KNLA နုာ်လီၤခး(ခၠီနခွၣ်)ပၢၤကီၢ်၀ဲၤလီၢ်အခါ ပၢၤကီၢ်သံ (၃) ဂၤဒီးဖီၣ်သမူန့ၢ်၀ဲ (၄) ဂၤ
လါနိၣ်၀့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါနိၣ်၀့ဘၢၣ် ၁၂ သီ ဂီၤခီအဆၢကတီၢ်န့ၣ် KNLA (သုးက့ ၆) သုးရ့ၣ်(၁၇)သုးပာ်ဖှိၣ် နုာ်လီၤခး၀ဲ(ကၠဲၣ်မယီကီၢ်ဆၣ်) ခၠီနခွၣ်ပၢၤကီၢ်၀ဲၤလီၢ်ဒီး ပၢၤကီၢ်သံ(၃)ဂၤအကျါပၣ်ဃုာ်၀ဲပၢၤကီၢ်ခိၣ်တဂၤဒီး ဖီၣ်သမူန့ၢ်၀ဲ(၄)ဂၤအဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢသုးပာ်ဖှိၣ်ကရူၢ်အအိၣ်န့ၣ်လီၤႉ ပယီၤသုးလၢတၢ်ဖီၣ်သမူန့ၢ်၀ဲတဖၣ်န့ၣ်မ့ၢ်၀ဲပၢၤကီၢ်သုးစကီၤအ့ကိၤႇသုးဖိလွ့ၤကိၤဟ့ႇသုးစကီၤပြံမၠိအ့ႇ သုးဖိကိၤလ့သ့ၣ်တဖၣ်ဒီးအသံတဖၣ်မ့ၢ်၀ဲပၢၤကီၢ်ခိၣ်လၣ်ကၠီၤအူႇသုးစကီၤပြံစိည့အူဒီးသုးဖိအီၤနါစိၤသ့ၣ်တဖၣ်န့ၣ်လီၤႉတကးဒံးဘၣ်အမဲာ်ညါတၢ်မၤန့ၢ်၀ဲ(AK-47)တခိၣ်ႇ(M-16)လွံၢ်ခိၣ်ႇ(G-3)တခိၣ်ႇ(၆၀ မမ)ကျိဖုၣ် တခိၣ်ႇ မ့ၣ်ပိၢ်ခံဖျၢၣ်ဒီးကျိချံၦာ်သၣ်တဖၣ်အဂ့ၢ်န့ၣ် ပယိၤဂီၤသုးကျိၤၦၤကတိၤတၢ်ပၢတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ KNLA သုးရ့ၣ်(၁၇) ပယိၤဂီၤသုးကျိၤ ၦၤကတိၤတၢ်ပၢ စီၤအဲၣ် စံး၀ဲလၢ“ပဖီၣ်န့ၢ်၀ဲဒၣ်ပၢၤကီၢ်(၄)ဂၤႉ လၢပ၀ဲတကပၤန့ၣ်တၢ်ဘၣ်ဒိဘၣ်ထံးတအိၣ်ဘၣ်ႉ(စကစ)အစိၤအံၤၦၤကညီတၢ်အိၣ်မူတၢ်ဂဲၤႇပၢၢ်တုၤလၢမုၢ်ကျိၤ၀ဲၤကွာ်န့ၣ်တၢ်ဘံၣ်တၢ်ဘၢတအိၣ်လၢၤဘၣ်ဒီးဒ်သိးတၢ်သ့ၣ်တဖၣ်အံၤပလဲၤခီပတာ်အီၤကန့ၢ်အဂီၢ်န့ၣ်ပကကွၢ်ဆၢၣ်မဲာ်သကိးတၢ်ကီတၢ်ခဲသ့ၣ်တဖၣ်အံၤဒီးဒ်သိးတၢ်ပၢၢ်ဆၢကကတၢၢ်ကွံာ်လၢအဆိအချ့အဂီၢ်န့ၣ်ပကပာ်ဖှိၣ်မၤသကိးတၢ်ခဲလၢာ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါနိၣ်၀့ဘၢၣ် ၁၃ သီအနံၤန့ၣ်လီၤႉ တၢ်ဒုးကဲထီၣ်လၢခၠီနခွၣ်ပၢၤကီၢ်၀ဲၤလီၢ်ကရၢၢ်ပူၤကဲထီၣ်သး၀ံၤအလီၢ်ခံခီဖျိပယီၤသုးကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ်လၢသ၀ီလၢအိၣ်ဘူးပၢၤကီၢ်၀ဲၤလီၢ်အခိၣ်အဃၢၤတဖၣ်ကအိၣ်(၁၃)ဘျီညါအဃိဘၣ်ဒိ၀ဲသီခါ(၁)ပါဒီးသ၀ီဖိတဂၤအသိးလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂၤ(၅၀၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ် န့ၣ်လီၤႉ (ခၠီနခွၣ်သ၀ီ) ပၢၤကီၢ်၀ဲၤလီၢ်ဒီးတိၤတၢ်ဘံၣ်တၢ်ဘၢတြဲၤ(gate)တၢ်လီၢ်သ့ၣ်တဖၣ်အံၤန့ၣ် ကညီသုးခိးကီၢ်ဆၢ (BGF)ႇပၢၤကီၢ်ႇပယီၤသုးတဖၣ်အိၣ်ဆီလီၤသးဟံး၀ဲတၢ်ဘံၣ်တၢ်ဘၢဒီးဖဲအပူၤကွံာ်လါမ့ၤအခါစ့ၢ်ကီးတၢ်ပၢၢ်ဆၢကရူၢ်သုးပာ်ဖှိၣ်နုာ်လီၤခး၀ဲခၠီနခွၣ်တိၤတၢ်ဘံၣ်တၢ်ဘၢတြဲၤ(gate)တၢ်လီၢ်တခါအဃိ ပယီၤသုးသံ (၅) ဂၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ဂုာ်ဆူၣ်ပျိဆူၣ်ႇတၢ်ဟုၣ်တၢ်ဘျၣ်ဟဲအါထီၣ်လၢကၠၤအ့စ့ၣ်ကၠံ၀့ၢ်ပူၤ
