သုးမီၤစိရိၤပျၢ်လီၤ(တီၤကလ့)ဃိာ်ပူၤ ထံရူၢ်ကီၢ်သဲးၦၤဃိာ်ဖိ(၅၄)ဂၤ
လါနိၣ်၀့ဘၢၣ် ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် (၁၀၂)၀ီတ၀ီ ဒီကလုာ်မုၢ်နံၤအဂီၢ် သုးမီၤစိရိၤပျၢ်လီၤ၀ဲၦၤဃိာ်ဖိ (၅၇၇၄) ဂၤအကျါပၣ်ဃုာ်၀ဲကညီကီၢ်စဲၣ် ဖၣ်အၣ်၀့ၢ်(တီၤကလ့) ဃိာ်ပူၤထံရူၢ်ကီၢ်သဲးၦၤဃိာ်ဖိ (၅၄) ဂၤလၢအဘၣ်တၢ်လိာ်ဘၢလိာ်ကွီၢ်၀ဲလၢ ၅၀၅(က)တၢ်ဘျၢသဲစးအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ “ပသ့ၣ်ညါလၢ(တီၤကလ့)န့ၣ်ၦၤကပျၢ်လီၤ၀ဲ (၅၄) ဂၤမီၤနီၤႉအကျါဖဲန့ၣ်ပၣ်ဃုာ်၀ဲၦၤဖၣ်အၣ်ဖိ (၃) ဂၤႉဖၣ်အၣ်ၦၤသးစၢ်အိၣ်တ့ၢ်ဒံးဒီဒူၣ်ညါႉဖၣ်အၣ်ကၠိဖိလၢတၢ်ဆှၢအီၤဆူဃိာ်တၢ်လီၢ်လၢအဂၤတဖၣ်န့ၣ် ၦၤကပျၢ်လီၤအကျါမ့ၢ်အ၀ဲသ့ၣ် ပၣ်ဧါတပၣ်ဧါတသ့ၣ်ညါဘၣ်ႉခဲအံၤၦၤကပျၢ်လီၤန့ၣ်ကီးတရံးႇမၠၣ်၀တံၣ်ႇကၠၤအ့စ့ၣ်ကၠံဒီးသူၣ်ဘီၣ်သးစၢ်ႇသရၣ်/မုၣ်လၢအိၣ်တၢ်လီၢ်အဂၤတဖၣ်ၦၤကပျၢ်လီၤခဲအံၤအကျါန့ၣ်အါလၢအပၣ်လီၤ” အဂ့ၢ်န့ၣ် ၦၤလီၤဘၣ်ဃိာ်လၢထံရူၢ်ကီၢ်သဲးတၢ်မူးတၢ်ရၢ်အဟံၣ်ဖိဃီဖိတဂၤစံး၀ဲန့ၣ်လီၤႉ တနံၤအံၤလါနိၣ်၀့ဘၢၣ် ၁၇ သီအနံၤ ကီၢ်ပယီၤထံကီၢ်ဒီတဘ့ၣ်အပူၤ သုးမီၤစိရိၤပျၢ်လီၤၦၤဃိာ်ဖိ(၅၇၇၄)အကျါ ပၣ်ဃုာ်၀ဲ(NLD)မုၢ်ကျိၤ၀ဲၤကွာ်ၦၤဟ့ၣ်ကူၣ်တၢ်ဖိ (မံစ်ထၢၣ်)ဆှီၤတာနဲၤႇ ဘရံၣ်တ့ၣ် မီၢ်သီလီၢ်လံၤ ဘ့ၣ်ကံၤဘိမ့ ဃုာ်ဒီးၦၤထံဂုၤကီၢ်ဂၤဖိ(၄)ဂၤအသိး ပၣ်ဃုာ်၀ဲကီၢ်ပူၤၦၤမၤတၢ်ဃံတၢ်လၤကစၢ်လၢ အမံၤဟူသၣ်ဖျါတစှၤန့ၢ် အဂၤ(၁၀)ဘၣ် အဂ့ၢ်န့ၣ်သုးမီၤစိရိၤအတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံ လၢကညီကီၢ်စဲၣ် ကီၢ်ဆၣ်(၇)ဘ့ၣ်အပူၤ ၦၤလၢအထီဒါသုးမီၤစိရိၤတဖၣ်အံၤတၢ်ဖီၣ်ထၢနုာ်အီၤလၢဃိာ်ပူၤႇတၢ်လိာ်ဘၢလိာ်ကွီၢ်ႇဘၣ်ထီၣ်တၢ်မူးတၢ်ရၢ်ဒီး ၦၤလၢတၢ်ထုးထီၣ်ဘိးဘၣ်ရၤလီၤအမံၤလၢကဘၣ်ဖီၣ်၀ဲတဖၣ်အိၣ်၀ဲခဲလၢာ်အဂၤ(၅၀၀)ဃၣ်ဃၣ်အဂ့ၢ်န့ၣ် ၦၤလၢအဘူးဒီးကွီၢ်ဘျီၣ်တဖၣ်စံး၀ဲန့ၣ်လီၤႉ ကတီၢ်ခဲအံၤလၢဖၣ်အၣ်၀့ၢ်(တီၤကလ့)ဃိာ်ပူၤဒီးၦၤဃိာ်ဖိလၢအဘၣ်ဆှၢအီၤဆူတၢ်လီၢ်အဂၤဃိာ်ပူၤတဖၣ်ခဲလၢာ်အိၣ်၀ဲအဂၤ(၂၀၀)ဃၣ်ဃၣ်ညါဒီးၦၤသ့ၣ်တဖၣ်အံၤအကျါပၣ်ဃုာ်၀ဲလၢတၢ်ပျၢ်လီၤဘျီ၀ဲအံၤအပူၤ(၅၄)ဂၤအဂ့ၢ်န့ၣ် သ့ၣ်ညါဘၣ်လၢပှၤအဘူးဒီးကွီၢ်ဘျီၣ်အအိၣ်န့ၣ်လီၤ.
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိ လိၣ်ရှါလီၢ်က၀ီၤကမျၢၢ်အဂၤ(၂၀၀၀)ဃၣ်ဃၣ်ဘၣ်ဃ့ၢ်ထီၣ်
လါနိၣ်၀့ဘၢၣ် ၁၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်(ကၠၤအ့စ့ၣ်ကၠံကီၢ်ဆၣ်)အပူၤ ဖဲလါနိၣ်၀့ဘၢၣ် ၁၅ သီအနံၤန့ၣ် တၢ်ဒုးကဲထီၣ်လၢလိၣ်ရှါသ၀ီပူၤဒီးခီဖျိပယီၤသုးခးလီၤကျိဖးဒိၣ်တကးဒံးဘၣ် ကဘီယူၤဟဲတ့ၢ်လီၤမ့ၣ်ပိၢ်အဃိ လီၢ်က၀ီၤကမျၢၢ်အဂၤ(၂၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ ဖဲလါနိၣ်၀့ဘၢၣ် ၁၅ သီ ဂီၤခီ ၅ နၣ်ရံၣ်အဆၢကတီၢ် လၢလိၣ်ရှါသ၀ီပူၤ ပယီၤသုးႇသုးခိးကီၢ်ဆၢ(BGF)သုးပာ်ဖှိၣ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤ တၢ်ဒုးကဲထီၣ်၀ဲန့ၣ်လီၤႉ တၢ်ဒုးကဲထီၣ်အကတီၢ်(တလၢၤကီၢ်စဲၣ်)သရိာ်၀ါကျိဖးဒိၣ်သုးရ့ၣ်အံၤခးဆိဃီၤကျိဖးဒိၣ်(၁၂၀ မမ)ဆူ လိၣရှါသ၀ီပူၤ တကးဒံးဘၣ်အမဲာ်ညါမုၢ်ထီၣ်ကလံၤထံးကီၢ်ခီသုး၀ဲၤလီၢ်ခိၣ်သ့ၣ်အံၤစ့ၢ်ကီးသူ၀ဲကဘီယူၤဟဲတ့ၢ်လီၤ၀ဲမ့ၣ်ပိၢ်အဃိ ဟံၣ်ဃီဒီးကျီးလီၢ်တဖၣ်ဟးဂီၤ၀ဲအါမးအသိးလီၢ်က၀ီၤကမျၢၢ်အဂၤ(၂၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲအဂ့ၢ်န့ၣ်သ့ၣ်ညါဘၣ်လၢ၀ီၢ်ရ့ၣ်လီၢ်က၀ီၤပၢပြးၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ “ဖဲမဟါစးထီၣ်ဂီၤခီ ၅ နၣ်ရံၣ်န့ၣ်တၢ်ခးလိာ်သးကဲထီၣ်ဒီတနံၤကျၢၤလီၤႉပယီၤသုးခးလီၤကျိဒိၣ်ႇကဘီယူၤစ့ၢ်ကီး ဟဲတ့ၢ်လီၤမ့ၣ်ပိၢ်လၢကစၢၢ်လီၢ်ခံတကပၤန့ၣ်အဃိ ၦၤစံၣ်ထီၣ်သ၀ီဒီတဖျၢၣ်လီၤႉကျိဖးဒိၣ်လီၤတဲာ်အဃိ ဟံၣ်ဟးဂီၤဖးဒိၣ်ညါႉလၢသ၀ီပူၤသဲးထူၣ်ႇရီဘၢၣ်ထူၣ်နါက့ဟးဂီၤဒီဒူၣ်ညါႉပယီၤသုးကလၢၤအခိၣ်အဃၢၤဒီးကျဲကပိၤကပၤဒီတဘိန့ၣ်ၦၤအိၣ်တဘူၣ်နီတဂၤလၢၤဘၣ်ႉတနီၤန့ၣ်လဲၤစံၣ်အိၣ်ဖှိၣ်၀ဲလၢသီခါဖၠၣ်” အဂ့ၢ်န့ၣ်လီၢ်က၀ီၤကမျၢၢ်လၢအဃ့ၢ်တၢ်ဒုးတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါလါနိၣ်၀့ဘၢၣ် ၁၆ သီအနံၤန့ၣ်လီၤႉ ပယီၤသုးကလၢၤလၢအိၣ်လိၣ်ရှါသ၀ီပူၤအံၤအပူၤကွံာ်န့ၣ်မ့ၢ်၀ဲဒၣ်(KNLA)သုးရ့ၣ် ၁၆ ဟီၣ်က၀ီၤဘံၣ်ဘၢသုးကလၢၤ တၢ်လီၢ်တခါဒီးစးထီၣ်ဖဲအပူၤကွံာ်(၂၀၂၁)လါအီးကထိဘၢၣ်န့ၣ်ပယီၤသုးနုာ်လီၤအိၣ်ဆိး၀ဲလၢတၢ်လီၢ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ စးထီၣ်ဖဲပယီၤသုးပာ်ဖှိၣ်နုာ်လီၤအိၣ်ဆီလီၤသးလၢလိၣ်ရှါ(KNLA)သုးကလၢၤအခါဘျီန့ၣ် လီၢ်က၀ီၤကမျၢၢ်တဖၣ်ဘၣ်ဟးထီၣ်က့ၤလီၤလဲၤဖံးလဲၤမၤလၢတၢ်ပျံၤတၢ်ဖုးအပူၤကိးမုၢ်နံၤဒဲးဒီး လဲၤလၢကျီပူၤတဘူၣ်ဒ်အပူၤကွံာ်လၢညါအသိးလၢၤဘၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(စၢၢ်ထး)ပူၤအဃိ ကမျၢၢ်သံ(၃)ဂၤႇဘၣ်ဒိ(၄)ဂၤ
လါနိၣ်၀့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ဃိၣ်သၢဖျၢၣ်ကီၢ်ဆၣ်အပူၤ ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢမဲၢ်ကသၤသ၀ီကပၤ(စၢၢ်ထး)ပူၤအဃိ ကမျၢၢ်သံ(၃)ဂၤဒီးဘၣ်ဒိ(၄)ဂၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲမဟါလါနိၣ်၀့ဘၢၣ် ၁၅ သီ မုၢ်နၤခီ ၁၂ နၣ်ရံၣ်ဘျဲၣ်အဆၢကတီၢ်န့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ် လၢစၢၢ်ထးပူၤအဃိမ့ၣ်အူအီၣ်ဟးဂီၤ၀ဲသိလ့ၣ်(၂)ခိၣ်ဒီးစဲးဖီကဟၣ်တၢ်မၤလီၢ်အပူၤ တၢ်သူၣ်ထီၣ်အိၣ်(၄)ဖျၢၣ်အကျါဟးဂီၤ၀ဲ(၃)ဖျၢၣ်အဂ့ၢ်န့ၣ် ၦၤမၤတၢ်ဖိလၢအိၣ်စၢၢ်ထး ပူၤတဂၤ စံး၀ဲဒ်အံၤန့ၣ်လီၤႉ “ကဘီယူၤဟဲဖဲမနၤ (၁၂) နၣ်ရံၣ်ဘျဲၣ်န့ၣ်ႉကဘီယူၤဟဲခံဘျီတ့ၢ်လီၤ၀ဲမ့ၣ်ပိၢ် (၂) ဘျီမီၤနီၤႉမ့ၣ်အူအီၣ်ဟးဂီၤခဲလၢာ်လီၤႉတၢ်ဖိတၢ်လံၤလၢအိၣ်တၢ်မၤလီၢ်နါက့ဟးဂီၤလၢာ်လံႉသိလ့ၣ်နါက့ဟးဂီၤ (၂) ခိၣ်ႉၦၤသံခီန့ၣ် (၃) ဂၤႇဘၣ်ဒိခီန့ၣ် (၄) ဂၤႉၦၤလၢအသံတဖၣ်န့ၣ်မ့ၣ်ပိၢ်လီၤတဲာ်လိၤလိၤအအိၣ်ဟံၣ်တၢ်သူၣ်ထီၣ်န့ၣ်လီၤႉတၢ်သူၣ်ထီၣ်ခီန့ၣ်အိၣ် (၄) ဖျၢၣ်မီၤနီၤႉမ့မ့ၢ်ပအိၣ်တဖျၢၣ်ခီန့ၣ်တဘၣ်ဘၣ်လၢအဂၤသၢဖျၢၣ်န့ၣ်ဘၣ်ခဲလၢာ်လီၤ” အဂ့ၢ်န့ၣ်စံး၀ဲန့ၣ်လီၤႉ သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဖဲမဟါဘျီ၀ဲန့ၣ်အပူၤၦၤသံတဖၣ်အကျါပၣ်ဃုာ်၀ဲတရူးထံဖိကီၢ်ဖိတဖၣ်စ့ၢ်ကီးအဂ့ၢ်န့ၣ် လီၢ်က၀ီၤတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးလၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ၀ီၢ်ရ့ၣ်ဟီၣ်က၀ီၤအပူၤ ဖဲအပူၤကွံာ်လါအီးကထိဘၢၣ် ၆ သီအနံၤ စ့ၢ်ကီးသုးမီၤစိရိၤကဘီယူၤ(၄)ဘ့ၣ်ဟဲတ့ၢ်လီၤ၀ဲမ့ၣ်ပိၢ်လၢ(မဲၢ်ကသၤ)သ၀ီသီခါဖၠၣ်ကရၢၢ်ပူၤအဃိ မ့ၣ်အူအီၣ်ဟးဂီၤ၀ဲသီခါဖၠၣ်တၢ်သူၣ်ထီၣ်ဒီတဖျၢၣ်ညါဒီးသီခါဘၣ်ဒိစ့ၢ်ကီး(၁)ပါဒံးန့ၣ်လီၤႉ
ခီဖျိတၢ်ခိတၢ်သွဲဟဲအါထီၣ်အဃိသဲးကျီးကစၢ်တဖၣ်ဘၣ်ပတုာ်ကွံာ်တၢ်ဖံးတၢ်မၤ
လါနိၣ်၀့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဒ၀ဲၢ်ကီၢ်ဆၣ် မုၢ်ထီၣ်ဒူသ၀ီတဖၣ်အပူၤ ၦၤလၢအမၤကၤသဲးသၣ်တဖၣ်အံၤ ခီဖျိကျဲတၢ်ခိတၢ်သွဲဟဲအါထီၣ်ဒီးသဲးသၣ်စ့ၢ်ကီးအၦ့ၤတဂၢၢ်တကျၢၤဘၣ်အဃိ ကျိၣ်စ့တၢ်ဟဲနုာ်လီၤစှၤ၀ဲဒီး ဘၣ်ပတုာ်ကွံာ်တၢ်မၤကၤသဲးသၣ်တၢ်ဖံးတၢ်မၤအဂ့ၢ်န့ၣ် လီၢ်က၀ီၤကမျၢၢ်လၢအမၤကၤသဲးသၣ်တဖၣ်စံး၀ဲန့ၣ်လီၤႉ စးထီၣ်ဖဲအပူၤကွံာ်လါအီးကထိဘၢၣ်တုၤလၢတလါအံၤလါနိၣ်၀့ဘၢၣ်န့ၣ် လၢဒ၀ဲၢ်ကီၢ်ဆၣ် မုၢ်ထီၣ်ဒူသ၀ီတဖၣ်အပူၤ ခီဖျိသဲးသၣ်အၦ့ၤတဂၢၢ်တကျၢၤဒီးဘၣ်ဟ့ၣ်လီၤကျဲတၢ်ခိတၢ်သွဲအဘူးအလဲဟဲအါထီၣ်ကွ့ၢ်ကွ့ၢ်တၢ်အိၣ်သးအဃိ ကမျၢၢ်လၢအမၤကၤသဲးသၣ်တဖၣ်အံၤအထိးနါ(အမၠး)တအိၣ်တ့ၢ်လၢအ၀ဲသ့ၣ်အဂီၢ်လၢၤဘၣ်ဒီးကျိၣ်စ့တၢ်ဟဲနုာ်လီၤစှၤ၀ဲအဂ့ၢ်န့ၣ်လီၢ်က၀ီၤကမျၢၢ်လၢအမၤကၤသဲးသၣ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပတၦ့ၤသဲးဒီဖျၢၣ်လၢာ်ဘၣ်ႉပဘၣ်စိာ်နးလီၤဘှံးဒိၣ်မးႉမ့၀ံၤသဲးဃ့တပီၢ်န့ၣ်ပဆါန့ၢ်ထဲ(၄၅၀၀)ကၠးလီၤႉမ့မ့ၢ်တၢ်ခိတၢ်သွဲဒုအါန့ၢ်အပူၤကွံာ်ဒံးမီၤနီၤႉသဲးသၣ်တဖၣ်န့ၣ်ပဘၣ်ဆှၢအီၤလၢ၀့ၢ်ပူၤအဃိကျဲဒီတဘိန့ၣ်အိၣ်ဒီးပယီၤသုးတြဲၤမီၤနီၤႉအ၀ဲသ့ၣ်ထၢ၀ဲ(တကလး)ဆူဖီခိၣ်လီၤႉသိလ့ၣ်တခိၣ်န့ၣ်အထိးနါ(အမၠး)တအိၣ်တ့ၢ်လၢၤဘၣ်ႉမ့၀ံၤဟီၣ်က၀ီၤပူၤနါက့တၢ်အိၣ်သးတဂ့ၤအါအါဘၣ်ႉကျိၣ်စ့တၢ်ဟဲနုာ်လီၤစှၤ၀ဲမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ၦၤလၢအမၤကၤသဲးသၣ်ဃ့တဖၣ်စ့ၢ်ကီးတၢ်ကီတၢ်ခဲအိၣ်အါမးလၢကလဲၤစိာ်ဆါသဲးသၣ်ဆူ၀့ၢ်ပူၤတၢ်ဆါတၢ်ၦ့ၤလီၢ်ဖးဒိၣ်အံၤဒီးကလဲၤလၢကျဲအဂီၢ်စ့ၢ်ကီးဘၣ်ကွဲး၀ဲလံာ်အုၣ်သးဒီဒူၣ်ညါအဂ့ၢ်န့ၣ် ၦၤမၤကၤသဲးသၣ်ဖိတဂၤစံး၀ဲဒ်အံၤ န့ၣ်လီၤႉ “ကျဲပူၤခီဒၢးၦၤထၢတၢ်ခိတၢ်သွဲတကးဒံးဘၣ်သဲးသၣ်ခီန့ၣ်ဘၣ်လဲၤစိာ်ဆါလၢ၀့ၢ်ပူၤညါအဃိ(ပွဲရံု)နါက့ကဆှၢထီၣ်လၢ၀့ၢ်တကူၣ်အဂီၢ်န့ၣ်တၢ်ကီတၢ်ခဲအိၣ်စ့ၢ်မီၤနီၤႉကလဲၤအဂီၢ်န့ၣ်လိၣ်၀ဲဒၣ်လံာ်လဲၢ်ဒီဒူၣ်ညါႉမ့၀ံၤလံာ်လဲၢ်လၢအဂၤကဘၣ်ပၣ်ဒံးႉကဆါတၢ်တဘျီဘျီန့ၣ်တၢ်မၤဘံဘူဒိၣ်မး” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ ဒ်န့ၣ်အသိးလၢကညီကီၢ်စဲၣ်(ကီးတရံး)ကီၢ်ဆၣ် ကလံၤထံးဒူသ၀ီတဖၣ်အပူၤစ့ၢ်ကီး တနံၣ်အံၤၦၤမၤကၤသဲးသၣ်ဖိတဖၣ်လီၤစှၤ၀ဲအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိစံး၀ဲအသိးသ့ၣ်ညါဘၣ်န့ၣ်လီၤႉ
ခီဖျိပယီၤသုးဟဲတ့ၢ်လီၤမ့ၣ်ပိၢ်လၢကဘီယူၤ(drone)အဃိ ကမျၢၢ်ဘၣ်ဒိ ၂ ဂၤ
