ပတၢ်ဂဲၤလိာ်ကတုၤထီၣ်ထီၣ်ဘးဆူတၢ်ပညိၣ်ဖီတၢၣ်အဂီၢ်ပကဘၣ်ပာ်ဖှိၣ်မၤသကိးတၢ်အဂ့ၢ်(KNU)ၦၤပၢၤလီၢ်ဆ့ၣ်နီၤဟ့ၣ်သဆၣ်ထီၣ်၀ဲ
လါဒံၣ်စ့ဘၢၣ် ၂၃ သီႇ ၂၀၂၂ နံၣ်ႇ ခ့ၣ်အဲးစံၣ် ဒ်သိးပတၢ်ဂဲၤလိာ်ကတုၤထီၣ်ထီၣ်ဘးဆူပတၢ်ပညိၣ်ဖီတၢၣ်အဂီၢ်န့ၣ်ပ၀ဲကညီဖိတၢ်ကရၢကရိခဲလၢာ်ႇတၢ်ဘူၣ်တၢ်ဘါကရူၢ်ကရၢဒီးတၢ်ပၢၢ်ဆၢအတၢ်ကရၢကရိခဲလၢာ်ပကဘၣ်ပာ်ဖှိၣ်မၤသကိးတၢ်လၢနီၣ်တယၢ်တဘ့ၣ်ဃီအဖီလာ်ဒီးလၢပတၢ်ပညိၣ်ကွၢ်စိတမံၤဃီအဖီခိၣ်အဂ့ၢ်န့ၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၦၤပၢၤလီၢ်ဆ့ၣ်နီၤ စီၤမူၤတူစ့ဖိ ဆီၣ်တခူထီၣ်၀ဲန့ၣ်လီၤႉ ခ့ၣ်အဲၣ်ယူၣ် ၦၤပၢၤလီၢ်ဆ့ၣ်နီၤ စံး၀ဲလၢ“ကညီဖိလၢအိၣ်တၢ်လီၢ်တတီၤဂ့ၤတတီၤဂ့ၤႇကညီဖိအတၢ်ကရၢကရိခဲလၢာ်ႇ တၢ်ဘူၣ်တၢ်ဘါအကရူၢ်ကရၢခဲလၢာ်ဒီးကညီၦၤပၢၢ်ဆၢတၢ်ဖိအတၢ်ကရၢကရိခဲလၢာ်ပကဘၣ်ပာ်ဖှိၣ်မၤသကိးတၢ်န့ၣ်လီၤႉလၢနီၣ်တယၢ်တဘ့ၣ်ဃီအဖီလာ်လၢတၢ်ပညိၣ်ကွၢ်စိဒီးလၢတၢ်ဂဲၤလိာ်တမံၤဃီအဂီၢ်န့ၣ်ပကဘၣ်ဖီၣ်လိာ်စုဒီးမၤသကိးတၢ်န့ၣ်လီၤ”အဂ့ၢ်န့ၣ်ဟ့ၣ်သဆၣ်ထီၣ်၀ဲန့ၣ်လီၤႉ လၢန့ၣ်အမဲာ်ညါဖဲပကွၢ်ကဒါက့ၤပတၢ်လဲၤခီဖျိဒီးပတၢ်ဂဲၤလိာ်တဖၣ်န့ၣ်ပထံၣ်ဘၣ်လၢပတၢ်ဂဲၤလိာ်အပူၤပတၢ်ဂံၢ်စၢ်ဘါစၢ်အိၣ်၀ဲအါမးဒီးလၢပတၢ်ဂံၢ်စၢ်ဘါစၢ်ခဲလၢာ်အကျါပထံၣ်ဘၣ်လၢပတၢ်ဃူတၢ်ဖိးဒီးတၢ်လီၤမုၢ်လီၤဖးလၢပတၢ်ဂဲၤလိာ်အပူၤန့ၣ်မ့ၢ်ပတၢ်ဂံၢ်စၢ်ဘါစၢ်အဒိၣ်ကတၢၢ်ဒီးသနာ်က့ပတ့ၢ်စၢ်လီၤပဂံၢ်ပာ်ဘါတသ့လ့ၤတက့ၤဘၣ်ႇမ့မ့ၢ်တခီပကဘၣ်ဂဲၤလိာ်အီၤဆူၣ်န့ၢ်အါန့ၢ်ဒီးဂ့ၤဒိၣ်န့ၢ်ဒံးအလီၢ်အဂ့ၢ်န့ၣ်(KNU)ၦၤပၢၤလီၢ်ဆ့ၣ်နီၤဟ့ၣ်သဆၣ်ထီၣ်၀ဲန့ၣ်လီၤႉ ခ့ၣ်အဲၣ်ယူၣ်လီၢ်ခၢၣ်သးကမံးတံာ် ပဒိၣ်စီၤသမ့ၤထိစ့ၢ်ကီးစံး၀ဲ“ပစံးလၢတၢ်အိၣ်ဃူတၢ်ဖိးန့ၣ်အညီဒိၣ်မးလီၤႉ နမၤအီၤအနီၢ်ကီၢ်န့ၣ်တၢ်လီၤမုၢ်ပြံပြါကဲထီၣ်တပယူာ်ဃီလီၤႉအရ့ဒိၣ်ကတၢၢ်တၢ်ဆၢတဲာ်လၢၦၤအါဂၤဘၣ်သူၣ်ဘၣ်သးသးလီၤပလိာ်၀ဲတဖၣ်န့ၣ်ၦၤတူၢ်လိာ်ဘၣ်သး၀ဲအိၣ်စှၤဘၣ်ဆၣ်ဒ်ဒံၣ်မိၣ်ခြ့ၣ်စံၣ်တၢ်ဖံးတၢ်မၤအသိးန့ၣ်တၢ်ဆၢတဲာ်လၢၦၤအါဂၤဘၣ်သူဘၣ်သးသးလီၤပိာ်၀ဲတဖၣ်န့ၣ်ၦၤကဘၣ်လူၤပိာ်မၤထွဲ၀ဲမီၤနီၤႉ ဘၣ်မနုၤအဃိၦၤတူၢ်လိာ်ဘၣ်သး၀ဲစှၤလဲၣ်တၢ်သ့ၣ်တဖၣ်အံၤအလီၢ်အိၣ်လၢပကဘၣ်ကွၢ်ဆိကမိၣ်နီၤဖးက့ၤအီၤမီၤနီၤႉမ့အိၣ်ဒ်န့ၣ်မးပစံးလၢတၢ်ဃူတၢ်ဖိးလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်အလီၢ်အိၣ်အသိးပကဘၣ်ဂဲၤလိာ်သကိးပ၀ဲဒီးဖီၣ်လိာ်စုမၤသကိးတၢ်ဒီးကယဲၢ်ကရူၢ်ကရၢႇတၢ်ကရၢကရိဒီးၦၤကလုာ်ခဲလၢာ်လၢအဂဲၤလိာ်ထီဒါ၀ဲသုးမီၤစိရိၤဒီးမီၤစိရိၤတမံၤလၢ်လၢ်လၢကလီၤမၢ်ကွံာ်၀ဲအဂီၢ်အဂ့ၢ်န့ၣ်(KNU)ၦၤပၢၤလီၢ်ဆ့ၣ်နီၤသုးခိၣ်ကျၢၢ်ဒိၣ်စိ စီၤမူၤတူစ့ဖိ စံးလီၤ၀ဲလၢနံၣ်ထီၣ်သီအလံာ်ဟ့ၣ်အပူၤန့ၣ်လီၤႉ ဒ်န့ၣ်အသိးကညီဒီကလုာ်တၢ်ထူၣ်ဖျဲးးသုးမုၢ်ဒိၣ်(KNLA)သုးရိၣ်မဲခိၣ်ကျၢၢ်ခံ သုးခိၣ်ကျၢၢ်စိ စီၤဘီကၠီၤဟဲ နံၣ်ထီၣ်သီအလံာ်ဟ့ၣ်ပူၤစ့ၢ်ကီးစံး၀ဲဒ်သိးပကပူၤဖျဲးထီၣ်လၢတၢ်ဆီၣ်တံၢ်မၤနၢၤႇတၢ်ကိၢ်တၢ်ဂီၤႇတၢ်မၤအၢမၤသီသ့ၣ်တဖၣ်အဂီၢ်န့ၣ်မ့ၢ်ပ၀ဲဒၣ်ကိးဂၤဒဲးအမူအဒါဒီးႇခါဆူညါဖိလံၤစၢၤသွဲၣ်သီတဖၣ်ကအိၣ်ဘၣ်က့ၤ၀ဲဒီးတၢ်မုာ်တၢ်ခုၣ်အဂီၢ်စိၤဆၢကတီၢ်ခဲအံၤပ၀ဲသ့ၣ်တဖၣ်န့ၣ်ပကဘၣ်ဂုာ်ကျဲးစၢးတၢ်သၦၢ်ၦၢ်လီၤအဂ့ၢ်န့ၣ်ဟ့ၣ်သဆၣ်ထီၣ်၀ဲန့ၣ်လီၤႉ ကညီနံၣ်(၂၇၆၂)နံၣ်လၢအလီၤဘၣ်ဖဲမဟါသလ့ၤလါထီၣ် ၁ သီအနံၤအံၤ ခီဖျိခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤဒုးယၤတၢ်ဖ့ၣ်စၢကဲထီၣ်ဒံး၀ဲတပယူာ်ဃီအဃိ ဟီၣ်က၀ီၤလၢတၢ်ဒုးကဲထီၣ်အလီၢ်တဖၣ်အါဒၣ်တက့ၢ်န့ၣ်တၢ်တမၤဘၣ်၀ဲကညီနံၣ်ထီၣ်သီအံၤဘၣ်အသိးတၢ်လီၢ်တနီၤတၢ်ဒုးကဲထီၣ်တအိၣ်၀ဲဘၣ်ဆၣ်ခီဖျိလၢတၢ်ဘံၣ်တၢ်ဘၢအဃိတၢ်တမၤဘၣ်၀ဲကညီနံၣ်ထီၣ်သီမူးတၢ်ရဲၣ်တၢ်ကျဲၤဘၣ်စ့ၢ်ကီးအိၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ကညီနံၣ်ထီၣ်သီမုၢ်နံၤအကတီၢ်ပယီၤသုးခးလီၤကျိဖးဒိၣ်ဆူသ၀ီပူၤအဆၢတတဲာ်၀ဲဘၣ်
လါဒံၣ်စ့ဘၢၣ် ၂၂ သီႇ ၂၀၂၂ နံၣ်ႇ ခ့ၣ်အဲးစံၣ် တနံၣ်အံၤ(၂၇၆၂)ကညီနံၣ်ထီၣ်သီလၢအလီၤဘၣ်၀ဲဖဲတနံၤညါအံၤန့ၣ် ကီးတရံးပယီၤသုးကျိဖးဒိၣ်တၢ်လီၢ်တဖၣ်ခးလီၤကျိဖးဒိၣ်ဆူသ၀ီပူၤအဆၢတတဲာ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်အဆၢတတဲာ်ဘၣ်အဃိကမျၢၢ်ၦၤဃ့ၢ်တၢ်ဒုးဖိအဟံၣ်အဃီႇတၢ်ဖံးအီၣ်မၤအီၣ်လီၢ်ကျဲဟးဂူာ်ဟးဂီၤ၀ဲဒီးကျီၢ်ပနၢ်ႇလီၢ်က၀ီၤကမျၢၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ ကမဲၤကိသ၀ီ ကမျၢၢ်ၦၤဃ့ၢ်တၢ်ဒုးတဂၤစံး၀ဲ“တနံၤအံၤကညီနံၣ်ထီၣ်သီမီၤနီၤႉကီးတရံးဒီတဘ့ၣ်ၦၤမၤနံၣ်ထီၣ်သီလၢ (ခၠီတီၤ)တၢ်ဂဲၤကလံၣ်ဒိလီၢ်ပျီပူၤတဆံးတက့ၢ်မီၤနီၤႉပယီၤသုးဆီလီၤသးလၢတၢ်ဂဲၤကလံၣ်ဒိပျီပူၤဒီး(ခၠီၤတီၤ)ကၠိန့ၣ်မီၤနီၤႉဒီးအ၀ဲသ့ၣ်ခးလီၤကျိဖးဒိၣ်ဆူကမဲၤကိသ၀ီႇကီးနွဲၣ်ႇမၠိၣ်ဟီႇတတၤကူႇအ့ရှါကျဲတုၤလၢခဲအံၤမုၢ်ထူၣ်တစုညါႉလဲၤ၀ၣ်ကျိဖးဒိၣ်လူၢ်ႇပယီၤသုး(၉၇)ႇ(၂၃၁)ႇ(၃၂၀)တဖၣ်နါက့ခးလီၤကျိဖးဒိၣ်ဆူသ၀ီပူၤဒီးတနံၤအံၤအိၣ်တနွံလံႉသ၀ီဟးဂူာ်ဟးဂီၤဖးအါညါ”အဂ့ၢ်န့ၣ်စံး၀ဲန့ၣ်လီၤႉ ပယီၤသုးတဖၣ်အံၤတၢ်လီၢ်လၢအ၀ဲသ့ၣ်အိၣ်ဆီလီၤသးအလီၢ်ဒီးအ၀ဲသ့ၣ်သုးကျိၤဆီလီၤသးအလီၢ်တဖၣ်န့ၣ် ဒ်သိး(KNLA)သုးပာ်ဖှိၣ်သုတဟဲခးအ၀ဲသ့ၣ်တဂ့ၤအဂီၢ်အ၀ဲသ့ၣ်ကဘီယူၤဟဲခးလီၤတၢ်ႇခးလီၤကျိဖးဒိၣ်ဆူသ၀ီပူၤကိးမုၢ်နံၤမုၢ်နၤအသိးအ၀ဲသ့ၣ်ကျိဖးဒိၣ်သိလ့ၣ်ထးဟးဆှၣ်တၢ်လၢ၀့ၢ်ခိၣ်၀့ၢ်ဃၢၤကျဲမုၢ်ဖးဒိၣ်တဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ခီဖျိပယီၤသုးမၤဒုးယၤတၢ်ဟူးတၢ်ဂဲၤဟဲဆူၣ်ထီၣ်အဃိလၢဟီၣ်က၀ီၤအပူၤတၢ်တမၤဘၣ်လၢၤ၀ဲကညီနံၣ်ထီၣ်သီမူးတၢ်ရဲၣ်တၢ်ကျဲၤႇတၢ်အီၣ်ဘုသီခိၣ်ႇဘူၣ်ပွဲတဖၣ်လၢၤဘၣ်ဒီးၦၤဘၣ်ဟးစံၣ်အိၣ်ခူသူၣ်ဃ့ၢ်မှံဟးဖျိးဟဲအါထီၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ “ပယီၤသုးပျံၤ၀ဲဒၣ်လၢကညီကရူူၢ်ကဟဲခးအ၀ဲသ့ၣ်တၢ်လီၢ်အဃိလၢဟါခီႇမုၢ်နၤခီႇမုၢ်ဘူးက၀ါထီၣ်န့ၣ်အ၀ဲသ့ၣ်ခးလီၤကျိဖးဒိၣ်လၢသ၀ီပူၤလီၤႉအဆၢကတီၢ်ဖဲန့ၣ်ၦၤဘၣ်အိၣ်လၢတၢ်ပူၤဒ်န့ၣ်လီၤမီၤနီၤႉလၢ၀့ၢ်ပူၤနါက့ပယီၤသုး(စကခ–၁၂)ႇပယီၤသုး (၉၇) ဟးဆှၣ်တၢ်ဒီးသုးသိလ့ၣ်ႇသိလ့ၣ်ထးတဖၣ်လၢက၀ီၤဒ့ပူၤႇ ကျဲပူၤမီၤနီၤ” အဂ့ၢ်န့ၣ်ကီးတရံး(ခၠီတီၤ)က၀ီၤဒ့ကမျၢၢ်တဂၤစံး၀ဲန့ၣ်လီၤႉ ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်အဃိတနွံအတီၢ်ပူၤလီၢ်က၀ီၤကမျၢၢ်အဟံၣ်အဃီအဖျၢၣ်(၂၀)ဃၣ်ဃၣ်ႇကျီၢ်ပနၢ်အဒု(၁၀)ဃၣ်ဃၣ်ဒီးလီၢ်က၀ီၤကမျၢၢ်(၅)ဂၤဘၣ်ဒိဘၣ်ထံး၀ဲအသိး(KNLA)သုးပာ်ဖှိၣ်တကပၤစ့ၢ်ကီးဘၣ်ဒိ၀ဲ(၅)ဂၤအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်အခံလၢကညီကီၢ်စဲၣ်အပူၤတနံၣ်အံၤ(၂၀၂၂)လၢကီၢ်စဲၣ်၀့ၢ်ဖၣ်အၣ်ဒီးလူၢ်ပျဲၢ်၀့ၢ်တကပၤန့ၣ်ပယီၤသုးမီၤစိရိၤမၤ၀ဲနံၣ်ထီၣ်သီမူးတၢ်ရဲၣ်တၢ်ကျဲၤဒီးမ့မ့ၢ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ တၢ်ပၢဟီၣ်က၀ီၤဒူသ၀ီတနီၤအပူၤဒီးသုးက့တၢ်လီၢ်တနီၤအပူၤန့ၣ်တၢ်မၤ၀ဲကညီနံၣ်ထီၣ်သီတၢ်ထုးထီၣ်နီၣ်တယၢ်ဒီးတၢ်အီၣ်ဘုသီခိၣ်မူးတၢ်ရဲၣ်တၢ်ကျဲၤဖုၣ်ဖုၣ်ဖိတဆံးတက့ၢ်လီၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ
မၠၣ်၀တံၣ်–ကီးတရံးအ့ရှါကျဲ(သ့ၣ်ကါညံၣ်နီၣ်)တြဲၤ သိလ့ၣ်ကတာ်ထီသးတုၤလၢခဲအံၤတစု
လါဒံၣ်စ့ဘၢၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်–ကီးတရံးအ့ရှါကျဲန့ၣ် ခီဖျိတိၤဖီလာ်အထူၣ်ခီၣ်ထံးတဖၣ်ဟးဂီၤအဃိ စးထီၣ်လါဒံၣ်စ့ဘၢၣ် ၁၈ သီ မုၢ်ထူၣ် ၁၁ နၣ်ရံၣ်တုၤလၢခဲအံၤတစုသိလ့ၣ်ကတာ်ထီသးဒံးဖဲတီနီၢ်ထံလီၤဆှူကပၤ အဂ့ၢ်န့ၣ် ၦၤနီသိလ့ၣ်ဖိတဂၤစံး၀ဲန့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၁၆ သီအနံၤန့ၣ် လၢကီးတရံးကီၢ်ဆၣ်(တတါကၠိ)သ၀ီအပူၤ တၢ်ဒုးကဲထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤအဃိ သိလ့ၣ်တီၣ်တၢ်ဖိတၢ်လံၤဒီးသိလ့ၣ်ဒိးလဲအခိၣ်(၂၀၀)ဘျဲၣ်ကတာ်ထီသးလၢကျဲပူၤဒီးတုၤလၢမဟါဂီၤခီန့ၣ်စးထီၣ်လၢ(တတါကၠိ)တၢ်သမံသမိးတြဲၤတုၤဃီၤလၢ(သ့ၣ်ကါညံၣ်နီၣ်)တြဲၤနုာ်လီၤန့ၣ်သိလ့ၣ်ကတာ်ထီဒံးသးအခိၣ်(၃၀၀)ဃၣ်ဃၣ်အဂ့ၢ်န့ၣ်ၦၤနီသိလ့ၣ်ဖိတဂၤစံး၀ဲဒ်အံၤန့ၣ်လီၤႉ “သိလ့ၣ်အိၣ်ဟဲထီၣ်လၢဖၣ်အၣ်တဖၣ်န့ၣ်ကတာ်ထီသးလၢ(တတါကၠိ)‚မ့မ့ၢ်သိလ့ၣ်အိၣ်ဟဲလီၤလၢမၠၣ်၀တံၣ်တကပၤခီန့ၣ်ကတာ်ထီၣ်သးလၢ(သ့ၣ်ကါညံၣ်နီၣ်)န့ၣ်မီၤနီၤႉ (BGF)‚ပယီၤသုးကးတံၢ်ဃာ်၀ဲႉတိၤလၢအိၣ်တီၢ်နီၢ်ကပၤန့ၣ်သူတန့ၢ်လၢၤဘၣ်ႉတိၤန့ၣ်တဘိဃီအပူၤကွံာ်လၢညါတၢ်မၤပိၢ်ဖးထီၣ်၀ဲန့ၣ်လီၤႉတိၤဖီလာ်အထူၣ်ခီထံးကၢ်မီၤနီၤႉဖဲတနံၤအံၤနါက့လၢကီးတရံးတကပၤန့ၣ်သိလ့ၣ်ကတာ်ထီၣ်ကအိၣ်အခိၣ် (၃၀၀) ဃၣ်ဃၣ်ညါ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါဒံၣ်စ့ဘၢၣ် ၂၀ သီအနံၤန့ၣ်လီၤႉ ခီဖျိကျဲကးတံၢ်သးတုၤလၢတကီၢ်ခါခဲအံၤအဃိသိလ့ၣ်သ့ၣ်တဖၣ်ကတာ်ထီသးအဖၢမုၢ်အသိး တၢ်ကစီၣ်ဟူထီၣ်သါလီၤစ့ၢ်ကီးလၢတၢ်ကကးတံၢ်ကဒီးကျဲခံသီညါအဂ့ၢ်န့ၣ် ၦၤနီသိလ့ၣ်ဖိတဖၣ်စံး၀ဲန့ၣ်လီၤႉ ဒ်န့ၣ်အသိးဖဲလါဒံၣ်စ့ဘၢၣ် ၁၉ သီအနံၤန့ၣ် ခီဖျိပယီၤသုးခးလီၤကျိဖးဒိၣ်ဆူကီးတရံးခိၣ်ဃၢၤဒူသ၀ီဒီး ကီးနွဲၣ်သ၀ီပူၤဒီတနံၤကျၢၤညါအဃိ လီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲအသိး ကီးနွဲၣ်လီၢ်က၀ီၤဒီဖုလံၤခံဂၤစ့ၢ်ကီး ဘၣ်ဒိဘၣ်ထံး၀ဲအဂ့ၢ်န့ၣ်လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “ဖဲမုၢ်ဃုနံၤအခါန့ၣ်ပယီၤသုးကဘီယူၤဟဲခးလီၤတၢ်ႉတနံၤအံၤနါက့ခးလီၤကျိဖးဒိၣ်ဒီတနံၤကျၢၤလီၤႉခးလီၤတၢ်လၢကီးတရံးအခိၣ်အဃၢၤဒူသ၀ီတဖၣ်အပူၤ‚ခး၀ဲအခိၣ်သ့ၣ်ခီန့ၣ်(ကီးနွဲၣ်)သ၀ီလီၤမီၤနီၤႉဘၣ်ဒိ၀ဲဒၣ်ၦၤဒီဖုလံၤ(၂)ဂၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါဒံၣ်စ့ဘၢၣ် ၂၀ သီအနံၤန့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၁၉ သီအခါစ့ၢ်ကီး ခီဖျိပယီၤသုးခးလီၤကျိဖးဒိၣ်တပယူာ်ဃီအဃိ တၢ်ဒုးကဲထီၣ်၀ဲဒီး(KNLA)အၦၤသ့ၣ်တဖၣ်ဒီးတကီၢ်ခါခဲအံၤခံခီခံကပၤဒုးယၤတၢ်ဖ့ၣ်စၢကဲထီၣ်ဒံး၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
(ယ့ဘလူ)ကရူၢ်လဲၤခး၀ဲအဃိပယီၤသုးသံ ၄ ဂၤ ဘၣ်ဒိ ၃ ဂၤ
လါဒံၣ်စ့ဘၢၣ် ၂၁ သီႇ ၂၀၂၂ သီႇ ခ့ၣ်အဲးစံၣ် လၢတလၢၤကီၢ်စဲၣ် ယ့ကီၢ်ဆၣ်အပူၤ (ယ့ဘလူ)ကရူၢ်လဲၤခးပယီၤသုးခီၣ်ချ့သုးရ့ၣ်(ခလရ–၅၈၆)အဃိ ပယီၤသုးသံ(၄)ဂၤဒီးဘၣ်ဒိနးနးကျံၤကျံၤ(၃)ဂၤအဂ့ၢ်န့ၣ် ယ့ဘလူကရူၢ်အခိၣ်စံး၀ဲန့ၣ်လီၤႉ ဖဲမဟါလါဒံၣ်စ့ဘၢၣ် ၂၀ သီ မုၢ်ထူၣ် ၁၁း၅၀ မံးနံးဃၣ်ဃၣ်အဆၢကတီၢ် ပယီၤသုး(ခလရ–၅၈၆)သုးရ့ၣ်လၢ အိၣ်ဆီလီၤသးဖဲယ့၀့ၢ်ကပၤအံၤ ယ့ဘလူကရူၢ်လဲၤခးအ၀ဲသ့ၣ်ဒီး(RPG)ကျိဖးဒိၣ်ႇကျိဖိတဖၣ်အဂ့ၢ်န့ၣ် ယ့ဘလူကရူၢ်အခိၣ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပ၀ဲဒၣ်(ယ့ဘလူ)ကရူၢ်သူ၀ဲဒၣ်(RPG)ဒီးပလဲၤနုာ်လီၤခးပယီၤသုး(၅၈၆)မီၤနီၤႉပခး(RPG)န့ၣ်လဲၤလီၤတဲာ်၀ဲလၢအ၀ဲသ့ၣ်ဒုးယၤ(ဗန်ကာ)အဃိအ၀ဲသ့ၣ်သံဘၣ်ဒိဘၣ်ထံးအါမီၤနီၤႉအသံ(၄)ဂၤဘၣ်ဒိနးနး(၃)ဂၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ခးလိာ်သးကဲထီၣ်ဘျီ၀ဲအံၤ(ယ့ဘလူ)ကရူၢ်တကပၤတၢ်သံဘၣ်ဒိဘၣ်ထံးတအိၣ်၀ဲဘၣ်ဒီး က့ၤကဒါဆူအ၀ဲသ့ၣ်သုးကလၢၤတၢ်လီၢ်ဂ့ၤဂ့ၤလီၤအဂ့ၢ်န့ၣ်အ၀ဲစံးအါထီၣ်၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါနိၣ်၀့ဘၢၣ်အခါစ့ၢ်ကီး(ယ့ဘလူ)ကရူၢ်အိၣ်ခိးခး၀ဲပၢၤကီၢ်ခိၣ်အသိလ့ၣ်အဃိ ပယီၤသုးသံ(၃)ဂၤဒီးမၤန့ၢ်၀ဲကျိဖိတခိၣ်အဂ့ၢ်န့ၣ်(ယ့ဘလူ)ကရူၢ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ပယီၤသုးနုာ်လီၤမၤဆှဲဟီၣ်က၀ီၤန့ၢ်တနံၣ်လံဘၣ်ဆၣ်လ့က့ၣ်ကိာ်ၦၤဃ့ၢ်မှံဟးဖျိးတက့ၤဘၣ်လၢအလီၢ်အကျဲဒံးဘၣ်
