ပယီၤသုးခးလီၤကျိဖးဒိၣ်အဃိကမျၢၢ်ဘၣ်ဒိ(၄)ဂၤအကျါပၣ်ဃု၁်ဖိသၣ်(၉)နံၣ်တဂၤ
လါမးရှး ၂၄ သီ‚ ၂၀၂၃ နံၣ်‚ ခ့ၣ်အဲးစံၣ် လၢကညီကီၢ်စဲၣ် ကီးတရံးကီၢ်ဆၣ်ကလံၤစိး(ကြောင်လျှာကုန်း)ပူၤခီဖျိပယီၤသုးခးလီၤကျိဖးဒိၣ်အဃိ ကမျၢၢ်ဘၣ်ဒိ(၄)ဂၤအကျါပၣ်ဃုာ်၀ဲဖိသၣ်မုၣ်ဖိ(၉)နံၣ်တဂၤအဂ့ၢ်န့ၣ် သ၀ီဖိစံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဖဲလါမးရှး ၂၃ သီ မုၢ်ဃ့ၢ်လီၤ ၃ နၣ်ရံၣ်ဃၣ်ဃၣ်အဆၢကတီၢ် ပယီၤသုး(ခလရ–၉၇)သုးရ့ၣ်လၢအိၣ်ကီးတရံး၀့ၢ်ပူၤ တဖၣ်အံၤ ခးလီၤတပျုာ်တပျီာ်ကျိဖးဒိၣ်လၢ(ကြောင်လျှာကုန်း)သ၀ီပူၤအဃိ သ၀ီဖိဘၣ်ဒိဘၣ်ထံး၀ဲ(၄)ဂၤအဂ့ၢ်န့ၣ် သ၀ီဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ အ၀ဲစံး၀ဲလၢ“တနံၤညါအံၤတၢ်ဒုးကဲထီၣ်တအိၣ်ဘၣ်ႉပယီၤသုးခးနါစိၤကျိဖးဒိၣ်ႉသ၀ီဖိဘၣ်ဒိ(၄)ဂၤႉမ့ၢ်ပယီၤသုးနၢ်ဟူတၢ်ကစီၣ်မနုၤလဲၣ်ဒုတသ့ၣ်ညါဘၣ်ႉမ့မ့ၢ်၀ဲဒၣ်ဒုပတသ့ၣ်ညါဘၣ်နီတမံၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါမးရှး ၂၃ သီအနံၤန့ၣ်လီၤႉ သ၀ီဖိလၢအဘၣ်ဒိဘၣ်ထံးတဖၣ်န့ၣ်မ့ၢ်၀ဲအူထိကၠံၤ(ကိး)ဖါပဲၣ် ၅၀ နံၣ်ႇ နီၢ်ဖီဘီ(၅၀)နံၣ်ႇ စီၤမ့ထဲၣ်(၁၈)နံၣ်ႇ နီၢ်တကၠိၤဖီ(၉)နံၣ်သ့ၣ်တဖၣ်ဒီးၦၤသ့ၣ်တဖၣ်အံၤတၢ်လဲၤဆှၢအ၀ဲသ့ၣ်ဆူဖၣ်အၣ်တၢ်ဆါဟံၣ်အဂ့ၢ်န့ၣ် သ့ၣ်ညါဘၣ်လၢ(ကြောင်လျှာကုန်း)သ၀ီဖိအအိၣ်န့ၣ်လီၤႉ “ၦၤလဲၤဆှၢအ၀ဲသ့ၣ်လၢဖၣ်အၣ်တၢ်ဆါလၢၤလံႉမ့မ့ၢ်နီၢ်ဖီဘီန့ၣ်ဘၣ်၀ဲဒၣ်အချၢဃံႇဘၣ်နးတစဲးႉအသွံၣ်လီၤဒီဒူၣ်ညါႉတဲ၀ဲလၢအမဲာ်မူၤႇမ့မ့ၢ်အ၀ဲန့ၣ်တၢ်ဘၣ်ယိၣ်အိၣ်လီၤ”အဂ့ၢ်န့ၣ် ၦၤလၢမၤစၢၤၦၤဘၣ်ဒိဘၣ်ထံးဖိတဂၤ စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါမးရှး ၂၁ သီအခါစ့ၢ်ကီး ပယီၤသုး(၉၇)သုးရ့ၣ်လၢအိၣ်ကီးတရံး၀့ၢ်ပူၤအံၤတဖၣ် ခးတပျုာ်တပျီာ်ကျိဖးဒိၣ်အဃိဘၣ်၀ဲဒၣ်(ရွာသစ်ကုန်း)သ၀ီပူၤဟံၣ်တၢ်သူၣ်ထီၣ်ဒီးဆၣ်ဖိကီၢ်ဖိသံဘၣ်ဒိဘၣ်ထံး၀ဲအိၣ်ဒၣ်န့ၣ်လီၤႉ
ကလံၤထံးဟီၣ်က၀ီၤ အဆိကတၢၢ်တဘျီတၢ်ပၢၢ်ဆၢသုးကရူၢ်မၤ၀ဲတၢ်ခးလိကျိဖးဒိၣ်တၢ်မၤလိ၀ံၤ၀ဲလံ
လါမးရှး ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် သုးကျိၤလၢအိၣ်ဒီကလုာ်ဃူဖိးပဒိၣ် တၢ်ဒီသဒၢကမျၢၢ်ကိာ်တိာ်၀ဲၤကျိၤ ကလံၤထံးကီၢ်ခီသုးဟီၣ်က၀ီၤ နီၣ်ဂံၢ်(၃)ပူၤတဖၣ်ပာ်ဖှိၣ်ထီၣ်သးမၤ၀ဲအဆိကတၢၢ်တဘျီတၢ်ခးလိကျိဖးဒိၣ်တၢ်မၤလိ၀ံၤ၀ဲလံအဂ့ၢ်န့ၣ် သုးကျိၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ သုးကျိၤကိးကျိၤဒဲးကမျၢၢ်သုးတဖၣ်အံၤတၢ်ဟ့ၣ်အ၀ဲသ့ၣ်တၢ်ခးလိကျိဖးဒိၣ်တၢ်မၤလိတခါလၢတၢ်ပၢၢ်ဆၢဟီၣ်က၀ီၤတၢ်လီၢ်တတီၤအပူၤဒီးဖဲလါမးရှး ၁၉ သီအနံၤ တၢ်မၤ၀ဲတၢ်ပျၢ်တၢ်သိၣ်လိမူးတၢ်ရဲၣ်တၢ်ကျဲၤအဂ့ၢ်န့ၣ် ကလံၤထံးကီၢ်ခီ သုးဟီၣ်က၀ီၤခိၣ်–၂ စီၤရှါ စံး၀ဲန့ၣ်လီၤႉ အ၀ဲစံး၀ဲလၢ“သုးကျိၤကိးဖုဒဲးန့ၣ်ၦၤဟ့ၣ်လီၤ၀ဲဒၣ်တၢ်ခးလိကျိဖးဒိၣ်တၢ်မၤလိခဲလၢာ်လီၤႉမ့မ့ၢ်လၢသုးကျိၤခဲလၢာ်ပာ်ဖှိၣ်ထီၣ်သးမၤ၀ဲဒၣ်တၢ်ခးလိကျိဖးဒိၣ်အံၤမ့ၢ်၀ဲအဆိကတၢၢ်တဘျီလီၤႉတၢ်လၢကဘၣ်အိၣ်ကတီၤဆိသးန့ၣ်အရ့ဒိၣ်၀ဲလီၤႉဒ်သိးဖီတၢၣ်လၢပလိၣ်ဘၣ်အံၤကတုၤ၀ဲအဂီၢ်န့ၣ်သုးတၢ်သိၣ်လိအံၤကဲထီၣ်တၢ်တိစၢၤမၤစၢၤလီၤႉ ပအဲၣ်ဒိးတဲလၢတၢ်ပၢၢ်ဆၢအဂီၢ်န့ၣ်ပဟူးဂဲၤဖံးမၤအီၤလၢလၢၦဲၤၦဲၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ တၢ်မၤတၢ်ပျၢ်တၢ်သိၣ်လိမူးတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်(နဂါနီ)‚နဂါးဖြူ‚Cobra‚တီနီၢ်ႇကျားဖြူ‚ကျားသစ်နက်‚‚ကစၢၢ်သူ‚(SOF)‚(ဂဠုန်)သုးကျိၤကိးဖုဒဲးသုးဖိသံၣ်ဖိသ့ၣ်တဖၣ်ဟ့ၣ်ထီၣ်၀ဲတၢ်ယူးယီၣ်ဆူတၢ်ဒီသဒၢကမျၢၢ်သုးမုၢ်ဒိၣ် နီၣ်တယၢ်အအိၣ်ဒီးတၢ်ရဲၣ်တၢ်ကျဲၤအပူၤသုးကျိၤၦၤဘၣ်မူဘၣ်ဒါတဖၣ်ကတိၤဟ့ၣ်ဂံၢ်ဟ့ၣ်ဘါလီၤတၢ်အသိးတၢ်ဟ့ၣ်ထီၣ်တၢ်ယူးယီၣ်ဆူသုးဖိသံၣ်ဖိလၢအဟ့ၣ်လီၤသးသမူလၢတၢ်ပၢၢ်ဆၢပူၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကလံၤထံးကီၢ်ခီသုးဟီၣ်က၀ီၤနီၣ်ဂံၢ်(၃)အံၤအိၣ်ဆီလီၤသးလၢကီၢ်ပယီၤကလံၤထံး(ကီၢ်ခီဒိၣ်)ဒီး(ကီၢ်စဲၣ်)သ့ၣ်တဖၣ်အပူၤဒီးခးလိာ်အသးဒီးတနီသရံၣ်သုး၀ဲၤလီၢ်သ့ၣ်ႇမုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်ဒီးသုးကီၢ်ခီသုးကျိၤ လၢအဂၤတဖၣ်အိၣ်၀ဲကိးမုၢ်နံၤဒဲးန့ၣ်လီၤႉဒ်န့ၣ်အသိးအ၀ဲသ့ၣ်အံၤပာ်ဖှိၣ်ဒုးသကိးဃုာ်တၢ်ဒီးကလုာ်ဒူၣ်တၢ်ပၢၢ်ဆၢသုးဖိသံၣ်ဖိတဖၣ်စ့ၢ်ကီးအဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
(လောင်းလုံ)ကီၢ်ဆၣ်ပူၤ ပယီၤသုးဟးနု၁်လီၤဒွဲၣ်အူအီၣ်သ၀ီတဖျၢၣ်၀ံၤတဖျၢၣ်
လါမးရှး ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် လီလိၤကီၢ်ဆၣ်အပူၤ ပယီၤသုးဟးနုာ်လီၤဒွဲၣ်အူအီၣ်သ၀ီတဖျၢၣ်၀ံၤတဖျၢၣ်ဒီး မၤသံ၀ဲလီၢ်က၀ီၤကမျၢၢ်တဂၤစ့ၢ်ကီးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢလီလိၤကီၢ်ဆၣ်အပူၤ ဖဲလါမးရှး ၂၁ သီ မုၢ်ထူၣ် ၁၂ နၣ်ရံၣ်ဃၣ်ဃၣ်အဆၢကတီၢ် ပယီၤသုးနုာ်လီၤလၢ(ညောပြင်)သ၀ီဒီး(အောက်ကျောက်၀ပ်)သ၀ီပူၤ၀ံၤဒွဲၣ်အူအီၣ်ကွံာ်ဟံၣ်အဖျၢၣ်(၁၅၀)ဃၣ်ဃၣ်အံၤလၢတၢ်ဂ့ၢ်တအိၣ်နီတမံၤဘၣ်ဒီးမၤသံကွံာ်သ၀ီဖိတဂၤစ့ၢ်ကီးအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “အ၀ဲသ့ၣ်ဒွဲၣ်အူအီၣ်ဟံၣ်ခဲလၢာ်န့ၣ်ကအိၣ်အဖျၢၣ်(၁၀၀)ဘျဲၣ်ညါႉဒွဲၣ်အူအီၣ်၀ဲသ၀ီဒီတဖျၢၣ်ညါမီၤနီၤႉ မ့၀ံၤအ၀ဲသ့ၣ်ခးသံ၀ဲသ၀ီဖိသးစၢ်အနံၣ်(၂၀)ဘျဲၣ်န့ၣ်တဂၤႉသ၀ီလၢသုးမီၤစိရိၤစုတီၤဖီလာ်ကရူၢ်(ပျူစောထီး)အိၣ်၀ဲနါက့အ၀ဲသ့ၣ်ဒွဲၣ်အူ၀ဲလီၤႉမ့မ့ၢ်သ၀ီလၢ(PDF)အိၣ်၀ဲဒုနးဒိၣ်ဒီးတစဲး”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ခီဖျိပယီၤသုးဒွဲၣ်အူအီၣ်သ၀ီအဃိကမျၢၢ်လၢပယီၤသုးဒွဲၣ်အူအီၣ်အဟံၣ်တဖၣ်အံၤဒီးသ၀ီလၢအိၣ်တၢ်ခိၣ်တၢ်ဃၢၤဖဲန့ၣ်(၅)ဖျၢၣ်ဃၣ်ဃၣ်ကမျၢၢ်တဖၣ်ပျံၤတၢ်ဖုးတၢ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢတၢ်ဒီသဒၢကမျၢၢ်သုးကရူၢ် အအိၣ်န့ၣ်လီၤႉ လီလိၤကီၢ်ဆၣ် တၢ်ဒီသဒၢကမျၢၢ်သုးကရူၢ် တၢ်ဘိးဘၣ်ရၤလီၤမူဒါခိၣ်တဂၤ စံး၀ဲလၢ“ သ၀ီဖိဘၣ်လဲၤစံၣ်အိၣ်လၢကစၢၢ်ကလိကျါခဲလၢာ်လီၤႉတၢ်ပၢၢဆၢသုးကရူၢ်လၢအိၣ်ကီၢ်ဆၣ်ပူၤတဖၣ်ဂုာ်စ့ၢ်ကီး ကျဲးစၢးတၢ်လၢကမျၢၢ်ၦၤဃ့ၢ်မှံဟးဖျိးတဖၣ်အဂီၢ်သၦၢ်ၦၢ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢတနီသရံၣ်ကီၢ်ခီဒိၣ် ကီၢ်ဆၣ်ဒီးဒူသ၀ီတဖၣ်အပူၤ စးထီၣ်(၂၀၂၁)လါစဲးပထ့ဘၢၣ်တုၤလၢ(၂၀၂၃) လါဖ့ၤဘြူၤအါရံၤန့ၣ် ခီဖျိပယီၤသုးဒီးသုးမီၤစိရိၤစုတီၤဖီလာ်ကရူၢ်တဖၣ်အံၤအတၢ်ဟူးတၢ်တၢ်ဂဲၤတၢ်ဖံးတၢ်မၤအဃိ မ့ၣ်အူအီၣ်ဟးဂီၤ၀ဲကမျၢၢ်အဟံၣ်ခဲလၢာ်အိၣ်၀ဲ(၄၃၅)ဖျၢၣ်အဂ့ၢ်န့ၣ် တနီသရံၣ်ကီၢ်ခီ (Southern Monitor) ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်စှၤသီအခါစ့ၢ်ကီးပယီၤသုးနုာ်လီၤဒွဲၣ်အူအီၣ်(ကရင်ကြီး)သ၀ီပူၤဟံၣ်(၉)ဖျၢၣ်ဒီး(ပညစ်)သ၀ီပူၤဟံၣ်(၄)ဖျၢၣ်တကးဒံးဘၣ်အမဲာ်ညါက့ၤစိာ်၀ဲလီၢ်က၀ီၤသ၀ီဖိအတၢ်ဖိတၢ်လံၤလုၢ်ဒိၣ်ၦ့ၤဒိၣ်ႇတၢ်အီၣ်တၢ်အီဒီး ဆၣ်ဖိကီၢ်ဖိလၢဟံၣ်သ့ၣ်တဖၣ်အဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
ပယီၤသုးခးလီၤကျိဖးဒိၣ်ဒီးကဘီယူၤဟဲခးလီၤတၢ်အါထီၣ်လၢ(KNU)ကီၢ်ရ့ၣ် ၂ ဘ့ၣ်အပူၤ
လါမးရှး ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤလၢအမ့ၢ်ချၢၣ်လွံၢ်ထူၣ်ကီၢ်ရ့ၣ်ဒီးဒူသထူၣ်ကီၢ်ရ့ၣ်အပူၤ စးထီၣ်တလါအံၤလါမးရှးခံနွံတနွံန့ၣ် ပယီၤသုးခးလီၤကျိဖးဒိၣ်‚ကဘီယူၤဟဲတ့ၢ်လီၤမ့ၣ်ပိၢ်ဟဲအါထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်–လီၢ်ခၢၣ်သးထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဖဲအပူၤကွံာ်လါမးရှး ၂၀ သီအနံၤန့ၣ် သုးမီၤစိရိၤကဘီယူၤဟဲခးလီၤတၢ်လၢ(ချၢၣ်လွံၢ်ထူၣ်ကီၢ်ရ့ၣ်)လၢၢ်ဒိၣ်ဒီး စွ့ၣ်ကၠ့ၣ်ကီၢ်ဆၣ်ဒူသ၀ီပူၤအိၣ်၀ဲ(၉)ဘျီဒီးတ့ၢ်လီၤ၀ဲမ့ၣ်ပိၢ်ကအိၣ်(၂၈)ဖျၢၣ်ညါအဃိကမျၢၢ်ဘၣ်ဒိ(၁)ဂၤအသိး ဟံၣ်ဟးဂီၤ(၅)ဖျၢၣ်ႇတီၤဖုၣ်ကၠိဟးဂီၤ၀ဲ(၁)ဖျၢၣ်ဒီး သ၀ီ(၂၁)ဖျၢၣ် ကမျၢၢ်အဂၤ(၃၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်–လီၢ်ခၢၣ်သး ထုးထီၣ်ပာ်ဖျါ၀ဲဖဲလါမးရှး ၂၂ သီအနံၤန့ၣ်လီၤႉ ဒ်န့ၣ်အသိးလါမးရှး ၁၆ သီတုၤလၢ(၂၀)သီအနံၤ ခီဖျိ(ကၠဲၣ်ထိၤ)၀့ၢ်ပယီၤသုးတဖၣ်အံၤ ခးလီၤကျိဖးဒိၣ်ဆူ ဒူသထူၣ်ကီၢ်ရ့ၣ် ကၠဲၣ်ထိၤကီၢ်ဆၣ် ဇီးပြောင်း(၃)သ၀ီဒီး(ကရ၀င်းဆိပ်)သ၀ီပူၤအဃိလီၢ်က၀ီၤကမျၢၢ်သံ(၂)ဂၤႇ ဘၣ်ဒိ(၂)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢၢ်ဒိၣ်ကီၢ်ဆၣ်ပူၤတၢ်ဒုးကဲထီၣ်လၢပယီၤသုးဒီးတၢ်ပၢၢ်ဆၢသုးကရူၢ်အဘၢၣ်စၢၤ၀ံၤလီၢ်ခံ ခီဖျိပယီၤသုးသံဘၣ်ဒိဘၣ်ထံးအါဒီးအ၀ဲသ့ၣ်ကမၤအါထီၣ်ဂံၢ်ဘါအဂီၢ်ပယီၤသုးအံၤသူ၀ဲကဘီယူၤဟဲတ့ၢ်လီၤမ့ၣ်ပိၢ်လၢကမျၢၢ်ထံဖိကီၢ်ဖိအိၣ်ဆိးလီၢ်ကျဲဒူသ၀ီပူၤအဂ့ၢ်န့ၣ် လီၢ်က၀ီၤကမျၢၢ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်န့ၣ်ပယီၤသုးတကပၤသံအါမးႉၦၤလၢအသံတဖၣ်အံၤပယီၤသုးဘိၣ်ဘံထီၣ်၀ဲဒီး(တာလပတ်)ဘျီကွံာ်လီၤ၀ဲလၢထံကျိပူၤဒ်န့ၣ်လီၤႉမ့မ့ၢ်ပ၀ဲဒၣ်ခီကဘီယူၤမ့ဟဲဘူးထီၣ်ဒီးၦၤလံန့ၣ်ပစံၣ်လီၤအိၣ်လၢတၢ်ပူၤလီၤႉတၢ်ပူၤမ့တအိၣ်ဘၣ်ခီန့ၣ်ပဟးအိၣ်လၢသ့ၣ်ကဒုဖီလာ်လီၤႉမ့ၣ်ပိၢ်မ့လီၤတဲာ်လိၤလိၤၦၤဒုသံ၀ဲန့ၣ်ႉအါဒၣ်တက့ၢ်န့ၣ်ၦၤသံလၢအဘၣ်ဒီးကျိဖးဒိၣ်န့ၣ်အါ၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ ပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်ဟဲအါထီၣ်ဒ်အံၤန့ၣ်ခီဖျိလၢသုးမီၤစိရိၤအံၤအတလူၤပိာ်မၤထွဲ၀ဲၦၤဂ့ၢ်၀ီတၢ်တိစၢၤမၤစၢၤတၢ်ဘျၢသဲးစးလၢဟီၣ်ခိၣ်ဒီဘ့ၣ်ပာ်လီၤ၀ဲအံၤဘၣ်ဒီးဆဲးလုၢ်သ့ၣ်ခါပတာ်၀ဲကွ့ၢ်ကွ့ၢ်လီၤအဂ့ၢ်န့ၣ် ကညီၦၤဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢ စီၤနၢၤဒၣ်ဆူ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်န့ၣ်လုၢ်သ့ၣ်ခါပတာ်မၤကမၣ်၀ဲဟီၣ်ခိၣ်ဒီဘ့ၣ်ၦၤဂ့ၢ်၀ီတၢ်တိစၢၤမၤစၢၤတၢ်ဘျၢသဲစးအံၤဖျိဖျိဖျါဖျါလီၤႉအ၀ဲသ့ၣ်န့ၣ်အတၢ်လူၤပိာ်မၤထွဲၦၤဂ့ၢ်၀ီခွဲးယာ်တအိၣ်ဘၣ်ဒီးပညိၣ်ထီၣ်ဒုး၀ဲကမျၢၢ်ထံဖိကီၢ်ဖိလိၤလိၤလီၤ”အဂ့ၢ်န့ၣ် စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတုၤလၢခဲအံၤလၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤဒူသ၀ီတဖၣ်အပူၤန့ၣ် ပယီၤသုးနုာ်လီၤလၢပျီပူၤႇခးလီၤကျိဖးဒိၣ်တကးဒံးဘၣ်သူစ့ၢ်ကီးကဘီယူၤဟဲခးလီၤတၢ်အဃိ လၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤတဖၣ်အပူၤန့ၣ်ကမျၢၢ်ၦၤဃ့ၢ်မှံဟးဖျိးအနီၣ်ဂံၢ်ပာ်ဖှိၣ်ခဲလၢာ်အိၣ်(၅၀၀ႇ၀၀၀)ဘျဲၣ်လံဒီးမ့မ့ၢ်ခ့ၣ်အဲၣ်ယူၣ်(သုးက့ ၁)ဒူသထူၣ်ကီၢ်ရ့ၣ်ပူၤန့ၣ်အိၣ်(၁၃၀ႇ၀၀၀)ဒီးလၢ(သုးက့ ၃)ချၢၣ်လွံၢ်ထူၣ် ကီၢ်ရ့ၣ်ပူၤန့ၣ် ၦၤဃ့ၢ်မှံဟးဖျိးနီၣ်ဂံၢ်အိၣ်၀ဲ(၄၀ႇ၀၀၀)ဘျဲၣ်လံအဂ့ၢ်န့ၣ် (KHRG)တၢ်မၤနီၣ်စရီအသိး သ့ၣ်ညါဘၣ်န့ၣ် လီၤႉ
နိၣ်တကီကီၢ်ဆၣ်ပူၤပယီၤသုးအိးထီၣ်တၢ်လိ၁်ကွဲတၢ်တၤကျိၣ်တၤစ့လီၢ်ဒီးထၢအခိ
လါမးရှး ၂၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် နိၣ်တကီကီၢ်ဆၣ်အပူၤ သုးမီၤစိရိၤထုးထီၣ်(martial law)ဘၣ်ဆၣ် ပယီၤသုးၦၤဘၣ်မူဘၣ်ဒါအိးထီၣ်၀ဲတၢ်တၤကျိၣ်တၤစ့လီၢ်အံၤလၢ(၂၄)နၣ်ရံၣ်တၢ်ဆၢကတီၢ်ၦဲၤၦဲၤလီၤအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်၀့ၢ်ပူၤတဖၣ်အအိၣ်န့ၣ်လီၤႉ လၢကၠၤအ့စ့ၣ်ကၠံ၀့ၢ် တၢ်သွၣ်ခိၣ်ကပၤ(အောင်)Hotel တၢ်သူၣ်ထီၣ်လီၢ်ခံန့ၣ် တၢ်အိးထီၣ်၀ဲတၢ်ဒုးတဖှံဆီလီၢ်ႇ တၢ်ဒိဖဲလီၢ်ဒီးတၢ်လိာ်ကွဲ(အနီထောင်)တၢ်တၤကျိၣ်တၤစ့လီၢ်အကလုာ်ကလုာ်တကးဒံးဘၣ်အမဲာ်ညါ နၦ့ၤသူကသံၣ်မူၤဘှီးသ့၀ဲညီညီကဒၣ်အဂ့ၢ်န့ၣ် ကမျၢၢ်အိၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမးရှး ၂၀ သီအနံၤန့ၣ်လီၤႉ “တၢ်ဂဲၤလိာ်ကွဲ(အနီထောင်)တၢ်တၤကျိၣ်တၤစ့လီၢ်န့ၣ်အိၣ်(၅)ခါညါႉတၢ်လိာ်ကွဲလီၢ်တခါန့ၣ်တနံၤန့ၣ်ဘၣ်ဟ့ၣ်၀ဲအလဲ(၁၃၀ႇ၀၀၀)ကၠးမီၤနီၤႉဖဲန့ၣ်အိၣ်၀ဲဒၣ်တၢ်ဒုးတဖှံဆီႇတၢ်ဒိဖဲလီၢ်အိၣ်ခဲလၢာ်လီၤႉၦၤမၤတၢ်န့ၣ်မ့ၢ်၀ဲဒၣ်ပယီၤသုးႇသုးခိးကီၢ်ဆၢ(BGF)တဖၣ်လီၤႉမ့၀ံၤအ၀ဲသ့ၣ်က့ၤနီၤလီၤအီၣ်သးမီၤနီၤႉတၢ်လိာ်ကွဲလီၢ်န့ၣ်နၦ့ၤအီကသံၣ်ကသ့ၣ်န့ၢ်လီၤႉမ့မ့ၢ်တၢ်တၤကျိၣ်တၤစ့လီၢ်လၢအိၣ်(မီးသတ်ရုံး)ကပိၤကပၤတဖၣ်ခီန့ၣ်ပၢၤကီၢ်ဒီးပယီၤသုးအိၣ်ခိး၀ဲတၢ်ဘံၣ်တၢ်ဘၢမီၤနီၤ”အဂ့ၢ်န့ၣ်ကမျၢၢ်လၢအိၣ်၀့ၢ်ပူၤတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ သုးမီၤစိရိၤထုးထီၣ်(martial law)အဃိကမျၢၢ်လၢအိၣ်၀့ၢ်ပူၤတဖၣ်စးထီၣ်ဟါခီ ၆ နၣ်ရံၣ်တုၤလၢဂီၤခီ ၆ နၣ်ရံၣ်န့ၣ် ဘၣ်အိၣ်ဟံၣ်ပူၤလီၤဒီးအ၀ဲသ့ၣ်မ့ဟးထီၣ်လၢတၢ်ချၢန့ၣ်ဘံၣ်ဘၢအိၣ်ခိးတၢ်ဖဲ၀့ၢ်ပူၤတဖၣ်ခးစိ၀ဲဒီးကျိတကးဒံးဘၣ်အမဲာ်ညါဘၣ်လီၤလၢဃိာ်ပူၤစ့ၢ်ကီးအိၣ်၀ဲန့ၣ်လီၤႉဘၣ်ဆၣ်တၢ်တၤကျိၣ်တၤစ့လီၢ်လၢအ၀ဲသ့ၣ်အိးထီၣ်၀ဲအံၤခီန့ၣ်ၦၤဟဲဂဲာ်လိာ်ကွဲန့ၢ်(၂၄)နၣ်ရံၣ်ၦဲၤၦဲၤလီၤဒီးအိၣ်ခိးန့ၢ်၀ဲတၢ်ဘံၣ်တၢ်ဘၢလၢလၢၦဲၤၦဲၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ်တၢ်စးထီၣ်အိးထီၣ်တၢ်လိာ်ကွဲတၢ်တၤကျိၣ်တၤစ့လီၢ်သ့ၣ်တဖၣ်ဒီး ဖဲအပူၤကွံာ်လါဖ့ၤဘြူၤအါရံၤ ၂ သီအနံၤ သုးမီၤစိရိၤထုးထီၣ်ဘိးဘၣ်ရၤလီၤ၀ဲလၢနိၣ်တကီကီၢ်ဆၣ်အံၤမ့ၢ်၀ဲ သုးတၢ်ပၢတၢ်ပြး၀ံၤလီၢ်ခံန့ၣ် ၦၤဟဲဂဲၤလိာ်ကွဲလၢတၢ်တၤကျိၣ်တၤစ့လီၢ်သ့ၣ်တဖၣ်အံၤဟဲအါထီၣ်၀ဲဒီး ၦၤသူကသံၣ်မူၤဘှီးဒီးတၢ်ဟုၣ်တၢ်ဘျၣ်တဖၣ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်၀့ၢ်ပူၤတဖၣ်အအိၣ် န့ၣ်လီၤႉ
