘၣ်ဒိဘၣ်ထံးအ၀ဲသ့ၣ်တၢ်ဖံးတၢ်မၤအဂ့ၢ်န့ၣ် ၦၤမၤဆါတၢ်လၢ(အီၤလါ)ပူၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤဘၣ်လၢၦၤတၢ်မၤဘံဘူအဆၢကတီၢ်မီၤနီၤႉၦၤၦ့ၤတၢ်ဖိတဖၣ်န့ၣ်တဟဲထီၣ်ၦ့ၤတၢ်လၢ၀့ၢ်ပူၤ လၢၤဘၣ်ႉအ၀ဲသ့ၣ်မၢ်လီၤတၢ်လၢ(အီၤလါ)ပူၤလီၤႉဘၣ်ဖဲပဆါတၢ်မုာ်အခါလီၤႇပဆဲးကျိးဒီးၦၤၦ့ၤတၢ်ဖိတန့ၢ်ဘၣ် အဃိအ၀ဲသ့ၣ်နါက့ကိၢ်သး၀ဲစ့ၢ်မီၤနီၤႉမ့၀ံၤမးပက့ၤဆှဲပၠးအ၀ဲသ့ၣ်တၢ်ဂ့ၢ်တၢ်ကျိၤႇတနီၤန့ၣ်ပၢၢ်တုၤလၢတနာ်အီၣ် ၦၤလၢာ်ဘၣ်မီၤနီၤႉ(Line)လီၤတဲာ်အဃိပဆါတၢ်လီၤ၀ဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢကညီကီၢ်စဲၣ်အပူၤအါဒၣ်တက့ၢ်ၦၤသူ၀ဲဒၣ်(MPT)စံမ်ကးႇ(Mytel)စံမ်ကးလီၤဒီး ခီဖျိစံမ်ကးလၢအဂၤတဖၣ် တန့ၢ်ဘၣ်အဃိ တၢ်သူ၀ဲဒၣ်ထဲ(MPT)စံမ်ကးအံၤလီၤအဂ့ၢ်န့ၣ် ၦၤမၤတၢ်လၢ(အီၤလါ)တၢ်ဆါတၢ်ၦ့ၤတဂၤ စံး၀ဲန့ၣ်လီၤႉ ကညီကီၢ်စဲၣ်ပူၤ လီၢ်က၀ီၤၦၤသူၣ်ဘီၣ်သးစၢ်တနီၤလၢမုၢ်နၤခီအ၀ဲသ့ၣ်ဖီၣ်တၢ်မၤ၀ံၤအိၣ်ဘှံးအဆၢကတီၢ် အ၀ဲသ့ၣ်ထီၣ်မၤလိတၢ်လၢ(အီၤလါ)ပူၤစ့ၢ်ကီးအိၣ်၀ဲဒီး ဒ်န့ၣ်အသိးခီဖျိ(Line)လီၤမၢ်လၢမုၢ်နၤခီဒ်အံၤအဃိ အ၀ဲသ့ၣ်တထီၣ်ဘၣ်တၢ်မၤလိလၢၤဘၣ်အဃိတၢ်ထုးထီၣ်ကွံာ်အီၤလၢတၢ်မၤလိပူၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ “ပထီၣ်တၢ်မၤလိတခါန့ၣ်နမ့တလဲၤထီၣ်ဘၣ်ခံဘျီန့ၣ်ၦၤနီဟးထီၣ်နၤလီၤႉ(Line)ဟးဂီၤကိးမုၢ်နၤဒဲးအဃိ ၦၤထုးထီၣ်၀ဲနၤန့ၣ်ႉဖဲအံၤစံမ်ကးလၢအဂၤန့ၣ်နသူတန့ၢ်ဘၣ်ႉန့ၢ်ထဲ(MPT)တခါလီၤႉ(Line)ဟးဂီၤဘျီတဘၣ်ဂီၢ် နီတစဲးဘၣ်ႉတၢ်ဖံးတၢ်မၤမ့ၢ်ဂ့ၤႇတၢ်လၢအဂၤစ့ၢ်ကီးတ၀ံၤ၀ဲဘၣ်မီၤနီၤ”အဂ့ၢ်န့ၣ် နီၢ်အဲၣ်ဖီ၀ါလၢအထီၣ် (Human Resources)တၢ်သိၣ်လိလၢအီၤလါပူၤအံၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢကြုၢ်တုႇ ငါတဲၤ ဒီး ယ့ၤပူၤကၠံသ၀ီတကပၤန့ၣ်စ့ၢ်ကီး စးထီၣ်ဖဲ(၂၀၂၂) လါအီးကထိဘၢၣ် ၁၀ သီ တုၤလၢ(၂၀၂၃)လါဖ့ၤဘြူၤအါရံၤန့ၣ် စးထီၣ်ဟါခီ ၄ နၣ်ရံၣ်တုၤလၢဂီၤခီ ၉ နၣ်ရံၣ် ခီဖျိ(MPT)လီတဲစိကျိၤဟးဂီၤအဃိ လီၢ်က၀ီၤပူၤၦၤလၢအမၤတၢ်လၢ(အီၤလါ)တၢ်ဖံးတၢ်မၤအံၤတဖၣ်ထံၣ်ဘၣ်၀ဲတၢ်ကီတၢ်ခဲကဲထီၣ်တ့ၢ် အသးဒံးအဂ့ၢ်န့ၣ်...