လါနိၣ်၀့ဘၢၣ် ၁၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ ကတီၢ်ခဲအံၤခီဖျိတၢ်ဟုၣ်တၢ်ဘျၢၣ်ႇတၢ်ဂုာ်ဆူၣ်ပျိဆူၣ်ကဲထီၣ်သး ဟဲအါထီၣ်၀ဲအဃိၦၤဟးထီၣ်က့ၤလီၤလၢ၀့ၢ်ပူၤလီၤစှၤ၀ဲအဂ့ၢ်န့ၣ်ကမျၢၢ်လၢအိၣ်ပူၤတဖၣ်စံး၀ဲန့ၣ်လီၤႉ နိၣ်တကီကီၢ်ဆၣ်အပူၤလၢ၀့ၢ်ခၢၣ်သးႇက၀ီၤဒ့ကျဲပူၤတဖၣ်န့ၣ်ခီဖျိတၢ်ဟုၣ်တၢ်ဘျၣ်ႇတၢ်ဂုာ်ဆူၣ်ပျိဆူၣ်ကဲထီၣ်သးအါထီၣ်အဃိလီၢ်က၀ီၤကမျၢၢ်တဖၣ်ဟးထီၣ်လၢတၢ်ချၢတဘူၣ်လၢၤဘၣ်အဂ့ၢ်န့ၣ်ကမျၢၢ်လၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ “လၢညါခါန့ၣ်ပနၢ်ဟူဘၣ်လၢၦၤဟးဟုၣ်တၢ်လီၤႉတနံၣ်အံၤပနၢ်ဟူဘၣ်လၢၦၤဟးဂုာ်ဆူၣ်ၦၤစ့ဒၢလၢဆဲးကဲးလိၤအိၣ်မီၤနီၤႉၦၤအိၣ်လၢ၀့ၢ်ပူၤတဖၣ်နါက့လဲၤလၢဖၠါပူၤလီၤစှၤ၀ဲႉဖဲမဟါန့ၣ်ၦၤဂုာ်ဆူၣ်ၦၤတဂၤအစ့ဒၢပၣ်၀ဲဒၣ်စ့အကလီၢ်(၄၀)ညါႉတၢ်မ့ကဲထီၣ်သးန့ၣ်အါလၢမုၢ်ဆါခီလီၤႉၦၤအိၣ်အါအဆၢကတီၢ်နါက့ဂုာ်ဆူၣ်ၦၤစ့ဒၢလီၤႉမုၢ်နၤခီန့ၣ်ၦၤဟးထီၣ်လၢတၢ်ချၢကဘူၣ်လၢၤ၀ဲလဲၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါန့ၣ်လီၤႉ ဘၣ်ဃးတၢ်ဂုာ်ဆူၣ်ၦၤစ့ကဲထီၣ်သးလၢ၀့ၢ်ပူၤအံၤန့ၣ်တၢ်လဲၤတီၣ်ဖျါထီၣ်လၢပၢၤကီၢ်၀ဲၤလီၢ်အအိၣ်အိၣ်၀ဲဘၣ်ဆၣ် တၢ်ဟံးန့ၢ်ဂ့ၢ်၀ီတအိၣ်၀ဲဘၣ်အဂ့ၢ်န့ၣ် ကမျၢၢ်လၢအိၣ်ကၠၤအ့စ့ၣ်ကၠံ၀့ၢ်ပူၤတဂၤစံး၀ဲဒ်အံၤန့ၣ်လီၤႉ “ၦၤတနီၤန့ၣ်လဲၤတၢၣ်၀ဲပၢၤကီၢ်အိၣ်မီၤနီၤႉတနီၤခီန့ၣ်တလဲၤတၢၣ်၀ဲပၢၤကီၢ်လၢၤဘၣ်ႉနတၢၣ်နါက့မးတလီၤဆီနီတမံၤန့ၣ်ႉၦၤတမၤဘံဘူသးလၢၤဘၣ်ႉပၢၤကီၢ်ခီဒုတဲ၀ဲမီၤလၢကဟံ၀ဲအရ့န့ၣ်မ့၀ံၤဘျီန့ၣ်ဒ်အံၤလီၤ”အဂ့ၢ်န့ၣ်စံးဘၣ်ခ့ၣ်အဲၣ်စံၣ်–ကညီတၢ်ကစီၣ်န့ၣ်လီၤႉ တၢ်ဟးတမျာ်ဂုာ်ဆူၣ်ၦၤကျိၣ်ၦၤစ့ကဲထီၣ်သးဒ်အံၤန့ၣ်ခီဖျိလၢတၢ်လုၢ်တၢ်ၦ့ၤဒိၣ်ထီၣ်လၢလီၢ်က၀ီၤပူၤဒီး တနံၤဘၣ်တနံၤခီဖျိတၢ်လုၢ်အီၣ်နီၢ်ခိသးသမူဟဲဃံးဒိၣ်ထီၣ်အဃိလီၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ ဒ်န့ၣ်အသိးလၢဖၣ်အၣ်ႇလူၢ်ပျဲၢ်ႇကီးတရံးဒီးမၠၣ်၀တံၣ်၀့ၢ်တကးဒံးဘၣ်အမဲာ်ညါလၢလီၢ်က၀ီၤဒူသ၀ီတဖၣ်အပူၤစ့ၢ်ကီးတၢ်ဟုၣ်တၢ်ဘျၣ်ႇတၢ်ဂုာ်ဆူၣ်ပျိဆူၣ်ၦၤစ့ကဲထီၣ်သးအါထီၣ်စ့ၢ်ကီး၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ
တၢ်ခးသံပယီၤသုးရ့ၣ်ခိၣ်ခံဒီးအၦၤ(၂)ဂၤကဲထီၣ်သး၀ံၤအလီၢ်ခံခီဖျိပယီၤသုးနုာ်လီၤအါအါဂီၢ်ဂီၢ်အဃိလီၢ်က၀ီၤကမျၢၢ်ဘၣ်ဃ့ၢ်ထီၣ်
လါနိၣ်၀့ဘၢၣ် ၁၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢတလၢၤကီၢ်စဲၣ် သထိၣ်၀့ၢ်ပူၤ ဖဲမဟါလါနိၣ်၀့ဘၢၣ် ၁၀ သီ ဂီၤခီအဆၢကတီၢ်န့ၣ် တၢ်ခးသံ၀ဲ သထိၣ်နီၣ်ဂံၢ်(၉)သုးတၢ်သိၣ်လိ သုးရ့ၣ်ခိၣ်ခံဃုာ်ဒီးအၦၤ(၂)ဂၤဖဲ၀့စ့ၤသ၀ီကဲထီၣ်သး၀ံၤအလီၢ်ခံ ခီဖျိပယီၤသုးနုာ်လီၤလၢသ၀ီပူၤအါအါဂီၢ်ဂီၢ်ဒီးခးနါစိၤတၢ်အဃိလီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ ဖဲမဟါလါနိၣ်၀့ဘၢၣ် ၁၀ သီ ဂီၤခီ ၅ နၣ်ရံၣ်တခီအဆၢကတီၢ်န့ၣ် သထိၣ် နီၣ်ဂံၢ်(၉)သုးတၢ်သိၣ်လိ သုးရ့ၣ်ခိၣ်ခံ သုးခိၣ်ဒိၣ်ဖိခၠ့ၣ်၀့သူၤဒီးအၦၤလၢဟဲက့ၤဒီးသိလ့ၣ်အိၣ်ဟဲက့ၤလၢ၀့စ့ၤသ၀ီအံၤ ခီဖျိတၢ်ကွၢ်အ၀ဲသ့ၣ်လီၤဆီအဃိ သထိၣ်(ပကဖ)တၢ်ဒီသဒၢကမျၢၢ်သုးနုာ်လီၤခး၀ဲဒီးဖဲန့ၣ်ပယီၤသုးသံ(၃)ဂၤအကျါပၣ်ဃုာ်သုးခိၣ်ဒိၣ်ဖိခၠ့ၣ်၀့သူၤဒီး