BGF ခးလီၤတပျုာ်တပျီာ်တၢ်ဆူမံပိသ၀ီပူၤဒီးဒွဲၣ်အူအီၣ်ကမျၢၢ်အဟံၣ်တဖျၢၣ်
လါဒံၣ်စ့ဘၢၣ် ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ဒူသထူၣ်ကီၢ်ရ့ၣ်(သုးက့ ၁) ဖၣ်အၣ်ကီၢ်ဆၣ်အပူၤ ဖဲအပူၤကွံာ်လါဒံၣ်စ့ဘၢၣ် ၁၀ သီအနံၤန့ၣ် သုးခိးကီၢ်ဆၢ(BGF)နုာ်လီၤလၢတကီၤဘိကရူၢ်(မံပိ)သ၀ီပူၤဒီး ခးနါစိၤကျိဖးဒိၣ်ကျိဖိအမဲာ်ညါဒွဲၣ်အူအီၣ်ကွံာ်ကမျၢၢ်အဟံၣ်တဖျၢၣ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ (BGF–၁၀၁၄) သုးရ့ၣ်လၢဘၣ်တၢ်တီခိၣ်မဲအီၤလၢသုးခိၣ်တ့ၤ၀့အံၤ နုာ်လီၤ၀ဲဒၣ်ဆူမံပိသ၀ီပူၤဒီး ခးနါစိၤကျိတပယူာ်ဃီ၀ံၤဖဲလါဒံၣ်စ့ဘၢၣ် ၁၁ သီ ဟါခီ ၂ နၣ်ရံၣ်အဆၢကတီၢ်န့ၣ် ဒွဲၣ်အူအီၣ်၀ဲမံပိသ၀ီပူၤ ကျးဖးဒိၣ်တဖျၢၣ်အဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဒွဲၣ်အူအီၣ်ဟးဂီၤကျးဖးဒိၣ်ဟံၣ်တဖျၢၣ်န့ၣ်ဒ်န့ၣ်လီၤႉအ၀ဲသ့ၣ်ဟဲနုာ်လီၤအနီၣ်ဂံၢ်ဖးအါညါႉအိၣ်လၢသ၀ီကျဲကပၤဒီတဘိဒီးဟးခးနါစိၤတၢ်ႇမ့ၢ်အခးမနုၤလဲၣ်တသ့ၣ်ညါဘၣ်ႉယတဲလၢသုခးတၢ်န့ၣ်ဘၣ်ဒိပသ၀ီလီၤအ၀ဲသ့ၣ်နံၤထီၣ်၀ဲဒံးႉမ့၀ံၤကျိဖးဒိၣ်လီၤတဲာ်အဃိဟံၣ်လၢအဟးဂီၤလၢအဂၤတဖျၢၣ်နါက့အ၀ဲသ့ၣ်နုာ်လီၤလၢကျးပူၤဒီးအိးထီၣ်အီ၀ဲၦၤ(ဘံၣ်ယၢၣ်)လၢတူၣ်ယ့ပူၤႉဟံဃုာ်ၦၤစ့ဒၢလၢအိၣ်ဟံၣ်ပူၤဒံး”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ခီဖျိအ၀ဲသ့ၣ်ခးတပျုာ်တပျီာ်ကျိဖးဒိၣ်အဃိဟံၣ်ဃီဟးဂူာ်ဟးဂီၤ၀ဲတနီၤတကးဒံးဘၣ်ကမျၢၢ်ဘၣ်ဒိစ့ၢ်ကီး(၁)ဂၤအသိးဟံၣ်ဆၣ်ဖိကီၢ်ဖိတနီၤဘၣ်ဒိဘၣ်ထံး၀ဲဒီး(မံပိ)သ၀ီဖိခဲလၢာ်ဃၣ်ဃၣ်လဲၤစံၣ်အိၣ်၀ဲလၢသ၀ီအဂၤအဂ့ၢ်န့ၣ်လီၢ်က၀ီၤသ၀ီဖိတဂၤဃီ၀ဲန့ၣ်စံးအါထီၣ်န့ၣ်လီၤႉ (BGF–၁၀၁၄) သုးဒ့ (၂) သုးဒ့ခိၣ် သုးခိၣ်တ့ၤ၀့အနီၢ်ကစၢ်ဒၣ်၀ဲတီခိၣ်ရိၣ်မဲအၦၤအဂၤ (၅၀) ဃၣ်ဃၣ် နုာ်လီၤ၀ဲဒၣ်ဆူသ၀ီပူၤဒီးဖဲအ၀ဲသ့ၣ်နုာ်လီၤအဆၢကတီၢ်န့ၣ်ခးပျံၤ၀ဲသူၣ်ဘီၣ်သးစၢ်လၢအဟးထီၣ်က့ၤလီၤဒီးဆဲးကဲးတဖၣ်အိၣ်၀ဲအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ဟီၣ်က၀ီၤဖဲန့ၣ်အပူၤတၢ်ဒုးကဲထီၣ်တအိၣ်၀ဲဘၣ်ဒီး(BGF)အံၤလၢခ့ၣ်အဲၣ်ယူၣ်(သုးက့ ၇)ဟီၣ်က၀ီၤ စွ့ၤကိသ၀ီတဆီနုာ်လီၤ၀ဲဒၣ်ဆူ(သုးက့ ၁)ဟီၣ်က၀ီၤပူၤဒီးခးတပျုာ်တပျီာ်ကျိဖးဒိၣ်ကျိဖိဆူ(မံပိ)သ၀ီပူၤ တနံၤတနၤညါအဂ့ၢ်န့ၣ်ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးခိၣ်တဂၤပာ်ဂၢၢ်ပာ်ကျၢၤစံး၀ဲန့ၣ်လီၤႉ အ၀ဲစံး၀ဲလၢ“နုာ်လီၤလၢသ၀ီပူၤဟးခးနါစိၤတၢ်လီၤႉတၢ်ခးလိာ်သးကဲထီၣ်ဒီး(KNLA)တအိၣ်စ့ၢ်ကီးဘၣ်ႉမဟါအနုာ်လီၤဒွဲၣ်အူအီၣ်သ၀ီပူၤဟံၣ်တဖျၢၣ်၀ံၤန့ၣ်ပၦၤလဲၤခးအ၀ဲသ့ၣ်ႉပခးနါက့တမ့ၢ်ဖဲဟံၣ်တဖျၢၣ်န့ၣ်အကပၤဘၣ်ႉၦၤလဲၤခးအီၤလၢကၠိကပၤတၢ်ဘၢၣ်စၢၤဖးယံၤညါႉတနံၤအံၤပနၢ်ဟူလၢအ၀ဲသ့ၣ်လဲၤထီၣ်လၢ(ကမၤမိၢ်)တကပၤလံ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါဒံၣ်စ့ဘၢၣ် ၁၂ သီအနံၤန့ၣ််လီၤႉ လၢန့ၣ်အမဲာ်ညါဖဲအပူၤကွံာ်လါနိၣ်၀့ဘၢၣ် ၁၇ သီအနံၤစ့ၢ်ကီး (BGF–၁၀၁၁)သုးရ့ၣ်လၢဘၣ်တီခိၣ်ရိၣ်မဲအီၤလၢ သုးဒ့(၂)သုးဒ့ခိၣ် သုးခိၣ်မီၤည့အံၤစ့ၢ်ကီး ခီဖျိအ၀ဲသ့ၣ်နုာ်လီၤလၢဖၣ်အၣ်ကီၢ်ဆၣ်(မံၣ်ကယ့ၤ)သ၀ီပူၤ ခးနါစိၤတၢ်အဃိ ကမျၢၢ်သံ(၂)ဂၤဒီးဘၣ်ဒိ(၂)ဂၤကဲထီၣ်တ့ၢ်အသးဒံးအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ကညီကူၣ်သ့၀ဲၤကျိၤဆီၣ်ထွဲမၤစၢၤကၠိသရၣ်/မုၣ်တဖၣ်လၢစ့ပယီၤအကကွဲၢ်(၂၀၀၀)ဘျဲၣ်