လါဒံၣ်စ့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် မၠၣ်၀တံၣ်ကလံၤထံး ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ လ့က့ၣ်ကိာ်၀့ၢ်သီတုၤလၢဂီၤလ့ၤလီၢ်က၀ီၤန့ၣ်ပယီၤသုးနုာ်လီၤမၤတၢ်ထီၣ်ဒုးန့ၢ်တနံၣ်လံဘၣ်ဆၣ် တုၤလၢခဲအံၤလီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်တက့ၤဘၣ်လၢအလီၢ်အကျဲဒံးဘၣ်အဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ “ခဲအံၤပဘၣ်ဟးစံၣ်ဒီးပဟဲအိၣ်လၢသူမှဲကျိကၢၢ်နံၤအံၤန့ၢ်တနံၣ်လံႉခဲအံၤပနၢ်ဟူလၢပယီၤသုးဟဲတဲသကိးတၢ်ဒီးသ၀ီၦၤဘၣ်မူဘၣ်ဒါလၢကက့ၤဆူလ့က့ၣ်ကိာ်အဂီၢ်မီၤနီၤႉတၢ်ဒုးကဲထီၣ်န့ၢ်လၢအလါလံဒီးပဆိမိၣ်လၢၦၤမၤဆှဲလဲမ့ၣ်ပိၢ်ႇမၤဆှဲတၦီာ်ႇမၤဆှဲကျဲမ့၀ံၤတၢ်ဒုးကဲထီၣ်မ့တအိၣ်လၢၤဘၣ်မးပကက့ၤအိၣ်မီၤနီၤႉ” အဂ့ၢ်န့ၣ်လ့က့ၣ်ကိာ်(က၀ီၤဒ့) ၦၤဃ့ၢ်မှံဟးဖျိးပိာ်မုၣ်တဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကီၢ်ခါခဲအံၤလ့က့ၣ်ကိာ်ဟီၣ်က၀ီၤအပူၤတၢ်ဒုးကဲထီၣ်တအိၣ်လၢၤ၀ဲဘၣ်ဆၣ်တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ႇပယီၤသုးၦၤဘၣ်မူဘၣ်ဒါတဖၣ်အံၤဟဲထံၣ်လိာ်တဲသကိးတၢ်ဒီးလ့က့ၣ်ကိာ်၀့ၢ်သီပၢပြးကရူၢ်သူၣ်က့သးၦၢ်တဖၣ်ဒီးကမၢၦၤဃ့ၢ်မှံဟးဖျိးဟဲက့ၤအိၣ်ကဒါ၀ဲအဂ့ၢ်န့ၣ် ဂံၢ်ခီၣ်ထံးတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ တၢ်ရဲၣ်တၢ်ကျဲၤအံၤအဖီခိၣ်တၢ်မၤဆှဲလဲဃာ်မ့ၣ်ပိၢ်ႇတၢ်မၤဆှဲတၦီာ်အိၣ်၀ဲဘၣ်ဆၣ် မ့မ့ၢ်ကမျၢၢ်ၦၤဃ့ၢ်မှံဟးဖျိးတဖၣ်ခီ က့ၤအိၣ်၀ဲတဘူၣ်ဒံးဘၣ်အဂ့ၢ်န့ၣ် ကမျၢၢ်ၦၤဃ့ၢ်မှံဟးဖျိးတဂၤစံး၀ဲဒ်အံၤန့ၣ်လီၤႉ “ခဲအံၤပယီၤသုးရၤလီၤတၢ်ကစီၣ်လၢသ၀ီလၢထံမဲး၀ါခံႇပဟံၣ်ကျီးႇသ့ၣ်ဘီဘိႇဘျၢၣ်ဒိၣ်သ၀ီဖိတဖၣ်န့ၣ်က့ၤလံဘၣ်ဆၣ်အနီၢ်ကီၢ်ကီၢ်ခီန့ၣ်အ၀ဲသ့ၣ်ဟဲကိးဒီးဒိ၀ဲတၢ်ဂီၤလီၤႉၦၤလၢအလဲၤပိာ်အ၀ဲသ့ၣ်ခံတဖၣ်န့ၣ်အိၣ်ဒၣ်အက့ၤကွၢ်အဟံၣ်အဃီႇအကျီးဒ်န့ၣ်လီၤႉၦၤက့ၤအိၣ်တစဲးဒံးလီၤႉတနီၤန့ၣ်မုၢ်ဆါခီန့ၣ်က့ၤအိၣ်လၢအဟံၣ်အကျီးပူၤဒီးမုၢ်နၤခီန့ၣ်ဟဲက့ၤမံကဒါလၢၦၤလီၢ်အိၣ်ကဒုအလီၢ်လီၤ” အဂ့ၢ်န့ၣ်အ၀ဲစံး၀ဲန့ၣ်လီၤႉ ဖဲအပူၤကွံာ်လါအခါပယီၤသုးဟးဒုးသ့ၣ်ညါကမျၢၢ်တဖၣ်လၢအ၀ဲသ့ၣ်လုၢ်ဘၢဒိၣ်စိ၀ဲသ့ၣ်ဘီဘိန့ၢ်လံဒီး လီၢ်က၀ီၤကမျၢၢ်ၦၤဃ့ၢ်မှံဟးဖျိးဟဲက့ၤအိၣ်လၢဒူသ၀ီပူၤသ့၀ဲလံအသိးသုးမီၤစိရိၤအတၢ်ကစီၣ်သန့တဖၣ်စ့ၢ်ကီးထုးထီၣ်ပာ်ဖျါ၀ဲတၢ်ကစီၣ်ဒံးန့ၣ်လီၤႉ ဖဲအပူၤကွံာ်(၂၀၂၁) လါဒံၣ်စ့ဘၢၣ် ၁၅ သီအခါန့ၣ် လၢကမၤဆှဲလဲလ့ၣ်က့ၣ်ကိာ်၀့ၢ်သီတၢ်လီၢ်တဖၣ်အဂီၢ် ပယီၤသုးကျိၤနုာ်လီၤဖီၣ်သမံသမိး၀ဲတၢ်ဒီးဖဲန့ၣ်တၢ်ထီၣ်ဒုးစးထီၣ်ကဲထီၣ်၀ဲဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အံၤန့ၣ်လီၤႉ တကီၢ်ခါတုၤလၢခဲအံၤတစုပယီၤသုးအံၤလုၢ်ဘၢဒိၣ်စိ၀ဲလ့က့ၣ်ကိာ်–သ့ၣ်ဘီဘိ–ဂီၤလ့ၤကျဲတန့ၢ်လၢလၢၦဲၤၦဲၤဒံးဘၣ် ဒီးခံခီခံကပၤဒုးယၤတၢ်ဖ့ၣ်စၢကဲထီၣ်ဒံး၀ဲတပယူာ်ဃီအဂ့ၢ်န့ၣ် ဟီၣ်က၀ီၤဒုးယၤၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ တုၤလၢတကီၢ်ခါခဲအံၤလ့က့ၣ်ကိာ်တုၤလၢဂီၤလ့ၤဟီၣ်က၀ီၤန့ၣ်ကမျၢၢ်ၦၤဃ့ၢ်မှံဟးဖျိးလီၢ်အိၣ်ကဒုတၢ်လီၢ်အိၣ်၀ဲ(၆)တီၤဒီးၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၇၀၀၀)ဃၣ်ဃၣ်အသိးဘၣ်ဃးတၢ်အီၣ်တၢ်အီႇတၢ်အိၣ်ဆူၣ်အိၣ်ချ့တၢ်အံးထွဲကွၢ်ထွဲတကပၤစ့ၢ်ကီးအ၀ဲသ့ၣ်ဘၣ်ဒိးသန့ၤထီၣ်သးလၢၦၤမၤဘူၣ်လီၤတၢ်ဖိတဖၣ်အအိၣ်လီၤအဂ့ၢ်န့ၣ် ဟီၣ်က၀ီၤဒုးယၤဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ
တၢ်မ့သူၣ်ဖျး(ဘဲထံထူၣ်)န့ၣ်တၢ်ကဟံအရ့ဒ်ကီၢ်သူလ့ၤတၢ်ဘျၢသဲစးအိၣ်အသိးအဂ့ၢ် KNU ထုးထီၣ်ပာ်ဖျါ
လါဒံၣ်စ့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးအပူၤ ၦၤလၢအမ့သူၣ်ဖျးမၤဆါ(ဘဲထံထူၣ်)သ့ၣ်တဖၣ်န့ၣ်တၢ်ကဟံအရ့ဒ်(ခ့ၣ်အဲၣ်ယူၣ်)ကီၢ်သူလ့ၤတၢ်ဘျၢသဲစးအိၣ်အသိးအဂ့ၢ်န့ၣ် ကီၢ်ရ့ၣ်ထီဘိကမံးတံာ်ကရူၢ်ထုးထီၣ်ပာ်ဖျါ၀ဲဖဲအပူၤကွံာ်လါဒံၣ်စ့ဘၢၣ် ၇ သီအနံၤန့ၣ်လီၤႉ (ဘဲထံလၣ်)အံၤတၢ်ပာ်ပနီၣ်၀ဲလၢအမ့ၢ်တၢ်မူၤတၢ်ဘှီးတကလုာ်အဃိၦၤလၢအမ့သူၣ်ဖျးထုးထီၣ်ဆါ၀ဲလၢကသံၣ်သ့ၣ်တဖၣ်အံၤတၢ်ကဟံးန့ၢ်အရ့ဒ်ကီၢ်သူလ့ၤတၢ်ဘျၢသဲစးအဆၢဖိ (၁၈၀)‚ (၁၈၁)‚ (၁၈၂)‚ (၁၈၃) ဒီး (၁၈၄) အသိးအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒူပျာ်ယာ်ကီၢ်ရ့ၣ် နဲၣ်ရွဲၣ် ပဒိၣ်စီၤလ့စတၣ် စံး၀ဲ“ ၦၤနီၢ်ဒိၣ်ဃုာ်ဒီးၦၤသူၣ်ဘီၣ်သးစၢ်လၢာ်ဃုာ်ဒီးၦၤပိာ်မုၣ်ပိာ်မၢၤ တဖၣ်သူ၀ဲ(ဘဲထံလၣ်)အါထီၣ်အဃိဘၣ်ဒိ၀ဲခါဆူညါတၢ်အိၣ်မူအဂီၢ်မီၤနီၤႉသုးဟံးန့ၢ်တၢ်စိတၢ်ကမီၤအတီၢ်ပူၤၦၤသူၣ်ဘီၣ်သးစၢ်တဖၣ်လဲၤက့ၤလၢ(ဘဲထံလၣ်)တကပၤအါထီၣ်မီၤနီၤႉကမျၢၢ်ပာ်ဖျါထီၣ်ၦၤလၢၦၤဟးဂီၤဒ်အံၤအါထီၣ်အဃိပဘၣ်ထုးထီၣ်တၢ်သိၣ်တၢ်သီလၢဟီၣ်က၀ီၤပူၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါဒံၣ်စ့ဘၢၣ် ၁၃ သီအနံၤန့ၣ်လီၤႉ ဟီၣ်က၀ီၤအပူၤတၢ်သူၣ်ဖျး၀ဲ(ဘဲထံလၣ်)အံၤဒီးဘဲထံလၣ်အလၣ်တကံလိန့ၣ်အၦ့ၤအိၣ်လၢစ့ယိၤ(၁၀၀)ဘးညါဒီးမ့မ့ၢ်လၢကီၢ်ပူၤတကပၤန့ၣ်ဘဲထံလၣ်အထၢၣ်ဆံးဆံးဖိတထၢၣ်န့ၣ်အၦၤ့အိၣ်(၃၀၀၀၀)ကၠးညါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤသ၀ီဖိတဖၣ်အအိၣ်န့ၣ်လီၤႉ “အလၣ်န့ၣ်ၦၤချီ၀ဲဒီးထံချီၦၤဃါဃုာ်အီအီၤဒီး(ခိၤခၤခိၤလၤ)အထံမီၤနီၤႉၦၤသူအီၤလၢၦၤမၤတၢ်ဃၢအခါဘၣ်ဆၣ်ခဲအံၤသူၣ်ဘီၣ်သးစၢ်တဖၣ်သူ၀ဲလၢဘူၣ်ပူၤအါထီၣ်မီၤနီၤႉနသူမ့အါန့ၣ်ကဲထီၣ်ပၢၢ်တုၤလၢနမ့တသူဘၣ်န့ၣ်နအိၣ်တကဲလၢၤဘၣ်ညါႉနသးနါက့တဂၢၢ်တကျၢၤဘၣ်ႉမၤဘၣ်ဒိစ့ၢ်ကီးနကလ့ၢ်နသူၣ်အဃိၦၤတနီၤန့ၣ်ဘၣ်လဲၤထီၣ်တုၤလၢတၢ်ဆါဟံၣ်ညါႉၦၤဟ့ၣ်ပီညါမ့အါမးကဘၣ်ဂီၢ်၀ဲလီၤ” အဂ့ၢ်န့ၣ်၀ီၢ်ရ့ၣ်ကီၢ်ဆၣ်လီၢ်က၀ီၤကမျၢၢ်တဂၤစံး၀ဲန့ၣ်လီၤႉ စးထီၣ်လၢကီၢ်ကၠီၣ်တဲၣ်ပဒိၣ်ဟ့ၣ်အခွဲးလၢသူကသံၣ်မူၤဘှီးအထူၣ်သ့၀ဲ၀ံၤလံအလီၢ်ခံန့ၣ် လၢကီၢ်ကီၢ်ကၠီၣ်တဲၣ်–ကီၢ်ပယီၤကီၢ်ဆၢဒီး(ခ့ၣ်အဲၣ်ယူၣ်)ဒူပျာ်ယာ်ကီၢ်ရ့ၣ် ကီၢ်ဆၣ်တဖၣ်အပူၤ ၦၤသူၣ်ၦၤဖျးကသံၣ်မူၤဘှီးအထူၣ်ဒီး ပှၤသူကသံၣ်မူၤဘှီးဟဲအါထီၣ်အဃိသူၣ်ဘီၣ်သးစၢ်အတၢ်အိၣ်မူခါဆူညါအဂီၢ်ဒီးကမျၢၢ်တၢ်ဘံၣ်တၢ်ဘၢအဂီၢ် တၢ်ထုးထီၣ်၀ဲတၢ်သူကသံၣ်မူၤဘှီးတၢ်သိၣ်တၢ်သီအံၤလီၤအဂ့ၢ်န့ၣ် ခ့ၣ်အဲၣ်ယူၣ်ၦၤဘၣ်မူဘၣ်ဒါစံး၀ဲန့ၣ်လီၤႉ
ထံဂုၤကီၢ်ဂၤမ့ဆဲးကွၢ်ကပ၁်တၢ်လုၣ်သ့ၣ်ခါပတ၁်ၦၤဂ့ၢ်၀ီခွဲးယာ်အံၤန့ၣ်တၢ်မၤကမၣ်ဒုးယၤကွီၢ်မ့ၣ်ကနးဒိၣ်ထီၣ်၀ဲအဂ့ၢ် KHRG စံး၀ဲ
လါဒံၣ်စ့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် ကီၢ်ပယီၤအပူၤသုးမီၤစိရိၤအတၢ်လုၣ်သ့ၣ်ခါပတာ်မၤကမၣ်ၦၤဂ့ၢ်၀ီခွဲးယာ်အံၤတၢ်မ့တဟံးန့ၢ်ဂ့ၢ်၀ီဘၣ်ထံဂုၤကီၢ်ဂၤမ့ဆဲးကွၢ်ကပာ်ကွံာ်၀ဲန့ၣ်တၢ်မၤကမၣ်ဒုးယၤကွီၢ်မ့ၣ်ကနးဒိၣ်ထီၣ်၀ဲအဂ့ၢ်န့ၣ်ကညီဂ့ၢ်၀ီခွဲးယာ်ကရူၢ်(KHRG)ထုးထီၣ်ပာ်ဖျါ၀ဲဖဲလါဒံၣ်စ့ဘၢၣ် ၁၃ သီအနံၤန့ၣ်လီၤႉ လၢကီၢ်ပယီၤမုၢ်ထီၣ်ကလံၤထံးန့ၣ်ဆံဖှိၣ်နံၣ်(၃)ခါအတီၢ်ပူၤသုးမီၤစိရိၤအံၤမၤကမၣ်၀ဲဒုးယၤကွီၢ်မ့ၣ်ႇၦၤဟီၣ်ခိၣ်ဖိကွီၢ်မ့ၣ်လၢလီၢ်က၀ီၤကမျၢၢ်ထံဖိကီၢ်ဖိအဖီခိၣ်ဒီးတၢ်အုၣ်သးတၢ်ဂ့ၢ်တၢ်ကျိၤလၢအပၣ်ဃုာ်လၢလံာ်တၢ်ပာ်ဖျါအပူၤအံၤတဖၣ်တုၤလၢခဲအံၤတၢ်မၤကမၣ်ကွီၢ်မ့ၣ်သ့ၣ်တဖၣ်အံၤထံဂုၤကီၢ်ဂၤကွၢ်ကပာ်ကွံာ်၀ဲအဂ့ၢ်န့ၣ်ပာ်ဖျါ၀ဲန့ၣ်လီၤႉ ကညီဂ့ၢ်၀ီခွဲးယာ်ကရူၢ် ၦၤကတိၤတဲန့ၢ်ခဲးတၢ်မူဒါခိၣ် စီၤနၤဒၣ်စူစံး၀ဲ“ပယီၤသုးန့ၣ်သမၢတ့ၢ်၀ဲလံ အ၀ဲတတူၢ်လိာ်၀ဲလၢအမၤကမၣ်တၢ်သ့ၣ်တဖၣ်အံၤဘၣ်ဒီးဂုာ်ကျဲးကးဘၢ၀ဲႉဘၣ်ဆၣ်သနါက့ပပာ်ဖျါထီၣ်လၢလၢၦဲၤၦဲၤတုၤလီၤတီၤလီၤ၀ံၤလံမီၤႉအ၀ဲသ့ၣ်သမၢ၀ဲတသ့လၢၤဘၣ်ႉအဃိသးန့ၣ်ထံဂုၤကီၢ်ဂၤအတၢ်ဟံးထီၣ်ဖီၣ်ထီၣ်မ့ၢ်ဂ့ၤန့ၣ်တမ့ၢ်အတုၤလီၤတီၤလီၤဘၣ်ႉအဃိသးန့ၣ်ခဲအံၤပအဲၣ်ဒိးဆီၣ်တခူထီၣ်တဲတဲာ်တဲာ်ဖျုဖျုတုၤလီၤတီၤလီၤလၢလီၤဆီဒၣ်တၢ်ထံဂုၤကီၢ်ဂၤလၢအအိၣ်ဒီးအမူအဒါဖးဒိၣ်လၢကဘၣ်ဟံးထီၣ်ဂ့ၢ်၀ီလၢသုးမီၤစိရိၤအဖီခိၣ်အံၤန့ၣ်အတကြၢးကွၢ်ပတာ်ကွံာ်တၢ်တခါအံၤဘၣ်မီၤနီၤႉအမ့ကွၢ်ပတာ်ကွံာ်လၢကဘၣ်ဟံးန့ၢ်ဂ့ၢ်၀ီလၢသုးမီၤစိရိၤအဖီခိၣ်အံၤန့ၣ်ဒ်သိးအ၀ဲမၤထီထီၣ်၀ဲသုးမီၤစိရိၤလၢကပူၤဖျဲးထီၣ်၀ဲလၢတၢ်ဟံးန့ၢ်အီၤဂ့ၢ်၀ီအံၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤႉ ကညီဂ့ၢ်၀ီခွဲးယာ်ကရူၢ်(KHRG)အလံာ်တၢ်ပာ်ဖျါအပူၤဒုးယၤကွီၢ်မ့ၣ်ဒီးၦၤဟီၣ်ခိၣ်ဖိကွီၢ်မ့ၣ်လၢသုးမီၤစိရိၤလုၢ်သ့ၣ်ခါပတာ်မၤကမၣ်၀ဲသ့ၣ်တဖၣ်လၢအမ့ၢ်တၢ်မၤသံမၤ၀ီဆှုၣ်မဲာ်ကဲာ်မဲာ်ႇမၢဆူၣ်တၢ်သုးလီၢ်သုးကျဲႇမၤပယွဲဆီၣ်တံၢ်မၤနၢၤႇမၢဆူၣ်မၢစိးကမျၢၢ်ႇကဲန့ၢ်ကုၢ်ႇဒွဲၣ်အူအီၣ်သ၀ီဒီတဖျၢၣ်ႇတြီကးတံၢ်ကွံာ်ဂံၢ်ခီၣ်ထံးတၢ်လိၣ်ဘၣ်သ့ၣ်တဖၣ်ႇဒုးလီၤဒိသၣ်၀ံၤဒီးသွံၣ်ထံးတၢ်စုဆူၣ်ခီၣ်တကးသ့ၣ်တဖၣ်ပၣ်ဃုာ်၀ဲအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါသုးဟံးန့ၢ်တၢ်စိတၢ်ကမီၤ၀ံၤအလီၢ်ခံလၢကီၢ်ပယီၤမုၢ်ထီၣ်ကလံၤထံးဟီၣ်က၀ီၤအပူၤန့ၣ်ယီၤသုးဒီးဟီၣ်က၀ီၤတၢ်ပၢၢ်ဆၢဖီၣ်စုက၀ဲၤကရူၢ်အဘၢၣ်စၢၤတၢ်ဒုးဟဲက့ၤဆူၣ်ထီၣ်ကဒါ၀ဲဒီးပယီၤသုးအံၤသူ၀ဲကဘီယူၤခးလီၤတၢ်လၢဒူသ၀ီပူၤဒီးခးလီၤကျိးဖးဒိၣ်ဒိၣ်ဒိၣ်မုၢ်မုၢ်တကးဒံးဘၣ်အမဲာ်ညါကဘီယူၤဟဲခးလီၤတၢ်အိၣ်၀ဲ(၇၂)ဘျီလံဒီးလီၢ်က၀ီၤကမျၢၢ်ထံဖိကီၢ်ဖိဘၣ်ဃ့ၢ်မှံဟးဖျိး၀ဲ(၃၀၀ႇ၀၀၀)ဘျဲၣ်အဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်လံာ််တၢ်ပာ်ဖျါပူၤအသိးန့ၣ်လၢကီၢ်ပယီၤမုၢ်ထီၣ်ကလံၤထံးဒူသ၀ီတဖၣ်အပူၤသုးမီၤစိရိၤအံၤမၤကမၣ်၀ဲၦၤဂ့ၢ်၀ီခွဲးယာ်ႇဒုးယၤကွီၢ်မ့ၣ်လၢထံဖိကီၢ်ဖိကမျၢၢ်တဖၣ်အဖီခိၣ်တၢ်သ့ၣ်တဖၣ်အံၤမ့ၢ်လီၢ်က၀ီၤကမျၢၢ်အတၢ်အုၣ်သးတၢ်ဂ့ၢ်တၢ်ကျိၤလၢတၢ်သမၢ၀ဲတန့ၢ်ဘၣ်အဂ့ၢ်န့ၣ်(KHRG)စံး၀ဲန့ၣ်လီၤႉ ကညီဂ့ၢ်၀ီခွဲးယာ်ကရူၢ်(KHRG)အံၤဘၣ်တၢ်ဒုးအိၣ်ထီၣ်အီၤဖဲ(၁၉၉၂)နံၣ်ဒီးမ့ၢ်ဂံၢ်ခီၣ်ထံးတၢ်ကရၢကရိတခါလၢဟူးဂဲၤ၀ဲဒ်ကရၢသဘျ့အသိးဒီးမၤနီၣ်မၤဃါ၀ဲဒူသ၀ီဖိဒီးကမျၢၢ်လၢအိၣ်ဆီလီၤသးလၢခိခိၣ်၀့ၢ်ပူၤဒီးဒူသ၀ီတဖၣ်အပူၤဖဲကီၢ်ပယီၤမုၢ်ထီၣ်ကလံၤထံးအတၢ်အိၣ်သးတဖၣ်န့ၣ်လီၤႉ
တၢ်ကစီၣ်ဟူထီၣ်သါလီၤလၢတၢ်ကက့ၤအိးထီၣ်ကဒါမၠၣ်၀တံၣ်နီၣ်ဂံၢ်(၁)တိၤ
လါဒံၣ်စ့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢတၢ်ရ့လိာ်မုာ်လိာ်နီၣ်ဂံၢ်(၁)တိၤလၢတၢ်ကးတံၢ်အီၤန့ၢ်၀ဲ(၂)နံၣ်ဘျဲၣ်အံၤ တလါအံၤလါလၢာ်တၢ်ကက့ၤအိးထီၣ်အီၤအဂီၢ်တၢ်အိၣ်ဖှိၣ်တၢၣ်ပီၣ်တဲသကိးအိၣ်ကတဲၤကတီၤ၀ဲလံအဂ့ၢ်န့ၣ် ကမျၢၢ်လၢအိၣ်မၠၣ်၀တံၣ်၀့ၢ်ပူၤတဖၣ်စံး၀ဲန့ၣ်လီၤႉ စးထီၣ်ဖဲအပူၤကွံာ်(၂၀၂၀)နံၣ်လါမးရှး(၂၃)သီအနံၤန့ၣ်ခီဖျိခိ၀ံၣ်တၢ်ဆါသံတြိာ်အဃိတၢ်ကးတံၢ်ဃာ်၀ဲနီၣ်ဂံၢ်(၁)တိၤအံၤဒီးကတီၢ်ခဲအံၤလၢတၢ်ကက့ၤအိးထီၣ်ကဒါတိၤအံၤအဂီၢ်န့ၣ်ထံကီၢ်ခံဘ့ၣ်ကီၢ်ဆၢၦၤဘၣ်မူဘၣ်ဒါတဖၣ်အိၣ်ဖှိၣ်တၢၣ်ပီၣ်တဲသကိးတၢ်ဒီးတၢ်ဂီၤစ့ၢ်ကီးရၤလီၤသးလၢၦၤမၤကဆှဲကဆှီဃာ်တၢ်ဘှီဂ့ၤထီၣ်က့ၤတၢ်သူၣ်ထီၣ်တနီၤလၢယိၤကီၢ်တကပၤအဂ့ၢ်န့ၣ် မၠၣ်၀တံၣ်ကမျၢၢ်တဂၤစံး၀ဲဒ်အံၤန့ၣ်လီၤႉ “လၢမဲၢ်ဆီးတိၤဖီခိၣ်န့ၣ်ပထံၣ်လၢကၠီၣ်တဲၣ်သူၣ်က့သးၦၢ်ဒီးၦၤမၤကဆှဲကဆှီတၢ်ဖိတဖၣ်မၤကဆှဲကဆှီတၢ်မီၤနီၤႉလၢမဲၢ်ဆီးတကပၤန့ၣ်ၦၤဘှီဂ့ၤမၤဂ့ၤထီၣ်တၢ်ထီဘိလီၤႉတိၤကအိးထီၣ်န့ၣ်ပနၢ်ဟူဖးယံၤလံႉလၢမၠၣ်၀တံၣ်တိၤန့ၣ်ပတထံၣ်ၦၤဟဲနီတဂၤဒံးဘၣ်ႉလၢအကပၤကပၤန့ၣ်ၦၤမၤတံၢ်ဃာ်ဒီးပျံၤထးဒ်လၢညါအသိးလီၤႉလၢအံၤတကပၤန့ၣ်ပတထံၣ်တၢ်ဟူးတၢ်ဂဲၤနီတမံၤဒံးဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါဒံၣ်စ့ဘၢၣ် ၁၄ သီအနံၤ န့ၣ်လီၤႉ ဘၣ်ဃးဒီးတၢ်ကက့ၤအိးထီၣ်ကဒါကီၢ်ကၠီၣ်တဲၣ်–ကီၢ်ပယီၤကီၢ်ဆၢ နီၣ်ဂံၢ်(၁)တိၤအံၤန့ၣ် တၢ်ကစီၣ်ဟူထီၣ်သါလီၤခဲအံၤခဲအံၤလီၤအသိးတၢ်ကစီၣ်ဟူထီၣ်လၢတၢ်ကက့ၤအိးထီၣ်ကဒါတိၤအံၤအိၣ်၀ဲဘၣ်ဆၣ် တုၤလၢခဲအံၤတၢ်တက့ၤအိးထီၣ်၀ဲဒံးဘၣ်န့ၣ်လီၤႉ လၢကီၢ်ပယီၤမၠၣ်၀တံၣ်နီၣ်ဂံၢ်(၁)တၢ်ရ့လိာ်မုာ်လိာ်တိၤတကပၤန့ၣ်မ့ၣ်ပိၢ်ပိၢ်ဖးကဲထီၣ်သးအိၣ်၀ဲ(၂)ဘျီလံဒီး ဖဲအပူၤကွံာ်လါအ့ဖြ့ၣ် ၂၃ သီအခါစ့ၢ်ကီးမ့ၣ်ပိၢ်ပိၢ်ဖးထီၣ်အဃိဟံၣ်ဃီႇကျးသ့ၣ်တဖၣ်ဟးဂီၤ၀ဲအါအါဂီၢ်ဂီၢ်ဒံး န့ၣ်လီၤႉ ဒ်န့ၣ်အသိးဖဲအပူၤကွံာ်လါမ့ၤ ၃ သီအခါစ့ၢ်ကီး လၢတၢ်ကက့ၤအိးထီၣ်ကဒါနီၣ်ဂံၢ်(၁)တၢ်ရ့လိာ်မုာ်လိာ်တိၤအံၤ အဂီၢ် ဖဲလါမ့ၤ ၁ သီအနံၤန့ၣ် ကီၢ်ကၠီၣ်တဲၣ်ပဒိၣ်အိၣ်ကတဲၤကတီၤဘှီဂ့ၤထီၣ်မၤဂ့ၤထီၣ်တၢ်အသိး လၢကီၢ်ပယီၤတိၤ(gate)တကပၤစ့ၢ်ကီးသုးမီၤစိရိၤအၦၤမၤတၢ်ဖိတဖၣ်မၤကဆှဲကဆှီဃာ်၀ဲတၢ်ဒံးန့ၣ်လီၤႉ ဘၣ်ဃးဒီးတၢ်ကစီၣ်ဟူထီၣ်သါလီၤလၢတနံၣ်အံၤလါဒံၣ်စ့ဘၢၣ်လၢာ်တၢ်ကက့ၤအိးထီၣ်ကဒါတိၤအံၤန့ၣ် ကီၢ်ဆၢဂံၢ်ခီၣ်ထံးတၢ်ကစီၣ်တနီၤပာ်ဖျါထီၣ်၀ဲလၢအ၀ဲသ့ၣ်(facebook)ပူၤအိၣ်၀ဲဘၣ်ဆၣ် တုၤလၢခဲအံၤခံခီခံကပၤၦၤဘၣ်မူဘၣ်ဒါထုးထီၣ်ပာ်ဖျါ၀ဲလၢအဖိးသဲစးတအိၣ်ဒံး၀ဲဘၣ်န့ၣ်လီၤႉ
တးကီၢ်ရ့ၣ်ပူၤခီကီၢ်ကၠိဖိတဖၣ်ကသ့ဒုးအိၣ်ထီၣ်တၢ်လုၢ်အီၣ်သးသမူတၢ်ဖံးတၢ်မၤလၢအပတီၢ်အိၣ်အဂီၢ် တၢ်မၤ၀ဲတၢ်ထံၣ်လိာ်ဟ့ၣ်ခီဟ့ၣ်နီၤတၢ်ရဲၣ်တၢ်ကျဲၤတခါ
လါဒံၣ်စ့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် ကီၢ်ပယီၤခီကီၢ်ကၠိဖိမုၣ်ခွါသ့ၣ်တဖၣ်ဒ်သိးအ၀ဲသ့ၣ်ကသ့ဒုးအိၣ်ထီၣ်တၢ်လုၢ်အီၣ်သးသမူတၢ်ဖံးတၢ်မၤလၢအပတီၢ်အိၣ်အဂီၢ် ဖဲလါဒံၣ်စ့ဘၢၣ် ၁၂ သီအနံၤန့ၣ် တၢ်မၤ၀ဲၦၤဖျိးစိတဖၣ်အတၢ်ဟ့ၣ်ခီဟ့ၣ်နီၤလီၤအတၢ်လဲၤခီဖျိ တၢ်ရဲၣ်တၢ်ကျဲၤတခါဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢ တးခ်ကီၢ်ရ့ၣ် ၀့ၢ်မဲၢ်ဆီးအပူၤန့ၣ်လီၤႉ တၢ်တၢၣ်ပီၣ်ဟ့ၣ်ခီဟ့ၣ်နီၤတၢ်ရဲၣ်တၢ်ကျဲၤလၢ(Cotton on Foundation)တီခိၣ်ရိၣ်မဲမၤ၀ဲ အဆိကတၢၢ်တဘျီအံၤန့ၣ်တၢ်တၢၣ်တဲသကိးဘၣ်ဃး(တးခ်ကီၢ်ရ့ၣ်)ပူၤတၢ်လီၢ်လၢခီကီၢ်ကၠိဖိအိၣ်၀ဲတကီၢ်ခါခဲအံၤသ့ၣ်တဖၣ်န့ၣ်ဒ်သိးတၢ်ဖံးတၢ်မၤအကျိၤအကျဲဒီးကျိၣ်စ့တၢ်ဟဲနုာ်ကအိၣ်အဂီၢ်ကဘၣ်ဟူးဂဲၤမၤဒ်လဲၣ်ဒီးၦၤလၢအဖျိးစိသ့ၣ်တဖၣ်ဟ့ၣ်ခီဟ့ၣ်နီၤလီၤအ၀ဲသ့ၣ်အတၢ်လဲၤခီဖျိတဖၣ်စ့ၢ်ကီးအဂ့ၢ်န့ၣ်(Cotton on Foundation)အၦၤနဲၣ်တၢ် နီၢ်ဂ့ၤဖိ စံး၀ဲဒ်အံၤန့ၣ်လီၤႉ “ခီကီၢ်ကၠိဖိသ့ၣ်တဖၣ်အါဒၣ်တက့ၢ်န့ၣ်အိၣ်ဒီးတၢ်ထံၣ်ဆံးလီၤသးလၢခါဆူညါအဂီၢ်ကလဲၤဒ်လဲၣ်ဒ်န့ၣ်အိၣ်မီၤနီၤႉအဃိန့ၣ်ပမိၣ်သးဟဲပၠးအ၀ဲသ့ၣ်လၢတၢ်ဃုထၢအဂၤအိၣ်ဒံးမီၤနီၤႉတမ့ၢ်ထဲလၢကဘၣ်လဲၤထဲ(University)တခါဘၣ်ႉသနါက့(စက့လ်)အဂုၤအဂၤလၢကဟ့ၣ်ထီၣ်အတၢ်ခွဲးတၢ်ယၤလၢကဃုတၢ်မၤလၢကလုၢ်အီၣ်သးသမူအဂီၢ်န့ၣ်ကျဲအိၣ်၀ဲဒၣ်အကလုာ်ကလုာ်လီၤႉအဃိန့ၣ်ပကွဲဃုာ်ဒီးၦၤဖဲဟီၣ်က၀ီၤဖိသ့ၣ်တဖၣ်လၢအဖျိးစိဘၣ်ဃးဒီးတၢ်ဆါတၢ်ၦ့ၤသ့ၣ်တဖၣ်မ့ၢ်ဂ့ၤႇ(Youtuber)တဖၣ်မ့ၢ်ဂ့ၤလၢၦၤကၠိဖိအဂီၢ်ကမၤလိနၢ်ဟူလၢအ၀ဲသ့ၣ်အိၣ်ဒီးဆိၣ်မိၣ်ရဲၣ်ကျဲၤလၢခါဆူညါအဂီၢ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ထံၣ်လိာ်ဟ့ၣ်ခီဟ့ၣ်နီၤဘျီ၀ဲအံၤအပူၤန့ၣ်ကီၢ်ကၠီၣ်တဲၣ်ကူၣ်သ့၀ဲၤကျိၤၦၤဘၣ်မူဘၣ်ဒါတဖၣ်ကတိၤဟ့ၣ်ဂံၢ်ဟ့ၣ်ဘါလီၤတၢ်ႇကညီမုၢ်ကျိၤ၀ဲၤကွာ်တၢ်မၤကစၢ်တဖၣ်ဟ့ၣ်ခီဟ့ၣ်နီၤလီၤအ၀ဲသ့ၣ်အတၢ်လဲၤခီဖျိႇဒီးၦၤဘၣ်မူဘၣ်ဒါဘၣ်ထွဲတဖၣ်ဆှဲပၠးလီၤကၠိဖိလၢအဟဲထီၣ်အဂၤ(၃၀၀)ဘျဲၣ်အံၤလၢအ၀ဲသ့ၣ်တၢ်ဖံးတၢ်မၤသ့ၣ်တဖၣ်န့ၣ်လီၤႉ ခီဖျိတၢ်မၤ၀ဲတၢ်ရဲၣ်တၢ်ကျဲၤအံၤအဃိကဲဘျုးကဲဖှိၣ်ကဲထီၣ်၀ဲဒၣ်တၢ်ဂံၢ်တၢ်ဘါလၢကီၢ်ပယီၤခီကီၢ်ကၠိဖိတဖၣ်အဂီၢ်ဒိၣ်မးအဂ့ၢ်န့ၣ် နီၢ်အဲၣ်ဆၢထံၣ်စိ လၢအဟဲထီၣ်တၢ်ရဲၣ်တၢ်ကျဲၤအံၤစံး၀ဲဒ်အံၤန့ၣ်လီၤႉ “တၢ်ရဲၣ်တၢ်ကျဲၤတခါအံၤဒုးသ့ၣ်ညါအါထီၣ်ယၤလၢၦၤတၢ်လဲၤခီဖျိန့ၣ်တမ့ၢ်အဟဲထဲလၢကျဲလၢအဂ့ၤကိးဘိဒဲးဘၣ်မီၤနီၤႉအ၀ဲသ့ၣ်အတၢ်အိၣ်မူအတၢ်လဲၤခီဖျိန့ၣ်ကဟဲ၀ဲဒၣ်လၢကျဲအါဘိႇကဘၣ်နးဘၣ်ဖှီၣ်၀ဲဒၣ်လီၤႉဒီးယသးန့ၣ်ဟဲနုာ်လီၤ၀ဲဒၣ်တခါလၢၦၤကညီတဂၤန့ၣ်လၢအတၢ်အိၣ်မူပူၤန့ၣ်အကဆှူဘၣ်၀ဲလီၤႉဘၣ်ဆၣ်သနါက့န့ၣ်ပဘၣ်ဂဲၤဆၢထၢၣ်ကဒါက့ၤပဘၣ်ဂုာ်မၤကဒါက့ၤႉၦၤလၢဂုာ်ကျဲးစၢးတၢ်ထီဘိတဂၤန့ၣ်တၢ်လီၢ်တၢ်ကျဲလၢအ၀ဲသ့ၣ်တဂၤအဂီၢ်န့ၣ်ကအိၣ်၀ဲဒၣ်ထီဘိလီၤမီၤနီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါတၢ်ရဲၣ်တၢ်ကျဲၤဘျီ၀ဲအံၤအပူၤ(Cotton