စံၣ်ဖျိးထီၣ်ကွံာ်တဂၤႇမၤန့ၢ်၀ဲကျိ(၃)ခိၣ်လၢသိလ့ၣ်ပူၤအဂ့ၢ်န့ၣ် သထိၣ်(ပကဖ)ထုးထီၣ်ပာ်ဖျါ၀ဲန့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံဖဲမုၢ်ဃ့ၢ်လီၤ ၃ နၣ်ရံၣ်အဆၢကတီၢ်န့ၣ် ပယီၤသုးနုာ်လီၤလၢ၀့စ့ၤသ၀ီပူၤကအိၣ်အဂၤ(၈၀)ဃၣ်ဃၣ်ညါဒီးခးလီၤတပျုာ်တပျီာ်တၢ်လၢသ၀ီပူၤအဃိ လီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သထိၣ်တၢ်ဒီသဒၢကမျၢၢ်သုးၦၤဘၣ်မူဘၣ်ဒါတဂၤစံး၀ဲဒ်အံၤ န့ၣ်လီၤႉ “တၢ်ဒုးကဲထီၣ်လၢ၀့စ့ၤသ၀ီမီၤနီၤႉသ၀ီဖိတဖၣ်ဃ့ၢ်ထီၣ်ႉတၢ်ဒုုးကဲထီၣ်၀ံၤကအိၣ်အမံးနံး(၃၀)ဃၣ်ဃၣ်န့ၣ်အ၀ဲသ့ၣ်ဟဲထၢၦၤသံစိၣ်ႉဖဲမုၢ်ဃ့ၢ်လီၤ(၃)နၣ်ရံၣ်န့ၣ်ပယီၤသုးဟဲနုာ်လီၤကဒီးအဂၤ(၈၀)ဃၣ်ဃၣ်ညါႉအ၀ဲသ့ၣ်ဟးခးလီၤတပျုာ်တပျီာ်တၢ်ဒုအိၣ်မီၤနီၤႉမ့မ့ၢ်ကျိဖးဒိၣ်ခီဒုတခး၀ဲဒံးဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါလါနိၣ်၀့ဘၢၣ် ၁၀ သီအနံၤန့ၣ်လီၤႉ လၢန့ၣ်အမဲာ်ညါတၢ်ဒုးကဲထီၣ်ဘျီ၀ဲအံၤတၢ်မၤပူၤဖျဲးထီၣ်က့ၤကမျၢၢ်လၢပယီၤသုးရ့ၣ်ခိၣ်ခံခၠ့ၣ်၀့သူၤဒီးအၦၤဖီၣ်ဃာ်၀ဲအံၤတဖၣ်အံၤစ့ၢ်ကီးအဂ့ၢ်န့ၣ် သထိၣ်(ပကဖ)လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ သုးခိၣ်ဒိၣ်ဖိခၠ့ၣ်၀့သူၤအံၤမ့ၢ်စ့ၢ်ကီးၦၤလၢအပၣ်ဃုာ်၀ဲလၢအပူၤကွံာ်လါယူၤ ၂၆ သီ တၢ်နုာ်လီၤဒွဲၣ်အူအီၣ်(နိၣ်ဖးထီ)သ၀ီအံၤအကျါတဂၤဒီးမ့ၢ်စ့ၢ်ကီးၦၤတဂၤလၢအဟးလူၤဖီၣ်၀ဲဒၣ် ၦၤဟူးဂဲၤတၢ်ဖိလၢသထိၣ်ကီၢ်ဆၣ်ပူၤအဂ့ၢ်န့ၣ် သထိၣ်(ပကဖ)လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လ့က့ၣ်ကိာ်လီၢ်က၀ီၤကမျၢၢ်ၦၤဃ့ၢ်မှံဟးဖျိးတဖၣ်လိၣ်ဘၣ်၀ဲယၣ်လုးဒီးဆ့ကၤကလၢၤ
လါနိၣ်၀့ဘၢၣ် ၁၁ သီႇ ၂၀၂၂ နံၣ်ႇ ခ့ၣ်အဲးစံၣ် လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ လီၢ်က၀ီၤဒူသ၀ီဃုာ်ဒီးလ့လ့ၣ်ကိာ်ၦၤဃ့ၢ်တၢ်ဒုးဖိအဂၤ(၅၀၀၀)ဘျဲၣ်လၢ အလဲၤစံၣ်အိၣ်သူမှဲကျိကၢၢ်နံၤဒီတကျိၤအံၤတဖၣ် ကတီၢ်ခဲအံၤခီဖျိတၢ်ချံၣ်ထီၣ်လံအဃိ လိၣ်ဘၣ်၀ဲယၣ်လုးဒီးဆ့ကၤကလၢၤသ့ၣ်တဖၣ်အဂ့ၢ်န့ၣ်ၦၤလၢမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ “ခီဖျိဖိသၣ်အိၣ်အါအဃိလိၣ်ဘၣ်၀ဲဒၣ်ယၣ်လုးဒီးဆ့ကၤကလၢၤတဖၣ်မီၤနီၤႉလၢၦၤသူၣ်က့သးၦၢ်အဂီၢ်နါက့လိၣ်စ့ၢ်ကီးလီၤႉခီဖျိတၢ်တလၢတၦဲၤဘၣ်အဃိအ၀ဲသ့ၣ်ဘၣ်ကၤဖှိၣ်ကထြၢ၀ဲဆ့ကၤခံကထြၢသၢကထြၢဒ်န့ၣ်လီၤမီၤနီၤႉမ့မ့ၢ်လၢမုၢ်ဆါခီန့ၣ်တၢ်ကိၢ်ႇလၢမုၢ်နၤခီန့ၣ်တၢ်ချံၣ်ဒိၣ်ထီၣ်မီၤနီၤႉကကုၢ်ထီၣ်မ့ၣ်အူဒၢးကုၢ်ထီၣ်တဘူၣ်ဘၣ်ႉပဟးစံၣ်ဒ်အံၤနီၢ်တလါကဒီးန့ၣ်ကၦဲၤထီၣ်တနံၣ်လီၤ”အဂ့ၢ်န့ၣ်လ့ၣ်က့ၣ်ကိာ်လီၢ်က၀ီၤၦၤဃ့ၢ်တၢ်ဒုးဖိတဂၤစံး၀ဲန့ၣ်လီၤႉ လၢမၠၣ်၀တံၣ်ကလံၤထံး လ့က့ၣ်ကိာ်–ဖလူ–ဂီၤလ့ၤကျဲန့ၣ် စးထီၣ်လါနိၣ်၀့ဘၢၣ် ၉ သီ တုၤလၢလါနိၣ်၀့ဘၢၣ် ၁၀ သီ ဂီၤခီအဆၢကတီၢ်န့ၣ် လၢဆိၣ်စံမၠဲၣ်သ၀ီဒီးသ့ၣ်ဘီဘိသ၀ီတကပၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးတဖၣ်အဘၢၣ်စၢၤတၢ်ဒုးကဲထီၣ်ဒံး၀ဲအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ လ့က့ၣ်ကိာ်(က၀ီၤဒ့ ၃)ကမျၢၢ်လၢဟဲအိၣ်စံၣ်အိၣ်သ့ၣ်ဘီဘိသ၀ီတဂၤစံး၀ဲ“စှၤသီအံၤတၢ်ချံၣ်ဒိၣ်ထီၣ်မီၤနီၤႉ ယၣ်လုးႇဆ့ကၤကလၢၤတအိၣ်ဘၣ်ႉဖိသၣ်တဖၣ်လိၤကိၢ်ႇတၢ်ကူးအီၣ်ႇပသိၣ်ဘၣ်တၢ်ခုၣ်အဃိကသံၣ်နါက့တအိၣ်ဘၣ်ႉပဘၣ်လဲၤၦ့ၤကသံၣ်လၢယိၤကီၢ်တကပၤမီၤနီၤႉစ့ဒၢးတအိၣ်တၢ်မၤစ့ၢ်ကီးတအိၣ်ႉၦၤတဟဲမၤဘူၣ်လီၤတၢ်ဒ်သိးလၢညါခါလၢၤဘၣ်အဃိၦၤဃ့ၢ်တၢ်ဒုးဖိတဖၣ်တၢ်ကီတၢ်ခဲအိၣ်ထီၣ်လၢကအီၣ်ကအီအဂီၢ်မီၤနီၤ”အဂ့ၢ်န့ၣ်စံး၀ဲန့ၣ်လီၤႉ ခီဖျိပယီၤသုးနုာ်လီၤမၤတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤပူၤအဃိ လီၢ်က၀ီၤဒူသ၀ီအဖျၢၣ်(၂၀)ဘျဲၣ်ကမျၢၢ်ဘၣ်ဃ့ၢ်မှံဟးဖျိး၀ဲအဂၤ(၅၀၀၀)ဘျဲၣ်ဒီးၦၤသ့ၣ်တဖၣ်အံၤလဲၤစံၣ်အိၣ်၀ဲလၢကီၢ်ကၠီၣ်တဲၣ်–ကီၢ်ပယီၤကီၢ်ဆၢသူမှဲကျိကၢၢ်နံၤအဖၢမုၢ်ဒံးန့ၣ်လီၤႉ ဖဲအပူၤကွံာ်လါအီးကထိဘၢၣ်အခါစ့ၢ်ကီးဒ်လီၢ်က၀ီၤခိၣ်နၢ်အတၢ်ရဲၣ်တၢ်ကျဲၤအသိးန့ၣ်ထံမဲး၀ါခံႇပဟံၣ်ကျီးႇဖလူဖးဒိၣ်ႇဖလူဖိသ၀ီလီၢ်က၀ီၤကမျၢၢ်တနီၤက့ၤအိၣ်လၢသ၀ီပူၤအိၣ်၀ဲဘၣ်ဆၣ်ခီဖျိတၢ်ဖံးအီၣ်မၤအီၣ်ကျီးႇဟံၣ်ဃီတဖၣ်ဟးဂူာ်ဟးဂီၤအဃိတၢ်ကီတၢ်ခဲအိၣ်လၢကအိၣ်ကဆိးႇကဖံးအီၣ်မၤအီၣ်တၢ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
ပယီၤသုးခးလီၤကျိဖးဒိၣ်အဃိချၢၣ်–တကူၣ်တၢၣ်သ၀ီဖိဘၣ်ဒိ ၁ ဂၤ
လါနိၣ်၀့ဘၢၣ် ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ်(နိၣ်တကီကီၢ်ဆၣ်)အပူၤ ဖဲတနံၤအံၤလါနိၣ်၀့ဘၢၣ် ၁၀ သီအနံၤန့ၣ် ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်လၢအိၣ်ဆီလီၤသး ဖဲတကူၣ်တၢၣ်သ၀ီပၢၤကီၢ်၀ဲၤလီၢ်ကရၢၢ်ပူၤအံၤတဖၣ်ခးလီၤကျိဖးဒိၣ်ဆူသ၀ီပူၤအဃိဘၣ်ဒိ၀ဲလီၢ်က၀ီၤပိာ်မုၣ်(၁) ဂၤအဂ့ၢ်န့ၣ် သ့ၣ်ညါဘၣ်လၢသ၀ီဖိတဖၣ်အအိၣ်န့ၣ်လီၤႉ လၢနိၣ်တကီကီၢ်ဆၣ်အပူၤ ပယီၤသုးခီၣ်သုးရ့ၣ်(ခလရ–၃၂)စုတီၤအဖီလာ်ဒီး BGF(၁၀၂၁) သုးရ့ၣ် သုးပာ်ဖှိၣ်တဖၣ် ဖဲတနံၤအံၤဂီၤခီ ၉ နၣ်ရံၣ်အဆၢကတီၢ်န့ၣ် အ၀ဲသ့ၣ်နုာ်လီၤလၢတကူၣ်တၢၣ်သ၀ီပူၤဒီး ခးလီၤကျိဖးဒိၣ်ဆူက၀ီၤဒ့ပူၤအဃိ ဘၣ်၀ဲဒၣ်နါသါသါအ့(၄၀)နံၣ်အခိၣ်သၣ်ဃံအဂ့ၢ်န့ၣ် လီၢ်က၀ီၤဖိတဂၤ စံး၀ဲဒ်အံၤန့ၣ်လီၤႉ “ပယီၤသုးဟဲလီၤဒီးသုးကူသုးကၤကအိၣ်လၢအဂၤ(၄၀)ညါႉဟဲစိာ်ဃုာ်ကျိဖးဒိၣ်ကျိဖိလၢသ၀ီပူၤဒီး ခးလီၤကျိဖးဒိၣ်ဆူတကူၣ်တၢၣ်က၀ီၤဒ့သီပူၤဒီးသ၀ီမုၢ်ထီၣ်ၦၤဟံၣ်ပူၤကအိၣ်ယဲၢ်ထံၣ်ဃုထံၣ်ညါႉအဃိန့ၣ်ဘၣ်၀ဲဒၣ်ၦၤမုၢ်ၦၢ်တဂၤလၢအသ့ကွံာ်အရီဘၢၣ်အထုးအံၤမီၤနီၤႉမတၤတဂၤမးဟဲခးအ၀ဲသ့ၣ်တအိၣ်ဘၣ်”အဂ့ၢ်န့ၣ်တကူၣ်တၢၣ်သ၀ီဖိတဂၤစံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိပယီၤသုးပာ်ဖှိၣ်လၢအိၣ်ဆီလီၤသးဖဲတကူၣ်တၢၣ်သ၀ီပၢၤကီၢ်၀ဲၤလီၢ်ကရၢၢ်ပူၤအံၤတဖၣ်ခးလီၤကျိဖးဒိၣ်ဆူသ၀ီပူၤတလီၢ်လီၢ်အဃိသ၀ီဖိလၢအိၣ်ဘူးသုးကလၢၤအခိၣ်အဃၢၤဖဲန့ၣ်တဖၣ်တုၤလၢခဲအံၤက့ၤအိၣ်လၢအဟံၣ်တဘူၣ်ဒံးဘၣ်ဒီးဘၣ်ဃ့ၢ်မှံဟးဖျိး၀ဲအဖၢမုၢ်ဒံးအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါအ့ဖြ့ၣ်အခါစ့ၢ်ကီးပယီၤသုးလၢအိၣ်ပၢၤကီၢ်၀ဲၤလီၢ်ကရၢၢ်ပူၤအံၤတဖၣ်ခးလီၤကျိဖးဒိၣ်ဆူသ၀ီပူၤအဃိ ဘၣ်သံ၀ဲဒၣ်တကူၣ်တၢၣ်သ၀ီဖိ(၂)ဂၤဒီးနါသဲထိၤသ၀ီဖိ(၁)ဂၤအသိး ဘၣ်ဒိစ့ၢ်ကီး၀ဲမၠိၣ်ဟီသ၀ီဖိ(၁)ဂၤဒံးန့ၣ်လီၤႉ
