တဟ့ၣ်အခွဲးလၢပယီၤသုးကဟဲတ့ထံကီၢ်ခိၣ်ဂီၤ(မၣ်ပိၤတ့ၤ)လၢၤဘၣ်အဂ့ၢ် KNU(သုးက့ ၆)သုးက့ခိၣ်ဒုးသ့ၣ်ညါ၀ဲ
လါအ့ဖြ့ၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် ဘၣ်ဃးဒီးပယီၤသုးမီၤစိရိၤတၢ်ရဲၣ်တၢ်ကျဲၤအိၣ်လၢကဟဲတ့ထံကီၢ်ခိၣ်ဂီၤ(မၣ်ပိၤတ့ၤ)လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)ဟီၣ်က၀ီၤပူၤတၢ်ဂ့ၢ်အံၤ တဟ့ၣ်၀ဲအခွဲးလၢကဟဲတ့၀ဲလၢၤဘၣ်အဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိစီၤစၤမံၣ်စ့ဖိ ထုးထီၣ်ဒုးသ့ၣ်ညါ၀ဲဖဲမဟါလါအ့ဖြ့ၣ် ၂၀ သီအနံၤန့ၣ်လီၤႉ ဒ်သိးထံဖိကီၢ်ဖိကမျၢၢ်အဟံၣ်အဃီတၢ်စုလီၢ်ခီၣ်ခိၣ်ကအိၣ်ဘံၣ်အိၣ်ဘၢဒီးကဖံးအီၣ်မၤအီၣ်ဘၣ်ဘျ့ဘျ့ဆှီဆှီအဂီၢ် ပယီၤသုးမီၤစိရိၤကတ့န့ၢ်၀ဲလီၢ်က၀ီၤကမျၢၢ်လၢထံကီၢ်ခိၣ်ဂီၤတၢ်ရဲၣ်တၢ်ကျဲၤအံၤတၢ်ဟ့ၣ်အခွဲး၀ံၤအလီၢ်ခံ ပယီၤသုးတဖၣ်မၤအါထီၣ်သုးဂံၢ်ဘါလၢဟီၣ်က၀ီၤပူၤ တၢ်အိၣ်သးဟဲကဲထီၣ်တုၤလၢထံဖိကီၢ်ဖိကမျၢၢ်အဟံၣ်အဃီဘၣ်ဟးဂုာ်ဟးဂီၤအဃိ တၢ်ပျဲလၢတၢ်ဟ့ၣ်ဃာ်၀ဲသ့ၣ်တဖၣ်က့ၤထုးကွံာ်အီၤလံအဂ့ၢ်န့ၣ် (သုးက့ ၆)သုးက့ခိၣ် လံာ်တၢ်ဒုးသ့ၣ်ညါအပူၤပာ်ဖျါ၀ဲန့ၣ်လီၤႉ ကၠၤအ့စ့ၣ်ကၠံကီၢ်ဆၣ်ပူၤကညီသးစၢ်နီၢ်ကပီၤဆှံစံး၀ဲ“ဖဲတၢ်စးထီၣ်ဟ့ၣ်တၢ်ပျဲအခါန့ၣ်ပဟ့ၣ်ကူၣ်ဟ့ၣ်ဖးဒံးလီၤႉခဲအံၤသုးက့ခိၣ်ပာ်လုၢ်ပာ်ၦ့ၤကမျၢၢ်အကလုၢ်ဒီးက့ၤထုးကွံာ်၀ဲဒ်အံၤပကဘၣ်တူၢ်လိာ်အီၤမီၤနီၤႉခီဖျိအ၀ဲသ့ၣ်မၤ၀ဲတၢ်ထီၣ်ဒုးအဃိထံဖိကီၢ်ဖိကမျၢၢ်တဖၣ်ဘၣ်ဟးစံၣ်မှံဟးဖျိးလီၤႉအ၀ဲတကပၤနါက့ဟဲရိဖှိၣ်၀ဲလၢကတ့န့ၢ်၀ဲထံကီၢ်ခိၣ်ဂီၤလီၤႉလ့ၤတက့ၤတတူၢ်လိာ်ဘၣ်ႉခီဖျိလၢအ၀ဲသ့ၣ်အဃိန့ၣ်ပဘၣ်ဖံးအီၣ်မၤအီၣ်နးတချုးႇ(မၣ်ပိၤတ့ၤ)ဒုတရ့တဒိၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢပယီၤသုးမီၤစိရိၤတၢ်သမံသမိးၦၤနုာ်လီၤဟးထီၣ်ဒီးကမျၢၢ်ဂံၢ်ဘါကိတိာ်၀ဲၤကျိၤ ကမၤန့ၢ်ကၠၤအ့စ့ၣ်ကၠံကီၢ်ဆၣ်ႇကၠဲးဒိဒီးဃိၣ်သၢဖျၢၣ်၀့ၢ်ကမျၢၢ်ထံဖိကီၢ်ဖိတဖၣ်လၢကီၢ်ပယီၤထံကီၢ်ခိၣ်ဂီၤ(မၣ်ပိၤတ့ၤအံၤ)အဂီၢ်န့ၣ် ဖဲအပူၤကွံာ်လါမးရှးအခါမၤန့ၢ်၀ဲတၢ်ပျဲလၢခ့ၣ်အဲၣ်ယူၣ်(သုးက့ ၆)သုးက့ခိၣ် သုးခိၣ်ကျၢၢ်ဖိ စီၤစၤမံၣ်စ့ဖိအအိၣ်န့ၣ်လီၤႉ စးထီၣ်ဖဲ(၂၀၂၁)လါအီးကထိဘၢၣ်န့ၣ် ခီဖျိပယီၤသုးပာ်လီၤအသုးကလၢၤမၤ၀ဲတၢ်ထီၣ်ဒုးလၢခ့ၣ်အဲၣ်ယူၣ်ဒူပျာ်ယာ်ကီၢ်ဆၣ်တဖၣ်အပူၤအဃိ တၢ်ဒုးကဲထီၣ်၀ဲဒီးတၢ်ပၢၢ်ဆၢသုးပာ်ဖှိၣ်တဖၣ်ဒီး လီၢ်က၀ီၤဒူဖိသ၀ီဖိလၢအကလးဘၣ်ဃ့ၢ်မှံဟးဖျိး၀ဲအဂ့ၢ်န့ၣ် သ့ၣ်ညါဘၣ်လၢတၢ်ကရၢကရိလၢအမၤစၢၤၦၤလီၢ်အိၣ်ကမှံဖိအအိၣ်န့ၣ်လီၤႉ ပယီၤသုးမီၤစိရိၤကတ့န့ၢ်လီၢ်က၀ီၤကမျၢၢ်လၢထံကီၢ်ခိၣ််ဂီၤ(မၣ်ပိၤတ့ၤ)တၢ်ရဲၣ်တၢ်ကျဲၤအံၤ မ့ၢ်ဒၣ်ဒ်သိးထံဖိကီၢ်ဖိကမျၢၢ်ကလဲၤဟ့ၣ်တၢ်ဖးလၢကဟဲ(၂၀၂၃)တၢ်ဃုထၢလၢပယီၤသုးမီၤစိရိၤကမၤ၀ဲအံၤအဂီၢ်လီၤအဂ့ၢ်န့ၣ် ဘျီၣ်ဒိၣ်ခၢၣ်စးလီၢ်လံၤတဖၣ်ပဲာ်ထံနီၤဖးစံး၀ဲန့ၣ်လီၤႉ
(KNDO)စံး၀ဲပယီၤသုးလၢအိၣ်လ့က့ၣ်ဒီးတၤပီသုးကလၢၤတဖၣ်ကဟးထီၣ်ကွံာ်လၢ(၃)သီအတီၢ်ပူၤ
လါအ့ဖြ့ၣ် ၂၁ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးလၢအိၣ်ဖဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤ ဘံလ့ကီၢ်ဆၣ် လ့က့ၣ်ဒီးတၤပီသုးကလၢၤတဖၣ်ကဟးထီၣ်ကွံာ်လၢ(၃)သီအတီၢ်ပူၤအဂ့ၢ်န့ၣ် ကညီဒီကလုာ်ဂၢၤသးကရၢ(KNDO)သုးရ့ၣ်(၂)ထုးထီၣ်ပာ်ဖျါ၀ဲဖဲမဟါလါအ့ဖြ့ၣ် ၂၀ သီအနံၤန့ၣ်လီၤႉ ပယီၤသုးကလၢၤလၢနုာ်လီၤဟူးဂဲၤတလၢဟီၣ်က၀ီၤတၢ်ပာ်ပနီၣ်တဖၣ်အံၤ လါအ့ဖြ့ၣ် ၂၃ သီလီၢ်ခံကတၢၢ်ကဟးထီၣ်ကွံာ်ဒီး တၢ်ပာ်ပနီၣ်မုၢ်နံၤမုၢ်သီအတီၢ်ပူၤမ့တဟးထီၣ်ဘၣ်န့ၣ် ဒ်ဒုးယၤဂ့ၢ်၀ီအိၣ်၀ဲအသိးကဟံး၀ဲအရ့တုၤလီၤတီၤလီၤအဂ့ၢ်န့ၣ် (KNDO)ထုးထီၣ်ပာ်ဖျါစံး၀ဲန့ၣ်လီၤႉ ပယီၤသုးမီၤစိရိၤအသုးတဖၣ်အံၤလၢကီၢ်ပယီၤထံကီၢ်ဒီတဘ့ၣ်အပူၤဖီၣ်ဒီးမၤသံကလုာ်ဒူၣ်ထံဖိကီၢ်ဖိကမျၢၢ်ႇဆီၣ်တံၢ်မၤနၢၤ၀ဲႇဒွဲၣ်အူမၤဟးဂီၤကမျၢၢ်အဟံၣ်အဃီတၢ်ဖိတၢ်လံၤတဖၣ်တကးဒံးဘၣ်အမဲာ်ညါမၤတရီတပါၦၤမုၢ်ၦၢ်ႇဖိဒံဖိသၣ်တဖၣ်အၢအၢသီသီအဃိ လ့ၤတက့ၤတဟ့ၣ်ဒုးအိၣ်ပယီၤသုးလၢအ၀ဲသ့ၣ်ဟီၣ်က၀ီၤပူၤဘၣ်အဂ့ၢ်န့ၣ် (KNDO)လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါပယီၤသုးမီၤစိရိၤအသုးမ့ၢ်အဲၣ်ဒိးဟဲက့ၤပာ်ဖှိၣ်မၤသကိးတၢ်ဒီး(KNDO)န့ၣ် ကဆဲးကျိး အ၀ဲသ့ၣ်တချုးလၢတၢ်ပာ်ပနီၣ်မုၢ်နံၤမုၢ်သီတုၤဒံးဘၣ်ႇကတၢၣ်ပီၣ်ဆိသကိးလၢကဟးထီၣ်ကျဲဒီး ဟီၣ်က၀ီၤအပူၤဂီၤခီ ၆ နၣ်ရံၣ်တုၤလၢဟါခီ ၆ နၣ်ရံၣ်အတီၢ်ပူၤ ကဟးထီၣ်က့ၤလီၤလၢတၢ်ပလီၢ်ပဒီပူၤအဂ့ၢ်န့ၣ် (KNDO)ဟ့ၣ်ပလီၢ်စံး၀ဲန့ၣ်လီၤႉ လ့က့ၣ်ဒီးတၤပီပယီၤသုးကလၢၤအံၤမ့ၢ်၀ဲပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်အိၣ်၀ဲဒီး ဒူသ၀ီဖိလၢအအိၣ်ဘူးဖဲန့ၣ်သ့ၣ်တဖၣ်ပယီၤသုးမၢဆူၣ်မၢဆိးအ၀ဲသ့ၣ်ဒီးခးလီၤကျိဖးဒိၣ်ဆူဒူသ၀ီလီၢ်က၀ီၤကမျၢၢ်အိၣ်ဆိးလီၢ်ခဲအံၤခဲအံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
သၣ်တီၣ်ပူၤတၢ်ခိးထုးပယီၤသုးဟးဆှၣ်တၢ်(၂)ဂၤလၢမ့ၣ်ပိၢ်ဒီးသံကွံာ်
လါအ့ဖြ့ၣ် ၂၀ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါအ့ဖြ့ၣ် ၂၀ သီ ဂီၤခီ ၆ နၣ်ရံၣ်တခီအဆၢကတီၢ် လၢသၣ်တီၣ်ကၠံကီၢ်ဆၣ် သၣ်တီၣ်ကၠံ၀့ၢ်ဒီးပၠါစခါသ၀ီအဘၢၣ်စၢၤ(၁၁)မဲၤကိကပၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ခိးထုး၀ဲပယီၤသုးခီၣ်ချ့လၢအဟးဆှၣ်တၢ်(၂)အံၤလၢမ့ၣ်ပိၢ်ဒီးသံကွံာ်၀ဲ(၂)ဂၤလၢာ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ (KNLA)သုးပာ်ဖှိၣ်မၤန့ၢ်၀ဲကျိ(၂)ခိၣ်လၢပယီၤသုးသံ(၂)ဂၤအံၤအအိၣ်အဂ့ၢ်န့ၣ် လီၢ်က၀ီၤတီအူကညီတၢ်ကစီၣ် ပာ်ဖျါ၀ဲန့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“ဖဲတဂီၤအံၤ(၆)နၣ်ရံၣ်တခီအခါန့ၣ်ပယီၤသုး(၂)ဂၤဟဲထီၣ်၀ဲလၢ(၁၁)မဲၤကိမီၤနီၤႉဖဲန့ၣ်ၦၤအိၣ်ခိးထုးအ၀ဲသ့ၣ်ဒီးမ့ၣ်ပိၢ်သံ၀ဲ(၂)ဂၤလၢာ်လီၤႉပသ့ၣ်ညါဘၣ်လၢတၢ်မၤန့ၢ်ကျိ(၂)ခိၣ်လီၤႉလီၢ်က၀ီၤဖိလၢအဟးထီၣ်က့ၤလီၤဒီးဆဲးကဲးဖဲန့ၣ်တခိၣ်နါက့ဟးဂီၤတစဲး”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်ခိးထုးပယီၤသုးဒီးမ့ၣ်ပိၢ်ကဲထီၣ်သး၀ံၤအလီၢ်ခံပယီၤသုးလၢအအိၣ်(၁၃)မံးလာ်တဖၣ်ဟဲတုၤ၀ဲဒၣ်လၢတၢ်ကဲထီၣ်သးအလီၢ်ဒီးကးတံၢ်ဃာ်ကျဲသမံသမိးတၢ်ကအိၣ်အမံးနံး(၃၀)ဘျဲၣ်၀ံၤမးက့ၤအိးထီၣ်က့ၤကျဲအဂ့ၢ်န့ၣ်် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဖဲအပူၤကွံာ်(၂၀၂၁)နံၣ် လါနိၣ်၀့ဘၢၣ်အခါစ့ၢ်ကီး တၢ်ခိးထုးပယီၤသုးဒီးမ့ၣ်ပိၢ်လၢ(၁၁)မံးလာ်တၢ်လီၢ်ကဲထီၣ်တ့ၢ်အသးအိၣ်၀ဲအဂ့ၢ်န့ၣ် တီအူကညီတၢ်ကစီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
