KNU သုးက့(၆)ဟီၣ်က၀ီၤပူၤခံသီအတီၢ်ပူၤ ပယီၤသုးသံ(၉)ဂၤႇဘၣ်ဒိ(၁၁)ဂၤ
လါဒံၣ်စ့ဘၢၣ် ၂၃ သီႇ ၂၀၂၁ နံၣ်ႇ ခ့ၣ်အဲးစံၣ် လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၆)ဟီၣ်က၀ီၤအပူၤ လၢခံသီအတီၢ်ပူၤတၢ်ဒုးကဲထီၣ်လၢ(KNLA)ဒီးပယီၤသုးတဖၣ်အဘၢၣ်စၢၤအဃိ ဖဲန့ၣ်ပယီၤသုးတကပၤသံ၀ဲ(၉)ဂၤႇဘၣ်ဒိ(၁၁)ဂၤအဂ့ၢ်န့ၣ် KNU ဒူပျာ်ယာ်ကီၢ်ရ့ၣ်ထုးထီၣ်ပာ်ဖျါ၀ဲဖဲတနံၤအံၤလါဒံၣ်စ့ဘၢၣ် ၂၃ သီအနံၤန့ၣ်လီၤႉ ဖဲလါဒံၣ်စ့ဘၢၣ် ၂၁ သီ မုၢ်ထူၣ် ၁၁ နၣ်ရံၣ်ဃၣ်ဃၣ်အဆၢကတီၢ် KNLA သုးရ့ၣ်(၁၈)ႇသုးရ့ၣ်(၂၇)သုးပာ်ဖှိၣ်ဒီးပယီၤသုး(ခမရ-၂၀၁)ႇ(ခမရ-၃၁၀)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်၀ဲဖဲကီးတရံးကီၢ်ဆၣ် ကီးနွဲၣ်သ၀ီ အ့ရှါကျဲမုၢ်ခိၣ်(၂)ဘျီႇ ဖဲန့ၣ်ပယီၤသုးသံ(၇)ဂၤအကျါပၣ်ဃုာ်၀ဲဒီးသုးဒ့ခိၣ်(၁)ဂၤဒီးဘၣ်ဒိ၀ဲ(၈)ဂၤအဂ့ၢ်န့ၣ် KNU ဒူပျာ်ယာ်ကီၢ်ရ့ၣ် ထုးထီၣ်ပာ်ဖျါ၀ဲန့ၣ်လီၤႉ ဒ်န့ၣ်အသိးဖဲလါဒံၣ်စ့ဘၢၣ် ၂၀ သီအနံၤစ့ၢ်ကီး (KNLA)သုးတဒူၣ်ဃီ၀ဲအံၤဒီးပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်(စကခ-၁၃)စုဒုၣ်တီၤအဖီလာ်(ခမရ-၅၄၅ႇ၅၄၆)ႇသုးတြိၤ(၇၇)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်၀ဲဖဲကီတၤကျါ(၁)ဘျီႇမီၤမီထၣ်ဒီးကလါမၣ်စွ့ၤ(၁)ဘျီဒီး ဖဲန့ၣ်ပယီၤသုးသံ၀ဲ(၂)ဂၤႇဘၣ်ဒိ၀ဲ(၃)ဂၤအဂ့ၢ်န့ၣ် ခ့ၣ်အဲၣ်ယူၣ်ဒူပျာ်ယာ်ကီၢ်ရ့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါဖဲလါဒံၣ်စ့ဘၢၣ် ၂၂ သီ ဂီၤခီ ၅ နၣ်ရံၣ်တခီအဆၢကတီၢ် ပယီၤသုးတဒူၣ်ဃီ၀ဲအံၤလၢအနီၣ်ဂံၢ်ကအိၣ်အဂၤ(၁၀၀)ဃၣ်ဃၣ်အံၤ ခီဖျိဟဲထီၣ်တလၢ၀ဲကီးတရံးကီၢ်ဆၣ်ကီးနွဲၣ်သ၀ီအဃိ လီၢ်က၀ီၤသ၀ီဖိတဖၣ်ဘၣ်ယိၣ်လၢတၢ်ဒုးကကဲထီၣ်အဃိဘၣ်ဟးပလဲာ်သးအိၣ်၀ဲအဂ့ၢ်န့ၣ် လီၢ်က၀ီၤတၢ်ကစီၣ်စံး၀ဲအသိးသ့ၣ်ညါဘၣ်န့ၣ်လီၤႉ ဖဲတနံၤအံၤလါဒံၣ်စ့ဘၢၣ် ၂၃ သီအနံၤစ့ၢ်ကီး ဖဲမၠၣ်၀တံၣ်-ကီးတရံးအ့ရှါကျဲတီနီၢ်ထံလီၤဆူကပၤန့ၣ် (KNLA)ဒီးပယီၤသုးအဘၢၣ်စၢၤတၢ်ခးလိာ်သးကဲထီၣ်၀ဲဒံးဒီး ခံခီခံကပၤသံဘၣ်ဒိဘၣ်ထံးတၢ်အိၣ်သးခီန့ၣ်တသ့ၣ်ညါဒံးဘၣ်န့ၣ်လီၤႉ
ပယီၤသုးဟဲက့ၤနုာ်လီၤကဒါဖဲယိၤကျါ(BGF)သုးကလၢၤလၢသုးက့(၁)မၤန့ၢ်၀ဲအံၤ
လါဒံၣ်စ့ဘၢၣ် ၂၂ သီႇ ၂၀၂၁ နံၣ်ႇ ခ့ၣ်အဲးစံၣ် ဘံလ့ကီၢ်ဆၣ်ပူၤ ယိၤကျါသ၀ီ(BGF)သုးကလၢၤတဖျၢၣ်လၢခ့ၣ်အဲၣ်ယူၣ် ဒူသထူၣ်ကီၢ်ရ့ၣ် သုးက့(၁)KNLA ဒီး PDF သုးပာ်ဖှိၣ်တဖၣ်လဲၤထီၣ်မၤန့ၢ်၀ဲ(၅)သီ၀ံၤအလီၢ်ခံ ဖဲမဟါလါဒံၣ်စ့ဘၢၣ် ၂၁ သီ ဟါခီ ၇ နၣ်ရံၣ်ဃၣ်ဃၣ်အဆၢကတီၢ် ပယီၤသုးဟဲက့ၤနုာ်လီၤကဒါ၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ပယီၤသုးဒီး(BGF)သုးပာ်ဖှိၣ်လၢအနီၣ်ဂံၢ်ကအိၣ်အဂၤ(၄၀)ဘျဲၣ်အံၤဟဲတုၤ၀ဲဒၣ်လၢကဆ့ၣ်နီၤအိၣ်ကဒါသ့၀ဲအသိး အ၀ဲသ့ၣ်အံၤအိၣ်ဟဲထီၣ်၀ဲဒၣ်လၢဖၣ်ပူၣ်တကပၤဒီး ပယီၤသုးတဖၣ်အကျါပၣ်ဃုာ်၀ဲဒီး(BGF)အၦၤ(၃)ဂၤအဂ့ၢ်န့ၣ် လီၢ်က၀ီၤ(KNLA)တကပၤစံး၀ဲန့ၣ်လီၤႉ သုးက့(၁)အၦၤသုးဖိတဂၤစံး၀ဲ“အ၀ဲသ့ၣ်ကဟဲက့ၤဆ့ၣ်နီၤကဒါန့ၣ်အတၢ်ပညိၣ်အိၣ်လီၤႉ အိၣ်ဟဲလၢဖၣ်ပူၣ်တပၤႇအ၀ဲသ့ၣ်မ့ဟဲက့ၤဆ့ၣ်နီၤကဒါဒုတၢ်ဒုးကဲထီၣ်သ့မီၤနီၤႉ အနီၣ်ဂံၢ်ကအိၣ်၀ဲဒၣ်(၄၀)လီၤႉ မ့မ့ၢ်ၦၤသ၀ီဖိန့ၣ်က့ၤအိၣ်ကဒါလၢအဟံၣ်အဃီလံ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤပယီၤသုးလၢအဟဲတုၤဖဲယိၤကျါသ၀ီပူၤတဖၣ် ဆီလီၤအသးလၢသီခါဖၠၣ်ဒီးသ၀ီဖိအဟံၣ်ဖီလာ်န့ၣ်လီၤႉ လၢန့ၣ်အမဲာ်ညါ ဖဲတနံၤအံၤဂီၤခီစ့ၢ်ကီးကိးအိၣ်ဖှိၣ်၀ဲလီၢ်က၀ီၤဖိဟံၣ်တဖျၢၣ်တဂၤဒီးသမံသမိးတၢ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ လီၢ်က၀ီၤဖိတဂၤစံး၀ဲလၢ“တဂီၤအံၤကိးသံကွၢ်၀ဲသ၀ီဖိတဖၣ်လီၤႉ တဲ၀ဲလၢတမ့ၢ်အ၀ဲသ့ၣ်ဟဲက့ၤဆ့ၣ်နီၤအိၣ်ဘၣ်ႇ တဲ၀ဲလၢတဘၣ်ဟဲခးအ၀ဲသ့ၣ်တဂ့ၤမီၤနီၤႉ မ့၀ံၤသံကွၢ်၀ဲသ၀ီပူၤအံၤကၠိအိၣ်ဧါႇကၠိသရၣ်မုၣ်အိၣ်ၦဲၤဂၤလဲၣ်ႇကၠိအိးထီၣ်စ့ၢ်ဧါႇခဲအံၤကၠိအိးထီၣ်ဒံးဧါလီၤႉ မ့၀ံၤတအဲၣ်ပလဲၤလၢသုးကလၢၤကပၤဘၣ်ႇတဲ၀ဲလၢကမၤရှဲမ့ၣ်ပိၢ်လီၤႉ ဖဲတဂီၤညါအံၤအ၀ဲသ့ၣ်က့ၤမၤရှဲသုးကလၢၤႇခီဖျိမ့ၣ်ပိၢ်ပိၢ်ထီၣ်အဃိတဲ၀ဲလၢဘၣ်၀ဲဒၣ်အ၀ဲသ့ၣ်အၦၤတဂၤအခီၣ်တစဲးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးသုးရ့ၣ်လၢအဟဲက့ၤလၢယိၤကျါသ၀ီပူၤဖဲမဟါအံၤ တၢ်တသ့ၣ်ညါအနီၣ်ဂံၢ်လီၤတံၢ်လီၤဆဲးဒံးဘၣ် ဘၣ်ဆၣ်သနါက့ ပယီၤသုးတဖၣ်အံၤဖဲအဟဲတုၤဖဲထီးကျီးခံဒီးလ့ခီၣ်ထံးအဘၢၣ်စၢၤအခါန့ၣ် တၢ်ခးလိာ်သးကဲထီၣ်၀ဲဒီးဟီၣ်က၀ီၤ(KNDO)အၦၤတဘျီဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ်(၁၇)သီ ဂီၤခီအဆၢကတီၢ် (KNLA)သုးရ့ၣ်(၁)ဒီး(PDF)သုးပာ်ဖှိၣ်တဖၣ် လဲၤထီၣ်မၤန့ၢ်ယိၤကျါ(BGF)သုးကလၢၤ(၁၀၁၃)သုးရ့ၣ်အခါ (KNLA)အၦၤဘၣ်ဟ့ၣ်လီၤကွံာ်အသးသမူတဂၤအသိး တၢ်ဖီၣ်ချုးန့ၢ်၀ဲ(BGF)အဂၤ ၃၀ ဃၣ်ဃၣ်ဘၣ်ဆၣ် ခီဖျိတၢ်က့ၤပျၢ်လီၤကဒါအ၀ဲသ့ၣ်အဃိ တၢ်ပဲာ်ထံနီၤဖးဟဲအိၣ်ထီၣ်၀ဲအကလုာ်ကလုာ်န့ၣ်လီၤႉ တၢ်ကဲထီၣ်သး၀ံၤအလီၢ်ခံခီဖျိပယီၤသုးဟဲဆှၣ်ဃုသ့ၣ်ညါတၢ်ဒီးကဘီယူၤတစှၤန့ၢ်ဒံး(၃)ဘျီဘၣ်အဃိ လီၢ်က၀ီၤဖိတဖၣ်ဘၣ်ယိၣ်၀ဲလၢကဘီယူၤကဟဲကွံာ်လီၤမ့ၣ်ပိၢ်န့ၣ်လီၤႉ ယိၤကျါသ၀ီအံၤတချုးလၢတၢ်တမၤတၢ်ပတုာ်တၢ်ခးဒံးဘၣ်အခါ ပယီၤသုးနုာ်လီၤဆီလီၤသုးကလၢၤဘၣ်ဆၣ် ဖဲတၢ်ပတုာ်တၢ်ခးအကတီၢ်(BGF)ဟဲက့ၤဆ့ၣ်နီၤအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ဒုးကဲထီၣ်လၢသ့ၣ်ဘီဘိႇလီၢ်က၀ီၤဖိလၢအကထိဃ့ၢ်ထီၣ်ဆူသူမှဲကျိကၢၢ်နံၤ
လါဒံၣ်စ့ဘၢၣ် ၂၂ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤလါဒံၣ်စ့ဘၢၣ် ၂၂ သီ ဂီၤခီ ၈ နၣ်ရံၣ်အဆၢကတီၢ် ခီဖျိတၢ်ဒုးကဲထီၣ်လၢကညီကီၢ်စဲၣ် မၠၣ်၀တံၣ် သ့ၣ်ဘီဘိသ၀ီတကပၤအဃိ လီၢ်က၀ီၤကမျၢၢ်လၢအကထိဟဲဃ့ၢ်ထီၣ်၀ဲဆူသူမှဲကျိကၢၢ်နံၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ လီၢ်က၀ီၤပိာ်မုၣ်လၢအအိၣ်ကီၢ်ကၠီၣ်တဲၣ်တကပၤတဂၤစံး၀ဲ“စးထီၣ်ခး၀ဲဖဲ ၈ နၣ်ရံၣ် ၅ မံးနံးႇခး၀ဲတုၤလၢ ၈ နၣ်ရံၣ် ၃၅ မံးနံးလီၤႉ ကျိချံလီၤတဲာ်လၢကၠီၣ်တဲၣ်တကပၤနါက့အိၣ်ႇ ခဲအံၤလၢကီၢ်ကၠီၣ်တဲၣ်တကပၤနါက့သ၀ီဖိတဖၣ်ဟးပလဲာ်သးအိၣ်လီၤႉ မ့မ့ၢ်သ့ၣ်ဘီဘိသ၀ီဖိတဖၣ်ဟဲဃ့ၢ်ထီၣ်လၢထံကျိကၢၢ်နံၤဒီဒူၣ်ညါလီၤႉ လၢကခီဃီၤလၢအံၤတကပၤအဂီၢ်ၦၤတဟ့ၣ်အခွဲးဘၣ်အဃိဘၣ်အိၣ်ခိး၀ဲဖဲန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ ခီဖျိကညီဖီၣ်စုက၀ဲၤတၢ်ပၢၢ်ဆၢကရူၢ်တဖၣ်လဲၤက၀ီၤပယီၤသုးမီၤစိရိၤအသုးကလၢၤလၢအအိၣ်ဖဲသ့ၣ်ဘီဘိသ၀ီအံၤ အဃိ ပယီၤသုးက့ၤခးလီၤကဒါကျိဖးဒိၣ်တဖၣ်လၢဒူသ၀ီအပူၤတပယူာ်ဃီအဂ့ၢ်န့ၣ် လီၢ်က၀ီၤတၢ်ကစီၣ်တဖၣ်စံး၀ဲန့ၣ်လီၤႉ ခီဖျိတၢ်ဒုးကဲထီၣ်အဃိ သ့ၣ်ဘီဘိလီၢ်က၀ီၤသ၀ီအဖျၢၣ်(၁၀)ဃၣ်ဃၣ်လီၢ်က၀ီၤဖိအဂၤ(၂၀၀၀)ဘျဲၣ် လဲၤဃ့ၢ်ထီၣ်၀ဲလၢသူမှဲကျိကၢၢ်နံၤဒီး အါဒၣ်တက့ၢ်မ့ၢ်၀ဲဖိဒံဖိသၣ်တဖၣ်အဃိ လိၣ်ဘၣ်၀ဲဒၣ်ဂ့ၢ်ဂီၢ်အူဖိသၣ်တၢ်ပီးတၢ်လီႇတၢ်အီၣ်တၢ်အီဒီးကသံၣ်ကသီတဖၣ်အဂ့ၢ်န့ၣ် တၢ်ကရၢကရိလၢအမၤစၢၤတၢ်တဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ခီဖျိတၢ်ဒုးကဲထီၣ်လၢသ့ၣ်ဘီဘိဟီၣ်က၀ီၤပူၤအဃိ ဖဲတနံၤအံၤဂီၤခီအဆၢကတီၢ် ဖလူ-ဆိၣ်ဆံမၠဲၣ်ကျဲတဖၣ်စ့ၢ်ကီးလ့ၢ်ထီၣ်လ့ၢ်လိၤတန့ၢ်လၢၤဘၣ်အဃိ ၦၤဃ့ၢ်မှံဟးဖျိးသ့ၣ်တဖၣ်ဘၣ်အိၣ်ခိးတၢ်ဖဲရီဘၢၣ််ကျီးစ့ၤတံၤကိတၢ်သူၣ်တၢ်ဖျးအလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