ပယီၤသုးမၤအါထီၣ်အဂံၢ်ဘါလၢ(ယ့ကီၢ်ဆၣ်)အပူၤ
လါမးရှး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ပယီၤသုးဟဲထီၣ်ဒီးချံကဘီသုး(၂)ဘ့ၣ်မၤအါထီၣ်သုးဂံၢ်ဘါလၢ(ယ့ကီၢ်ဆၣ်)ပူၤအဂ့ၢ်န့ၣ် ယ့(YGF)တၢ်ပၢၢ်ဆၢကရူၢ် တၢ်ဘိးဘၣ်ရၤလီၤမူဒါခိၣ် စီၤခ့ၣ်သ့ၣ် စံး၀ဲန့ၣ်လီၤႉ လၢ(ယ့ကီၢ်ဆၣ်)အပူၤတၢ်ဒုးကဲထီၣ်၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢသုးပာ်ဖှိၣ်အဘၢၣ်စၢၤခဲအံၤခဲအံၤဒီး ပယီၤသုးဟဲထီၣ်ဒီးကဘီသုးမၤအါထီၣ်သုးဂံၢ်ဘါလၢပယီၤသုးကလၢၤတၢ်လီၢ်ကအိၣ်အဂၤ(၅၀၀)ဃၣ်ဃၣ်ညါအဂ့ၢ်န့ၣ် ယ့(YGF)တၢ်ပၢၢ်ဆၢကရူၢ် တၢ်ဘိးဘၣ်ရၤလီၤမူဒါခိၣ် စီၤခ့ၣ်သ့ၣ် စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“စးထီၣ်ဖဲ ၁၇ သီန့ၣ်အ၀ဲသ့ၣ်ဟဲထီၣ်ဒီးချံသုး(၂)ဘ့ၣ်ဟဲထီၣ်မၤအါထီၣ်သုးဂံၢ်ဘါမီၤနီၤႉ အ၀ဲသ့ၣ်ထီၣ်မၤၦဲၤ၀ဲ၀ံၤဘျီမ့ၢ်အကလဲၤမၤၦဲၤဒံး၀ဲလၢ၀့ၢ်လၢအဂၤဒံးဧါဒုပတနၢ်ဟူဘၣ်ႉလီလီစဲၤခဲအံၤအိၣ်ဒံးဖဲ(ယ့)၀့ၢ်ပူၤန့ၣ်လီၤႉပနၢ်ဟူကဆှၢ၀ဲလၢ(ဘျံးဒ၀ဲၢ်)တကပၤန့ၣ်တ၀၁်မီၤနီၤႉသုးနီၣ်ဂံၢ်န့ၣ်ကအိၣ်အဂၤ(၅၀၀)ညါႉ မ့၀ံၤၦၤသုးဖိတနီၤန့ၣ်အခးလိသးလၢကျိအိၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးဟဲထီၣ်ဒီးကဘီမၤအါထီၣ်သုးဂံၢ်ဘါဒ်အံၤအဃိ(ယ့ကီၢ်ဆၣ်)ပူၤလီၢ်က၀ီၤကမျၢၢ်တဖၣ် ဘၣ်ယိၣ်၀ဲလၢတၢ်ဒုးကဆူၣ်ထီၣ်ဒီးပယီၤသုးကဒွဲၣ်အူအီၣ်သ၀ီအဂ့ၢ်န့ၣ် လီၢ်က၀ီၤသ၀ီဖိိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲသ၀ီပူၤအံၤပယီၤသုးဒိးလီၤဃာ်မ့ၣ်ပိၢ်ႉခဲအံၤအ၀ဲသ့ၣ်ဟဲထီၣ်ဒီးချံဟဲမၤအါထီၣ်အၦၤဒ်အံၤအဃိ ပလဲၤတဘူၣ်နီတလိၣ်လၢၤဘၣ်ႉပယီၤသုးမ့နုာ်လီၤလၢတၢ်လီၢ်ကိးတီၤဒဲးလံန့ၣ်ဒွဲၣ်အူအီၣ်ၦၤဟံၣ်အဃိပအိၣ်ဖဲအံၤ ပဘၣ်ယိၣ်တၢ်စ့ၢ်”အဂ့ၢ်န့ၣ် စံး၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါ လၢတလၢၤကီၢ်စဲၣ်(ယ့ကီၢ်ဆၣ်)အပူၤ စးထီၣ်ဖဲလါယနူၤအါရံၤန့ၣ် ခီဖျိပယီၤသုးဒိးလီၤဃာ်မ့ၣ်ပိၢ်လၢ(ကြိုးတံတား)သ၀ီတၢ်ဖံးအီၣ်မၤအီၣ်လီၢ်အဃိ ၦၤမၤအီၣ်ကျီးဖိတဖၣ်တၢ်ကီတၢ်ခဲအိၣ်ထီၣ်လၢကလဲၤဖံးမၤတၢ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ် အအိၣ်န့ၣ်လီၤႉ ဒ်န့ၣ်အသိးလၢတလၢၤကီၢ်စဲၣ်(ယ့၀့ၢ်)တၢ်သမံသမိးတြဲၤလီၢ်ဒီးတိၤသ့ၣ်တဖၣ်န့ၣ်စ့ၢ်ကီး ပယီၤသုးမၤအါထီၣ်အသုးနီၣ်ဂံၢ်ဟဲအါထီၣ်အါန့ၢ်အပူၤကွံာ်ဒံးအဂ့ၢ်န့ၣ် ဟီၣ်က၀ီၤတၢ်ပၢၢ်ဆၢသုးပာ်ဖှိၣ်ကရူၢ် စံး၀ဲန့ၣ်လီၤႉ
မိကီၢ်ဆၣ်ပူၤပယီၤသုးဖီၣ်လီၢ်က၀ီၤကမျၢၢ်(၂၂)ဂၤအကျါပၣ်ဃု၁်သးစၢ်လၢအသးနံၣ်တၦဲၤဒံးဘၣ်(၃)ဂၤ
