ကၠဲးထိၣ်ကီၢ်ဆၣ်ပူၤ တၢ်ခးသံ(BGF)ၦၤတဂၤ
လါအီးကထိဘၢၣ် ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲလါအီးကထိဘၢၣ် ၁၅ သီအနံၤ တၢ်ခးသံ၀ဲသုးခိးကီၢ်ဆၢ(BGF)ၦၤတဂၤ အဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤ ဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ လၢတလၢၤကီၢ်စဲၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ်အပူၤ (BGF)အၦၤအီၤမၠိလွ့ၤ(ကိး)စီၤနါအူ ၆၂ နံၣ် လၢအိၣ် ဖဲၣ်ကလ့ၣ်သ၀ီပူၤတဂၤအံၤ ဖဲအအိၣ်(အ့ၤကၣ်ဘိၤ)သ၀ီက့ၤလၢကျဲအခါ ဖီၣ်စုက၀ဲၤကရူၢ်လၢတၢ်သ့ၣ်ညါအမံၤအံၤ ခးအီၤဒီးဘၣ်၀ဲဒၣ်အယီၢ်ဒ့ချၢဃံဘၣ်ဒိဘၣ်ထံးအဃိဖဲတၢ်လဲၤဆှၢအီၤဆူကၠဲးထိၣ်တၢ်ဆါဟံၣ်အခါသံ၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“အီၤန့ၣ်လၢညါခါအကဲ(PC)အဟဲက့ၤနုာ်လီၤလၢ(BGF)မီၤနီၤႉ တၢ်အီၣ်ကျးလၢ အအိးထီၣ်၀ဲဖဲ(ဖဲၣ်ကလ့ၣ်)သ၀ီပူၤန့ၣ်စ့ၢ်ကီးအကျးလီၤအကစၢ်တၢ်ဂီၤဒီးသုးယူၣ်နံၣ်ဖီမီၤနီၤႉ စွ့ၤ(KTV)ဒီး တၢ်အီၣ်ကျးန့ၣ်အိးထီၣ်တွဲ၀ဲႉဖဲလီၢ်ခံအံၤၦၤတဲလၢအက့ၤငါကဒါန့ၢ်ၦၤလၢအဂၤႉဖဲတၢ်တနံၤန့ၣ်အက့ၤလၢဟံၣ်အမၤကဆှီဟံၣ်၀ံၤဖဲအဟဲက့ၤအခါတၢ်ခးသံအီၤ”အဂ့ၢ်န့ၣ် စံး၀ဲန့ၣ်လီၤႉ စီၤနါအ့အစိၣ်အံၤအဟံၣ်ဖိဃီဖိကကုၢ်ထီၣ်အီၤဖဲမဟါလါအီးကထိဘၢၣ် ၁၆ သီအနံၤ ဘၣ်ဆၣ် ကၠဲးထိၣ်တၢ်ဆါဟံၣ် တပျဲထုးထီၣ်၀ဲအစိၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢၦၤဘူးဒီးအ၀ဲသ့ၣ်တဖၣ်အအိၣ်န့ၣ်လီၤႉ “တမ့ၢ်ပဖွဲးမၤ၀ဲဘၣ်ႉကယဲၢ်မ့ၢ်တၢ်လၢပမၤအီၤန့ၣ်ပထုးထီၣ်ပာ်ဖျါအီၤခဲလၢာ်လီၤႉပနၢ်ဟူမီၤနီၤလၢၦၤခးသံအီၤန့ၣ်ႉ တမ့ၢ်ပဖွဲးမၤဘၣ်”အဂ့ၢ်န့ၣ် ဘၣ်ဃးတၢ်ဂ့ၢ်ကဲထီၣ်သးအံၤ ကၠဲးထိၣ်တၢ်ပၢၢ်ဆၢကရူၢ်(KRF) တၢ်ဘိးဘၣ်ရၤလီၤမူဒါခိၣ် စံး၀ဲန့ၣ်လီၤႉ ၦၤလၢအသံတဂၤအံၤအပူၤကွံာ်မ့ၢ်၀ဲ(KNU/KNLA-PC)ဒီးဖဲန့ၣ်တဆီအပူၤကွံာ်(၂၀၁၁)နံၣ်အခါန့ၣ် အဟဲက့ၤနုာ်လီၤ လၢ(BGF)ပူၤ၀ံၤလီၢ်ခံအ၀ဲဒိးန့ၢ်ဘၣ်ကျိၣ်စ့တၢ်ဆီၣ်ထွဲမၤစၢၤလၢသုးကီၣ်ကးအအိၣ်အါမးန့ၣ်လီၤႉ ဒ်န့ၣ်အသိး လၢအတၢ်အီၣ်ကျးပူၤပယီၤသုးမၤသံတၢ်ပၢၢ်ဆၢသုးကရူၢ်အၦၤတနီၤကဲထီၣ်တ့ၢ်အသးအိၣ်၀ဲအဂ့ၢ်န့ၣ် ကမျၢၢ်စံး၀ဲ န့ၣ်လီၤႉ ဒ်န့ၣ်အသိးဖဲအပူၤကွံာ်လါအီးကူး ၂၄ သီအခါစ့ၢ်ကီး လၢကၠဲးထိၣ်ကီၢ်ဆၣ် ကီၣ်ထ့သ၀ီကပၤ (BGF)သုးခိၣ်တဂၤ ဖဲအဟဲက့ၤဒီးသိလ့ၣ်အခါ ခီဖျိ(KRF)တၢ်ပၢၢ်ဆၢသုးပာ်ဖှိၣ်ကရူၢ်အဃိ သုးခိၣ်တဂၤအံၤဒီး ၦၤကမျၢၢ်ပိာ်ခွါတဂၤ သံ၀ဲတဘျီဃီဖဲတၢ်ကဲထီၣ်သးလီၢ်န့ၣ်လီၤႉ
ကွံလၢၢ်တၢပယီၤသုးကလၢၤခးလီၤကျိဖးဒိၣ်အဃိ ၦၤကမျၢၢ်က့ၤဟံၣ်တဘူၣ်ဒံးဘၣ်
လါအီးကထိဘၢၣ် ၁၇ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် နိၣ်တကီကီၢ်ဆၣ်အပူၤ ခီဖျိကွံလၢၢ်တၢပယီၤသုး ကလၢၤအံၤခးလီၤကျိဖးဒိၣ်တလီၢ်လီၢ်အဃိ လီၢ်က၀ီၤၦၤသ၀ီဖိလၢအဃ့ၢ်တဖၣ်တုၤလၢခဲက့ၤအိၣ်လၢသ၀ီပူၤ တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်(၂၀၂၂)နံၣ်ဘူးကလၢာ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)နုာ်လီၤခး၀ဲကွဲလၢၢ်တၢပယီၤသုး သုးကလၢၤအံၤဒီးဖဲန့ၣ်ခီဖျိပယီၤသုးက့ၤခးလီၤကဒါကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်အဃိသ၀ီအိၣ်တၢ်ခိၣ် တၢ်ဃၢၤဖဲန့ၣ်တဖၣ်လၢအမ့ၢ်ကွံလၢၢ်တၢႇတီၤကလ့ႇမဲတလဲဒီးထံသဘျုၣ်ခံသ၀ီဖိဘၣ်ဃ့ၢ်ထီၣ်တကထိဘျဲၣ်ညါန့ၣ်လီၤႉ တကီၢ်ခါခဲအံၤပယီၤသုးလၢအဟဲထီၣ်(စစ်ကူ)တဖၣ်အံၤဒီး(KNLA)အဘၢၣ်စၢၤတၢ်ဒုးကဲထီၣ်၀ဲတလီၢ်လီၢ်အသိး ပယီၤသုးခးလီၤကျိဖးဒိၣ်လၢသ၀ီပူၤအိၣ်ဒံး၀ဲအဂ့ၢ်န့ၣ် လီၢ်က၀ီၤသ၀ီဖိတဂၤ စံး၀ဲန့ၣ်လီၤႉ အ၀ဲစံး၀ဲလၢ“လၢသုးကလၢၤန့ၣ်နါက့ပယီၤသုးအိၣ်ႉပယီၤသုးလၢအဟဲထီၣ်(စစ်ကူ)တဖၣ်အံၤဒီးတၢ်ပၢၢ်ဆၢကရူၢ် အဘၢၣ်စၢၤတၢ်ဒုးကဲထီၣ်အိၣ်ႉပယီၤသုးခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်အဃိၦၤသ၀ီဖိက့ၤအိၣ်လၢ သ၀ီပူၤတဘူၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ ပယီၤသုးအံၤကဟဲထီၣ်(စစ်ကူ)လၢပျီပူၤအဂီၢ်ဟဲထီၣ်၀ဲတန့ၢ်ဘၣ်အဃိအ၀ဲသ့ၣ်ဆှၢထီၣ်တၢ်အီၣ်တၢ်အီႇအသုးလၢ ကဘီယူၤဒီးတၢ်ပၢၢ်ဆၢသုးကရူၢ်တကပၤစ့ၢ်ကီးက၀ီၤဃာ်ပယီၤသုးကလၢၤအံၤလၢတၢ်ခိၣ်တၢ်ဃၢၤဖဲန့ၣ်၀း၀းတရံး အဂ့ၢ်န့ၣ် ဟီၣ်က၀ီၤတၢ်ပၢၢ်ဆၢသုးကရူၢ်ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ “ခဲအံၤတၢ်ဒုးကဲထီၣ်ဒိၣ်ဒိၣ်မုၢ်မုၢ်ဒုတအိၣ်ဒံးဘၣ်ႉပက၀ီၤဃာ်အ၀ဲသ့ၣ်(ပယီၤသုး)၀း၀းတရံးလီၤႉ တၢ်လီၢ်ဖဲန့ၣ်န့ၣ်ကဘီယူၤကစီၣ်လီၤအဂီၢ်ကီတစဲးႉအ၀ဲသ့ၣ်သ့ၣ်ညါလၢပအိၣ်ခိးအ၀ဲသ့ၣ်(၂၄)နၣ်ရံၣ်ၦဲၤၦဲၤအဃိ အ၀ဲသ့ၣ်ဟးခးလီၤတၢ်၀း၀းတရံးလီၤ”အဂ့ၢ်န့ၣ် ဟီၣ်က၀ီၤ(KNLA)ၦၤဘၣ်မူဘၣ်ဒါတဂၤ စံး၀ဲန့ၣ်လီၤႉ ကွံလၢၢ်တၢပယီၤသုးကလၢၤအံၤမ့ၢ်သုးကလၢၤတဖျၢၣ်လၢအပူၤကွံာ်(၂၀၂၂)လါအီးကထိဘၢၣ်အခါ ခ့ၣ်အဲၣ်ယူၣ် (သုးက့ ၆) သုးရ့ၣ် ၁၇ႇ သုးရ့ၣ် ၁၈ သုးပာ်ဖှိၣ်လဲၤထီၣ်မၤန့ၢ်တ့ၢ်၀ဲသုးကလၢၤတဖျၢၣ်န့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၂၂ သီအခါစ့ၢ်ကီး ပယီၤသုး(၁၃)စုတီၤဖီလာ်(ခမရ-၅၅၈)ဒီး(ခမရ-၅၆၁)သုးရ့ၣ် သုးခိၣ်စိ ယဲသွ့ႇ သုးခိၣ်စိ ဆါမီၤမီၤ ဒီး သုးခိၣ်စိ မၠိမ့အီၤ တီခိၣ်ရိၣ်မဲအၦၤတဖၣ် ဒွဲၣ်အူအီၣ်၀ဲ မဲတလဲသ၀ီဖိ အဟံၣ် ၃ ဖျၢၣ်ႇ သိလ့ၣ်ဒီးဆဲးကၢးသ့ၣ်တဖၣ်ဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
သုးမီၤစိရိၤအခိၣ်စံးဘၣ်ကရူၢ်လၢအဆဲးလီၤတၢ်ပတု၁်တၢ်ခးတဖၣ်လၢကစိ၁်မူစိ၁်ဂဲၤ(NCA)တၢ်အၢၣ်လီၤအီလီၤ
လါအီးကထိဘၢၣ် ၁၆ သီႇ ၂၀၂၃ နံၣ်ႇ ခ့ၣ်အဲးစံၣ် ကရူၢ်ကရၢလၢအဆဲးလီၤထံကီၢ်ဒီဘ့ၣ်တၢ်ပတုာ်တၢ်ခး(NCA)လံာ်ဃံးဃာ်အံၤတဖၣ်ကစိာ်မူစိာ်ဂဲၤ(NCA)တၢ်အၢၣ်လီၤ အီလီၤအဂ့ၢ်န့ၣ် သုးမီၤစိရိၤအခိၣ် သုးခိၣ်ကျၢၢ်ဒိၣ်စိ မ့အီၤလဲၤ စံးလီၤ၀ဲဖဲမဟါလါအီးကထိဘၢၣ် ၁၅ သီ အနံၤလၢတၢ်မၤ (NCA)နံၣ်ဆဲးဆၢၦဲၤထီၣ် ၈ ၀ီတ၀ီ တၢ်ရဲၣ်တၢ်ကျဲၤမူးအပူၤန့ၣ်လီၤႉ သုးမီၤစိရိၤအခိၣ်စံးလီၤ၀ဲလၢ“ထံကီၢ်ကအိၣ်မုာ်အိၣ်ခုၣ်အဂီၢ်ပကဘၣ်ပာ်လုၢ်ပာ်ၦ့ၤ(NCA)ဒီး လၢတၢ်န့ၣ်အဃိ တၢ်ကရၢကရိလၢအဆဲးလီၤ(NCA)လံာ်ဃံးဃံာ်တဖၣ်အံၤစ့ၢ်ကီးအလီၢ်အိၣ်လၢကဘၣ်စိာ်မူစိာ်ဂဲၤ(NCA)တၢ်အၢၣ်လီၤ အီလီၤဒီးကအိၣ်ဖျိဖျိဖျါဖျါႇကအိၣ်ဒီးတၢ်သ့ဟံမူဒါႇကဆဲးမၤဖျါထီၣ်တၢ်အမိၢ်လံၤမိၢ်ၦၢ်”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါတၢ်ကဘၣ်ပာ်လုၢ်ပာ်ၦ့ၤ(NCA)ဒီးလၢတၢ်န့ၣ်အဃိကလုာ်ဒူၣ်ဖီၣ်စုက၀ဲၤလၢအဆဲးလီၤတၢ်ပတုာ်တၢ်ခးသ့ၣ်တဖၣ်အံၤစ့ၢ်ကီးကဟဲထီၣ်ဘၣ်တၢ်ထံၣ်လိာ်တၢၣ်ပီၣ်တဲသကိးတၢ်ရဲၣ်တၢ်ကျဲၤဒီးႇကလုာ်ဒူၣ်ဖီၣ်စုက၀ဲၤလၢအတဆဲးလီၤတၢ်ပတုာ်တၢ်ခးဒံးဘၣ်သ့ၣ်တဖၣ်အံၤစ့ၢ်ကီးကဆဲးလီၤဘၣ်လံာ်ဃံးဃာ်ဒီးသူၣ်ထီၣ်သကိးတၢ်မုာ်တၢ်ခုၣ်အဂ့ၢ်န့ၣ် သုးမီၤစိရိၤအခိၣ် စံးလီၤ၀ဲန့ၣ်လီၤႉ တကးဒံးဘၣ်အမဲာ်ညါသုးမီၤစိရိၤအခိၣ်မ့အီၤလဲၤစံးလီၤ၀ဲလၢအပူၤကွံာ်(၂၀၁၁)ဒံၣ်မိၣ်ခြ့ၣ်စံၣ် ပဒိၣ်စိၤအခါန့ၣ် ဒံၣ်မိၣ်ခြ့ၣ်စံၣ်သနူစးထီၣ်အခီၣ်ထံးခီၣ်ဘိဂ့ၤ၀ဲဒီးထံကီၢ်တၢ်လဲၤထီၣ်လဲၤထီအိၣ်ထီၣ်ဖဲအကြၢးအသိး ဖဲ(NCA)ဟဲအိၣ်ဖျါ ထီၣ်၀ံၤလီၢ်ခံလၢတၢ်မုာ်တၢ်ခုၣ်အဂီၢ်ဒိးန့ၢ်ဘၣ်တၢ်အဆၢလၢအဂ့ၤသ့ၣ်တဖၣ်အဂ့ၢ်န့ၣ် စံးလီၤ၀ဲလၢ တၢ်ကတိၤအိးထီၣ်ပူၤ န့ၣ်လီၤႉ သုးမီၤစိရိၤစံး၀ဲလၢတၢ်ကဘၣ်ပာ်လုၢ်ပာ်ၦ့ၤ(NCA)ဘၣ်ဆၣ် ဖဲ ၂၀၂၁ အတၢ်ဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤအံၤ လုၢ်သ့ၣ်ခါပတာ်မၤကမၣ်၀ဲ(NCA)ဂံၢ်ခီၣ်ထံးတၢ်ဘျၢသဲစးတဖၣ်လံဒီးမၤဟးဂီၤကွံာ်၀ဲလံာ်ဃံးဃာ်အဂ့ၢ်န့ၣ် KNU-ကညီဒီကလုာ်စၢဖှိၣ်ကရၢလၢအဆဲးလီၤတၢ်ပတုာ်တၢ်ခးအံၤဒီး ကီၢ်ပယီၤ ၦၤကၠိဖိ ဒံၣ်မိၣ်ကရဲၣ်တ့ၣ်သုးမုၢ်(ABSDF), ခၠီဒီကလုာ်သုးမုၢ်(CNF)ထုးထီၣ်ဘိးဘၣ်ရၤလီၤသဃဲၤ၀ဲလံာ်တၢ်ပာ်ဖျါအံၤဖဲအပူၤကွံာ်လါအီးကထိဘၢၣ် ၁၂ သီ အနံၤ န့ၣ်လီၤႉ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ၦၤကတိၤတၢ်ပၢ ပဒိၣ်စီၤတီနံ စ့ၢ်ကီးစံး၀ဲလၢ“ဆၢကတီၢ်ခဲအံၤ ပထံၣ်ဘၣ်လၢ သုးမီၤစိရိၤအံၤဂုာ်ကျဲးစၢးမၤ၀ဲတၢ်ထံၣ်လိာ်တၢၣ်ပီၣ်တဲသကိးတၢ်မုာ်တၢ်ခုၣ်ဒီးနီၢ်နီၢ်န့ၣ်နမၤတၢ်တၢၣ် ပီၣ်တဲသကိး တၢ်မုာ်တၢ်ခုၣ်လ့ၤတက့ၤတသ့ဘၣ်ႉစးထီၣ်လၢသုးဟံးန့ၢ်တၢ်စိတၢ်ကမီၤန့ၣ်ဂံၢ်ခီၣ်ထံးတၢ်ဘျၢသဲစးတအိၣ်၀ဲလၢၤဘၣ်ႇ ပဒိၣ်စ့ၢ်ကီးတအိၣ်လၢၤဘၣ်ဒီးဘျီၣ်ဒိၣ်စ့ၢ်ကီးတအိၣ်လၢၤဘၣ်ႉအ၀ဲအကစၢ်ဒၣ်၀ဲပျုၢ်ဂဲၤဆၢထၢၣ်ဟံန့ၢ်တၢ်စိတၢ်ကမီၤဘျီ ပကဘၣ်လဲၤတၢၣ်ပီၣ်တၢ်မုာ်တၢ်ခုၣ်ဒီးအီၤန့ၣ်လ့ၤတက့ၤတသ့ဘၣ်”အဂ့ၢ်န့ၣ် စံးလီၤ၀ဲလၢ ခ့ၣ်အဲၣ်ယူၣ်လီၢ်ခၢၣ်သး အ(ဖ့းစ်ဘူး)ပူၤန့ၣ်လီၤႉ (NCA)နံၣ်ဆဲးဆၢၦဲၤထီၣ် ၈ ၀ီတ၀ီ...
