၀ီၢ်ရီလီၢ်က၀ီၤဖိလၢပယီၤသုးဖီၣ်က့ၤကိး၀ဲတဖၣ်ဟဲက့ၤထူၣ်ဖျဲးထီၣ်လံ
လါအ့ဖြ့ၣ် ၂၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါအ့ဖြ့ၣ် ၂၅ သီအနံၤ လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ၀ီၢ်ရီဟီၣ်က၀ီၤအပူၤ ပယီၤသုးဖီၣ်၀ဲလီၢ်က၀ီၤသ၀ီဖိ(၄၀)ဘျဲၣ်လၢက၀ံန့ၢ်အ၀ဲသ့ၣ်သုးတၢ်ဖိတၢ်လံၤသ့ၣ်တဖၣ်အံၤန့ၣ် ကတီၢ်ခဲအံၤလီၢ်က၀ီၤဖိတဖၣ်ဟဲက့ၤပူၤဖျဲးထီၣ်ခဲလၢာ်လံအဂ့ၢ်န့ၣ် သ့ၣ်ညါဘၣ်လၢသ၀ီဖိအအိၣ်န့ၣ်လီၤႉ ချၢၣ်ႇနီဒ့ၣ်ႇမၠိၣ်ဟီႇချၢၣ်သ၀ီဖိဒီးသ၀ီလၢအဂၤလီၢ်က၀ီၤဖိလၢအမၤအီၣ်တၢ်လၢကျီးဖဲကစၢၢ်ခီၣ်ထံးအံၤသ့ၣ်တ ဖၣ် ပယီၤသုးဖီၣ်ကိးမၢဆူၣ်အ၀ဲသ့ၣ်လၢကနဲၣ်ပၠးကျဲႇက၀ံကယိးန့ၢ်သုးတၢ်ဖိတၢ်လံၤသ့ၣ်တဖၣ်အဂီၢ်ဒီး ပယီၤသုးဖီၣ်က့ၤကိးလီၢ်က၀ီၤဖိတဖၣ်ဆူတကူၣ်တၢၣ်ပၢၤကီၢ်၀ဲၤလီၢ်၀ံၤအလီၢ်ခံ ဖဲလါအ့ဖြ့ၣ် ၂၅ သီ မုၢ်နၤခီ ၁၀ နၣ်ရံၣ်အခါန့ၣ် ၦၤလၢတၢ်ဖီၣ်ဃာ်၀ဲသ့ၣ်တဖၣ်တၢ်ပျၢ်လီၤက့ၤ၀ဲဒၣ်လံန့ၣ်လီၤႉ “ဖီၣ်၀ဲလၢကျဲပူၤဖဲကလဲၤလီၤလၢသ၀ီပူၤအခါလီၤႉမၢပ၀ံန့ၢ်အ၀ဲသ့ၣ်ကျိခံႇစုက၀ဲၤတဖၣ်လီၤႉ အ၀ဲသ့ၣ်န့ၣ်အိၣ်ဖး လီၤအသး(၃)ဒူၣ်ႉအ၀ဲသ့ၣ်ပာ်ၦၤလၢတၢ်မဲာ်ညါႇတၢ်ခၢၣ်သးဒီးတၢ်လီၢ်ခံလီၤႉ သ၀ီဖိလၢအဂၤတဖၣ်နါက့ကအိၣ်အဂၤ(၄၀)ညါႉက့ၤဆှၢၦၤလၢတကူၣ်တၢၣ်ပၢၤကီၢ်၀ဲၤလီၢ်၀ံၤမး ပျၢ်လီၤက့ၤၦၤလၢမုၢ်နၤခီလီၤ”အဂ့ၢ်န့ၣ် ၀ီၢ်ရီလီၢ်က၀ီၤဖိလၢတၢ်ဖီၣ်အီၤတဂၤစံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအ့ဖြ့ၣ် ၂၃ သီအနံၤ ပယီၤသုးလၢအအိၣ်ဆီလီၤသးဖဲတကူၣ်တၢၣ်သ၀ီ ပၢၤကီၢ်၀ဲၤလီၢ်ကရၢၢ်ပူၤသ့ၣ်တဖၣ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ဲ ဒီး မ့ၢ်လၢပယီၤသုးခးလီၤကျိဖးဒိၣ်ဆူသ၀ီပူၤအဃိတကူၣ်တၢၣ်သ၀ီဖိသံ၀ဲ(၂)ဂၤဒီး လီၢ်က၀ီၤသ၀ီဖိလၢအဂၤ(၂)ဂၤစ့ၢ်ကီးဘၣ်ဒိ၀ဲနးနးကလဲာ်အဂ့ၢ်န့ၣ် သ့ၣ်ညါဘၣ်လၢသ၀ီဖိအအိၣ်န့ၣ်လီၤႉ ခီဖျိတၢ်ဒုးကဲထီၣ်အဃိ၀ီၢ်ရီလီၢ်ဟီၣ်က၀ီၤသ၀ီအဖျၢၣ်(၁၀)ဘျဲၣ်ကမျၢၢ်(၃၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲဒီး လါအ့ဖြ့ၣ် ၂၃ သီတုၤလၢ ၂၈ သီန့ၣ် မ့ၢ်လၢတၢ်ဒုးကဲထီၣ်ကိးမုၢ်နံၤဒဲးအဃိ လီၢ်က၀ီၤၦၤလီၢ်အိၣ်ကမှံအနီၣ်ဂံၢ်ဟဲအါထီၣ်၀ဲအဂ့ၢ်န့ၣ် သ့ၣ်ညါဘၣ်လၢတၢ်တိစၢၤမၤစၢၤရူၢ်ကအအိၣ်န့ၣ်လီၤႉ
(BGF)ထၢဖှိၣ်သးစၢ်လၢကကဲသုးဒီးဆှၢထီၣ်၀ဲဆူတၢ်ဒုးပျီပူၤ
လါအ့ဖြ့ၣ် ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် ကညီကီၢ်စဲၣ် သုးခိးကီၢ်ဆၢ(BGF)သုးဟီၣ်က၀ီၤ(၃)တၢ်ပၢဟီၣ်က၀ီၤ စွ့ၤကိၣ်ကိၤလီၢ်က၀ီၤ ဒူသ၀ီတဖၣ်အပူၤန့ၣ် တၢ်ဟးကရၢကရိ၀ဲသူၣ်ဘီၣ်သးစၢ်တဖၣ်လၢကကဲသုးဒီး ဘၣ်တၢ်ဆှၢအ၀ဲသ့ၣ်ဆူတၢ်မဲာ်ညါတၢ်ဒုးပျီပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လၢကညီကီၢ်စဲၣ်အပူၤတၢ်ဒုးကဲထီၣ်ဒိၣ်ဒိၣ်မုၢ်မုၢ်လၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤဒီး ဖဲန့ၣ်ပယီၤသုးခိၣ်သုးနၢ်ႇသုးဖိဒီး(BGF)သုးတဖၣ်သံအါအါဂီၢ်ဂီၢ်န့ၣ်လီၤႉ လၢတၢ်န့ၣ်အဃိ ဘၣ်တၢ်ဟးလူၤထၢ၀ဲသုးအံၤဒီးၦၤလၢကဲသုးတမုာ်ဘၣ်သ့ၣ်တဖၣ်န့ၣ်ဘၣ်ဟးဃုန့ၢ်ၦၤတဂၤလၢကကဲသုးလၢအလီၢ်အဂ့ၢ်န့ၣ် (BGF)သုးလၢအဘၣ်တၢ်ဆှၢထီၣ်အီၤဆူတၢ်ဒုးပျီပူၤအဟံၣ်ဖိဃီဖိတဂၤစံး၀ဲန့ၣ်လီၤႉ အ၀ဲစံး၀ဲလၢ“အခီၣ်ထံးန့ၣ်တဲ၀ဲဒၣ်လၢမၢအိၣ်ခိးတၢ်ဖဲစွ့ၤကိၣ်ကိၤကၣ်စံၣ်နိၣ်န့ၣ်မီၤနီၤႉတဲ၀ဲလၢတလါန့ၣ်ကဟ့ၣ်၀ဲစ့(၂၈၀ႇ၀၀၀)ကၠးလီၤႉခဲအံၤတၢ်ဒုးကဲထီၣ်န့ၣ်(BGF)အၦၤသံဘၣ်ဒိအါအဃိ ဟးကိး၀ဲဒၣ်သ၀ီဖိတဖၣ်ဒီးမၢအကဲ(BGF)သုးႇမ့၀ံၤဆှၢထီၣ်၀ဲလၢတၢ်မဲာ်ညါႇမၤမ့တမုာ်ဘၣ်န့ၣ်လၢကဟးဃုၦၤလၢအသီအဂီၢ်မၢဟ့ၣ်လီၤစ့ယိၤ(၁၀ႇ၀၀၀)ဘးလီၤႉၦၤလၢအဟ့ၣ်စ့တန့ၢ်ဘၣ်တဖၣ်န့ၣ်မၢ၀ဲအဖီၣ်မဲလီၤႉ ဖီၣ်မဲမ့ဘၣ်န့ၣ်ဘၣ်လဲၤလၢတၢ်မဲာ်ညါလီၤႉယဖိန့ၣ်ၦၤလဲၤကိးအီၤလၢတၢ်မဲာ်ညါႇတန့ၢ်တၢ်ဆဲးကျိးဘၣ်အိၣ်သၢလါဃၣ်ဃၣ်လံ”အဂ့ၢ်န့ၣ် စံး၀ဲန့ၣ်လီၤႉ ဘၣ်ဃးတၢ်ဟးကိးဖှိၣ်သးစၢ်တဖၣ်လၢကကဲ(BGF)သုးဒီး တၢ်ဆှၢထီၣ်အ၀ဲသ့ၣ်ဆူတၢ်ဒုးပျီပူၤဒ်အံၤန့ၣ် လၢဖၣ်အၣ်ႇလူၢ်ပျဲၢ်ႇကီးတရံးဟီၣ်က၀ီၤတဖၣ်အပူၤဘၣ်လဲၤခီဖျိစ့ၢ်ကီး၀ဲတၢ်ဂ့ၢ်ဒ်အံၤအဂ့ၢ်န့ၣ် ၦၤလၢအဘူးဒီး(BGF)တဂၤစံးဘၣ်ခ့ၣ်အဲးစံၣ်န့ၣ်လီၤႉ ၦၤလၢအဘူးဒီး(BGF)သုးတဂၤစံး၀ဲ“အခီၣ်ထံးန့ၣ်အ၀ဲသ့ၣ်ဟဲကရၢကရိ၀ဲလၢကမၤတၢ်ဖဲကူၣ်ပနံၣ်မီၤနီၤႉအ၀ဲသ့ၣ်ထၢဖှိၣ်သးစၢ်တဲ၀ဲလၢကဟ့ၣ်လါလဲမီၤနီၤႉ အခီၣ်ထံးတလါခံလါအခါန့ၣ်တၢ်မၢအ၀ဲသ့ၣ်မၤတၢ်လၢကၣ်စံၣ်နိၣ်ႉမ့၀ံၤဆှၢ၀ဲလၢတၢ်မဲာ်ညါလီၤႉအဂၤတခါန့ၣ်ၦၤသးစၢ်ပိာ်ခွါလၢအလဲၤမၤတၢ်လၢလူၢ်ပျဲၢ်ကီၢ်ဆၣ်သ့ၣ်တဖၣ်န့ၣ်တၢ်ဆှၢအ၀ဲသ့ၣ်ဆူတၢ်မဲာ်ညါခဲလၢာ်လီၤ”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤတၢ်ဒုးကဲထီၣ်လၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤပူၤလၢ ပယီၤသုးဒီး(KNLA)သုးပာ်ဖှိၣ်တဖၣ်အဘၢၣ်စၢၤန့ၣ် (BGF)သုးထီၣ်ခးစၢၤ၀ဲပယီၤသုးတဖၣ်အဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲအသိး သ့ၣ်ညါဘၣ်န့ၣ်လီၤႉ တၢ်ဒုးကဲထီၣ်အကတီၢ်(BGF)သုးႇသုးခိၣ်သုးနၢ်သံဘၣ်ဒိဘၣ်ထံးအိၣ်၀ဲလၢအကယၤညါန့ၣ်လီၤႉ တကးဒံးဘၣ်တၢ်ဖီၣ်ချုးန့ၢ်၀ဲႇဟဲက့ၤဟ့ၣ်လီၤသးဆူ(KNLA)အအိၣ်စ့ၢ်ကီးအိၣ်၀ဲဒီး ၦၤလၢတအဲၣ်ဒိးကဲသုးဘၣ်တဖၣ်ဟးစံၣ်အိၣ်ခူသူၣ်စ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ဃးဒီးတၢ်ဂ့ၢ်ကဲဲထီၣ်သးအံၤခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဂုာ်ကျဲးစၢးဆဲးကျိး၀ဲဒီး(BGF )ၦၤဘၣ်မူဘၣ်ဒါတဖၣ်ဘၣ်ဆၣ် ဆဲးကျိးတန့ၢ်၀ဲဘၣ်န့ၣ်လီၤႉ
KNU လဲၤဆီၣ်ထွဲမၤစၢၤ၀ီၢ်ရီလီၢ်က၀ီၤၦၤလီၢ်အိၣ်ကမှံဖိဟုသးအထၢၣ်(၂၀၀)ဃၣ်ဃၣ်
လါအ့ဖြ့ၣ် ၂၇ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါအ့ဖြ့ၣ် ၂၃ သီအနံၤ လၢကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ချၢၣ်–တကူၣ်တၢၣ်သ၀ီအပူၤ ခီဖျိတၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးတဖၣ်အဘၢၣ်စၢၤအဃိ လီၢ်က၀ီၤကမျၢၢ်(၃၀၀၀)ဃၣ်ဃၣ်လၢအဘၣ်ဃ့ၢ်တၢ်ဒုးသ့ၣ်တဖၣ်အံၤအဂီၢ် ခ့ၣ်အဲၣ်ယူၣ် ၀ီၢ်ရ့ၣ်ကီၢ်ဆၣ် ၦၤဘၣ်မူဘၣ်ဒါတဖၣ်လဲၤဆီၣ်ထွဲမၤစၢၤ၀ဲဟုသးအထၢၣ်(၂၀၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ချၢၣ်ႇတကူၣ်တၢၣ်ႇချၢၣ်သ၀ီဖိႇမၠိၣ်ဟီႇတကူၣ်တၢၣ်သ၀ီဖိႇနါသဲၣ်ထိၤႇဒဲၤလိၣ်ႇကမီၣ်၀ါသ၀ီဒီးသ၀ီလၢအဂၤလီၢ်က၀ီၤဖိ(၃၀၀၀)ဃၣ်ဃၣ်လၢအဘၣ်ဃ့ၢ်တၢ်ဒုးသ့ၣ်တဖၣ်အံၤ အဆိကတၢၢ်တဘျီခ့ၣ်အဲၣ်ယူၣ်(၀ီၢ်ရီကီၢ်ဆၣ်)ၦၤဘၣ်မူဘၣ်ဒါလဲၤဆီၣ်ထွဲမၤစၢၤ၀ဲဟုသးတဖၣ်ဒီး မ့ၢ်တၢ်မၤစၢၤကမျၢၢ်အတၢ်ကီတၢ်ခဲလၢကျဲတကပၤလီၤအဂ့ၢ်န့ၣ် ကီၢ်ဆၣ်ၦၤဘၣ်မူဘၣ်ဒါတဂၤစံး၀ဲန့ၣ်လီၤႉ အ၀ဲစံး၀ဲလၢ“ကမျၢၢ်သ့ၣ်တဖၣ်န့ၣ်မ့ၢ်၀ဲဒၣ်ပတၢ်ဘၣ်ဘျုးကစၢ်သ့ၣ်တဖၣ်လီၤႉအ၀ဲသ့ၣ်ဘၣ်ဟးစံၣ်လီၤဘၣ်တၢ်ကီတၢ်ခဲဒ်အံၤပဒိသူၣ်ဒိသးလီၤႉပလဲၤမၤစၢၤအ၀ဲသ့ၣ်ဟုသးအထၢၣ်(၂၀၀)ဃၣ်ဃၣ်ႉဒ်တၢ်သ့အိၣ်ဒီးၦၤအသိးပကမၤစၢၤကမျၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲတနံၤအံၤလါအ့ဖြ့ၣ် ၂၇ သီအနံၤန့ၣ်လီၤႉ ဖဲအပူၤကွံာ်လါအ့ဖြ့ၣ် ၂၃ သီအနံၤ လၢချၢၣ်–တကူၣ်တၢၣ်လီၢ်က၀ီၤ ခီဖျိတၢ်ဒုးကဲထီၣ်၀ဲလၢပယီၤသုးဒီး (KNLA)တဖၣ်အဘၢၣ်စၢၤအဃိ ၀ီၢ်ရီဟီၣ်က၀ီၤသ၀ီပာ်ဖှိၣ်ခဲလၢာ်အဖျၢၣ်(၁၀)ဘျဲၣ် လီၢ်က၀ီၤဖိတဖၣ်ဘၣ်ဃ့ၢ်ထီၣ်၀ဲဒီး ၦၤဃ့ၢ်တၢ်ဒုးတဖၣ်အကျါပၣ်ဃုာ်၀ဲဖိဒံဖိသၣ်ႇၦၤသူၣ်က့သးၦၢ်တဖၣ်ဒီး တနီၤန့ၣ်အိၣ်ကဒု၀ဲဒၣ်လၢသ့ၣ်ကဒု၀ၣ်ကဒုအဖီလာ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ “စးထီၣ်လၢအစးထီၣ်ခး၀ဲန့ၣ်ပဃ့ၢ်ထီၣ်လဲၤအိၣ်လၢန့ၣ်တထံၣ်ႇလဲၤပၠီကဒီးလၢအံၤတထံၣ်ကန့ၢ်တနွံလီၤႉတၢ်ဒုးကဲထီၣ်ပပျံၤတၢ်အဃိမုၢ်ဆါခီဒၢးတမံဘၣ်ႇမုၢ်နၤခီဒၢးမံတန့ၢ်ဘၣ်ႉမ့ၢ်နၢ်ဟူကျိကလုၢ်န့ၣ်ဘၣ်ပျံၤတၢ်မီၤနီၤႉယဖိဒိၣ်ဒီးယဖိဒိၣ်အ၀ၤနါက့ကျိဘၣ်အီၤသံလံႉတအဲၣ်ဒိးလၢတၢ်ဒုးကကဲထီၣ်လၢၤဘၣ်ႉအဲၣ်ဒိးလၢတၢ်ကမုာ်ကခုၣ်ထီၣ်လံ”အဂ့ၢ်န့ၣ် ၀ီၢ်ရီလီၢ်က၀ီၤဖိလၢအဘၣ်ဃ့ၢ်တၢ်ဒုးတဂၤ စံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်ဒုးကဲထီၣ်အဃိလၢ၀ီၢ်ရီဟီၣ်က၀ီၤကျဲဒီးချၢၣ်–တကူၣ်တၢၣ်–မူၣ်ဒိၤကျဲသ့ၣ်တဖၣ်န့ၣ် ၦၤဟးထီၣ်က့ၤလီၤတအိၣ်အါအါလၢၤဘၣ်ဒီး သိလ့ၣ်တီၣ်တီၣ်ဆှၢတၢ်ဖိတၢ်လံၤလၢအိၣ်သ၀ီပူၤတဖၣ်စ့ၢ်ကီးတစံၣ်လၢာ်ဘၣ်အိၣ်ဘှံး၀ဲအဃိ တၢ်အီၣ်တၢ်အီတလၢတလီၣ်ဟဲအိၣ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢသ၀ီၦၤဘၣ်မူဘၣ်ဒါအအိၣ်န့ၣ်လီၤႉ
သုးခိၣ်စးလိတီခိၣ်ရိၣ်မဲ DKBA(၂၀၀)ဘျဲၣ် ဟဲက့ၤမၤသကိးတၢ်ဒီးသုးခိၣ်ကျၢၢ်ဖိစီၤနၢၤဒါမၠး
လါအ့ဖြ့ၣ် ၂၆ သီႇ ၂၀၂၂ နံၣ်ႇ ခ့ၣ်အဲးစံၣ် သုးခိၣ်စးလိတီခိၣ်ရိၣ်မဲတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးဖိ(၂၀၀)ဘျဲၣ် ဟဲက့ၤပာ်ဖှိၣ်မၤသကိးတၢ်ဆူသုးခိၣ်ကျၢၢ်ဖိစီၤနၢၤဒါမၠးတီခိၣ်ရိၣ်မဲကညီဒီကလုာ်ဂၢၤသးကရၢ(KNDO)အအိၣ် ဖဲမဟါလါအ့ဖြ့ၣ် ၂၅သီအနံၤန့ၣ်လီၤႉ ဘၣ်ဃးဒီးတၢ်ဂ့ၢ်အံၤအဖီခိၣ် သုးခိၣ်စးလိစံး၀ဲ“ပ၀ဲဒၣ်န့ၣ်ပအဲၣ်ဒိးလၢပကကွၢ်ထွဲကမျၢၢ်ဒီး ကမျၢၢ်ဘၣ်တၢ်ကီတၢ်ခဲန့ၣ်ပအဲၣ်ဒိမၤစၢၤလၢလၢၦဲၤၦဲၤမီၤနီၤႉပတၢ်လၢတၢ်ၦဲၤမ့တအိၣ်ဘၣ်ဆၣ်သနါက့အခဲအံၤပမ့အိၣ်လၢ(DKBA)အကျါန့ၣ်နခးပယီၤနမ့တခးဘၣ်ဒီးၦၤတဲနၤႇနအီၣ်တအိၣ်ဘၣ်ဒီးကမျၢၢ်ဘၣ်လုၢ်အီၣ်နၤလီၤႉနမ့ခးခီခိၣ်နၢ်တနီၤနီၤလၢတနၢ်ပၢၢ်ၦၤဘၣ်နၢ်ပၢၢ်ပယီၤတဖၣ်န့ၣ်လူၤသးက့ၣ်က့ၤနၤလီၤႉအဃိန့ၣ်ယအဲၣ်ဒိးအိၣ်ကဒါလၢရှဲရှဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ဂီၤမူလၢအရၤလီၤသးတခါအပူၤ သုးခိၣ်စးလိစံးလီၤ၀ဲလၢ အမူဒါလၢအိၣ်တ့ၢ်ဃာ်လၢ(DKBA)ပူၤတဖၣ်ဟ့ၣ်လီၤက့ၤ၀ဲဆူ(KNDO)အအိၣ်ဒီး သုးခိၣ်ကျၢၢ်ဖိစီၤနၢၤဒါမၠးစ့ၢ်ကီးသုးဖိသံၣ်ဖိအသီသ့ၣ်တဖၣ်အံၤကဒုးအိၣ်ထီၣ်၀ဲ(KNDO)သိၣ်ဒူစိသုးရ့ၣ်တရ့ၣ်အဂ့ၢ်န့ၣ် စံး၀ဲန့ၣ်လီၤႉ သုးခိၣ်ကျၢၢ်ဖိစီၤနၢၤဒါမၠးစံး၀ဲလၢ“ပတဲဃာ်ထီဘိလီၤဆၢကတီၢ်ခဲအံၤပကပာ်ဖှိၣ်မၤသကိးတၢ်ဒီး တၢ်ဆၢကတီၢ်ဘၣ်လၢပကဘၣ်ဒုးဖျိးကွံာ်ပဒုၣ်ပဒါလံလီၤႉတၢ်ဆၢကတီၢ်တအိၣ်ဒီးၦၤလၢၤဘၣ်ႉလၢတၢ်န့ၣ်အဃိအ၀ဲသ့ၣ်နၢ်ပၢၢ်၀ဲတၢ်အိၣ်သးဒီးဟဲက့ၤပာ်ဖှိၣ်မၤသကိးတၢ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဆၢကတီၢ်ခဲအံၤတမၤဘၣ်ဒံးတၢ်လီၤတံၢ်လီၤဆဲးဘၣ်ႇကတဲၤကတီၤဃာ်တၢ်မ့၀ံၤခဲလၢာ်မး ကမၤ၀ဲတၢ်တူၢ်လိာ်အမူးသးဖှံတ၀ီကဒီးန့ၣ်လီၤႉ တကးဒံးဘၣ်ကပာ်လီၤန့ၢ်၀ဲ(KNDO)သးရ့ၣ်တရ့ၣ်ဒီး ဘိၤစးလိကတီခိၣ်ရိၣ်မဲ၀ဲသုးရ့ၣ်အံၤဒ်သုးရ့ၣ်ခိၣ်တဂၤအသိးအဂ့ၢ်န့ၣ် သုးခိၣ်ကျၢၢ်ဖိစီၤနၢၤဒါမၠး စံးအါထီၣ်၀ဲန့ၣ်လီၤႉ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံလၢတၢ်က့ၤဒုးခီၣ်ဆၢက့ၤပယီၤသုးမီၤစိရိၤအံၤအကျါ အပူၤကွံာ်န့ၣ်တပၣ်ဃုာ်၀ဲဒီး(DKBA)ဘၣ်ဆၣ်သနါက့ လီၢ်ခံန့ၣ်သးစၢ်တဖၣ်ဟဲစံၣ်အိၣ်ကဒု၀ဲဒၣ်လၢ(DKBA)သုးရ့ၣ်ခိၣ်သုးခိၣ်စးလိအိၣ်တၢ်လီၢ်၀ံၤ ပာ်ဖှိၣ်ထီၣ်သးဒီးဟီၣ်က၀ီၤ(KNDO/KNLA)သုးရ့ၣ်တဖၣ်ဒုးခီၣ်ဆၢက့ၤ၀ဲပယီၤသုးမီၤစိရိၤအံၤန့ၣ်လီၤႉ ခီဖျိတၢ်က့ၤဒုးခီၣ်ဆၢကဒါပယီၤသုးမီၤစိရိၤအဃိ ဖဲအပူၤကွံာ်လါယနူၤအါရံၤ ၁၂ သီအနံၤန့ၣ် သုးခိးကီၢ်ဆၢ(BGF)ဒီးပယီၤသုးပာ်ဖှိၣ်ထီၣ်သးဟဲထီၣ်မၤ၀ဲတၢ်ထီၣ်ဒုးလၢပျီပူၤဒီးကဘီယူၤအံၤလၢဘိၤစးလိအသုးကလၢၤအိၣ်အလီၢ်ဖဲသူမှဲကျိကၢၢ်နံၤအံၤအဃိ ဘိၤစးလိအၦၤသုးဖိဘၣ်ဟ့ၣ်လီၤကွံာ်အသးသမူတနီၤဒံးန့ၣ်လီၤႉ
တၢ်ဒုးဆူၣ်ထီၣ်လၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤပူၤအဃိ လီၢ်က၀ီၤဖိလၢအထိဘၣ်ဃ့ၢ်ထီၣ်
လါအ့ဖြ့ၣ် ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်ဖဲလါအ့ဖြ့ၣ် ၂၃ သီအနံၤန့ၣ် တၢ်ဒုးဆူၣ်ထီၣ်၀ဲလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဘံလ့ကီၢ်ဆၣ်အပူၤဒီး ခီဖျိပယီၤသုးခးလီၤနါစိၤကျိဖးဒိၣ်ဆူသ၀ီတဖၣ်အပူၤအဃိ လီၢ်က၀ီၤကမျၢၢ်လၢအကထိဘၣ်ဃ့ၢ်ပူၤဖျဲးသးအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်စှၤသီအခါ ကညီဒီကလုာ်ဂၢၤသးကရၢ(KNDO)သုးရ့ၣ်(၂)ထုးထီၣ်လံာ်ဟ့ၣ်ပလီၢ်၀ဲလၢ ပယီၤသုးကလၢၤလၢအိၣ်ဖဲခ့ၣ်အဲၣ်ယူၣ်ဘံလ့ကီၢ်ဆၣ်လ့က့ၣ်ဒီးတၤပီသ၀ီပူၤတဖၣ် (၂၃)သီလီၢ်ခံကတၢၢ်အဟးထီၣ်ကွံာ်၀ဲဘၣ်ဆၣ် ပယီၤသုးအံၤမ့မ့ၢ်တခီတဟးထီၣ်ကွံာ်ဘၣ်အမဲာ်ညါ ခးလီၤနါစိၤကျိဖးဒိၣ်ဆူသ၀ီတဖၣ်အပူၤအဂ့ၢ်န့ၣ် ဒူသထူၣ်ကီၣ်ရ့ၣ်ခိၣ် ပဒိၣ်စီၤစိမၠ့ၣ်စံးဘၣ်ခ့ၣ်အဲးစံၣ်န့ၣ်လီၤႉ “အခီၣ်ထံးန့ၣ်ယနၢ်ဟူလၢအ၀ဲသ့ၣ်ဟဲတဲ၀ဲဒၣ်လၢတၤပီပယီၤသုးကလၢၤကဟးထီၣ်အဂီၢ်မၢဟ့ၣ်အါထီၣ်တၢ်ဆၢကတီၢ်မီၤနီၤႉ ဘၣ်ဆၣ်မ့ၢ်နံၤမုၢ်သီဘၣ်လံတဟးထီၣ်ဘၣ်အဃိပလဲၤခးဟ့ၣ်ပလီၢ်အ၀ဲသ့ၣ်လီၤႉ အ၀ဲသ့ၣ်နါက့က့ၤခးဆၢၦၤလီၤႉကျိချံလီၤတဲာ်လၢတၢ်လီၢ်တဘျုးတီၤညါႉတၢ်အဃိန့ၣ်သ၀ီဖိလၢအကထိအကလးဃၣ်ဃၣ်ဘၣ်ဃ့ၢ်ထီၣ်၀ဲ”အဂ့ၢ်န့ၣ် စံး၀ဲန့ၣ်လီၤႉ ဖဲအပူၤကွံာ်လါအ့ဖြ့ၣ် ၂၃ သီအနံၤစ့ၢ်ကီး ခီဖျိကတၢၢ်တံာ်ပယီၤသုးကလၢၤလၢအအိၣ်ဖဲဖၣ်ပူၣ်ကီၢ်ရ့ၣ်(သုးက့ ၅)ဟီၣ်က၀ီၤပူၤအံၤ ခးလီၤစိကျိဖးဒိၣ်ဆူတၤအုးနံၤသ၀ီပူၤအဃိ သ၀ီဖိအဟံၣ်အဃီဟးဂီၤ၀ဲ(၅)ဖျၢၣ်အသိး ကမျၢၢ်ဘၣ်ဒိ၀ဲ(၂)ဂၤဒံးန့ၣ်လီၤႉ လၢတၢ်န့ၣ်အဃိသ၀ီအဖျၢၣ်(၁၀)ဘျဲၣ်လၢ အပၣ်ဃုာ်ဒီးတၤအုးနံၤႇလ့က့ၣ်ႇတၤပီႇပယၢ်ရီသ၀ီဖိတဖၣ်စ့ၢ်ကီးဘၣ်ဟးစံၣ်ပလဲာ်သးအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ ဒ်န့ၣ်အသိးလီၢ်က၀ီၤသ၀ီဖိတနီၤဘၣ်ယိၣ်၀ဲလၢပယီၤသုးကဘီယူၤကဟဲခးလီၤတၢ်အဃိ ဟံၣ်ဖိဃီဖိသ့ၣ်တဖၣ်ဘၣ်လဲၤစံၣ်အိၣ်၀ဲဒၣ်လၢလၢၢ်ပူၤလ့ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လီၢ်က၀ီၤကမျၢၢ်လၢအဘၣ်ဃ့ၢ်ထီၣ်တဖၣ်အံၤအဂီၢ် တၢ်ကရၢကရိလၢအအိၣ်ဖဲလီၢ်က၀ီၤဖဲန့ၣ်အပူၤတဖၣ်လဲၤဟ့ၣ်၀ဲတၢ်ဆီၣ်ထွဲမၤစၢၤအိၣ်ဘၣ်ဆၣ် ၦၤဃ့ၢ်တၢ်ဒုးဖိတဖၣ်အါဒၣ်တက့ၢ်န့ၣ်တဒိးန့ၢ်ဘၣ်၀ဲတၢ်ဆီၣ်ထွဲမၤစၢၤဘၣ်အဃိ လိၣ်ဘၣ်၀ဲဒၣ်တၢ်ဆီၣ်ထွဲမၤစၢၤသ့ၣ်တဖၣ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
KNDO သုးရ့ၣ်(၄)ဟ့ၣ်ပလီၢ်ပယီၤသုးလၢကဟးထီၣ်ကွံာ်လၢ(၁၅)သီအတီၢ်ပူၤ
လါအ့ဖြ့ၣ် ၂၅ သီႇ ၂၀၂၂ နံၣ်ႇ ခ့ၣ်အဲးစံၣ် စးထီၣ်လါအ့ဖြ့ၣ် ၂၅ သီ ပယီၤသုးကလၢၤ(၂)ဖျၢၣ်လၢအဒုးအိၣ်ထီၣ်လီၢ်က၀ီၤကမျၢၢ်အတၢ်ကီတၢ်ခဲႇ တၢ်ဘၣ်ယိၣ်ဘၣ်ဘှီတဖၣ်အံၤ ကဟးထီၣ်ကွံာ်လၢ(၁၅)သီအတီၢ်ပူၤအဂ့ၢ်န့ၣ် ကညီဒီကလုာ်စၢဖှိၣ်ကရၢ(သုးက့ ၂)ဟီၣ်က၀ီၤ ကညီဒီကလုာ်ဂၢၤသးကရၢ(KNDO)သုးရ့ၣ်(၄)၀ဲၤလီၢ်ခိၣ်သ့ၣ် ထုးထီၣ်လံာ်ဟ့ၣ်ပလီၢ်၀ဲဖဲတနံၤအံၤလါအ့ဖြ့ၣ် ၂၅ သီအနံၤန့ၣ်လီၤႉ လၢတီအူကီၢ်ရ့ၣ် ထီတထူၣ်ကီၢ်ဆၣ် ခ့ၣ်အဲၣ်ယူၣ်(သုးက့ ၂) KNDO သုးရ့ၣ်(၄)ဟီၣ်က၀ီၤပူၤ ခီဖျိကၠံခၠီပယီၤသုးကလၢၤဒီး(၄၈)မံးလာ်ကိဒ့သုးကလၢၤတဖၣ်အဃိ လီၢ်က၀ီၤကမျၢၢ်လၢအအိၣ်ဖဲဟီၣ်က၀ီၤအပူၤဖဲန့ၣ်သ့ၣ်တဖၣ်ဘၣ်အိၣ်လၢတၢ်ပျံၤတၢ်ဖုးအပူၤဒီး ခီဖျိမ့ၣ်ပိၢ်ပျီပူၤအဃိ လၢတၢ်ကလဲၤက့ၤဖံးမၤအဂီၢ်ကဲထီၣ်၀ဲတၢ်နိးတၢ်ဘျးအဂ့ၢ်န့ၣ် လံာ်တၢ်ဟ့ၣ်ပလီၢ်အပူၤပာ်ဖျါ၀ဲန့ၣ်လီၤႉ ၦၤလၢအဘူးဒီး(KNDO)သုးရ့ၣ်(၂)တဂၤစံး၀ဲ“ၦၤထုးထီၣ်လံာ်အံၤမ့ၢ်အစဲၤနီၢ်လီၤႉ တၢ်ဂ့ၢ်တခါအံၤမ့ၢ်တၢ်ဂ့ၢ်လၢၦၤတၢၣ်ပီၣ်တဲသကိးအီၤလၢအပူၤကွံာ်တလါလံမီၤနီၤႉ”အဂ့ၢ်န့ၣ် ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးကလၢၤအိၣ်ဆီလီၤသးဖဲအံၤလ့ၤတက့ၤပတတူၢ်လိာ်ဘၣ်ဒီးစးထီၣ်လၢတၢ်ထုးထီၣ်လံာ်(၁၅)သီအတီၢ်ပူၤ ကဟးထီၣ်ကွံာ်လၢသုးကလၢၤအံၤဒီးမ့ၢ်တလၢတၢ်ပာ်ပနီၣ်မုၢ်နံၤမုၢ်သီမ့ၢ်ဆဲးအိၣ်ဒံး၀ဲန့ၣ် တၢ်ဂ့ၢ်ကီလၢကပိာ်ထွဲထီၣ်အခံသ့ၣ်တဖၣ်တဟံးမူဒါဘၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးဖဲလါအ့ဖြ့ၣ် ၂၀ သီအနံၤစ့ၢ်ကီး ကညီဒီကလုာ်ဂၢၤသးကရၢ(KNDO)သုးရ့ၣ်(၂)၀ဲၤလီၢ်ခိၣ်သ့ၣ် ထုးထီၣ်လံာ်ဟ့ၣ်ပလီၢ်စံး၀ဲလၢ သုးခိးကီၢ်ဆၢ(BGF)ဒီးပယီၤသုးကလၢၤလၢအိၣ်ဖဲခ့ၣ်အဲၣ်ယူၣ်(သုးက့ ၁)ဟီၣ်က၀ီၤ လ့က့ၣ်ဒီးတၤပီသ၀ီပူၤတဖၣ် (၂၃)သီလီၢ်ခံကတၢၢ်ကဟးထီၣ်ကွံာ်လၢဟီၣ်က၀ီၤအပူၤႇ မ့တဟးထီၣ်ဘၣ်န့ၣ်အဟံးအရ့အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ KNDO သုးရ့ၣ်(၂)ထုးထီၣ်ဟ့ၣ်ပလီၢ်လံာ်ဘၣ်ဆၣ် မ့မ့ၢ်တခီပယီၤသုးဒီး(BGF)သုးတဖၣ်တဟးထီၣ်ကွံာ်လၢသုးကလၢၤဘၣ်အဖီခိၣ် (KNDO)လဲၤလီၤခးအ၀ဲသ့ၣ်အဃိ ပယီၤသုးအံၤက့ၤခးလီၤကျိဖးဒိၣ်ဆူဒူသ၀ီလၢအအိၣ်ဘူးဖဲန့ၣ်သ့ၣ်တဖၣ်အပူၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ခ့ၣ်အဲၣ်ယူၣ်ဘံလ့ကီၢ်ဆၣ်(KNDO)သုးရ့ၣ်(၂)၀ဲၤလီၢ်ခိၣ်သ့ၣ်ထုးထီၣ်ဘိးဘၣ်ရၤလီၤ၀ံၤအလီၢ်ခံ (BGF)သုးလၢအအိၣ်ဖဲလ့က့ၣ်ဒီးတၤပီသ၀ီပူၤတဖၣ်ကးတံၢ်ဃာ်၀ဲကျဲတအဲၣ်လီၢ်က၀ီၤဖိတဖၣ်လ့ၢ်ထီၣ်လ့ၢ်လိၤလၢၤဘၣ်ဒီး လၢတၢ်ဂ့ၢ်အံၤအဖီခိၣ်ခံခီခံကပၤသုးတၢ်ဖ့ၣ်ဆၢဟဲကဲထီၣ်သ့အဃိ လီၢ်က၀ီၤဒူဖိသ၀ီဖိလၢအအိၣ်ဘူးဖဲန့ၣ်သ့ၣ်တဖၣ်ဟးစံၣ်ပလဲာ်သးလၢတၢ်လီၢ်အဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
(KNLA)သုးရိၣ်မဲခိၣ်ကျၢၢ်နဲၣ်လီၤတၢ်ကလုၢ်လၢတဘၣ်ခးသိလ့ၣ်လၢဟးထီၣ်က့ၤလီၤလၢမၠၣ်၀တံၣ်-ကီးတရံးအ့ရှါကျဲဘၣ်
လါအ့ဖြ့ၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါအ့ဖြ့ၣ် ၂၃ သီအနံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤကၠီၤနံၤ ထုးထီၣ်လံာ်နဲၣ်လီၤတၢ်ကလုၢ်ဆူခ့ၣ်အဲၣ်ယူၣ်(သုးက့၊သုးရ့ၣ်)တၢ်ဖီလာ်သုးခိၣ်သုးဖိတဖၣ်အအိၣ်လၢ သိလ့ၣ်ႇကမျၢၢ်သိလ့ၣ်ႇသိလ့ၣ်တီၣ်တၢ်ဖိတၢ်လံၤလၢအဟးထီၣ်က့ၤလီၤလၢမၠၣ်၀တံၣ်-ကီးတရံးအ့ရှါကျဲမုၢ်ခိၣ်သ့ၣ်တဖၣ် တၢ်တဘၣ်မၤတံာ်တာ်အီၤဒီးတၢ်တဘၣ်ဒွဲၣ်အူအီၣ်၀ဲဘၣ်န့ၣ်လီၤႉ လံာ်တၢ်ကလုၢ်လၢအဘၣ်တၢ်နဲၣ်လီၤ၀ဲဆူခ့ၣ်အဲၣ်ယူၣ်(သုးက့ ၆)ႇ(သုးက့ ၇)သုးက့ခိၣ်အအိၣ်အံၤ အဘၣ်တၢ်ထုးထီၣ်နဲၣ်လီၤအီၤဒ်ခ့ၣ်အဲၣ်ယူၣ်ကညီဒီကလုာ်စၢဖှိၣ်ကရၢလီၢ်ခၢၣ်သးပၢဆှၢတၢ်ကမံးတံာ်အတၢ်ဆၢတဲာ်အိၣ်အသိးလီၤအဂ့ၢ်န့ၣ် လံာ်တၢ်နဲၣ်လီၤအပူၤပာ်ဖျါ၀ဲန့ၣ်လီၤႉ ခ့ၣ်အဲၣ်ယူၣ်(သုးက့ ၇)သုးခိၣ်တဂၤစံး၀ဲ“လံာ်န့ၣ်မ့ၢ်အနီၢ်ကီၢ်လီၤနီၤႉ မ့ၢ်၀ဲဒၣ်(EC)အတၢ်ဆၢတဲာ်ဒီးတၢ်နဲၣ်လီၤအီၤလီၤႉမ့ၢ်၀ဲဒၣ်တၢ်ဖီခိၣ််တၢ်ဆၢတဲာ်လီၤ”အဂ့ၢ်န့ၣ် ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါတၢ်မ့တလူၤပိာ်မၤထွဲလံာ်တၢ်နဲၣ်လီၤဘၣ်ႇမ့လုၢ်သ့ၣ်ခါပတာ်၀ဲန့ၣ် ဒ်တၢ်လိၣ်အိၣ်အသိးတၢ်ကဟံးန့ၢ်၀ဲဂ့ၢ်၀ီအဂ့ၢ်န့ၣ် (KNLA)သုးရိၣ်မဲခိၣ်ကျၢၢ်လံာ်တၢ်နဲၣ်လီၤအပူၤပာ်ဖျါ၀ဲန့ၣ်လီၤႉ
ခီဖျိကတၢၢ်တံာ်(BGF)သုးကလၢၤခးလီၤကျိဖးဒိၣ်အဃိလီၢ်က၀ီၤဖိဘၣ်ဒိ(၂)ဂၤ