(၁၅)သီအတီၢ်ပူၤ ခ့ၣ်အဲၣ်ယူၣ်(သုးက့ ၅)ဒီး(သုးက့ ၆)ဟီၣ်က၀ီၤတၢ်ဒုးကဲထီၣ်(၂၂၉)ဘျီႇပယီၤသုးသံ(၁၆၈)ဂၤ
လါအ့ဖြ့ၣ် ၁၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဟီၣ်က၀ီၤ(သုးက့ ၅)မုၢ်တြီၢ်ကီၢ်ရ့ၣ်ဒီး(သုးက့ ၆)ဒူပျာ်ယာ်ကီၢ်ရ့ၣ်အပူၤ လါအ့ဖြ့ၣ် ၁ သီတုၤလၢ ၁၅ သီ တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီး ပယီၤသုးတဖၣ်အဘၢၣ်စၢၤခဲလၢာ်(၂၂၉)ဘျီဒီးပယီၤသုးတကပၤသံ၀ဲ(၁၆၈)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤ(၁၅)သီအတီၢ်ပူၤတၢ်ဒုးကဲထီၣ်ခဲလၢာ်(၁၇၄)ဘျီဒီး ဖဲန့ၣ်ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တကပၤသံ၀ဲ(၈၁)ဂၤႇဘၣ်ဒိ(၄၄)ဂၤအသိး မ့မ့ၢ်ခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤန့ၣ်တၢ်ဒုုးကဲထီၣ်၀ဲ(၅၅)ဘျီ ပယီၤသုးတကပၤသံ၀ဲ(၈၇)ဂၤႇဘၣ်ဒိ(၄၅)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဒ်န့ၣ်အသိးခ့ၣ်အဲၣ်ယူၣ်(သုးက့ ၅)တကပၤဘၣ်ဟ့ၣ်လီၤကွံာ်အသးသမူ(၁)ဂၤဒီးဘၣ်ဒိ(၇)ဂၤအသိး မ့မ့ၢ်လၢ(သုးက့ ၆)တကပၤန့ၣ်ဘၣ်ဟ့ၣ်လီၤကွံာ်အသးသမူ(၁၂)ဂၤဒီးဘၣ်ဒိ၀ဲ(၁၇)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါခံနွံအတီၢ်ပူၤလၢ(သုးက့ ၅)ဟီၣ်က၀ီၤအပူၤ (KNLA)မၤဟးဂီၤကွံာ်ပယီၤသုးအသိလ့ၣ်(၂)ခိၣ်ဒီးသိလ့ၣ်တိၤဟးဂီၤ၀ဲ(၃)ဘိအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲတနံၤအံၤလါအ့ဖြ့ၣ် ၁၉ သီအနံၤန့ၣ်လီၤႉ တလါအံၤလါအ့ဖြ့ၣ်လါတ၀ာ််အတီၢ်ပူၤ ပယီၤသုးခးလီၤကျိဖးဒိၣ်(၄၃၀)ဖျၢၣ်ဆူလီၢ်က၀ီၤဒူသ၀ီတၢ်ဖံးအီၣ်မၤအီၣ်လီၢ်ကျဲပူၤအသိး ခီဖျိပယီၤသုးခးလီၤကျိဖးဒိၣ်အဃိဖၣ်ပူၣ်-ကမးမိၢ် လီၢ်က၀ီၤသ၀ီဖိသံ၀ဲ(၂)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဒ်န့ၣ်အသိးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤန့ၣ် တၢ်ဒုးကဲထီၣ်လၢခံနွံအတီၢ်ပူၤ ခီဖျိပယီၤသုးကဘီယူၤဟဲခးလီၤတၢ်ဒီးခးလီၤကျိဖးဒိၣ်ဆူသ၀ီပူၤအဃိ လီၢ်က၀ီၤဖိသံ၀ဲ(၄)ဂၤႇဘၣ်ဒိ၀ဲ(၈)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
တၢ်နုာ်လီၤခး၀ါဘိတီပၢၤကီၢ်အိၣ်ခိးတၢ်လီၢ် ပၢၤကီၢ်သုးသံ(၆)ဂၤ
လါအ့ဖြ့ၣ် ၁၉ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲတနံၤအံၤလါအ့ဖြ့ၣ် ၁၉ သီ ဂီၤခီအဆၢကတီၢ်န့ၣ် တၢ်နုာ်လီၤခး၀ါဘိတီကျဲဖးဒ့ပၢၤကီၢ်တြဲၤလၢအအိၣ်ဖဲကညီကီၢ်စဲၣ် ဖၣ်အၣ်ကီၢ်ဆၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤပူၤအံၤဒီး ဖဲန့ၣ်ပၢၤကီၢ်သုးသံ၀ဲ(၆)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ၀ါဘိတီကျဲဖးဒ့ပၢၤကီၢ်သုးအိၣ်ခိးတၢ်လီၢ်တြဲၤလၢအအိၣ်ဖဲဖၣ်အၣ်-ဒူသထူၣ်-ကမးမိၢ်ကျဲဖးဒ့အံၤ ဖဲတဂီၤအံၤဂီၤခီ ၈ နၣ်ရံၣ်တခီအဆၢကတီၢ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လဲၤနုာ်လီၤခး၀ဲအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ ဒူသထူၣ်ကီၢ်ရ့ၣ်ခိၣ် ပဒိၣ်စီၤစိမၠ့ၣ်စံး၀ဲလၢ“တြဲၤ၀ဲန့ၣ်သမံသမိးတၢ်တလီၢ်လီၢ်လီၤႉ အ၀ဲသ့ၣ်သမံသမိးၦၤဟးထီၣ်က့ၤလီၤအါအဃိကဘၣ်မ့ၢ်ၦၤလဲၤခးအီၤလီၤမီၤနီၤႉဖဲတြဲၤန့ၣ်ပၢၤကီၢ်သုးႇပယီၤသုးတဖၣ်အိၣ်လီၤႉၦၤသံအါလၢပၢၤကီၢ်သုးလီၤ”အဂ့ၢ်န့ၣ် ပဒိၣ်စီၤစိမၠ့ၣ်စံးဘၣ်ခ့ၣ်အဲးစံၣ်န့ၣ်လီၤႉ တၢ်နုုာ်လီၤခးပၢၤကီၢ်သုးတြဲၤဘျီ၀ဲအံၤန့ၣ်တၢ်မၤန့ၢ်၀ဲကျိဖိ(၃)ခိၣ်ဒီးကျိချံ(၁၅)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်(သုးက့ ၁)စံး၀ဲန့ၣ်လီၤႉ ပၢၤကီၢ်တြဲၤအံၤမ့ၢ်၀ဲဒၣ်ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲဒီးသိလ့ၣ်ဒီး တၢ်ကဲထီၣ်သး၀ံၤအလီၢ်ခံမ့ၣ်ပိၢ်ပိၢ်ဖးထီၣ်(၂)ဖျၢၣ်လၢတြဲၤအကပၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ခီဖျိတၢ်နုုာ်လီၤခးပၢၤကီၢ်တြဲၤအဃိ ပယီၤသုးတဖၣ်ဟဲတုၤ၀ဲဒီးခးတပျုာ်တပျီၤကျိအသိး ကးတံၢ်ကျဲသမံသမိးတၢ်ဟဲအါထီၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ပယီၤသုးဂုာ်ကျဲးစၢးမၤအါထီၣ်ဂံၢ်ဘါလၢထံကပျၢၤသုးကလၢၤ
လါအ့ဖြ့ၣ် ၁၉ သီႇ ၂၀၂၂ နံၣ်ႇ ခ့ၣ်အဲးစံၣ် ကီးတရံးကီၢ်ဆၣ် တီနီၢ်မုၢ်ထီၣ် ထံကပျၢၤပယီၤသုးကလၢၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA (သုးက့ ၆)သုးပာ်ဖှိၣ်က၀ီၤတံၢ်ဃာ်၀ဲအံၤ ကတီၢ်ခဲအံၤပယီၤသုးကျိၤဟဲထီၣ်မၤအါထီၣ်အဂံၢ်ဘါအဂ့ၢ်န့ၣ် ဟီၣ်က၀ီၤကညီဒီကလုာ်ဂၢၤသးကရၢ(KNDO)သုးခိၣ်တဂၤစံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါမးရှး ၂၅ သီအနံၤ ကညီဒီကလုာ်ဂၢၤသးကရၢ(KNDO)ဘံၣ်ဘၢသုးရ့ၣ်ဒီးKNLA(၁၀၃) သုးရ့ၣ်ပာ်ဖှိၣ်ထီၣ်သးဂုာ်ကျဲးစၢးလၢကလဲၤထီၣ်မၤန့ၢ်ထံကပျၢၤပယီၤသုးကလၢၤအံၤအကတီၢ် ခီဖျိပယီၤသုးကဘီယူၤဟဲခးလီၤတၢ်အဃိ ဘၣ်ဂုၤက့ၤလီၢ်ခံန့ၣ်လီၤႉ ကတီၢ်ခဲအံၤခီဖျိတၢ်ကးတံၢ်ဃာ်၀ဲသုးကလၢၤအကျဲအဃိ ပယီၤသုးရ့ၣ်(၄)ရ့ၣ်ပာ်ဖှိၣ်ထီၣ်သးဂုာ်ကျဲးစၢးဟဲထီၣ်၀ဲအဂ့ၢ်န့ၣ် (KNDO)ဘံၣ်ဘၢသုးရ့ၣ် သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်မၠးထူ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ အ၀ဲစံး၀ဲလၢ“ထံကပျၢၤသုးကလၢၤန့ၣ်စးထီၣ်လၢမဟါတလါ ၂၅ သီတုၤလၢခဲအံၤန့ၣ် ဖဲပသုးရ့ၣ်မဲာ်ညါထံကပျၢၤဒီးဂီၤလ့ၤကါကျဲမုၢ်န့ၣ် ပၦၤဖၠးတဲာ်အဃိတုၤလၢအခဲအံၤန့ၣ်အ၀ဲသ့ၣ်က့ၤဆှၢအၦၤဆါတန့ၢ်ဘၣ်ႇအသုးလၢကဟဲမၤစၢၤတၢ်နါက့လဲၤတန့ၢ်ဘၣ်ႉထံကပျၢၤခီန့ၣ်လီၤဂာ်က့ၤဒ်သိးၦၤဖိၣ်ဃဲတဒူၣ်အဃိႇလိၤလိၤန့ၣ်အ၀ဲသ့ၣ်ထိ၀ဲလၢဂံၢ်ဘါကလူၤမၤၦဲၤက့ၤထံကပျၢၤဂံၢ်ဘါလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဒ်သိးပယီၤသုးကမၤအါထီၣ်အဂံၢ်ဘါလၢထံကပျၢၤသုးကလၢၤအံၤအဂီၢ် ပယီၤသုးရ့ၣ်(၄)ရ့ၣ်ပာ်ဖှိၣ်ထီၣ်သး တဟဲထီၣ်၀ဲဒၣ်လၢဂီၤလ့ၤကျဲမုၢ်တခီလၢၤဘၣ် မ့မ့ၢ်တခီဆီတလဲက့ၤအကျဲဟဲထီၣ်က့ၤ၀ဲဒၣ်လၢကစၢၢ်ကျဲတကပၤအဂ့ၢ်န့ၣ် (KNDO)စံး၀ဲန့ၣ်လီၤႉ ဖဲအ၀ဲသ့ၣ်ဟဲထီၣ်၀ဲကျဲလၢကစၢၢ်ကျဲအကတီၢ်န့ၣ်တၢ်ဒုးကဲထီၣ်၀ဲဒီး(KNDO)အဃိ (KNDO)တကပၤဘၣ်ဂုာ်က့ၤအလီၢ်ခံန့ၣ်လီၤႉကတီၢ်ခဲအံၤပယီၤသုးကျိၤဟဲထီၣ်တုၤ၀ဲဒၣ်လၢ(KNLA)၁၀၃ သုးရ့ၣ်အဟီၣ်က၀ီၤပူၤလံအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤအဲၣ်မၠးထူ စံးအါထီၣ်၀ဲန့ၣ်လီၤႉ ပယီၤသုးကျိၤလၢအဟဲထီၣ်တဖၣ်အံၤမ့ၢ်၀ဲဒၣ်ဒုးယၤပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၁၃)ဒုးယၤ(၁)ဒုးယၤခိၣ်မၠ့ၣ်ကၠီၤတီခိၣ်ရိၣ်မဲခီၣ်ချ့သုးရ့ၣ်(ခမရ-၅၅၅)ႇ(ခမရ-၅၅၆)ႇ(ခမရ-၅၆၀)ဒီး(ခမရ-၅၈၅)သုးရ့ၣ်(၄)ရ့ၣ်သုးဖိတဖၣ်ဒီးသုးဂံၢ်ဘါကအိၣ်အဂၤ(၂၀၀)ဘျဲၣ်န့ၣ်လီၤႉ (KNDO)သုးကလၢၤလၢပယီၤသုးကျိၤထီၣ်ရှဲ၀ဲအံၤ ကတီၢ်ခဲအံၤ(KNDO)သုးပာ်ဖှိၣ်လဲၤထီၣ်မၤန့ၢ်က့ၤ၀ဲလံအဂ့ၢ်န့ၣ် သ့ၣ်ညါဘၣ်လၢသုးခိၣ်တဂၤအအိၣ်န့ၣ်လီၤႉ ဒ်န့ၣ်အသိးစးထီၣ်ဖဲအပူၤကွံာ်လါထီၣ်သီအခါ ခီဖျိလၢထံကပျၢၤသုးကလၢၤတၢ်ဒုးအဃိ လီၢ်က၀ီၤကမျၢၢ်(၂၀၀၀)ဘျဲၣ်ဘၣ်ဃ့ၢ်ထီၣ်၀ဲဒီးကတီၢ်ခဲအံၤတုၤလၢခဲအံၤအ၀ဲသ့ၣ်တက့ၤဘၣ်ဒံးလၢအဟံၣ်အဃီဘၣ်ႇ ခီဖျိတၢ်အီၣ်တၢ်အီတကဆှီႇတၢ်ဟးလီၢ်တအိၣ်ႇတၢ်ခိၣ်ဒုးတကူတလၢဘၣ်ဒီးၦၤနီၣ်ဂံၢ်အါအဃိ တၢ်ကီတၢ်ခဲဟဲအိၣ်ထီၣ်၀ဲလၢတၢ်အိၣ်ဆူၣ််အိၣ်ချ့တကပၤအဂ့ၢ်န့ၣ် ၦၤလၢအမၤစၢၤၦၤလီၢ်အိၣ်ကမှံတဖၣ်စံး၀ဲန့ၣ်လီၤႉ ဖဲအပူၤကွံာ်လါမးရှး ၂၅ သီအနံၤန့ၣ် (KNLA,KNDO)ဒီးသိၣ်မှံၤသုးပာ်ဖှိၣ်တဖၣ် လဲၤထီၣ်မၤန့ၢ်၀ဲထံကပျၢၤပယီၤသုးကလၢၤဘၣ်ဆၣ် ခီဖျိပယီၤသုးဟဲထီၣ်ခးလီၤတၢ်ဒီးကဘီယူၤအဃိ တမၤန့ၢ်၀ဲပယီၤသုးကလၢၤအံၤဘၣ်ဒီးဘၣ်ဂုၤက့ၤလီၢ်ခံန့ၣ်လီၤႉ ဘၣ်ဆၣ်ကတီၢ်ခဲအံၤတၢ်လဲၤထီၣ်မၤန့ၢ်က၀ီၤတံၢ်ဃာ်ထံကပျၢၤသုးကလၢၤအံၤလံအဂ့ၢ်န့ၣ် (KNDO)စံး၀ဲန့ၣ်လီၤႉ
ပယီၤသုးခးလီၤကျိဖးဒိၣ်ဆူလ့က့ၣ်ကိာ်ထံမူထၣ်လီၢ်က၀ီၤဒီးဟဲဃုသ့ၣ်ညါတၢ်ဒီးကဘီယူၤကိးမုၢ်နံၤဒဲး
လါအ့ဖြ့ၣ် ၁၉ သီႇ ၂၀၂၂ နံၣ်ႇ ခ့ၣ်အဲးစံၣ် ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်ခးလီၤကျိဖးဒိၣ်ဆူခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၆)ဒူပျာ်ယာ်ကီၢ်ရ့ၣ် လ့က့ၣ်ကိာ်တၢ်လီၢ် သ့ၣ်ခါညံၣ်နီၣ် ထံမူထၣ်လီၢ်က၀ီၤတကပၤအမဲာ်ညါ ဟဲဃုသ့ၣ်ညါတၢ်ဒီးကဘီယူၤတပယူာ်ဃီအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤတၢ်ကစီၣ်အအိၣ်န့ၣ်လီၤႉ ဖဲမဟါလါအ့ဖြ့ၣ် ၁၈ သီ မုၢ်နၤခီ ၁၀ နၣ်ရံၣ်အဆၢကတီၢ် ပယီၤသုးဒီး(BGF)သုးပာ်ဖှိၣ်တဖၣ် ခးလီၤတၢ်ဆူလ့က့ၣ်ကိာ် သ့ၣ်ကါညံၣ်နီၣ် ထံမူထၣ်လီၢ်က၀ီၤ လၢ(KNLA)သုးပာ်ဖှိၣ်အိၣ်အလီၢ်တဖၣ်တကးဒံးဘၣ်အမဲာ်ညါ ဖဲမုၢ်နၤခီ ၁၂ နၣ်ရံၣ်ဘျဲၣ်အဆၢကတီၢ်ဒီး တနံၤအံၤလါအ့ဖြ့ၣ် ၁၉ သီ ဂီၤခီအဆၢကတီၢ်န့ၣ် ကဘီယူၤဟဲဆှၣ်တၢ်ဒံးအဂ့ၢ်န့ၣ် (KNLA)သုးပာ်ဖှိၣ်ၦၤဟ့ၣ်တၢ်ကစီၣ်ဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမုၢ်နၤခီ ၁၀ နၣ်ရံၣ်ဘျဲၣ်အခါန့ၣ် လၢညံၣ်နီၣ်(၃၅၅)သုးရ့ၣ်တကပၤန့ၣ်တၢ်ဒုးကဲထီၣ်ႉ ညံၣ်နီၣ်ကျိဖးဒိၣ်လူၢ်ခးလီၤကျိဖးဒိၣ်ဆူသ၀ီပူၤႉ ဖဲမုၢ်နၤနါက့လၢက့ၣ်ကိာ်တကပၤစ့ၢ်ကီးတၢ်ဒုးကဲထီၣ်ႇ ခးလီၤကျိဖးဒိၣ်ႉမ့မ့ၢ်ပ၀ဲဒၣ်ဒုတၢ်ဘၣ်ဒိဘၣ်ထံးတအိၣ်ဘၣ်ႉဖဲမုၢ်နၤန့ၣ်ကဘီယူၤဟဲဆှၣ်တၢ်ႇဖဲတဂီၤအံၤ ၉ နၣ်ရံၣ်ဘျဲၣ်နါက့ကဘီယူၤကၠဲးဟဲဆှၣ်တၢ်တရံးတၢ်(၇)၀ီညါႇတ့ၢ်လီၤမ့ၣ်ပိၢ်ဒုတအိၣ်ဘၣ်”အဂ့ၢ်န့ၣ် စံး၀ဲန့ၣ်လီၤႉ လၢန့ၣ််အမဲာ်ညါလၢဂီၤလ့ၤဒီးကနဲလ့ႇမီခံတကပၤစ့ၢ်ကီးတၢ်ဒုးကဲထီၣ်၀ဲကိးမုၢ်နံၤဒဲးအသိး တကီၢ်ခါတၢ်အိၣ်သးခဲအံၤခီဖျိပယီၤသုးဒီး(BGF)သုးပာ်ဖှိၣ်အံၤတဂုၤအလီၢ်ခံဘၣ် မ့့မ့ၢ်တခီမၤအါထီၣ်အသုးဂံၢ်ဘါကွ့ၢ်ကွ့ၢ်အဃိ တၢ်ဒုးကဆဲးကဲထီၣ်ကဒါသ့၀ဲအဂ့ၢ်န့ၣ် ၦၤဟ့ၣ်တၢ်ကစီၣ်ဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဒ်န့ၣ်အသိးခီဖျိပယီၤသုးဒီး(BGF)သုးပာ်ဖျိၣ်သုးကျိၤတဖၣ်နုာ်လီၤမၤ၀ဲတၢ်ထီၣ်ဒုးလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤ ဒူပျာ်ယာ်ကီၢ်ရ့ၣ်ပူၤအဃိ လါအ့ဖြ့ၣ်(၁၅)သီအတီၢ်ပူၤ ခံခီခံကပၤတၢ်ခးလိာ်သးကဲထီၣ်ခဲလၢာ်(၅၅)ဘျီဒီးပယီၤသုးဒီး(BGF)တကပၤသံ၀ဲ(၈၇)ဂၤႇဘၣ်ဒိ(၄၅)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ မ့မ့ၢ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တကပၤဘၣ်ဟ့ၣ်လီၤအသးသမူ(၁၂)ဂၤႇဘၣ်ဒိ(၁၇)ဂၤဒီး လီၢ်က၀ီၤဖိသံ၀ဲ(၄)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤ ဖဲတၢ်ခးလိာ်သးကဲထီၣ်လၢ(KNLA)သုးပာ်ဖှိၣ်ဒီးပယီၤသုးတဖၣ်အဘၢၣ်စၢၤအတီၢ်ပူၤန့ၣ် ဟံၣ်ဃီတၢ်သူၣ်ထီၣ်ႇသီခါဖၠၣ်ႇတၢ်ဘါယွၤသရိာ်တၢ်သူၣ်ထီၣ်ဟးဂီၤ၀ဲအါမးဒီး ကမျၢၢ်ၦၤလီၢ်အိၣ်ကမှံ(၃၀ႇ၀၀၀)ဃၣ်ဃၣ်တုၤလၢခဲအံၤတက့ၤဘၣ်ဒံးလၢအဟံၣ်အဃီဘၣ် ဘၣ်အိၣ်ကဒုဒံးအသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢသူမှဲကျိကၢၢ်နံၤဒီး ကီးတရံးကလံၤထံးဟီၣ်သရီကျိ၀ၢ်ခီသ၀ီတဖၣ်အပူၤအဖၢမုၢ်ဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ထံမူထၣ်သ၀ီဖိလၢအကထိလိၣ်ဘၣ်ဂ့ၢ်ဂီၢ်အူတၢ်မၤစၢၤ
လါအ့ဖြၣ် ၁၈ သီႇ ၂၀၂၂ နံၣ်ႇ ခ့ၣ်အဲးစံၣ် ခီဖျိပယီၤသုးကဘီယူၤဟဲခးလီၤတၢ်အဃိ မၠၣ်၀တံၣ်ကီၢ်ရ့ၣ် ထံမူထၣ်သ၀ီဖိလၢအကထိလၢအဘၣ်ဃ့ၢ်အိၣ်ကမှံတဖၣ် ကတီၢ်ခဲအံၤလိၣ်ဘၣ်၀ဲဂ့ၢ်ဂီၢ်အူတၢ်မၤစၢၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါအ့ဖြ့ၣ် ၁၂ သီအနံၤ ခီဖျိပယီၤသုးကဘီယူၤဟဲခးလီၤတၢ်အဃိ ထံမူထၣ်သ၀ီဒီတဖျၢၣ်ဃ့ၢ်ထီၣ်၀ဲဒၣ်ဒီးခီဖျိလဲၤဃ့ၢ်အိၣ်ကဒု၀ဲဒၣ်လၢသ၀ီလၢအဂၤတဖၣ်အဃိ တကီၢ်ခါခဲအံၤလိၣ်ဘၣ်၀ဲဒၣ်ဂ့ၢ်ဂီၢ်အူတၢ်အီၣ်တၢ်အီႇကသံၣ်ကသီဒီးတၢ်ဖိတၢ်လံၤလၢအဂၤသ့ၣ်တဖၣ်အဂ့ၢ်န့ၣ် ပိာ်မုၣ်ၦၤလီၢ်အိၣ်ကမှံဖိတဂၤစံး၀ဲဒ်အံၤန့ၣ်လီၤႉ “ၦၤနီၤဖးလိာ်သးအိၣ်၀ဲဒၣ်လၢအံၤတတီၤလၢန့ၣ်တတီၤလီၤႉတၢ်အီၣ်တၢ်အီနါက့လိၣ်၀ဲလီၤႉၦၤတနီၤဟဲစံၣ်န့ၣ်အဆ့ကၤအပိၣ်တပၣ်ဘၣ်ႉမံလၢၦၢ်ပူၤမ့ၣ်အူတအိၣ်ဘၣ်ႇခီဖျိပ့ၢ်ပီၤတပၣ်ဘၣ်အဃိဖိသၣ်သ့ၣ်တဖၣ်အဂီၢ်တၢ်ကီ၀ဲလီၤႉပကရူၢ်အံၤအိၣ်၀ဲဒၣ်အဂၤ(၅၀)ဘျဲၣ်ႉဖဲပအိၣ်တၢ်လီၢ်အံၤမဟါန့ၣ်ၦၤဟဲစံၣ်ထီၣ်ကဒီးလၢသိလ့ၣ်ဖးဒိၣ်ခံခိၣ်ညါႉသ၀ီပူၤအံၤၦၤအိၣ်အါအဃိိပနီၤဖးလိာ်သးဒီးပအိၣ်၀ဲလၢန့ၣ်တတီၤလၢအံၤတတီၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအ့ဖြ့ၣ် ၁၂ သီအနံၤ ပယီၤသုးခးလီၤကျိဖးဒိၣ်လၢထံမူထၣ်သ၀ီပူၤဒီတနံၤညါအမဲာ်ညါ လၢမုၢ်နၤခီစ့ၢ်ကီးဟဲခးလီၤတၢ်ဒီးကဘီယူၤအဃိ လီၢ်က၀ီၤကမျၢၢ်ဘၣ်ဒိ၀ဲ(၉)ဂၤဒီးဟံၣ်ဃီတၢ်သူၣ်ထီၣ်တနီၤဟးဂီၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ “ဖဲအ၀ဲသ့ၣ်ဟဲခးလီၤတၢ်ဒီးကဘီယူၤအခါခီဖျိၦၤတနီၤစံၣ်လီၤလၢတၢ်ပူၤတတုၤဒံးတဖၣ်ဘၣ်၀ဲဒီးကျိအက့အခီအိၣ်လီၤႉဖဲန့ၣ်အကျါမိၢ်ဖိဆံးတဂၤကျိချံအက့ဘၣ်၀ဲအနုၢ်လီၤႉၦၤဘၣ်ဒိဘၣ်ထံးတဖၣ်အကျါမ့ၢ်အအိၣ်တ့ၢ်ဖဲသ၀ီပူၤဧါႇမ့ၢ်အလဲၤစံၣ်အိၣ်ခူသူၣ်ဖဲလဲၣ်ဒုတသ့ၣ်ညါဘၣ်ႉထံမူထၣ်သ၀ီန့ၣ်ဟံၣ်ခိၣ်အိၣ်၀ဲအဖျၢၣ်(၆၀၀)ဘျဲၣ်ႇစံၣ်ထီၣ်ခဲလၢာ်လီၤႉတနီၤန့ၣ်ခီဖျိအဘုၣ်ဃာ်၀ဲကျီၢ်ႇထီးႇဆီအိၣ်အဃိအိၣ်တ့ၢ်၀ဲလီၤ”အဂ့ၢ်န့ၣ် ပိာ်မုၣ်ၦၤလီၢ်အိၣ်ကမှံဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဖဲအပူၤကွံာ်လါမးရှး ၂၄ သီအနံၤစ့ၢ်ကီး လၢထံမူထၣ်သ၀ီပူၤတၢ်ဒုးကဲထီၣ်၀ဲလၢ ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံ ခီဖျိပယီၤသုးတကပၤက့ၤခးလီၤကျိဖးဒိၣ်တဖၣ်ဆူသ၀ီပူၤအဃိ သးစၢ်ပိာ်မုၣ်ဖိသံကွံာ်(၁)ဂၤဒီး ဘၣ်ဒိ၀ဲနးနးကျံၤကျံၤ(၃)ဂၤအသိး ဟံၣ်ဃီတၢ်သူၣ်ထီၣ်တနီၤဟးဂီၤကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
မီခံဟီၣ်က၀ီၤပယီၤသုးဟဲက့ၤပာ်ဖှိၣ်မၤသကိးတၢ်ဒီး(KNLA)တဂၤဃုာ်ဒီးတၢ်စုက၀ဲၤ
လါအ့ဖြၣ် ၁၂ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲအပူၤကွံာ်လါအ့ဖြ့ၣ် ၉ သီအနံၤ ပယီၤသုးဖိတဂၤလၢအအိၣ်ဖဲမၠၣ်၀တံၣ်ကလံၤထံး မီခံဟီၣ်က၀ီၤ ဘယ့ၣ်နီၤတၢ်လူၢ်အံၤ ဟဲက့ၤပာ်ဖှိၣ်မၤသကိးတၢ်ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) ဃုာ်ဒီးတၢ်စုက၀ဲၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးခီၣ်ချ့သုးရ့ၣ်(ခမရ-၅၅၅)သုးဖိစီၣ်မ့ထွ့လၢအသးနံၣ်အိၣ်(၂၇)နံၣ်အံၤ ခီဖျိတၢ်မၤနၢၤအီၤလၢသုးပူၤဒီးအီၣ်ဘၣ်တၢ်တဘျဲလၢၤဘၣ်အဃိ ဆဲးကျိး၀ဲ(KNLA) ၂၀၁ သုးရ့ၣ်၀ံၤ ဟဲက့ၤပာ်ဖှိၣ်မၤသကိးတၢ်ဒ်အံၤလီၤအဂ့ၢ်န့ၣ် စံး၀ဲဒ်အံၤန့ၣ်လီၤႉ “ပတၢ်ကူတၢ်ကၤစ့ၢ်ကီးတအိၣ်လၢၤဘၣ်ႇကစၢ်စ့ၢ်ကီးလီၤဃဲၤလၢာ်လံႉအသီ(၂၀)မးလုၢ်ထံတဘျီလီၤအဃိဖးနးညါႉထွံၣ်မးန့ၣ်အီလုၢ်ထံတနံၤတဘျီဒံးႉတအီၣ်ဘၣ်အီဘၣ်လီၤဒိလၢမ့ၤႉလီၤဘၣ်တၢ်ကီတၢ်ခဲဖးဒိၣ်ညါႉမ့မ့ၢ်အ၀ဲသ့ၣ်ခီဒုအီၣ်မ့ၤႉမ့မ့ၢ်ပ၀ဲဒၣ်ခီဒုပဘၣ်အီၣ်မ့ၤချီလီၤႉအ၀ဲသ့ၣ်မၤ၀ဲလၢတၢ်ဘၣ်အသးလီၤႉ အဲၣ်ဒိးတ့ၢ်လီၤန့ၣ်တ့ၢ်လီၤ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးဖိစီၣ်မ့ထွ့အံၤဟဲက့ၤစိာ်ဃုာ်၀ဲ(MA 1)ကျိတခိၣ်ႇကျိချံ(၁၆၀)ဖျၢၣ်ႇကျိမဲးကစံ(၁)ဘ့ၣ်ဒီး မ့ၣ်ပိၢ်တဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ပယီၤသုးဖိစီၣ်မ့ထွ့လၢအဟဲက့ၤပာ်ဖှိၣ်မၤသကိးတၢ်ဒီး(KNLA)အံၤ ကတီၢ်ခဲအံၤတၢ်တူၢ်လိာ်အီၤဂ့ၤဂ့ၤဒီး တၢ်လၢအအဲၣ်ဒိးမၤ၀ဲသ့ၣ်တဖၣ်န့ၣ်ကဟ့ၣ်အီၤတၢ်ပျဲအဂ့ၢ်န့ၣ် KNLA (၂၀၁)သုးရ့ၣ် သုးခိၣ်စိ စီၤတနၢ်ထူ စံး၀ဲဒ်အံၤန့ၣ်လီၤႉ “ဟဲက့ၤလၢပအိၣ်ဒုပတူၢ်လိာ်ခီၣ်ဆၢအီၤမုာ်မုာ်လီၤႉအ၀ဲခီဒုဟဲက့ၤတုၤန့ၣ်တဲ၀ဲဒၣ်လၢကဃုဖံးဃုမၤႇကမၤစၢၤက့ၤအမိအပါလီၤႉတဲ၀ဲလၢအမိအပါန့ၣ်တၢ်အိၣ်ဆူၣ်အိၣ်ချ့တဂ့ၤဘၣ်ႉဒ်သိးအတၢ်ဘၣ်သးလၢကလဲၤတူၢ်ငါဒုပဟ့ၣ်အီၤတၢ်ပျဲလီၤ”အဂ့ၢ်န့ၣ် စံး၀ဲန့ၣ်လီၤႉ KNLA (၂၀၁)သုးရ့ၣ်တၢ်လီၢ်မီခံဟီၣ်က၀ီၤအပူၤန့ၣ် ပယီၤသုးကလၢၤအိၣ်၀ဲ(၄)ဖျၢၣ်ဒီး မ့ၢ်၀ဲဒၣ်(ခလရ-၃၁)ဒီး(ခမရ-၅၅၅)သုးရ့ၣ်အိၣ်ဆီလီၤသးဟူးဂဲၤ၀ဲဒၣ်န့ၣ်လီၤႉသုးဟံးန့ၢ်တၢ်စိတၢ်ကမီၤ၀ံၤအလီၢ်ခံ ပယီၤသုးဟဲက့ၤပာ်ဖှိၣ်မၤသကိးတၢ်ဒီး KNLA(၂၀၁)သုးရ့ၣ် အိၣ်၀ဲခဲလၢာ်(၇)ဂၤလံအဂ့ၢ်န့ၣ် သုးခိၣ်စိ စီၤတနၢ်ထူစံးအါထီၣ်၀ဲန့ၣ်လီၤႉ