သုးကီၣ်ကးအတၢ်လဲၤခး(မိၤလဲၤခဲၣ်)ၦၤလီၢ်အိၣ်ကမှံလီၢ်အံၤအဖီခိၣ် (KHRW)ထီဒါ၀ဲတဲ၁်တဲ၁်ဖျုဖျု
လါအီးကထိဘၢၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါအီးကထိဘၢၣ် ၉ သီအနံၤ သုးကီၣ်ကးအကဘီယူၤဟဲခးလီၤတၢ်လၢကခၠ့ၣ်တၢ်သဘျ့ကရၢ(KIO/KIA) လဲၤစၤလီၢ်ခၢၣ်သး၀ဲၤလီၢ်ခိၣ်သ့ၣ်ကပၤ မိၤလဲၤခဲၣ် ၦၤလီၢ်အိၣ်ကမှံလီၢ်အဃိ ၦၤကမျၢၢ်ဃုာ်ဒီးၦၤဖိဒံဖိသၣ် သံဘၣ်ဒိဘၣ်ထံး၀ဲအဂၤ(၉၀)ဘျဲၣ်ဒီးလၢတၢ်ဂ့ၢ်အံၤအဖီခိၣ်ထီဒါ၀ဲတဲာ်တဲာ်ဖျုဖျုအဂ့ၢ်န့ၣ် တၢ်ခိးကွၢ်ဟုၣ်ကွၢ်စူၣ် ကခၠ့ၣ်ၦၤဂ့ၢ်၀ီခွဲးယာ်ကရူၢ်(KHRW)ထုးထီၣ်ပာ်ဖျါ၀ဲဖဲမဟါလါအီးကထိဘၢၣ် ၁၀ သီ အနံၤန့ၣ်လီၤႉ ဖဲလါအီးကထိဘၢၣ် ၉ သီ မုၢ်နၤခီအဆၢကတီၢ် ခီဖျိသုးကီၣ်ကးအကဘီယူၤဟဲခးလီၤတၢ်လၢကခၠ့ၣ်ကီၢ်စဲၣ် (KIO/KIA)လီၢ်ခၢၣ်သး၀ဲၤလီၢ်ခိၣ်သ့ၣ် လဲၤစၤ၀့ၢ်ဃၢၤ မိၤလဲၤခဲၣ် ကခၠ့ၣ်ၦၤလီၢ်အိၣ်ကမှံတၢ်လီၢ်တတီၤအဃိ ၦၤနီၢ်ဒိၣ်ဃုာ်ဒီးၦၤဖိဒံဖိသၣ်သံတစှၤန့ၢ်အဂၤ(၃၀)ဒီးဘၣ်ဒိ၀ဲဘၣ်ခဲလၢာ်အဂၤ(၆၀)ဃၣ်ဃၣ်အဂ့ၢ်န့ၣ် တၢ်အိၣ်ခိးကွၢ်ဟုၣ်ကွၢ်စူၣ်ကခၠ့ၣ်ၦၤဂ့ၢ်၀ီခွဲးယာ်ကရူၢ်အံၤ ထုးထီၣ်ပာ်ဖျါ၀ဲန့ၣ်လီၤႉ သုးကီၣ်ကးအတၢ်ပညိၣ်ထီၣ်ဒုးကမျၢၢ်ထံဖိကီၢ်ဖိဒ်အံၤအဖီခိၣ်ထီဒါ၀ဲတဲာ်တဲာ်ဒီးတကးဒံးဘၣ်အမဲာ်ညါ တၢ်ကရၢကရိဒီးၦၤနီၢ်တဂၤလၢအဆီၣ်ထွဲမၤစၢၤသုးကီၣ်ကးတဖၣ်အံၤတၢ်ကဟံးထီၣ်ဖီၣ်ထီၣ်အရ့တုၤလီၤတီၤလီၤ အဂ့ၢ်န့ၣ် တၢ်ခိးကွၢ်ဟုၣ်ကွၢ်စူၣ်ကခၠ့ၣ်ၦၤဂ့ၢ်၀ီခွဲးယာ်ကရူၢ်(KHRW)ဃ့ထီၣ်၀ဲန့ၣ်လီၤႉ (KHRW)မူဒါခိၣ် ကိၤကၠဲၣ်ကီၣ် စံး၀ဲလၢ“အ၀ဲသ့ၣ်ဟဲခးလီၤတၢ်ဒ်အံၤၦၤကမျၢၢ်ဘၣ်သံအါအါဂီၢ်ဂီၢ်ႉ သုးကီၣ်ကးအတၢ်ဖံးတၢ်မၤအံၤ(KHRW)ထီဒါ၀ဲန့ၣ်ပထုးထီၣ်လံာ်လံမီၤနီၤႉလၢခံတခါန့ၣ်တၢ်မၤဒ်အံၤအဖီခိၣ် ပဃ့ထီၣ်ထံဂုၤကီၢ်ဂၤလၢကဟံးထီၣ်ဖီၣ်ထီၣ်အရ့တုၤလီၤတီၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ သုးကီၣ်ကးအတၢ်ဟဲခးလီၤတၢ်ဘျီ၀ဲအံၤအပူၤန့ၣ်ၦၤသံၦၤဘၣ်ဒိဘၣ်ထံးအကျါ ၦၤဖိဒံဖိသၣ်(၁၄)ဂၤဒီး ၦၤပိာ်မုၣ်ပိာ်မၢၤဃုာ်ဒီးၦၤနီၢ်ဒိၣ်သူၣ်က့သးၦၢ်သံ၀ဲခဲလၢာ်အဂၤ(၂၀)ဃၣ်ဃၣ်အဂ့ၢ်န့ၣ် KHRW စံး၀ဲန့ၣ်လီၤႉ ဖဲအပူၤကွံာ်(၂၀၂၂)လါအီးကထိဘၢၣ် ၂၃ သီအခါစ့ၢ်ကီး လၢ(ဖါကၣ်)ကီၢ်ဆၣ် အနၣ်ပၤသ၀ီအပူၤ ဖဲတၢ်မၤတၢ်သူၣ်၀ံၣ်သးဆၢလၢကခၠ့ၣ်တၢ်သဘျ့(KIO) နံၣ်ဆဲးဆၢ ၆၂ နံၣ်တၢ်ရဲၣ်တၢ်ကျဲၤပူၤအခါ ခီဖျိသုးကီၣ်ကး ကဘီယူၤဟဲခးလီၤတၢ်အဃိ ၦၤကမျၢၢ်ဃုာ်ဒီးဖိဒံဖိသၣ်သံ၀ဲဒၣ်အဂၤ(၆၀)ဘျဲၣ် ကဲထီၣ်တ့ၢ်အသးဒံးန့ၣ်လီၤႉ ဒ်န့ၣ်အသိးလၢကညီကီၢ်စဲၣ်ဟီၣ်က၀ီၤအပူၤစ့ၢ်ကီးသုးကီၣ်ကးကဘီယူၤဟဲခးလီၤတၢ်အိၣ်၀ဲတလီၢ်လီၢ်န့ၣ်လီၤႉ ဒ်ကညီတၢ်ဆီၣ်ထွဲမၤစၢၤတၢ်မုာ််တၢ်ခုၣ်ၦာ်ဘျးစဲ(KPSN)ထုးထီၣ်ပာ်ဖျါ၀ဲအသိးန့ၣ် ခီဖျိသုးကီၣ်ကး ကဘီယူၤ ဟဲခးလီၤတၢ်အဃိလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ...
BGF တြဲၤလၢအိၣ်တၢ်ကနု၁်လီၤစွ့ၤကိၣ်ကိၤဟီၣ်က၀ီၤအံၤတဖၣ် အိၣ်ခိးထၢစ့ဟဲအါထီၣ်
လါအီးကထိဘၢၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကလံၤစိး သုးခိးကီၢ်ဆၢ(BGF)တြဲၤလၢအိၣ်တၢ်ကနုာ်လီၤစွ့ၤကိၣ်ကိၤဟီၣ်က၀ီၤအံၤတဖၣ် စးထီၣ်ဖဲတလါအံၤလါအီးကထိဘၢၣ်န့ၣ် အ၀ဲသ့ၣ်အိၣ်ခိးထၢစ့လၢသိလ့ၣ်ဟးထီၣ်က့ၤလီၤဖဲန့ၣ်သ့ၣ်တဖၣ်အအိၣ် ဟဲအါထီၣ်၀ဲအဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ သိလ့ၣ်လၢအလ့ၢ်ထိၣ်လ့ၢ်လိၤဖဲစွ့ၤကိၣ်ကိၤဒီးမၠၣ်၀တံၣ်–ဖၣ်အၣ်ကျဲသ့ၣ်တဖၣ်အံၤ အပူၤကွံာ်လၢညါဘၣ်လဲၤခီဂာ် ၀ဲဒၣ်တြဲၤ(၅)ဘ့ၣ်ႇတၢ်အိၣ်ခိးထၢစ့တအိၣ်နီတခါဘၣ်ဒီးဘၣ်ဆၣ်ခဲအံၤအ၀ဲသ့ၣ်မၤဃံးထီၣ်တၢ်သမံသမိးႇ အိၣ်ခိးထၢစ့ဟဲအါထီၣ်၀ဲအဂ့ၢ်န့ၣ် ၦၤနီသိလ့ၣ်ဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤ န့ၣ်လီၤႉ “ဖဲမဟါတလါန့ၣ်ပလ့ၢ်ထီၣ်လ့ၢ်လိၤနီသိလ့ၣ်တဘၣ်တၢ်နီတမံၤဘၣ်ႉစးထီၣ်လၢမၠၣ်၀တံၣ်တုၤလၢစွ့ၤကိၣ်ကိၤန့ၣ် နလဲၤအ့ဆ့လီၤႉပဘၣ်လဲၤခီတဲာ်၀ဲတြဲၤန့ၣ်(၅)ဘ့ၣ်ႉတြဲၤတဘ့ၣ်န့ၣ်ပဘၣ်ဟ့ၣ်လီၤအစှၤကတၢၢ်(၅၀၀၀)ကၠးႉ အန့ၣ်မးအသ့ၣ်ညါလိာ်သးဒီးၦၤႇမ့တသ့ၣ်ညါလိာ်သးဒီးၦၤဘၣ်ဒုတပူၤဘၣ်(၁၀၀၀၀)န့ၣ်ႉမ့ဘၣ်တဲန့ၣ်အ၀ဲသ့ၣ်ထးခိၣ်န့ၣ်ဟးထီၣ်ထဲစ့လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတကီၢ်ခါခဲအံၤခီဖျိတၢ်ဖံးတၢ်မၤလီၤစှၤဒီးၦၤလၢအအိၣ်ဟဲလၢတၢ်ချၢသ့ၣ်တဖၣ်အံၤ တၢ်သမံသမိး အ၀ဲသ့ၣ်ထံကီၢ်တၢ်ဂီၤႇတၢ်ဃ့အီၣ်အ၀ဲသ့ၣ်စ့အဃိ ၦၤလ့ၢ်ထီၣ်လ့ၢ်လိၤလီၤစှၤ၀ဲအဂ့ၢ်န့ၣ် ၦၤနီသိလ့ၣ်ဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးလၢစွ့ၤကိၣ်ကိၤဟီၣ်က၀ီၤအပူၤ ၦၤအိၣ်တၢ်လီၢ်လၢအဂၤလၢအဟဲဖံးမၤတၢ်ဖဲ(အီၤလါ)တၢ်လံၣ်တၢ်လီ တၢ်ဖံးတၢ်မၤအံၤတဖၣ်ဒီးၦၤလၢအဟဲမၤ(ကၣ်စံၣ်နိၣ်)တၢ်ဖံးတၢ်မၤသ့ၣ်တဖၣ်အံၤ ၦၤဘၣ်လဲၤကိးန့ၢ်အ၀ဲသ့ၣ်လၢ မၠၣ်၀တံၣ်တဆီအဂ့ၢ်န့ၣ် သ့ၣ်ညါဘၣ်လၢၦၤမၤတၢ်လၢ(အီၤလါ)တၢ်ဖံးတၢ်မၤတဖၣ်အအိၣ်န့ၣ်လီၤႉ လၢစွ့ၤကိၣ်ကိၤဟီၣ်က၀ီၤ က၀ီၤဒ့တဖၣ်အပူၤ ခီဖျိမ့ၣ်အူဟဲတဘၣ်ဆၢဘၣ်ကတီၢ်ဘၣ်ဒီး တရူး(အီၤလါ)ကၣ်စံၣ်နိၣ် တၢ်ဖံးတၢ်မၤလီၢ်တနီၤဆိကတီၢ်သးအဃိ ဟီၣ်က၀ီၤဖဲန့ၣ်အပူၤတၢ်ဖံးတၢ်မၤလီၤစှၤ၀ဲဒီး ခီပနံၣ်တၢ်မၤတနီၤ ဆိကတီၢ်ကွံာ်သးအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးစးထီၣ်ဖဲအပူၤကွံာ်လါစဲးပထ့ဘၢၣ်ဘူးကလၢာ်န့ၣ်ခီဖျိတၢ်ကစီၣ်ဟးထီၣ်လၢၦၤကနုာ်လီၤသမံသမိး (အီၣ်လါ)တၢ်လံၣ်တၢ်လီတၢ်ဖံးတၢ်မၤလီၢ်အဃိ ၦၤသူၣ်ဘီၣ်သးစၢ်လၢအဟဲမၤတၢ်မၤဖဲန့ၣ်သ့ၣ်တဖၣ်တနီၤန့ၣ် အ၀ဲသ့ၣ်က့ၤဆူအတၢ်လီၢ်တၢ်ကျဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
မၠၣ်၀တံၣ်၀့ၢ်ပူၤ (BGF)သုးဖိကဒဲကဒဲခးလိ၁်သးအဃိ သံ ၁ ဂၤ
လါအီးကထိဘၢၣ် ၁၁ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲမဟါလါအီးကထိဘၢၣ် ၁၀ သီ ဂီၤခီ ၂ နၣ်ရံၣ်ဘျဲၣ်အဆၢကတီၢ် လၢကညီကီၢ်စဲၣ် မၠၣ်၀တံၣ်၀့ၢ်ပူၤ သိလ့ၣ်သန့လီၢ်လံၤကပၤ (သၤတတါ) သုးခိးကီၢ်ဆၢ(BGF)တၢ်သမံသမိးတြဲၤလီၢ်န့ၣ် တၢ်ခးလိာ်သးကဲထီၣ်လၢ (BGF)သုးဖိကဒဲကဒဲအဘၢၣ်စၢၤအဃိ သံ၀ဲဒၣ် ၁ ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ကဲထီၣ်သးအခီၣ်ထံးခီၣ်ဘိန့ၣ်အ၀ဲသ့ၣ်သူကသံၣ်မူၤဘှီးဒီး(BGF)သုးဖိလၢအဟးခးနါစိၤတၢ်တဂၤအံၤ ဖဲတၢ်လူၤဖီၣ်ခးအီၤအခါကဒဲကဒဲတၢ်ခးလိာ်သးကဲထီၣ်ဒီးဖဲန့ၣ်၀ံၤလီၢ်ခံဂီၤခီ ၆ နၣ်ရံၣ် ဖဲအလဲၤစံၣ်ထီၣ်လၢယိၤကီၢ် တကပၤအဆၢကတီၢ် တၢ်ဖီၣ်ချုးကဒါအီၤအဂ့ၢ်န့ၣ် ဂံၢ်ခီၣ်ထံးတၢ်ကစီၣ်လၢဘူးဒီး(BGF)အံၤ စံး၀ဲန့ၣ်လီၤႉ အ၀ဲစံး၀ဲလၢ“လၢ(သၤတတါ) BGF တြဲၤန့ၣ်အ၀ဲသ့ၣ်သူကသံၣ်မူၤဘှီးဒီးတဲအါလိာ်သးခးလိာ်သးကဒဲကဒဲလီၤမီၤနီၤႉ မ့မ့ၢ်ၦၤလၢအစံၣ်ထီၣ်တဂၤန့ၣ်ၦၤလူၤဖီၣ်ခးအီၤမီၤနီၤႇအသံတဂၤႉၦၤလၢအခးတၢ်တဂၤန့ၣ်စံၣ်စိာ်ဃုာ်ကျိ ၂ ခိၣ်ႉ အက့ၤခးဆၢကဒါတၢ်ႇၦၤလူၤဖီၣ်ခးအီၤဘျီအလဲၤစံၣ်ထီၣ်လၢယိၤကီၢ်တကပၤႉခဲအံၤယိၤသုးဖီၣ်အီၤန့ၢ်လံႇ(BGF)က့ၤကိးအီၤလံ”အဂ့ၢ်န့ၣ် စံး၀ဲန့ၣ်လီၤႉ ခီဖျိတၢ်ဂ့ၢ်အံၤအဃိမၠၣ်၀တံၣ်၀့ၢ်ပူၤၦၤကမျၢၢ်တဖၣ်နၢ်ဟူတၢ်ကစီၣ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခးမၠၣ်၀တံၣ်ဒီးလၢတၢ်န့ၣ်အဃိလၢကျဲပူၤန့ၣ်ၦၤဟးထီၣ်က့ၤလီၤတအိၣ်လၢၤဘၣ်အဂ့ၢ်န့ၣ် မၠၣ်၀တံၣ် ကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါအီးကထိဘၢၣ် ၁၀ သီအနံၤလီၤႉ “ပနၢ်ဟူကျိသီၣ်န့ၣ်မုၢ်တ၀ါဒံးဘၣ်ႉတၢ်ကစီၣ်ဟးထီၣ်လၢ(PDF)နုာ်လီၤခးတၢ်လၢမၠၣ်စၤနံၤ(ကီးစ်)ပျီႇ (သၤတတါ) တကပၤန့ၣ်မီၤနီၤႉၦၤတဲလၢပယီၤသုးဒီး(BGF)က၀ီၤဃာ်(PDF)ဒ်န့ၣ်မီၤနီၤႉမုၢ်၀ါထီၣ်ဘျီပနၢ်ဟူလၢ (သၤတတါ)တြဲၤန့ၣ် (BGF)ကဒဲကဒဲခးသံလိာ်သးမီၤနီၤ”အဂ့ၢ်န့ၣ် ၦၤလၢအိၣ်ဘူးဒီး(သၤတတါ)သိလ့ၣ်သန့ကပၤ အံၤတဖၣ်စံး၀ဲန့ၣ်လီၤႉ ဘၣ်ဃးတၢ်ခးလိာ်သးကဲထီၣ်လၢ(BGF)ကဒဲကဒဲအဘၢၣ်စၢၤတၢ်ဂ့ၢ်အံၤ ပဆဲးကျိးမၠၣ်၀တံၣ်(BGF)ၦၤဘၣ်မူဘၣ်ဒါ ဘၣ်ဆၣ် အ၀ဲသ့ၣ်ပံးဃာ်လီတဲစိဒီး ဘၣ်ဃးတၢ်ဂ့ၢ်အံၤပခ့ၣ်အဲးစံၣ်–ကညီတၢ်ကစီၣ် ပာ်ဂၢၢ်ပာ်ကျၢၤ၀ဲလီၤတံၢ် လီၤဆဲးတန့ၢ်ဒံးဘၣ်န့ၣ်လီၤႉ တကီၢ်ခါခဲအံၤလၢမၠၣ်၀တံၣ်၀့ၢ်ခိၣ်၀့ၢ်ဃၢၤတၢ်လီၢ်သ့ၣ်တဖၣ်န့ၣ်ပယီၤသုးႇ(BGF)ဒီးဂၢၤကီၢ်ဘံၣ်ဘၢသုးကလၢၤ တၢ်လီၢ်ဆီလီၤသးကအိၣ်အခါ(၂၀)ဘျဲၣ်ညါဒီးဒ်န့ၣ်အသိးပယီၤသုးအံၤဒ်သိး(KNLA)သုးပာ်ဖှိၣ်သုတဟဲခးအ၀ဲသ့ၣ်တဂ့ၤအဂီၢ် တၢ်လီၢ်လၢအ၀ဲသ့ၣ်မၤအါထီၣ်တၢ်ဘံၣ်တၢ်ဘၢအလီၢ်သ့ၣ်တဖၣ်န့ၣ် အ၀ဲသ့ၣ်အၦၤကဒဲကဒဲတဲအါ က့ၤခးလိာ်ကဒါသးကဲထီၣ်အိၣ်၀ဲတလီၢ်လီၢ်အဂ့ၢ်န့ၣ် မၠၣ်၀တံၣ်...