လါအ့ဖြ့ၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဘံလ့ကီၢ်ဆၣ်အပူၤ ဖဲမဟါလါအ့ဖြ့ၣ် ၂၃ သီ မုၢ်နၤခီ ၁၁ နၣ်ရံၣ်ဃၣ်ဃၣ်အဆၢကတီၢ် ခီဖျိကတၢၢ်တံာ်(BGF-၁၀၁၃)သုးကလၢၤခးလီၤ(၁၂၀ မမ)ကျိဖးဒိၣ်အဃိ တၤအုးနံၤဖိသၣ်မုၣ်ဖိ(၁၂)နံၣ်တဂၤဒီးဖံသးၦၢ်(၆၆)နံၣ်တဂၤဘၣ်ဒိ၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ “ဖဲမုၢ်နၤခီ ၁၁ နၣ်ရံၣ်န့ၣ်ကျိဖးဒိၣ်လီၤတဲာ်တဖျၢၣ်ႉဘၣ်၀ဲဒၣ်ဖိသၣ်မုၣ်ဖိတဂၤဒီးဖံသးၦၢ်တဂၤႉ ဘၣ်၀ဲဒၣ်အစုဒုၣ်ခံဂၤလၢာ်လီၤႉဘၣ်ဒိတနးဘၣ်နါက့ၦၤအိၣ်လၢသ၀ီပူၤတဘူၣ်လၢၤဘၣ်”အဂ့ၢ်န့ၣ် လီၢ်က၀ီၤဖိတဂၤစံးဘၣ်ခ့ၣ်အဲၣ်ယူၣ်-ဒူသထူၣ်ကီၢ်ရ့ၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤန့ၣ်လီၤႉ လၢန့ၣ်အမဲာ်ညါခီဖျိကတၢၢ်တံာ်(BGF-၁၀၁၃)သုးကလၢၤခးလီၤနါစိၤကျိဖးဒိၣ်အဃိ တၤအုးနံၤသ၀ီဖိအဟံၣ်အဃီဟးဂီၤ၀ဲ(၅)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲလါအ့ဖြ့ၣ် ၂၀ သီအနံၤ ကညီဒီကလုာ်ဂၢၤသးကရၢ(KNDO)သုးရ့ၣ်(၂)၀ဲၤလီၢ်ခိၣ်သ့ၣ် ထုးထီၣ်လံာ်ပာ်ဖျါဒီးစံး၀ဲလၢ (BGF)သုးကလၢၤလၢအအိၣ်ဆီလီၤသးဖဲလ့က့ၣ်ဒီးတၤပီသ၀ီပူၤသ့ၣ်တဖၣ် လါအ့ဖြ့ၣ် ၂၃ သီအလီၢ်ခံကတၢၢ်ကဟးထီၣ်ကွံာ်လၢဟီၣ်က၀ီၤအပူၤဒီးမ့တဟးထီၣ်ဘၣ်န့ၣ်ကဟံးဂ့ၢ်၀ီ၀ံၤအလီၢ်ခံ တၢ်ဒုးဟဲကဲထီၣ်သးလီၤအဂ့ၢ်န့ၣ် စံး၀ဲန့ၣ်လီၤႉ ခ့ၣ်အဲၣ်ယူၣ်ဘံလ့ကီၢ်ဆၣ်(KNDO)သုးရ့ၣ်(၂)၀ဲၤလီၢ်ခိၣ်သ့ၣ်ထုးထီၣ်ဘိးဘၣ်ရၤလီၤလံာ်၀ံၤအလီၢ်ခံ (BGF)သုးတဖၣ်ကးတံၢ်ဃာ်လ့က့ၣ်သ၀ီဒီးတၤပီသ၀ီကျဲတဖၣ်ဒီးတအဲၣ်ကမျၢၢ်ဟးထီၣ်ဟးလီၤလၢၤဘၣ်န့ၣ်လီၤႉ ခီဖျိခံခီခံကပၤတၢ်ဖ့ၣ်စၢဟဲအိၣ်ထီၣ်သ့အဃိ လီၢ်က၀ီၤကမျၢၢ်လၢအအိၣ်ဘူးဖဲန့ၣ်သ့ၣ်တဖၣ်ပာ်တ့ၢ်ကွံာ်အဟံၣ်အဃီ ဟးစံၣ်ပလဲာ်သးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
ခီဖျိပယီၤသုးခးနါစိၤကျိဖးဒိၣ်အဃိ ချၢၣ်-တကူၣ်တၢၣ်လီၢ်က၀ီၤသ၀ီဖိလၢအကထိဘၣ်ဟးစံၣ်ပလဲာ်သး
လါအ့ဖြ့ၣ် ၂၄ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါအ့ဖြ့ၣ် ၂၃ သီ ဟါခီအဆၢကတီၢ် ခီဖျိပယီၤသုးခးလီၤကျိဖးဒိၣ်ဆူကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ချၢၣ်-တကူၣ်တၢၣ်သ၀ီပူၤအဃိ လီၢ်က၀ီၤသ၀ီဖိလၢအကထိဘၣ်ဟးစံၣ်ပလဲာ်သးအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲလါအ့ဖြ့ၣ် ၂၃ သီ ဟါခီ ၁၀ နၣ်ရံၣ်ဘျဲၣ်အဆၢကတီၢ် ခီဖျိပယီၤသုး(၃၁၈)သုးရ့ၣ်လၢအအိၣ်ဆီလီၤသးဖဲတလၢၤကီၢ်စဲၣ် မူၣ်ဒိၤကီၢ်ဆၣ်အပူၤသ့ၣ်တဖၣ်အံၤ ခးလီၤကျိဖးဒိၣ်ဆူချၢၣ်ႇတကူၣ်တၢၣ်ႇပူလ့ၤႇတကူၣ်တၢၣ်သ၀ီဖိႇနါသဲၣ်ထိၤသ၀ီပူၤအဃိ လီၢ်က၀ီၤသ၀ီဖိတဖၣ်ဘၣ်ဟးစံၣ်ပလဲာ်သးလၢတၢ်လီၢ်အဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ “ဖဲမုၢ်နၤခီ ၁၀ နၣ်ရံၣ်ဘျဲၣ်န့ၣ်ခးစိဃီၤကျိဖးဒိၣ်လၢသ၀ီပူၤႉ အ၀ဲသ့ၣ်ခးစိတၢ်လၢတလၢၤကီၢ်စဲၣ်တကပၤလီၤႉကျိဖးဒိၣ်(၂)ဖျၢၣ်လီၤတဲာ်၀ဲဒၣ်လၢသ၀ီဃၢၤရီဘၢၣ်ကျီးပူၤလီၤႉဟီၣ်ခိၣ်ဟူးဘၣ်မးအသးလီၤႉၦၤအါဒၣ်တက့ၢ်န့ၣ်စိာ်ထီၣ်အတၢ်ဘိၣ်စံၣ်ထီၣ်လံ”အဂ့ၢ်န့ၣ် နါသဲၣ်ထိၤသ၀ီဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲမဟါလါအ့ဖြ့ၣ် ၂၃ သီအနံၤစ့ၢ်ကီး ခီဖျိပယီၤသုးလၢအအိၣ်ဖဲတကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤသ့ၣ်တဖၣ်ခးလီၤကျိဖးဒိိိၣ်အဃိ တကူၣ်တၢၣ်သ၀ီဖိပိာ်မုၣ်တဂၤသံ၀ဲဒီးကမျၢၢ်လၢအဂၤ(၂)ဂၤစ့ၢ်ကီးဘၣ်ဒိ၀ဲနးနးကလဲာ်န့ၣ်လီၤႉ လၢန့ၣ်အမဲာ်ညါၦၤလၢအဟးထီၣ်က့ၤလီၤလၢတကူၣ်တၢၣ်ပၢၤကီၢ်၀ဲၤလီၢ်အမဲာ်ညါကျဲမုၢ်ခိၣ်တဖၣ်စ့ၢ်ကီး ပယီၤသုးလၢအအိၣ်ဖဲန့ၣ်သ့ၣ်တဖၣ်ခးစိအ၀ဲသ့ၣ်ဒီးကျိအဃိ တကီၢ်ခါခဲအံၤလၢ၀ီၢ်ရီကျဲမုၢ်ခိၣ်ဒီတကျိၤ ၦၤဟးထီၣ်က့ၤလီၤတအိၣ်၀ဲလၢၤဘၣ်အဂ့ၢ်န့ၣ် သ့ၣ်ညါဘၣ်လၢသ၀ီဖိအအိၣ်န့ၣ်လီၤႉ သုးခိးကီၢ်ဆၢ(BGF-၁၀၂၁)သုးရ့ၣ်ဒီးပယီၤသုးဟံးန့ၢ်အလီၢ်ဖ ဲချၢၣ်-တကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤ၀ံၤအလီၢ်ခံ စးထီၣ်လၢဟါခီ ၇ နၣ်ရံၣ်ဘျဲၣ်န့ၣ် တအဲၣ်လီၢ်က၀ီၤဖိဟးထီၣ်က့ၤလီၤလၢအ၀ဲသ့ၣ်သုးကလၢၤအမဲာ်ညါလၢၤဘၣ်န့ၣ်လီၤႉ တကးဒံးဘၣ်အမဲာ်ညါ လၢမုၢ်ဆါခါစ့ၢ်ကီးပယီၤသုးလၢအအိၣ်ဖဲန့ၣ်သ့ၣ်တဖၣ်ခးစိ၀ဲၦၤဟးထီၣ်က့ၤလီၤတဖၣ်လၢကျဲမုၢ်ခိၣ်အဃိ တုၤလၢခဲအံၤတၢ်ကးတံၢ်ဃာ်၀ဲကျဲအံၤအဖၢမုၢ်ဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
တၢ်ဒုးကဲထီၣ်လၢဖလူ၀ံၤအလီၢ်ခံပယီၤသုးကဘီယူၤဟဲခးလီၤကဒါတၢ်လၢမုၢ်နၤခီတပယူာ်ဃီ
လါအ့ဖြ့ၣ် ၂၂ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးကျိၤလၢအဟဲထီၣ်ဆူခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ လ့က့ၣ်ကိာ် ဖလူဟီၣ်က၀ီၤပူၤဒီး(KNLA)သုးပာ်ဖှိၣ်တဖၣ်အဘၢၣ်စၢၤတၢ်ခးလိာ်သးကဲထီၣ်၀ံၤအလီၢ်ခံ ပယီၤသုးကဘီယူၤဟဲက့ၤခးလီၤကျိဖးဒိၣ်လၢမုၢ်နၤခီတပယူာ်ဃီအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲန့ၣ််လီၤႉ စးထီၣ်ဖဲမဟါလါအ့ဖြ့ၣ် ၂၁ သီ ဟါခီ ၆ နၣ်ရံၣ်အဆၢကတီၢ် တၢ်ခးလိာ်သးကဲထီၣ်၀ဲလၢဟီၣ်က၀ီၤ(KNLA)သုးပာ်ဖှိၣ်ဒီးပယီၤသုးတြိၤ(၄၄)စုတီၤအဖီလာ်(ခမရ-၁)သုးကျိၤလၢအဟဲနုာ်လီၤဆူဖလူသ၀ီတကပၤအံၤ၀ံၤအလီၢ်ခံ ဖဲဟါခီ ၇ နၣ်ရံၣ်တုၤလၢ ၁၁ နၣ်ရံၣ်ဃၣ်ဃၣ်န့ၣ် ခီဖျိပယီၤသုးကဘီယူၤဟဲခးလီၤကျိဖးဒိၣ်ဆူ(KNLA)သုးပာ်ဖှိၣ်အိၣ်အလီၢ်တဖၣ်အဃိ ကညီသုးပာ်ဖှိၣ်သုးဖိဘၣ်ဒိ၀ဲ(၂)ဂၤအဂ့ၢ်န့ၣ် (KNLA)သုးပာ်ဖှိၣ်ၦၤဟ့ၣ်တၢ်ကစီၣ်ဖိစံး၀ဲဒ်အံၤန့ၣ်လီၤႉ “ဖဲမဟါဟါခီန့ၣ်ဟဲထီၣ်၀ဲဒၣ်လၢဖလူသ၀ီတကပၤႇအ၀ဲသ့ၣ်ဒီးပၦၤကညီသုးဖိကရူၢ်တဖၣ်ထံၣ်လိာ်သးဒီးတၢ်ခးလိာ်သးကဲထီၣ်ႉအ၀ဲသ့ၣ်တကပၤသံ(၁)ဂၤႇဘၣ်ဒိ(၂)ဂၤလီၤႉတယံၤတမီၢ်ဖဲဟါခီ ၇ နၣ်ရံၣ်ဘျဲၣ်န့ၣ် စွဲၣ်ဒီၣ်တၢ်လူၢ်ႇလဲၣ်ခၣ်တီၤတၢ်လူၢ်တဖၣ်ခးလီၤကျိဖးဒိၣ်ဆူပကညီသုးအိၣ်တၢ်လီၢ် ခး၀ဲတုၤလၢမုၢ်နၤခီ ၁၁ နၣ်ရံၣ်ညါမီၤနီၤႉပၦၤဖိသၣ်ဘၣ်ဒိ(၂)ဂၤႇတၢ်ဘၣ်ယိၣ်တအိၣ်ဘၣ်”အဂ့ၢ်န့ၣ် ဂံၢ်ခီၣ်ထံးတၢ်ကစီၣ်၀ဲန့ၣ်စံး၀ဲန့ၣ်လီၤႉ တလါအံၤလါအ့ဖြ့ၣ်အတီၢ်ပူၤ မ့ၢ်လၢပယီၤသုးဟဲထီၣ်မၤဒုးယၤတၢ်ဟူးတၢ်ဂဲၤလၢ လ့က့ၣ်ကိာ်ႇ သ့ၣ်ဘီဘိႇဂီၤလ့ၤႇကနဲလ့ႇမီခံႇထံသၢပျၢၤလီၢ်က၀ီၤတဖၣ်အပူၤအဃိ အ၀ဲသ့ၣ်တကပၤသံ၀ဲအါမးအဂ့ၢ်န့ၣ် (KNLA)သုးပာ်ဖှိၣ်စံး၀ဲန့ၣ်လီၤႉ လၢအ၀ဲသ့ၣ်ကဆဲးဟဲထီၣ်မၤ၀ဲတၢ်ထီၣ်ဒုးအဂီၢ်န့ၣ်ဆှၢအါထီၣ်အသုးဂံၢ်ဘါႇတၢ်စုက၀ဲၤကျိချံၦာ်သၣ်ဒီး ခီဖျိမၤ၀ဲတၢ်ထီၣ်ဒုးလၢပျီပူၤကိးမုၢ်နံၤဒဲးအဃိ လီၢ်က၀ီၤ(KNLA)သုးပာ်ဖှိၣ်တဖၣ်လဲၤခးစဲးပြဲး၀ဲပယီၤသုးကလၢၤႇကျိဖးဒိၣ်လူၢ်ႇသုးကျိၤလၢအိၣ်ဆီလီၤသးဖဲဟီၣ်က၀ီၤအပူၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