လါဒံၣ်စ့ဘၢၣ် ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီၢ်ဆၣ်ကိးဘ့ၣ်အပူၤ ကၠိသရၣ်/မုၣ်လၢအသိၣ်လိတၢ်သ့ၣ်တဖၣ် တနံၣ်အံၤ(၂၀၂၂–၂၀၂၃)တၢ်သိၣ်လိနံၣ်အဂီၢ် ကညီကူၣ်သ့ဆဲးလၤ၀ဲၤကျိၤ(KECD)ဆီၣ်ထွဲမၤစၢၤ၀ဲစ့ပယီၤအကကွဲၢ်(၂၀၀၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ကူၣ်သ့၀ဲၤကျိၤၦၤဘၣ်မူဘၣ်ဒါအအိၣ်န့ၣ်လီၤႉ ၀ီၢ်ရ့ၣ်ႇနိၣ်တကီႇကြုၢ်တုဒီးကီးတရံးကီၢ်ဆၣ်ပူၤကညီကူၣ်သ့၀ဲၤကျိၤကၠိဒီးနီၢ်ကစၢ်တၢ်ထဲးဂံၢ်ထဲးဘါကၠိလၢအိၣ်(KECD)တၢ်ပၢဆှၢဖီလာ်တဖၣ်ဒ်သိးကၠိသရၣ်/မုၣ်(၂၅၀၀)ဘျဲၣ်အံၤဆဲးသိၣ်လိတၢ်ကသ့အဂီၢ် ဘၣ်ဆီၣ်ထွဲမၤစၢၤ၀ဲဒ်အံၤလီၤအဂ့ၢ်န့ၣ်ဒူပျာ်ယာ်ကီၢ်ရ့ၣ်ကူၣ်သ့မူဒါခိၣ်ပဒိၣ်မါကန့ၤဒံၤစံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ “ဒ်သိးကၠိဖိမိၢ်ပၢ်အတၢ်၀ံတၢ်ယိးကလီၤစှၤအဂီၢ်ဒီးသရၣ်/မုၣ်သိၣ်လိတၢ်ခါဆူညါကသ့အဂီၢ်န့ၣ်ပဆီၣ်ထွဲမၤစၢၤ၀ဲဒ်န့ၣ်လီၤႉထံရူၢ်ကီၢ်သဲးတၢ်အိၣ်သးအဃိခဲအံၤတၢ်လုၢ်တၢ်ၦ့ၤစ့ၢ်ကီးထီၣ်အဃိပမၤစၢၤအါထီၣ်ဒိၣ်န့ၢ်အပူၤကွံာ်နံၣ်မီၤနီၤႉကူၣ်သ့တၢ်သိၣ်လိမၤဒိးအတၢ်လီၤတူာ်လီၤကၤသုတအိၣ်တဂ့ၤအဂီၢ်န့ၣ်ဒ်တၢ်သ့အိၣ်ၦၤအသိးပကမၤစၢၤမီၤနီၤ” အဂ့ၢ်န့ၣ်ကူၣ်သ့မူဒါခိၣ် ပဒိၣ်မါကန့ၤဒံၤ စံး၀ဲန့ၣ်လီၤႉ တနံၣ်အံၤ(၂၀၂၂–၂၀၂၃)တၢ်သိၣ်လိနံၣ်အဂီၢ် ဒူပျာ်ယာ်ကီၢ်ရ့ၣ်ပူၤကၠိကိးဖျၢၣ်ဒဲးကၠိသရၣ်/မုၣ်အိၣ်၀ဲ(၂၅၀၀)ဘျဲၣ်ဒီး အပူၤကွံာ်တနံၣ်အဂီၢ်န့ၣ်တၢ်ဆီၣ်ထွဲမၤစၢၤ၀ဲလၢစ့ယိၤတဂၤန့ၣ်(၉၀၀၀)ဘးဒီးဘၣ်ဆၣ်တနံၣ်အံၤတၢ်ဆီၣ်ထွဲမၤစၢၤ၀ဲတုၤလၢ(၁၁ႇ၀၀၀)ဘးညါန့ၣ်လီၤႉလၢန့ၣ်အမဲာ်ညါဆီၣ်ထွဲမၤစၢၤဃုာ်၀ဲကၠိတၢ်ပီတၢ်လီတဖၣ်ကိးနံၣ်ဒဲးအဂ့ၢ်န့ၣ်သ့ၣ်ညါဘၣ်လၢကီၢ်ဆၣ်ကိးဘ့ၣ်ဒဲးကညီကူၣ်သ့၀ဲၤကျိၤၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံကၠိလၢအိၣ်တလၢကွံာ်ပဒိၣ်စိၤစုတီၤအဖီလာ်တဖၣ် ကတီၢ်ခဲအံၤအ၀ဲသ့ၣ်အိၣ်ဆၢထၢၣ်ကဒါက့ၤ၀ဲဒ်နီၢ်ကစၢ်တၢ်ထဲးဂံၢ်ထဲးဘါကၠိတဖၣ်အသိးဒီးကၠိတဖၣ်အံၤစ့ၢ်ကီး(KECD)ဆီၣ်ထွဲမၤစၢၤ၀ဲဒီးဆီၣ်ထွဲမၤစၢၤကျိၣ်စ့အါန့ၢ်အပူၤကွံာ်နံၣ်တဖၣ်အဂ့ၢ်န့ၣ် ကူၣ်သ့ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ “မ့မ့ၢ်ကၠိလၢအိၣ်ဆၢထၢၣ်နီၢ်ကစၢ်အခီၣ်တဖၣ်န့ၣ်ဒ်သိးတၢ်သိၣ်လိလဲၤတရံးသးကဘၣ်လီၢ်ဘၣ်ဆးအဂီၢ်န့ၣ်ကီခဲ၀ဲဒိၣ်မးလီၤႉဘၣ်ဒိးသန့ၤထီၣ်သးလၢကၠိဖိမိၢ်ပၢ်ဒီးသ၀ီဖိတဖၣ်အအိၣ်ဒီဒူၣ်ညါလီၤႉ (KECD)ပာ်ပနီၣ်ဆီၣ်ထွဲမၤစၢၤ၀ဲဒ်အံၤအဃိကဲထီၣ်တၢ်တိစၢၤမၤစၢၤဖးဒိၣ်ညါႉကဲထီၣ်စ့ၢ်ကီးတၢ်ဂံၢ်တၢ်ဘါဖးဒိၣ်လၢ၀ဲၤကျိၤၦၤဖိသၣ်ဖိတဖၣ်အဂီၢ်အါမးလီၤ” အဂ့ၢ်န့ၣ်၀ီၢ်ရ့ၣ်ကီၢ်ဆၣ်သရၣ်စီၤလၣ်၀ိလၢသိၣ်လိနီၢ်ကစၢ်တၢ်ထဲးဂံၢ်ထဲးဘါကၠိအံၤစံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဒူပျာ်ယာ်ကီၢ်ရ့ၣ်အပူၤကၠိဒီးနီၢ်ကစၢ်တၢ်ထဲးဂံၢ်ထဲးဘါကၠိလၢသိၣ်လိမၤဒိး၀ဲ(KECD)ကူၣ်သ့န့ၣ်အိၣ်၀ဲခဲလၢာ်အဖျၢၣ်(၃၀၀)ဘျဲၣ်ဒီးကၠိဖိမၤလိတၢ်အနီၣ်ဂံၢ်ခဲလၢာ်အိၣ်၀ဲ(၃၈ႇ၀၀၀)ဘျဲၣ်အဂ့ၢ်န့ၣ် (KECD)ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ ဒ်န့ၣ်အသိးဒူပျာ်ယာ်ကီၢ်ရ့ၣ်(ကီၢ်ဆၣ်)ကိးဘ့ၣ်ဒဲးအပူၤပယီၤသုးခးလီၤကျိဖးဒိၣ်ခဲအံၤခဲအံၤတကးဒံးဘၣ်အမဲာ်ညါနုာ်လီၤမၤ၀ဲတၢ်ထီၣ်ဒုးလၢသ၀ီပူၤအဃိကၠိတဖၣ်အါဒၣ်တက့ၢ်န့ၣ်တၢ်ကီတၢ်ခဲအိၣ်လၢကလဲၤတရံးသးဒီးခီဖျိခံခီခံကပၤတၢ်ဒုးကဲထီၣ်အဃိကၠိတနီၤဘၣ်သုးလီၢ်လဲၤမၤလိက့ၤတၢ်လၢကစၢၢ်ကလိကျါၦၢ်ပူၤဒီးလ့ပူၤအဂ့ၢ်န့ၣ်သ့ၣ်ညါဘၣ်လၢကၠိသရၣ်/မုၣ်အအိၣ်န့ၣ်လီၤႉ
ပယီၤသုးခးလီၤကျိဖးဒိၣ်အဃိ တီၤကၠၤအ့ဒီးလီကဲၤသ၀ီဟံၣ်ဟးဂီၤ ၆ ဖျၢၣ်