KNU ဃ့ထီၣ်၀ဲလၢဘီမုၢ်စၢဖှိၣ်ကရၢကကိးဂ့ၢ်ဂီၢ်အူတၢ်အိၣ်ဖှိၣ်ဒီး ကပာ်ပနီၣ်လ့က့ၣ်ကီာ်လီၢ်က၀ီၤဒ်အမ့ၢ်ကဘီယူၤပူၤဖျဲးအလီၢ်
လါဒံၣ်စ့ဘၢၣ် ၂၂ သီႇ ၂၀၂၁ နံၣ်ႇ ခ့ၣ်အဲးစံၣ် တကီၢ်ခါခဲအံၤလ့က့ၣ်ကီာ်၀့ၢ်သီလီၢ်က၀ီၤလၢတၢ်ဒုးဆူၣ်ထီၣ်၀ဲဒၣ်ကွ့ၢ်ကွ့ၢ်အံၤ ခီဖျိလၢသုးကီၣ်ကးဒုးအိၣ်ထီၣ်ကလံၤကျဲတၢ်ဒုးသုးသ့၀ဲအဃိ ဘီမုၢ်ကရၢစၢဖှိၣ်ကတီခိၣ်ရိၣ်မဲကိးဂ့ၢ်ဂီၢ်အူတၢ်အိၣ်ဖှိၣ်ဒီးပာ်ပနီၣ်လ့က့ၣ်ကီာ်လီၢ်က၀ီၤဒ်အမ့ၢ်ကဘီယူၤဖျဲးအလီၢ်အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဃ့ထီၣ်၀ဲဖဲလါဒံၣ်စ့ဘၢၣ် ၂၀ သီအနံၤန့ၣ်လီၤႉ KNU လံာ်တၢ်ထုးထီၣ်ပာ်ဖျါၦၤကတိၤတၢ်ပၢစီၤတၢ်ဒိၣ်မူစံး၀ဲလၢ “တၢ်မၤကမၣ်ၦၤဂ့ၢ်၀ီခွဲးယာ်တဖၣ်ဒီးဒုးအိၣ်ထီၣ်၀ဲကလံၤကျဲတၢ်ဒုးသုးသ့၀ဲန့ၣ်လီၤႉ ဘၣ်မနုၤအဃိလဲၣ်န့ၣ် ဟဲ၀ဲလၢကလံၤကျါႇဟဲဃုသ့ၣ်ညါတၢ်ဒိဃာ်တၢ်ဂီၤအိၣ်ကိးမုၢ်နံၤဒဲးဃၣ်ဃၣ်ညါမီၤနီၤႉ ကဘီယူၤဟဲဆှၣ်တၢ်အိၣ်သၢဘျီလွံၢ်ဘျီလံႉ ဘၣ်တနံၤနံၤန့ၣ်အိၣ်လၢယဲၢ်ဘျီညါမီၤနီၤႉ တၢ်အဃိန့ၣ်ဒ်သိးဟီၣ်ခိၣ်ဒီတဘ့ၣ်မ့ၢ်ဂ့ၤႇကီၢ်ကၠီၣ်တဲၣ်မ့ၢ်ဂ့ၤကတြီဃာ်၀ဲကန့ၢ်အဂီၢ် ပဃ့ထီၣ်၀ဲလီၤ”အဂ့ၢ်န့ၣ် စံး၀ဲန့ၣ်လီၤႉ ဘၣ်ထွဲဒီးပယီၤသုးသူ၀ဲသုးဂံၢ်ဘါအါအါဂီၢ်ဂီၢ်လၢလ့က့ၣ်ကီာ်၀့ၢ်သီအံၤအဖီခိၣ် KNU လီၢ်ခၢၣ်သးကမံးတံာ်လံာ် တၢ်ပာ်ဖျါအပူၤပာ်ဖျါ၀ဲလၢ လၢတၢ်ကၢၤက့ၤဂၢၤက့ၤသုးကီၣ်ကးအသူးသ့ၣ်လၤကပီၤအဂီၢ် မ်ကထုးက့ၤအသုးဖိသံၣ်ဖိတဖၣ်လၢအိၣ်လၢတၢ်ဒုးတၢ်ယၤကဲထီၣ်တ့ၢ်အသးအလီၢ်ဒီးလၢတၢ်အုၣ်က့ၤခီၣ်က့ၤထံကီၢ်လၢအမ့ၢ်တ့ၢ်လံထံကီၢ်လၢလီၤပအာ်(failed state)အဂီၢ် သုးကီၣ်ကးသုးခိၣ်သုးနၢ်တဖၣ်မ်ကနုာ်လီၤပၣ်ဃုာ်မၤက့ၤတၢ်ဒီးကမျၢၢ်ထံဖိကီၢ်ဖိအဂီၢ်အဂ့ၢ်န့ၣ် ဃ့ထီၣ်၀ဲဒၣ်န့ၣ်လီၤႉ KNU လံာ်တၢ်ပာ်ဖျါအပူၤပာ်ဖျါ၀ဲလၢ ခီဖျိသုးကီၣ်ကးအတၢ်မၤထီဒါၦၤဂ့ၢ်၀ီခွဲးယာ်ဒီး ထံရူၢ်ကီၢ်သဲးတၢ်တူၢ်ခီၣ်ပာ်သးတဖၣ်အဃိ ၦၤလၢအပာ်ဖျါထီၣ်တ့ၢ်အတၢ်ပာ်သးလၢတၢ်မုာ်တၢ်ခုၣ်အပူၤတဖၣ်ဘၣ်တၢ်ဖီၣ်ဒီးတၢ်မၤသံမၤ၀ီအီၤအဃိ ဘၣ်ဃ့ၢ်ပူၤဖျဲးအသးဒီးဘၣ်ဃ့ၢ်အိၣ်ကဒု၀ဲတစိၢ်တလီၢ်န့ၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဟ့ၣ်တ့ၢ်အီၤတၢ်အံးထွဲကွၢ်ထွဲဒီးတၢ်ဒီသဒၢအီၤလီၤအဂ့ၢ်န့ၣ် စံး၀ဲန့ၣ်လီၤႉ တၢ်ဒုးလိာ်ယၤလိာ်သးဖဲလါဒံၣ်စ့ဘၢၣ်(၁၅)သီန့ၣ်ဟဲခီဖျိသးလၢဖီၣ်ဆူၣ်မၤနၢၤ၀ဲၦၤလၢဟဲဃ့ၢ်အိၣ်ကဒုတစိၢ်တလီၢ်တဖၣ်ႇတီၢ်မၤသဘှံးမၤဟးဂီၤကွံာ်ၦၤအဟံၣ်အဃီႇဒီးဟ့ၣ်၀ဲဒုးယၤတၢ်ဆီၣ်သနံးဆူပၦၤသုးဖိသံၣ်ဖိတဖၣ်အဖီခိၣ် လၢတၢ်စုဆူၣ်ခီၣ်တကးကျဲအဃိ ခ့ၣ်အဲၣ်ယူၣ်- ကညီဒီကလုာ်စၢဖှိၣ်ကရၢအိၣ်ဆၢထၢၣ်တ့ၢ်လံ၀ဲလၢတၢ်ပာ်သးလၢအမ့ၢ်တၢ်ပၢၢ်ဆၢဒီတဒၢလီၤသးအဖီခိၣ်န့ၣ်ဘၣ်ကဲထီၣ်တ့ၢ်အသးလီၤအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ လၢန့ၣ်အမဲာ်ညါသုးကီၣ်ကးကအိၣ်၀ဲဒီးတၢ်အၢၣ်လီၤအီလီၤလၢကဂုၤက့ၤအခံလၢတၢ်နုာ်လီၤပၣ်ဃုာ်ပၣ်ဂီၢ်လၢခါဆူညါထံရူၢ်ကီၢ်သဲးအပူၤႇဒီးတၢ်သူူၣ်ထီၣ်ဖဲၣ်ဒရဲၣ်ဒံၣ်မိၣ်ကရ့ၣ်စံၣ်န့ၣ်မ့ၢ်တၢ်စံးဆၢထဲတမံၤဧိၤလၢတၢ်ဃဲၣ်လီၤကျဲၤဘၣ်က့ၤအနံၣ်(၇၀)ဘျဲၣ်ထံလီၢ်ကီၢ်ပူၤတၢ်ဒုးတၢ်ယၤလၢဟဲဆူၣ်ထီၣ်အၢထီၣ်၀ဲအဂ့ၢ်န့ၣ် KNU ဃ့ထီၣ်၀ဲန့ၣ်လီၤႉ ခီဖျိတၢ်ဒုးကဲထီၣ်အဃိကမျၢၢ်ထံဖိကီၢ်ဖိလၢဘၣ်ဃ့ၢ်မှံအိၣ်ကဒု၀ဲအဂၤ(၃၀၀၀)ဘျဲၣ်အမဲာ်ညါ တၢ်ဒုးကဲထီထီၣ်ကဒီးဖဲလါဒံၣ်စ့ဘၢၣ် ၁၉ သီအဃိ ကမျၢၢ်ထံဖိကီၢ်ဖိ အဂၤ(၂၀၀၀)ဘျဲၣ်လၢဘၣ်ဃ့ၢ်အိၣ်ကဒု၀ဲအံၤတဖၣ် ခီဖျိကၠီၣ်တဲၣ်ဟ့ၣ်ကဒီး၀ဲတၢ်ပျဲအဃိပစံးဘျုးဘၣ်စ့ၢ်ကီးကီၢ်ကၠီၣ်တဲၣ်ဒီးမုၢ်လၢ်လၢအ၀ဲသ့ၣ်ကပာ်လီၤန့ၢ်ကဒီးၦၤကမျၢၢ်ထံဖိကီၢ်ဖိတဖၣ်အံၤတၢ်အိၣ်ကဒုအလီၢ်အကျဲအဂ့ၢ်န့ၣ် KNU စံး၀ဲန့ၣ်လီၤႉ လၢန့ၣ်အမဲာ်ညါကညီကလုာ်လၢအိၣ်ဆိးလၢကီၢ်ပူၤကီၢ်ချၢႇကမျၢၢ်ထံဖိကီၢ်ဖိဒီးတၢ်ကရၢကရိလၢအိၣ်လၢထံလီၢ်ကီၢ်ပူၤဒီးလၢထံဂုၤကီၢ်ဂၤတဖၣ်လၢအတိစၢၤမၤစၢၤ၀ဲကမျၢၢ်ထံဖိကီၢ်ဖိလၢအဘၣ်ဃ့ၢ်အိၣ်ကမှံတဖၣ်လၢတၢ်အီၣ်တၢ်အီႇကသံၣ်ကသီဒီးတၢ်ပီးတၢ်လီတဖၣ်လၢဘၣ်ထွဲဒီးတၢ်အိၣ်ကမှံတစိၢ်တလီၢ်အဂီၢ်အံၤသုကတိစၢၤမၤစၢၤအါထီၣ်ကဒီးအီၤဆူညါအဂ့ၢ်န့ၣ် KNU လံာ်တၢ်ပာ်ဖျါအပူၤဆီၣ်တခူထီၣ်၀ဲဒၣ်န့ၣ်လီၤႉ
တၢ်ဒုးကဲထီၣ်လၢမၠၣ်၀တံၣ်-ကီးတရံးအ့ရှါကျဲကီးနွဲၣ်သ၀ီကပၤႇ တၢ်ကးတံၢ်ဃာ်သိလ့ၣ်တၢ်ဟးထီၣ်က့ၤလီၤတစိၢ်တလီၢ်
လါဒံၣ်စ့ဘၢၣ် ၂၁ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤလါဒံၣ်စ့ဘၢၣ် ၂၁ သီ ဂီၤခီ ၁၁ နၣ်ရံၣ်အဆၢကတီၢ် ခီဖျိပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ကရူၢ်တဖၣ်အဘၢၣ်စၢၤတၢ်ဒုးကဲထီၣ်၀ဲဖဲကီးတရံးကီၢ်ဆၣ် ကီးနွဲၣ်သ၀ီကပၤအဃိ မၠၣ်၀တံၣ်-ကီးတရံးအ့ရှါကျဲမုၢ်လၢကီးတရံးတီနီၢ်ကစၢၢ်ခီၣ်ထံးတကပၤန့ၣ်တၢ်ကးတံၢ်ဃာ်၀ဲသိလ့ၣ်တၢ်ဟးထီၣ်က့ၤလီၤတစိၢ်တလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ထွဲဒီးတနံၤအံၤတၢ်ဒုးကဲထီၣ်တၢ်အိၣ်သးအံၤ ၦၤလၢအအိၣ်ဘူးဖဲကီးနွဲၣ်သ၀ီတဂၤစံး၀ဲ“စးထီၣ်ဖဲတဂီၤအံၤ ၁၁ နၣ်ရံၣ်ဃၣ်ဃၣ်န့ၣ် ပနၢ်ဟူကျိဖးဒိၣ်ႇကျိဖိအကလုၢ်သီၣ်လီၤႉ ကဘၣ်မ့ၢ်ဖဲကီးနွဲၣ်သ၀ီအမဲာ်ညါလီၤႉ လၢမၠၣ်၀တံၣ်-ကီးတရံးအ့ရှါကျဲကီးနွဲၣ်သ၀ီကပၤန့ၣ် ပတထံၣ်သိလ့ၣ်ဟးထီၣ်က့လီၤလၢာ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲတဂီၤအံၤ ၁၁ နၣ်ရံၣ်တခီအဆၢကတီၢ်န့ၣ် တနၢ်ဟူလၢာ်ကျိဖိအကလုၢ်သီၣ်လၢာ်ဘၣ်ႇ နၢ်ဟူကဒါက့ၤလၢကျိဖးဒိၣ်အကလုၢ်ဒီး တၢ်ကးတံၢ်စိဃာ်သိလ့ၣ်တၢ်ဟးထီၣ်က့ၤလီၤတစိၢ်တလီၢ်အဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ ခီဖျိတၢ်ဒုးကဲထီၣ်အဃိဒ်တကီၢ်ခါတၢ်အိၣ်သးအသိး လၢမၠၣ်၀တံၣ်-ကီးတရံးအ့ရှါကျဲကီးနွဲၣ်သ၀ီကပၤတီနီၢ်ကစၢၢ်ခီၣ်ထံးန့ၣ် ကါတီၣ်တၢ်ဖိတၢ်လံၤသ့ၣ်တဖၣ်အိၣ်ကတာ်ထီလၢကျဲပူၤဒီး ဖဲထူၣ် ၁၂ နၣ်ရံၣ်အဆၢကတီၢ်န့ၣ် သိလ့ၣ်သ့ၣ်တဖၣ်လ့ၢ်လိၤလ့ၢ်ထီၣ်ကဒါအဂ့ၢ်န့ၣ် သ့ၣ်ညါဘၣ်န့ၣ်လီၤႉ စးထီၣ်ဖဲတလါအံၤလါဒံၣ်စ့ဘၢၣ် ၁၅ သီအနံၤ ခီဖျိတၢ်ဒုးကဲထီၣ်လၢမၠၣ်၀တံၣ်ကလံၤထံးလ့က့ၣ်ကီာ်ဟီၣ်က၀ီၤပူၤအဃိ တၢ်ဒုးဆူၣ်ထီၣ်၀ဲဒၣ်လၢကညီကီၢ်စဲၣ်ပူၤကွ့ၢ်ကွ့ၢ်န့ၣ်လီၤႉ ဖဲစှၤသီအတီၢ်ပူၤအံၤလၢကီးတရံးတကပၤမၠၣ်၀တံၣ်-ကီးတရံးအ့ရှါကျဲမုၢ်ခိၣ်န့ၣ် ပယီၤသုးဒီး(KNLA)သုးပာ်ဖှိၣ်ကရူၢ်တဖၣ်အဘၢၣ်စၢၤတၢ်ခးလိာ်သးကဲထီၣ်အိၣ်၀ဲ(၃)ဘျီလံဒီး ဖဲန့ၣ်ပယီၤသုးတကပၤသံတစှၤန့ၢ်ဒံးအဂၤ(၁၀)ဘၣ်ဒီးဘၣ်ဒိဘၣ်ထံးစ့ၢ်ကီးအိၣ်၀ဲဒၣ်န့ၣ်လီၤႉ