ခီဖျိပယီၤသုးခးလီၤကျိဖးဒိၣ်ဒီးကဘီယူၤခးလီၤတၢ်အဃိ လ့က့ၣ်ကိာ်၀့ၢ်ပူၤနံၣ်ပိဖီၣ်ဒ့ရှၢၣ်ကၠိတၢ်သူၣ်ထီၣ်ဟးဂီၤ
လါအ့ဖြ့ၣ် ၁၁ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲမဟါလါအ့ဖြ့ၣ် ၁၀ သီ တၢ်ဒုးကဲထီၣ်၀ဲလၢခ့ၣ်အဲၣ်ယူၣ်(သုးက့ ၆)လ့က့ၣ်ကိာ်၀့ၢ်သီဟီၣ်က၀ီၤအပူၤဒီး ဖဲန့ၣ်ခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိ ကၠိတၢ်သူၣ်ထီၣ်လၢယပၣ်နံၣ်ပိဖီၣ်ဒ့ရှၢၣ်မၤဘူၣ်လီၤသူၣ်ထီၣ်၀ဲအံၤဒီးလီၢ်က၀ီၤၦၤလီၢ်အိၣ်ကမှံဖိအဟံၣ်တၢ်သူၣ်ထီၣ်လီၤၦီၢ်ဟးဂီၤ၀ဲအါမးအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲန့ၣ်လီၤႉ “ဖဲမုၢ်နၤခီ ၁၂ နၣ်ရံၣ်န့ၣ်ကဘီယူၤကၠဲးဟဲတဘ့ၣ်ႉတ့ၢ်လီၤ၀ဲမ့ၣ်ပိၢ်ဖးဒိၣ်ခံဖျၢၣ် ဖဲန့ၣ်ဘၣ်၀ဲဒၣ်လ့က့ၣ်ကိာ်ကၠိတၢ်သူၣ်ထီၣ်လီၤႉ ဖဲမဟါဂီၤခီ ၁၁ နၣ်ရံၣ်တုၤလၢဟါခီ ၆ နၣ်ရံၣ်န့ၣ် ကဘီယူၤဟဲတ့ၢ်လီၤမ့ၣ်ပိၢ်ဖးဒိၣ်အဖျၢၣ်(၂၀)ဃၣ်ဃၣ်ညါႉဟဲခး၀ဲဒီး(ရီးကဲး)ကျိဖးဒိၣ်လီၤႉတနီၤန့ၣ်တပိၢ်ဖးထီၣ်ဒံးဘၣ်ႉလၢပျီပူၤခီန့ၣ်လၢတၢ်လူၢ်ခိၣ်ႇလဲၣ်ခဲၣ်တီၤဃိၣ်လူၢ်(BGF)သုးကလၢၤတဖၣ်ခးလီၤစၢၤကျိဖးဒိၣ်အဖျၢၣ်(၁၀၀)ဘျဲၣ်ႉ လီၤတဲာ်ဘၣ်၀ဲလ့က့ၣ်ကိာ်က၀ီၤဒ့(၆)ဟံၣ်ႇက၀ီၤဒ့(၃)ဟံၣ်ႇက၀ီၤဒ့(၁)ဟံၣ်ခဲလၢာ်အဖျၢၣ်(၃၀)ဘျဲၣ်ညါႉ ပသ့ၣ်ညါလၢဟံၣ်တနီၤန့ၣ်အူအီၣ်ဟးဂီၤ၀ဲလီၤ”အဂ့ၢ်န့ၣ်လီၢ်က၀ီၤတၢ်ကစီၣ်စံး၀ဲန့ၣ်လီၤႉ လၢန့ၣ်အမဲာ်ညါတၢ်တယးကွၢ်၀ဲလၢဃုာ်ဒီးအပူၤကွံာ်တၢ်ဒုးကဲထီၣ်ဟံၣ်ဃီဟးဂီၤဒီးခဲအံၤလ့က့ၣ်ကိာ်က၀ီၤဒ့ပူၤဟံၣ်ဟးဂီၤခဲလၢာ်အဖျၢၣ်(၁၀၀)ဃၣ်ဃၣ်ညါဘၣ်ဆၣ်တုၤလၢခဲအံၤတၢ်မၤန့ၢ်စရီလီၤတံၢ်လီၤဆဲးတအိၣ်ဒံးဘၣ်အဂ့ၢ်န့ၣ် လီၢ်က၀ီၤတၢ်ကစီၣ်တခါဃီ၀ဲန့ၣ်စံးအါထီၣ်၀ဲန့ၣ်လီၤႉ ဖဲမဟါလၢလ့က့ၣ်ကိာ်ဟီၣ်က၀ီၤပူၤတၢ်ဒုးကဲထီၣ်၀ဲလၢ(KNLA)သုးပာ်ဖှိၣ်ဒီးပယီၤသုးတြိၤ(၄၄)စုတီၤအဖီလာ်သုးရ့ၣ်(ခမရ-၂၀၇)သုးကျိၤတဖၣ်အဘၢၣ်စၢၤန့ၣ်တၢ်ထံၣ်န့ၢ်၀ဲပယီၤသုးအစိၣ်(၁၂)စိၣ်ဒီး တၢ်မၤန့ၢ်၀ဲကျိ(၉)ခိၣ်ဃုာ်ဒီးစဲးတၢ်ဖိတၢ်လံၤသ့ၣ်တဖၣ်အသိး မ့မ့ၢ်လၢအ၀ဲသ့ၣ်တကပၤဘၣ်ဟ့ၣ်လီၤကွံာ်အသးသမူ(၂)ဂၤဒီးဘၣ်ဒိ၀ဲ(၄)ဂၤအဂ့ၢ်န့ၣ် (KNLA)သုးပာ်ဖှိၣ်(Cobra)သုးကျိၤထုးထီၣ်ပာ်ဖျါ၀ဲတၢ်ကစီၣ်န့ၣ်လီၤႉ လၢန့ၣ်အမဲာ်ညါဖီၣ်သမူန့ၢ်၀ဲပယီၤသုး(ခမရ-၂၀၇)သုးဒ့ခိၣ် သုးခိၣ်စိတ့ၤလ့နဲၤစ့ၢ်ကီးအဂ့ၢ်န့ၣ် (Cobra)သုးကျိၤထုးထီၣ်ပာ်ဖျါ၀ဲန့ၣ်လီၤႉ တၢ်ဒုးကဲထီၣ်ဖဲမဟါအကတီၢ် စးထီၣ်ဖဲဂီၤခီ ၁၀ နၣ်ရံၣ်န့ၣ် ပယီၤသုးကဘီယူၤ(၂)ဘ့ၣ်ဟဲဆှၣ်တၢ်တ့ၢ်လီၤ၀ဲမ့ၣ်ပိၢ်(၅)ဘျီဒီး ခီဖျိကဘီယူၤဟဲခးလီၤတၢ်အဃိလ့က့ၣ်ကိာ်လီၢ်က၀ီၤကမျၢၢ်အဟံၣ်ဟးဂီၤ၀ဲအဖျၢၣ်(၃၀)ဃၣ်ဃၣ်ဒီး မ့ၣ်အူအီၣ်ဟးဂီၤကွံာ်၀ဲဟံၣ်(၅)ဖျၢၣ်အဂ့ၢ်န့ၣ် (Cobra)သုးကျိၤထုးထီၣ်ပာ်ဖျါ၀ဲန့ၣ်လီၤႉ ဖဲအပူၤကွံာ် ၂၀၂၁ နံၣ် လါဒံၣ်စ့ဘၢၣ် ၁၅ သီအနံၤ တၢ်ဒုးစးထီၣ်ကဲထီၣ်၀ဲလၢလ့က့ၣ်ကိာ်ဟီၣ်က၀ီၤအပူၤဒီး တုၤလၢတနံၣ်အံၤ(၂၀၂၂)လါအ့ဖြ့ၣ် ၁၀ သီအနံၤတၢ်ဒုးကဲထီၣ်ယံၤ၀ဲ(၄)လါဃၣ်ဃၣ်အတီၢ်ပူၤ လ့က့ၣ်ကိာ်ႇထံမဲး၀ါခံႇယသ့ၣ်ကူၤႇဖလူဖးဒိၣ်ႇဖလူဖိသ၀ီလီၢ်က၀ီၤကမျၢၢ်(၁၂ႇ၀၀၀)ဘျဲၣ်ဘၣ်လဲၤစံၣ်အိၣ်ကဒု၀ဲလၢကီၢ်ကၠီၣ်တဲၣ်-ကီၢ်ပယီၤကီၢ်ဆၢသူမှဲကျိကၢၢ်နံၤတစိၢ်တလီၢ်အဖၢမုၢ်ဒံးန့ၣ်လီၤႉ