လါမးရှး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢချၢၣ်လွံၢ်ထူၣ်ကီၢ်ရ့ၣ် မိကီၢ်ဆၣ်အပူၤ ဖဲလါမးရှး ၂၀ သီ ဂီၤခီအဆၢကတီၢ်န့ၣ် ပယီၤသုးနုာ်လီၤလၢ (ဥသျှစ်ကုန်း)သ၀ီပူၤဒီးဖီၣ်က့ၤကိး၀ဲလီၢ်က၀ီၤကမျၢၢ်အဂၤ(၂၂)အကျါပၣ်ဃုာ်၀ဲသးစၢ်လၢအသးနံၣ်တၦဲၤဒံးဘၣ်(၃)ဂၤ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲလၢ“ဖဲမဟါဂီၤခီန့ၣ်ပယီၤသုးနုာ်လီၤလၢသ၀ီပူၤဒီးဖီၣ်က့ၤကိး၀ဲကမျၢၢ်(၂၂)ဂၤႉအဖီၣ်၀ဲအကျါန့ၣ်ပၣ်ဃုာ်သးစၢ်လၢအသးနံၣ်တၦဲၤဒံးဘၣ်န့ၣ်(၃)ဂၤႉပၣ်ဃုာ်ဒီးၦၤဃ့ၢ်တၢ်ဒုးလၢအဟဲစံၣ်အိၣ်လၢသ၀ီပူၤအံၤ(၄)ဂၤႉယဆိမိၣ်ကဘၣ်အကသူ၀ဲဒ်တၢ်ဒီသဒၢစုက၀ဲၤတခါအသိးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမးရှး ၂၀ သီအနံၤန့ၣ်လီၤႉ ဖဲန့ၣ်၀ံၤအလီၢ်ခံတၢ်ကစီၣ်ဟူထီၣ်သါလီၤလၢကမျၢၢ်လၢပယီၤသုးဖီၣ်အီၤတဖၣ်အကျါန့ၣ် တၢ်ပျၢ်လီၤက့ၤ၀ဲၦၤလၢအသးၦၢ်(၂)ဂၤဘၣ်ဆၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ပာ်ဂၢၢ်ပာ်ကျၢၤ၀ဲလီၤလီၤ ဆီဆီတန့ၢ်ဒံး၀ဲဘၣ်န့ၣ်လီၤႉ တကီၢ်ခါခဲအံၤပယီၤသုးက့ၤကိးလီၢ်က၀ီၤကမျၢၢ်တဖၣ်ဒီးဆီလီၤသးအိၣ်၀ဲလၢ(အုန်းပင်စု)သ၀ီပူၤဒီး ခီဖျိပယီၤသုးခးလီၤကျိဖးဒိၣ်အဃိ(ဥသျှစ်ကုန်း)သ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်လၢတအဲၣ်ဒိးပာ်ဖျါအမံၤတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ “ပယီၤသုးဖီၣ်က့ၤကိးၦၤသ၀ီဖိန့ၣ်အမ့ၢ်လီၤႉတဲ၀ဲလၢပယီၤသုးမၢအတၢ်လဲၤပၠးန့ၢ်ကျဲလီၤႉပယီၤသုးခးလီၤကျိဖးဒိၣ်လၢသ၀ီပူၤႉၦၤသ၀ီတနီၤန့ၣ်စံၣ်ထီၣ်မီၤနီၤဘၣ်ဆၣ်စံၣ်ယံၤယံၤတသ့ဘၣ်ႉခီဖျိဘၣ်ဟဲက့ၤဒုးအီၣ်ဆၣ်ဖိကီၢ်ဖိအဆၣ်ဒံးအဃိလီၤႉတၢ်ဒုးမ့တကဲထီၣ်ဒံးဘၣ်န့ၣ်ၦၤတစံၣ်ဘၣ်ႇအါဒၣ်တက့ၢ်ၦၤအိၣ်လၢဟံၣ်လီၤအဃိပယီၤသုးမ့ဟဲနုာ်လီၤလံန့ၣ်ဖီၣ်ၦၤကညီႇခးသံၦၤကညီအိၣ်လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါဖဲလါမးရှး ၂၀ သီအနံၤစ့ၢ်ကီး ခီဖျိတၢ်ပၢၢ်ဆၢသုးကရူၢ်လဲၤခး(နတ်သံကွင်း)ပယီၤသုးကလၢၤအံၤ လၢ(ဒြိ)အဃိ ပယီၤသုးက့ၤခးလီၤကဒါကျိဖးဒိၣ်ဆူ(မိကီၢ်ဆၣ်)ဒူသ၀ီတဖၣ်အပူၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးခီဖျိခးလီၤကျိဖးဒိၣ်ဆူ(မိကီၢ်ဆၣ်)ဒူသ၀ီပူၤအဃိသ၀ီ(၇)ဖျၢၣ်ကမျၢၢ်အဂၤ(၄၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢလီၢ်ခၢၣ်သး ထုးထီၣ်ပာ်ဖျါ၀ဲဖဲလါမးရှး ၂၁ သီအနံၤန့ၣ် လီၤႉ
တၢ်လဲၤခးပယီၤသုးတြိၤခိၣ်အဟံၣ်ဒီးသုးတြိၤ၀ဲၤလီၢ်ခိၣ်သ့ၣ်ရူ၀ံၤလီၢ်ခံပယီၤသုးက့ၤခးလီၤကျိဖးဒိၣ်ဆူသ၀ီပူၤ
လါမးရှး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် ကၠဲၣ်ထိၤကီၢ်ဆၣ်အပူၤ ဖဲလါမးရှး ၂၁ သီ ဂီၤခီ ၁၀ နၣ်ရံၣ်အဆၢကတီၢ် တၢ်လဲၤခးပယီၤသုး ခီၣ်ချ့သုးရ့ၣ်(၄၄) သုးတြိၤ၀ဲၤလီၢ်ခိၣ်သ့ၣ် သုးတြိၤခိၣ်အဟံၣ်ဒီး သုးတြိၤ၀ဲၤလီၢ်ခိၣ်သ့ၣ်ရူ၀ံၤလီၢ်ခံန့ၣ် ပယီၤသုးက့ၤလီၤကဒါကျိဖးဒိၣ်ဆူသ၀ီပူၤအဂ့ၢ်န့ၣ် ကၠဲၣ်ထိၤတၢ်ပၢၢ်ဆၢသုး(KRF)စံး၀ဲန့ၣ်လီၤႉ သုးတြိၤခိၣ်အဟံၣ်ဒီးသုးတြိၤ၀ဲၤလီၢ်ခိၣ်သ့ၣ်ရူလၢအိၣ်သုး၀ဲၤလီၢ်ခိၣ်သ့ၣ်တၢ်လီၢ်အံၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇကၠဲၣ်ထိၤတၢ်ပၢၢ်ဆၢသုးကရူၢ်(KRF)ႇတၢ်ဒီသဒၢကမျၢၢ်သုး(PDF)ႇသထူၣ်ကီၢ်ဆၣ် ကမျၢၢ်တၢ်ပၢၢ်ဆၢသုး(TPDF Drone Unit)တဖၣ်ပာ်ဖှိၣ်ထီၣ်သးလဲၤတ့ၢ်လီၤမ့ၣ်ပိၢ်ဒီး(ဒြိ)အဂ့ၢ်န့ၣ် (KRF)တၢ်ကစီၣ်ဒီးတၢ်ဘိးဘၣ်ရၤလီၤမူဒါခိၣ်တဂၤစံး၀ဲန့ၣ်လီၤႉ အ၀ဲစံး၀ဲလၢ“တၢ်အိၣ်သးဒုယဆိမိၣ်ကဘၣ်၀ဲဒၣ်သုး၀ဲၤလီၢ်ခိၣ်သ့ဒီးသုးတြိၤခိၣ်အဟံၣ်မီၤနီၤႉအ၀ဲသ့ၣ်က့ၤခးလီၤကဒါကျိဖးဒိၣ်ဒုအိၣ်ႉတၢ်မ့ကဲထီၣ်သးန့ၣ်အ၀ဲသ့ၣ်န့ၣ်ညီနုၢ်ခးလီၤကျိဖးဒိၣ်လီၤႉမ့ၢ်တၢ်လီၢ်ဖဲလဲၣ်တတီၤခးလီၤ၀ဲလဲၣ်န့ၣ်ပတဲလီၤတံၢ်တဘၣ်ဘၣ်ႉတၢ်လီၢ်လၢအ၀ဲသ့ၣ်ဆီလီၤကျိဖးဒိၣ်အလီၢ်န့ၣ်အိၣ်ဒီဒူၣ်ညါမီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါပယီၤသုး(သံတတား)တြဲၤလၢအိၣ်(တလၢၤကီၢ်စဲၣ်)ကၠဲၣ်ထိၤကီၢ်ဆၣ်ဒီးဘံလ့ကီၢ်ဆၣ်အဘၢၣ်စၢၤအံၤစ့ၢ်ကီးန့ၣ် KNLA, KRF, PDF, TPDF Drone Unit တဖၣ်ပာ်ဖှိၣ်ထီၣ်သး လဲၤခး၀ဲဒီး(ဒြိ)ဒံးအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ “ပယီၤသုးတြဲၤ၀ဲန့ၣ်မ့ၢ်တၢ်လီၢ်လၢပယီၤသုးအိၣ်ထီဘိလီၤန့ၣ်ပတဲအီၤသ့လီၤႉအ၀ဲသ့ၣ်အိၣ်ခိးသမံသမိးတၢ်ႉခးပိၢ်ထီၣ်ကျိခဲအံၤခဲအံၤလီၤႉခဲအံၤမ့ၢ်အ၀ဲသ့ၣ်အၦၤအါထီၣ်တအါထီၣ်ဧါဒုပတသ့ၣ်ညါဒံးဘၣ်ႉဖဲပလဲၤခးအ၀ဲသ့ၣ်အခါန့ၣ်ကအိၣ်(၁၅)ဂၤလီၤ”အဂ့ၢ်န့ၣ် တၢ်ကစီၣ်ဒီးတၢ်ဘိးဘၣ်ရၤလီၤမူဒါခိၣ်တဂၤဃီ၀ဲန့ၣ် စံး၀ဲန့ၣ်လီၤႉ ဘၣ်ဃးတၢ်လဲၤခးပယီၤသုးခီၣ်ချ့သုးရ့ၣ်(၄၄)၀ဲၤလီၢ်ခိၣ်သ့ၣ် သုးတြိၤခိၣ်အဟံၣ်ႇ သုးတြိၤ၀ဲၤလီၢ်ခိၣ်သ့ၣ်ရူဒီး ပယီၤသုးတြဲၤအိၣ်ခိးတၢ်လီၢ်သ့ၣ်တဖၣ်အံၤအခါန့ၣ် မ့ၢ်ပယီၤသုးသံဘၣ်ဒိဘၣ်ထံးၦဲၤဂၤလဲၣ်န့ၣ် ပခ့ၣ်အဲးစံၣ်–ကညီတၢ်ကစီၣ်ပာ်ဂၢၢ်ပာ်ကျၢၤ၀ဲတန့ၢ်ဒံးဘၣ်အသိးပယီၤသုးတကပၤစ့ၢ်ကီးထုးထီၣ်ပာ်ဖျါ၀ဲတအိၣ်နီတမံၤဒံးဘၣ်န့ၣ်လီၤႉ တၢ်လဲၤခးပယီၤသုးဘျီ၀ဲအံၤအပူၤန့ၣ်မ့မ့ၢ်တၢ်ပၢၢ်ဆၢသုးပာ်ဖှိၣ်တကပၤသံဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
ပယီၤသုးဆီလီၤအါထီၣ်တၢ်သမံသမိးတြဲၤလၢ(ပလီ)ကီၢ်ဆၣ်ပူၤ
လါမးရှး ၂၂ သီႇ ၂၀၂၃ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ပလီကီၢ်ဆၣ်အပူၤ ပယီၤသုးဆီလီၤအါထီၣ်တၢ်သမံသမိးတြဲၤလၢ၀့ၢ်ပူၤ၀့ၢ်ချၢ ဟဲအါထီၣ်၀ဲကွ့ၢ်ကွ့ၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လၢ(ပလီကီၢ်ဆၣ်)ပူၤတၢ်ဒုးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးအဘၢၣ်စၢၤခဲအံၤခဲအံၤဒီး တလါအံၤလါမးရှးအတီၢ်ပူၤ ပယီၤသုးဆီလီၤအါထီၣ်တၢ်သမံသမိးတြဲၤအိၣ်ခိးသမံသမိးတၢ်ဟဲအါထီၣ်ဒိၣ်န့ၢ် အပူၤကွံာ်လၢညါအဂ့ၢ်န့ၣ် ပလီလီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ “အ၀ဲသ့ၣ်အိၣ်ခိးတၢ်ဖဲ(ပလီ)တိၤန့ၣ်(၆)ဂၤႉလၢနီၣ်ဂံၢ်(၄)ကၠီၣ်စူၣ်တြဲၤန့ၣ်အဂၤ(၃၀)ႉမကၠံကိတြဲၤန့ၣ်အဂၤ(၁၀)ႉလၢ(နန်းတောင်)တြဲၤန့ၣ်(၂၅)ဂၤမီၤနီၤႉပလၣ်၀့ၢ်ပူၤန့ၣ်အသုးနီၣ်ဂံၢ်ကအိၣ်အဂၤ(၈၀)ညါႉလၢ(ပလောက်)တကပၤန့ၣ် အိၣ်ခိးတၢ်ဖဲပလီၣ်တိၤႇ(ထမင်မစားဂိတ်)န့ၣ်အိၣ်အဂၤ(၄၀)ညါႉတၢ်န့ၣ်မးသုးရ့ၣ်တပၣ်ဒံးဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးအိၣ်ခိးသမံသမိးတၢ်တကးဒံးဘၣ်အမဲာ်ညါလၢမုၢ်နၤခီန့ၣ်အ၀ဲသ့ၣ်စိာ်ဒီးကျိဟးသမံသမိးၦၤတမှံၤစရီ အဃိကမျၢၢ်သ့ၣ်တဖၣ်တူၢ်ဘၣ်၀ဲလၢတၢ်ဘံၣ်တၢ်ဘၢတအိၣ်လၢအ၀ဲသ့ၣ်အဂီၢ်ဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ပလီလီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲလၢ“လၢမုၢ်နၤခီန့ၣ်အ၀ဲသ့ၣ်စိာ်ထီၣ်ကျိဟးသမံသမိးတၢ်လၢၦၤဟံၣ်ၦၤဃီႉအ၀ဲသ့ၣ်ဟးဆှၣ်တၢ်တုၤလၢခဲအံၤလီၤႉအ၀ဲသ့ၣ်မၤ၀ဲဒ်န့ၣ်အဃိမုၢ်နၤခီန့ၣ်ၦၤမံတဘၣ်ဂီၢ်ဘၣ်ႉမၤ၀ဲဒ်သိးၦၤကပျံၤဘၣ်အ၀ဲသ့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါပယီၤသုးအံၤတပျဲၦၤစိာ်စဲးသိဘၣ်ႇတပျဲစ့ၢ်ကီးသိကျးလၢကဆါ၀ဲသိလၢၤဘၣ်အသိး