ယိၤကျါသ၀ီဖိတဖၣ်က့ၤလၢဟံၣ်တဘူၣ်ဒံးဘၣ်ခီဖျိဘၣ်ယိၣ်လၢကဘီယူၤကဟဲကွံာ်လီၤမ့ၣ်ပိၢ်အဃိ
လါဒံၣ်စ့ဘၢၣ် ၂၁ သီႇ ၂၀၂၁ နံၣ်ႇ ခ့ၣ်အဲးစံၣ် ကညီဒီကလုာ်တၢ်ထူူၣ်ဖျဲးသုးမုၢ်ဒိၣ်(KNLA)လဲၤထီၣ်မၤန့ၢ်၀ဲ(BGF)သုးကလၢၤလၢအအိၣ်ဆီလီၤသးဖဲဘံလ့ကီၢ်ဆၣ် ယိၤကျါသ၀ီပူၤအံၤအဖီခိၣ် လီၢ်က၀ီၤဖိတဖၣ်ဘၣ်ယိၣ်လၢပယီၤသုးကဟဲကွံာ်လီၤမ့ၣ်ပိၣ်ဒီးကဘီယူၤအဃိ ယိၤကျါလီၢ်က၀ီၤကမျၢၢ်လၢအကထိဟဲက့ၤလၢအဟံၣ်တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးမီၤစိရိၤစုဒုၣ်တီၤအဖီလာ် BGF(၁၀၁၃)သုးရ့ၣ်အသုးလၢၤတဖျၢၣ်လၢအအိၣ်ဆီလီၤသးဖဲခ့ၣ်အဲၣ်ယူၣ် ဒူသထူၣ်ကီၢ်ရ့ၣ် သုးက့(၁)ဟီၣ်က၀ီၤ ယိၤကျါသ၀ီပူၤအံၤ ဖဲလါဒံၣ်စ့ဘၢၣ် ၁၇ သီအနံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၁)စုဒုၣ်တီၤအဖီလာ်သုးရ့ၣ်(၁)ဒီး(PDF)သုးပာ်ဖှိၣ်တဖၣ်လဲၤထီၣ်မၤန့ၢ်၀ဲဒီး ဖဲန့ၣ်ခီဖျိခံခီခံကပၤတၢ်ဒုးကဲထီၣ်အဃိ လီၢ်က၀ီၤသ၀ီဖိသ့ၣ်တဖၣ်တုၤလၢခဲအံၤတစုဘၣ်ဟးစံၣ်အိၣ်ခူသူၣ်ဒံး၀ဲအဖၢမုၢ်န့ၣ်လီၤႉ “တနီၤန့ၣ်က့ၤအိၣ်ႇက့ၤလၢသ၀ီန့ၣ်တမ့ၢ်လၢက့ၤအိၣ်၀ဲဘၣ်ႉက့ၤကွၢ်၀ဲဒၣ်အဟံၣ်အဃီလီၤႉ ဖဲမဟါၦၤက့ၤတနီၤန့ၣ်ဟဲက့ၤကဒါလၢၦၢ်စံၣ်အိၣ်ခူသူၣ်အလီၢ်မီၤနီၤႉ ပနၢ်ဟူလၢပယီၤသုးကဟဲက့ၤထီၣ်ကဒါလီၤႉ ဘၣ်ပျံၤအဒိၣ်ကတၢၢ်လၢပယီၤသုးကဟဲကွံာ်လီၤမ့ၣ်ပိၢ်ဒီးကဘီယူၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲမဟါ(လါဒံၣ်စ့ဘၢၣ် ၂၀)သီအနံၤန့ၣ်လီၤႉ တၢ်ထီၣ်မၤန့ၢ်ဒွဲၣ်အူကွံာ် BGF(၁၀၁၃)သုးကလၢၤ၀ံၤအလီၢ်ခံ ဖဲလါဒံၣ်စ့ဘၢၣ် ၁၈ သီဒီး ၁၉ သီအနံၤန့ၣ် မုၢ်နၤမုၢ်ဆါပယီၤသုးဟဲဆှၣ်တၢ်ဒီးကဘီယူၤတပယူၤဃီတစှၤန့ၢ်ဒံးလွံၢ်ဘျီဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢတၢ်န့ၣ်အဃိယိၤကျါသ၀ီဖိတဖၣ်ဟးစံၣ်ပလဲာ်သးတဖၣ်န့ၢ်၀ဲယဲၢ်သီဃၣ်ဃၣ်လံဒီး တုၤလၢခဲအံၤတစုဘၣ်အိၣ်ကဒုသးလၢသ၀ီအဂၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ တနံၤဃီဖဲတၢ်မၤန့ၢ်(BGF)သုးကလၢၤန့ၣ် တၢ်ခးလိာ်သးကဲထီၣ်ဒီတနံၤညါဒီး လၢန့ၣ်အမဲာ်ညါခီဖျိကတၢၢ်တံာ်(BGF)သုးကလၢၤစ့ၢ်ကီးခးလီၤစၢၤ၀ဲကျိဖးဒိၣ်အဃိ ဘၣ်၀ဲဒၣ်ယိၤကျါသ၀ီပူၤဟံၣ်အဖျၢၣ်(၂၀)ဘျဲၣ်ဒီးထိးတစှၤန့ၢ်ဒံး(၃)ဒုဘၣ်အသိး ခီဖျိကျိဖးဒိၣ်ကလုၢ်အဃိလီၢ်က၀ီၤဖံသးၦၢ်တဂၤဖုးဘၣ်အသးသံကွံာ်၀ဲဒၣ်န့ၣ်လီၤႉ
KNU ဃ့ကညး၀ဲလၢတၢ်တဘၣ်တီၣ်ထီၣ်တၢ်ဒုးတၢ်ကစီၣ်ဒီးတၢ်မၤန့ၢ်သုးကလၢၤတၢ်ဂ့ၢ်တၢ်ကျိၤတဖၣ် လၢ(online)ပူၤချ့သဒံးတဂ့ၤ
လါဒံၣ်စ့ဘၢၣ် ၂၀ သီႇ ၂၀၂၁ နံၣ်ႇ ခ့ၣ်အဲးစံၣ် KNU-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်အပူၤ မ့သ့ၣ်ညါလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၆)ဒီးသုးမီၤစိရိၤအသုးတဖၣ်အဘၢၣ်စၢၤတၢ်ဒုးကဲထီၣ်ဒီး(KNLA)လဲၤထီၣ်မၤန့ၢ်ပယီၤသုးကလၢၤန့ၣ် တဘၣ်တီၣ်ထီၣ်လၢ(online)ပူၤချ့သဒံးတဂ့ၤအဂ့ၢ်န့ၣ် ဒူပျာ်ယာ်ကီၢ်ရ့ၣ် တၢ်ကစီၣ်ဒီးတၢ်ဘိးဘၣ်ရၤလီၤ ထုးထီၣ်ပာ်ဖျါဃ့ကညး၀ဲဒၣ်န့ၣ်လီၤႉ တၢ်ဒုးကဲထီၣ်၀ံၤအလီၢ်ခံမ့ၢ်ဂ့ၤႇတၢ်မၤန့ၢ်ပယီၤသုးကလၢၤ၀ံၤအခါမ့ၢ်ဂ့ၤႇ ဒ်သုးဂ့ၢ်၀ီတၢ်ရဲၣ်တၢ်ကျဲၤအသိး တၢ်မၤလၢ(KNLA)တကပၤကဘၣ်ဆဲးမၤ၀ဲအိၣ်အဃိ သုးဂ့ၢ်၀ီတၢ်ဟူးတၢ်ဂဲၤတၢ်ဂ့ၢ်တၢ်ကျိၤတဖၣ်မ့တီၣ်ထီၣ်လၢ(online)ပူၤချ့သဒံးန့ၣ် လီၤဂာ်ဒ်သိးပဟ့ၣ်ဒုၣ်ဒါတၢ်ကစီၣ်အဃိ တၢ်ဖံးတၢ်မၤတၢ်ရဲၣ်တၢ်ကျဲၤလၢ(KNLA)တကပၤကဘၣ်ဆဲးမၤ၀ဲတဖၣ် ကဲထီၣ်၀ဲတၢ်ကီတၢ်ခဲသ့၀ဲအဂ့ၢ်န့ၣ် လံာ်တၢ်ဃ့ကညးအပူၤပာ်ဖျါ၀ဲန့ၣ်လီၤႉ လၢန့ၣ်အမဲာ်ညါတၢ်ဒုးကဲထီၣ်၀ံၤအလီၢ်ခံ ကမျၢၢ်ၦၤဃ့ၢ်မှံဟးဖျိးလဲၤစံၣ်အိၣ်အလီၢ်တဖၣ် မ့ပာ်ဖျါထီၣ်ဒီးဟီၣ်ခိၣ်ဂီၤန့ၣ် ခီဖျိပယီၤသုးတကပၤပညိၣ်၀ဲၦၤဃ့ၢ်မှံဟးဖျိးဖိတဖၣ်သ့၀ဲအဃိ ၦၤဃ့ၢ်မှံဟးဖျိးဖိတဖၣ်အဂီၢ်တၢ်ဘံၣ်တၢ်ဘၢတအိၣ်၀ဲစ့ၢ်ကီးဘၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ တၢ်ဒုးကဲထီၣ်၀ံၤအလီၢ်ခံပယီၤသုးတကပၤတၢ်ဘၣ်ဒိဘၣ်ထံးမ့ၢ်အါလံဘျီန့ၣ်ညီနုၢ်အ၀ဲသ့ၣ်သူ၀ဲဒၣ်ကဘီယူၤဒီး ကံွာ်လီၤ၀ဲမ့ၣ်ပိၢ်လၢတၢ်ဒုးကဲထီၣ်အလီၢ်ဒီးဒူသ၀ီအပူၤအိၣ်၀ဲအသိး ဒ်သိးအ၀ဲသ့ၣ်ကိးတၢ်မၤစၢၤသုတန့ၢ်လၢအဆိအချ့တဂ့ၤအဂီၢ် တၢ်ဟံးထီၣ်ဖီၣ်ထီၣ်မၤဟီၣ်က၀ီၤတၢ်ဂ့ၢ်တၢ်ကျိၤတဖၣ်မ့၀ံၤမးကရၤလီၤတၢ်ကစီၣ်န့ၣ်ဃ့ကညးအါထီၣ်၀ဲန့ၣ်လီၤႉ စးထီၣ်ဖဲအပူၤကွံာ်လါဒံၣ်စ့ဘၢၣ် ၁၅ သီအနံၤန့ၣ် ပယီၤသုးဃုာ်ဒီးသုးခိးကီၢ်ဆၢ(BGF)ဒီး KNLA-PDF သုးပာ်ဖှိၣ်တဖၣ်အဘၢၣ်စၢၤတၢ်ဒုးစးထီၣ်ကဲထီၣ်၀ဲဖဲသုးက့(၆)ဟီၣ်က၀ီၤ လ့က့ၣ်ကီာ်၀့ၢ်သီဒီးသ၀ီလၢအိၣ်ဘူးဖဲန့ၣ်သ့ၣ်တဖၣ်အပူၤန့ၣ်လီၤႉ လၢန့ၣ်အမဲာ်ညါတုၤလၢခဲအံၤတစုတၢ်ဒုးကဲထီၣ်ဒံး၀ဲဒီး ပယီၤသုးတကပၤသံဘၣ်ဒိဘၣ်ထံးအိၣ်၀ဲအါမးအသိး လီၢ်က၀ီၤကမျၢၢ်လၢအကထိဘၣ်လဲၤစံၣ်အိၣ်လၢတၢ်လီၢ်လၢအပူၤဖျဲးအလီၢ်ဒီးလၢကီၢ်ကၠီၣ်တဲၣ်တကပၤန့ၣ်လီၤႉ
မ့တလၢတၢ်ပာ်ပနီၣ်အလီၢ်န့ၣ်ဟ့ၣ်တၢ်ပျဲလၢကခးလံအဂ့ၢ် KNU သုးက့(၇)စံး၀ဲ
လါဒံၣ်စ့ဘၢၣ် ၂၀ သီႇ ၂၀၂၁ နံၣ်ႇ ခ့ၣ်အဲးစံၣ် ပယီၤသုးမ့ဟဲထီၣ်တလၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၇)ဟီၣ်က၀ီၤတၢ်ပာ်ပနီၣ်အလီၢ်န့ၣ် တၢ်ဟ့ၣ်တၢ်ပျဲလၢကခးလံအဂ့ၢ်န့ၣ် သုးက့(၇)သုးဂ့ၢ်၀ီခိၣ်နၢ်ဒိၣ်ထီတဂၤပာ်ဂၢၢ်ပာ်ကျၢၤစံး၀ဲန့ၣ်လီၤႉ “မ့ၢ်၀ဲလီၤႉ ခဲအံၤဒုလၢဟီၣ်က၀ီၤပူၤန့ၣ်တဘၣ်တၢ်နီတမံၤဒံးမီၤနီၤႉ တၢ်ခဲလၢာ်န့ၣ်ပရဲၣ်ကျဲၤဃာ်လၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဒ်ဟီၣ်က၀ီၤတၢ်ကစီၣ်တဖၣ်စံး၀ဲအသိး သုးမီၤစိရိၤအသုးကျိၤလၢအဟဲထီၣ််၀ဲဒၣ်လၢ(KNU)သုးက့ ၇ ဟီၣ်က၀ီၤအပူၤအံၤ နုာ်လီၤဟံးန့ၢ်အလီၢ်လၢသုးက့(၇)ဒီးသုးက့(၆)အဘၢၣ်စၢၤအသိး သုးကျိၤတဖၣ်နုာ်လီၤစ့ၢ်ကီးလၢလူၢ်ပျဲၢ်ကီၢ်ဆၣ် တန့ဆါဟီၣ်က၀ီၤအပူၤအဂ့ၢ်န့ၣ် လီၢ်က၀ီၤတၢ်ကစီၣ်တဖၣ်စံး၀ဲန့ၣ်လီၤႉ KNU သုးက့(၇)ဟီၣ်က၀ီၤသုးခိၣ်တဂၤစံး၀ဲလၢ “ဟဲထီၣ်လၢအံၤတကပၤခီဒုတအိၣ်ဒံးဘၣ်ႉဘၣ်ဆၣ်ဒ်သိးသုးက့(၇)အံၤလဲၤမၤစၢၤသုးက့(၆)တန့ၢ်တဂ့ၤအဂီၢ် ပယီၤသုးဟဲဆီလီၤသးတၢ်လီၢ် ၃ တီၤလီၤႉ ဟဲထီၣ်လၢထံ၀ၣ်ဘျီတကပၤဒုတမ့ၢ်ဒံးဘၣ်ႉမ့ဟဲထီၣ်ဒုပကမၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤသုးတၢ်ဖ့ၣ်စၢကဲထီၣ်၀ဲဒၣ်လၢ KNU သုးက့(၆)တၢ်ပၢဟီၣ်က၀ီၤ လ့က့ၣ်ကီာ်ဟီၣ်အပူၤ ကွ့ၢ်ကွ့ၢ်ဒံးဒီး ခီဖျိသုးမီၤစိရိၤအၦၤသံဘၣ်ဒိဘၣ်ထံးအါအဃိ သိလ့ၣ်ထးဒီးသိလ့ၣ်လၢအတီၣ်သုးတဖၣ်ဟဲ ထီၣ်၀ဲအါအါဂီၢ်ဂီၢ်ဒီး ဟဲနုာ်လီၤလၢ(သုးက့ ၇)ဟီၣ်က၀ီၤပူၤသ့၀ဲစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ဒ်တကီၢ်ခါသုးဂ့ၢ်၀ီတၢ်အိၣ်သးအသိး ပယီၤသုးတဖၣ်မၤအါထီၣ်သုးဂံၢ်ဘါဒီး ပထံၣ်ဘၣ်တၢ်ဂီၤမူရၤလီၤသးလၢ(social media)အပူၤလၢ သုးမီၤစိရိၤအစုဒုၣ်တီၤအဖီလာ်သုးခိးကီၢ်ဆၢ(BGF)အံၤ အိၣ်လၢပယီၤသုးအိၣ်တကပၤဒီးခးစၢၤ၀ဲကျိဖးဒိၣ်ကျိဖိတဖၣ်အိၣ်၀ဲစ့ၢ်ကီးန့ၣ်လီၤႉ သုးဟံးန့ၢ်ဆူၣ်ကွံာ်တၢ်စိတၢ်ကမီၤ၀ံၤအလီၢ်ခံ လၢ(KNU)သုးက့ဟီၣ်က၀ီၤခဲလၢာ်ဃၣ်ဃၣ်အပူၤ တၢ်ခးလိာ်သးကဲထီၣ်၀ဲဒီးပယီၤသုးႇသုးခိးကီၢ်ဆၢ(BGF)အၦၤတဖၣ်ကိးမုၢ်နံၤဒဲးဃၣ်ဃၣ်ဘၣ်ဆၣ်သနါက့ မ့မ့ၢ်လၢ KNU သုးက့(၇)ဟီၣ်က၀ီၤအပူၤအံၤတုၤလၢခဲအံၤတစုတၢ်ဒုးတကဲထီၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ၦၤဃ့ၢ်မှံဟးဖျိးလၢအအိၣ်တ့ၢ်လၢကီၢ်ပယီၤတကပၤလိၣ်ဘၣ်၀ဲဂ့ၢ်ဂီၢ်အူတၢ်မၤစၢၤ