လါနိၣ်၀့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ပလီၢ်ကီၢ်ဆၣ်အပူၤ ဖဲနိၣ်၀့ဘၢၣ် ၁၄ သီအနံၤန့ၣ် ခီဖျိပယီၤသုးဟဲတ့ၢ်လီၤမ့ၣ်ပိၢ်ဒီးကဘီယူၤ(drone)လၢကဒဲသ၀ီပူၤအဃိ ကမျၢၢ်ဘၣ်ဒိ၀ဲ(၂)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါနိၣ်၀့ဘၢၣ် ၁၄ သီ မုၢ်ထူၣ် ၁၁း၃၀ ဃၣ်ဃၣ်အဆၢကတီၢ် လၢပလီၢ်ကီၢ်ဆၣ် ကဒဲသ၀ီအပူၤ ခီဖျိပယီၤသုးဟးတ့ၢ်လီၤနါစိၤမ့ၣ်ပိၢ်ဒီးကဘီယူၤ(drone)ဆူတၢ်ဒီသဒၢကမျၢၢ်သုး(PDF)အိၣ်တၢ်လီၢ်တဖၣ်အဃိ ဘၣ်ဒိ၀ဲသ၀ီဖိပိာ်မုၣ်တဂၤဒီးပိာ်ခွါတဂၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဘၣ်ဃးတၢ်ဂ့ၢ်ကဲထီၣ်သးအံၤပလီၢ်တၢ်ဒီသဒၢကမျၢၢ်သုး(PDF)တၢ်ဘိးဘၣ်ရၤလီၤမူဒါခိၣ်တဂၤစံး၀ဲ“အဟဲတ့ၢ်လီၤမ့ၣ်ပိၢ်န့ၣ်ကဘၣ်ဖဲမုၢ်ထူၣ် ၁၁း၃၀ န့ၣ်မီၤနီၤႉဟဲတ့ၢ်လီၤ၀ဲမ့ၣ်ပိၢ်န့ၣ်တဖျၢၣ်လီၤႉဘၣ်ဟံၣ်ဃီဒုတအိၣ်ဘၣ်ႉ ကွၢ်၀ဲလၢသ၀ီပူၤ(PDF)အိၣ်တၢ်လီၢ်န့ၣ်ဒီးဟဲတ့ၢ်လီၤ၀ဲလီၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါန့ၣ်လီၤႉ ခီဖျိပယီၤသုးဟဲတ့ၢ်လီၤမ့ၣ်ပိၢ်လၢကဘီယူၤ(ဒြိ)အဃိဘၣ်ဒိ၀ဲပိာ်မုၣ်တဂၤအမဲာ်ချံဒီးမ့မ့ၢ်အပိာ်ခွါတဂၤန့ၣ်ဘၣ်ဒီၣ်တဲာ်ကွံာ်၀ဲအစုဘိ(လက်သန်းကြွယ်)အဂ့ၢ်န့ၣ်လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ပယီၤသုးဟဲတ့ၢ်လီၤမ့ၣ်ပိၢ်ဒီးကဘီယူၤ(drone)လၢပလီၢ်ကီၢ်ဆၣ်ပူၤအိၣ်၀ဲ(၄)ဘျီလံဒီး ဟဲတ့ၢ်လီၤ၀ဲလီၢ်ခံကတၢၢ်တဘျီအံၤကမျၢၢ်တၢ်ဘၣ်ဒိဘၣ်ထံးဟဲအိၣ်ထီၣ်၀ဲန့ၣ်လီၤႉ
တၢ်ဖီၣ်န့ၢ် PDF (၅)ဂၤလၢမီၣ်လမၠဲၣ်(စ့ၤယၤသံၤရံၣ်)က၀ီၤဒ့ပူၤ၀ံၤအလီၢ်ခံ တၢ်ကလုၢ်လီၤလၢကဘၣ်ခး
လါနိၣ်၀့ဘၢၣ် ၁၆ သီႇ ၂၀၂၂ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် မီၣ်လမၠဲၣ်၀့ၢ်ပူၤ ဖဲလါနိၣ်၀့ဘၢၣ် ၁၄ သီအနံၤန့ၣ် ပယီၤသုးနုာ်လီၤလၢ(စ့ၤယၤသံၤရံၣ်)က၀ီၤဒ့ စ့ၤယၤ(၃)ကျဲဟံၣ်တဖျၢၣ်အပူၤဒီးဖီၣ်န့ၢ်၀ဲ(PDF) ၅ ဂၤကဲထီၣ်၀ံၤအလီၢ်ခံ ပယီၤသုးဟးဆှၣ်တၢ်လၢက၀ီၤဒ့ပူၤ ဒီးတၢ်ကလုၢ်လီၤလၢကဘၣ်ခး၀ဲအဂ့ၢ်န့ၣ် ကမျၢၢ်လၢအိၣ်က၀ီၤဒ့ပူၤတဖၣ်စံး၀ဲန့ၣ်လီၤႉ ဖဲလါနိၣ်၀့ဘၢၣ် ၁၄ သီ ဟါခီ ၄း၃၀ ဃၣ်ဃၣ်အဆၢကတီၢ်န့ၣ် လၢမီၣ်လမၠဲၣ်၀့ၢ်ပူၤ ပယီၤသုးနုာ်လီၤလၢ(စ့ၤယၤသံၤရံၣ်)က၀ီၤဒ့ဟံၣ်တဖျၢၣ်အပူၤဒီးခံခီခံကပၤတၢ်ခးလိာ်သးကဲထီၣ်၀ဲဒၣ်န့ၣ်လီၤႉတၢ်ကဲထီၣ်သးဘျီ၀ဲအံၤအပူၤပယီၤသုးဖီၣ်န့ၢ်၀ဲ(PDF) ၅ ဂၤ၀ံၤအလီၢ်ခံ မုၢ်ဆ့ၣ်ထီၣ်ဂီၤခီအဆၢကတီၢ်န့ၣ် ပယီၤသုးကးတံၢ်ကွံာ်၀ဲ(စ့ၤယၤသံၤရံၣ်)က၀ီၤဒ့ စ့ၤယၤ(၃)ကျဲအံၤဒီးတၢ်ကလုၢ်လီၤလၢကဘၣ်ခး၀ဲအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ “ဖဲမဟါဟါခီ ၄း၃၀ အဆၢကတီၢ်န့ၣ်တၢ်ခးလိာ်သးကဲထီၣ်ဒီးပယီၤသုးဖီၣ်န့ၢ်ၦၤဖိသၣ်တဖၣ်အိၣ်မီၤနီၤႉ ခဲအံၤတဂီၤညါအံၤလၢ(စ့ၤယၤသံၤရံၣ်)က၀ီၤဒ့န့ၣ်တၢ်ကလုၢ်လီၤလၢကဘၣ်ခး၀ဲမီၤနီၤႉ ပၢၤကီၢ်နါက့ဟးဆှၣ်တၢ်လၢတၢ်ကဲထီၣ်သးအလီၢ်န့ၣ်၀း၀းတရံးလီၤႉပနၢ်ဟူလၢပၢၤကီၢ်တဂၤန့ၣ်ၦၤဟ့ၣ်ဃာ်၀ဲကျိချံအဖျၢၣ် (၆၀) ညါႉအ၀ဲသ့ၣ်ကးတံၢ်ဃာ်က၀ီၤဒ့၀ဲန့ၣ်လံမီၤနီၤႉၦၤလၢအ၀ဲသ့ၣ်ပျဲဟးထီၣ်၀ဲတဖၣ်လီၤဟးထီၣ်န့ၢ်” အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါနိၣ်၀့ဘၢၣ် ၁၅ သီအနံၤန့ၣ်လီၤႉ တၢ်ကဲထီၣ်သး၀ံၤအလီၢ်ခံဖဲဟါခီ ၇ နၣ်ရံၣ်တခီအဆၢကတီၢ်န့ၣ်ပယီၤသုးကအိၣ်အဂၤ(၃၀၀)ဃၣ်ဃၣ် ခးလီၤတပျုာ်တပျီာ်ကျိဖးဒိၣ်ကျိဖိဆူ(စ့ၤယၤသံၤရံၣ်)က၀ီၤဒ့ စ့ၤယၤ(၃)ကျဲအဃိပယီၤသုးဖီၣ်န့ၢ်၀ဲ(Special Underground Movement Force )အၦၤ ၅ ဂၤဃုာ်ဒီးကျိ(၃)ခိၣ်အဂ့ၢ်န့ၣ် ထုးထီၣ်ပာ်ဖျါ၀ဲလၢအ၀ဲသ့ၣ်(page)ပူၤန့ၣ်လီၤႉ လၢန့ၣ်အမဲာ်ညါတၢ်ခးလိာ်သးကဲထီၣ်ဘျီ၀ဲအံၤအပူၤန့ၣ်က၀ီၤဒ့ပၢပြးသးၦၢ်လၢသုးမီၤစိရိၤတီၣ်ထီၣ်၀ဲအံၤ အဖိခွါတဂၤဒီးပၢၤကီၢ်တဂၤသံ၀ဲဒၣ်အသိးပယီၤသုးဖီၣ်န့ၢ်၀ဲ(PDF)ပိာ်ခွါ ၄ ဂၤဒီးပိာ်မုၣ် ၁ ဂၤ ဒီး ကဆဲးထီဒါပၢၢၢ်ဆၢ၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးစးထီၣ်ဖဲလါနိၣ်၀့ဘၢၣ် ၁၅...