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢလူၤသီကီၢ်ဆၣ်ပူၤအဃိတၢ်ဘါယွၤသရိာ်ဒီးကၠိတၢ်သူၣ်ထီၣ်ဟးဂီၤ
လါနိၣ်၀့ဘၢၣ် ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) လူၤသီကီၢ်ဆၣ်အပူၤ ဖဲမဟါလါနိၣ်၀့ဘၢၣ် ၉ သီ ဂီၤခီ ၁ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိပယီၤသုးမီၤစိရိၤကဘီယူၤ ဟဲတ့ၢ်လီၤမ့ၣ်ပိၢ်လၢစီၤမုၢ်ပျီကရူၢ် (တၤဘီကီာ်ဒၢ)သ၀ီပူၤအဃိ တၢ်ဘါယွၤသရိာ်ဒီးကၠိတၢ်သူၣ်ထီၣ်တဖၣ်ဟးဂူာ်ဟးဂီၤ၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ ခီဖျိသုးမီၤစရိၤကဘီယူၤဟဲတ့ၢ်လီၤမ့ၣ်ပိၢ်အဃိခရံာ်ဖိတၢ်ဘါယွၤသရိာ်ဒီးတီၤဖုၣ်ကၠိတၢ်သူၣ်ထီၣ်ဟးဂူာ်ဟးဂီၤ၀ဲတကးဒံးဘၣ်အမဲာ်ညါဟံၣ်လၢအိၣ်ဘူးဒီဒတၢ်ဘါယွၤသရိာ်တဖၣ်စ့ၢ်ကီးဟးဂီၤ၀ဲအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ခီဖျိသုးမီၤစိရိၤအံၤပညိၣ်၀ဲကမျၢၢ်ထံဖိကီၢ်ဖိသူ၀ဲကဘီယူၤဟဲတ့ၢ်လီၤမ့ၣ်ပိၢ်အဃိ ဟံၣ်ဃီတၢ်သူၣ်ထီၣ်ဟးဂူာ်ဟးဂီၤအိၣ်၀ဲဘၣ်ဆၣ်တၢ်ဟးဂူာ်ဟးဂီၤအနီၣ်ဂံၢ်နီၣ်ဒွးခီန့ၣ်တၢ်သမံသမိးအီၤအဖၢမုၢ်လီၤအဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ ဖဲအပူၤကွံာ်(၂၀၂၁)လါမးရှး ၂၇ သီအနံၤန့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဆိကတၢၢ်တဘျီလၢ လူၤသီကီၢ်ဆၣ်ပူၤကဲထီၣ်သး၀ံၤအလီၢ်ခံ ဖဲတနံၣ်အံၤ(၂၀၂၂)လါမးရှး ၂၇ သီအနံၤန့ၣ် ဟဲတ့ၢ်လီၤကဒီး၀ဲမ့ၣ်ပိၢ်ခံဘျီတဘျီလၢလူၤသီကီၢ်ဆၣ်(ဒ့ၣ်ပူၤနိၣ်)သ၀ီပူၤန့ၣ်လီၤႉ ဖဲအပူၤကွံာ်လါအ့ဖြ့ၣ်အခါစ့ၢ်ကီးပယီၤသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢဒ့ၣ်ပူၤနိၣ်သ၀ီဒီးသ့ၣ်ကၤထၣ်သ၀ီပူၤအိၣ်အဘျီ(၁၀)ဃၣ်ဃၣ်ညါအဃိကၠိဒီးဟံၣ်ဃီတၢ်သူူၣ်ထီၣ်ဟးဂီၤ၀ဲတနီၤအသိးလီၢ်က၀ီၤကမျၢၢ်တဖၣ်ဘၣ်ဃ့ၢ်မှံဟးဖျိး၀ဲအဂ့ၢ်န့ၣ်လီၢ်က၀ီၤၦၤဟ့ၣ်တၢ်ကစီၣ်ဖိစံး၀ဲအသိးသ့ၣ်ညါဘၣ်န့ၣ်လီၤႉ သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံစးထီၣ်(၂၀၂၁)တုၤလၢတနံၣ်အံၤလါအီးကထိဘၢၣ်လၢာ်န့ၣ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤအပူၤအိၣ်၀ဲခဲလၢာ်(၁၀၇)ဘျီလံအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါနိၣ်၀့ဘၢၣ် ၇ သီအနံၤန့ၣ်လီၤႉ
တၢ်ဒုးကဲထီၣ်အဃိပယီၤသုးသံ(၃)ဂၤအဂ့ၢ်(Palaw-KPDF)ထုးထီၣ်ပာ်ဖျါ
လါနိၣ်၀့ဘၢၣ် ၁၀ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် မၠ့ၣ်ကီၢ်ရ့ၣ် ပလီၢ်ကီၢ်ဆၣ်အပူၤ ဖဲမဟါလါနိၣ်၀့ဘၢၣ် ၉ သီအနံၤန့ၣ် ကညီတၢ်ဒီသဒၢကမျၢၢ်သုး(Palaw-KPDF)ဒီးပယီၤသုးအဘၢၣ်စၢၤတၢ်ဒုးကဲထီၣ်အဃိ ပယီၤသုးသံ(၃)ဂၤအဂ့ၢ်န့ၣ် (Palaw-KPDF)ထုးထီၣ်ပာ်ဖျါ၀ဲန့ၣ်လီၤႉ လၢပလီၢ်ကီၢ်ဆၣ်အပူၤ ပယီၤသုးလၢအနုာ်လီၤဟံကျဲတၢ်ဘံၣ်တၢ်ဘၢဖဲနါပယိၣ်သ၀ီဒီးထမ့မစါသ၀ီ အဘၢၣ်စၢၤတဖၣ်အံၤဘၣ်တၢ်နုာ်လီၤခးအီၤလၢကညီတၢ်ဒီသဒၢကမျၢၢ်သုး(Palaw-KPDF)ဘိၤခီဖၠူၤသုးကျိၤအဂ့ၢ်န့ၣ် (Palaw-KPDF)တၢ်ဘိးဘၣ်ရၤလီၤမူဒါခိၣ်တဂၤ စံး၀ဲန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်အခါပယီၤသုးလၢအဟဲဟံကျဲတၢ်ဘံၣ်တၢ်ဘၢတဖၣ်န့ၣ်က့ၤကဒါလီၢ်ခံမီၤနီၤႉ ပယီၤသုးနီၣ်ဂံၢ်ကအိၣ်လၢအဂၤ(၃၀)ညါႉပဒိးန့ၢ်ဃာ်တၢ်ကစီၣ်အဃိပလဲၤနုာ်လီၤခး၀ဲမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တၢ်ဒုးကဲထီၣ်ဘျီ၀ဲအံၤတံာ်တာ်၀ဲ(၁၅)မံးနံးဃၣ်ဃၣ်ဒီးမ့မ့ၢ်(Palaw-KPDF)ဘိၤခီဖၠူၤသုးကျိၤအၦၤသုးဖိတဖၣ်ခီန့ၣ် တၢ်ဘၣ်ဒိဘၣ်ထံးတအိၣ်၀ဲနီတမံၤဘၣ်အဂ့ၢ်န့ၣ်(KPDF)တကပၤစံး၀ဲန့ၣ်လီၤႉ “တၢ်ဒုးကဲထီၣ်ဆဲးတဲးတပယူာ်ဃီအဃိကျိခံၦာ်သၣ်လၢာ်အါမးမီၤနီၤႉလၢတၢ်န့ၣ်အဃိပလိၣ်ဘၣ်၀ဲဒၣ်ကမျၢၢ်ထံဖိကီၢ်ဖိအတၢ်ဆီၣ်ထွဲမၤစၢၤအါမးလီၤ” အဂ့ၢ်န့ၣ် (Palaw-KPDF) တၢ်ဘိးဘၣ်ရၤလီၤမူဒါခိၣ် စံးအါထီၣ်၀ဲန့ၣ်လီၤႉ ဒ်န့ၣ်အသိးဖဲမဟါလါနိၣ်၀့ဘၢၣ် ၉ သီအနံၤစ့ၢ်ကီး လၢတနီသရံၣ်ကီၢ်ခီ မၠ့ၣ်ကီၢ်ရ့ၣ် ပလီၢ်ကီၢ်ဆၣ်အပူၤန့ၣ် ပယီၤသုးဒွဲၣ်အူအီၣ်၀ဲ(တပိၢ်သ၀ီ)ဟံၣ် ၄ ဖျၢၣ်အသိး ဒွဲၣ်အူအီၣ်စ့ၢ်ကီး၀ဲ သ့ၤကါတီသ၀ီႇပံၣ်ဒဲၣ်သ၀ီပူၤ ဟံၣ်တစှၤန့ၢ်အဖျၢၣ်(၁၀)ဘၣ်ညါအဂ့ၢ်န့ၣ်လီၢ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
သိလ့ၣ်တခိၣ်လၢအိၣ်ဟဲက့ၤလီၤလၢမၠၣ်၀တံၣ်လီၤတကျၢၢ်အဃိ ၦၤသံ(၇)ဂၤ
လါနိၣ်၀့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါနိၣ်၀့ဘၢၣ် ၉ သီ မုၢ်ထူၣ် ၁၁း၃၀ ဃၣ်ဃၣ်အဆၢကတီၢ်န့ၣ် သိလ့ၣ်တခိၣ်လၢအိၣ်ဟဲက့ၤလီၤလၢမၠၣ်၀တံၣ်၀့ၢ်အံၤဘျၢၣ်ဘၣ်၀ဲတၢ်ကပၤလီၤတကျၢၢ်၀ဲအဃိ ၦၤအိၣ်လၢသိလ့ၣ်ပူၤသံ၀ဲ(၇)ဂၤအဂ့ၢ်န့ၣ် ပလဲဖၠူၤၦၤဂ့ၢ်၀ီတၢ်တိစၢၤမၤစၢၤကရူၢ်ၦၤမၤတၢ်ဖိတဂၤစံး၀ဲန့ၣ်လီၤႉ လၢကီးတရံး–မၠၣ်၀တံၣ်အ့ရှါကျဲ တီနီၢ်ထံလီၤဆှူန့ၣ် သိလ့ၣ်တခိၣ်လၢအိၣ်ဟဲက့ၤလီၤလၢမၠၣ်၀တံၣ်၀့ၢ်အံၤ ဘျၢၣ်ဘၣ်၀ဲတၢ်ကပၤဒီးလီၤတဲာ်ကဒီးဆူတီနီၢ်ထံလီၤဆှူ(ဆိုင်းဘုတ်)အဃိၦၤအိၣ်လၢသိၣ်လ့ၣ်ပူၤ(၇)ဂၤသံ၀ဲ တဘျီဃီခဲလၢာ်အဂ့ၢ်န့ၣ် ပလဲဖၠူၤၦၤဂ့ၢ်၀ီတၢ်တိစၢၤမၤစၢၤကရူၢ် ၦၤမၤတၢ်ဖိတဂၤစံး၀ဲဒ်အံၤန့ၣ်လီၤႉ “သိလ့ၣ်န့ၣ်အိၣ်ဟဲက့ၤလီၤလၢမၠၣ်၀တံၣ်မီၤနီၤႉတၢ်ကဲထီၣ်သးန့ၣ်ကဘၣ်ဖဲမုၢ်ထူၣ် ၁၁း၃၀ န့ၣ်မီၤနီၤႉ အဘျၢၣ်ဘၣ်၀ဲတၢ်ကပၤလၢတၢ်ကလဲၤလီၤတီၢ်နီၢ်ထံလီၤဆှူန့ၣ်မီၤနီၤႉအဘျၢၣ်၀ဲ၀ံၤဘျီန့ၣ်ဘျၢၣ်ကဒီး၀ဲတီၢ်နီၢ်ထံလီၤဆှူ(ဆိုင်းဘုတ်)ႉအဃိန့ၣ်ၦၤအိၣ်လၢသိလ့ၣ်ပူၤခဲလၢာ်န့ၣ်သံ၀ဲဒၣ်တဘျီဃီလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ၦၤသံတဖၣ်န့ၣ်မ့ၢ်၀ဲပိာ်ခွါ(၅)ဂၤႇပိာ်မုၣ်(၂)ဂၤဒီးၦၤသ့ၣ်တဖၣ်အံၤတၢ်ဆှၢအီၤဆူကီးတရံးတၢ်ဆါဟံၣ်ၦၤသံလီၢ်ဒီးကတီၢ်ခဲအံၤတၢ်ထံၣ်ကဒီးၦၤအိၣ်လၢသိလ့ၣ်ဖီလာ်ဒံးတဂၤအဃိမ့ၢ်အသံတသံခီန့ၣ်ပာ်ဂၢၢ်ပာ်ကျၢၤတန့ၢ်ဒံးဘၣ်အဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ “ၦၤပိာ်ခွါ(၅)ဂၤဒီးပိာ်မုၣ်(၂)ဂၤလၢအသံတဖၣ်အံၤန့ၣ်ပဆှၢအီၤဆူကီးတရံးတၢ်ဆါဟံၣ်လံမီၤနီၤႉခဲအံၤၦၤတဲလၢၦၤထံၣ်ကဒီးၦၤသံတဂၤအဃိပလဲၤကွၢ်လံမီၤနီၤႉမ့မ့ၢ်အသံ(၇)ဂၤဒုလီၤတံၢ်လံႉခဲအံၤတဂၤခီန့ၣ်ပလဲၤကွၢ်အဖၢမုၢ်လီၤႉတၢ်တဂၤအံၤခီန့ၣ်ပပာ်ဂၢၢ်ပာ်ကျၢၤတန့ၢ်ဒံးဘၣ်”အဂ့ၢ်န့ၣ်စံး၀ဲန့ၣ်လီၤႉ ဒ်န့ၣ်အသိးဖဲအပူၤကွံာ်လါအီးကထိဘၢၣ် ၆ သီအနံၤစ့ၢ်ကီး လၢမၠၣ်၀တံၣ်အ့ရှါကျဲန့ၣ် (ပွ့ၣ်န့ၤခၠံၤ) ကၠးသိလ့ၣ်တခိၣ်လၢအိၣ်ဟဲထီၣ်လၢမီၣ်လမၠဲၣ်အံၤစ့ၢ်ကီးလီၤတကျၢၢ်၀ဲအဃိ ၦၤဂဲၤကလံၣ်ကၠးဖိလၢအိၣ်သိလ့ၣ်ပူၤ သံ၀ဲ(၉)ဂၤကဲထီၣ်တ့ၢ်အသးဒံးအဂ့ၢ်န့ၣ် (အလင်းသစ်)ဂ့ၢ်ဂီၢ်အူတၢ်တိစၢၤမၤစၢၤကရူၢ်စံး၀ဲန့ၣ်လီၤႉ
တၢ်နုာ်လီၤခး သၣ်တီၣ်ကၠံ သုးတၢ်သိၣ်လိဘံၣ်ဘၢတြဲၤ(gate)‚ပယီၤသုးသံ ၄ ဂၤ
လါနိၣ်၀့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် သၣ်တီၣ်ကၠံ၀့ၢ် က၀ီၤဒ့(၁) ဘယ့ၣ်နီၤသုးတၢ်သိၣ်လိကၠိ ဘံၣ်ဘၢတြဲၤ(gate)တၢ်လီၢ်အံၤ ဖဲတနံၤအံၤလါနိၣ်၀့ဘၢၣ် ၉ သီ ဂီၤခီ ၄ နၣ်ရံၣ်အဆၢကတီၢ်န့ၣ် တၢ်နုာ်လီၤခး၀ဲဘံၣ်ဘၢတြဲၤအံၤအဃိ ပယီၤသုးသံ(၄)ဂၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤႉ “ကဘၣ်ဖဲဂီၤခီ ၃ နၣ်ရံၣ် ၄ နၣ်ရံၣ်အခါန့ၣ်ပနၢ်ဟူကျိသီၣ်မီၤနီၤႉဖဲအနၣ်ရံၣ် ၁၀ ဃၣ်ဃၣ်ဘျီန့ၣ်တသီၣ်လၢၤဘၣ်ႉ ပဟးထီၣ်လၢဟံၣ်ချၢနါက့တဘူၣ်ဒံးဘၣ်” အဂ့ၢ်န့ၣ် လီၢ်က၀ီၤကမျၢၢ်လၢအိၣ်၀့ၢ်ပူၤတဂၤစံး၀ဲန့ၣ်လီၤႉ သုးတၢ်သိၣ်လိကၠိ ဘံၣ်ဘၢတြဲၤ(gate)လီၢ်အံၤ ဘၣ်တၢ်နုာ်လီၤခးအီၤလၢ(KNLA)ဒီး(PDF)သုးပာ်ဖှိၣ် တဖၣ်ဒီးခီဖျိတၢ်ဒုးကဲထီၣ်အဃိပယီၤသုးလၢအအိၣ်ခိးတြဲၤသံ၀ဲ(၄)ဂၤအသိး တၢ်ဒွဲၣ်အူအီၣ်ကွံာ််ဘံၣ်ဘၢတြဲၤအံၤစ့ၢ်ကီးအဂ့ၢ်န့ၣ် ၦၤလၢဘူးဒီးသုးပာ်ဖှိၣ်ကရူၢ်အံၤတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်ဒုးကဲထီၣ်ဘျီပယီၤသုးက့ၤခးလီၤကဒါကျိဖးဒိၣ်ကျိဖိလၢ(KNLA)ဒီး(PDF)က့ၤကျဲအလီၢ်တဖၣ်န့ၣ်မီၤနီၤႉတၢ်ဒုးကဲထီၣ်ခဲအံၤအိၣ်ဘူးဘူးဒီးက၀ီၤဒ့(၁)န့ၢ်သးလၢ၀့ၢ်ဃၢၤတစဲးမီၤနီၤႉဟံၣ်ခိၣ်ကအိၣ်(၃၀)ႇ(၄၀)ညါႉၦၤအိၣ်လၢက၀ီၤဒ့ပူၤတဖၣ်န့ၣ်နုာ်လီၤစံၣ်အိၣ်လၢ၀့ၢ်ပူၤခဲလၢာ်လီၤႉ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ တၢ်နုာ်လီၤခးတြဲၤကဲထီၣ်သး၀ံၤအလီၢ်ပယီၤသုးခးလီၤကျိဖးဒိၣ်ကျိဖိတဖၣ်ဆူသၣ်တီၣ်ကၠံ၀့ၢ်ပူၤဒီး ဒ်ပဒိးန့ၢ်ဘၣ်တၢ်စီၣ်လၢခံကတၢၢ်အသိးန့ၣ်ပယီၤသုးဖီၣ်က့ၤကိး၀ဲ(က၀ီၤဒ့ ၂)ကမျၢၢ်ခံဂၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတၢ်ပိၢ်ဖးထီၣ်လၢသၣ်တီၣ်ကၠံ၀့ၢ်ပူၤအိၣ်၀ဲတဆံးတက့ၢ်ဘၣ်ဆၣ် တၢ်နုာ်လီၤခးသုးမီၤစိရိၤအတြဲၤ(gate)ဒ်အံၤကဲထီၣ်သးအဆိကတၢၢ်တဘျီလီၤအဂ့ၢ်န့ၣ် လီၢ်က၀ီၤကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ ဘယ့ၣ်နီၤသုးတၢ်သိၣ်လိကၠိလၢအအိၣ်ဘူးကးတံၢ်ဒီးသၣ်တီၣ်ကၠံ(က၀ီၤဒ့ ၁)အံၤ လၢကရၢၢ်ပူၤသုးအဟံၣ်ဖိဃီဖိတဖၣ်အိၣ်စ့ၢ်ကီး၀ဲအသိးမ့ၢ်စ့ၢ်ကီးတၢ်သိၣ်လိကၠိတဖျၢၣ်လၢဟ့ၣ်၀ဲသုးတၢ်သိၣ်လိ(၃)လါတဘျီအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒ်သိးကသ့ၣ်ညါဘၣ်တၢ်ဂ့ၢ်ကဲထီၣ်သးတၢ်အိၣ်သးတံၢ်လီၤဆဲးအဂီၢ်န့ၣ် ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဂုာ်ကျဲးစၢးဆဲးကျိး၀ဲဒီးတၢ်ပၢၢ်ဆၢကရူၢ်သုးပာ်ဖှိၣ်တဖၣ်အဖၢမုၢ်န့ၣ်လီၤႉ