ခီၣ်မဲဒိၣ်သုးရ့ၣ်ခိၣ် သုးခိၣ်စးလိ ဟးစံၣ်အိၣ်ခူသူၣ်အဂ့ၢ် KTLA စံး၀ဲ
လါအီးကထိဘၢၣ် ၁၆ သီႇ ၂၀၂၃ နံၣ်ႇ ခ့ၣ်အဲးစံၣ် ကီၢ်သူလ့ၤသုးမုၢ်ဒိၣ်(KTLA)ခီၣ်မဲဒိၣ်သုးရ့ၣ်ခိၣ် သုးခိၣ်ဒိၣ်စိ သုးခိၣ်စးလိအံၤ မၤကမၣ်တၢ်အိၣ်လၢတၢ်ကရၢကရိ ပူၤတနီၤတဘှါဆှဲ၀ဲဘၣ်ဒီးတကီၢ်ခါခဲအံၤအ၀ဲဟးစံၣ်အိၣ်ခူသူၣ်အဂ့ၢ်န့ၣ် ကရူၢ်ၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ် လီၤႉ KTLA ၦၤဘၣ်မူဘၣ်ဒါတဂၤစံး၀ဲလၢ“တၢ်လၢၦၤဖီၣ်စုက၀ဲၤဖိအံၤတဘျီတခီၣ်အမၤကမၣ်တၢ်သ့လီၤႉ ၦၤလဲၤကိးအီၤႇ ၦၤလဲၤကိးအီၤန့ၣ်လၢကထံၣ်လိာ်သးဒီးခိၣ်နၢ်တၢ်ဖီခိၣ်လၢကဟဲက့ၤဆှဲပၠးလၢၦၤကမျၢၢ်သုးတပျံၤ ၦၤတဂ့ၤအဂီၢ်လီၤႉ ဘၣ်ဆၣ်အ၀ဲဟးစံၣ်အိၣ်ခူသူၣ်အဃိ၀ဲဒၣ်နက့ပမၤတဘၣ်နီတမံၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ် န့ၣ်လီၤႉ ဘၣ်ဃးသုးခိၣ်စးလိအတၢ်တဲပျံၤတဲဖုးမၤကမၣ်တၢ်လၢၦၤကမျၢၢ်အဖီခိၣ်အံၤ(KTLA)ၦၤဘၣ်မူဘၣ်ဒါကိးထံၣ်အီၤလၢ ကထံၣ်လိာ်ဘှါဆှဲက့ၤတၢ်ဒီးၦၤကမျၢၢ်ဘၣ်ဆၣ်အ၀ဲဟဲဘှါဆှဲ၀ဲတအိၣ်ဘၣ်တကးဒံးဘၣ်အမဲာ်ညါ တကီၢ်ခါခဲအံၤ အ၀ဲဟးစံၣ်အိၣ်ခူသူၣ်၀ဲဒၣ်အဂ့ၢ်န့ၣ် စံး၀ဲန့ၣ်လီၤႉ ဘၣ်ဃးတၢ်ဂ့ၢ်ကဲထီၣ်သးအံၤသုးခိၣ်စးလိဘှါဆှဲ၀ဲတအိၣ်ဘၣ်အဃိတကီၢ်ခါခဲအံၤတၢ်ပတုာ်ကွံာ်အီၤလၢအမူဒါပူၤ (၉)လါဒီးအ၀ဲမ့ဆဲးမၤကမၣ်ဒံးတၢ်န့ၣ်တၢ်ကထုးထီၣ်ကွံာ်အီၤလၢသုးပူၤအဂ့ၢ်န့ၣ် (KTLA)ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ ဘၣ်ဃးအ၀ဲဟးစံၣ်အိၣ်ခူသူၣ်အံၤဒ်သိးပကသ့ၣ်ညါဘၣ်တၢ်ဂ့ၢ်လီၤတံၢ်လီၤဆဲးအဂီၢ်န့ၣ် ပခ့ၣ်အဲးစံၣ်- ကညီတၢ်ကစီၣ် ဆဲးကျိးသုးခိၣ်စးလိဘၣ်ဆၣ် ဆဲးကျိးတန့ၢ်ဒံးဘၣ်န့ၣ်လီၤႉ သုးခိၣ်စးလိတီခိၣ်ရိၣ်မဲ(KTLA)ခီၣ်မဲဒိၣ်သုးရ့ၣ်လီၤဆီအၦၤတနီၤခီဖျိအ၀ဲသ့ၣ်ဖီၣ်မၤဒၢၣ်ၦၤကမျၢၢ်လၢဟီၣ်က၀ီၤ ဖဲန့ၣ်ပူၤအဃိၦၤကမျၢၢ်ဃ့ထီၣ်၀ဲလၢခီၣ်မဲဒိၣ်သုးရ့ၣ်လီၤဆီအၦၤခဲလၢာ်ကဟးထီၣ်ကွံာ်လၢသ၀ီပူၤကဲထီၣ်တ့ၢ်အသး ဒံးန့ၣ်လီၤႉ “ဘၣ်မနုၤအဃိယတလဲၤဘၣ်လဲၣ်န့ၣ်ဘၣ်ဃးတၢ်ဂ့ၢ်တခါန့ၣ်ယကျဲၤဒီးၦၤသ၀ီဖိ၀ံၤလံႉလၢခံတနံၤယကျဲၤဒီးသ၀ီခိၣ်နၢ်ႇ (DKBA)ခိၣ်နၢ်ဘၣ်ဂီၢ်လၢၤလံႉပတဲ၀ံၤလံအသုတ၀ံၤဒံးဘၣ်ႉအဃိန့ၣ်ပတလဲၤထီၣ်တၢ်အိၣ်ဖှိၣ်ဘၣ်န့ၣ်တၢ်ဂ့ၢ်တခါန့ၣ်ႉအ၀ဲသ့ၣ်မ့တအဲၣ်ဒိးထံၣ်ၦၤဘၣ်န့ၣ်ပသုးလီၢ်တုၤလၢမၠၣ်၀တံၣ်နါက့ပသုးသ့လီၤႉယအိၣ်ဖဲအံၤယဟီၣ်ခိၣ်တက့မးတအိၣ်ဘၣ်ႇယဟံၣ်တဖျၢၣ်မးတအိၣ်ဘၣ်ႉတၢ်တခါန့ၣ်အသံကွၢ်ယၤတသ့ဘၣ်ႇဘၣ်သံကွၢ်လၢသုးခိၣ်စီၤနၢၤဒါႉစီၤနၢၤဒါမ့၀ံၤန့ၣ်ယ၀ံၤလီၤ” အဂ့ၢ်န့ၣ် စံးတ့ၢ်ဃာ်ခ့ၣ်အဲးစံၣ်–ကညီတၢ်ကစီၣ်ဖဲအပူၤကွံာ်လါအီးကထိဘၢၣ် ၅ သီ အနံၤန့ၣ်လီၤႉ ဘၣ်ဃးတၢ်မၤဒၢၣ်ၦၤကမျၢၢ်တၢ်ဂ့ၢ်အံၤအဖီခိၣ် ဖဲလါအီးကထိဘၢၣ် ၄ သီအနံၤ ဒူပျာ်ယာ်ကီၢ်ရ့ၣ် တီနီၢ်မုၢ်ထီၣ် မီခံသ၀ီကရူၢ် သ၀ီ(၅)ဖျၢၣ်ၦၤသ၀ီဖိဒီး(KTLA)ၦၤဘၣ်မူဘၣ်ဒါမၤတၢ်ထံၣ်လိာ်အိၣ်သကိးဒီး လၢတၢ်အိၣ်ဖှိၣ်ဘျီ၀ဲ အံၤအပူၤ တၢ်ဆၢတဲာ်လီၤလၢသုးခိၣ်စးလိတီခိၣ်ရိၣ်မဲခီၣ်မဲဒိၣ်သုးရ့ၣ်လီၤဆီအၦၤကဘၣ်ကဟးထီၣ်ကွံာ်လၢသ၀ီပူၤ အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်န့ၣ်အသိး(KTLA)ခီၣ်မဲဒိၣ် သုးဒ့(၂)သုးဒ့ခိၣ် ဒံၤမိၤလၢအမၤဒၢၣ်ၦၤကမျၢၢ်အံၤစ့ၢ်ကီး တၢ်ထုးထီၣ်ကွံာ်အီၤလၢမူဒါပူၤဒီး ဖဲတၢ်ဟ့ၣ်အီၤတၢ်ကမၣ်ထၢနုာ်အီၤလၢတၢ်ဒုးဃာ်လီၢ်အဆၢကတီၢ်အ၀ဲဃစံၣ်ဖျိးထီၣ်အဂ့ၢ်န့ၣ် (KTLA)တကပၤ...
ၦၤဖိဒံဖိသၣ်အတၢ်မၤလိမၤဒိးဒီးခါဆူညါတၢ်ကမၤအသးဒ်လဲၣ်အဂ့ၢ်န့ၣ် ပကပာ်ဖျါထီၣ်၀ဲကၠိသရၣ်၊မုၣ်ဒီး ၦၤကၠိဖိအတၢ်ထံၣ်
ကၠိလၢအိၣ်ကညီကီၢ်စဲၣ်ပူၤတဖၣ်အါဒၣ်တက့ၢ်န့ၣ်ခီဖျိသုးကီၣ်ကးပၢဆှၢရဲၣ်ကျဲၤ၀ဲတန့ၢ်လၢၤဘၣ်အဃိ ၦၤဖိဒံဖိသၣ်အတၢ်မၤလိမၤဒိးဒီးခါဆူညါတၢ်ကမၤအသးဒ်လဲၣ်အဂ့ၢ်န့ၣ် ပကပာ်ဖျါထီၣ်၀ဲကၠိသရၣ်၊မုၣ်ဒီး ၦၤကၠိဖိအတၢ်ထံၣ်သ့ၣ်တဖၣ်န့ၣ်လီၤႉ စီၤဟဲခုၣ် (KECD)နဲၣ်ရွဲၣ် ကီးတရံးကီၢ်ဆၣ် သုးမီၤစိရိၤဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤလီၢ်ခံန့ၣ်မ့မ့ၢ်လၢပ(ခ့ၣ်အဲၣ်ယူၣ်)တၢ်ပၢဟီၣ်က၀ီၤအပူၤန့ၣ် အဘၣ်ဒိ အိၣ်တနီၤမီၤႉလီၤဆီဒၣ်တၢ်လၢတၢ်ဒုးတၢ်ယၤအလီၢ်လၢဒုၣ်ဒါခးလီၤကျိဖးဒိၣ်ႇကဘီယူၤဟဲခးလီၤတၢ်အလီၢ် သ့ၣ်တဖၣ် န့ၣ်ဖဲပကီးတရံးကီၢ်ဆၣ်အံၤအါဒၣ်တက့ၢ်ပကၠိဘၣ်အိၣ်ပတုာ်ဒီဒူၣ်ညါႉမ့၀ံၤၦၤဖိသၣ်တဖၣ်နါက့ဘၣ်စံၣ်မှံဟးဖျိးဒီဒူၣ်ညါလီၤႉခီဖျိလၢတၢ်ဘံၣ်တၢ်ဘၢတအိၣ်လၢၤဘၣ်အဃိမီၤနီၤႉတကးဒံးဘၣ်သုးဟံးန့ၢ်ထံကီၢ်တၢ်စိတၢ်ကမီၤ၀ံၤလီၢ်ခံန့ၣ်ပကၠိသရၣ်၊မုၣ်စ့ၢ်ကီးအသးအိၣ်သိၣ်လိတၢ်ဘၣ်ဆၣ်တသိၣ်လိဘၣ်တၢ်လၢၤဘၣ်ႉဘၣ်ဟးကွံာ်ဒီဒူၣ်ဘၣ်မနုၤအဃိလဲၣ်န့ၣ်ခီဖျိလၢတၢ်ၦ့ၤတၢ်ကလံၤထီၣ်ႇတၢ်ကီတၢ်ခဲအိၣ်ကလုာ်ကလုာ်ႇစ့ဒၢးအလုၢ်အၦ့ၤတအိၣ်ဘၣ်အဃိန့ၣ်သရၣ်၊မုၣ်ဘၣ်ဟးထီၣ်ကွံာ်လၢတၢ်ဖံးတၢ်မၤပူၤအိၣ်ဒီဒူၣ်ညါလီၤႉ နါဆဲထံၣ် (ကၠိသရၣ်မုၣ်) သုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ်ပမ့ဘၣ်ကွၢ်လၢ(KECD)တၢ်ကူၣ်ဘၣ်ကူၣ်သ့န့ၣ်ဟဲလဲၢ်ထီၣ်၀ဲတစဲးမီၤနီၤႉမ့မ့ၢ် လၢ ကီၢ်ပယီၤတၢ်ကူၣ်ဘၣ်ကူၣ်သ့တၢ်သိၣ်လိမၤဒိးခီန့ၣ်အံၣ်လီၤ၀ဲတနီၤမီၤနီၤႉလီၤတဲာ်သးလၢပက့ၤကွၢ်ကဒါက့ၤန့ၣ် (KECD) န့ၢ်ကဒါ၀ဲတၢ်ခွဲးတၢ်ယၤတၢ်သဘျ့တခါမီၤနီၤႉအဃိန့ၣ်ဘၣ်ဃးဒီး(KECD)တၢ်သိၣ်လိမၤဒိးအံၤရၤလီၤအသးဟဲအါထီၣ်ဒိၣ်န့ၢ်ဒံးလၢညါမီၤနီၤႉမ့မ့ၢ်ဖဲကီးတရံးဟီၣ်က၀ီၤပူၤအံၤပတဟံကီၢ်ပယီၤပဒိၣ်အတၢ်ကူၣ်ဘၣ်ကူၣ်သ့သနူလၢၤဘၣ်ႉ စီၤဖိချ့ (ကၠိဖိ) သုးဟံးန့ၢ်တၢ်စိတၢ်ကမီၤ၀ံၤလီၢ်ခံၦၤသူၣ်ဘီၣ်သးစၢ်တဖၣ်တမၤလိဘၣ်တၢ်လၢလၢၦဲၤၦဲၤဒ်သိးလၢညါအသိးလၢၤဘၣ်မီၤနီၤႉအ၀ဲသ့ၣ်ကမၤလိလံာ်လၢကီၢ်ပယီၤပဒိၣ်အိၣ်တကပၤခီဒၢးၦၤသိၣ်လိအ၀ဲသ့ၣ်တအိၣ်လၢၤဘၣ်ႉနဒိးစဲးတဖျိဘၣ်နါက့အ၀ဲသ့ၣ်ဟ့ၣ်ဒုးဖိ၀ဲဟ့ၣ်ဒုး၀ဲ(ကိၤထူ)ခဲလၢာ်လီၤႉၦၤကၠိဖိတဖၣ်နါက့လၢကလဲၤအိၣ်ကၠိလၢ၀့ၢ်ပူၤအဂီၢ်ခီဒၢးခီဖျိသုးဟံးန့ၢ်တၢ်စိတၢ်ကမီၤအဃိအ၀ဲသ့ၣ်လဲၤအိၣ်တသ့လၢၤဘၣ်ႇကဟဲက့ၤထီၣ်က့ၤကၠိလၢသ၀ီပူၤခီဒၢး လၢသ၀ီပူၤအံၤတၢ်ကူၣ်ဘၣ်သ့ အဂံၢ်လီၤစှၤႉလၢညါခါန့ၣ်ၦၤလဲၤထီၣ်ကၠိအါလၢ၀့ၢ်ပူၤလီၤႉခီဖျိတၢ်ကူၣ်ဘၣ်ကူၣ်သ့အဂံၢ်စှၤလီၤဘျီအ၀ဲသ့ၣ်ဟးဂီၤအိၣ်မီၤနီၤႉတနီၤန့ၣ်သူက့ၤတၢ်မူၤတၢ်ဘှီးႇထီၣ်ဖိန့ၢ်မါက့ၤတနီၤႉခီဖျိအ၀ဲသ့ၣ်တထီၣ်ဘၣ်ကၠိလၢၤဘၣ်အဃိတဘျီအံၤယထံၣ်အ၀ဲသ့ၣ်ထီၣ်ၦၢ်စိမးႉ
တၢ်လဲၤခးလီၤတၢ်လၢ(မိၤလဲၤခဲၣ်)ၦၤလီၢ်အိၣ်ကမှံလီၢ်အံၤမ့ၢ်တၢ်မၤကမၣ်ဒုးယၤကွီၢ်မ့ၣ်အဃိ ထီဒါ၀ဲတဲ၁်တဲ၁်ဖျုဖျုအဂ့ၢ် KNU စံး၀ဲ
လါအီးကထိဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲအပူၤကွံာ်လါအီးကထိဘၢၣ် ၉ သီအနံၤ သုးမီၤစိရိၤကဘီယူၤလဲၤခးလီၤတၢ်လၢကခၠ့ၣ်ကီၢ်စဲၣ် လဲၤစၤ၀့ၢ်ဃၢၤ (မိၤလဲၤခဲၣ်)ၦၤလီၢ်အိၣ်ကမှံလီၢ်အဃိကမျၢၢ်ၦၤဃ့ၢ်မှံဟးဖျိးသံဘၣ်ဒိဘၣ်ထံး၀ဲအါအါဂီၢ်ဂီၢ်ဒီးတၢ်သ့ၣ်တဖၣ်အံၤ မ့ၢ်တၢ်လုၢ်သ့ၣ်ခါပတာ်မၤကမၣ်ဒုးယၤကွီၢ်မ့ၣ်အဃိ ထီဒါ၀ဲတဲာ်တဲာ်ဖျူဖျူအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ် စၢဖှိၣ်ကရၢ ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၁ သီ အနံၤန့ၣ်လီၤႉ သုးမီၤစိရိၤအတၢ်လဲၤခးလီၤတၢ်ဘျီ၀ဲအံၤအပူၤၦၤဖိဒံဖိသၣ်(၁၁)ဂၤဃုာ်ဒီးၦၤပိာ်မုၣ်ပိာ်ကမျၢၢ်ခဲလၢာ် သံ၀ဲဒၣ် (၂၉)ဂၤႇ ဘၣ်ဒိတစှၤန့ၢ်(၅၇)ဂၤဘၣ်ညါန့ၣ်လီၤႉလၢတၢ်န့ၣ်အဃိဘၣ်ဃးဒုးယၤႇၦၤကမျၢၢ်ႇတၢ်ပဲာ်ဖးနီၤဖးၦၤဖိဒံ ဖိသၣ်ဒီး ၦၤကမျၢၢ်ထံဖိကီၢ်ဖိအဟံၣ်ဟးဂူာ်ဟးဂီၤအဖီခိၣ်အံၤသုးမီၤစိရိၤတကိၢ်၀ဲဘၣ်ႇသူ၀ဲဒၣ်ဂံၢ်ဘါအါအါဂီၢ်ဂီၢ် ဒ်အံၤ မ့ၢ်တၢ်မၤကမၣ်ဒုးယၤကွီၢ်မ့ၣ်တခါအဂ့ၢ်န့ၣ် KNU စံး၀ဲန့ၣ်လီၤႉ ဒ်(ခ့ၣ်အဲၣ်ယူၣ်)အလံာ်တၢ်ပာ်ဖျါပူၤအသိးန့ၣ် သုးမိၤစိရိၤအံၤပညိၣ်၀ဲဒၣ်ထံကီၢ်ဒီတဘ့ၣ်အပူၤ ကမျၢၢ်တၢ်ဆါဟံၣ်ႇ ကၠိႇတၢ်ဘူၣ်တၢ်ဘါတၢ်သူၣ်ထီၣ်ဒီးမၤကမၣ်၀ဲဒၣ်ၦၤဂ့ၢ်၀ီခွဲးယာ်သ့ၣ်တဖၣ်န့ၣ်လီၤႉလၢန့ၣ်အမဲာ်ညါၦၤဂ့ၢ်၀ီတၢ်ဆီၣ်ထွဲမၤစၢၤလၢကမျၢၢ်ၦၤဃ့ၢ်မှံဟးဖျိးအဂီၢ်သ့ၣ်တဖၣ်အံၤမ့မ့ၢ်တခီသုးမီၤစိရိၤအံၤသူအီၣ်က့ၤ၀ဲလၢတၢ်စုက၀ဲၤအဂ့ၢ်န့ၣ် စံး၀ဲန့ၣ်လီၤႉ “လၢပထံပကီၢ်ပူၤအံၤၦၤလၢအမၤနးမၤဖှီၣ်မၤကီမၤခဲၦၤကမျၢၢ်ထံဖိကီၢ်ဖိန့ၣ်မ့ၢ်၀ဲဒၣ်သုးမီၤစိရိၤလီၤႉၦၤကလဲၤဟ့ၣ် တၢ်ဆီၣ်ထွဲမၤစၢၤလၢၦၤဃ့ၢ်မှံဟးဖျိးအဂီၢ်စ့ၢ်ကီးၦၤဘၣ်လဲၤလၢအ၀ဲသ့ၣ်အိၣ်တဆီႉပအဲၣ်ဒိးလၢထံဂုၤကီၢ်ဂၤမ့ဟ့ၣ် တၢ်ဆီၣ်ထွဲမၤစၢၤန့ၣ်ကဘၣ်လဲၤလၢကီၢ်ဆၢမီၤနီၤႉခဲအံၤအ၀ဲသ့ၣ်ကွဲမုာ်(KIA)လၢကလဲၤထီၣ်(NCA)နံၣ်ဆဲး ဆၢမီၤနီၤႉ ဘၣ်ဆၣ်အ၀ဲသ့ၣ်မၤၦၤကခၠ့ၣ်ကမျၢၢ်ထံဖိကီၢ်ဖိဒ်အံၤ၀ဲဒၣ်စ့ၢ်ကီးပကဘၣ်အိၣ်ဒီးတၢ်ပလီၢ်ပဒီ”အဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲန့ၣ်လီၤႉ သုးမီၤစိရိၤလၢအလုၢ်သ့ၣ်ခါပတာ်မၤကမၣ်ဒုးယၤကွီၢ်မ့ၣ်သ့ၣ်တဖၣ်အံၤထံဂုၤကီၢ်ဂၤတၢ်ကရၢကရိတဖၣ် ကဟံးထီၣ်ဖီၣ် ထီၣ်အရ့ဒီးတဘၣ်ဟ့ၣ်သုးမီၤစိရိၤအတၢ်ရ့လိာ်မုာ်လိာ်သးဒီးထံဂုၤကီၢ်ဂၤဘၣ်ႇတၢ်ကပတုာ်ကွံာ် တၢ်ဆီၣ်ထွဲမၤစၢၤ သုးမီၤစိရိၤအံၤလၢကျိၣ်စ့တၢ်စုက၀ဲၤဂံၢ်ဘါလၢကျဲအဘိဘိအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ ဒ်န့ၣ်အသိးဘၣ်ဃးသုးမီၤစိရိၤကဘီယူၤအတၢ်လဲၤခးလီၤတၢ်လၢ(မိၤလဲၤခဲၣ်)ၦၤလီၢ်အိၣ်ကမှံလီၢ်တၢ်ဂ့ၢ်အံၤ ပအိၣ်ဒီကလုာ်ဖဲၣ်ဒရၢၣ်ကီၣ်ကး(PNFC)အံၤစ့ၢ်ကီးထီဒါ၀ဲအဂ့ၢ်န့ၣ် ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၀ သီအနံၤ န့ၣ်လီၤႉ ဒ်န့ၣ်အသိးကလံၤစိးသိၣ်မှံၤ ၃ ဒူၣ် လၢအမ့ၢ် ကိကၣ်(MNTJP/MNDAA), ပလီၣ်(PSLF/TNLA)ဒီး ရၢၣ်ခၢၣ်(ULA/AA) သ့ၣ်တဖၣ်အံၤစ့ၢ်ကီးသုးမီၤစိရိၤအတၢ်လဲၤခးလီၤတၢ်လၢ(မိၤလဲၤခဲၣ်)ၦၤလီၢ်အိၣ်ကမှံလီၢ်အံၤ...
ပယီၤသုးခးလီၤကျိဖးဒိၣ်လၢချၢၣ်လွံၢ်ထူၣ်ကီၢ်ရ့ၣ်ပူၤအဃိ ၦၤဖိသၣ်မုၣ်သံ(၁)ဂၤႇ ဘၣ်ဒိ ၈ ဂၤ
လါအီးကထိဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လါအီးကထိဘၢၣ် ၁၀ သီအနံၤ လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်အပူၤ ခီဖျိပယီၤသုး ခးလီၤကျိဖးဒိၣ်အဃိ ၦၤဖိသၣ်မုၣ်ဖိသံ(၁)ဂၤဒီး ဘၣ်ဒိဘၣ်ထံး(၈)ဂၤအကျါပၣ်ဃုာ်ၦၤဖိသၣ် ၂ နံၣ် ခံဂၤ အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ခီဖျိပယီၤသုး(ခမရ-၄၃၉)ခးလီၤကျိဖးဒိၣ်အဃိ ဖၠူကီၢ်ဆၣ် ကၠီၤလၣ်သ၀ီ ၦၤဖိသၣ်မုၣ်သံ၀ဲ(၁)ဂၤဒီး ပ့စလိၣ် ပယီၤသုး(ခလရ-၂၆၄), စွ့ၤ၀ၤ ပယီၤသုး(ခမရ-၃၀၇)ခးလီၤကျိဖးဒိၣ်အဃိ လၢၢ်ဒိၣ်ကီၢ်ဆၣ် ယွၤကၣ်လၣ်သ၀ီႇ မူကီၢ်ဆၣ် သနၣ်ကွ့သ၀ီ ဒီး ဖၠူကီၢ်ဆၣ် နဒၣ်မ့ၣ်သ၀ီ ၦၤဖိသၣ်(၂)ဂၤအံၤဃုာ်ဒီးကမျၢၢ်ခဲလၢာ်ဘၣ်ဒိဘၣ်ထံး၀ဲ (၈)ဂၤ အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၁ သီ အနံၤန့ၣ်လီၤႉ လၢန့ၣ်အမဲာ်ညါခီဖျိပယီၤသုးဆဲးခးလီၤကျိဖးဒိၣ်အဃိလီၢ်က၀ီၤၦၤကမျၢၢ်တဖၣ်အါဒၣ်တက့ၢဃ့ၢ်ထီၣ်၀ဲဒီး တနီၤန့ၣ်လၢအ၀ဲသ့ၣ်ကအိၣ်ဆိးအဂီၢ်တၢ်လီၢ်တၢ်ကျဲတအိၣ်ဘၣ်အဃိအ၀ဲသ့ၣ်အိၣ်တ့ၢ်လၢသ၀ီပူၤႇအိၣ်၀ဲလၢ တၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤဒ်န့ၣ်လီၤအဂ့ၢ်န့ၣ် လၢၢ်ဒိၣ်၀့ၢ် ကမျၢၢ်ပိာ်မုၣ်တဂၤ စံး၀ဲဒ်အံၤန့ၣ်လီၤႉ “ၦၤလၢအစံၣ်ညါန့ၣ်စံၣ်လီၤၦၤလၢအဘူးအတံၢ်အိၣ်လၢထံ၀ၢ်ခီတကပၤန့ၣ်ခီန့ၣ်အ၀ဲသ့ၣ်လဲၤအိၣ်၀ဲလၢန့ၣ်မီၤနီၤႉ မ့မ့ၢ်ၦၤလၢအဟးထီၣ်က့ၤလီၤတညီဘၣ်တဖၣ်န့ၣ်အိၣ်တ့ၢ်လၢသ၀ီပူၤလီၤႉတၢ်ဒုးမ့ကဲထီၣ်န့ၣ်နနုာ်လီၤအိၣ်လၢတၢ်ပူၤ သ့ဒံးႉခဲအံၤအခးလီၤ၀ဲကိးဆၢကတီၢ်ဒဲးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ တကးဒံးဘၣ်န့ၣ်အမဲာ်ညါလၢချၢၣ်လွံၢ်ထူၣ်ကီၢ်ရ့ၣ်အပူၤ လီၢ်က၀ီၤၦၤသ၀ီဖိတဖၣ်မ့ဟးထီၣ်က့ၤလီၤလၢ ပယီၤသုး တၢ်သမံသမိးတြဲၤလီၢ်မဲာ်ညါန့ၣ်ပယီၤသုးသမံသမိးဖီၣ်ဃာ်၀ဲဒီးမၢၦၤလဲၤက့ၤရ့ထီၣ်၀ဲဒီးစ့အိၣ်၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ လီၢ်က၀ီၤကမျၢၢ်တဂၤစံး၀ဲလၢ“ၦၤသ၀ီဖိမ့လဲၤၦ့ၤတၢ်န့ၣ်ပယီၤသုးသံကွၢ်အီၤသုအိၣ်သ၀ီဖဲလဲၣ်ႇၦၤမ့အိၣ်ဟဲလၢ (ခ့ၣ်အဲၣ်ယူၣ်)အိၣ်လီၢ်တကပၤန့ၣ်ဖီၣ်၀ဲလီၤႉတၢ်ကစီၣ်မ့တန့ၢ်လၢပယီၤသုးအဂီၢ်နီတမံၤဘၣ်န့ၣ်အ၀ဲသ့ၣ်တဲကျၢ ၦၤဟံၣ်ဖိဃီဖိမၢၦၤလဲၤရ့ထီၣ်ဒီးစ့ႉၦၤမ့တလဲၤရ့ထီၣ်ဘၣ်န့ၢ်ထၢနုာ်၀ဲလၢတၢ်ဒုးဃာ်လီၢ်လီၤ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါအီးကထိဘၢၣ် ၉...
လၢဖၣ်အၣ်ကီၢ်ဆၣ်အပူၤ ဟံၣ်ကျီးလီၢ်ဟီၣ်ခိၣ်လီၢ်အၦ့ၤဒိၣ်ထီၣ်ကွ့ၢ်ကွ့ၢ်
လါအီးကထိဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်အၣ်ကီၢ်ဆၣ်အပူၤ တနံၣ်အံၤဟံၣ်ကျီးလီၢ်ဟီၣ်ခိၣ်လီၢ်အၦ့ၤဒိၣ်ထီၣ်၀ဲဒၣ်ကွ့ၢ်ကွ့ၢ်အဂ့ၢ်န့ၣ် ၦၤမၤတၢ်လၢဟံၣ်ဟီၣ်ခိၣ်လီၢ်တၢ်ဆါတၢ်ၦ့ၤတၢ်ဖံးတၢ်မၤအံၤဒီး၀့ၢ်ပူၤၦၤကမျၢၢ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤလီၢ်ခံ လၢကညီကီၢ်စဲၣ် ကီၢ်ဆၣ်တနီၤအပူၤ တၢ်ဒုးက့ၤကဲထီၣ်ကဒါ၀ဲဒီး ဘၣ်ဆၣ် လၢဖၣ်အၣ်၀့ၢ်ပူၤ ၦၤၦ့ၤဟံၣ်ကျီးလီၢ်ဟီၣ်ခိၣ်လီၢ်ဟဲအါထီၣ်၀ဲအသိးဟံၣ်ဟီၣ်ခိၣ်လီၢ်စ့ၢ်ကီးအၦ့ၤထီၣ်ခံဆးညါအဂ့ၢ်န့ၣ် ၦၤမၤတၢ်လၢဟံၣ်ဟီၣ်ခိၣ်လီၢ်တၢ်ဆါတၢ်ၦ့ၤတၢ်ဖံးတၢ်မၤအံၤတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဟီၣ်ခိၣ်လီၢ်အၦ့ၤထီၣ်ဖးဒိၣ်ညါႉတချုးလၢသုးဟံးန့ၢ်တၢ်စိတၢ်ကမီၤဒံးဘၣ် ဖဲ၀့ၢ်ပူၤအံၤအကလီၢ်(၁၀၀) ဟီၣ်ခိၣ်န့ၣ်ခဲအံၤထီၣ်တုၤလၢ(၂၀၀),(၃၀၀)ညါလံႉလၢညါခါ(စွ့ၤဖါစံၤ)ဟံၣ်တဖၣ်န့ၣ်ၦၤဆါထဲ အကလီၢ်(၁၀၀)ဘျဲၣ် လီၤႇ ခဲအံၤအကလီၢ်(၃၀၀)ဘျဲၣ်လံႉဟီၣ်ခိၣ်ၦ့ၤထီၣ်တမ့ၢ်ထဲလၢ၀့ၢ်ပူၤတခါဘၣ်ႇလၢ၀့ၢ်ချၢ စ့ၢ်ကီးၦၤဆါလီၤဟီၣ်ခိၣ်အက့ တဖၣ်န့ၣ်အၦ့ၤထီၣ်ခဲလၢာ်လီၤႉဟီၣ်ခိၣ်ၦ့ၤထီၣ်ဘၣ်ဆၣ်ၦၤၦ့ၤအိၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ လၢကညီကီၢ်စဲၣ် ကီးတရံးႇမၠၣ်၀တံၣ်ႇဖၣ်ပူၣ်ႇနိၣ်တကီႇသၣ်တီၣ်ကီၢ်ဆၣ်တဖၣ်အပူၤတၢ်ဒုးကဲထီၣ်၀ဲဒီး ခီဖျိဟီၣ်က၀ီၤပူၤတၢ်တဂၢၢ်တကျၢၤဘၣ်အဃိ ၦၤဟဲၦ့ၤဟံၣ်ဟီၣ်ခိၣ်လီၢ်လၢဖၣ်အၣ်ကီၢ်ဆၣ်ပူၤႇ ၦၤဟဲဘျၢလီၤသး ဟဲအထီၣ်အသိးခီဖျိစ့အလုၢ်အၦ့ၤတအိၣ်ဘၣ်အဃိၦၤဟဲၦ့ၤဟီၣ်ခိၣ်လီၢ်ဘျၢလီၤသးဟဲအါထီၣ်၀ဲဒၣ်ဒ်အံၤလီၤအဂ့ၢ်န့ၣ် သ့ၣ်ညါဘၣ်လၢကမျၢၢ်တဖၣ်အအိၣ်န့ၣ်လီၤႉ ဖၣ်အၣ်ကမျၢၢ်တဂၤစံး၀ဲလၢ“ခဲအံၤန့ၣ်မတၤတဂၤမးတအဲၣ်ဒိးပာ်စ့လၢအစုပူၤလၢၤဘၣ်ႉနမ့ၦ့ၤဃာ်ထူန့ၣ်မး ထူန့ၣ် အၦ့ၤက့ၤလီၤကဒါသ့ဒံးႉမ့မ့ၢ်လၢဟီၣ်ခိၣ်လီၢ်ခီန့ၣ်အၦ့ၤလီၤတအိၣ်ဘၣ်အဃိၦၤၦ့ၤဃာ်ဟီၣ်ခိၣ်အါမီၤနီၤႉမ့၀ံၤဆၢကတီၢ် ခဲအံၤနကဘျၢလီၤစ့လၢတၢ်မၤလၢအဂၤခီဒၢးနဘျၢလီၤတဘူၣ်ဘၣ်အဃိၦၤၦ့ၤဃာ်က့ၤလၢဟီၣ်ခိၣ်လီၢ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါလၢကညီကီၢ်စဲၣ်ပူၤခီဖျိဒုးယၤတၢ်သဘံၣ်သဘုၣ်အဃိၦၤဃ့ၢ်တၢ်ဒုးဖိလၢအကျိၣ်အစ့အိၣ်တဖၣ် တနီၤန့ၣ်အ၀ဲသ့ၣ်လဲၤငါအိၣ်က့ၤဟံၣ်လၢဖၣ်အၣ်၀့ၢ်ပူၤဟဲအါထီၣ်အဃိဟံၣ်လဲစ့ၢ်ကီးအၦ့ၤထီၣ်အါန့ၢ်အပူၤကွံာ်ဒံး န့ၣ်လီၤႉ တကီၢ်ခါခဲအံၤအါဒၣ်တက့ၢ်လၢကီၢ်ဆၣ်ဟီၣ်က၀ီၤတဖၣ်အပူၤတၢ်ဂၢၢ်တၢ်ကျၢၤတအိၣ်ဒံးဘၣ်အသိး တၢ်ဘံၣ်တၢ်ဘၢ တအိၣ်ဒံးဘၣ်ဘၣ်ဆၣ်လၢဖၣ်အၣ်၀့ၢ်ပူၤတၢ်အီၣ်ကျးႇဟိၤထဲတၢ်ဟးဆှၣ်ထံဟးဆှၣ်ကီၢ်တၢ်ဖံးတၢ်မၤအံၤဒီးဟံၣ်ဟီၣ်ခိၣ်လီၢ်တၢ်ဆါတၢ်ၦ့ၤတၢ်ဖံးတၢ်မၤတကပၤန့ၣ် ၦၤလဲၤဘျၢလီၤသးအါထီၣ်၀ဲဒၣ်တပယူာ်ဃီအဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤကမျၢၢ်အအိၣ်န့ၣ်လီၤႉ အပူၤကွံာ်လါစဲးပထ့ဘၢၣ် ၂၁ သီအနံၤ ဖဲတၢ်မၤကညီကီၢ်စဲၣ်ဘၣ်ထွဲတၢ်ဟးဆှၣ်ထံဟးဆှၣ်ကီၢ်တၢ်ဖံးတၢ်မၤကမံးတံာ် တၢ်အိၣ်ဖှိၣ်အခါန့ၣ်ကညီကီၢ်စဲၣ်အပူၤဒ်သိးကီၢ်ပူၤကီၢ်ချၢၦၤဟးဆှၣ်ထံဟးဆှၣ်ကီၢ်တဖၣ်အံၤအ၀ဲသ့ၣ် ဟးထီၣ်က့ၤလီၤ ဘၣ်ကဂ့ၤအဂီၢ်ကပာ်ဖှိၣ်မၤသကိးတၢ်လၢတၢ်ဟးဆှၣ်ထံဟးဆှၣ်ကီၢ်တၢ်ဂုၤထီၣ်ပသီထီၣ်တကပၤအဂ့ၢ်န့ၣ် ကညီကီၢ်စဲၣ် သုးကီၣ်ကး ၦၤပၢၤလီၢ်ဆ့ၣ်နီၤ အူမၠ့ၣ်အူ ဆီၣ်တခူဟ့ၣ်ဂံၢ်ဟ့ၣ်ဘါလီၤ ကီၢ်စဲၣ်ဟီၣ်က၀ီၤဘၣ်ထွဲ တၢ်ဟးဆှၣ်ထံဟးဆှၣ်ကီၢ်တၢ်ဖံးတၢ်မၤကမံးတံာ်အံၤန့ၣ်လီၤႉ
တၢ်ထံၣ်လိာ်သံကွၢ် ကီၢ်ပယီၤခီကီၢ် ကူၣ်သ့ပှၤမၤတၢ်ဖိကမံးတံာ် (BMWEC) ၦၤနဲၣ်တၢ် သရၣ်မုၣ် နီၢ်လါဆှံ
တကီၢ်ခါ ခီကီၢ်ကၠိသရၣ်/မုၣ်တဖၣ်အတၢ်ဟ့ၣ်လီၤသးလၢဖိသၣ်အတၢ်ကူၣ်ဘၣ်ကူၣ်သ့အဂီၢ် ဒီး တၢ်ကီတၢ်ခဲလၢ အဝဲသ့ၣ်ဘၣ်ကွၢ်ဆၢၣ်မဲာ်၀ဲတဖၣ် ကမ့ၢ်မနုၤလဲၣ်အဂ့ၢ်န့ၣ် ပထံၣ်လိာ်သံကွၢ် ကီၢ်ပယီၤခီကီၢ် ကူၣ်သ့ပှၤမၤတၢ်ဖိကမံးတံာ် (BMWEC) ၦၤနဲၣ်တၢ် သရၣ်မုၣ် နီၢ်လါဆှံ န့ၣ်လီၤ. သံကွၢ်–တၢ်လၢကၠိသရၣ်§မုၣ်တဂၤန့ၣ် အရ့ဒိၣ်လၢၦၤတဝၢပူၤဒီးၦၤတကလုာ်အဂီၢ်ထဲလဲၣ်. စံးဆၢ–လၢၦၤတဝၢပူၤန့ၣ်မိပၢ်မ့ၢ်ဝံၤန့ၣ်ကၠိသရၣ်§မုၣ်န့ၣ်အရ့ဒိၣ်ကတၢၢ်လီၤ.ခီဖျိလၢပတၢ်အိၣ်မူတဝာ် အဒိ§ပအိၣ်ကၠိ တုၤလီၤလၢပဖျိထီၣ်ခီလ့းကၠိမ့ၢ်ဂ့ၤ,ဖၠၣ်စိမိၤမ့ၢ်ဂ့ၤ ပတၢ်အိၣ်မူဒီတဝာ်ကျၢၤန့ၣ်ပဘၣ်အိၣ်ဒ်ကၠိသရၣ်§မုၣ်န့ၣ်လီၤ. ကၠိသရၣ်§မုၣ်န့ၣ်အဝဲသ့ၣ်အိၣ်ဝဲဒၣ်အတၢ်ဆၢကတီၢ်န့ၣ်အါန့ၣ်ဒံးမိၢ်ပၢ်ဒံး.ဘၣ်တဘျီဘျီန့ၣ်တမ့ၢ်ထဲလၢအအိၣ်လၢကၠိဖိဘၣ်,တမ့ၢ်ထဲလၢအသိၣ်လိလံာ်လဲၢ်လၢအဝဲသ့ၣ်ကနၢ်ပၢၢ်အဂီၢ်ဒီးကဖးသ့ကွဲးသ့ဘၣ်,မ့မ့ၢ်တခီန့ၣ်အဝဲသ့ၣ်သိၣ်လိဝဲဒၣ်လၢတၢ်ဆိကမိၣ်ဆိကမးလၢအဝဲသ့ၣ်ကဘၣ်ဆိကမိၣ်ဝဲဒ်လဲၣ်,တၢ်ဂ့ၢ်တခါအံၤမ့ၢ်ကြၢးဧါတကြၢးဧါ,တၢ်တဒူၣ်အံၤ ပစးထီၣ်သိၣ်လိအီၤလၢအနီၢ်ဆံးခါတုၤလၢအနီၢ်ဒိၣ်ထီၣ်န့ၣ်လီၤ.