လါဒံၣ်စ့ဘၢၣ် ၁၇ သီႇ ၂၀၂၁ နံၣ်ႇ ခ့ၣ်အဲးစံၣ် လ့က့ၣ်ကီာ်၀့ၢ်သီဟီၣ်က၀ီၤအပူၤလၢတၢ်ဒုးကဲထီၣ်ဒံး၀ဲကွ့ၢ်ကွ့ၢ်အံၤ ၦၤဃ့ၢ်မှံဟးဖျိးဖိလၢအအိၣ်တ့ၢ် လၢကီၢ်ပယီၤတကပၤတဖၣ်လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီႇတၢ်ခိၣ်ဒုးဒီးယၣ်လုးသ့ၣ်တဖၣ်အဂ့ၢ်န့ၣ် သ့ၣ်ညါဘၣ်လၢၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ တၢ်ဒုးကဲထီၣ်လၢသၢသီအတီၢ်ပူၤအံၤ လ့က့ၣ်ကီာ်လီၢ်က၀ီၤဖိဒီးသ၀ီဖိလၢအိၣ်ဘူးဖဲန့ၣ်သ့ၣ်တဖၣ်အဂၤ(၂၀၀၀)ဃၣ်ဃၣ်ဘၣ်လဲၤဃ့ၢ်ထီၣ်၀ဲလၢကီၢ်ကၠီၣ်တဲၣ်အိၣ်၀ဲအသိး လၢကီၢ်ပယီၤတကပၤစ့ၢ်ကီးၦၤဃ့ၢ်မှံဟးဖျိးဖိအိၣ်တ့ၢ်၀ဲအဂၤ(၁၀၀၀)ဃၣ်ဃၣ်ညါန့ၣ်လီၤႉ လၢတၢ်န့ၣ်အဃိလိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီႇတၢ်ခိၣ်ဒုးဒီးယၣ်လုးသ့ၣ်တဖၣ်အဂ့ၢ်န့ၣ် ၦၤလၢအလဲၤမၤစၢၤၦၤဃ့ၢ်မှံဟးဖျိးဖိတဂၤစံး၀ဲဒ်အံၤန့ၣ်လီၤႉ “ခဲအံၤခီဖျိလၢတၢ်ချံၣ်ဒိၣ်အဃိလိၣ်ဘၣ်၀ဲဒၣ်ဆ့ကၤကလၢၤႇယၣ်လုးႇခိၣ်သခၢၣ်တဖၣ်မီၤနီၤႉ တၢ်အီၣ်တၢ်အီနါက့လိၣ်လီၤႉ တၢ်ဒုးမ့ဆဲးကဲထီၣ်မၢ်မၢ်ဒုလၢပဂီၢ်ဒုတၢ်ကီတၢ်ခဲကအိၣ်ထီၣ်ဖးဒိၣ်ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ စးထီၣ်ဖဲတလါအံၤလါဒံၣ်စ့ဘၢၣ် ၁၅ သီအနံၤန့ၣ် တၢ်ဒုးကဲထီၣ်၀ဲလၢပယီၤသုးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇတၢ်ဒီသဒၢကမျၢၢ်(PDF)သုးပာ်ဖှိၣ်တဖၣ်အဘၢၣ်စၢၤဖဲလ့က့ၣ်ကီာ်၀့ၢ်သီဟီၣ်က၀ီၤအပူၤတပယူာ်ဃီန့ၣ်လီၤႉ ခီဖျိတၢ်ဒုးကဲထီၣ်အဃိ လီၢ်က၀ီၤသ၀ီဖိ(၂၀၀၀)ဘျဲၣ်လဲၤဃ့ၢ်ထီၣ်၀ဲလၢကၠီၣ်တဲၣ်တကပၤအိၣ်၀ဲအသိး လၢတၢ်ဂ့ၢ်အကလုာ်အကလုာ်အဃိလီၢ်က၀ီၤဖိအဂၤ(၁၀၀၀)ဘျဲၣ်အိၣ်တ့ၢ်၀ဲဖဲကီၢ်ပယီၤတကပၤအိၣ်၀ဲအဂ့ၢ်န့ၣ် ၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ တကီၢ်ခါခဲအံၤၦၤဃ့ၢ်မှံဟးဖျိးဖိလဲၤဃ့ၢ်ထီၣ်လၢကၠီၣ်တဲၣ်ပူၤအိၣ်၀ဲ(၂ႇ၅၀၀)ဘျဲၣ်လံဒီး ခီဖျိဖဲမဟါပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢကၠီၣ်တဲၣ်ပူၤအဃိ တကီၢ်ခါခဲအံၤတၢ်လဲၤဆီလီၤက့ၤၦၤဃ့ၢ်မှံဟးဖျိးဖိတဖၣ်ဖဲမဲၢ်ဆီး၀့ၢ်သီခါဖၠၣ်ကရၢၢ်ပူၤဒီး ဖဲန့ၣ်ကၠီၣ်တဲၣ်ၦၤဂ့ၢ်၀ီတၢ်ကရၢကရိအမဲာ်ညါၦၤကီၢ်ပယီၤဖိလၢအအိၣ်ကီၢ်ကၠီၣ်တဲၣ်ပူၤသ့ၣ်တဖၣ််စ့ၢ်ကီးလဲၤမၤစၢၤ၀ဲတၢ်အီၣ်တၢ်အီႇတၢ်ကူတၢ်ကၤဒီးယၣ်လုးသ့ၣ်တဖၣ်န့ၣ်လီၤႉ ၦၤကီၢ်ပယီၤဖိတဂၤလၢအမၤစၢၤၦၤဃ့ၢ်မှံဟးဖျိးလၢအတုၤအိၣ်ဖဲကၠီၣ်တဲၣ်တကပၤတဂၤစံး၀ဲ“ဖဲမုကၢၤပလဲၤလၢသီခါဖၠၣ်လၢၦၤဟဲပာ်လီၤၦၤဃ့ၢ်မှံဟးဖျိးတဖၣ်အလီၢ်မီၤနီၤႉ ပလဲၤဆှၢတၢ်ဖိတၢ်လံၤလၢအလိၣ်၀ဲသ့ၣ်တဖၣ်မီၤနီၤႉ ဘၣ်ဆၣ်ပလဲၤနုာ်လီၤလၢၦၤဃ့ၢ်မှံဟးဖျိးဖိအိၣ်အလီၢ်တန့ၢ်ဘၣ်ႉ တၢ်ဖိတၢ်လံၤလၢၦၤဟဲမၤဘူၣ်လီၤတဖၣ်န့ၣ်ဘၣ်ပာ်တ့ၢ်ဖဲသီခါဖၠၣ်န့ၣ်လီၤႉ ပတယးဒုၦၤအိၣ်ဖဲအံၤတဖၣ်အဘၣ်ဂီၢ်လီၤႇပဘၣ်ယိၣ်တၢ်လၢၦၤအိၣ်တ့ၢ်လၢန့ၣ်တကပၤအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါဒ်တၢ်အိၣ်သးခဲအံၤအသိး လ့က့ၣ်ကီာ်၀့ၢ်သီဟီၣ်က၀ီၤဃုာ်ဒီး ခ့ၣ်အဲၣ်ယူၣ်သ့က့(၆)သုးရ့ၣ်ဟီၣ်က၀ီၤတနီၤအပူၤတၢ်ဒုးဟဲကဲထီၣ်၀ဲဒၣ်န့ၣ်လီၤႉ လၢန့ၣ်အမဲာ်ညါပယီၤသုးတကပၤမၤအါထီၣ်အသုးဂံၢ်ဘါကွ့ၢ်ကွ့ၢ်ဒီး ခ့ၣ်အဲၣ်ယူၣ်ဟီၣ်က၀ီၤလၢအဂၤတဖၣ်စ့ၢ်ကီး ပယီၤသုးတဖၣ်အိၣ်ကတဲၤကတီၤထီၣ်သးလၢတၢ်ဒုးအဂီၢ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ဒုးကဲထီၣ်လၢဘံလ့ကီၢ်ဆၣ် ယိၤကျါ(BGF)သုးကလၢၤတၢ်လီၢ်