လါဒံၣ်စ့ဘၢၣ် ၁၃ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤအပူၤ ဖဲလါဒံၣ်စ့ဘၢၣ် ၁၁ သီ ဟါခီ(၈)နၣ်ရံၣ်ဘျဲၣ်အဆၢကတီၢ်န့ၣ် ကီးတရံး ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(၁၂)စုတီၤဖီလာ် လဲၤ၀ၣ်ကျိဖးဒိၣ်သုးခးလီၤကျိဖးဒိၣ်(၁၂၀ မမ)ဆူတီၤကၠၤအ့ဒီးလီကဲၤသ၀ီပူၤအဃိ ဟံၣ်ဟးဂီၤ၀ဲ(၆)ဖျၢၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်လၢသ၀ီပူၤအဃိမ့ၣ်အူအီၣ်တီၤကၠၤအ့သ၀ီပူၤကမျၢၢ်အဟံၣ်(၂)ဖျၢၣ်အသိး လီကဲၤသ၀ီကမျၢၢ်အဟံၣ်ဟးဂီၤ၀ဲ(၄)ဖျၢၣ်စ့ၢ်ကီးအဂ့ၢ်န့ၣ်လီကဲၤသ၀ီဖိတဂၤစံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “ကီးတရံး(စကခ–၁၂) စုတီၤဖီလာ်လဲၤ၀ၣ်ကျိဖးဒိၣ်လူၢ်ခးလီၤ၀ဲမီၤနီၤႉ ပယီၤသုးလၢအိၣ်တီၤကၠၤအ့ တိၤခိၣ်ထိး(တီၤထီကၠိ) အံၤဒီး (BGF)အိၣ်ခိးတိၤတၢ်ဘံၣ်တၢ်ဘၢတဖၣ်အံၤစ့ၢ်ကီးခလီၤ(မီထး)ကျိဖးဒိၣ်အဃိ မ့ၣ်အူအီၣ်ဟံၣ် ၂ ဖျၢၣ်ႉလၢလီကဲၤသ၀ီတကပၤနါက့ဟံၣ်ဟးဂီၤ၀ဲ (၄) ဖျၢၣ်ညါ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကတီၢ်ခဲအံၤခီဖျိသ၀ီဖိတဖၣ်က့ၤနုာ်လီၤလၢသ၀ီပူၤတဘူၣ်ဒံးဘၣ်အဃိတၢ်ဘၣ်ဒိဘၣ်ထံးဟးဂူာ်ဟးဂီၤတၢ်အိၣ်သးခီန့ၣ်တသ့ၣ်ညါလီၤတံၢ်လီၤဆဲးဒံးဘၣ်ဆၣ်မ့ၢ်လၢသ၀ီဖိတဖၣ်ဟးစံၣ်မှံဟးဖျိးအဃိကမျၢၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ စးထီၣ်ဖဲတလါအံၤလါဒံၣ်စ့ဘၢၣ်န့ၣ်ပယီၤသုးခးလီၤကျိဖးဒိၣ်ဆူကီးတရံးဒူသ၀ီတဖၣ်အပူၤကိးမုၢ်နၤဒဲးအဃိ မ့ၣ်အူအီၣ်ဟးဂီၤလီၢ်က၀ီၤကမျၢၢ်အဟံၣ်အဃီဟဲအါထီၣ်၀ဲအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ လၢန့ၣ်အမဲာ်ညါခီဖျိပယီၤသုးကျိၤဟူးဂဲၤဟးဆှၣ်တၢ်လၢမီမးႇသ၀ီသီ(တီၤကၠၤအ့)ႇလီကဲၤႇ၀့ကကၠ့သ၀ီတကပၤအဃိလၢခူၤနံၤႇဖါကၠၣ်ႇသမ့ၤဒိၣ်ကျဲတဆီလီၢ်က၀ီၤသ၀ီဖိတဖၣ်လဲၤစံၣ်အိၣ်၀ဲဆူ(ကါမယဲၣ်)သ၀ီႇကြုၢ်တုႇငါတဲၤႇကိတဲၤႇ၀့ၣ်စၤကိသ၀ီတကပၤအဂ့ၢ်န့ၣ်ကမျၢၢ်လၢအဃ့ၢ်ထီၣ်တဖၣ်စံး၀ဲန့ၣ်လီၤႉ ပယီၤသုးဟးဆှၣ်တၢ်တကးဒံးဘၣ်အမဲာ်ညါသုးခိးကီၢ်ဆၢ(BGF)မ့မူၤထီၣ်လၢမုၢ်နၤခီန့ၣ်ဟးခးလီၤနါစိၤကျိဖးဒိၣ်ဒီး ပယီၤသုးကျိဖးဒိၣ်လူၢ်စ့ၢ်ကီးခးလီၤကဒီးကျိးဖးဒိၣ်အဃိလီၢ်က၀ီၤကမျၢၢ်တဖၣ်တမံဘၣ်ဂ့ၤဂ့ၤဘၣ်ဒီးလဲၤဖံးလဲၤမၤတၢ်တသ့၀ဲဘၣ်အဂ့ၢ်န့ၣ် တီၤကၠၤအ့ၦၤဃ့ၢ်တၢ်ဒုးတဂၤစံး၀ဲန့ၣ်လီၤႉ အ၀ဲစံး၀ဲလၢ“လၢမုၢ်နၤခီန့ၣ်ပယီၤသုးတြဲၤဒီး(BGF)တြဲၤတဖၣ်မ့မူၤထီၣ်န့ၣ်ခးပိၢ်ထီၣ်ကျိႉခးလီၤကျိဖးဒိၣ်လၢသ၀ီပူၤႉမ့မၤ၀ဲဒ်န့ၣ်လံန့ၣ်(စကခ–၁၂)ႇကီးတရံး(၉၇)သုးတဖၣ်က့ၤခးလီၤကဒါ(၁၂၀ မမ)ကျိဖးဒိၣ်လၢသ၀ီပူၤမီၤနီၤႉ မုၢ် နၤခီန့ၣ်ပဘၣ်စံၣ်လီၤမံလၢတၢ်ပူၤႉဘၣ်လဲၤစံၣ်မံလၢသီခါဖၠၣ်ဖီလာ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ စးထီၣ်လၢတၢ်ဒုးကဲထီၣ်ဒီးပယီၤသုးန့ၢ်တနံၣ်ဘျဲၣ်ဃၣ်ဃၣ်တုၤလၢခဲအံၤန့ၣ်ကီးတရံးကလံၤထံးလီၢ်က၀ီၤသ၀ီအဖျၢၣ်(၃၀)လီၢ်က၀ီၤကမျၢၢ်ဘၣ်ဃ့ၢ်မှံဟးဖျိး၀ဲအဂၤ(၇၀၀၀)ဃၣ်ဃၣ်ညါဒီးကတီၢ်ခဲအံၤလီၢ်က၀ီၤသ၀ီဖိက့ၤအိၣ်လၢအဟံၣ်အဃီတနီၤလံဘၣ်ဆၣ်မ့မ့ၢ်လၢမုၢ်နၤခီန့ၣ်ဘၣ်ဟးစံၣ်အိၣ်ခူသူၣ်လၢတၢ်ပူၤဖျဲးလီၢ်အဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ ခီဖျိလီၢ်က၀ီၤကမျၢၢ်ဘၣ်ဟးဃ့ၢ်မှံဟးဖျိးဒ်အံၤအဖီခိၣ်တနီၤန့ၣ်ဒိးန့ၢ်ဘၣ်ဆူၣ်ချ့တၢ်အံးထွဲကွၢ်ထွဲဒီးအီၣ်အီအိၣ်ဆိးလီၢ်ကျဲအတၢ်ဆီၣ်ထွဲမၤစၢၤလီၤစှၤ၀ဲအဃိထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ
ကရ့ၣ်နံၣ်ကမျၢၢ်ၦၤဃ့ၢ်မှံဟးဖျိးတဖၣ်လိၣ်ဘၣ်တၢ်အီၣ်တၢ်အီဒီးဆ့ကၤကလၢၤ
လါဒံၣ်စ့ဘၢၣ် ၁၂ သီႇ ၂၀၂၂ နံၣ်ႇ ခ့ၣ်အဲးစံၣ် (ကရ့ၣ်နံၣ်)ကီၢ်စဲၣ်ပူၤခီဖျိတၢ်ဒုးတၢ်ယၤအဃိကမျၢၢ်တဖၣ်ဘၣ်ဃ့ၢ်မှံဟးဖျိး၀ဲဒီးကတီၢ်ခဲအံၤစ့ၢ်ကီး ခီဖျိတၢ်ချံၣ်ဒိၣ်ထီၣ်လံအဃိလိၣ်ဘၣ်၀ဲတၢ်အီၣ်တၢ်အီဒီးဆ့ကၤကလၢၤတဖၣ်အဂ့ၢ်န့ၣ် ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ တၢ်ဒုးကဲထီၣ်အကတီၢ်ကမျၢၢ်ၦၤဃ့ၢ်တၢ်ဒုးဖိလၢအလဲၤစံၣ်အိၣ်ၦၢ်ပူၤကစၢၢ်ကလိကျါႇအဘူးအတံၢ်သ၀ီတဖၣ်အံၤခီဖျိအ၀ဲသ့ၣ်ဘၣ်ဟးသုးလီၢ်သုးကျဲအိၣ်လံလၢလွံၢ်ဘျီယဲၢ်ဘျီလံအဃိတၢ်အီၣ်တၢ်အီတကူတလၢ၀ဲဘၣ်အသိးကတီၢ်ခဲအံၤခီဖျိတၢ်ချံၣ်ဒိၣ်ထီၣ်လံအဃိလိၣ်ဘၣ်၀ဲဆ့ကၤကလၢၤအဂ့ၢ်န့ၣ်သးစၢ်တဂၤလၢမၤစၢၤၦၤဃ့ၢ်မှံဟးဖျိးအံၤစံး၀ဲန့ၣ်လီၤႉ “ကမျၢၢ်တနီၤန့ၣ်ဘၣ်ဟးသုးလီၢ်ခဲအံၤခဲအံၤအဃိဆိမိၣ်၀ဲမ့သံဒီးသံလီၤအဲၣ်ဒိးက့ၤအိၣ်လၢအဟံၣ်လံႉမ့ၤနါက့ဘၣ်အီၣ်သၢဘျီန့ၣ်ဘၣ်ပာ်ဖှိၣ်အီၣ်ခံဘျီဒ်န့ၣ်အိၣ်မီၤနီၤႉမ့ဖှံၣ်မ့ၤဖှိးမ့အိၣ်န့ၣ်အ၀ဲသ့ၣ်လိဃ့ပာ်၀ဲဒီးၦၤမၤဘူၣ်လီၤတၢ်ဖိမ့တဟဲဘၣ်မ့တအီၣ်ဘၣ်မ့ၤဘၣ်န့ၣ်က့ၤချီအီၣ်ကဒါ၀ဲဒီးထံချီဒ်န့ၣ်လီၤႉၦၤမၤဘူၣ်လီၤတၢ်ဖိအိၣ်နါက့(ကရ့ၣ်နံၣ်ကီၢ်စဲၣ်) ဒီတဘ့ၣ်အပူၤၦၤဃ့ၢ်မှံဟးဖျိးအိၣ်လၢအကလီၢ်ညါအဃိမၤဖဲမၤန့ၢ်အသိးလီၤမီၤနီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကးဒံးဘၣ်ဖဲအပူၤကွံာ်လါဒံၣ်စ့ဘၢၣ် ၃ သီအခါစ့ၢ်ကီးလၢကရ့ၣ်နံၣ်ကီၢ်စဲၣ်(ဒံၤမီစိၤကီၢ်ဆၣ်)ဒီကမံသ၀ီပူၤန့ၣ် တၢ်ဒုးကဲထီၣ်၀ဲလၢပယီၤသုးဒီးကရ့ၣ်နံၣ်ဒီကလုာ်ဂၢၤသးကရၢ(KNDF)အဘၢၣ်စၢၤအဃိ ပယီၤသုးခးလီၤကျိဖးဒိၣ်တကးဒံးဘၣ်ကဘီယူၤစ့ၢ်ကီးဟဲခးလီၤတၢ်အဂ့ၢ်န့ၣ်(KNDF)ထုးထီၣ်ပာ်ဖျါ၀ဲဖဲတၢ်တနံၤဃီ၀ဲန့ၣ်လီၤႉ ကမျၢၢ်လၢအဃ့ၢ်တၢ်ဒုးတဂၤစံး၀ဲ“ကမျၢၢ်လၢအိၣ်ဘူးတၢ်ဒုးကဲထီၣ်အလီၢ်ကပိၤကပၤတဖၣ်န့ၣ်ဟးစံၣ်အိၣ်လၢတၢ်လီၢ်ပူၤဖျဲးအလီၢ်လံႉဟးစံၣ်နါက့ယံၤထီၣ်လံအဃိလီၤဘၣ်တၢ်ကီတၢ်ခဲဒိၣ်မးႉအီၣ်အီနါက့တဘၣ်ဂီၢ်ဘၣ်ႉလၢအံၤတကပၤတၢ်ချံၣ်ဒိၣ်မးအဃိဆ့ကၤကလၢၤနါက့လိၣ််စ့ၢ်ကီးလီၤႉလၢ(ဒီပီၤကူ)န့ၣ်ၦၤဃ့ၢ်မှံဟးဖျိးအိၣ်ဒံးႉအ၀ဲသ့ၣ်အိၣ်ဘူးဒီးတၢ်ဒုးကဲထီၣ်အလီၢ်ဘၣ်ဆၣ်မ့ခူၣ်ထံပူၤန့ၣ်ထံထီၣ်အဃိဘၣ်ဂီၢ်ဒီးအိၣ်ဒံး၀ဲဖဲန့ၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကတီၢ်ခဲအံၤလၢ(ဒံၤမီစိၤကီၢ်ဆၣ်)ကိသၤသ၀ီမုၢ်ထီၣ်ဒီးသ့စူၤလဲႇဒီကမံသ၀ီတကပၤန့ၣ်ပယီၤသုးကျိၤနုာ်လီၤဟူးဂဲၤ၀ဲဒီးခီဖျိဒုးယၤတၢ်ဖ့ၣ်စၢႇတၢ်ဒုးကဲထီၣ်အဃိဖဲအပူၤကွံာ်လါဒံၣ်စ့ဘၢၣ် ၃ သီအနံၤန့ၣ် (KNDF)ထုးထီၣ်လံာ်ဃ့ကညးကမျၢၢ်လၢတဘၣ်ဟးထီၣ်က့ၤလီၤလၢသ၀ီခိၣ်သ၀ီဃၢၤဘၣ်ႇတဘၣ်က့ၤအိၣ်လၢသ၀ီပူၤဒံးဘၣ်န့ၣ်လီၤႉ
လၢကလုၢ်ဘၢဒိၣ်စိကီးတရံး–ကၠၤအ့စ့ၣ်ကၠံ–ကၠဲးဒိကျဲအဂီၢ်ပယီၤသုးမၤအါထီၣ်သုးဂံၢ်ဘါ
လါဒံၣ်စ့ဘၢၣ် ၁၂ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ ဒူပျာ်ယာ်ကီၢ်ရ့ၣ်အပူၤ ပယီၤသုးအံၤလၢကလုၢ်ဘၢဒိၣ်စိ၀ဲကီးတရံး–ကၠၤအ့စ့ၣ်ကၠံ–ကၠဲးဒိကျဲအဂီၢ်န့ၣ် မၤအါထီၣ်အသုးဂံၢ်ဘါဒီးခးလီၤကျိဖးဒိၣ်ဆူသ၀ီပူၤကိးမုၢ်နံၤဒဲးအဂ့ၢ်န့ၣ်လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ ပယီၤသုးအံၤလၢကလုၢ်ဘၢဒိၣ်စိ၀ဲကီးတရံး–ကၠဲးဒိကျဲဒီးကီးတရံး–တီၤကၠၤအ့–ကၠၤအ့စ့ၣ်ကၠံ–မူၣ်ဒိၤကျဲအဂီၢ်န့ၣ်တလါအံၤလါဒံၣ်စ့ဘၢၣ်အတီၢ်ပူၤမၤအါထီၣ်အသုးဂံၢ်ဘါကိးမုၢ်နံၤဒဲးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ “ခဲအံၤလၢကီးတရံး–ကၠဲးဒိကျဲ သ၀ီသီႇမီမးႇအီးဖးသ၀ီတကပၤန့ၣ် ပယီၤသုးဟဲနုာ်လီၤဒီး (BGF)သိလ့ၣ်လၢကျဲဒီကဘိလီၤႉလၢမုၢ်နၤခီန့ၣ်ခးလီၤကျိဖးဒိၣ်လၢသ၀ီပူၤႉလၢတီၤကၠၤအ့–ကၠၤအ့စ့ၣ်ကၠံ–မူၣ်ဒိၤသ၀ီကျဲမုၢ်ခိၣ်ကျဲခိၣ်ထိး (BGF)သုးကလၢၤန့ၣ်ပယီၤသုးမၤအါထီၣ်သုးဂံၢ်ဘါႇ ဟးဆှၣ်တၢ်ဒီးသိလ့ၣ်အခိၣ် (၁၀) ညါ” အဂ့ၢ်န့ၣ်ကီးတရံးလီၢ်က၀ီၤဖိတဂၤစံး၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ်လီၢ်ခံကတၢၢ်တနွံအခါ ခီဖျိမၠၣ်၀တံၣ်–ဂီၤလ့ၤကျဲဒီးသ့ၣ်ဘီဘိသုးကလၢၤအံၤ ခးလီၤကျိဖးဒိၣ်ႇကဘီယူၤစ့ၢ်ကီးဟဲခးလီၤတၢ်အဃိကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အံၤဘၣ်သုးလီၢ်သုးကျဲဒီးဒ်သိးပယီၤသုးအံၤနုာ်လီၤမၤတၢ်ထီၣ်ဒုးလၢကီးတရံး–ကၠဲးဒိကျဲဒီး ကီးတရံး–ကၠၤအ့စ့ၣ်ကၠံ–မူၣ်ဒိၤကျဲကန့ၢ်အဂီၢ်မၤအါထီၣ်အသုးဂံၢ်ဘါဒ်အံၤလီၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤႉ ခီဖျိပယီၤသုးမၤအါထီၣ်သုးဂံၢ်ဘါအဃိလီၢ်က၀ီၤသ၀ီဖိတဖၣ်ဘၣ်ဟးစံၣ်ပလဲာ်သးလၢတၢ်လီၢ်အဂၤဒီး တုၤလၢခဲအံၤလီၢ်က၀ီၤကမျၢၢ်တဖၣ်ဘၣ်ဟးစံၣ်အိၣ်ခူသူၣ်ဒံး၀ဲအဖၢမုၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖါကၠၣ်သ၀ီဖိတဂၤစံး၀ဲ“ကရူၢ်လၢအိၣ်ကီးတရံးပူၤတဖၣ်ပယီၤသုးခးလီၤ၀ဲဒီးကျိဖးဒိၣ်ႉ ကညီကရူၢ်တကပၤနါက့က့ၤခးလီၤကဒါ၀ဲဒီး(ဒြိ)ႉကညီကရူၢ်မၤ၀ဲဒ်န့ၣ်ပယီၤသုးဘၣ်ဒိအါအဃိပယီၤသုးက့ၤခးလီၤကဒါကျိဖးဒိၣ်လၢသ၀ီပူၤႉခဲအံၤပဘၣ်ဟးစံၣ်ပလဲာ်သးႉမ့ၢ်အ၀ဲသ့ၣ်ကခးလီၤတၢ်လၢမုၢ်နၤခီဧါႇမုၢ်ဆါခီဧါပတသ့ၣ်ညါဘၣ်မီၤနီၤ”အဂ့ၢ်န့ၣ်စံး၀ဲန့ၣ်လီၤႉ ကီးတရံးကလံၤဟီၣ်က၀ီၤအပူၤခီဖျိခံခီခံကပၤဒုးယၤတၢ်ဖ့ၣ်စၢအိၣ်ထီၣ်အဖီခိၣ်လၢဒူသ၀ီအဖျၢၣ်(၃၀)ဘျဲၣ်အပူၤပယီၤသုးဒီး(BGF)သုးပာ်ဖှိၣ်မၤအါထီၣ်သုးဂံၢ်ဘါအဃိလီၢ်က၀ီၤကမျၢၢ်ဘၣ်ဃ့ၢ်မှံဟးဖျိးအိၣ်အဂၤ(၅၀၀၀)ဘျဲၣ်လံအဂ့ၢ်န့ၣ်သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးအအိၣ်န့ၣ်လီၤႉ
တၢ်စူၤတဘၣ်ဆၢဘၣ်ကတီၢ်ဘၣ်အဃိတၢ်ကြဲၢ်ကီၢ်ဆၣ်ပူၤဘုတဖၣ်ဟးဂီၤ
လါဒံၣ်စ့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်အပူၤ စှၤသီအတီၢ်ပူၤအံၤ ခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိဘုတဖၣ်ဟးဂီၤ၀ဲဒီးတနံၣ်အံၤဘုဟးထီၣ်ကလီၤစှၤ၀ဲအဂ့ၢ်န့ၣ် ၦၤမၤအီၣ်စံာ်ဖိတဖၣ်စံး၀ဲန့ၣ်လီၤႉ တၢ်ကြဲၢ်ကီၢ်ဆၣ်အပူၤလီၢ်က၀ီၤကမျၢၢ်တဖၣ်အခိၣ်သ့ၣ်န့ၣ်ဖံးအီၣ်မၤအီၣ်သူၣ်အီၣ်ဖျးအီၣ်၀ဲဘုဒီး ဒ်သိးဘုဟးထီၣ်ကအါအဂီၢ်န့ၣ်သူၣ်၀ဲတၢ်စူၤဘုတဖၣ်ဘၣ်ဆၣ်ခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိ ဘုဟးဂီၤဆှူ၀ဲအါမးအဂ့ၢ်န့ၣ် ၦၤမၤအီၣ်စံာ်ဖိတဖၣ်စံး၀ဲန့ၣ်လီၤႉ တၢ်ကြဲၢ်ကီၢ်ဆၣ်(တၤကယါ)သ၀ီ ၦၤမၤအီၣ်စံာ်ဖိ ကၠီၣ်မၠိ စံး၀ဲ“တနံၣ်အံၤပဆိမိၣ်လၢဘုကဟးထီၣ်အါမီၤနီၤႉ တၢ်ဆၢကတီၢ်ဘၣ်လၢပကဘၣ်ကူူးဘုဘျီမူခိၣ်စူၤလီၤႉမ့မ့ၢ်ယစံာ်န့ၣ်ဘၣ်ဖဲပကူးအီၤ၀ံၤပပာ်ပူထီၣ်အီၤအခါလီၤႉဘုတနီၤန့ၣ်က့ၤမဲထီၣ်ကဒါအိၣ်ႉဘုနါက့အချံလီၤဆှူကွံာ်ခဲလၢာ်လီၤႉဘုဟးဂီၤဒီဒူၣ်ညါႉၦၤမၤအီၣ်စံာ်ဖိကိးဂၤဒဲးန့ၣ်တဲ၀ဲလၢအတဆိမိၣ်လၢမူခိၣ်ကစူၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ကြဲၢ်ကီၢ်ဆၣ်အပူၤလီၢ်က၀ီၤကမျၢၢ်တဖၣ်(၇၅)မျးကယၤန့ၣ်သူၣ်အီၣ်ဖျးအီၣ်၀ဲဘုဒီးတနံၣ်အံၤခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိစံာ်ဟးဂီၤ၀ဲ(အအ့ကၢၣ်)အါမးဒီးတနံၣ်အံၤဘုဟးထီၣ်ကလီၤစှၤ၀ဲအဂ့ၢ်န့ၣ် လီၢ်က၀ီၤပူၤၦၤမၤအီၣ်စံာ်ဖိတဖၣ်စံး၀ဲန့ၣ်လီၤႉ “တနံၣ်အံၤတၢ်ကြဲၢ်ကီၢ်ဆၣ်ဒီတဘ့ၣ်န့ၣ်ဘုဟးဂီၤအါမးလီၤႉၦၤတနီၤန့ၣ်မ့ၢ်လၢအဘုစှၤအဃိအ၀ဲသ့ၣ်ပာ်ဖှိၣ်၀ဲချုးဒံးမီၤနီၤႉမ့မ့ၢ်ပ၀ဲဒၣ်ခီန့ၣ်ပဘုကအိၣ်အအ့ကၢၣ် (၂၀) ညါႉပထၢဖှိၣ်ပာ်ဖှိၣ်တချုးဘၣ်ႉလၢမုၢ်ထူၣ်မူခိၣ်စူၤတစဲးလၢမုၢ်နၤခီန့ၣ်တၢ်စူၤအါအဃိပပာ်ဖှိၣ်ပဘုတချုးလၢၤဘၣ်မီၤနီၤ”အဂ့ၢ်န့ၣ် ၦၤမၤစံာ်ဖိ အူစဲၤမ့ စ့ၢ်ကီးစံးဘၣ် ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိတၢ်ကြဲၢ်ကီၢ်ဆၣ်လီၢ်က၀ီၤဒူသ၀ီကမျၢၢ်သဂၢၢ်ဘၣ်၀ဲဘုဟးဂီၤဆှူ၀ဲအါအါဂီၢ်ဂီၢ်ဒ်အံၤတနံၣ်အံၤမ့ၢ်၀ဲအဆိကတၢၢ်တဘျီန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံခီဖျိဒုးယၤတၢ်သဘံၣ်သဘုၣ်ဟဲအိၣ်ထီၣ်အဃိ ကညီကီၢ်စဲၣ်ပူၤၦၤမၤအီၣ်စံာ်ဖိတဖၣ်ထုးဖှိၣ်ပာ်ဖှိၣ်အဘုတချုး၀ဲဘၣ်ဒီးခီဖျိတၢ်စူၤတဘၣ်ဆၢဘၣ်ကတီၢ်ဘၣ်အဃိတကူးဘၣ်စ့ၢ်ကီး၀ဲဘုႇဘုဟးဂီၤ၀ဲဒီးတနံၣ်အံၤဘုဟးထီၣ်ကလီၤစှၤ၀ဲအါမးအဂ့ၢ်န့ၣ် ၦၤမၤအီၣ်စံာ်ဖိတဖၣ်စံး၀ဲန့ၣ် လီၤႉ