ပၦၤကညီတဂၤပတၢ်အိၣ်မူအရ့ဒိၣ်ကတၢၢ်န့ၣ် ပတၢ်ပာ်သူၣ်ပာ်သးဒ်လဲၣ်,ပတၢ်ဆိကမိၣ်ဆိကမးလၢပကဖံးတၢ်မၤတၢ်အဖီခိၣ်မ့ၢ်ဂ့ၤ,ၦၤတဝၢမ့ၢ်ဂ့ၤ,ပဟံၣ်ဖိဃီဖိအဂီၢ်မ့ၢ်ဂ့ၤ,မ့ၢ်တၢ်အရ့ဒိၣ်ကတၢၢ်မ့ၢ်(sector)တခါလၢပတၢ်ဆိကမိၣ်ဆိကမး,ပတၢ်ပာ်သူၣ်ပာ်သးအဃိန့ၣ်လီၤ.လၢယတၢ်ထံၣ်န့ၣ်ကၠိသရၣ်§မုၣ်အတၢ်မၤအံၤန့ၣ်အရ့ဒိၣ်ကတၢၢ်ဒီးမ့ၢ်အကီကတၢၢ်လီၤ.ခီဖျိလၢကၠိသရၣ်§မုၣ်တဂၤအံၤအတၢ်သိၣ်လိ ၦၤဖိသၣ်တဂၤအံၤအတၢ်ထံၣ်အဖီခိၣ်န့ၣ်ပကန့ၢ်ဘၣ်ခိၣ်နၢ်လၢအဂ့ၤဒီးခိၣ်နၢ်လၢအအၢန့ၢ်ဒိးသန့ၤအသးလၢအဝဲအဖီခိၣ် အဃိန့ၣ်လီၤ.လၢတၢ်န့ၣ်အဃိန့ၣ်အရ့ဒိၣ်ကတၢၢ်လီၤ. သံကွၢ်–တၢ်လၢကၠိသရၣ်§မုၣ်တဂၤအတၢ်သးခုအတၢ်ပာ်ကဖၢလၢလီၤသးန့ၣ်အိၣ်လၢကျဲဒ်လဲၣ်ဒီးအခါဖဲလဲၣ်. စံးဆၢ–အဝဲအတၢ်သးခုအတၢ်ပာ်ကဖၢလၢလီၤသးန့ၣ်ဒ်သိးနၤနၤယၤယၤလီၤ.တၢ်တခါအံၤဒုပသ့ၣ်ညါလီၤ. ပကၠိဖိတဂၤမ့ၢ်ကဲထီၣ်ၦၤအဂ့ၤတဂၤန့ၣ်ပသးခုလီၤ.မ့ၢ်တကဲထီၣ်ၦၤအၢၦၤသီန့ၣ်ဟ့ၣ်နပျဲၢ်တဂၤအံၤကွၢ်တထံဧဲၢ်, ကဲထီၣ်ၦၤဟုၣ်တၢ်ဘျၣ်တၢ်ၦၤအၢၦၤသီန့ၣ်ပသးတမုာ်ဘၣ်.အဒိ§ပၦၤကၠိဖိကဲထီၣ်ၦၤဂ့ၤတဂၤ, အတၢ်အိၣ်မူမ့ၢ်ဂ့ၤန့ၣ် ပသးမုာ်လံဒီးမ့ၢ်ကဲထီၣ်ဘၣ်ခိၣ်နၢ်လၢအဂ့ၤတဂၤန့ၣ်ပပာ်ကဖၢလၢပသးဒိၣ်အါထီၣ်တစဲးလီၤ. သံကွၢ်–တကီၢ်ခါခဲအံၤ ခီကီၢ်ကၠိသရၣ်§မုၣ်သ့ၣ်တဖၣ်န့ၣ်တၢ်တၤတၢ်ဒီးအဝဲသ့ၣ်ကမ့ၢ်မနုၤလဲၣ်. စံးဆၢ–ခီကီၢ်ကၠိန့ၣ်တၢ်တၤတၢ်ဒီးအီၤန့ၣ်အိၣ်ဒီဒူၣ်.ပမ့ၢ်ခီကီၢ်န့ၣ်အခီပညီန့ၢ်ကဲဝဲဒၣ်ပှၤလၢပတအိၣ်လၢ ပထံပကီၢ်အပူၤဘၣ်.ပဟဲအိၣ်လၢၦၤအထံအကီၢ်အကအိပူၤ,ပအိၣ်န့ၣ်ခီကီၢ်န့ၣ်ကအိၣ်ဝဲဒၣ်ခံခါ.တၢတခါန့ၣ် အဒိပကၠိသရၣ်§မုၣ်လၢအအိၣ်လၢဒဲကဝီၤအပူၤ,တၢ်အဝဲန့ၣ်နာ်က့ကဲခီကီၢ်ကၠိသရၣ်§မုၣ်စ့ၢ်ကီးလီၤ. ဒီးကၠိသရၣ်§မုၣ် လၢအအိၣ်လၢတၢ်ချၢလၢတမ့ၢ်လၢဒဲကဝီၤပူၤဘၣ်တဖၣ်န့ၣ်အကဲခီကီၢ်ကၠိသရၣ်§မုၣ်စ့ၢ်ကီးလီၤ.တၢ်တၤတၢ်အိၣ်ဒ်လဲၣ်န့ၣ် အဒ်သိးသိးလိာ်အသးန့ၣ်ကဲဝဲဒၣ်တၢ်တဒိးန့ၣ်ဘၣ်တၢ်အဘူးအလဲအဝဲသ့ၣ်သိၣ်လိတၢ်ဒီနံၣ်ကျၢၤသနာ်က့တၢ်အဘူး အလဲလၢအဝဲသ့ၣ်ဒိးန့ၢ်ဘၣ်ဝဲန့ၣ်စှၤတလၢစှၤန့ၢ်ဒံးတၢ်လၢအဝဲသ့ၣ်ဟ့ၣ်လီၤပာ်ဝဲဒံး.အဝဲသ့ၣ်မၤတၢ်ဒီနံၤအဝဲသ့ၣ်ဆိကမိၣ်ဆိကမးအတၢ်အသူၣ်လီၤဘှံးသးလီၤဘှံးနီၢ်ကစၢ်နာ်က့လီၤဘှံးခဲလၢာ်ခဲစ့သနာ်က့တၢ်လၢအက့ၤဒိးန့ၢ်ဘၣ်ဝဲန့ၣ်အစှၤဒီး ကဲတၢ်တၤတၢ်တခါလၢပကၠိသရၣ်§မုၣ်န့ၣ်အလီၤစှၤကွံာ်အိၣ်တနီၤ.အလီၤစှၤအကစူးန့ၣ်ကၠိသရၣ်§မုၣ်လၢအၦဲၤဒီးအကံၢ်အစီန့ၣ်အလီၤစှၤ၀ဲလီၤ.ခီဖျိလၢတၢ်အဘူးအလဲလီၤစှၤတၢ်အဘူးအလဲတအိၣ်ဘၣ်အဃိဒဲကဝီၤအပူၤမ့ၢ်ဂ့ၤ,ဒဲကဝီၤအချၢ မၢ်ဂ့ၤ တၢ်ကီတၢ်ခဲတၢ်တၤတၢ်တခါန့ၣ်မ့ၢ်တၢ်တၤတၢ်ဖးဒိၣ်တခါလၢပကဟ့ၣ်လီၤက့ၤကၠိသရၣ်§မုၣ်န့ၣ်လီၤ. ခံခါတခါန့ၣ် တၢ်တၤတၢ်န့ၣ်တမ့ၢ်လၢပတဲလၢအရ့ဒိၣ်ဘၣ်န့ၣ်အရ့ဒိၣ်သ့လၢကၠိသရၣ်§မုၣ်အကံၢ်အစီ.လၢညါခါန့ၣ်ခီဖျိလၢတၢ်ဆၢကတီၢ်မ့ၢ်ဂ့ၤ,တၢ်ကရၢကရိလၢအမၤစၢၤၦၤအိၣ်အါန့ၣ် အခါဖဲန့ၣ်ကၠိသရၣ်§မုၣ်လၢအကံၢ်အစီအိၣ်န့ၣ်အိၣ်ဒီဒူၣ်. ပဟ့ၣ်လီၤအီၤတၢ်သိၣ်လိအခဲအံၤလၢဒဲကဝီၤအပူၤမ့ၢ်ဂ့ၤ,လၢဒဲကဝီၤအချၢမ့ၢ်ဂ့ၤ, ကၠိသရၣ်§မုၣ်လၢအကံၢ်အစီ အိၣ်န့ၣ်ပဃုဘၣ်ကီလီၤ.တၢ်တခါအံၤကဲထီၣ်ဝဲတၢ်တၤတၢ်ခံခါတခါလီၤ. သံကွၢ်–ကၠိသရၣ်§မုၣ်တဖၣ်ဟဲအိၣ်လၢပှၤထံပှၤကီၢ်အံၤအဖီခိၣ်န့ၣ် အ၀ဲသ့ၣ်တူၢ်ဘၣ်လၢအသးဆံးအမဲာ်သၣ်အံၣ်န့ၣ် အိၣ်စ့ၢ်ဧါ. စံးဆၢ–တၢ်မဲာ်သၣ်အံၣ်တၢ်သးဆံးဒုအိၣ်ဝဲ.နကဲကၠိသရၣ်ဒီတဂၤ အဒိ§ၦၤအထံၦၤအကီၢ် လၢယိၤကီၢ်မ့ၢ်ဂ့ၤ, ကီၢ်ကၠီၣ်တဲၣ်မ့ၢ်ဂ့ၤ,ကီၢ်ပယီၤမ့ၢ်ဂ့ၤ,ၦၤကီးၦၤလၢသရၣ်§မုၣ်ဒီးပှၤပာ်ကဖၢလၢၦၤအသးဒီးပဟးလၢၦၤအကျါဒီး ယၤအံၤယကဲသရၣ်§မုၣ်အသူးအသ့ၣ်သ့လီၤ.နာ်သက့ဖဲလၢပဟဲအိၣ်လၢခီကီၢ် ကီၢ်ကၠီၣ်တဲၣ်အပူၤအံၤ ကၠိသရၣ်§မုၣ် လၢအအိၣ်လၢဒဲကဝီၤအချၢကဟးလၢၦၤအကျါအကတဲလီၤအသးလၢအကဲကၠိသရၣ်§မုၣ်မးန့ၣ်တဲဝဲတဘူၣ်ဘၣ်ဒီး အသူးသ့ၣ်လၤကပီၤတအိၣ်ဘၣ်.ဒဲကဝီၤကၠိသရၣ်§မုၣ်စ့ၢ်ကီးအအိၣ်သ့ဒၣ်ထဲဒဲကဝီၤအပူၤလီၤ.မ့ၢ်ဟးထီၣ်လၢတၢ်ချၢန့ၣ် ၦၤတဂၤအံၤန့ၣ်ၦၤတသ့ၣ်ညါအီၤလၢမ့ၢ်ကၠိသရၣ်§မုၣ်ဘၣ်.တၢ်လၢကၠိသရၣ်§မုၣ်န့ၣ်ပပာ်ကဖၢလၢပသးလၢပကဲကၠိသရၣ်§မုၣ်ဒီးပသူးသ့ၣ်လၤကပီၤအိၣ်ဖဲပကဲကၠိသရၣ်§မုၣ်အခါလီၤ.တဘျီဖဲပမ့ၢ်ဟးထီၣ်တၢ်ချၢၦၤမ့ၢ်ထံၣ်ၦၤၦၤတပာ်ကဲၦၤဘၣ်. ၦၤတထံၣ်ၦၤလၢပကဲကၠိသရၣ်§မုၣ်ဘၣ်.တၢ်တခါအံၤအကဲဝဲဒၣ်တၢ်လီၤသးအုးဖးဒိၣ်ဒီးတၢ်သးတမုာ်လၢ ကၠိသရၣ်§မုၣ် သ့ၣ်တဖၣ်အဂီၢ်လီၤ. သံကွၢ်–လီၢ်ခံကတၢၢ်နအဲၣ်ဒိးဆီၣ်သခူထီၣ်ခီကီၢ်ကၠိသရၣ်§မုၣ်တဖၣ်ဃုာ်ဒီးဟီၣ်ခိၣ်ဒီဖျၢၣ်ကၠိသရၣ်§မုၣ်တဖၣ်ဒ်လဲၣ်. စံးဆၢ–ကၠိသရၣ်§မုၣ်လၢအအိၣ်ဖဲအံၤန့ၣ်အသးဆူၣ်ကိးဂၤဒဲးလံ.အသးမ့ၢ်တဆူၣ်ဘၣ်န့ၣ်တၢ်ကီတၢ်ခဲအိၣ်ဖးအါလံ...