လါဒံၣ်စ့ဘၢၣ် ၁၇ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤဂီၤခီအဆၢကတီၢ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ဒူသထူၣ်ကီၢ်ရ့ၣ် သုးက့(၁)ယိၤကျါသ၀ီအပူၤ တၢ်ဒုးကဲထီၣ်၀ဲဖဲပယီၤသုးစုဒုၣ်တီၤအဖီလာ်သုးခိးကီၢ်ဆၢ(BGF)အသုးကလၢၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲတနံၤအံၤလါဒံၣ်စ့ဘၢၣ် ၁၇ သီ ဂီၤခီ ၅ နၣ်ရံၣ်ဃၣ်ဃၣ်အဆၢကတီၢ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အၦၤလဲၤထီၣ်ခး၀ဲ(BGF)သုးကလၢၤလၢအအိၣ်ဖဲယိၤကျါသ၀ီပူၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ တကီၢ်ခါခဲအံၤခီဖျိတၢ်ခးလိာ်သးကဲထီၣ်အဃိ ယိၤကျါသ၀ီဖိအမဲာ်ညါသ၀ီလၢအိၣ်ဘူးဖဲန့ၣ်သ့ၣ်တဖၣ်စ့ၢ်ကီး ဘၣ်ဃ့ၢ်ပူၤဖျဲးသးအိၣ်၀ဲအသိး တနီၤန့ၣ်နုာ်လီၤစံၣ်အိၣ်၀ဲလၢတၢ်ပူၤစ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ “စးထီၣ်လၢဂီၤခီတုၤလၢခဲအံၤစံၣ်နုာ်လီၤအိၣ်လၢတၢ်ပူၤလီၤႉ က့ၤထီၣ်လၢဟံၣ်ပူၤတဘူၣ်ဒံးဘၣ်ႉ ခး၀ဲကျိဖးဒိၣ်တဖၣ်လီၤႉ ခဲအံၤပနၢ်ဟူလၢၦၤမၤန့ၢ်သုးကလၢၤလံလီၤႉ တုၤလၢခဲအံၤခးလိာ်သးတပတုာ်ဒံးဘၣ်ႉ ခး၀ဲပူၤထံၣ်ပူၤထံၣ်ဒံးႇလၢသ၀ီပူၤဒုတနီၤန့ၣ်စံၣ်လံႇမ့မ့ၢ်ၦၤပိာ်ခွါတဖၣ်န့ၣ်အိၣ်တဘူၣ်လၢၤဘၣ်စံၣ်လၢၤလံ”အဂ့ၢ်န့ၣ်် လီၢ်က၀ီၤဖိတဂၤစံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤ(BGF)သုးကလၢၤလၢအအိၣ်ဖဲယိၤကျါသ၀ီပူၤအံၤ (KNLA)တကပၤလဲၤထီၣ်ဟံးန့ၢ်ကွံာ်၀ဲလံဒီး ခံခီခံကပၤတၢ်သံဘၣ်ဒိဘၣ်ထံးအိၣ်၀ဲဒၣ်န့ၣ်လီၢ်က၀ီၤဖိတဖၣ်စံး၀ဲဘၣ်ဆၣ် ခ့ၣ်အဲးစံၣ်-ကညီတၢ်ကစီၣ်ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်န့ၣ်လီၤႉ လၢန့ၣ်အမဲာ်ညါခီဖျိခံခီခံကပၤတၢ်ဒုးကဲထီၣ်အဃိ ဟံၣ်တဖၣ်ဟးဂီၤ၀ဲအိၣ်အသိး ခီဖျိကျိဖးဒိၣ်လီၤတဲာ်လၢသ၀ီပူၤႇကျိကလုၢ်သီၣ်ဒိၣ်အဃိ ဖံသးၦၢ်တဂၤဖုးဘၣ်အသးသံကွံာ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ စးထီၣ်လၢတၢ်ဒုးကဲထီၣ်ဖဲတဂီၤအံၤဂီၤခီ ၅ နၣ်ရံၣ်တုၤလၢမုၢ်ထူၣ်အဆၢကတီၢ် တၢ်ဒုးဆဲးကဲထီၣ်ဒံး၀ဲကွ့ၢ်ကွ့ၢ်အသိး ကတၢၢ်တံာ်(BGF)သုးကလၢၤလၢအအိၣ်ဖဲသုးက့(၅)ဟီၣ်က၀ီၤ ဖၣ်ပူၣ်ကီၢ်ဆၣ်ပူၤတဖၣ် ခးလီၤစၢၤ၀ဲ(BGF)သုးတဖၣ်အံၤလၢကျိဖးဒိၣ်အိၣ်၀ဲစ့ၢ်ကီးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ (BGF)သုးကလၢၤလၢအအိၣ်ဆီလီၤသးဖဲမိၣ်ကီၢ်စဲၣ် ဘံလ့ကီၢ်ဆၣ် ယိၤကျါသ၀ီပူၤအံၤ မ့ၢ်သုးကလၢၤတဖျၢၣ်လၢဆှၢထီၣ်တၢ်အီၣ်တၢ်အီလၢသုးဖိတဖၣ်အဂီၢ်ထီဘိဒီးဆီတလဲအၦၤထီဘိလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ်အခါစ့ၢ်ကီး ဖဲပယီၤသုးဒီး(BGF)သုးပာ်ဖှိၣ်တဖၣ်လဲၤဆှၢတၢ်အီၣ်တၢ်အီလၢယိၤကျါသုးကလၢၤအံၤအခါ ကိးမၢ၀ဲလီၢ်က၀ီၤဖဲန့ၣ်အပူၤပိာ်မုၣ်ပိာ်မၢၤဒီးလီၢ်က၀ီၤဖိတဖၣ်ဒ်တၢ်ဒီသဒၢစုက၀ဲၤတခါအသိးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