တကးဒံးဘၣ်အမဲာ်ညါစးထီၣ်လါဖ့ၤဘြူၤအါရံၤန့ၣ်အ၀ဲသ့ၣ်တပျဲလီၢ်က၀ီၤကမျၢၢ်တဖၣ်လၢကစိာ်ဟုသးဒီးတၢ်အီၣ်တၢ်အီလၢအဂၤတဖၣ်ဘၣ်အဂ့ၢ်န့ၣ် ပလီလီၢ်က၀ီၤကမျၢၢ်စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါဖ့ၤဘြူၤအါရံၤ ၂၂ သီအခါစ့ၢ်ကီး ပယီၤသုးနုာ်လီၤဖီၣ်(CDM)ကၠိသရၣ်/မုၣ်ဒီး လီၢ်က၀ီၤကမျၢၢ်တနီၤလၢ(ပလီ)၀့ၢ်ပူၤဒံးအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်ပာ်ဖျါ၀ဲအသိး သ့ၣညါဘၣ်န့ၣ်လီၤႉ
ခီဖျိဟုသးၦ့ၤထီၣ်အဃိတၢ်ကီတၢ်ခဲအိၣ်ထီၣ်လၢလီၢ်က၀ီၤကမျၢၢ်တဖၣ်အဂီၢ်
လါမးရှး ၂၁ သီႇ ၂၀၂၃ နံၣ်ႇ ခ့ၣ်အဲးစံၣ် လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်အပူၤ ခီဖျိဟုသးၦ့ၤဒိၣ်ထီၣ်ကွ့ၢ်ကွ့ၢ်အဃိ တၢ်ကီတၢ်ခဲအိၣ်ထီၣ်လၢလီၢ်က၀ီၤကမျၢၢ်မုၢ်ဆ့ၣ်မုၢ်ဂီၤဖိတဖၣ်အဂီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ အပူၤကွံာ်လၢညါခါဟုသးယိယိတနာ်န့ၣ်အၦ့ၤအိၣ်ထဲ(၁၅ႇ၀၀၀)ကၠးလီၤဒီးဘၣ်ဆၣ်ခဲအံၤ တနာ်န့ၣ်အၦ့ၤအိၣ်တုၤလၢ(၃၀ႇ၀၀၀)ဘျဲၣ်လံအဃိတၢ်ကီတၢ်ခဲအိၣ်ထီၣ်လၢလီၢ်က၀ီၤကမျၢၢ်လၢအိၣ်ဟီၣ်က၀ီၤပူၤတဖၣ်အံၤအဂီၢ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ လီၢ်က၀ီၤကမျၢၢ် နီၢ်မၣ်အ့ စံး၀ဲလၢ“မ့မ့ၢ်ပ၀ဲခီန့ၣ်ပတမၤအီၣ်စံာ်ဘၣ်အဃိပဘၣ်ၦ့ၤအီၣ်ဟုသးလီၤႉ ခဲအံၤဘုၦ့ၤထီၣ်အဃိပ၀ဲဒၣ်နါက့ပကျိၣ်ပစ့တၢ်ဟဲနုာ်တအိၣ်ဘၣ်ႉစ့လၢပမၤတၢ်မၤန့ၢ်တဖၣ်နါက့ဒီတနံၤမးန့ၢ်ထဲ(၆၀၀၀)ကၠး(၇၀၀၀)ကၠးဒ်န့ၣ်လီၤႉအန့ၣ်မးတၢ်မၤမ့အိၣ်မးန့ၢ်စ့လီၤႉလၢကၦ့ၤအီၣ်ဟုသးအဂီၢ်န့ၣ်တညီဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဟုသးအၦ့ၤမ့တလီၤမ့ဆဲးထီၣ်ဒံးကွ့ၢ်ကွ့ၢ်ဒုလီၢ်က၀ီၤကမျၢၢ်အိၣ်ဟီၣ်က၀ီၤပူၤလၢအၦ့ၤအီၣ်တန့ၢ်ဘၣ်တဖၣ်အံၤ ဟုသးလီၤတူာ်သ့၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ “သုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ်ပဆါတၢ်တန့ၢ်အါအါလၢၤဘၣ်ႉလၢညါခါပမ့လဲၤၦ့ၤဘုသးတဘျီန့ၣ် အအါကတၢၢ်တလါန့ၣ်နဆါလၢာ်လီၤႉနဘၣ်ဟ့ၣ်လီၤကါလဲနါက့အၦ့ၤတဒိၣ်ဒ်သိးခဲအံၤဘၣ်ႉခဲအံၤအိၣ်လၢယဲၢ်လါဘျဲၣ်လံပဆါဟုသးတန့ၢ်ဘၣ်ႉပဆါဟုသးတခါအံၤမ့လၢာ်နါက့လၢပကက့ၤၦ့ၤကဒါအသီဒီးကက့ၤဆါအဂီၢ်န့ၣ်တမ့ၢ်တၢ်ညီဘၣ်ႉအၦ့ၤထီၣ်ဒိၣ်မးအဃိၦၤၦ့ၤအီၣ်တအိၣ်အါအါလၢၤဘၣ်”အဂ့ၢ်န့ၣ် ၦၤဆါဟုသးဖိတဂၤ စံး၀ဲန့ၣ်လီၤႉ တနံၣ်အံၤလၢတၢ်ကြဲၢ်ကီၢ်ဆၣ်ပူၤန့ၣ်ၦၤသူၣ်ဘုဖျးဘုအိၣ်(၇၅)မျးကယၤညါဘၣ်ဆၣ် ခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိဘုတဖၣ်ဟးဂီၤ၀ဲအါမးဒီးၦၤၦ့ၤဘုဖိသ့ၣ်တဖၣ်စ့ၢ်ကီးလိာ်ကွဲတၢ်ၦ့ၤအဃိဟုသးအၦ့ၤဘၣ်ထီၣ်၀ဲဒၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဟီၣ်က၀ီၤပူၤတဖၣ်စံး၀ဲန့ၣ်လီၤႉ ဒ်န့ၣ်အသိးလၢဖၣ်အၣ်၀့ၢ်ႇလူၢ်ပျဲၢ်၀့ၢ်ႇကီးတရံးႇနိၣ်တကီဃုာ်ဒီးကီၢ်ဆၣ်လၢအဂၤသ့ၣ်တဖၣ်အပူၤန့ၣ်စ့ၢ်ကီး ဒိးသန့ၤထီၣ်သးလၢဟုသးအကလုာ်ဒီးဟုသးတနာ်တ၀၁်ထၢၣ်တထၢၣ်န့ၣ်အၦ့ၤအိၣ်လၢ(၂၈ႇ၀၀၀)တုၤ(၃၀ႇ၀၀၀)ဘျဲၣ်လံအဂ့ၢ်န့ၣ်သ့ၣ်ညါဘၣ်န့ၣ်လီၤႉ