ၦၤၦ့ၤဃၢမံၤတံၢ်တအိၣ်ဘၣ်အဃိ ၦၤသူၣ်တၢ်ဖိတဖၣ်ကျိၣ်စ့တၢ်ဟဲနု၁်တအိၣ်လၢၤႇထံၣ်ဘၣ်တၢ်ကီတၢ်ခဲ
လါအီးကထိဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ဒီးတၢ်ကြဲၢ်ကီၢ်ဆၣ်အပူၤ ခီဖျိၦၤၦ့ၤဃၢမံၤတံၢ်တအိၣ်ဘၣ်အဃိ ၦၤသူၣ်ဃၢမံၤတံၢ်ဖိတဖၣ် တနံၣ်အံၤကျိၣ်စ့တၢ်ဟဲနုာ်တအိၣ်လၢၤဘၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကီၢ်ဆၣ်ခံဘ့ၣ်အံၤဟီၣ်က၀ီၤဒူသ၀ီတဖၣ်အပူၤ ဘူးထီၣ်တၢ်စူၤကလၢၤန့ၣ်တၢ်စးထီၣ်ခူၣ်ထီၣ်၀ဲဃၢမံၤတံၢ်ဒီး ခီဖျိၦၤဟဲၦ့ၤဃၢမံၤတံၢ်ဖိတအိၣ်လၢၤဘၣ်အဃိ ၦၤလၢအသူၣ်ဃၢမံၤတံၢ်သ့ၣ်တဖၣ်အံၤလၢကအီၣ်ကအီအဂီၢ် ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ၦၤသူၣ်ဃၢမံၤတံၢ်ဖိတဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ညီနုၢ်ဆၢကတီၢ်ခဲအံၤန့ၣ်ပဆါဃၢမံၤတံၢ်လံႉအပူၤကွံာ်ၦၤဟဲၦ့ၤဃၢမံၤတံၢ်ဖိတဖၣ်န့ၣ်ခဲအံၤ တၦ့ၤ၀ဲလၢၤဘၣ်ႉ ကလဲၤဆါအဂီၢ်ဒၢးအ၀ဲသ့ၣ်တဲ၀ဲလၢခဲအံၤအ၀ဲသ့ၣ်နါက့တၢ်တဘၣ်ဂီၢ်ဘၣ်ႇတမၤတၢ်မၤလၢၤဘၣ်တဲ၀ဲဒ်န့ၣ်ႉပကဆါန့ၢ်ၦၤလၢအဂၤခီဒၢးအ၀ဲသ့ၣ်နါက့တဲၦၤလၢအတၦ့ၤ၀ဲလၢၤဘၣ်ႉတနံၣ်အံၤၦၤၦ့ၤမ့တအိၣ်ဘၣ်ဒုၦၤသူၣ်ဃၢမံၤတံၢ်ဖိတဖၣ်တမ့ၢ်လၢကဘၣ်ဂီၢ်၀ဲဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ကြဲၢ်ကီၢ်ဆၣ် ဟီၣ်က၀ီၤအပူၤ ကမျၢၢ်တနီၤန့ၣ် သူၣ်ဆါ၀ဲဒၣ်ဃၢမံၤတံၢ်ဒ်မုၢ်ကျိၤ၀ဲၤကွာ်တၢ်ဖံးတၢ်မၤတခါအသိး ဒီးတၢ်လီၢ်တနီၤခီန့ၣ်သူၣ်ဆါ၀ဲတမ့ၢ်ဒ်သိးမုၢ်ကျိၤ၀ဲၤကွာ်အသိးဘၣ်ႉဘၣ်ဆၣ်ဃၢမံၤတံၢ်လၢအမဲထီၣ်လၢအ၀ဲသ့ၣ် အဟံၣ်ကပၤအကျီးကပၤတဖၣ်အံၤန့ၣ်အ၀ဲသ့ၣ်ခူၣ်ထီၣ်ဆါ၀ဲလၢကအီၣ်ကအီအဂီၢ်ဒီးဘၣ်ဆၣ်တနံၣ်အံၤခီဖျိၦၤၦ့ၤ ဃၢမံၤတံၢ်တအိၣ်လၢၤဘၣ်အဃိ တၢ်ကီတၢ်ခဲအိၣ်ထီၣ်၀ဲဒၣ်န့ၣ်လီၤႉ တကီၢ်ခါခဲအံၤပနံာ်တၢ်ဖိတၢ်လံၤတၢ်အီၣ်တၢ်အီစ့ၢ်ကီးအၦ့ၤဒိၣ်ထီၣ်၀ဲဒၣ်ကွ့ၢ်ကွ့ၢ်အသိးခီဖျိဃၢမံၤတံၢ်စ့ၢ်ကီး အၦ့ၤတဂၢၢ်တကျၢၤဘၣ်အဃိတၦ့ၤ၀ဲလၢၤဘၣ်ဒီးဃၢမံၤတံၢ်လၢအၦ့ၤဃာ်၀ဲသ့ၣ်တဖၣ်စ့ၢ်ကီးလၢကဆှၢထီၣ်ဆါအီၤဆူ (မၠၣ်၀တံၣ်၀့ၢ်)တၢ်မၤလီၢ်အဂီၢ်စ့ၢ်ကီးကျဲတၢ်ကီတၢ်ခဲအဃိတၦ့ၤဃၢမံၤတံၢ်လၢၤဘၣ်အဂ့ၢ်န့ၣ် ၦၤခိးၦ့ၤဃၢမံၤတံၢ်ဖိ တဂၤ စံး၀ဲဒ်အံၤန့ၣ်လီၤႉ “တနံၣ်အံၤမၤတၢ်တဘၣ်ဂီၢ်နီတမံၤဘၣ်ႉတၢ်ၦ့ၤဒၢးထီၣ်ႇမၤဆါတၢ်ခီဒၢးတဘၣ်ဂီၢ်ဘၣ်ဘျီပၦ့ၤတၢ်တဘူၣ်နီတမံၤလၢၤဘၣ်ႉခဲအံၤန့ၣ်အၦ့ၤတမၠိႇယံၤထီၣ်ဘျီန့ၣ်အၦ့ၤအိၣ်တမၠိမီၤနီၤႉနၦ့ၤ၀ံၤမးမ့ဆှူဒုတၢ်ကီလံႉတၢ်ၦ့ၤမ့ဂၢၢ်ထီၣ်ဘျီမး ပကၦ့ၤဧါဒု တသ့ၣ်ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢကီးတရံးကီၢ်ဆၣ်ဒီးနိၣ်တကီကီၢ်ဆၣ်သ့ၣ်တဖၣ်အပူၤစ့ၢ်ကီး ဖဲအပူၤကွံာ်(၂၀၂၂)ဃၢမံၤတံၢ်ဟးထီၣ် အဆၢကတီၢ် ခီဖျိၦၤၦ့ၤဃၢမံၤတံၢ်တအိၣ်ဘၣ်အဃိ ၦၤသူၣ်ဃၢမံၤတံၢ်ဖိတဖၣ်ထံၣ်ဘၣ်၀ဲတၢ်ကီတၢ်ခဲဒီး ဒ်န့ၣ်အသိး ခဲအံၤစ့ၢ်ကီးဃၢမံၤတံၢ်အၦ့ၤလီၤ၀ဲဖးဒိၣ်ညါအဂ့ၢ်န့ၣ် ကီးတရံးကီၢ်ဆၣ် ၦၤသူၣ်ဃၢမံၤတံၢ်ဖိတဖၣ် စံး၀ဲန့ၣ်လီၤႉ