လါအီးကထိဘၢၣ် ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ တနံၣ်အံၤ(၂၀၂၃)လါယူနူၤအါရံၤ တုၤလၢ လါစဲးပထ့ဘၢၣ် လၢ(၉)လါအတီၢ်ပူၤ ပယီၤသုးတကပၤသံ၀ဲဒၣ်အဂၤ(၃၀၀၀)ဘျဲၣ်ဒီး ဘၣ်ဒိဘၣ်ထံး အဂၤ(၂၀၀၀)ဘျဲၣ် အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သး ထုးထီၣ်ပာ်ဖျါ၀ဲဖဲမဟါလါအီးကထိဘၢၣ် ၁၁ သီ အနံၤန့ၣ်လီၤႉ
တနံၣ်အံၤစးထီၣ်လါယနူၤအါရံၤတုၤလၢလါစဲးပထ့ဘၢၣ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA), ကညီဒီကလုာ်ဂၢၤသးကရၢ(KNDO)ဒီးပယီၤသုးအဘၢၣ်စၢၤတၢ်ဒုးဖးဒိၣ်တၢ်ဒုးဖိကဲထီၣ်ခဲလၢာ်အဘျီ(၃၅၇၀) ပယီၤသုးတကပၤသံ၀ဲ(၃၈၆၅),ဘၣ်ဒိ(၂၂၆၀)အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ဒ်န့ၣ်အသိးမ့မ့ၢ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုာ်ဂၢၤသးကရၢ(KNDO)တကပၤန့ၣ် ဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၁၁၂)ဂၤဒီးဘၣ်ဒိ၀ဲ(၃၉၉)ဂၤအဂ့ၢ်န့ၣ် ခ့ၣ်အဲၣ်ယူၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