ကညီဖီၣ်စုက၀ဲၤကရူၢ်ဒီးကမျၢၢ်တၢ်ထံၣ်လိာ်အိၣ်သကိးတၢ်ရဲၣ်တၢ်ကျဲၤအပူၤလီၢ်က၀ီၤကမျၢၢ်ဟဲထီၣ်(၁၅၀၀)ဘျဲၣ်
လါနိၣ်၀့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတီခိၣ်ရိၣ်မဲကညီဖီၣ်စုက၀ဲၤကရူၢ်ကရၢဒီးကမျၢၢ်တၢ်ထံၣ်လိာ်အိၣ် သကိးမူးတၢ်ရဲၣ်တၢ်ကျဲၤလၢဘၣ်တၢ်မၤအီၤဖဲကညီကီၢ်စဲၣ် လူၢ်ပျဲၢ်ကီၢ်ဆၣ် ကၠၤအ့သ၀ီပူၤအံၤန့ၣ် လီၢ်က၀ီၤကမျၢၢ်ဟဲထီၣ်၀ဲ(၁၅၀၀)ဘျဲၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါနိၣ်၀့ဘၢၣ် ၁၂ သီအနံၤ န့ၣ်လီၤႉ ကမျၢၢ်တၢ်ထံၣ်လိာ်တၢၣ်ပီၣ်တဲသကိးမူးတၢ်ရဲၣ်တၢ်ကျဲၤလၢတၢ်မၤအီၤဖဲလါနိၣ်၀့ဘၢၣ် ၁၁သီအနံၤန့ၣ် ကမျၢၢ်လၢအိၣ်ခ့ၣ်အဲၣ်ယူၣ်(ဖၣ်အၣ်ကီၢ်ရ့ၣ်)တၢ်ပၢဟီၣ်က၀ီၤ လူၢ်ပျဲၢ်ႇတၢ်ကြဲၢ်ႇထံၤလိၤႇနဘူႇဒူယီၢ်ကီၢ်ဆၣ် (၅)ဘ့ၣ်အပူၤတဖၣ်ဟဲထီၣ်၀ဲတၢ်ရဲၣ်တၢ်ကျဲၤအံၤန့ၣ်လီၤႉ “ဒ်သိးကမျၢၢ်ထံဖိကီၢ်ဖိတဖၣ်ကသ့ၣ်ညါဘၣ်၀ဲထံရူၢ်ကီၢ်သဲးအတၢ်လဲၤကျဲႇတၢ်မၤအကျဲဒီးထံရူၢ်ကီၢ်သဲးအတၢ်အိၣ်ဆၢထၢၣ်လၢ(ခ့ၣ်အဲၣ်ယူၣ်)မၤ၀ဲလၢတကီၢ်ခါခဲအံၤသ့ၣ်တဖၣ်အဂီၢ်ဒီးတကးဒံးဘၣ်ကသူၣ်ထီၣ်က့ၤတၢ်ဃူတၢ်ဖိးအဂီၢ်လီၤ” အဂ့ၢ်န့ၣ်ပဒိၣ်စီၤလၣ်ထိစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ရဲၣ်တၢ်ကျဲၤဘျီ၀ဲအံၤအပူၤန့ၣ်(ခ့ၣ်အဲၣ်ယူၣ်)ကရၢခိၣ်–၂ ပဒိၣ်စီၤကွဲၤထူ၀့ႇ နဲၣ်ရွဲၣ်ခိၣ်ကျၢၢ်သဃဲၤ(၂) ပဒိၣ်စီၤလၣ်ထိႇ (KNLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၤနံၤႇ လီၢ်ခၢၣ်သးထီဘိကမံးတံာ် ဖၣ်အၣ်ကီၢ်ရ့ၣ်ခိၣ် ပဒိၣ်စီၤအီၤမီၤအ့သ့ၣ်တဖၣ်ဟဲထီၣ်၀ဲဒၣ်န့ၣ်လီၤႉ တၢ်ရဲၣ်တၢ်ကျဲၤအပူၤ တၢ်ဆှဲပၠးလီၤ၀ဲကမျၢၢ်တဖၣ်လၢသုးဟံးန့ၢ်တၢ်စိတၢ်ကမီၤ၀ံၤအလီၢ်ခံ(၂)နံၣ်အတီၢ်ပူၤ (ခ့ၣ်အဲၣ်ယူၣ်)ထံရူၢ်ကီၢ်သဲးတၢ်အိၣ်ဆၢထၢၣ်ႇအတၢ်ပညိၣ်ႇထံရူၢ်ကီၢ်သဲးတၢ်မၤအကျဲအဂ့ၢ်အကျိၤတဖၣ်န့ၣ်လီၤႉ ဒ်န့ၣ်အသိးမူးတၢ်ရဲၣ်တၢ်ကျဲၤဘျီ၀ဲအံၤအပူၤ ဖီၣ်စုက၀ဲၤကရူၢ်ကရၢတဖၣ်လၢအမ့ၢ်(KNU/KNLA-PC)ကရၢခိၣ်ခံ ဒီၣ်ကထၢၣ်နီၢ်ကပီၤထူႇ သုးခိးကီၢ်ဆၢ(BGF)ၦၤပၢၤလီၢ်ဆ့ၣ်နီၤ သုးခိၣ်ကျၢၢ်ဂီၢ်ဂ့ၢ် စီၤထိလဲၤႇ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးခိၣ်ဒိၣ်စိ စီၤဆါအီၤဒီး တၢ်ဘူၣ်တၢ်ဘါခိၣ်နၢ်လၢအမ့ၢ်(မဲစမ့ၣ်)သီခါဖၠၣ် အရှ့ၤစဒၤယၣ်ႇ ခရံာ်ဖိ သရၣ်ဒိၣ် စီၤဆၣ်စ့ဖီဒီး ကညီဒီကလုာ်ဒံၣ်မိၣ်ကရဲၣ်တ့ၣ်ပၣ်တံၣ်ၦၤပၢၤလီၢ်ဆ့ၣ်နီၤမါအီၤပၠံၤစိသ့ၣ်တဖၣ်အံၤမ့ၢ်၀ဲဒၣ်တၢ်ရဲၣ်တၢ်ကျဲၤၦၤပၢၤလီၢ်ဆ့ၣ်နီၤဖိသ့ၣ်တဖၣ်န့ၣ်လီၤႉ ကညီဖီၣ်စုက၀ဲၤကရူၢ်ကရၢခိၣ်နၢ်လၢအဟဲထီၣ်တၢ်ရဲၣ်တၢ်ကျဲၤသ့ၣ်တဖၣ်အံၤပာ်ဖျါထီၣ်အ၀ဲသ့ၣ်တကီၢ်ခါတၢ်ထံၣ်တၢ်ပာ်သးဒီးကရူၢ်ကရၢအတၢ်ဖံးတၢ်မၤတၢ်ဟူးတၢ်ဂဲၤသ့ၣ်တဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
ခီဖျိကျိဖးဒိၣ်လီၤတဲာ်လၢယိၤကီၢ်ပူၤတကပၤသ့အဃိတၢ်ဒုးသ့ၣ်ညါသ၀ီဖိတဖၣ်လၢကသုးဆိဃာ်အလီၢ်အကျဲ
လါနိၣ်၀့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိပယီၤသုးခးလီၤကျိဖးဒိၣ်ဆူမၠၣ်၀တံၣ်–ဂီၤလ့ၤကျဲ သ့ၣ်ဘီဘိသ၀ီတကပၤကိးမုၢ်နံၤဒဲးအဃိ ကျိဖးဒိၣ်လီၤတဲာ်လၢယိၤကီၢ်သ၀ီပူၤတကပၤသ့၀ဲဒီးလၢတၢ်န့ၣ်အဃိယိၤကီၢ်သ၀ီသးၦၢ်ဒုးသ့ၣ်ညါသ၀ီဖိတဖၣ်လၢကသုးဆိဃာ်အလီၢ်အကျဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ စးထီၣ်ဖဲအပူၤကွံာ်လါနိၣ်၀့ဘၢၣ် ၇ သီအနံၤန့ၣ် ဖလူ(ဖယါကိ)ပယီၤသုးတဖၣ် ခးလီၤကျိဖးဒိၣ်ကိးမုၢ်နံၤမုၢ်နၤဒီးကျိဖးဒိၣ်အံၤလီၤတဲာ်လၢယိၤကီၢ်တကပၤသ့၀ဲအဃိသ၀ီသးၦၢ်တဖၣ်ဒုးသ့ၣ်ညါသ၀ီဖိတဖၣ်လၢကသုးဆိဃာ်အလီၢ်အကျဲအဂ့ၢ်န့ၣ်သ၀ီဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲအ၀ဲတနံၤန့ၣ်ကဘီယူၤဟဲခးလီၤတၢ်မီၤနီၤႉခီဖျိကျိဖးဒိၣ်လီၤတဲာ်ပိၢ်ဖးထီၣ်လၢဘျၢၣ်ဒိၣ်ဒီးသ့ၣ်ဘီဘိသ၀ီပူၤအဃိခဲအံၤကမျၢၢ်ၦၤဃ့ၢ်တၢ်ဒုးဖိတဖၣ်လဲၤအိၣ်ဖှိၣ်က့ၤလၢသူမှဲကျိကၢၢ်နံၤလံမီၤနီၤႉလၢယိၤကီၢ် မီၤလံၤခၠါသ၀ီသးၦၢ်နါက့ မၢဃာ်ၦၤသ၀ီဖိဒီးၦၤအိၣ်လၢထံကျိကၢၢ်နံၤတဖၣ်လၢကသုးဆိဃာ်အလီၢ်အကျဲအဃိ ဘၣ်လဲၤအိၣ်ဆိလၢ(ဖိဖြး)က၀ီၤဒ့တကပၤန့ၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ စှၤသီအတီၢ်ပူၤပယီၤသုးကျိၤလၢအိၣ်ဆီလီၤသးဖဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ဟီၣ်က၀ီၤဆိၣ်စံမၠဲၣ်(စွ့ၤသၤဆှီဖယါကိ)ႇဘျၢၣ်ဒိၣ်ႇ(မွ့ၤနကီၤဖယါကိ)တၢ်လီၢ်တဖၣ်အံၤအ၀ဲသ့ၣ်အိၣ်ကတီၤထီၣ်သးလၢကက၀ီၤတံၢ်ထီၣ်ဒုး၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အံၤအဃိခံခီခံကပၤတၢ်ဒုးကဲထီၣ်၀ဲကိးမုၢ်နံၤဒဲးန့ၣ်လီၤႉ တၢ်ဒုးကဲထီၣ်အကတီၢ်ခီဖျိပယီၤသုးခးလီၤကျိဖးဒိၣ်အဃိကီၢ်ကၠီၣ်တဲၣ်သ၀ီလီၢ်က၀ီၤကမျၢၢ်တဖၣ်ဘၣ်ယိၣ်ဘၣ်ဘှီပျံၤ၀ဲလၢကျိဖးဒိၣ်ကလီၤတဲာ်ပိၢ်ဖးထီၣ်လၢယိၤကီၢ်တကပၤအဂ့ၢ်န့ၣ်မီၤလံၤခၠါယိၤကီၢ်သ၀ီဖိတဂၤစံး၀ဲဒ်အံၤန့ၣ်လီၤႉ “ၦၤဘၣ်ယိၣ်လၢကျိဖးဒိၣ်မ့လီၤတဲာ်လၢယိၤကီၢ်တကပၤန့ၣ်ကဘၣ်ၦၤကညီႇကဘၣ်ၦၤဟံၣ်ၦၤဃီဒီးမ့ၣ်အူကအီၣ်ကျီးလီၢ်အဃိသ၀ီသးၦၢ်တဖၣ်တအဲၣ်ဒိးလၢၦၤကမၤဘူၣ်မၤပွဲအါအါလၢၤဘၣ်ႉၦၤမၢပတုာ်ဃာ်တၢ်မၤဘူၣ်မၤပွဲလၢသ၀ီပူၤမီၤနီၤႉၦၤဘၣ်ယိၣ်လၢကျိချံကလီၤတဲာ်အဃိၦၤအိၣ်လၢထံကျိကပၤတဖၣ်ဒီးကျီးပူၤသ့ၣ်တဖၣ်န့ၣ်ၦၤမၢအ၀ဲသ့ၣ်သုးလီၢ်သုးကျဲလံမီၤနီၤ”အဂ့ၢ်န့ၣ်မီၤလံၤခၠါသ၀ီဖိစံး၀ဲန့ၣ်လီၤႉ လီၢ်က၀ီၤသ၀ီအဖျၢၣ်(၂၀)ကမျၢၢ်ၦၤနီၣ်ဂံၢ်အဂၤ(၅၀၀၀)ဘျဲၣ်လၢအလဲၤစံၣ်အိၣ်ဖဲကီၢ်ကၠီၣ်တဲၣ်–ကီၢ်ပယီၤကီၢ်ဆၢ သူမှဲကျိကၢၢ်နံၤတၢ်လီၢ်သ့ၣ်တဖၣ် တုၤလၢခဲအံၤအ၀ဲသ့ၣ်တက့ၤဘၣ်အိၣ်ဘၣ်လၢအဒူသ၀ီတၢ်လီၢ်တၢ်ကျဲဒံးဘၣ် ဒီးဘၣ်ဆဲးအိၣ်ကဒုသးဖဲသူမှဲကျိကၢၢ်ခိၣ်တၢ်လီၢ်သ့ၣ်တဖၣ်အဖၢမုၢ်ဒံးန့ၣ်လီၤႉ
မာ်အံးချံဟးထီၣ်အါဘၣ်ဆၣ်အၦ့ၤလီၤ၀ဲ