(သုးက့ ၅) ဟီၣ်က၀ီၤတသီအတီၢ်ပူၤသုးမီၤစိရိၤကဘီယူၤဟဲခးလီၤတၢ်လၢတၢ်လီၢ် (၂) တီၤ
လါဒံၣ်စ့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲလါဒံၣ်စ့ဘၢၣ် ၇ သီ တနံၤဃီအတီၢ်ပူၤန့ၣ်သုးမီၤစိရိၤကဘီယူၤဟဲခးလီၤတၢ်လၢတၢ်လီၢ်(၂)တီၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဖဲလါဒံၣ်စ့ဘၢၣ် ၇ သီ ဂီၤခီ ၄း၂၅ မံးနံးအဆၢကတီၢ်န့ၣ် သုးမိၤစိရိၤကဘီယူၤကၠဲး(၂)ဘ့ၣ် ဟဲတ့ၢ်လီၤမ့ၣ်ပိၢ်လၢလူၤသီကီၢ်ဆၣ်(ပ့က့သ၀ီကရူၢ်)ဒ့ၣ်ဘူးနိၣ်သ၀ီပူၤတကးဒံးဘၣ်ဖဲ ၄း၃၀ မံးနံး အဆၢကတီၢ်စ့ၢ်ကီး ဟဲတ့ၢ်လီၤကဒီးမ့ၣ်ပိၢ်လၢ(ဘုသိၣ်ကီၢ်ဆၣ်)ခီပူးသ၀ီကရူၢ် ဖီထၣ်သ၀ီဃၢၤအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်ထုးထီၣ်ပာ်ဖျါ၀ဲန့ၣ်လီၤႉ သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဘျီ၀ဲအံၤကမျၢၢ်သံဘၣ်ဒိဘၣ်ထံးတအိၣ်၀ဲဘၣ်ဆၣ် ကမျၢၢ်အတၢ်ဖံးအီၣ်မၤအီၣ်လီၢ်ကျဲဟးဂီၤ၀ဲတနီၤအသိးဆၣ်ဖိကီၢ်ဖိလၢအိၣ်သ၀ီပူၤတဖၣ်ဘၣ်ဒိဘၣ်ထံး၀ဲအါမးအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ်တလါအတီၢ်ပူၤန့ၣ်လၢခ့ၣ်အဲၣ်ယူၣ်ကီၢ်သူလ့ၤတၢ်ပၢဟီၣ်က၀ီၤသုးက့(၆)ဘ့ၣ်အပူၤ သုးမီၤစိရိၤကဘီယူၤဟဲခးလီၤတၢ်အိၣ်၀ဲ(၅၆)ဘျီညါအဂ့ၢ်န့ၣ် ခ့ၣ်အဲၣ်ယူၣ်တလါတဘျီလံာ်တၢ်ပာ်ဖျါစရီပူၤအသိး သ့ၣ်ညါဘၣ်န့ၣ်လီၤႉ သုးမီၤစိရိၤကဘီယူၤဟဲခးလီၤတၢ်လၢလီၢ်က၀ီၤကမျၢၢ်ဒူသ၀ီတၢ်မၤအီၣ်လီၢ်ကျဲတကးဒံးဘၣ်အမဲာ်ညါခီဖျိအ၀ဲသ့ၣ်ခးတပျုာ်တပျီာ်ကျိဖးဒိၣ်အဃိလီၢ်က၀ီၤကမျၢၢ်သံ(၁၂)ဂၤဒီးဘၣ်ဒိ၀ဲ(၂၈)ဂၤန့ၣ်လီၤႉလၢန့ၣ်အမဲာ်ညါဟံၣ်ဟးဂီၤ၀ဲ(၈၁)ဖျၢၣ်ဒီးဖဲန့ၣ်အကျါပယီၤသုးဒွဲၣ်အူအီၣ်၀ဲ(၃၇)ဖျၢၣ်အဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၆ သီ ဂီၤခီအဆၢကတီၢ်စ့ၢ်ကီး သံရိၤထၣ်ပယီၤသုးကလၢၤတဖျၢၣ်လၢအိၣ်ခ့ၣ်အဲၣ်ယူၣ် (သုးက့ ၅)ဟီၣ်က၀ီၤဃိၣ်လိာ်ကျိကၢၢ်ခိၣ်အံၤ ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ ကညီဒီကလုာ်ဂၢၤသးကရၢ(KNDO)သုးပာ်ဖှိၣ်ထီၣ်မၤန့ၢ်၀ဲ၀ံၤဒီးတနံၤန့ၣ်သုးမီၤစိရိၤကဘီယူၤဟဲတ့ၢ်လီၤ မ့ၣ်ပိၢ်ဒ်အံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
မ့ၣ်ပိၢ်ပိၢ်ဖးထီၣ်၀ံၤအလီၢ်ခံပယီၤသုးအိၣ်ခိးသမံသမိးတၢ်ဃံးဒိၣ်ထီၣ်လၢဒ၀ဲၢ်၀့ၢ်ကျဲနုာ်လီၤ
လါဒံၣ်စ့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ်အပူၤ ဖဲအပူၤကွံာ်လါဒံၣ်စ့ဘၢၣ် ၄ သီ မုၢ်နၤခီအဆၢကတီၢ် မ့ၣ်ပိၢ်ပိၢ်ဖးထီၣ်လၢ ဒ၀ဲၢ်၀့ၢ်ကျဲနုာ်လီၤ(ကမၠီက့)တိၤကဲထီၣ်သး၀ံၤအလီၢ်ခံပယီၤသုးဆီလီၤတၢ်ဘံၣ်တၢ်ဘၢဃံးဃီၣ်ဒီၣ်ဒီးအိၣ်ခိးသမံသမိးၦၤဟးထီၣ်က့ၤလီၤလၢတိၤဖီခိၣ်တဖၣ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၄ သီ မုၢ်နၤခီအဆၢကတီၢ်န့ၣ် မ့ၣ်ပိၢ်ပိၢ်ဖးထီၣ်လၢဒ၀ဲၢ်၀့ၢ်ကျဲနုာ်လီၤ(ကမၠီက့)တိၤ ဖီခိၣ်အသိး တၢ်နုာ်လီၤခး(မီမကၤ)ပၢၤကီၢ်၀ဲၤလီၢ်ကဲထီၣ်သး၀ံၤအလီၢ်ခံ ပယီၤသုးဆီလီၤတၢ်ဘံၣ်တၢ်ဘၢဃံးဃီၣ်ဒီၣ်လၢတိၤအခိၣ်အဃၢၤဒီးသမံသမိး၀ဲပၢၢ်တုၤလၢကမျၢၢ်အသိလ့ၣ်ယီၢ်ဒၢပူၤညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကမျၢၢ်အိၣ်၀့ၢ်ပူၤတဂၤစံး၀ဲ“ကဘၣ်မ့ၢ်လၢအ၀ဲတနံၤန့ၣ်တၢ်ကဲထီၣ်သးဖဲ(မီမကၤ)န့ၣ်အဃိအ၀ဲသ့ၣ်အသမံသမိးတၢ်ဒ်အံၤလီၤႉမ့၀ံၤမ့ၣ်ပိၢ်နါက့ပိၢ်ထီၣ်ဒံးမီၤနီၤႉဖဲ(ကမၠီက့)တိၤန့ၣ်ၦၤတအိၣ်ခိးသမံသမိးတၢ်ဖးယံၤလံႉပယီၤသုးတဖၣ်အံၤသမံသမိးတၢ်ပၢၢ်တုၤလၢသိလ့ၣ်ယီၢ်အဒၢပူၤညါႉလၢညါန့ၣ်သမံသမိး၀ဲထဲသိလ့ၣ်အလံာ်လဲၢ်လီၤႉအ၀ဲသ့ၣ်မ့လိၣ်ဘၣ်စ့န့ၣ်အဲၣ်ဒိးမၤကီမၤခဲနၤတစဲးဒ်န့ၣ်လီၤႉခဲအံၤပာ်လီၤတၢ်ဘံၣ်တၢ်ဘၢဖးဃံးညါ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးသမံသမိးတၢ်အခဲအံၤအခိၣ်သ့ၣ်န့ၣ်သမံသမိး၀ဲၦၤသူၣ်ဘီၣ်သးစၢ်တဖၣ်လီၤဒီးတကးဒံးဘၣ်ဖဲအ၀ဲသ့ၣ်သမံသမိးတၢ်အခါန့ၣ်ထိၣ်သတြီၤ၀ဲလၢတၢ်ဂီၤတဘ့ၣ်ဒီးၦၤလၢအကွၢ်၀ဲလီၤဆီသ့ၣ်တဖၣ်န့ၣ်က့ၤကိးသမံသမိး၀ဲလၢတြဲၤအဂ့ၢ်န့ၣ် ကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ တကးဒံးဘၣ်လၢန့ၣ်အမဲာ်ညါခီဖျိပယီၤသုးအိၣ်ခိးသမံသမိးတၢ်အဃိ(ကမၠီက့)တိၤအခိၣ်အဃၢၤန့ၣ် သိလ့ၣ်ႇသိလ့ၣ်ယီၢ်တဖၣ်အိၣ်ကတာ်ထီသးလၢကျဲပူၤဒီးတၢ်လဲၤတၢ််က့ၤစ့ၢ်ကီးယံၤထီၣ်နီၢ်ထီၣ်၀ဲအဂ့ၢ်န့ၣ် ကမျၢၢ်လၢအဟးထီၣ်က့ၤလီၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“အ၀ဲသ့ၣ်အခိၣ်သ့ၣ်န့ၣ်သမံသမိး၀ဲၦၤသူၣ်ဘီၣ်သးစၢ်တဖၣ်လီၤမီၤနီၤႉမ့ၢ်အမ့ၢ်(PDF)ဧါႇမ့၀ံၤထိၣ်သတြီၤ၀ဲဒီးတၢ်ဂီၤတဘ့ၣ်ႉမ့ၢ်မနုၤတၢ်ဂီၤလဲၣ်ဒုတသ့ၣ်ညါဘၣ်ႉအ၀ဲသ့ၣ်မ့အိၣ်ခိးသမံသမိးတၢ်ဒ်န့ၣ်လံန့ၣ်နနီသိလ့ၣ်ယီၢ်လၢတိၤလိၤတန့ၢ်လၢၤဘၣ်နဘၣ်စံၣ်လီၤဆီၣ်က့ၤအီၤလီၤႉအ၀ဲသ့ၣ်ကွၢ်နၤမ့လီၤဆီန့ၣ်က့ၤကိးသမံသမိးနၤလၢတြဲၤလီၤမီၤနီၤ”အဂ့ၢ်န့ၣ်စံး၀ဲန့ၣ်လီၤႉ ဖဲမ့ၣ်ပိၢ်ပိၢ်ဖးထီၣ်ကဲထီၣ်သးဖဲ(ကမၠီက့)တိၤအခါန့ၣ်ဘၣ်ဒိ၀ဲပိာ်မုၣ်(၂)ဂၤဒီးတၢ်နုာ်လီၤခး(မီမကၤ)ပၢၤကီၢ်၀ဲၤလီၢ်အခါစ့ၢ်ကီးပယီၤသုးသံဘၣ်ဒိဘၣ်ထံးတစှၤန့ၢ်(၃)ဂၤညါဘၣ်အဂ့ၢ်န့ၣ်လီၢ်က၀ီၤဂံၢ်ခီၣ်ထံးတၢ်ကစီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
တၢ်ဟုၣ်သိလ့ၣ်ႇသိလ့ၣ်ယီၢ်ကဲထီၣ်သးဟဲအါထီၣ်လၢဖၣ်အၣ်ဒီးမၠၣ်၀တံၣ်၀့ၢ်ပူၤ
လါဒံၣ်စ့ဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ် သုးဟံးန့ၢ်တၢ်စိတၢ်ကမီၤန့ၢ်တနံၣ်ဘျဲၣ်အတီၢ်ပူၤ လၢကညီကီၢ်စဲၣ် ဖၣ်အၣ်၀့ၢ်ဒီးကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်၀တံၣ်၀့ၢ်ပူၤန့ၣ်တၢ်ဟုၣ်သိလ့ၣ်ႇသိလ့ၣ်ယီၢ်(ဆဲးကဲး)ကဲထီၣ်သးဟဲအါထီၣ်၀ဲကိးမုၢ်နံၤမုၢ်နၤအဂ့ၢ်န့ၣ် လီၢ်က၀ီၤကမျၢၢ်လၢအသိလ့ၣ်ႇသိလ့ၣ်ယီၢ်လီၤမၢ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖၣ်အၣ်လီၢ်က၀ီၤကမျၢၢ်လၢအသိလ့ၣ်ယီၢ်လီၤမၢ်တဂၤစံး၀ဲ“၀့ၢ်ပူၤအံၤက၀ီၤဒ့ၦၤဟ့ၣ်တၢ်ကစီၣ်ဖိႇတၢ်မဲာ်ချံႇပယီၤသုးဒီးဖီၣ်စုက၀ဲၤကရူၢ်ကရၢဆီလီၤတြဲၤအိၣ်ခိးသမံသမိးတၢ်လၢ၀့ၢ်ပူၤကျဲနုာ်လီၤဟးထီၣ်ႇကျဲမုၢ်ခိၣ်ႇကျဲဖးဒ့တၢ်လီၢ်သကုၤဆးဒးအဃိကြၢးလၢၦၤဖီၣ်ၦၤဟုၣ်တၢ်ဖိန့ၢ်မီၤနီၤႉခဲအံၤၦၤသိလ့ၣ်လီၤမၢ်ႇၦၤဆဲးကဲးလီၤမၢ်လၢက၀ီၤဒ့ပူၤကဲထီၣ်သးကိးမုၢ်နံၤဒဲးလီၤႉဖၣ်အၣ်၀့ၢ်ပူၤအံၤပတနၢ်ဟူလၢၦၤဖီၣ်ချုးၦၤဟုၣ်တၢ်ဖိဒံးဘၣ်”အဂ့ၢ်န့ၣ်စံး၀ဲန့ၣ်လီၤႉ လၢဖၣ်အၣ်၀့ၢ်ဃိၣ်လိာ်ကျိတိၤတၢ်သမံသမိးလီၢ်ႇစၤသပၠ့ၤတိၤႇအ့ၤဒူၣ်တိတြဲၤႇတီၤကလ့တိတြဲၤႇဖၠၣ်စိမိၤကၠိႇနီၤလိၤကစၢၢ်ကဆူးႇကျဲဖးဒ့တၢ်လီၢ်သ့ၣ်တဖၣ်န့ၣ်တၢ်အိၣ်ခိးသမံသမိးလီၢ်က၀ီၤကမျၢၢ်လၢအဟးထီၣ်က့ၤလီၤတဖၣ်ဟဲအါထီၣ်၀ဲအသိးတၢ်ထီထီၣ်စ့ၢ်ကီး(CCTV)တၢ်ဂီၤဒၢလၢ၀့ၢ်ပူၤၦၤအါအလီၢ်သ့ၣ်တဖၣ်အိၣ်၀ဲဘၣ်ဆၣ် တၢ်ဖီၣ်ချုးၦၤဟုၣ်တၢ်ဖိ တအိၣ်ဒံး၀ဲဘၣ်အဂ့ၢ်န့ၣ်ၦၤလၢအသိလ့ၣ်ႇသိလ့ၣ်ယီၢ်လီၤမၢ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ “ခဲအံၤအ၀ဲသ့ၣ်သမံသမိးကမျၢၢ်အသိလ့ၣ်ႇသိလ့ၣ်ယီၢ်ႇလီတဲစိကိးမုၢ်နံၤမုၢ်နၤလီၤႉအသမံသမိးလံာ်လဲၢ်ခီန့ၣ်အဲၣ်ဒိးမၤအီၣ်စ့လၢကမျၢၢ်အအိၣ်မီၤနီၤႉလၢကဖီၣ်စၢၤၦၤဟုၣ်တၢ်ဖိခီန့ၣ်မၤ၀ဲတကဲလၢၤဘၣ်ႉပမ့ၢ်တလီၤတံၢ်လီၤဆဲးဘၣ်ဒုပကစၢ်လီၤဘၣ်တူၢ်” အဂ့ၢ်န့ၣ်ဖၣ်အၣ်လီၢ်က၀ီၤဖိလၢအသိလ့ၣ်ယီၢ်လီၤမၢ်တဂၤစံးအါထီၣ်၀ဲန့ၣ်လီၤႉ ဒ်န့ၣ်အသိးလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢမၠၣ်၀တံၣ်၀့ၢ်တကပၤစ့ၢ်ကီး ပယီၤသုးဒီး(BGF)ပာ်လီၤတၢ်ဘံၣ်တၢ်ဘၢ အိၣ်ခိးသမံသမိးတၢ်လၢ၀့ၢ်ပူၤကျဲနုာ်လီၤ(သ့ၣ်ကါညံၣ်နီၣ်)တၢ်သမံသမိးတြဲၤႇတၢ်ကူၣ်လဲၤမၤကၤလီၢ်တြဲၤႇ(၂၇၅)ပယီၤသုးတြဲၤႇသၤတတါတြဲၤႇကၠၤခ့တြဲၤႇကၠီၣ်လိကၠံတြဲၤတၢ်လီၢ်တဖၣ်အိၣ်၀ဲဘၣ်ဆၣ်သိလ့ၣ်ႇသိလ့ၣ်ယီၢ်လီၤမၢ်ကဲထီၣ်သးကိးမုၢ်နံၤဒဲးအဂ့ၢ်န့ၣ်မၠၣ်၀တံၣ်၀့ၢ်ကမျၢၢ်လၢအသိလ့ၣ်လီၤမၢ်တဂၤစ့ၢ်ကီးစံး၀ဲဒ်အံၤန့ၣ်လီၤႉ “ဖဲအပူၤကွံာ်တလါအခါန့ၣ်ၦၤဟုၣ်ယသိလ့ၣ်ႉယပာ်ဖဲယဟံၣ်မဲာ်ညါလီၤႉယက့ၤကွၢ်လီၤလၢ (CCTV)ပူၤန့ၣ်ၦၤဟုၣ်တၢ်ဖိဟဲဒိးဒီးသိလ့ၣ်တခိၣ်မၤဟးဂီၤကွံာ်ယတြဲၤ၀ံၤနီထီၣ််၀ဲယသိလ့ၣ်လီၤႉယဃ့တၢ်မၤစၢၤလၢယသကိးအိၣ်ဒီးယလဲၤလီၤဃုတုၤလၢ(သထူၣ်)၀့ၢ်ပူၤညါႉတထံၣ်ၦၤဟုၣ်တၢ်ဖိဘၣ်ႇသိလ့ၣ်နါက့တက့ၤထံၣ်ကဒါလၢၤဘၣ်ႉဟးဃုတုၤလၢ(ကၣ်စံၣ်နိၣ်)ႇတၢ်လိာ်ကွဲ(က့မ်) လီၢ်ႇတၢ်ပီၣ်လီၤလီၢ်နါက့ယတထံၣ်ဘၣ်” အဂ့ၢ်န့ၣ်ၦၤလၢအသိလ့ၣ်လီၤမၢ်အံၤစံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံလၢ(ကညီကီၢ်စဲၣ်)၀့ၢ်ပူၤႇဟီၣ်က၀ီၤဒူသ၀ီတၢ်လီၢ်ကိးတီၤဒဲးဃၣ်ဃၣ်အပူၤန့ၣ် ပယီၤသုးႇသုခိးကီၢ်ဆၢ(BGF)ဒီး(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲဒၣ်လၢတၢ်လီၢ်သကုၤဆးဒးန့ၣ်လီၤႉ
ခံခီခံကပၤတၢ်ဒုးကဲထီၣ်၀ံၤ(BGF)ကးတံၢ်ကွံာ်ဖၣ်ပူၣ်–ကမၤမိၢ်ကျဲ
လါဒံၣ်စ့ဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်ပူၣ်–ကမၤမိၢ်ကျဲဒီတဘိန့ၣ် ဖဲမဟါလါဒံၣ်စ့ဘၢၣ် ၆ သီ ဂီၤခီအဆၢကတီၢ် တၢ်ဒုးကဲထီၣ်၀ဲလၢသုးခိးကီၢ်ဆၢ(BGF)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤအဂ့ၢ်န့ၣ် လီၢ်က၀ီၤကမျၢၢ်လၢအိၣ်ဘူးဖဲန့ၣ်သ့ၣ်တဖၣ်စံး၀ဲန့ၣ်လီၤႉ လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤ ဖၣ်ပူၣ်–ကမၤမိၢ်ကျဲန့ၣ် ဖဲမဟါ(၅)နၣ်ရံၣ်ဘျဲၣ်အဆၢကတီၢ်တၢ်ဒုးကဲထီၣ်၀ဲလၢ(BGF)ဒီး(KNLA)အဘၢၣ်စၢၤကအိၣ်တခီနၣ်ရံၣ်၀ံၤအလီၢ်ခံ(BGF)ကးတံၢ်ကွံာ်၀ဲကျဲအံၤလီၤအဂ့ၢ်န့ၣ်လီၢ်က၀ီၤကမျၢၢ်လၢအိၣ်ဘူးဖဲန့ၣ်တဂၤစံး၀ဲဒ်အံၤန့ၣ်လီၤႉ “တဂီၤအံၤကဘၣ်ဖဲ (၅) နၣ်ရံၣ်ဘျဲၣ်အခါန့ၣ်တၢ်ခးလိာ်သးကဲထီၣ်ဖဲကမၤမိၢ်ကျဲမီၤနီၤႉကဲထီၣ်ခီန့ၣ် (BGF) ဒီး (KNLA)ခးလိာ်သးမီၤနီၤႉပနၢ်ဟူကျိသီၣ်န့ၣ်ကအိၣ်တခီနၣ်ရံၣ်ဃၣ်ဃၣ်ႉလၢဖၣ်ပူၣ်–ကမၤမိၢ်ကျဲဒီတဘိန့ၣ် ၦၤဒိးလီၤဃာ်မ့ၣ်ပိၢ်အိၣ်ဒီဒူၣ်ညါႉခဲအံၤတၢ်ဒုးကဲထီၣ်အလီၢ်န့ၣ်ၦၤကးတံၢ်ကွံာ်ကျဲႉကျိသီၣ်ကတၢၢ်ဘျီ (BGF) သိလ့ၣ် (၁၅) ခိၣ်က့ၤနုာ်လီၤလၢဖၣ်ပူၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါဒံၣ်စ့ဘၢၣ် ၆ သီအနံၤန့ၣ်လီၤႉ တၢ်ခးလိာ်သးကဲထီၣ်အဃိခံခီခံကပၤတၢ်သံတၢ်ဘၣ်ဒိဘၣ်ထံးတၢ်အိၣ်သးခီန့ၣ်ခ့ၣ်အဲးစံၣ်–ကညီတၢ်ကစီၣ် ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်၀ဲဒံးဘၣ်အသိးခံခီခံကပၤထုးထီၣ်ပာ်ဖျါ၀ဲလၢအဖိးသဲစးတအိၣ်ဒံး၀ဲဘၣ်န့ၣ်လီၤႉ လၢန့ၣ်အမဲာ်ညါလီၢ်က၀ီၤသ၀ီဖိလၢအိၣ်ဖၣ်ပူၣ်၀့ၢ်ခိၣ်၀့ၢ်ဃၢၤတဖၣ်စ့ၢ်ကီးနၢ်ဟူ၀ဲကျိဖးဒိၣ်သီၣ်ကိးမုၢ်နၤဒဲးဒီး (BGF)သုးနုာ်လီၤဟူးဂဲၤလၢက၀ီၤဒ့ပူၤအိၣ်၀ဲစ့ၢ်ကီးအဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤႉ “ပနၢ်ဟူကျိဖးဒိၣ်သီၣ်ကိးမုၢ်နၤဒဲးလီၤႉမ့ၢ်လၢန့ၣ်တကပၤခး၀ဲဧါႇလၢအံၤတကပၤခး၀ဲဧါဒုပတသ့ၣ်ညါလီၤတံၢ်လီၤဆဲးဘၣ်ႉပ၀ဲဒၣ်နါက့ဖဲလီၢ်ခံအံၤပဟးထီၣ်လၢတၢ်ချၢတဘူၣ်လၢၤဘၣ်ႉဖဲမဟါန့ၣ် (BGF)သုးဟဲနုာ်လီၤလၢက၀ီၤဒ့ပူၤမီၤနီၤႉၦၤမၤလီၤဘၢဃာ်တၢ်ကစီၣ်အဃိတၢ်ကဲထီၣ်သးဖဲအံၤမတၤတဂၤမးတသ့ၣ်ညါ၀ဲဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဒ်န့ၣ်အသိးလၢဖၣ်ပူၣ်–ကမၤမိၢ်၀့ၢ်ဖီခိၣ်န့ၣ်သုးမီၤစိရိၤအကဘီယူၤဟဲဃုသ့ၣ်ညါတၢ်ကအိၣ်ကိးမုၢ်နံၤဒဲးညါအဃိ လီၢ်က၀ီၤကမျၢၢ်ထံဖိကီၢ်ဖိတဖၣ်အိၣ်ဒီးတၢ်ကိၢ်တၢ်ဂီၤတၢ်ဘၣ်ယိၣ်ဘၣ်ဘှီအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