(BCMF)ကရူၢ် လဲၤမၤကွၢ်ၦၤမဲ၁်ချံဟ့ၣ်လီၤမဲာ်ဒိးလၢ ကီၢ်ဆၢဘၣ်ကီဘၣ်ခဲဒဲက၀ီၤ ၂ ဘ့ၣ်အပူၤ
လါအီးကထိဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢကီၢ်ကၠီၣ်တဲၣ် တးခ်ကီၢ်ရ့ၣ် အိဖးကီၢ်ဆၣ် အူးဖၠၣ်ဒီးနိၣ်ဖိဘၣ်ကီဘၣ်ခဲဒဲက၀ီၤ ၂ ဘ့ၣ်အပူၤ ၦၤဖိသၣ်(၅)နံၣ်ဆူဖီခိၣ်ႇ ၦၤနီၢ်ဒိၣ်ဒီးၦၤသူၣ်က့သးၦၢ်အဂၤ ၁၀၀၀ ဘျဲၣ် စးထီၣ်ဖဲအပူၤကွံာ် လါစဲးပထ့ဘၢၣ်လၢာ်အခါန့ၣ် (BCMF)ကရူၢ် လဲၤမၤကွၢ်၀ဲမဲာ်ချံဒီးဟ့ၣ်လီၤမဲာ်ဒိးအဂ့ၢ်န့ၣ် (BCMF)စံး၀ဲန့ၣ်လီၤႉ စးထီၣ်ဖဲ(၂၀၁၉)ခိ၀ံၣ်တၢ်ဆါကဲထီၣ်သးန့ၣ်လၢဒဲက၀ီၤတဖၣ်အပူၤတၢ်လဲၤမၤကွၢ်ၦၤမဲာ်ချံလဲၤဟ့ၣ်လီၤမဲာ်ဒိး တအိၣ်၀ဲဘၣ်ဒီးတကးဒံးဘၣ်အမဲာ်ညါလၢကမၤကွၢ်မဲာ်ချံအဂီၢ်ဟးထီၣ်က့ၤလီၤတၢ်ကီတၢ်ခဲအိၣ်ႇကျိၣ်စ့တၢ်တအိၣ် တယၢၤဒီးဒဲက၀ီၤဆူၣ်ချ့ၦၤဘၣ်မူဘၣ်ဒါဃ့တၢ်မၤစၢၤအဃိ(BCMF)လဲၤမၤကွၢ်ဟ့ၣ်လီၤ၀ဲမဲာ်ဒိးဒ်အံၤလီၤအဂ့ၢ်န့ၣ် (BCMF)ၦၤဘၣ်မူဘၣ်ဒါ နီၢ်ကပီၤ၀ါ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခိ၀ံၣ်ကဲထီၣ်၀ံၤအလီၢ်ခံန့ၣ်တၢ်ကရၢကရိသ့ၣ်တဖၣ်လၢအလဲၤမၤမဲာ်ဒိးလၢညါခါသ့ၣ်တဖၣ်န့ၣ် အတလဲၤဘၣ်ဖးယံၤလံႉအဃိအ၀ဲသ့ၣ်ဃ့ထီၣ်ၦၤတၢ်မၤစၢၤအဖီခိၣ်န့ၣ်ပလဲၤမၤကွၢ်မဲာ်ချံဒီးပဟ့ၣ်အ၀ဲသ့ၣ်မဲာ်ဒိးမီၤနီၤႉ တၢ်ပညိၣ်ခီန့ၣ်ဒ်လဲၣ်န့ၣ်ၦၤသူၣ်က့သးၦၢ်အိၣ်ဒဲက၀ီၤပူၤတဖၣ်န့ၣ်ကဟးထီၣ်က့ၤလီၤလၢဒဲက၀ီၤချၢန့ၣ်တၢ်ကီတၢ်ခဲအိၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်လဲၤမၤကွၢ်မဲာ်ချံတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် တၢ်သမံသမိးမၤကွၢ်မဲာ်ချံႇ ဟ့ၣ်အ၀ဲသ့ၣ်လၢ မဲာ်ဒိးဒီးၦၤလၢအဘၣ်ကွဲးဘၣ်ကါအမဲာ်ချံသ့ၣ်တဖၣ်ခီန့ၣ်တၢ်ဆဲးကျိးန့ၢ်အ၀ဲသ့ၣ်ဒီးတၢ်ဆါဟံၣ်ဘၣ်ထွဲတဖၣ်အဂ့ၢ်န့ၣ် (BCMF)ၦၤဘၣ်မူဒါ တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ တၢ်လဲၤမကွၢ်ၦၤမဲာ်ချံဘျီ၀ဲအံၤမ့မ့ၢ်နိၣ်ဖိဘၣ်ကီဘၣ်ခဲဒဲက၀ီၤန့ၣ်ၦၤဟဲမၤကွၢ်ၦၤမဲာ်ချံအိၣ်၀ဲ(၈၁၇)ဂၤအကျါ တၢ်ထုးထီၣ်န့ၢ်၀ဲမဲာ်ဒိးခဲလၢာ်အိၣ်(၈၅၄)ဘ့ၣ်ဒီးၦၤလၢအဘၣ်ကွဲးဘၣ်ကါအမဲာ်ချံ(၃၅)ဂၤအံၤခီန့ၣ် တၢ်ဆဲးကျိးန့ၢ်၀ဲဒီး တၢ်ဆါဟံၣ်လၢအိၣ်ဘူးဖဲန့ၣ်သ့ၣ်တဖၣ်န့ၣ်လီၤႉဒ်န့ၣ်အသိးမ့မ့ၢ်လၢအူးဖၠၣ်ဒဲက၀ီၤပူၤခီန့ၣ်ၦၤဟဲမၤကွၢ်ၦၤမဲာ်ချံအိၣ်၀ဲ (၈၆၉)ဂၤအကျါတၢ်ထုးထီၣ်န့ၢ်၀ဲမဲာ်ဒိးခဲလၢာ်(၉၈၆)ဘ့ၣ်ဒီးမ့မ့ၢ်ၦၤလၢအဘၣ်ကွဲးဘၣ်ကါအမဲာ်ချံတဖၣ်အံၤခီန့ၣ် တၢ်ဆဲးကျိးဆှၢအ၀ဲသ့ၣ်ဆူတၢ်ဆါဟံၣ်ဖးဒိၣ်ဒီးတၢ်ကွဲးကါကလီန့ၢ်အ၀ဲသ့ၣ်ဒ်န့ၣ်လီၤ အဂ့ၢ်န့ၣ် သ့ၣ်ညါဘၣ်လၢ(BCMF) အအိၣ်န့ၣ်လီၤႉ ဖဲအပူၤကွံာ်(၂၀၂၂)အခါစ့ၢ်ကီး တၢ်လဲၤမၤကွၢ်ၦၤမဲာ်ချံဟ့ၣ်လီၤမဲာ်ဒိးလၢမဲၢ်ရၤမိၢ်ႇမဲၢ်လးအူးႇမဲၢ်လးဘၣ်ကီဘၣ်ခဲ ဒဲက၀ီၤတဖၣ်အပူၤဒံးဒီးဒ်န့ၣ်အသိးတနံၣ်အံၤလါလၢကဟဲလါနိၣ်၀့ဘၢၣ်န့ၣ် (BCMF)ကရူၢ် ကလဲၤမၤကွၢ်ၦၤမဲာ်ချံ ဟ့ၣ်လီၤမဲာ်ဒိးလၢမဲၢ်လးအူးဒီးမဲၢ်ရၤမိၢ်ဘၣ်ကီဘၣ်ခဲဒဲက၀ီၤအပူၤအဂ့ၢ်န့ၣ် (BCMF)စံး၀ဲန့ၣ်လီၤႉ (BCMF)ဟဲမၤကွၢ်ဟ့ၣ်လီၤမဲာ်ဒိးလၢဘၣ်ကီဘၣ်ခဲဒဲက၀ီၤ ၂ ဘ့ၣ်အပူၤဒ်အံၤ ကဲထီၣ်၀ဲဒၣ်တၢ်တိစၢၤမၤစၢၤလၢ ၦၤဒဲက၀ီၤဖိလၢအမဲာ်ချံတဂ့ၤဘၣ်သ့ၣ်တဖၣ်အဂီၢ်ဒိၣ်မးအဂ့ၢ်န့ၣ် အူးဖၠၣ်ဒဲက၀ီၤ နီၢ်ကဲဖီလၢအလဲၤမၤကွၢ်အမဲာ်ချံ တဂၤ စံး၀ဲဒ်အံၤန့ၣ်လီၤႉ “ခဲအံၤၦၤဟဲမၤန့ၢ်ၦၤဒ်အံၤပသးခုဒိၣ်မးလီၤႉယၤန့ၣ်ယအဲၣ်ဒိးမၤမဲာ်ဒိးန့ၣ်ဖးယံၤလံႉပကဘၣ်လဲၤဒိးသိလ့ၣ်လၢမဲၢ်ဆီးညါန့ၣ်ပဒိးတကဲဘၣ်ပမဲာ်မူးပဘှီးမီၤနီၤႉတၢ်ခဲလၢာ်န့ၣ်ပစံးဘျုးဘၣ်အ၀ဲသ့ၣ်ဒိၣ်မးႉပမ့ၦ့ၤဘၣ်လၢကျိၣ်လၢစ့န့ၣ် ကလၢာ်ဒံးႇ ပၦ့ၤနါက့တန့ၢ်ဘၣ်ႉယန့ၢ်ဘၣ်ခံဘ့ၣ်လၢကွၢ်တၢ်ယံၤကွၢ်တၢ်ဘူးအဂီၢ်မီၤနီၤႉ”အဂ့ၢ်န့ၣ်...
ဒ်သိးတၢ်သုတဟဲခး လ့က့ၣ်ကိ၁် ကျိဖးဒိၣ်လူၢ်တဂ့ၤအဂီၢ် သုးကီၣ်ကးမၤအါထီၣ်အသုးဂံၢ်ဘါ
လါအီးကထိဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢမၠၣ်၀တံၣ်ကလံၤထံး လ့က့ၣ်ကိာ်၀့ၢ်သီအဃၢၤ သုးကီၣ်ကး(စွဲၤတီၤကိ)ကျိဖးဒိၣ်လူၢ်အံၤ ဒ်သိးတၢ်ဟုတဟဲထီၣ်ခး၀ဲ တဂ့ၤအဂီၢ် သုကီၣ်ကးမၤအါထီၣ်အသုးဂံၢ်ဘါဒီး အိၣ်ကတီၤထီၣ်သးလၢကခးလီၤကျိဖးဒိၣ်အဂ့ၢ်န့ၣ် လ့က့ၣ်ကိာ် ဒုးယၤဟီၣ်က၀ီၤဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤႉ လၢလ့က့ၣ်ကိာ်၀့ၢ်သီဃၢၤ ပယီၤသုး(စွဲၤတီၤကိ)ကျိဖးဒိၣ်လူၢ်တၢ်လီၢ်ဒီး လ့က့ၣ်ကိာ် (ပါခၠၤကိ)အခိၣ်အဃၢၤ တၢ်လီၢ်သ့ၣ်တဖၣ်န့ၣ် ပယီၤသုးဒိးလီၤဃာ်၀ဲဟီၣ်လာ်မ့ၣ်ပိၢ်အါအါဂီၢ်ဂီၢ်ဒီး လၢန့ၣ်အမဲာ်ညါဒ်သိးကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ် သုတဟဲထီၣ်ခးအ၀ဲသ့ၣ်သုးကလၢၤတဂ့ၤအဂီၢ်န့ၣ် အ၀ဲသ့ၣ်မၤအါထီၣ် အသုးဂံၢ်ဘါအဂ့ၢ်န့ၣ် လ့က့ၣ်ကိာ် ဒုးယၤဟီၣ်က၀ီၤဂံၢ်ခီၣ်ထံးတၢ်ကစီၣ် စံး၀ဲဒ်အံၤန့ၣ်လီၤႉ “စှၤသီအတီၢ်ပူၤအံၤလၢ(ပါခၠၤကိ)တကပၤန့ၣ်ပယီၤသုးဟဲအါထီၣ်မီၤနီၤႉလၢ(လဲၣ်ခၣ်တီၤ)တကပၤန့ၣ်နါက့ တၢ်ဒုးတဂၢၢ်ထီၣ်ဒံးဘၣ်ႉပယီၤသုးတကပၤနါက့ဒ်သိးတၢ်သုတဟဲထီၣ်ခးအ၀ဲသ့ၣ်(စွဲၤတီၤကိ)ကျိဖးဒိၣ်လူၢ်တဂ့ၤ အဂီၢ်န့ၣ်အ၀ဲသ့ၣ်ဒိးလီၤဃာ်မ့ၣ်ပိၢ်လၢ၀း၀းတရံးလီၤႉဘၣ်ယိၣ်၀ဲလၢၦၤကဟဲခးအ၀ဲသ့ၣ်ကျိဖးဒိၣ်လူၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်(၂၀၂၁)လါဒံၣ်စ့ဘၢၣ်အခါန့ၣ် လၢလ့က့ၣ်ကိာ်ဟီၣ်က၀ီၤအပူၤ တၢ်ဒုးစးထီၣ်ကဲထီၣ်၀ဲလၢပယီၤသုးဒီး(KNLA) အဘၢၣ်စၢၤဒီး ဖဲတနံၣ်အံၤ(၂၀၂၃)လါအီးကထိဘၢၣ်အတီၢ်ပူၤ ပယီၤသုးဘၣ်ယိၣ်၀ဲလၢဟီၣ်က၀ီၤ(KNLA)သုးပာ်ဖှိၣ် ကထီၣ်ဟံန့ၢ်အ၀ဲသ့ၣ်သုးကလၢၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိးစှၤသီအတီၢ်ပူၤလၢလ့က့ၣ်ကိာ်၀့ၢ်သီအဃၢၤခီဖျိပယီၤသုးနုာ်လီၤမၤဒုးယၤတၢ်ဟူးတၢ်ဂဲၤအဃိ ၦၤကမျၢၢ်လၢအက့ၤအိၣ်လၢက၀ီၤဒ့ပူၤတဖၣ်ဘၣ်ယိၣ်၀ဲလၢတၢ်ဒုးကကဲထီၣ်ကဒါအဂ့ၢ်န့ၣ် လ့က့ၣ်ကိာ် က၀ီၤဒ့ပူၤ ကမျၢၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲတၢ်တနွံအံၤပယီၤသုးဒီး(BGF)ဟးဆှၣ်တၢ်လၢလ့က့ၣ်ကိာ်၀့ၢ်ချၢကစၢၢ်တကပၤန့ၣ်မီၤနီၤႉ လၢမုၢ်နၤခီန့ၣ်အ၀ဲသ့ၣ်ဟးအိၣ်ခိးခူသူၣ်တၢ်ႉလၢလဲၣ်ခၣ်တီၤတကပၤန့ၣ်နါက့တၢ်ဒုးကဲထီၣ်အိၣ်ဒံးအသိး (စွဲၤတီၤကိ)ပယီၤသုးကျိဖးဒိၣ်လူၢ်အံၤစ့ၢ်ကီးခးလီၤကျိဖးဒိၣ်အိၣ်အဃိ ကက့ၤအိၣ်လၢလ့က့ၣ်ကိာ်အဂီၢ် တၢ်ဘံၣ်တၢ်ဘၢတအိၣ်ဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤလၢတီနီၢ်မုၢ်ထီၣ် မၠၣ်၀တံၣ်–ဂီၤလ့ၤကျဲ အူကြ့ၣ်ထၣ်ပယီၤသုးကလၢၤႇမီခံပယီၤသုးကလၢၤတကပၤန့ၣ် တၢ်ဒုးကဲထီၣ်၀ဲလၢပယီၤသုးဒီး(KNLA)သုးပာ်ဖှိၣ်အဘၢၣ်စၢၤဒီး တၢ်လဲၤတ့ၢ်လီၤဒြိမ့ၣ်ပိၢ်ႇတၢ်လဲၤခးစဲးပြဲး ပယီၤသုး အိၣ်ဒံး၀ဲအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်သုးကျိၤ ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
(KTLA)ဒွဲၣ်အူအီၣ် စၢၢ်ထးတၢ်ဖံးတၢ်မၤလီၢ်အံၤ တဘၣ်ဃးဒီးအ၀ဲသ့ၣ်တၢ်ကရၢကရိဘၣ်အဂ့ၢ် KNU စံး၀ဲ
လါအီးကထိဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် မုၢ်ထီၣ်ကလံၤထံးဟီၣ်က၀ီၤအပူၤ ဖဲလါအီးကထိဘၢၣ် ၇ သီအနံၤ သုးခိၣ်အဲၣ်ခွံတီခိၣ်ရိၣ်မဲကီၢ်သူလ့ၤသုးမုၢ်ဒိၣ်(KTLA)အတၢ်လဲၤဒွဲၣ်အူအီၣ်စၢၢ်ထးတၢ်ဖံးတၢ်မၤလီၢ်တၢ်ဂ့ၢ်အံၤ တဘၣ်ဃးဒီးအ၀ဲသ့ၣ်တၢ်ကရၢကရိဘၣ်အဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲကီၢ်ရ့ၣ်(သုးက့ ၄)တကပၤစံး၀ဲန့ၣ်လီၤႉ (ဖိလၣ်)စၢၢ်ထးတၢ်ဖံးတၢ်မၤလီၢ်အံၤလၢအအိၣ်ဒီးသုးကီၣ်ကးတၢ်ပျဲတၢ်မၤအီၤလၢ(ခ့ၣ်အဲၣ်ယူၣ်)ဟီၣ်က၀ီၤပူၤ ကအိၣ်လၢ ၂ နံၣ်ဃၣ်ဃၣ်လံဒီး တၢ်ဖံးတၢ်မၤအံၤတၢ်ဘၣ်ထွဲဒီးခ့ၣ်အဲၣ်ယူၣ်တအိၣ်နီတမံၤဘၣ်အသိး တန့ၢ်ဘၣ်တၢ်ဘျုးအဖှိၣ် နီတမံၤဘၣ်အဂ့ၢ်န့ၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ဘၣ်ထွဲဒီးၦၤတအိၣ်နီတမံၤဘၣ်ႉအိၣ်ဒၣ်တၢ်ဃု(စိးစွဲ)ၦၤႇတၢ်ဟးတဲဟးဂီၤၦၤတၢ်ဃုတၢ်ကမဲၤ ကမီၤတဖၣ်န့ၣ်လီၤႉဒ်သိးကမျၢၢ်တဖၣ်ကနၢ်ပၢၢ်ကမၣ်ကထံၣ်ကမၣ်ၦၤလီၤႉအဃိန့ၣ်မ့ၢ်တၢ်တခါလၢတၢ်ထံၣ်ကမၣ် လိာ်သးဖးဒိၣ်တခါညါႉစၢၢ်ထးတဖျၢၣ်န့ၣ်ဘၣ်ဃးဒီးပယီၤအတၢ်ဟ့ၣ်တၢ်ပျဲမ့ၢ်၀ဲဒၣ်တရူးဒီးပယီၤမၤသကိးတၢ်လီၤႉတၢ်ဘၣ်ထွဲဒီးခ့ၣ်အဲၣ်ယူၣ်ကရၢတၢ်ဟ့ၣ်တၢ်ပျဲတအိၣ်နီတမံၤဘၣ်ႉတန့ၢ်ဘၣ်စ့ၢ်ကီးတၢ်ဘၣ်ဘျုးနီတမံၤဘၣ်”အဂ့ၢ်န့ၣ် စံး၀ဲန့ၣ်လီၤႉ စၢၢ်ထးတၢ်ဖံးတၢ်မၤလီၢ်အံၤအိၣ်ဆီလီၤသးလၢဟ့ၤဒါသ၀ီကရူၢ် ဖိၣ်လဲၣ်သ၀ီပူၤဒီး တၢ်ဖံးတၢ်မၤလီၢ်အံၤ ဘၣ်တၢ်ပာ်ဖှိၣ် မၤသကိးအီၤလၢပယီၤသုးဒီးခ့ၣ်အဲၣ်ယူၣ်ခိၣ်နၢ်တနီၤဒီး တၢ်အဘျုးအဖှိၣ်လၢ အန့ၢ်သ့ၣ်တဖၣ်အ၀ဲသ့ၣ်ဟ့ၣ်နီၤလီၤသး တကးဒံးဘၣ်အမဲာ်ညါခီဖျိစၢၢ်ထးတၢ်ဖံးတၢ်မၤလီၢ်အံၤအဃိထံကျိထံကွာ် ကတာ်ထီ၀ဲဒီး ခီဖျိကဲထီၣ်တၢ်ကီတၢ်ခဲလၢ ကမျၢၢ်အဖီခိၣ်အဃိဘၣ်တၢ်နုာ်လီၤဒွဲၣ်အူအီၣ်ကွံာ်၀ဲဒ်အံၤလီၤအဂ့ၢ်န့ၣ် သုးခိၣ်အဲၣ်ခွံ စံး၀ဲလၢအ၀ဲသ့ၣ်ကရူၢ်(KTLA) ထုးထီၣ်ရၤလီၤတၢ်ဂီၤမူအပူၤန့ၣ်လီၤႉ စၢၢ်ထးတၢ်ဖံးတၢ်မၤလီၢ်အံၤဒိးန့ၢ်ဘၣ်အခွဲးလၢကခူၣ်၀ဲစးထီၣ်(၂၀၁၉)တုၤလၢ(၂၀၃၀)နံၣ်အတီၢ်ပူၤညါဒီး ဘၣ်ဆၣ် ခီဖျိဟီၣ်က၀ီၤတၢ်အိၣ်သးအဃိစးထီၣ်ဖဲအပူၤကွံာ်(၂၀၂၂)နံၣ်လၢာ်န့ၣ် ခီပနံၣ်ၦၤဘၣ်မူဘၣ်ဒါတဖၣ်သုးလီၢ်သုကျဲ ကယီကယီဒီးဘၣ်ပတုာ်ကွံာ်တၢ်ဖံးတၢ်တၢ်မၤအံၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါလၢၢ်ဒီးဟီၣ်လၢတၢ်ခူၣ်ဟးထီၣ်အီၤသ့ၣ်တဖၣ်အံၤအဃိထံကျိလၢအိၣ်မုၢ်ထီၣ်ဟီၣ်က၀ီၤပူၤတဖၣ် ဟးဂီၤဒီးတကးဒံးဘၣ်အမဲာ်ညါတၢ်စူၤခါအတီၢ်ပူၤတၢ်ဖံးအီၣ်မၤအီၣ်လီၢ်ကျီးဒီးတိၤသ့ၣ်တဖၣ်ဟးဂီၤ၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“ထံကျိဟးဂီၤန့ၣ်တမ့ၢ်ခဲအံၤဘၣ်ဟးဂီၤလၢညါလံၤလံၤလံႉအစးထီၣ်ဟးဂီၤခဲအံၤန့ၣ်လၢကစၢၢ်ဒိၣ်ထံခံတကပၤန့ၣ်မီၤနီၤႉမ့၀ံၤဖဲအပူၤကွံာ်တဘျီန့ၣ်မုၢ်ထီၣ်ဟီၣ်က၀ီၤန့ၣ်ထံဒိၣ်ထီၣ်ႉတိၤဟးဂီၤန့ၣ်တမ့ၢ်တၢ်စူၤဒိၣ်တလၢအဃိဘၣ်ႉသုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ်အ၀ဲသ့ၣ်စးထီၣ်ခူၣ်၀ဲဒၣ်စၢၢ်ထးအံၤပၢၢ်တုၤလၢထံဒုထီၣ်ႉအဃိထံန့ၢ်လီၤ ယွၤတဒ်သိး လၢညါခါလၢၤဘၣ်အဃိထံကျိကၢၢ်ကပၤဟီၣ်ခိၣ်လာ်ဘျီပၢၢ်တုၤလၢတိၤန့ၣ်အဲးထီၣ်အသး”အဂ့ၢ်န့ၣ် စံး၀ဲန့ၣ်လီၤႉ ဒ်န့ၣ်အသိးဖဲတနံၣ်အံၤလါယူၤအခါစ့ၢ်ကီး(KTLA)လဲၤဒွဲၣ်အူအီၣ်၀ဲ ကစၢၢ်ဒိၣ်ကီၢ်ဆၣ် ဖီတီသ၀ီ ထံလီမ့ၣ်အူတၢ်တိၤကျဲၤလီၢ်လံၤ တၢ်သူၣ်ထီၣ်ႇစဲးဖီကဟၣ်ဒီးသိလ့ၣ်ဘျၢၣ်ဟီၣ်ခိၣ်သ့ၣ်တဖၣ်ဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