လါနိၣ်၀့ဘၢၣ် ၁၅ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ်ကလံၤစိး သၣ်တီၣ်ကၠံကီၢ်ဆၣ်အပူၤ တနံၣ်အံၤမာ်အံးသၣ်ဟးထီၣ်အါ၀ဲဘၣ်ဆၣ် အၦ့ၤလီၤ၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်လၢသူၣ်မာ်အံးသၣ်တဖၣ်အအိၣ်န့ၣ်လီၤႉ အပူၤကွံာ်မဟိတနံၣ်န့ၣ်မာ်အံးသၣ်တပီၢ်အၦ့ၤအိၣ်၀ဲ(၁၀၀၀၀)ကၠးဘျဲၣ်ညါလီၤဒီးဘၣ်ဆၣ်တနံၣ်အံၤလါအီးကထိဘၢၣ်တုၤလၢလါနိၣ်၀့ဘၢၣ်တၢ်ဒဲးမာ်အံးသၣ်အကတီၢ်န့ၣ်တပီၢ်န့ၣ်အၦ့ၤအိၣ်က့ၤထဲ(၇၀၀၀)ကၠးဘျဲၣ်လီၤအဃိစ့အံၤအိၣ်တ့ၢ်က့ၤထဲတၢ်သူၣ်တၢ်ဖျးတၢ်လၢာ်ဘူၣ်လၢာ်စ့အဂီၢ်ဒီးၦၤမၤတၢ်ဖိအဘူးအလဲလီၤအဂ့ၢ်န့ၣ်သ့ၣ်ညါဘၣ်လၢၦၤသူၣ်မာ်အံးဖိတဖၣ်အအိၣ်န့ၣ်လီၤႉ “ခီဖျိမူခိၣ်ကလံၤသီၣ်ဂီၤဂ့ၤအဃိလီၤမီၤနီၤႉတနံၣ်အံၤမာ်အံးသၣ်ဟးထီၣ်အါမးႉအၦ့ၤခီဒုအိၣ်ထဲ(၈၀၀၀)အဖီလာ်လီၤႉအၦ့ၤမ့အိၣ်လၢ(၁၀၀၀၀)ဘျဲၣ်မးကဘၣ်ဂီၢ်တစဲးမီၤနီၤႉစ့နါက့အလုၢ်အၦ့ၤတအိၣ်ဘၣ်မီၤနီၤႉစ့န့ၣ်အိၣ်တ့ၢ်က့ၤထဲၦၤမၤတၢ်ဖိအဘူးအလဲလီၤႉစ့လၢဆါမာ်အံးသၣ်န့ၢ်တဖၣ်ခီန့ၣ်ပက့ၤၦ့ၤအီၣ်ကဒါဟုသးႇသိႇအံသၣ်မီၤနီၤႉတနံၣ်အံၤတၢ်ၦ့ၤထီၣ်ခဲလၢာ်အဃိဘၣ်နးဘၣ်ဖှီၣ်ကိးဂၤဒဲးလီၤ”အဂ့ၢ်န့ၣ် သၣ်တီၣ်၀့ၢ် နီၢ်ကပီၤဆှံ လၢအသူၣ်မာ်အံးသၣ်အံၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တနံၣ်အံၤလၢသၣ်တီၣ်ႇသၣ်တီၣ်ကၠံႇဘီကလံၣ်(ချၢၣ်လၣ်)ႇဖၣ်ပူၣ်ႇလ့ၣ်သိၤဒီးကျၢၤစိခွံလီၢ်က၀ီၤတကပၤန့ၣ် မာ်အံးသၣ်ဟးထီၣ်၀ဲအါမးဒီးဖဲအပူၤကွံာ်လါအီးကထိဘၢၣ်အတီၢ်ပူၤန့ၣ်တၢ်ဆှၢထီၣ်အီၤဆူတရူးကီၢ်အိၣ်၀ဲအပီၢ်(၉)ကလီၢ်ညါအဂ့ၢ်န့ၣ်သ့ၣ်ညါဘၣ်လၢၦၤၦ့ၤမာ်အံးဖိတဖၣ်အအိၣ်န့ၣ်လီၤႉ သၣ်တီၣ်ကၠံ၀့ၢ် နီၢ်ဆၣ်ထူလၢအခိးၦ့ၤမာ်အံးချံအံၤစ့ၢ်ကီးစံး၀ဲလၢ“မာ်အံးအၦ့ၤလီၤအခိၣ်သ့ၣ်န့ၣ် ခီဖျိလၢတရူးကီၢ်ခိကျဲတကပၤန့ၣ်ၦၤပံးဃာ်၀ဲမီၤနီၤႉဘၣ်ဆှၢက့ၤလၢကဘီအဃိတပီၢ်န့ၣ်ဘၣ်ဟ့ၣ်ဆှၢတၢ်လဲ (၃၅၀၀)ကၠးညါႉစ့ဒီၣ်လၣ်အလုၢ်အၦ့ၤဆီတလဲသးတကးဒံးဘၣ်ကီၢ်ပယီၤစ့စ့ၢ်ကီးအၦ့ၤလီၤအဃိၦၤသူၣ်အီၣ်ၦၤဖျးအီၣ်မာ်အံးဖိမ့ၢ်ဂ့ၤၦၤခိးၦ့ၤတၢ်ဖိမ့ၢ်ဂ့ၤဒွးတကဲးအါအါလၢၤဘၣ်မီၤနီၤႉမ့မ့ၢ်တရူးခီန့ၣ်အဲၣ်ဒိးၦ့ၤ၀ဲအၦ့ၤဘၣ်ဘၣ်ဖိလီၤႉအိၣ်ဒၣ်တၢ်ဖံးတၢ်မၤအံၤလီၤအဃိဖဲကန့ၢ်၀ဲန့ၣ်ဘၣ်ဆါ၀ဲမာ်အံးချံဒီးဘှါဆှဲ၀ဲတၢ်လုၢ်အီၣ်နီၢ်ခိသးသမူတၢ်ကီတၢ်ခဲအံၤလီၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ မာ်အံးချံလၢအဟးထီၣ်ကညီကီၢ်စဲၣ်ပူၤအံၤတဖၣ်န့ၣ်ဘၣ်တၢ်ဆှၢအီၤဆူတရူးကီၢ်ဒီးကိးနံၣ်ဒဲးတၢ်ဆှၢမာ်အံးချံကအိၣ်လၢအပီၢ်(၁၅)ကလီၢ်ညါန့ၣ်လီၤႉမာ်အံးချံတဖၣ်အံၤတၢ်က့ၤထုးထီၣ်သူအီၤလၢတၢ်နၢမူလၢတၢ်ဖီကသူအဂီၢ်ႇတၢ်အီၣ်တၢ်အီဒီးတၢ်သူစ့ၢ်ကီးအီၤလၢတၢ်တ့ကသံၣ်ကသီအကျါအဂ့ၢ်န့ၣ်သ့ၣ်ညါဘၣ်လၢၦၤၦ့ၤမာ်အံးချံဖိတဖၣ်အအိၣ်န့ၣ်လီၤႉ
(သုးက့ ၃) အတၢ်ထီၣ်ခးပယီၤသုးကလၢၤဘျီ၀ဲအံၤ ပယီၤသုးသံ (၁၁) ဂၤဒီးမၤန့ၢ်ကျိချံၦာ်သၣ်အါအါဂီၢ်ဂီၢ်အဂ့ၢ် (KNU)ထုးထီၣ်ပာ်ဖျါ