တၢ်တဘၣ်ဟးထီၣ်က့ၤလီၤလၢ မၠ့ၣ်–ဒ၀ဲၢ် ပၠံၣ်ထီၣ်စူၣ်ကျဲမုၢ်ခိၣ်ဘၣ်အဂ့ၢ် ပလီ(PDF)ဟ့ၣ်ပလီၢ်၀ဲ
လါနိၣ်၀့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် မၠ့ၣ်–ဒ၀ဲၢ် ပၠံၣ်ထီၣ်စူၣ်ကျဲမုၢ်ဖးဒိၣ်ဒီတကျိၤန့ၣ် ခီဖျိပယီၤသုးဒီးတၢ်ဒီသဒၢကမျၢၢ်သုး(PDF) မၠ့ၣ်ကီၢ်ရ့ၣ် သုးရ့ၣ်(၁)သိၣ်မှံၤကရူၢ်တဖၣ်အဘၢၣ်စၢၤတၢ်ဒုးကဲထီၣ်တလီၢ်လီၢ်အဃိ တၢ်တဘၣ်ဟးထီၣ်က့ၤလီၤဖဲကျဲအံၤဘၣ်အဂ့ၢ်န့ၣ် ပလီတၢ်ဒီသဒၢကမျၢၢ်သုး(PDF)ထုးထီၣ်ပာ်ဖျါဟ့ၣ်ပလီၢ်၀ဲ ဖဲလါနိၣ်၀့ဘၢၣ် ၇ သီအနံၤန့ၣ်လီၤႉ ကမျၢၢ်ထံဖိကီၢ်ဖိလၢအဟးထီၣ်က့ၤလီၤဖဲ မၠ့ၣ်–ဒ၀ဲၢ် ပၠံၣ်ထီၣ်စူၣ်ကျဲမုၢ်ခိၣ်အံၤတဖၣ် မၠ့ၣ်ကီၢ်ရ့ၣ် သုးရ့ၣ်(၁) မ့တထုးထီၣ်ပာ်ဖျါလၢဟးထီၣ်က့ၤလီၤသ့ဒံးဘၣ်န့ၣ်လ့ၤတက့ၤတၢ်တဘၣ်ဟးထီၣ်က့ၤလီၤ၀ဲဘၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဘၣ်ဃးလံာ်တၢ်ပာ်ဖျါအံၤအဖီခိၣ်ပလီ(PDF)တၢ်ဘိးဘၣ်ရၤလီၤမူဒါခိၣ်တဂၤစံး၀ဲ“ပထုးထီၣ်ပာ်ဖျါလံာ်တၢ်ဂ့ၢ်အခိၣ်သ့ၣ်န့ၣ်ခီဖျိတၢ်ဒုးတၢ်ယၤအဃိပတအဲၣ်ဒိးလၢကမျၢၢ်ထံဖိကီၢ်ဖိတဖၣ်ကဘၣ်ဒိဘၣ်ထံးဘၣ်မီၤနီၤႉၦၤလၢအမ့တလူၤပိာ်မၤထွဲတၢ်ကလုၢ်အံၤဘၣ်န့ၣ်ပတဟံအရ့ဘၣ်ႉကဘၣ်ဒိဘၣ်ထံးလၢၦၤလၢအတလူၤပိာ်မၤထွဲ၀ဲတဖၣ်လီၤမီၤနီၤႉပ၀ဲဒၣ်နါက့အလိၣ်အဃိပထုးထီၣ်ပာ်ဖျါအီၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ တကးဒံးဘၣ်အမဲာ်ညါကမျၢၢ်ထံဖိကီၢ်ဖိတဖၣ်တၢ်ဂ့ၢ်မ့တအိၣ်ဘၣ်န့ၣ်တဘၣ်ဟးထီၣ်လၢတၢ်ချၢဘၣ်ဒီး တၢ်တဘၣ်ဟးမုာ်လၤသးဖှံအါအါဘၣ်အဂ့ၢ်န့ၣ် တၢ်ဘိးဘၣ်ရၤလီၤမူဒါခိၣ်တဂၤဃီ၀ဲန့ၣ်ဟ့ၣ်ပလီၢ်စံး၀ဲန့ၣ်လီၤႉ “တၢ်ဂ့ၢ်အခိၣ်သ့ၣ်ခီန့ၣ်တၢ်ဂ့ၢ်အရ့ဒိၣ်မ့တအိၣ်ဘၣ်န့ၣ်တဘၣ်ဟးထီၣ်တၢ်ချၢဘၣ်ႉကဘိၣ်ထီၣ်ဃာ်တၢ်ဘိၣ်တၢ်စၢၤလၢအလိၣ်၀ဲတဖၣ်ဒီးကအိၣ်လၢတၢ်ပလီပဒီအပူၤႉလူၤပိာ်မၤထွဲလံာ်တၢ်ပာ်ဖျါလၢသိၣ်မှံၤထုးထီၣ်၀ဲအံၤမီၤနီၤႉတၢ်ကဲထီၣ်သးဖဲမဟါန့ၣ်ကမျၢၢ်တဖၣ်တသ့ၣ်ညါတၢ်ဘၣ်ႉတၢ်ဒုးကဲထီၣ်နါက့အ၀ဲသ့ၣ်လဲၤဘူၣ်ကထ့ၣ်လဲၤမၤဘူၣ်မၤဘါဟးထီၣ်က့ၤလီၤဒံးႉလၢအ၀ဲသ့ၣ်အဂီၢ်န့ၣ်တၢ်ဘၣ်ယိၣ်အါမးႉလီၤဆီဒၣ်တၢ်တၢ်ဒုးမ့ကဲထီၣ်လံန့ၣ်ပကဘၣ်အိၣ်သ့သ့ဘၣ်ဘၣ်လီၤ”အဂ့ၢ်န့ၣ်အ၀ဲစံးအါထီၣ်၀ဲန့ၣ်လီၤႉ ဖဲအပူၤကွံာ်စှၤသီအခါစ့ၢ်ကီးလၢမၠ့ၣ်ကီၢ်ဆၣ်ဒီးတနီသရံၣ်ကီၢ်ဆၣ်အပူၤတၢ်ဒုးကဲထီၣ်တပယူာ်ဃီအဃိ ပယီၤသုးတကပၤသံ(၁၃)ဂၤအကျါပၣ်ဃုာ်၀ဲသုးရ့ၣ်ခိၣ်တဂၤအသိးတၢ်ခးသံစ့ၢ်ကီးသးၦၢ်တဂၤလၢသုးမီၤစိရိၤတီၣ်ထီၣ်ဒၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါတၢ်ဒုးကဲထီၣ်ဘျီ၀ဲန့ၣ်အခါပယီၤသုးနုာ်လီၤဒွဲၣ်အူအီၣ်၀ဲလီၢ်က၀ီၤကမျၢၢ်အဟံၣ်အဃီတဖၣ်အိၣ်၀ဲအဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိစံး၀ဲအသိးသ့ၣ်ညါဘၣ်န့ၣ်လီၤႉ