on Foundation )ဃုာ်ဒီး ဆၣ်သူလ့ၤကၠိ(ဖီၣ်ဒ့ရှၢၣ်)‚ (Suwannimit Foundation)‚ကီၢ်ကၠီၣ်တဲၣ်–ကီၢ်ပယီၤကီၢ်ဆၢ(Picture Book)‚(Kickstart art)‚(Lush Life)‚ (Thabyaw)‚(Hebron)‚(Play Onside)‚(Mae Tao Clinic)‚(LCCI account CPI)‚(Sunday Morning Cafe)‚(Klee Po Shop)တၢ်ကရၢကရိတဖၣ်ဒီးမုၢ်ကျိၤ၀ဲၤကွာ်တၢ်မၤကစၢ်သ့ၣ်တဖၣ်ဟဲထီၣ်၀ဲဒၣ်န့ၣ်လီၤႉ (Cotton on Foundation) အံၤမ့ၢ်တၢ်ကရၢကရိတဒူၣ်လၢအိၣ််ဆီလီၤသးလၢကီၢ်အီးစထြ့လ်ယါဒီး ကတီၢ်ခဲအံၤဒ်သိးကီၢ်ကၠီၣ်တဲၣ်ပူၤခီကီၢ်ကၠိလၢအမ့ၢ်ဘွဲကျါကၠိဒီးဆၣ်သူလ့ၤတီၤထီကၠိအံၤလဲၤတရံးသးကန့ၢ်အဂီၢ်န့ၣ်မ့ၢ်တၢ်ကရၢကရိတဒူၣ်လၢအဆီၣ်ထွဲမၤစၢၤ၀ဲကၠိအံၤအသိးဆီၣ်ထွဲမၤစၢၤစ့ၢ်ကီးခီကီၢ်ကၠိဖိလၢအလဲၤထီၣ်မၤလိတၢ်လၢကီၢ်ကၠီၣ်တဲၣ်(ခီလ့းကၠိ)သ့ၣ်တဖၣ်စ့ၢ်ကီးန့ၣ်လီၤႉ
မုၢ်တြီၢ်ကီၢ်ရ့ၣ်အပူၤ ပယီၤသုးဒွဲၣ်အူအီၣ်လီၢ်က၀ီၤကမျၢၢ်အဘုဖီ ၄ ဖျၢၣ်
လါဒံၣ်စ့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤ ဘုသိၣ်ကီၢ်ဆၣ်အပူၤ ဖဲအပူၤကွံာ်လါဒံၣ်စ့ဘၢၣ် ၁၀ သီအနံၤန့ၣ် ပယီၤသုးဒွဲၣ်အူအီၣ်၀ဲခီပူးကရူၢ်(လၢ်ဂီၤဒၢ)သ၀ီဖိအဘုဖီ ၄ ဖျၢၣ်အဂ့ၢ်န့ၣ် မုၢ်တြီၢ်ကီၢ်ရ့ၣ်တၢ်ကစီၣ်ထုးထီၣ်ပာ်ဖျါ၀ဲန့ၣ်လီၤႉ ပယီၤသုးလၢအဟဲနုာ်လီၤလၢသ၀ီပူၤတဖၣ်အံၤခီဖျိဒွဲၣ်အူအီၣ်၀ဲလီၢ်က၀ီၤကမျၢၢ်အဘုဖီအဃိ မ့ၣ်အူအီၣ်ကွံာ်ဘုအနာ်(၂၇၀)ဒီးဟံးဆူၣ်၀ဲလီၢ်က၀ီၤကမျၢၢ်အတၢ်ဖိတၢ်လံၤလၢအမ့ၢ်တၢ်လိမုၢ်ႇတၢ်ဖိတၢ်လံၤလၢအလုၢ်ဒိၣ်ၦ့ၤဒိၣ်တနီၤဃုာ်ဒီးတၢ်ဖိိတၢ်လံၤလၢအဂၤတဖၣ်အဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ခ့ၣ်အဲၣ်ယူၣ်(သုးက့ ၅)အၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံး၀ဲ“လၢ(သုးက့ ၅)ဟီၣ်က၀ီၤပူၤအံၤန့ၣ် ပယီၤသုးဟူးဂဲၤဟဲအါထီၣ်ႉဟဲခးလီၤတၢ်ဒီးကဘီယူၤအါထီၣ်ႉခးလီၤကျိဖးဒိၣ်ဟဲအါထီၣ်မီၤနီၤႉခီဖျိအ၀ဲသ့ၣ်ခးလီၤတၢ်အဃိၦၤဟံၣ်ၦၤဃီဟးဂီၤဒီးၦၤဘုဖီဟးဂီၤ ၅ ဖျၢၣ်ညါ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၉ သီအနံၤန့ၣ် ပယီၤသုးကဘီယူၤဟဲခးလီၤတၢ်လၢဒွဲၣ်လိကီၢ်ဆၣ် မဲၤ၀့ၤသ၀ီပူၤ ဒီးကမျၢၢ်တၢ်ဖံးအီၣ်မၤအီၣ်လီၢ်ကျဲအိၣ်၀ဲခံဘျီညါတကးဒံးဘၣ်အမဲာ်ညါခးလီၤကျိဖးဒိၣ်ကျိဖိအထံၣ်(၁၀၀)ဘျဲၣ်ညါဒီးခးသံကွံာ်လီၢ်က၀ီၤကမျၢၢ်အပနၢ်တဖၣ်လၢတၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် မုၢ်တြီၢ်ကီၢ်ရ့ၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါစးထီၣ်လါနိၣ်၀့ဘၢၣ်တုၤလၢခဲအံၤတလါဘျဲၣ်အတီၢ်ပူၤန့ၣ် ခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤ သုးမီၤစိရိၤကဘီယူၤဟဲခးလီၤတၢ်အိၣ်၀ဲ(၁၁)ဘျီညါဒီးဖဲန့ၣ်ကမျၢၢ်အဟံၣ်အဃီဟးဂီၤ ၀ဲအဖျၢၣ်(၁၀)ဘျဲၣ်အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးလၢမုၢ်နၤခီအဆၢကတီၢ်စ့ၢ်ကီးခီဖျိသုးမီၤစိရိၤကဘီယူၤဟဲခးလီၤတၢ်ဒီးခးလီၤနါစိၤကျိဖးဒိၣ်အဃိလီၢ်က၀ီၤကမျၢၢ်တဖၣ်ဘၣ်အိၣ်လၢတၢ်ပလီၢ်ပဒီအပူၤထီဘိလီၤအဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ ခီဖျိပယီၤသုးနုာ်လီၤမၤဒုးယၤတၢ်ဟူးတၢ်ဂဲၤဟဲအါထီၣ်အဃိစးထီၣ်လါနိၣ်၀့ဘၢၣ်တုၤလၢလါဒံၣ်စ့ဘၢၣ်ထီၣ်အံၤန့ၣ်လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤ ပယီၤသုးဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးပာ်ဖှိၣ်အဘၢၣ်စၢၤတၢ်ခးလိာ်သးကဲထီၣ်၀ဲ(၁၄၇)ဘျီဒီးဖဲန့ၣ်ပယီၤသုးတကပၤသံ၀ဲ(၈၅)ဂၤႇဘၣ်ဒိ(၅၉)ဂၤန့ၣ်လီၤႉဒ်န့ၣ်အသိး(KNLA)သုးပာ်ဖှိၣ်တကပၤစ့ၢ်ကီးဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်ဂီၢ်(၁၁)ဂၤဒီးဘၣ်ဒိ(၃၈)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲန့ၣ်လီၤႉ