လါနိၣ်၀့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်ခံရ့ၣ် ပာ်ဖှိၣ်ထီၣ်သးထီၣ်ဒုးမၤန့ၢ်၀ဲပယီၤသုးကလၢၤ(၃)ဖျၢၣ်ဒီးပယီသုးသံ(၁၁)ဂၤဒီးမၤန့ၢ်၀ဲကျိချံၦာ်သၣ်တဖၣ်အါအါဂီၢ်ဂီၢ်အဂ့ၢ်န့ၣ်(KNU)ထုးထီၣ်ပာ်ဖျါ၀ဲဖဲတနံၤအံၤလါနိၣ်၀့ဘၢၣ် ၁၄ သီအနံၤန့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁၂ သီအနံၤန့ၣ် KNLA သုးရ့ၣ်(၉)ဒီးသုးရ့ၣ်(၇)တဖၣ်ပာ်ဖှိၣ်ထီၣ်သး နုာ်လီၤခး၀ဲသုးရ့ၣ်(၇)ဟီၣ်က၀ီၤပူၤ(သၣ်ဆ့း)သုးကလၢၤဒီးသုးရ့ၣ်(၉)ဟီၣ်က၀ီၤပူၤဘီကထၣ်ႇတိၤသ့ၣ်ဖူ သုးကလၢၤလၢတသီအတီၢ်ပူၤဒီးဖဲန့ၣ်ပယီၤသုးသံ(၁၁)ဂၤဒီးမၤန့ၢ်၀ဲကျိဖးဒိၣ်ကျိဖိဃုာ်ဒီးကျိချံၦာ်သၣ်တဖၣ်အါအါဂီၢ်ဂီၢ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ တၢ်ဒုးကဲထီၣ်လၢတသီအတီၢ်ပူၤအံၤမၤန့ၢ်၀ဲ(MA)ကျိ ၈ ခိၣ်ႇ ကျိချံ(၃၀၇၀)ဖျၢၣ်ႇ (9mm) ၂ ခိၣ်ႇ (81mm) တခိၣ်ႇ (81mm)အချံ(၆၈)ဖျၢၣ်ႇ (60mm)အထီ(၁)ခိၣ်ႇ(60mm)အဖုၣ်(၄)ခိၣ်ႇ (60mm)အချံ(၁၁၃)ဖျၢၣ်ႇ(RPG-7)တခိၣ်ႇ RPG-7 အချံ(၇၇)ဖျၢၣ်ႇ စုကွံာ်မ့ၣ်ပိၢ်(၂၈)ဖျၢၣ်ႇ ဘီးကၢ်(၁)ခိၣ်ႇ ဘီးကၢ်အချံ(၈၈)ဖျၢၣ်ႇ (M14)ခီၣ်ယီၢ်မ့ၣ်ပိၢ်(၁၀)ဖျၢၣ်ႇ တိုက်မိုင်း(၁၀)ဖျၢၣ်ႇ ကျိချံဆၣ်အဒၢ(၁၇)ဘ့ၣ်ဒီးတၢ်ဃုခီၣ်ယီၢ်မ့ၣ်ပိၢ်စဲး(၁)ဖျၢၣ် အဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ခီဖျိတၢ်နုာ်လီၤခးပယီၤသုးကလၢၤအဃိသုးမီၤစိရိၤကဘီယူၤဟဲတ့ၢ်လီၤကဒါမ့ၢ်ပိၢ်အိၣ်၀ဲအဘျီ(၂၀)ဃၣ်ဃၣ်ညါဒီးခီဖျိကဘီယူၤဟဲခးလီၤတၢ်အဃိမၤန့ၢ်ပယီၤသုးအကျိချံၦာ်သၣ်တချုးခဲလၢာ်ဘၣ်န့ၣ်လီၤႉတၢ်ဒုးကဲထီၣ်ဘျီ၀ဲအံၤအပူၤပယီၤသုးတကပၤသံ၀ဲ(၁၁)ဂၤဒီးဘၣ်ဒိဘၣ်ထံးအနီၣ်ဂံၢ်ခီန့ၣ်တၢ်ဃုသ့ၣ်ညါမၤတံၢ်အီၤအဖၢမုၢ်လီၤအဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ ဒ်န့ၣ်အသိးတၢ်ဒုးကဲထီၣ်၀ံၤအလီၢ်ခံသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကမျၢၢ်ဒူသ၀ီပူၤကအိၣ်အဘျီ(၁၀)ဘျီဃၣ်ဃၣ်ညါအသိးဖဲမဟါလါနိၣ်၀့ဘၢၣ် ၁၃ သီအနံၤစ့ၢ်ကီးကဘီယူၤဟဲတ့ၢ်လီၤကဒီးမ့ၣ်ပိၢ်အဃိ လီၢ်က၀ီၤကမျၢၢ်ဘၣ်ဒိဘၣ်ထံးအိၣ်၀ဲအသိးကမျၢၢ်ဟံၣ်ဃီတၢ်သူၣ်ထီၣ်ဟးဂီၤ၀ဲတနီၤစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ ခီဖျိသုးမီၤစိရိၤကဘီယူၤဟဲက့ၤတ့ၢ်လီၤမ့ၣ်ပိၢ်လၢခံသီတပယူာ်ဃီအဃိခ့ၣ်အဲၣ်ယူၣ်(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ ကရူၢ်(၃)ဘ့ၣ် သ၀ီ(၁၈)ဖျၢၣ် ၦၤနီၣ်ဂံၢ်(၂၀၀၀၀)ဘျဲၣ်ဘၣ်ဃ့ၢ်ထီၣ်၀ဲဒီး လိၣ်ဘၣ်၀ဲဂ့ၢ်ဂီၢ်အူတၢ်တိစၢၤမၤစၢၤတဖၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံလၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤအပူၤ တၢ်ဒုးကဲထီၣ်၀ဲခဲလၢာ်(၃၈၂)ဘျီဒီးဖဲန့ၣ်ပယီၤသုးတကပၤသံ(၄၈၀)ဂၤႇဘၣ်ဒိ(၂၂၀)ဂၤန့ၣ်လီၤႉဒ်န့ၣ်အသိးစးထီၣ်ဖဲတနံၣ်အံၤလါအ့ဖြ့ၣ်န့ၣ်(KNLA)ထီၣ်ဒုးပယီၤသုးလၢ(ဒြိ)အိၣ်၀ဲ(၆၄)ဘျီအဃိပယီၤသုးသံ(၇၀)ဂၤႇဘၣ်ဒိ၀ဲ(၄၆)ဂၤအသိးမၤဟးဂီၤကွံာ်သုးမီၤစိရိၤအသုးကလၢၤအိၣ်၀ဲခဲလၢာ်(၇)ဖျၢၣ်လံအဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